رواية مبعثر فيك ماللحزن لايشفى الفصل الحادي عشر 11 - بقلم ايمان يوسف🕊️

البارت الحادي عشر

مانبي نفرح عدوٍ ولا نحزن عشير
‏ساترين الجرح ولا الشلا ما من شلا

متسنده ع الباب .. وهو يطق ويتوسلها : تكفين زينه .. اجي يمك ..والله اضمك بس ..
زينه بحده:
فكني واللي يرحم والديك .. انا طالعه من ذمتك يابن الناس.. لاتقعد تنفس على مخي طول اليوم .. وتضربني .. وتجي تلصق فيني اخر الليل ..
عبد الإله يطق الباب بقوه وبحده: ماانتي طالعه من ذمتي .. والله بس لساني يقولها .. احبك زينه .. احبك والله العظيم لاتكسريني ..

زينه:شهالحب .. اللي تفتش في جوالاتي وتشك في حركاتي .. شهالحب اللي مافيه ثقه .. تنزلني المزرعه وتتصل على جديده .. تتأكد ..
عبد الإله: صدقيني كنت مكلمها اسلم عليها ..ليش تفكرين هالتفكير زينه ..
زينه بعصبية :
ايه صدقتك .. اسألك بالله ليش تسوي فيني كذا ... انا مادفع ثمن احساسك في النقص .. ماهو ذنبي والله ماهو ذنبي ..
عبد الإله طق الباب بعنف :
لاتقولين عني ناقص .. فتحي هالباب لاكسره ..
زينه بعصبيه وغضب : اقسم بالله .. وعزة ربي وجلاله لو ظليت تضرب هالباب .. والله افتح النافذه وارمي نفسي مع الدريشه ..

عبد الإله بخوف : لاعاد .. ماتسوينها .. لاتقولين كذا الله يهداك ..
صرخت : والله اطب .. واخلص من هالدنيا .. انا ساكته وصامله ومتحمله غثاك  وجورك .. وانت جالس تصعبها علي .. خلني في حالي .. لابركة في ساعه ارتبطتني فيك ..

عبد الإله .. اسند جبينه بضعف على الباب: لاتقسين علي يازينه .. قدري ظروفي اللي امر فيها ..
زينه بكت : كنت مقدره .. وكنت عادي .. وكنت مابي منك شي الا الحب والاحترام .. بس انت مريض .. تفكرني ماسكه عليك ممسك وبفضحك .. ماهو انا من هالنوع ياعبد الإله .. لو بتخلى عنك تخليت من اول ماعرفت حالتك ..
بضعف :انتِ حلوه وجميله .. وماراح ترضين تكملين معي .. ادري بيجي يوم وتنسحبين .. ولابتخونيني .. وبتعشقين غيري ..
زينه .. حطت كفوفها على الباب وبقسوة :
اي والله اني واجد عليك .. بس ماللبلاوي الا الصبر ..
طق الباب بعنف .. وهو يسبها ويشتمها ..
وزينه ابتعدت عن الباب .. وسدت اذانها .. وهي تمتم: الله يسامحك ياجديده .. الله يسامحك .. على اللي سويتيه فيني وفي مهير .. !!!

*****

سيف عقد حجاجه :
عساف .. حي .. وهنا ..خبله انتي ..
مهره بانهيار : اقسم بالله طلعت من المطبخ وشفته .. عاد انا ماني نايمه واحلم ..والله شفته ..
سيف مسك راسها ..ناظر عيونها .. وبحزم : مهره اهدي .. ركزي معي .. انتي فاهمه الموضوع خطأ .. شكلك شفتي احد يشبهه ..

مهره انصدمت وبانفعال: سيف وش فيك .. اقولك عساف .. مب شبه .. رح شوفه .. والله هو ..
سيف مسك ذرعانها :
اهدي وبشرح لك كل شي ..
مهره بانفعال راحت دفته ..وصاحت : لاتعاملني كني خبله .. انا ماتوهم .. لاتشرح لي شي رح شفه .. لايروح .. ويشككم اني مجنونه .. عاد عساف يقدر يوهم اللي حوله بكل شي يبيه ..

صاح فيها : مهره سمعيني ..
سدت اذانها : مابي اسمع شي .. اول تطلع تشوفه .. بعدين اسمعك .. سيف تكفى ..
سيف يجاريها :
طيب اهدي انا رايح .. اشوف وجايك .. اهدي ولا ماراح اروح ..
مهره تبلع ريقها وتمسك راسها وبرجفه: هديت .. والله هديت .. روح سيف روح ..
طلع سيف واغلق الباب وتنهد  ..راح يمشي في ممر الدور الثاني متوجه لأحد الغرف ..
شارد وتسائل هايل في ذهنه : ايش العلاقة بالضبط .. اللي كانت تجمع عساف بمهره .. امشي صدمتها  بفارس انه ولدي ..
مسك مقبض احد الغرف وافتحه وبداخله : بس كيف ماتدري ان لعساف توم ..!!!!

التفت نواف وكان يشلح جاكيته ويرميه .. ابتسم بشوق :
حي الله العضيد ..
ابتسم سيف .. وهو يدخل الغرفه .. ونواف .. يجي ناحيته ..سيف يعانقه:
هلا يابوي .. هلا بك يابعد راسي ..
نواف .. قبل انفه وجبينه:
مشتاق لك يالغالي .. بشرني عنك ..
سيف ربت على كتفه: يسرك الحال ..
نواف اشر بابهامه لورى:
البنت اللي واجهتني تحت .. ؟!
سيف ابتسم : زوجتي .. والله ماتدري انك نشفت دمها..
ضحك وهو يرمي السكارف .. ويفتح ازرار قميصه : ليه ..؟!
سيف بحيرة: واضح ماتدري ان لعساف توم ..يوم شافتك .. انصدمت .. جاتني زي المجنونه .. وتفكر عساف رجع حي ..
نواف بلامبالاة: المسألة هذي ماكان مرحب فيها عساف بالحيل .. عشان يمشي ويعلم اللي حوله..
سيف تسند على التسريحه: معك لو احد عابر.. بس زوجته .. حول سنتين معه ماتدري عن ذا الشي  ..
نواف بسخرية :
والله عساف يسويها .. اذا انت الى الان مو واصل لسبب من زواجته الغريبه هذي .. ولا كيف وصل للبنت ..لاتستغرب انها ماتدري عن توم له ..
زفر سيف : خليني اروح اشوفها ووضح لها .. الوكاد ان اخوك يجلط حي وميت ..
نواف شتت نظره .. وبخفوت : الله يرحمه ..

توجه سيف للباب ..
وقبل يطلع وقفه نواف .. وبتردد : سيف.. بسألك  سيف الصغير كم عمره بالضبط..
سيف بتفكير: والله مب متأكد يا اخوك .. بس تقريبا ً سنتين وخمس شهور .. سنتين ونص .. توه ماكمل الثلاث يعني .. ليه ..؟!
ابتسم نواف وهز راسه : ولاشي .. لاني اشوف مقاطعه يرسلهم لي فارس .. ولا ادري كم عمره بالضبط ..الورع دخل قلبي ..
سيف : بتشوفه بكره .. وتشبع منه .. ارتاح الحين ونام..
نواف : تصبح على خير ..
سيف : تلاقي خير ..
طلع سيف .. وتغيرت ملامح نواف .. وهو يمسك جبينه .. ويضغط عيونه ..
وصورة مهره وهي واقفه ماتروح عن باله .. عيونها المصدومة والرعب فيها ..
نفض راسه: إيش اللي قاعد يصير ..
راح يحاول مايفكر ..فسخ بلوزته ورماها وراح يطلع له ملابس من الخزانه ..
شرد ووقف ومخه يستعيد اشياء ولمحات ..
نفض راسه : اعوذ بالله من الشيطان .. لا كثير كذا ...!!!

*****

رجع سيف الغرفه لقى مهره واقفه وفاتحه النافذة الكبيرة ..حاطه كفوفها على الحافه .. وتحاول تاخذ في صدرها اكبر كمية ممكنه من الأكسجين ..
التفتت لما سمعت صوته يدخل ..
ناظرته تنتظر نفي .. اكثر من تأكيد .. بهدوء:
تعالي اجلسي .. بوضح لك شغله ..
مهره بعصبيه: سيف تكفى ..
قرب منها وحط كفوفه على خدودها وناظر عيونها:
مهره ذا نواف ..
توسعت عيونها وبرجفة: لذي الدرجة شبه..بالنور الضعيف فكرته هو .. انخلع قلبي ..
سيف هز راسه نفي :
ماهو شبه وبس ..ولا له دخل النور .. نواف توم عساف .. توم مطابقين .. نسخة من بعض واللي مايعرفهم مايفرق بينهم ..
خفق قلبها بقوه حتى كاد يُسمع .. ارتجفت :
كيف ..من جدك أنت ..
سيف هز كتوفه: هذا الواقع .. بس هم مختلفين مره بالأطباع .. يعني لايوترك موضوع الشبه.. نواف مختلف تماماً عن عساف .. لو أدري ان ماعندك خبر .. كان قلت لك من قبل..
هزت راسها بعصبية وتوتر :
ماكنت أدري .. والله ولاجاء ببالي حتى .. يالله كيف كذا ..
سيف .. وعيونها الحايره .. الزايغه تحيره زياده .. والسؤال .. كيف كانت علاقة مهره وعساف بالضبط ..
يستشف بعض الأمور من تصرفاتها ..
لكنها تخمينات بس .. !
ولايبي يسألها .. لأنها ماراح تجاوبه كالعاده.. !

سيف بتنهيده: راح اطلع على البلكونه شوي ..
تركها .. ومهره تهالكت على الأريكه ..
شردت في السجادة..
وعيون نواف ونظرته لها .. انحفرت في مخها ..
'لما شافني ..
كان بعينه صدمه ..
وتسائل ..
النظره .. نظرة شخص شافني من قبل .. '
ارتجفت للفكرة .. تعوذت من الشيطان.. وقلبها يخفق بقوة ..

