رواية مبعثر فيك ماللحزن لايشفى الفصل العاشر 10 - بقلم ايمان يوسف🕊️

البارت العاشر

*يدها في يدي ..
غفت بعد ان هلوست من الحمى .. هلوستها تسللت حتى في مساماتي .. وهي تعبر عن شوقها وفقدي .. !
اخذت مني يمين غليظه .. الا اتركها وافجعها بسفري .. وبعدي ..
كانت تهذي .. لكن ..!
هذت بمكامن روحها .. وخبايا دواخلها .. فسكبت من فمها اصدق فضفضه .. !
علمتني كيف عشقتني واحبتني ..
جعلتني اعدها الا اقترب وان اقدر جرحها وخوفها.. من الاقتراب بعمق .. كازوج ..

وعدتني هي ايضاً..ان تكون اقرب والا تكتم شي في نفسها .. حتى لاتنفجر مثلما حدث عند تركي لها وذهابي لهيا .. !
نعم .. عرفت .. ان هيا .. شرارة ذاك اليوم .. وهمست لها ..وافهمتها .. ان هيا ونوف في ذمتي الآن .. وعليها ان تتفهم .. ولاتكبت ..وتتظاهر بأن ذلك لايهمها ..
وعدتني انها ستعبر ..
ضحكت ..من هلوسة هذه الجميلة.. (عادي رح انا متفهمه .. بس سيف .. يمكن يمكن .. اطعنك يومها ) ..
ابتسمتْ وهي تبين حدودي ..
*عادي تضمني .. وتبوسني .. ابي الصق فيك وماخليك .. سيف ترى من جد احبك .. مادري كذا حسيت اني مت وانت بعيد .. سيف .. وكررت (أمانه ماتخليني) .. *
لا احتاج ان تأمني .. لاطاقه لي في تركها .. فقد هزلت اعصابي في بعدها ..
لم تسعني الأرض .. ولا أبعادها .. لم يسليني لاعمل ولاصديق ..لندن بحجمها لم تساعدني على التجاهل .. ولم تدعمني في ان اكون صابر ومكابر ..!

ظلت تتأرجح في عقلي .. مطلقه صرير مزعج عبارة عن عتب وألم .. !
وحده وفقد ...!!

عندما خلى محيطي منها .. شعرت باليُتم فجأه .. واني شخص مثير للشفقه ..الإعتراف بكل ذلك ازاح اطنان من قلبي ..! *

رجعوا من المستشفى .. الساعه الرابعة تقريباً.. سيف اخذ مهره لغرفته .. حرصه الدكتور .. على حرارتها وأدويتها ..ظل يبدل لها كمادات .. تغفي .. وتصحى .. تهلوس وتهذر وترجع تنام ..
نايمه على سريره ... افتحت عيونها ..وشالت الكماده من راسها.. تلفتت انتبهت للنور من النافذه .. معلنه ان الشمس طلعت..
سيف .. وينه ..؟!
ياربي ماكون اتخيل وجوده .. وكلها من لذعة السخونه ..
اعتدلت بخمول .. وكلها معرقه .. مع نزول حرارتها.. مسحت رقبتها بيدها .. ونفضت تيشرتها .. من صدرها .. وهي تنادي :
سيف .. !
جاها صوته: ابوي ..!
التفتت.. متروش ولابس بنطلون ترينغ.. وتيشرت .. وينشف شعره بفوطه صغيره ..

قرب منها ..
وحط كفه على جبينها .. رفعت عيونها له ..
وكأنها بعد مانزلت حرارتها .. تستوعب وجوده صدقاً وليس هلوسه .. ابتسم :
اخيراً .. ياخي علقت بك السخونه وماتبي تنزل ..
مهره تناظره بصمت .. وتروح تشتت عيونها .. وبخفوت:
انا كذا .. من يوم كنت صغيره .. ماتجيني انفلونزا دوم .. بس لو جات تكون مميته ..
جلس جنبها : بسم الله عليك .. احسن مافي سخونتك .. انها فكت عقدة لسانك ..

احمرت .. وتدري انها ماخلت في خاطرها شي ..
نزلت عيونها..
سيف يناظرها بحنية ..همس : وحشتيني يابعدهم ..
رفعت عيونها  لعيونه .. ونبضها يتسارع ..
حط كفه على خدها :البُعد ..علمني ان الدنيا ماتسوى بدونك ..
امتلت عيونها دموع مع كلماته .. همست بصوتها المبحوح: كنت بموت .. الايام مرت كنها سنين ..
وبرجفه :سيف .. ؟!
همس بحب : ياروحه ..
ببحتها وتوسلها : امانه ماتخليني ..تحملني .. ولاتطفش مني ..
فاجئها .. لما دخل يدينه تحت ذرعانها .. وخذها في حضنه ..
ضمها بشوقه وحبه ..
غمض عيونه .. يستشعر جسدها بين ضلوعه .. ارخى راسه على راسها  :
مهره يوم انك دخلتي هالقلب .. عارفه انك ماتقدرين تطلعين منه ..

*صوته العميق.. وهمسه العاشق .. كانا كفيلين ان اتشبث به .. وان اسكب دموعاً صامته .. ليتني استطيع ان اعطيك كُلي .. آه ليت العمر يمر بين ضلوعك .. واتنفسك .. كيف احببتك .. كيف عشقتك  .. كيف لرجل واحد ان يختصر جميع الرجال .. *

سيف يربت عليها .. ويخلخل كفه بشعرها ..
بعدت وهي تمسح دموعها .. وضحكت بخفوت :
خلني بعيده .. لاتتعادى..
ابتسم .. وحط خده على خدها .. بعدين باسها قريب من شفايفها :
دام العدوه منك .. اروح فدا .. !
فهت وهي فاتحه فمها.. وتناظره ..
رفع حاجب : وراه .. ؟!
ارتبكت ولمست رقبتها: ابي اتروش .. نزلت حرارتي وعرقت مره ..
وقف وساعدها توقف : تمام .. ادخلي تروشي .. راح اجيب بجامه من غرفتك .. بحطها هنا .. وانزل اسوي شي تاكلينه ..
مهره : لا ماله داعي .. انا اروح اتروش هناك ..
سيف ماعليه منها .. خذ منشفه .. عطاها اياه .. وراح بها للحمام :
خلصي ولاتقفلين الباب .. لازلتي تعبانه ..
هزت راسها ايجاب .. ولا حيل لها للاعتراض ..
*****

جمان .. طلع عليها النور وهي في مرسمها .. اشتغلت في لوحة كبيرة ودقيقة ..
نامت يدها ..
حطت الريشة..
وفردت يدها ولاحظت كيف ترجف واعصابها دمار ..
قامت ..
جوالها .. ساكن ..
لامسج ولا اتصال ..
شاهين بالعاده يطمنها .. لكنه لم يفعل ..
ظلت تلعن غاده في داخلها ..
طاحت عينها على طرف لوحه .. راحت سحبتها .. وابتسمت بحنين ..
الصورة عباره عن وجه .. لابس نظاره شمسيه ..بعدسه وعدسه الثانيه طايحه وباينه العين ..
تأملتها وليت الماضي يعود..!
حطت اللوحه في حامل اللوحات .. وجلست على كرسي مقابل ..

*راحت بخيالها لساحة النافونا في روما ..
حيث الرسامين .. والعشاق..
حيث الموسيقين الجوالين .. ايامي الأولى مع شاهين .. في شهر عسل ..اخلى من العسل..
وقفت معه حيث عازف كمنجا .. يذوب وهو يعزف ..
كان يموت والموسيقى جداً حزينه ..
شاهين اخذني بذراعه .. وقلوبنا تفطرت من اجله ..
اذكر اني دعوت ان الله لايذيقني مرارة هذا العازف .. المخذول .. !
اظن ان في ذاك اليوم .. لم يمر ملك ..ولم تكن دعوتي مستجابه ..
انتهى العازف من مقطوعته .. وصفقنا مع انحناءاته ..
امتلئ صندوقه المفتوح من الاوراق والقطع النقدية ..
عل العاشقين .. يدفعون غربان لذاك العازف النازف .. الا يصيبهم ما اصابه .. !*

مشينا انا وشاهين .. وانا امتلئت طاقة سلبية..
قرص خدي :حبيبي.. وراه ..
جمان : تأثرت .. حطيت نفسي مكانه ..
ضحك شاهين :والله انتوا يالفنانين ماعندكم سالفة ..
جمان التفتت وبانفعال: ليه عشان حنا نحس بهموم بعض .. مو ماعندنا سالفة شاهين ..  بس احنا حساسين بزيادة .. اي شي يجرحنا .. الحزن مو لحظي .. حتى لو مابينا داخلنا .. احنا غامضين نفس الالوان .. فينا صخب الأوتار .. فينا شموخ نفس التماثيل المصبوبه صب .. بس ترى لانجرحنا .. نكون نموت نفس اللي يعزف من شوي ..
شاهين بلامبالاة متعمد يجننها: ياشيخة .. دراما .. ومحوطين نفسكم بهالة احاسيس وحزن .. ولا اذا جينا للواقع ماعندكم ماعند جدتي ...
انفعلت وانقضت عليه بتلكمه على وجهه .. ضحك .. وهو يبعد ويمسك يدينها ..
طاحت نظارته الشمسية ..وبدون قصد داست عليها .. 
شهق هو معها .. وانحنى بيشيلها .. وكانت طاحت عدستها ..
ناظرها بنص عيون : امس شارينها .. يالفنانه المرهفه .. شوفي شسويتي ..
جُمان بلامبالاة : من فدايا رجولي ..
شاهين راح سحب نظارتها من عيونها .. وبنذالة ضغط على عدستها وشالها .. ولبسها اياه..
جمان عيونها متوسعه .. وبانفعال: خبل انت ..
شاهين يلبس نظارته بدون عدسه :
من فدايا رجولي ..

