معتقل الصحراء الفصل الرابع وخمسون 54 - بقلم أم مختار

صباح الحب قراءة ممتعة لا تنسون التصويت و التعليق
البارت ٤١٠٠ كلمة

#معتقل_الصحراء ٤٥
#بقلم_ام_مختار
#دنيا_غانم

سائد _يا اهلاََ وسهلاََ
بس شلون عرفتني اني سائد واجيتني احنه مشفناك بالعزومة

_ ها... لا مو الوالد جان وياي وگلي هذا سائد الحجيتلك عنه بس اني نزلت اريد اروح السوگ السمج وحبيت اسلم عليك الوالد حجالي عنك هواي

سائد _لزمت ايده و گتله ان شاء الله الحجي حلو علينه

_لااا مدحلي بيك هواي

سائد _هههههه الله يحفظه الك ترخصت منه و صعدت الباص واجه صليل وراي يركض
عفنه البنات ورانه و گتله هذااا وليد مووو ابن اميررر

صليل _شصاير

سائد _حجيتله الي صار
و گلي شلون عرفته مو ابنه

_ من سألته هذوله كل عائلتك شگلي گال اييي هذوله ولدي وبناتي هذااا منين طلع
لو هذااا صدگ ابنه ع الاقل جان گال عندي بعد ولد بس ما موجود صح لو اني غلطان

صليل _والله ما اعرف شگلك يعني بشنووو شاك انت

سائد _ ما ادري ما مرتاح هسا خلينه نرجع يم البنات ولا تحجي كدامهن شي لا يخافن

صليل _اكيد ما احجي

مناسك _رجعنه للشقه الولد ميتين جوع وهمه ما ياكلون حي الله اكل يردون اكل دسم
تشريب باقي من الغده تمن ومرگ مشاوي
ما يتبطرون اذا نسوي شي بسيط بس سائد يگول التشاريب اطيب
حميتله تشريب و تمن و گليت اللحم و سويت زلاطه اكلو ودخل يسبح دخلت للغرفه لبست بلوز شوي طويل وي الركبه و فتحت شعري و خليت مكياج خفيف كلش و گعدت اگلب بالتليفون الحد ما طلع من الحمام
نعيماََ

_الله ينعم عليج شنو هل تشيرت الحلو

_اشتريته قبل كم يوم حلوو عليه

_بالعافيه تقربت منها بستها من شحمة اذنها
انتِ كلشي يلوكلج شنوو مطوله اليوم بلزمة التليفون ذبي وتعااي

_وين اجي

_تعاي على صدري اخليج

_ ما اريد

_ليش

_تعبانه اليوم

_ اي عادي واذا تعبانه انتِ تعبي و اني اسوي الي اريده

_لااا هيج انانية حرام عليك اني تعبانه وانت تجبرني

سائد _ هووو اني اگدررر اجبرج
تعاي بس نامي بحضني ما اسوي شي

_اكيددد

_اكيددد بس شلون تردين مني طفل و انتِ يوميا تعبانه

مناسك _شهكت هاي اول مره اگول تعبانه سويتها يوميا

_تعااي تعاي اشاقه وياج ابوية انتِ

_ نمت على صدره وبأيده طوق رگبتي و ضغط حيل اكسرررها الهل رگبه

_يهووون عليك تكسرها

_ اذا جرت عدل لا ما يهووون بس اذا عادت سالفه من سوالفها المكسره وداعت كل بوسه نطبعت بيها اكسرها وما يرفلي جفن

_قاسييي تبقه تلمح وتعير هم

سائد _ اني لوو قاسي مو اليوم نايمه بحضني و متربعه بصدري وتحكمين الجبل النايمه عليه
بسس كلشي مباح الا الخذلان نيزك

_يابه والله ما تنعاد

_اني اذكر ان الذكره تنفع المؤمنين يا مؤمنه

مناسك _ يگولون غلطة الشاطر بالف
الا غلطتي بعمررر

_ووووين رحتي

_وياك وين رحت قابل

سائد _ بعد اقل ال ١٥ يوم يخلص العقد و ونروح الاوسلوو

مناسك _بس اني هنا مرتاحة هواي

سائد _ جاهد ما عنده غيرنه دتشوفين وضعه هو وزوجته كل يوم اسوأ ما اگدر اتركه و اني بدونه هم ما اگدر علاقتي بالولد مو علاقة صديق ولا اخ لاااا نسواني هذول

_هههههههههه صرت مثل صليل

_لا يابه هذك ابو السان وين اگدرله بس و الله جاهد يتخبل اذا بقينه هنا اني ادري بيج انتِ مرتاحة هنا بس الوحدة تكتل
وجاهد جاي يعيش الوحده و هو متزوج وويا طفله مريضه