اما سيف كان شارد وينفخ سحب الدخان ..
مهره القريبه البعيدة ..
كيف خافت ..!
كيف ارتجفت ..
كيف افقدت القدره على تصرفاتها ..

نفخ الدخان .. احيان يحس نفسه مربط .. عن اي تقدم مع مهره .. !
لأنها تخفي الكثير ..

التخمين الأكبر ان عساف كان يغتصبها ويمارس ساديته عليها..
لكن لماذا ومهره زوجته بالاختيار .. لا الاجبار ..

مهره عانت قسوة وعنف وقهر ..هذا واضح في كم الرعب والرجفه ..حين ظنت ان عساف عاد للحياة..
لكن السؤال ..
لماذا..!!
مالأسباب ..!!

تنهد ..ممكن ماكان يضربها ولا يغتصبها وكلها افتراضات..!
الحيره ذبحته ..

تنبه من شروده .. وهي تجي وراه .. وتدخل يديها تحت ذرعانه ..وتضمه .. اسندت خدها على ظهره ..ابتسمت :
بدل مااعشيك .. عكرت جوك ..
سيف بشرود :
خوفك كان غريب ..
مهره بهمس وهي ضامته:طبيعي بجفل لو رجع ميت للحياة .. حتى لو انه ابوي ..
سيف والدخان يطلع من فمه .. شارد في الخارج: كان يضربك ..؟!
مهره بخفوت: لا ..
سيف ضحك بتهكم مرير ..
مهره اندست في ظهره زيادة: صدقني علاقتي بعساف كانت حلوه.. باستثناء بعض شطحاته لاكثر شرب .. صدقني .. سيف ..
سيف : لما فصلتي هذاك اليوم وقت جيت عليك .. ماكان اللي قلتيه نتيجة شطحات بسيطة ولاعادية  ..
ارتبكت وهي تندس اكثر في ظهره وتعتصر خصره:
ليه ماتصدقني ..
تنهد وهو يطفي السيجار .. ويلتفت وياخذها بحضنه:
خايف من المخبى والله ..
همست برجفه وهي ماترفع عيونها له: ماخبي شي ..
سيف وذقنه على راسها .. وفي داخله ..
'لو عساف كانت علاقتك فيه عاديه ..ان كان ماصار بينا هالبُعد ..خوفك مرعب يامهره والله يستر '

*****

(مع الأسف وليد .. لكن هذا يثبت شكوك سيف في راجح .. وجود احد تماثيل الأوشابتي الفرعونية لديه يأكد ذلك ..انت تعلم ان هناك مجموعة كبيرة هربها الفلاحين .. من قطع الأوشابتي.. وتم الإعلان من وزارة الأثار ..لإختفاء هذه المجموعه .. بعد ان اخرجوها حديثاً بالتنقيب ..! )

وليد .. ضغط على راسه بكفوفه: عقلي لايستوعب ..هل نحن مخدوعين براجح كل تلك السنين .. كيف يكون مافيا آثار .. وهو يقدس كل قطعه .. ويحضر كل مزاد ..

ماريا: كما قال سيف .. راجح بهذا الأسلوب .. يجعل على نفسه هاله من هذا الشغف .. وأي قطعه تتواجد لديه ..لاتثير الشك .. بما انه رجل مليونير .. عاشق للأقتناء .. كما انه وجه يرتاد المزادات .. لن يتوارد للأذهان .. ان القطعه في بيته مهربه او مسروقه  ..

وليد : اثبت سيف انه داهية .. وقوعه على مثل هذا الأمر كارثي ..لكن انا لاأريده ان يتعرض لراجح بأي شكل .. ولا ان يخاطر بفضحه ..
ماريا : هل نصمت على هذا الشيء وليد .. الواضح ان راجح لديه ثروات هائله من الأثار .. تماثيل الأوشابتي .. نحن وجدنا احداها مصادفه .. في صالون منزله .. لكن الواقع ان البلاغ عنها .. يقول ان هناك اربعين تمثال مفقود ..
وليد : مسؤوليتنا الإبلاغ .. افهمك .. لكن يجب ان نأمن خطورة هذا كله .. ليس لدينا اي دليل .. ولانعلم ماخلف راجح من عصابات .. ورجال .. لنهدء قليلا ً .. ونحاول التصرف بحكمه..

*****
في صباح بارد .. وصوت الرعد مهيب ..وزخات المطر تقل وتتكاثر..الساعه السادسة .. والشمس شحيحه بنورها .. جمان على طاولة الفطور .. تضبط توست لبيان ..وهي جالسه بمريولها ..
ديم  مشاركتهم .. تجلس ببجامه شتويه ..
بيان بزعل : ماما .. قال بابا بياخذنا للملاهي .. اذا انتي وافقتي .. ليه ماوافقتي ..
جمان ..تحاول تخفي ابتسامتها .. ولمعة عيونها :
صدقيني ماقال لي .. هو كان تعبان ونام ..
ديم عاقده حواجبها : ابي اروح ملاهي .. بابا نام .. وانتي ماما .. بعد تنامين ماتفتحين باب ..
بيان: والله حلمت اني راكبه اللعبة اللي تدور .. وبابا يشتري لنا ايسكريم ..توت ..
جمان مدت التوست لبيان: طيب بابا كان تعبان ونام .. حرام نصحيه عشان الملاهي ..

لم تنتبه لقدومه حتى ضمها من ظهرها .. وهمس في اذنها : اي والله حرام تصحوني عشان ملاهي ..
ابتسمت جمان ..رفعت حاجبها : وش صحى الشياطين .. !
شاهين بملكعه: سمعت صوت الرعد وخفت وانا لحالي ..ماتعودت ع الوحده ..
جمان وهي تبعد :الله أكبر ..
شاهين التفت على بناته .. وهم يناظرونه بزعل .. جلس على الكرسي وقابلهم :
كيكاتي .. مابكم تنظرون اليَّ بهذه الطريقة..
بيان بصد : مانبي نكلمك ..
ديم صدت : مانبي ..
شاهين : افاااا ..
جمان : الشرهه عليك الحين مليون ..
شاهين مروق يبتدي يفطر : الجدران واجده ..
توسعت عيون جمان وضحكت :
ايش هالنسف ..
شاهين : دام معي القمر .. وش لي بالنجوم ..
جمان وهي تاخذ جاكت بيان وتلبسها : راضهم .. لاتروح وهي مادة البوز ..
شاهين وهو يشيل نواة الزيتون من فمه .. ابتسم :من اللي زعلان ..
ديم تأشر على صدرها ..: انا وبيان .. زعلانين ..
ارتفع صوت الرعد قوي ..
ديم بقمطه : وخايفين ..
شاهين بخرفنه : عمري .. تخاف نفس ابوها ..تعالي اخبيك ..
ديم راحت بسرعه وطبت في حضنه .. وهو خباها ويستهبل : بنتي لايشيلها الرعد .. تخبي تخبي ..
ناظر بيان وهي صاده .. : يلا بيان تعالي اخبيك ..
بيان قامت عن الكرسي .. وراحت لامها ولبست الجاكت وبغرور :
من قال اني خايفه ..ماسامحتك بابا عشان اتخبى عندك ..
شاهين نقل نظره بينها وبين جمان .. اللي عطت نظره بابتسامه .. يعني (مالي دخل) ..
شاهين بسخريه:
والله مابه شي مستغرب ..جينات النماسة طاغية..
وضم ديم : انا هذا اللي طالعه علي .. قلبها رقيق ..وطايره بالعجه ..
راحت جمان طلت من النافذه :
والله المطره شدت .. مادري اخلي بيون تروح ولا .. ؟!
شاهين : اذا ماعليها اختبار خليها .. عشان اسوي برنامج .. حق نراضيها ..
جمان : الا في اختبار ..
دق جوال جمان .. راحت بيان شالته .. وبابتسامه: هذا فارس ..!
ردت : الو.. فارس ..
فارس : هلا بينون .. وين امك ..
خذت جمان الجوال : صبح صبح ..
فارس :علقوا الدراسه .. لاتخلين بنتك تروح ..
جمان بحماس : احلف .. !!
فارس : والله توني شايفه بتويتر .. من الفجر وانا احدث .. وعاد علقوها ..
جمان : بشرك الله بالخير ..
فارس : اصلا ً حتى لو ماعلقوها كنت بغيب .. جاء نواف ..
جمان بفرح : وش هالصباح الحلو...
فارس : يلا شيلي قشك وتعالي عندنا .. امي بتسوي خبز دبس .. لايفوتك ..
جمان : بالله..يبي لنا نطب عندكم اجل..
فارس : الهمام الهمام .. واهم شي جيبي لك معك هديه .. ترى انا اللي بشرتك
ضحكت: ماشاء الله .. اخبارك صايره احلى من الدبس.. تستاهل .. وش تبي اجيب لك معي ..
فارس : برسل لك القائمة ع الواتساب .. عشان ماتنسين شي ..
ضحكت : قم انقلع .. عطيتك وجه ..
فارس : خالي شاهين جاء .. ؟!
جمان: ايه موجود ..
فارس : قولي له جاب اللي وصيته عليه .. من مطار سويسرا ..
جمان: وش انت موصيه ..؟!
فارس: ماعليك .. سأليه ..
جمان : شاهين .. جبت لفارس اللي وصاك عليه من المطار ..
شاهين ابتسم : افا عليه ..
جمان : شكله جابه ..
فارس : كفو .. يلا تعالوا لاتتأخرون..
جمان : على خير ..

*****
'في صباح برائحة المطر وصوته ..
وعبق مهره يخترق انفي .. عابث في عقلي .. فتحت عيني وانا اسحبها واضمها اكثر..واخبئ انفي خلف عنقها .. علني احبس رائحتها في روحي .. قبل ان تصحو وتبتعد .. !

