تحميل رواية «مابين النسر والشيخة» PDF

كتبت وكتبت لكن النهاية صارت مطولة خمسة آلاف  كلمة قسمت الجزء الى نصفين هذا نصف والثاني الساعه ب١١ اليوم ينشر

لاتنسون التصويت

***

ليان ...

دقايق وانتهت الهوسة والوشة اللي تتهامس عن الموقف اللي صار .. بصيحة وحده من الجد سكت كناته وكل وحده راحت لوكرها .... اما جواهر اخذوها للطبيب وما رجعوا بيها غير الساعة ب١٠ بالليل ..... و كالو باجر لازم تراجع ..

***

يقين

اجاني خبر بألي صار ....شفت عمتي حيل ضاجت بس ختام الفرحة واضحه على شكلها وهي تسرد النا شنو صار

بعد مخابرة رغدة الها ...

الصبح عرفت حسين ما راجع للبيت ثلاث ايام احنه ما نعرف اله مكان ... حتى بابا صار يدور عليه هو ومحسن وهو مختفي ........

***

حسين ...

بشقتي حبيس انتكاستي .... ما اريد اتعمق اكثر ولا اسمع منها اي شي

اعصابي تلفت و حواسي ما اكدر استشعر بيها شي بعد لا اعرف الغلط من الصح ...

ايام الا كدرت اتعايش وية الواقع ورجعت للبيت ...

اتلكتني امي واني اصعد الدرج

يمة وينك ...

يمج

تعال احاجيك

مابيه حيل

دخلت للغرفة ... صارت كدامي صورتها كاعده ولابسه عباية رجالية فوك ثوبها الابيض واني واكف وراها ... وشعرها على جانبها الايمن متدلي ...اني مبتسم ببساطة بس هي . تباوع للعدسة واعيونها تلمع وشامخة ورافعة رگبتها ... شمرت تلفوني عليها انكسرت و وكع الكزاز على الكروتة مالتها ...التفلون ما انكسر حافته اللي ضربت الصورة ...

ما اعرف نمت بملابسي لو التعب اخذني من الدنيا ... فتحت على صوت محسن يصحي بيه ويكول عزيز جوة ينتظرك

اشمدريه اني اهنا ؟

دنك راسه محسن

الرجال ايام وهو يدورك وياي اول ما اجيت بلغته ... انت وين جنت ؟؟

كمت ورحت للاستقبال ....شفته كاعد ويسبح .... اجت صورتها كدامي وهي نفس الحركه اسويها مثل اخوها ...

اهلا وسهلا ...كعدت كدامه وهو وكف وكعد يفرك بأيدة

باوع الي واني ما اهتمت لشكلي اصلا ما ادري اشلون صاير ايام واني ما شايف روحي ؟

احوالك مدهورة

ما جاوبت ..

محسن خوية بس اترخص منك عندي كلمة ويه اخوك

راح محسن ...

اجه كعد يمي عزيز ...

يباوع للسبحة مالته ...

خوية شنو بدر من بتنا .... باوع الي وبنظرته ترجي اللي فهموه ما يطلع صح ....تذكرت وكفته وياي بالايام السابقة ..........والا هي ما يشفع الي الشرب من دمها على الي سوته بيه ..

كل خير ...

بالكوة طلعت من لساني ..

ما شايف منها الا كل خير .. بس سوء فهم وكبر ...

شنو من سوء فهم اطلعوه هيج للعالم ؟؟ شنو اللي صار باليوم اللي طلعت من بيتنا ؟؟

خوية هذا شرفنا والنا حك نعرف منك ومنها ....

سكتت ماعندي شي اكولة

انه اعرف تربات ايدي جواهر . بس عتبي وياك وزعلي راح يثكل ....انت أست النا وللشيخ بطلعتك هاي .....حسستنا اكو شي قوي وچايد واحنه اللي حويناك وعديناك منا....

باوعت اله ....

خوية اني صدك تعبان .... شوف اشلون اشتري رضاكم واعتذر من الشيخ على طلعتي ....واذا تحب نفض الي بينا اني ماعندي مانع نفض كل الشغل ...

قاطعني

وسفة تفكر اني اعيرك .....اني عديتك اخو ...

ونعم منك ...

طلع من بيتنا عزيز ضايج

***

ليان

رحت اتحمد لسلامة جواهر كالوا صارت زينة ....

اول ما دخلت شفت رغده و قحطان يجادلون ورسل يمهم ساكته ..

اخوج بطلعته طلع كلام على جواهر . بعد شيسكت النسوان

غير كل من اختك الله الي يعلم شنو مسوية

السلام عليكم

ردوا عليه وكعدت ...

قحطان

والله انت مدري ليش شايلة على اختي ..

رسل

اي احسج اتعرفين شي لو انت بالاساس اتكرهيها

اني لا شعلية

رسل

اي شو احسج مرتاحه بالي صار

ترة لو ما جواهر عمي ابد ما وافق ياخذج لقحطان ....هي ظلت تتوسل الي وقبل

قحطان راح .... وشكله ضايج ...

رغدة

شنو هذا الكلام رسل

والله هذا الكلام الي قحطان ما يقبل كلساع انذكرج بيه .... بس اني ما ارضى على جواهر ...المرة صاحبة افضال عليه .. والحق يقال قحطان سنة كاملة يتوسل بابو ما يقبل يريد اله وحده على هواه لأجل مصلحته ..... بس جواهر الي قنعته ....

سكتت رغده اهنا اجو خطار يشوفون جواهر .. راحت رسل ...

رغدة

كله من ورة ختام .. هي ظلت اتلح علية اكول لحسين

شنو ولج

سولفت الي رغده عملتها ... وعرفت سبب خصام حسين و جواهر ..بس ليش اجه وليش طلع بهذا الشكل.....؟؟

الاخبار خلتني استغرب واتعجب اشجاب جواهر على المرحوم ؟؟؟؟؟؟ ومحد ذكر هذا الشي من عائلة جواهر ولا يذكرون بيت عمي ... بس جواهر اتحب هذي المفاجئة صدمتني

اجتنا رباب ....

سلمت ... وجرتني على صفحة

حبيبة ليان اصعدي لجواهر و اتصلي بيه فيديو حبابه ادري بيج خوش ابنية

شنو مافهمت

اريدن اشوف جواهر ويطمن گلبي عليها

ليش ما اصعدين انت الها ؟

دمعتها طلعت وكالت ...ماتقبل اشوف وجهي البارحه اجيت من سمعت بيها صحصحت وطردتني ماخلتني ادخل الها

كسرت خاطريبس لو اعرف ليش ضربتها ذاك اليوم

والكل سالها لرباب و ما اتكول شي مقنع

رحت اتصلت بيها فيديو ...ودخلت سلمت على جواهر .. جانت كاعده على مرجوحتها الدائرية الي بالغرفتها وتشرب عصير .. دخلت رغده سلمت عليها ....اختي واعرفها من اسوي مصيبة وجهه يصير ينطي الوان باوعت الي اشرت اروح وراها .. طفيت الكامرة ورحت الها ...بغرفتها دخلنا

اشبيج

ولج ليان اني بورطه

شكو شنو بعد صخمتي ...

