رواية ماذنبي انا الفصل الثالث 3 - بقلم Renad.m

#قصصي
#ماذنبي_انا

البارت 7

احمد
اتصلت بي أمي وكالت اجاك ولد يخبل بالمبارك يمة
ماصبرت على مايخلص الاسبوع بس صار الصبح اخذت اجازة ورجعت للبيت متشوق اشوف ابني اول ولد الي اختاريت له اسم... علي.... وصلت للبيت شفت ابني  بحضن مرت اخوي محسن سألت عن امه لكن الوجوه تغيرت
وين رانيه؟
الام...ماتت بالولادة
شنووووو.ليش محد كال لي
يعني من اتصلتي كانت ميته ؟ وينها منو دفنها ؟ ليش ممسوين فاتحة
الام.. وليش احنه اللي نسوي فاتحة ترى هي فصليه خلي اهلها يسوون فاتحة
بقيت اسمع لامي ومصدوم اباوع لابني بابا شنو من انقهر عاشته امك وماتت بي
بقيت احس بتأنيب الضمير لان هملتها وحتى ولادتها صارت مبكرة اكيد تعبت بالولادة وهسه ابني انولد يتيم
وحتى جنسيه ماكدر اطلع له لان ممسوي عقد محكمة لامه
امي اقترحت اخلي بأسم اخوي محسن
انا ماقتنعت كلش
انتبهت اختي سارة اختي من ابوي كانت تبجي ومبين مقهورة كل ساعه تشيل ابني ودموعها تجري سارة عمرها ١٦ سنه
بالليل كعدت اريد اشرب ماي دخلت للمطبخ لكيت وحدة كاعدة بمكان فراش رانيه وتبجي بلبدايه خفت بعديت تقربت لها لكيتها سارة..
شبيج سارة ليش تبجين
احمد ماتت جوعانه وعطشانه كل ما اتذكرها ابجي
منو هي ؟ رانيه!!!!
احمد امك موتتها ماماتت بالولادة
شلون؟؟؟
سارة تبجي وتشهك وانا اريد افتهم منها ماكو اخذتها غسلت لها
....تعاي كعدي احجي لي بالتفصيل
....انطيني وعد ماتكول انا كلت لك ترى تكتلني امك
.....وعد ماكول
رانيه بدت تطلك من الصبح وامك وامي مارحمنها طبخت الغدة وكل شويه توكف على صفحة وتبجي من الالم ومن فحصتها القابله كالت لامك هاي بجر وولادتها مبكرة لازم مستشفى ماقبلت امك
رانيه توسلت بامك بس خلي اشوف امي بس هي ماقبلت وكامت تغلط عليها
للعصر ولدت رانيه القابله كالت لامك عندها نزيف خلي ناخذها مستشفى بس امك ماقبلت وكالت لها اذا ماتت ماعليه مو تكولون انا ولدتها
امك كالت له خل تموت عساها
بقت رانيه بلغرفه محد نطاها كوب ماي حتى ومن الولادة تعبانه بعد اذان المغرب سمعتها تصيح خاله ام احمد وامك تسمع وتغلس ردت اكوم انا الها بس امك صاحت عليه كعدي لا اكسر راسج
انا كلت من ينامون اروح الها انطيها اكل وماي بقيت على فراشي انتظرهم ينامون بس غفيت وماحسيت الا الصبح على صريخ امها واختها كانت بلفراش سابحة بدمها ولونها اصفررر تخوف
انا لو باقيه مانايمة وناطيتها اكل يمكن كان عاشت ..احجي وابجي احس اني اللي موتتها