توترت اعصابي .. وبيدي مهره ..مثل فاكهة الجنه اللتي حُرمت على آدم ..
وهاهو الشيطان يوسوس لي أن آكلها .. حتى لو كان عقابي الخروج من الجنه ..
قبلت عنقها .. ويداي تأخذانها اكثر ..
مهره الغارقه في نومها .. تأوهت غير مستوعبه ..
وايقضني الرعد القوي من اللحظه ..
كما فتحت مهره عينيها .. وقد روعها الرعد ...
ارخيت كفوفي .. وقطعت قبلتي ..
ومهره بخفوت ناعس :سبحان الذي يسبِّح الرعد بحمده، والملائكة من خيفته..
كان قلبها يخفق تحت كفي ويرتجف ..
وهي تظن اني نائم ..
وضعت كفوفها على يدي .. وضمتها بقوه وكأن قلبها سوف يخرج من مكانه .. '

مهره بخفوت : سيف .. قوم .. شكلها تمطر ..
سيف لارد .. يحاول يسيطر على قلبه واعصابه .. وهي تفك كفوفه .. وتقوم ..
يتأملها وهي تجلس على طرف السرير وتجمع شعرها الطويل .. وتلفه بكعكع مُهمل .. وتوقف وهي تحتضن كنزتها الصوفية ..
وتروح جهة النافذه ..
افتحت الستارة .. والنافذة..
ابتسمت وذرات المطر تبلل وجهها .. وعيونها تنكسر من النور ..
والمطر اثار فيها الحنين لجدتهاوخواتها .. ومزرعتهم .. وصباحاتها الحلوه معهم..
شافت فارس في الحديقة .. بجاكت مطر ورافع القبعه .. على راسه ..
ويصور سناب ..
نادته : فارس .. !
رفع راسه يدور الصوت ..
مهره : هنا فوق ..
ناظرها :صحيتي .. ! .. تعالي مهره لايفوتك الجو ..
مهره : وش فيك ماداومت ..
فارس: علقوها ..
مهره بفهاوه:نعم ..؟!
فارس : اقلك علقوا المدرسة .. لأن الشوارع .. غرقت والمدارس .. تعالي انزلي وصحي ابوي ..
مهره : تمام .. بس ادخل .. مره برد .. لاتمرض ..
فارس : طيب .. بس بصور سنابه .. عشان احط الجو يشبهني ..
ضحكت :
الله يعينك على نفسك ..انتبه لاتزلق ثم تتعلق رجلك بدل المدارس..

قفلت النافذة ..
لقت سيف جالس : وش عندك تلعلعين مع فارس ع الصبح ..
مهره : سوري اذا ازعجنا سموك ..زين صحيت .. الأجواء تجيب العافية..
سيف قام ..وباينه نفسيته مو شي .. شغل الابتوب..
مهره رتبت الفراش .. كانت تطقطق المخده .. لما خذ منشفته .. ومر بيروح الحمام ..
عقدت حواجبها :
سيف فيك شي .. ؟!
تحاشى عيونها ..وهو يمر : لا .. بس مصدع شوي ..
مهره ببراءه: تمام .. بدل وننزل واسوي لنا احلى قهوه تفكك صواميل مخك ..
ارتسمت شبح ابتسامه بوجهه : تمام ..
خذت شال حطته على راسها .. قبل تطلع ناداها : مهره .. انا ماعندي تعقيدات جدتك .. افضل انك تعتبرين نواف اخوك من اول يوم .. يكفي حجاب .. ماله داعي تتغطين ..
مهره ارتبكت : بس ..!
قال : احنا ببيت واحد .. عشان مايصير الوضع صعب عليك وعليه ..عارف نواف راح يتعامل معك نفس اخته .. وانتي كذلك ..
مهره هزت راسها ايجاب بتردد واطلعت ..
وسيف ضغط على جبينه ..
ولايدري اللي سواه صح او خطأ .. لو مهره .. كانت تحب عساف قبل .. وبينهم مشاعر قويه ..
كيف بتكون نظرتها .. وهي تشوف نواف قدامها نسخه طبق الأصل منه ..!

*****

بعد قليل..

'مهره'
نزلت الدرج وانا امسك يد سيف ولدي .. سمعت ضحكاتهم .. وانفعالاتهم.. وقفت وانا اشوف وجه نواف من بعيد ..
ذات الملامح اللي سحرتني ..
وخلتني اوافق الجده .. على انُ الزواج ستر .. وانه ولد ناس .. وبيوديني امريكا ويوريني العالم و.. وو ..
نزلت درجه .. وطرى علي يومي الأول مع عساف في المطار ..

كنت متوترة .. اناظر الساعه كل شوي .. وكنت ماسكه الجوال .. واقرء عن الولاية اللي بنروح لها .. واحدث احوال الطقس فيها ..
محاولة تناسي كيان الشخص الغريب اللي جالس جنبي ..
و راح اروح معه للمجهول ..
عساف كان مايعرف عني شي .. نفسي تماماً.. بس كان لطيف .. ملامحه مريحة للنظر .. نفس نواف الحين ..
سحب الجوال من يدي .. وقال : حالياً هيوستن جوها معتدل .. ولو شتت الدنيا انا ادفيك ..
ارتبكت وخطفت الجوال من يده: مو قصدي كذا .. احب اطلع على المكان اللي بروح فيه .. واخذ فكرة عنه..

رفع حاجب .. وخذني بذراعه .. وهمس: على كلام جدتك .. ماطلعتي من السعوديه الا وانتي صغيرة للأردن .. وبرضو رحتي سوريا .. اتوقع ماكان فيه جوال وقتها ..
عطته نظرة جانبيه :
طيب ابوي كان يعرف كل شي عن هذوك البلدين .. وانا عادي اروح عمياني مع ابوي حتى جهنم ..
ضحك : طيب روحي عمياني معي وباخذك للجنه ..
كانت ضحكته جميله .. نفس نواف .. الجالس يلعب بلستيشن مع فارس .. واثنينهم يصارخون ..
وسيف جالس يتقهوى...ضحك : والله كنت بتجيب القول .. يافارس .. بس ذيبان مايخليك ..
لمحها على الدرج.. وابتسم وشجعها يوم شافها يالله تنزل : هلا بأم سيف .. يالله حيها .. انزلي ابوي ..
نواف مالتفت وعينه على الشاشه .. رفع راسه لما سيف الصغير .. قال بشرهه : وانا أوبه .. قلي حيه ..
سيف بترحاب : وياهلا بسيف يالله حيه ..
توجهت مهره ناحيتهم ..
ونواف وقف اللعب .. وعينه على سيف الصغير وهو يناظره باستغراب ..
مهره خفق قلبها ..
وسيف يطالعه بتحديق .. وتسائل ..
نواف وقف .. ومركز في عيونه..
فجعهم سيف لما قال بانبهار : ماما سوفي بابا .. تقولين راح سما .. بابا جاء ..

(ومهره كانت حريصه .. انها ترسخ صورة عساف في ذهن سيف .. عشان مايكبر وهو يجهله .. ولايحس بيوم انه ماعنده اب ..فكانت دوم توريه صوره وتردد له ان هذا بابا ) ..
مهره بارتباك : لا حبيبي .. هذا عمي هو يشبه بـ..
قبل تكمل نواف .. و ماحد لاحظ عيونه كيف لمعت بدموع ..
جلس على ركبه وفتح ذرعانه : تعال بابا .. تعال ..

مهره لوهله حست بتتشبث بيد سيف .. بس فكتها لما سيف سحبها .. وفضوله يحده يقرب .. لحضن هذا الكيان ..
اللي كان يشوفه بالصور ..
سيف وقف مقابل نواف .. وظل يناظر ملامحه بصمت وبدون تعبير ..
نواف .. خذه بحضنه وضمه .. وهو يشم رقبته بحنين ..
مهره وقف شعر جلدها ..
سيف لاحظ توترها .. بس ظل بعيد يراقبها ..
لاحظها كيف شردت فيهم ..
ونواف يبعد سيف ويبوس جبينه:
كيفك يابطل ..
سيف يغمض ويفتح .. وباسلوب مهره ونبرتها : تمام ..
داعب شعره بحنية : ياجعله دوم التمام ..
وقف .. ومهره على بعد بسيط منه .. مد يده : كيفك مهره .. !
ابتسمت .. واخفت ارتباكها وهي تصافحه .. وحتى اسقاطه للرسميات ومناداته لها بمهره ماهو ام سيف وترها ..
بس قالت بثقه : بخير جعلك بخير ..
سحبت يدها ..
وابتسمت :سبحان الله .. ايش هالشبه ..ماهو لذي الدرجه عاد ..
نواف .. وهو يشيل سيف الصغير ويبتسم : والله يامهره .. احيان هالشبه يوهق ناس ..ومايعرفون هو انا نواف ولاعساف ..
مهره ببشاشه تخفي توترها .. راحت احضنت ذراع سيف :
احس حلو كذا ... ليت معي توم ...
ورفعت راسها لسيف وببتسامة مكشره : تخيل ..؟!