اي والله صخمت اصخام يصخمني ...توني عرفت عمج رايح لحسين و حسين ما كايل اله شي ولا جاب طاري الطلاك عبالي راح يطلكها اني

اسم الله ....فال الله ولا فالج

الله يخليج شسوي ... اني عبالي خبرها ينتشر وتطلك شو هسة ضجت عليها ...وهي طلعت متوسطه لأبوها الا قابل يزوج ابنه .... واني رحت فلتت حجي كدام سمر الصبح

عزة العزاج والبين لفاج وخلصنا منج ولج محد يدري من اهلها راحت المرة سمعتها مدام صارت بيد سمر من اشوكت انت وياها صلح ....

تبجي ....والله هي باكت الساني واني

ضربتها على صدرها دفعتها لورة

ولج فلتي حجي السانج ما لازمته هاي مو بس سمعتها سمعة اخوج يا ثولة وسمعت ابن عمج الميت ...شنو راح يكون موقف حسين اذا انشهر زوجته جانت تعرف ابن عمه ....ولج هذا الكلام يطير رگاب اتعرفين شنو راح اتطير رگاب

تصرفها هاي الرعنه راح يكلفنا اهواي هاي سمر شنو يسد حلكها ...

احتاج احد اشورة يااارب شسوي

ما لكيت غير رباب رحت الها جانت اتعدل بغرفة جواهر خطية . وجواهر بالحمام ما تدري بيها بالبسكوت عدلتها .. واني طلعتها للمر وكلت الها رغده مفلته حجي كدام سمر

شسوي رباب

كالت

عزة ولج هاي سمر تتمنى الزلة من زمان ادورها على جواهر ...

اختج بغرفتها هسة

اي

راحت رجعت للغرفة لبست حجابها وصار كدامها مداس او شحاطة جواهر الي كعبها خشب ومقدمتها ريش وردي .. شالتها وراحت لغرفة رغده صايرة كدام غرفة جواهر ...دخلت مدرعمة

سألتها

رباب اشبيج.؟؟

ولي انت ...... دفعتني ووين اليوجع نزلت بيه على رغده

اني گلبي ملجوم على الوادم اللي خسرتها وانت راح افوخ بيج علتي ..

اااه

ااااي ليان ليان

كأي اخت مهما سوت اختي دمي يحن الها .... دا ابعدها عنها واجاني نعال على خدي بعدني عنهن

ااخ ولي

رغده ادفع بس رباب اقوى منها شبعتها كتل بالمداس

شايفه هذا مداس جواهر يسواج

وهاي اختج ام الزلم ختام يراد الها نعال

ظلت تغلط على ختام ورغده وطلعت ...

صارت جواهر كدامها توها طالعه من غرفتها وشعرها مبلل ...

رباب نزلت المداس من ايدها واتباوع لجواهر بشوق واني طردتني رغده و سدت بابها تبجي ووكفت يم رباب ...

راحت جواهر ... نزلت لجوة عايفتنا

رباب

تعالي وياي ليان اريد اشهدج على شي

رحت وراها من غير فهم ...

وصاحت لسمر اللي على وجه السعاده

من شافت جواهر نظراتها خوفتني حيل

شكو رباب

تعالي لغرفتج دخلينا عدنا شي وياج ...

الفضول خلاها اتروح ويانا لغرفتها واطلع بناتها . وسدت الباب

خير خية

صار شي جديد وية جواهر .... خطية امنين اطلعن الها بنات عم حسين ...

رباب

اني اجيت اشهد هاي

واشرت عليه

اخت حسين ....و فدوة رحت للسموه عليه و ابو فاضل الكفيل ....اذا جبتي سيرة لأحد على سالفة جواهر ...

والله العلي العظيم لروح اكول لرجلج على سالفتج ويه ابن عمي حامد ولا يهمني باللي راح يصير حتى بالقران احلف اله جنت اوصل بينكم رسايل

وعندي وحده منهن ترة .... هااا واتعرفين المصونات اذا طلع ماضيهن الاكشر شنو يصير بيهن

ظلن يتحاورن ...واني صافنه ومصدومة على اسرار هاي العائلة متشابكة وتحاك الامور بينهم والعلاقات من جوة لجوة ..

هددت رباب سمر وطلعت ....

ورة اشوية من كعدتنا واني بعدني ممستوعبة الي يصير اهنا .. صاحت سمر رباب ....اضاهر اتفقت وياها ....

جرتني على صفحة رباب وكالت اتصرفت ويه سمر و اسكت اختي لا تطير رقاب ....هذا شرف مو لعبة .. وهاي سمر خايفه منها بعدني ترة ما تخاف تدري بيه لا احلف ولا انبش بالماضي بس السان لان بيها خراب بيوت وتشتت بالعشيرة

***

ليان

كل عصرية بعد ما اكمل كل شغلي الي حاطته عليه ام قيس ادور لجواهر اكعد يمها ....ما تكعد ولا اسولف مع احد من النسوان غير مع ابوها و اني ..واحنه اللي نروح الها ...حتى اكلها لغرفتها يصعد اتكول ما احب افرح الشمات بشكلي مالي نفس بالحياة .....

احجيلي جواهر .... ترة اني مقدرة واعرف حب مراهقة والمشاعر مو بيدنا

باوعتلي و خزرتني

لا يكون ولج بعدج بخاربيطج هاي .. واني ورطت قيس

لا لا والله لا اتفهمين غلط ....اصلا من أتذكر افكاري بالماضي و الله اخجل من نفسي ما اباوع لأخوج غير انه مثل عمي والد زوجي اصلا مشاعري السابقة ما جانت غير احاسيس واهمة من وحده ضعيفة ...اما هسة قويت بقيس عوضني ونساني الي سواه خطيبي السابق ...

ومازلت احب اهتمام عمي عزيز لأولاده وهذا الشي اللي حببني بيه بالسابق ومازلت احبه لكن كاب حنون على اولاده لا اكثر

كانت ساكته واني دوختها

جواهر ما ناوية تحجين الي

تعبانه يا ليان اللي المفروض احجي اله اخوج ....بس هو رافض يتواصل وياي . .

***

حسين

...ارجع اسافر حتى انساها لو اظل اتألم ... غيمت على گلبي غمامة سوودة خلتني ازهد كلشي عندي وودي اشرد من جديد ارجع للغربة حتى انسى ..

دك تلفوني ...

جواهر تتصل ... ودي تجيني قدرة على قتلها واخلص من ذلي وضعفي كدامها ...... اشلون انخدعت بيها اشلون كدرت تلبس لون الشرف والعفة ...اشلون خدعتني بحب واهم ..!!

غلقت التلفون ورحت دخلت بنص الحمام و فتحت الماي البارد عسى ولعل اصحى ...

،،،،

العقل والمطنق حتم عليه اروح اعتذر من الشيخ وارجعها لا اعم على سمعتها وسمعتي بكلام الناس .... رحت بعد فترة تفكير ...

اشلون راح اشوفها ما اعرف ..

دخلت والوجوه ثكلية عليه ...الشيخ ما طلع الي .....

اختلج وجداني الشوك ...واني اشوفها كدامي متغيرة حيل ..

اشلونك .

اجيت اشوف ابوج ...

ابوية بالنجف

اهااا

لعد اني اروح ومن يجي ابوج ارجع والنا حديث بعدها ارجعج وياي اذا تردين

حديثي وياها كان بارد و كأني روبورت مبرمج اكول هالكلمتين واروح .

ابوية موافق ارجع وياك ... اقصد مدام اني اريد ارجع ابوية وياي ...