احمد..تخبلت معقوله امي هيج سوت معقوله تموت بشر بهالسهوله .زين ابني مافكرت بي ليش تيتمه اول عمره
ظليت للصبح مانمت
كعدت الصبح غيرت ملابسي وطلعت صاحت عليه امي تعال يمة اتريك
....لايمة مستعجل
....خير يمة وين رايح
رايح اشوف ولد صديقي محامي اشوف شلون يرتب جنسيه لابني علي راح اسمي باسمي وباسم امه الله يرحمها
هااا شنو هاي جديدة ..من يمته الفصليه جهالها يتسمون باسمها
احمد...فار دمي البنيه ماتت وامي مامبطله منها..يمة كافي خافي ربج كافي موتيها وكانت جوعانه وعطشانه وكذبتي عليه كلتي بالولادة كافي يمة كافي حرام
فصليه فصليه فصليه ...كافي عاد انت وام زينه دمرتنها وانتقمتن منها شحصلتن
.....التفتت لام زينه عقلج يشتغل باذيه المرحومة بس ما اشتغل وراقب بنتج من شردت ونزلت روسنا بالطين
.....وانت يمة انسي اعوف ابني وما راح انطي لغيري
طلعت وانا محتار شلون تترتب جنسيه ابني
اتفقت ويه صديقي وكال سهله ارتبها الك ورحت لنفس القابله طلعت له بيان ولادة وخليت الاجراءات الباقيه على صديقي يكملها
بقت علاقتي بأمي متوترة كلش والطفل عند مرت اخوي محسن وحجيت وياها .خويه ام ابراهيم انت عندج طفل وخاف ابني علي يتعبج اذا تربيهم اثنينهم كالت لا خويه افا عليك واصلأ سارة النهار كله شايلته انا بس بوكت الرضاعه يجيني روح كمل دراستك انت بس هالسنه وتخلص ماظل شي
رجعت لدوامي بس ارجع يوم الخميس صرت اشتاق لعلاوي شوفته يكبر كدام عيني توجع قلبي لان كان نسخه من امه حتى الشامه اللي بوسط خدها ماخذها همين
ماكانت عندي الجرأة اودي الطفل لاهل امه لان الطريقه اللي ماتت بيها بنتهم وموقف اهلي خجلني
مشت الايام وخلصت دراستي وصار عمر علاوي ست اشهر كانت صحته مو تمام وبيوم تخربط كلش احتارينا بي وصحته كل مالها بالنازل كان صديقي ابوه دكتور واقترح علي اخذه لطبيب اطفال معروف وشاطر اخذت علاوي ومن شخص حالته الطبيب كانت صدمة الي
طلع ابني عنده لوكيميا .
هذا المرض مثل السرطان ينخر الجسم نخررر
والمشكله الاكبر ابني فصيله دمه( O سالب)
احنه بعائلتنا ابد ماكو سالب اكيد امه كانت زمرة دمها سالبه
شرح لي الدكتور حاله ابني وبقيت صافن واكول ايييييه احمد هاي حوبه امه ماحميتها وتركتها تموت بايدهم وهاي الله ياخذ حقها منك
رجعت للبيت محتار طفل هيج عمر وين يتحمل المرض والعلاج اللي هو يعتبر كيمياوي بقيت ابجي واستغفر ربي هذا عقابي هذا جزائي لو متزوج امه مثل البشر ومسوين فحص للدم كان عرفت اذا عندهم امراض بالدم وراثيه
لو من صارت حامل تابعت حالته طبيبه يمكن كان هسه عايشه
بقيت بندم وعذاب ضمير

