رواية ماذنبي انا الفصل الرابع 4 - بقلم Renad.m

#قصصي
#ماذنبي_انا

البارت ١١

الطبيبه ...انت موافقه على هيج زواج
فاديه... اي
الطبيبيه ....بارك الله بيج انت عاقله وشجاعه بحيث تضحين بحياتج لاجل ابن اختج
سوت الها تحاليل وسونار وكانت كلها تمام .سألتها عن موعد الدورة الشهريه وانتبهت لفاديه خجلت وصارت طماطة بداخلي ضحكت هاي ام لسان مبشط تعرف تخجل
فهمتنا الدكتورة ان افضل وقت لتلقيح البيضه هو بعد ٣ اسابيع ونطتها علاج وفهمتها شوكت تاخذه
فاديه طول الوقت ماكالت كلمتين او ثلاثه
......
احمد...كعدت ويه اهلي وحجيت لهم كل شي ووجوهم عبست لان راح اتزوجها وامي بقت تصيح وتحلف ماتخطبها .
الاب... صوتج كافي يامرة الولد ابنه مريض وعلاجه بهاي الزواجة شلون نموت ابننا
الام... انا اروح لبت الفكر هاي واخطبها لو تموتني ما اخطبها
الاب ... ترحين وتخطبين وشنو يردون تكولين صار وان سمعت غير شي والله طلاكج بيها
احمد.. يوم البنيه اخذها اخذها خطبتي ولا ماخطبتي ورحم الله والديها قبلت تضيع دراستها وحياتها وتتزوج لخاطر حياة ابني
هااا وحطو ببالكم كلكم ماراح تجي هنا كنه الكم تجي ضيفه بين ماتولد الطفل مو باجر عكبه تجي وتشغلنها وكنسي ومسحي.
الام.. هله هله نوب احنا نخدمها
احمد... اي خدموها مو سنه كامله اختها تخدم بيكم.نسوان ولدج نايمات وذابات جهالهن عليها نسيتو شنو كم مرة نظفت حفاضات جهالكم .
الام... وانت شنو حاقد علينا .بعدها ما اجت وهيج فرت راسك علينا من تجي شلون
احمد ... ماحاقد بس لو خايفه الله بيها كان بقت عايشه ومنها اخذنا علاج الطفل بدل مامشلوع قلبي بي وحدي
بويه رحمة لاهلك فهمهم ماريد مشاكل كلبي خلصان والله .والجمعه المشيه حطو ببالكم
الام .. وبنت خالك انا مو كلت لك اريد اخطبها الك
احمد ... ماريدها ماريد هااااا

فاديه ..اجة يوم الجمعه واحس ويه كل نفس اتنفسه روحي تطلع محد حاس بيه محد فاهمني الموضوع كله غلط بغلط ومجبورة عليه اوووف  شنو كان حال قلبج يارانيه بيوم رحتي فصليه .انا متزوجة بموافقتي وانا ام الراهي ومو طايقه نفسي
صار العصر تعمدت البس فستان قصير لان اعرفهم لبسهم محتشم زيادة .اجت امه ووياها نسوان ٣ خواته امه مبين غصب جايه وانا تحلفت بيهة بس تكول كلمه ماتعجبني اردها  عليها بس بقت ساكته وبناتها اللي حجو
المهر همة حددو احنا ماطلبنا شي. .الغريب نطو مهر كبير

بعدين صاح لي بابا علمود العقد دخلونا بغرفه لوحدنا وياي بابا وماما والشيخ وام احمد دخلت همين .من سألني الشيخ موافقه حسيت قلبي انعصر كوة كلت نعم
خلصت الخطبه وحتى بابا كال مبين كوة جايين بس مجبورين حاجتهم عندنا
ثاني يوم اجالنا احمد وانا بقيت على حالي اطلع كدامه بحجاب وصايه بس امي خزرتني .ما اهتميت شنو يعني يريد يعيش فترة خطوبه خاف مصدك روحة عريس
سأل شوكت نروح نشتري ذهب
فاديه.. ماكو داعي للذهب هي مو زواجة حقيقيه
الام .. ماما ليش هيج تكولين هذه اول زواجج
فاديه.. ورانيه الله يرحمها همين كان اول زواجها جبتولها ذهب؟ شكد نطيتوها مهر؟ مو المهر من شروط عقد الزواج وشنو ينكتب بلعقد لازم تنطونة للبنيه شنو نطيتو رانيه؟ احجي وانا رافعه تك حاجب
