رواية مبعثر فيك ماللحزن لايشفى الفصل الحادي والعشرون 21 - بقلم ايمان يوسف🕊️

البارت الحادي والعشرين

قبل صلاة الظهر.. في حديقة البيت والاجواء حلوة بعد مطر البارح..
طلعت مهره..
وكانوا بالجلسات الخارجية..الجدات مزنه وصبحا.. وموضي وزينه تقهويهم.. مهره بنشوى:
يالبيييييه شهالجو..شكلها ممطره..
زينه وهي تضحك وتبوسها:
الدنيا اغرقت البارح..ماخليتي لحد نوم يالشينه..
مهره: فاتني ورى ماصحيتوني..

سلمت على الباقين..
موضي:نوم العوافي امي.. نامي وريحي راسك..
صبحا:مهير وطير.. ورى نايمه ولاقابلتي رجالك في قومته.. وش هالعلوم الشينه يابنت غازي..
مهره تاخذ صحن مطلعته معها يحوي جبن مالح وطماط:
مدري فيني نوم ماهو طبيعي.. راسي ثقيل.. اقوم وارجع ارقد..
موضي بحماس:يمكنك حامل يابنتي.. كيف الدورة.. متأخره عليك..؟
مهره فهت والصحن فوق كفها  ارتجفت:
وش حامل يمه.. بسم الله شهالطاري..
زينه بوناسه:يمكن ياقليبي.. شفيك مصدومه..
صبحا:المفروض تعرفين.. يوم حملتي حبة الزرار.. وش صار معتس..
ارتجف قلبها.. هي ماجربت الحمل ابد.. ولاتدري وش يصير.. بس المتعارف 'غثيان' ومافيها.. وتأخر الدورة.. هي عادي كذا.. مو منتظمه عندها..
كلت جبنه بالشوكة: لاماتوقع.. نوم بس ونعاس.. وعادي النوم يتلخبط عندي مو شي جديد..
مزنه:وراتس انخرشتي.. وانتي ماتبين الحمال..؟!

مهره :ماهو قصدي ياجده.. بس تونا وش حماله ..
مزنه وبدون قيود:وش توكم يابنيتي.. يقولون الأولين دامها تحت الفحول ماتحول.. وان شاء الله انه.. ..
شرقت مهره وموضي تضحك وتعطيها ماء :
يمه شفيك.. الله يهديك وش هالكلام..
صبحا:وهي صادقه ام فهد.. روحي سوي لك تحليل.. والله يرزقكم الخلف الصالح..

مهره تحط الكاس :مابي اسوي تحليل.. مافيني شي.. خلاص انسو.. من بكره بقوم من الفجر.. حشى طولت في النوم شوي سوتوني حامل.. بكرة بصحى وبيدي ورع ..
ضحكت زينه:وش فيك قمطتي ياملي.. والله حتى لونتس بكريه.. يالجبانه المفروض تفرحين..

مهره تاكل بصمت.. ليش كانت مستبعده الفكره..ممكن تكون حامل ليش لا..!
تلخبطت مشاعرها..
'طفل لي ينمو في احشائي.. ابوه سيف..
ياربي '
حاولت تنفض الفكره.. 'مستحيل اكون حامل بس لاني اطول في النوم..
ولا ابي احلل..
جد مابي لاتأكد ولا انفي هالشي'

*****

انفال تكلم هادي جوال وهو بالعمل :
والله والله ألف ورق عنب.. اجل انا غايبه وش هولا.. لاني سمعتك تقول مشتهيه.. والحيوانة ضحى مسويه التعبانة .. وماتقدر تلف..
هادي :تستهبلين.. والترجيع الصبح.. والمغص..
انفال ماسكه الجوال بكتفها:تمثيل.. دخلت اصبعي بحلقي ورجعت.. بس تكفى هادي لاتقول لامي.. والله.. عشانگ
هادي :تصدقين.. مابيه.. سديتي نفسي.. يالشيطانة الكذابة..
شهقت:هادي.. هذا حقي مابي اخليه بخاطرك.. يالجميل انت يالسكر..
هادي:والله انتي تبين تشبكين الخميس بالويكند.. ولا انا ماجيت في بالك..
انفال:ورب الكعبة.. وعيوني اللي بتاكلها الدود.. انا غايبه عشانك..
هادي :تمام.. اجل بكره ماتروحين عزيمة عمي سعود في المزرعة .. وقضيها لف ورق عنب..
طاح الجوال من اذنها وشالته بفجيعة وعجته بالحشوه:
ماتسويها فيني يالشيخ ياولد الشيخ.. ياللي جدك شيخ واختك نفول شيخه..!
هادي:روحي روحي حشي.. مانب فاضي لك.. يالكذابة ..
قفل بوجهها.. ..
انفال شهقت وتطالع الجوال:يعنننننني انا شضاااااااابه..!!!!!!!!!!.. هادي يقوول  ان اناااا شضااااابه...!!!!

*****
دخل سيف جاي من بره وهم في الحديقة.. زينه تغشت.. ومهره تناديه:تعال.. تعال سيف.. انت اللي تقدر تتفاهم مع صبحا..
قرب وسلم :علامك ياجده..
صبحا:ابد اقول الديار طلبت اهلها.. وهم يقولون اقعدوا لعشاء بكره..
سيف:مالك لوا  بس ماتروحين الا حاضره ..
موضي:وراه عنيده يا ام غازي..نبيك معنا.. ونعرفك على جماعتنا..
سيف:وش عندك عاد ببيتك.. بتتوقف اعمالك.. اقعدي بس الله يجزاك خير..
صبحا:ياولدي.. من قام عن خبزته احترقت.. لازم اشوف مكاني والمزرعة من اتركها له..
سيف باقناع:ايوب هناك.. وماشاء الله عليه فاهم وعارف..
صبحا.. عنيده واعجزوا يقنعونها.. 
مهره بإلحاح:اجل زوين تظل..
الجده برفض:زوين تركب قبلي بالسيارة .. ان خليتها.. متى ترجع.. ومن يرجعها.. ماخليها تمسك درب مع ايوب لحاله..
سيف :انا ومهره نرجعها وخلاص عاد.. لاتزيدين الرفض ياجده.. ترى انا ماطلبك ..لاترديني..

زينه انحرجت..
موضي:ايه يا ام غازي.. دامك ماانتي ظاله.. تحضر زينه.. وانا والله ودي اهل مهره كلهم يحضرون..بس انتي ميبستن  راسك ومستعجله..
زينه لكزت مهره بكوعها وبخفوت:بمشي.. وش يقعدني بدون جديده خبله انتي..
مهره بهمس: اقعدي وبنفلها..

(ورضت الجده.. وهي متردده وماودها)..

******

"جمان"

*معقول اليوم كيف اجتاحني الحنين.. حتى ظل كبريائي.. طريقه..!
كدت اموت حين حاولت تشغيل مقاطع لشاهين وبناتي..
وابى الهاتف..
خرجت وكأن لديا طفل يختنق واريد انقاذه..وها أنا اقف بتوتر وانفعال..
وخبير الكترونيات يتفحص الهاتف..!
يجب ان ينجو.. فبتلك المقاطع والصور اصبر نفسي واعزيها..!.
ظللت ادعو الا يُحذف مشهد شاهين وهو يغني عراقي من اجلي..
ولاصورته وهو نائم ببدلة الطيران..
ولا وهو يضحك.. وبيان وديم يلعبون معه ويرتمون فوقه..
دعيت الا افقد مقطع بناتي وهم يغنون لي اغنية في عيد الأم.. حفظتها اياهم بلقيس..
خفق قلبي بقوه.. صوتيات لشاهين ..يرسلها حتى في ايام الزعل (أحبك والله العظيم)... صرخته العابثه(جمااااان ياروحي).. (بالجنوبي.. احبش واموت فيش)..
احتقنت عيونها دموع.. وهي تعض سبابتها وتستفسر.. اذا بيضبط..
ابتسم:نعم .. اجريت له بعض التحديثات.. اذا كنتي قلقه هكذا.. عليك بالإحتفاظ بكل مايخصك بذاكرة خارجية..
تنهدت وتنفست الصعداء :سأشتري ذاكره..
طلع وحده..
خذتها وكل مافيها يرجف.. يالله كيف الجوال اليوم شكل لها حياة.. وكأنه شخص يحتضر..!

(‏بدُونك مانيّ بخِير اكابر وبقِلبيُ الفِ غصّه.)

*****

گان طالع من الدوام بطريق رجعته للبيت.. ولانها تعرف وقت طلعته اتصلت.. رد .. بلقيس بضحك متواصل:هادي وش فيك مع انفال..
هادي:ليه.. مكلمتك..؟
بلقيس منهاره ضحك:سنابها يهد دموع.. يالله تتحلطم وتشكي.. الواضح انك ما انت راضي تجيبها بكره العشاء..
هادي:خليها تنقلع الكلبه..
(وقال لها اللي حصل)..
بلقيس:حرام عليك.. هي نيتها عشانك.. لاتكسر خاطرها..
هادي:انتي لو شايفتها الصبح بتموت...صفقت امي وهي تتشهد..
ضحكت :ياربي والله نفول توسع الصدر.. مايخالف هادي.. عشاني جبها..
جاله اتصال.. طل في الشاشة .. انفال تتصل.. رجع لبلقيس:والله اذا سبعين مره دقت شوي.. كل ذا عشان بكره..
بلقيس :ياعمري.. هي مستعده وحاطه لنا بالقروب وش بتلبس.. وتهاوش ضحى والنور عشان مايتأخرون بكرة .. يعني حرام هادي.. بتمرض صدق لو ماجات..
هادي:يصير خير.. بس خليني انشف ريقها شوي.

