رواية مبعثر فيك ماللحزن لايشفى الفصل التاسع عشر 19 - بقلم ايمان يوسف🕊️

البارت التاسع عشر

في گل صبح ابتدي أحبك من جديد
وين النهاية وأنا گل يوم ارجع ابتديك

الصباح - بيت سيف

سيف الصغير على المائدة.. ومهره تحضر الإفطار مع جولي.
فارس واقف يحورف في تُحف فوق المدخنه : ابا اصادر هالنمر جاز لي.
مهره بسعادة : حلالك ابوي خذ اللي يعجبك.
سيف نازل : اقول خله مكانه،مايطلع هذا من البيت.
فارس رفع حاجب : مهره عطتني اياه .
سيف : انت ومهره وماتملكون لي .
سيف يحرك رجوله وهو على الكرسي : وانا اوبه .
سيف باسه : عاد انت راس المال،انت المكسب الصافي .
سيف منتشي ..وفارس يطالع بنص عيون ومتكتف :
واللهِ عيب،يبه ترى ماجالي اخو لسى عشان تنسفني كذا .
سيف راح له وضمه وهمس في اذنه: استح، تغار من ولد عمك .
فارس في حضن ابوه :انتبه لتصرفاتك معوه ،ترى ها مثل ماجبته ارجعه، انت ابوي انا،لي انا، جايك من اخر الدنيا،عشان تبوس سيف بالأوله .
سيف باس خده : صغير وندلعه، اكبر يافارس .
توجه لطاوله: اكبر عند الكل الا عندك، راعي مشاعري ولابدخل في حالة عزله واكتئاب..
سيف : ياساتر..!
مهره جات تحط باقي الفطور : وش فيك امي، وش هولا تدخل في اكتئاب..!
فارس :
التفرقه يامهره.. توجع القلب.. انا اشهد ان قلبي مجروح وينزف..
مهره بشهقه باست راسه: وويه بسم الله عليك جعلني قبلك.
ابتسم وبنص عيون : تصدق يبه.. نبادل.. خوذ سيف جعله عافيه.. وانا تاخذني مهره.. والله ماهي شينه..

ورفع عيونه : مهره تبنيني.. وببر فيك..وبتبرء من ابوي وبعقه.. توافقين .؟
ضحكت: تم تبنيتك.. وش فيك على ابوك ..سيف وش مهبب..؟!
يشرب قهوته : كل ذا لأني بست سيف بالاول.. فيها شي..؟!.
مهره تجلس : ايه فيها..المفروض تبدء بالأكبر.. اول انا.. ثم فارس.. واخر شي سيف..
فارس بتهكم : لا عز الله افلحنا..
سيف برواقه : وش رايكم.. نكنسل هالعاده الشينه دامها بتسبب صراعات داخليه بينكم..
سيف الصغير خرج عن صمته وهو يحط كاس الحليب:
ماما.. انتي قولين تنامين معي.. انا نمت وانتي هجيتي.. ياكداااابه.. وين لوحين خليني..

توهقت..
وفارس انفجر ضحك: ايه شفتها وهي تهج.. وين رحتي يامهره وخليتي سيف لحاله..
سيف بهدوء وهو ياكل :
نومتك خلاص.. وجيت خذتها عشان تنومني.. ماعرف انام الا بحضنها حتى انا.
فارس انصدم من ابوه واحمر وجهه وضحك : وراه .. عيب يبه وش جاك ..
مهره وجهها ولع : سيف ..!

ياكل بهدوء ويناظرهم بفهاوة: وش قلت انا..اثنينكم كبار وبالغين،ليه اللف والدوران .
ناظر وجه سيف و فوقه علامة استفهام: وهذا فاهي مايدري وين ربي قاطه..
مهره تضحك بارتباك وتقرب الصحن من فارس : اكل امي.. ابوك مادري وش به ضارب سلك براسوه .

*****

علم مشاري عن وجود فارس وسيف الصغير.. اصر يجتمعون بمزرعة ابوه.. وينبسطون سوى..

كان وقت العصر وهو مع سما هناك .
جالسه على احد المقاعد الخارجية ضامه رجولها وشارده..
وتسمع مكالمات مشاري وهو يعزم الشله.
بيجي نواف تعلم انه توأم عساف والتقت معه قبل،لكن ماشافته من سنوات،اخر مره شافته قبل مايتوفى اخوه.
وبتجي مهره زوجة وحبيبة عساف،ومعها 'ولده' .!
كيف تكون طعنتك موجوعه بقدر رحيلك ياعساف..
كيف تزوجت وانجبت .؟!
كيف كنت غبيه، ولم استوعب غياباتك وغموضك .
كيف اصبح العالم من حولي مُخيف وانت الأمان..!
تبسمت وانت تخون.!
أأتمنتك نفسي وانت عبثت بها ..
غرورك لم يشفع لي كبوتي،عاقبتني وانجبت من غيري ..
ظل اسمك معلق في الدنيا يحمله طفلك كما كنت تتمنى ..
انا التي خسرت وكسرت انفي كما اقسمت..
كنت شاهقاً ياعساف،كبرياءك يجعلني انكمش..
مات طفلي كما تنميت انا،وعاش طفلك كما اقسمت انت .!
: سما..معقول ماتسمعين..؟!
هزت راسها من شرودها العميق:سوري مشاري والله مانتبهت،وش فيك..؟!
مشاري : بيجون سيف ومهره..ومعهم فارس وسيف الصغير ولد مهره،بتنبسطين معهم .
تنهدت : ماحب الأطفال يوترون الوضع والمكان،مشاري شكلي برجع البيت..

(سما من عقدها ،الطفولة والأطفال،تحسها اشقى مرحلة في الحياة مرت فيها، فصار عندها اصرار انها ماتنجب، ومو بس كذا، تتوتر من وجودهم فالمكان، خاصه لو كانوا كثيرين حركة واشقياء، دوم تحس انه بيطيح او يأذي نفسه..
'سما بختصار مجموعة عقد نفسيه')

مشاري يخلط لها شوكلت بالحليب ويعطيها اياه :
بالعكس ظلي، انتي تحبين مهره وتنبسطين معها،بتحبين ولدها .

خذت الكوب وشردت..
مهره حبوبه وعلاقتها بسيف منسيتني انها كانت زوجة لعساف.
بس لما اشوف ولدها منه،كيف رد فعلي ..
اصعب شي ان تعاتب ميت..
دفن بحلوه ومره..
تمسكت في الكوب، خافت يطيح من رجفتها.
وقفت:بتمشى شوي.
داعب انفها المحمر: تمام حبيبتي.

راحت وخيالها يجمح لبدايتها مع عساف..
كانت في امريكا وكما نوهت سابقا كانت تشتغل فالصحافة، وخاضت في امور مع سياسين،وحاولت فضحهم.
ولما حاولوا يوصلون لها وحتى حاولوا اغتيالها، استبعدت اللجوء لابوها.. لانه بيرجعها عنده وهالشي ماكانت تبيه.
تواصلت مع عساف،و هو على علاقه بابوها،وكان راجح معطيها رقمه، ورقم بعض الأشخاص بامريكا ممكن يساعدونها اذا احتاجت.
عساف كان المُرجح بحكم انها تعرف سيف ووليد وهو يقرب لهم.
وحتى هو قد شافته ،حتى ماكانت تذكر اللي شافته قبلاً هو ولانواف .

وكان اللقاء..
تذكر عيونه القاتله، كيف حدقت بها،تذكرهم وكأنهم العيون الوحيدة،التي ملكت اقوى حفارة تنقيب عن انوثتها المدفونة .!

لقاءنا الاول كان في بار ..
ولم تكن مرتي الأولى في مثل هذا المكان،فأنا برغم شرقية ابي التي حكتها ونحلتها السنون ،اميل لعرق امي، التي ماتت قبل ان تُسلم حتى ..
تعارفنا..صافحته.. حكيت له.. واخذت منه قسم غليظ الا يخبر ابي او احد بشيء، فقط اريده ان يخبأني لفترة..
وخبأني.. في قلبه،وبيته،وحتى سريره..!

عيونه الجريئة .. كانت تحدق في تفاصيل لم اكن اعرفها بنفسي..!
لم يغفل عن فكي الحاد وتروقتي البارزه،اتساع عيني ولونها البني العتيم، كان يتلمس رمشاي بطرف اصابعه..
كان يخبرني انها تصيبه في مقتل.
كان يسند كفه على خده،وانا على ظهري،يبتسم بخمول العاشقين : ود اعد حبات خالك بعنقك ووجهك.. بس تعرفين ليه ماعدهم ..؟!
: ليه..؟!
: اخاف تطلع بوجهي ثواليل..
هي بدهشه: واااات..؟!
ضحك: ثواليل،كل علومك ماش،يبي لي اعطيك كورسات بعلومنا وسلومنا وامثالنا وكذب اولينا..
اعتدلت : عساف ترى افهم عليك،واحكي سعودي،بس عاد لاتبالغ، واصير مافهم، وش اللي قلته؟

(اذكر شرح لي ان من المعتقدات فالماضي.. ان الواحد اذا عد النجوم تطلع له ثواليل، فتح صورتها بقوقل، انقرفت، بس ضحكت بسعادة يوم فهمت انه يشبه شاماتي بنجوم السما)!

مهما كان عساف محط نقد، كان شخصية استثنائية،لايشبه احد..
على الأقل انا لا اجد من يشبهه ..
ردود فعله مفاجئه، غير متوقعه، احبني صدق وعشقني واقع..
لم يكن هاوي وابتلعني ورمى عظامي للكلاب..
كان مسؤول..
خاف بغيرة حاده علي وعلى سمعتي .
'في ليلة غاب عقله وعقلي.. بسِم نستهويه انا وهو.. شربنا حتى ثملنا.. حكينا معًا في السياسة والدين.. في العائلة وعنجهية الأباء.. في التفرقه بين الأبناء.. اخبرته اني مستحيل ان انجب.. واخبرني ان امنيته ان يرزق بطفل.. ويعطيه حتى يرضيه.. احتد النقاش ان كلينا غير منطقي.. انا لا اريد لأني اتذكر طفولتي المعاقة.. والخذلان واليأس.. لن انجب طفل مثلي.. اما يحمل صفاتي الوراثيه.. او يسقط من شي ويتعوق.. حتى الان لايوجد مايثبت.. من كان السبب الأعظم في سجني في كرسي بعجلات.. هل الجينات ام السقوط..!!