بس ليش هالكد أتأخرت أني منتظرتك من ايام ....

اتقربت عليه ...و جانت ادور بعيوني على شي....

يلا روحي حضري نفسج لعد ...

ثواني ...

طلعت متحضرة اجانه عزيز وصاني عليها ونصحنا مشاكلنا ماتطلع خارج غرفتنا ونصحها ما تطلع من البيت ردت عليه

بس عزيز من غير ما اتوصي .. اني ما طلعت من البيت زعلانه ...وكلت الكم رجعوني لبيتي وانتم فضلتوا هو يجي ..

مو وكت هسة هذا الكلام يلا روحي وية زوجج ...

...

صعدت وياي ..

هي تحجي واني ساكت ما اعرف امنين نزل عليه البرود الي بيه اني بس ودي تسكت .....

اخر جملة كالتها

ترة اني من طلبت منك اظل فترة جنت خجلانه منك حيل وهمين انطيك مجال تستوعب

وصلتها وما نزلت عفتها باب البيت وانطلقت ....

رجعت بالليل لشقتي بتت بيها ومناك اروح للشغل ......

الصبح رن جرس باب الشقة وهذا شي نادرا ما يصير بس من اطلب وجبة سريعة ....فتحت الباب وافرك بعيوني ...شفتها كبالي ..

مبتسمة ...

دفعتني ودخلت اني جنت بعدني متفاجئ ..

شسوي اهنا .... عايف بيتك وجاي اهنا ...

كعدت بالصالة وايدها على وجهه واتباوع الي بوجه مبتسم ....

شرايدة ؟؟

تاتأت

اقصد ليش جاية وحدج ...

عفتها ورحت اغسل وجهي ....

لكيتها ماهي .... سمعت صوت بالمطبخ...

شفتها ادور بيه

شنو ماكو طاوات اهنا ؟

لا تعالي ...

اسويلك ريوك

لا ما اريد تعالي اوصلج ... بس ابدل ...

قبل لا اتبدل ... تعال اريدك ...

سحبتني من ايدي و امشي وراها تعبان من كل شي ....

اكعووود ...

كعدت ..

مثل ما جبتني مرة اهنا وحجيت الي ...اني بعد همين راح اسولف الك .. كعدت بحضني لو جنيت وخرتها عني وكمت هي كاعده و وجهي منحني عليها

شرايده تعترفين .. ؟؟

بعيوني الشرر

من حقي ابرر الك ..وهمين مو من حقك ترة اتحاسبني على شي صار بمراهقتي حتى والله حيل اخجل افصح عنه ...اني مرة ترة واقل شي انعاب ..

مو شغلة حب مراهقة واغلس عنه .. اني ماخذج عندج تجربة قبلي ....ماااعندي اعتراض .....

رفعت راسها بيدي من حنجها اعيونها كدام اعيوني ....

اني مصدوووم بيج .... كلش مصدووم ولا كادر اتقبلج ولا اعوفج ....

ليش هيج تظلمني ..

انت الي ظلمتيني ....ليش قبلتي بيه ....

هااااا ليش وافقتي وانت عندج علاقة بأبن عمي

ابن عمك مو اخووك والله يرحمة

ههههههههه اخوية ولج حتى اخوية شايفج ببيت عمي وية ياسر !!!!

لو نسيتي

صفنت بعيوني

دزيت ختام لنبراس وهددتها وسولفت كلشي

(( جرجرت ختام بالخوف خليتها تدخل لبيتهم و تاخذ نبراس على صفحة وتنطيها التلفون واني على الخط

وروح حسن الطاهرة اروح لزوجج و اسولف اله شسويتي باخوية يا نكرة ..اذا ما كلتي الصدك ... !!! ))

نرجع للحاضر حلفت جواهر

والله العظيم علاقة شريفه حالها حال علاقة حسن بنبراس مابينا شي

وخر ايدك ختنكتي .. كامت تبجي

حسين اني احبك .... دموعي الي ما تهون عليه تطلع ما طلعت غير كدامك وعليك ...لا اصير خناگي واني روحي بيدك ....

اش

كافي

راح ابدل واجي اوصلج ..

اوكف حباب

درت وجهي عليها

اذا اوكف هسة ارتكب جناية هاي انتي الي حسن مرة كال الي شفت ياسر وية وحده

جايبها لبيت اهلة ... انتي ..

مجرد صدفةة....

صدكني جان بينا حب بس ما بينا

اششش اكتفيت بهاي الكلمة ... لزمتها من ازنودها عصرتهن حيل .... وخضيتها

هسة اني راح اكلج ...

مات حبج ياسر..بالوقت اللي تمت خطبة اخوج الصغير اي بعقد رغده هو اتوفى اشلون عرفتي هم نادري يجوز تتواصلين ويه حبج بعد ما ترملتي ويجوز حاطه ناس تراقبة كلشي اتوقع منج ....من تأثرج بيه وكعتي طريحه بالفراش موووو وما حضرتي عقد اخوج ....اذكر كل تفصيلة اتخصج ....

اعيوني مفتوحة عليها ...

ومن جنتي اسرحين بوجهي حتى وانت رافضتني اشوف بعيونج الحب وهذا الي خلاني اتمسك بيج ويطيح حظي

.دارت وجهه عني

باوعيلي ..... من ازوجنا هم وكعتي مريضة ايام وانتي ما مستوعبة يمكن

صرت زوجج اني مو هوو جنت اشوفيني بيه ....لمسامتج هم الي يمكن جنتي مجربتها وياه .... لهذا جنت ماخذه عليه من اول لقاء ....شهكت ..

لا لا

ما حسيت بنفسي اشلون جريتها هيج ووكعتها على الارض

صحيت من شفت خشمها ينزف و اتباوع الي بخوف ...

كومتها واني مستغرب من نفسي تمنين هذا الدم يطلع من گلبي اني واخلص

وصلتها للبيت ورجعت تركت البيت هاج منه ....امنين طلعت الي هاي السالفة لو ظالة مضمورة

اسوق واضرب على الاستيرن ..... ليش اني هيج يصير وياي .....اني گلبي مجروح من سالفه مايا انوب حتى الي اختارها من نسل طيب يطلع عدها ماضي والماضي يمس كرامتي ۔ حابة شبيهي ياسر ونظيري وعلاقتهم مو عابرة من ربطت كل الحلقات سوة فهمت نوعها ..ليش هي يارب لو اي واحد ما يصير بحالي هيج ...اضوج بس ما افكر اعوفها بيوم .... هسة بس اريد اعوفها بس مو بيدي گلبي يريدها ....

***

يقين

شفت عمتي رجعت لنشاطاتها الاولية تشتغل و تفتر بالبيت لكن حسين ماكوو

وام حسين تسال بيها ليش عايفج وليش ازاعلتوا ما جاوب ....حسيت بالضغط يزداد عليها من ملحة عمتي ام حسن ...خلصنا من موضوع الخلفة هسة موضوع الهجة .ما اعرف ليش تجرح بجواهر وهي من عافت البيت فترة ضاجت عليها !!؟؟

***

ليان

بزعت من نقد ام قيس على اقل شي و همين عكرة حتى بروحتي لأختي اللي بصفنا تدخل ...بس شسوي دسمع نصيحة جواهر قبل لا اتروح كالت الي لا تتأثرين بكلامها سوي اللي يرييحج بس من غير ما اتحسسيها .. وهم من تلح غلسي الكلام بس لا تتحسسيها بالتجاهل

حقه رجلها دومه شارد.اثاريها نگاگه ...