******

باليوم الثاني..
من بدري بيت سعود كلهم راحوا المزرعة ..زينه مره تغيرت نفسيتها مع الجميع.. وقضوها سهره باليوم اللي قبله هي ومهره وبلقيس والجده مزنه..
اللي حيل جايزين لها.. وحيل تثني على تربيتهم هي ومهره.. وهم انبسطوا معها.. وخاصه انها تسهر عكس جدتهم..
نواف الكتوم وماحل في قلبه وحصل.. وقت درى ان زينه ظلت.. شعور انتشاء غريب.. وكأنه يبي يتعرف عليها اكثر.!

مع العلم مايدري ابداً عن موضوع انفصالها..  ويأسه قدام هالعلاقة يوازي الإثارة في موضوع جديد على قلبه ..

انفال مع ان هادي.. كان ناوي يجيبها.. الا ان خلاها لمن بكت وهي تتوسله ياخذها معهم..خلاها تعتذر من امها ومنه.. وخلاها تلف ثلاث علب ورق عنب عشان تاخذها معهم 'ولفت'🤣..
رابطه راسها وقدامها قدر حشوه هايل..
وهادي يصورها وهي ماتدري ويرسلها لبلقيس.. 
ارسلت له:يالظالم.. حرام عليك كل شي ولانفول ..دلوعتك..
هادي كتب:دلوعتي ماختلفنا .. بس كذبها اطلعه من عينها..
بلقيس :طيب خلاص خلها تقوم مسكينه ترتاح بتجي وهي طاقه بهدال..
هادي :لاتدافعين لاخليك تجين تلفين معها..
انفال صاحت فجأه:شايفني مخبز.. لاااا مخبز.. تعبت.. تعبت..
هادي نهرها :كملي.. وبدون تذمر.. لا اهون ..
انفال ضحكت بتسليك: تهوون.. لا يانظر عيني الفها والف معها ست علب بعد.. واذا ودك افتح مشروع مفرزنات لرمضان..افتح.. مره مُسلي..

هادي برواقه ويطقطق في الجوال:كافي بس لعزيمة عمي سعود.. غيبي بكذب مره ثانيه.. والله افتح لك مشروع اسر منتجة.. والارباح نشتري فيها اغراض البيت..

*****

جاء الليل.. وامتلئت المزرعة بالاقارب والاصدقاء.. سعود اقام وليمة لسلامة موضي.. بعد ماتحسنت ولله الحمد..

مهره كانت مع النساء لما رن جوالها ردت:هلا امي.. صحيت..؟!
فارس:ايه.. وينك..
مهره:تحت.. وش بغيت..
فارس :تعالي تكفين.. لبست وابي عطر وكبكات من حقين ابوي دبريني.. ماجبت..
مهره: دقايق.. الحين اجيك..
عطت صحن الحلى لزينه: وزعي زيون.. بروح لفارس يبيني..
موضي: توه يصحى الأمير.. كان كمل رقاده..
ضحكت :اعقلي امي عن اميري العود.. يصحى متى مايبي.. جعله نوم العافية..
لُجين من بنات العايله تهمس بنقد :من جدها ماينه على فارس.. كبير وخاط شنبه.. وهي صغيره.
اروى:زوجة ابوه.. الشرع يقول عادي.. انتي وش تبين..
لجين بقهر :ما احب هالحركات والتميلح.. واضح انها ماهنا سنع..
بلقيس سمعتهم :اعقلي يالجين.. ترى سيف مايرضا بالهواء الطاير يزعجها..ولابكلمة تزعلها..
لجين:الله اكبر.. الحين الزواج كان مثل الاولين رجال وبيحفظ مرت اخوه وعياله وش صار..؟!.
بلقيس بخبث:عاد القلب وعشق ..وزوجته وماعليه ملام..
اروى:من جدك.. سيف حب بعد نجود..!.
بلقيس بضحك:أوووه.. هالمهره سوت المعجزات يا اروى..!

زينه سمعت بعض الكلام وكانت منحنيه تمد القهوة لمزنه:سمي ياجده..
مسكت كفها:
لاتسمعين لحتسي هالمقروده ويضيق صدرتس.. ذي (ألجين) مابها سنع على امها شينة لسان وحسود..
ضحكت :يابعد راسي ياجده.. والله ولاكني سمعت .. بلاك شايله هم ..
مزنه: ايه يمه.. ويقولون لتس مايهم الذيب **** النعاج.. اسفهيها.. السفيه حقه الحقران..
زينه بغت تموت ضحك.. والجده وامثالها..!
حبت راسها:
يمه.. يازين اللي تشتري خاطري..
مزنه تضحك:روحي جيبي لي من ذيك الحلاو .. جازت لي..
زينه:جده.. عادي يعني.. عشان السكر..
مزنه:جيبي بس.. ألعنبوو السكر.. خل احلي ريزي.. واللي يطيح من السما تلقفه الأرض..
زينه تجيب الصحن:انا اشهد انك بايعتها ياجده..

مهره صعدت لقت فارس واقف عند غرفتهم.. متسند  ورافع رجله على الجدار ويطقطق في الجوال..
رفع راسه وابتسم:اوووه.. وش هالزين..!
فتحت باب الغرفة وضحكت:جد عاد .. حلو؟!
فارس يدخل وراها:
ايه.. بتحرقين كبود بنات العايله عاد  خابر لجين بنت عمي زياد تبي ابوي وخاطرها فيه ..
مهره التفتت توسعت عيونها:اثاريه  كذا..
فارس وهو يروح ياخذ عطر من التسريحه ويرش.. بل تروش فيه:ليه.. قايله لك شي..
مهره وهي تجلس نص ركبه عند شنطه فيها اغراض :ماقالت.. بس عوذه نظراتها.. احسها مو طايقتني .. وطول الوقت رافعه خشمها ..ماجازت لي..
قامت بسرعه..
واختل توازنها..
داهمتها دوخه وحست بطيح..
فارس بسرعه مسك ذراعها وبقلق:مهره وراتس ..
افتحت عيونها وهي تحط كفها على جبينها :مدري.. يمكن لاني جلست وقمت فجأه..
نفضت راسها :
مافيني شي.. خذ الكبكات وانتبه لايضيعون.. يعصب علينا ابوك..
ضحكت :ترى فصوصهم من الاثريات..
التقطهم من كفها ومسك يدها جلسها:
انتي اجلسي الحين.. اكلم ابوي ياخذك المشفى..
مهره: لا حشى.. لاتروعه بس.. والله مافيني شي..
فارس:اجل نضلوتس الحريم.. ياكرهي لذا الجمعات..
مهره:الله اكبر.. جدتي تتكلم مهب فارس..
صدمها لما حط كفه على راسها: بقرء عليتس.. لاتحركين..
مهره بضحك:من جدك.. مافيني شي..
بدء يقرء ويرقيها.. سكتها:هشش لاتلخبطين..
سكتت..
'واراقب فارس وكفه على رأسي.. واطلب من الله ان يرزقني بره.. ينفث على رأسي ويحصني.. وصلني شعوره.. خائف ان تصيبني عين فعلاً.. يالله يابراءة فارس.. وقلبه الحنون..'

خلص وراح لبس الكبكات :بنزل.. بس اذا حسيتي تعبانه كلميني ولاكلمي ابوي.. تمام؟
مهره:وانا اقولك لاتحاتي اموري طيبه.. بس فارس امي.. انتبه لسيف.. تشبك فابوك وطلع معه..
فارس يحط عقال على راسه: ماعليك..
وطلع ومهره وراه تقفل: مافي احد بوجهي..
مهره تنزل معه :لا كلهم بقسم النساء..

*****

من احداث هذا العشاء..
وليد طالع من مجالس رجال.. وماحد لاحظ عصبيته الا سيف.. لحقه..
وليد متوجه لساحة فيها سيارتهم..
سيف:وليد وقف.. من جدك بتمشي.. مانت صاحي..
وليد فتح باب السيارة ورمى شماغه وعقاله وبغضب:خلني امشي قبل اتهاوش مع ابوك ..
سيف بعصبية:وليه.. تراه مثل هالخطبات تجري.. واما موافقة ولارفض..
وليد يطلع علبة ماء يفرغها بجوفه :عاد اذا ابوك ماتاب من زيجة جمان.. لايتوب.. ترى عمك فيصل.. هاللي قاعد يخطبها لولده شبيب.. نفسه ولده حمدان اللي ثور فيك يالسبيكه.. دام عندكم حمية بدوان.. حق ايش ترضون..
سيف بانفعال:واحنا رضينا.. هو قطها كلمة.. دعابه حتى مب خطبه.. قال اللي جمعنا بهالعشاء .. يجمعنا ان شاء الله بملكة شبيب وبنتك ياسعود..
وليد رمى العلبة بقوه:
خلاص اجل بكرة ابوك يملك عليها..ترى مخوخهم متحجره.. شف لو قاعدين ومكملين السيناريو تلقى ابوك قال اخذها بعباتها..

سيف: عنبوك انت وش شايف ابوي.. تراه مازوج جمان الا بموافقتها.. ويوم قالت تبي شاهين.. اعقل وماراح يصير شي الا اذا بلقيس رضت..

وليد يشعل سيجار.. ينفخ دخانه: والله لوقف عظم لهالخطبة .. مهب كيفهم جماعتك.. خذوا وحده وضيعوها.. وياخذون الثانية .. راس مالي هالاخت وعياله.. انعنتن الله على قبيلتك من راسها لاساسها ..
سيف ماقاوم انفجر ضحك:
شفيك شبيت.. هد ابوي هد.. انت شايط والظاهر بُعد ماريا لاعب فيك..!

*****

داخل عند الرجال.. تمنى انه ثار مثل وليد وخرج.. تمنى انه لطم فم الشايب وهو يخطب..
تمنى انه وقف بوجه سعود وقال (انا اللي ابيها ياعم سعود.. من مثلي بيحبها ويموت فيها)..
لكنه ساكت..
وارتشف فنجال القهوة وهو مابرد.. دفعه واحده.. لينزل في معدته مثل الزقوم..!
لم اكن على استعداد..
ان اسمع كلمات طلبك وخطبتك.. ووجه عريس مترقب ومبتسم.. وينتظر رد والدك ..
سعود :الله يكتب اللي فيه الخير..

