رواية مبعثر فيك ماللحزن لايشفى الفصل الخامس والعشرون 25 - بقلم ايمان يوسف🕊️

البارت الخامس والعشرين

سافر سيف الصغير ..
بين ألم الجميع وصلابة مهره اللي تلبستها من يوم امس..

تقابلت مع وليد ومشاري ووصتهم عليه.. خذت وعود غليضه من مشاري.. ان الولد في امانته.. وانه ينصفها لو ألتوت سما في وعدها ..
ابتسم مشاري :ارقدي وآمني..لو ألتوينا حنا ابوي بيرجعه لك.. هذا وعدي لك..

مهره ماكانت مستوعبه حجم العلاقة اللي تكلموا فيها عن راجح وابوها..
بس قالت بعصبية: مشاري..انا مو مستوعبه شي من الماضي بين ابوي وابوك .. ولاشي.. انا علي من الحين لو سما خبصت نفسيتها.. سيف بذمتك..
مشاري : بعيوني..
التفتت لوليد:خالي امانه.. لازم تزوره انت وماريا.. تشوفونه وتطمنوني عليه..
وليد:بدون ماتوصين.. انتي بس انتبهي لحالك.. يابنتي تطمني لايجيك شي..
مهره بعصبية وصوتها طلع مرتجف:
انا مافيني شي بالعكس متفهمه..وذا شي اذا ماصار اليوم بيصير بكره..
سيف حسها مع الساعات تشحب زيادة وتظاهرها يضغط عليها اكثر.. مسك يدها واسند ذراعها:
مهره.. وش رايك نروح المستشفى..تشوفك دكتورتك..
التفتت بحدة: ليش مستشفى.. ترى مافيني شي.
احتار سيف ..
كيف..
كيف يتعامل مع مهره ونفسيتها الغريبه..؟!
.
.

غادر سيف.. بعد عناقات مطولة وحبس دموع جامد من الجميع..
عشان مايبكونه..
ولايحسسونه بصعوبة الوضع..!
واللي قلل من حدة الرحيل عند سيف.. ان نواف هو حمله وراح المطار معهم هو وفارس..!

مهره كانت واقفه متجزله لها يومين بدون بكي ولااكل.. واعصاب على المحك..!
بس سمعت صوت السيارة غادرت..
وكانت واقفه على الدرج الخارجي معهم..
اختل اتزانها..
بسرعة مسكها سيف..
مع اصوات موضي وزينه الملهوفة..
مهره عيونها شبه مفتوحه.. توقف مره ثانيه:
مافيني شي.. والله مافيني شي..
سيف بعصبية:
مهره.. اكلي لك حاجه.. ولاخلينا نروح المستشفى..
موضي:يايمه مو زين عليك.. تراك شايله روح.. انتي مسؤولة عنها..
مهره بخفوت.. وكانها تسمع اصواتهم من بعيد:
بنام شوي واصير زينه..بس تعبت مارتحت من امس..
زينه امسكت ذراعها الثاني :
عشاني مهره.. قبل تنامين اكلي اي حاجه..
هزت راسها نفي: لمن اصحى..
سحبت يدها من زينه ومسكت ذراع سيف بكفوفها :
تكفى سيف.. خذني  فوق.. احسني بنام وانا واقفه ..

'كيف سأغفر لنفسي.. عودة ألمك هذا.. وشدته.. من مثلي يعرف هروبك من حزنك بالنوم.. من مثلي كان ينتظرك ساعات وساعات.. وانتي تعبري عن رفضك للحياة والعيش بالنوم الطويل..'
خذها وساعدها.. دخل معها وصعدوا فوق..!

بلقيس انهارت بكي :
ياعمري يامهره.. والله ماتستاهل كل اللي يصير فيها..
زينه تناظر حيث اختفت اختها:
الله يجبرك ياخيتي ..
وتحشرج صوتها وهي تقول :آاااه عليك يامهير..آااه..
موضي وهي تبكي بعد:
الله يرضا عليكم يابنات.. تماسكوا.. عشانها...
جلست زينه على العتب وشردت في الارض بصمت..

'حلقي مُر كالعلقم.. ذهاب سيف.. حزن مهره.. فقدي لصغيرنا الشقي.. اطفئ في قلبي حلاوة الحياة..
فجأه.. احسست ان الدنيا باهته.. وان كسورها بليغه.. وان الجبر مستحيل..
هذهِ الحياة تضربنا مع كل التفاته.. وان الامل كذبة..
احتار الدمع ليس في عيني.. بل في حلقي..
وجه مهره الشاحب كالموتى.. لايفارق عيني.. ذهبت مهره لتنام..
خفت.. خفت فعلا ً.. لو نامت مهره بهذا الكم من الألم..
هل ستصحو..!
ام تكون كجارتنا.. التي مات ابنها ونامت.. وماتت كمداً عليه'..

موضي بحنية:
زينه امي قومي ندخل.. قومي بنتي لاتغتلقين هنا ماهو زين..
زينه تمسح عيونها:
ماعليه خالتي لاتحاتين.. روحوا انتوا ارتاحوا.. انا اروح الملحق..لمن....
قاطعتها موضي وهي تمسك يدها وتقومها:
اي ملحق .. البارح نامت معك مهره.. تعالي امي والله ماخليك لحالك..

خذتها معها ..
بالداخل سعود جالس بصمت.. بلقيس تمد له ادويته.. خذها.. وقال:
اتركي علاجي.. واطمني على مرت اخوك.. مهره ماهو شلية ابد..
بلقيس:طيب بروح.. بس خذ علاجك يبه.. ضغطك مرتفع الله يحفظك لنا..روق..
جلست زينه ..
تراقب الأب كيف تعبان ويحاتي مهره.. وبلقيس صعدت..
وموضي  راحت تسوي له كركديه بارد عله ينزل ضغطه..

بتردد ربتت على كفه:ماشتدت وتعسرت واستحالت..
ردد معها سعود بصوت رخيم:الا واستهلت وتيسرت واستهانت..
زينه:اذكر الله ياعمي.. شدة وتزول ..
ابتسم وهو يحط كفه على راسها:
الله يرضى عليك يالزينه.. الظروف عاكست.. ولا دخلتك في هالبيت.. ياكبر قيمتها عندي.. تراك مرت الغالي..نواف شعرت جوفي .. سامحيني وانا ابوك ..

زينه ماكان ناقصها الا هالصوت المتحشرج الحنين وهو يستسمح منها في اشد اوقاته صعوبة..
امتلت عيونها دموع:
الله يحفظك.. وياجعلك ذخر.. واصلني شعورك اي والله ..لاتحط في بالك عمي..
سعود بتنهيده:
مهره ماتروح عن وجهي.. ولاهالصغير اللي راح.. يابنتي مدري انا ظالم احد بحياتي.. والله يعاقبني هالحين على فعايل عيالي..

زينه بلعت ريقها وبغصه :
ولاتزر وازرة وزرا اخرى.. مايجي منك الا كل خير ياعم سعود..

نزلت بلقيس وقالت لهم ان سيف يقول ان مهره نامت..
زينه جلست معهم..
ربما وقوفها ووجودها معهم في هذا المصاب قربها منهم ..
و تعرفوا عليها اكثر..
كانت مثل مهره.. مبينه متماسكه وكاتمه.. وتحاول انها ماتوضح دواخلها عندهم..
لأن الوضع كان متوتر.. وموضي وبلقيس كل شوي يقيسون الضغط لسعود.. اللي ارتفع ومايبي ينزل..!

*****
رجعوا نواف وفارس قريب الفجر..
اشكالهم مُرهقه وتعبانه..
البيت كلن في غرفته وغالباً نايمين..
نواف راح الملحق.. دور زينه مالقاها.. اتصل عليها وماترد..
تسائل هل مشت..؟!
صعد ولقى فارس جالس بالصالة العلوية.. شارد..!.
بخفوت: وراه قاعد هنا.. قم نام..
فارس بضيق ابعد راسه على ورى:
مدقور نواف.. احس بدخل الغرفة واشوف فراش سيف.. صوته يرن في اذني وهو يبكي..!

نواف ربت على كتفه :
الله يعين ياعمك.. الله يعين..
نزلت جنب عين فارس دمعه وهو يهمس :
الله يرحمك ياعساف.. وش اللي سويته فينا..