الغريب احمد شكد عنده صبر وطولت بال بقى بس يباوع بوجهي
الام.. ماما كافي اختج ماتجوز لها بس الرحمه كافي تحجين بالموضوع ..اكوم اسوي جاي اني
طلعت ماما واحمد صافن بوجهي ...بعدين كال
احمد... سمعيني فاديه ماكو داعي اعيد واكول سبب زواجي باختج لان ماريد افتح دفاتر قديمة.احنا اللي بيننا هسه زواج والغايه منه مصلحة علاوي يعني يجمعنا هدف واحد ماكو داعي نظل واحد يهاجم الثاني ولا عبالج انا راضي عن زواجي بالمرحومة لو باللي صار الها اقسم بالله مادريت بطريقه موتتها وموضوع الدفن الا بعدين انا مو نذل واترك مرتي تموت .ياريت ماتفتحين الموضوع بعد لان كافي علي احساسي بالذنب
فاديه.. ولا تأثرت بكلامة ولاصدكته اصلا
احمد.. اجيت اليوم اريد اكول لج اذا تحبين تختارين الغرفه بنفسج اخذج تختارينها
فاديه لا ماكو داعي انت اختار اي شي
احمد.. على كلام الطبيبه بعد اسبوعين تقريب الموعد اللي كالته مو صح
فاديه .. صح
انت كملي تجهيز واذا والدتج ماتكدر تطلع للسوق انا اخذج
فاديه .. انا ما اشتري من هذا السوق اوصي من النت ببغداد وبنات عمي يستلموهن الي ويدزوهن بيد ابن عمي
احمد.. ابن عمج منو ياعم منهم
فاديه... استغربت سؤاله ... عمي ابو كرار اللي بقينا عندهم ببغداد
احمد .. كم ولد عنده
فاديه .. اثنين ليش تسأل 
احمد .. اكبر منج
فاديه .. كرار اكبر مني وحسين اصغر ب٣سنوات
احمد.. اكو واحد منهم  حاجي بيج
فاديه... شنو يعني
احمد.. يعني رايدج ..خاطبج
فاديه .. لا
احمد .. هم بينكم اتصالات او شي
فاديه.. شنو الموضوع ليش تسأل
احمد... جاوبي
فاديه... لا .. ممكن تجاوبني ليش تسأل
احمد .. هيج عبالي واحد منهم رايدج
فاديه.. لا اتطمن وحتى لو رايد ما اقبل
احمد .. ليش
فاديه.. الي اسبابي
احمد.. ميخالف اكون فضولي واعرف
فاديه .. لا مو ضروري تعرف.. وتركته وطلعت
احمد.. لعب قلبي من كلامها معقوله بينهم شي سابقآ .

#قصصي
#ماذنبي_انا

بارت 12
فادية....
سؤاله عن ابن عمي غريب ليش يسأل .انا كرار اكرها اموت منه
مرت ايام واجتني الشهريه وانا من تجي لي الشهريه انتهي بالفراش ومرات اروح للمستشفى .اجت لي بالليل واهلي نايمين وانا اتلوى من الوجع وصار الصبح كوة نمت كعدت ب١٠ الالم موتني وحطيت راسي بحضن امي وجهي اصفررر وشعري كفشه وكنت لابسه دشداشه قصيرة خيوط فانيله اسود وبالنص صورة زرافه ..امي خطيه سوت لي حليب دافي لان معدتي فارغه بس شربته تقيئت انا هذه حالي كل شهر .بقيت نايمة ع القنفه وامي كامت تسوي غدة ورة شويه كمت يمها للمطبخ كوة امشي اتجيت ع الحايط
فاديه.. ماما فدوة بطني ماكدر بعد وكعدت ع الارض
الام.. خل اتصل باحمد ياخذج للمستشفى
فاديه ..خل يولي
الام .. عيب ماما صار زوجج
خلي اتصل بي ابوج ب٢ يرجع ونوب تعبان يريد غدة شوفي وجهج شلون اصفر .
فاديه .. ماما انت اخذيني خل يولي احمد
الام.. تعمدت اكول لها هيج ..ماشي راح اتصلل باحمد خاف ماتطلعين بدون علمه حرام انت مرته
فاديه.. بطلت ماريد لا علاج ولا شي اروح انام
الام .. اتصلت باحمد وكال هسه اجيب سيارة واجيكم
رحت لفاديه كومي يوم كومي خاف ماتظلين هيج كومي اخذج لبسي .
