رواية مازلت طفلة الفصل الرابع عشر 14 - بقلم الكاتبة شمس السعدي

….البارت الرابع عشر….
  {#مازلت_طفلة}
#بقلم_الكاتبة_شمس

اخذوني للمستشفى بسرعه . واني اون وابجي من الالم.

الحجيه . بسرعه اخذيلها هدوم لا يكشفوها هناك .حجت وي عمه وفاء .
صعدني الحجي . وصعدت يمي رجاء .نيمتني على رجليها
والحجي يسوق وورانا اجو اهله وعمه وفاء .

احس نار وشبت بيه . وكلما اريد اشوف . ماتقبل باجي رجاء .

وصلنا ودخلونا قسم الحروق ..
اجت. المضمده ودكتور .

شاف الحرگ . گال لاتخافين بابا ان شاء الله بالدهن والعلاج تصيرين احسن .

اني بس ابجي . وخاصه من شفت منظر جسمي .
متشوه والجلد مخروط كله .
زدت بالبجي والعياط .

اجت الممرضه . انطتني ابره .
وجابت شاش ودهن .
واول مابدت زلغت الجلد كلها . واني روحي راحت وزدت بالعياط . احس روحي طلعت .
وهي بلا رحمه . خرطت الجلد وطلع اللحم .
وبدت تدهن فوگه ولفته بشاش .

گالتلهم لبسوها شي خفيف .
والافضل اذا وصلت للبيت . تنزعوهيا .
وكل يوم تعقموها وتدهنوه .

بقيت اول يوم بالمستشفى وثاني يوم طلعوني .
بس حسيت خلص هذي نهايتي وتشوهت بعد .

وصلت للبيت واني منتهيه وعيوني ذابلات لان ماكو نوم .
اجه ابو ايات ضربني ابره مهدئ .
گال خطيه ع الاقل ترتاح شويه وتهدأ .
نمت شويه ومن راح مفعول الابره بدأ الوجع والحرگ هاج عليه .

گمت ابجي واعيط من الوجع .
شفت امي گبالي تبجي .
زدت بالبحي .
يمه اريد اموت الحگيني . يمه تشوه جسمي كله يمه .

امي .. سوده عليه يمه منين اجتج هاي .
وهاي جهالج يفرفحون يردون يشوفوج .
وشلون ندخلهم وانتي بس تبحين .

هدى . يمه جا شسوي اريد اموت. اووووف ربي موتني وخلصني . احس روحي تطلع .

تحملت شويه . جابوهم الي شفتهم بس ماگدرت احظنهم .وصفاوي يأشرلي بديه عود شيليني .

امي بقت يمي تباريني .. والحق ينگال باجي وفااء وزوجها ماتركوني ابد .
مغذيات وينطي تعليمات العمه وفاء وهي تسوي .
بس من تدهن جسمي وتعقمه روحي تروح .
والليل كله ماانامه وابجي .
الحجيه ملتهيه بالجهال .
والحجي هم ماخله شي ماجابه .
حتى دز من بغداد اكو عصاره وصفوها اله وماموجوده بس هناك .

مر كم يوم وجسمي ورم . وحتى وجهي .
واحس بوزني زاد .
ومحد يعرف السبب .. راحت عمه وفاء . صاحت الحجيه واجت شافتني تخبلت . ولكم يمه البنيه خاف تتسمم .
وهذا كله مايفيد .
خلونا نسويلها طب عرب احسن . وشوفوها شلون حتى اثر مايبقى ..

دزت على مره من القريه . من اهل الله . وشغلها كله بطب العرب .
جابت شعير وسهته وطحنته بالهاون . وصفار بيض عرب خلطته وياه .
وگامت هي والحجيه . يدهنن جسمي بريشه مال دجاجه غسلنها وعقمنها .

وبقت الحجيه كل يوم نفس تسويلي نفس الوصفه .
حتى جسمي احسه خدر .
وخف الالم والورم . ويوم عن يوم گام الجري يبيس ..
ويطيب .
واللحم التأم وصار قطعه سوده . بالبدايه خفت .
وبعدين گام يتگشط وحده وراح وفعلا حتى اثر ماكو .
ماعدا شويه ببطني يم السرة .
هاي بقت بيها اثر لان بالمستشفى من نضفوها حفروها .
بس بالنسبه الجسمي وافخاذي الي جانن كلهن مشوهات مابقى اي اثر والحمد لله گمت على حيلي بعد شهرين .

بهاي الفتره اشتاقيت الاولادي كلش .
وحسيت بفراگهم وگمت من انام اخلي واحد منا وواحد منا على گد اشتياقي .
وهمه هم مايفارگوني .

الحجي تغيير وياي وصار زين .
وگام حتى يبات يمنا يم ويوم يم نضال .
والوحيده نضال الي ماشافتني طول فترة علاجي وحتى ماتدخل غرفتي . بحجه تلعب نفسها من المنظر .
مع العلم كنت مغطايه بشرشف بس وكت العلاج يفتحوه .
والغرفه معقمه وميخلون اي احد يدخللها حتى ماتتلوث .
الي يشوفني من الباب ويطلع .
بس هي تدور حجج . وحتى سمعتها تگول هاي حوبتي طلعت بيها ..