يتبع

للساعة ١١

حسين

اخر مسج منها خلاني احتار

(( حبيبي لو يطول هجرانك عمر اني انتظرك لأخر يوم بعمري ... مراح استسلم واطلع من بيتك غير على تابوتي ... راح اشتاق الك حيل وراح اظل ادعي بصلاتي الله يهديك وتجي تسمعني اعرف انت مو مشكلتك العلاقة گد ويه منو جانت لهذا راح اعوفك على راحتك تجيني واسولف الك .))

الود ودي هسة اروح الها  بس اخاف من غيرتي عليها اذيها مثل المرة السابقة ظال كل ما اذكر موضوعها ناري تحركني ولا اكدر اهدأ ......لو على كلام نبراس ولا اخذه بالاعتبار هو وبس ...لكن كلام حسن الله يرحمة من سولف الي نفس الموقف . يعني جواهر وياسر سوة بنفس البيت ...امه بالدوام وابوه الشغل وخواته دخلن و لكفنهم اشلون افسر الموقف ... وهسة اخذتها اني الي ودي احرك وجهي على الشبه الي بيه من ياسر

***

ليان

خابرتني رباب ..

اخيج ما يرد على اتصالاتي ... واني ما اندل دروبه

والله اني هم حتى امي مشتاقه اله ..عود مرات يخابرها ...

عبالي اتعرفين واسهلين عليه المهمة

لا والله بس الاعرفة عنده شقة وين ماادري ......اووف الكلام كثران على جواهر كلها عارفة رجلها هاجرها وخايفه من سمر

رباب

اكلج اني راح اشوف شغلي وية استاذ عزيز ادري بيه عارف مكانه مرة فلتها هو كايل اله وين يبات لأن احتاج اوراق ودزله العنوان ...

خوش عفية طمنيني ..

خوش

سدته ... طبعا رباب حجت الي كلشي عن جواهر وياسر وعرفت طبيعة علاقتهم

***

يقين

خابرتني مرام وكالت عالكه بين امي وخالتي ... مطلعه عليها كاله كدام حوراء ورايحه امي محلفتها ومحلفه بتها واتخاربت وياهن ....ما تخلص مشاكل امي كلها ضدها بس بيت جدي حيل متعاطفين وياها بس هي ظاله شايلة عليهم

.....

ثاني يوم

سيرت يمنا مرام  و امي واختي الصغيره ....

طلعت الهم جواهر رحبت وراحت اتحضر الهم الغده لأن ما تدري اليوم يجون ما كلت الها بس لعمتي ام حسن كلت

مرام

اشوف علاقتج بعمة مو مثل قبل

ما اعرف اكو حواجز انبنت بينا .. واني هم كبرت وفهمت الناس ..

..

اتغدينا ... بعد الغدا ... طلبت جواهر من مرام اتحف وجها ... ...

واخذتها لغرفتها ...

ليش ما اتحفين انت لعمتج مو اتعلمتي ..

ما كالت الي ... اكلج يوم شو انت عادي وياها وتحجين ولا يكلك زوجت رجلج عليج ....

اذا ابيج كاين علينا ....شسوي بعد

...

العصر قرب يصير .. اخذت مرام لغرفتي اتحف الي وهم نفس السؤال ليش مو عمة اتحف الج

اني ما اطلب منها شي ...

ليش ولج هيج وياها ...

ما ادري احس علاقتنا خربت

لا يكون لان لحت على رباب تقبل وسعت  ..

جاوبت

تجاهلها لأمي ومشاعرها ولا كأنها مرة مثلها

كالت مرام

كله من ابوج

اي ادري ابوية كاتل نفسه على رباب بس هي سعت وياه

شوفي راح اكلج سر عرفته من امي بس الله عليج مو اكولين لاحد

حلفتني وسولفت الي سر بابا الي ما يردونا نعرفه لا ينزل من نظرنا ... جواهر مسولفته لأمي وامي مسولفته لمرام .....

اهنا عرفت ابوية كلة منه هو وامي ما حافظوا على زواجهم لا رباب ولا جواهر السبب 

...

رحنا كعدنا يمهن واني بس اباوع لجواهر

صارلي اشكد ما مباوعه لوجهه هييج ....ودي اكوم واكعد يمها

امي كالت

ترة ليان اتوسلت لقيس وما قبل لأن قبل يومين اجتكم ... .ويريد ياخذها للمختبر العصر شاكين بحملها

ام حسن

لا اني كلت الها تروح اتحلل اليوم

انشالله نفرح بيها

اي وافرح بخلفة حسين والله حيل كاسر گلبي لا خلفه ولا مرتاح بزواجه وعمره راح يصير اربعين وهيج ظال

جواهر بينت عليها الضوجه

كملت ام حسن

هاجر مرته وما يريدها اكله ارجع للبيت ما يقبل

اريدها تسكت لا تجرحها بزياده كدام امي ....

امي

اي خاف وحده لافه عليه ليش هاجر مرته

اتقطع بالتفاحه جواهر وتسمعهن ...

ام حسن اي شو كلش ما يريدها جان ساكن البيت قبل لا ترجع للبيت شو هي رجعت وهو راح

كلت

يمتى عمة هم جان دومه بشقته وشغله

هزت ايدها وكالت

عاد جان يمر بيه

هسة حتى دخله ما يدخل ....

امي كالت وهي اتباوع لجواهر

يا خوفي صدك لافه عليه وحده حلوة وصغيره ...

ام حسن

ياريت والله ويفرح گلبي بضناه

جرحت نفسها بالسكين وصفنت على ام حسن

عافتنا وراحت واني وراها

عمه اجيب الج قطن ..

لا

عمة عمة

ما سمعتني وراحت عني ....

بالليل شو اجه جدي ومرته فجأة ومحسن بالشغل بعد ما عافتنا امه

جدي كال

بوية كومي لمي ملابسج وخل اخذج

ليش !؟؟؟

ليش ....!بعد هذا العمر اسمع كلام عنج

بوية شنو سمعت ومن اشوكت تاخذ بكلام العذال عني ....

بوية الكلام ما قل عنج زاد وهجران رجلج الج ولبيتج اكده  اليوم ام قيس كالت النا وسالت عزيز ما كذب الخبر ...اني ما يرضيني هذا الحال ... ليش انظل حارجيه للرجال

اخذج بتي و ترباتي الي ما عرفت اديها واتحمل الكلام

شنو ليش هذا الكلام ... بوية انت ربيتنا صح

لو ربيت صح ما جان انطيتي لزمه عليج يا بوية بعد هذا العمر اتحطيني بهذا الموقف ....هسة درينا صغيره جنتي بس هسة اشلون تاخذين ابن عمه ...

كالها بغضب انتفضت عمتي منه

وعاتبها عتاب ينحر ويزرف الكلب اني ما اعرف شنو القضية صح باخر فترة طلع كلام عنها من قبل نسوان عمامي وبالاخص سمر لكن ما انطيته اهمية

ليش ذليتي نفسج وذليتيني وياج ...

ليش

راد ياخذها جان حاد وياها وعصبي وكال الها اتصل هسة بالولد.وابلغه  اما  يجي هسة او ناخذج لا نظل بهذا الحرج ...