سيف ضغط على انفها : وحده وحده .. مابي لك شبيه .. حلاة الشي ندرته وجوده ..
مهره وتحاول تاخذ الموضوع بمرح وماتركز في نواف .. لأن الوضع مخيف بالنسبه لها ..!
حتى لاتلفت الانتباه ..
ولاتثير التسائلات ..
قالت : ماشاء الله ايش هالروائح اللذيذه ..جبتو لي صباحيات صبحا بالمزرعه..
فارس : امي بمناسبة رجعة نواف والمطر .. راحت تسوي خبز دبس ..
مهره قامت : بروح اساعدها .. ونضبطكم بكرك .. بعد ..
سيف : ع القوة ابوي ..
مهره راحت واخطفت نظره من نواف : يقويك ..
يوم راحت .. فارس قال لابوه :
يبه لاحظت مهره .. ترى ماهي طبيعيه ..واضح مرتبكه ..
سيف شرد في نقطة اللي راحت فيها :
لاحظت يبه..انت ماشفتها البارح كيف انرعبت لما شافت عمك ..
التفت فارس بحده .. على نواف .. اللي جالس يلعب سيف ..وقال: كيف.. ماكانت تدري ان نواف توأم عساف .. من جدكم ..؟!
نواف ببتسامة جانبية :
وش خذت عاد انا من مشابه عساف .. وتجيك جدتك .. تناظر فيني .. تبي تشوفه في عيوني ..
وبحده: ليتهم يتركوني في حالي ..
سيف الصغير رفع عيونه لنواف ويفتح ويغمض .. : افيك ..؟! ..بابا ..
ابتسم سيف : يلا .. خذ ايجابية من الشبه .. صرت بابا وانت ثلاثيني وعازف عن الزواج ..
نواف ناظر عيون سيف الصغير بحنية  :وانت شتبي صاير تشبهنا ..
فارس : اي والله لو طالع على مهره .. ازين له.. !
سيف يشرب القهوه: مهره مابي لها شبيه الا اخوانك ..
نواف : بالله .. يعني فكيت الحصار .. وناوي تخلف على عود المسواك ..
سيف حرك حاجبه : نقول ان شاء الله ..
نواف باستغراب : ها فارس عادي ..
فارس هز كتفه: دام امهم مهره اكيد عادي ..
نواف بتهكم : لا .. مانتوا صاحين لا أنت ولاأبوك ..

*****

وقف المطر بعد الغداء ..كنت اناظر سيف من نافذة الصاله ..
واقف هناك ويشعل نار كبيرة في الحديقة .. معه نواف وشاهين وفارس ..
شردت فيه .. لابس ثوب شتوي .. وحاسر.. لفتاتته .. نظراته .. ابتسامته ..
طوله الشاهق في قلبي ..
ابتسمت .. وانا اقسم داخلي اني لم اواجه في حياتي رجل بوسامة زوجي ..
انتشى داخلي لهذه الحقيقه .. !
سيف زوجي انا ..
يحبني انا ..
ليت لاشيء يعكر صفونا .. وليت لاماضي يعقدني .. ويكبلني ..
ألقيت نظره لنواف ..
بعد بضعة ساعات .. من وجوده معنا .. اقتنعت .. ان هذا شخص آخر ..
كيف هذه النفس الخفيفه .. تشاركت ذات الرحم .. مع عساف ..
كيف تقاسم معه الشبه لهذه الدرجه ..
نواف .. واضح طيب .. حبيب .. العائله تعتمد عليه في كل شيء ..
كيف بنات جمان ..فرحوا فيه .. وكيف يلاعبهم .. ويحملهم ..
ابوي سعود .. فرحته اليوم .. لاتقدر بثمن .. عرفت ان نواف كفته ترجح بين ابناءه جميعهم ..
لكن ظل قلبي ينصهر .. كلما تلاقت عيني بعين نواف ..اكيد لاني ماعتدت مثلهم .. ولاكان عندي خبر ..

جات جمان .. ومدت لها كوب شاي :
عيونك فيها حُب يتكلم يامهره ..
مهره ببتسامه ونظره حلوه تشرب الشاي :
وهل في حب سيف ياجمان قد ألامُ ..
ضحكت جمان :
اوووف ..وضعك مايطمن ..
مهره بنص عيون :
ياخي جنتل .. أمير ..باتشي ..
جمان شهقت : ها مهره ها ..
مهره بشقاوة : قلبي كذا ينبض ينبض وانا اشوفه ..

جمان بخبث .. مدت يدها لشعر مهره .. وابعدته : يعني انا لمحت هالشي .. واثاري اسبابه هالخرفنه..
مهره انخطف لونها .. وهي تحط كفها على رقبتها: وش ..؟!
حركت جمان حاجبها وبخبث اكبر : والله مادري وش .. بس عوافي ..
قالت كذا وراحت ..
ارتجفت كف مهره وهي حاطتها على رقبتها ..
وعينها تحدق بسيف وهو يضحك بره ..
وقلبها يخفق بقوه ..
حطت كاس الشاي .. وراحت دورة المياه .. وقفت قدام المرايا .. وبعدت شعرها ..
توسعت عيونها للأثر الواضح ..وقلبها يتسارع ويخفق بجنون ..!

وإني أراك بعين قلبي جنةٌ
‏يا من بك مرُّ الحياة يطيب

*****

بره الشباب .. يسولفون ..
فارس يرمي حطب في النار .. ويحس بصداع قوي.. صار له كم يوم مع وجود ابوه .. ماعسل .. ومتعود عليها .. صعب يقطعها فجأه .. حاول يتناسى صداعه .. ويركز مع كلام ابوه
سيف :خذتها .. بدون مزاد ..اللوحه عمرها فوق القرن .. غامرت ..سعرها نار .. وكان ممكن مايدفع فيها الا الراغب في امتلاكها فعلا ً..
نواف : ولو مالقيت اللي يبي يمتلكها .. خاصه انه رسام نمساوي مغمور على قولك .. ومو معروف نفس غيره ..

سيف بخبرة : عشان كذا .. رحت عرضتها لمجموعة فاهمين صح .. في الفن .. اللوحه فن تجريدي ونادره .. وجابت لي ارباح عشرين بالمئه من سعرها ..
نواف وهو يفرك كفوفه قدام النار :
ممتاز ..بس الغريب .. ان راجح ..ماشراها .. مايوفر هالاشياء.. وبيدفع اكثر ..
سيف رفع حاجبه : انا ماعرضتها عليه ..
شاهين : غريبه .. !.خابرك الشغلات النادره حيل .. تخليه يطلع عليها .. اول ..
سيف : يعني حاصله امور .. وابي اتأكد منها ..
نواف بحذر: مع راجح ..؟! ..
سيف : والله هذا اللي حاصل ..
رن جوال نواف .. فتحه : هلا هادي .. شسويت..
هادي :التقيت بالمهندس .. جاب التصاميم .. حط التعديلات اللي انت تبيها .. بس العم سعود ما أدري ايش رايه بالتغيرات .. نبي نسلمها للمقاول .. ونبلش ..
نواف : سلمها .. خلاص ..
هادي : لاتوهقنا يانواف..نعرضها للوالد بالأول .. لأن شايف التصاميم قبل التعديلات وكان مقتنع فيها ..
نواف : وانا غيرت فيها ومقتنع .. ماعليك ابوي عندي .. الليله اناقشه ..
هادي : طيب تعال انت .. الحين .. وتفاهم مع مندوب شركة المقاولات.. قبل يمشي ..
نواف : ورب الكعبه .. دايخ .. راسي الى الان مصدع .. ماقدر هادي ..الموضوع عندك .. سلمه اليوم .. معطين كلمة..
هادي : وميزانية البنى .. ؟!
نواف: ماراح نسلمها كامله .. على مراحل ..
هادي : تمام ماشي ..سلام ..
وقفل ..
سيف لاحظ فارس كيف شارد في النار .. ومايشاركهم .. عقد حجاجه : فارس .. وش فيك يبه ..؟!
ابتسم بارتباك : لا ولاشي .. اسمع لكم ..
سيف دقق في عيونه بشك : بالله ..؟!
فارس بارتباك اكثر : اي والله .. حتى نواف كان يكلم هادي ..
سيف باللعانه : وش كان يقول له.. ؟!
فارس فصل وهو ماسك جبينه بتفكير: عن العمل يعني وش يبي يقول ..
نواف : فارس مريض ..؟! .. وراه وجهك اصفر ..
شاهين حط يده على راسه : اخذك المستشفى خالي ..؟!
فارس سحب راسه من تحت كف شاهين: بصعد غرفتي .. يمكن انام شوي ..

سيف راقبه لمن دخل ..
نواف : غريبه .. فارس ينام ..ومعلقين المدارس .. وفوقها مطر وجو .. لو طبيعي قال خلونا نطلع البر ...
سيف يحدق في الباب الداخلي :
فارس له يومين ماطلع .. مضيق عليه انا لأن مسخها مع المعسل .. وماهو عارف يتركه ..
شاهين :
ماهو كذا سيف .. يعني انت تدخن وعارف الوضع .. بالتدريج .. حط نفسك مكانه ..
سيف ضغط عيونه : مايبي يقطعها .. ياخي توه صغير .. تعلق فيها كذا .. وش بيجيب لي بعدين ..
نواف: بالعكس .. اضغط عليه شوي ..جيته بالدمقراطيه مانفع .. تعال باساليب ثانيه ..
شاهين : انا اشهد ان تولوا ولد اختي يهود .. هاتوه وانا اتفاهم معه ..
ضحك نواف: انت واحد فاصخ .. مجانين نسلمك ورعنا ..
سيف شرد شوي .. وقلبه يضيق عشان فارس...

*****

جالسين بالصاله .. لما دخل فارس .. وتوجه للدرج .. موضي : وين فارس امي تعال ..؟!
فارس : بنام شوي.. نعست..
موضي : الله يحفظك ..
صعد بسرعة ..
مهره عقدت حجاجها .. ولاحظت انُ فارس مو مضبوط ..
حاولت تتجاهل ..لكنها بدت تحاتيه.. ظلت شوي ..بعدها اعتذرت منهم ..وصعدت ..
راحت ناحية غرفته .. طرقت الباب بخفوت .. حتى لو كان غفى مايصحى ..
مارد ..
افتحت الباب ببطء .. ودخلت .. عقدت حجاجها .. لما ماشافته ..
لكن توسعت عيونها .. وهي تشوف دخان كثيف  يطلع من فتحة غرفة التبديل ..
فارس .. قاوم بس ماقدر .. عنده فيب ..
جاء يدخن فيها .. ويعوض عن المعسل ..
مهره راحت ناحيته .. ولقته يطلق سحابه هايله .. وعيونه ذابله باسترخاء .. بعصبيه: فارس ..!!
التفت بحده ناحيتها ..
وخبى الفيب وراه .. وبعصبيه: وش تبين .. مهره خير .. وش مدخلك غرفتي من غير ماتدقين الباب ..