****

انتهى العشاء والكل غادر.. وبقت عايلة سعود.. ظلوا عشان يكملون فعاليات باليوم الثاني..
والليل واسراره.. وسوالف اخر الليل.. وتنهيدات الابواب الموصده..
سعود وهو يتلحف:هو كلام سطحي.. مافيه شي اكيد..
موضي بانفعال : والله ماعرس بنتي..لأي واحد من عيال فيصل .. اذا انت نسيت ان ولده بغى يذبح سيف انا ما انسى..
سعود بتنهيده متضجره:ذيك سالفه قضت مع الزمن.. طيش شباب وحمدان كبر وعقل.. وعرس وعيل.. وولدك الله عداه الشر.. ويبقون عيال عم ياموضي..
موضي :اقفل السالفه ياسعود.. واذا رجع كلمك قله اي شي.. بتكمل دراستها.. ماتبي.. عازفه عن الزواج.. بنتي ماعطيها شبيب ..
سعود بجزع :لحول.. خلاص موضي.. خلاص.. لو ادري ماقلت لك هالسالفه.. انا الغلطان.. اخذي حذيانك واضربيني على راسي..
موضي بلعثمه:ووي محشوم.. هو انا شقلت.. مجرد نقاش..

*****

هادي دخل البيت وانفال تتكلم وتعلق..مبسوطه طول الطريق ماسكتت.. وهو عقله مو معه. 
امه :هادي وش فيك وانا أمك.. وش شاغلك..
هو ببتسامة باهته :ولاشي.. النوم لعب فيني.. يلاتصبحون على خير..
امه:تلاقي خير امي..
انفال:وانت من اهل الخير..
صعد وطلع جواله كان صامت لان بلقيس تتصل..
مسك الجوال وجاه اتصال.. راح عطاها مشغول.. وكتب لها واتس:حولي الجماعة ماعرف ارد.. واطمنك وصلت..
وارسلها وقفل الجوال.. فك ازرار ثوبه يشعر بالأختناق.. شي واقف في حلقه مثل العود..
فرك صدره.. ويحاول يطلق آاااه..
مسك راسه بقوه.. حسه بينفجر.. كل عروق راسه تشكلت وتضخمت.. واصبحت مثل خيوط نار.. تحرق جمجمته..
دخل الحمام.. فتح الماء وراح يرشح وجهه وراسه..
كان اليأس في العلاقه صعب ..
لكن قطع الأمل..كان كارثي..!!

شربت من مّر كاس الصبر شرب الضمان
‏وعزّي لـ كبدٍ تحط الصبر مشروبها

‏ويا حر كبدي وياصبري وطول الزمان
‏ويـا قّو وجه الحياه وما اشين اسلوبها

‏غديت مثل الغريب اللي جفاه المكان
‏في ديرةٍ ساقه الحظ الردي صوبها

******

متربع على السرير وراسها في حضنه.. وضاغط عليه من الجهتين..
ومهره مغمضه وتقول:اضغط بقوه سيف..
قال :اعورك.. يابنت قومي نروح المستشفى..
مهره:لا يضبط الحين عادي يجيني دوار احيان..
وابتسمت وهي مغمضه:ماشاء الله يديك ترسل ذبذبات في راسي ..
سيف :عساها زينه بس..
مهره لسى مغمضه : الا عدمتني مره وحده.. قمت اشوف زغلله..
بعد يدينه وصاح فيها:زغلله.. من جدك؟!
ضحكت:رجعها.. امزح معك.. يدك فيها الشفاء ياحج.. ترى والله خف ..
سيف بقلق:اكيد..؟!
فتحت عيونها:اكيد فديتك..
ابتسم:خرشتيني ياشيخه..
اعتدلت: تصدق فارس قرى علي قبل يجيكم تحت ..ياعمري  روعته..
سيف: خاف عليك.. شوفي فارس من يوم كان صغير وبعد مافقد امه.. صار عنده قلق.. واذا صار خايف على شخص.. امي تقوله حصنه والله يحفظه.. يعني كنت اروح واسافر وارجع.. وفارس يودعني بقرايه ويستقبلني بتحصين..

مهره توقفت عيونها على وجه سيف..
وبخفوت:
ياربي بصيح.. بقوم آلمه.. حبيبي اهو..
وبتقوم.. قعدها:
نزل .. بيسهر مع نواف.. ماجاله النوم..
جلست..
وراحوا يسولفون عن العزيمة والضيوف.. لما قال سيف : وزينه عساها مبسوطه..؟!. في بالي والله..
مهره ببتسامة:على طاري زينه تتوقع من اكثر شخصيه متآلفه معها من بيتكم..
سيف:من.. بلقيس..؟!
مهره:لا.. جدتي مزنه..
ضحك:بالله..
مهره تلوشن يديها:وربي لو تشوفهم خويات.. طول العزيمة سوى ..حش وسوالف.. وتبادلوا ارقام بعض.. لا وازيدك.. زينه بتنام معها تحت بالغرفة ..
سيف:ياحليلها.. الله يسعدها ويعوضها.. والله اللي مثل زينه ماودك تنغث..
مهره مسكت يده وتوزع فيها لوشن:تخيل.. الكلب عبد الإله.. غاثها.. يدقدق ويرسل.. ويقول كلام مثل وجهه ..
سيف بانفعال:وشهو.!! .. وليش هي ماحظرته..
مهره:حظرته.. بس كل شوي جايها من رقم.. لا وارقام دوليه كل شوي مطلع له شريحه.. لانه فمصر..ويقعد يرسل ويفصل ..
سيف بعصبية:وش يبي.. ماقضى..وش اللي يقول..
مهره بتردد :اقلك شي يفجعك.. بس انا مادريت عن الوضع هذا الا بعد طلاق زينه..
عقد حجاجه:ايه..؟!
قالت له الاسباب.. اللي خلت عبد الاله منفس.. واللي خلاه يتعامل مع اختها كذا..
سيف يسمع ومصدوم..
مهره:والحين هو يعني بيتعالج.. ويبي يعقد عليها من جديد.. يفكر زينه ميته عليه وتنتظر الشاره..
سيف مصدوم..
ومهره ضحكت :اللهم لاشماته.. بس والله يستاهل.. ذي عقوبه من رب العالمين..
سيف يطالع فيها بفهاوه.. بعدين تكلم :
والله انكم تفجعون يابنات غازي..
مهره بدهشه:ليه..؟!
سيف ضحك: يا انتم عقوبه على رجالكم.. ولا ان عليكم حجاب..
مهره بتفاخر:احنا علينا حجاب من رب العالمين.. مايجينا الا اللي يستاهلنا ..

*****

قبل شوي في المجلس الخارجي.. لحاله منسدح على الأرض على فرش السدو.. ورافع رجوله ع الجدار.. ويفكر باليوم وقت امه وجدته معه بالسيارة.. طريق المزرعة ..
الجده :والله يامرت سيف دخلت قلبي هي واختها.. ماشاء الله تربيه وعلم ..
موضي :ايه الله يحفظهم.. جدتهم ربتهم ولا امهم.. من زمان خلتهم ولاتدري عنهم يادافع البلاء.. خذت رجل معوه فلوس وخير وحطت رجلها.. ماتعرفهم الا بتلفون ولا بالمناسبات.. اختهم سندس بعد دكتوره خذها واحد من حايل.. والله يايمه كل وحده تقول الزود عندي ..

مزنه:والله ضايقن خاطري على هالزينه.. هالحين رجلها عمي يومن طلقها.. وش عاد لقى عيبٍ في هالزين..

طبعاً هو زين ماطلع جلد مع المعلومة الكارثية لقلبه وعقله..!
جدته تمسكت فالمسكه فوقها وتتشهد وتسمي ..
عدل السيارة :وراه جده بسم الله عليك..
انفعلت :انعتن الله على هالوجه.. بغينا ننقلب ..
ضحك :حشى.. ترى اعرف اسوق.. بس انتي خايفه على عمرك..
موضي:تركد نواف.. وراك امي.. تعبان..؟!
نواف :مافيني شي ..بس لفيت حسيت راعي الشاص بيحذف علي ..
الجده بنفعال:حذفوا عدوك في بير ماله قاع.. انت اللي حذفت ماهو اهو .. شايفه الدرب.. يامال اللي مانب قايله..
ضحك :ول.. عصبت ام فهد.. خلاص كملوا .. اي وش كنتوا تقولون.. من اللي طلقت..؟!
الجده:عليك الله اكبر.. ويوم ان اذانك مشرعها علينا.. ورى مسكر عويناتك.. عيون الحصني..
ضحك لمن دمعت عيونه :الحين عيوني حقات الشواهين تقولين عنهم عيون حصني ..
الجده تفتح شنطة صغيرة فحضنها.. وتطلع علبة ماء: السكر السكر شكله طق خمس مية.. يبس ريزي..هو انتوا جايبني من الديره تباطيتوني..
ضحكت موضي :الله الله.. بسم الله عليك.. لانتسبب فيك جعلني افداك..

وبعد ماهجدوا.. رجعوا يسولفون عن زينه و فهم ان عبدالاله مايستاهلها.. وانها هي بغت الطلاق.. وان سيف  ساعدها فالمحامي.. وماخلاها الا لمن تطلقت.
وفكر بما ان سيف سعى لهالشي بهالشكل.. اذاً الطلاق كانت اسبابه مقنعه..
والبنت كانت في ضيق واذى..
.
.
افاق من شروده على رنين جواله رد :ارحب..
فارس :صاحي..؟
نواف :ايه تعال..ماجاني النوم..