_مو شكال نروح هذا هو

_هناك نأجرلنه شقه ونعيش بيها اني وياج بس

_عبالي راح تگول شقه وكلنه نعيش بيها هههههه

سائد _لااا مو الهاي الدرجة كل واحد ببيته يحكم و يأمر وينهي ويلبس وياخذ راحته

_شنو ناوين تسون من نروح الاوسلو بهاي الفلوس

_فلوس الشغل؟؟

_اي

_هاي كلها الجاهد الفلوس احنه جاي نصرف بس اكل وشرب تره احنه من اجينه كرستيان ساند بس الخاطر جاهد المبلغ زين و يگدر يعالج بنته

_هاا يعني ما تاخذون منهن شي

_لااا هنه هواي بس هو يگول اني اريد دكتور شاطر يسوي عملية بنتي ما اريد يبقه بوجهه اثر وتالي تكبر و يضحكون عليها لو تخجل منه اريد بنتي مثل اي طفل تعيش ما اريد واحد يغثها

_ الله يسهل هاي العمليه و يفرح ببنته

سائد _ امين

_ما تحجيلي عن السنه البقيت بيها وحدك شنوو سويت

سائد _اذا قصدج شنو سويت علمودج ما سويت شي ولا حرررركت ساكن

_يعني ما اشتاقيتلي

سائد _ماكو گلب يحب وما يشتاق
بس ماكوووو شي يذلني ولاااا يكسرني بعدددد
وخاصه امييي راحت

_يعني اني مو مهمة عندك

_لااا مهمة بس مو تبيعيني وتگولين مهمه ومو مهمه اني المهم العندي كون اكله موووت يموت

_اهووو ولا احب هذا حجيك

سائد _لزمت فجهه بقوه ودرت راسها عليه اولاََ اهوووووو ما اريد اسمعها ثانياََ
حجيي ما تحبي لأن تحسين بتأنيب الضمير
اما گلبييي صاير مرسى السفنيتج الرست وما راضيه تقلع منه

_ما احب هذا الغزل المو واضح

_ انطيني ايدج

_خليت ايدي بأيده فتح اصابيعي الضعاف وباسها من باطنها
سفينتج هيه گلبج رسى يعني سكن بگلبي
و ما راضي يقلع منه يعني انتِ خلاص تمكنتي مني من زمان

_من شوكت سائد؟؟

_ من صرتي وره الاء وگلتي عليك بستر زينب
الانسان مووو غبي عنده سرعة بديهيه بسرعة يلكفها واحنه والمكان الجنه بي و العشر سنين الخلصناها شفرات ورسائل تحتم علينه نعرف البشر وهااا خاف تگولين لعد ليش بقيتو عشر سنين بالسجون
اني بقيت لأن حبي الامي كسرني
و صليل يخاف يطلع لأن يگلج اني امي وابوي غدروني الي همه لازم يكونون مصدر اماني
و جاهد شنوو امي جابه صياح هلكدوته جنه دجاجة مهلسه ومن شافنه ورفض يبقى وما طلعه صياح بجة رغم هو اكبر من عدنه بس هاي حقيقة
بجه و على الشافه هسا يمكن لو واحد من عدنه يموت ما يبجي بعد هههههههه

_اسم الله لا تگول هيج

سائد _خلي ارجع اكمل وبعدين اعقب على هاي الاسم الله من وكفتج وخوفج وحالتج حسيت انتِ اكو سر وراج بس مو معناها صدگتج لأن احنه ما نثق أبني بشر

_اهووووو شگد اكره هاي الكلمة

_انييي شنووو گلت مووو گلت ما نگول اهووو

_ولويش ما اگول اهووو
واني داگولها باس شفايفي و عيونه بعيوني

_لأن شفايفج تنمد واني ما اتحمل ما اخذهن
وما اضوگهن

_.....

_بشرفج لا تستكين ما عولت كمتي تعرفين تحجين

_كمل كمل حباب استحي من تحجي هيج

_ ولج كل مسامه بيج بستها هسااا صرتي تستحين

_سائد حباب لا تگول هيج يعني انت مو زوجي لازم تبوسني مو شي حرام

سائد _نيزك تره اجيبج بكف افره الوجهه فررر
مستحية من شنووو
تره هسا اكوم امشي مصلخ

_ايييي انت مشهودلك بالكف

_توجعتي بيومها مووو

_يعني انت ما شفتني وراها بيوم شلون وجهي ورم

سائد _حمدي الله وشكري طلعت غضبي بهاي الطريقة احسن ما كتمت و كرررهت

_يعني انت كل ما راح تعصب تضربني بحجة هاي طريقتك

_ بقيتي وياي شگدددد بسوريا دستييي ابطنييي دوووووس وما فتحت حلگي بس مو معناها تجين عليه واني ما احرك ساكن
و ساعة الاتخبل عليج غصباََ ما عليج تتحمليني