*****

بعد شوي..
دخل نواف غرفته وهو يدق على زينه.. تفاجئ بجوالها يهتز وهو صامت ع التسريحة..
والغرفة ظلمه الا من ابجورة جنب السرير.. تلفت ولاشافها..
شغل النور..
وهو ينادي :زينه..!
انتبه لها جالسه على الارض من الجهه الثانيه لسرير.. قرب لقاها تخفي وجهها بركبها وواضح تبكي..
عباتها على كتوفها ماشالتها..
همس : زينه حبيبي..!
رفعت راسها وهي تمسح عيونها وما رفعت راسها عليه وهي تحاول تخفي بكاها..
جلس عندها حط كفه على ركبتها:
زينه.. ناظريني ..
رفعت عيونها الحمراء له :خلاص راح سيف يعني..
هز راسه ايجاب :
ايه.. الله يحفظه.. ماجيت الا بعد ماطارت طيارتهم..
انهارت بكاء بصوت :حبيب خالته النتفه.. ياربي كيف بنتحمل غيابه..
نواف خذها ضمها وبحنيه وهلع:
زينه.. صلي على النبي..
زينه تتكلم وهي تبكي :
حبيبي اهو.. ياربي بفقده.. كيف يصير كل ذا.. خايفه على مهره.. وخايفه عليه..
مسح على راسها :
الله معه.. ومهره قويه.. بتشوفين كيف بتستوعب الوضع وتعتاد..
زينه تتكلم وتفضفض عن سيف.. ومهره.. ومواقف..
ونواف محتفظ فيها عنده..
بعدت عنه بعد ماهدت.. مع طبطبته واسلوبه الهادي..

نواف يغير الموضوع:رحت دورتك في الملحق .. خفت تكونين مشيتي ..
قالت : قالت لي الوالده انتظرك هنا لمن تجي وتتفاهم معي..
ابتسم وداعب انفها:
زين سوت.. عاد انا بعد هالغباين محتاج حضن مزه انام فيه..
زينه بتهكم توقف: ياشيخ..!.
نواف قام بسرعه وضمها من ظهرها وبشطانة:
ترى من جدي.. مامزح..
ابلعت ريقها بعصبية :
وش اللي ماتمزح.. نواف لايصير الوضع عيب عاد.. ترى يكفي اني كاسرة بروتكلات الخطوبة وقاعده بيتكم ..
نواف يتكلم جنب اذنها:
انتي تقولين ماتبين عرس..؟!
زينه وقلبها يرجف لهالقرب: طيب..؟!
نواف:واشهار.. الكل يدري.. جوالي يستفرغ من رسايل التهنئه ..
زينه:نواف لا تخربها.. ترى وضعنا غير مناسب.. للإيحاءات اللي انت قاعد تقولها..
نواف بهمس وانفه على رقبتها:
اي ايحاءات..؟!
زينه.. داخت خلاص.. بخفوت:
نواف..! خلاص بعد عيب..
همس لها: انتي زوجتي.. وانا واحد عاصم حالي.. خليني اجرب..
حسته بيخرب الدنيا:
لو اني مو مطلقه كان حطيت حدود.. بس عادي ماتفرق.. هذا اللي تقوله جواتك..
بعد عنها نواف :
يلعن شيطانك كانك خربتي جوي..
تكتفت وارفعت حاجب :
يعني هذا نيتك.. يلا نخبص سوا واذا ماكملنا.. هي اصلا مطلقه.. ماضريتها..
تركها وراح غرفة التبديل :
والله ولاجاء في بالي.. انتي من وين تفكرين..
زينه وهي تحاول تلملم رجفتها:
يعني نواف احنا في هالسالفة.. معقول بندخل في مود ثاني..
طلع من غرفة التبديل وهو مدخل راسه بتيشرت  وينزله على صدره وبطنه:
سيف بصحه وسلامه وكل اموره طيبه.. لاتحججين.. مو عندنا واحد متوفي واحنا بنكيف مع بعض..
لمحته.. ونزلت عيونها بسرعه.. اففففف ايش هذا.. جسم نواف يوجع القلب رياضي ومفصل..

جاء عند التسريحة.. راقبته وهو يتعطر.. بعدت عينها عنه:
الحين انا مافهمت اصرار خالتي موضي انِ انتظرك هنا..
رفع حاجب ومر من عندها جلس على السرير :
انا موصيها..وبعدين زينه خلينا واقعين.. اذا حنا ماراح نسوي حفل.. ليش مانختصر الوقت..

جلست على كرسي مقابله: نختصر ايش.. نواف ترى حنا ماخذنا حتى اسبوعين من ملكتنا الغريبه ..
نواف حيل خاطره فيها ومزاجه محتاجها.. وجودها في غرفته فوق طاقته.. بس حاول يسيطر على نفسه.. وهو يشوفها قاعده قدامه.. على الكرسي وحاطه رجل على رجل.. وتتلفت في كل شي.. ولاتناظره.!

سحب سيجار واشعلها.. نفخ دخانها.. التفتت باستغراب.. :
تدخن..؟!
نواف وهو ياخذ المنفضه على فراشه:
كنت اشيش.. ومع سفراتي الاخيره ماتحصل الشيشه.. وطحت في الدخان..
زينه بامتعاض :الله يهديك..
ضحك:زينه.. مب اشرب.. دخان لاتكبرينها..
زينه بنص عيون: طيب الله يهديك..
قال:الحين وراه بهالعباة.. بتمشين..؟!

زينه:والله ليت امشي.. بس احاتي مهره.. ود اطمن عليها بالاول..جد نواف احس وضعي ماله داعي.. ومتوهقه بعمري.. مب عارفه وين اقعد وين ارقد.. ايش رايك.. تشوف سيف واطمني عليها ثم توصلني لجديده..
طفى السيجار:
والله يازينه انك ماتستحين..!
توسعت عيونها:انا..؟!!
نواف:ايه انتي.. الحين انتي في بيتك.. وغرفتك.. وهذا حكيك.. قومي شيلي هالعباية وعيني خير.. وتعالي نامي هنا..
وطق الفراش جنبه:
زينه بهلع :من جدك..؟!.
قال:جربيني.. لو وضعي معك عابر وبس بستقل وضعنا.. بخربها.. ولو انا رجل تحطيني على يمناك يصبح عليك الصبح وانتي على حالك..
ارتبكت : وانا اذا نمت فيذا.. ماعلي منقود.. قم نواف دبرني بمكان ثاني..
نواف استرخى:
اي منقود.. انا زوجك واهلي يدرون عن وجودك..
قامت :طيب تمام.. نام انت انا ادبر نفسي..
راحت للباب.. لقته مقفول.. التفتت بحده وبغيض وخفوت:
نواف قم افتح لاتستهبل وتوترني..
نواف: الباب يقفل لحاله.. السستم عندي يعلق .. مايفتح الا الصبح..
زينه في بالها:ياربي احر ماعندي ابرد ماعنده.. وانا كل الامور معاكستني وضدي..
حاولت تستجدي عطفه:
والله بروح اجيب فرشتي من الملحق.. وحتى شنطتي تحت وببدل ملابسي ..
قام وفتح درج.. طلع فرشاة جديده:
يلا اخذيها.. ولاتحججين..
تنحت مكانها.. مدها:طيعيني زينه.. خلينا نقرب من بعض..كيف بنحب بعض كذا.. وانتي تهجين مني.. ولاتثقين بنيتي..
خذتها وهي تناظر عيونه..
فعلاً هي تنجذب لنواف.. تحاول تبعد وماتبي تغشها البدايات..!
بس الواقع ان قلبها اسفنجه جافه.. ونواف بحر هائل من المغريات..

زينه كأي بنت كانت عندها احلام وخيالات.. الا ان عبدالاله حرق الاحلام وشوه الامنيات.. وغيب من عينها كل معنى  للحُب..باتت خائفة من فكرة ان يتملكها رجل.. ويعشقها..

فسخت عبايتها.. كانت لابسه لقنز اسود وبلوزه واسعه كات ورديه..
ابتسم : هذا انتي مبدله.. ليش الكذب..
راحت ناحية دورة المياة:
كذبت.. عشان اطلع من هنا..
لحقها.. التفتت واهتفت:
نواف..؟!..
فتح دولاب الحمام :بطلع لك معجون الاسنان..
خذته:عشت..
قرص خدها:يالبى اللي تتكلم نفس الشيبان.. عشت اجل..
اكتمت ضحكتها ودفته بره: خلاص نواف برررره..!

*****
بعد شوي..
نواف منسدح على جنب ويناظرها ..
وهي على الكرسي المريح ثانيه رجولها.. وجالسه ومتلحفه ببطانية طلعها لها من الخزانة ..
يسالفون عن عدة امور..

