رواية مازلت طفلة الفصل الثاني عشر 12 - بقلم الكاتبة شمس السعدي

بارت مفاجئ . لعيونكم حبايب

….البارت الثاني عشر….
  {#مازلت_طفلة}
#بقلم_الكاتبة_شمس

.. مازلت طفله .. حتى لو اصبحت ام .
لكني طفله . الهوا والعب وامرح مع طفلي لانني طفله .
وهو لعبة بالنسبه لي الهو معه واعوض به مافاتني . فلا تلومو مشاعري لانها مشاعر طفله حرموها من طفولتها ..ومهما كبرت سأبقى طفله ..

.. من گالت الحجيه اني حامل ..
وبهاي اللحظه اتهسترت وگمت ابجي وادعي كون مو حامل .
مااتحمل بعدني ماشفت شي بحياتي .
تحملت مسؤوليه طفل واني صغيره ومااعرفله وشويه شويه تعودت عليه وصار سلوتي .
بس هسا اذا اجه طفل ثاني شلون راح اربي اثنين واني اصلا حياتي مهدده على ساعه يطردوني .
وياخذون ابني مني .

الليل كله ابجي . حتى حمودي مالي خلگة .
هو شنو شفت بحياتي حتى اربي طفلين . اني منو الي ومنو يربيني . شلون انطيهم الحنان واني مفتقدته .

وهذا الحيال يناغي الي ويريدني العب وياه تعود .
بس مالي خلگ اله .
وديته يم الحجيه وگلتلها مالي خلگ .

بقيت كم يوم على هاي الحاله . وابني عند الحجيه .

الحجيه گالت للحجي يمكن هدى حامل .
سمعته يگلها . يمه بس اني صا هواي مامتقربلها .
الحجيه . يمه وهي تگول صار هواي غايبتلها . يمكن من جنت تجيها ولزمتك نضال .

رضا .. يمه جا شني صار مثل هذا عليه من لزمتني نضال .
وجا اني مااكيف يصير عندي طفل ثاني ويكبر اسمي .
بس سألت هيج .

گليلها اخذها ونروح للمستشفى.  واخذ وفاء وياي .
بدلت وطلعنا وخلينا حمودي عند الحجيه .
صاحت ورانا نضال .

ها وين رايحين .

رضا .. هدى مريضه وراح اخذها اني ووفاء .

نضال . وانت ليش رايح . خلي مرتضى ياخذها .
لو متأمن .

رضا .. نضاااال بطلي سوالفج كافي . احترمي هذا اخوي وهي مرتي لهنا وبس .
عفناها وطلعنا .
وضايجه بداخلي . عبالهم ماافتهم لو ماعندي احساس .
من تجرحني وتطعن بشرفي . بس مجبوره اسكت واتحمل .

رحنا للمستشفى.  وسوولي تحليل وگلولي حامل.
الحجي فرح . بس اني ودي الطم وابجي .

باجي وفاء گالت ..
دكتوره سويلها سونار خلي نشوف وضعه وشگد صارلها لان هي ماحاسبه الروحها وماتعرف .

اني اعرف هاي سوالف الحجي مو سوالفها .

سوتلي سونار . گالت الها شهرين ونص . والطفل نبضه طبيعي وماكو شي .
بس هي عندها فقر دم وهبوط . لازمها تغذيه وهسا راح نخليلها مغذي .

اووووف رجعت سالفه المغذيات . باوعت للحجي ارتاح وزادت فرحته من عرف صارلي شهرين ونص مو حامل .
يگول الاخته . همزين لحگنا قبل ماتصيدنا نضال .

وفاء .. والله خويه انت منطيها مجال . شني تحكمك ماتنام يم مرتك . انت كبرت ولازم تزيد خلفتك وتكبر اسمك . وتخلي الك سند يفيدوك وكت كبرتك .

ياااا😲 شوف هاي . اني مااريد وهي تحرضه يسوي خلفه بعد . ( بداخلي)

رضا .. لا مو وعدتها مااتقربلها بس يجينا اول طفل .
وهسا بس تدري هدى حامل شوف المصيبه الي تگب .

وفاء ..هههههه .. خليها تحجي . المهم فرحتنا بأخو حمودي ان شاء الله تكمل ..

رضا .. ان شاء الله .

خلص المغذي . وطلعنا .
وصلنا للييت . تلگتنا هي جاي تسوي عشا .

هاا شبيها الخاتون .

وفاء . راح يجي اخو الحمودي .

نضال 😲😡😡😠 .. وعينها ع الحجي .

رضا .. لا تعاينين عليه . والله من ذيج اللحظه وبعد ماوصلتلها .

نضال . جا ماتأكدتوا خاف من البساتين حبلت .

اني 😲😲😲 شنو هذا الحجي اني اشرف من كل واحد يطعن بشرفي .
وكانت هاي اول مره احجي والاسن بيها .
بس مااتحملت . ورحت گبل للحجيه بين ابجي وبين احجي .