فاديه لبست صايه وحطيت الشال شلون ماكان وطلعت اسحل بروحي سحل طلعت لكيت بوجهي احمد ..استغفر الله امي ماتبطل سوالفها
احمد.. ها الحمد لله ع السلامة شنو ماكله شي مأذي معدتج
فادية..بقلبي اكول صخام وجهك ياسلامة انت تدري شنو بيه ..الله يسلمك
طلعنا للمستشفى وانا ادعي ياربي كون طبيبه موجودة مو طبيب وصلنا وكانت نفس الطبيبه اللي رحنالها للعيادة والغريب انها عرفتني بسرعه .
الطبيبه ..ها سلامات
الام.. دكتورة والله اجتها الشهريه وكلش تخربطت وتتقئ
الطبيبه .. كل مرة هيج انت
الام .. اي كل مرة اذا مو علاج ومغذي ما تكدر
احمد.. اشوف فاديه عيونها بالارض ومبين خجلت كلش تستاهل ام لسان تقصف قصف ماتحجي  حجي
الطبيبه هذا علاج وخل ينطوها المغذي ..ماما فاديه علاجج اللي كتبته الج بالعيادة من ٥ يوم بالدورة اخذي ولاتنسون حاولو تكثفون الشغل بالايام ١٣ و١٤ و١٥ للدورة الشهريه لان هاي ايام نزول البيضه وان شاء الله ربي يوفقكم
فاديه ... يبوووو شكول عليج ماما الا تجيبين احمد افندي ويانه
طلعت حطولي المغذي وهو واكف برة وعلاوي بيده من خلصنا رجعنا للبيت وطلع ورى شويه رجع وياه صينيه مشاوي ومعلاق
عشتوو عايش الدور عود هو زوجي ومهتم بصحتي
الام.. يمة ليش كلفت نفسك
احمد.. ماكو كلافه وحمد لله على سلامتج فاديه
فاديه .. الله يسلمك
استأذن احمد وطلع وانا ركضت للفراش نمت لان ليلتي كلها اتلوى من الوجع
احمد...خابرت لي عمتي وكالت فاديه مريضه عبالي مستبردة لو ماكله شي رحت لهم استغربت من شفتها صفرررة تخوف عبالك ميته
من وصل للطبيبه وكالت امها اجتها الشهري استغربت مادري بيها هيج تتعب من تجيها الشهريه
تحجي وياها الطبيبه وهي خجلانه صدك ضحكت اللي يشوفها هسه مايشوفها من تقصف
ماعرف ليش تمنيت اشوف خجلها من اتقرب الها ماعرف ليش حسيت تجاه احساس كرجل وامرأة
بالليل اتصلت بيها مجاوبت .دزيت لها رساله (شلون صرتي ان شاء الله احسن)
ماجاوبت معقوله نامت
فاديه تركت الفون والتهيت بعلاوي من ردت انام لكيت مكالمه ورساله من احمد استغربت جاوبته (اي احسن الحمد لله)
بقيت بكرهي اله وتحلفت بي وبأهله اطلع حق اختي منهم .اول شي جهازي كله وصيته من النت ببغداد وانطيت المقاسات لبنات عمي وهن راحن اشترن الي بالبيت هو كال محتشم اشتريت كله كلابيات راقيه وقفاطين مغربيه
بالطلعه جبب وفساتين راقيه وجبت تراكات وبرمودات اذا محد موجود البسهن ..واشتريت كومة اشياء تجنن كلت الا ءادب نسوانكم صارن على اختي حزب وخلنها تكرب وتخدم بسيطة
خلص التجهيز واحمد اتفق ويه ابوي علمود الزواج ابوي كال بكيفكم انتم ..تركنا لوحدنا احمد كال... بكيفج شنو تردين
فاديه .. اريد قبل الزواج ازور قبر اختي
احمد .. صار
فاديه.. اكيد ماتندله
احمد.. اندله وزايرها هواي
فاديه .. شلون تندله
احمد.. رحت لاكثر من دفان ونطيتهم اسمها وتاريخ الوفاة ودلوني عليها
فاديه .. استغربت انه زايرها بقبرها
فاديه ...واريد اروح لبغداد
احمد .. صار بس مانروح  لبيت عمج
فاديه.. لو بس اعرف ليش ماتحب بيت عمي
احمد.. من تكولين ليش ماتردين كرار انا اكول لج ليش ماحبهم
فاديه .. لاتكولي ولا اكول لك احسن
انا استأذن اشوف علاوي خاف محتاج شي
احمد.. فاديه لحظه
فاديه .. نعم
احمد... ااا  هي واكفه تريد تطلع اجيت وكفت كدامها بعدها لحد الان تطلع لي بحجاب وانا اموت واشوف شعرها مثل اختها هيج طويل وحلو ......