تجولوا في النافونا .. بنظرات بعدسة واحده ..
كانوا يضحكون على هبالهم ..
ووقفوا ياخذون سيلفي ..
.
.

قامت جُمان من تأملها للوحة .. افتحت درج صغير .. طلعت صندوق .. افتحته ..
كان فيه النظارات المكسورة .. ومجموعة صور .. لشهر العسل ..
وفيه قلادة بلاتين .. نفس اللي يلبسونها الجيش .. شالتها .. كانت بيانات شاهين .. تنهدت وهي تتخيل .. شكله بدون بلوزه .. والقلادة عليه ..
كانوا بشاطئ ميلانو .. لما سرحت في جاذبيته..وصاير برونز من الشمس ..
شاهين بخبث .. قطع شرودها :
عاجبك السكس باق ..
هي بلامبالاة : عاجبتني قلادة الامريكان ..هي اللي محليتك ..
فسخها ورماها عليها .. التقفتها: دام هذا اللي عاجبك هي لك ..
ابتسمت بخبث : ولو عاجبني الشي الثاني .. ؟!
ابتسم بعبث: هو بعد لك ..

يحوي الصندوق جماليات العسل الذي عاشوه .. كانوا عشاق .. حتى النخاع ..
رفعت اسوارة مشكوكه من قواقع .. اشتراها شاهين .. من وحده تبيع .. في ميلان .. لبسها اياه: خليها ذكرى .. لأحلى ايام حياتي ..
وباس كفها .. !

لكل قطعة في الصندوق ذكرى .. وكأن ايامي الجميلة جمعتها في صندوق لايفتح الا للذكرى..
جمعت كل شي وقفلت الصندوق.. ولأنها ماتقدر تجاهل ذيك الأيام ..
خذت جوالها ..
واتصلت عليه ..
عشان تعرف تنام .. بس ..
مو عشانه ..

في فندق  .. في زيورخ سويسرا .. وفي لحظات .. ضعفه .. مانام رغم التعب ..
يدخن .. واعقاب السجائر ملت الطفايه ..جالس في الشرفه البارده .. شارد في الضياع ..
ماتواصل مع احد ..
يفكر يمدد رحلته ..
وماياخذها عودة ..
مشكلتي لاصرت طايل جُمان ولاغادة .. ولاعارف ارجع لجمان .. ولاقادر اتخلص من غادة ..
غادة تعبت وهي تتصل ولا رد عليها ..
بالعادة.. يطمنها ويطمن جمان ..
رن جواله ..
القى نظره على صورة بيان وديم  مخصصها  لاتصال جُمان ..
سحب الجوال باللهفة .. وهو يطفي السيجار .. رد وبحذر : مرحبا ..
جمان ظلت ساكته ..
شاهين بصوت مبحوح :
جُمان ..
بجمود : ليش ماكلمتني ولا ارسلت ..
ضحك بسخرية مريره وضغط  عيونه اللي دمعت..
وسكتوا اثنينهم .. وانفاسهم يحملها الأثير .. تكاد تحرق اذن الآخر ..
شاهين وهو يشعل سيجار وبخفوت بحته: رحت ومتشفق ابوسك.. ماخفتي من الله يوم رحت وخليتيها في نفسي.. ماكسرت خاطرك..
جمان بهدوء:
لا .. ماتكسر خاطري ..
شاهين ضحك بوجع : ليه متصله ..؟!
جمان : يمكن اعتدت انك تطمني .. ولما ماتصلت يمكن خفت من قطع هالعادة ..
وبخفوت: خفت عليك ..

شاهين اطلق آاااه: اتفائل يعني .. ؟!
جمان شردت : انت قل لي .. يوم امتحنت حياتنا .. واغتصبت حبنا بغاده .. تتوقع خليت فيني شي يدعو للتفائل ..
شاهين : لو خليتها .. وطلعتها من حياتي .. تصفين لي ..
جمان هالمره هي ضحكت بسخرية .. وبصوت مذبوح:
شاهين ابوي .. مانتظر منك كلام .. الكلام مأخوذ خيره .. ولاانتظر منك افعال في وجهي ..  وخبايا من ورى ظهري .. انا اشوف غاده بعيونك .. افهمك لما تكون تبيني وماتبي تزعلني .. بس غادة جواتك ماتطلع..
شاهين : برافو والله .. وانتي ظلي على اسلوبك معي وخليني ضايع  بين السماء والأرض ..
جمان : انا انسانه ما أركض ورى احد .. ولا اساعدك انك تنسى .. ولا اسعى اني اسحبك لي .. يوم خذتك.. ماكنت ناويه أنافس عليك .. لو عرفت قيمة جُمان صح .. هذيك الساعه لو تجي ألف غادة وتفرش نفسها لك .. ماتشوف غيري ..
شاهين بضياع: عارف قيمتك والله ..
جمان : عشانك ماطلقتني تكون عارف قيمتي..غلطان ..انت بس مرعوب من فكرة انك تعرف قيمتي واكون مو في  يدك .. عارف لو طلقت .. لو تنطبق السما على الأرض مارجعني ابوي لك..
شاهين ببحه : ساعديني .. احتويني .. خليك معي ..
ضحكت جمان بقهر : شاهين .. اوعى.اصحى.. انا هنا .. ترى ننام بنفس الغرفه  .. قصدك اعطيك كلشي وتنسى غادة .. انا في قمة عشقي لك .. لما لقيت غادة نسفتني .. انا وقت ولدت بنتك .. رحت سميتها عليها .. تفكر لو رجعت معك زي اول ..بتنسى ..
شاهين بصدق : والله انسى ..
جمان تحشرج صوتها :
مابي انسيك انا .. ابيك تنظف نفسك منها بنفسك .. شاهين أكش منك والله .. وهي بقلبك وعقلك .. ماتحملك ..

شاهين ضحك بآااه وعيونه امتلت دموع :
جمان .. تذكرين لانمتي وانتي حامل .. من شدة قربك .. كنت احس ببيان وديم كنت احس بحركتهم في بطني انا ... ماشتقتي لهالقرب .. ؟!!!

اختنقت جمُان بعبرتها ..
*يسألني اذا ماشتقت .. يسألني وانا اللي قربت اموت من بعده ..
كانت بيننا بيان وبعدها ديم ..
نضحك سوياً ونحن نتحسس ركلاتهم ..
اصبحت بيننا افعى ..
اسمها غادة ..
لاتكف عن بث سمومها ابداً..*

شاهين بهمس : خلينا نعطي نفسنا فرصة ..
لاحظت رجفته .. ثم كحته ..
همست : ادخل عن البرد ولاتظل بره ..
ابتسم وقال يداعبها : شفتي .. تحبيني ..
جُمان :تمرض .. ثم نبلش فيك ..
ضحك :ايه يعني خايفه علي ..
جمان : ياليل.. خلاص خلك بالبرد يكسر عظامك .. وش دخلني عاد .. سلام ..
ضحك شاهين: مع ألف سلامة يابعدهم ..

*****
رجع سيف الغرفه .. ومعه صحن صغير .. لقاها رجعت انسدحت ومغطية حتى راسها ..
حط الصحن على الكومدينا ..
وجلس جنبها : قومي افطري ..
مهره من تحت البطانية : ماعرف ابلع والله .. مابي .. ابي انام بس ..
شال البطانية عن راسها .. ولقاها ضامه نفسها .. وتوها بتتكلم .. الا قامت تكح متواصل ..
ساعدها تجلس ولمس جبينها .. ورقبتها :
لازم تاكلين عشان تاخذين ادويتك ..
مهره تلمس حلقها : يوجع ..
ابتسم وهو يجيب الصحن قدامها: ادري انه يوجعك ..بس انا مسوي شي يصلح لحالتك ..
مهره ناظرت الزبدية الصغيره .. فيها حليب ..وشي ثاني ..
تسائلت : ايش هذا .. سيف ترى معدتي ماتستسيغ اي شي ..
ابتسم وهو يشيل لها بالملعقه : حليب وشوفان وحليته بعسل ..
توسعت عيون مهره:
اوخس يالهيلثي ..
ضحك وهو يحط الملعقة بفمها: مو وقت مسخرتك ..
مهره حطت يدها بفمها وتكح : والله ماتمسخر ..بس فاجأتني .. كذا شوفان وحركات ..
سيف: كله عشان خاطر بلاعيمك ..
مهره ابتسمت وبتاخذ الملعقه: طيب هات انا آكله ..
بعد يده :
انا بأكلك .. ممكن ..؟!
استسلمت .. وتناظره بشرود ومشاعر غريبة .. وهو يأكلها .. وباين الارهاق على كل ملامحه .. هو جاء من سفر ولا ارتاح .. والحين الصباح ..همست: ليه مانمت ..؟!
سيف بدون يدقق في عيونها:
ماجاني النوم ..
مهره: عشان حرارتي كانت مرتفعه صح .. حسيت فيك وانت تبدل كماداتي ..
سيف : بالله ..؟! .. لا ماهو السبب .. ماجاني النوم قلت اسوي شي مفيد
مهره عارفه انه يكذب .. النوم باين حتى من سواد جفونه ..
خلصت أكل .. وعطاها المضاد ..
مسكت يده: حرارتي زينه .. نام سيف ..
ناظرها بشكل مطول وهو واقف .. وبعد تفكير :مُصره يعني ..؟!
مهره ببراءة هزت راسها ايجاب ..
اشر بحاجبه : زيحي اجل ..
مهره: طيب بعاديك كذا ..
سيف: ماعليك ..ماراح تعاديني ..
وراح استلقى جنبها .. وخذها بذراعه .. مهره تشنجنت لقوة القرب ..
التفتت من الجهه الثانيه..
ضمها من ظهرها ..
ودس انفه في شعرها ..  وكفه عند بطنها...
ارتجفت: ليه لفيتني كذا ..
سيف وهو مغمض:
كذا لاسخنتي .. بحس ع طول ..
بخفوت متوتر: كيف بنام ..؟!
همس وهو يضمها اكثر: بتنامين .. انتي في اكثر مكان آمن بالدنيا ..نامي ياعينه ..