بعكسي عساف.. كان يريد ان ينجب ليمد بجذر اسمه في الدنيا.. وقال انه سيقوم بشجره خاصه لعائلته.. يفكر بانجاب عشره سيعاملهم بدمقراطية .. لن يمنعهم من شيء.. سيعطيهم كل شيء.. لهم الحق في الاختيارات .. فقط سيكون داعم .. ويتفرج لانجازاتهم.. فقد كان يرى ان والده احتكره.. كان يريده مثل نواف يقارنه دائماً به.. ومن وجهة نظره هذا ما أفشل مخططاته ومشاريعه..

حلق بالكلام.. الى حيث حُرية الإنسان .. حتى في اختيار دينه ومن يعشق.. كيف يأكل وكيف يشرب.. من يخالط ومع من يعيش..!
وصلت بنا الطرق.. للعشق والغرام.. حدثني عن ثنائيات فرقتهم الطرقات ..
وان العشق أعلى مراتب الحب..!
هلوستنا وهمساتنا.. زادت من مسببات الأثم..
لعب الشراب لعبته.. وجاذبية كلينا.. وكانت ليله تجردنا فيها من كل شيء.. اولها الخوف من الله .!

في اليوم الثاني.. بعد النشوه والقهوة المُره التي ازاحت بعض من ثمالة البارحه..
كنت اهيم عشقًا..
وعساف كان ثائر لاعن يسب نفسه ويعتذر ،
اخبرته اننا عشاق ولايقلق اكثر ..
كان حاسماً جاداً، اقسم انه يحبني فعلاً ولست نزوه،
كان محافظ علي والشراب هو الذي لعب بعقله..
واخبرته اني اصدقه..

ذُهلت وهو يتصل بالسفارة ويتكلم عن كيفية عقد القران..
ربما بعقليتي الأوروبية،لم اكن اريد الاستعجال لكن بعقليته الشرقيه التي ينكرها وهو قابع فيها حتى النخاع، لم يرضى ان اظل يومًا بعد ماحدث وانا على غير ذمته.
في تسائل مخيف لذاته..
ماذا لو مُت اليوم في حادث،سكته،ماذا لو علم احد وتركتك تتمرغين بتراب فعلتي.

كلماته مازلت احفظها: 'نعقد اضمن،ولو ماعجبك الوضع ننفصل،بس عشان ضميري سما،انتي مانتي بنت هوى ولا بنت ليل، والله اني صاينك، من يوم دستي ارضي ونخيتيني، بس الله يلعن الشيطان'..

وتزوجنا ببساطه في السفارة .
انا بحريتي،لم اجد اهميه في اخبار احد،
وهو كان جذر مقطوع،مُستحل الغربه وحده.

عدنا للشقه،نتأمل العقد بأيدينا وضحكنا حتى الهلاك .
بالليل فتحنا شمبانيا تناثر رذاذها في كل مكان،واحتفلنا بطريقتنا الخاصة الملتوية بزواجنا الديمقراطي البحت،الذي لايمت لمجتمع اباءنا وجدودنا بصله.!

*****

نواف بالفندق منسدح ويتأمل السقف.
تسلطت صورة زينه ذات الثواني مخيلته.
'دائما كان يسبق اخوته علمياً وعملياً.. يسبقهم في رضا والديهم
وفي المكوث في يمين والده والحضور له'

لكن عاطفياً فهو بطيء كاسلحفاة متحصنة بقوقعة تضخمت بفعل العمل والطموح.

مابال امرأه متزوجة اصلاً، مُحرم علي التفكير حتى بها، تتباهى في رأسي ممتطيه خيلها،متلثمة بشماغ كالصبيان..
ارتكاز ظهرها على الحصان يدك حصوني، ويضرب كالمنجل في قوقعتي الحصينة..'

اعتدل وهو ياخذ قارورة ماء ويفرغها بجوفه،غمض عيونه..
وسقوطها وسيف يقفز لاحتضانها.. يحضر في عينه.
فتح عيونه وصوتها يرن : 'جديده انا بمشي تبين شي'
نفخ بتوتر : اطلعي من مخي ..

'مابالها علقت في ذاكرته، بهذه الطريقة المزعجة،كل مايشعر به انطباع صورتها، لاشعور ولا حتى امنيه فالوصول اليها.
استبعاد تام لفكرة الإقتران بها.
لكن صورتها،ارتفاعها الشامخ على الحصان، كفها الممسكه بالجام،كفها الاخرى على ظهر سيف الصغير.
شعرها يتضارب مع قوة الهواء في جدال خرافي'

نفخ بتوتر..
غفل عنها، تناسى صورتها،وانشغل بمصيبة جمان وسفرته وقضية مهره،
بس ليه اليوم ارجعت تداهمه كذا.!
رمى علبة الماء الفارغة من بعيد في القمامة،
ارتفع رنين جواله،رد : هلا .
سيف : وراك مختفي..
نواف بضيق :توني صاحي،سهران البارح ملجلج،ماعرفت ارقد.
سيف : وراه..
نواف يشعل سيجار ينفخ دخانها :
ابد،حايس بموضوع اختك، مدري احس جمان طولتها،يعني قلنا قرصة اذن، بس شكلها من بيعة اسهمها، مطوله الشرده، ولاهي ناويه تتواصل معنا.

سيف: ابوي يدري صدقني، ولا ماكان حط ببطنه بطيخ صيفي وهجد..
نواف:اعرف ابوي ياسيف،صدقني حده معها الرساله اللي يقول خلتها مع هادي، وبس.
سيف وسوس: لاتقوله..
نواف :لو يدري على الأقل قال لي انا، تعرف ابوي وحرصه على تأمين كل شي ونظامه فالوصايا والضمانات.
سيف : يمكن العلم عند هادي، دامه ضبطها..

نواف بتفكير عميق : قلت لك لو الموضوع وصل لأبوي قال لي انا،بس اذا الموضوع بصدر هادي،انا اشهد ان مايدري فيه احد.

سيف: المهم قم صحصح احنا متوجهين لمزرعة بومشاري،ننتظرك..
نواف:ارسل لي مشاري،بقوم اتروش واشوف وضعي.
سيف : تعال لاتقعد تخاوي ابليس.
نواف قبل يقفل:يصير خير.

' البارح تأرق في جمان.
واليوم صحى على صورة شامخة تمتطي حصان'.!

*****

هادي بعصبية:
ام بيان الله يرضى عليك لاتصلت ردي، ولاوالله لي تصرف ثاني معك.
جمان: الله يهديك ياخوي، كنت نايمه والجوال صامت اعذرني..
هادي: لاتصمتينه، تراك بذمتي لين ترجعين،ولا بحط العلم عند عمي واخوانك،
جمان : لاوالله ماتسويها، خلاص توبه الجوال كله عام.
هادي : سويتي مواعيدك بالمستشفى اللي ارسلت لك عنوانه.
جمان: ايه وخذت بكج كامل على المتابعه عندهم وحتى الولاده.
هادي بتوتر يفرك جبينه: ام بيان ارجعي قبل ولادتك، لاتصعبينها، وترى شاهين نادم ومذبوح،وانا وقفت على الموضوع..هو صادق، كانت وقفه انسانيه بوفاة ام البنت بالمشفى ومامعها احد،لاتاخذين الامور....
قاطعته: قفل الموضوع..
هادي : تراك ما انتي محجمه الوضع والله لو تجيك الولاده لحالك، تموتين محد درى عنك..
جمان بعصبية : هادي.! لاتفاول..
بعقلانيه: مافاول بس هذا الواقع واشوفك تبالغين.. عاقبي زوجك وانتي بحضن امك وابوك.. ليه تمتحنين عمرك بغربه ووحدة  .. تراك تظلمين نفسك وبناتك.. والله بوفهد مايستاهل.. نادم  وانا اللي اعرف الرجال من نظرات عيونه.
جمان بصلابة:ماهمني.. تقول ندمان،ماندم الا وقد فات الفوت ياهادي،ولافات الفوت على قولهم ماينفع الصوت..!

*****

بعد شوي بالمزرعه.
مبسوطين و سما جالسة بعيد عن المجموعة، والأجواء نهارية خارجية،
ألقت نظره سريعة على سيف الصغير،
حاولت ماتدقق ولاتحدق، ولاتبدي لطف وابتسامات مجاملة قد تغدر بها وتجعلها تبكي.
وهذا الطفل ايقونة خيانة عساف، الذي تمناه وانجبه من غيرها.

مشاري شايل سيف: مهره مايشبهك، كله التوم التعيس ابوه وعمه.
مهره تصف علب كيك هي مسويتها :كلن يقوله..
سيف يرمي حطب في مشعل كبير:
تعالي ياسما،خلك قريبة من المشب برد عندك.
ردت بلطف بالإنجلش:انا ارتدي قطع كثيره من الملابس، سأستمتع بالتأمل قبل المغيب.
مشاري بمداخله مايمل منها: سما عربي..
بخفوت: ابشر.
سيف الصغير ومشاري شايله :شفت كلب كبير هناك يخوف،اووبه قولي مايعض.
مشاري ضحك: وشو.اوبه.. من اوبه.؟!
فارس :ابوي،خلاص علقت معه اوبه لانه يسمعني اقول يبه.
مشاري متخرفن على سيف وكيف مأنق بملابس شتوية:
مايعض تبي اجيبه لك.
سيف : لا مابيه.. انا ابي جاجه.. اصان..
وشهق: بيتنا .. شفت سندوووب حلوو.. (ويأشر بكفوفه و يضمهم) صقيييير..

ضحكت مهره: ليتك شايفه اول ماشافه، تمنيت اني سنجاب ومنبهر فيني.
فارس : الخبال مايمرح بالخلا، ظل يلاحق به،مثل اللحوج اللي يلاحقون الضبان والجرابيع.

سما التفتت،ومافهمت شي من جملة فارس، وبصدمة: فارس وش تقول؟!مافهم عليك..