بعد ماگمت حسيت روحي كلي نشاط .
وگمت الحياتي الطبيعيه . بس طبخ وخبز والنار منعوني منها ههههه صارت عبره بعد حتى اني اخاف اتقربلهن .
گمت بس تنضيف وغسل ملابس .

بيوم الحجيه . جمعتنا وويانا مرتضى . وگالت الشيخ حجز بنت سهيله المرتضى .
شتگول يمه .
طبعا سهيله تصير عمتهم اخت الشيخ .
ومو هالگد نشوفها بس بالمناسبات لأن گاعده بمركز الناحيه .

طبعا احنه ناحيه وحده . بس جدهم الجبير عنده گاع جبيره .بنى بيها البيت الجبير الي گاعد بي هسا الشيخ خضير .
وزرع الگيعان الي داير مدايرها كلها . وصارت مزارع وبساتين وشغل ناس وياه .
وكبرت وصارت قريه جبيره بأطراف الناحيه بأحدى المحافظات .

نرجع المرتضى . من حجت وياه الحجيه . مااعترض ووافق وگالها اصيل خوش بنيه وحبابه وماالگي احسن منها .
تعجبت الردة فعله . يعني ابد مايعترضون شيگول الشيخ ينفذون . حتى بزواجهم وحياتهم الشخصيه .

گام باس راس الحجيه وباس الحجي .. والضحكه ماليه وجهها ..

الحجيه . خوش جا باجر . جهزن ارواحتجن . واني راح اگول النسوان عمامك هم . ونروحلهم .

نضال .. انتي لاترحين هدى . جهالج منا وانتي هستوج صرتي زينه. خو ماتنحثلين بيهم .

الحجيه . لا ليش ماتروح هم حماها وحقها تفرح بي .

الحجي..  اي خلي تروح هم تغيير جو صار هواي ماطالعه .

سكتت نضال .
فرحت من راح يخطبون المرتضى . بلكي تجي وحده حبابه وتصير صديقه الي .
ولو هنه كلهن گرايب .وخاف تطلع مثل نضال .
#بقلمي_الكاتبة_شمس

……………………………… .

ثاني يوم ..
لبست ثوب مخصر على طولي وبارز جسمي وخليت مكياج وبدلت الجهالي .
اخذت حجابي وطلعنا اني وولدي .

الحجيه .. اللهم صل على محمد وال محمد.  طالعه تخبلين هداوي . والله گمت اخاف عليج من العين .
الناس تگول حليوه وصغيره وعندها اثنين ولد .
والله گمت من تطلعين اقرأ وراج ايات. .

نضال نزلت . على شنو عمه الجمال من فوگ .بس خلي يشوفون المخفي والتشوه .

الحجيه . وانتي وين شفتيها . اصلا رجع جسمها احلى من قبل وتغمزلي .

مااهتميت . ولبسنا وطلعنا مأجرين كوستر . وماشاء الله البنات كلها رايحه .
حتى توته وجنات ونور . كلهن .
ومن صعدت بتول بس تخوزر بيه . حتى ماسلمت . راح يصير ثلاث سنوات ع السالفه وهي بعدهي شايله بگلبها .

وصلنا البيت عمتهم سهيله . بيت عادي ومرتب .
ومبين نضيف . يخبل . هي عندها اثنين بنات وثلاث ولد
واصيل الجبيره .
عمرها 14 سنه . وناعمه حيل .
اوووف ذكرتني بروحي من تزوجت . بس ع الاقل هي الفرق بينها وبين مرتضى قليل .
مرتضى 22 سنه . ومامتزوج وابن خالها .
مو مثل حالي . صغيره والغريب واكبر مني بضعف عمري .
ومتزوج وشفت الضيم وياهم .
مانيتي احسدها بس . حزت بروحي.

حجت الحجيه . والظاهر همه متفقين على كلشي ..
لان گبل الحجيه طلعت عبايه وسيت نوم . والذهب .
گالتلها هذا نيشانها .
والاسبوع الجاي مشية الزلم وعقد السيد فد يوم .

رجعنا وطول الطريق . يدگن ويرگصن . الى ان وصلنا .
سكتتهن الحجيه .
كافي ولجن . لايشوفج الشيخ تتمرگصن يگص روسجن .

بيومها الكل بقى عدنا وسوينا عشا وتعشوا يمنا.
واجه مرتضى فرحان.
وذني يهوسله . اخونه خوش اخو يستاهل الهوسه .
وهو يدبج بنص .
ودخل الحجي يصفگ وياه .
اول مره اشوفه هيج . الفرحه جانت ماليه ووجوهم .

تالي گالها يمه . ولؤي شلون انوديله طارش .
اريد اخوي يحظر عرسي ..

الحجيه . يوم المنى اشوفه . بس تدري بالشيخ غضبان عليه وادري بي مايجي .
بس اذا تريد خابره يجي ويستسمح من الشيخ . وينهي الخلاف .

الحجي .. اني مااحجي وياه . اذا تريد خابره وگله .