*اغمضت عيني طاعه .. هو عاد ..ليس علي إلا ان اذعن .. لن اغضبه ..نبضه يصطدم بظهري .. انفاسه تحرق عنقي .. كفوفه تجمعني .. وانا التي انفرطت كالمسباح دونه .. *

اما سيف .. وبعد ان سهر الليالي بلندن وجافاه النوم ..
وجد السكينة في رائحة شعرها ..
في جسدها الحار .. ذائب بين ذراعيه ..
نام اخيراً..
ولاينوي تركها .. ابداً..

*عندما ذهبت في ذاك اليوم مزرعة صبحا.. وعندما اتت ذات عينين العسل ..
وحدثتني ..
وعندما احتد النقاش معها ..
لم اتخيل او اخمن .. انها ستتملك قلبي ..
وتستعمره .. !
احتلال يامهره احتلال .. ماتفعلينه ..
تغتصبين ارضي .. وبشروطك *

****
في الصالة وبعد صلاة الجمعة ..
اجتمعوا العائله وحتى جمان وبناتها .. سعود وموضي عادوا من الديرة..

سيف ومهره مانزلوا ..
فارس توه ينزل ..
وسلم على الكل .. وسيف الصغير تعلق فيه .. ضمه وجلسه جنبه ..
سيف يتكلم بحماس عن الديره .. وعن النياق .. والخيول .. وعن الجده الكبيره والجد ..
ويوريه كمية الحلويات والعلوك اللي عطته الجده ..
فارس وهو يتفرج على كيس الحلويات:
والله حسيتك رايح البوليڤارد مو الديره على هالحماس .. الله يخلف عليك ..سهل الأرضاء..
جُمان : الديره احسن من البوليڤارد ..
فارس ناظرها بنص عيون :
لاتسوين نفسك البدويه المنتمية .. وان يعني ديرتي احسن مكان .. ومارتاح الا فيها..
ضحكت : والله ان الديره عندي .. تسوى مليون بوليڤارد ..
فارس : انا يعجبني ابوي .. كذا متحضر .. وماعنده في الديره ولاينتمي لها ..
موضي : ترى ابوك كان اكثر واحد يحبها .. الاجازات كان يقضيها هناك .. ويسترجع طفولته .. يالله يرجعون هو وخالك شاهين..
فارس : كان يمه .. كان .. فعل ماضي..الحين الوضع اختلف .. تبين يتهاوش معك قولي رح الديره ..
موضي تنهدت: الله يخلف عليه .. ماعافها .. الا من اللي صار وهو رايح لها ..
سيف تلفت وبتسائل : إينه ماما .. ابي ماما ..
فارس : نايمه امك .. مريضة ..
عقدت موضي حجاجها : صاز ..ولا تلهي الورع؟!
تنهد فارس : ايه مارجعنا انا وابوي معها من المستشفى الا الفجر .. البنت حرارتها فوق الاربعين ويالله نزلت ..
توسعت عيونهم .. وموضي بخوف:وش جاها.. وابوك ..؟! يعني ابوك رجع ..؟! .. البنت زينه الحين .. تكلم فارس قلبي وقع في بطني ..

بلقيس : ويني انا مادري عن شي .. 
جمان : وينها الحين .. نبي نطمن عليها ..
فارس : مع ابوي .. خذها معه لغرفته ..
جمان وعندها علم باللي حصل قبل سفره .. بدهشه :
مهره .. ؟! .. مع ابوك ..! .. وفي غرفته ..
فارس بتهكم :
احجي فارسي آني ..  ايه بغرفته .. زوجته ترى ..
جمان : ادري انها زوجته .. اخلص .. وش صار ..
فارس سولف لهم وعلمهم .. وسيف النتفه .. يفكرونه مو مستوعب .. تأزم وهو يسمع عن وضع امه .. ولا انتبهوا  له .. وهو يصعد لها فوق .. !
ولأن سمع انها بغرفة سيف .. راح دخل ..ينادي بخفوت : ماما .. ماما ..
ماردت ..
صعد على السرير .. وكشر لما لقى مهره مدفونه بحضن سيف .. واثنينهم متعمقين بالنوم ..
هزها : ماما .. دومي .. ماما ..
مهره : هااا ..
سيف : انا هنا ماما .. سوفيني ..
بعدت مهره عن سيف وابتسمت وهي تلتفت لولدها: جيت حبيبي ..؟
صارت على ظهرها ..
سيف راح جلس فوق بطنها: فالس قولي انتي مليضه ..
رفعت يدها لخده :
لا ياقلبي .. صرت زينه ..
سيف فتح عيونه ..يتأمل الموقف .. وسيف ينزل راسه ويخبية بصدرها : حفت ماما ..انتي مليضه انا ببكي ..
مهره تداعب شعره الكثيف : لا ياماما .. ماني مريضة ولاشي .. يلا ولدي الشيخ بعد شوي .. عشان ماعاديك ..
سيف يقرب منها زيادة وبرفض : مابي ..
كحت متواصل .. وسيف جالس فوقها .. حاولت تبعده ومو راضي ..
قام سيف .. وشاله :ياولد كتمت انفاسها ..
اعتدلت مهره .. وخذت ماء تشرب .. سيف ربت على ظهرها: ماجوره ..
سيف تأثر : ماما .. أفيك .. تموتين ..؟!!!
ابتسمت مهره :
مستعجل علي ..ياكثر ماتقول بتموتين ..
سيف : عدوينك  ..
ابتسمت مهره وهي تنزل عيونها ..
سيف الصغير : إيش تنامين .. مع أوبة .. سوين له حبيبي .. بس انا سوين لي حبيبي..(قصدة الضمه ) ..
ضحكت مهره .. وتوردت خدودها ..
اما سيف بنص عيون : شوفي بيجي يوم بفغص ال** هذا .. ولاتقولين ماقلت لك ..
بعثرت شعر ولدها : القلب ذا ..
قام سيف : يعين الله ..

****
بعد شوي نزل سيف وبعد ماسلم على الكل .. توجه المطبخ ..
موضي :وراه يمه .. تبي شي ..تبي اجهز لك حاجه ؟!
سيف بهدوء: مايحتاج يمه .. انا بسوي مشروب لمهره .. عشان حلقها ..لاتعبين حالك ..
بلقيس وفارس افتحوا عيونهم وفمهم ..
وموضي وجمان كذا يطالعونه بفهاوة ..
موضي تلعثمت : اقعد واسويه انا..
سيف راح : خلاص انا عارف وش بسوي ..
اختفى من قدامهم ..
بلقيس : لا لا .. مبدل اخوي ..
فارس بحماس ودهشه : يالبيه ..يابو فارس .. متخرفن .. انا اشهد انه سيد من تخرفن ..
قامت جُمان :
قصر حسك .. الحين يسمعك ويهون ..
راحت له المطبخ .. دخلت واغلقت الباب .. لقته يعصر برتقال وليمون ..
ابتسمت وراحت تسندت على الكاونتر جنبه .. رفع حاجب دون يلتفت عليها :
وراه ..؟!
جُمان : قلي .. كيف الوضع .. يبشر بخير ..
سيف : الأمور طيبه ..
جمان : ابي تفاصيل ..
ابتسم وهو يسكب الليمون في كاس كبير : عطيني زنجبيل .. مادله ..
جمان ضحكت: تدري صاير تهوس وانت تسوي هالحركات ..
سيف وهو ياخذ سكر بتهديد :جُمان .. !!
طلعت اللي يبي  : يعني صار نقاش بينكم ..
سيف : البنت محمومه هلوست .. وقالت كلشي بخاطرها .. اللي قالته يكفيني .. انتظرها عمر .. اي والله..
جمان : حلو .. وش بتسوي مع نوف وهيا ..
تنهد..
عقدت حجاجها : وش.؟!
سيف حكى لها وش صار مع هيا ..
جمان : أوف .. لا عاد مو كذا ..

رن جواله .. نغمة واتس .. فتحها من هيا .. (قهرتني ياسيف .. ذبحتني.. الله يسامحك .. طلقني )
سيف استغفر وحوقل..
جمان بتسائل: وش بلاك ..من راسل لك ..
لف الجوال عليها .. قرت .. عضت شفتها : ياربي  مسكينه هيا .. انت كنت قاسي بكلامك معها ..
سيف يقطع الزنجبيل :
يابنتي ..لايسون فيها فجعتهم ..زواجي منها ومن نوف كذا .. وكانوا راضين .. ليه ردود الفعل البايخه هذي..
جمان : القلب ياسيف .. هم كانوا تزوجوا لنفس احتياجاتك .. بس هم مالوا وانت ظليت .. ..
سيف بجمود كمل : جدار ..!
رفعت حاجبها ونزلته : انا ماقلت ..
سيف شال الكاس : على العموم .. هذا كلام هيا .. باقي نوف .. الفاغرة هذي تروح تقول اللي حصل لها .. وذيك تعطي ردة فعل انُ الكلام موجه لهم الثنتين ..
وضحك :
ايش هالخيبه اللي انا فيها ..
جمان ابتسمت : يسعد لي جوك .. اهم شي الايجابية ..
سيف : انا بصعد .. اخذ الليمون لمهره .. ببدل وانزل معها جهزوا الغداء ميت جوع ..
جمان : من عيوني ياقليبي .. يخسى الجوع ..
.