شوي الا فارس جايه:اسكت عجزت ارقد.. وش فيك منسدح تسذا..
نواف يعتدل :اهوجس..!
فارس :وش فيه..
نواف :ركب القهوة بالمشب.. خلنا نقضي على صحون هالكنافة والبقلاوة.. وانا بروح اجيب شاي تلقيمه من المطبخ..
فارس :تلقيمه.. وقهوه.. واللي قايل بيقعد من الصبح ننزل للخيل.. متى بنرقد..
نواف :ماعليك.. النوم للرخوم.. وهات البلاستيشن في سيارتي.. بصقعك فيفا..

فارس وهو يركب القهوة :
خل عنك فيفا الحين.. خلنا نكمل لاكاسا دي بابل.. ابا اشوف اخر موسم ماكملته..
نواف وهو يطلع عويدي ويحطه بالدله وهو واقف :انت ماذابحك الا طوكيو يالكلب..ذوقك **
فارس بسلوب مغازل: ألعن امهاااا..
نواف صقعه بالفنجال :اعقب يالسلوقي..
ضحك :رح انقلع..على الاقل اخق من خلف الشاشات.. ماهو مثل.. اللي رافع سيقانه على الجدران.. وشكله طايح وواقع ومحد سمى عليه ..
نواف صقعه براسه باصابعه:
كمل القهوه.. ولاتدخل عصك في شي مايخصك ..
توسعت عيون فارس:وشهو ..!!! ولد ابووي ..يعني تحب يانواف.. ومن وراي..

طلع نواف.. بدون يرد عليه..!.
وصيحت فارس تلحقه:مصيري اعرف .. وين بتروح يعني .. اصيدك اصيدك ..

****

دخل نواف البيت.. توجه للمطبخ.. لما انتبه للباب جدته المرود والنور مشغل..
ابتسم وهو يروح ناحيته.. ناوي يتحرش فيها دامها صاحيه..

لكن .. سمع صوتها.. 'زينه': شوية عناية ويرجع يطول..
مزنه:يقولون لك يابنيتي.. مايصلح العطار.. اللي عطبه الزمن..كان علي قرون.. شطولهن.. يتهول فيهن كل من شافهم.. بس حتوو.. وبقت هالبلابص..
ضحكت :كلهم خير وبركه..
مزنه:والتسلب سيف يقول قصيه سويه مثل عجز الانجليز ..
زينه :والله بتطلعين كيوت ياجده.. فكري فيها.. ترى بوفارس رايه سديد..
اختلس النظر..
مزنه على سرير وزينه  وراها تحزم راسها بالملفع :كذا زين ولا اخففه..
مزنه:لا زين.. نفخت راسي بنت احلام .. انا هاجه من الديره.. وهي ماخلت سالفة.. ولاشارده ولاوارده الا صبتها بأذني.. هالبنت رادو.. عاد امها ربيتها على العقل وماتنقل حتسي.. بس هالحمارة طالعتن على اهل ابوها ..يموتون في السوالف والعلوم..
زينه تنزل على فراش بالأرض:بزر ياجده.. لاتواخذينها ومتحمسه لك.. وتفكر انها تزين روحها لتس..

نواف يلعن دناءته وانعدام اخلاقه..
'كالشياطين.. استرق السمع والنظر.. غير عابئ بشهبٌ قد ترجمني وتسحقني.. نادراً يداهمني مايسمى شغف.. كيف تكون هذه الأنثى كالكتاب.. الذي تبدءه ولاتستطيع ان تغلقه... انا في اشد الفصول تشويقاً .. ان اعرف ان هذه العاثيه في عقلي حُره.. ومُتاحه..!!..
اراقب ضحكتها مع جدتي.. وبساطة اسلوبها.. تمشط شعرها.. بجانب رأسها.. وتجدله بتراخي.. وتنهيه بعقده بخصله من شعرها ذاته.. '

مزنه:يايمه روحي ارقدي في غرفة بلقيس فيها سرير جمين.. لاتقطين عمرتس بالارض تسذا..
زينه:وش فيها.. ترى الأرض تمتص الطاقه السلبيه.. وياجده ابي انام معك ولا انتي ماتبين..

مزنه تنسدح:الا ابيك وابيك وابي اللي يبيك.. يازينك.. انتي اللي يقولون عنها خذت نصيبها من اسمها..
زينه :الله يرزقني على كثر ماتمدحيني ياجده.. ريشتي طلعت والله.. ماعلمتك صبحا احنا نمدح نفسنا وهي تكسر مجدافنا..
قامت زينه طفت النور وهي تسولف مع الجده..
وفجأه حست انها سمعت شي بره الباب..
عقدت حجاجها وانتبهت انه مردود..
راحت فتحته.. وتلفتت في الظلام يغطي الصالة..نادت :مهره..! ياتبن.. انتي فيذا..
محد رد..

الجده:هي مهره نزلت..
رجعت  واغلقت الباب:
سمعت تطقطق.. قلت يمكن نزلت وتبي تروعنا.. بس ماشوفها..
مزنه:اكيد الهوى.. درايش الصالة مفتوحة .. تقلقع البيبان..
زينه تجلس في فراشها وتفكر بشك وبخفوت: يمكن..
انسدحت وتلحفت وجفل قلبها.. يوم قربت من الباب..
حست ان فيه احد..
بلعت ريقها وهي تسمي.. وتتعوذ من الشيطان..

آن قآلهآ الله يعتدل كل ، مآيـل
ولابد آلليآلي آلسود يظهر قمرهآ ..

*****
قبل تطل زينه وتسمع الحركه اللي كان مصدرها.. انُ فارس دخل لما تباطى نواف.. وشافه واقف عند باب الجده..
توسعت عيونه.. فهو يدري ان زينه موجودة شهق وهو يجي عنده: نواااف..!!!
مع غفلته نقز وصقع الباب وانتبهت زينه..سحب هو فارس واغلق فمه.. وتخبى عند ممر جانبي..
لمن اغلقت زينه..
طلع وهو مقفل فم فارس اللي بغى ينجلط.. وماتركه الا في المجلس..
صاح : يالمريض.. وش فيك تطل ماتدري ان اخت مهره نايمه مع جدتي.. مو عيب عليك.. حسبي الله عليك يا نواف.. ياقواة عينك.. واقف بكل بجاحه تقز..

نواف كزه وقفل فمه.. وجلسه على التكايه وركى عليه :يا** انطم فضحتنا..
فارس بيبعد يكمل يهاوش..
قفل فمه.. وبعصبية :هشششششش.. هشششش.. ابلعها وبفهمك..
فارس عيونه متوسعه.. ويأشر بهم .. فكني..

ارخى عنه..
فارس يعدل تيشرته:ايه.. فهمني... ولو ان مافي لك اي مبرر بالحركه البايخه هذي..!.
نواف بكل جديه:البنت عاجبتني..
وتنهد وهو يجلس عند المشب:ومدري ملخبطه عقلي وقلبي.. وماهو اليوم ولا امس.. من يوم نروح هاك اليوم بمزرعتهم.. وناخذ سيف لهم..

فارس عاقد حجاجه ويتذكر.. وجاء قعد قباله: يعني انت شفتها.. يوم جينا نطلع وهي راكبه الحصان..
نواف بتنهيدة : شفتها.. من يوم شرد سيف ولحقته.. واللي خلق عيونك يافارس .. عجزت اطردها من عقلي.. وشفتها وحنا طالعين.. والله وحاولت ابعدها.. وتمسك براسي زيادة.. وبعد جيتها بيتنا.. وانا مثلي مثل المراهق.. اتصيد الفرص.. وانفض على الطاري.. مدري ياعمك.. مدري وش صار بي..
وتوني اليوم عرفت انها انفصلت عن زوجها.. يعني تقدر تقول.. ابيها بالحلال.. افكر فيها من هالناحية.. ماني بعشق بالحرام ولا انا قليل اصل بفكر فيها بهالصورة.
فارس :بس ترى اللي فهمته .. هي ماتبي العرس ابد..
رفع راسه وبدهشة :وليه..!..
حرك كتوفه:انا اسمع ابوي ومهره يتناقشون.. ايام كنا بلندن عن سالفتها.. السافل زوجها.. كان نفسيه.. يضربها ويهينها ..
توسعت عيون نواف وخفق قلبه:افاااا..؟
فارس:ايه.. وكان يشك فيها.. لو يسمعها تضحك مع خواتها بالجوال.. سحبه وسمع اذا اختها ولا.. ينزلها عند جدتها ويدق يسألها اذا هي يمها.. والبنت مسكينة متربيه.. تقول مهره.. ان الامور هذي اثرت بنفسيتها وخلتها تعاف الرجال.. وبس تبي تعيش بهدوء بزراعتهم..

نواف بأمل:لا ماعليك.. لو جاها واحد كفو بتوافق.. حكي مأخوذ خيره.. وتوها طالعه من تجربه ..
ضحك فارس :ومين الكفو..؟!!.. لايكون انت.؟!..ياوسع وجهك وسعاه.. حد يقز ضيوفه ياحيوان..
نواف يصب قهوة بفنجال:
خلك رجال.. ولاتتصيد الزلات.. وانا نيتي بيضاء والله يشهد.. خل نخلي البنت تهدا نفسيتها وتطخ.. تالي نشوف اللي علينا..
ومد الفنجال لفارس.. ارتشف منه:
ع القوه.. ياشاروخان..
نواف بنفاذ صبر:الله يلعن هالخشه.. وانا ماطحت الا بلسانك..
ضحك وحرك حواجبه:
والله لا ابتزك.. لا اطلع التقزقز من عينك ..

شرد نواف في نقطه..وسبح في ملكوت آخر ..

فارس :اييييه..!!! وين وصلت..
نواف يفكر بمهره وزينه.. وكيف الماضي الزفت مع رجالهم..
عرف مهره صح..
ومن شعوره بزينه.. حاس كيف البنت بريئه وبسيطة وناعمة..!..
فارس:نواف.. اكلمك..
هز راسه وتنهد:ذا الحين اللي مثل الزينه ينضرب..!
توسعت عيون فارس وبصدمه وتهكم : اخص يالعويشق..