_ما اتحملك ولو ضربتني مره لخ اشتكي عليك

_ راح اسوي روحي ما سمعتج حتى لا ارد رد يزعلج وگليلي شنو تردين احجيلج

_احجيلي قبل لا ندخل معتقل الصحراء شنو جنت تسوي

_شنو جنت اسوي كل اسبوع تجيني وحده اخلص وياها الاريده وانتهى

_ما جانت تلعب روحك

_ تلعب روحي واكو بيهن ما اتقربلهن و اكو بيهن يجن وصخات ونسبحهن مثل حضرتج

_هااا هااا شكوو لا تجيب حضرتي على السانك يااا زير النساء

_ تعاي حبيتج و انتِ بعز وصخج

_هههههههه والله جنت ابقه وصخة الخاطر لا يتق..... خله ايده على گلي و گلي اشششش

سائد _انسي الصار ولا تذكريني بي حتى لا يصير عقبة بيوم من الايام بحياتنه

_حاضر

_هسا اعيد سؤالي شنو تردين احجيلج

_اكو جانت ويانه بنيه بسجن الينابيع هيه حارس تسمها ساران تعرفها

_اييي جانت توصلي اخبارج

_اختفت شنو صارلها

_كتلها صياح

_الله ياخذه الصياح

_اخذه وراح

_منو گلك مو لعبه من عدنان؟؟

_لااا انا جنت متفق على موته
بقه يحجيلي كلشي ساعة انصدم وساعة ابجي وساعة اضحك وساعة اكله بطل وساعة اكله انت شنوو من گلب شايل
وخفت منه وگتله اليوم ما انام يمك

سائد _ اي لا تنامين يمي نامي فوگي

_شووو صاير ما عندك ستوب

_والله انتِ الي ما عندج ستوب انا كلت نامي فوگي تفكيرج وصخ شسوي

_هههههههه خوش تفرها عليه من ايام السجن هيج تسوي

هذاك القائد وله وراح وبقه بس سائد
سائد الي يريد يعيش مثله مثل اغلب الناس بيت وزوجة واطفال و عمل انتهت ما اريد اكثر

_واذا الله ما رزقنه اطفال
الوجهه كله تغير معاني من سألته

_ليش هيج تگولين مو رزقنه بعز الحرام الانا بي
ليش هسا من صرت انسان صالح وتوجهت اله ما يرزقني

_گلت لو

_لا تگولين هاي الو ما احبها

_شنو تسمي اول طفل الك

_اذا بنيه عائشة و اذا ولد عمر

مناسك _رفعت حاجبي وليش بالله هاي

سائد _مو انا اعرف راح ينط عندج العرگ الطائفي وراح تجيبين طفل لخ واذا بنيه نسميها زينب واذا ولد نسمي علي

_ههههههه تلعب بعصابي انت لو شنوو

_اريد هواي اطفال وهاي افضل طريقة لوو عندج اعتراض

_لا بس بشرط اساعدني بيهم

سائد _اييي شكو بيها نساعد
انا اجيب فلوس و انتِ ربيهم هاي افضل مساعده

_هههههههههههه
واستمرينه بهاي النقاشات و ساعه نطلع الطائفية الحلو الي بيناتنه وساعة كل واحد يمجد بمذهب الثاني وساعة يگول خلي المذاهب على صفحة وتعاي حبيني حب يهودي

_هاي شنوو هنوب

_مو اليهود يحبون بتملك حبيني بتملك

_اني امووووت بيك

_حترك ابووو الي التعبان الي ما اتقربله
.........

ايام واجاني اتصال من الحسينيه بمناسبة ولادة احد الائمة
سائد عزموك تحب تجي ويانه

سائد _نجي شعدنه

صليل _واحنه شنو وهابية محد يخابرنه ويعزمنه

مناسك _بالعكس عزمو الكل ترحون؟؟

مياسه _اييي نروح نرووح

صليل _واذا اني ما اقبل ترحين شوو انتِ گبل نروح

مياسه _ اشتريلك كيكة واروح

صليل _لا اذا هيج روحي قابلين

سائد _الله يرحم شفرات المعتقل و الكلام الخاص
هسا صار اشتري كيكة

صليل _نعله على شرف صياححح

مناسك _ لازم تعلمني شفراتكم

سائد _اعلمج تدللين

مناسك _جاب كيكة كامله و جاب عصاير
و صليل جاب حلويات نوع ثاني و ماي اخذنا ورحنه للحسينيه همه اخذو قسم الزلم واحنه للنسوان وزعنه وزاد على گد ما جابو
تونسنه وصفكنه وهلهلنه خلصت الملايه و الملايه قرأة دعاء بنيه شفاء احد ابناء المسؤولين عن الحسينيه اني هم دعيت الليلو ربي يشافيها ويسهل عمليتها وبقينه نحجي بيناتنه بالحسينيه عن حالتها اني ومياسين واكو مره شاركتنه الحديث بعد ما سمعتنه گالت الدكاتره بالهند كلش ممتازين
ودوها للهند وما تخسرون بنت اخويه مثله حالتها و هسا لو تشوفوها تتعجبون كل اثر ماكو