.

.
بعد شوي في الصالة .. وفي جمعه عائلية حلوه ..
مهره جالسه جنب سيف .. تضحك معهم .. مبسوطه والى الآن تعبانه ..

سيف وفارس .. يسولفون عن وضعها .. وهلوستها ..
فارس وهو يضحك :
سمعتك وانتي توصين اختك بالجوال تسدد ديونك .. وربي ما انتي صاحية ..
شهقت : كذاب فارس .. تبالغ ..
فارس رفع حاجب : خليني ساكت لاقول ديونك كم ..
مهره بإحراج: اي والله اسكت .. ماصدق .. ماذكر .. اني قلت لها .. احسك شاطفها علي ..
سيف : بالله كم .. ؟!
فارس يهدد : أقول .. ؟!
مهره صاحت : لا .. ما تقول .. تكفى فارس..
فارس : عشان يسددها ابوي عنك ..
ضحك وكمل : ما انتي  تقولين ماراح ترفع اعمالك لامتي .. من ديونك ..
انصدم سيف : كم عليك ..؟!
فارس بتهكم : واجد ..
بلقيس :  كم يعني ..شارية سيارة .. داخله مشروع؟!
جمان: مسافرة فيهم .. كم صدق ..
سيف نزل عيونه جهتها وخذها بذراعه :
هامورتنا .. على ايش طاقه السلف ..
سعود :
عاد وش على مهرتنا دين .. انا أوفيه .. الحلال كله تحت امرك يبه ..
مهره توسعت عيونها :لا يبه .. فارس يبالغ .. شفيكم .. ماهو سلف سلف ..
سيف: كم يعني .. خمسين ألف .. مية .. مليون .. ابي اعرف ..
مهره برعب : مليون .. !!!!
والتفتت على فارس وبتحذير: فروس لو تكلمت .. بتخسرني ..
توسعت عيون سيف : لذي الدرجة ..
مهره: واكثر .. ديوني .. انا كفيلة فيها وبسددها كلها ..
سيف بدهشة وتعزوي : ابو فارس .. حرمتي مديونة .. وغارقة بديونها .. وانا اخر من يعلم ..
انفجر فارس ضحك : كلها اربعين ريال لأيوب هنديهم .. وجارتهم شاكه اذا عطتها قيمة طلبيتها ..
مهره خبت وجهها باحراج : حيواااان ..
انفجروا كلهم ضحك .. وموضي: ياويلي .. وانا قلت البنت وش هي متوهقه فيه ..
مهره بدفاع : والله اكثر .. زينه تلحقني بألف ..يعني مو لذي الدرجه بشيل هم اربعين ريال ..
سيف داعب شعرها وبحنية : الدين يبقى دين .. حتى لو ريال .. 
 
مهره سكتت .. وشردت ..خافت من هلوستها البارح .. ايش ممكن قالت بعد ..
شردت بفارس .. اذا هي قالت تفاصيل سخيفه .. مثل اربعين ايوب ..
ايش ممكن قالت لسيف ..
فارس حرك يده : آسف مهره ..وش فيك بتبكين .. مزوح ..وراه تكدرتي..
ناظرته بنص عيون :
فضحتني يلد .. وش بقى بعد .. الحق علي أمنت لك .. يابخور المواقد ..
توسعت عيونه .. واشر على صدره بسبابته :
انا..؟! .. بخور المواقد ..
مهره : خلاص عرفتك .. بيرك يفوض ماله امان ..
شهق  : لااا  مهره ..تكفين .. الثقه ..
مهره صدت : مابقى منها شي ..
تحطم فارس : لا تقولين ..
سيف مبسوط على اسلوبها مع فارس ..

موضي : جدتك تبيك تروح الديره وتاخذ مهره .. عشان تشوفها ..
عقد حجاجه :
اقتراح مرفوض.. مهره ماراح تروح الديره .. اللي يبيها يجيها هنا ..
عقدت موضي حجاجها : جدتك مافيها حيل للطريق .. ومتشفقه ودها تتعرف على حرمتك ..لاتحبكها ..روحوا عندهم كم يوم تنبسط هي .. وجدك ..
سيف بعصبية وترت مهره:
يمه انسي ..
سعود بحده : لمتى سيف .. عمامك .. وناسك.. سنين ماتروح ..من بيوصل هلي لاغمضت عيني ..
سيف بعصبيه : الله يطول بعمرك يبه .. عمام .. ماعندي الا عمي فهد ..الباقي انا ماعترف فيهم..
سعود بحده : سيف ..!
موضي بعصبيه : اهدوا .. شجاكم .. الله يصلحكم ..
جمان بانفعال: سيف صادق .. ليش تتجاهلون تصرف عمامي .. يوم وقفوا مع حمدان واهم يدرون ان صوب سيف متعمد .. بعد ما تزوج نجود ..اخوي بغى يموت .. وكلهم قالوا بالخطأ ..جدي اللي مارضى ..وقال كلمة الحق ..

موضي بحده : جُمان .. قولي خير ولاسكتي.. !!!
فارس بصدمه: لحظه لحظه.. من اللي صوب من ..حمدان ولد عمي فيصل .. ماغيروه ... صوب ابوي ؟!
سيف رفع راسه وتنهد ومن بين اسنانه : قفلوها  ..
مهره ارتجفت.. ومو فاهمه شي .. بس الواضح ان في احد كان محاول يقتل سيف ..في الماضي ..
فارس وقف وبانفعال وعصبية : والحين ليش تو ادري .. يعني يبه .. انت مب على اصلاح مع عمامي عشان تسذا .. طيب ورى انا اقابلهم .. واعطيهم وجه ..

سعود بحده: هم عمامك يافارس وعمام ابوك .. مسألة قضت مع الزمن ..
سيف يناظر ابوه وبحده :
كل شي يقضي الا ان حمدان كانت عينه على نجود وهي لي .. وكل شي انساه .. الا انهم دروا ان هذا السبب اللي بغى يقتلني عشانه ..  وقالوا شاب وعاشق .. طاش وسواها من حر قلبه ..
سعود : قضى ياسيف .. ذيك سنين وراحت .. ونجود والله يرحمها واحنا عيال اليوم ..
سيف ضحك بقهر:
من قال ان الجروح تدفن مع الموت .. والله يايبه .. لو الود ودي .. ان عساف ..عساف واهو اخوي يرجع لدنيا .. اقسم بالله .. ان كان ....

مهره قاطعته ..  مسكت ذراعه تنبهه ..ضغطت وكأنها تتوسله .. ألا يُكمل ..
سكت .. وقلبه يخفق بتسارع من انفعاله ..
سعود عقد حجاجه : وش كنت تبي تقول ..
سيف وعشان مهره ماتزعل:
ولاشي .. بس تذكرت ان هو ونواف كانوا معي ضد اخوانك ..
سعود بغضب وهو يتكى على عصاه ويقوم : والله والكوبه منكم الثلاثه ..
وراح وهو يتحلطم بغضب ..
بلقيس : يالله .. الحين تزيد رجل ابوي .. من الغيض ..
قامت موضي وراه تهديه ..

سيف فتح ازرار ثوبه ودلك رقبته .. مايحب طاري الديره وعمامه ..
كانت اجمل ايامه فالديرة .. ومن تزوج نجود .. تتالت الاحداث السوداوية فيها .. ! ..
مهره حطت يدها على كفه وهمست تداعبه : الو ..
ابتسم .. وتلاشت ابتسامته على طول .. وهو يضغط على عيونه ..
والحادثه تطري عليه .. بعد اسبوع من زواجه ..كانوا رايحين الديره .. عشان عزيمة كبيرة مسوينها للعرسان .. وخلال العشاء .. والاحتفال ..
اطلق حمدان ..  كان ناويها في قلبه لكن ... !!

قاطعه من شروده الحاح فارس.. جثى امامه : وين يبه وين .. وين صوبك الكلب ..ياوجع قلبي وجعاه ..
ابتسم سيف بحنية له :
وش لك فيها عاد ..
فارس : كذا ابي اعرف .. صدمتوني .. والله لو اني ولدكم بالتبني .. شي مثل هذا ادري به صدفه ..
اشر سيف على صدره فوق .. قريب عند تجويف الابط وذراعه :
هنا بالضبط ..قرت رصاصة حمدان ..
شهقت مهره وحطت كفها على فمها ..
فارس بصدمه : مو انت قايل  عن الاثر هذا ..انُ حارقك القضا ..
سيف بتنهيده: وش هالقضا اللي بيجيني هنا .. لا يبه .. هذا اثر رصاصة حمدان التسلب ..
فارس بحمية: والله لاشرب من دمه .. ابن ابوي.. والله عيب علي الشنب ان ماخذت بثاري.. ياعيباه ياعيباه وانا اقابله بالمجالس وعيني بعينه .. يناظرني واتبوسم له ..