#قصصي
#ماذنبي_انا

البارت 8

وخوف على ابني .كنت محتاج شخص احجي له اللي بقلبي رحت لصديقي المحامي هو يعرف كل قصتي
حجيت له عن مرض ابني علي وكال اخذه لبغداد عندهم اطباء كبار عندهم مستشفيات افضل .واقتنعت بكلامة وكانت نفس النتيجة لوكيميا الدم لكن هاي المرة الدكتور كال لي مفاجأة جديدة وهي امكانيه العلاج عن طريق زرع نخاع من شخص يكون انسجته مطابقه لانسجة الطفل ام او اخ او اخت او اب
شرحت للطبيب ان امه ماتت واقترح ان اجري انا تحليل انسجة وللاسف اجريت الفحص والنتيجة مامتطابق
اقترح علي اخذه لغير دوله عندهم بنوك لانسجة الدم ياخذوها من الحبل السري للاطفال
لكن طبعآ هذا صعب اقترح علي الدكتور ان اخذ عينه من اهل ام الطفل لان الفصيله سالبه يعني اكو احتمال تطابق انسجته مع انسجه الخوال
ماكنت اكدر اشرح للدكتور طبيعه العلاقه بيني وبين خوال ابني سألته اذا طلع ماكو تطابق بالانسجة شنو اسوي
الدكتور ..ليش تتشائم خل يحللون وان شاء الله خير
رجعت مسطور وماعرف شلون راح احط عيني بعينهم
وكان صديقي المحامي ...مظفر... وياي كال روح الهم مهما كان هذا ابن بتهم ماراح يتركونة
رحت الهم وابوهم استقبلني اسوء استقبال لكن ام المرحومة كانت متلهفه تعرف شنو بي علي
...................................
الام يمة وليدي شبي
احمد... خاله والله كوة علي اجيتكم اعرف انتم كارهيني وحقكم بس اقسم بالله بيوم ولادتها انا كنت مسافر لان دوام
والله خجلت اجيكم قبل هسه بس علي ابن المرحومة محتاجكم وحياته بخطر وانتم ممكن تساعدوني
الام .. شلعت قلبي احجي شبي
احمد ... خاله الولد بي لوكيميا...بقيت اشرح الهم وضعه وكلام الدكتور...
فادية...هو كاعد يحجي وانا اشب نار بداخلي ..ماتحملت رديت عليه وهسه انت جاينا شتريد
احمد... اريد تسوون تحليل نشوف منو منكم مطابق بالانسجة لابني حتى ياخذون من انسجته ويزرعوها لعلي علمود يعيش
فاديه... نعتذر طلبك مرفوض
احمد🙁🙁
فاديه...فقدت اعصابي ووكفت على حيلي ..اي مرفوض وانت تستاهل جزاكم واقل من جزاكم خل ييموت ابنك ذوووق ذوووق نار قلوبنا خل يتكطع كلبك على ابنك سنه كااامله محرومين من اختي وتاليها تموت وتتركونها مثل الجلب حتى ماتكرمونها وتدفنونها ولكم ياظلام
مانسوي تحليل وياريت يموت ابنك وتظل طول عمرك تبجي علي مثل احنا نبجي على اختي
الاب ..فاديه كافي صوتج ...ابني شوكت تريد نحلل احنا حاضرين
فاديه ..بابا شنو حاضرين خل يولي قتل اختي ويجي يريد علاج لابنا من عندنا خل يموت ابنه وخل يعيش بندم لو مهتمين باختي ماكان هي اللي نقذت ابنها
الاب ... بغضب فااااديه صوتج ما اسمعه
فاديه ..حللو انتم انا ما احلل
الاب... انت اول وحدة تحلل لان انتن الاثنين نفس الفصيله واثنينكم سالب دمكم
فاديه ...ما احلل لو اعرف هسه تذبحني
الام... لج يووم ليش هيجي ليش هذا ابن رانيه اللي من يوم طلعت منا وانت مانشفت دمعتج عليها ..امي هذا اخر شي من ريحة المرحومة وانت ميته قهر لفراكها ربج هسه دزالج ابنها قطعه منها وانت بيدج احتمال شفاءه
بقت امي تبجي وتتوسل بي لان همة اعتقدو انا واختي متطابقين لان متشابهين كلش ونفس الفصيله وهمين سالب
بقيت مترددة اوافق ردت يحترق قلبهم بنفس النار اللي حرقو قلوبنا بيها .لكن ماكدرت استمر بالرفض خصوصا من شفت صورة ابن اختي كان نسخة منها وشامة بخده مثلها بقيت اشهك وابجي
امي نظرت لي نظرة توسل وكلت لهم احلل وياكم
سافرنالبغداد لان الطفل كان هناك بالمستشفى وسوينا التحاليل ورجعنا
احمد جاب علي لامي تشوفه وحضنته وبقت تصرخ يمةةةةة رانيه ماشفتي وليدج ..كان موقف صعب حيل صعب
وثاني يوم اجانه احمد وطلعت نتيجة التحاليل لكن للاسف ولا واحد بينا مطابق كانت مشكله لان علي بدة المرض يزيد عليه ولازم ياخذ كورس علاج ومباشرة بعدها عمليه الزرع
راحو امي وابوي واحمد للدكتور يوم ثاني وحاولو يعرفون منه اكو طريقه علاج او صورة حل لان امي تخبلت من شافت الطفل كالت مستحيل اظل كاعدة وايدي على  خدي
رجعو اهلي المغرب وجايبي لي مفاجأة خلتني اصرخ
احمد...
اخر امل الي هو خوال ابني سوو تحليل حتى خالاته المتزوجات وللاسف تطابق ماكو .رجعنا للدكتور نتباحث وياه بلكي اكو حل .اقترح علي اقتراح غريب
دكتور. ابني تريد حياة ابنك واللي اشوفه خواله كذلك .عندك حل اكو احتمال كبييير جدآ ينفع
احمد.. شنو الحل
الدكتور .. خاله الطفل اللي فصيله دمها نفس فصيلته
احمد ... اي شبيها
الدكتور ... تزوجها
احمد... شنووووووو
الدكتور ...تزوجها وننطيكم منشطات نخليها تحمل بسرعه وبس توصل شهر الرابع تسوي عمليه ناخذ عينه من نسيج الحبل السري واذا تطابقت راح نزرع
احمد... واذا ماتطابقت
الدكتور ...يا ابني ليش تتشائم .بس اكول لك العمليه هنا مو ناجحة الا بالخارج
احمد... الدكتور حيرني باقتراحة اكثر مما ريحني
اباوع لام واب فاديه وجوهم تغيرت
رجعتهم للبيت وطلب عمي من ادخل ونكعد نحجي ويه فاديه
الاب... احمد عمي تعال اتفضل خلي نشرح الموضوع لفادية واتحملها ابني فاديه عصبيه شويه
احمد عمي انت موافق على كلام الطبيب ؟
#قصصي
#ماذنبي_انا