لما ابتسمت واشردت:
تصدق نواف عبدالاله كان يشك فيني في كل شي.. مايثق ..بس قد مره شك حتى فيك.. يعني مدري هو جنيه كان متنبئ للي حنا فيه الحين..
ضم مخدته وهو على بطنه: مافهمت..
قالت :تذكر يوم اطلع من بيت جديده.. وقت انت جاي تاخذ سيف.. كنت انت بسيارتك بره.. تدري ان علق وشرشحني .. يقول اخو زوج مهره.. ماوقف هالوقفه الا يبي يشوفك..
ناظر عيونها مده طويله.. بعدها همس:
اتوقع انها المره الوحيدة اللي صدق شكه وخوفه..
عقدت حجاجها :وش قصدك..؟!
نواف بغموض:ولاشي..
زينه:ياليل.. ماحب هالحركات..
ابتسم:تعالي نامي.. وعد ما ألمسك..
زينه:مرتاحه انا بهالكرسي.. وبعدين بطقطق بجوالي.. مافيني النوم..
نواف بصوته الناعس:عنيده..!.
راقبته وعينه تروغ وينعس زياده وينام..
ظلت كذا تناظر ملامحه الهادية النايمه..
ابتسمت بحنية..
بعدها فتحت جوالها.. وراحت تفرفر فيه وهي مسترخيه كذا..!

*****

'شعرت به يتشبث بظهري .. اقدامه يعقدها في بطني .. واظافره تكاد تدمي صدري .. ويصيح بانهيار : ماااابي الوووح ماما .. ابيك مااااماااا.. ابيك مااااما ..
واحدهم يشده عن ظهري .. فينغرس سيف بقوه فيّ.. فاشعر به كالطعنات في كامل جسدي .. ظهري وبطني .. صدري .. وانا ابكي معه '

واحاول افتح يدينه عشان مايتعور من شدهم له واقول بانهيار :
لايوجعونك يمه.. باخذك منهم .. لاتتعور يمه ..
وهو ينغرس في جوفي .. حتى شعرت باقدامه .. فعلاً فتحت شروح هائله في بطني وادمتها ..
بكيت بخوف وهلع : فكني سيف .. اوجعتني اوجعتني ..
صاح متشبث فيني : ابييييييك انتي ماما.. مابيهم .. ابيك..
صحت : فك سيف .. فتحت بطني ..

اتسعت عيناي وانا ارى دمائي تتخذ طريقها ..لتسري على فخذي وساقي وتقع في الأرض ..
لم اعد اسمع سيف .. لمست ظهري ابحث عنه..صدري وعنقي .. وكان اختفى ..
صحت بصوت مزق حنجرتي :
سيييييف ...يماااااه ... !

صوتي لم يتعدى الكابوس الهائل ولا حتى شفتاي الجافتان .. فقط فتحت عيني برجفه بسيطه.. وكأني اسقط من مرتفع ..
كنت غارقه في عرق بارد ..
سأتحرك لكن منعتني ذراعي سيف الذي كان يضمني .. وجهي مغروس في عنقه ..
لم تكن لدي طاقه لابتعد عنه .. آلام في كل جسمي .. مغص رهيب يقطع معدتي .. همست بوجع:سيف اصحى ..
تحرك شوي ..
بس صوتها كان خافت مره وماسمعه..

ابتعدت عنه وقامت.. وراحت لدورة المياة..

شوي تحرك سيف وتوعى..
واعتدل بسرعه وقت ماشافها..
وسمع صوت الماء بالحمام..
تنهد..
وهو يطول على الابجوره ويقوم..
طرق باب الحمام :مهره..
بخفوت:هلا..
اطلق تنهيده وهو يرجع الغرفة ويشغل النور يبي يشوف لها شي تاكله.. بسكوت او عصير.. بعد مانامت كل هالساعات..

مع النور انتبه للنقط على الأرض من السرير الى الحمام..

توسعت عيونه برعب..
ترك اللي عنده وراح فتح باب الحمام بسرعه وبخوف :مهرررره..!

******

كان الصبح بدء يطلع.. وفارس في الصاله العلوية يتابع فلم..مو جايه النوم بعد التوترات اللي صارت..
لما انفتح باب غرفة ابوه وطلع سيف..
رفع راسه يطل من الكنب :يبه..!
سيف بعصبية:زين انك صاحي.. (رمى عليه المفتاح) .. شغل السيارة سريع وقربها..
توسعت عيونه وهو يشوف الدم.. فبلوزته ورقبته:
وش ذا يبه.. شهالدم..!
سيف:مهره.. انفها يرعف ومغيبه.. بسرعه يبه.. ولحد يحس بشي..
قال كذا وعاد للغرفه..
فارس نزل بسرعه..
في ظرف دقايق كانوا فالسيارة.. سيف يسوق.. ومهره ورى مع فارس.. كان ماسك فوطه تحت انفها وراسها عنده وكانت واعيه.. بعدت الفوطه:
خلاص فارس وقف شيلها.. خلونا نرجع..
شال الفوطه وشاف انه وقف:
وش ترجعين.. مهره وش فيك تبين تموتين..
رجعت راسها على للوراء ومسكت انفها من فوق :
تكفون خلوني ارجع.. والله دايخه.. مافيني لقلق مستشفيات..
سيف يناظرها من مراية السياره.. صفراء ومالها لون.. ولاتكلم..
اعصابه فلتت من شافها جالسه بدورة المياة.. وانفها يرعف بغزارة ..
هو اول ماشاف الدم.. خاف وفكر ان البيبي صار له شي..
كيف كانت بلوزته ورقبته كلها دم..  كيف رعفت وهي جنبه بحضنه ولاحس فيها..!
خذها وبالغصب شربها عصير.. كانت بحالة اغماء..
مهره بإلحاح: سيف انا كويسه خلاص نرجع ..
سيف :ماراح ارجع الا لمن اطمن عليك.. ودامك ماهو ماكله.. يحطون لك مغذي.. وشوفي مهره.. اذا انتي بتعاندين.. كل شوي بشيلك ويركبون عليك مغذيه..
مهره بتوسل وخفوت: باكل بس رجعني..
ومالت براسها على كتف فارس وغمضت..
فارس بخوف:وش فيك..؟!
حركت راسها:فيني النوم ورب الكعبة..
طبطب على راسها: تمام.. نامي.. بسم الله عليك..
سيف وقلبه يحترق..
ايش مدى الاكتئاب فيها الحين..تصحى وتنام.. تتكلم وتغفي.. ياربي الصبر..!

*****

فتح نواف عيونه فالصباح..
واول مالمح..
وجه زينه وهي نايمه على الكرسي..
'تأملت عنقها الطويلة.. نحرها.. وكُل زينه يفقدني صوابي..
لكنها تستحق الصبر.. اذا كنت عاشق.. ونضجت واحترقت.. هي تبقى جديده فالعلاقه.. خائفة وحذره.. ولا تلام'

قام وراح بعد الجوال من على بطنها..
ماهانت عليه كيف منثنيه كذا.. شالها ونزلها على السرير ولحفها..
ظل يتأملها..
الحديث معها.. وتأملها.. وجودها.. يُريق في قلبه انهار من عشق وجنون..

‏فاطمٍ قلبي عن الغير يا نشوة رجايّ
‏لا سمعت اسمك غدى فالمعاليق حركه

*****

بيت راجح..
وصلوا..
سما كانت تراقب السيارة من النافذة العلوية وهي تدخل السور ..
ماسكه الستارة برجفه وترغب.. ماهي مصدقه..
كانت خايفه ان مشاري يكذب عليها.. وانه صدق خذه..
شافت ابواب السيارة تفتح ..
وينزلون مشاري ووليد..
ووليد ينحني داخل السيارة ويطلع منها وهو حامله..
وسيف يتلفت حوله بدون تعبير..
نزلت الدموع من عيونها تباعاً..
وهي تطلع من غرفتها وتنزل الدرج بسرعه.. وليان وابوها تحت.. وباللهفه وبكاء :
بابا وصلوا.. اقسم بالله وصلوا..
راجح تنهد وشال نظارته وترك المكان ودخل مكتبه..
سما عارفه ابوها زعلان.. رغم انه سوا كل شي عشانها الا انه زعلان..
مانتظرت تفكر او تتعمق في ردة فعل ابوها.. بسرعه فتحت الباب..
ومشاري يبتسم :وصل ورعنا ياسما..
سما تناظره بين يدين وليد..
وهم يدخلون..
ملامحها فيها تعبير فرح وبكاء .. تردد وحذر..
وسيف يناظرها بدون اي ابتسامه..
همست ملهوفه:سيف.. كمان ماي بيبي..
سيف تمسك في رقبة وليد..
مشاري غمز:سما.. ترى سيف مايعرف انجلش ابد.. ركزي لاتخلطين..
تداركت وهي متلخبطه:سيف حبيبي تعال..
التفت عليها.. ورجع ضم رقبة وليد..
ليان توترت من الموقف..
حست الصغير.. بيقمع سما المتحمسه..
وليد يداعبه:
هذا وصلنا لسما.. ماتبي تلعب معها مثل هاك اليوم..
سيف.. دخل وجهه في رقبة وليد:
آلي..ابي ماما.. ابي فالس..
وليد انوجع قلبه:بنرجع لهم يابابا.. كم يوم ونرجع..
سما قربت بتحاول تاخذه.. بس هو تعلق في وليد..
سما خلاص بتنهار بكاء..
وليد راح جلس على الكنب وسيف في حضنه:واللهِ فللنا نوم.. بالطيارة.. وسيف عاد ماخلا لاحد نوم..
سيف يدافع عن نفسه:نمت بس اسوي.. والله..