مهره بعصبيه : دقيت الباب .. بس انت ماسمعت .. ايش هالاستغفال لابوك .. هو مفكرك مسوي انجاز ..لأنك يومين ماشيشت ..وانت قاعد تدخن البلاء ذا ..
فارس بتوتر وعصبيه:
ماستغفلت احد .. ذا شي خاص فيني ..هو يدخن ماحد منعه ..
مهره مدت كفها:تعوذ من الشيطان يافارس وعطني هالشي اللي عندك ..
فارس بغضب : ماني معطيك اياها ..مهره لاتحشرين نفسك.. والله مابي ازعلك ..
مهره توسعت عيونها : لا زعلني .. لاتخلي بخاطرك .. خطأ فارس خطأ .. ابوك ليش يمنعك اجل .. عشان تخون فيه وتقعد تشيش شغلات ثانيه بغرفتك ..

فارس : ماخونت فيه .. هذي مو نفس الشيشه غير ..خلاص اطلعي بره مهره .. لا احد يحس .. مو ناقص فلسفة على مخي ..
مهره بإصرار : عطني اياها بالأول ..
بعصبيه وحده : مالك شغل ..
حدقت مهره فيه بحده وهو كذلك.. بعدها راحت ناحية الباب .. بزعل..

فارس ظل قابض على السيجار الألكتروني بيد ترجف .. تندم وتوه بيناديها .. الا طلعت ..
سمعها وواضح انها صادفت ابوه بره ..
مهره تغطي عليه : نايم ..داخله احط ملابس سيف ..ولقيته نام.. اكيد تعب من الهجوله بالمطر ..
سيف : بدخل اشوفه .. ماكان مضبوط من شوي ..
مهره منعته وهي توقف قدام الباب:
ياخي لاتصير موذي .. الولد نايم .. من قده معلقينه اليوم ..
سيف : طيب بشوفه ..
مهره تمنعه: تعال مير .. ابي اسألك عن شغله ..
سيف بتسائل : وش ..؟!
مهره ضمت ذراعه: تعال معي هناك واسألك .. كذا بالممر مايصير ..
سيف استغرب تصرفاتها وبدء يشك .. اشر بعينه: اول بشوف فارس ..

فتح الباب ..
لقاه منسدح ومغطي حتى وجهه وباين نايم ..
قرب منه .. وزاح البطانيه عن راسه ..لقاه مغمض ..
حط كفه على جبينه .. وظل يناظر ملامحه..
وبعدها طلع ..
فارس وقلبه ينبض بسرعة .. يعني اوك هو سيف مدلعه ويموت فيه ..
بس لو يفصل عليه .. !!
ينسى حتى ان هو ولده .. حمد ربه وشكر مهره بداخله .. انها صرفت ابوه شوي على مانسدح وتظاهر بالنوم ..!

*****
جمان بعد المغرب .. كانت راجعه بيتها ..
وماغاب عن عينها .. اتصال غاده اللي ألقاه شاهين .. واتصالها الثاني ..
ولاحظته كيف طفى الجوال ..
في قلبها ..
كانت تتمنى ان ذا شي صدق .. وماهو تظاهر ..
بالعاده شاهين .. بعد مايقفل اتصالات غادة .. يحاول يلقى له نفذه ويطلع .. يكلمها او يقابلها ..
بس شاهين .. جلس في الصاله : بيان قومي جيبي كتابك خلينا نشوف مشكلتك مع الضفدع والظبي ..
وطالع جمان ..بشقاوة..
ابتسمت : تمام .. راجع لها .. وخلينا نشوف شطارتك .. يمكن تقدر تسوي اللي انا ماسويته ..
شاهين ببتسامه : بتشوفين .. !

خايفٍ من الوقت ماني خايفٍ منك
ضامنك.. بس الليالي وش يضمّنها.

*****
مهره في الصاله .. جالسه تأكل سيف الصغير .. وتداعبه ..
وتحاول تبعد تفكيرها عن كل المواقف السلبية لليوم .. فارس وحدته في التعامل معها ..

كذبها على سيف ..

نواف وتواجده المُربك .. بعيد عن الشبه الكبير .. في نظرة غريبه في عينه .. وتعامله حذر .. وعنده اسلوب غريب في الكلام لدرجة احيان تحس انه يقصدها..
وسيف عاد ومكالمته بنوف ..
كانت جالسه معه بالغرفه .. لما اتصلت نوف .. وكانت تناقشه بعصبيه .. كيف طلق هيا ..وكيف تخلى عنها بهالسهوله ..
رده ببرود : تعرفيني يانوفه .. ماتعلق با احد .. ومن يدق لي الباب .. يسمع الجواب ..
انسحبت من الغرفه بهدوء .. وماحبت تسمع بقية المكالمة .. نزلت..
راحت مع سيف الصغير تلعب معه.. وتابعت معه شغلات بالايباد ..
حاولت تركز في ولدها بس ..
هي دخلت البيت هذا عشانه ..
والمفروض تظل على هذا الحد .. !
سيف نزل على عجاله وطلع .. وهو يكلم جوال ..
مهره حاولت تجاهل الوضع بشكل تام ..
كملت لعب مع سيف وسوالف مع موضي وبلقيس ..
بس متضايقه من داخل ..ومخنوقة .. !

نزل فارس .. بوقت العشاء .. لابس تبديلة شتويه انيقه .. بجاكت جلد وبوت بني.. وكان وجهه شاحب ومبين عليه الضيق ..انتبهت له مهره ..
بس شتت نظرها عنه .. وانشغلت بسيف ..
فارس تضايق اكثر ..
وحس بغصه .. !
تعود على مهره ومو هاين عليه زعلها..
بلقيس :ماشاء الله .. كاشخ .. وين .؟!
التفتت عليه موضي :
وين امي .. الحين ابوك محرص عليك تظل بالبيت ..
فارس باسلوب عصبي : كلمته ورضا ..
موضي : هو شفيه مانعك كذا وش انت مهبب ..
فارس يخطف نظره لمهره .. اللي ماتلتفت عليه : مافيه شي .. يبيني اذاكر .. بس ..
موضي بشك: وعساك ذاكرت ..
بلقيس : ماظنيت يمه ..مو وجهه ..
فارس بعصبيه : تبون شي .. ؟!
موضي : سلامتك يمه انتبه لنفسك ..
سيف قام من عند مهره ونادى فارس .. وقف ..
سيف مسك سيقانه وناظره :
فالس .. افيك .. (شفيك) ..؟!
انصدم ..شلون هالصغير ..يلاحظ تغيرات مزاجه كذا ..
داعب شعره .. وجثى قدامه : مافيني شي حبيبي .. بطلع شوي واجي ..
ابتسم سيف .. وظل شاق الابتسامه لمن اجبر فارس يبتسم ..
بعدين طلع حلاوة من جيبه: اطيك حلاوة توت ..

خذها فارس وباسه ..
قام .. والقى نظره على مهره .. اللي عينها في جوالها وطلع ..
بلقيس بقلق : يمه شفيه فروس .. احسه مو طبيعي ..
موضي : مادري والله الوكاد متهاوش مع ابوه على موضوع هالطلعات مع ربعه ..

مهره وعينها كانت في الجوال ..
فجأه جاتها رسالة من سيف : مهره قلبي .. ابيك تجهزين لي شنطة صغيره .. مسافر عندي شغل ضروري بدبي ..

توسعت عيونها ..وكتبت: ايش هالسفرة المفاجأه .. انت وينك الحين ..؟!
سيف : انا مع واحد من الربع .. كنت معه بمجلسه .. واتفاجأت بمزاد بيبدء بكره .. في دبي ..في شغله مهمه بالنسبه لي .. لازم احضر ..
مهره بعصبية كتبت : كذا فجأه .. وانا ..؟! وفارس ..؟!.. طيب كان قلت لي .. عشان اروح عند جديده .. وخواتي ..
سيف : مهره ماراح اطول.. ثلاث ايام اربع بالكثير .. ابيك حول فارس .. انتي تدرين عن وضعه مع الشيشه .. بخليه بامانتك ..
مهره بقلق: انا ماقدر اسوي لفارس شي .. لاتعتمد علي .. سيف خلك معه .. لاتروح .. اترك الشغل ذا بعدين ..
سيف كتب ..الشغلات اللي يبيها في الشنطه ..:جهزيها تكفين .. ماعندي وقت .. لاتفوتني الطيارة ..
وطلع من المحادثه ..
مهره تاظر الشاشه بصدمه .. وتفكر ..وفارس .. وهالباب الجديد اللي افتحه بالدخان ..
ليه يهمله سيف كذا .. بعدين يجي يأنبه ويحبسه ..!!!

*****
نواف رجع في الحادي عشر ليلاً .. وقبل يفتح الباب وقف يكلم فارس بعصبية :
اوك فارس .. توسطت وعطيتك السيارة .. بس المفروض راجع قبلي ..
فارس : بكرة الجمعه .. لاتعقدها نواف .. وكمل جميلك ..شدعوى..
نواف وهو يطالع السماء : ياحيوان باين بتمطر .. وانت سواقتك لك عليها .. ارجع قبل اجيك واشيلك مع اذانك ..
فارس بوقاحة : يالليل الزفت .. واللهِ انت وابوي .. ماعندكم الا تنفخون عضلاتكم علي ..عندكم عقد خلوها بعيد عني ..ماراح اجي ذا الحين ..
نواف بغضب ضرب الباب بكفه : ورب الكعبة لو ماجيت ذا الحين ياسفلة .. لاتشوف شيٍ مايسرك ولايسر ابوك .. والله ابكيك دم يا** ..يا*** تستغفلني ..