فارس حط كفه على فمه مسوي مصدوم : أو أم جي.. احجي فارسي اني.. كيف اترجم ياسما.. حسستيني اني اتكلم المهريه.
سما :وضح لي،تراي سعودية مثلكم،بس انت تتكلم بشكل صعب.
مشاري غمز له : فارس بسط لسما، انا فاقع مرارتها ابيها تتكلم عربي، اكثر حكيها انجلش..
بدء فارس يشرح لهاوفي داخله يحس سما تنكه مع ذكاءها اللي الكل يشهد له.
سما حاولت تلتهي بفارس وتسمع بعض مصطلحاته وتعيدها معه، وماتبي عيونها تروح لسيف الصغير..
ماتبي تركز على الخيبه والقهر..
ماتبي تذوق العلقم،اللي قدمه عساف بطبق صادم وصلها بعد وفاته..
ومن خلال تحاشيها له..
وقعت عينها على نواف،
وهو ينادي : يامشاري،ياعيال..

'كان دخول نواف مُربك،كل لمحه منه قلبت موازيني وهزتني، لمحاته التي خطفتني من ذاتي، آااااه ياعساف،كم عشقتك بجنون'
هي ثواني وتلاشى الشبه،
وعدت للواقع ..
نواف لايشبه عساف ابداً..
ذاك الشغوف المشاغب..
ذاك المجنون اللعوب..
نظراته التي تصوب نحوي كاسهام تتراشق نحو قلبي.
ابداً لايشبه عساف..!
منذ سمعت عن تواجد نواف بلندن.. وانا اتحاشى تواجدي معه في مكان، خوفاً من الشبه، لاني كنت اعرف رغم اني لم التقيهم معاً، انهم نسخه والغالب يخطئ بينهم..
لكني تعجبت..
كيف يقولون انهم توأم متطابق..
متطابقان لمن يعرفهما سطحياً، لكني وقد غصت في دواخل عساف، ارى ان احدهم في الشرق والاخر غرب.. '

قاطعتها ايماءته بتحية: كيفك سما..
ابتسمت : الحمدلله..
مهره كانت تحدق فيها،تحاول تشوف تأثير وجود نواف عليها،وهي متيقنه من اسلوب سما في الكلام عن عساف انها تحبه،
حاولت تلقى شي مختلف وهي تناظر نواف..
بس سما رجعت لشرودها..
و قطعته وهي تلتقط قطه صغيره مرت عند رجولها، وتحطها بحضنها وتمسح عليها بحنية.

'لو كانت تحب عساف كان هزها وجود نواف،
مثل رعبي لما شفته وفكرته عساف،
يمكن لانها تدري عن مسئلة التوآم وانا كنت اجهل، يمكن .'

همس لها سيف: وانتي مسويه مكتشفه الذره،شوفي سما لاعبرت نواف، ولا هزها شوفة ولد عساف،واضح ان مابينهم شي.

مهره بهمس: غريبه، احس في شي خطأ، صدقني البنت هذي مفهيه،المفروض ردة فعلها غير .
سيف يعبث في المشب وبخفوت:
مافاهي الا انتي،نواف يختلف عن عساف،في عدة نقاط.
مهره بنص عيون : بالشخصية والأسلوب والادب والاخلاق،ولا الخشه وربي نفس الخشه.

سما شارده وتداعب شعر القطه،وهي تبعد امتار بسيطة عنهم وجالسة على عتبه رخامية..
لما سيف كان يلعب وانتبه للقطوه عندها، قرب منها وهي مو حاسه.
حط كفه لتلامس يدها مع شعر البسه: حلوووه كتووووه.

ارتعشت وقلبها يخفق بشكل مخيف مع قرب الصغير..
عينها على انامله وهو يمسح على البسه.
تسارعت انفاسها،وبدت واضحه.. وكأنها ركضت في مارثون دون توقف.
نزل راسه.. وطل بوجهها وبخفوت : افيك..؟! (وش فيك)..
رفعت عيونها له، لما هذا الصغير اشعل كياني كما يفعل والده.
مفاصلي ترتجف،وكأني كبرت في السن فجأه، اصبحت كهله وعجوز،لا استطيع حتى رفع كفي نحوه..
لما اشعر ان قلبي اُقتلع،وان صدري به جاذبيه تفوق الجاذبيه الارضيه..!
ابتسم..
ليخلع من عمري سنين..
ابتسم..
ورف قلبي..
كحمامه..!
ابتسم..
وگأنه ترياق واكسير حياة..!

خيل لي ان الصغير عليه هاله من النور، بعث في نفسي دفئ يشبه دفئ الآيات القرآنيه التي ينفثها والدي احيانا على رأسي، لو عجزت المسكنات والمهدئات على كبح جماح انهياراتي..
نعم.. كأن في عينيه،قل هو الله احد، والفلق والناس.
اغرقني بنعيم الكوثر، واعاذني من كل مايؤذيني.
مايحدث في كياني غريب،والاغرب روحي علقت في حنجرتي.
اريد ان اهمس،اتكلم، لكني ابتسمت وعيناي تتبلل بدموع غريبة، وانا التي لا اقرب الاطفال ولا ألاطفهم، اخذته بتردد لحضني، وطوقته ..
ضممته وارخيت ذقني على كتفه،
شعرت اني ارمي ثقال السنين فوق اكتافه،
هذيت في داخلي : لما رحل والدك وتركنا.. لما ايها الصغير..؟
سيف باستكنان عجيب ظل بحضن سما،
وهي مغمضه على كتفه وتستنشق رائحته..

خُيل لها انها ليست المره الأولى،
هلوس عقلها الباطن،انها حضنت هذا الطفل كثيراً،وجدته في تجويف روحها،
هل لأنه ابنه..!
لانه أخ فقيدي،
لا اعرف تقدير اعمار الأطفال ابداً،لكن ربما ذاك المتوفى،
كان سيكون قريب من عمره.
ترى حين دفن عساف ابني،مالأسم الذي اطلقه عليه..؟!

*****

مر اليوم بالمزرعة
واجتمعوا الشباب،تعالت ضحكاتهم وسوالفهم..
سما بشكل غريب، امضت اليوم مع سيف،لعبته وفرجته على الحيوانات بالزرعة..
كان شكلهم يجنن لما هو يقول كلمه وماتفهمها ويروح يعيد فيها، ويبيها تفهمها. وهو مو عارف ينطقها صح، ولاسما متمكنه كويس في كل المصطلحات..
لما يلجئ لمهره وبضجر: ماما.. اكول لها دُبعه ماتعرف ..

سما بتسائل وابتسامة متشوقه: بالله مهره وش يعني والله مافهمت عليه..
مهره ببتسامه: قبعه ياسما.. كاب..
سما بضحكه شفافه :طيب كاب اسهل ياسيف، وش فيها القبعه،
سيف بكياته: ابي احط السندوب فيه واخبيها على راسي،عسان اوديه سوفه ديون..
سما : مين ديون اللي متشوق ياخذ السنجاب لها..؟!
مهره بحنين : اختي زينه..!
نواف ورغم انسجامهم في البالوت،اسم زينه تفلتر من كل الكلام،ليعبر محدث صفير في اذنه..
ويسمع مهره وهي تقول وتجاوب سما: اكبر مني بسنتين..
ولما قالت سما: جميلة مثلك..؟!
ومهره تقول : واجمل مني ،هذي زينه مايشابهها أحد،زينة شكل، زينة روح ياسما.. ليتك تشوفينها..

نواف لعن نفسه على التركيز في الجُمل،وكيف شرد عن اللعب،وحسين بخبث يداعبه:
مِن شافونيّ اضحك بالچذب كالوا عليّه تعافه !
مخفيّ الحزن جوة الگلب! همزيّن محد شافه..
عليِك الله وامان الله نواف تحجي.. هسا تريد تقنعنا ماوگعان بالحب يالجلب..
ضحكوا الشباب..
مشاري : نواف ذيب.. محصن.. گلنا بنوكع الا هو..
نواف بنص عيون لحسين :
خلينا الحب لك ياحسين، سنه تحب وسنه تبكي على الفرقا،الله يبعدنا عن مصابك..!
سيف : من الخبله اللي تعرف حسين وتستمر معه.
حسين: اي ارقصوا على جراحي والّلوجع.. نعنتن الله عليكم.. اني وفي.. بس ماطيح الا بناس زبالة.
مشاري بعبث:لو تطيع شور اخوك،خلك سطحي ولاتتعمق، وش عاد الناس لقت من الحب الا العذاب.

سيف يزيح باصابعه السيجار عن فمه : اعقب يامشاري،الرجل شريف ونيته ارتباط وزواج، ماهو مثل اللي يتنقل بين الزهور، خلك اسد وبطل حركات النحله يارخمه..

ضحك نواف :
الا بجوازك يامشاري حاط مسلم ولامسيحي على الوالده.؟!
مشاري :جوازي سعودي يا**.. اسلام اباً عن جد..
حسين: هسا الجواز الاخضر عرفنا انك مسلم بيه، وجواز البريطاني وش حاطط بيه ..
مشاري : انت وش شايفني ياحيوان،ماشي ومعلق الصليب على رقبتي،توني مصلي معكم ياكلب.

نواف يوزع الورق : الإسلام ماهو بس ديانة تعلقها بالجواز يامشاري، فيه حلال وحرام ،وتجاوزاتك تحت مسمى الحرية، تراها محرمات.
مشاري بعصبية : لاتعكرون جوي،تراي مبسوط.. واطلعوا عن اطار الجدية وخلكم بالمزوح..

ياسمين كانت منشغله على جنب في تنظيف قطعة اثرية، بمواد ريحتها قوية.. لفت انتباها الحوار..
وبحب مخبى داخل قلبها لمشاري،تعرف كيف يتوتر من المواضيع هذي،وتدري عن محاولاته في كبح نفسه الأمارة بالسوء ومايقدر،بحكم البيئه والمكان اللي عاش فيه والعادات اللي اكتسبها من مجتمعه ومن امه..
ياسمين : سيف، عطني وجه اشوي..
سيف وهو يفرد الاوراق : ماخلصتي..
ياسمين: فيه تكلسات عالقه وخايفه احط عليها نشادر،يعدم الرسم على التحفه..
سيف : جيبيها اشوف..
قامت،حط سيف الورق ومسكها بقطعة قماش..
قال : حاولي تذوبينها، حطي عليها حمض عضوي،الستريك كويس..
حسين : انتي صعبتي عليج الأمور ياسمين.. اني اشوف اللتوحفه.. اللي يكون قالبها نحاس يكفي تنظفيها بلخل والليمون..

