رواية ماذنبي انا الفصل السادس 6 - بقلم Renad.m

#قصصي
#ماذنبي_انا
البارت 17

ابو واخو مشو باجراءات المستشفى واخوه الثانيه حاول يهدي
احمد.. ولج فاديه تعبنا راح ع الخالي بلاش ولج فاديه راح علاوي
ماحسيت بنفسي حضنته وبقيت ابجي حضني حيل ويصرخ يابويه
التفت لامي راح وكعد كدامها خاله حللني خاله ابريني الذمة الله شوفني نارج بموت بنتج خاله حللني بلكت الله يسامحني
يوم لتكول هيج والله ماشايله عليك ..يوم الله اخذ منك علاوي حتى بيوم القيامه يشفع لك يفتح لك باب للجنه
يابوويه علاوي ياتعبي الضاع مني
رجعنا للديوانيه واحمد بس ساكت ماكدرت اتركه كسر خاطري .لا اكل مثل البشر ولا نوم بس جكاير تعبني كلش ولا ياخذ الحجي بقى تقريب الاسبوع ومناك امي توووون النهار بطوله .وابوي كاتم بقلبه وخايفه عليه حسيت نفسي تعبت المن انطي روحي لامي ابوي لاحمد لنفسي وحملي .بيوم احمد لاتريك ولا تغدة وصار الليل صبو عشا وعمي سأل عنه رحت اصيحة كال ما اشتهي انا هنا انفجرت
كافي احمد كاافي ارحمني مو لخاطري لخاطر روحك كوم اكل اطلع من الغرفه شوف شكلك كبرت ٢٠ سنه ليش
تاذي اهلك من حابس روحك ماتكول امي وابوي يتاذون عليه
يرد عليه بكل برود حقج الوجعه مو بقلبج
خبلني بجوابه بقيت احجي واصرخ ولك مو بقلبي شلون مو بقلبي ولك راحت مني اخت قطعه من روحي وكلت الله عوضني بابنها ضحيت بحياتي حتى انقذ حياته وراح مني اخر خيط يربطني باختي راح اخر ذكرى منها راحت انت شمدريك بوجعه قلبي
شمدريك بيه اصلا ولك النار بقلبي مو وحدة لا ثلاثه انت بجهة وامي بجهة وابوي بجهة المن ادير وجهي اذا اتركك باكيت الجكاير مايطيح منك اذا اترك امي يضلون لا اكل لاتنظيف امي مكابله صورة علاوي وتون ..بقيت اصرخ ولك حرام تكول الوجعه مو بقلبج اضرب على صدري واكول ولك نار شابه بين ضلوعي وساكتة محتارة بيك حسو بي واحد.منكم يرحمني .انت فكر بي حامل بابنك لو خلص بعد ماله لزمة الحمل مو
احمد ..كلامها وعاني على نفسي صدك هي تطلع لاهلها تروح تطبخ وتنظف وترجع لي وترجع تروح بليل تسوي عشا وانا حتى ما اخذها مدري شلون تروح يمكن تروح مشي
لاجاي اجيب الها فواكه لا اشوفها تاكل ويه اهلي لو لا  حسيت صدك هملتها وهملت ابنها
كمت من مكاني رحت لها مسحت دموعها وبستها براسي كافي مو زين عليج كافي تعاي تعشي
ماريد
اذا ماجيتي ما اكل انا
يله امشي ..
بدء احمد يرجع لوضعه بس صار مهتم بيه زيادة مصخها كلش صار متعب
بابا بدت صحته تتدهور وضغطة ابد ماينزل زاد الخوف بداخلي عليه .طلع تقاعد وبقى كاعد بالبيت ونفسيته تازمت ومنا احمد صارت صار بي مرض وسواس وخوف لا ابنه اللي ببطني يصير بي شي
مشت الايام وعرفت بي بنيه ووصلت شهر السادس بالحمل
بيوم بعد صلاة المغرب اتصل بيه ع الواتساب رقم غريب رفعت خط كلت الو سمعت صوت واحد يشهك عرفته سرمد مدري شصار بيه
سرمد.. خويه فاديه لاتسدينه الله عليج
بقيت ابجي وهو يبجي ..
