رواية مازلت طفلة الفصل الحادي عشر 11 - بقلم الكاتبة شمس السعدي

….البارت الحادي عشر….
  {#مازلت_طفلة}
#بقلم_الكاتبة_شمس

عمة نضال من شافتنا فضحتنا .. گمت اريد الملم روحي
حسيت روحي مسويه فد شي مو زين .

گمت ابرر الها وابجي . والله عمه مو اني هو يجيني اني معليه ..

الحجي .. ولج شبيج تجرفين وخايفه قابل مغتصبج وگاعده تبررين انتي مرتي فاهمه وشوكت مايعجبني انام وياج انام محد يمنعني ..

نضال .. هيج صار الحجي رضا . هذا وعدك الي مو گلنا بس يصير عندها طفل وبعد ماتتقربلها .
مو على اساس بس تجيب تطلگها ..
وگلت الطفل صغير بعده خليه بس يكبر شويه .
تالي تريد تخدرني بالحجي وتقشمرني .

مادامها هيج بعد انسى الك مره . ولو اني لو هي ..
طلعت من الغرفه وطبگت الباب ..

الحجي بدل بسرعه وطلع وراها . شافته الحجيه .

شكو يمه شبيك صوتكم طالع . نضال شعندها .

رضا .. يمه والله بلوه هي الزوجتني بيدها . وهسا تعال طلگ لعب جهال هي .
اني جاهل بيدها تزوجني وتطلگني .

الحجيه . جا هسا دريت بروحك جاهل . يمه من زمان نضال هيج وانت تضعف گدامها بكل شي .
بس مااگدر احجي . واگول بنت عمه ومريته ويحبها .
بس من توصل تطلگ البنيه .
لا لهنا وكافي اني هالمره اوگف بوجهها واروح الشيخ خضير اشكيها . وادري بي مايرضى بالعيبه .

اني گعدت بغرفتي وابجي . يربي شلون بيه وبحظي شوكت اخلص وارتاح .
باوعت الحمودي يضحكلي ويناغي .
ردت روحي . حسيت بشي اتجاهها ماادري شنو .
من عمه نضال گالت طلگها واخذ الطفل . ضجت بينما جنت من تگول هيج مااضوج وافرح اخلص منهم .

بس هسا حمودي صار ونستي وفرحتي من اضوج العب وياه وهو يضحك ويناغيلي .
معقوله مااشوف هاي العيون الي تسولف .

شلته حضنته وعصرته الگلبي حيل . مااريد اعوفه مااخليها تاخذه مني نزلت دموعي .
اووووف من هالدموع الفاضحتني .
دخلت الحجيه وشافتني .

-ها هداوي شبيج يمه تبجين ..

يمه ماسمعتي عمه نضال . تريد تاخذه مني . واني تعودت عليه . صح بالبدايه ماردته لان بس يبجي وصغير ومامتعلمه عليه . بس هسا گمت احبه مااگدر اعوفه .

الحجيه .. لا يمه استهدي بالرحمن محد ياخذه منج .
هو هذا الضنا يمه غالي وفراگة مر . ماتشوفين مرضي وقهري كله على وليدي عبن فارگني وراح .

نامي يمة نامي . ونيمي وليدج خطيه فز من نومته ومادامني اشم الهوا محد ياخذه منج .
لاتاخذين بحجي نضال . هاي الغيره خبلتها وماتعرف شتحجي . نامي نامي ..
اوووف خلي اروح اتوضا واصلي ..

جبت حمودي يمي ع الجربايه وحضنته ونمت .
وهو هم حس بيه للصبح ماگعد ..

گعدت الصبح على صوت عمه نضال . تصيح .
عفت البيت الك والهاي بنت الفلاح الجبتها بأيدي وخليتها هنا خلي تفيدك . هذا مستواكم . مو مستواكم بنت شيوخ .
عافت البيت وطلعت .

خليت الحجي يطلع .
بدلت الحمودي . واخذته للحجيه
انطتهيا وگمت سويت ريوگ وتريگنا . وبعدين نضفت البيت وركبت الغدا .
وهو عند الحجيه تلوليله بحظنها .

دخلت ابتهال اخت نضال .
ولج كلج خلگ خدامه انتي واهلج عدنا . جايه تحطين راسج براس بنت الشيخ . والله اطين عيشتج واطلعج منا بطرگ الخرگ الي اجيتي بيهن .
انعدلي وصيري ادميه . ومو تبجين وتگولين جبروني .
لمي خرگج وروحي لهلج .
الولد ابنه صار . ونضال تربيه . ولو ماهو انتي بحياتج ماتحلمين تتزوجين هيج واحد .