ياسمين توسعت عيونها :
خل وليمون.. من جدك مادري شايفها دلة رسلان.. هذي حقت عجوز وقعتني على ورق حتى ارجعها سليمه.. لو تلف فيها شي تبي تعويض..
سيف : ترى ينفع احيان.. بس حسين باين القطعة كانت مخزنه بشكل غلط ومكان رطب، يعني حتى الوانها انعدمت..
مشاري عقد حواجبه ورحمها حتى بالإجازات تشتغل :
ياسمين اتركيها ماهو وقتها، انبسطي لاحقه على الشغل..
ابتسمت :لما انجح في ترميم عشر قطع اثرية، ويعطوني المختصين تقيمات حلوه.. بطور من نفسي وبيعطيني البوس منصب بالورشه..
ضحك سيف : يابنت لاتحمليني ذنبك،انبسطي اليوم اجازه..
ياسمين تاخذ القطعة: ماراح اخذ المنصب الا بتعبي سيف،ماراح اصعد بالواسطه..
وقعت عين مشاري على اصابعها المتأثرة بالمحاليل واظافرها كيف متغير لونهم وهي تتركهم وتروح..
ابتسم سيف :والله ياسمين شعله،ماشاء الله عليها..

'ياسمين تشتغل في ورشة سيف.. تخرجت من نفس جامعته.. كان حاضر كعضو في لجنة بالجامعه.. يطلعون على تجارب عمليه لشغل الطلاب.. تعرف عليها واعجبته ثقتها بنفسهاومثابرتها وشغلها.. عطاها كرته ووعدها بوظيفة اذا تخرجت.. وهذا اللي حصل'

دخلوا فارس وعزيز شايلين علب البيتزا..
فارس :لاتقولون خالي وليد وماريا مشوا..
سيف : ايه مشوا.. دوامهم مبكر بكره.. وانتوا طولتوا بالعشاء..
فارس يحط العلب على الطاولة:
المطاعم بعيدة عن مزرعة عمي راجح..
مشاري : لو مسوينها باربكيو افضل،انتم ماتحمسون..
مهره: برد بره ورعي يمرض..
سيف راح لفارس : فالس جبت لي بتاتس..
فارس ياخذ علبة وينحني له ويفتحها : ايه شوف.. يلا تعال اقعد واكلها..

جلسه على الكنبه وقرب منه طاولة صغيرة ورتبه وفتح له الكاتشب.
عزيز : هو ماعطلنا الا ذا البطاطس.. مافيه بمحل البيتزا.. رحنا خذناه من مطعم ثاني.
سيف يداعب شعر سيف : يستاهل العنوه السمي..

سيف رفع راسه له بتكشيره وابتسامه وهو ياكل..
'مهره والاطار الذي تعشقه، فارس كيف مهتم بسيف.. وسيف كيف يحن على سيف.. الثلاثي اللي تموت فيه ،شردت فيهم.. وقلبها يردد ياربي لاتحرمني منهم.. '

في نهاية السهرة..
سيف نام في حضن مهره.. فارس بعد مالبس جاكيته وقبعته جاء عندها : هاتيه..
سيف عطاه مفتاح السياره: شغل السيارة والتدفئة ابوي،انا اشيله..
خذ المفتاح وطلع..
مهره حركت رجلها : اففف نامت رجلي..

حمله بخفه وحطه على كتفه، مسك يدها وساعدها توقف:لاتنومينه على رجولك يعورك..
لبست جاكيتها وبهمس: يعني سيف بعد هالفرقى ود انومه بداخل ضلوعي مو بس حضني..
سيف باغتها وخاصه مايمهم احد الاغلب مشى مسكها من خصرها وهمس في اذنها :
عساك ع القوه.. بس خفي لاابتلي فيك وفيه..
ضحكت وهي تبعد عنه وتشيل شنطتها..
جات سما معها كيس.. مدتها لها: مهره سيف جمع ريش الطاوويس.. اخذيها لايصحى ويفقدها..
ابتسمت وهي تتبادل معها بوسة خد:
حيل انبسط معك ياسما..
ابتسمت : وانا بعد،جيبوه دايم، خلاص صار صديقي..
ابتسم سيف :ابشري وانتي تعالي له ياسما لاتخلين..
راحت وراه  وناظرت وجه سيف النايم ومسكت يده وباستها : كيوت..!.

*****
بعد شوي في السيارة..
فارس ورى والسماعات بذنه ويكلم ذياب واتس وفي صفحة ثانية بلقيس..

راس سيف على حضنه..
مهره شاردة من النافذة، تبعثرت شوي من مشاعر سما لسيف..
وكيف مشاري متعجب وهو عارفها ماتجي صوب الأطفال،وش معنى سيف..
في زاوية شك انحصرت..
ماذا لو؟!..
وهل ممكن تكون على علاقة عميقة بعساف والنتيجه سيف..
ولو هي امه..
هل هي على علم وان وجود سيف عندها بتفاق من عساف ومنها..
لا مستحيل..
هي بس لاطفته.. لانه ولد عساف الرجل اللي حملت له مشاعر بيوم من الأيام..
بس الواقع، سما مستحيل تكون ذوق عساف..
عساف كان شقي.. لعوب.. مليئ بالحياة..
عكس سما تماماً..!
وكجتهاد من ابليس، دس لها موقف مشاري لما جات سما تاخذ من الحلى اللي مهره مسويته..
منعها: ماتصلح لك، خوذي شي ثاني..
مهره بستغراب : ليه وش فيها..خلها تذوقها؟!
مشاري : فيها فول سوداني.. سما معها تكسر فولي..!

مهره انقبض قلبها وهي تتخيل الموقف ويزداد انقباضها،لانها تدري ان سيف ولدها معه ذات التكسر من وقت انولد..

قطعها من التفكير، انامل سيف وهو يقرص خدها وبخفوت وصوت دافي : وش فيك شارده.. وش هي الطواري..؟!
تنهدت وابتسمت : ولاشي..

مسك ذقنها ولف وجهها له،وناظرها ورجع للطريق : ولاشيك،فيها اشياء كثير، اعرفك يامهره من حسك..

ضحكت وهي تمسك يده : فيني النوم بس،صاحين بدري ومن متى واحنا نهجول..
سيف :اكيد مافيك شي..
مهره ومحتفظه بيده:اكيدين..
خذ كفها وباس اناملها وظل متمسك فيها ويسوق بصمت..
'حين لم يفلت سيف كفي،اعطاني دعم روحي اني معك، مهما تعمقت وساوسك وخوفك، يدي لن تتركك ابداً..'

*****

'لا تجادلني في حقوقي بك انت لي وانتهى!.. '

ياسمين تغسل بعض الادوات، لما مشاري وقف عند فتحة المغاسل واسند كتفه :
ياسمين انتي لما تطلعيني من وهقاتي، تتعمدين،ولا الله خالقك لي مخرج.

مارفعت عينها:
مدري وش تتكلم عنه..الحين ورى ماخليت عزيز يوصلني، شقتي قريبه من شقته.
وبعصبيه استطردت:اففف ليتني جايه بسيارتي افضل،ماحب انربط بمكان.

قرب منها يراقب رجفة يديها،طاحت الاداة بالمغسلة، رفعتها واسحبت الفوطه ونشفتها وهي تصفها بالعلبة المفتوحة..

مشاري بشقاوة جاء وراها، وهمس قريب من اذنها: جيسي ماجاوبتيني..
ياسمين مستمره ترتب اشياءها :
مشاري ابعد واترك مسافه تعرفني ماحب هالحركات.
مشاري :طيب انا احبها كيف..؟!
ياسمين بانفعال : مشكلتك..
قفلت اشياءها بعصبية والتفتت حاولت تبعد عنه بس حاصرها..
بغضب:مشاري وش فيك، ماخذ شي..

ناظر عيونها:ماهي اول مره حد يزبد لي في اسلوب حياتي، والقاك تنقذين الموقفدكلهم ماينتبهون، بس انا مركز .
ياسمين:عادي يعني،يمكن لاني اعاني من نفس مشكلتك ويوجعني النقد،ومكتفه لاني عارفه اتغير ولاعندي القناعه،ابوي سعودي وامي من هنا ومسيحية،في اشياء مقتنعه انها عادي،وهم مصرين انها عيب وحرام..
مشاري قرب من اذنها وبهمس: ليتهم يفهمون مثلك عاد..

دفعته من صدره قبل يبوس خدها، لما داعبت انفها ريحة الواين من فمه:
انا افهمك.. بس ماشوفه صح..انا اقصى اخطائي اني ماتحجب.. واختلط في العمل وفيكم كأصدقاء.. بس مشاري العلاقات اللي انت فيها حرام.. والشرب حرام..الشغلات هذي مو بس حرام كبائر.. ولاتقول ماتقدر تقطعها.. تقدر.. دامك مسلم قدام الله.. ليت تحترم ديانتك ولاتقول البيئه.. هذا سيف سنين هنا ولاعمره شرب..

مسك معصمها ورفع كفها بالجدار وبانفعال من بين اسنانه : ياسمين..!!!
لاتقارنيني بأحد.. سيف مايسويها.. بس هذا عزيز يسويها.. وليد ياخذ مزاجه احيان وهذا هو خال سيف اصابعك ماهي سوى..

بعصبية:هذا انت قلت خاله.. وهالشي ماخلاه يقتدي فيه ويسوي مثله.. لاتعلق اخطاءك على بيئتك.. ابوك ليبرالي وامك مسيحية.. بس انت ايش..؟!..

مسك معصمها بقوةوبعصبية:
ياسمين ريلاكس بيبي.. وش فيك شطحتي.. لاتستشرفين على مخي..

بان الألم على وجهها وهي تكتم تآوه كاد يطلع من شفايفها.. وتحرك كفها تبيه يفكها..
عقد حجاجه.. وهو يرفع عينه لكفها المرفوعه ويمهل ضغطه وهي تسحبها..
بخفوت متوجع ونادم:ما انتبهت آسف..جد ياسمين سوري..
احبست دموعها وهي تشيل اشياءها وتطلع للصالة الجانبية..
جلست على الكنب وهي تسحب شوزها وتفسخ شبشب الحمام..
دخلت رجولها بالجزمه وقبل ماتربط الخيوط..
كان جلس قبالها ومسك كفها : اتركيها..