مالك شبيّه الا البخت لا اقبل على الحظ الردي
‏ولا لك مثيل الا السحاب الممتليّ عشق ومطر !

*****

صباح اليوم التالي..
سلمى ام شاهين تفطر مع فهد: ماشاء الله ماقصر سعود في هالعشاء.. تجمل.. وتستاهل ام سيف الجماله..
فهد : الحمدلله اللي الله قومها بالسلامه.. تسببوا فيها عياله.. ويوم طاحت جاوا مثل المجنن ملهوفين عليها ..
سلمى :عيال سعود.. مدري ينولدون وتلقفهم الشياطين.. من صغرهم شر.. وفي كبرهم عند وروس يابسه.. يادافع البلاء..
فهد: الله يهداهم ..
سلمى: وجمان لاحس ولاخبر.. والله يافهد.. ان بغيت الصدق.. الحال ذا مايسر ابد.. البارح نقول للعايله رايحتن تدرس.. ومطاوعين اهلها بذا الكذبة.. اللي والله ماكلها الا هالفقير ولدي..

تنهد :وش تبين اسوي ياسلمى.. والله انها لو اطلعت في الشارب.. وان نزلت في اللحيه..
سلمى:يافهد.. حالة ولدك ماتسر..
فهد :وش بيدي.. اسويه وماسويته.. الامر متروك لولدك.. وذا فعل يده.. هو اللي كان قرصه فناره وعينه على جاره.. هو اللي طس عينه بيده ..

شاهين نازل  مبدل للعمل مر عندهم سلم وخذ زيتونه أكلها:
ماعندكم الا هالشاهين تقرضون فيه..
سلمى:اقعد اكل.. وش عاجلك..
شاهين ياكل وهو واقف:بطلع مافي وقت.. الله يخليك يمه.. بس يرجعون بيت عمي من المزرعة اخذي البنات ..بيان عندها اختبار الاحد..
سلمى:وش عليها..؟!ماقالت لي..
شاهين:كلمت بلقيس.. بتذاكر لها هناك .. بس جيبيها عشان تنام بدري.. نومها متلخبط..
سلمى :ماعليك.. لاتحاتي..
حب راسها وراس ابوه:توصون شي..
فهد:سلامتك يبه
سلمى.. امطرته بسيل من الدعوات والاستيداع..

*****
فالخيمة نايمين على فرش السدو.. نواف متكتف ووجهه على المساند..
وفارس.. راسه على مسند عند رجول نواف.. والمكان ظلام ومافيه تكيف.. الاجواء  حلوه هاك الوقت من السنه..
نواف..
تسلل لاذانه صوت من بعيد.. فكره حلم.. فكان مستعذب الصوت والدندنه..
عود.. وصوت اثير يغني على المقام العراقي والموشحات..بشقاوة واحبال صوتيه تطرب وتضحك.
*ان شكوت الهوى فما انت منا (آاا ياعين) فاحمل الصد والجفا يا معنى
تدعي مذهب الهوى ثم تشكو(آااا ياعين)اين دعواك في الهوى يا معنى
قم من النوم واطرد الهم عنا(آااا ياعين) يا غزالا اذا مشى يتثنى*

بره وفي جلسة كراسي عند الفيلا.. فطور وشاي.. ومهره بعود خذته من سيارة سيف..
وزينه تغني وتستهبل.. على سيف الصغير وهو نايم على الكرسي ومو راضي يصحى.
بلقيس تضحك:
يابخته انتوا تصحونه كذا..؟! بيدلع زيادة وينام..
ضحكت زينه.. وهي تدقدقه:
هارون الرشيد.. مب سهل..
سيف مندعس جنب مهره ومو راضي يصحى..
مهره تضحك :بيدخل فيني..
سحبته زينه:من قلب زينه مين..؟!
بنعس:سيف..
زينه :من عين زينه مين..؟!..
يندعس في حضنها: سيف..
زينه:سيف اذا ماصحيت بمشي.. برجع لجديده..
فتح ويناظرها وعينه منكسره:
تلوحين جديده.. تخليني.. والله اهطك..
ضحكت:تطقني يالتسلب..
بلقيس:ياقواة عينك.. حد يطق خالته.. قم عشان تصحي بيان وديم..
جلس ويعرك في عيونه:وين فالس..؟!..
مهره: فارس بالخيمة رح صحه...نايم مع بابا نواف..
نزلته زينه وراح توجه لباب المجلس القريب..
زينه : من جدك..؟!.
مهره تاكل بسكويت:وش..؟!
زينه بقمطه:في احد نايم هنا.. وانا قاعده آلعلع..
بلقيس تضحك:ياشيخه.. عادي نايمين.. نومن ثقيل.. لو تقوم الحرب ماصحو..
مهره:مايسمعون ماعليك.. واذا اسمعوا.. عادي..
زينه تهاوشها:يالبازع ياقليلة الحياء.. انتي كلش صرتي ماتستحين..!

في الخيمة.. جاهم صوت طرق سيف ونداءه :فالس.. افتح باب.. فالس.. قوم..
وتكرر النداء..
ونواف مطنش ورجع نام بعد ماسمع صوت زينه وهي تغني ..
اما فارس بس استوعب.. ان سيف يطق.. قام بسرعه.. واول شي فكر فيه.. ان سيف طالع لحاله وخاف يطيح فالمسبح..
فقام بحركة سريعه.. وطمر في الظلام.. وضرب في صحن البيالات.. انطشوا وتكسروا.. وصاح:الله يلعنك يانواف.. حد يرقد في ظلمه كذا..
نواف راقد ولاكنه صار شي..
فارس سحب جواله شغل الفلاش.. عشان مايدوس على الزجاج : يلا جيتك حبيبي..جيت سيف جيت..
فتح الباب.. وسيف رافع راسه ويناظره.. ويأنبه:ليش رحت مانمت معي ..
جثى فارس وهو متعومس من الشمس.. وابتسم وهو حاط ذراعه فوق عيونه:
انت نمت.. وانا ظليت لحالي.. نزلت يم نواف شفنا فلم ونمنا..
سيف يعانقه :نروح حصان.. اووبه ودينا..
فارس لمح مهره وهي تناظرهم.. وجنبها بلقيس و زينه متغشيه بشال..
قال:ودامك صاحيه.. ورى جاي يطق لحاله.. نشفت.. قلت طالع لحاله.. وبيطب بالمسبح..
مهره باستمتاع :يالبى.. احبك لاصرت مسؤول..
ابتسم :صحى ابوي..؟
مهره:ايه داخل..
بلقيس :وين اللي بيروحون الاسطبلات.. والله انت ونواف.. ماينوخذ عليكم.. كلام الليل يمحيه النهار. 
فارس:اخوك الزلابه ماخلان ارقد.. تراه من الساعة ثنتين لست واحنا نكفخ قهوه وشاهي تلقيمه..
بلقيس:طيب صحه هالحين حدعش.. ابوي كلم بوخالد بنروح معكم.. بيفضون لنا المكان..
فارس اخفى ابتسامته الخبيثة :وانتي مهره بتجين.. واختك..؟!
مهره:ايه بنجي نتفرج ..
فارس:تجون تركبون..؟! تفرج مانبيكم..
زينه :وحنا شعرفنا اخاف اركب واطيح على وجهي ..
مهره واكبت زينه على طول :يكفي نشوفكم يالفرسان الثلاثة..يلا صح نواف.. ابوك يبي يرجع هنا قبل المغرب..

فارس.. وكان شايف زينه على الخيل ويدري انهم يكذبون :بصحيه واجي.. اخذي ولدك في زجاج مكسور.. بلقيس خلي  احد يجي  يكنسه ..
دخل الخيمة واغلق الباب.. وشغل النور وبحماس وخفوت:قم نواف قم.. ان ماقمت بيفوتك نص عمرك ..
بتذمر:طف النور يا**..
فارس جلس عنده وهزه :ماتبي تروح الاسطبل..
نواف يضب نفسه:روحوا انتوا..مافيني انا.. تعبان..
ضربه فارس على صدره:حبيبتك بتروح ..

نواف ماستوعب على طول.. فجأة فتح عيونه:
حبيبتي..؟!!... زينه بتروح ..
فارس :ايه.. قم عشان تغازلها وتميلح وانت فوق الحصان.. عشان تعلمها ان بينكم شغلات مشتركه.. قوم يلا ..
اعتدل: والله اذا كنت تكذب.. ياويلك..
فارس:افا عليك.. اضبطك..

*****
دخلت بلقيس.. كانت تمشي في المدخل.. وسمعت امها :
وليد وراه ماظل هنا وش مرجعه لحاله..
سيف:هو من سمع عمي فيصل وهو يخطب بلقيس لشبيب.. وهو اخلاقه ***مره وحده طلع وهو منغث..
سعود بهدوء:وليد وش مفكر.. بنترك عيالنا يحبون ويتمعشقون ويتزوجون بدمقراطية على قوله..
دخلت بلقيس وبنفعال وعصبية :
مين مين.. مين اللي خاطب مين..؟!.
مزنه:عنبوتس عيب سوي نفستس ماسمعتي.. عرز (عرق) الحياء انقطع مرتن وحده..
بلقيس بانفعال:جده.. ماهنا مكان للعيب.. تراه انقال بلقيس في هالبقعه.. ماني حاشره نفسي في موضوع مالي علاقه فيه..
موضي:كلام عابر.. ومافيه شي رسمي..
بلقيس بتسائل منفعل لابوها:ولايكون عشمتهم فيني..
سعود عقد حجاجه:وش تنقدين ولد عمك فيه.. واذا تممت ورحبت.. وش اعتراضك عليه..
صاحت:انا مابي اتزوج ذا الحين.
سيف:طيب اهدي بلقيس.. محدن غاصبك على شي..
مزنه:وليش.. المصاصه بفمها.. عشان مانغصبها.. امك يوم هي قدك عندها سيف.. ونواف وعساف رحمة الله عليه.. وولد عمك ماشاء الله عليه عقل وثقل ووظيفتن سنعه...هماه يشتغل بصيدلية الديره.. دختور الله لايضره .. هو اللي من اخوانه..من صغره.. طينة جنه.. لايشرب ولايدخن.. وحتى الفجر يصليها بالمسجد.. مير امتس داعيه لتس لوخذتيه ..