عمتي ما قبلت تطلع من البيت توسلت مشاكلها هي اتحلها ....

زعل والدها عليها وراح زعلان من البيت

كلة من ورة النسوان الله لا ينطيهم

وصلتهم وهي ظلت بالاستقبال كاعده مصدومة على الكلام الي شاع عنها و كشف امرها .اللي اني ما استوعبه لهسه جواهر اشجابها على ابن عم حسين ؟

المهم هو شي ما يسوة وماضي حسبي الله بالي نبشة نبش ...  اني ما صدكته طلع حقيقة من ردة فعل جدي وعمتي  ما كذبته

***

حسين

الحت جواهر بالاتصال رديت مشتاق لصوتها ...

مرحبا ..

هلا رايدة شي

اشوكت ترجع

جان كلامها بقتضاب وجاف ...

شسوين بيه

ما صفى بالك ادري شنو ما همك وضعي حرج .... كلها تحجي بشرفي واني ضاربتهم عرض الحايط ...لو جبل هم ينهد متحملة كلام امك السم و نظرات الكل بس لخاطر متأملة رجعتك ...

ليش تحجين بصياح

اني مناك راسي يوجعني ودايخ ..

اما تجي لو يصبح الصبح ما تلكاني والله تحلم بعد بشوفتي

اهاا رجعنا للتكبر حضرتج اتهددين ...؟

رن جرس الباب 

رحت واني على الخط فتحته ....

الو وينك ترجع لو لا  حتى اعرف اصرف ..

رغده

هلووو حسين

هااا اهلااااا

جواهر بعدين احجي وياج

انتظر منو هاي ....؟؟؟

سمعت صوت رغده اضاهر

سديت الخط ..

واستقبلت رغدة و قحطان ...

من وين جبتوا العنوان .. 

ضحك قحطان ...من ابو قيس

اها

طلعت رغده اااخ منها مسولفه لأخوة البنية السالفه ...

الرجل ماخذها بشي من البساطه لأن رغده كايلة اله نبراس جذبت  على حسين وخربت  البيت وحده جذابة فهو اصلا ما مصدك ....بس الي عرفته من رغده كل اهل جواهر عارفين بالسالفه وضجت عليها حيل ....

كومي رغده صبي شي نشربه ...راحت ورحت وراها

ولج اشلون هيج اسوين .  منو وصل خبر لكل الناس هاااا انوب اخوتها خطيه

اني شعليه ...امك تمشي واتكول هاجرها و الحجي وحده طلع عليها ما ادري ...

اكولك حباب ارجع للبيت وانهي القصة ليان سولفت الي ترة شي تافه ..

راحوا .

شفت كومه مكالمات منها .  

اتصلت بيها

ابسرعة ردت

منو هاي اجتك ؟؟؟

اكلج اني راجع للبيت بس لا يكون عبالج لان هد ....

قاطعتني

منو هاي اللي اجتك ...هاااا رجعت لسوالفك ..... جاوب ...اجيب نسوان بالحرام واني اهنا الوب عليك .. انت رجال انت

بعصبية

رجال وغصبا ما عليج ........شو انت صايرة ما اتعرفين تحجين ....اي جايب وحده شتردين بعد  وكل يوم انام ويه وحده شكل ارتاح.....

ردت اكول ارتاحيتي هسة انسد الخط ..!!

***

يقين

شفت عمتي  نزلت من غرفتها من جديد جان وجهه خالي من المكياج

رحت الها بس ردت فرصه اسولف وياها ...

اخذت ماي

عمة .. اريد احجي وياج ...

بعدم اهتمام

بعدين بعدين

بس  اني

طلعت تلفونها وقاطعتني من خلته يدك على ليان بأهمال على الطاولة وكعدت ..

الووو اشلونج جواهر

ها ليان ....طلعتي حامل ...بشري ..

اي ليش ماكالت الج يقين

ها مبروك ..اتكومين بالسلامة

يوم الج انشالله

ما اعتقد  .. 

يا ليش هيج جواهر .  نسيتي كلامج لازم  ما نقنط ويجي يوم يصلح كلشي

ما اعتقد ليان اني تعبت من كل الي حولي ....احس نفسي نخلة و قبل لا اتموت الكل حاد منشارة عليها واولهم اخوج

جواهر ..

اي يا ليان اخوج ..كالعادة يشرد ويعوف غيره .... ما فكر بيه ولا بسمعتي   ولا بحبي اله اللي مخليني صابرة عليه .. بس

يلا كلشي اله نهاية

شنو قصدج جواهر لا يكون تردين تجين

وين اجي واني حتى ابوية كسرت كلمته ..

تنهدت

وليان خافت عليهاوتسال بيها شصار

ليان .... دربالج على نفسج ...  هسة دخت اريد انام ...تصبحين على خير

سدته

وكامت

كنت اسمع كلام عمتي وليان متقطع گلبي عليها وحسيت بينها وبين ليان صايرة صداقة قوية بينما اني خسرتها بسبب الضروف بعد ما كنت اقرب الناس الها ...

هسة اعرف اخبارها من الغير ..

جنت كاعده كدامها اخذت الماي وراحت

عمة مو بعد وكت على النوم ...اريد احجي وياج...

اريد انام تعبانه ...لا اصحوني باجر من وكت خلي ابنج يم بيبيته الصبح لا يجي يدك بابي ...

عافتني وراحت ...

***

ليان

رباب الساعه ب ١ بالليل رسلت الي عنوان حسين ..... وكالت الي انروح باجر سوة

اووف شلت هم لعمتي ...

الصبح

جذبت وكلت الها رايحه يم رغده ....

رحت صدك يم رغده

انتظرت اهناك رباب اترمش الي واطلع

اجتني رغده توها كاعده من النوم ..من كولت الها خطتي كالت

هي البارحه يمه

سالتها

ولج ليش ما كلتي الي اخذ منج  العنوان

كالت اشمدريني بيج اني

رمشت رباب وطلعت .. صعدت وية رباب ورحنا

الساعة توها ٨ ونص

جنت خايفه رغم اني متفقة ويه قيس اروح وسولفت اله رباب تجيني حتى تصلح بين جواهر وحسين على سوء فهم بينهن ما نعرفه . بس هم خايفه لا عمتي تكشفني رايحه ويه ضرتها ...

وصلنا لشقة حسين ظلينا ندك اهواي الا طلع النا اتعجب واستغرب جيتنا ..دخلنا

وهو راح يغير ملابسة ورجع النا

شوف خوية جواهر ترة ما دازتني و وداعت جهالي ما تحجي وياي .. وكله من وراك

رباب الموضوع خلص

لا ما خلص ولا تخاف ليان تعرف كلشي

..

ظلوا يتحاورون منا من دخلت بالموضوع رباب ...وسولفت اله .

....ياسر اخو نبراس و احلام ...احلام جانت وياي بنفس الشعبة جنت بصف الرابع اعدادي ....و جواهر بالخامس وياها نبراس لأن ابيوتنا قريبة حيل جنا انروح ونرجع مشي ... صداقتنا وية نبراس واحلام من الابتدائية مرات نزاعل ونرجع نصالح مثلنا مثل اي مراهقات ....

جان اخو نبراس الاكبر منها يجي ياخذها من بينا واتروح وياه من صف ثاني متوسط ... منا من انعجب بجواهر وهي ولا عبرته ..ودوم انشوفه يباوع الها ونصبنه عليهم ...