تلفتت بعيونها وبعصبية: وين سما لاتقول مشت،وظليت انا لحالي..
مشاري يطالع حروق وانتفاخات طفيفه في كفها ومعصمها ببرود: مانتي لحالك.. انا معك..
حاولت تسحب يدها :ياشيخ..
تمسك فيها من جهة سليمه: ياسمين اركدي سما هنا.. بس طالعه فوق مادري وش عندها.. والحين قولي لي عاجبك هالحروق بزر انتي..

ياسمين : بقفل الحمض وصاد يدي.. تخف.. ماعليك..
فاجئها لما خذ مرهم جنبه،وارغمها تفرد يدها وهو يوزعه..
بخفوت موجوع يناظر حروق المحاليل فيها.. واظافرها كيف قصيره.. ومعدومه:جيسي وش حادك ..تدرين اني اقدر اساعدك بوظيفة ارقى والطف.. وسيف ممكن يتقاضى ويمسكك منصب بدون هالضرر ذا كله..

ياسمين تناظر كفها: مابي اصعد على ظهر احد ..انا لما وافق ابوي اظل هنا.. وعدت نفسي ابني نفسي بنفسي.. ما احتاج دعم... وسيف ماهو مقصر معي بشي .. المفروض ما استقل عطاءه لي واطالب بأكثر ..
مشاري وعينه على وجههاوكفها ببطن كفه: وابوك يرضيه كذا.؟!
رفعت عيونها: ابوي عصامي.. ومعي في اني ابتدي من الصفر وانجز واحقق ..وبعدين انا اخترت اعيش مع امي هنا.. وابوي ألزمني اني اثبت نفسي..
مشاري بتهكم : لما يجيكم ابوك.. مايشوف يدينك.. راضيه اناملك الناعمة تنهري بالمحاليل ومواد النحاس والحديد..

سحبت كفها منه وبعناد:ويبوسها بعد ويفتخر فيني.. مشاري ماسمح لك تلوم ابوي.. لو عنده ماديات كفاية دعمني اكثر من دعمه .. بس عارف الحياة كيف غالية هنا.. وانا وحده ما استغني عن امي.. وامي مارتاحت بالسعودية ولاانا ارتحت..

مشاري :شوفي من رايي الحياة مع ابوك بتكون افضل.. عن قناعة اقلك حياة البريطانين جدية وجافه وعملية بحته.. بعكس البيئه مع ابوك.. جربي بالصيف.. روحي عنده و....
قاطعته : لو رحت ..جدي قايل يبي يزوجني لعبد الرحمن ولد عمي.. عشان يحدني على الجلسة هناك ..لان شايف ابوي ماهو شاكمني ومقعدني عنده ..بيضغط على ابوي ويسويها ..
مشاري بغضب: نعم..! من باقي يفكر كذا..
ياسمين :جدي ماقدر على ابوي .. يبي يجرب حظه معي.. قم خلنا نمشي، امي ماراح تنام الا اذا جيت..
قالت كذا ورفعت جزمتها على الطاولة تبي تربطها.. بدت وبانت لمحت الم بوجهها..
مشاري مسك خيوط جزمتها وربطها بخفه، واشار لها بالثانية ورفعت رجلها..
بخفوت وهي توقف: ثانكس..

مشاري في لحظة صمت،شال جاكيتها،وساعدها ويحاول ان الكم مايصيد جروحها..
سحبه قدامها والتقت عيونهم..
عيون ياسمين خضراء شفافه.. تقعان فوق بشرة برونزية ..
شكلت مزيج متنافر لذيذ كالقهوة والسكر..
بشعر متموج بني او رمادي..ربما اشقر ..غريب وكفى..!
ملامحها بريئه.. هادئة..
ابعدت عيونها عنه وهي اللي تغرق في مشاري.. تعرف محاسنه اكثر من نفسه..
قلبه الأبيض الصافي يلامس روحها..
رغم شقاوة طباعه وانفلاته..
لفت شالها حول رقبتها واغلقت شنطة جلدية فيها التحفه والأدوات..
شالتها على كتفها: يلا مشاري.. ناد سما..
بخفوت :تمام..

*****

يوم جديد..

صبحا بتحقيق: ودامها رحلة علاج مثل ماتقولين وراه ماخذتس معوه.. الوكاد انه تسذوب وش فيه يعالجه بمصر..
زينه : ومن قالك جديده ابي اخاويه.. رايح مع ابوه.. عاد وش بيعالج وش يدريني.. يمكن عقلوه المصدي..

صبحا تتوقف عن هز منسف مليء بالعدس : لايكون جايه الخبيث هو عندهم وراثه الله يكف الشر ويدفع البلاء..
زينه تسكب سطل ماء على البلاط: مافيه خبيث..لو المرض اعمى مادخل لعبد الاله جسد.. عوذة.. تهرب منه حتى الجن والعفاريت.. من شين نفسه واطباعه..!

صبحا:هالحين انتي وراه ماتسنعين وتدورين لك مدخل مع رجلتس.. والله ماعلموكم الاولين.. رجالهم بجيوبهم.. تشوفينه رجال ترعد الرجال من طاريه.. ولاصار تحت جناحها..كنه بزير.. يدور الحضن والدلال ..

زينه تجمع الماء بشطافة:
والله ياجدة هذوك الرجال.. مب عبد الاله.. المهم ابيك عون.. ترى ابي اخلص من مسألة انفصالي قبل يجي.. وابيك تخاوين للمحكمة .. تواصلت مع محامي وعرضت مشكلتي.. قال لي اني طالعه من ذمته ..باقي اخلص الأوراق بالمحكمة ..وان الله وفق خلصها الشيخ بطلاق.. ولا بلجئ للخلع وعندي كل شي رسايل جوال مطلقني فيها .. كم مره اخذ تقارير من المستشفى حق ضربه وتعنيفه..وفي امور بخليها بنفسي.. ان عقدها الشيخ قلتها.. وبيحكم لصالحي..

صبحا تناظرها بفجيعة وهي تحط المنسف جنبها:
لابالله ما انتي صاحيه.. اعقلي يازوين واركدي.. وحتى فلاح ماهو رايح معتس ولاصاير والي.. مايرضى على سند وعياله بشي.. حطي عقلتس براستس.. ودامه بعيد.. ادمحي الجفا وخلي هالمركب يسير ..

زينه رمت الشطافه بجزع :
يلعنه مركب اللي يسير فيني بعبد الاله.. جديده يشك فيني.. يطعن بشرفي.. ماطيقه..ماهو حتى شخص عادي وماحس بمشاعر تجاهه.. الا شخص اكرهه وابغضه.. عاد سايرتك وقلت بكره تزين وبكره يتغير.. بس عاد تعبت وانا ارتب اعذار برف مايل.. ياجده عبد الاله عوج.. وانتي اعرف الناس انه اهله زوجوه عشان يعقل.. ويكف رجله عن خرابيطه وسفراته ..

صبحا:وهذا هو قعد ولاعاد سافر .. من بعد ذاك الحادث الغبر اللي صار عليه بسفرته قبل يملك عليتس.. انتي عاد لاتصير رجلتس بالارض وراستس بالسما وتعلين عليه.. يا امك انسي الماضي والرجال تاب ويحبك.. ولا اهقى انه راجع بدروب الشينه ..

ضحكت بتهكم مرير :
والله لو بيده ياجده .. ماخلا خرابيطه..(ورفعت عيونها تناجي ربها) بس ياربي لك الحمد والشكر يالمنصف العادل.. اللي ضربت عبدالاله.. في الشي اللي يماري فيه بحرامك.. ويهايط فيه ومايخافك.. ياربي كانوا يدرون انه هاتك حدودك.. وخذوني طاهرة اخافك.. وحلت بيني وبينه بقدرتك يارب العالمين ..

الجده عقدت حجاجها : انتي وش تقصدين.. وش في بطنك يابنت غازي..؟!
زينه حطت عيونها بعيون جدتها وبجدية:
وش ظنك ياجده اني ماعرف بالحلال والحرام.. واني عارفه ان طلقات عبدالاله علي واقعه..انا قاعده لان الرجال مافيه يقرب مني .. ولافيه ياخذ حق الرجال من حرمته.. ياجده عبد الاله من صار عليه الحادث ذاك .. وهو جاته اصابة.. يعني لافيه من الرجوله علومها ولا سلومها .. وسلامتك ..

اشاحت وجدتها تحط يدينها فوق راسها من هول ماسمعت :وووي وووي.. الله اكبر.. الله عليك ياسند .. ماخذ بنتي لولدك المعطوب .. الله لايحلك ولايبيحك لا انت ولاولدك ..
واسترسلت وهي تتفطن بالفاجعة:
المقرووود شبيسوي بعمره ..
وصاحت بانهيار : زووين...!!!!!

*****

في المساء وبعد المغرب..
صحى هادي بصداع شديد ..جلس وسحب جواله والقى نظره ومالقى اي رسالة ولامكالمة من بلقيس..
من يوم المطار وهي حامقه عليه وشايله نفسها..
لقى مكالمة من نواف.. اتصل عليه.

نواف: وينك يارجل تعبت وانا اتصل عليك ..
هادي يفتح حبتين بنادول ويشربها مع ماء :
نمت.. هلكت ..ابوك قاعد يحط حرته بالشغل.. اليوم من صباح الله بموقع البني..شوي ويشيل طابوق مع العمال ويليص معهم ..
ضحك نواف :اف..وش فيه مجتهد بزيادة..
هادي : ترى ماهو مزح نواف.. عمي سعود محترق دمه على وضع البيت.. وكلكم ما انتوا حوله ..

نواف بتبرير : طيب هادي انت تدري.. اني مافلحت بشغلة امريكا .. وهنا لقيت اللي نبي واحسن من هناك .. بخلص شغلتي مع المكتب وبجي..
هادي دعك جبينه:والباقين يانواف.. ترى عمي ساكت وضاغط على اعصابه.. وروحة ام بيان قصمت ظهر البعير..
عقد حجاجه:هادي.. تبي تقنعني ماعندك خبر عنها.. ترى هالشي ماهو داخل راسي ابد..
هادي بكذب متقن:
لو ادري كان بلغت عمي.. ماراح اخليه كذا على نار..
تنهد نواف: وهالخبله.. من جدها حد يخلي عياله ولايسأل.
هادي ناظر ساعته:بقوم اصلي المغرب قبل يطلع الوقت.. وش فيك داق..
نواف : ارسل لي نموذج عقد عمل pdf.. كان عندي وضيعته..
هادي يقوم : تمام شوي وارسله .. سلم لي على الجميع..
نواف : يوصل..

