رواية مازلت طفلة الفصل الثالث عشر 13 - بقلم الكاتبة شمس السعدي

مساء العسل حبايب .. اسفه لان البارحه مانشرت بسبب النت واليوم اعوضكم ببارت ثاني فديتكم مو تزعلون وتفاعلو وصوتوا 😘😘

….البارت الثالث عشر….
  {#مازلت_طفلة}
#بقلم_الكاتبة_شمس

طلبت من الحجي حلويات وعمتهم وفاء ماهره بتحضير الكيك .سوتلهم كيكتين وزينتهن ..
عزمت اقاربهم واهلهم كلهم بس بتول مااجت زعلانه من ذيج السالفه  ..
واجن امي واخواتي .

شغلنا كاسيت . ونرگص ونغني . يعني فرحنا وتونسنا .
وخاصه اني صار هواية مافرحانه ..

الكل جابلهم هدايه . وسيارات 
ترسن الغرفه .
ومناك الحجي هم جان يشتريلهم .. يعني غرفتنا صارت محل مال العاب ..

الحجي مرات يجي بالبوگات . ومااعرف شلون عمه نضال ماتشك بي او تگعد ..
بس اني گمت اخذ احتياطي من بعد ماجبت صفاوي .
وصيت امي بسكته تجيبلي مانع ..
وگمت اخذ من غير الحجي مايعرف .

امي بالاول ماقبلت وگالت حرام تاخذين ..
امي .. يمه حرام اذا رجلج يريد تحرميه وتاخذين من وراه مانع هدى .. يمه واني منو يتحمل ذنبي .
مو حرام عليكم عمري 16 سنه وعندي طفلين . شنو شفت من حياتي . وانتي تدرين بآخر حمل شصار بيه ووصلت الموت لو من اطلگ شلون احس روحي تطلع واشوف الموت .
ودور طفل فوگ طفل . شنو تردون تموتوني .
حتى الدكتوره حذرتني من الحمل واحد فوگ الثاني .
شنو بزونه اني كل ساعه طفل .
ومنو يربيهم . شو الحجي ليل ونهار بالشغل لو ببغداد لو يم عمه نضال .
يجي شويه بالليل يلعبهم .
لو الحجيه الي رجليها توجعها وماتگدر تگوم وتگعد .
گليلي منو الهم والي منو . اتهسترت وگمت ابجي .

امي .. هاهي يمه كافي لاتأذين روحج . اني بس گلت هيج لمصلحتج . وهاي نضال مالها امان .
وگلت تربطيه بالجهال .

هدى .. هههههه يمه نضال رابطته اكثر مني . صحيح عندي اثنين ولد يخبلون .. بس هو مايحب غيرها ومايشوف غيرها لان بنت عمه وشيخهم .

امي .. وداعتج هداوي هسا تطلع رابطته بالسحر لاحب ولا شي . صحيح هي حلوه وماقاصره .
بس انتي صغيره واحلى منها . وعندج اثنين ورود .
معقوله مايشوفج ويشوف ذيج العاجر ..

هدى .. اووف يمه استغفر الله . مالنا علاقه شتسويله خلي تسوي اني عندي ولدي اهم من الحجي واهله .

امي .. ها هدى شگلنا . مو گتلج شويه شويه ماتستغنين عنهم .وانتي خبصتيني من جبتي محمد مااريده ومااريده .

ضحكت وباوعتلهم . افييييش امووووااااح وبستهم وحضنتهم
يمه ذوله لعباتي شعندي غيرهم . همه ونستي بالدنيا ..

الحجيه جانت امي الثانيه .. تگعد بالمطبخ وتخلي سنافيري يمها توكلهم علمتني اسويلهم شوربة تمن .
يحبوها ودنفشوا عليها .
هي تخليهم يمها واني اكمل شغلي واطبخ الحجيه علمتني على كلشي .
حتى المريه جانت تجي تطبخلهم وتنضف گلتلها خليها تجي وكت الحاجه . لو من اكو خطار هواي ..

صحيح بعدني طفله بس صرت ام بيت شاطره وطبخي يخبل .
حتى الحجي عجبه .
بس عمه نضال كالعاده كلشي من ايدي مايعجبها .
وصارت بس من يجي الحجي تجي .
اذا ماهو تروح يم اهلها ..

بس اغلب الاحيان تجي حمواتي وبناتهن . ونتجمع وسوالف وضحك . صرت احبهن ويحبني .
ومرات كل وحده تسوي طبخه وناخذها ونروح نگعد بالبستان الگعده هناك تخبل والمنظر والهوا يرد الروح ..

لعباتي كبروا ويگولولي هدى مو ماما لان احسهم اخواني وسند الي .. بعد ماحرمتني الدنيا من الاخوان .

وبيوم رحت مسيره الاهلي ..
وجانت شتويه .. شفت نسوان طلعن من البيت .
دخلت مستغربه .
شافتني امي .. هلا يمه هلا . سلم عليها الحجي وانطتني الجهال وراح .

