رواية ماذنبي انا الفصل الخامس 5 - بقلم Renad.m

#قصصي
#ماذنبي_انا

البارت 15

شبعت قهر من سرمد وانتهت حياتها ومستقبلها بسببه ..
تدري المفروض انا اللي اصير فصليه بس هي ماقبلت كالت انت لسانج طويل وماعندج صبر يذبحونج مايتحملون لسانج
اووف ياريتني انا متت ولا هي
..كانت تحب ابن خالتي والولد حاجي ويه امي بس تخلص سادس يخطبها من عرف بيها صارت فصليه تخبل خابرلي يبجي ويكول شلون راح تبات بحظن غيري ..ولج بس اسمع من خواتي يكولن ظفيرتها بطولها متمني اخطبها واشوف شعرها ولج غيري راح يفل ظفيرتها
احمد...سمعت كلامها ومدري شصار بيه بين اللي غيرتي تحركت وبين احتقرت نفسي دمرت انسانه
فاديه ... تركت احمد ودرت وجهي وبقيت ابجي لحد ماغفيت كعدت الصبح احمد مو بالغرفه ردت اطلع ماكدرت وجهي يخوف بقيت بمكاني ورى فترة دخل احمد
احمد صباح الخير
فاديه صباح النور .. وصيت سارة تجيب لج ريوك وحجزت لج عند طبيب باطنيه اليوم جمعه يكعدون الصبح
فاديه.. طبيب ؟ ليش
احمد.. شوفي وجهج شلونه خل يشوفج طبيب وانت شوفي جسمج انتبهت ايدي همين حمر بيهن بقع دخلت للحمام جسمي كله مبقع من صدك خفت تريكت وبدلت وطلبت من سارة نقاب لان وجهي يخوف
تنقبت ونزلت كان احمد بالسيارة شافني بين عليه استغرب .رحنا للطبيب ومن فحصني وشاف البقع كال
الطبيب ... بابا هاي اثر صدمة نفسيه او مثلما يسمونها امهاتنه شوطة ..انت اكو احد مزعلج صاير لج فد شي
فادي.. اي شويه انغثيت.
الدكتور... ان شاء الله ماكو شي راح اكتب لج علاج وانطيج مجموعه اكلات تبتعدين عنها هاي الفترة
اخذنا العلاج وطلعنا للبيت وصلت بوجهي للغرفه صعد وراي احمد
احمد.. سمعتي الطبيب حاولي ماتغثين نفسج
فاديه . اوك ..رجعت نمت لان راسي من البجي احس راح ينفجر
كعدت على صوت احمد ..كعدي فاديه ..فتحت عيني بالقوة عيوني مورمة ومغوشه ماشوف..هااا بيش الساعه
احمد.. بال٢ الظهر يله غسلي حتى تتغدين وتاخذين علاجج
فاديه غسلت وطلعت لكيت صينيه غدة واحمد كاعد تغدينا سوة ومن خلصت كمت اخذ علاجي اجه وكف كدامي كال:دتاخذين علاج الطبيبه النسائيه
فاديه.. هزيت راسي بمعنى اي
رفع ايده وبعد خصل كذلتي عن وجهي وكال ترى ماتلوك لج السكته اشتاقيت للسانج المبشط
فاديه..مبشط!!شنو يعني
احمد...سامعه يكولون سجينه باشطه يعني حادة تذبح انت هيج لسانج
فاديه.. هاي اني
احمد... اييي تقصفين انت ماتحجين
فاديه... اهااا هيج طلعت
تقرب لي خطوة صار كلش قريب مني وكال بس على قلبي عسل.لاتضلين مغندبه مايلوك لج
مادري شصار بيه من تقرب وحجة بهدوء تركته ورحت كعدت
احمد..تركتها ترتاح ونزلت كعدت ويه اهلي وامي رجعت فتحت موضوع امس وانعادت نفس الهوسه
سارة... صعدت لفاديه .شلونج هسه
احسن الحمد لله ..اكلج هاي الهوسه شنو شصاير
سارة ..على سالفه احمد امس
ليش شصار امس
جا ماتدرين ؟ مو احمد من بعد ماصعدتي نزل وسوة عمل بيهن تعارك ويا الكل وكال لمرت خالي ياتدخلين للبيت وتحترمين زوجتي يا اما الباب يوسع جمل
وحتى امي اللي محد يحاجيها تعارك وياها