توضى وصلى ..كان يلبس ثوبه لما سمع صوتها المبحوح وهي تلاسن بحده..
خذ جواله واشياءه وقبل ينزل السلم سمع صوت انفال الطفولي بغضب: والله لو قلت لك ادفعي لي ريال هذيك الساعه اعترضي ..

عايلة هادي 'امه.. هو الكبير.. بعده النور متزوجة وعندها ثلاث عيال.. وبعدها ضحى ايضاً متزوجة وعمرها عشرين سنه..
والجعدة(انفال اصغر خواته بسادس).. كبرت على يده بعد وفاة ابوه..
سمع النور تهاوشها: منك لله.. تدرين ان هادي ماراح يردك وتستقلينه..

ضحى: انفال.. استحي على وجهك .. ماراح تلبسين كل هالشوزات اللي اخترتيها.. الثنتين نايك متشابهات.. شيلي وحده وخلي وحده..
النور بنفعال:ماهو بس النايك ياضحى.. انتي شايفه حاطه بالسله اربع..اديداس لحالها بست مية.. غير الترنغات.. عنبوك الفين وست مية بطلبية نمشي.. وش هالزود ..
انفال بلسانة : النور.. ادحري ابليس عاد.. هذا انتي ماتشرين لعيالك الا كل شي زين ماحد جاء قالك شي.. لاتدخلين ولو جيت طلبتك شي.. اضربيني بحذيانك على راسي..
النور بغضب :
ياحيوانة لما هادي مايرد لك طلب .. المفروض تقدرين ذا الشي ماتزيدينها.. ياخي فكروا فيه.. متى بيجمع له شي.. متى يكون له كم قرش ويعرس.. ويشوف هو حياته..

انفال تمد الأيباد لضحى وتتجاهل النور:وش احط هنا.. ابيه الدفع عند الإستلام..
النور: ضحى لاتطاوعينها.. وين امي.. ماحد يعرف لك الا هي..
وصاحت تناديها..
الا هادي نازل الدرج :تصلي بالصالة الفوقيه.. لاتشغلينها.. وش فيك..؟!
النور تسلم عليه خد..
بعدها ضحى سلمت عليه وحبت راسه : شلونك ياخيي..
هادي : زين.. الحمدلله.. اخبارك مع التعب..
ابتسمت وهي تمسح على بطنها:الحمدلله زينه.. يسلم عليك محمد..
قرص خدها :الله يسلمك ويسلمه..
ضحى نحيله بقصه بوي وملامح دقيقه شكلها كنها طفله حامل.. بفستان كيوت..
التفت لانفال وكانت ماتقل كياته عنها بس بشكل اصغر :وش فيكم على غنايم اخوها.. ازعجن حسها واصل لفوق..
تكتفت واسكتت..
والنور بمحاولة انها تحل المشكلة بدون مايتدخل وتزيد الضغط عليه:
ماعليك.. هوشة خوات وتنحل.. تعال خذ لك من هالحنيني تو امي مسويته وتقهوى..
هادي سمع الحوار وعارف المشكلة.. وماوده يكسر كلمة النور لانها الكبيرة .. ولا وده يكسر خاطر هاليتيمة.. اللي امانيها ومباغيها فرض بالنسبه له ..
خذ فنجال القهوة من يد النور : وين عيالك..؟!

النور وهي تتبادل نظرات مع انفال:راحو مع ابوهم لجدتهم.. بيجيبهم بعد شوي..
وكملت حوار العيون و الحواجب مع انفال اللي صاحت بنفاذ صبر : الا.. باخذهم كلهم..
النور : تخسين..
هادي حط الفنجال : وش اللي بتاخذين يا انفال..
انفال بصوت دفاعي :
هالحين انا قلت لك بطلب من نمشي.. وانت وش قلت..؟!
هادي : قلت طلبي اللي تبين ..
انفال: سمعتي.. قال طلبي اللي تبين.. ماقال بكم اطلب .. يعني لو اطلب بعشر آلاف.. انا واخوي ننجاز..

هادي ضحك : خليها وش فيك عليها..
النور محترق دمها: هادي خف من دلعك لها.. ياخي البنت بنت حمد جافل.. والعيشه بنت عبد اللطيف جميل.. اربع شوزات بطلبية وحده وكلها نايك واديداس.. ليش؟! مشاركة بالمارثون وبيدك البيرق.. اقصاها بتصورين فيها بسناب يا افنان الباتل..

ضحى :لا جد تماديتي ياقشر الشمسي..
هادي مد يده لها:جيبي ايبادك اشوف وش طالبه؟!
جات قدامه وعطته الأيباد .. وظلت واقفه في وجهه..يد على خصرها وعيونها معه في الشاشة..
هادي :هذول مره كنهم نفس بعض..
انفال:هذي زيجها فسفوري اخضر.. وهذي كحلي..
هادي: اختاري وحده..
اشرت :خلاص هذي..
هادي :وهذي ليه..؟!
قالت: هذا مق موضه.. شوف الكرستال عليه.. محلاه..
الغاها :نفول.. المطبخ مليان..
تضايقت :بس ماعندي هاللون..
هادي: ماهو لازم..

دخل رقم بطاقته وارسل طلبيتها: خلاص دفعتها.. لاجات بس استلميها..
راحت عانقته وقبلت خده : اموووت فييييك ياهادي.. رح جعلك تصير مليونير..
النور: والله كلفت يوم شلت بس شوز وبراد..
خذ فنجاله ومده لها :
زيديها بردت..
ضحى شردت فيه..
وتدعي بقلب مبتهل له..
وهو اللي يفني عمره عشانهم.

*****

فارس بالصاله واناره خافته يتابع فلم.. وسيف على الأرض منشغل بمكعبات شاريها سيف له ..
وكل شوي يجي لفارس يبي يعدل له شي.. وهو يركبها وعينه في الشاشة ..
سيف يهاوشه: فالس حطا حملا هنا.. بيضه هنا.. اتخرب العابي..
فارس بضجر يعتدل ويوقف الفلم ويركبهم لسيف :
وش بلاك اشغلته امي.. المفروض انت تركبها.. يعني حتى اللعب العب عنك سيف..

سيف يناظر شعر فارس بانبهار:فالس ابي زيك..
بستغراب:وش اللي زيي..
اشر على راسه:سعرك.. (شعرك)..

فارس وهو منسجم بالفلم..يده فيها مطاط ربط شعره.. ضحك:
وانت ابد مطبق معي حتى لو ادخل جحر ضب دخلته وراي ..
سيف يترجاه:سو لي فالس.. ألجووووك..
ضحك وهو يطلع مطاطه ثانيه بيده.. ويجمع شعر سيف اللي وقف بهدوء وربطه..
وراح يمهله ويضبطه..
جات مهره وهي شايله صحن ضحكت:
شمسوين بعمركم ..
فارس ينهي التسريحة لسيف ويلفه لمهره:
يخسي مالوما عنده..
سيف :سرايس ماما..
مهره:حلو.. تعال اشرب حليب شوكلت..
عطته وعطت فارس كوفي.. وقربت صحن كيك منهم..

فارس :وين ابوي مختفي من جاء من العمل..
مهره: في مكتبه.. بروح اشوفه.. تكفى فارس انتبه لسيف لايدلق الحليب على الكنب..
فارس: تمام.
عادت المطبخ ..

سيف في مكتبه..
يريح راسه على للوراء .. يفكر ويحاول يربط الاحداث..
مهره كيف تقول ابوها كان من مهربين الاثار .. وش الصدفه أن عساف يوصل له.. استحالة صدفة..!
واستحالة أحد يعرفه عساف من ديرة مهره وشاير عليه..
مثل ماقالت مهره قبل..

الموضوع مو هنا..
اليوم سيف رايح لراجح في البيت ..عندهم نقاش في مزاد بيفتح..
دخل بمكتبه في البيت.. ومو اول مره..
بس اول مره يلفت انتباهه البرواز القديم على المكتب.. صورة تجمع راجح بشخص شافه من خلال صور مهره..
ممكن شبه..
ممكن ..
وش يجيب صورة غازي عند راجح..!
بس معقول اذا اجتمعوا في نقطة تهريب الاثار..
معقول راجح يكون سبب مقتل غازي..
مستحيل..
لا مستحيل..
تاريخ راجح.. مافيه قتل ابد.. يلحق الماده.. وطايح بتهريب الاثار.. بس ماهو قاتل..!

غرس اصابعه براسه وزفر.. وبعدين اللي بيقتل احد بيرز صورته بمكتبه..
و يمكن مو هو.. يمكن يشابهه..
اعوذ بالله منك ياراجح..
الله يشهد مابي اضرك..
والله يستر ماتغرق نفسك اكثر ..

تنبه لمهره وهي تطق الباب..
افاق من شروده على ابتسامتها العذبه واسلوب دلعها الخاص :
اللي ماخوذ عقلك..
ابتسم وهو يعتدل : من غيرك ماخوذ كلي..
راحت له وحطت صحن الكيك والقهوة على المكتب..
وحطت يديها حول سيف وانحنت وارفعت حاجب:والله اشوف غيري.. يلعب رايح جاي بعقلك..
سيف ببتسامة جانبية متسند ورافع حاجب :
لاتشكين بغلاك وانتي اعرف الناس فيه..
باست خده وهي تبعد : واضح ماتبي تعلمني..
مسك ذراعها وسحبها.. جلسها في حضنه:وين..؟!

مهره :بنزل عند فارس وسيف.. واخليك تعوفر مع مخك الشاطح عنا اليوم..
سيف :صدقيني محتاس في الشغل، قولي لي كلمتك زينه اليوم، قالت لك وش سوت..
مهره :اسكت مصدومه انا.. كيف يرمي عليها اليمين كذا.. وظاله معه...
سيف :هي زين تكلمت اخيراً،كلمني المحامي.. مسألتها خالصه.. شرعاً طالعه من ذمته.. باقي يخلصون اوراقها بالمحكمة.
مهره:واذا رجع عبد الاله من السفر ..كيف الوضع..
سيف :هو مايقدر ينكر الطلاق واقع.. بيحل الموضوع بإكمال الاجراءات.. ويمكن يضغط على زينه بالرجوع بعقد جديد..
مهره بقلق: ومستحيل ترجع له صح..؟!