البارت.  9

الاب ... خل نشوف فاديه شتكول
دخلنا وصاحو لفاديه وشالت علاوي وسألتهم هااا بشرو؟
الام ... شنبشر ماكو بشارة
احمد ...شفتها حضنته علي حيل وكالت شلون يعني
الاب.. بابا فاديه الطفل لازم ينزرع له نسيج متطابق واذا نسيج من اخ اله تكون فرصه العلاج اكبر
فاديه ... واذا ماعنده اخ شلون
الاب....(تعمدت امهد الموضوع شويه شويه)..اذا عنده اخ بعدة ببطن امه يصير ياخذون من الحبل السري مال الطفل
فاديه ... وشلون هسه
الاب.. لازم احمد يتزوج وزوجته تحمل بسرعه
فاديه .. التفتت على احمد ورفعت تك حاجب وكلت مايتزوج لو احترامآ لذكرى المرحومة مايريد يتزوج وهزيت بايدي
احمد.. باوعت لي صفح وتعوج بحلكها من تحجي ونوب هزت ايدها اخ يابويه تمنيت اكسر راسها فرق بينها وبين اختها من السما للكاع
الاب ..مو مشكله بابا بس خاف يتزوج والطفل همين مايطابق
فادية... اووووو شلون سالفه
الاب .. بحاله وحده واحتمال النتيجة مضمونة
فاديه ..التفتت لابوي بلهفه اييه شنو
الاب ..يتزوج وحدة قريبه للطفل
فاديه نظرت ابوي الي خوفتني...يعني شنو بابا
الاب .. بابا انت اخر امل لهذا الطفل اذا تزوجتي احمد وصرتي حامل ساعتها نعرف الانسجة ممكن تفيد علاوي لو لا
احمد ... وكفت فاديه على حيلها وحطت علاوي بالكاع وصاحت شنووووو
فاديه... شنوووو شتكول بابا انتم شنو تحجون من كل عقلكم
لالا اكيد تتشاقون
التفتت لاحمد لك بابا انا مو طايقه المكان اللي انت بي الهوا الهواااا ماطيقه لان انت تتنفسه وياي نوب تريد اتزوجك واخلف منك
الام ...امي فدوة لقلبج فكري بهذا الطفل شنو ذنبه
فاديه ...يوم واني واني شنو ذنبي
يوم اني اريد اكمل دراستي السنه ادخل كليه ليش تحطموني
بزواج وحمل كله مصلحة وترتيب. ماما فدوة انا مو فار تجارب عندكم
التفتت لاحمد وكلت له روح انت وابنك تموتون تعيشون مالي دخل بيكم كافي دمرت حياة اختي ومستقبلها تريد تدمرني بعد
احمد..مالومها باللي كالته هي حياتها مو لعبه وحقها تريد تعيش مثل باقي البنات بس انا والله مو بيدي ابني كبال عيني يوم عن يوم يذبل كدام عيني
تركتهم وطلعت سمعت ابن عمها يحجي ويه امه يكول لها كله منج من شهر وانا الح عليج خطبيها هسه راح يقنعوها امها وابوها وتاخذ هذا ال....

