رواية مبعثر فيك ماللحزن لايشفى الفصل العشرون 20 - بقلم ايمان يوسف🕊️

البارت العشرون

وليد وهو يطلع اوراق وجواز :لم استطع ان اكلمها .. هي تحت الأجهزه منذ يومين.. لا أدري ربما اصابها مكروه بلقيس كلامها غير واضح..
ماريا تحاول تهديه: ستكون بخير..الأخبار السيئة تصل بسرعة.. اهدء وليد..
طلع صورة شخصية بتوتر : اللعنه كيف لم انتبه ان جوازي يحتاج تجديد.. لكنت ذهبت مع سيف والجميع اليوم..
ماريا :لن يأخذ وقت طويل وعدك سلطان في السفارة.. سيقوم بتجديده بسرعة..
وليد متوتر واول مره تشوفه ماريا كذا جلس على طرف السرير: لم ارها منذ اكثر من سنة ماريا.. انها اختي الوحيده وكل ماتبقى لي.. كيف اهملتها هكذا.. لن اسامح نفسي لو حدث لها شيء.
ضمت راسه :
اهدء حبيبي.. لن يحدث شيء.. ستكون بخير..

*****

في صالة الإنتظار.. مهره تتأمل وجوه الثلاثة.. .. كيف تشابهت في الغصه وهالة الدموع التي لاتسقط..
سيف جالس..وسيف الصغير ماسك يده وواقف قدامه.. يضحك وسيف يداعبه..وهو اصلاً مخنوق..
فارس ساكت وكل شوي يمسح رمشه، مهره مسكت كفه وهمست :
فارس امي..ماهنا الا الخير..صل على النبي.
هز راسه بنفي وبخفوت مخنوق:
مافيني افقد امي ثاني.. لو يصير بأمي موضي شي.. والله اموت..
مهره: مافيها الا العافية ان شاء الله.. هي بخير ياعميري وبتشوف..
فارس بنفس الخفوت:لو هي بخير كان كلمتني.. يقولون عليها اجهزة.. والله اعلم يامهره.. مايكون صاير لها شي ومايبون يقولون لنا واحنا بعيد.
ضغطت على يده :
لاتفاول..ادعي لها واحسن الظن بالله..يقول الله عز وجل انا عند ظن عبدي بي. خلك متفائل ان بنوصل وهي بخير.. نسيت يومك افترضت هالفرضيات على ذياب.. وفي الاخير هذا هو بخير..ابليس يصور لنا اشياء ويشطح فينا واحنا ضعوف ياقليبي..
تمسك بيدها ورجع لشروده..
طالعت ساعتها.. وهي تلقي نظره على سيف، يبتسم لسيف وهو في عالم ثاني..من وصل هالخبر وهو في حالة غصة وصمت مهيبه ورهيبه..
صوت نواف وهو يرد على شاهين بعصبية:
بالمطار لسى..
وبعدين يستطرد :احلفك بالله شاهين.. امي على الدنيا ولاصار فيها شي.. قلبي ماكلني ورب الكعبة..
شاهين :نواف تعرفني على بلاطه وماراح الف وادور.. عمتي تعبانه واليوم سو لها قسطرة وانجحت.. في العناية لانها مافاقت الى الان.. على وصولكم ان شاء الله تكون صحت..
نواف بغضب :الحيوانة بلقيس.. لعبت باعصابنا.. الا تبي تشككنا ان امي..
وماكمل الكلمة.. وابوي يقول انها بخير.. ويقول لاتطيع بلقيس لانها شايله عليكم وزعلانه.. ولاعرفت من اصدق.. وهادي نفس كلام ابوي..

شاهين: خذها مني.. عمتي ان شاء الله بخير..هدو وراكم رحلة طويلة.. مايصير تقضونها وسوسة..
نواف :الله يسهلها.. خلكم مع ابوي ياشاهين لاتخلونه..
شاهين: لاتوصي كلنا حوله..انتبهوا لحالكم وتوصلون بالسلامه..

قفل نواف..
رفع سيف عيونه:وش يقول..؟!
نواف:كلام شاهين يطمن.. وحتى سولها قسطره بالقلب.. نجحت الحمدلله.. بس مافاقت الى الان..
مهره:ماعليها شر ان شاء الله.. كثفوا دعاء انتوا مسافرين.. دعائكم مستجاب..
نواف:اللهم ان استودعناك امي.. ياربي خذ من عمري واعطيها..
فارس برجاء:الله يحفظها ومانشوف فيها مكروه..
مهره ابتسمت ومسحت على راسه وربتت على يده بكفها..
وسيف يناظر ساعته ويتنهد بحرارة وصمت..
رغم المتر اللي بينهم.. الا ان مهره حست زفرته حرقت روحها.

يارب أجعل يومها بعد يومي
يارب لا تحرمني منها وأنا حي
امي هي الدنيا وقوة عزومي
من دونها عمري يساوي ولاشي

******

نرجع ليوم تعب موضي ونقلها للمشفى..
لما بلقيس نزلت مع هادي تعبر الممرات وهي تبكي بعد ماخذ المعلومات من الرسبشن..
كان وراها لما همس بحدة : بلقيس.. ركزي.. ماهو يمين.. خلك معي..
التفتت ببكاء وانهيار:ياربي هادي استعميت.. وين.. وين امي.. ابوي ماشوفه..
همس بحنية:بلقيس ابوي اهدي.
واشر نهاية الممر على اليسار : هذا عمي سعود هناك..
رحمها كيف ترجف وتركته وهي تسرع لابوها..
سعود واقف ينتظر..
يعصب راسه بشماغه ومسوي عمامه..
راحت اندفعت لحضنه :
يبه.. شفيها امي.. وش قالوا هي حية.. تتنفس..
ضمها وبمداعبه وغصه:
حيه وبخير.. انا متفق مع امتس ماتموت قبلي.. ماتذوق مويضي الموت الا مقضيه حدادها علي..
انتحبت : بسم الله عليكم يبه.. عساني مابكيكم.. لاتقول كذا.. لاتقهروني فيكم..
ربت عليها وبصمود يحرق صدره:
اهدي يبه.. امك بخير..
هادي :وش صار عمي.. وش قالوا..
جلس وبصوت متلعثم غريب على شخص سعود الشامخ دوم :
يقولون انسداد بالشريان.. هي فاقت.. تكلمت شوي..تبي عياله.. تهاذي بعياله ياهادي..كلم سيف ونواف..لاتخوفهم بالراحة يابوك.. خل يتحركون ويعجلون بجيتهم لامهم..
بلقيس تتمزق على لعثمة ابوها وكيف مخنوق.. بغضب:
وخايف عليهم يبه لايخوفهم.. يلعنهم.. هم اللي جلطوا امي..هم والكلبه جمان..
سعود بخفوت:يايبه كل واحد بشغله.. اعقلي يابلقيس عن اخوانك لاتحملينهم الذنب.. وذا مقدر ومكتوب..يعني هم بيرضيهم اللي امك فيه..
انهارت بلقيس وهي تشوف ابوها يدور مناديل من جيبه.. ويطلع مجموعة.. ويسحب واحد بيدين ترجف.. ويمسح عيونه..
جثت قدامه ومسكت ركبه:يبه لاتكفى..صل على النبي..
هادي قرب وبصوت عبر من خلال بلقيس قبل ابوها:لااله الاالله ياعمي .. لااله الاالله..الخاله ام سيف بخير..انت ماتؤمن بالله..
بتنهيده مهزوزه:ونعم بالله.

*اهتزت اركانه بسقوط موضي.. رفيقة السنين والعمر ..تعلم الحياة معها.. كبروا وعاشوا شقاوة الشباب معاً.. اعتكزوا بعضهم في كل هزة وظرف.. عدوا الشعرات البيض في رأسه عداً حتى خالطت السواد..سخرت منه وهم يخطون عتبات الخمسين( يالشايب) وهو (عيرتني بالشيب وهو وقار.. ليتها عيرتني بما هو عار.. بيغزاك الشيب يامويضي وبحط على راسك ثلاث.. ضحكها.. احنا ماتشيب روسنا وراثه ياسعود.. وعاد في الزين.. لو اصك السبعين بظل شزيني غزال) ..شريطه مع موضي ليس ومضه.. ولالحظات.. مواقف.. بل تاريخ...
"عسى حسك مايطفي ياخلف جداني" *

*****

الوقت الحالي ..
دخل مشاري البيت وشاف سما جالسه وقدامها علبة هدايا كبيرة برسومات طفولية..وترتب فيها مجموعة من الألعاب والألوان ودفاتر تلوين..!.
سألها باستغراب:طلعتي لحالك..؟!
ابتسمت وهي مستمره فيما تفعل:ايه مشاري..بكره بنجتمع في المزرعة.. وباخذها معي لسيف.. اكيد بيحبها.
(طبعاً سما في الايام الفائتة التقت بسيف مراراً.. ومره تعلقت فيه)..
جلس مشاري ع الارض ورفع لعبة..
حاول يكون لطيف ومايصدمها:
سما.. ليتك جايبتهم قبل.. ماودي احبطك.. بس سيف فاملي كلهم مشوا اليوم.. رجعوا السعودية وطبعاً سيف الصغير معهم..

توسعت عيونها وهي تحدق بالالعاب.. وهبط قلبها بنبضه عنيفة ..
بخفوت وعصبية:ليه.. كيف راحوا.. انا تعلقت بسيف.. ماودعته.. طيب ماعطيته الهديه.. عشان ماينساني.. مشاري بينساني..
ابتسم بحنيه على مشاعر اخته الغريبه اتجاه سيف:
ماراح ينساك.. الولد حتى هو تعلق فيك..
بدت تجتمع الدموع في عيونها وهي تشيل الاشياء وتجمعها بالاكياس وهمست برجفه ودمعتها تطيح:متى بشوفه ثاني.. ليش راحوا كذا ..
مشاري :امهم بالمستشفى.. جاتها نوبة قلبية.. اضطروا يروحون قبل يودعون احد.. حتى احنا ماشفناهم.. مادريت الا من ياسمين.. لان سيف بلغ ادارة الورشه والمحل قبل يمشي ..