مشاري خذ سما وجلسوا..
بعد ما اشر لهم وليد.. يعطونه فرصه ياخذ شوي ع المكان..
.
.
في الطرف الثاني..
سيف يدخل غرفة في المستشفى.. ومهره حاطين عليها مغذي :
كيفك الحين..؟!
مهره :تمام.. والله سيف تبالغ.. ترى خشمي هذا سلمه مافي شي خطر..
ابتسم وهو يحط يده على جبينها:
نطمن.. وثانياً باقي ماخلصت المغذيه..
مهره بملل:خلصت وحده كامله ذي الثانيه.. وبعدين حرام.. فارس نايم على هالاريكه.. خطيه مو مريحه (مفهيه وتقط عراقي بعد) .

جلس جنبها:شفتيه كيف تحمس وهو يسمع نبض الجنين..
مهره ابتسمت اخيراً :والله ماغير نفسيتي اليوم.. الا ضحكة فارس وهو مصدوم بالنبض..
باس يدها:يعني حطي في بالك صاحب هالنبض مهم علينا كلنا.. انتبهي له يامهره..
طالعت سيف بملامحها الشاحبه وعضت شفتها.. وبتردد:
سيف وصل..؟!. ولالسى..
ناظر ساعته: اكيد وصل..
مهره:طيب كلم خالي وليد.. خلني احاكيه..
سيف:ابشري..

عند بيت راجح.. رن جوال وليد.. رد:
ارحب يا كحيلان.. اعذرني مادقيت.. تو واصلين بيت راجح..
سيف :ها بشر.. وش وضع سيف..؟!
وليد يناظر سيف بحضنه:والله ناشب بحضني مابيضها..
مهره كانت تسمع وليد من سبيكر..
قالت:خالي خلني اكلمه..
وليد :من عيوني خالي..
عطاه الجوال :هاك كلم..
سيف حط الجوال بذنه وبس سمع صوتها شهق:ماماا..
مهره عضت شفتها :امي..!.
سيف تزحلق من حضن وليد وراح يمشي بالجوال بعيد.. كأن مايبي يسمع احد وش بيقولون..
قدام نظرات سما المكسورة..
وليد:ماعليه سما.. كل هالامور بتعدي.. الولد مستغرب وماينلام ..
ابتسمت وهي تحاول ماتبكي:شور وليد.. انا اصلا ً حاطه في بالي كل ذا ومهيئه نفسي..
ليان ابتسمت وهي تداعب خدها:
سما ولدك كيوت يهبل.. صدقيني نطلع به الملاهي.. ونهبل فيه ينسى مهره وسيف والسعودية بكبرها..
وليد عقد حواجبه.. ومشاري نهرها:ليان..!
ليان بلامبالاه:طيب انا شقلت.. ضروري بنحبب الولد فينا والا كيف بيظل..
وليد:ضروري سما ماتفرضين عليه الامومه.. او تغصبينه يناديك بها.. لمن يكون عنده تقبل..
هزت راسها ايجاب وهي مخنوقه وتشوفه بعيد منسجم بمكالمته مع مهره:
اصلا ً واضح ماعندي فرصه..
قفل سيف الجوال وجاء عطاه وليد.. وفاجئهم لما راح لسما اللي كانت منزله راسها بعد جملتها المجروحه وباس خدها..
توسعت عيونها بعدم استيعاب وهي تناظره والدموع تملي عيونها..
وصدمهم لما صعد على الكنب وضمها من رقبتها: ماما قولي.. ابوسك.. واعطيك حنان..
سما انهارت في دموع صامته وهي تضمه :
روحي.. وش كثر حاجتي لهالحنان.. ياقلبي..

ابتسموا بتأثر.. وهم يشوفون سما تحتضنه بهالطريقة .. واصابعها النحيلة فشعره الغزير..سيف استطاعت مهره اقناعه بطريقتها ..
استكان في حضنها ويطبطب بيدينه الصغيرات عليها..

*****
مهره  قاومت.. قاومت مابكت وهي تكلم سيف..
تكلمت معه بعقلانية ..

والحين بعصبية تحاول تشيل الابره الفاضية باليد الثانيه صاحت:
نادهم سيف خلهم يفكونها.. اختنقت.. ابي اطلع اتنفس..
سيف مسك كفها وبانفعال:اصبري.. لاتعورين.. خلاص بناديهم..
فارس صحى على صوتها وابوه يحاول يمسك كفوفها.. وهي مو قادره تبكي.. وتصيح انها تبي تطلع وانها اختنقت..
طلع فارس.. نادى النيرس..
و جات وبانفعال من الدم اللي طلع من كف مهره وسيف ماسكها:ليش كدا هبيبي.. ليش..!!
سيف :خلاص سستر شيل..
الممرضه تفك اللزقات وباستياء:لاإلوها الا لله.. انتي بيبي.. سوي كدا..
مهره بعجله تفتح لاصق المغذي وبعصبية:
اخلصي افتحي هذي ماني ناقصتك..
الممرضه ارتبكت :بابا.. هذا تحليل.. حق مخزون سكر مافي يطلع..
سيف ياخذ اللزقه يحطها لمهره:انا اجي بعدين اخذه..
مهره برجفه:فارس ابوي.. عطني نقابي..
جابه لها.. تحجبت ولبسته.. ومسكت يد سيف ووقفت..
ساعدها وطلعوا..

مهره فالسيارة.. شردت من النافذة وسيف يسوق..
'اختنق.. اختنق.. والدنيا تكتم انفاسي.. ابني بعيد عني.. تفصلنا قارات... وقلبي ورب الكعبة واهن.. '

سيف مسك كفها وضغط عليها..
'احسست ان يده تضغط ببروده على قلبي..! '

*****

زينه وقت الظهر  صحت مالقت نواف.. توضت عشان تصلي..
طلعت وهي تمسح وجهها بمنشفه..
نواف دخل والجوال بأذنه:
لابالعكس احسن.. يمكن تتغير نفسيتها عن البيت.. خلاص اشوف زينه ونجيكم..
اغلق وهي تناظره بتسائل..
ابتسم :يعني انتي من جدك بتروحين.. وتخليني..
زينه:لازم.. هو الجيه عشان مهره ولانسيت..
بنص عيون :جاملي.!
زينه تطلع قلم حواجب من شنطتها.. وتحدد حواجبها وترتبهم وهي تناظر المرايا:
حتى لو ماقلت.. الواقع ان حنا قضينا الوقت اصلا مع بعض.. اكثر من مع مهره..
نواف مستمتع وهو يناظرها.. وهي ترتب شعرها بمشطه وتضبه.. جاء وراها وضمها.. وانفتح شعرها من يدها..
هتفت:نواف..!
طالعها في المرايا:
مهره تعبت.. وخذها سيف المستشفى...
بهلع وشهقه : شفيها..!
لفها جهتها :لاتشوهقين هي زينه الحين بس كان ضغطها نازل مره.. ونزل من انفها دم كثير .. هي طيبه الحين وخذوها سيف وفارس للمزرعه علها تغير جوها.. ويبونا نروح لهم..!
زينه وقلبها يخفق :بسم الله وربي انرعبت..
حط يده مكان قلبها واحس بنبضها المتسارع..عقد حواجبه وبخفوت:
زينه قوي قلبك مايصير كذا..

*****

'اصرت مهره ان تعتلي الخيل وتركبه.. بعد ان ذهبت بها الى الاسطبلات..
كنت رضيت على ذلك بشروطي.. مع اني خائف عليها والله..
لكن..
كان الشرط ان تآكل حتى الشبع وقد فعلت..
احسست انها بحاجه مُلحه لذلك..
علا ركوب الخيل.. من طرق مهره في التنفيس.. كما تفعل مع النعاس والنوم..
كنت ارقبها وهي تتهادى على الحصان.. تركض به بخفه.. وتتعامل معه.. وكأنها انعزلت عن العالم..
ماتنفك الدنيا.. الا وهي تطعن في مهره.. مخلفه ندوب في معالمها الجميلة..
وجروح غائرة لاتندمل..
ذابله مثل ياسمينة شاميه.. متروكه بعد حرب..
ربيع مهره احترق وبات خريف..
جفت عروق الصبر.. ومات الحوار.. مهره صامته..  تمارس وحدتها دوني..
رافضه ان يشاركها احد.. وحيده فالمضمار..
نرقبها انا وفارس..
بقل حيله..
ماذا نفعل بأنثى ثكلت ابنها..بمشاركة اخرى..حقها فيه..
مهره ضحية عشق عساف وسما الملعون..!