بلقيس بعصبية وغضب: وانا سبيته ولاذميته.. جده مابيه.. ولا ابي اسكن في الديرة.. ولا ابي اعرس.. يبه دق عليهم الحين.. وقل لحد يفتح هالسيره ثاني..
سيف لاحظ يديها ترجف.. قام مسكها وخذها  بذراعه:طيب خلاص.. وش فيك عصبتي كذا.. انتهى الموضوع.. ماتبينه .. ورويسك الغالي ماياخذك..
دخل فارس وشاف الوضع..
ومزنه تقول بعصبية :قلة حياء ودلع ماسخ.. ولا البنية عيال عمامه أولى فيها..كل وحده لسانها وش طوله..
فارس :وش فيكم.. من مزعل بلقيس..؟!
موضي:مافيها شي.. خذها واطلعوا فوق.. بدلوا.. عشان تروحون للخيل..
سعود بحده:اصبري ياموضي.. قبل تصعد تعطيني سبب واحد مقنع.. يخليها رافضه شبيب..
'وتضخم قلبي وهو ينبض بصوت يكاد يُسمع.. سببي (هادي) .. ذاك الذي تربى في جوف قلبي.. كبر وبلغ وشاب في قلبي.. هادي كهل عاجز في أوردتي.. عليا بره.. حتى لوكان عجوز رافض عنيد.. لايمكنني الفرار منه.. كأنه انفي.. هو انفي حتى لو كان أعوج..'
تصلبت نظرتي في وجه ابوي..'الا يرى هادي في عيني'..!
سيف :خلاص يبه.. خلنا نأجل هالموضوع.. ولاتضغط عليها..
سعود:اصبر ياسيف..
واشار بسبابته وبانفعال :عمتس طلبتس وانا قلت له خير.. وانا ماني من اللي يقول القول وينفلق منه عشرين قول..شبيب رجال والنعم.. ان كان عندتس سبب يقنعني.. ولامارده..

فارس طالع جده وتوسعت عيونه :
يبه سعود.. تكفى.. بلقيس ماتصلح لشبيب.. كلش مافيه توافق..
سيف عقد حجاجه.. وخذ بلقيس عند الدرج:اصعدي.. وبدلي.. وانت يا فارس..

صعدوا.. وسيف جلس بهدوء:
يبه.. قفل هالموضوع..
سعود:وانتوا من متى احد سمع فيكم قولي..
سيف برجاء:انا فوجهك..
دخل نواف وسلم.. وحس الوضع متوتر.. اشر بعينه لامه يعني شسالفه..
اشرت بشفايفها.. (بلقيس).. وسوت بصبعها حركه يعني خاتم.. فهم على طول لان كان موجود وقت الكلام..
سيف:مافي كلمه تعلى على قولك.. بس الا الزواج مافيه غصب.. ان اقتنعت ولاانتهى..
التفت نواف لابوه: عسى فاتحين موضوع بلقيس..ومن جدكم تناقشون فيه..!
سعود بعصبية :جاك الثاني..
نواف:واضح الرفض.. وانا رافض.. عاد ابوي صدق تصالحنا مع عيال عمي فيصل.. بعد سالفة ال**حمدان مع سيف.. بس والله لو عندي عنز ماعطيتهم اياه.. عشان اعطيهم بنتنا..
مزنه طق سكرها مليون :
ايااا التسلاب... ياعيال التسلاب.. هذا قولكم على ولدي وعياله...
نواف ولاهامه: والله ياجده.. كلمتن تستحي منها بدها.. وعمي ماعندنا له شي.. اذا سيف بيجامل.. وبيجيكم بالتفاهم.. انا مانساه وهو غارق بدمه.. واولهم عمي فيصل نقز قال خطا وماهو متعمد.. وشبيب جاي يشهد يقول حمدان بيصيد قمري.. والله القمري اللي صابوه قمرينا.. اللي يبي يصيد قمري تراه بالسما ماهو على الأرض..
سيف اخفى ابتسامته.. وموضي بحمية:
ايه والله انك صادق يانواف..
مزنه :حسبي الله عليكم.. سكري طق.. ياليهود يالحاقدين.. ولد عمك يامال اللي مانب قايله..واخوك بصحه وعافيه وش خليت للزير اخو تسليب..
نواف :عاد انتهينا ياجده.. وتراه عمي فيصل يحرج ابوي.. انا ادري ان ابوي بداخله ماوده.. صفا صفا صفا.. بس عاد مايعطيهم جعدته..!!

زفر سعود بكل قوته: قفلوا الموضوع.. ولحد يتكلم فيه ويبدي راي.. موضوع بلقيس عندي.. وانتهى...انا اللي ارفضه ولا اوافق عليه.. وان صار فيها اقناع.. انا اعرف لبنتي.. واطلعوا منها يالاثنين..

وقام وطلع فوق..
سيف ناظر نواف وضحك :والله كفو يالامير.. طلع الانجليزي طلع.. هذا وتوك قاعد من النوم الله لايضرك..
نواف غمز وصب له قهوه: ازهلني ..

مزنه معصبه:وانت الحين جاي فازع.. وتطري سالفة حمدان واخوك.. الظاهر انك نسيت يومك تبط راس شاهين بهاك الحصاه.. بس الجمل مايشوف عوجة سنامه..
نواف مد كفه:رجاءً ياجده.. عاد شاهين ونجود لادخلونهم في عيال عمامي الثانين.. هالاثنين مابينا وبينهم الا وضح النقا.. واذا نسيتي اذكرك.. تراه كنا نقط الحصا بالسيل وحاشت شاهين.. ماهوب صوبته زي بعض الناس.. وكلها تسع غرز.. وردت دامجة شاهين احسن من الاول..

نواف يشير لسيف:ماهوب مثل هالضعيف.. تونا معرسينه..فرحانين فيه.. بدل مايطير شهر العسل.. دخل عمليات.. والفشقه تسري.. وهم يشرحون.. انتي اصلاً ياجده ماجاك السكر الا في الحادثه.. المفروض انتي اللي تقولين لا.. ماتجين توسطين..

موضي قرصته ومن بين اسنانها:خلاص.. انطم.. بتزعل جدتك..
سيف صب لها ماء ومده لها :روقي جعلني قبلك.. ومو صاير الا المكتوب.. وقومي روحي معنا الاسطبلات.. تونسين وتسلين..
مزنه تشرب وبعصبية وانفعال : مابي اروح مع هالتسلب مكان.. غثني طويل لسان.. قليل الخاتمة ..
نواف :افااا.. عاد كل شي ولامزنه..
مزنه : وانت خليت فيها مزنه.. لاحشمتني ولاحشمت ابوك .. بس اشبع بختك.. بعرسه اللي احسن منها.. اي والله.. مير الزينه طلعت من عدتها..؟!
توسعت عيون سيف..
ونواف بغى يشرق بالقهوة..
سيف :هدي هدي ياجده.. مالك لوا بس انسي الموضوع ..
نواف بانفعال:وانتي طقها ولحقها الله يهداك.. بلقيس مارضت.. تاخذين له اخت مهره.. شفيك جده تمترين هاشمي..
سيف بحزم:وبعدين ياجده.. بلقيس.. اناقش ابوي وكلمتي ماتعلا كلمته فيها.. بس زينه اخت مهره.. محد يجي صوبها..
موضي :وليه.. ترى شبيب مايعيبه شي.. رفضي له عشان سالفتنا القديمة مع بيت عمك.. اذا زينه بتوافق وهو بتعجبه.. ليه توقف بنصيبها ..
سيف عاقد حجاجه وبين اسنانه:
زينه وقبلها مهره.. مروا باول تجربه سودا.. ان كاني طلعت مهره من اللي كانت فيه.. ماني بحاط الزينه الا عند رجال يستاهلها..وعيال عمي عارفتهم انتي.. اطباعهم حاده وانفسهم زفره.. البنت ماهي برجاء حظ يايصيب يايخيب..

مزنه بتفكير بكلامه:ان شافها.. والله..ان...
قاطعها سيف: قفليها ياجده.. عشان مازعلك ولاتزعليني.. زينه اليوم معكم بكره بتمشي.. ومثل رفضي اجيب مهره الديرة لاني كارهها.. زينه اختها.. يعني اختي.. ولي كلمتي عليها..وهي وثقت فيني وعطتني حق التصرف بأهم قرار بحياتها.. ماتدخل الديرة زوجه لعيال عمامي دام راسي يشم الهواء...!!

(للتوضيح.. لان سيف هو ضبط موضوع طلاق زينه مع المحامي.. عن بعد.. بالتوكيل اللي سوته له.. لما رفض فلاح يروح معها)..

نواف كان هبط من الفكرة ..
التفت سيف عليه :وانت بتقعد تقهوى اقعد.. احنا ماشين.
نواف طمر:هالحين اركب السيارة.

*****

كافي تعب  ياضيقة الصدر تكفين
صكي زراير هاجسي .. واعتقيني

غصيت في العبره مثل حد .. سكين
قومي عن ضلوع الصدر وارحميني

في نادي واسع.. و شباب يتمرنون على اجهزة رياضه وشيل اثقال.. هادي واقف يشرب ماء وكل وجهه وشعره معرق..!
المدرب :هيك بتتمزق عضلاتك هادي.. لما بدك تزيد الوزن بالتدريج.. بتفش خلئاتك بالحديد.. بكرة مابتئدر تشيل حتى لتر الماي..
ارتسمت على وجهه ابتسامه باهته:ماعليك بوس ارتاح كذا..