وجانت تضايق حيل ..منا من هي هم انعجبت بيه .... صارت بينهم نظرات ...

واستمر علاقة النظرات جواهر وياسر من صف الثاني متوسط الى الخامس اعدادي من صارت ذيج الشغلة ...

حسن اخوك جان مرات يجي يشوف نبراس والي نعرفه بينهم قصة حب ...

بس هي ضايجه من وضعه  المادي.....

ياسر مل من النظرات لأن جواهر ما تنطيه اكثر ...صار يدز الها رسايل بيد اخته واستمرت رسايله من بداية السنة الى الامتحانات النهائية ...جانت تكتفي بأخذها وما بيوم دزلته اي رساله رغم توسلاته بيها .....

اهنا صار سوء فهم بينا و بين نبراس وازاعلن ..... بس ياسر ما تاثر بأخته .. ودوم يجي على الدراجه واحنه راجعات يشمر علينا رساله ويشرد ....

اخر رسالة كال الها راح اجي اخطبج ...

بيوم باخر امتحان

طلعت جواهر ادور عليه

ها ولج اهنا واكفه واهبد عليج

كلت الها

ههههه جاوبتي

اي اكلج رباب هاي نبراس طلعت؟

ما شفتها ما ادري هي مو وياج

لا بغير قاعة ...

حطيت ايدي كدامها

يلا نمشي

اي نمشي ولي ايدج هاي ثول ما شايفة حلقة

هيهيهيهي جا غير انخطبت للهيبة كظوووومي يووومه فديته والله

هههههه والله ما مصدكه هذا سنين بلا زواج وكلها حاطه عينها عليه وتاليها ياخذج انت الهبلة ههههههه

هيهيهيهيه اني همين هههههههه

عزيز جهالة اشكبرهم وهذا بعمره وتوه خطب

يلا ولج شسوين

دقيقه

ياا

جواهر فرغت جنطتها وعدلت غراضها من جديد ...

تهي بي حتى اهنا اتعدلين

ولج مو اعدل دا ادور على رسالة يسوري

مممم عيني انت همين راح يخطبج

طلعنا وشفناه واكف

هذا على اخته واكف لو الج هههه

ما تحنين عليه خطية دكتبي رسالة رد

كالت

ما جواهر صعبة المنال

يا ويلاه ديانا حداد دمشي امشي

ضحكنا من شفنا حسن اجه ومن شاف ابن عمه ليوف بالبايسكل وطلع من دربونه ...يمكن جاي يشوف الحب نبراس ..

اتوسلت الها ندخل لمحل مرطبات جنت حيل عطشانه ......

دخلنا وكعدنا اني وياها طلبت ايس كريم

وهي شربت عصيرها وتنتظرني اخلص ...

اليوم كاظم كال اجي اخذج من المدرسة بس شو ما اجه

اكلي ابسرعه

اهنا فاجئنا ياسر وكعد يمنا ...

تلخبطت احوال جواهر

يباوع الها ومبتسم

خلصي رباب

هبهيهي خليه خطية

طلب عصير

وجواهر ما تباوع الها

بس بعدين لكفتها تبادلة النظرات وبطلت اتلح عليه انكوم ...

اشوية واشوفلك من الجام سيارة كاظم فاتت طالعه كبل للمدرسة ....

انطاها شي بايده واخذته منه

كاظم كاظم كاظم

باوعت الي خايفه

ولج امشي انروح .....

رحنا نركض ... لا يلكفنا وحدنا كاعدات

بمحل مرطبات منبهين علينا ما نسويها

واحنه نعاند لا وبعد ياسر كاعد يمنا او يم جواهر .. انهفي بالعبي ركاضي سويناها

هو نزل من السيارة واحنه هدينا بالمشي

عزة عزة

شكووو ولج

راح انروح اله وانكول ايسنا منك ومشينا وشفناك من اجيت وانت ما شفتنا .

لج جنطتي جنطتي  يا كاظم هذا

عااا

عفتها بالمحل ....

وكفنا حرنا ... كالت راح اروح اجيبها وكولي اله جواهر من زمان طلعت من الامتحان ورجعت للبيت خل يوصلج .

شردت راجعه للمحل ..

اهنا هي سولفت الي اللي صار اني رحت ويه كاظم ...

وهي رجعت للمحل سالت عن جنطتها ابو المحل كال الها الولد الي وياكم اخذها

اخترعت ....جان توه نازل التلفون الموبايل ومشتريه واحد.واجيبه بالخفية تتباها بيه .. بالجنطة وغراضها واخر رساله توه انطاها الها

راحت لبيت نبراس .. ومحتارة اشلون اجيب الجنطة ...هاي نبراس مزاعله وياها ..بعدين كالت اجيبها واصالح نبراس

دكت الباب وكالت اطلب منهم اشوف نبراس اكيد رجعت هسة واطلب منها الجنطة وافهمها على غبائي  ..

انفتح الها الباب وصار بوجها ياسر

اخترعت ....

ياسر الجنطة

هاي شصاير بحالج ...

اي من وراك عثرت بنزيزه و وكعت

عباتج معدومه ...

وين الجنطة .. ادخلي غسلي

وين ادخل جيب الجنطه

هاي اول مرة نحجي ويه بعض وهيج وياي ليش

الله يخليك الجنطه .والله خايفه ..

ادخلي غسلي وروحي والله اشبيج ..

لا روح جيبها

بس كولي اتحبيني لو لا ...مو الله انشلع گلبي اسنين واني اتمنى هالكلمه

اتباوع منا ومنا

اي اي ما اشوف اقبل اخذ رسايلك

واخير سمعتها والله اخذت الجنطة وما لحكتج حتى بس اسمعها منج

ظلت  حارنة كال الها .. نبراس اهنا ادخلي غسلي بالصونده على ما اصيحها الج ..

عاف الباب مفتوح ودخل .. وهي دخلت ...اخذت الصونده وتنتظر نبراس ..

اهنا دخلت نبراس وية ابن عمها حسن و احلام همين و شافوا جواهر بنص حديقتهم .... تغسل بوجهه من الحر .. هي ردة فعلها من الصدمة خلتها  خايفه ورجفت من عرفت نبراس ما راجعه

اهنا طلع ياسر

واعيونه على الجنطه اول ما طلع

هاج هاي نسيتيها من خوفج شجاج

شاف ابن عمه و خواته . هو هم ارتبك .. يريد يصحح الموقف

جرت جنطتها وشردت ...هي ماخذه على نبراس وعلى امها ... كل ظنها همه بالبيت وراح تطلع الها نبراس ..

انوب من طلع بيده جنطه ايدها الصغيرة الموقف كله انفهم غلط ... برر الهم حسب علمي بس نبراس ابد ما صدكته ...

طلبها مرتين  دز امه ورفضت امها كالت محجوزة هالجواهر وام ياسر بعد ما قبلت اتروح مرة ثالثه

وفضت الموضوع ام جواهر من يمها ..