دخلت شفت انعام مبدله .

باوعت الامي . يمه شنو هاي النسوان الطلعن .
ونعوش مبدله شكو ..

امي .. هاااا يمه ذني خطابه الاختج .

شنو 😲 يعني ماتبتو من الي صارلي . حطمتوا حياتي واني صغيره وبطلتوني من المدرسه .
وهسا نعوش هم حرام عليكم وهي متفوقه ودرجاتها عاليه

امي .. يمه اني شعليه على اساس ابوجن ياخذ حجايتي .
يگول الولد زين ومعلم وكلها تحمد بي .
هدى .. هو معلم وهي بالمتوسطه الله اليعلم صارله شگد من تخرج وتعين يعني مثل حالي من بعتوني للحجي  ..#بقلمي_شمس

دخل ابوي .. وشبي الحجي مو سواج مره وخله السانج شطوله وجايه تلاسنين اهلج .
انتي تجين مثل الخطار بأدبج . وتطلعين بأدبج وماتتدخلين افتهمتي .
مو خليتي الحجي جوه ابطج وجبتيله اثنين ولد ومسويه روحج مضلومه هناك . حتى خاف نگلج انطينا .
وهسا جايه تگطعين قسمة اختج .

اباوع النعوش تبجي . گتله بويه بس…

گال .. انلصمي وشيلي جهالج وروحي للغرفه منا لمن يجي رجلج .
واذا تجين تحرضين لاتجين احسن .

اخذت جهالي وفرقان شالت غراضي وراي ..
والدمعه بطرف عيني . ماتحملت اول مادخلت الغرفه نزلت دموعي واخذت نفس وشهگت .
اجت نعوش حضنتني وتبجي .

گالت هداوي . لاتضوجين انتي تعرفين ابوي . الي براسه يسويه . واني راضيه بقسمتي . لاتكرهين روحج من وراي .

هدى . ولج ماشفتيه شلون يحجي وياي . عبالك مو بنته ليش هيج حاقد عليه . ولج جاي يبيعنا وحده ورى الثانيه .

فرقان . هسا عليمن تبجن هسا مااكيف البس بدله واحط حمره .ههههه

هدى . ضحكتني . شوف هاي عبالها بس بدله وحمره .
ووراها طيحان حظ .

فرقان . يعني شلون . گابلتني وگعدت .

هدى . دگومي منا لااطلع حرگتي بيج.  ماهمتج الدنيا .

التفتت على انعام . وفوگاها گلت للحجي ابات عند اهلي .
شيجيب الصبح واروح . مااگدر اطلع واگابل ابوي .
#بقلمي_الكاتبه_شمس .
………………………………………
دخلت امي ..
ها يمه شبيج تبجين . جا هو ابوج جديد عليج . هو هذا من يومه .

هدى . بس يمه عبالي يحن عليه ويتغير . واني كل شهرين اجيكم مره . هيج ماتتحملوني .
شو گمت اجمع واجيبله مصروفي حتى يرضى عليه ليش يسوي وياي هيج لأن اريد مصلحة اختي .

امي .. يله يمه العني الشيطان واختج هاي قسمتها بعد وبلكي الله يطلع خوش ولد ويصونها .

هدى .. ان شاء الله.

دگومن يله ساعدني خلي نسوي عشا . اليوم حبايب بيبيتهم هنا .

شالت حمودي . شسويلك بيبي .

حمودي . تيته ..

هههههه يمه يعني بتيته . يحبها .

يا جنه على بتيته هسا اترسله البلم .

گمنا گشرنا بتيته وسوتها امي اصابع وگلتها . وسوت طماطه تگلا ومحترگه مثل مااحبها اني .
وخبز حار .
وگعدنا ناكل . بس ابوي طول الگعده ساكت .
وحمودي داس بالبتيته وخفت لا ابوي يحجي .

بس هو شويه شويه اتقربلهم وگام يلاشيهم ويلعب وياهم .
حمودي زين يروح الاي احد ويلعب وياه .
بس صفاوي لا . بس الي مايريد احد وليل ونهار بحظني .
مامتعود بس عليه وعلى الحجيه .

گضينا الليل كله وي اخواتي سوالف وضحك . ونعوش تسولف على مهرها الاسبوع الجاي وحايره شتلبس .

هدى . اني عندي ثوب حلو اشتريته بايام عرسي ومالبسته . اذا قبل الحجي اجي . اجيبه وياي .
لاتشترين ليش باقي بالكنتور البسيه حلو كلش .
بس خلي امي تكفه الج .

نعوش .😡 شنو قصدج اني گصيره .

هدى .. ههههههه عود ماردت احجيها بس انتي حجيتيها .😂

تونست وياهن. بس لعاباتي مانامو تعبوني . اهلي
عندهم بگ هواي .
خطيه اولادي بيومها للصبح ماناموا .