نضال…  اني تاج راسها . شنو ترد عليه هيج ..

سمعت الحجي . يگلها تستاهلين حجيها ليش تطعنين بيها واني بنفسي تأكدت . حامل بشهرين ونص يعني من جنت اروح يمها .

وفاء . كاافي حتى ضعيتوا الفرحه علينا .

دخلت وگالت . حجيه بالخير راح يجي اخو الحمودي .

الحجيه گامت تهلهل . واني ابجي من حرگتي .
اخذت ابني ودخلت الغرفه .
لان من شافني گام يفرفر عليه يريدني .

شويه واجه الحجي . هدى لاتنقهرين. وديري بالج على روحج والطفل . وحمودي هم خطيه .

هدى .. شنو شفت بحياتي . مااريد طفل هو حمودي ومتعبني .

رضا .. لاتكفرين هذا رزق الله.  واذا على حمودي .
امي يمج . واني من اجي اخذه عنج وحتى انيمه يمي بعد شتردين.

هدى . لا لا خاف عمه نضال تكتله .

رضا .. ههههه والله عايشه بالافلام البوليسيه.
مدام اني موجود محد يوصله لاتخافين.

هدى . زين خليني اروح كم يوم الامي اشتاقيتلهم .

رضا .. يله عمي تدللي حقج. بعد كسرتي عيني بحمودي وصفاوي .

هدى . صفاوي منين.

رضا .. الجاي ان شاء الله اسميه مصطفى .

ثاني يوم گعدت . بدلت وجهزت جنطة ابني واخذنا الحجي من الصبح .
شفت مرتضى گبالي يريد يروح للدوام . سلمت ومشيت .
صار بينا بس السلام .وهو هم مايباوع بعيني ابد .
حتى من ننجمع على سفرة وحده .
بس مرات ياخذ حمودي ويطلعه . وهذا يكيف الثاني .

وصلت البيت اهلي . وتلكتني امي . همزين ابوي ماهو .
اخواتي رايحات للدوام .
حضنت امي ونمت بحضنها وابوسها واشم بيها .
وهي تضحك عليه .
ولج صار عندج ولد وانتي بعدج زعطوطه ..

-والله لو يصير عندي عشره ابقى طفله وكلما اجي انام بحضنج الي ماشبعت منه .

وحضنتها وگمنا نضحك .
دخل ابوي . شافني ابتسم . گمت بسته وسلمت عليه .
باوع الحمودي .
#بقلمي_الكاتبة_شمس
……………………………………………..
گال هذا ابنج هيج كبران .
شوف ابن العز شلون يدنفش بسرعه .

امي .. يااا اللهم صل على محمد وال محمد..
شنو السالفه . غير هي صارلها شهرين ماجايتنا .
طبعا الولد كبر .

عافنا ودخل يغسل ..
سوت امي ريوگ بتيته وجاي وخبز حار وسوتلي خبز بالدهن تدري بيه احبه وگعدنا نتريگ .
ثردت الحمودي خبزة بالجاي . اوكله بس يبجي مايقبل ياكل .

ابوي . مايعجبه اكلنه ابن الشيوخ متعود ع البيض مال عرب .

امي . هاي شبيك اليوم وي الطفل .

لزمت ابني وگمت . غير هو ابوي خفت على ابني منه .

رحت انيمه بالغرفه وسمعته يگول الامي .

شوفيها كل شهرين تجي مره ومن تجي . علاگه ماتجيب وياها . اهم شي هي گاعده بالدلال واهلها ماتفكر شلون عايشين . بهذا الحصار والضيم خبزه مالحگتنا .

ضجت من حجيه . عباله اني يشمرون بالفلوس تشمر عليه . مايدري اني عايشه بحصار بس اكل واشرب .
الحجي انطاني مصرف .
گال خاف تحتاجيهن . واني مااحتاج شي .

نيمت حمودي وطلعت .
لگيت امي تخبز.  وابوي يريد يطلع .
گتله . يابه .
التفتت .
انطيته الفلوس . ولو قليلات بس هناك مو هالگد ينطوني مصرف .

اخذهن . انعم الله .. وطلع .

باوعتلي امي وضحكت وبين خجلانه احس بيها .
گلتلها يمه عادي مابيها شي . بس والله هناك ماينطوني مصرف . صح يجيبولي كلشي اريد بس فلوس ماينطوني .
واستحيت اگول للحجي يشتريلي شي اجيبه وياي .

امي .. لايمه لاتطلبين خليج هيج واحفظي كرامتنا مااريد يصير مثل قبل ..

خلص اليوم واجه الحجي واخذنا .

مرت الاشهر بين حملي الي متعبني وبين حمودي كبر وصار يزحف واني اركض وراه .
وتعلم ع الطلعه لان ابوه وعمه دوووم يطلعوه ..