جاله اتصال وابتعد وهو يرد :
ارحب ياطليق الحجاج..
طلال: البقا يابعدي..
سيف:ها بشر..
طلال:مثل ماتوقعنا.. علاقة منصور براجح.. انه يستخدم قطع من راجح.. في غسيل الاموال.. ونسبة راجح.. تكون حلوه بالاضافه للقطعه نفسها.. يعني راجح يصير كأنه يأجر القطعه ويطلع منها ارباح.. ونفس الشي عنده دعم له كمعارف في المجال.. مثل اللي حصل فلوحة ادوارد بفرنسا..
سيف:يعني الحين راجح.. ممكن يطلع من هالقضيه.. لو اقدمنا في شغلنا ضد منصور..

طلال:الى الآن ممكن..ع الاقل لو تعاون معنا.. خاصه ان راجح مرت عليه فتره.. في تهريب الاثار.. بس بعد بحثنا والتحقيقات.. توقف عن هالشي او على الأقل مافيه شي ضده قانونياً من مده.. راجح بالفعل يشتري القطع والاثريات ويدفع فيها مبالغ جامده.. ومنصور هو اللي يشتغل فيها.. في تنظيف عفن فلوسه..

سيف بعصبية:كيف يطلع منها ياطلال.. شف الشي الوحيد اني مابي اكون سبب في اذية راجح او اني اغدر فيه..
طلال: راجح ذكي.. تعامله مع منصور نظيف.. والنسب اللي ياخذها.. تحول لحسابه.. عن طريق بيع بضايع من ماركته.. لمحلات منصور اللي عندنا بالسعودية.. يعني مثلا يبيعه بضاعه تقدر بـ١٠٠ الف.. ومنصور يشتريها بمليون.. فيه عقود واصول..
سيف: اذا كذا ممكن.. 
طلال ضحك: ماشاء الله مهتم بهالحيلي.. ماهو صار جد ولدكم..
سيف بزفره:والله ياطلال.. اني بأحلام العصر.. شي مايدخل العقل..
طلال: واختك مافيه خبر عنها..
سيف : مافيه الا رسايلها لابوي.. كل بين فتره وفتره.. شاهين احسه لو يمسكها فرمها..
طلال:الله يلوم اللي يلومه.. والله لو ام عقاب تسويها فيني.. لاارديها برشاش افضيه فيها..
سيف :لله درها متحملتك يالمتصحر..!
طلال:ايه ترى اللي اختك سوته ماهو شوي..
سيف :لاجيت للجد.. عايلتنا فارطه سبيكتها..والله يعين..
طلال:تنحل الامور وموضوع ولد عساف.. لوتعقد احله لك بمعرفتي.. لو عقدها راجح اقدر اطلع زوجتك قانونياً من القضيه كلها.. لاتنسى ان وحده من الدكتورات بالسجن حالياً.. وممكن ناخذ منها شهادة بالوضع اللي صار كله..
سيف:والله في بالي هالشي.. بس الحين دام الأمور سلميه.. ننتظر.. ولانظلم بنت راجح.. الورع ولدها ولها حق فيه..
طلال: اصيل يابوفارس..
سيف :ماعليك زود..
طلال:المهم بجمع لك نسخ من عقود راجح مع منصور.. وبعض التقارير عن  الاثار المستخدمه في موضوعهم.. ابيك تشوفها لي وتشيكها وتتأكد اذا راجح يمتلكها او لا..!
سيف:ابشر يابوعقاب..
طلال:بشروك بالجنه.. سلم لي على الوالد والشباب..
سيف:يوصل..

****

مرت الأيام وسما تلازم سيف.. طلعت به مع ليان.. ابهروه بأمكان الألعاب..
اشترت له كل شي يعجبه..
سيف كان بطفولته.. طايره عيونه.. مو مستوعب وش يصير..
الا نقطة ان كل شي يطلبه ياخذه.. وهالأمر ماهو موجود عند مهره..
كانت تشتري له بس بحدود..
تتخذ معه اسلوب العقاب.. والحرمان والمكافئة..
بس سما تبيه يطلب بس..!
سما بأنانيتها.. قامت تحاول تلهيه عن مكالمة مهره..
بس مشاري يجي ضدها وياخذه يكلم حتى فديو..
فكان احيان يبكي بعد المكالمه ويطالب انه يرجع.. واحيان يكون هو مستاء ومعصب.. وتتغير نفسيته لمن يكلمها ويصير ألطف..
راجح..
كان يراقب الطفل من بعيد..
ولايتقرب منه..
اما سما فكان مايكلمها الاقليل وعتبه عليها واضح..

مشاري بس كان  ملاحظ ابوه كيف يبتسم بحنيه..
ويشرد فسيف اذا كان يلعب.. او يحاول يداعب الكلب الكبير.. يلمسه لمسات خفيفه ويهج..
سما حبت الحياه مع سيف.. راحت تطمح وتسوي اهداف.. عادت للصحافه الكترونياً من غير دوام رسمي..!!
تستغرب من سيف احيان ينزوي بعيد تحت الدرج او بغرفة الملابس.. واحيان وسط خزانة الملابس يقعد فيه تحت..
والسماعات بأذنه ويلعب بالايباد..
هو عنده ايبود صغير.. يشبك السماعات فيه وينام وهو يسمع..
وكانت دوم تحاول يخليه يشاركها.. ومايرضى يقول( بس حقي) ..!
فكانت معطته جوه.. وانُ اكيد يسمع اغاني طفوليه.. متعود عليها..

كان نايم بفراشها.. وكانت تشتغل ع الابتوب لمن وقت متأخر من الليل..
قفلته وابتسمت بحنيه.. وهي تبوسه.. تعلقت فيه بشكل مو طبيعي..
حتى لو هو بعيد.. حتى لو هو يناديها سما وماهو ماما.. حتى لو ماحبها نفس مهره..
حتى لو ماشاف العوض فيها..
سحبت الايبود الصغير..
كانت مبتسمه.. لما حطت السماعه بأذنها.. وتوسعت عيونها.. وهي تشغل الصوتيات.. وتناظر سيف..
كان صوت مهره وهي تغني.. وهي تدندن.. وهي تغني له تهويده.. صوتها وهي تقرى له قرآن.. انصدمت..
ان طفل بعمر سيف.. جالس يسلك لها.. كل هالتسليك الجامد..
ينام بحضنها ومافي اذنه وقلبه الا مهره وصوتها..
خذت الايبود وعيونها تجمر وتحترق بدموع قهر..
وتطلع من الغرفه.. حاولت تتمالك اعصابها وهي تنزل الدرج والبيت ساكن.. ولقت ايباده.. فتحته على الصور..
صور عشوائيه ومقاطع.. سيف ملتقطها لمهره.. وفارس.. وعايلتهم..
وبعض الصور مهره تعطيه وضعيات.. وهو يصورها..
قفلت الايباد برجفه وتركته على الطاولة.. اما الايبود اخفته..
راحت عند ركن في البيت.. سحبت زجاجه برجفه.. ورجعتها..
قبضت على راسها بقوه:لا سما لا.. لاتضعفين..

قاومت وقاومت...
وتركت المكان وطلعت الحديقة بره..

*****

مهره قررت الاعتياد..
ساندها الجميع.. تقوت بالصبر.. تكلمه ويسولف لها.. ويتكلم ان راح وجاء واشترى..
اطمئنت نوعاً ما..

تقنع نفسها بالهدوء وراحة البال عشان البيبي.. وقد بان ببروز بسيط في بطنها..

سندس ..مع انها تعصب على اي شي..
الا انها بهالسالفة اسندت مهره وجاتها.. تكلمت معها وقوتها ..
عطتها الواقع.. خلتها تتفكر ان سيف بخير.. وانها بتجيب بيبي.. حرام تخاطر فيه بزعلها وضيقها..
الكل كان خير داعم..
وسيف مايتركها..
اليوم فاجئها.. لمن جاب تذاكر :
وش رايك..
انصدمت:من جدك..؟!
سيف ببتسامه:فارس اجازه حرام تروح كلها وماطلع..
مهره بتردد :بس سيفي لو..
قاطعها:سيف ماراح يرجع الحين.. عارفه اتفاقنا معهم بمحرم.. والتواصل هذا الجوالات معنا..
ابتسمت ودموعها تغورق :
سيف والله لو ما انت معي مادري وش بيصير فيني..
فتح ذراعينه وهو واقف:
قومي عطيني هاق.. وعطيني جو اللي انهوستي بالمفاجئه..عادي متقبل حتى لو كذب..