مناسك _ وشگد طولت العمليه ونجحت بأول مره حجيلي كلشي خاله

_لا مو عمليه وحده لازم اكثر
وهم ما اعرف كل تفاصيل تردين انطيني رقم ابو البنيه انطي الاخويه ويتواصل ويا

ياريت انطيتها الرقم وگتلها
بس كون بأسرع وقت لأن احنه مستعجلين

_تدللين

بس خلص المولود خابرني سائد وطلعنه متونسين

ساعة ١١ بعد ساعة وتوقف الباصات وگفنه بنص السنتر والولد فرحانين وبعدهم يصفكون ويقرون بالاناشيد الي تغنت وملتهين واحد يمازح الثاني اني گاعده بردانه تعدت من الجههة الثانية رحمة ولازم بأيدها وليد اني همست المياسين تشوفهم ما ردت الولد يشوفوها وتصير مصيبه

مياسه _شوفي الوياها ما يجي ظفر جاهد

مناسك _الوياها وليد الي شفنا بموقف الباص ابن اخو حبيب

_شجابه هذا عليها

_وين ادري روحي سأليها غابت عن نظرنه واحنه بعدنه نباوع الجهتها والف سؤال براسنه

صعدنه الباص ونطلق الشقتنه
بس دخلنه جاهد خابر الولد يطمن عليهم سائد حس بصوته اكو شي

سائد _شبيك

جاهد _ماكو شي بس ردت اطمن عليكم

_احنه زينين انت صوتك شبي شو احسك ضايج

_لا ماكو شي بس مشتاقلكم
وطولت سفرتكم

_ما بقه شي كلها ١٥ يوم وينتهي العقد بنفس اليوم اجيلك

جاهد _ اي و الله ياريت اوسلو و حياتي لا شيء بدونكم

سائد _ تدلل سديت الخط منه ما طمنت صاحبي واعرفه
لموو جنطكم

مناسك _وين؟؟

_الصبح نروح ناخذ رخصة من الشغل ٣ ايام نروح نشوف جاهد ونرجع

مناسك _اني قبل فتره اخذت ٣ بقتلي بس ٣

_مو شكال اخذيهن هيه ايام ونخلص

طلعنه الصبح اخذنه اذن ال ٣ ايام من العمل سائد و صليل راحو للمحطة يشوف حجوزات اوسلو
واحنه رجعنه للبيت نرتب امورنه

اتصل تليفوني باوعت زوجة حبيب
جاوبت الو السلام عليكم

زوجة حبيب _وعليكم السلام وصباح الخير
يابه شنو امس شنو هل جمال شنو هل نزاكة

_حبيبتي من ذوقج

_ اكلج امس سمعت بالحسينيه عن بنت صديق زوجج خطية عدها شفة الارنب

_ايي والله

_ اكو دكتور نعرفه فددد شاطر يابه العمليه كلها تختفي ما تبقالها اثر والطفل ترجع صحته مثل اي طفل ثاني و هم هيه تأثر على الاذن هو هم يشوف اذا اكو مشاكل بالاذن والسمع دكتور ايده والعافيه

مناسك _ صدگ والله ياريت خطيه ابوها گلبه نار عليها و يريدها من تكبر ما تبين العمليه و يضحكون عليها

_هو هذا الطبيب يشتغل هم عمليه هم تجميل انصحكم بي تردين اجيبلج رقمه لو تدزيلي رقم ابوها يتواصلون ويا الولد ووي الدكتور هم يهتم بيهم اكثر

مناسك _ لا لا هسا ادزلج رقم جاهد و گلوله واحنه هم هسا رايحين اله الاوسلو و انطي خبر

_خوش

_سديت الخط منها خابرني سائد گال تعالو للمحطة ساعتين ويطلع قطار اوسلو
اخذنه جنطنه وطلعنه وصلنه للمحطة
ضجت هذا الطريق ما احبه اكبر غلط سويته بحياتي وهذا الطريق جان شاهد
سائد حس بيه گلي تذكرتي

