رواية مازلت طفلة الفصل الخامس عشر 15 - بقلم الكاتبة شمس السعدي

مساء الگاردينيا حبايب ..

….البارت الخامس عشر….
  {#مازلت_طفلة}
#بقلم_الكاتبة_شمس

تسريع الاحداث…
مرت السنين . وحياتنا عاديه واكيد ماتخلو من المشاكل والمغامرات ..
بتول اجوها خطابه .. وهاي كم مرة والشيخ يرفض ومافهمت ليش .
تالي اصيل گالتلي الحجي بيناتنا .
گالت عادل لزمها تحجي وي واحد يم البساتين . وشبعوها كتل والولد مهزوم .ومايعرفوه منين .
وحتى ماتصير فضيحه طمطموا السالفه وسدوها بينهم وحلفوا يخلوها عانس وماتعرس وتصير خدامه الهم اني امي گالتلي وحلفتني مااگول .

اوووف واني شگد حجوا عليه وجذبوني من حجيت بذاك الوكت ..

اولادي كبروا وحمودي صار بالمدرسة .. وفدوه الاسمه شاطر ولاتگول اسبيعي مايتعبني ابد .

الحجي . طول ذيج الفتره يسأل ليش مايصير عندي اطفال . الى ان يأس وبعد مايسأل .
وگال هاهي الله قاسملي بس ذوله والحمد لله.
خفت اگله اني محتاطه .
وهو اصلا مو دايما يمنا . لهذا ماالح ع الشغله .

رنونه وعلاوي كبروا واصيل حامل بالثالث ..

اخواتي نعوش صار عندها اثنين بنات وولد هستوه جابته تگول بزون كل سنه طفل ههههه .
وكالعاده بقت فرقان ابويه يحوس يريد يزوجها .
بس لسا مااجت قسمتها ..

هذا الحجي بسنه 2000 . والي صار عمري بيها.
20 سنه والمفروض كبرت وصرت ام .
بس الى الان اني العب وي اولادي ومانسيت طفولتي وماخليت احد يطغى عليها .
جان يجي حمودي من المدرسه .
ادرسه ونخلص .
ونبدي نلعب اني وياهم وحتى اصيل ويانا .
ومرات عندهم طوبه نلعب بالطارمه .
ومرتضى يگول .
امهات تالي وكت ويضحك علينا.
ماخليت شي بنفس اولادي .
صرت اختهم وصديقتهم . مو امهم .
ويگلولي هداوي مو يمه .

لكن بشهر الثاني من سنه 2000 . صار شي نغص حياتنا .
جان الحجي . طالع البغداد بشغله .
هو بين فترة وفترة يروح .
بطريق الرجعه بالليل قريب الناحيه. طالعين عليه ملثمين مجهولين .
ومزرفين سيارته تزرف وهو هم ..

ومختفين بالبساتين .
اجانا الخبر مثل الصاعقه . الامه كلها انگلبت . وذيج الليله صارت ليلة حمره علينا .

اجه مرتضى طاير وعيونه حمر .
يركض .
گال الحجيه وين .

جنه اني واصيل بغرفتي . هي تنتظره يمي الى ان يجي ويصعدون . تساعدني بتدريس حمودي هي قويه بالرياضيات .واولادها يلعبون يمنا متعودين .

هدى . الحجيه راسها خطيه يمكن ضغطها مرتفع ونامت ليش خير شرايد منها .

مرتضى ووجهها مايتفسر . مااريدها تعرف هسا لاتنهبط لو يصير بيها شي . واياني واياجن اعرف وحده گايلتلها .

اصيل . اي غير نعرف شبيك . الشيخ بي شي شكو احجي .

نزلت دموعه ومااتحمل .
الحجججججي اغتالوه .

لطمت على صدري وشهكت . شنوووووو
وهسا وينه خو مامتأذي . طلعت من غرفتي واركض للطارمه .

اجه وراي جرني . ولج وين موليه اخذوه للمستشفى واجو اهل الرحم گاللولنه شايفيه ع الطريق وماخذيه للمستشفى والشيخ والولد كلها راحت ومانعرف شي عنه .
واني اجيت اكلجن واروح ديرن بالجن على امي .

بقيت بالطارمه مصدومه . ومااعرف شأحجي .
واصيل تحجي وياي واني مو يمها .
شريط حياتي كله مر من يمي .
ليش ياربي بس اني هيج من ضيم الضيم .
وين اروح وين انطي وجهي بعده.  اولادي منو الهم .
والله يشمروني بالشارع وياخذوهم .
احجي وابجي .

گالت اصيل .. بيش مفاوله. عليه . هو مرتضى ماشايفه اصلا وحده يحجي بلكي مابي شي.
دگومي خيه . الجهال صافنه واخترعت . لاتحسيسيهم بشي .

دخلنا الجهال ودخلت وكاتمه خوفي وصوتي لاتسمع الحجيه .