سمعتها الحجيه واجت .
ابتهال شني هذا الحجي . صحيح هي بنت فلاح وانتي بنت شيخ . بس هسا انتي گاعده ببيتي مو ببيت الشيخ .
ومالج حق تتطردين واحد من بيتي افتهمتي .
واني هسا لابسه عباتي ورايحه الشيخ خضير اريد اشوفه يرضى على هذا الحجي .
يله يمه روحي البيت عيالج وراعيهم وراعي اولادج مكان ماجايه تهدين على مرت ابني ببيتي ..

ابتهال . هيج صارت يعمه تطرديني من بيت عمي علمود هاي وتأشر عليه .
لجن اني مالي طبه لهنا بعد ولاالي حجايه وياكم .
لفت عباتها وطلعت .

الحجيه . هدى روحي اگعدي يم ابنج واني رايحه للشيخ واجي .

هدى . يمه عوفيهن لاتصير مشكله بسببي واني ماناقصه
بس ماسمعت كلامي ولبست جواريبها وعباتها وراحت .
خليت حمودي بحضني وگعدت العب وياه .
هسا اني شعليه . خلي شيحجون يحجون هو كله من ورى الحجي كل يوم وجايني . دور اقفل الباب احسن الي .

مرت ساعه ورجعت الحجيه . مقهوره وضايجه .

هدى . ها يمه شبيج . بس لاضوجوج من وراي .

الحجيه . لايمه مو من وراج . من ورى بنات خضير . مو تگول ابوهن الشيخ . عبالك هنه الشيخات يأمرن وينهن بكيفن ومايهابن واحد ولا يحترمن جبير .

هدن بذاك الحجي . وامهن تسكتن بيهن وماكو .
شو ابوهن الناس تحلف بأسمه . وامهن هم فقيره .
واخوانهن هم درة مال الله .
عليمن طالعات ذني ماادري ..

بس خوش الشيخ رداهن وسكتهن .

هدى . يمه هي هديل مو اختهن هم شو حبابه كم مره اشوفها مايطلع حسها .

الحجيه .لا يمه . الحق ينگال هنوده هم جانت طيبه ومايطلع حسها هي وهديل هم زينه ..
اوووووف ردتها جنه الي وماصارت . ولو هو كلشي بالقسمه . وهي مو قسمه ابني سوده عليه هج وراح من وراها .
-زين هي شبيها اختها وماتت ??
#بقلمي_الكاتبة_شمس
……………………………………

-مابيها شي يمه . بس من جابت صار نزيف عندها وماتلاحگوها وماتت .
هي هم ماخذها ابن عمها عدي . يصير حماها الرجاء هذا ابنهم الصغير هو بگد لؤي ومثل الاخوه .
وحتى ماقبل ياخذ هديل . بس الشيخ الله هداه گاله محد يربي ولد بنتي الا اختها هي احن عليهم من غيرها .

عود هو الشيخ مقسم بناته . ابتهال والمرحومه الولد كاظم .. ونضال وابتهال . الولدي ..
تالي من بعد ماماتت هنوده اتغيير الحجي .

هدى .. ليش خطيه شني هذا الظلم .

الحجيه . هي هاي العشاير تحكم وتنهى بكيفها .
خلينا من هذا الحجي وگومي صبيلنا لگمه .
خرت روحي من الجوع .

جاي اصب غدا . ودخلت عمه نضال والحجي .
باوعتلي بعين صفح .
ورجعت لزمت ايده . رضاوي حبيبي روح اصعد الغرفتنا غسل وارتاح واني اجيبلك الغدا لفوگ .

وهو راح حتى من غير مايگلي شلونج هداوي مثل كل مره . ياعشتو واذا خفتا وراحه ( احجي بداخلي)
سلم على امه وباس حمودي .
وبقوا يسولفون شويه وصعد .

نضال .. باعي ولج من وجاي انسي الحجي ولاتحلمين بغير شي . لو ماالشيخ جان اني طاردتج هسا .
بس علمود محمد مخليج .
عليج بالطفل وبس .
يعني منا وجاي انتي مربيه وخدامه وبس . فاهمه .

سكتت وماحجيت . لأن اعرف مالي ظهر وسند هنا .
وحتى عند اهلي .
امي صار شهر ماشايفتها .
وماتجي لهنا الا اني اروح .
ومن اروح ابوي ياخذ مني ماينطيني .
يعني حتى اذا زعلت يطردني هو من البيت .
الاحسن اگعد واسكت واسوي الي يطلبوه مني .

گمت اخلص شغلي وادخل اني وحمودي للغرفه .
ابدله وارضعه وانيمه .
واني ابقى ارسم لو اشخبط . اضوج مرات .
ومرات افتح الشباك واباوع ع البساتين .
وبظهريه . شفت بتول هم طلعت .

گلت خليني اشوف هاي وين تروح .
مدري شخطر ببالي وخلاني اراقبها . لان كم مره تسويها وكتلني الفضول .
بيومها جانت الحجيه نايمه ونضال عند اهلها .
والحجي ماهو .
اخذت حمودي خفت يبجي وماكو احد يمه .
وطلعت وبحجة اتمشى ..