_شنو تذكرت
يأشرلي بأصابيعه وهو يگلي درب الفلته

_اييي تذكرت

_اييي خوش لا تنسين

_لا ما انسه
انطلقنه الاوسلو و جاهد ما يدري بس دخلنه المحطة رجعت كل الذكريات السيئة
اخذنه الباص و ورحنه البيت جاهد همه يندلون احنه كلشي ماكو هنا بس لغتنه تمام
دگينه الباب وفتحه جاهد من شافنه ضحك

جاهد _والله بوقتهاااا

مناسك _ذبو الجنطه الجانت بأيديهم وحضنو صاحبهم مثل اليحضن حبيب مفاركة سنين
حضن يكسر الظلوع

سائد _عمييي طك كلبي بعد ما اكدررر

جاهد _ كل الهلا يابه

صليل _ هلااا ببت الكوا... ها شو موصخة نفسها شصاير

جاهد _داوكلها

سائد _لعد كارينا وين

_طالعه

_هاا تمام

مناسك _اخذنه ليلو مسحنه حلكها ووكلناها وبدلنالها الملابس الصايره عباره عن اكل
مسحنه الارضيه ما يعرفلها جاهد وهيه شوي صعبه يراد انسان متمكن من حالتها

سائد _جاوبني ع سريع طالعه لو مغادره البيت بدون رجعه

جاهد _ موبدون رجعه بس الاخت تريد تروح سفره اسبووع وي اصدقائها

_هاا تمام الله يسهل امرك

صليل _حجالك ومااا نرديت

سائد _علي كيفج صوله شنو اخر المطاف مثل ما قندرنه الاولى نگدر نقندر الثانيه صحححح لو انيي غلطططططان

جاهد _ ونختمها بعد اربي بناتي و اعيش الهن

سائد _جايتلك بنيه؟؟

_ايي جايتني بنوته ثانيه

_ههههههه الف الحمد لله

مناسك _ اعتذر ادخل بسوالفكم بس انت اگعد وياها اذا ما وصلت الحل نفصل لويش هيج عايش

_ خلي تولد واگعد وياها لأن حالياََ هيه شنو نحجي وصاحت نفسيتي

_الله كريم ولا ينشغل بالك احنه يمك ليلو جيبها يمي اني اهتم بيها

مياسه _واني اخذ البنيه الثانيه وروح انت عيش حياتك

جاهد _ههههههههه والله خوش فكره

مناسك _رجعتله ضحكته و رغم تعبنه بس ما گدرنه ما نطبخ الاكل العراقي الي يكمل جمعتنه سوينه سمج شوي و تمن وهاي السوالف الي تزين الصينيه
وگعدنه ناكل ونضحك خلصنه الاكل سوينه جاي
خطيه جاهد نخبص هنا القوري هنا الشكر هنا الكوابه هو يوجهه واحنه نسوي
واحنه دنشرب الجاي اتصل تليفون الجاهد
رد و طلع من الهوسه
قرابة العشر دقايق ورجع

جاهد _ اكو ناس تعرفيهم مناسك خابروني بخصوص مسوين عمليه البتهم حالتها مثل حالت ليلو

_ايييي هاي مره بالحسينيه گلتلي
اني ما اذكرت بوقتها زوجة حبيب ولا اجت ببالي

جاهد _الولد يگول الدكتور كلش شاطر كل اثر ما يبقه

سائد _حلو اذا تمام ليش لا بس وين هذا الدكتور

مناسك _گال بأحد الدول المجاوره للعراق
استغربت بس المراه گالت بالهند
گلت يجوز هم ما تعرف ناسيه وعبالها بالهند

سائد _ بس نستلم الراتب بربطة المعلم كلنه نروح
هم سياحة وهم وياك

جاهد _ والله ياريت تجون كلكم وياي اني من هسا خايف عليها اذا يدخلوها العمليه واني ابوحدي امووت

مناسك _اسم الله عليك نجي ليش لا اني ما اترك ليلو

مياسه _واني هم وياكم

صليل _واحنه نروح هيج زواده العبد الساده

سائد _ههههههههه ركعته على ظهره انت منين جبت هذا عبد الساده

_اذكرت فد مره بگهوه قدو گالوها وهسا اجت ببالي

جاهد _بعزز الكتل هو يطلع گهاوي

سائد _ اله نفس هههههههههه

مناسك _ ثاني يوم الصبح بعدني نايمه گال سائد اني طالع شوي وارجع

_وين رايح.