اتذكرت نضال . گلتلها اگلج خلي نگول النضال خطيه .
بعدنا ماحجينه سمعنا الباب انفتحت .
وبدأ العياط .
رجلي وكفن .
اصيل بسرعه دخلت الجهال الغرفتي ودخلت وياهم .

شفت غيمه سوده دخلت للبيت . ويلطمن ويصيحن .
عرفته راح خلص .
وبعد ماكو امل . وهنه كلهن لابسات اسود .

شفت باجي وفاء گبالي . گلتلها ها مات وگمت ادگ على راسي والطم .

اي ولج اي مات راح والينا وجبيرنا راح .

طلعت عمتي ع الصوت . وگالت ولجن رضا شبي ليش تلطمن تگول گلبها يحس .
گالتلها يمه راح . رضا راح .
هي حجايه ووگعت الحجيه.

دور نزلت نضال مخرمشه وجهها وكله دم وملخت روحها .
ولكم وينه جيبوه لاتاخذوه . ولجن هذا حبيبي وادري بي مايعوفني . ولجن اريده لاتاخذوه .

شفت الضعف والحب بعيونها اول مره اشوفها بهيج حاله .
عرفت غيرتها ومشاكلها وجبروتها . جان عشق اله جانت ماتريد احد ياخذه منها . وزوجته من حبها اله بس اكلها الندم بعدين من شاركتها وحده ثانيه بي .
بس هي ماتدري . اني ابد ماجنت شريكه الها .
لان هو گلبه الها دوووم . واني راد مني الخلفه وبس .

الوجه الصبح جابوه من المستشفى. والكل مامصدگ وحالتهم حاله..

جابوه والنسوان ملخت التابوت تملخ .
نضال بالگوه شلعوها منه .
وهي تگلهم ادفنوني وياه لاتخلوه وحده بذيج الظلمه .
نزلت فرشتها وغطت بيها التابوت .
والحجيه گابلته وتون عليه .
ردتك تشيل جنازتي يارضيوي تاليتي اشوف جنازتك اني

ريت عمري قبل عمرك ييمه ..

اني تقربت يمه وشهكت من كل گلبي بالبجي وعاتبته لان عافني واني صغيره وولده صغار مافكر منو يربيهم
گتله . تگول اريدهم سند الي .
شو عفتهم بلا سند . منو الهم غيرك بعد .

جهالي حبستهم بالغرفه ماردتهم. يشوفون هيج منظر لان ردت يتذكرون ابوهم بذيج هيبته مو بالتابوت .

مرتضى گال جيبيهم يودعون ابوهم .
گتله لا خليهم همه بلايه كلشي . بس گلتلهم بابا مات وراح يم الله للجنه . والليل كله افهم .
وهمه دموعهم مافارگتهم يردونه يرجع .
اذا هسا شافوه بهيج وضع شيصير بيهم .
ماردت نفسيتهم تتعب وهمه بعدهم صغار .

شالوه واخذوه . وكلنا نركض وراه .
لان كلنا محتاجيه .
الاخوات محتاجات الاخوهن ووگفته .
ونضال هذا حب عمرها وعشقه راح گدام عينها .
واني صحيح احبه واحترمه بس محتاجته سند الاولاده الي مالهم غيره .
#بقلمي_الكاتبه_شمس
…………………………………………………
الحجيه اخذوها للمستشفى. ضغطها ارتفع كلش وصابتها جلطه . وبقت تحت المراقبه .
بس ماقبلت للعصر وگالتلهم. طلعوني اذا فاتحة ابني مااحظره منو يحظرها .

اجت العصر والبيت مگلوب نسوان .
وحالنا حال . صحيح كلنا نبجي ومقهورين .
بس نضال موتت روحها .
وتگول گتله عوف هاي الشغله والله جان گلبي حاس يجي من وراها المصايب .

الحجي جانت اسراره كلها مايضمها عن نضال . لهذا هي تعرفه اكثر مني .

اني ابجي بس مامصدگة . عيني ع الباب .
كل ساعه اگول هسا يدخل من الباب . وبيده علاليگ
ويصيح حمودي صفاوي رنونه تعالوا شوفوا شجبتلكم .
جان مايفرق ولد مرتضى عن ولده .

الناس انگلبت علينا من كل جهه وامي ماعافتني طول فترة الفاتحه .
اولادي قهروني كل ساعه يسألون على ابوهم .
شوكت يرجع من الجنه هذا صفاوي يگلي .
وحمودي يگله يمكن مايرجع لان طموه بالتراب عمو مرتضى گالي .

لو احجي للصبح مااگدر اوصف حالنا بوفاة الحجي .
كلنا ضايعين بغيابه .
حتى الشيخ بهيبته وعضمته دخل سلم على الحجيه وعيونه تجري . جان يحبه ومايستغنى عنه ولادقيقه .
يگلها اني الي انكسر ظهري بفراگه .

وبس الزم الي غدروه . ماارحهمهم . لان هو اسد ماينغدر لو ماينصبوله فخ . والله لو مواجهيه بذرعانهم جان ماگدروله .