ابتسم وهو يداعب شعرها:ماعليك بنكون رجعنا وانا اللي بوقف بوجهه.. حاليا ً المحامي نايف كفو وبيحل المسئلة بطلاق نهائي.. ويكون الحكم.. مايقدر يرجعها الا بمحلل..
توسعت عيون مهره: من جد..
سيف :ايه.. تفكرين الدين والاحكام لعبه.. على كيف امه طالع نازل فيها طلاق.. فوضى..
مهره ببتسامة واسعة:
ورب الكعبة انك خطير.. ياشيخ زوين ساكته وصاخه.. كيف سحبت منها هالحقايق..
سيف ضحك وارتشف من القهوة:
ماخلقنا الا لحل العقد يابعد حيي..
بصدمه :ياويلي.. بيعلي خشمه علينا الحين..
بنص عيون:لايكون عندك اعتراض لاسمح الله..
حوطت رقبته وهمست وهي قريبه:
لا ماعترض.. هو استرجي وانت اللي حليت عقد وشفرات فيني كانت مستحيله..
سيف بهمس وابتسام :
مالشدايد الا اهلها.. واحنا اهلها يابنت غازي..!

‏لا هوى قبلك .. ولا أمل بعدك
لا سما إلا عيونك ..
ولا ثرى إلا في وعدك
انتي كل الناس وحدك

من ملك ضحكة عيونك
وابتسام الفجر فيها
ما بقى في الدنيا ناس

ولا بقى أرضٍ يبيها
إنتي يا عمري الليالي
كلها قربك وبعدك.

*****
ضحى تلبس عبايتها،انفال محتاسة وودها تقول شي،
ضحى:وش فيك .. قولي قبل امشي..
انفال :الحين انا صدق ضاغطه على هادي.. النور تقعد ترمي علي كلام مثل السم .. اني انانية ومدري ايش..ضحى احنا مب فقارا..

ضحى تحط جوالها بالشنطة :نفول انا معك ان راتب هادي كويس، وراتب ابوي الله يرحمه، بس انتي تدرين ان هادي دفع دم قلبه بهالفيلا .. وراح يظل يدفع اقساطها سنين قدام،عشان مين ..؟.. عشانا وعشانك وعشان امي.. طيب لما هو يقصون من راتبه ذاك المبلغ للبيت.. ويجي يدفع لك في طلبياتك هالكثر.. هو متى يجمع له شي لنفسه.. يعني انتي ماتتمنين هادي يتزوج وينبسط..
انفال بندم : الا..
ضحى : تراه اكبر مني بثنعش سنه.. وانا شوفيني عرست وببطني بيبي.. والنور اصغر منه وعيلت..وانتي بيجي اليوم اللي تكبرين وتتزوجين.. قد طار العمر بهادي..
انفال بانفعال:
لاتقعدين توجعين قلبي.. انا مستحيل اتزوج واخلي هادي..وان شاء الله يتزوج
وبرقص بعرسه.. رجلتس ورجل النور ماهم احسن منه يعرسون وهو يقعد ..
ضحى تربط نقابها:ياطول لسانك..
انفال بكبرياء ودقره : هالحين شلون يلغون الطلبيات بنمشي ..؟

ضحكت ضحى على انفال.. مع قشارتها الا انها على طول تندقر خاصه لكان الشي يمس هادي:ماعرف والله وهادي دفعها بالفيزا.. خلاص عافيه نفول.. بس خفي بالأيام الجاية ..
قامت وبعصبية :
يوووه.. الحين نبي نصلح هالخطأ كيف ..
ضحى بضحك : كثري استغفار ..
شالت فازا :روحي انقلعي لرجلك.. لا افتح راسك بهذي..

ضحى طلعت وهي تضحك..
وانفال بصرخه هزت البيت : يمااااه..
وراحت تكرر النداءات..وافتحت باب الغرفة على امها.. اللي هتفت:
وش فيك.. شصاير..
انفال: هالحين ابي الفين.. من ورثي كيف اسحبها..
امها بستغراب:وش تبين فيها؟!
انفال:ابيها شي خاص.. لوسمحتي يمه.. ذا ورثي لاتناشبوني فيه.. وش تبين فيه.. وش بتسوين فيه.. والله يمكن بتبرع.. ببني مسجد بنقلادش.. والدين يقول شمالي المفروض ماتدري يميني وش عطت.. اخلصي وعطيني قريشاتي..

امها:الله والورث اللي بتبنين فيه مسجد.. روحي فرشي اسنانك.. ونامي دام مشوا خواتك.. ماني بفاضيه لك..
انفال:يمه..!  انا اكلمك ابي الفين.. وانتي تقولين نامي.. والله لاشتكيكم.. عند الأمير محمد بن سلمان واقول مايعطوني حقوقي..

امها:وش تبين بالألفين؟!. فلوسك بالبنك والبطاقة مع هادي..
اغلقت الباب وقربت من امها :يمه.. انتي شفتي هوشتي اليوم مع النور.. عشان الطلبية.. انا ذا الحين متحسفه.. وابي اساعد هادي بقيمتها.. ودي الغيها وماعرف كيف ..
ابتسمت وداعبت شعرها واجلستها جنبها:
تبين الصدق ولا ولد عمه؟!
انفال بخفوت: ابي الصدق اكيد..
امها:اخطيتي بأسلوبك مع اختك.. وغلط ان كل ماطرى في راسك شي تاخذينه.. دام اخوك فاتح يده لك ولايقصر.. المفروض تقدرين هالشي ولا تزيدينها..

نفخت انفال:يمه ترى ببكي جد.. خلاص ماعاد ابي هالطلبية .. ولاعدت متحمسه لها.. وعطيني فلوس لا ابيع بكره سوارتي واعطي هادي فلوسها..
ضحكت ام هادي : الله اكبر.. خلاص امي ماله داعي عافيه هالطلبية .. وخلاص دام دفعها اخوك..هو توه مستلم.. لو ماعنده ماخلاك تاخذينها كلها.. لاتحسفين وروحي نامي..
انفال تتنهد وتزفر والتفتت :طيب يمه عطيني خمس مية.. واخصميها من مصاريف العيد..

وبعد نقاش مع امها.. عطتها خمس مية وراحت انفال غرفتها.. سحبت حصالة.. جمعت اللي فيها لقتهم ست مية وعشرين .. رتبتهم وقد كانوا من عدة فئات.. وحطتهم بظرف واكتبت فوقه :
انا اسفه ياعين اختك.. اصير انانيه مع الكل الا معك.. حبيبتك نفول..

وطلعت فتحت جناح هادي بخفوت.. كان نايم.. هو عنده دوام والطلاب إجازة..
مشت بخفوت..
حطت الظرف جنب جواله.. وقفت تناظره وهو متعمق في النوم..
ضمت قبضاتها كنها تطالع ارنب ولا قطو وبانهيار صامت : كيووووووووتتتتتتت...
وراحت باست خده وطلعت.. بصمت مبالغ كنها حرامي واغلقت الباب بهدوء..

*****

في صباح منعش..
سلمى سمعت ضحكات شاهين بحديقة البيت مع بناته..
طلت من النافذه.. ابتسمت وهي تشوفه جالس على الارض وديم فوق كتوفه..
ويشقلبها ع الارض وهي تضحك..
وبيان تجي تنط وترميه على ظهره وتطيح فوقه انها هزمته..
وديم تساعدها..
وضحكاتهم تتعالى..
'هل ولد البعد الجفا ياشاهين.. هل غفى عملاق الشوق في صدرك.. هل انطفئت نار الهوى وتبلد احساسك.. '

طلعت لهم وبصوت عالي :
وش ذا الصبح الزين يا امك.. عسى هالضحكة ماتنطفي.
شاهين ببتسامة:ولا ينطفي حسك يمه.
وقف ديم على رجولها: قوموا سلموا على جده..
ركضوا ناحيتها.. وضمتهم وبوستهم..
وشاهين جالس على الأرض..

شرد فيهم وامه تقول لهم :دخلوا قولوا لشملا تطلع الفطور بره.. الجو زين..
ركضوا للداخل..
سلمى وهي تجلس على كرسي قريب :
الله يجبرك ياعين امك.. زين قدرت تطلع من اللي انت فيه..
قام وهو يضرب ثيابه عن الغبار وباللهجة غريبة :
يقول البدر يايمه
من تعنى لوصلك لاترده كسير
ومن تباهى بهجرك أتركه للعنا
بيان وديم بحاجتي، وغيرهم ماعاد يهمني.

ناظرته بشبح ابتسامة وفي خاطرها :
تكذب على مين ياولدي.. ماقول الا الله يجبر كسرك ويبرد قلبك..

في بقعة بعيدة، في حديقة راشيل..
تقف امام لوحة..
بجانبها طاولة مليئة بالالوان والفرش.. زجاجه مليئة حلويات ملونه..
صحن صغير بسكويت.. وزجاجة مربى وكوب شاي سبحت وسطه نحله.. جعلت جمان تترك افطارها.. وتكتفي بالرسم على جوع.

سمعت ركض جاي ناحية البيت.. التفتت ببتسامة لطفلتين  يعبرون السور.. وينادونها :جيجي سنيوا.. بونجورنو..
ردت عليهم بإيطالية تتقنها.. بحكم دراستها سنين فيها ..
جمان تتبادل معهم الحديث وهم يتكلموا بحماس.. تعودت على البنتين وتعودوا عليها يشبهون بناتها في العمر بس..
البنتين شقروات بعيون زرقاء.. وبشره بيضاء بخدود حمراء..
وحده منهم.. حضنت جمان وحطت اذنها.. على بطنها :الم يتحرك اليوم جيجي..
جمان تداعب شعرها:انه كسول.. قليل الحركه.. تعالي ليندا.. قد يتحرك اذا عانقتيه..
قربت الصغيرة بخجل..
ضمت بطن جمان وابتسمت :هناك شيء ينبض..

راحت تداعبهم ويضحكون معها.. بعدها افتحت زجاجة الحلوى.. اخذوا وشكروها ببوسات وودعتهم..

جلست على الكرسي ومسكت بطنها.. كانوا بيان وديم بيتجننون على التطورات هذي.