ردت اعرف بديتي تاخذين العلاج ...صارت طماطة من الخجل ونزلت راسها كالت اي
وطلعت بسرعه انا ضحكت لتصرفها

قررنا ثاني يوم نسافر طلعنا اول شي للنجف زارت الامام علي وطلعنا للمقبرة كعدت ع القبر بجت بجي كطعت كلبي تبجي وتصرخ سامحيني والله ماراضيه بس مجبورة امي تموت اذا ابنج صار بي شي والله كوة عليه ما اخونج انا على شلع عيني والله بس ابنج محتاجني

#قصصي
#ماذنبي_انا

البارت ١٣

انا محاوله مو اكثر هذا الزواج وسيله علاج بس
مو انا اللي اخذ شي الج حتى لو ماكنتي مرتاحة بي .
سمعتها تكول لها ليش تزوريهم كلهم بالحلم وانا لا شنو زعلانه مني من يوم رحتي كلهم شافوج بس انا لا رناوي فدوة بس مرة اشوفج طاك كلبي عليج مرة وحدة بس اشوفج
عرفت انها رافضتني لان بيوم كنت زوج اختها حقها عمي هي كوة صعبه
بقت تبجي وخفت عليها لاتتعب قنعتها اخذها ونطلع
كالت ما ابات بالنجف اختتك هنا ماكدر
طلعنا لبغداد زرنا ..
فاديه ..دخلت للامام وبقيت ادعي احمل بطفل يطابق انسجة علاوي .طلعت لكيت احمد ينتظرني اخذني وطلع  للسوك كال محتاجة شي
فاديه .. لا
احمد ..نروح نتعشى
فاديه .. اي.
احمد .. كلامها قليل ومحدود صبرت لها اصلآ مو من حقي اطلب منها شي
طلعنا حجزت بفندق مرتب دخلنا وانا تركتها وطلعت خليتها ترتب اغراضها . بقيت افتر شلون ياربي صعبه حتى عليه اخذت نفس وتوجهت لقبه الامام وكلت له يابو الجوادين رايد وكفتك وياي ياب الحوائج
رجعت للغرفه لكيتها لابسة تراك نص ردن وشعرها ظفيرة جوة الورك من شفتها رجف كلبي اول مرة انتبه على جسمها مرتب ومثير غيرت ملابسي ودخلت سبحت طلعت هي كاعدة تلعب بالفون اجيت يمها ماعرف شلون افتح الموضوع هي الظاهر افتهمت .
احمد.. اعرف الموضوع صعب وصدكيني حتى عليه صعب بس هو لازم يصير ساعديني ولاتصعبينها عليه انا اشوف يتم زواجنا واحنه اليوم زايرين ابو الجوادين وندعي الله يوفقنا ويرزقنا طفل نفس انسجه علاوي
هزت راسي بمعنى اي
اتقربت الها بقت منزله راسها بستها براسها كلت لها لو انطيج عمري كله ما اجازيج وان شاء الله ماتضيع تضحيتج هاي
حاولت اتقرب الها  وووووو.