#قصصي
#ماذنبي_انا
البارت 10

احمد. رجعت للديوانيه مخنوك ومحتار اكثر ام سرمد اصرت علاوي يظل عندها ماحبيت اكسر بخاطرها .طلعت بوجهي لصديقي مظفر حجيت له كل شي .كال خلي اروح وياك وانا اقنعها انت كارهتك ماتسمع منك
احمد.. اكول له ابوها ماكدر يحجي وياها يكول انا اقنعها
مظفر ..خل نجرب شخاسر .اتفق ويه ابوها باجر نمر عليهم
صدك اتصلت بعمي ورحنا لهم ثاني يوم العصر .استقبلنا ابوها .ورة دقيقه دخلت وكانت خلقتها مكلوبه
مظفر دغني  بعكسه لك ابن ال... تخبل هاي والله لو ما ابنك جان خطبتها انا بدالك
احمد.. سد حلكك احسن

مظفر ....احممم شلونج خويه فاديه
فاديه .. بجمود اهلا من الله بخير
مظفر ..خويه انا اريد احجي وياج بس رجاء سمعي مني وبدون عصبيه
فاديه.. اسمع
مظفر .. انت طالبه حسب ماعرفت والسنه خلصتي سادس واكيد قاريه قران
فاديه ..نعم
مظفر .. خويه قاريه الايه من احياها فقد احيا الناس جميعآ
انت هسه بيدج حياه روح وهاي الروح هي اصلآ منج اللي عرفته ابن اختج اللي كانت اقرب لج حتى شكلكم يتشابه ودمكم نفسه .ربج اله حكمه خلاكم هيج حتى انت اللي تنقذين هذا الطفل
فاديه .. وانت شنو وتحلل احكام الله .زين شنو الحكمة من اخذتهم لاختي فصليه هاااا..شنو الحكمة من موتت اختي .. لاتفسر الايات ولا اقدار الله بالشكل اللي يعجبكم ويناسبكم لاجل مصلحتكم وردتو تكسرون ابوي كدام العالم اخذتو اختي وعدمتو حياتها وماتت حتى مادفنتوها
وهسه جاييني تحللون وتفسرون بكيفكم حتى تضيعون حياتي علمود حياة ابنكم
زواج ماتزوج لو اعرف ابوي يتبرة مني وابنك اذا مات بحضنك هذه عقوبه الله ع اللي صار باختي مو صح لو مايحق لي افسر اقدار مثل ما انتو تفسرون
مظفر ... سمعت كلامها وتعجبت هيج جرئة وقوة ومبين كااارهة احمد كلللش
مظفر...خويه مبين انت من النوع الحديه بالنقاش ماعندج تفاهم بس اريد منج بس فكري هذا الطفل يجوز مايموت يجوز يعيش كم سنه بس يعيشها مرض والم وانت تكدرين تساعدين ادري مساعدتج صعبه عليج بس احنا ماعندنا امل غيرج واختج روحها ويانا واكيد تتعذب لمرض ابنها فكري وشنو تردين وشنو تشرطين احنا حاضرين