رحمها كيف شاريه الالعاب وفجأه قال:
سما.. وليد بيروح خلال ايام يمدينا نرسل هديتك لسيف..
رفعت عيونها ومسحت دموعها بسبايتها:
جد..؟!.
ابتسم :ايه جد.. خلصي ترتيبها وانا اخذها لوليد..
راحت ضمته وبحماس :حبيبي مشاري..
وضمته اقوى وبحماس ومشاعر كانت غايبه عن سما مذ زمن :احبگ..
مسح على شعرها:وانا احبك ياعين اخوك..!

******

هادي شارد وحرب داخله .. وده يقول لجمان وترجع عشان امها..
ومتخوف من كلام جمان الاخير.. وان الدكتورة ماطمنتها على الجنين.. وحذرتها من اشياء كثير منها السلالم والسفر الطويل.. وشيل الثقيل وخلافه ..
اليوم الخاله موضي افضل..
لا اجيب العيد في الثانية..

ود اتكلم واطمنهم عليها.. ويطري عليه كفه فوق المصحف.. اللي طلعته جمان قدامه وحلفته عليه يحفظ سرها لمن النهاية.
وخلال زفراته وضيقه ..
رن جواله رد وهو يمشي بممر المستشفى ويداعبها:
هلا يابكاية..
بلقيس: اف ماطحت الا بلسانك عاد..
ضحك:فيه انسان عاقل يبكي يومين متواصله.. ياشيخه اختفت عيونك.. اناظر من النقاب ادور العيون الناعسة.. مابقى منهم شي اختفوا .. بح..
هاوشته:
تمسخر يالمتصحر..يالثلجة.. ياخي انت ماتعرف تواسي ابد..
هادي :ودي وودي لكن كيف تحقيق ودي.. عيا زماني لايجيني على الكيف.. ياشيخه كيف اواسيك وعم سعود فيذا..
بلقيس:وصلتوا عند امي..
قال:ايه امي والبنات عندها.. وانتوا مطولين؟!
بلقيس :قدني تروشت.. ورتبت لي شنطة لاني برافق مع امي.. باقي ارتب اغراض لها ونشيل القهوة ونجي.. خلي البنات وخالتي لايمشون..
هادي :لا خلاص بنرجع.. النور مخليه عيالها وضحى تعبانه ماتقدر تطول..
بلقيس:لاتقول.. حسافة.. خل انفال وخالتي طيب..
هادي :يوم ثاني فديتك.. تعبان وربي مافيني حيل ارجع لهم.
توقفت عند (فديتك) كلماته البسيطة القليلة التي تفلت احيان.. تلامس كل بطينات قلبها..
همست:اخلي السواق يرجعهم..
هادي يمازحها بجدية:
شغل المعزبة مانبيه..
هتفت:والله مو قصدي شي يانفسية..
هادي يجننها وكنه زعل :السواق أجل ..
هتفت:هادي.. والله مو قصدي.. ياخي لاتخليني احسب كل كلمة وتصرف معك..
ضحك:امزح ياعينه.. حتى لو انك معزبتي وعمتي.. احبك يابعد الدنيا..
سكتت مصدومة.. من الكلمة اللي يشح فيها هادي عليها.. ومايقولها ولاينطقها..
سگون.. وانفاسهم التي تطفوا حارقة.. تكاد تلتهم الاثير وتتكثف في آذانهم .

همس لها:في امان الله..
وقفل..
ظلت تناظر الشاشة بصدمة وتأثير الكلمة يسري في عروقها.. محدث تنمل لذيذ في اطرافها..
آاااه منك ياهادي..
ومن كوارثك الجليدية في قلبي..!
ظلت شاردة تحت تأثير الكلمة.. بعدها انتبهت انها بوسط غرفة امها..
وعبايتها على كتوفها.. والمفروض تحط بعض الاشياء بالشنطة..!
راحت ترتب بعض الأدوات الشخصية والملابس.. لان موضي من فاقت وهي متذمرة من لبس المشفى.. واستاءت من ازراره وهي تفتح.. اختارت لها بلقيس بجامة بأزرار امامية وروب قطني.. ابتسمت وهي تقربه من وجهها وتستنشق ريحته..
تحمد الله على افاقة امها وتحسنها..
تدور بعيونها على الخزائن وترتيبها ونظامها.. وريحة العطور الفرنسية الطاغية في ثيابها..
تمتمت بدموع وكنها تمازحهاوهي تاخذ تروبان وإشارب من احد الادراج:
يعني يامُسرفة.. كل هالبراندات والفاشن..كنتي ناويه تروحين وتخلينها..!
حست بغصه.. بين اشياء موضي.. ورجعت لها نوبة البكاء من جديد.. وهي تتخيل وجهها وهي طايحة على سجادة الصلاة..
راحت تمسح عيونها وتقفل الدرج والخزائن السحب.. وتطلع من غرفة التبديل.. وتحطهم بالشنطة وتقفلها.. سحبت مناديل.. نشفت عيونها وانفها وطلعت بسرعة..
وعند الدرج سمعت صوت ابوها واخوانها بالصالة .. (يعني وصلوا) ..!

نزلت وبعكس اعتيادهم على بلقيس.. قالت بسخرية وتهكم :
حيالله اخواني.. الحمدلله على سلامتكم ياعيال موضي..

واضح على وجوههم تعب الطريق.. سيف الصغير بحضن جده..
سعود باللهجة ذات مغزى:سلمي على اخوانك يابلقيس.. وخلونا نمشي لامك..

نواف ناظرها من فوق الفنجال اللي يشربه.. وكانت واقفه ومتكتفه:
اقسم بالله حاشم ابوي.. ولا والله ود ادخل هالفنجال بعينك..
سيف ساكت ومن منطلق حاشم ابوه ماقال لها شي..
لان بلقيس لعبت في حسبتهم خلال اليومين.. ماتطمنهم وتقول لهم كلام يثير شكهم ان امهم توفت ..
بلقيس بسخرية:ليه خفت على امي.. بسم الله على قلبك ياروحها..تبي احرق لك ملح.. ولا اجيب لك منقوع مره..
توسعت عيون فارس من اسلوبها.. ومهره تطالع يد سيف وهو ماسك الفنجال..وزين مايتفتت بيده..
تدري ان بلقيس نقصت عمره وعمرهم بأسلوبها.. وهي تقول تسببتم في امي وذبحتوها.. وبعدين تقول لاعايشة.. وتلتوي معهم عشان توجعهم مثل ماوجعوها في امها..

سمعها وهي تتكلم باسلوبها الساخر المغبون.. وابوه يحاول يقفلها معها..
بس بلقيس ماهي ناوية تسكت..
وقف وبحدة رمى الفنجال عن يمين بلقيس وطشه على الرخام.. وبحده زلزلت المكان :
ابلعيهااااا.....!!!
حست صرخته كفختها على وجهها..
وهي تقفز بأرتياع..
سعود:لاتلومها يبه.. هي موجوعه على امكم..
صاح بانفعال وغضب وهو يلتفت لابوه ويأشر عليها:
وهي امها لحاله.. يايبه لعب فينا ابليس ألوان.. هي تقول حكي ان امي غدت.. وانت تكذبها.. ونقول ابوي يبينا نرجع ومايبي يفجعنا بالغربة.. كل ذا يطلع منك يابلقيس.. والله حتى لو حنا اعدائك.. انتي تعرفين وش الموت.. تعرفين الفقد عشان تلعبين فيه..
صاحت وعيونها تمتلي دموع:اعرفه لما لقيت امي طايحه على سجادتها زي الجثه.. اعرفه لما اشوف ابوي.. يصد ويخفي دموعه.. اعرفه بشحوب امي وهي تهذري وتناديكم..

صاح فيها: ماتعرفينه بلقيس.. ماتعرفينه..خذوا امي الإسعاف وهي حية.. وابوي قالك انها عايشه.. انتي ذبحتيني وانا هناك..(ضرب صدره) :انا اللي اعرف الموت و الفقد.. لما افوق من حادث.. ويقولون نجود ماتت..لما اقول ابي اشوفها ويقولون دفنوها.. اعرفه لما اروح امريكا واستلم جثة عساف..ولما يكون معي بالرحلة وماهو جنبي.. محمل بتابوت.. اعرفه لما تقلبين علي المواجع.. وانا بعيد وبوصل لشخص ميت.. انتي وش اللي بين ضلوعك.. ماعندك احساس..

الجميع سكت بغصة قدام وجع سيف بصوته.. بلقيس بدموع كثيفة ونحيب:
سيف انتوا انانين حتى في تعاملكم مع اوجاعكم.. ماتفكرون بأمي وابوي.. انت يوم فقدت نجود.. هربت..كونت حياة كامله بعيد.. عساف لما تمرد وعارض ابوي.. راح شال نفسه وسافر لمن جمرها ومات بالغربة.. جمان اللي ماتخاف الله..راحت وتركت كل شي وراها.. تروحون متى ماطرا لكم.. شلت نفسك مع زوجتك ورحت.. لاسلام ولاطيب خاطر.. ونواف بعدك..شوي الا شلعت قلبها وخذت فارس وسيف.. وقبلكم عاد.. كبيركم اللي علمكم السحر.. خالي وليد.. ولاكنه عنده اخت..
انتوا ماتدرون.. انتوا تشتت اوجاعكم الغربه.. بس ماتفكرون عن قلب امي الذايب وراكم.. عن لسانها وهو يلهج دعاء واستيداع..
صاحت بغبن ودموع:
ايه.. اعترف اني بغيت اوصل لكم هالوجع والافتراض.. لأنه لو الله ستر هالمره.. بكره بيصير.. لاظليتوا توطون قلب امي وتمشون..

سيف بنظرة حارقه لبلقيس.. اشر بسبابته بتحذير وبخفوت:
ولالك اي مبرر.. ولا سبب فالدنيا يشفع لك تصرفك.. بس والله طحتي من عيني..

قال كذا وتركهم وتوجه للباب :
اللي بيجي معي انا بالسياره..!