طول ما انا وياها هي مغمضه وبس دموع تنزل بس خلصت تركتني وركضت للحمام سمعت صوتها تشهك وتبجي طولت بالحمام ومن طلعت ماباوعت بوجهي ابد انا دخلت للحمام ومن طلعت لكيتها متغطيه ونايمه
تركتها براحتها .. ثاني يوم رجعنا للبيت مرت باهلها سلمت عليهم واصرت تاخذ علاوي من امها لكن امها رفضت اخذنا جنطها واغراضها لان ماقبلت توديهن قبل لانروح نزور 
وصلت لبيت اهلي استقبلونا اهلي سلمو عليها وحسيتهم صافنين عليها لان نسخة ثانيه من المرحومة بالشكل طبعآ اما اللسان والطباع فهي العكس تماما
اختي سارة شافتها وشهكت وظلت تباوع لي وتنزل دموعها ماكدرت تسلم عليها ركضت دخلت جوة
فاديه ..اليومين اللي فاتو عشت اسوووء احساس سافرت وياه للنجف احس رايحة لقبري .زرت اختي وفرغت همي عندها .طلعت من النجف احس تخنكني بيها اختي بس جوة التراب
من وصلت بغداد زرت ودموعي تجري ماتوقعت يوم اعيش هاي الحياة الصعبه
من قرر احمد نتمم زواجنا كنت احس روحي تطلع كل لمسه منه كانت تطعن بقلبي وتندمت على نفسي موهاي ليله عرسي اللي تمنيتها ولا هذا الشخص اللي تمنيت اتزوجه ردت اعيش قصه حب ردت ارجع اعيش ببغداد
كل شي تمنيته تبخر وراح
وصلت لبيتهم كان قلبي يخفق حيل كل خطوة امشي اتخيل وجه اختي كدامي كل مكان اشوفه اكول هنا نظفت هنا كنست هنا صيحو عليها هنا ضربوها كان احساسي صعب اتكطع بداخلي من دخلت كلهم صفنو بوجهي ماعرف شبيهم
عندهم بنيه شابه شافتني شهكت وظلت تباع لاحمد وتبجي استغربت تصرفها
من دخلت للغرفه سألت احمد
فاديه .. احمد منو هاي البنيه اللي فزت من شافتني
احمد.. سارة اختي
فاديه.. ليش هيج سوت
احمد.. سارة كانت اقرب وحدة للمرحومة ومن ماتت كلش تأثرت
فاديه.. هههه تأثرت ضحكتني لك بابا انتم لو جلب ميت عندكم جان اهتميتو اكثر مما ماتت اختي وبعدين لاعبالك انا ماعرف شلون اختي كانت عايشه هنا لااا اعرف واعرف انها تنام بلمطبخ وامك بالروحة والرجعه تكفخ بيها صديقاتي بلمدرسه جيرانكم من يجون الكم يسولفولي عن حياتها كنت اموت قهر وماكدر حتى اكول لامي
احمد.. فاديه مو اتفقنا مانحجي بالموضوع
فاديه.. مو بكيفك انساها مو بكيفك ما اذكرها اختي هاي قطعه من روحي اللي بيدي هاي غسلتها من ماتت واشوف ايديها كلها جويات من التنور
ما انساها واظل لاخر عمري اذكرها
احمد.. براحتج انا علمودج ماريد تتذكريها وتتاذين
تحبين اساعدج بترتيب اغراضج
فاديه.. لا نعسانه خلي انام ومن اكعد
احمد .. براحتج ..عفتها وطلعت رحت لسارة لكيتها طاكة بجي
سارونة شبيج
سارة.. احمد تشبها حيل تشبها من شفتها عبالي هي
احمد.. اي صح
سارة.. شلون متحمل تشوفها
احمد.. اوووف محد حاس بي بس انت جاي اموت سارة اموت
فاديه طلعت من الغرفه اريد اعرف وين الحمام هو كال بغرفتج حمام بس ماشفت باب سمعت صوت بنيه تبجي وكفت اسمع لكيت احمد يحجي
احمد... سارة انا جاي اموت البنيه نسخة من اختها اتذكر المرحومة وقلبي يوجعني احس بالندم عليها لو موكف امي عند حدها لو حاميها منهم كان هسه عايشه
سارة.. حمودي فدوة ديربالك على البنيه لاتخليهم يأذوها
احمد.. شحدة اللي يغثها بكلمه
فاديه سمعت كلامهم رجعت للغرفه وقررت انا اللي احاسب امه واخذ حق اختي
نمت وكعدت وبديت ارتب اغراضي دخل احمد سألته عن الحمام كال هذا وخر البردة انا عبالي شباك

#قصصي
#ماذنبي_انا

البارت ١٤
كملت ترتيب اغراضي لبست فستان ورتبت شعري وحطيت الشال هيج على راسي ونزلت امه صارت بوجهي قلبت خلقتها دخلت للمطبخ ردت اسوي لي نسكافي مالكيت عندهم اتصلت باحمد   هلو انت وين
احمد.. طلعت للسوق
فاديه .اممممم جيب لي وياك نسكافي
احمد.. ماشي رايدة شي بعد
فاديه Noo ooo
احمد.. هااا صرنا انكليز
فاديه ضحكت وسديته ههه مايدري امه كدامي واريد اغيضها
تعمدت افتر بالبيت كأنما هو بيتي
رجع احمد وبيد علاكه بس صعد الدرج امه كالت اييي بدت رحمة الله بدينا نصعد علاليك انا كنت ع الدرج انزل ضحكت هو صعد شافني انا مابطلت ضحكت كلت له حصلت حجايه من وراي
احمد.. عادي عادي
فاديه .. نزلت للمطبخ سويت كوب نسكافي الي ولاحمد عيب وياي بالغرفه واشرب وهو لاصعدت نطيته الكوب ابتسم واخذه كال ماتخافين لاماتنامين الدنيا مغرب وانت تشربين قهوة
فاديه.... هه لو اشرب قهوة بصطل ما اتأثر جسمي متشبع بيها من ايام امتحانات الوزاري تعلمت عليها
احمد.. صدك انت مو سادس شنو طلعتي
فاديه.. هندسه ..كلتها وهو صفن بوجهي وسكت مانطق
...ليش شنو ماتلوك لي
احمد... لاتلوك بس ماعبالي هيج شاطرة
فاديه ..وشنو الفايدة راح تخليني اكمل ؟
احمد .. ليش لا.