فادي...اكلج صدك ليش امج هيج محد بلبيت يكول لها على عينج حاجب
خيه شايفه هذا العز والخير كله من اهلها .ابوي عشكها وجان عمرها ١٦ سنه وهو متزوج وعنده جهال  ظل سنه ونص يوميه خاطبها وجدي يرفض اخر شي كال لجدي انطيني اياها ترى منو يخطبها انا اروح اخربها وهي الي يعني الي ..امي سمعت هيج يحبها ويريدها همين حبته ماظل شيخ ولا سيد ما جابه على جدي اخر شي وافقو بس شرطو عليه يشتغل وياهم لان ابوي كان مو كلش حالته وامي بت خير ودلال .واشتغل وياهم ومشت بيده الفلوس وعمرة مازعلها لو رفض لها طلب الا من صارت سالفه زينه عصب عليها بس ماضربها وداها لاهلها وظل ليله يبات بغرفتها حتى لو فارغه وليله عند ام احمد
واحنا شفنا الويل بغيابها ام احمد بهذلتنه لحد ماوصلت للضرب انا ماتحملت رحت لابوي ابجي وكلت له لو ترجع امي وهي تحمينا منها لو تودينا الها .ابوي تخبل وضرب ام احمد من عرف انها تضربني وراح رجع امي
فاديه ..سارة كانت جميييله جدا شقراء وعيون خضر وبيضه تجنن تشبه امها هيج حلوة
.من عرفت احمد هيج مسوي بداخلي فرحت لان تعارك وياهن يستاهلن
مشت الايام ببيتهم بين مد وجزر ..قرب موعد الشهريه وانا بقلق اريد يصير حمل ونفس الوقت ماريد بس شنو بيدي حياة علاوي اهم
بعد مافات ١٠ ايام على موعد الشهريه كلت لاحمد يجيب لي شريط اختبار بالبيت ماردت اروح للتحليل .خطيه طلع بسرعه جاب التحليل .اخذته ودخلت للحمام بس طلعت ركض علي هااا بشري
هزيت راسي اي اكو حمل
رفع راسه لفوك وكال ربي رحمتك وسعت كل شئ  تقرب لي وحضن وجهي بكفوف ايديه وباسني براسي كال شلون اجازي فضلج هذا شلون اعوضج
هذا مو فضل هذا واجبي علاوي ابني
والله الام ماتسوي اللي سويتي . ياربي تكمل فرحتنا وتطلع الانسجة متطابقه
نزل احمد بشر اهله اللي ماعتقد انهم يفرحون ..بيومها احمد كل شويه ويجيني ويكول مامصدك كنت خايف نتأخر وهذا كله من عمر علاوي محسوب .ماعرفت شجاوبه لا انا الفرحانه بالحمل وافرح له ولا اكدر امثل عليه انا تقريبآ رافضه الحمل ..
فاديه.. احمد اريد احجي وياك
_كولي اسمعج
..احنه اتفقنا زواجنا هو مصلحة
...اي
... انا صرت حامل خلاص خلينا ننفصل
...ليش
..هيج كان الاتفاق
...اي بس انا ماكدر هسه انت حامل وعلاوي بعدة ماتعالج ...ابقي عندي فترة الحمل منها اتطمن ع اللي ببطنج ومنها نعالج علاوي وبعدين الله كريم

فاجأتني بطلبهة الصدك حسيت قلبي رجف من كالت نتطلك ماردت اخسرها تعودت عليها ..تحججت بالحمل وبعلاوي

فاديه..ردت اتطلك واخلص مو متحمله بقائي هنا بس ماوافق احمد ..بعد يومين كنت متمددة على الفراش اتابع Tv ودخل احمد كعد يمي سولف شويه وبعدين تقرب مني حاول يبوسني دفعته كلت له ماكو داعي سابقآ تتقرب لاجل الحمل وهسه صرت حامل بعد ماكو داعي
...اعرف بس انت زوجتي وهذا حقي
..احنه متزوجين باتفاقيه يعني مو زواج طبيعي وبي حقوق وواجبات..حسيت وجه احمد تغير وتعصب تركني وطلع
ما اهتميت لان شايله هم لهاي الشغله واريد اخلص منها طبعآ هو من بعدها بقى يتجنب الكلام او التواجد وياي بنفس المكان .وعلى هذا المنوال مشت ايامنا
.....