فاديه خابرتج اريد تسلمين لي على امي وابوي وكولي لهم ابروني الذمة انا طالع بالبحر تهريب لالمانيا خاف كل شي يصير خلي يسامحوني
خويه وين رايح استر علينا
ماكدر ابقى هنا العيشه نار وراح نطلع نطلب لجوء  صار عندي طفل ومالحك للمصاريف اذا وصلت اخابركم
شنو صار عندك
ولد
وينه دزلي صورته
سرمد شوكت تطلع للبحر
اليوم بليل
بالك على نفسك وطمني ..مو ماتدز صورة ابنك ..شنو سميته
اسمه ريان
الله يحفظكم
سديت الخط ودزلي صورة الطفل يجنن يشبهنا مايشبه زوجته بقيت ابجي وماكدر اكعد .لبست وطلعت لاحمد ..وديني لاهلي
ليش
ماما تعبانه واريد اشوفها
شطلعت هاي كل ماتتعب تروحين  انت حامل والحركة مو زين الج
فدوة وديني ماكدر انتظر وديني ابات وباجر ارجع
بعد نقاش طويل بلقوة اقتنع اروح
وصلت لاهلي وصحت لابوي اجانة للغرفه طلعت صورة ابن سرمد
بابا هذا منو ؟
ابن سرمد
ابوي عيونة لمعت الدمعه بيهن
امي اخذت التليفون يممة وليدي نسخة من ابو بصغرة
.. بابا  سرمد اتصل ويكول ابروني الذمة هسه راح يطلع تهريب بالبحر
....اوووف سرمد يا خبالك مو يوميه الناس تغرق وتطلع ع التلفزيون مايخاف هذا
...بابا فدوة خلي اخابرة واحجو وياه هاي دنيا ماتعرف شيصير
...انتي ....انتي هيج تكولين
....اي انا بابا كافي اللي راحو منا ماكدر اتحمل بعد
...اتصلي خلي احاجي
....اتصلت بي فيديو
...هلو فدوشه
...هلا سرمد كبران ولك متغير
...بعد شنسوي
...وين ابنك
....تعال بابا سلم ع العمه
...يمممة فدوة انا شنو هالكيك حبيب عمتك تروح لك فدوة عمتك
...سرمد امي وابوي يردون يحاجونك
...والله وينهم هاك احجي وشوفهم
اخذو التليفون وساعه بجي وعتاب وهو يصيح سامحوني يابه غلطت يابه ندمان والله هنا ندمت على كل لحظة اذيتكم بيها
...بابا انت ابني ما اكرهك ولا اغضب عليك بالك على نفسك وطمنا عليك ترى راح نظل بقلق
...الله كريم ان شاء الله بابا
انتهت مكالمتهم وبابا كام توضى وصلى وامي كذلك دعوله بالسلامة ودعوة الوالدين مستجابه

بليلتها ماشافت عيونا نوم وعيوننا ع التليفون وماكو اتصال العصر اجة عليه احمد حاولت اقنعه ابقى لكن ماقبل ورحت وياه وبالي مشغول اتصل مغلق
احمد بدة ينتبه علي ويكول
شنو صاير لج
ماكو شي
بقينا ٣ ايام ماكو خبر كنت احس روحي تطلع بكل دقيقه تمر عليه وكل شويه امي تتصل وتكول ماحصلتي خبر واكول لها لا ماكو
ثالث يوم المغرب بقيت ادعي ربي مابينا حيل خسارة واحد من العايله حتى لو بعيد علينا المهم سالم  ربي برد قلبنا عليه سمعنا خبر
نزلت جوة شفت ام زينه تتوضا لصلاة المغرب بقيت صافنه عليها واكول ايييه ماتدرين ببنتج وين ما وين
انتبهت علي وكالت اكو شي
كلت لها دعاء الوالدين مستجاب ادعي بلكي ربي يسمع منج ويوصلنا خبر عنهم انهم عايشين
من سمعتني ملامح وجهها كلها تغيرت سحبتني من ايدي ودخلتني غرفتها ..احجي شنو بنتي شبيها
...اليوم الهم ثالث ما خابروني راح يعبرون البحر لالمانيا يرحون وما حصلنا منهم خبر مادري وصلو لو غركو
نزعت شيلتها ورفعت راسها للسما وشهكت يامن حفظت حفظت موسى بتابوت بالبحر ورديته لامة احفظ بنيتي