'ماهذا الصد ياجمان.. ماهذه القسوة التي استوطنتني.. كيف امسك زمام جفائي.. كيف اسامحك ياشاهين.. كيف افقد ذاكرة ضممت فيها امرأه غيري.. كيف اقطع مشهد بات محفور كخندق في عيني '

*****

كان ينشف وجهه لما رن جواله..
رد وحط الجوال بذنه وعيونه تتعلق على الظرف ويشيله:
هلا عمي..صبحك الله بالنور..
سعود :صبحك الله بالرضا والسرور يبه.. ها خف راسك..

هادي وهو يفتح الظرف ويشوف الفلوس فيه:
ايه وهذا بجيك.. مسافة الطريق بس..
سعود: يابن الحلال انا داق اطمن عليك.. انت من ارسلت هالرساله انك تعبان وبتتأخروانا والله احاتيك.. اقعد ارتاح لاتجي ولاتمر..
ابتسم :يخليك لنا.. مافيني الا العافية .. شوية صداع وزال.. جايك ماخليك..
سعود :على هواك ياولد حمد.. بس الله يرضا عليك لو تعبان لاتجي.. والشغل حق اليوم خالص.. ماعندنا شي مهم..
ضحك هادي ويداعبه:وش عندك ماتبين اجي.. لايكون بوه بربسه بالمكتب...
سعود : افا ياذا العلم .. اقول تعال خل امصع اذانيك يالهيس..
ضحك :جايك جايك.. فمان الله..
هادي :فمان الكريم..
حط الجوال وطلع الفلوس لقاها تضم حتى فئات العشره والخمسه والخمسين.. و٥٠٠ قطعه..
لبس ثيابه.. وحط عقاله على راسه والشماغ على كتفه وبخ له عطر وشال ظرف انفال وطلع ..
فتح غرفتها وماشافها..

نزل.. لقاها قدام الشاشة تتصفح نتفلكس باندماج.. والطاولة مليانه شبسات وتغميسة زبادي وكولا..

قال :فطرتي.. ولاتاكلين خرابيطك على معدة فاضية ..
رفعت عيونها له:الا كلت مع امي.. وشربت حليب بعد..
قرب منها ورمى الظرف ع الطاولة :
خذي فلوسك ورجعيها بحصالتك.. ترى الخير واجد.. وانسي كلام النور وضحى..
قامت بانفعال:
هادي بليز لاتوترني وتخلي ضميري يجلدني بذا العطله.. اتعوذ من الشيطان وخذ الفلوس.. وبجمع من جديد..
تجاهلها وهو يلبس شماغه وعقاله..
انفال بانفعال: هادي.. رجاءً خلني اعتمد على نفسي واكون معتصمه.. لاتخربني بهالاسلوب وتخرب اعتصامي.. بليز..
نسف شماغه:بتكونين وش.. مافهمت..

زفرت:بصير معتصمه.. انت تدري ان راعي محلات باجه حق الحب المصري والقهوة.. كان يبيع فبسطه.. والحين شف محلاتوه ماليات السعودية كلها.. والله لاصير معتصمه زيه.. واروح ادفع طلبيات النور وضحى وحتى انت ازوجك على حسابي ياعزوبي السالمية.

هادي ببرود: عصامية..ع صا مية .. انطقيها بالأول عدل ثم يصير خير.. روحي سوي لي اسبريسو قبل امشي..

توسعت عيونها بسعادة وبانهيار : OMG... تبي اسوي لك بيضه بعد..
هادي :لا قهوة بس.. يلا افلحي.. تأخرت على عمي سعود..
انفال بخرفنة:اصير لك اسبريسو.. وكابتشينو.. اصير لك ستار بوكس يا قلبي انت..
راحت وابتسم.. 'كيف تكون الحياه بدون خبال انفال وفوضويتها'..

دخلت على امها المطبخ.. وراحت عند آلة القهوه.. ركبت المرشح وفجأة صرخت :
انتي وش متوحمه فيه يومك حامل بهادي.. قولي لي وش.. توحمتي فييييه...؟!!!!!!!

نقزت امها وهي ترتب الثلاجة..
وانفال تكمل بانفعال: متأكدة باسكن.. باسكن.. والله يمه والله.. لو تموتين ماجبتي.. حلو زي هادي ثاني..
ام هادي :يابنت اللذين.. انتي حالفة تجلطيني.. متى دخلتي المطبخ..
انفال تختار احلى واحسن كوب من درج الأكواب :
القمر طالب مني اسبريسو.. في كوب هارودز شاريته انا خصيصاً لهادي.. لاتقولين كسرته شغالتك يمه ..

امها تجيبه من الفترينا:لا هذا هو.. خلي اخوك ينتظر بجيب له فطور..
انفال تنفخ الرغوة بالاله : هو يقول تأخر على عمي سعودوبيمشي.. بس يبي قهوة.
نادت امه: ياهادي.. لاتعدي الا فاطر..
هادي بصوت مرادف:قهوه كفاية.. بفطر بالمكتب..
نادت : قلت لك.. الفطور جاهز.. اقعد مكانك..
مرت انفال بالقهوة.. مضبطه الصحن وحاطه صبعين كندر وهي ماتسخى لحد شي من اغراضها..

جات الصالة وهادي يسقي الزرايع الداخلية.. بعلب مويه مفتحه بالصالة ..
حطت القهوة على الطاولة:
يعني حلو ..وكريم.. وحنون.. ومهتم بالزرع والبيئة .. انت المفروض يسونك سفير لكل شي زين..
ضحك: بالله..!.. ليت الكل يشوفني بعيونك ياغنايم اخوك..
انفال: تعال اشرب قهوتك قبل مايروح القلب سويته لك بالرغوه..
ضحك وهو يشوف القلب الممسوح فوق سطح الاسبريسو :والله اتعبتي البارستات من بعدك يانفول..
جلس وبيده الكوب..
افتحت الكاميرا :نزله اشوي.. ايوه كذا خل يدك هنا.. طالع النافذة..ايوووه بس..
هادي :لاطلعين وجهي بسنابك..
صورت وتوريه :بس دقنك.. شرايك..
شرب قهوته:زوينه.. ولو اني ماحب هالحركات..
هي تضبط الصورة وتحط عليها كلام :عاد انا احب هالحركات..
سرقت لها بيت..

"‏اخوي اتنومس فيه واجاهر في غلاه
‏هو عضيدي في الليالي وسندي"

وحطتها بالستوري..

بعد شوي.. فتحتها بلقيس وحدقت فيها بشرود..
'مُنهك الحُب المقطوع فيه الأمل.. وخاصه لو كان ذاك الامل يقطعه طرف يائس.. متشبث بفرضيات واعتقادات.
هادي بارع في تكفين حبنا..وتشيعه جنائز لواقع هو صوره واقتنع به..
آاااه منك ياهادي.. كيف اتجاوزك.. وحبك اميال وقارات لا استطيع قطعها..
انت لست ذكريات وصور احرقها وتنتهي..
انت شي لو احرقته..احترقت كلي معه ..'

*****

بعد ايام..
راجح ينظر بذهول لمقطع قدروا يوصلون له بطريقة ما..
سيف وهو يقوم بعملية الفحص عن اللوحة في باريس..
قبض راسه وهو يعيد المقطع..
هو من سيف اللي عرف ان هو يخرب شغله.. ولا ان سيف عرف عنه النقطه السوداء هذي..
كان مايبي احد من قروبه النظيف يدري عنها..
خاف يدري منصور عن سيف ويحاول يصفيه..
تمتم وهو يفيق من ذهوله :هاشم.. المعلومات هذي في احد وصلها غيرنا..
هاشم (عراقي) :والله ياعم بومشاري لهسا.. احنا أول ناس اوصلنا للمعلومات..بس ألعلمك.. هاذ سيف عنده حصانة من الانتربول.. في شغله بالأوروبا.. باوع ليش ماستخدم حصانته بالشُغله هذي.. يعني حسب توقعاتي.. سيف مايريد اذيتك.. يعني حط هالشي قودام عيونك قبل گول شي.. تريد تساويه..
راجح: منصور لايوصله علم.. سو كل شي ياهاشم.. وادفن هالمعلومات.. انا اتفاهم مع سيف.. بس خل منصور ورجاله بعيد..
هاشم :تومر امر ..
وراح مد اوراق له : فدوى عمي اطلع على هاي الاوراق.. مو تنساها..
راجح:خلاص خلها ياهاشم.. وخلني لحالي..

طلع وراجح.. حس بصداع قوي.. رغم انه داخل بهالمجال وشغوف فيه.. بس مستحيل يبيع العشره.. ومستحيل يتسبب بقتل احد.. كيف سيف..
منصور داهيه وآفه.. هو الراس الكبير.. وهو اللي يدير كل شي من فوق مع اجانب ومافيات..
زفر بتوتر ويفكر كيف يواجه الموقف..!

*****

هادي راجع من صلاة الفجر.. صعد غرفته.. جواله موجود ماخذه معه ..
لقاه يضوي ويهتز وهو في الشاحن خذه وابتسم لما لقاها بلقيس.. وهي منقطعه عنه فتره..
رد : مرحبا..
تبكي ومنهارة :
هادي تعال تكفى.. امي كانت تصلي بالصالة.. وجيتها على السجاده ماتتحرك.. مادري وش فيها.. هادي.. شالها ابوي مع الاسعاف.. وراحوا.. هادي امي يمكن ما..
قاطعها بعصبية:اهدي بلقيس.. لاتفاولين عليها .. اهدي ..

بلقيس ببكاء:والله ماسامح جمان واخواني.. والله ماسامحهم.. لو صار في امي شي..
هادي طلع وهو يكلمها :تعوذي من الشيطان.. اشربي موية واهدي..
بكت:هادي قطعوا قلب امي عليهم.. كل واحد لاهي.. وهي بس جالسه تبكي وتحاتي.. الله لايحلهم لاصار فيها شي.. وجمان الحيوانة بتأدب رجلها وهي ضربت بالكل عرض جدار.. امي هادي امي.. وجهها ماكان فيه لون.. تكفى تعال.. ابوي لحاله مامعه احد لايصير فيه شي..
كان يسوق ويتمتم:
انا قريب.. خلك بره.. لاتطلعين الشارع.. لمن اوصل..

"‏صوتك حضن لمّة أهل وبيوت طين يارب صوتك والحياة الي معه "

*****