فاديه ..احمد اتصل بدكتور علاوي وبقى يتابع وياه والمفروض من اصير شهر الرابع نروح لتركيا نسوي العمليه .بخلال حملي وصلت للشهر الثالث علاوي كلش انتكس وضعه واضطرينا ناخذه لبغداد اصريت اروح وياهم وسافرنا انا واحمد وامي .استقرت حاله علاوي ومن طلعنا من المستشفى اصر احمد نرجع للبيت كان رافض فكرة ان نروح لبيت عمي ابو كرار  ماعرفت ليش .رجعنا للبيت وامي اخذت علاوي عندها لان كلش خايفه عليه .نمت من التعب بدون عشاء
احمد.. كعدت الصبح هي نايمة وتعبانه وماحاسه بشي بقيت اباع عليها واحجي ويه نفسي ياربي تعلقت بيها بديت احبها واشتاق لها شلون وهي شكلها مصرة ع الطلاق .
خاف اطلقها وياخذها ابن عمها .اذبحة والله ومايلمسها مرتي هاي انا ماكدرت اخليهم  يرحون لبيت عمها خاف يشوفها
نزلت وتركتها نايمه رحت جبت علاوي خلي امها ترتاح خطيه من رجعت دخلت الغرفه لكيتها كاعدة وتبدل ملابسها بس شافتني ركضت ختلت ورى الكنتور خليت علاوي ع الفراش واجيتها هي من استعجالها ماكدر تلبس بقت تستر جسمها وكفت كدامها... الى متى فدوش ولج مشتاق لج انت ما اشتاقيتي لي
فاديه ..هزيت راسي لا
ليش ليييش
احنه ممتزوجين علمود هذا الشي احنه زواجنا ع الحمل وانا حملت
ولج انا زوجج وهذا حقي
وانا ماكدر انطيك حقك.
ليش شنو تغير
ماتغير بس هي من الاول صعبه علي وكل مرة كانت على اعصابي
من كلت هاي كلمتي ضرب الكنتور بيده حيل ولزمني من فكي وكال انت اكو بقلبج واحد ..هنا حسيته صورة ثانيه لسرمد كرهته كلش دفعت ايده وكلت له مو شغلك كافي انا ضحيت هواي تضحيه الام ماتضحيها لابنها تركت اهلي ودراستي وتزوجتك وانت كنت زوج اختي ولك صعببببه صعبببه موت وانحسبت عليه زواجة وراح اتسمى مطلقه واتورط بطفل مارايدتة بس حتى ابنك يعيش ابنك اللي عمرك مافكرت بي من خليت اختي حامل ومامرة شافتها طبيبه لو هامك ابنك كان هو ببطنها وانت تابعت حالته
وانا ضحيت بهذا كله وهسه جايني تكول بقلبج احد ليش انت فكرت بقلبي بقلب اختي الله يرحمها تفكر بس بنفسك  كنت احجي وجسمي يرعش من الاعصاب والقهر
على صوت صياحنا علاوي ضل يصرخ راح له هو شاله انا لبست واخذته منه طلع وتركني بقيت متخربطة وضعيتي وصار نظري يغوش واحس حلكي ناشف اشرب الماي مادري وين يروح اظل عطشانه
احمد.. طلعت من الغرفه دايخ ليش ترفضني هي صغيرة وهذا التقارب مامعقوله ماحرك مشاعرها مامعقوله ما اشتاقت لهاي المشاعر ليش ترفضني ليش بقيت افتر بالسيارة بالشوارع وفكري يودي ويجيب كلت اكيد تريد واحد قررت اراقب فونها بلكي اعرف شي
بعد شويه اتصلت سارة ..