فاديه تركتهم وطلعت بقيت ابجي ياربي الامتحان صعب شلون اساعده ينقذ ابنه وانا اريد احرق قلبه ونفس الوقت ابن اختي روحي تعلقت بي
شلون اخذ رجل اختي وشلون اعيش وياه وهو سبب موتتها
بقيت حابسه روحي بالغرفه وابجي

احمد .كلام فاديه اذاني اكثر كرهتها شكد ما انا عايش بتأنيب ضمير هي تزيدها علي اكثر
طلعت منهم واتذكر تكول هاي عقوبه الله ..بقيت افكر واكول ربي عاقبني بالدنيا واغفر لي بالاخره ظليت استغفر ربي وامشي بالشارع صار وقت الاذان كان اكو جامع دخلت صليت وخلصت الصلاة حسيت اريد ابقى بالجامع كان يوم خميس ورة دقايق بدأ الشيخ يقرأ دعاء كميل وصل لمقطع(فأليك ياربي نصبت وجهي واليك ياربي مددت يدي فبعزتك استجب لي دعاي)
رفعت ايدي وكلت ربي حلها من يمك لاتخسرني

فاديه ......
بالليل اجتني ماما كعدت يمي وكالت:تدرين ماما ربج بكل قضاء ينزل رحمه
مثلا واحد يموت بس يترك لجهاله فلوس ورث
واحد يندعم تتفلش سيارته بس هو يطلع سالم
انا بموتت اختج بقيت ادور على رحمة الله واكول ربي وين رحمتك .رحمه الله ابن اختج من ريحتها وهسه قضاء مرضته رحمة الله انهم لجأو النه علمود نكدر نشوفه ويعوضني فراق اختج
انت قضاءج هذا تعرفين شنو رحمته
فاديه...شنو
الام.. رحمته ثواب تنقذين ابن اختج والرحمه الاكبر نكدر ناخذه منهم احنه نربي بعيد عن عشايرهم وفصولهم
فاديه .. امي كلامها فر راسي فرر. غير طريقه تفكيري
صار الصبح وانا اتقلب بفراشي .طلعت لامي وابوي وكلت لهم انا قررت ....
الام والاب ... اي
فاديه ... موافقه بس عندي شروط عليكم وشروط على احمد
الاب ..نسمع كولي
فاديه ... انا كوة علي راح اغير حياتي وادمرها بس الله شاهد خاف باجر يصير بعلاوي شي وادري امي تموت وراه لان تعلقت بي
الام ...يمة ربي يوفقج
الاب ..كملي بابا
فاديه... راح اتزوجه بس يتعالج علاوي يطلكني
الاب.. بابا ليش هيج
فاديه ... بابا فدوة افهمني اكرها اموووت منه ما اطيقه
الاب ... براحتج ماكدر اضغط عليج
فاديه... دراستي من اخلص من علاج علاوي اكملها مو تكول مطلقه والناس وماعرف شنو
الاب ...الله يسهل منا لوكتها