مثل ما زوجوا عزيز جبرا هي هم ما خلوها تكمل وتزوجت ابن عمهاووهي بالها ياسر ظل  .. بس بعدين اتعايشت ويه زوجها و هو  حبها حيل وياسر حب مراهقة ونظرات وراح لسبيله وازوج الرجال  يمكن اول ما شافتك رجعت لذيج الايام الحلوة 

... بس بعد الزواج انت تملكت عقلها وقلبها وصدكني جواهر دومها صاينة نفسها وبيتها  انت تختلف جذريا عن كل الي عرفتهم سواء ياسر او زوجها و حبتك حيل ....لا تخرب كلشي بيدك

ضجت هذا ليش هيج سوة بيها بس اعرف ياسر نيته مو سوء ولا صاحب هيج سوالف صدك رايدها وما مفكر بيها غلط يمكن رادها تغسل واتروح والدليل جاب الها الجنطة

......

كلام رباب اشوية برد عليه وطفى ناري اللي كل يوم اتغطى بيها .......

وقررت  اخذ ملابسي وارجع اليوم للبيت و كلشي ينحل مدام اشوية هدا بالي علاقتهم حتى كلام مابيها ماتسوى اخسرها من وراها .....

تذكرت كلامي البارحه وياها واشلون انتهى ...  يمكن نحتاج وقت بس كل شي يهون مدام صفى بالي علاقة مو مثل ما توقعتها ....بكل ليلة اتخيلها هي وياه جانت وقبلت بيه مع هذا !

دكيت عليها مرة وماردت اضاهر زعلانه ..

البارحة جنت حيل نار وياها ...هو لعد اني ليش عايفها بس اتسولف وياي افقد السيطرة على نفسي ...

***

ليان

رباب ما قبلت اتوصلني للبيت كالت انروح لهلج نسلم على جواهر واريد اراضيها متت من الخصام .... اخوج وجه لان من فهم السالفة  سويت العلية بعد .. اني هم ..خابرت قيس وكلت اله وافق .  

***

يقين

ما رحت للدوام قررت ابقى اطيح بحضن عمتي و اراضيها على كل مرة عليت صوتي عليها .. على كل تجاهل بدر مني سواء بكلام او بفعل ... 

دكيت بابها ما ردت ..فتحته ومديت راسي شفتها نايمة على ضهرها ما حبيت ازعجها  ..

رحت اتريكت ..  ودكت الساعة بالتسعة ...

هم رحت الها بس مديت راسي على نومتها .....

عفتها ونزلت ...

بالعشرة اندك الباب ...جان محسن طالع قبل ساعه للشغل وعمتي ام حسن بغرفتها وختام بالمدرسة ......

رحت فتحته شفت ليان ورباب سوة!!!

دخلتهم 

بعد السلام ... فتحت موضوع عمتي ..

رباب

هسة مو وكتها نفهمج انت اللخ .. وين عمتج

نايمه

اشعجب لهسة نايمه

كالت تعبانه ولحد يصحيني ونامت ...

اجتنا ام حسن كعدت يمنا وكالت كعدتي عمتج اكو واحد ينام لهسة هم يلا اسوي غده ...

رحت الها ...

عمه كعدتي .. فتحت الباب .. 

دخلت عمة عمة ..

انتبهت من الصبح اجيتها هي على هاي نومتها ...على ضهرها واديها على جوانبها ......   

عمة....

اتقربت اكثر وبأيدي حركت ايدها بخفه

عمة ....

جانت ايدها باردة ...

عمه

حركتها  بقوة هالمرة ما صحت....

كلت واني مخترعة ...

عمة ....اصحيى..!!!!

ليش ما تصحين وانت على خطوات اكعدين ؟؟؟

عمةة... عمة

ماكو رد عقلي انهار ...ليش ما اجاوب ...رفعت ايدها ....جانت خاوية وكعت من ايدي بسهولة ...

اتراجعت للخلف مفجوعة ومنهارة تماما ....اريد صوتي يطلع اختفى ..بس الدموع ودكات كلبي توجعني صارت ...  نزلت الدرج اتعثر ..... اريد احجي ما اكدر ... اريد اكول الهم ...

رباب  اول ما لمحتني ابجي ...

شكووو!!

اشر الهم على مكان الدرج ...ركضت ليان للدرج و رباب وراها ...وام حسن

اسم الله شصار

شصار

؟؟؟

صعدن

رباب دخلت

شافتها نايمه

جواهر....اكعدي .... اكعدي خيتي   اصحي ....  اكعدي هاي النومة ما اتلوك الج ....

ليان

جواهر ...

خاف مغمى عليها ...

رباب

كومي خيييتي اعرف نومتج هاي  نومة وداع .....كومي يا خيتي .. .

تبجي واشبك بيها ..... عمتي  ام حسن توحد الله  وليان تبجي واتكول مدا تتنفس جسمها بارد خاوي .. 

رباب تنحب .....نحب رباب خلاني اجمد بمكاني ....  

راحت ليان اتخابر... وصارت ربدة بالبيت واصياح قوي واني اخذتلي زاوية بغرفة عمتي وصافنه عليها ...  هي نايمة اي نايمة وهسة تصحى ..... هيج احاول افهم  نفسي حتى اكدر اكوم ....اسمع ابني يبجي واصياح ام حسن ترس البيت ...

اهنا شو دخلت امي وقيس ....اي شفتهم دخلوووا

قيس وخر رباب عنها ....

رباب  اصيح وما تقبل اتوخر امي سحلتها وكعدت على الارض بالممر وراسها على صدر امي واصيح بعلو صوتها ...

***

ليان

خابرت قيس ما اعرف غيره امان يطمني ان كلشي بخير ...اجه وجاب امه ...طلعنا من الغرفة وخابر ومدري شنو سوة ...

اجه عمي عزيز  يركض ...حتى ما كال سوة الي طريق ركض للغرفة مال اخته دخل واني وقيس وكفنا يمه ..

ولك ليش ما اتصلت بالاسعاف

قيس يبجي ويكول ما اريد  بوية  الروح مفاركتها من ساعات مبينه

اجه والدها .. وياه علوان و عايد ..

صعد كبل شافها 

بوية   ... 

طلعت لبرة ما كدرت اشوف هذا الرجال الهيبة من نزع عكاله وحطه يم  ايدها و كام يبجي ... 

بكاء ونحيب  ... بعد ما اميز الوجوه من الدموع ولا الناس الي اجت ....

محسن توه الا اجه ..مفزوع .. 

***

حسين

نسيت تلفوني بالشقة واني بنص الطريق ... رجعت من جديد وجان طافي من الشحن .... جنت داك اغنية هيثم يوسف وين انت عيني ابعدت  ..

   وصلت لفرعنا ...شفت سيارات سادات الشارع  ...

وكفت استغفر دكيت هورن .  

ونزلت ...اريد اشوف هاي شنو صاير ميت عدهم الجيران وهيج سادين الفرع ع العالم  ..

السيارت ممتدات لبيتنا .هاي شنو

اتمشيت وشفت سيارة عزيز  وسيارة قحطان ...اعرفهن ..باب بيتنا مفتوح على مصرعة واصوات صريخ النسوان فزعتني ..دخلت واني اكول منو امي !!؟؟؟؟

دخلت   والنسوان بالهول ازداد صوتهن

و رباب لزمتني من ياختي ..

توك اجيت ...توووك  اشعدك جاي

وخرنها عني واني ما اعرف  مأخوذ من الموقف شفت كدامي امي  تبجي ..... وزلم يم الدرج ...  لفت نظري الشيخ بهيبته كاعد على الدرج وابنه فوك راسه يبجي ... والزلم صافنه والي تبجي كلهم اخوتها وهذا ابن عمها و بعد غيرهم ما اعرف شجابهم اهنا ....ما اريد اعرف شي ولا احد يفسر الي اي شي اجاني محسن ...ذب نفسه عليه

البقية بحياتك ...