مهره قامت وهي تضحك وطوقته بذرعانها.. ضمها وباس راسها وهي تقول:
يعني لو تبي الجد المفاجئه تسطل..
وارفعت وجهها له.. باس شفايفها.. وحط انفه على انفها:
اتمنى انه ماهو تسليك..
مهره :والله من جد.. يمكن تغير المكان يفيدنا وكذا.. وفارس والله مسكين انضغط هالفتره.. ياعمري حتى نادر يطلع لذياب وربعه..

سيف:اجل خلينا نجهز امورنا.. قدامنا اسبوع..
مهره تاخذ التذاكر.. وسيف ضامها من ظهرها:
بس وين..؟!
قال :المالديف..
مهره بمحاولات فرح :وااو عاد اسمع فيها وماشفتها.. ليت زينه ونواف يجون..
سيف :عن نفسي ماعندي مشاكل.. بس زينه موقفه اي تقدم مع نواف وقاعده بيت جدتك..تتوقعين توافق..؟!

*****

باليوم الثاني - لندن ..
راجح جالس تحت ومستغرب من بكاء سيف المنهار ويهاوش..
مشاري كان جنبه وقدامهم بعض الاوراق يشتغلون عليها..
سمعوا سيف وهو يصرخ:
اطيني أقي اقي.. ماما شرته لي..
سما بنفي:
ماهو عندي سيف..كل ذا عشان ايبود.. اشتري لك عشره..
سيف بنهيار:تجيبين عشر ارميهم باله.. ابي هذا.. اطيني اياه.. والله اكسر جوالش..
والنقاش محتد وسما معانده.. وسيف انفلت مره وحده..
راجح بخفوت: شف اختك وش مسويه بالورع..
وقف مشاري على الدرج:
سماااا وش فيك؟!..
جاء سيف على الدرج ينزل بسرعه وهو يبكي بقوه وصوته يرن في البيت كله..
وصل لمشاري اللي جثى عنده:
وش فيك حبيبي.. وش مزعلك..؟
سيف يأشر بيدينه بنفعال:
ايبودي.. اقي.. من ماما.. وانه (حيوانه) سما خذته..
مشاري :افففف.. يمكن انت حطيته بغرفة ليان ولا بره.. ندوره الحين..
جات سما وهو يضرب برجله الارض :
شاااااالي...! انا نمت.. ابود عندي.. قمت.. اشفته.. سما خذته..
رفع مشاري راسه لها بتسائل وصدت بعصبيه..
عقد حجاجه :تستهبلين..!
سما بعصبيه:عنده الايباد.. يلعب فيه.. ليش جهازين..
مشاري يحاول يمسك اعصابه وهو يوقف :
وانتي وش دخلك.. وش يستخدم وش يتعامل فيه.. سيف متعود على نمطيه.. لاتقعدين تعفسينها من راسك..
راجح يراقب بصمت..
لانه باعد نفسه عن اي شي يخص سما بولدها من خذته ..
سما بإنجليزيه عشان مايفهم عليها سيف وبانفعال:
مشاري.. الا تلاحظ السماعه في اذنه طوال الوقت وينام بها.. البارحه بالصدفه.. عرفت انه يستمع لصوت مهره.. كيف بالله سأعلق هذا الطفل بي.. كيف سيفهم اني امه.. وهو يستمع لها طوال اليوم..
مشاري رد عليها بانفعال:
عليك اللعنه.. انتي تتعاملين مع طفل وليس قطه.. مهره امه.. لو وضعتي قدم في السماء واخرى في الارض.. لن تتغير هذه الحقيقه..

سما بزفره وضيق راحت لمجموعة الألعاب.. ونادت سيف.. تبيه يلعب فيها : الله ايش هالسيارة الحمراء.. تعال سيف.. شوف الشاحنه..
جاء بانفعال.. قام ياخذ الالعاب ويرميها واضح يبي يكسرها:
مابيها.. يع.. يع.. ماحبك.. ماحبك سما.. ابي ماما.. ابيها..
سما مسكته تحاول تهديه:ايش رايك نروح نشري كات صغيرة.. في محل حيوانات جميل..

دفها بقوه..
وراح توجه لراجح.. مع انعدام العلاقه معه.. مسح وجهه ودموعه وبنظره قويه :
أمي(عمي).. انت.. الا.. ديب..
سما مافهمت.. ولامشاري..
مشاري بتسائل :وش اديبه..؟!

بس راجح ارتمست على وجهه ابتسامه حلوه وفهم عليه: يخسى الذيب.. وش بغيت ياسيف..
سيف باسلوب يهبل :
قل لسما تطيني بودي.. ولاببكي لمن العيد..
راجح بحنيه مد يده:
تعال ياجدي.. وابشر..
جاء سيف وجلس جنبه يناظر سما بتحدي..
وراجح حط يده عليه وبهدوء وأمر:
روحي جيبي هاللي يبيه.. ولاوالله واللي رفع سبع.. مايصبح الصبح.. الا الورع في حضن مهره..
سما توسعت عيونها :
بابااااا..!
راجح: لاتكثرين الهرج.. (وبأمر حاد).. هالحين..!
سما راحت وهي تتحلطم..
ومشاري :وش قالك هالبرغي وخذك بصفه..
ضحك راجح وهو يناظر سيف :
انتخى فيني.. يقولي لك ولا للذيب..
ضحك مشاري :
اما قال كذا.. والله ماهو سهل.. اكيد تعاليم عمامه..
راجح بحنيه يداعب شعر سيف :
والله كفو من رباه..
سيف شارد بالسجاده.. ورموشه فيها دموع عالقه.. وينتع ويشوهق  من كثر الصياح اللي صاحه..!

****

بالليل.. في بيت فهد بوشاهين..
سلمى تحوس فالصالة وماسكه جوالها.. يبس ريقها وهي تدعي وتطلب.. وتدق ع جوال شاهين وذاك مايرد..

فهد : اقعدي خيلتيني.. لو انك خايفه عليهم مارحتي تطامرين بعرس ولد اخوك ومخليتهم مع الشغاله..

سلمى بانفعال:فهد.. الله يخليك قل خير ولا اسكت.. معهم شغالتين.. وش يدريني بتصير هالسالفه..
(اللي صار ان شاهين كان راجع من العمل.. وبناته كالعاده بعهدة امه.. دخل البيت فوق الثنعش... ولقى عاملة بناته بره وبحضنها ديم.. طايحه من الدرج ومتعوره.. شالها مع العاملة ومعهم بيان للمستشفى.. ولما جات سلمى درت من العاملة الثانيه عن اللي صار.. وعجزت تكلم شاهين ولايرد)..!

بعد شوي انفتح الباب..
ودخل شاهين.. شايل ديم وذراعها بجبس.. ووجها ماله لون من البكاء.. وخدها في ضربه زرقاء..
سلمى بانفعال وخوف:
وش صار عليها.. وراك ماترد علي الله يهديك..
شاهين بملامح جامده نزل ديم على الكنب.. وبيان جلست جنبها..
وقال للعاملة تجهز اغراضهم..
سلمى بعصبية:وين بتروح فيهم بذا الليل..
شاهين بجمود وهو يعدل ذراع ديم المعلقه :
بروح بيتي خلاص انا انتبه عليهم ونونا معهم..
سلمى بشهقه:
الله أكبر عليك.. ترى البزر معرض يطيح.. يعني انتوا ماكبرتوا الا بطيحات وفلقات شكثرها..
فهد:يجري يايبه.. وهذا البزارين.. الله يحفظهم..
شاهين بحده:
مأمنك عليهم يمه.. يومك ماتقدرين تمسكين نفسك عن مناسبات وعروس كان قلتي لي وخليتهم عند خالتي موضي..
سلمى بانفعال:
الله ياشاهين.. هذا مردك لي بعد هالشهور.. ترى لعلمك انا عن الربى وملاحق البزارين لي فوق الثلاثين سنه.. الا اني قابلتهم وسويت كل شي عشانك وعشانهم.. عاد اليوم عرس ولد خالك.. وجابوا بطاقات لهم.. وبناتك ابد مهب راضين يروحون.. الحين لاحضرت عرس ولد اخوي اطلع غلطانه..

شاهين بانفعال:
يمه.. ديم انكسرت يدها.. وضرب راسها بالأرض..سو لها تصوير عله يكون تعور راسها.. وظلت فوق الساعه تتألم بيدين الخادمه.. محد تصرف.. لو صاير فيها شي..
سلمى وهي تجلس عند ديم وتضمها :
اووويه عليها نتفتنا.. بسم الله عليها.. لاتفاول..
فهد : مقدر ومكتوب.. والحمدلله.. جات تسذا.. اقعد وعين خير.. وانت اذا رحت بهم بيتك وش بيتغير.. خلهم حولي وحول امك.. انت في العمل وتغيب بالايام.. اعقل يابوك واطرد ابليس..