سيف نبط جبهته: ولا حتى في احلامك يجيك ذا الطاري .. موقف قديم وانتهى .. وانا قاطع علاقتي فيهم .. ومانلتقي الا في العزيات .. وبعض المناسبات ..
ولعلمك بعد الحادثه بعد ما طابت جروحي .. رحت وسوا ابوي حمدان (جده ) عشاء كبير .. عشان ياخذ اللي في خاطرنا انا وابوي اتجاه عمامي ..
فالمسأله منتهية .. بس انا في اشياء في نفسي .. ماتنمسح بسهولة ..

شرد سيف في كف مهره اللي فوق كفه..
فارس شرد في وجه ابوه .. لو صاير فيه شي .. لو ميت ابوي .. ليش ابوي دوم فرحته مكسورة ..
من يكون حمدان عشان يجاكره في امي ..
تخيل صورة ابوة في العرس .. كان صغير ..
كيف ولد عمه من دمه ولحمه .. يطلق عليه بدون رحمه ..
وانا ألوم ابوي .. لاعاش بلندن وترك كل شي وراه .. !!!
بلقيس .. ولحظة الصمت ثقيلة .. كل واحد يسبح في ملكوت آخر ..
قالت : وش فيكم .. حل على روسكم الطير ..
سيف فاق من شروده وقام :
انا بطلع ادخن ..
طلع ..
تارك مهره .. تشعر بفجوة مكانه جنبها .. لو كان مافيه سيف .. !
كيف بتكون الدنيا ..!!!

*****

نواف:ايه ادري .. بس ذا امر قديم ومنتهي .. واحنا عيال عمومه .. ومابينا ثار ..
فارس بعصبية: والله امشيها لهم كلهم الا انت نواف .. كيف تخبي علي شي كذا ..
نواف بهدوء: وليه اقولك .. موقف حصل قبل تنولد .. ابوك عايش والله حفظه .. وهذا هو عندك .. لايصير قلبك اسود ..
فارس ضايق صدره:وجعني قلبي يانواف .. رصاصة وابوي .. ليتها فيني ولافيه..  الا ابوي يانواف .. جعلني قبله .. جعلني ماذوق يومه ..كيف برقد وانا اتخيل اللي صار ...
نواف : بالله انتوا وش فتح عندكم هالسيرة ..
فارس : امي وابوي سعود .. يبون ابوي يروح الديره وياخذ مهره .. لان جدتي مزنه تبي تشوفها ..
نواف : وجدتي مزنه ورى ماتجي مثل عوايدها .. كل بين كم شهر .. جات عندنا .. الا ان جدتي تبي حرش..
فارس بضيق: وانا ادري عنهم .. ابوي مبسوط هالايام ونفسيته زينه .. من تزوج مهره ..بس مايقدرون ..الا لقوا سيره يفتحونها ويكدرون عليه ..

تنهد : خلاص .. لا احد يفتح سيرة الديره عند ابوك .. وانت بعد لاتقعد تسأل .. وتضايقه .. جاتك **** السؤال تتصل علي واقولك اللي تبي ..
فارس انصدم : نواف ..!
نواف : وانا صادق .. وابوي انا اكلمه واتفاهم معه ..
فارس : طيب متى بتجي انت ..
نواف : قريب ان شاء الله .. ابي اقفل .. كل شي لاني ابي استقر فترة مابي اسافر ..
فارس يتحرش : ها.. ها.. تبا تعرس ..
نواف يجارية : عاد لاقي لي كورية.. كنها لعبة ..وجهها تقل انمي ..
فارس : الله ابي .. على كم ..
نواف :يا ** بنت .. ماهي ميدالية ..
فارس بنص عيون : ماش .. خشتك ماتصلح مع الكوارية .. يبي لك سعودية ومن قلب الديرة والصحراء ..
نواف : والله هالقطن اللي هنا حلوين .. بس ماهنا خشوم ..
فارس : كيف يعني ..؟!
نواف : يهمني الخشم وانا عمك ..ابيه سلة سيف ..
فارس بنص عيون: لاتفكر انك بتجيب وريث للعايلة احلى مني ..
نواف : انسى انك حفيد البيت .. بس بأذن الله بجيب اللي يدق راسك ..
فارس : بعد عندنا الحين ولد عساف.. شبيهك..
ضحك نواف : متحمس اشوفه .. من ترسل له مقطع يموتني ضحك .. شيتعاطى هالورع ..
فارس : زاحف .. طالع على امه ..
نواف : ومتحمس اعرف هالمهره .. اللي صنعت المعجزات ..
فارس : بتحبها ..
نواف ينبه فارس : هلا..؟!
فارس : اقصد حب اخوي مثلي معها .. ايش في مخك يشطح ..
ضحك نواف: لايسمعك ابوك .. يقص راسك ..
ضحك :يالبى بوفارس ..يمون يمون على الرقيبة وراعيها..
.
.
.

دخل سيف .. بعد ماطلع وراح عند ربعه وغير جوه وتلفت : وين مهره ..؟!
بلقيس : صعدت بتاخذ علاجها .. ومانزلت .. تقول بترتاح شوي ...
التفت على سيف .. جالس متكدر .. وبيده لعبه ..
عقد حواجبه: سيف .. وش فيك بابا.؟!
تنهد: ماما .. تقولي .. لوح .. انا ابيها ..
ابتسم وشاله وجلس وجلسه على حضنه :وليش زعلان .. هي تعبانه .. وتبي ترتاح ..
تنهد بصوت: تقول عاديني .. ابيها عاديني ..انا أليض .. وماما اليضه .. اثنينا أليضين .. احبها ماما .. مسكينه ماما ..
توسعت عيون سيف بدهشه .. من كلام النتفه ومنطقه ..
'واجتمعنا سيفين .. في عشق مهره نتبارى '

بلقيس متأثره: من مساعه وهو يقول كذا .. مهره خايفه تعاديه .. وهو من راحوا بنات جمان وهو يبيها ..
سيف وقفه على حضنه ناظر عيونه :
شوف ..خلينا نتفق .. لو صرت شاطر .. وطعت كلام ماما ..عشان نساعدها تطيب .. بس تصحى .. نروح كلنا المزرعة..
توسعت عيونه : مع ماما ..؟!
: مع ماما ..
: وفالس ..؟!
ضحك سيف : وفارس..
: وكلهم .. وابي بيان وديم ..
سيف : لو تبي الجيران بعد .. واركبك على الحصان .. ونسبح في المسبح ..
سيف راح ضم سيف .. وذرعانه .. تعتصر رقبته ..
وفي لحظه ابوية جميله ضمه بحنية ..
ابتسمت بلقيس ..
ودخل فارس .. وشاف الوضع ..
توسعت عيونه : لاااا ياشيخ ..
سيف يناظره وراس سيف الصغير في رقبته : خير في شي ..؟!
فارس رمى مفتاحه على الطاوله .. ويقلد المشهوره موزه :
انا ساكته .. ومتحمله .. ساكته ومتحمله ..
بلقيس انفجرت ضحك ..
وسيف مو فاهم : وش ذا ..؟!
فارس بتهديد: خير .. وش ذا الهاق .. انت حلاتك مع النتفه ذا عداوة ..سايح بحضنك اشوف..
ابتسم وهو يضمه اكثر : ورعي ذا ..
جاء فارس ومسك بلوزة سيف من ورى ويسحبه: قم يالعنكبوت .. لاصق ..
سيف تشبث بعمه : مابي .. اوبه .. فالس تكني..(فارس بيطقني)
فارس يشده : ابعد .. ذا ابوي انا ..اقسم بالله لايوصل الدم للركب ..
ضحك سيف .. وناظر وجه فارس : من جدك .. ؟!
فارس وعينه في عين ابوه ..وبتحدي: ايه من جدي ..
وراح يمزع سيف اللي شبك.. بسيف ..
وسيف الصغير يضحك ويتعلق بعمه ويحتمي فيه ..
وسيف ضامه ..
فارس راح يدقدق سيف .. لمن انهار ضحك .. وفك عمه ..
وفارس اسحبه ورماه ع الكنب ..
وراح يتعارك معه .. واثنينهم يضحكون ..
سيف شرد في الاثنين ..
وبلقيس ببتسامه حلوه تناظر سيف ..
وكل شيء في روحه يختلف ..
ويعود للجمال ..!

.
.