_رايح للمقبره

_اخذني وياك

_بيج؟

_اييي هسا بس ابدل واجي لبست ع سريع وطلعنه اني ويا اخذ ماي من البيت واشتره ورد وطلعنه للمقبره
سائد بس وصلنه ساكت ولا حجة كلمة اني صرت وراه و هو يمشي قريت اسمها من بعيد باوعتله بزنده مسح دموعه اخذت الماي عنه وهو شال الورد بس تقرب يم قبرها خله الورد و گلها هاا يا
ضياع العمر اجيتج لا اردياََ الدموع تنزل خاصه وهو حجاها بكسره

سائد _ادري اتأخرت عليج بس شسوي مو بايدي
اليوم اجيتج ووياي البنيه الوصيتيني عليها
وياي مناسك ام سائددد

مناسك _ما گدر يكمل حجي تحسر وكام يقرالها قرأن واحنه يمها انخلت ايد عليه فزيت درت مياسين و الولد و ليلو

جاهد _احنه گلنه راح يروحلها بسس مووو من ورانه

سائد _ما ردت اتعبكم

جاهد _هاااي امنه مو بس امك انت

مناسك _خلوله ورد و مياسين فتحت كتاب الادعيه وكامت تقرا بصوتها العذب وقرتلها سورة الفاتحة
اني طول هذا الوقت ايدي على ظهر سائد حتى من گام حضني وباسني من راسي اني ايدي على ظهره حبيت احسسه اني يمه بكل جوارحي

سائد _ يلا خلي نروح مو زين زيارة القبور للنساء

مناسك _الحمد لله هذا عدكم مو عدنه

سائد _ ربط العرگ الطائفي

مناسك _ بسته من جتفه لا كلشي ولا هذا العرگ
بقينه يم جاهد تلث ايام كلها ضحك وسوالف حلوه
اسمع جاهد يگلهم هاااا واخيراََ ارتاحيتو ولميتو الحب

صليل _خووو سائد نسه الوعيد و الصعيد

سائد _وانت شدخلك

صليل _حتى ما نطيتنه مجال نحسسهم بالغلططط

مياسين _ يا غلط عيوني شوو انت صاير ابو وجهين

صليل _هههههههههه لا يابه انتو وين والغلط وين

سائد _ وداعتك يا خوية اني طلعت خرطي بس السان انتو طلعتو للسفره منا هيه اجتني منا اني نسيت منا عود هذا انا ابو كلمة ما تصير ثنين الحمد لله الكلمة كلها نسيناها

جاهد _ وجعلنه بينكم موده ورحمة
لا كلام يعلو على كلام الله

سائد _ونعم بالله

مناسك _طلعت من الحمام يعني انت جنت ناوووي اطولها سيدي القائد

سائد _جنت بس ما گدرت

مناسك _هههههههههه
رجعنه لكرستيان ساند وتركنه جاهد وليلو وحدهم الحلو هنا اكو حضانه يعني الطفله ماا عليها شي وقت دوامه ويهتمون بيها بس المشكله من يرجعون ويبقون وحدهم

جاهد _لا تخافون اني داير بالي عليها

سائد _كلها ١٢ يوم يا خوي وارجعيلك

جاهد _بالسلامة الله وياكم

مناسك _ رجعو ويانه بس بقه گلبهم يم صاحبهم وهمه يسولفون ويحجون بي
طول هاي ال ١٢ يوم همه على تواصل
و تطور موضوع ليلو و قرر جاهد بس نخلص الشغل نسافر

سائد _اي وقت تحب احجز ونروح

جاهد _الولد هم عنده سفره ويانه گال اذا تحب اني احجزلك وياي بنفس الفندق و احجزلك يم الدكتور

سائد _حلو ليش لا احجز هيج يصير عليك اسهل

جاهد _ تمام ما بقه شي الجيتكم بس تخلصون العقد تعالو ونحجز

صليل _لااا احجز احجز احنه بس تنزل الفلوس بحسابنه ثاني يوم نحجز الاوسلو و نطلع من مطار اوسلو

جاهد _ارتاحوو بالاول وبعدين نحجز

سائد _راحتنه من نشوفك انت مرتاح ومطمن على بنتك

مناسك _ همه متحمسين اكثر من جاهد للعمليه علمود يفرحو وهو خايف على بنته من العمليه ويريد قدر المستطاع يأجل
خلص عقد العمل و الولد اخذو الفلوس وسافرنه الاوسلو البيت الي جان بي سائد و صليل هو نفسه رحناله الحد ما نرجع من السفر لأن فلسو الولد بقينه بس على مساعدات الدولة لأن شغل ماكو حجزو الولد للدولة المعنيه و الولد الي يتواصل وي جاهد گله حجزتلك يم الدكتور و حجزتلك فندق وانطا اسم الفندق
بهاي الايام اني تعبانه واحس بخمول مو طبيعي ولو اشوف واحد ياكل من يمي اتقيأ ومعدتي نارررر