فاديه ..هندسه بغداد مو هنا
احمد.. اذا تردين ننقلج او نسوي استضافه شوف شلون تترتب
فاديه ..الله كريم خل يكوم علاوي بالسلامة
ورى فترة صاحولنا ع العشا ردت انزل واحمد صاح ويين وييين تعاي
فاديه ..شكو
احمد .. شلابسه وهذا اللي بوجهج شنو
فاديه.. لابسه فستان وبوجهي شووويه ميكب
احمد...غيري ملابسج لبسي شي اعرض شويه ومسحي هذا اللي بوجهج
فاديه..ليش فستاني عريض
احمد ...وكفت مقابيلها كلش ونزلت لمستواها لان اقصر مني وهمست ..فستانج مخصر وحمرتج واضحة ما اريد اخوتي يشوفوج هيج
فاديه... ماعرف ليش حبيت استفزة وكلت ..هههه يمعود خل يشوفون مساكين نسوانهم كل شي ماكو لا لبسه لاترتيب
احمد... صدك غثتني لزمتها من ايدها حيل وجريتها الي شوفي ولج راسج اكسره اذا عدتيها ومن يجون اخوتي تلبسين صايه سودة وشال اسود مفهوم
فاديه .. مانطقت حرف بقبت اباوع بعينه ومتندمة الوقت خلاني تحت حكم واحد مثل هذا شروكي وترباة عشاير ناس همها تلفلف المرة وتخنكها تركته وكعدت ع الجربايه كال ماتنزلين
فاديه ...لاااا
احمد... يطبج مرض .طلعت وركعت الباب حيل عبالي عاقله وتفتهم
فاديه .. طلع وبقيت ابجي الظاهر الرجال كلهة مثل سرمد
احمد.... نزلت تعشيت وبعدها ضجت علمودها صعدت لكيتها كاعدة ع الجربايه اجيت يمها وكعدت ماباعت لي ولاتحركت
رفعت وجهها بايدي شفت عيونها حمر انقهرت عليهة من اول يوم رزلتها .سحبتها وبست راسها ..انت ضوجتيني خليتيني اعصب عليج ترى انا مو طبعي هيج
فاديه.. اني دااتشاقه وياك وانت عصبت
احمد.. ولج هذا شقى هذا حركان دم شنو خلي اخوانك يشوفون غير اذبحج
فاديه ... مو طبعك!!!! وتكول اذبحج ههه
احمد... ولج فهمي هذول مخلصين يوم بالشغل وكل النسوان اللي يشوفوهن ملفلفات وزوجاتهم انت شفتيهن  مايلبسن غير الدشداشه وانت هذا لبسج ومنا الله يسلمج تتماوعين بالحجي وكلامج مو مثلهن ما اتحمل ولج صح اخوتي وادري ماتدنه نفسهم على عرضي بس غيرتي تاكلني
وبعدين نسوانهم يشوفونج هيج غير يتخبلن 
فاديه بقيت اباوع عليه وساكته فجاة تقرب لي وووو
كلش ضجت لان تقرب لي جاي اتضايق من هذا الشي والمشكله لازم نستمر بلكي يصير حمل كل مرة احس اتكطع بداخلي اكره نفسي واقرف من نفسي ومن احمد
ركضت للحمام سبحت اريد اشيل اي اثر اله بجسمي وياريت لو اطلعه من حياتي اصلآ
احمد.. اتقرب لها وهي ابد مو وياي احس كوة عليها بس اثنينا مجبورين الايام تمشي كلها من عمر وصحة علاوي نحاول على كد مانكدر نجيب له اخو بلكي تتطابق الانسجة