بعد شوي صعد لغرفته .. ومالقى مهره .. طلع وراح غرفتها .. فتح بخفوت .. وسمع صوت جهاز البخار .. يشتغل ..دخل واغلق الباب  .. لما حسها غافيه .. والكمام على وجهها.. ومستنده على ظهر السرير..
وقف قريب منها .. مهره تتجزل .. وتحاول ماتشكي .. قاعده لحالها وتطبب في روحها.. لاحظ عيونها الذابله ..
من مساعه تضحك وتسولف ..
وهي اصلاً تعبانه ..
وقف يناظرها..شعرها الحريري .. مخنوق في مطاطة الكمام ..
رموشها ساجدة في خنوع على خدها الشاحب ..
تأمل عنقها .. نحرها .. وصدرها يعلو وينخفض .. وصوت انفاسها موجع ..
نزل عينه على ذراعها .. واثار الابر .. متشكله في بقع زرقاء ..على بشرتها البيضاء ..
وصل بتأمله لكفها الجاثيه جنبها .. نصف مفتوحه ..
عقد حواجبه .. لأثر نقط غريب في بطن يدها..
مد يده وفرد اصابعها ..
تحسس الاثر .. بتسائل .. كذا وحده وفي اماكن متقاربه ..
فجأه اسحبت مهره كفها .. وهي تعتدل.. وتشيل الكمام :
سيف .. !
سألها : ايش اللي في يدك..
مهره طفت جهاز البخار .. وبتسائل : وش فيها يدي ..
مد كفه: هاتيها .. وانا اوريك ..
ارتبكت بس مدتها ..
مسكها واشر على النقط ..
مهره ببتسامة حاولت تخفي ارتباكها: تقصد النقط هذي ..
سيف عاقد حجاجه: ايه ..؟!!!!
مهره ارتبكت اكثر .. بس ضحكت : طحت في مزرعتنا مره.. وقدامي نار مشبوبه .. وجات يدي على الفحم .. وبس يعني .. ظل الاثر ..
سيف رفع حاجب وماصدق .. بس قال بسخرية :
واضح ان الفحم مرتب ونفس المقاس ماشاء الله..
سحبت كفها .. والتزمت الصمت .. وهي تلملم ادوات جهاز البخار ..
سيف راقبها ..وهي تتحاشى تناظره.. اللي بكفها اما بفعل فاعل .. او هي مسويته بنفسها .. كاتعبير عن حالة نفسية .. اوضغط نفسي ..
تنهد وماحب يقلب الجو شحنات .. جاء جلس جنبها وخذ احد الادوية : حطيتي منه في البخار ..
هزت راسها ايجاب ..
لمس جبينها : تراك مسخنه ..
مهره: خذت بنادول الحين تنزل ..
ابتسم : وش فيك ماتناظريني طيب ..
مهره تبعثر نظرها بكل شي الا وجهه ..
مسك ذقنها .. ورفع راسها له :
مهره ادري ان بينا بحور ودهور .. وعوالم .. الله بس اللي يدري فيها .. بس احنا اختصرنا الدنيا .. وحبينا بعض ..لما ماتبين تقولين لي الشي .. لاتقولينه .. بس لاتكذبين علي ..
همست وهي تحدق في مكان الاصابة اللي درت عنها اليوم :
لما قلت لفارس ان اثر الرصاصه حارقك القضا .. ليش كذبت ..؟!
سيف بعثر نظره : عارف فارس بيتأثر .. وبيحط في باله .. وبيحقد .. وممكن يكبر في نفسه هالشي .. ويغلط ..
ارتسمت في شفايفها ابتسامه صغيرة :
اممممم ..
رجع ناظر عيونها .. وهز راسه بتسائل .. خذت كفوفه .. واحضنتهم بيديها :
رغم الوقت القصير اللي بينا .. الا اني اسأل الله ياسيف ان يجعل يومي قبل يومك . .
خفق قلبه بدهشه وبخفوت : استغفري ..
فاجأته لما اندفعت لصدره وضمته : اوجعوني عليك والله.. سيف انا ابتدى عمري معك .. في اشياء كثير ابي اعيشها وياك .. باقي الدنيا بتبكيني .. ابيك حولي وتمسح الدمعه .. باقي بنكسر.. وبحتاج اتعكزك ..
انصدم وهو يضمها ويغرس يده في شعرها : وش قصدك يامجنونه ..كل شي انتهى .. ماحدٍ يبكيك .. وخشمي يشم الهوى ..
ضمته اكثر .. وخفق قلبه اكثر .. همس : مهره ..!!!!
رفعت راسها له وابتسمت : يارجا عينها ..
حط انفه على انفها: وش كنتي تقصدين ..
مهره بعبث: كنت ابي احسسك بتأنيب الضمير عشان تخاف على نفسك .. وتتمسك في الحياه اكثر ..
رفع حاجب ومتعمد يسئل هالسؤال: وليه اتمسك فيها ..
ابتسمت وبدلع : عشاني ..!
رفع حاجب .. وهذه الغزالة الصغيرة .. تجيد اللعب على اوتار قلبه ..
وتحترف اعتقال جوارحه ..
سيف توه بيبوسها ..  بعدت وحطت راسها على حضنه :
انا مريضة .. المفروض ماتروح عني ولاتخليني؟!
سيف يبعد خصلاتها عن خدها:
تدرين رحت عند اخوياي ..والجلسه عامره .. بس كنت افكر فيك وظليتي تخاشرين عقلي ..
رفعت عيونها له :
جعلني مافارقه..
باس خشمها ..
مهره سولفت معه .. مثل الطفله .. وسيف كان يداعب شعرها ..وملامحها ..
ضحك من سالفه قالتها عن صبحا ..
مهره رفعت سبابتها على خده .. وضغطت على الغمازه .. وهمست :
جعلها ماتختفي ..

اذا سولفت عذبه ويمطر معاها الديم
‏كأن المسامع أرض ، و الغيم شفتها

‏عليها حلا مايشبه الا " بنات الريم "
‏نعيم الحياه وغايته في ابتسامتها

*****
في مساء عصبي بالنسبة لجمان ..
تذاكر لبيان  .. كانت تصيح بعصبية : بيان .. ضفدع مافيه عصا .. ايش في مخك .. استوعبي جننتيني ..
بيان بتبكي : ماعرف ماما .. ضرس .. ظلام ..وتقولين ضفدع .. ضيف .. كيف اعرف هذا فيه عصا .. هذا مافيه ..
جمان واللي كانت اعصابها فالته ضربت الدفتر بكفها :
ركزي بنطقي .. الحين لما اقول ضـ .. ضـفدع .. نفس لما اقول ظـــبي ..
ديم طايره عيونها .. تناظر امها بخوف ..
خايفه على اختها ..
بيان بدت تبكي : ماعرف ماما..
جمان تضرب جبين بيان : خزني في مخك المصدي .. تعبت وانا اعيد ..
بيان انهارت تبكي بصوت .. واكتبت ضفدع صح ..
جمان تضرب الدفتر : اكتبي ظلال .. اشوف ..
بيان اكتبتها بدون عصا ..
وصرخت جمان: بيان ...
انفتح الباب .. ودخل شاهين .. بيان وديم في وقت واحد التفتوا ..
وبصيحه ملهوفه : بابا ...
ركضت ديم بسرعة البرق .. والتقفها .. وشالها فوق .. وبشوق : عين بابا ..
بيان ركضت له ..
وجمان ..مارفعت راسها له ..
ماتبي عيونها تفضحها.. كان المفروض يجي من اربع ايام.. ولاجاء ..
واتصلت عليه وكله جواله مغلق ..
خافت ..
انرعبت من فكرة انه صار فيه شي ..
تزداد ضربات قلبها مع صوته .. ومداعباته لابيان وديم ..
وهم يشكون له عصبيتها وصراخها عليهم ..
قرب ناحيتها وهي جالسه على الأرض مقابله الطاولة ..
داعبها : وش فيك مستشره على بناتي ..
بيان بانفعال : بابا .. ماما تقول عن مخي مصدي ..
ديم : بابا ماما تقول شعري مدهن .. تقول شعري مو.. مو .. مو حلو ..
جمان مارفعت عينها له .. وهي تعض شفتها السفليه شوي وتقطعها ..
بيان : بابا ماما شقت مريولي ورمته بزباله لاني وسخته بالحبر ..

شاهين يناظرها .. وينتظر منها كلمه ..
نزل ديم وهي مستمره فالشكوى : كيكاتي .. ممكن تخلوني مع ماما شوي ..
وغمز لهم وبهمس :
اصعدوا فوق ولو اقنعنا ماما ممكن نروح الملاهي ..
توسعت عيونهم : والله ..؟!
باسهم : اذا وافقت ماما ..
راحوا صعدوا .. وقبل يتكلم .. قامت جمان بسرعه .. وراحت اتجاه مرسمها ..
لحقها ودخل وراها قبل تغلق الباب ..

جمان بدون تلتفت : خلني لحالي ممكن ..
اغلق الباب .. وعقد حجاجه :
وش فيك مع البنات .. ماهو عوايدك هالأسلوب ..
صاحت بانفعال : شاهين اطلع بره ..
راح لها وسحبها من ذراعها ولفها جهته وبانفعال:
كلميني .. وش فيك .. وش صار لك ..
جمان رفعت عيونها له وصاحت .. وهي تدفعه من صدره:
ارجع مكان ماجيت .. ليش رجعت ..اخر اتصال بينا .. بينت لك اني متضايقه انك ماطمنتني .. وتروح تطفي جوالاتك .. وفوقها .. تأخر جيتك اربع ايام .. يعني عساس عرفنا نقطة ضعفها ندوسها ..

توسعت عيونه .. ومسك معصمها .. وهي مستمره تضربه على صدره:
والله ماكان قصدي اللي فهمتيه..
صاحت وهي تنهار دموع :
شاهين ماخذت منك الا العذاب .. يلعنك كثر ماتمسكت فيك .. يالخاين يالجلف .. يالعاهه ..
انقضت عليه .. وهي تضربه وتسبه وتشتمه .. وشاهين قلبه ينبض بقوه وثوره ..
لهفتها .. حُرقتها .. خوفها عليه.. الفاظها الغريبه على لسانها .. ماطلعت الا من قو حبها وعشقها ..
دموعها الفيصل ..
دموعها غسلت غاده من قلبه ..
اندفاعها .. ضربها المؤلم ..
مسكها بشدة وضمها.. وهي تتفلت منه بكل ماأوتيت من قوه ..