مهره واقفه في الشرفه الفوقية ..
نبرة الصوت والغضب .. والكلام البذيئ شلها .. وتعوذت من الشيطان ..
نفخت بتوتر .. وهي تدخل الغرفه .. وتسكر زجاج الشرفه ..

سيف سافر .. جاء وهو مستعجل .. خذ اغراضه .. اوصاها على فارس ومشى ..
كيف يوصيني عليه وهذا عمه مو قادر عليه .. واضح ان فارس يتمرد .. و يسوي اللي يبيه .. وواضح يبي يمشي كلامه .. !

بدت تقلق عليه .. حتى لوزعلانه منه ..!
ودها يرجع وتطمن عليه ..
بالفعل ..صارت تحس بأمومه اتجاه فارس .. حتى لو العمر اللي بينهم تسع او عشر سنين ..!
جلست على فراشها : الله يهديك يافارس .. !.وش اللي قاعد تسويه .. !!

*****

بعد شوي
موضي وبلقيس ومهره بالصاله ..الساعه الواحده ..
طلع سعود ونواف .. من المكتب .. وباين كانوا يتناقشون في امور تخص العمل ..
جلس سعود وهو ينادي سيف بمرح :
تعال .. جدي تعال ..
سيف قام وقفز عليه بشقاوه ..
نواف عقد حجاجه : فارس ماجاء الى الان ..
بلقيس وهي تتابع مسلسل .. ومتسطحه على الكنب :
لا ..هو يتأخر شوي بالويكند ..
نواف بغضب : يمه .. اتصلي عليه خليه يحضر .. لا اروح ادفنه عند ربعه ..
موضي : وش فيكم على الورع انت واخوك .. خفوا عليه ..
نواف بعصبيه : بتتصلين عليه .. ولا اروح له ..
مهره عقدت حجاجها:
توها وحده .. الحين يجي ..فارس متعود على ربعه .. صعبة تحرمونه كذا .. شوي شوي عليه ..
نواف بنظره حارقه .. لمهره .. مد كفه :
رجاءً.. رايك ماطلبته ..
انصدمت .. ايش هالنظره .. وايش هالاسلوب .. !!

سعود بتقريع: هوب نواف هوب ..مهره حرمة سيف .. ومقامها .. مقام ام لفارس ..
نواف بعصبية وابتسامة تهكمية : يا ابوي .. لاتطيرون في العجه .. والله كل مفهومياتكم خطأ.. حطيتوا بنت اليومين .. بمكان نجود ..

مهره قلبها قرب يطلع من مكانه .. !
لا مو شبه بس ..
الثواني والدقايق هذي ..
طيحتها في دوامة مخيفه ..
لا العصبية ولا النظره .. ولا النبره .. ولا الإحتقار .. !
موضي بعصبية : نواف .. انتبه لأسلوبك .. لا والله اغضب عليك .. وش فيك .. حشى عساف يتكلم ماهو انت ..
نواف : يا يمه .. سيف كان رافض ..انُ فارس يطلع .. وانا رحت توسطت له .. وفي وجهي .. انه بيطلع ساعتين ويرجع .. وعطيته سيارتي لعلمك .. انا مو ضده .. بس ابوه والله لو درى عن تصرفاته وعناده .. لايمسحه عن وجه الارض ..

موضي بحده : وانت وسيف .. ربيتوا نفسكم وكبرتوها .. جاين الحين .. تعذلون على فارس وتنقدون .. فارس تربيتي .. مسيكين مايطلع الا مستأذن مني .. ويكلمني .. واعرف كل شي يسويه ..
نواف بحده : اجل تدرين انه يماشي .. تيم ولد علي .. الداشر ولد بياع المخدرات .. وتدرين ان الزفت .. يشيش .. وابوه انتبه .. ويوم تكلم معه .. طلع من سنه ونص متعود عليها .. جاء معاه باللين ..والكلام ووعده يبطل .. قام رجع .. ودامه توه ماطلع من البيضه يشيش .. بكره يحشش ويشرب .. ويالله .. تفرعنوا عليه لاصار قد عساف ..
موضي توسعت عيونها .. وبصدمه: منهو اللي يشيش .. ؟!!!
سعود ولايرى فارس الا طفل بإنكار: فارس .. يشيش ..؟! .. خبل انت ..
نواف بعصبية : هذا اللي صار .. اليوم من باب تلطيف الجو .. وارجع له الثقه عطيته السياره .. يروح استراحة الذياب ... واكلمه .. ويعاند يقول بيتأخر ..

انفتح الباب .. ودخل فارس .. التفتوا كلهم عليه .. نواف يأشر بيده : تعال تعال ..
فارس بلامبالاة قرب ..
نواف اسحبه من بلوزته .. وشم فمه .. واتركه ..
فارس بنص عيون : ماشيشت .. وماهو عشانك ولاعشان ابوي .. بمزاجي ماشتهيتها ..
نواف عقد حجاجه :
وليش تأخرت .. ؟!
فارس بتحدي : فالينها مع الشباب .. ورايحين نلعب بولينغ.. اجي من حدعش ليش ..؟!
نواف بسخريه : ويومك مو جاي .. ليش حفيت عشان اتوسط لك عند ابوك ومابقى الا تحب رجولي ..
فارس خذ كف نواف وحط المفتاح :
لاني كنت محتاج اطلع.. خُذ سيارتك ذليتني فيها .. الله لايحوجني الا لوجهه الكريم ..
نواف مسكه.. من بلوزته بغضب.. وموضي قامت مسكت يده : والله ماتضربه .. ولاتمد يدك عليه ..
سعود بهدوء : خلاص نواف ..
نواف يناظر عيون فارس بغضب .. وماتركه ..
وفارس يناظره ببرود ..
سعود : اتركه يانواف .. حصل خير ومايعيدها ..
موضي .. ويدها على يد نواف وبرجاء: خلاص يمه ..ومثل ماقال ابوك .. مايعيدها .. !
نواف .. ترك فارس ..
اللي مشى على ورى .. بعدها صعد بسرعة على الدرج ..!

*****

في هذه الليله ..
نواف في غرفته .. مسك راسه بعصبية .. كيف طلع من طوره كذا.. هذا مو أسلوبه ..!
وجه مهره وعيونها مو راضي يروح عن باله .. الخوف اللي بعيونها .. وعصبيتها ..لما تلمحه..!

ناظر وجهه بالمرايا : ذنوبك تتعلقني حتى لو مت ..
طرى عليه صوتها قبل كم سنه:اوووه صاحي اليوم .. ؟!
غمض عيونه بقوه .. وهو يتخيلها تضحك باهستيريا :ولو بيدي الموت .. كان هديته عليك ..شكلك يهوس وانت تتوجع..
ارتجفت يده وهو يحطها على كتفه .. وصرخته فيها: يا مجنونة ..!!!
ايش سويتي ..

فاق من الذكرى .. لما على صوت الرعد .. وداهمه صداع قوي .. وهو يحاول يلقى تفسير .. !
للي يصير .. !

*****

سيف من مطل الفندق .. يناظر ناطحات سحاب دبي ..
الشغله جات مفاجأه ..
واللي حفزه لها انه يبعد عن مهره .. وحضن مهره .. وعطرها ..!
لأن قرب ينقض الوعد ..
فكل مافيها يُشعله .. ويحرقه ..
*فتلك الأنثى .. بعثتني من جديد .. رجل لايرى سواها ..
ولايثيره الاها*
.

.

.
شاهين وجمان ومشاعرهم تغزل من أمل .. شاهين واثق من عشقه وتمسكه ..
وجمان مُقدمه .. لكن بحذر ..
تأكل الحلوى ..
وكلها خوف من السم بداخلها ..!
بقدر حبها له ..
لاتثق به ..
هل شاهين فعلا ً ينشئ لعلاقتهم صرح جديد ..
ام هل يبني شاهد على القبر ..!
عادوا معاً..
لكن كل ذلك على كف عفريت ..
لاسلام في قلب جمان ..!
.
.
.

موضي بعصبية: الله يهديه نواف.. كذا يتعامل معه .. ياعمري فارس ماتطلع منه العيبه ..
سعود وهو يتسطح: مواريه ياموضي مثل عساف .. بداها بدخان .. وانتهى بيالله المستعان ..
موضي بصدمه: الله أكبر .. ابوه يدخن .. ونواف الناصح يشيش ..الحين هو مايستحي يهاوشه عليها وهو رازها بالخيمه ..
سعود .. ومايخطي نواف في شي : والله نواف رجل وشكبره .. تقارنينه .. بفارس هالبزر .. اعقلي .. واهجدي خلينا نرقد ..
موضي: اصلاً بالله عليك شفته كيف يكلم مرت اخوه .. استخف نواف .. فيه شي .. لاوالله مب صاحي .. خبز يدي ..في شي ضاغطه عشان كذا فقع علينا ..
سعود : عاد ذي معاك حق .. والله اخطا بحكيه مع مهره ..
موضي بتفكير : شفت .. يعني فيه شي .. ؟!
سعود : يامره نواف جاي من سفر .. وانا مثقل عليه الشغل .. اعصابه تعبانه .. ومضغوط .. تعوذي من ابليس ..ولاتسخطين عليه ..
موضي : ماتسخطت .. الله يهديه .. ويهدي النزغه فارس ..
.

.

.
بلقيس ...
في يدها كتاب عتيق لمحمود درويش (في حضرة الغياب) ..
ابتسمت بحنين وهي تتصفح الكتاب .. المحشوه هوامشه .. بخط ازرق جميل ..
توقفت في المنتصف .. عند وردة جافه .. ونوته صفراء: بالسلامة .. الهوامش مكنونات قلبي .. عشقك ذنب .. لكنني اقترفته .. !