المدرب يضغط ذراع هادي:ايِّ دخول على المساج.. لعد الفلبيني يفصفص لك عظماتك.. يكسب فيك سواب..
هادي ضحك: ماشي.. لاتشيل هم..
راح المدرب وبقى هادي.. وهو يمسح وجهه وشعره بمنشفه ..
شال جواله.. ماكلمها ولاكلمته ولاصار بينهم مواجهه عن خطبة البارح..
ولاناوي يكلم..
ورغم زحمة دواخله.. الا ان مانسى جمان.. تعبانه هالايام.. وحتى كان بيتصرف ضد رغباتها.. الا انها طمنته وقالت له ان راشيل بتجي عندها لمن تولد..

طلع عند مسبح خارجي.. وجلس على كرسي واتصل عليها.. ردت وصوتها خافت وتعبان :هلا هادي ارحب..
بقلق:وش فيك زايد عليك شي..
جمان:لاكنت مغفيه.. طلعت الصباح ارسم عند المزارع ونعست..
هادي :جمان لاتعبين نفسك.. خلاص خلك مكانك.. بترسمين في البيت.. انتي تعاندين.. بس والله لا انكبك.. وتشوفين عمي سعود ولا رجالك يطق عليك الباب قريب..
جمان بتحذير:ماتسويها.. هانت.. خل اولد وانا بتفاهم مع ابوي ..
هادي زفر:جات خويتك..؟!
جمان:ايه وصلت البارح.. انتوا اهم شي.. اخباركم.. امي احسن الحين..؟!.. بناتي.. ماشفتهم هادي..
قال: كلهم تمام.. وامورهم طيبه.. بيان وديم شفتهم البارح بمزرعة ابوك.. مسوي عشى لامك.. والكل حضر ..
تحشرج صوتها: ليه ماصورتهم.. ابي اشوفهم..
هادي : والله كنت ناوي.. بس زحمه.. ومابغيت شاهين يلاحظ.. لان تعرفين من البدايه شاك فيني.. ماحبيت ادخل بدوامه جديده معه.. والنتيجة تحليفك لي.. اللي والله لو كنت عارف نتيجته ماحلفت ..
جمان:ادري اني قالقتك هادي... بس شسوي مال الشدايد الا اهلها..
تنهد بحرقه: مامن شدايد يا اخوك.. ولت الشدة ومابقى منها شي..
باستغراب: وش فيك .. صاير شي..!

شرد لمده..
بعدين تكلم كنه بيغير الموضوع.. وهو في صلب الموضوع اللي موجعه :
شكله بيصير عندكم عرس قريب.. ابشرك..
جمان:لاتقول.. عزم نواف..
هادي:لاء.. بلقيس..
جمان باستنكار:وشو..؟! شلون ومين..!
هادي:البارح عمك فيصل.. تكلم فيها لولده شبيب.. وابوك واضح لاينه اذنه.. وعلى قولهم ولد عمها واولى من الغريب..
فاجئته جمان: وانت هادي.. انت.. شرايك بالموضوع..؟!
عقد حجاجه.. واستغرب كلامها.. بس مايبي يبين شي : انتوا خواتي.. واتمنى لكم كل خير.. وشبيب ماعرفه والله.. الا كاشكل واسم.. اذا هو كفو.. الله يوفقهم..!.

سكتت جمان شوي.. بعدها تكلمت :شاهين تزوجني وكان يحب وحده.. وظلمني.. حبني صدق بس ظلت بينا.. لمن ضعت وضيعت بيتي.. شبيب بيحب بلقيس.. لانها تنحب.. وهي بتحاول ترضيه.. بس بيظل الحب القديم بينهم.. وبيحرقهم.. هادي الزواج هذا مستحيل يتم.. لاتنعاد قصتي في بلقيس.. عودها ضعيف وتنكسر..
هادي توترت اعصابه.. من كلامها المبطن :وش قصدك جمان.. خلك واضحه..!

جمان بدون لف ولادوران:لاتغيشم هادي.. ادري انك تحب بلقيس.. وبلقيس تحبك.. بس انتوا اغبى اثنين حبوا بعض في هالدنيا..!

وكان تصريحها صادم له.
صار بينهم حوار.. احتد وهدا..لمن انهوا الاتصال..

جمان على سرير ابيض في مستشفى.. جات راشيل معها ورقه:
هل انتهى السيروم..
جمان تجلس وتحاول تشيل الكنيولا:انتهى وهذه الممرضه لم تأتي..
راشيل مسكت يدها: اتركيها.. هل انت مجنونه..!
نادت النيرس وجات شالتها.. وقالت لها لازم تجي تكمل ابر الحديد.. وتسوي تخطيط للبيبي..
(جمان تعبانه خاصه مع نفسيتها.. بس عنادها لا ادري وين بيوصلها)
راشيل تساعدها تلبس البالطو وطالع في وجهها الشاحب وعيونها الغايره ودموعها ماتنزل:جمان.. ستقتلين نفسك والطفل هكذا.. لما تكابرين اتصلي بزوجك.. واصلحي الامور..
جمان مو عارفه تتكلم بتبكي.. راحت تحط جوالها بشنطتها.. وتعطي راشيل البطاقة :راشيل اصرفي الدواء ارجوك سأنتظرك بالسيارة..
وطلعت..!!

الشوق يذبح والعنا ماله حلول
و الدمع يفضح والمكابر مصيبه

*****

في الاسطبل الكبير.. كان قريب من المزرعة .
الشباب والبنات فيه مع البزراين بنات جمان وسيف الصغير..
وانواع الوناسه وركوب الخيل..
بلقيس غاضبه بداخلها على هادي.. وعلى هالموضوع الجديد..
موجوعه من ابوها.. كيف كان معصب اليوم.. وكأن يبي يجبرها..!

زينه قدام احد الخيول الاصيلة.. ومعها الثلاث بزارين.. وتضحك معهم.. وهي كل شوي ترقي واحد فوقه..

مهره مستنده على سياج.. ترقب سيف فوق احد الخيول.. وكان خاطفها من نفسها بنظره حالمه.. وتتخيل من شوي وقت ركبت السيارة.. لما نادتها موضي عند الفيلا..
ونزلت لها.. راحت وسيف يراقبهم باستغراب وامها تهمس لها ومهره تضحك..
رجعت..
سيف بفضول :وش تقول..
مهره:لا بس توصيني على البزارين..
سيف بتكذيب:بالله..!
مهره قلبها يخفق.. كانت موضي تحرصها.. دامك موضامنه نفسك لاتنطين فوق الخيل.. وتديفشين عليه.. تطيحين ولاشي..
ضحكت: من جدك يمه.. مافيه شي.. ماحس اني حامل كلش..
موضي قرصتها على ذراعها: اعقلي يامهره ولابنادي سيف واقوله..
مهره:لاتكفين.. والله مابي اقوله الا لما اتأكد..
موضي:اجل انتبهي وبس نرجع تروحين تحللين ولااقلها تاخذين منزلي..
مهره بوستها:تمام.. دعواتك..
افاقت وسيف يقرب منها بالخيل.. ورفع نظارته على راسه:وش سالفتك اليوم..؟!
ضحكت:وش.. تجيك التهايم وانت نايم..
مد كفه: تعالي اطلعي معي..؟!
مهره:اخاف اطيح..
سيف بصدمه.. ضحك: ياشيخه.. من اللي يطيح.. مفكرتني غشيم فيك.. وانا شايف صورك وماضيك.. ولانسينا صورتك وانتي متعلبشه فوق نخله.. تعالي بس..
مهره مسكت كفه: ياربي الواحد يبي يصير رقيق ومايخلونه..
وقبل يسحبها.. كانت بخفه تدوس على مكان القدم اللي فيها رجل سيف.. ويدها في اللجام وتركب..
حوطها بذراعيه وضرب الخيل برجله يمشي فيها.. راسه عند راسها.. يداعب انفه عطرها والعود..
ومهره تحس بنشوه رهيبه وسعادة من قربه .. ولو تكون حامل.. يالله..!
قالت :ذكرتني بابوي.. كان يمشيني على الخيل كذا..
كانوا يتهامسون..
لما جاهم صوت نواف وهو يمشي موازي لفارس:الله يرزقنا.. يافارس..
مهره:اللهم لاحسد..
فارس واقف بالخيل ويصورهم بجواله:ورب الكعبة شكلكم يصلح نركب عليكم شيلات..
مهره عطت وضعيه :وكذا كذا فارس..
صورها وهو يضحك: بحطك خلفيه للجوال..

سيف مشى معها..
نواف منقهر.. وزينه بعيده تلاعب الأطفال.. ولاراكبه هي..
فارس:ورب الكعبة انك تجحفلت.. مفكر الحين بتشوفها.. تروكض على الحصان مثل هاك اليوم.. البنت ثقيله ومسويه ماتعرف..!
نواف:حظي واعرفه.. **..

****

مر الوقت وقبل المغرب.. الكل اجتمع عند طاوله خارجية في الاسطبل.. موضي راسله لهم كيك ومعجنات وعصاير..!.
بلقيس رتبتهم مع فارس..
مهره جات.. و بيدها عباية ملفوفه.. حطتها جنبها..وخذت قطعة كيك ..
سيف:وين الزينه.. ماجاعت..! لايكون مستحيه منا.. نقوم ونخليكم تاخذون راحتكم...
مهره :خلها تفش خلقها شوي قبل نمشي..تجري بالخيل في المضمار.. دام فضى المكان هناك ..