كلت لها وابنها بعد
التفتت عليه صار عندهم ولد ؟
اي اسمه ريان وشوفتها صورته ضلت دموعها تجري وتبوس الصورة
بقينا يومين كل شويه تصعد لغرفتي تسألني واكول ماكو خبر واذا كنت جوة يمهم تسألني بعيونها
يوم ال٥ لمكالمتهم اتصل سرمد واحمد موجود اخذت التليفون ورحت لغرفه ام زينه كانت ليلتها ابو احمد عند زوجته الثانيه دخلت لغرفتها بدون مادك الباب تفاجات من شافتني
هااا شنو
انا كبل فتحت خط ..الوو هاسرمد انتم بخير
اي اي الحمد لله
الف حمد وشكر وابنك شلونه
الحمد لله بخير
اشرت لام زينه هم بخير والمرة ظلت تبجي .كانت ليل والكل نايم خفت يسمعونا نهيت المكالمة ويه سرمد وبقيت اهدي بيها .تذكرت امي واتصلت بيها جاوبني ابوي وصوته خايف
هاا بابا خير
بابا سرمد اتصل بي واصل وهو وعايلته بخير
ابوي ضل ينحب ويكول يارحمة الله  ام سرمد وصل وصل مابي شي
خلصت منهم ردت اصعد لزمتني ام زينه وكالت سامحيني
...الله اليسامح
رجعت نمت بفراشي مرتاحة
بقيت اتراسل ويه سرمد واذا احمد مموجود اتصل بي عرفت انه مقدم لجوء ومقدم اوراق تثبت ان اهل زينه تعرضو لبيتنا بالاطلاق الناري وحتى اوراق تثبت الضرب اللي تعرضوله ولد عمي والسبب انهم حبيبين يردون الزواج لكن اهلهم رافضين
وكال بلكي يقبلون وينطوني اقامه
بيوم كنت احجي ويه ام زينه ان تحاجي بنتها لان سرمد كال زينه متازمة نفسيتها لان انا صالحت اهلي وهي لا
بقيت اقنعها تحاجيها وياريت ماحاجتها لان انا دفعت الثمن تالي
اتصلت بيها وفتح سرمد الكاميرا واجت زينه بس شافت امها شهكت بالبجي وامها تبجي
...ليش يمه هيج ليش
...زينه بس تكول يمة سامحيني
بقت الام تعاتبها وتبجي وتالي تركت التليفون ونزلت
انا اخذت الفون وكلت لزينه ميخالف بس بلبدايه صعبه وبعدين يسامحونج
وانت سرمد بالك عليها وانا بس احصل فرصه ثانيه اتصل بيكم واخلي امج تحجي وياج
واثناء كلامي اندفر عليه الباب واشوف احمد عيونة تجدح غضب متت خوف منه صرخ بوجهي
ولج كلبه تحجين ويه هذا السكط وضربني وكع الفون من ايدي
وظل يضرب ويغلط وانا اصرخ دخلت سارة رادت تخلصني منه دفعها وقفل الباب واستمر يضرب وانا اصرخ اخر شي دفعني حيل حسيت نفسي  مثل الطرت بالهوى واصطدمت بالكنتور وظل يرفس بيه بعد فقدت القدرة حتى على الصريخ
سرمد ..سمعت صوت زوجها يصرخ عليها وبعد مافهمت شي بس اسمع صريخها سديت الخط واتصلت بابوي اعرف البيت قريب عليهم
يابه الحك لفاديه اتصلت بي وزوجها دخل عليها وظل يضربها 
الاب.. وصلت للبيت احمد ودخلت لهم وجوهم ماتتفسر تعاركت وياهم وين فاديه
صعدو يصيحوها نزل لي احمد وكال مرتي وبكيفي ماتطلع من البيت
فاديه شبعت ضربت لحد ما النفس صرت كوة اجرة تذكرت سرمد ع الخط بلكي يتصل بابوي
حسيت شي حار ينزل عليه اباوع اشوفه دم
بقيت ازحف وصلت للتليفون اتصلت بسرمد رد علي
...ها فاديه
...سرمد خابر ابوي راح اموت
...اجاج بابا خابرته
...ماكو قفل عليه الغرفه وطلع صار نص ساعه ..سرمد جاي انزف خابر ابوي يلحك لي
...سرمد اتصلت بابوي وكلت له يبلغ الشرطة