وين انت
طالع ليش
اذا قريب تعال ارجع مرتك مدري شبيها تخربطت
فريت السيارة ورجعت لكيتها تعبان شكلها وترجف اخذتها كبل للمستشفى وسوولها تحليل طلع صاعد الضغط والسكر والدكتورة كلش حذرتنا من هالشي لان حامل وصغيرة بالعمر
حسيت انا السبب ورجعت وكلت لا اكيد ارتفع سكرها لان خافت لان كشفتها عندها شي بدة الشك يسيطر على تفكيري

#قصصي
#ماذنبي_انا

البارت 16

بذاك الوكت فكرة وحدة سيطرت علي اعرف فاديه تحب واحد لو لا .رجعنا للبيت ولازم اعاملهة بهدوء لان حياة ابني متوقفه عليها وطفل ثاني الي ببطنها .وصلنا من دخلت الغرفه وتمددت ع السرير مانطقت كلمه بستها براسها وكلت لها اسف ماقصدي تعصبت عليج
هي بساعتها بجت واول مرة اشوفها ضعيفه كل مرة تكون قويه ولسانها يرمي مو يحجي.كالت. .كافي ارحمني تزوجتني غصب وراح تسويني ام غصب وتريد تعاشرني بفراشك غصب والله ماكدر حرام اللي يصير بي .انا اللي بعمري ماشايفات هم وانا قلبي محمل هموم .تدري صديقاتي يوميه يراسلوني يشوفوني شنو جهزو ملابس للكليه وانا هاي حالي حامل ونساوة تعبتني ومسؤوليه طفل براسي .ترى انا والله مو مال هيج عيشه بس ابن اختي بيدي اساعدة وماكدرت ارفض .احمد هل جزاء الاحسان الا الاحسان

احمد..اسمع لها واتكطع اكول حقها خربت حياتها بس مو بيدي حبيتها صرت اريد اعيش وياه كزوجة واشاركها كل شي .هاي احنه الشروك اذا نحب لازم اللي نحبه تكون النا لو ببيت ابوها نحكم عليها النا مو انا هي عندي وبذمتي وماتريدني ماكدر .وفكرة الطلاق صاعده براسها شلون اطلكها شلووون وانا اعرف لو تطلكت وراحت داومت كليه راح تكعد لها الشباب ركبه ونص.واولهم ابن عمها
ماطلكها حتى لو تكول خلفت وعدك اوفرلها كل شي تريد حتى لو اروح وياها لبغداد تدرس .فضلها علي جبير ماكدر اجازي وفوكاها حبيتها لو انطيها عمري قليل
تركتها تنام وطلعت منها وصيت سارة عليها
رجعت وهي نايمة ماعرف ليش فكرت اخذ تليفونها اخذته وفتشتها كله حفظت صفحتها بالفيس والانستا
نقلت كل ارقام بتليفونها .فتحت الانستا ودخلت ع الدردشه وشفت الها مراسلات ويه وحدة الظاهر اقارب كلت بلكي اعرف شي من خلال المحادثات .قريتهن كلهن وعرفت ان كرار رايدها وهي كايله ماريدة لو بس هو بالدنيا وعرفت انهم متواصلين ويه سرمد