نواف.. يسمع حوافر الخيل تضرب في الأرض.. بس مو في مجال رؤيتهم ابد..
انقهر.. يبي يتصور روعة المنظر.. ماكانت تمشي في الخيل ولاتجري.. الصوت كان واضح..
انها تصارع الريح في ركض مجنون وقوة قلب واعتياد ..
فارس بغى يفقع ضحك على نواف وجهه المحبط.. اللي لو احد دقق فيه انفضح..!

*****

بالليل كانوا يركبون السيارات ويحملون اغراضهم..
والحريم كلهم بعباياتهم...

زينه سلمت عليها موضي ودعت لها:روحي يازينه عساك لتوافيق وسعاده وهناء..مالها حد.. سامحينا على القصور.. والله ماودي تمشين..
زينه :الله يسعدك ياخاله.. ماقصرتوا.. بيض الله وجيهكم..وعاد زين صبحا تجملت.. نروح قبل ينزل علينا الغضب.
بلقيس تضمها:زيون عاد مو تروحين وتقفلين بابنا بطين وعجين.. تراك دليتي الدرب.. وميزانك والله نفس مهره بقلوبنا..
زينه:حبيبتي لاشك ..

التفتت على مزنه  تمشي بعكازها مع الخادمه.. راحت عندها.. واشرت للخدامه انها هي بتوصلها للسيارة .
زينه وفعلياً جاتها العبره بمرح مغبون: ها  صديقتي.. ماتبين تودعين اشوفك تصيددين..!!
الجده تمشي معها : يالزينه انا ماهوب صلاح مع الوداع.. قلبي خريش.. والله العالم اتعودت عليتس يا امك..
زينه: بحرق جوالك اتصال وانتي بس اطري عليك اضغطي رقم خمسه ويطلع رقمي..
مزنه:عسى عيني ماتبكيك.. يازينك..
زينه:اي سيارة بتركبين..؟!
مزنه:سيارة نويف.. هي اللي بالارض.. ولاسيارة سعود ان رقيتها شفت مصر..
زينه تضحك: الله اكبر..
مزنه:ايه ماقوى وانا أمك.. لارقيت.. بينزلوني منها في المستشفى.. بتشهد..
ضحكت: بسم الله عليك.. انتي تبالغين تبين تكشخين بذا البورش..
نواف اختطف كل حركه.. من زينه وكل ضحكه وصوت..
وكأنه يبي يخزنها كوداعية..
هم بيمشون.. وهي بتركب مع مهره وسيف بترجع لديرتهم.. فكان توديعها للجميع.. موجع له بالذات.. ومايدري كيف تضخم هالشعور بداخله .. وكيف تعملق اكثر مجرد مادرى عن انفصالها..
زينه سفطت عكاز الجده بعد ماركبت سندته على السيارة.. وراحت بوستها وحبت يدها:
جده حبيتك.. الله لايجعله اخر لقى.. ادعي لي جده..ادعي لي بقلبك النظيف.
نواف مر خذ العكاز.. سمع صوتها المبحوح والمجروح بكلمتها
'ادعي لي ياجده'..

امطرتها مزنه بسيل من الدعوات المصفصفه.. بسجعات وبلاغيات.. عجيبه غريبه..
ادخلت فيها كم من اسماء الله الحسنى.. وذكرت تشبيهات من بلاء الانبياء.. وفرجهم..
نسجت اسم زينه.. في وسط الدعوات..
ماجعل زينه تنهار داخلياً..
وتضم راسها وتبوسها..وتكرر..'آمين.. آمين.. آمين'..
اغلقت الباب.. وهي تحاول ماتبكي وتضيق صدرها : بروح لاتأخر.. على سيف ومهره.. عاد ياجده لاتنسيني..!

وتوها بتتعدى نادتها.. رجعت والجده فسخت خاتم ذهب من خواتمها ذو فص احمر..وسحبت يد زينه: لبسيه.. ماهو مودرن على المودا.. بس تذكري مزنه فيه...
شهقت زينه وهي تسحب يدها:لااا جده..يزهى عليك والله.. ماحتاج شي يذكرني فيك.. خلاص انطبعتي بقلبي..
مزنه بانفعال:ان لله وان اليه راجعون..
نواف كان قريب من السيارة:خُذيه لاتزعلينها..
التفتت عليه.. بعدين عليها.. ومزنه:ماتبون الا الفالتيل واللي مادري شسمه.. مايجوز لكم خواتم العجز..
ابتسمت زينه ومدت يدها :والله ماهو قصدي.. ياربي شهالصديقه.. نازرت علي.. لبسيني انتي اياه..
مزنه لبستها وبتغزل: ويه شوفي شزينه على يدياتك.. روحي فالك دبله.. لأمير اطخم يقدرك ويحبك..ومايشوفك الا انتي..
اكتفت انها باست كفها..
وراحت بسرعه لسيارة سيف..
اللي ينتظرها مع مهره..
للتوجه لديار صبحا..

نواف راقبها حتى اختفت.. وزفر بتنهيده..

عظيمه كنها قصرٍ تعلى نايفات السور
‏ورقيقه كنها وردٍ تفتح وسط بستانه

****

في طريق الرجعه.. زينه تناظر خاتم الجده.. يالله يالجدات.. وحب الجدات..
الجلسه مع مهره واهلها والجده مزنه بالذات نفعتها كثير..

مهره تداعبها:زيون.. الجده كيفت معك..ياشيخه اكلتي قلبها..
سيف وهو يسوق :شوي وتشيلك بشنطتها.. مو سهله عجيزنا..
ضحكت:ياحبي لها..

سيف بهدوء:زينه وانا اخوك .. البيت بيتك.. ماتضيمك الدنيا وانا موجود..
زينه:عسى عمرك طويل يابوفارس..

مهره مبتسمه ومبسوطة .. ضمت سيف النايم في حضنها..
وسيف التفت جهتها.. وعرف وش فخاطرها.. ابتسم وغمز لها بعينه..

قُومي تعزوي بي إذا مالك أخوان
‏ترى المحب..  يكون عزوة حبيبه

*****

نهار اليوم الثاني.. سيف فالصاله يذاكر لفارس رياضيات..
عصب عليه.. اشعل سيجار :وش فيه مخك تنح.. والله لو اشرحها لسيف فهم.. معقوله فارس..

فارس ضحك:يبه.. شوي شوي.. لأن انا ماجي بهالاسلوب.. وفعلاً.. الوضع معقدني.. فتعال لي بالين...
سيف يمسك الدفتر.. ويحل المسئله.. ويتدرج فيها.. وهو يشرحها نطقاً وانها سهله.. ومايبي لها شي..
فارس بتناحه:مافهمت..
سيف بانفعال: لأنك حمار...!!
نزلت مهره بهدوء.. وجلست.. وظلت ساكته..
استمروا في الصراع مع المذاكره.. وهي صامته.. وتناظرهم..
فارس وهو يضحك :مهره شوفيه.. ماعرف كذا..
سيف منفعل:لاتضحك.. ياحيوان.. كيف بتختبر فيها بكره..
مهره بخفوت:ماجاء سيف..
فارس :اكيد بتمسكهم امي سلمى لمن العشاء بعد..
مهره بخفوت وصوت مرتجف:كويس.. عشان يشبعون من جده مزنه.. وماتظل تنام هناك ..
سيف عقد حجاجه.. ورفع عينه عن الكتاب: وراك..؟!.
مهره وكنها تنفي عن نفسها تهمه: مافيني شي.. ليش..
سيف بنص عيون وتدقيق:
عجين يدي.. والله فيك.. قولي وش بلاك ..
فارس يناظرها:
وش فيك مهره... وش فيك.. ؟!
مهره.. برتباك ولعثمه :شوفوا انا مو متأكده.. لازم اروح المستشفى..
سيف بقلق:تعبانه..!
مهره بنفي :لا لا زينه انا.. بس شكينا.. يعني انا وامي موضي.. وجداتي.. وكذا.. ان... يووه  شلون اقول...
فارس بنفاذ صبر :وليش يشكون معك.. تراهم موسوسين.. اكيد قلتي صداع قالوا سرطان..
سيف بترقب.. وكأن فهم وش بتقول..
طلعت جهاز التحليل :امي جابته لي الصباح..
وناظرتهم بحماس وقلق.. وسعاده :
انا شكلي حامل..
فارس بنفعال وصياح :اماااااا.. من جدك..
سيف قام وجلس ع الطاولة قدامها..
وخذ الجهاز منها :هو وش يطلع لاصار حمل ..
مهره بلعت ريقها : خطين.. هو طلع خطين..بس مدري.. احس مو صدق..
سيف يحدق في الجهاز ورفع عينه لها.. حدق فيها ولبطنها.. ويدينها ترتجف :
طيب انتي ليش خايفه.. ماتبين..؟!
مهره اغلقت فمها بكفها وعيونها تمتلي دموع.. وبمشاعر جياشه:
خايفه اروح المستشفى ومايطلع صدق..!
سيف ضمها.. وهي تبكي وتقول :ياربي يكون صدق.. اففففف مو عارفه اعبر..
فارس واقف ومتشنج.. وردة فعله عجيبه :
يالله شهالصدمه.. يعني الحين لما تجيبين ولد ولابنت.. يصير اخوي.. اخوي صدق.. ولد سيف بن سعود..
ابتسم سيف..
هل بعد السنوات ذي كلها..
يصير عنده طفل غير فارس..!
مهره وهي تمسح دموعها وبخفوت مبحوح وسعادة:
ايه فارس.. تصدق.. والله انا لسى.. مو مصدقه.. سيف مستوعب كيف السالفه كيوت..!!

سيف مستوعب حجم عدم تصديقها وفرحتها.. يمكن الكل مايقدر حجم مشاعرها.. لان يفكرونه الطفل الثاني لها..
مو مستوعبين.. ان حمل مهره هذا الفرحه الاولى لها..
باس جبينها وكفها ومسح دموعها :
ياربي.. كيف النعم تجي تباعاً.. الحمدلله عليك.. وعلى العطايا اللي تجيني بسبابك..!

*****