طلعت من الحمام وانا تركتها ورحت اسبح من طلعت مثل المرة اللي فاتت لكيتها متغطيه ونايمه احسها مثل اللي تستعجل تنهي اليوم وياي
نزلت جوة بقيت كاعد ويه اهلي وامي طبعآ مو طايقه وجود فاديه وصايرة اعصاب
بقيت على هذا الحال ايام بين فاديه اللي ساكته وقليل كلامها وياي  صرت اشتاق للسانها المبشط وللقصف مالتها وبين امي اللي تحاول تقنعي اخطب ومو راضيه تفهم انا مو بحال زواج انا اريد سلامة ابني
فاديه بعد يومين ببيتهم شفت سارة اخت احمد بس شافتني حاولت ترجع بس انا وقفتها .سارة اوكفي ليش كل ماتشوفيني تشردين
سارة ..ما اشرد بس عندي شغل
فاديه.. اكدر احجي وياج
سارة اي
فاديه اخذتها ودخلنا بغرفتي ..سارة انا سمعت انت كنت اقرب وحدة لاختي .سولفي لي شلون عاشت هنا شنو صار عليهة من اول يوم دخلت هنا
سارة .. لاتسألين ولاتعرفين احسن عيشي حياتج وحبي احمد ترى احمد وردة بس بالج من امه حيه مسمومة
فاديه ..ليش هي مو امج
سارة .. لا مو امي.انا اخت زينه احمد ابن ابوي
فاديه .. حبابه احجي لي عن اختي شلون عاشت هنا
سارة .. ليش تعذبين نفسج
فاديه.. حبابه كولي
سارة.. اختج عاشت بظيم وقهر من ام احمد وحتى من امي كانت كل وحدة تنتقم منها شكل شبعت قهر وظيم وضرب .خصوصآ ام تحمد مرة ظالمه متخاف الله انا ياما شوفتني الويل
اذا تكره شخص تاذي ومايهمها احد بالج منها ترى ماتخاف الله
فاديه .. اعرف واعرف هي موتت اختي القابله ام وسام كالت لنا
سارة .. اي ماخلتني انطيها ماي لو اكل بقت من الصبح لليل بين طلوك وولادة ونزف وحتى من ردت انطيها اكل ماقبلت
فاديه .. بقت دموعي تجري على حال اختي من ماتت
من سمعت كلام سارة قررت انتقم لاختي واتصرف بالبيت براحتي  ماظل محبوسه اول شي سويته جبت علاوي من امي وبقيت افتر بلبيت وعلاوي يزبل ويخربط البيت ما انظف وراه اذا واحد من الجهال ضوجة اصيح بي صوت لو كدام امه وابوه
احمد بقيت اتجنبه وهو بس من يريد حاجته يتقرب وانا على اعصابي اسكت اكول بلكي هالشهر اكو حمل
بيوم كعدت الصبح لكيتهم مخبوصين سألت سارة شكو شصاير؟
سارة.. اليوم ابوي مسوي عزيمة
اجيت اطلع من المطبخ لحكتني سارة كالت تعاي..حبيبتي فاديه اليوم يجون نسوان خال احمد وبناتهن الله يخليج لاتختلطين بيهن ترى يغثنج
فاديه.. شنووو شحدهة وحدة بيهن تحجي
سارة. لافاديه انت ماتعرفيهن ملسونات ويسمعنج كلام يغث
وبيهن وحدة تحب احمد ومتأمله تاخذه
فاديه.. اي وشنو يعني ... حبيبي خلي يجربون يغثوني لا اكلب السحر ع الساحر.