سائد _ اليوم ما عاجبني وضعج شصايرر

مناسك _ مداگدر اوكف رجليه يأذني وراسي موتني والدنيا تفتر بيه

سائد _ خلي نروح للمستوصف

_ما بيه حيل اگوم انطوني حبوب خلوني اشرب راسي راح ينفجر

سائد _اني طالع اخلص جم شغله اطول وانتِ مبين تعبانه كلش شلوون راح تتحملين

_اتحمل روح لا ينشغل بالك ويمي مياسين

_بس اتعبين اتصلي تمام

_اوكي روح

مناسك _ فدوه مياسه جيبيلي حبوب راس
هذا اخير شي اذكره خليت راسي على الطاوله بعد ما حسيت بأي شي الحد ما هو رفع راسي

مياسين _اني اجيت انطيها الحبوب لگيتها نايمه و تركتها خفت اگعدها وبعد متكدر تنام خليتها هيج

_ يلا گومي للغرفة ارتاحي

مناسك _ما بيه حيل اگوم سائد

سائد _حاولي

_جيبولي ماي بس اشرب ماي

سائد _انتِ شنو ماكله من الصبح الهسا

مناسَك_ولا شي

_ليشش ابويه انتِ ما شوفين مدتگدرين تكومين

مناسك _ بس جاب طاري الاكل كمت اتهوع واشرتله يسكت

مياسين _ شكيت بمناسك حامل
راد يشيلها سائد استحت هيه گلتله بس اسندني
سندها ودخلها للغرفة بعد ما درت بالدنيا رجعت نامت عبالك صارلها سنه منايمة

سائد _باجر ضروري اخذها اشوف شبيها

مياسين _انتو روحو خلصو اجراءات السفر واني اخذها

_تمام بس توصلين هناك وتطمنون طمنيني

_تمام جانو شاكين لازم ناخذ فيزا للدولة الي لازم ندخللها لان احنه عراقيين الاصل فـ ستغليت الوضع و خليتهم همه يرحون يسألون واني گتله اخذها

_الصبح همه طلعو و ترك الكارت مالته على الميز وانطاني الرمز

مياسين _اخذ كارتك سائد اني اذا تحتاج شي اني اجيبه الها هاااي اختي قبل حتى لااا تصيررر زوجتك
بدلتلها ووكلتها لفة جبن وعصير بس كملتهن ذبتهن اتقيأت غسلت وجهه وطلعنه من البيت للمستوصف
انتظرنه بالسره بس وگفنه يم الدكتوره گتلها سويلها تحليل حمل

مناسك _باوعت المياسين ما صارلي هوااي يمه

_شهررر ونص كفيله تحبلين متمرضه انتِ قبل بس ما صارلج هذا كله خلي نتأكد

مناسك _ سوولي التحليل وبقيت گاعده انتظر ما سيطرت الوجع بكل جسمي نمت على جتف مياسين

مياسين _اذا حامل نسوي مفاجئة السائد

مناسك _ ابتسمت اذا طلعت حامل سائد يموت من الفرحة

مياسين _ الله يسعدكم ويكمل هاي الفرحة علينه بنونو صغير
وصلت اوراق التحليل طلعت حامل فرحتلها من كل گلبي

مناسك _هاااا

_حااامل

_ههههههههههههه جذابه

_والله حامل باوعي

_الف الحمد لله

مياسين _تردين اخابره واگله انت وين
واني احجي وياها اتصل تليفوني سائد
باعي هو اتصل الطيب عند ذكره
الوو

سائد _هاا طمنيني

_ما بيها شي فلاونزه عاديه بس گال الدكتور خلي ترتاح انت وين

سائد _اني بالبيت انتظركم

_تمام هسا جايين

مناسك _هااا وين

مياسين _بالبيت

_بس اوصل اگله

_هههههه على كيفج ويا بس

مناسك _ احساس ما ينوصف وخاصه اني ادري هو يريد هذا الطفل صارت امنية حياته دخلنه للعماره صعدت بالمصعد ساندتني مياسين
من دخلت للبيت گاملي سندني وگعدني على القنفة هااا شلونج اليوم مو شوي احسن

_زينه افضل

_شنو گالو يعني شبيج

_گلولي بعد تسع اشهر بأذن الله تشيل طفلك بأيديك
صفن بوجهي

سائد _ مناسك فدوه عيدي الي گلتي

_گلت گلولي بعد تسع اشهر بأذن الله تشيل طفلك بأيديك.