دفعته واباوع بعيونه

مرتك الله اخذ امانتها ...دفعته و اريد اصعد الشيخ ساد عليه الدرب ..والزلم اتربت على متني البقية بحياتك ....عزيز نظراته من بين دموعه خوفتني اكثر من التعازي ... اتعديتهم من كام الشيخ وصعدت ....

الباب مسدود ....فتحته واني ما اريد افتحه .....اريد ادخل ورجلية ما تقبل تدخل .....   اتخاذلت .... بس دخلت .... شفتها .... لا مو هي .... شخص نايم و مغطين راسه ...مو هي .   اديه تعرش بالكوة رفعت الغطى .... وصار وجهه كدامي ......مغمضة بسلام ...هاي نايمة ليش هيج جوة مسوين لعد  ...

اريد انطق اسمها هالمرة صعبة عليه احروفه ....

اتلمست خدها ....جان بارد .....

ما كدرت اكول شي ..... غير اني هزيتها تصحى ...

بعدين ما اعرف اشلون طلع صوتي وصيحت الها اتكوم .... اني رجعت ...والله رجعت مو كلتي انتظرك  . 

مو انطتيني وقت ....مو كلتي اخذ راحتك ........كومي ..... هاي اجيتج .....والله لو شنو مسويه اني راجع الج ولا بيوم فكرت اعوفج ..... الوقت الي كلتي عليه شو قصير ..... قصير  حيل ما اتفقنا هيج ..... احس جسمي اتحول جثة هامده وناس ما كدرت افرزنهم بعدوني عن جسدها الي حطيت راسي على صدرها واترجاها .

كاعد واشوفهم كدامي جابوا تابوت ....

***

ليان

اسمعهم يحجون ... ....

وطلعوها نزلوها من غرفتها والاصوات علت ....بس شفت حسين منزل راسه  واكف على صفحه ....

اخذوها للمستشفى ....اهنا انطوا رشوات وعدهم معارف  حتى يطلعون شهادة وفاة من غير تشريح .... اسمعهم يكولون جثة وجثة ولا مصدكه يحجون عن جواهر اللي البارحه خابرتني وتحجي وياي وصوتها بأذني لساااه ....

***

حسين ...

الوادع الاخير من شلت بأيدي التراب و ذبيتها عليها ....كملت كلشي وياهم  و وكفت اول يوم عزة ....بس بالي وفكري متأمل من ادخل للغرفة الكاها بيها . !!!!

***

يقين

عود مرن اربعين يوم واني ولا مصدكه جواهر تحت التراب جسدها  ...  صح ما صحت ولا نعيت ساكته لأن صوتي ما يرضى يطلع بس نار وتسعر بيه ...

انكلبت حياتي صارت سودة عاتمه .....

محسن كل فترة يروح للنجف يجيب حسين من المقبرة وهم ياخذلة كم يوم ويمنا ويرجع يسكن النجف .

اني اصلا مارحت غير مرة لا اريد اشوف القبر ولا القطعه ولا اصدك جواه عمتي نايمة .....

وهاي مرت ٦ اشهر على وفاتها ...

عفت دراستي وجانت اخر سنة الي وامي تاخذني لشيوخ ومزارات حتى صوتي يرجع الي ومحسن وداني للطبيب لكن اني حتى رافضه احاول انطق روحي هملت الدنيا ...... عمتي عافتني وهي زعلانه مني .....ما استغليت كل ثانية وياها وشبعت منها كضيتها زعل وحقد .. 

ما ادري بيها عمرها قصير .. ما ادري بيها ساعاتها معدودة .... عمتي الي عايشه وياها بنفس الغرفة .. جانت منهارة وماتت بنوبة قلبية مفاجأة .. ؟؟ هذي الانسانة الكبيرة القوية كانت مثل الشتلة الي تنروي من احبائها ومن خذولها كلهم ذبلت و نامت نومتها الاخيرة هدوء انسحبت روحها منا من غير ما نحس نسمة هوى طيبة وغادرت ديرتنا

***

حسين

طلعت حبيبة العمر  دقات    گلبها معدودة واني الي ماخذ العمر على هوادة ما حسبت حساب الفراق ...!!!! لعد شنو  من زوج اني الي يموت مرته من حسرتها عليه شنو من حب جان عندي ؟؟؟؟ اتحط العلاج بعلب مقويات   ... رحلتها وياي قصيرة ...كالت اخذ وقتك وهي وقتها قصير .

بعد وكت على هجرانج ....

حلفتي ما اطلعين من بيتج الا على تابوتج  ووفيتي ...اني الي ما وفيت ولا استاهل ...... ما استاهل منج اي ذرة حب

***

ليان

راحت الشيخة من بيتنا ومن الكل البيوت غابت شمسها .....ضحكتها ...قوتها تعقلها تكبرها  وانقرضت اخر وحده من شامخات البارحة  .... وتركت سيرة طيبة ..من اتوفت الا كل وحده من نسوان اخوتها تذكر مساعده او موقف حلو الها ويا مكثر مواقفها ....

حسين تغير جذريا ....اشوفه مهمل بحق نفسه المشروع والبيع مال البيوت تركه ..كله عل  عاتق عمي عزيز ... حاله مايسر عدوا والا عزيز الكل اتعاطف وياه  .   معتكف عن الناس وجرحه ما اعتقد بيوم يلحم 

اني حامل بشهر السابع

ورباب حامل بشهر الرابع !!!!!!!!! ..عمي عزيز دوم يجينا ما يقطع ولا يوم ...لكن استقرارة يم رباب .....

وعمتي من اتوفت جواهر وشافت الموت اشلون ما يفرق بين الناس وماتعرف اشوكت يجيك تغيرت وياي وهمين اعتقد لان عرفت معدني من خلال تعاملي وياها  ومن حبلت هم اهتمت بيه.. 

يقين حالتها النفسية بسبب الصدمة مخليتنا كلنا بأنذار لحد لان ما نطقت واصلا توها الا بدت ترجع تهتم بابنها على الاقل ! امي عايفتها بحالها وحيل تأثرت بوفاة معلمتها وكنتها ... ختام ما اعرف اتمنيت تهتم بدراستها لكنها ظاله على طريقها الاعوج وحتى رسبت ...

رغده اشوية هدات وبطلت زعلات على اقل شي بعد حملها الثاني ....وسمر ادعي الله يجازيها  ..هي الي نشرت الخبر ...والله يغفر لرغده .....

***

يقين

كمت احاول اتعايش وية الواقع الي اعترضت عليه ورضيت بحكم الله  .. لخاطر ابني

ما انتهت حياتنا مستمرة  ....لكن مابيها اي شي يستحق يروى بعد ما حياة جواهر انتهت ..... لهذا كلت الكم من البداية حياتي  عادية مابيها شي يروي ...لكن جواهر عاشت عمرها ومن انكشفت خبايا روحها غادرت عالمنا ..

رباب كالت ...صح هي ما نست ياسر بزواجها الاول الي ما استمر غير ثلاث سنوات ....لكن حسين حبته و نست بيه ياسر  و كسرت كل حواجز خوفها و قبلت تزوج مرة ثانية ...

النهاية

زهراء العراقية

ارائكم