قبل سنتين وكانت بتسافر بتاخذ دوره بفرنسا .. صاحب الكتاب عطاها اياه بالمطار..مع الورده ..
كانت بترميه بعصبية وغضب ..
لكن ..
والواقع ..
انها كانت تريد هذا الكتاب .. وتريد صاحبه .. وبقوه ..!
.

.

.

فارس.. ماعرف ينام .. كان رغم كبرياءه .. حاس بالذنب.. الواقع مو بكيفه مارجع بدري .. اليوم راح استراحة ثانية .. تبع ناس يعرفهم تيم ..
وكان الوضع مُربك ودمار ..
الجلسه فيها .. كل شي حرام وممنوع .. من الحشيش والكحول .. وحتى البنات ..
حاس بالذنب ومو عارف ينام ..
البنات كانوا اكبر منه .. بملابس خليعه وماجنه..
تيم وشباب اكبر منهم .. كانوا فالينها معهم .. رقص .. وهز ولمس ..

ضم نفسه تحت البطانية ..
وتأنيب الضمير يبتلعه .. تخيل .. وحده منهم كيف قربت منه وحاولت تبوس خده .. هو بعد ..وباستنكار: خيــــر .. ؟!
ضحكت: ياحليله .. كتكوت .. شكله مابلغ ..

طلع من المكان ..بكل عصبيه وغضب..
يبي يطلع من الاستراحه .. لقى سيارة تيم ..وهيثم .. مقفلين على سيارته .. !
وعاندوا وكانوا سكارى وفاصلين ..
مايبونه يمشي ..
كان بيرجع .. مع ذياب .. بس المُصيبه .. سيارة نواف ..
لو رجع بدونها .. بتصير سالفة ..

طلع تيم : ياخي ماصدقنا تجي .. ياشيخ كبر عقلك واقعد .. بلاش بزاره..
فارس بحده: ورب الكعبه ياتيم لو مابعدت سيارتك .. لاصدمها واعدمها ..
ضحك بمد : تسويها ياولد سيف .. عاد تعدم رنجك بالسوناتا **** حقتي..
فارس بينقض عليه ..بس مسكه ذياب: اعدمها واعدم وجهك المعفن .. تيم بلاش مـ ****.. ابعد سيارتك.. لا ابتلي فيك ..
تيم بانفعال: ياخي اقعد وفلها .. هذا حقي ابيك تنبسط..
فارس بحده :ياحيوان عارف ان الجو الشوارعي ذا ماهو جوي .. تكذب علي .. واجي القى الزبالة ذي كلها ..
ذياب : تيم .. شيل سيارتك .. ياخي الرجال مايبي يظل ..
طلعت وحده من البنات وقربت من فارس و بمياعه : وش فيه المزيون معصب .. كل شي ولا الحلوين عاد ..
وتوها بتحط كفوفها عليه ..
فارس دفها بقوه واصدمت  بتيم .. وبدون سابق انذار سحب سكين حاطها في البوت حقه:
بتبعد سيارتك .. ولاابتلي فيك وقبلك بنت ال *** هذي..
ذياب بعصبية : ابعد السكين فارس .. مو لذي الدرجه ..
تيم عقد حواجبه : قد هالحركه فروس .. ؟!

فارس بغضب : والله اسويها .. وعارف اني مامزح ..
في اثنين من الشباب واقفين قالوا: خلاص تيم .. فكنا ولاتعكر جونا.. ذا ابوه واصل .. يذبحك اليوم وبكره يطلعونه ..ديتك يعطونها ابوك ع الجزمه ..
تيم رمى المفتاح على ذياب :
طلعها .. بس والله ماعديها لك.. انا تهوش لي بسكينه يافارس..والله لاتعض اصابيعك ندامه..

افاق من الموقف .. ويحس معدته توجعه .. وكل ماتخيل البنت وهي تقرب من وجهه وانفاسها تلامس خده .. كبده تقلب .. يشعر بالاشمئزاز .. والقرف ..
زفر وثقل قلبه يتزايد .. محتاج لابوه ..
تقلب .. لو جنبه ابوه اليوم بيحكي له كل شي .. حتى لو هاوشه ..بيعتذر ويطلب منه السماح وبينام في حضنه..
زفر بثقل في قلبه : وينك يبه وينك .. وقت احتاج لك مالقاك ..
التفت على سيف النايم في السرير الثاني ..طرت عليه مهره ..
كيف زعلها .. وهي كيف تسترت عليه .. وسمعها قبل يدخل كيف دافعت عنه قدام نواف .. وكيف رد عليها بجفاف..
حس بثقل قلبه يكبر اكبر ..ويتزايد..
يالله ومهره زعلانه مني ولاتلتفت حتى صوبي ..

وخلال اختناقه في ضميره .. ووحدته ..
حس بباب غرفته يفتح ..  غمض عيونه بسرعه وتظاهر بالنوم ..
اختطف النظر لمهره وهي تروح ناحية سيف .. وتشيله على كتفها .. وهي تسمي عليه ..
راقبها وهي تاخذه لدورة المياه ..
وترجعه تسدحه وتلحفه ..وتعدل قبعته فالجو بارد ..
التفتت جهة فارس .. غمض ..راحت افتحت البطانية الثقيله عند رجوله .. ولحفته ..
قصرت النور واطلعت ..

فارس ..ضميره يجلده اكثر ..
الانسان هو يحكم عليك كيف تشوفه وكيف تعامله ..
مهره .. رغم سنها الصغير .. الا انه يحس بأمومتها ومسؤوليتها اتجاهه ..
يحب براءتها .. واحترامها لنفسها .. واحتشامها ..!
تخيل البنات في الاستراحه ..
اسلوبهم ولبسهم .. تخيل كيف تيم كان يشفشف وحده يمكن اكبر منه بعشر سنوات او اكثر .. يشفشفها ولا هو مستحي منهم ولا خايف من رب العالمين .. !
اكثر شي تعلمه من ابوه .. انك تخاف من الله .. قبل ماتستحي من الناس ..
قاعدة ثابته في مخه ..
مشى عليها ابوه ..
رغم غربته .. ورغم ان الدنيا حوله اشكال والوان ..!

*****

في صباح اليوم التالي ..
سيف فتح عيونه ..على صوت الجوال .. ظل شوي يستوعب المكان ..غرفة الفندق..بدبي..
سحب الجوال ورد بخمول : هلا ابوي .. هلا ..
فارس : صباح الخير ..
سيف: صباح العسل .. كيفك .. ؟!
فارس : الحمدلله زين ..ماشفتك قبل تسافر ..
سيف حاط ذراعه على عيونه:
والله كنت مستعجل وانت كنت طالع ..
فارس بتنهيده: كان انتظرتني .. ولاكلمتني .. يبه كنت ابي اشوفك ..
اعتدل سيف وباستغراب :
وراه .. كنت معك طول الوقت وانت تزن على مخي تبي تطلع .. وش اللي تبيه بالضبط يافارس ..
فارس بضيق : ولاشي .. مابي شي ..
سيف : فارس وش فيك .. قول لي .. اسمعك ..
فارس: خلاص مافيني شي ..
تنهد : ماراح اطول .. ثلاث ايام .. اربعه وجاي ..
فارس: اوك انتظرك يبه ..
سيف: توصي شي
فارس : سلامتك ..
سيف : فمان الله ياعين ابوك ..
قفل ..وقام ..

*****
بعد شوي .. سيف .. يفطر ويكلم جوال :
عشان تعرف .. انا لاقلت شي .. مو اخربط من راسي ..
وليد : طيب ايش الحل برايك .. يعني لاجيت للواقع راجح رجل نعرفه من سنين .. هو وعياله  ..

سيف يشرب قهوه :
والله ياوليد ..انا كإنسان .. باب رزقي الثروات الأثرية .. يوجعن اني اشوف اللعب فيها كذا واسكت .. تهريبها بشكل غير قانوني .. وانو يملكها ناس مالهم حق في امتلاكها .. والله شي ماينسكت عليه ..
وليد : والله فاهمك .. بس احنا ماحطنا الله حكم على عبيده .. بكره تروح ارواحنا بيدين هالمافيات.. وش نستفيد..
ضحك سيف : ماخبرتك خواف ..
وليد : والله من خاف سلم .. باقي في الدنيا اشياء ابي اسويها .. انا من واجبي اتجاه هالآثار .. اهتم بمحيط المتحف اللي اديره وبس ..
سيف : اجل تقول مهرب تماثيل الأوشابتي .. وبهالكمية .. انا اشهد ان راجح خاربها وقاعد على تلها ...

وليد : والله هذا اللي حصل .. احنا شفنا واحد .. هل هذا اللي عنده بس .. او المجموعه معه .. الله اعلم ..

سيف : الرجل لاعب لعب.. اشهد ان راجح قادح..(وضحك)
وليد :سيف اترك الأمور تمشي بتجاهل منا .. اهم شي نكون حذرين ومايمس شغلنا بشي ..
سيف يشعل سيجار :
تمام .. اصلاً انا المشاكل اللي عندي مكفيتني .. دامه بعيد ومامسني .. وش دخلني ان شاء الله يهرب ابو الهول بكبره ..
ضحك وليد : حيوان ..
سيف : وانا صادق .. يبعد عن محلي والورشه .. لايجيس حدودي .. وماعلي منه ..
وليد : اي خلك بعيد ولاتضر نفسك ..
سيف : اوك حبيبي .. ماعليك ..
وقفل ..