شاهين  مخنوق.. قلبه ينعصر.. سب جمان داخله لعنها وشتمها...
على الحاله اللي وصل لها هو وبناته..

*****

باليوم الثاني.. سيف مزاجه متعكر على سما وزعلان وحتى مانام معها..
بالليل شال مخدته وراح غرفة مشاري.. 
ابتسم :ها سيف.. وش؟! 
سيف يغلق الباب.. وشكله بائس:
انام معك.. مابي سما..
مشاري رفع مفرشه له:ياهلا ومرحبا..
جاء وحط مخدته.. وانسدح ومعطي ظهره له..
مشاري يداعبه:
طيب انت زعلان من سما.. بعد زعلان من مشاري..
التفت عليه:
لا.. مازعلت على شالي.. بس سما شليله(شريره)...

مشاري خذه بذراعه.. يسولف معه ويقنعه ان سما تحبه.. وان مو قصدها..
بس قلب البعير  داخل سيف مايبي يسامحها..
.
.

اليوم من الصبح لمن المساء وسيف مايكلمها ولايجي عندها..
والغريب انه يتقرب من راجح وحاس ان هو اللي بينصفه لو سما كررت الحركه..

ظل كذا قاعد وساكت ويحرك رجوله بملل..
راجح نزل نظارته على خشمه :
الى الحين زعلان منها..؟!
هز راسه ايجاب..
راجح: طيب سامحها.. تتوب..
سيف مايطالعه يحرك رجوله على وتيره وحده.. قال بغصه: انا ابي الوح بيتنا.. ماما واحستني..

راجح حزن عليه..
وهو يحاول مايبكي.. ويمسح بكفه الصغيره عيونه.. ويرفع شعره عن جبينه..
قاله:ماتصلت عليها اليوم..
هز راسه نفي :شالي لاح مع جواله.. وسما انا زعلت عليها..
راجح خذ جواله : تعال جنبي.. الحين نكلم..
جاء سيف ببتسامه حلوه: انت عندك لقم ماما أمي(عمي)..؟!
جلسه راجح جنبه:قل جدي ماهو عمي.. ونكلم..
سيف بتكنيشه وابتسامه بينت صفة اسنانه :جدي..!
حب راسه :عندي رقم عمك.. نكلمه ونكلم امك..

واتصل وسيف يناظر الجوال بترقب وحاطه سبيكر..
رد سيف:ارحب يابومشاري..
راجح :البقا..يبــ...
وقبل يكمل.. سيف بحماس :اووبه.. حبيبي..
سيف :ابووي..!
سيف الصغير :وحستوني ابيكم..
سيف:واحنا نبيك.. اخبارك.. واخبار سما ومشاري ..
سيف ياخذ الجوال من يد راجح:نمت مع شالي امس.. قال لي قصه.. قالي اميرة دفدع.. (الأميره والضفدع)..
ضحك سيف:اووه.. خليه يحفظك اياها.. عشان لما ترجع تحكيها لي ولامك..
سيف:وينها ماما.. ابيها..
جاه صوت مهره:سيفي..!
سيف وكالعاده من جاء من يسمع صوتها يعطي شهقة شوق :ماما..حبيبي..
مهره :بعد عمري وقلبي..
سيف يحط الجوال على خده:يلا بوسيني..
مهره ترسله بوسات..
وسيف اخر شي حط الجوال على عيونه وقال :بعد بوسي عيوني..
ومهره تضحك ومعطته جوه وتقول:واحلى بوسات عيون لسيفي..
راجح يراقبه ببتسامه واستمتاع..

حاول يقاوم سيف.. ويكون حاجز من الصد بسبب سالفة سما وعساف..
بس ماقاوم.. سيف يدخل القلب وبقوه..!

*****

في الصباح وبيت سعود.. موضي في مكالمه مع سلمى..
موضي:يالله رحمتك دويم عاد مافيها عمر عظم على جلده وانكسرت..
سلمى:ياختي الكسر يجبر.. والمريض يطيب.. والبزر معرض.. بس شاهين البارح غسل شراعي.. والله كنه ابوي وانا بنته.. مايستحي كلش..

ضحكت موضي :تستاهلين.. يومك بتروحين العرس كان جبتيهم عندي..
سلمى:والله استحيت على وجهي.. شايفه وضعك وهمك.. الا وش العلم عن ولد عساف..
تنهدت موضي:اموره ان شاء الله طيبه.. نكلمه ويسولف.. مطير قلوبنا ياسلوم.. ومهره عاد اللي زين مايطير عقلها.. ماغير شارده.. تحاكيه وتضحك ومن تسكر.. يتبدل حاله.. الله يربط بعقلها.. ويعقل على اللي فبطنها.. مضيقه صدورنا والله..
سلمى متأثره:سبحان اللي سخرها له.. صدق الأم مب اللي تولد.. الله يصبر قليبها..
موضي بتنهيده :اللهم امين..
لحظة صمت قالت موضي بعدها : مالهم حس البنات.. نايمات...؟!
سلمى:لا.. حنا يالله اقنعنا التسلب ابوهم.. ماطلع فيهم بذيك الليول.. والحين من الصبح رايح بيته بهم مع نونا.. يبيها تنظف في البيت يقول لاينهجر..
موضي :هييييييه ياسلوم.. الله يرد راعية البيت له.. يا ان حال شاهين والبنات غابني..
سلمى:الله يسمع منك ياخيتي.. الله يسمعك منك..

شوي الا غيرت سلمى الموجه:اسكتي.. البارح الهرشه عاليه.. مسويه تكميم..
موضي:احلفي.. وعساها ضعفت..
سلمى :والله راح نصها.. وصابغه الاشقر والثلجي وقاصه شوشتها مثل الصبيان.. صايره بعمر العشرين..
موضي:اجل محميد بيخق..
سلمى:ويه مالت عليها وعلى حظها.. هي ماحورفت الا يوم اعرس عليها.. يابلفيت بتقهره وهو ماغير خامر مع هالمصريه..
موضي تضحك:يحن يحن.. وبعد لاشافها تزهزت.. عاد مسكينه عاليه قلبها طيب وفضيخ..
سلمى :والله اتمنى ذلك.. هي ماخرب عليها الا قلبها.. اجل امس بس طقو.. حبك ذبحني محمد.. رقت على المسرح ترمح.. ماش.. ماجازت لي..
ضحكت موضي :تحبه.. شدراك انتي..
سلمى: حبتها القراده.. وش فمحميد ينحب.. لازين اخلاق ولا شكل ولاماده.. مايذكرني الا با****..
موضي تضحك وزين ماشرقت بالشاي:
حسبي عليك ياسلوم.. بسك قرض بالاوادم..
وراحت سلمى.. تعطيها احداثيات الزواج بالتفصيل..

*****

بيت شاهين..
البنات يراكضون ومبسوطين في البيت.. بعد غيابهم عنه..
والخادمه تشتغل وتنظف الغبار..
وشاهين جالس  بالصاله ومشغل مسلسل اجنبي يتابع..
كان شارد ولاهو مركز بعد حادثة ديم.. حس بشعور داخله.. ضد جمان..
حس وده يطحنها.. يذبحها.. لا امه ولاموضي مسؤولين..
جمان رمت كل شي ورى ظهرها واهملت الكل.. اسلوبها اناني وحقير..!

وبين سرحانه والغضب بداخله..
جاوا بيان وديم يتلاحقون.. والعاملة تصيح وراهم..
التفت عليهم..انصدم لما شاف ملابسهم كلها الوان .. وجبيرة ديم كلها ملطخه وهم يضحكون..
صاح فيهم بغضب هايل من فكرة انهم خربوا شي من لوحات امهم :بيان.. ديم.. وش ذا..
وقفوا ثنتينهم وهم يكتمون ضحكاتهم..
نونا :بابا.. هذا بيان وديم.. سوي خراب غرفة مدام جمان..
تركهم وركض لمرسمها بسرعه..
دخل.. لقاهم ساكبين الالوان.. وماسكين لوحه فاضيه عاجينها.. ولاعبين في لوحة ملاحظات.. شايلين الدبابيس من نوتات وصور..
شاهين بربكه وعصبيه  يرفع الالوان ويلملم الفرش.. ويشيك لوحات على الارض لو صادهم شي..