*****

فالسيارة مهره ماسكه يده.. وتختلس النظر لملامحه الجامدة وصمته..
همست تداعبه:طيب خلاص فك العقدة..
مارد..بس ضغط على اناملها..
مهره:يعني لاحظت نحشت فارس وسيف.. راحوا بسيارة عمي مع نواف..
سيف بخفوت وهو يدير الدركسون في اللفه :كان رحتي معهم..
مهره:بالله.. الحق علي والله.. اقول مابي اخليك لحالك..وفي النهاية طلعت حاشرة نفسي..وقف بتصل على فارس يوقفون واركب معهم..
ضغط على يدها:ماهو كيفك..
ابتسمت وتداعبه وبالحاح:يعني تبيني معك..حتى وانت معصب وقافل.. قول.. قول..
ارتسمت على وجهه شبح ابتسامه:مهره اهجدي..
داعبت ذقنه بيدها الثانية :
قلب قلبي هالابتسامة.. سيفي.. عمري.. لاتلوم بلقيس.. ولاتشيل بخاطرك منها.. مقهوره على امي موضي..
سحب نفس طويل وتنهد:
قهرتني.. ماهي حركاتها.. بلقيس هادية.. عاقلة..انا بالعادة اتقادح مع جمان.. وتشوفين بلقيس تهجدها وماترضا.. ذا الحين هي النتفه تحط راسها براسي.. لا والله اللي عينا خير.. اي والله واقفه بوجهي وتبي تعلمن الصح من الخطأ..

مهره:خلنا واقعين سيف الانسان طاقة.. وبلقيس تقدر تقول انفجرت.. وهذي ردة فعل انتقامية لما حست ان امي بيصير لها شي بسبب تصرفاتكم وغيابكم..
تنهد :خلاص مهره.. مابي اتكلم فالموضوع.. راسي مصدع..
سكت شوي.. بعدها تمتم بسب وشتم للشوارع المزحومة.. وهو يبي يوصل لامه بسرعة..!

*****
في غرفة المشفى.. اجتمعوا كلهم..
اشرق وجه موضي ببتسامة عصت الشحوب والمرض.. وهي تقول بخفوت:
عسى بس ماروعتوهم ياسعود..
بلقيس واقفه متسنده على الجدار.. عضت شفتها..
وسيف جالس عند رجولها.. ويضغط بتهميزات حانيه على رجولها:
لايمه لاتحاتين..جينا واحنا ندري انك بصحه وعافية..
طالعتهم موضي.. نواف ماسك يدها ويبوس فيها.. وفارس عند راسها وماسك نفسه عن الكلام..
ورجعت تطالع سيف وهو يتحاشى يطالعها ولمساته على رجولها :
والله وجيهكم تقل غير هالكلام..
رفعت عينها لمهره :
وجه مهره مثل الليمون.. كنه وجه وحدتن طارح..
قربت وابتسمت وهي تبوس جبينها وخدها:
تعب السفر يمه.. زينه انتي الحين..
موضي بحنية: والله دامكم حولي.. اكيد زينه يا امي..
قالت كذا وحست بنقطه طاحت على وجهها.. رفعت عينها بهلع لفارس :وووي وووي.. شهاللي امطر علي..عنبوووكم ذا ورعي مغبون..

وجه فارس كله دموع وبعبرة:حرام عليتس يمه.. كذا تسوين فينا..
وقف وصد وخبى وجهه بكفوفه ..
وراح يمسح دموعه.. ولاهو عارف يحضنها من الشغلات على صدرها..
موضي تبي تعتدل.. تمسكت بيد نواف :
عدلني نواف..
بدهشة:وراك يمه.. خلك مكانك..
بحده.. بس الصوت طلع ضعيف :قومني نواف..
بمحاولة لتهدئتها:اصبري ارفع السرير..
مهره وقفت قدام فارس وكانت تهمس له وتبتسم..
وفارس مو عارف يسكت يمسح دموعه وتنزل زيادة..
سعود بمرح:اثاري قلبك رهيف يافيرس..
رفع نواف السرير لموضي.. فتحت ذراعيها: تعال امي تعال.. شفني مافيني شي..
التفت وبوجه كله دموع:ابي ألمك واحشر نفسي بحضنك يمه.. بس اخاف اعورك..
ابتسمت : تعال يابعدهم.. قربك يخليني اطيب مايعورني..
فارس بطفولة..ضم موضي.. ويتحاشى يصيد الأجهزة والاسلاك على صدرها..
سيف بتحذير: انتبه ياورع.. جدتك..
فارس يبوس خدود موضي وراسها :فديتك.. يعني ذمه بدون موضي شيصير فينا..
سيف صغير :وانا ابي ابوس جديدة..
التفتت عليه:يمه يمه قليبي ..
شاله نواف :بس بوسه صغيرة..
باس جبين موضي..
وقد رجع لونها وهم حولها ويحوفونها حوف..

*****
وبعد ما انتهت الزيارة ومشوا..بلقيس ترتب مكانها بصمت وحاسه بالذنب.. ويتردد في اذنها كلام سيف..
وكيف تجاهلت اوجاعه.. وهي اللي تعرف كيف الموت شكل تعرجات وعراقيل بحياتة..
رنت في اذنها كلمته'بس والله طحتي من عيني'..!
انمغصت.. وانوجعت..
موضي وهي تخدر بعد الابره:
بلقيس.. وراتس.. مانتي عاجبتني..
حاولت تبتسم:ولاشي يمه.. معطتك جوك مع عيالك.. قبل انفرد فيك..
ابتسمت والنوم يأخذها فعلاً:الله لايحرمني منكم امي..الله يحفظكم ولا اشوف فيكم مكروه..
غفت وبلقيس تناظرها.. عدلت الشرشف عليها.. وقللت النور..
كانت ترتب الطاولة..وحاسه بغصه..
لما انفتح الباب بخفوت.. رفعت عينها..
لقته سيف..
حاول يتحاشى عيونها وهو يدخل ويحط اكياس على الاريكة فيها تسالي..كيك.. وعصاير..
وبيده الثانية.. شاحن ايفون.. وشاحن متنقل.. حطه على الاريكة.. وبدون يطالعها:استخدميه.. لاتخلين جوالك يشحن عند الممرضات.. وهو في صور لك واشياء تخصك..
'الغصه ترقى وترقى في حلقها.. هي نست شاحنها.. وسيف لاحظها وهي تطلع بجوالها تشحنه عند الممرضات.. تعنى ورجع.. مع انه تعبان حده'..!

التفت بيمشي..
وراحت بسرعه له.. ووقفت قدام الباب في وجهه وبدموع:سيف آسفه.. والله آسفه..
نزل عيونه لها وظل يناظر فيها وهي تتكلم ومو حاطه عينها بعينه:كل شي ولازعلك يابوفارس..
كملت وهي تبكي وتتعبر :انت تقول اني طحت من عينك.. كيف طاوعك قلبك تقوله..
ابتسم وهو يناظرها وهي تتحلطم وتبرر..
اخيراً رفعت عينها له:خلاص عاد سامحني.. قول شي..
ضمها لصدره:وش تبين اقول..تدرين ان ماحد قدر ينشف دمي مثل ماسويتي انتي ..
سكتت ..
سيف:لاني خابر ان حركات الخباثه هذي ماهي لك.. وعارف ان قلبك مايشيل ولاهو اسود.. ويشهد علي الله اني ماوصلت.. وحاط واحد بالمية ان امي عايشة..
بكت وهي تخبي وجهها بصدره: آسفه.. ياربي انا شسويت..والله آسفة.
باس راسها وبحنية :تمونين يالنملة..

*****

بعد ايام..
مقتطفات لابطالنا..

*هادي في الجوال:هي زينه الحين.. وطلعت من المستشفى..
جمان بعصبية وخوف:وليه توك تقول لي..
هادي :لو قلت لك كنتي بتجين..؟!
صاحت:اكيد بجي.. هذي امي وتراها فوق كل شي..
هادي بجمود:عشان كذا ماقلت لك ..وانتي معطتني خبر عن صعوبة حملك.. الحين هي بخير.. وتقدرين على الاقل تتصلين وتسمعينها صوتك.. اخوانك كلهم جاو...
ارتبكت :واذا لزمت ارجع.. مابي اولد عندهم.. مابي اعطي هالفرحه لشاهين..
ضحك هادي بتهكم وقهر:توك تقولين امك فوق كل شي.. وش جاب طاري شاهين..
جمان بتوتر :هادي.. لاتضغط علي..
رد بخفوت:تحبينه.. والى الآن.. وهو محور تفكيرك.. واللي يحب مايضر نفس ماتسوين.. سلمي بمشاعرك وتنازلي ياجمان..
توسعت عيونها بصدمة والتزمت الصمت..
وهادي مانتظر منها رد..
قفل الخط..!

*****

شاهين يتظاهر انه مطنش ومبين مبرد على مشاعره..
واللي يشوفه يقول نسى وسلى..
وحاط هالمثل رد لكل من يطعن في مصداقية شعوره الحالي:(من عافنا عفناه ولو كان غالي)..
بيان وديم منسدحين على الأرض يتصفحون ثلاث البومات قديمة.. حاطتهم سلمى عندهم.. وراحت تخلص الغداء..
نزل وجلس وهو يصب له قهوة :
وش عندكم.. من وين جايبين هالصور..
ديم منسدحه على بطنها وعينها في الالبوم :جدي وجدتي.. عروسه.. سوفها بابا.. تجنن..
وسحبت كم صورة خذتها لشاهين.. ابتسم على جو صور الزواج.. امه صغيره بملامح طفولية.. وشعر اسود مسدول.. وفستان موديل قديم وطرحة وكمية ذهب..يالله.. وابوه.. باين من زقرتية زمان.. ببشت وملامح حاده.. ولا اي ابتسامة.. كل واحد على كنبة.. كأنهم مايخصون بعض.. ولا بينهم اي نظره ولا ابتسامة..
جات امه.. وبيدها ترمس شاي ترج فيه..
ضحك شاهين:
والله من اشوف صور عرسكم اسأل نفسي هالسؤال.. ليش مقندبين يمه كذا.. احد مهاوشكم قبل الزفه..
حطت الترمس وببتسامة مرحه:
والله ياولدي من الفهاوة.. ابوك قالوا له لقينا لك مره قال ياله تم.. وانا ملكوا علي وبلغوني من تالي.. ولاادري وش المصيبة اللي دردمون فيها..عاد مثل ما انت شايف حسينا بالوهقة.. على هالكوشه الغبره.. ويعني مسوين مثل المصرين زفه.. ولا ترى اهلنا مايرضون بالديره.. الرجال لحال والنساء لحال.. يجيها يصفق عيشتها بغرفة النوم..والله ياشاهين عرسٍ مبارك.. ياانا وابوك مانقدر نعيش يوم بدون بعضنا.. اي والله ان قلبي معلق في ابوك وعينه ماتشوف غيري..