ناظر شاشة الجوال .. شوي  وخذته اصابعه .. لتقاسيم من عزف رياض سنباطي ..وشغلها ..
وحط الجوال .. وراح يكمل قهوته ..
(تعودت على الأشياء التي تحبها .. اغاني فيروز ونجاة الصغيره .. عبد الحليم.. وتقاسيم العود التي تعشقها .. علمتني على السنباطي .. وانا لم اكن اعرفه .. لدى مهره حس موسيقي .. يحرك خلاياي كله .. ترفض ان تغني بجانبي .. وتخجل .. لكنها اخبرتني .. انها لو غنت تصمت العصافير لتسمعها .. ضحكت وسخرت لأُثيرها واستفزها.. (عارف انه نشاز بس ترفعين لحالك..)
كانت تبتسم واثقه (خليني على ثقتي .. وخلك على ظنونك .. )
متأكد انها لاتمزح .. صوت مهره في الكلام .. وبحتها التي جننتني ..
كلها دلائل ..
ان مهره لو غنت ..ستسلبني عقلي كله .. استمعت لتنقلات السنباطي بتقاسيمه .. اغمضت عيني ..
وتنهدت روحي الحزينه ..!
حياتي ناقصه ..
مستسلم لحلقة مفرغه .. انتظر حلول عقيمة .. من مهره ..
لا أدري الى متى..
والى أين .. ؟!
سينتهي بنا المطاف .. )

خذ الجوال ودق رقمها .. صباحه مايكتمل الا بها .. لا القهوه .. ولاتقاسيم  تحبها .. عوضته ..
ردت بخمول ونعس: هلا ابويا .. مرحبا الساع ..
ابتسم وبضحكه :
يابعدهم ..
مهره تتثائب: فقدتك ..
سيف بسخريه:واضح ..
مهره  تنقلب وتغمض: من جد ..والله ..
سيف: يابنتي .. ماخليتي لاحد نوم ..
مهره: لاتحسدن .. بكره اتأرق..
ضحك: ياجعله نوم العافيه ..
مهره ببتسامة ونص عيون: يعافيك ..

استمروا يسولفون .. لمن صحصحت مهره ..

معَاك أستطعِم الدنيا ومقبوله معك وتزين
‏ومن قبلك وسيعات الأراضي .. ما تناسبني !

*****
بعد قليل في الصاله .. وموضي تكلم خويتها على التلفون ..
سيف يلعب مع تشيلي .. ومهره حاطتها بحضنها .. وتمشط شعرها ..
كان يقول : دولي دولي (دوري) انا امسطها ..
عطته المشط : شوي شوي عشان ماتتعور ..
دخل فارس ..
واضح انه جاي من البقاله من الشغلات اللي معه .. سلم ..
مهره بدون ترفع راسها .. ردت السلام ..
فارس تحطم ..
سيف راح لفارس : ابي الاوة..
ابتسم :جبت لك كل اللي تبي ..
وراح جلس وجلسه جنبه .. يعطيه شغلات وسيف مبسوط ..
مهره .. تحس لما يسرق فارس النظر لها .. وتدري انه نادم ..
بس مارفعت راسها له ..
حيل ضايقها اسلوبه ...
قفلت موضي :استسمحت من عمك .. ؟!
فارس مارد ..
موضي : فارس احاكيك ..
فارس فتح جواله: ماشفته ..
موضي: هو في غرفته وصاحي .. ورى مامريت عليه..
فارس: خلاص يمه .. انا ونواف ننجاز ..نتهاوش ونرضى .. لاتشيلين هم ..
موضي : عنبوك .. عمك مسافر خذ له كم .. وبس يجي تعصب فيه كذا ..
فارس بضجر وانفعال قام : خلاص يمه خلاص .. ورب الكعبه ضايقتن بي .. لاتزيدينها ...
عقدت مهره حواجبها بدون ترفع راسها .. وتذكرت مكالمتها بسيف : شوفي فارس .. ماهو عاجبني .. متضايق فيه شي وماعلمني.،
توه بيصعد الا نواف نازل .. شماغه على كتفه وعقاله على راسه ..
بنص عيون :
وش فيك تنافخ على جدتك ..
فارس بعصبية :
مانافخت على احد .. وش فيكم انتوا ..خفوا تركيزكم عني ..
نواف قفل الطريق عليه عشان مايرقى وببرود :
تراك خبز يدي ياولد سيف .. وش انت مهبب ..

فارس بانفعال :
ماسويت شي .. نواف لاتمتحني .. واتركني في حالي ..
نواف دفه وبعده عن الدرج : لاتقعد تراهق على مخي ومسوي منفس .. اقعد مثل الناس وتكلم معي .. واذا تبي نطلع نطلع ..
فارس ويختنق اكثر :
نواف فكن واللي يرحم والديك .. ماراهقت ولا اني منفس .. اصلاً انا بروح بيت ابوي فهد .. واقعد هناك افككم من وجهي ..
رفع نواف حواجبه :
جديده ذي ..
موضي بقلق: فارس وش هالحكي .. حشى بالله ما انت صاحي .. وش احنا مسوين فيك ..
فارس ومضغوط ألف باين اخنقته العبرة : ماسويتوا شي يمه .. بس يمكن اروح اغير محل وجدتي اصلاً كله تلح .. تبين اقعد عندها .. عادي يعني..
نواف بانفعال صاح فيه: فارس وراه ..؟!!...قاعد تخبص .. وتلف وتدور .. جدتك اجل .. تكلم وش فيك ..

مهره وغصه هايله تحتل حلقها ..
وكأنها تشوف فارس هي ..
لما تتخبط .. وتضيع .. وتحس بالوحده ..
جلس فارس على الدرج ..
وخبى عيونه بكفوفه .. وهو ينزل راسه .. وبغصه :
ابي امي نواف .. ابيها .. تقدر تجيبها .. !

'وكانت كلمته بحجم الفقد في نبرته .. كفيله ان تزلزل قلوبهم ..
وتحشر في حلوقهم غصه لاترحم ..! '

نواف قرب منه وبحنية: فارس .. عمي .. بعني في السوق .. وش هالطواري ..
موضي وعيونها تمتلي دموع .. جات وقفت قدامه: وانا فارس .. مامليت عينك ..انا امك ياولد روحي انت ..
فارس بآااه :ماقلت كذا يمه .. ماقلت .. افهموني ..
مهره ماحست كيف عيونها تمتلي ودموعها تنزل مع آاااه فارس ..
من مثلها يعرف شعور اليُتم .. اللي يحسه ..
والوحده اللي مايبددها أحد ..
حست قلبها يتضخم ..
وفارس يتركهم ويصعد فوق ..
بتلحقه موضي ..
بس نواف مسكها: خليه يمه ..خلاص لاتقولين له شي ..
موضي : ياربي شفيه هالولد .. وش جاه ..
نواف: خلاص يهدا وانا اشوفه .. لاتضغطين عليه .. انا بروح لابوي ..عندنا شغل تأخرت عليه.. توصين شي ..
موضي : سلامتك يمه ..
حب راسها ..
وتوه بيمشي .. انتبه لسيف الصغير .. جالس على الارض مع القطوه ..
توجه له .. وجلس نص ركبه .. وقال :
ها سيف .. مافيه بوسه لبابا ..؟!
ورفع عينه يحاول يشوف ردة فعل مهره ..

مهره فجأه هوى قلبها ..
ومع نظرته الغريبه ..
وقف شعر جلدها ..
وش قصده هالآدمي ..!
كيف ينظر بنفس نظرة عساف ..
ارتجفت اطرافها ..
وسيف يعانقه ويبوس خده ..
نواف يأشر على صدره : أنا مين ..؟!
سيف بمرح : بابا..

مهره تبي تاخذ سيف وتعجنه .. لايقول له بابا .. عساف مات .. مات .. !
ابوه مات ..
نواف يداعب جبينه بجبين سيف: يابعد عمري يابابا ..

بعدها قام وقف .. وطلع .. وهو يلبس الطاقيه..
مهره بغبن وقهر ووجع .. تلعن هالصبح ..وتلعن نواف اللي طلع لها في الحظ ..
قامت واستأذنت من موضي : عن اذنك امي بصعد .. تخلين سيف جنبك ..
موضي : ماعليه يمه .. خذي راحتك ..

صعدت وقفلت على نفسها الغرفة .. تسندت على الباب ..
ونظرات نواف ..
وكلماته المُبطنه ..
يفتحون لها الف باب من وسواس ..
جلست على الأرض .. ومنظر فارس وهو يبكي ويطري امه مايروح عن بالها..
همست :
سيف وينك .. ماهو وقته الشغل..والله ماهو وقته ... !

*****

شاهين .. في الحديقة..
مشعل نار .. ويشرب شاي .. ويقرء كتاب .. لما جاته رسايل واتس متتابعه ..
فتحها .. كانت من غادة ..

"يومك عارف انك ماتتمسك .. وتعاف .. ليش رجعت لي .. وليش خليتني احبك هالكثر .. ليش خليت دنيتي ماتتلون الا فيك .. غيابك تعبني .. واهلكني .. جمان كانت في يدك .. بس تخليت عنها .. وتمسكت فيني انا .. ذا وش يثبت .. اني انا الاساس وانا الأوله .. قلبك ماينبض الا لي .. جمان .. ام بناتك وبس .. "

حدق في كلامها بغصه.. وثقل في قلبه .. ماعرف وش يكتب .. وش يجاوبها ..
كتبت :
ادري تشوف كلامي وماعندك رد .. انسحابك مُهين لي .. والله كسرت بخاطري ياشاهين .. وانا اللي وقفت الزمن لايدور عشانك ..

*يدري انها ارفضت اثنين بدون اسباب مقنعه عشانه .. بس هو ابد ماغصبها على هالخطوة .. كان يلتزم الصمت .. ينقهر .. بس مايبي يظلمها ..*

كتبت يعلم انها تبكي:
تعودت عليك .. احب صوتك يكون اخر صوت اسمعه قبل انام .. واحب اسمعه لاصحيت .. انت رحت .. وامي وحيدتي الله يعلم بحالها .. خايفه تروح بعد وتخليني ..

عقد حواجبه .. يعلم ان غاده ماعندها الا امها المريضة .. واخوانها اثنينهم بعيد عنهم .. تردد .. يمكن تستدر عطفه بس عشان يرد عليها .. ماهانت عليه .. راح كتب :
وش فيها .. مستجد عليها شي ..؟!!

*****