مرتضى . خوش باجر اروح واخابره واشوفه .

طلعت كلها . نيمت جهالي وگمت نضفت المطبخ والطارمه . دخل مرتضى .

گال شلونج هدى .

-هلا خويه . بالعافيه وع الخير ماصار مجال اباركلك.

مرتضى .. رحم الله والديج.  اگلج هدى اني قبل جنت طايش وماافهم وانتي تعرفين قصدي .
خلي الفات مات ونبدي صفحه جديده . واعتبريني اخوج واي شي تحتاجيه اني حاظر ام حمودي .

-تسلم خويه ماتقصر . واني اصلا نسيت الماضي جنت ومازلت اخو الي .

-هاهي بعد . اريدج توكفيلي بعرسي عربون صلح .

-هههههه خوش عربون مال كراب .

-هههههههه .

وفعلا . اتغير بعد ماكان طايش .
وبدينا نحظر الزواجه .
وصبغوا الغرفه وجابو غرفه الاخشاب ..

وعقدوا سيد . بس المشكله . صادف زواج نعوش وزواج
مرتضى سويه .
وماگدرت اروح الاختي وضجت بيومها لان الحجي ماخلاني اروح..

وحتى مااتونست بعرس مرتضى . رغم كان زواجه يخبل والدنيا انگلبت من غير محافضات كلها عدنا .
بس لؤي مااجه . لأن الشيخ شارط يرضى عليه اذا اجه  واتزوج بنت عمه .

وبيومها اولادي ماادري شبيهم بس يبجون ولعبوا بحالي
ماصدگت زفوا العرسان .
ودخلتهم نيمتهم .
وطلعت لميت البيت . اني وتوته والبنات .
باتن يمنا .
دور خلصنا . دخلنا الغرفتنا فرشتلهن .
ونمنا .
ومرتضى للصبح ماطلع .
بالگوه الساعه ثمانية گعدناهم .
والحجي گام يحجي عليه .
.. هذا مامصدگ خلي ينزل الوادم ملتمه تريد تسلم عليه بالمضيف .

نزل . صاح مرتضى ام حمودي اصيل تريدج .
تعجبت . اول مره احد يهتم الي ويصيحلي وياخذ رأي .
صعدتلها .
خطيه لگيتها مستحيه وماتعرف شتسوي .
علمتها وفهمتها . واخذت النيشان راويته للحجيه لان هي طلبت مني .
وبدلتلها ونزلتها .

ونضال ضايجه .. تگول التمن الزعاطيط عليه الله يصبرني .
بيوم السبعه ماسوو الاصيل لان سوت حنه .
استغليتها فرصه ورحت النعوش خطيه . واخذتلها هديه .

مرن الايام واني واصيل علاقتي حلوه .
وگامت تبقى يمي بغرفتي اذا مرتضى اتأخر نبقى نسولف ونضحك .
وحتى ولدي حبوها .

وخاصه بعد ماعرفت قصتي . ضاجت حيل عليه . وگالت والله جنه نضوج منج اني وامي .
بسبب الحجي الي يوصللنا . على اساس اخذتي الحجي من نضال وتوزيه عليها وفوگ ماهي الي مزوجتج .
وحتى تبوگين وتودين الاهلج .

صدگ ضجت من حجيها . وعرفت الناس ليش تضوج مني جانت . بس الحمد لله اغلبها عرفت الحقيقه ونصرني الله على الي يحجون عليه ويشوهون سمعتي ..

اصيل حملت من ليلتها . وخطيه الحمل تعبها .
وگمت اشيل الشغل عنها . لان حاسه بيها واعرف شيصير بالحامل بهيج عمر .

وعلاقتي صارت قويه بمرتضى وكله يگلي خويه . وشيجيب المرته يشتريلنا اني وجهالي .

بعد هذا كله . گامت نضال توز بالحجي حتى تطلع بيت وحدها . تگله يتفقن عليه ويخبثن .
وهدى توز بأصيل . وحتى گامت تشكي العمتها سهيله .
وكم مره تجي عمتهم ترزل اصيل .
تگلها بنت خالج اولى من الغريب .
وهي البنيه تحلف وتگلها جذب . بس امها ماتصدگ وعبالها اني اوز بيها صدگ .

مرت الاشهر وجابت اصيل . بنيه وسموها رنين ..
وبعد كم سنه صار عندهم ولد سموه علي يخبل ربي يحفضه الهم .

كل هذي الفترة والحجي مشغول عن البيت ومرات بس بالليل يجي . واكثر الاحيان ببغداد مانعرف شعنده .
الى سنة 2000 صار الي مامتوقعيه يصير…
#بقلمي_الكاتبه_شمس
يتبع…
………………
حبايب الكتابه تاخذ من وقتي هواي لان لازم تركيز وياها وانتو شفتو الفرق بين ذاك البارت وهذا .
هاي الفتره كلها كنت اكتب ..
لهذا على كيفكم وياي حبايب واغلب الاحداث سرعتها .
حتى ميصير ملل . لانها طويله والاحداث الجايه اكثر .

متابعه ممتعه حبايب ..