ضحك :واحنا شوفة وخطبة وتمعشق.. وزفة وشهر عسل ولا صلحنا..اي والله يمه راحت البركة..لا انا فقلبها.. وانا ماعدت اشوفها شي..
امه و ماتصدق هالكلام.. رفعت حاجب واختبرته:
اجل دام هذا قولك.. خالتك عندها بنتها المَّها.. تذكرها.. طيوبه وبتحن بناتك.. اطلقت وماتوفقت مع رجلها وماعليها عيال.. نخطبها لك.. حنينة ياشاهين 'وبتأكيد مبالغ' حنينة..

تجاهل كلامها.. وناظر مجموعة صور جابتهم بيان: قفلي الموضوع..
سلمى تاخذ صور طلعوهم البنات تدخلهم بالالبوم : بعد عمري موضي.. والله هدتها هالطيحه..
شاهين بخفوت:موجعن قلبي عليها..
رفعت له صورة وهي تضحك:شف الصورة كلنا جميع.. والله احمد ربي ان ابوك كان مفهي.. ولا كان انشلعت عينه على موضي..شف شزينها..

ضحك وهو يشوف الصورة.. هم زواجهم كان بليلة وحده ابوه وعمه سعود.. ومن بياض النية الزفه كلهم سوى مع حريمهم:
هالحين عمتي موضي ورى على موضة الاوربين وانتي يمه مسوينك كنك من الصعيد..
ماظل ذهبه الا ولبستيها..

سلمى تتحسر:ايه مير انت خابر خالتك موضي من الرياض متمدنة..شفها ماغير تاج وعقد الماس.. كانت شايفه عرس ديانا بالتلفزيون وتقلد.. وانا حريم الديره هولو فيني الله يحلهم.. لبسوني ذهب جهازي كله..وامي بعد ذاك الحين شالت منه.. عن الحسد بعد.. مو عشان الاطلالة..
شاهين يتأمل الصورة:بس والله شزينك ..
ضحكت:ايه عليك من الملامح.. لاتركز في التهاويل..
شاهين بمرح:يعني يمه.. الا انه زواج تقليدي.. بس جدتي مزنه عرفت تختار..ماوهقت ابوي وعمي نفس الأولين..
صبت شاي ورفعت البيالة تشوف اذا خدر :
جدتك عارفه عياله.. ذوقهم صعب وتسلاب.. كانوا زقرتية وشايفين حالهم.. مافي شي يرضيهم.. ورايحين ومسافرين وشايفين.. لو ماختارت شي يملي عيونهم..ماستقروا ولاقعدوا..
شاهين:حكيمة..!!
بيان رفعت صورة : بابا هذي ماما صح..

ناظر الصورة وصبع بيان على بنت صغيرة جالسه جنب شاهين.. وبنت صغيرة بعمر السنه بحضنه:لا اللي جنبي عمتك نجود الله يرحمها.. امك اللي بحضني.. هي كانت الصغيرة وقتها..

ناظر الصورة بحزن وحنين وشرود..
بيان :عمتي نجود زي ماما..
سلمى:ايه اول يفكرونهم خوات يتشابهون.. الله يرحم عمتك.. ويرد امك سالمة..
شاهين مازال يدقق في الصورة وملامحهم.. وطفولتهم.. تمتم بغصة:
انا ذبحتهم ثنتينهم.. نجود بالحادث.. وبعدها جمان بسود افعالي..
سلمى عطت بيان الالبوم:روحي امي مع اختك.. الصالة الثانية شوفوا الصور..

راحوا..مسكت ذراعه :
شاهين دورها وانا أمك.. الزمن كفيل يطيب الجروح..
تنهد :ذبحتها بجروح ماتندمل.. وجرحتني بجرح تقيح مايطيب.. يايمه لا انا اللي سويته فيها شوي.. ولا اللي سوته فيني ينغفر.. ماعاد ننفع بعض ولا نتأمل في بعض ..
سلمى:ترى الحب يمه.. فوق كل شي.. ويسوي المعجزات على مايقولون ..
زفر وقام:الا قصتنا العقيمة .. ذي مالها علاج يمه..
وتنهد ببتسامة وحزن:ليتني مثل ابوي وعمي.. يوم شفت الحلا والزين.. نسيت كل ماضي وكل حرمه.. ان كان محد غلب جمان .. بس كنت غبي..لا ملا عيني زين.. ولاشبع قلبي حب ودلال..

وتوجه للباب:بروح المجلس عند ابوي.. لاخلص الغداء..ازهمينا..

خرج..
وقف في الحديقة ورفع صورة فيها عمه وابوه بالعرس.. وموضي وامه..
في هذا اليوم.. وبشقاوة اخوان.. ابوه وعمه تعاهدوا.. ان كل واحد يزوج بنته لولد الثاني.. كانوا في علم الغيب.. مانخلقوا ولاصاروا..
بقدرة الله سيف عشق نجود وتزوجوا قبل حتى يكبرون صح..!
وبنفس القدرة تزوج جمان وقلبه معلق بثانية..
وقدر الله وماتت نجود.. وفقد سيف مشاعره وكل الحب معها..
وانا تعلقت بجمان وباللي قبلها.. سيف بعشقه ووفاءه.. تزوج زوجات عابثه وطلق.. وتزوج مهره وحبها صدق ونسى نجود..
وانا اللي كنت مفكرني ماحب جمان.. عجزت اتزوج غيرها.. ابها وبدونها.. عجزت اسويها وربي..
يعني الحين من گان عاشق صدق.. سيف ونجود.. ولا انا وجمان..!

‏لا هاج موج البحر واحتار مجدافي
من لي عوينٍ على الشدات غير الله

*****

قبل يومين من الان.. وقبل تطلع موضي من المشفى..
سيف ومهره معها..
مهره تعدل ازرارها بعد ماشالوا منها التخطيط.. موضي : الله لايكشف لنا ستر.. كل شوي دالعين جيبي مركبين هالبلاء..
ضحك سيف:
والله لو اني من ابوي ذبحتك.. فوضى يتكشفون على الحلال..
مهره بضحك:انت ماشفت ابوي سعود وهو يطلع ويتحلطم..
موضي:عاد هو يبالغ.. حريم ممرضات..
مهره تداعبها.. وهي تعدل الروب:ولو تستري يامره.. الدكتور اللي سوا العملية رجال.. وشاف هالزين والبياض.. هسه كيف ابوي سعود بيمحي النقطة السوداء ذي من عقله..

موضي تحمر بإحراج:اسكتي لاتذكريني.. لا ودكتور مزيون وصغير قد سيف .. انا فذيك الحالة وسعود يقول مافيه دكتورة..
ضحك سيف:ومبسوطة تقولين مزيون.. والله الطيحة ضربت في مخك ياموضي..!

طرق الباب وتحجبت مهره بسرعة ولبست نقابها..
وموضي لفت شيلتها :اصبري يمكن ابوك..
سيف:تغطي يمه يمكن الدكتور..لو ابوي كان دخل..
حطت طرف الشيله على وجهها..
وسيف:حياك..
فتح الباب وهو يتنحنح.. ليخترق صوت تلك النحنحه فؤاد موضي..
وهي تفك الشيله وبانفعال ودموع سريعة :وليـــد..!!!!!
وليد وهو يتوجه لها:خلف ابوي..
انتهت الكلمتين بحضن انهياري باكي.. من موضي ووليد.. تخلله العتب المحبب والشوق..
وليد يبوس كفها وخدها وراسها :
ماجوره يالغالية..
مهره بدهشة :يالله خالي وليد بالثوب غير..
سيف بسخرية:شوفي ازراره مفتحه وحاسر.. هذا خال مايعرف يرسم..
التفت وليد:ياكلب.. كنت مستعجل.. يادوب تروشت ولبست..
سيف يتبادل معه سلام خشم.. ويشد قماش الثوب من ذراعه:فصل لك ثياب.. ضاق عليك فوق السنه مالبستهم..
وليد يناظر الثوب :لاتقوله.. متنت..
مهره تضحك :يبالغ.. ماعليك منه.. كيفك ياخال..
وليد بصدمة:يابنت ماعرفتك بالنقاب..بتغشين مني فيذا يعني..
مهره فكت نقابها واكتفت بالحجاب: لا..بس فكرناك الدكتور.. ماجات ماريا معك..
وليد يجلس عند موضي:
فكرت اسوي لها اوراق زيارة بس بطول المسئلة.. خليتها وجيت..
وبوله:شلونك ياخيتي.. بشريني عنك... الله لايبين غلاك ياموضي.. اوجعتي قلوبنا..

'لما ننتظر ان تحل مصيبة او كارثة لأحبابنا لنظهر الغلا.. لما لانستطيع ايصاله قبل ذلك'.!!

*****

زينه تكلم سندس :
لازم بنروح نتحمد السلامه لأم سيف.. واصلاً نبي نشوف مهير.. ميته على شوفها..
سندس :اي والله الكلبه عزت مع هالسيف.. انا بشوف اذا قدرت جيتكم هناك.. بس متى بتروحون..
زينه: يمكن بعد بكره ..
سندس:واخبار نفسيتك بعد ماتم الإنفصال.
زينه:اسكتي وربي فرحتي ماتشيلها الأرض.. يمه هم وانزاح.. واهم شي ان خلص الاجراءات.. حاول يتلوى بس ماعطيته فرصه..
زينه:ايه خايف تفضحينه.. انتي بالله عليك كيف كنتي ساكته على هالبلاوي.. وش صبرك..
زينه :خلاص سندس راح بخيره وشره.. ماعاد ابي اسمع طاريه.
سندس:الله يعوضك خير يازوين ويجيك ذاك الأمير المطنوخ.. يكون رجال صدق  ويستاهلك..
زينه:يابنت الحلال مانبي عوض.. نبي راحة البال.. والله يامقابل صبحا وهالنخيل.. ابرك من اشيخ رجال..
ضحكت:عاد لاتتعقدين وانا اختس.. توك صغيرة.. والأطخم المقدر لك.. قاعد يدور عليك الحين..
زينه:والله ياسندس.. اللي تجرب الرجاجيل في عبد الاله.. ماعاد تطري العرس..!