فارت روحي من قريت الكلام ردت اكوم اجرها من شعرها بس تعوذت الشيطان لااظلمها مثل ماظلمت اختها  خل اسالها واشوف اذا تكذب لو تصدق
باليوم الثاني طلبت تروح  لامها واخذتها للمغرب رحت جبتها ماصبرت البيت موحش عليه الغرفه احسها تاكلني بدونها .من اجت قررت احجي وياها
اكلج  كرار ابن عمج من سألتج عنه ليش كلتي ماريدة
مايعجبني
ليش
لان نسخة ثانيه من سرمد
وشبي عيني سرمد مو اخوج الله يكرم
شوف خل اكول لك شي سرمد مو بس اذاكم .احنه بعد مافكر بينا ماكال خواتي شنو مصيرهن.ابوي الرجال الكبير شلون راح يواجه العالم بعد سوايته وصخام وجهة اللي تصخمنه بي
لاعبالك انا بجانب سرمد طول عمره اناني ميحب غير نفسه دللته امي لحد ما فسد من الدلال عمره ماحبنه ولابقلبه محنه علينا.كانت ايده والضرب

.احمد ..بعد ماشرد هم اتصل بيكم هم عرفتو عنه شي
فاديه...بعد فاتحة المرحومة بيوم اتصل فيديو على امي بس انا اخذت الفون ولعبت بي لعب وابوي كال له الله لايرضى عليك دنيا واخره
..وين هو هسه
ماعرف
اكيد
اكيد
تركني احمد وطلع وانا متت خوف لان كلامه واسلوبه خوفني احسه اذا شاف سرمد يذبحة شلون بي ياربي
بقيت بالغرفه ساعه مارجع كلت خلي انزل اشوفه نزلت كانو اهله كاعدين بالهول وهو مموجود رحت للمطبخ اشرب مي لمحته كاعد بالحديقه اووو هذا قافل كلش خلي اروح يمة احجي وياه ..بداخلي ماكنت ضايجة لان زعل مايهمني هو بشي ابد بس خفت من سؤاله عن مكان سرمد شيريد منه واذا عرف مكانه شنو يسوي مهما صار وبدر من سرمد يظل اخويه ماريدة يتأذى واحمد بيني وبينه علاوي اللي صار اعز من روحي وبينه طفل ببطني ماريد ايدة تتلطخ بدم اخوي ويكون ابو ابني قاتل وقاتل المن لاخوي .احنه اصلا علاقتنا معقدة وبيها جروح ما ممكن تشفى .ماريد يصير شي يزيد الوضع تعقيد .
طلعت امشي للحديقه لكيته كاعد على كرسي وبيدة جكارة كعدت بصفه
اول مرة اشوفك تدخن
..مودايمآ ادخن
من شفت جوابه ناشف كلت خل الطف الجو حتى يقبل يسمع مني .دكيت باصبعي على جتفه التفت لي
هاا
اريد اجربها وءاشر بعيوني ع الجكارة
كعدي وسكتي .ودار وجهة
رجعت دكيت على جتفه   جاوبني بملل هااا
حباب بس نفس واحد اريد اعرف شنو طعمها
هسه الزكج براشدي
اوووي شدعوة عليك ماشايفه واحد يدخن لا ابوي ولا اخوي يدخن وحامل واشتهيتها كفرنه خماكفرنه .