تمشي واني وراها بس بينا مسافه . واضحك على روحي بله صرت محقق من تالي اني .
يوووه هسه اني شعليه اروح ارجع احسلني. لايشوفني احد وتصير مشكله .
ردت ارجع . وشفت البحيره من بعيد منضرها حلو .
وبعدين شفت واحد اجه واخذ بتول وراحوا .

يااا عزا هذا منو الراحت وياه يم البحيره . خاف واحد من اهلها . اذا همه شكثرهم .
خليت ورجعت . وحمود گام يبجي والجو بارد خفت عليه يتمرض .
من رجعت . شافني الحجي .. متت بدمي

گال وين جنتي 😡

-ضجت وحمودي يبجي گلت اطلعه .

-عصرني من ايدي حيل . مطلعه الطفل بهذا البرد .
ومن يمتى عدنا نسوان  تطلع وحدها ..
ادخلي گدامي ادخلي .

صاح .. يمه يمه .

الحجيه . هايمه شكو .

-هاج اسأليها وين جانت لااابتلي بيها .

-وين جنتي هدى .

-يمه والله ضايجه وحمودي يبجي گلت اتمشى بي شويه اختنگ من البيت .

رضا .. ومالگيتي الا يم البساتين تتمشين شعندج تتدحسين هناك احجي . بصوت عالي .

ماعندي شي والله . بس شفت بتول راحت ورحت اشوف وين راحت هناك . ومرة باجي وفاء گالت اكو بحيره وعبالي بتول راحت للبحيره گلت اروح وياها اشوف .

رضا ..😡😡 ليش تجذبين . شعندها بتول طالعه .
ماعدنا بنيه تطلع وحدها .

هدى . واني شعليه روح وشوف .

ضرب الباب وطلع .
والحجيه گعدت تحقق وياي . شلون شفتيها وويامن .
ومن سولفتلها ضلت تلطم .

وحظي الاغبر . طلعت بتول راجعه . وحالفتلهم هي ماطالعه وطلعت اني الجذابه . والكل حقد عليه .
والحجي رزلني وگال تهمين بناتنا لان تردين تغطين على روحج . لازم اكو شي وراج .
بعد طلعه للباب ماكو . وحذر امه مني .

بيومها گضيتها بجي . وعمه نضال بالطالعه والنازله تعيرني وتگلي من تحت السواهي دواهي الله اليعلم شضامه وويامن جنتي وتهمين بتول .
لان هي اشرف منج .

محد صدگني بس الحجيه . وگالت اني من صغرها اعرفها مو راحه . همزين ابني ماتورط بيها .

بعد من ذاك اليوم عزلت روحي ومالي علاقه بأحد وصار كلشي بحياتي حمودي والحجيه . لأن دوووم تعلمني وتوجهني وتگلي هذا الصح وهذا الغلط .
حتى بتعاملي وي حمودي . علمتني على كلشي .

حمودي گام يكبر . والحجيه تعلمني شلون اربيه وگمت اطعمه واسويله فوح تمن .
گام يدنفش عليه . لعباتي صار يجنن .
الحجي گمت اتجنبه . واذا اجه الابنه يشوفه .
اني اطلع من الغرفه .
ومرات ياخذه فوگ يمه هو ونضال ومن ينام ينزله .
وساعات تجيني خيالات .
اگول اخاف تموته نضال . حتى تطردني منا .
لان ادري بيها ماتحبني اني وابني .

هههههه گمت اگول ابني . لان صار عندي اغلى من روحي لعابتي هذا وونستي مو بس ابني.

صحيح انحرمت من اللعابات . بس الله انطاني لعابه تضحگ وتلعب وتتحرك .

يوم عن يوم اني گمت اتغيير واتعب . احس روحي رايحه ومريضه ومالي خلگ الكلشي .
لااكل ولااشرب .
وفوگ شغل البيت . وحمودي تعلم ع الشيل . واني شايلته وافتر بي ..

گمت اتقيأ ومااشتهي . ونمت بالفراش .
الى ان الحجيه گالت ولج هداوي خاف حبله انتي .

انصدمت .. لا مااريد لا هو حمودي ومااگدرله وبعده صغير .

-گالت . شبيج خفتي . هو الحجي اتقربلج بعد المشكله .

-هدى ..  لا . هي من شهر ونص مدري شهرين يمكن .

-والعاده هم اجتج .

-تذكرت . لا صارلها هواي .

جا هاهي يمه انتي حبله وماتدرين بروحج وهسا بدت النساوه عندج . هم بحمودي هيج صار بيج وتمرضتي وطلعتي حبله .
#بقلمي_الكاتبه_شمس
يتبع…