*****
سيف يلعب بالألعاب اللي ارسلتهم سما له ..معاه ديم..
مهره تمشط بيان وترفع شعرها بمطاط لانه طول:تصدق بس قلت له انها من سما عرفها.. ويقول ليش ماجات مع وليد..الكلب قهرني..
سيف وهو يشتغل على الابتوب:طيب وين المشكلة.. من جدك غيرانه من سما.. ترى هي فرضت محبتها عنده.. باسلوبها معه..
مهره تنزل غره لبيان :ماهو غيره سيف..
والتفتت :سيف قم شيل هالالعاب قبل تجي جده مزنه.. وتقول ليه بيتكم وسخ..
سيف ضحك:والله غلا موضي اللي جابها..لها وحشة ام فهد..
مهره :متحمسه اشوفها.. يعني متخيل الى الان علاقتي بجدتك.. مكالمات..
سيف :بتحبينها.. على جوك..
مهره:عاد العجز والجدات لعبتي..
وابتسمت لبيان وهي ترتب فستانها.. وتعطرها:لبسي اساورك وخواتمك..عشان تكمل الكشخة..
بيان باستها:شكراً خاله مهره..
مهره ببتسامة واسعة :بعد عمري عفواً..
وطالعت ديم : ديمي لبستي ذهبك..
رفعت كفها :ايه خالتي.. سوفي خاتم.. سواره..
مهره بانهيار:يمه هاليدين ينوكلون..

سيف اختلس النظر لها..يراقب كمية امومتها وهي بعدها ماصارت ام..
لمحته وهي ترتب مشوط بيان وديم:شهالنظره..؟!
سيف:عارفه الكشخة اللي بتصلح لجدتي مزنه.. فساتين وذهب..
ضحكت :لو كانت النفسية زي صبحا.. بتشوف بيان وديم ترند..وسيفي عاد شفه ثوب وطاقيه..لازم نحترم ذائقة الجدات.. عشان نروقهم ولايتسخطون..
سيف :حستي البزارين بهالملابس..

جاهم صوت الباب يفتح ونواف : ياعيال..
مهره حطت عليها شال.. وسيف :حياكم..
وصلهم صوت حلطمة الجده: ذا عتب..عنبوكم.. بنرقا ونلقى المهراجا.. من عمرك ياسعود هيس.. حاط عشرين عتبة عشان ماجيكم..
فارس:مادرينا جده كان حطينا لك درج متحرك .. ولاممشى كهرب نفس المطارات..
مزنه:تطنز..ياولد التسلب.. عاد دام ابوك سويف ماعليك شرهه..
خطت داخل وهي تتكى على عكاز رباعي..
ضحك سيف وهو يجيها:
حااااقدة على سويف.. مدري بايق حلالتس يامزنه..
وفجع مهره وهو يعانقها وزين ماطاحت.. ضحكت وهي تضرب كتفه :خف علي يالسلوقي لاطيح.. مافيني شدتك..
مهره عيونها تلمع على شوفة سيف بصورة الحفيد.. وهو يضمها بشوق وحماس ويشمها ويداعبها:
يازينك يامزنه.. مشتاق لتس.. يالووه ياريحتس.. ود تسكن بجوفي..

*وضعت كفها المجعدة خلف عنقه.. وانزلت رأسه.. وسيفي ينحني طواعية.. كان صغير.. واذا رأته انحنت وقبلت خده..
سيف الآن يفوقها قامة بمراحل.. وهي تثنيه لتقبله كما كانت تفعل *
سيف يداعبها ويهمس:ترى زوجتي تغار.. ماترضى احد يبوسني غيرها.
همست الجده بخبث:والله دامها.. خلت سنك يبان وتضحك.. نخلي لها الخد وراعيه.
سيف يرجع يبوس خدها : عاد انا مالي غناة عن خدك.. لو تخليتي انتي..
ضحكت وهو يساعدها ويأشر لمهره:
وهذي مهره ياجدة.. تعالي وراتس مفهيه..
مهره وعيونها تلمع :جديده..تهبليييييين.. تهبلين.. كل اسمع صوتك وابي اشوفك.. ويقولون انك حالفة ماتصورين..
الجده :وووي وووي.. وش هالزين..هذا مهره.. هذا بيض الصعوو اللي نسمع فيه ومانشوفه..
مهره تبوس كفها وخدها وراسها : والله الزين منك وفيك يابعد راسي..
مزنه:الله اكبر عليك ياسيف.. كم شهر ماخذها.. ماجبتها اشوفها..
سيف بنص عيون وهو يمشيها لصالة :تعرفيني ماحب الديرة ولا احب اجيها..
مزنه:ايه فالح تطارد في ديار الانجليز..ياقليل الخاتمة..
سيف وهو يساعدها تجلس ويبعد عكازها:
عاد تقارنين ديرة الانجليز.. بديرتكم..

الجده بأسلوب لاذع :يقولون عنز الشعيب.. ماتبي الا التيس الغريب..
مهره قفلت فمها بكفها وكتمت شهقتها..
فارس :اوووه شيت..
نواف انفجر ضحك :والله مايعرف لك الا مزنه.. هي اللي تمسح فيك البلاط رايحه جايه..
سيف :مزنه خفي.. عشان نحافظ على الاحترام بينا..
الجده ولاعليها:اقول قم خل امك تجي.. قلبي عليها ولا الضوو..
سيف :ناديها بتسمعك..هي في الغرفة تحت..

طلعت موضي ومعها سعود.. ماسكها وهي تمشي ومبتسمه:
ارحبي يمه ارحبي.. نور البيت جعلني فداك ..
الجده وبانفعالات غريبة سريعة دموعها نفرت.. وهي تلوح لموضي بكفها.. باسلوب اقشعر له بدن مهره :حيك حيك.. حيك ولا زال فيك.. آيوووه ياموضي عساني ماذووق حرتس.. ياجعل يومي قبل يومتس.. قالوا مويضي طايحه.. وطاحت عزومي..

موضي ولانها ماتقدر تنحني جلست جنبها.. وضمت راسها وباسته:
الله يطول لنا بعمرك يالغالية..ارحبي وارحبي.. يالشيخة..

*تبادلتا حديثاً وترحيباً وغلا.. عجيبة علاقتهم.. اذا قارنتها بعلاقة جدتي صبحا وامي...لكني اراها واقعية.. اذا تذكرت معاملة امي موضي لي*

*****

*نامت ديم في حضني..ثرثرت هذه الصغيرة.. اشعلت في قلبي الوجع..
تركتني امي وانا في عمرها.. ابتعدت وطال بعدها..
اخبرتني ديم عن شوقها.. واحلامها بجمان..كيف يعيد التاريخ نفسه.. لكن بتغيرات طفيفة.. واسباب واهية.. والضحية امثالي انا وديم.. قلبها ينبض بسرعة.. اشعر به كعصفور مبتل يكاد يخرج من مكانه وهي تلتصق بأضلاعي..!

رمشاها الطويلة حزينة وكسيرة.. مهما لعبت في النهار وضحكت..ستنطوي باليل وحيدة يلازمها الفقد في قوقعة .. لايطرقها الا احلام متقطعة ..بعضها حضن يتلاشى.. وقبلة بدون ملامح.. ورائحة حبيسة داخل روحها الصغيرة.
اعرف ان من ضمن تلك الاحلام .. نداءات باسمها.. واوامر اشتاقتها.. ديم نامي.. ديم لاطيحين.. ديم لاتوسخين ثيابك..
احلام ديم شفافة.. تنطبع في عيني.. تتكرر من طفولتي'انا'.. باختلاف الأسماء فقط..
اخفيتها بشالي..
عندما انتقمتي ياجمان من شاهين وحققتي رغبتك في استرداد كبريائك المطعون..
الم تفكري في اشلاء حربك
انهما ليس الا 'بيان وديم'..!
وان طال بعدك.. لن يزد قلوبهم الا نحولاً.. وشخصياتهم انكساراً.. عيون مهزومه.. وضحكات مغزولة من تصنع وكذب*

الجده مزنه بهمس وعتب:الحين يابلقيس.. جمان ورا تاركه بناته.. وطايرتن تلاحق ورى الرسم والخرابيط..
بلقيس فاجئها السؤال.. ارتبكت وابتسمت:
جده تعرفين جمان.. طموحها يعانق الثريا .. تخلص هالدورة وتجي.. وبناته هذا احنا حولهم وخالتي سلمى..
الجده:يايمه العيال ينكسرون بدون امهم.. يوم انها عزمت كان خذتهم معها.. ولاقعدت وقضبت ارضه..
بلقيس :بيان تدرس جده.. ماقدرت تاخذها..خلتهم مع ابوهم وهو راضي..
الجده بتهكم وفراسه:
لاوالله مهب راضي.. هالروحه من ورى خاطروه..
مهره ارتسمت في وجهها شبح ابتسامة وهي مستمره في لمساتها على ديم النايمة على صدرها..
وبلقيس بتبرير:شلون يعني ياجده.. الا تطلعين جمان غلطانة.. وانتي داخله بعقل شاهين وكاشفه الغيب عنه..راضي وراضي وهو اللي موصلها المطار..
الجده :الخلا بس.. اشوف طالت وشمخت ياحبة النقل ترادين..انا اللي اعرفه وليدي.. يوم شفته اليوم مب الاولي.. شاين وناحل.. ياقلبي قلبه.. عاد هو وحيد فهيد .. ان طولت اختك وهملته .. ازوجه شيخة شيختها.. وخلي هالأصباغ تنفعها..

توسعت عيون بلقيس :جده وش ذا التحيز مع الأولاد.. لا والله اللي عينا خير.. دام هذا حكيك..