اي كفرتي شنو مرة تدخن وين كاعدين
كاعدين بالديوانيه اعرف كل شي عيب وكل شي ممنوع ..حبيت اضوجة ماعرف ليش ... ماريد جكارتك الله لايعوزنة اخوانك كاعدين بالهول والجكاير مكومة يمهم اخذ لي وحدة اجربه ردت اكوم جرني حيل ولزكني بالكرسي
كعدي لا احش رجليج
...احمد شبيك شلون تدفعني هيج انا حامل خضيت بطني
...لا اخليج ترحين لاخوي تاخذين جكارة
...اي شسويلك كلت لك نفس واحد ماقبلت
التفت لي ورفع حاجبه وكال..مو كانت بحلكي ماتلعب نفسج مني
لا ماتلعب نفسي
جا ليش بالفراش تلعب نفسج
ماكلت لك تلعب نفسي كلت لك صعبه ماكدر اتقبل الموضوع .وانت تلح حتى ماتقدر وضعي الصحي وبعدين الناس تتزوج عن حب وبفترة الحمل الزوجة ماتحب زوجها يتقرب لها هرموناتها كلها مخربطة وتعبانه
احمد..جاوبتها بلهفه يعني اعتبر اللي احنه بي وضع مؤقت
الصراحة   لا
كومي فاديه لاتحركين دمي كومي طبي جوة
كمت شلت الكرسي مالتي حطيته كدامة كلت له ..ميخالف نسولف شويه وتسمعني .ميخالف ماتعصب
اسمعج
للمرة الالف اكول لك انا مامخططة لحياتي هيج تصير وربك اراد وصارت لاتصعبها علي انت .اكول لك الصدك انا من اجيت للديوانيه هواي انخطبت بس كلت لو اموت ماخذ شروكي يمة ماينجرعون اعصاب والمرة يلفلفونها ويحبسونها بحجة الحب والغيرة وحتى شغله الفراش والاطفال هواي تلحون بيها وتردونها  بس صارت واخذتك ماكدر اتأقلم وياك لا تفكيرنا متقارب ولا الماضي اللي بينا سهل واتجاوزة
...الشروكي الماعاجبج من يحب مو مثل ابن بغداد يمشي وياها بلبس مقسم جسمها واليسوة والمايسوة يباوع لمفاتنها الشروكي المرة عنده جوهرة من يلفلفها مايسمح لاحد يمتع عيونه بيها لان عرضه ينطي روحها وماينطيها  والحب عنده مو حجة الحب عندها اخلاق ورجوله لو حبينه مانذل اللي نحبها نحترمها ومن نمنعها من لبس معين ونفرض عليها عباة وحشمه نريد مظهرها محترم مايسمح للتافهين بالشوارع يتعرضولها .وانا مقدر وضعج وطباع اهلج ووين كنت عايشه ومالبستج عباة خليتج تلبسين جبه محتشمة صح لو انا غلطان
...لا حشاك
وسالفه الفراش احنا مانلح بيها الا لسببين الاول بسبب الحب لان مشاعر الحب والشوق هي تخلي رغبه الفراش والثاني من اتقرب لمرتي بالحلال افضل احصن نفسي واحميها من الحرام هم انا ماخذ حقي وهمين منطي زوجتي حقها وبحلال الله
... عندك حق بس والله صعبه علي انت كنت زوج اختي ماعرف ماكدر احس نفسي اخذ مكانها احس اخونها
احمد.....تقربت لها وكلت لها اختج طول فترة ماهي يمي مرتين مررررتيييين فقط تقربت لها مرتين اثنين فقط .وهي بلسانها كالت لاتطلبني لفراشك بعد ما اريد
فاديه .. بقيت مصدومة من كلامة ماعرفت ارد
كلت خلي اغير الموضوع
...ممكن اسألك سؤال
...تفضلي
اذا صار وعرفت مكان اختك وسرمد شتسوي
اغسل عاري
شهكت حيل وضربت صدري ..يمممة يعني تقتل
نظر لي نظرة بكل جمود موتتني خوف حسيت بي مقرر وخالص انه يقتلهم ...احمد جاوبني تقتل ؟
اي
ليش ليييش يعني انا الله  مايحط بطريقي الا وين الرجال اللي همه نفسه ..اخوي الوحيد اخذ اللي رادها وماهتم النا ..وانت ببطني منك طفل وبحضني منك ابن اختي تريد تقتل اخوي حتى خاف اكول الله قدر لرانيه الموت هسه لاااا انت ايدك ملطخة بدم خال ولدك