فاديه اتصل باحمد خل يجي احجي وياه
اتصل بابا ودقايق واحمد يمنا
اجة يركض ولونه مخطوف عباله علاوي تخربط
بابا طمنه ماكو شي بس فاديه تريد تحجي وياك
دخلت للاستقبال وماما وبابا تركونا وحدنه.مو طايقه الفظ اسمه ولا اباوع بخلقته
احمد... حسيته مرتبكة ومترددة كلت وين الله واقتنعت كلت خلي انا ابدي حتى اكسر الجو
احمد... اي فاديه عمي يكول عندج حجي وياي
فاديه ...اي احمد انا قررت اوافق بس عندي شروط
احمد... اذا اكدر انفذها ليش لا
فاديه... زواجنا هو اتفاقيه بس يتعالج علاوي تطلكني
احمد... توقعت هذا منها لان مبين كارهتني.. براحتج بس راح يصير طفل بيننا شلون
فاديه ... اذا صار طفل ماراح احرمك منه ولا اعتقد انت تاذيني وتاخذ ابني بعد ما ادمر حياتي واتزوج حتى انقذ ابنك مو صح
واذا اجاني ولد يبقى الك بس اذا بنيه الي مانطيها خاف باجر تنطوها فصليه
فاديه... حالي حال البنات تجيني مشيه للبيت زلم يخطبوني من ابوي
فاديه.. ماريد لاعرس ولا حفله
احمد.. صار
فاديه... اريد اسكن ببيت اهلي
احمد... هاي صعبه ماكدر عليها
فاديه ...ليش
احمد ... صعبه علي يكولون عني كعيدي
فاديه... تدري طول عمري اكول ما اخذ شروكي من ورة هالتفكير والعقليات
احمد... استغفر الله(لا اكدر اردها خاف تغير رايها وحاجتي عندها)
يابت الناس نكعد ببيت اهلي معززة مكرمة
فاديه.تفهمهم انا مو كنه الهم مو تجيني وحدة نظفي خدمي
وعلاوي مسؤوليتي مو باجر عكبه اعيش ببيتكم وواحد.يتدخل بتربيته
واختي المرحومة محد يجيب طاريها
واذا ما ارتاحيت هناك ارجع هنا
احمد... صار. . بس خلي نتفق احترمج وتحترميني وشروك وهمج ومعدان ماريدها ماااشي
فاديه .. ماشي
احمد... البيت بي اخواني لبسج مستور وعريض وحجاب ماينزل اذا اخوتي بالبيت
فاديه... نعمممم نعممم شنو هالخنكه
احمد. انت مو تكولين انا مو كنه الهم ظلي بغرفتج ولبسي براحتج وانا راح اخذ لج غرفه فوك وبيها حمام
فاديه... امري لله
احمد... بعد عندج شي
فاديه ... الشروط هاي كلها تنذكر بالكعدة مالت الخطبه كدام الرجال خاف يصير شي وتغير رايك
احمد... لا هاي ما اقبلها منج .انا رجال وكلمه تاخذيها مني اللي ردتي كله يصير .انا اذا اريد اغير رايي ترى هذول الزلم مايحكموني اسوي اللي اريده .خلي اتفاق بيننا ماحب احد يعرف تفاصيل حياتي
فاديه ... ماشي
احمد... عندج شي بعد
فاديه ... لا
احمد... فضلج هذا عمري ما انساه الج
طلعت منهم طاير اخيرآ انفتح باب امل بعلاج ابني .رحت لمظفر وحجيت وياه
مظفر .. ولك والله مبينه صعبه بس انت تحملها هم خطيه اختها راحت منها وهسه راح تضحي بحياتها .حميدان انا اعرفك زلمه معدل البنت فضلها عليك كبير جازي الطيب ولاتقصر وياها وفهم اهلك هاي البنت خط احمر
احمد ... اكيد انا ببالي حتى غرفتها اثاثها اجيبه احسن مايكون وانطيهم انذار محد يتقرب لها

اتصلت بالطبيب واقترح علي اخذها لطبيبه نسائيه تنطيها منشطات علمود نحصل حمل سريع
العصر اجيت لبيت عمي ابو سرمد جبت مسواك لعلاوي وحجيت ويه عمي وطلبت منه اخذ فاديه وامها للطبيبه ووافق .طلعنا للطبيبه وشرحنالها الوضع كله صفنت بوجه فاديه وكالت شكد عمرج
فاديه .. ١٨