...الاب رحت للشرطة وطلعو وياي للبيت وتعاركو ويه احمد وامها كانت كاعدة بالباب وتبجي على بتها بعدين بالقوة دخلونة للبيت وركض لغرفه فاديه دخلت وشفتها تذكرت دخلتي لرانيه بيوم ماتت رجلي ماشالتني .بنتي بالارض ممدة والشعر مكفش والوجه مزورك والدم تارس وجها
ورجليها والكاع كلها دم امها حضنتها وبقت تصرخ الله اكبر عليكم ولكم ثاني وحدة انطيكم اياها وتقتلونها ولكم ليش .ولك احمد ضحت بحياتها واخذتك حتى تعالج ابنك ولك هيج تجازيها
اخذناها للمستشفى وانخبصو بيها لان حالتها خطرة وفاقدة دم هواي وفصيلتها نادرة بقو يصيحون بالجوامع
اتصل بي سرمد وكلت له طلعناها منهم بس تحتاج دم وتعرف فصيله اختك
سرمد كمت انشر بالكروبات ع الفيس بوك وانطيهم رقم والدي وراسلت كم بيج ع الفيس ونشرو رسالتي  والحمد لله حصلو متبرعين اثنين
احمد اخذو الشرطة لان والدي قدم شكوة
بقت فاديه بالمستشفى اسبوع يوميه اتصل ويكولون لي فاقدة الوعي وبالعنايه المركزة الطفل حالته استقرت لكن هي بعدها شكد كرهت نفسي دمرت عايلتي علمود نفسي وياريت عشت سعيد

#قصصي
#ماذنبي_انا
ا
البارت 18
بعد الاسبوع صحت فاديه لكن وضعها بعده تعبان وشويه بدت تتحسن احمد بقى محبوس اقترحت على والدي ان يساوم احمد يطلقها علمود تتنازل عنه ويطلع من السجن
وفعلا هذا اللي صار
احمد ...بعد ما اخذوني الشرطة وكعدت وحدي صدك تندمت على اللي سويته بيها شلون خليت الغضب يسيطر عليه
اتذكرت شلون ضربتها بقيت الوم نفسي انا احبها شلون هيج سويت بيها وهي حامل .ظليت الوب ونار بقلبي عليها وكل ما اسأل يكولون بالعنايه بقيت ادعي تكوم بالسلامة ياربي شلون اذا صار بيها شي دمها ودم اختها برقبتي
بعد كم يوم اجاني ابوي وكال صحت بس مو كلش زينه وجهها صاير خارطة من الضرب و٦خياطات براسها
وكتفها مخلوع وعندها فطر بالورك
انعصر قلبي وانا اسمع تذكرت من شمرتها ع الكنتور
الاب.. بويه احمد ابوها يكول نتنازل ويطلع بس بشرط يطلق
...تخبلت طلاق معناها اخسرها للابد
...بويه ماطلق ولا يتنازلون خلوني
....احمد لاتتخبل ترى حتى لو ماتنازلو تكدر ترفع عليك قضيه وتتطلق .
...بويه ماطلكها اريدها مرتي وببطنها بتي
...ومن طكيتها طك مال كفار ماكلت مرتي وبتي
...بويه انت ماتعرف شسوت
...اي كول احجي شسوت من يومها وانت ساكت خل نعرف بلكن الحق وياك
...بويه سمعتها تخابر اخوها وزينه
الاب.. استغفر الله مادري شكول لك يابويه انعل ابو زينه لابو سرمد خليني بمصيبتي بيك بويه طلق واطلع خلصنا منهم
ماطلق
بقيت يومين محد اجاني وراها اجاني ابوها وابن عمها كرار تخبلت من شفته يعني الايام الفاتت كلها هو يمها واكيد صاير هو المسؤول عنها ويحاول يتقرب لها .بالقوة ضبطت اعصابي وياهم
ابو سرمد.. عمي البنيه زين ماماتت مثل اختهة طلكها بهدوء وخلي نتنازل
...عمي مرتي واريدها وهي حامل شلون اطلكها
...عمي اتعوذ من الشيطان ترى تكبر اكثر هي ممكن ترفع قضيه وتتطلق حتى بدون ماتتنازل
بقينا نحجي اخر شي كلت لهم اطلق وانتم تكولون هي ممكن تتطلق برضاي او غصب بس انا اريد تتنازلون يله اطلق لان اخاف اطلق وماتتنازلون لان انتم ضامنين الطلاق بس تقدم تقرير طبي يطلكوها