مهره وبلقيس كانوا جالسين مع الجده في غرفتها بالليل.. والشباب سهرانين بره مع شاهين.. وسعود وموضي نايمين..

بره في جلسة شبابية..
شاهين:وين البنات بمشي..
سيف: وين يارجل اجلس صل الفجر وبعدها تيسر..
شاهين:وقت ثاني بروح يمكن اغفي شوي عندي رحلة الصباح..
سيف وفعلياً متأزم عشانه:تزل ياولد العم.. تزل..
ببتسامة باهته:الله يعين وانا اخوك..كلمهم نواف خل البنات يطلعون..
نواف:خلهم.. مبسوطين فيذا.
شاهين:ماعرف انام الا بهم.. اخلص تأخرت..
فارس :ديم نايمة عند مهره..
قام سيف :خلاص اجيبها.. شغل سيارتك..

دخل ولقى بيان تتابع التلفزيون:قومي خالي البسي حذيانك.. ابوك بيمشي..
قامت:وديمي.. نامت بغرفة جده كبيرة..
ابتسم وهو يجلس نص ركبه ويداعب شعرها: خليها عندنا طيب..
بيان وهي تلبس جزمتها:
بعد ماما مو هنا.. وديم تنام هنا.. وبابا عنده رحلة الصباح.. بيان شتسوي.. تموت..
ضحك وهو يضمها:يابعدهم.. وش خليتي من امك انتي..
همست في اذنه.. وهي تعانقه:خالي.. جب ماما.. واحشتني.. بموت لو ماشوفها..
شعر بهمستها كالأبره.. التي تسللت لقلبه بنعومة وبطئ شديد واحدثت تسريب هائل من الوجع في داخله.!
نحن الكبار على يقين انها بخير..
وبخبرتنا في الحياة نعتاد على البُعد ونتأقلم..
وعلى أمل بعودتها.. لاننا نعلم هي لن تهاجر حتى المشيب..
لكن..!
كيف للصغار استيعاب الحدث وابعاده..
انهم فقط يتبعثرون ويفقدون..يتألمون وتمرض دواخلهم ".
همس :ان شاء الله خالي.. ابشري..

وقف والقى نظره عليها.. بعدها على سيف النايم على الكنبة.. وطرى عليه فارس وقت كان صغير ورجع له بعد فترة.. وشعره مهمل وطويل..
مشى بخطوات متثاقله لغرفة جدته.. والقى نظره على ديم النايمة عند مهره..
احنا ياعيال سعود الأسوء.. في الابوه والأمومة.. الواقع اننا ننجبهم عشقاً ونتركهم يتامى..
مهره عقدت حواجبها وهي تشوفه واقف.. وباين مخه مشتت..
الجده:وش بلاك مضيع .. بسم الله على عقلك..
توجه لمهره:مافيني شي.. هاتي ديم ابوها بيمشي..
مهره: طيب حرام بيضيع نومها.. خلها..
خذها:ابوهم يبيهم.. وقومي اخذي سيف لفراشه نايم بالصالة..
قال وكذا وراح..
بلقيس باستغراب: وش به متعكر..
مهره هزت كتفها: مدري..
الجدة:والله العالم.. ان بحوركم عميقة ياعيال سعود.. كل واحد بقلبه ونه وونين..!
بلقيس: الله يكافينا شر الون والونين ياجده..!.

من يحضن الليل لين أحلامنا تدفى ؟
‏للدرب وحشة مثل ما للسهر عثره..!!

*****
في يوم جديد..
وقف ايوب عند بيت سعود..
وراح ينزل الأشياء من شنطة السيارة.. نزلت زينه وراحت عند نافذة صبحا :وراه ياجدة رقدتي.. انزلي..
صبحا:بروح لبنت عمي جواهر.. ساعة زمن ثم اجي.. لاتدري اني وصلت فيذا ومامريتها..عاد وش ينجيني من نقدها ولسانها..
زينه توسعت عيونها:
وش ينزلني لحالي.. جديده وش فيك تمترين هاشمي الله يهديك.. يكفي ماوصلنا الا المساء..وش يدخلني على العرب لحالي..
صبحا تطل من النافذة: انتبه يا ايوب.. لقراش الليمون لاتنكسر..
والتفتت لزينه:كلمي اختس وتجي تشيل معك.. ماهنا سنع يابنات غازي.. وهقتكم بريال..
زينه بعصبية وخفوت.. وايوب يدخل الاغراض عبر البوابة:
جديده ماتسوينها فيني وتمشين.. ماحلت لك جواهر الا ذا الحين.. خلاص اجي معتس ونرجع سوى..
صبحا:وهالاغراض من نخليها له.. الذبيحة بتخيس.. يكفي الطريز.. لمن وصلنا..دخليها خلهم يحطوها بالفريز..
زينه ضربت نافذة جدتها :وانتي شايفه الناس عليها قاصر جايبه ذبيحة..
صبحا:الواجب واجب...ذي ذبيحة سلامة ام سيف..
ركب ايوب.. وصبحا تقوله: روح بيت ماما جواهر يا ايوب..
زينه بغضب:والله لو ادري بتنكبين عفشي ما خاويتك ياصبوح..
صبحا:عنبوك قاطتس لقطه عند مسجد.. بيت اختك بروح اسوي الواجب وارجع.. دام ايوب معنا.. بيرجع ومب معود لنا الا في خير..
والتفتت :يلا يا ايوب..
وراحوا وخلوها..

دخلت من البوابة الكبيرة وهي تتحلطم.. وتشوف الاغراض اللي حطهم ايوب..شنطتين صغار لها ولصبحا..
كيس كبير فيه ذبيحة.. سلة فيها قهاوي.. سله فيها مرطبنات ليمون مخلل.. كيس كبير فيه صحن ضخم باتشي وباقة ورد..
طبعاً الورد وباتشي.. هدايا زينه.. ولا التهاويل الباقي من صبحا..
توهقت تدق على مهره وذيك ماترد.. تطالع الفيلا قدامها والنوافذ الضخمة.. مافيه احد يمر.. ولا في صوت..
ولاهي عارفه تطق الباب الرئيسي الداخلي.. ولاتدل باب المطبخ الخارجي.. حسبي الله على ابليسك ياجديده.. كانك دخلتيني في العيد من اوسع ابوابه.. ومهره التبن ماترد..

تلفتت مافيه احد بالحديقة.. وفي مجلس خارجي.. وشكل انواره مشغله.. ارتبكت.. لايكون فيه رجال.. واحد يطلع.. دقت دقت على مهره.. وتسب فيها بداخلها..
راحت بتردد اتصلت على سيف.. شوي رد وبترحاب:
مرحبا.. ها.. وصلتوا..؟!
زينه بخفوت :بوفارس.. انا بره ومتوهقه.. جديده نزلتني مع شوية اغراض وراحت تقضي مشوار.. ومهره ماترد.. شوفها لي الله يرضى عليك..
فجأه وهو يتكلم.. طلع من المجلس وقفل الجوال..
توترت وهو يرحب فيها:
حي الله الزينه.. نور البيت ..ارحبي..
نزلت عيونها: البقا يابوفارس.. الحمدلله على سلامة الوالدة وسلامتكم..
سيف ببتسامة:الله يسلمك.. ورى تأخرتوا..
زينه بارتباك لانها اول مره تكلم سيف مباشر:
ايوب راح يغير زيت السيارة وتأخر علينا.. والحين جديده راحت لبنت عمها.. ساعة وتجي.. الله يخليك نبا نشيل هالاغراض للمطبخ..
توسعت عيون سيف :وش ذا.. عزبة.. ليش الكلافة الله يهديكم..
زينه:والله مافيها من حقكم..هذي هدايا سلامة الخالة موضي..
طلع نواف في ذيك اللحظة وباين كان يضحك ويمسخر فارس..
لما سكت وهو يشوف الموقف..
ومو فاهم شسالفة.. بس لوهله فكرها مهره.. بالعباية والنقاب نفس الهيئة..
ضحك:وش عندها مهره بتهج.. ولابتكشت على هالعفش..
زينه تمنت الارض تنفلق وتسحبها بوسطها.. ثم ترجع تتقفل من جديد..
وسيف يقول بمرح :هذي ماهي مهره اختها.. تعال ياكحيلان شل العفش دخله داخل..

تقدم نواف.. ورايح عن باله ان البنت هي زينه.. اللي ثبتت بمخه ايام وليالي: ذبيحة..؟! كلم العاملات يشيلونها.. ثوبي ابيض لايدمر ..
سيف كذلك:وانا يعني لابس كُحلي.. شيله نواف..عيب عليك انا اخوك الكبير..
نواف :انا بشيل كل شي الا هالشي.. خاف الله سيف توني سابح..
زينه ماكان ناقصها الا هالحوار.. هي معصبه من جدتها ومن مهره ومن الطريق والوهقة..
وهم عاد دمهم حار طالعين على جدتهم ..
رفعت عبايتها شوي من تحت وربطتها.. عند رجولها.. ورفعت اكمام العباية.. وبشيمه وحده.. رفعت كيس الذبيحة:
علمون وين باب مطبخكم انا اخذها لاتلطخ ثيابكم .. بس ياليتك يابوفارس تشيل صحن الحلى.. واخوك يشيل الورد.. والباقي خلوه ارجع اشيله..
سيف ونواف.. حسوا بجبل طاح عليهم وفلقهم نصين من الفشيله والاحراج..
سيف بسرعة راح لها:نزليها يالزينه.. مزوح.. وش فيك الله يهديك.. شينتي النفس علينا..
نواف من سمع اسمها..
حدق ودقق في كفها وهي تنزل الكيس.. حدق في عيونها.الواضحه من النقاب.. قامتها وطولها.. رزتها وصوتها..
اذاً هذي زينه..!
زينه بتنهيدة:ماهو قصدي يابوفارس.. بس واصله من طريق.. وجديده رافعه ضغطي.. ابي بس درب وادخل الاغراض.. مب عدلة ادرعم في البيت..
شال سيف الكيس.. وشال القهاوي باليد الثانية: البيت بيتك.. ارفسي الباب وادخلي.. روحي وحنا بنجيب الاغراض..
قال كذا وتوجه للباب الخلفي تبع المطبخ.. نواف بصمت وربكه يشيل باقي الاغراض.. وجاته صرخة سيف وهو طالع من المجالس :ديوووون..
وجاها يركض وعليه ثوب ابيض..
زينه بوله وشوق تلقفته:ياقلب زيون وعينها..
ناظرت وجهه وبشوق بالغ:
قلبي صار رجال..صاروا يروحون لندن ويسافرون ونجي نتحمد لهم السلامة..
سيف يعانقها بقوه..
ونواف يشيل الشغلات ويروح وهو يسمع كلامها وشوقها لسيف الصغير:محلاك بالثوب.. انطعن.. جعلني قبلك.. شهالملح ياروح زوين..!