سائد _اششش لا تشاقين بهذا الموضوع والله اعصاب ما بقت بيه

_والله مداكذب شوووف

سائد _اخذت الورقه منها التحليل يثبت هيه حامل
لوو يصير اضمها بين ضلوعي جان ضميتها
بستها من راسها ومررت اصابيعي على بطنها
تنفست براحة تگوميلي بالسلامة

_ دخلت للغرفه بس سد الباب باسني من منحري

سائد _ رررربي لطف بحالي وما عاقبني بأكثر شي جنت انتظره

مناسك _ ربي رحيم ورحم بحالنه
نزل البطني باسها وهو يحجي وي حبة عدس مثل ما گالت الدكتوره

سائد _تعال للدنيا وشوف شنوو اسويلك اذا ما اخليك بين رموشي واسدها للعين
اذا ما ادللك ما اطلع سائد تعال بوية ونور حياتي

مناسك _ فرحة مو بس بهجت قلب سائد لاا الكل فرحله مثل ما هو فرح وجاهد جاب عائلته وجايبين هداية للطفل من هسا وصليل يگول علية الغرفة وهذاك يگول اني اسويله كلشي
شلون ما الكل شايل ليلو شالو جنيني

جاهد _بخصوص السفر نأجله هااا يابه

سائد _ لا ليش تأجله يروح وياك صليل و مياسين وزوجتك هم وياك

مناسك _لا فدوه اني ما اترك ليلو نروح شعليه

سائد _ لا اخاف يصيرلكم شي

جاهد _الافضل تبقون انتو وصليل و مياسين يجون وياي

سائد _الولد الي تراسله تعرفه شفته الوضع تمام مرتاح مطمن

جاهد _اسمه جواد ردت اقابله بس عنده شغل ميگدر هسا نتقابل
گال اني حجزتلك بس قربت الحجز بدون فلوس تعال وشوف شغله يطول اني هم عندي مراجعه يمه اشوفكم بالمطار كلامه مريح الوضع تمام اني هيج هيج رايح علمود بنتي ما عجبني الوضع نشوفلنه دكتور لخ

سائد _تمام هذا هو روحو وتوكلو على الله

مناسك _ حضرو الفلوس و رتبو كل وضعهم زوجة جاهد قررت ما تروح گلتله اني ما اسافر وما بيه حيل اسافر من حجة جاهد ل سائد جان ضايج
بس گال يكفي صليل وياي

سائد _ولا يهمك مو بس صليل اني ومناسك هم نجي

جاهد _لاا يابه هنوب يصير بيهم شي خليك هنا

سائد _ابددد والله شنوو ابني اغلى منك قابل
نروح والحافظ الله

مناسك _ فعلاََ ما گال غير الحقيقه حب سائد الجاهد و صليل مستحيل اگدر اوصفه ولا ينوصف ولو بألف بارت
حجزلنه وجان خايف عليه بس طول الوقت يگول الله الحافظ وقبل لا نطلع تأكد من ادويتي
اتأكد اني لابسه زين
من صعدنه الطياره هو بنفسه لبسني الحزام
وطول الطريق هو يسألني هاا خو ما تعبانه هاا كلشي تمام

_كلشي تمام لا تخاف
جنت الرحله متعبه لأن مو طياره وحده اكثر ترانزيت جان عدنه الحد ما وصلنه للبلد المنشود
تعبت بس ما بينت السائد خاصه وهو شايل ليلو ويبوس بأيديها ويگلها باجر اخلي ابني ينهي عليج
وجاهد يعاركه ويگله ما انطي بنتي واگاومك انت وابنك
الولد الي منتظرنه جان شايل لافته بأسم ليلو جاهد
شافها جاهد رحناله وسلمو الولد عليه
گال اني اجرتلكم سياره و نطلع للفندق گبل ارتاحو اليوم وباجر موعدنه وي الدكتور

سائد _تمام
خلينه الجنط بالسياره وجاي نسولف وي جواد
من اجيت اگعد على السياره
بحجة الشقه هو طبطب على جتفي تلث مرات
اني رأساََ ربطتها وي الشفره مالتنه تلث مرات يعني اكو خطر
مرتين يعني ما مرتاح
مره الامور تمام
باوعتله هو ما باوعلي صعد السياره همه يحجون ويضحكون واني ايدي صارت بأيد مناسك
ما جنت خايف غير على ليلو و على مناسك كلشي نسيت وكلشي غاب من بالي حتى اصواتهم ما اسمعها

مناسك _بيك شي حبيبي

_لا لا ماكو شي اخذتي حبوبج

_اي بالمطار شربت ماي و اخذت الحبوب

_تمام عاشت ايدج انتِ زينه

_اييي بس ايدي كامت توجعني شوي رخي قبضتك

_اي اي ما منتبهه

مناسك _ الطريق شبهه صحراء ناس قليله سيارات تتعده سريع لاف بينه السايق شوي ونرفعت الاسلحة بوجهنه

جواد _ايييي كلمة منكم اخلص عليهن قبلكم

صليل _ جماعة عدنان انتووو مووو

جواد _ الوالد مشتاقلك هواااي وحررص توصله بأمان

يتبع......