استمرت الفاتحه سبعة ايام والناس ماتفض . جانت فاجعه بالنسبه النا ..
والشيخ شدد ع الولد يلزمون مناوبات ع القريه من بعد الي صار وعبالك خايف يدخلون لو عنده غير حساب .

سمعت من حمودي . يگول يمه اجو حتى عسكريين وشرطه للفاتحه مال ابويه .
وبوسوني وحضنوني .
لان حمودي جان مرتضى ياخذه وياه .
خطيه مرتضى انكسر بعد وفاة الحجي .
وحس روحه وحيد .
ماله احد . الحجي مات ولؤي تاركهم ومايسأل عنهم من زمان . والحمل زاد عليه .

من خلصت الفاتحه . گالت امي يمه بعد شعندج هنا .
روحي كملي العده هناك .

هدى .. يمه اخاف مايقبلون وياخذون جهالي مني .

ام هدى . يمه احجي وي الحجيه ونشوف شتگول .

رحت للحجيه . وحجيت وياها .
يمه اني لازم الزم عده . وهنا الولد طابه طالعه .
اريد اروح يم اهلي .

الحجيه . يمه وتاخذين الجهال . همه الي بقوا من ريحة المرحوم .

هدى . يمه بأي وقت يجي مرتضى ياخذهم وتشوفيهم .
ماامنعهم عنج ابد والله .
واني هم شني گعدتي هنا بعد المرحوم .

الحجيه . روحي يمه بس الجهال كل يوم ترى اودي عليهم مو تضوجين .

هدى لا يمه بكيفج شوكت ماتردين .

لميت بس ملابسي وملابس جهالي . وبقت الغرفه على حطتها .
قفلتها وانطيت المفتاح عند اصيل .

سلمت ع الحجيه . وعلى نضال.  بس هي ماحجت .
بس گالت لو الحجي هنا ماخلاج تاخذيهم من اهلهم .

سكتت ماحجيت لان ادري بيها متأذيه اكثر مني .

رحت وي امي ووصلنا مرتضى .
جهالي ضاجوا لان متعودين هنا يلعبون بالبساتين وبين اهلهم ومن بيت البيت .

هناك راح ينحبسون ومايحبون يرحون من ورى ابوي لان عينه ع اللگمه ..
بس مااخليهم بعوز . لو اعرف اشتغل . ولو بيبيتهم ماقصرت . شالت فلوس وگالت هذا مصرفهم .
وكل شهر مصرفهم يجيهم ولد رضيوي مايشوفون العوز بوجودي .
واني هم ضامه كم فلس .

رحت الاهلي وامي تحاول كلشي تسوي حتى اولادي يتعودون .
لان تنحسوا ويردون هناك .
واني خايفه اوديهم كل يوم . اخاف مايرجعوهم الي .
مدري ليش گلبي ينقبض من يجي مرتضى ياخذهم .
اگعد اشمهم وابوسهم يله انطيهم الامي تاخذهم المرتضى .

يرجعون فرحانين ومحملين غراض . ومرتضى يجيبلهم فواكه ومسواگ لان متعودين هناك ياكلون .

وابوي متعجبه عليه . هالمره فرحان الوجودنا .
يگول بويه مدام الناس مامقصرين على جهالهم ويصرفون عليهم . البيت بيتج وبيتهم .

اتعجب على ابوي عباله ذيج هدى العمرها 13 سنه مايدري هسا عمري 20 كبرت ووعيت .
وگمت افهم نواياه كلها .
بس مااحجي احاول اسايره لأن وين اروح اني وجهالي .
نعوش مرات تجي تونسني وتلهيني شويه .

رجلها حباب . ورغم هو جبير هم . بس مدللها ويموت عليها كلش . الحمد لله الي الله عوض وحده منا .

واني هم مااتبطر على نعمته . لان انطاني اثنين ورود مالين الدنيا عليه .

بالاربعين رحت لهناك ورحنا وياهم للنجف .
ومن رجعنا گالت الحجيه خلي الجهال يمي .
باجر جمعه وحمودي ماعنده دوام .

حمودي فرح . وقبل يبقى . بس صفاوي لزم بيه .
گال اروح وياج .
لان متعود ينام بحظني .

رحت وجني مثل الي معبره ولد ومخليه ولد .
ماادري گلبي ليش ينقبض من يرحون عني ويبقون عند اهلهم .
وخاصه بعد مااصيل گالت . كلها تگول شنو مبقين ولد رضا هناك عند امهم .
بعدهي صغيره وباجر عگبه تتزوج ويبقون للغريب يكفخ بيهم .
بساعتها دمي فار . وگلتلها مستحيل اتزوج واعوف جهالي لو اعرف اشتغل كلشي واعيشهم ومااخلي احد يتحكم بيهم .
من ذيج اللحظه واني الخوف ماكلني . وحاسه بأي لحظة ياخذون جهالي مني ..
#بقلمي_الكاتبه_شمس
يتبع….