صار الصبح . وشفتهم مگرصين خطيه .
بين ماتريگنا وبدلتلهم وحظرت روحي .
اجه الحجي .

صعدنا بالسياره . شال ولده واحد واحد باسهم .
من حركت السياره .
گال . بعد ماتباتين عند اهلج . تروحين الصبح وتجين العصر .واذا تردين تباتين عوفيهم عند الحجيه .

-ليش ..

-ماتشوفيهم شلون مگرصين والبگ ماص دمهم .
هناك ناصبلهم كله (غشوه ململ ) .
وخايف عليهم وانتي تاخذيهم هيج .
لو مالحجيه فلا اخليج تباتين .

-سكتت ماحجيت . شلون بيه وفوگاها اريد اگله الاسبوع الجاي مهر اختي . منو يگول راح يخليني .

وصلنا للبيت . الحجي نزلني وراح عنده شغل ..
لگيت المطبخ هوسه وكله ماعين . وعود هاي يوم واحد رحت .

وديت اولادي يم الحجيه . بعد ماسلمت عليها وسألتني عن اهلي وصحتهم .
ناموا جهالي يمها . وگمت للبيت نضفته ونضفت المطبخ .
وحميت ماي الي اريد اسبح .
گلت مادام جهالي نايمين .

رحت طلعت ملابسي . وخليتهن بالحمام .
شفت عمه نضال نزلت .

گالت . هدى مو باجر رجعت ام محمد . اني مااگدر انضف ضهري يوجعني .
وطبخج موطيب . مثل ام محمد .

سكتت ماحجيت . بس صدگ انقهرت . هاي كم سنه اشتغل ومثل الخدامه عندهم .
واولادي متعبيني والبيت وساكته مابيوم شكيت وتالي لاحمودا ولا شكورا ..

شلت الگدر ثگيل مال ماي وردت ادخل للحمام .
ليش ما الردن مال دشداشه يشكل بالرزه مال باب الحمام . ويوگع المي عليه .

احس روحي راحت. صحت صوت يمكن القريه كلها سمعته .
وگمت اطفر وابجي مثل المخبله .

الحجيه اجت تركض رغم رجليها .
يمه شبيج خلي اشوفج . نضال جمدت بمكانها وماتسوي شي .

اريد بس واحد يشگ الدشداشه لو ينزعها الي .
من الوجع مااحس بشي واحس روحي تخدرت ووگعت بالگاع .
واهذي .
يمه لحگيني راح اموت . يمه احترگت يمه ودموعي ينزلن لااراديا .

ماادري شلون الحجيه لحگت نزعتني الدشداشه .
وگامت تلطم على وجهها .

ولج نضال اركضي . صيحي واحد خلي ناخذها للمستشفى ولج البنيه راح تموت .

لبست عباتها نضال وركضت ..

والحجيه تصيح . يمه بنت العالم راحت . سوده عليه .
وينج ووين الگدر شكبره شلتيه .

اجو جهالي على الصياح ويبجون .
واني مو يم واحد من الوجع .

باوعت الايدي الجسمي الجلد مسلوخ واني زدت بالبجي والصياح .
يمممممه الحگيني اتشوهت وراح اموت.
يمه تعااااااليلي ..

اجت باجي وفاء والبنات يتراكضن .
من شافني گام يلطمن على خدهن .
واني من اشوفهن هيج ازيد بالبجي والصياح .

الحجيه . ولجن رضا وين .

نضال . دزيتله واحد من الجهال بالمضيف بلكي يلگاه .

وفاء.  دجيبن جرجف خلي نلفها لايجي واحد وهم بارده خطيه .

شويه واندگت الباب واجه ابو ايات گال .
سوولي طريق .
لفلفني بالجرجف .

دخل . شلون احترگت .

الحجيه . سوده عليه تريد تسبح واخذت الماي الحار ووگع عليها .

ابو ايات . عمه طلعيلي شويه بس اشوف درجه الحرگ.

الحجيه كشفتله شويه عن بطني .

غمض عينه وگال . سهله ان شاء الله سهله لاتخافين ام حمودي صيري سباعيه . شوفي ولدج خطيه يبجون عليج .

من گام . باوع االباجي وفاء وهز راسه .
دور گال . راح احيب السياره حظرنها على مايجي الحجي .
بعده ماحجه . دخل الحجي والولد كلهم يتراكضون .
الحجي . شنو وشلون وانتن وين عليها .
اجه كشفني . ولطم على وجهها .
اباوع للكل تبجي عليه مدري تبجي على ولدي الي ماتوا يردوني ومحد يخليهم ..
باوع الحجي الايات . تعاي خالو اخذيهم لهناك عندهم.
اذا بقوا هنا يذكرون امهم ويبجون .

شالتهم واخذتهم هي وجنات .
واني دموعي تجري وراهم . وعلى الوجع البيه .

لفلفني الحجي بيديه وشالني ومن ضغط على بطني .گمت اصيح وابجي من الالم .
#بقلمي_الكاتبه_شمس
يتبع..