ومن مايطلعوه يجرجر بيه .عود طلعيني
واني اشيله وافتر . وبطني شكبرها ..

تعبت حيل بحملي هذا . واحس روحي شثگلني .
بس رغم كلشي . ماخليت ابني ناقصه شي .
ليل ونهار نضيف وهو مدنفش وحلو صار الكل يتمنى يشيله .

تحسنت علاقتي وي اهلهم بعد سالفه بتتول .
وگمت اضوج اروح يم گرايبهم .
وصار الكل يحبني .
واني تعودت عليهم وگمت اتشاقه واضحك .
وابني صار مميز بين الاطفال .
لا الحجي دووم يروح البغداد ويجيبله هدوم مم الغالي والحلو .
واني كل ساعه البسه وانزعه شكل .

بآخر فتره . صار حملي ثگيل وبعد مااطلع .
الحجي زاد اهتمامه بيه .
وزاد حقد نضال عليه .

ومن حقدها سوت روحها تغسل البيت وهي بحياتها ماغاسله كله عليه  . وتارسة البيت تايت وخاصه يم غرفتي ..
واني طلعت من الغرفه .ولابسه العفو نعال اسفنج
وماادري تزحلگت .
وگمت انزف . اخذوني للمستشفى وگالو الطفل نازل ولازم تنام على ظهرها ذني الشهرين .
لو هم تجيب بالسابع .

امي تجي تباريني .. لان ابد مااتحرك على گدر حاجتي وبس .
حتى شعري امي تغسله الي بالطشت واني نايمه .
الشهرين ذني صارن سنتين .
وسوده عليه حمودي . يبجي يم راسي يبحي يريدني اشيله .
تالي يخلي راسه على راسي ويغفى .

ونضال برأت روحها . ومحد تهمها بشي .
بس اني ادري بيها اتعمدت لأن گالت سبع ارواح عبالي يوگع . ومحد سمعها .

تعبت حيل منا لمن طلگت وهم وكت الفجر . وشفت المر الى ان جبت .
وحلفت بعد مااحبل ولازم اشوف طريقه امنع الحباله .

وجبت ولد . وسماه الحجي مصطفى.  ورجعنا للبيت وهم ذبحله خروف . وبيومها قامت القيامه من نضال .

وفكرت انطيها مصطفى الها هي تربيه.  گلت هي هم خطيه ومادامني مامتعلقه بي كلش ..

وحجيت وي الحجيه . والحجيه گالت الله يسعدج يبنيتي .
هو مايفك شر نضال عنج الا هيج ..

ومن گالتلها الحجي ..

نضال..  ووويع اني اربي ولدها شمالي . ومن يكبر ينكرني . ربيني واني بزر هلي .

خلي ولدها الها مادام رضا الي مااريد شي ..
يوم عن يوم يطلع حقدها عليه .

الحجي كثرت سفراته البغداد .
وصار هواي من متزوجه مااعرف شنو يشتغل ببغداد .
بس اسمعه يحجي بالسياسه .
واني هم مااتدخل بي ولا الي علاقه .

بس من يرجع . يحمل الحمودي ومصطفى اشكال .
والنضال .
بس اني مايذكرني .
وهي كل يوم لابسه گلبيه شكل . مال خليجيات تخبل.

وعرفت ساعتها . اني مجرد وحده تجيبله جهال . لااكثر ولااقل .

امي تگلي حاولي تتقربيله وتلبسيله .
بس اذا هو مايجي الغرفتي ابد بس وكت مايلعب ولده .
ومرات ياخذهم بغرفته الى ان يتعبون لو ينامون ينزلهم .

بالنسبه الي . صاروا ولدي كلشي بحياتي . وحسيت بحنان امي وحبها النا .
اني مااتخيل حياتي بعد بدونهم .
وشكرت الله لان انطاني اثنين لعبات اتونس وياهم وكت ضوجتي .

ههههههه لسا احسهم لعباتي لان من العب وياهم واشمهم انسى همومي كلها ..
صحيح كبرت وصرت ام الاثنين ولد . بس هذا مايغير اكو طفله بداخلي محتاجه حنان ..

كبر صفاوي وصار احلى واجمل من محمد ..
وتذكرت اني جنت هستوني جايبه وما سوينا عيد ميلاد الحمودي بالسنه الاولى ..
فقررت نحتفل بعيد ميلادهم اثنينهم بنفس اليوم.
مصطفى سنته الاولى . وحمودي سنته الثانيه .
ردت افرح روحي مو بس افرحهم لان بحياتي محد مسويلي عيد ميلاد ..
#بقلمي_الكاتبه_شمس
#يتبع..
…………….

هلو حبايب .. اليوم عوضتكم ببارتين .
شفتو اذا عندي وقت مااقصر عنكم فديتكم 😍
صوتوا وتفاعلوا وسوولي واهس ..
والقادم احلى ..