*ضممتها دفنتها في جسدي .. كيف شككت .. في عشقي لها .. كيف جلست في خلوتي .. واعتزلت الجميع .. لأرى كفة من ترجح ..
ياثقل عشقك في قلبي ياجمان .. كفتك لم ترجح فقط ..بل كسرت حتى الميزان ..
جمان .. انتي شامه في قلبي منذ الولاده ..ولدت بها وتبقى حتى اموت ..
انتي شامه ظننت انها بي رغماً عن انفي .. لكني اكتشفت ..
انها تقع في اخطر منطقه من جسمي .. ولو حاولت ان ازيلها تشوهت .. ومت*

شاهين .. دفن وجهه برقبتها .. وهمس: اهدي ياروحه ..والله الدنيا ماتسوى بدونك ..
انفاسه الحارة .. وهمسه .. كانتا البسملة والمعوذات .. على شياطينها الهائجه ..
هدت وهي تسمعه .. يهمس ويضمها اكثر:
اعتزلت العالم من بعد مكالمتك .. ماتواصلت مع احد.. ابي اصفي ذهني واعرف انا وش ابي بالضبط.. مالقيتك الا انتي .. انتي الحاكم وشعبه ..انتي اللي لك القلب كله ..
همس ببحه : جُمان ..
بخفوت : هممم ..
بعدها وهو ماسكها .. وناظر عيونها: احبك لاشك  .. غيرك وهم .. عطيني فرصه واثبت لك ..
ارتجفت شفايفها .. بتقويسه طفوليه وعبره :
لو صدقتك وخذلتني .. بتخسرني..
شاهين بصدق: ورب البيت ماخذلك ..

*في عينيه صدق ثابت .. وفي قلبي طفل يريد تصديق الأكاذيب .. قررت .. منحه الفرصه .. ومنح نفسي شاهين .. عطشته وذبلت .. اريد ان استعيده ..سأضع ثقتي على كف عفريت .. ان وقعت .. تنتهي هذه القصه *

لفت ذراعيها على رقبته .. وسحبته ناحيتها .. وبكل ارادتها قبلته ..
توسعت عيون شاهين ..بصرخه داخله
*كم لبثنا*..!!!

بادلها بقوة شغفه وجنونه .. وهو يرفعها عن الأرض ..
في عناق كالمُسكر .. !
شهية كالعسل .. مُره كالقهوه
جمان .. ونقطه ..!!

*****
 بالليل .. مهره في غرفتها .. تروح وتجي بتوتر . .. سيف راح لهيا ..
لأنُ قال بيجلس معها وياخذ خاطرها قبل مسألة الطلاق ..

ـــ قبل مايمشي ..
هو يلبس الجزمة ..وهي جالسه جنبه ع الاريكة .. قطعت كفوفها ... وهي تشبكهم في بعض ..
رفع حاجبه وهو يلبس كبكاته :
ترى رايح عشان اطلقها ..
مهره تدعي الكبرياء : وانا قلت شي .. عادي يعني حتى لو تفاهمت معها وراضيتها ..
التفت ناحيتها وبتحدي: تقولينه صادقه..؟!
مهره نزلت عيونها:
انا مابي أحد ينظلم بسبابي .. حتى لو كان هالشي ضد رغبتي ..
نزل عيونه لكفوفها وقد احمرت من ضغطها عليهم .. فك اصابعها .. ومسك كفها :
ماحد انظلم بسببك .. ومافيه مظلوم في المسأله كلها .. البنت تبي تطلق .. وانا بعطيها اللي تبيه .. وانتهينا ..
مهره رفعت راسها: مره قلت لي .. انك رجل .. وتحتاج الحرمه بحياتك .. سيف .. انا احبك .. بس مو قاعده اقوم بحتياجاتك .. مابي اظلمك حتى انت ..

سيف وقف .. وباللهجه هادية يوضح لها :
خلينا نقول اني طول السنين اللي فاتت .. بحثت عن احتياجي .. ومارسته..جربت ماحرم نفسي .. بس ماكنت مبسوط .. ماكنت اتعلق بأحد .. ولا اشتاق .. كل شي يصير مثل الشرارة وتطفي ..

حدقت فيه .. وركز بعيونها كثير .. وكمل بصدق:
كل شي اختلف يوم حبيتك .. ماعدت احتاج الا قربك ..
امتلت عيونها دموع :
بس انا..؟!!!
سيف خذ شماغه على كتفه .. وحط عقاله على راسه :
انتظرك عمر .. بيجي اليوم .. اللي بعالج جروحك .. وانتي بتجيني من كيفك ..
توسعت عيونها:
انا اجي من كيفي .. اف يالثقه .. لاتتعشم..
سيف يرش العطر على ثوبه :
طيب ماراح اتعشم باقي نوف .. موجوده ..
وغمز لها:
على اقل من مهلك حبي ..
صاحت وهي تقوم : سيف .. !
جاء ناحيتها وضم وجهها بكفوفه وباس عيونها: المهم انتظريني .. لاتنامين ..
هزت راسها ايجاب ..
وبودها تتشبث فيه ومايروح ..
توجه للباب ..
وبسرعه راحت له ..وقفت قدام الباب .. وبالحاح طفولي: امانه سيف لاتتأخر هناك ..
ابتسم : من عيوني ..
مهره بتوسل: سيف انت قلت .. تنتظرني عمر ..
سيف : وانا قد الوعد ..
تحرك خطوه للباب ..
ومنعته وكفوفها على صدره : سيف .. !
سيف ذايب عليها : ابوي .. ؟!!
مهره ومحتاسه بنفسها :والله احبك .. والله والله ..
سيف بحنية : وانا اعشقك .. ابعدي تأخرت..
وتقدم خطوة للباب .. ومنعته:
سيف .. !..
ضحك بحيرة .. لتصرفاتها الطفوليه .. فعلاً قيدت حركته :
مهره اعقلي .. والله راجع لك ..
بعدت عن الباب: في أمان الله ..
بعثر شعرها : في امان الكريم ..

'الوقت اللي غابه سيف مو طويل .. لكن احس كأن مرت سنه ..
وانا ماتصل .. لمراعاة الذوق في الموضوع .. فجأه تطلع قرينتي الشيطانه  .. وتضحك ضحكة الساحرات .. ( هو لك .. لك لحالك .. انتي تحبينه وهو يحبك .. لاهيا ولانوف .. ولا اي حرمه في الدنيا تنافسك .. وش فيها اذا انتي نفسيه وماعطيتيه حقوقه .. هي الحياه بس هالشي ..)

بعدها طلعت قرينتي  الملاك ..  (انتي جيتي اخر شي وتبين تتملكينه .. هو رجل ..ودامك مترهبنه .. خليه يعيش حياته .. وهم زوجاته وبالحلال ..)

وصرخت الشيطانه(تخسين زوجاته .. كانوا كانوا .. انتي زوجته بس .. انتي قلبه .. انتي اللي يشوف الدنيا من عيونك .. انتبهي تتنازلين عنه .. لأي زفت في الدنيا .. وحتى في الاخره .. انتبهي له من الحور العين ..) ..

جات الملاك ودعست الشيطانه .. وشاتتها ..(مهره .. لاتصيرين انانيه .. دامك ناويه تحبينه على الناشف خليه يعيش ..)

هاجت الشيطانه وبصياح(خليها تقنعك .. وخليه عندها .. ياهبله .. شكله صالح هيا .. وشكله نام في العسل معها ..وخلي ام الجناحين تلعب عليك  )

شهقت مهره : ايــــش ..؟!!

.
.

في الكراج سيف وقف بسيارته .. وظل شارد مانزل على طول ..
قبل شوي كان الوداع مع هيا مؤثر نوعاً ما .. بس ماقدر يكذب عليها ويعشمها ..
وهي اختارت الانفصال ..
لما وصلت لنتيجة انه حاله ميؤوس منها ..

اجمعت كل شي يخصها من بيته ..
ولما كانوا الخدمات يركبون اشياءها بالسيارة ..
ابتسمت وببحه: بوفارس ..
سيف : يالبيه ..
كانت بعبايتها والشيله على كتوفها .. امتلت عيونها دموع :
الله يوفقك .. واذا البنت اللي علقتك فيها خير .. ان الله يتمم لكم ويبارك لكم ..
سيف بخفوت: الله يجزاك خير .. سامحيني هيا ..
بغصه وابتسامه: والله ماشيل عليك ..
مد يده بيصافحها ..
صافحته .. وشاف دموعها كيف انزلت .. زفر بثقل قلبه وخذها ضمها :
هيا .. تكفين .. لاتبكين .. ولو تتراجعين عن قرارك .. والله البيت بيتك .. وما انتي رخيصه عندي ..
ابتعدت .. وهي تمسح عيونها .. وابتسمت : اول مره اتخذ هالقرار بكل قناعه ..صدقني مو زعلانه ولاندمانه .. بالعكس اتمنى انك تلقى نفسك صدق .. انت تستاهل كل خير ياسيف ..
.
.
تنهد .. وطفى السياره ونزل ..
دخل البيت وصعد ..ودخل غرفته ..مهره كانت مو في الغرفه ..
طلعت تطمن على سيف النايم بغرفة فارس ..
ابتسم وهو يشوف اكوام من ورق الملاحظات مقطعين .. مو بس مقطعين منتفيين على الطاوله اللي مقابله الاريكة  ..
واقف .. وسمع صوتها داخله من باب الجناح وتتحلطم بعصبيه: يقول رايح يطلق .. النصاب .. الى الان ماجاء..اكيد تدلعت عليه .. وهون .. استغفر الله .. انا ليش جالسه انتظر ..

كان مستمتع وهو يسمعها .. وشكلها قعدت بغرفة الجلوس .. وتكلم نفسها :
كيف صدقتي هالجلف ..يموت بالحريم ..نسونجي .. يبي كذا.. مره هيا ومره نوف .. ومره انتي يكذب عليك ويقولك احبك وانتظرك عمر ..
توسعت عيونه ..ورفع حواجبه ..