تنازلو عن القضيه وطلبت اشوفها عمي ماقبل كال تعبانه
...اخر مرة عمي اريد اتسامح منها
كرار.. ولمن تهمك هي ليش ضربتها الضرب هذا
...انت مالك دخل رجال ومرته اطلع منها
...ابن عمها انا مو عبالك تايهة لك ترى كافي تنازلنا عنك
...عمي كلامي وياك خليني اشوفها واقسم بالله اطلكها
ماشي تعال ويانا طلعناها للبيت
...رحت وياهم مشتاق لها وخجلان شلون احط عيني بعينها بعد اللي سويته
وصلنا ودخلنا وامها نظرت لي بحقد ومالومها غيرها وحدها تطردني
دخل ابوها لغرفتها اسمعها تكول له ماريد اشوفه ورة شويه طلع ابوها وكال عمي صحتها تعبانه على كيفك وياها
دخلت للغرفه كانت تبجي دارت وجهها عني هي ع الجربايه كعدت يمها ع الكرسي جريت حسرة
...صدكي ساعه موتت علاوي اهون عليه من هاي الساعه .ماكرهت نفسي من اخذت اختج ولا من ماتت بسببي بكد ماكارههة هسه .انا اعرف نفسي نذل لان وعدتج محد يأذيج بس اجت الاذيه مني وعدتج اجازي فضلج بس ماجازيت .والله مالي وجه احط عيني بعينج مالي وجه اكول اسف انا من نفسي خجلان مو منج .
ماسيطرت ع الغضب بداخلي من سمعتج تحجين وياه لاتلوميني اللي سواه بينا اخوج ماكدر اتجاوزه خله الناس تحجي بعرضنا نزل روسنا بالطين .اعرف غلطت وساعه غضب راح تخليني اخسر عمري كله
لزمت ايدها جرتها مني بسرعه .حقج مالومج بس الله يخليج لخاطر اللي ببطنج  زعلي علي ظلي هنا شكد ماتردين سوي اللي تردينه بس الطلاق لا تراجعي عنه

فاديه اسمعه وابجي ..لخاطر اللي بطني ليش يهمك تدري ليش اللي ببطني عايش لان انت تضربني عبالك تضرب حيوان وانا حميت بطني وماحميت نفسي شوف راسي ٦خياطات شوف كتفي مخلوع وفطر بالورك بقيت اتلقى الضرب وحامية بطني منك هسه تكول لخاطر اللي ببطنج
انا لخاطرها لازم ابتعد عنك لان قبل كنت اخاف من عاداتكم وعشايركم هسه اخاف منك
...فاديه فكري اعرف انت كارهتني هسه انطيني فرصه
...ماكو داعي احنه اصلآ متفقين ع الطلاق
..ولج خايبه ماتفهمين ماكدر ماكدر احبج شلون اطلكج ولج اتخبل شلون اطلكج وغيري ياخذج .ابن عمج واكف برة تمنيت اذبحة شلون يمج هو وانا لا
...انت ماتحب احد حتى نفسك ماتحبها بدليل بنتك قطعه منك بداخلي ماخفت عليها ..انت كلت انا اجازي فضلج هسه جازيني وطلكني ماتحمل بعد كافي
...جريت حسرة وكلت لها يجرالج بس اخر طلب
شنو
اريد احضنج لاخر مرة ...نزلت راسها وسكتت انا كمت من مكاني ما انتظرت موافقتها حضنتها وبقيت انحب هي بجت همين ..لزمت وجهها بايدي ومسحت دموعها بستها براسها
انت صدك بنت اصول وتاج ع الراس وللاسف ماقدرتج سامحيني اذا كدرتي بيوم تسامحين .بقت تباوع بعيني وعيونها تلمع بالدمع ظليت صافن بوجهها . ولج والله احبج والله والله .ومايوم مرة دخلت قلبي وملت عيني غيرج
تركتها وطلعت من الغرفه ومن البيت كله طلعت كبل لبيتنا لغرفتي قفلت الباب واحس روحي شبت للخلقها تريد تطلع من ضلوعي .مخنوك ماعرف شسوي .انا غلطان هاي ثاني غلطة اغلطها وتكلفني هواي
بعد يومين اتصلت بابوها ومشيت باجراءات الطلاق
طلقتهة وكان يوم خميس