*****

بعد شوي دخل سيف الغرفة..
كل الأنوار مشعله.. ومبخرة العود على التسريحة.. نادى:
مهره..!!
ردت من غرفة التبديل: عينها..
ابتسم وهو يروح لها:وش عندك مانزلتي.. وصلوا جماعتك..
دخل عليها وهي متوهقة بسحابها:سيف تكفى قفله لي.. عقدني..
ابتسم وهو يقرب منها..
*اقترب وامامي ظهر مهره.. واشياء كانت تخفيها "اعتدتها وقبلتها" حتى انسيتها وجعها منها في يوم مضى..
امسك قفل السحاب.. واعيد في ذهني يوم زواجنا وعصبيتها وانفعالها..
كيف كانت مرعوبة من فكرة ان تستدير واغلق ثوبها..
اغلقه الان وعيني لاتفارق لونها الذي اعشق..اصعد بعيني لعنقها.. وشعرها الذي ترفعه بكفها.. لتمكن اصابعي من العبور.. اقفلته ببطئ..كم من الاميال قطعناها في علاقتنا.. كم اقتربنا يامهره ونقترب اكثر.. *
باس خلف عنقها.. وتركت شعرها على ظهرها :وش عندك صعدت..
سيف:ابد.. شلت ذبيحة جايبتها جدتك ونقطت على ثوبي ..جيت ابدل..
مهره باللهفة :وصلوا..
سيف وهو يفتح الخزانة:ايه بس جدتك تركت زينه ومدري وين راحت وبترجع..
فسخ ثوبه.. ومهره تشوف نقاط الدم على الثوب ضحكت:
غريبه عليك صراحه..
هو:وش الغريب..؟!
مهره تاخذ حلق من الخزنه المفتوحة :انت لالبست وسكبت.. ياويل احد يصيدك ولايوسخك.. يعني ما انسى سيف يوم مسح الشوكلت ببدلتك بلندن..
سيف يطلع ثوب ويلبسه: لاتذكريني..والله لو انه مو سميي كان كل كف فر وجهه..
مهره تمازحه:وعساك حشمت اهلي وماقلت لهم شي..
سيف يطلع معها من غرفة التبديل:وانا اقدر اقول شي.. زينه فشلتني انا ونواف.. فصلت وبغت تشيلها هي..
ضحكت:زيون عاد مسالمة.. بس اكيد ضغطتوها..

قالت كذا وهي تشيل كبكاته وتجي تركبهم له..
سيف:المهم نزلي عندها.. عصبت لانها اتصلت عليك وماتردين..
مهره :جوالي نسيته بالصالة..
سيف منزل عيونه عليها.. كيف تهتم بتفاصيله.. تقفل الكبك.. وازرار ثوبه.. تبخ عطر من اختيارها..
منسجمه وهي تحط العود بمعصمها وتروح تاخذ منه بظهر سبابتها.. وتحط منه تحت اذنه..
وعلى دقنه وترجع تاخذ وتحطه على شنبه وهي مبتسمه ومتحاشيه عيونه.. لما حست بنظرته الذايبه لها :لاتناظرني كذا .. تربكني ..
رفع حاجب:بالله..
مهره تداعبه :يعني اشوي..
وتوها بتعطر نفسها بالعود..
مسك ذقنها وفاجئها وهو يمسح خده برقبتها..
وهمس:كذا احسن..
*ويعرف كيف يعشقني باحترافية.. فأذوب فيه حتى النخاع.. ياربي سيف ولاتحرمني اياه*

*****

يومين مرت بجتماع الاحباب.. الجدات مزنه وصبحا تآلفوا.. وسواليفهم عن المعارف.. (تعرفين ام فلان بنت فلان اللي ولدها كذا وهكذا) .
حتى توصلوا لبعض المعارف المشتركة..!
فلك ان تتخيل كمية الاندماج.. كانهم مكتشفين انهم خوات ضايعات عن بعض سنين..

زينه تغيرت نفسيتها كثير بعد الكبت والاوضاع وقضية الانفصال..!
ظلوا هي وجدتها بضيافة بيت سعود وكانوا مجهزين لهم الملحق الخارجي..

انتهى اليوم الثاني..
منتصف الليل..
نواف بمكتب ابوه في الدور الأرضي مع سيف والاغلب نام لأنها ليلة دوامات..
سيف فرك جبينه:عجزت اربط صورة غازي براجح.. بوصول مهره لعساف.. مستحيل صدفة..
نواف:بس لاتنسى نقطة ان عساف يعرف راجح.. وقد حتى تسلف منه مبلغ على ايام مشروعه الفاشل..

سيف ينفث الدخان :طيب يعرف راجح.. وش وصله لمهره.. وبعدين مهره ماتعرف راجح لاماضي ولاحاضر.. لما يحط شخص صورة رجال بمكتبه مايقرب له.. فأما انه صديقه بشكل عميق.. او شخصية معروفه ويحترمها.. غازي ابو مهره مو معروف.. يبقى انه صديق راجح.. بس اخوك .. وش دخله..

نواف :والله ياسيف.. الواضح ان عساف كان متواصل مع راجح.. وبينهم اشياء اعمق من اللي ظاهره لنا.. يعني انت وضحت لي ان سما بنت راجح تواصلت مع عساف.. وساعدها هناك ..خلنا واقعين.. سما اعرفها انا وعساف.. بس معرفتنا فيها سطحية مو مثلك يعني نعرفها شكلاً فقط.. بس دامها لجئت له.. اذاً ابوها ناصيها له..
سيف :طيب وكيف وصل لمهره.. وغازي متوفي يمكن من ثمان سنين او اكثر..
نواف بتفكير:يمكن راجح اقترحها.. اقول يمكن.. يعني مثلا عساف سائله لو يعرف بنات وكذا..
سيف بتفكير :لا ماتوقع..راجح باين مايعرف مهره ابد..
نواف:الامور هذي بتبين مع الوقت.. بس حالياً طيعني واطلع من سالفة راجح.. لاانت تبي تضره.. ولا انت قد الامور اللي ممكن تجيك من وراء هالناس.
سيف :انا وضحت لك ان طلال كلمني لأن هدفهم منصور.. ومنصور هذا مو بس شغلته هالاثار.. الوضع أكبر وتحته عصابه.. راجح مجرد فرع صغير يعني تهريب الاثار مو الهدف.. مجرد خيط يبون يمسكون فيه منصور.. انا من خلال الشغلات اللي عطاني طلال.. توصلت ان راجح في السالفة.. ووضحت اني مستحيل اضره.. ولعلمك انا من رجعت هنا وانا ناوي اطلع من هالشغله واقفل بابه..
نواف : حلو.. ولاتفكر كثير انبسط ياخي.. والباب اللي يجي منه الريح سده واستريح..
قام :الله يسرها.. مب نايم انت..؟!
نواف :لابخلص هالملف.. بكره عندي اجتماع واحضر له..
سيف:على القوه ابوي.
نواف:يقويك يابعد حيي..

طلع سيف ونواف رجع انغمس في شغله..
.
.

زينه في الملحق تتقلب ومو عارفه تنام.. تناظر جدتها نايمه بعمق..!
وفي داخلها:هذا وماتعرف تنام الا بمكانها.. والله انا اللي استويت ولاني عارفه ارقد..
قامت وطلعت الصالة.. وانتبهت للبرق من النافذة وصوت الرعد.. بعده ذرات مطر..

*انه موسم السرايات..
العابرات..
النهايات..
والبدايات..!
دائماً المطر يثير في قلبي الحنين لأشياء اعلمها.. وكثيره اجهلها..!
وقفت انظر من النافذة لسلاسل المطر... تلدها السماء وتبتلعها الأرض..وتبكيها اوراق الشجر..ويشيعها قلبي.. بشعور غريب.. لا ادري ماهو..!

شردت في حبات المطر..
وطرء علي عنوان كتاب فيصل خرمي
(الحظ لايطرق باب الجميلات)..
تهكمت لنفسي.. هل انا جميله حتى لايطرق الحظ بابي..
لاأريد جمالاً.. اريد حظاً ..كنت استاء حين آكل تفاحة وفي جوفها دودة..
او اذا انتعلت حذاء وبداخله زجاجه..
او اذا شربت الشاي وحرق لساني..!
وكنت ألعن حظي..
ليت سوء الحظ.. ظل على تلك السخافات.. ولم يجرح عبدالاله اخلاقي بشكه.. وكرامتي بضربه.. واعصابي بشخصه الذي لايطاق..!
امتحنني ربي لأعلم سوء الحظ كيف..
ماذا الان..؟!
الى أين يادنيا..!
مذ اصدرت المحكمة ورقتي وانا اجدول بعض الاهداف.. تبدء بوظيفه وكيان.. ورفض تام لأي زواج.. فقد خرجت من الأسر بأضرار جسيمه.. وقلبي اصابه هدم.. يصعب ترميمه..!

اضاء البرق..
يكسر صفحة السماء..وكأنه فتتها وستقع اشلاء.. واغرت زينه للخروج.. وخاصه الحديقه والمنزل في حالة سكون تام والكل نائم..!

نواف.. كان قفل ملفه وهو يسمع المطر ناظر الساعة ثلاث بعد منتصف الليل .. طفى انوار المكتب عشان يشوف اضاءت البرق من باب الشرفه والنوافذ الكبيرة المُطله على بره.. ونواف عاشق للمطر من زمان..!