ونونا جات.. بنب وفوط تنظف :سوري بابا.. انا فوق مافي شوف بيبي..
شاهين يرفع الورق والصور ويرجعها بلوحة الملاحظات..
وبيان وديم..
جاوا وهم يتأسفون :اسفه بابا.. احنا نلعب..
بيان :نبي نرسم زي ماما.. اسفين بابا..
وراحت تشيل صورة من الارض.. وتتملغ على ابوها اللي مو راد عليهم :شف بابا صورة ماما معها صديقتها الحلوة ..
سحب الصوره وبزمره: بيان اطلعي مع اختك.. لاشوف وجهك..

وتوه بيعلق الصورة.. انتبه ان في شي مكتوب وراها..
كان مكتوب..
*اورتساي - ايطاليا..
مع اخت لم تلدها امي.. عندما تختلف الجنسيه والديانه.. ويظل يجمعنا الوفاء..
في ضيافة صديقة عمري.. راشيل كرو.. وحاطه تاريخ..
والواضح ان التاريخ.. بايام دراستها بايطاليه..*

فهى شاهين وهو يكرر قراءة المكتوب..
وكأن بين الزحام.. وبين الضيق يخرج الله فرج..!
اتصل على واحد.. رد:
قصي.. قرية اورتساي بالشمال الايطالي.. في عليها طيران داخلي ولاكيف..؟!
قاله قصي خط السير وان اغلبه بيكون سياره.. في ريف الشمال..
شاهين :طيب تمام.. احجز لي اقرب شي..
قصي:ايشبك.. البارح جيت من روما.. حُط لك خيمه بايطاليا وخليك فيها..
شاهين :اقصر الهرج ياقصي ابا اروح راكب.. مابي اروح بدوام..
قصي :افففف..
شاهين :وضبط اجازتي حق السنه.. لاني مدري متى بخلص من شغلتي..
قصي :من عيوني التنين..
شاهين :تسلم لي ياغالي...
قفل وهو يطالع صورة جمان تجمعها براشيل.. بمكان ريفي..

*****

زينه في غرفتها..
ترتب بعض المشتروات.. ماخذتها حق جهازها..
ابتسمت وهي تناظر قميص نوم واحمرت: ياحليلك يانواف..
كانوا يسولفون مع بعض بالجوال..
وزينه تختار شغلات من موقع تسوق..
وراسله له جزمة يشوفها اذا حلوه..
شوي الا رسل لها رابط.. وكتب ذا حلو..
كان راسل..
القميص هذا..
يومها كانت بتموت ضحك من الاحراج.. بس تماسكت :
شكلك دخت مع هالعارضه..
نواف :عليك بيطلع احلى.. اطلبيه..
زينه ضحكت :لا مابيه..
نواف:هين..اكسري بخاطري..

طلبته وهو مايدري..!

جاها اتصال:هلا جديده..؟!
صبحا:ها تعشتي..
زينه وهي ترتب الشغلات:ايه الحمدلله..
صبحا: اقفلي البيبان عدل ولاتفتحين لاحد..
زينه:جديده ماهنا الا الخير.. انتي انتبهي لخالتي رحمه.. وعظمي لها الاجر..
صبحا :ليتك جايه كان ابرد لي قلب.. بقعد احاتيك..
زينه:يوه ياجديده.. ترى عيوش هنا..
صبحا:عويش مندعسه مع رجلها.. بدويرتهم اخر المزرعه.. والله لو يصير لك شي ماسمعتك..
زينه بطفش:ياربي شهالفال.. خلاص روحي.. وسلمي عليهم..
قفلت منها..
وهي تتحلطم..
ياخي وش فيهم.. كانت مكلمه مهره من شوي.. وقالت لها ذيك (ياخبله.. انتي تدرين ان مضاوي بنت خالي فلاح.. مقطوع سرها مع هاله اخت عبد الاله.. والله تقول عنده انك ماجيتي العزا.. وانك لحالك ويجيك الكلب.. ماهو مهدد ينتقم منك..وترى هاله شايله عليك بقلبها)
زينه قالت لها :(ياوسع خيالك.. خلاص قضينا منه الله لايرده)..

شردت وهي تفكر بكلام مهره.. وتتعوذ من الشيطان..
ناظرت الساعه وحده بالليل..
فجأه سمعت صوت خرخشة عند نافذتها..
ارتجفت برعب..
وهي تقوم تتأكد من النافذة.. لقتها مغلقة.. طلعت من الغرفة.. وتأكدت من باب الصاله.. ماكان مقفول.. بسرعه قفلته كم قفله.. وراحت تتأكد من النوافذ..
وهي تتحلطم برجفه :حسبي الله على شرك يامهير كانك جبتي لي الوهم..
وتوها بتتحرك بترجع لغرفتها.. الا حست شخص يسحبها.. ويغلق فمها بكفه.. ويمنعها.. انها تصرخ..
توسعت عيونها برعب.. وحست انها النهايه..

*****
بلندن..
مشاري مع عزيز وحسين وياسمين..
كان يقول :
كذا فجأه تبي تكوش عليه.. هي لو ودها مايتصل على مهره..
حسين:شوف صاحبي.. الطبيعي هيج.. سما كانت تظن ابنها مات دون تشوفه.. فجأه يطلع عايش.. يعني هي زين ماتحوطه بقرشه وتناظر فيه..
ياسمين :بس سما من وجهة نظري.. ماهي عارفه كيف تتعامل معه.. سيف باين ذكي.. وترى تصرفاته ماهو عشوائية.. يعني اهنيه على اخفاءة لصوتيات مهره.. لان في شي بداخله كان مقتنع.. ان ممكن احد يحرمه منهم..

مشاري :والله ياان هالسيف ياخذ القلب.. احنا تعلقنا فيه كيف هي..
حسين بدفاع:هذا الولد مال مهره.. مو مالكم.. لاتتعلقون بزياده فيه.. بكره تسوها قضيه ان احنا احق فيه..
عزيز:انا اصلا ً اشوف الوضع اللي صار ماله داعي.. سما المفروض تصرفت بعقل.. وخلت الوضع مثل ماهو.. واذا ألتقت بسيف تخلي هالامومه بداخلها.. اهم شي هي مطمنه عليه.. وذا شي ابوه يبيه.. عساف كان عنده بعد نظر..
مشاري بنص عيون :قصدك ان اختي فاشله..
ياسمين :انا فهمت وش يقصد عزيز.. سما نفسيتها مو مستقره.. واذا دخلت في مجال العمل تشوفها ماتشوف الا العمل.. يعني انت تقول انها راجعه للصحافه.. لو تعمقت مثل اول.. نقول لسيف *وبتلحين* (سلم ع الشهده اللي معاك) ..
وضحكت..
مشاري يتصنع الغضب.. يمسك رقبتها :
ياسمين ماسمح لك ياتبن.. الا سما عاد..
تبادل معها نظره من هذا القرب..
لتبتلعه غابه ياسمين الغريبه وهي تبتسم..
ارتبك.. وترك رقبتها..
وضرب الطاولة يبعثر ارتباكه:ماصارت عشى.. بطني يغرد..

*****
بيت راجح..
سما بعد محاولات فاشله لاسترضاء سيف.. جلست بلابتوبها فوق تشتغل..
وسيف ظل بالصاله تحت يتابع افلام كرتون بالشاشة..
راجح  جاء وشافه بالصاله..
جلس يتصفح كتاب وهو يمه..
خلص الكرتون.. وانقلب سيف لان منسدح على الارض..
والكلب الكبير قريب..
ظل يناظره..
وكالعاده قام يحاول يلمسه ويبعد يخاف..
وراجح ملاحظه الى الان مو جارع لان الكلب ضخم..
ترك الكتاب..
وقام له :تعال جدي.. المسه.. مايعض..
سيف يضم يده :حووف شكبره..
راجح نادى الكلب..  وقف قريب منه ولمس راسه :شفت مايسوي شي..
سيف حاول يجرب.. بس يبعد ويمد يده..
وببعدها..
الا فجأه نبح الكلب في وجهه..
سيف برعب وهلع.. يدخل في صدر راجح :
الله لعنه.. حوفني (الله يلعنه خوفني)..
راجح بضحكه صافيه شاله :
ماش ياولد.. طلعت خواف..
سيف :انا ماحاف.. اركب صان.. والعب مع الدجاجه وحلوف.. وعندنا قطاوة.. وسلحفاه.. بس كلب شالي حوف..! (بس كلب مشاري يخوف)
راجح وقلبه يعصيه.. ويندفع لهذا الطفل..
جلس وخلاه بحضنه..
وظل يسولف معه وراجح..يسمع له ويسولف..
سما طلت من الدرابزين فوق تبي تطمن عليه..
شافته كيف قاعد مع ابوها كذا وابتسمت..
كانت الصوره جداً  شيقه وجميلة..!

*****