بعد ساعه بدو الناس تتجمع انا تعمدت لبست فستان وردي وبالاطراف ورد كبار نيلي وبي شريط ع الخصر ستن وفيونكه ولبست شال وخليت مكياج خفيف .نزلت جوة وبحضني علاوي اللي يدخل اكوم واسلم اكو يصفنون بوجهي واكو يسلمون عادي ..دخلت مجموعه بس نظرتهن الي مدري شلونها حسيت ذول خوال احمد من وكفت اسلم محد سلمت كلت طززز كعدت وعلاوي وياي وحدة منهن كالت هاي الفصليه شعدها هنا وكاعدة ويانا
فاديه .. الفصليه ماتت كتلتها اللي ماتخاف الله وانا هنا زوجه احمد ولان بت اصول ماراح ارد عليج لان خطار عندي
كالت اي عيني  بت اصول مبين من سوايه اخوج
فاديه.. اخوي رجال مايعيبه شي وسوايته ماسواها وحدة بتكم المصون سوتها وياه واذا اخوي اخذ اللي حبها وماعترف باحد هي راحت مافكرت لا بسمعه ولاشرف اهلها
كامت ام زينه رادت تضربني حطيت ايدي بصدرها ودفعتها كلت لها والله ان تقربتي ماتلومين غير حالج بيج خير كان ربيتي بنتج وسترتي بيتج ايدج هاي لو مخوفه بنتج بيها كان ماوصلنا لهالمواصيل
التفت على المرة اللي كالت شعندها الفصليه هنا وكلت لها المثل يكول ياغريب كون اديب
تركتهم وطلعت وانا جسمي يتراعش من الاعصاب طبيت غرفتي ركعت الباب حيل وكعدت ورة الباب ابجي ما انتبهن ان احمد بالغرفه احس واحد كدامي وكال شنو شبيج
دفعته من صدره وصرخت شنو انت شنووو بشر اضرب بصدره واكول هنا اكوو قلب انت شنو هااا اختي شلون عاشت هنا ولك شلون شلون تخليهم يهينوها مو مرتك شلون تقبل تنام بلمطبخ ولك مرتك على ذمتك مسؤوله منك مو الرسول يكول كلكم راع وكلكم مسؤول عن رعيته شلون ما حميتها منهم
احمد.. شبيج هسه غير افهم
فاديه .. مابيه ماااابيه ولك انا ولساني ووكاحتي وماكدرت لنسوانكم ولك رانيه فقيرة شلون عاشت هنا ..ولك خلصت من ظيم سرمد اجت لظيمكم اذا خطاركم يتجاوز علي وانا مرتك وانا ام الراهي بهاي الزواجة بشروط وقوانين وخطاركم يهين بيه لعد اختي شسويتو بيها بقيت اصرخ والطم على وجهي ولك كول شسويتو بيها
لزم ايدي وكال اهدي اهدي منو غاثج منو مزعلج دفعته ماعليك بيه انت مثلهم وانكس بعد بس هسه تعاملني زين بلكي اجيب لك طفل وتعالج ابنك ..تعال اكلك ابنك شلون صار اذا اختي تبات بلمطبخ ..صفنت لحظه وجريته من قميصه وصحت ولك بس لا وسكتت ماكدر اكمل خنكتني العبرة تركته وكلت اكيد بوكت حاجتك تصيح لها وتالي تشمرها مثل الجلب كعدت بالكاع اصرخ ربيييييي اخذ روحي اريد اموت ولج يمة تعالي شوفي بنتج شجانت عيشتها
نزل يمي احمد وحظني وبقى ينحب ويكول ولج كافي رحميني رحميني ندمااان والله جاي اموت الف مرة باليوم ولج انا مو هيج بس همة خلوني هيج ابوس ايدج كافي خليتيني احتقر نفسي من كلامج .
من شفته يبجي بعد انا سكتت تركته رحت للفراش لا اريد اشوفه ولا اريد ابقى هنا ونفس الوقت ماكدر اروح لامي اخاف احجي لها وتتأذه بقيت ابجي بالفراش وحسيت باحمد طلع
بقيت بغرفتي لليل ماطلعت وعلى فد بجيه مابطلت ..رجع احمد بالليل شافني اجة ركض كال شبيج ليش هيج وجهج استغربت كلامه باوعت بوجهي بالمرايه لكيت بي بقع زرك شكلي يخوف وعيوني ماكو مورمة وحلكي الشفه الفوق صايرة ضعف حجمها ١٠ مرات وصلبه رحت غسلت ماكو  باقي الورم
احمد... تعشيتي
فاديه لا
احمد وغدة همين ماكو ..ليش هيج مو تتأذين
فاديه مجاوبته شي سألته عن علاوي كال اخذته لامج كلت لها عندنا خطار وخاف يتعب
فاديه ..حطيت راسي ع المخدة ردت انام اجة احمد
احمد.. عليج بروحها كافي احلفج بروحها وادري شكد عزيزة عندج كااافي لاتلوميني ولا تأذين روحج .سمعت كلامه ورجعت ابجي بدون ما احس على نفسي بديت احجي له عنها.
فاديه.. كانت فقيرة وهادئه .طول عمرة سرمد الله لايوفقه وين ماكان مأذينا وهي اكثر شي .كان يتأمر علينا وانا اعاندة هي خطيه تخاف عليه تروح تسوي له اللي يريدة علمود مايضربني
.