ماقاوم..
فتح الباب وطلع والشرفة مسقفه.. والانوار فيها مطفئه..
قدامه ساحة الحديقة.. باضاءتها الأرضية الخافتة.. والعشب المنتشي بالماء.. وقف ويدينه على السور.. يستنشق رائحة المطر وعبيره المختلط بالشجر..!
والبرق يقذف بنوره.. مُهشم الظلام..!
عقد حجاجه وهو يشوفها تمشي هناك..
كانت في مستوى النور الخافت وهو في العتمه والظلام..!
اوقفه الاستغراب والوقت.. وعدم الاستيعاب ثم الفضول 'بنت تمشي قريب من الملحق.. اكيد زينه'..!

*قفز الشيطان على اكتافي ليسحق مبادئي في تلك اللحظة..امام تلك البسيطة.. التي تمشي حافيه..ساقها ينتهي بخلخال صغير لمع في الاضاءات الأرضية.. بقميص قطني ترفعه قليلاً ..اقدامها تطي الماء وتبعثره..!
استغفرت وانا اتذكر الملكة بلقيس وهي تكشف عن ساقيها.. وحين ظنت ان القصر لجي.. زينه تطي في اللجه وقلبي قوارير الزجاج التي تتكسر..!
لماذا هذه المحرمه.. لماذا تلك المعقودة في ذمة رجل آخر.. لماذا مشاعري التي حنطتها بأقوى مواد الحفظ شيوعاً..تخون توابيت قلبي وتخرج.. التصقت في عيني فارسة على حصان.. واليوم تبلل عجاف سنيني بأقدام حافيه وماء يغمرها..
من تكون زينه..!
هل كانت قريبه مني في حياة اخرى.. هل شعوري الغريب هذا دلالة على وجود تناسخ الأرواح.. كما تعتقده الديانات الاخرى..!
وان انجذابي ليس الا عملاق كامن في روحي الماضية..!!
استغفرت..
وانا الذي اؤومن ان الروح كيان مستقل..واحده تولد وتعيش وتموت وتحاسب وحيده.. كما سأحاسب على اختلاس النظر لأنثى ليست من حقي.. غافله.. ولم تراودني حتى عن نفسها..!

اضاء البرق..
ولااريد ان ينحسر الظلام..
لااريد ان أكف عن النظر لزينه وانا استغفر من لذة اللحظة ..واستعيذ من شر ماوقع في قلبي..!*

زينه تفرد اكفها للمطر.. وترفع وجهها وهي مغمضه.. والسماء تلطمها بنعومة..برشقات تغرق شعرها.. وتفاصيل وجهها.

ونواف لايمتنع.. كأنها حلم..
ويذكر الاستيعاذ ولايريد ان ينطقه ..!
تمر البسملة والأستغفار في شفاهه ويبتلعها..
لايريد ان تتضبب الصورة.. ولايصيبها تشويش..

اقسمت ان قلبي يعقوب الأعمى وزينه قميص يوسف الذي رُمى في وجهه..فهو اليوم بصير*

التفتت زينه للملحق.. وشكل جدتها تناديها..
راحت ناحية الباب.. واضاء البرق..
التفتت فجأة بشعور ان احد واقف هناك..
نواف تدارك بسرعه لصق بالجدار وتخبى..
عقدت حاجبها وهي تحدق..
لمن ضوى البرق ثاني..
وماشافت احد..
جفل قلبها..
واسرعت تدخل الملحق وتقفل الباب..

تنهد ودخل المكتب وقفل.. والسريات اتت السنه لتعصف بقلبه وكيانه وتقتلعه.. كشجرة ضخمه راسية.. لكنها كسرت كغصن جاف..!

مطرةٍ فاضت على الدنيا شذاها
‏كنّي اللي قبلها مانيب عايش

‏روحي اللي مدري مني من خذاها
‏ردّها طقّ المطر على الدرايش

****

سعود بتردد:موضي اليوم ماصحيت الا اشوف رسالة بالايميل من جمان.. تطمنا وتقول...

قاطعته وهي تمد كفها:
مابي اسمع عنها شي..
سعود:يابنت الحلال.. مهب زين زعلك منها.. فكري فيها.. ماخذها عن بناتها الا الشديد القوي.. وماتصرفت تسذا الا يوم غزر..
هي بصد وجفا:
تعقب.. الأم لو تصير مداس ماتخلي عياله يتامى وتروح.. لو ضامها شاهين تجي لي وتشكي.. يا اصلح بينهم.. ياكلن يروح بحاله.. بس اللي سوته بنتك..يفشل ويوطي الراس..

سعود ومايبي يضغط عليها بعد تعبها.. ولاماهو راضيه حكيها عن جمان:يهداك الله..بس شاهين غلط.. ويستاهل القرصه اللي جاته..
موضي بعصبية :لا والله مايستاهل ولد فهد.. هو رجال والشرع محلل اربع.. ولو يبي يغدرها حط فوقها اللي عاجبته ويبيها.. وهذا وفضى له الجو.. ماسواها.. لأن اصيل.. وبنتك بياعة العشرة..
سعود:مابي ازعلك وانتي تعبانه.. بس شاهين وهي عينتين في راس.. واللي سوته.. انا معها فيه.. هي صبرت وفي الاخير يوم تمادى عرفت كيف تداويه..!

موضي:قم ياسعود افطر.. وقفل سيرتها تراها ماتجيب لكبدي الا المر..
قالت كذا واطلعت..
تنهد ويدعي ان الله يحفظ جمان اللي موراضيه تصرح وينها فيه.. بس لاظلت ارسلت له ايميل وطمنته عليها..
ويدعي ان الله يحنن قلب موضي عليها.. ولاينزل غضب الام فوق راسها وهي بغربه ووحده..!

******

سيف لابس ثوب وجالس يلبس جزمته ويكلم مهره النايمه:
ليتنا مامدحناك.. وانا اقول ماطلع الا مفطرتني..

مهره بنعس وضجر:ياشيخ لكل حصان كبوه.. وبعدين وش عندك شغل فيذا.. ما انت شغلك بلندن..
سيف يحط شماغه على كتفه وعقاله براسه:
قايل لك بقابل واحد.. وده يسوي عقد معنا..ويستورد عن طريقنا لمحله..!
مهره تتحلطم:خله بس تعال ارقد..
وارجعت نامت..
سيف مو عاجبه ان بيروح وماقامت.. قام يسوي ازعاج بالعطور والغطيان..
وهي ولاتحس.. طرق الباب.. وسيف ينادي:ماما افتحي باب.. انا جوعان..
راح فتح له وابتسم:هلا يبه..
واقف يدعك بعيونه شعره منكوش.. سرواله ساق فوق والثاني تحت..
ومجرد مافتح.. دخل :ايش تنامين.. قومي..
سيف:والله جاك اللي ينفشك يالفسله.. مخليه عيالك وبوعيالك من غير فطور..
مهره و تحس ان سيف جلس على ظهرها ومع جلسته مشع شعرها صاحت:
سيف طلعه بلا لعانه عاد..
ضحك:الله..!  انا مايخالف.. حتى سيفك مو قايمه عشانه..
سيف ينطط على ظهرها ويلح :قومي قومي..
حطت كفها على جنب وجهها مع الشعور اللي حسته..
اعصابها فلتت وحست بترمي سيف على الأرض...
لاحظ سيف صمتها.. وانها مره تضايقت ومو متحمله مزح.. بينت ملامحها وهي مغمضه..!.

ومهره ومزاجها وتعبيرها من خلال النوم.. يمكن فيها شي..
راح شاله:
خلاص سيف.. ننزل الحين ونشوف جده موضي مسويه فطور..
استسلم.. وسيف يطفي الابجورة.. ويطلع ويغلق الباب:واروح لديون..
سيف:اذا زينه صحت اوديك عندها..
سيف وذراعاه ملتفه على رقبة سيف:
ايش ماما زعلانه..؟!
سيف ينزل الدرج:ماهي زعلانه.. بس فيها النوم اشوي وتقوم..
سيف:ايش فالس لوح مدلسه.. ماوديني..؟!
سيف :بعدك صغير.. يبه..!
وظل سيف يثرثر وسيف يجاوبه.. ومستغرب من مود مهره الغريب..!

*****

شاهين الجوال باذنه :وش قالك..؟!
الرجال:المعلومات اللي وصلنا لها انها بايطاليا وماطلعت منها..
شاهين وقلبه ينبض بشكل متسارع.. الا ان صوته راسي ونبراته هاديه:طيب ابي معلومات اكثر.. كيف ممكن تجيبها لي..
الرجال:والله يابوفهد .. ما أضمن لك.. بس هذا يعتمد عليك.. انت قلت انها دارسه بايطاليا.. ممكن تدور مين اصحابها.. السكن اللي كانت عايشه فيه.. جيرانها.. لو في اقارب او زمالة هناك.. تتواصل معهم.. وممكن توصل..
شاهين :تمام.. بيض الله وجهك ياعبد العزيز والله ماراح انسى وقفتك معي..
عبدالعزيز: حاضرين.. في الخدمه وانا اخوك..
اغلق..
وشرد..
كانت ايطاليا ولندن من تخميناتهم.. في جلسته الاخيرة مع سيف ونواف..
سيف قاله:ايطاليا.. لانها جلست فيها سنين بسبب دراستها.. تقدر تقول بلدها الثاني.. جمان مارست حتى الرسم كهاوية عند النافونا وتريفي.. وكانت ترسم سياح بأريحية وكنها وحده من الشعب.. واكيد عندك فكره.. انها كانت تتنقل بالاجازات.. لانها تحاول تطور من نفسها.. يعني جمان مجالها واسع هناك ومعارفها كثير.. اما لندن ممكن تلجئ لها.. لاني ووليد حولها.. حتى لو مابينت نفسها في ناس ممكن تستند لهم وقت تضيق بها..

نواف:لأني اعرف جمان غامرت هالمغامرة.. بس تظل حاطه سابور حولها..حتى لو مايدرون عن وجودها.. اهم شي هي تدري..!

افاق من شروده..
ماغفل وماتوانى عن بحثه عنها.. حتى لو كذب على الجميع انه سلى ونسى..وعافها.!

عندي عشم مثل الكفوف الباردة ورا الهشيم
‏عندي أمل مثل الندى فوق الغصون اليابسة

*****