مهره افتحت جوالها: عاد قلنا ذوق ومو رانه عليه .. بس خير يعني .. والله لاتصل واخرب عليه كل شي ..
رن جواله ..
مهره انصدمت .. لما الصوت جاء من الغرفه ..
تيبست وتحنطت مكانها ..
وخاصه لما طل سيف من الفتحه .. وبتهكم :
اجل انا اموت في الحريم .. ؟! .. نسونجي  ونصاب .. وجلف بعد ..باقي شي بعد ودك تضيفينه..
رفعت عيونها له وعضت شفتها :
متى جيت ..؟!
سيف بجمود .. عطاها نظره حارقه ..
ورجع الغرفه : مو شغلك ..
توسعت عيونها .. وقامت لحقته .. وقف يشبك جواله بالشاحن ..
مهره بتوتر :والله موقصدي ..
سيف فتح علبة ماء شرب منها : يعني هذا رايك فيني  ..
مهره خلاص بتبكي :لا والله .. انا كذا كنت اتحلطم.. آسفه .. ياليتني نمت ..
جلس سيف على فراشه وتسند .. وببرود : ايه والله ليتك نايمه ولاسمعت منك هالكلام اللي يسم البدن ..شيلي هالقراطيس اللي قطعتيها .. وارميها بزباله .. 

انصدمت .. اول مره سيف يكون جدي معها كذا ..
ناظرت عيونه ودموعها تجتمع .. في كثير اسأله في بالها .. بس مزاجه مايساعد .. وهي طينتها بكلامها ..
تكونت غصه بحلقها ..
وسيف يناظرها بجمود ..
راح يفتح كبكاته .. وتوها مهره بتروح تشيل الاوراق المقطعه ..ناداها:
تعالي خذي  كبكاتي حطيهم بالعلبه لايضيعون ..
توسعت عيونها بدون تلتفت .. بس التزمت الصمت ..
راحت له .. وهو ماد كفه  بالكبكات .. وتوها بتاخذهم قفل يده وبعدها عنها..
عقدت حجاجها..
سيف برفعة حاجب :انا جلف ..؟!
مهره بخفوت: لا ..
سيف : انا نصاب .. ؟!
مهره وفمها يتقوس : لا ..

مد كفه بالكبكات .. وتوها بتاخذهم.. مسك معصمها وسحبها ..
طاحت على صدره .. وصاحت لما أنفها ضرب بصدره  : وجع ..
وتوها بتقوم .. كبل حركتها برجله .. وتمسك فيها :
خليك .. ابيك بسالفة ..
مهره : ابعد عني .. تهاوشني .. كني اصغر عيالك ..
سيف بنص عيون :ليش كنتي تسبيني في حلطمتك ..
مهره منزله عيونها: لانك قهرتني ..
سيف : قهرتك بوش ..؟!
مهره:ولاشي ..
سيف : طيب قولي لأني اغار عليك ..
سكتت مهره ..
بس انفاسها كانت تلهب رقبته ..
والقُرب كذا مزعج..
وسيف جاذبيته لعينه ..
همس : تغارين .. ؟! قوليها .. وخفتي ارجع لهيا..
مهره مستوى عينها رقبته .. ذقنه .. فمه ..
حاولت تبعد .. ومسكها ..
رفعت عيونها : سيف فكني .. تكفى ..
ابتسم وحرك حاجبه:
ماراح اسوي لك شي .. عندي كنترول ..
مهره رجعت سكتت..
سيف نفخ على جبينها : قولي .. واسألي .. لاتحلطمين لحالك ..
عضت شفتها ببتسامه :يعني مازعلت مني ..
هز راسه نفي وباس أنفها : بالعكس .. كنت اضحك على كلامك ..
مهره بدلع عفوي :وليه تسوي فيني هالحركات ..وقعت قلبي..
سيف : متعمد .. لاخفتي تصيرين كنك بزر عامل عمله ..
مهره :  ياشيخ .. !!
وبتبعد .. ومسكها من جديد : اذا عندك اسأله .. سأليها وانتي هنا .. لابعدتي .. ماعندي ايجابات ..
مهره بعصبيه: كيف اسأل ماعرف ... ما اركز .. اصلاً عورتني .. فكني عشان اعرف اسولف ..
سيف بتهكم: تكبير .. !!...الحين كذا عورتك ..
مهره شتت نظرها : طيب قول لي .. وش صار مع هيا ..
سيف : انفصلنا .. باسلوب جداً حضاري ..
مهره : كيف يعني حضاري ..؟!
سيف : يعني سامحنا بعض .. وكل واحد خذ خاطر الثاني ..
مهره : اها كويس ..
عقدت حواجبها وهي تلاحظ الشي على كتفه .. وتغيرت ملامحها .. ١٨٠ درجه ..

سيف بقلق:وراه..
هزت راسها نفي : مافيني شي .. خلاص سيف ابعد ابي استعدل تضايقت ..
فكها .. وراحت جلست .. لاحظ سيف توترها وهي ترتب شعرها .. وتلمس رقبتها ..
سيف وهو يجلس : وش فيك تعكرتي ..
هزت راسها نفي ..
قامت وبدون تلتفت: ارمي ثوبك مع الغسيل لاتلبسه ثاني .. عشان فيه آثار الانفصال الحضاري ..
عقد حجاجه وهو يشيك في ثوبه .. وشاف بقايا الروج والكحل ..
وفي داخله اطلق شتيمة على هذا الأثر ..
مهره صدت وبتمشي .. ناداها: مهره .. وقفي .. مو مثل ماشطح مخك ..
مهره بدون تلتفت : ماشاء الله هذا رايح تطلقها كذا .. لو رايح تصالحها كيف ..
مسك كتوفها: ماتعودت ابرر تصرفاتي .. بس مهره عشانك انتي وعشان شانك عندي .. راح ابرر .. هيا حيل تأثرت وبكت يوم صافحتها قبل تمشي ..ضميتها من باب المواساه ..

ناظرت عيونه .. مايحق لها التبرير .. ولاتستحقه ..
لكن سيف يلتهمني كالاعصار .. ويجذبني الا مركزه فقط ..
يصبح محوري .. مهما كابرت وابتعدت ..*
مشاعرها متضاربه .. خايفه من انانيتها ..خايفه تكون ظالمه ..

بس غصب عنها .. مو بيدها .. ماهي قادره تتحمل فكرة اي انثى معه ..
لاحظ ملامحها وحيرتها .. حط يديه على خدودها وباس جبينها:
من حقك تغارين ..مايزعلني.. دافعي عن حقوقك ياعين جدي..
ابتسمت وامتلت عيونها دموع .. وحركت شفايفها : احبك ..
همس: قوليها بصوت ..
مهره ببحه: أحبك سيف .. احبك وربي ..  
خذها ضمها : يابعد الدنيا ..

.
.
.

بعد شوي .. نزلت مهره  بتسوي وجبه خفيفه لسيف جايع..

'كنت في المطبخ .. هدوء .. وليله بارده من ايام الشتاء الاولى ..
ارتب الصينيه ..  مبتسمه .. وحاسه براحه نفسيه ..
قرب سيف نساني الهم والماضي وكل شي ..
متأكده ان مع الوقت ..
راح يطيح كل حاجز بينا ..
سيف ماراح يخذلني .. ولايتركني .. سيف اليد اللي ماراح تتخلى عني ..

كنت احط اللمسات الأخيرة في الصينيه .. لما حسيت  بصوت حركة في الصالة..
ابتسمت ..
اكيد سيف نزل .. مع اني قلت له بآخذ له الصينية فوق ..
رحت والإنارة خفيفه .. لكن ..!!

هناك كيان واقف ومعطيني ظهره وشكله يناظر شي بالجوال ..
ماكان سيف ..
وجل قلبي من القامه .. والوقفة .. واستعذت من الشيطان في داخلي ..
وببحه : انت مين ..؟!

التفت ببطئ ..
لأشهق كالمصروعة .. اتسعت عيناي .. حتى كادتا تخرج من محجرهما ..
قلبي سيقفز من مكانه ..
رعب .. هلع .. جنون .. لا.. كابوس .. ليس واقع ..!!!!!
ذاك الواقف .. ميت .. والله مات .. كيف عاد ..
هززت رأسي أنفي التصديق ..

وهو امامي عاقد حاجبيه وينظر إلي بذهول وتسائل .. تقدم نحوي وبخفوت :انتي ..؟! '

مهره ابتعدت مثل المجنونه .. وصعدت فوق تركض .. افتحت غرفة سيف .. كان توه طالع من الحمام .. ومبدل ..
مهره اندفعت له وكأن كل اشباح العالم تطاردها .. وبهلع :
مامات .. سيف .. تحت .. شفته ..
عقد حجاجه وهو يمسكها بخوف : مهره اهدي .. من شفتي ..
مهره تأشر مثل الخبله: الا أهو .. والله .. والله شفته .. كان ميت .. هو مات ..

سيف خاف عليها مسك راسها ..ويمسح على شعرها : بسم الله عليك مهره .. تعوذي من الشيطان ..فهميني من مات .. او من مامات ..
مهره مرعوبه وترجف .. قامت تبكي : يمه شي يخووف .. والله يخووف..  انا ماجنيت ..ترى انا صاحيه .. هو اكيد هو ..
سيف مسك وجهها وركز بعيونها وبحده: مهره .. ناظريني .. فهميني .. من شفتي ..

مهره برجفه .. وسبابتها تأشر جهة الباب :
عساف ..عساف تحت .. عساف مامات.. عساف بالصالة ياسيف ..

*****