ظليت احجي وهو بكل برود يسحب نفس الجكارة وينفخ الدخان
ولك جاوبني صدك تحجي ..انا اولي جهالك مافكرت بيهم منو الهم .احمد الله يخليك شيل الفكرة من راسك
...احنه الشروك هيج اللي يتعدة على عرضنا نقتله
....اعررف اعرررف بس مو انت فدوة لقلبك احنا نريد علاوي يطيب ويعيش همنا اكبر من هاي العادات
...هاي العادات هي النه مثل الهويه .وانت شمدريج شنو عشت ورة سوايت اخوج
...اخوي واختك. اخوي مو لوحدة اختك لو ممطاوعته مصار شي هاي انا كدامك مرتك حلالك ومن ماردت اتقرب لك منعتك
....لزمني من زندي حيل وعصر ايدي ولج كافي نطيتج مجال ترى اكسر فكج والله لسانج صاير شطوله حقج تدافعين عن الساقط اخوج تعرفين شنو صار بينا من سوة سوايته النذل الناس شلون تحجي علينا
...مادافع عنه ادافع عن حياتي انا والجهال من تقتله احنه منو النا مافكرت بينا
...جهالي اهلي الهم موجودين وانت ليش افكر بيج مو متريدني
...ماريدك بسبب هاي عقليتك ماريدك لان خايفه منك باجر عكبه تروح ببلوة من ورة عاداتكم ماريدك خاف تجيني بنيه تنطوها فصليه  وتروح مني ..بقيت ابجي ..تركته وصعدت

احمد..حرقت دمي بقيت ادخن وتذكرت هاي سكرها صاعد ونوب عصبت صعدت للغرفه كانت كاعدة تبجي بس دخلت مسحت خدها وغطت راسها ونامت .نزلت سويت لها عصير ليمون وبرتقال .اجتني امي
المن العصير للمسعدة
يمه الله يخليج البيه مكفيني
اي حقك كعدت يمك شويه بالحديقه ذابت روحك عليها
استغفر الله .اخذت العصير ورحت لها وخرت الغطا عنها بعدها تبجي كومي رجعت الغطا ماريد
رفعت الغطا وجريتها كعدتها هاج شربي لايصعد سكرج
ماشرب مو ما اهمك انا وجهالك تكول الهم اهلي انا ماريد اهلك وخلي اللي ببطني يموت يطبه طوب
اششش كافي عصبيه وبجي نسيتي شكالت الدكتورة مو كالت لازم ينزل السكر لانوب يستمر وياج
يله هاج اشربي
شربته ورجعت نمت بقيت اتقلب بنومي ماغمضت عيني .هذا اكيد يدور عن اخوي شلون اوصل له واحذره .انا اصلا لازم ابتعد عن احمد خلي اقنعه بعد العمليه نتطلك واخذ علاوي واروح لبغداد وحتى عنوانه اغيره اي لازم اشرد منه
بعد هاي الليله ماعرفت طعم الراحة الخوف عاش وياي بعدها باسبوع علاوي صخن اتصلت باحمد يرجع من الشغل ناخذه للطبيب وطلعنا لبغداد العصر وامي ويانه بس وصلنا ساءت حاله علاوي ودخلو للانعاش احمد بلغ اهله وماعرف ليش الله هداهم واجو لنا لبغداد ابو واخوته اثنين
بقى علاوي بالانعاش يوم كامل وثاني يوم  مات ..
من سمعت الخبر من كد الصدمة انشل لساني حتى صرخة ماكدرت اصرخ احمد كلب الدنيا بالصريخ
يصيح ولك بابا كان صبرت لي شويه مابقى شي ونسوي لك العمليه ولك بابا ليش تضيع تعبي ظل كاعد بباب الغرفه يبجي وانا ابجي وياه
ابو واخو مشو باجراءات المستشفى واخوه الثانيه حاول يهدي
احمد.. ولج فاديه تعبنا راح ع الخالي بلاش ولج فاديه راح علاوي
ماحسيت بنفسي حضنته وبقيت ابجي حضني حيل ويصرخ يابويه
التفت لامي راح وكعد كدامها خاله حللني خاله ابريني الذمة الله شوفني نارج بموت بنتج خاله حللني بلكت الله يسامحني
امي...يوم لتكول هيج والله ماشايله عليك ..يوم الله اخذ منك علاوي حتى بيوم القيامه يشفع لك يفتح لك باب للجنه
احمد.....يابوويه علاوي ياتعبي الضاع مني