رواية مبعثر فيك ماللحزن لايشفى الفصل الرابع والعشرون 24 - بقلم ايمان يوسف🕊️

البارت الرابع والعشرون

في مزرعة صبحا..
مهره بعصبية:
كان قلتوا لي انك بتجي مع سيف يانواف.. ترى زوين نفسيتها مب شي .. لاتبلشوني معها..
سيف جلس على احد المقاعد في الجلسات الخارجية:
والله انا قلت له وهو اصر.. تعلبش فيني مثل الوراعين .. وكسر خاطري وجبته ..
نواف بنص عيون:
والله يا اني انذليت ذل على ذا الشوفه .. يعني مهره اختك ماتبي تكلمني وشايله الدنيا فوق راسه.. وتفكرني مغصوب على هالعرس ..
مهره تجلس جنب سيف:
والله انا مستغربه وراك مطيور ..
نواف بانفعال:
انتوا وش فيكم كلكم محد فاهمني.. وين الزينه ابي اشوفها ..
مهره توسعت عيونها :
لازم تستعد وتترتب.. اول شوفة بينكم .. حسستني من سنه متزوجين ..
نواف باصرار :انا ابي اشوفها باللي هي فيه.. ممكن..؟!
الجده طلعت من داخل وباين سمعت الحوار وهي تقول :
الزينه عند الخيول هناك .. رح يمه ودربك خضر ..
نواف راح باس راسها ويدها :
ايه هاا... والله ياجده انك شيخه.. وانتي اللي بتنصفيني ..
مهره بانفعال:
جديده وراك ..  زوين ماراح ترضى ..
الجده:الخلا انتي وياها.. دامها تممت وملكت على هالامير.. من حقه يشوفها ..
سيف وهو يسلم على الجده :
والله انك نصيرة الرجال ياجده ..
نواف اشر على المزرعة :
الطريق سالك..؟!
مهره :ايه سالك.. دام زوين صارت حرمتك سالك ..
راح نواف..

'ذهبت لدرب الذي رماني لسحرها اول مره.. لصورتها التي التصقت في ذهني شهور.. ذهبت وانا قلبي يختلج يكاد يركض امامي.. بدئت اقترب حيث هي.. سمعت صوت شيلة من سماعة..
على مقطع :
مسكين قلبي ماتهنى بغاليين
ولاضنتي شاف الهنا بالحقايق

مكتوب يانجلا نسافر غريبين
ونمشي على درب الشقا والعوايق

طاحت عينه لسماعة صغيرة على برميل كبير.. والصوت منها ..

راحت عينه على الماء يسري من هناك.. تتبعه وصوت الفُرشه بيدها..

اول مايبهره بزينه بساطتها.. اللي تاخذ عقله ..
كانت بجينز رافعته لمن نص ساقها.. وبدي كات كله مويه..
شعرها مرفوع كعكع متراخي.. وخصلاتها الناعمة عابثه ورى اذنها وعلى رقبتها ..

'ضعت في خصرها وظهرها وهو يبان مع حركتها بالفرشاة في تنظيف الحصان ..
حسدت قفل السلسال كيف يقبع خلف عنقها يتبجح في موقعه من جسدها بينما انا بعيد.. ذبت مع خال واضحه على كتفها..

كنت انسان لايجد في الأنثى مايلفت الانتباه.. ليس لي شغف في التعمق فيها والتأمل .. اما ومنذ رأيت زينه.. قُلبت معادلاتي..صرت اجيد التمعن.. صرت لماح.. واخطف ادق التفاصيل من نظره..

انا وصلت.. واقف قريب.. لكن..!
لا ادري ما اقول.. وكيف ابدء.. امام خرافتي التي اصبحت واقع..!

هاهي تحمل الماء وتسكبه على الخيل.. وانا واقف صامت كالفزاعه..!
وكأني اعتدت اختلاس النظر لها بالخفاء'

بعد تردد قال:
صبحها بالخير..
التفتت بسرعه عليه.. ناظرته بدهشة وعدم استيعاب..
وجوده غير متوقع..
لا المكان ولا الزمان مناسب ..
رمت الدلو من يدها ..
واختفت بسرعه داخل الاسطبل..

لحقها وقبل يدخل..
زينه:تكفى.. لا..
نواف:زينه تراك زوجتي.. الى متى بتتهربين ..
بتوسل:طيب انا ماقلت شي.. خلاص روح وانا ارتب نفسي واجي..
نواف بتسلية:طيب انا حبكت ابي اشوفك ذا الحين ..

قال كذا وهو يدخل..
وهي لاصقه في الجدار وماسكه البدي.. جهة صدرها رافعته..
نواف بخفوت:
زينه..ابوي.. تراي طاق الدرب وجاي.. ومتشفق لشوفك..
رفعت راسها لما حست بقربه..
وقائمة التشغيل بالجوال تشتغل.. على تنويعات زينه.. في الشيلات والاغاني..
بدت اغنية (من عذابي.. قلت لعيونك هلا) ..

زينه سبت الاغنية والسماعة.. وعبادي.. ونظرة نواف وابتسامته الخبيثة ..
قال:انا اشهد ان عبادي جابها على الجرح ..

طبعاً زينه ماتدري وش خفايا قلبه.. ولا حبه..
ولاتدري ان هذي مو اول مره يشوفها فيها..
وان نواف وهو يشوف عيونها من هالقرب..
ذاب وضاعت علومه..

حط كفه على الجدار وحكرها :والله هالشعراء.. لاقالوا هالكلام ماينلامون..
زينه تمر من تحت ذراعه :
تافهين..وفي كل وادي يهيمون..

وحسب ظنها ان نواف.. فقط يبي يستفيد من الوضع.. ويستقل هالزواج..
رفع حواجبه وابتسم وهو يطلع لها..

وهي تتوجه للسماعه وتطفيها.. ولاحظها كيف تنزل بلوزتها.. وتسحب ايشارب من السور.. وتلفه برقبتها..
قال:ليه ماتبين تتواصلين معي..؟!

راحت تجمع الاغراض اللي تغسل فيها:
ماطلعت شريحه.. هاك الشريحه خذها مني بوفارس..
نواف:واذا صعبه انك تطلعين شريحه ثانية.. وقت اتصل على جوال مهره واطلبك.. وشهولا ماتكلمين..

حطت الاغراض مكانها.. والتفتت وتكلمت:
نواف..! انا اقدر لك اللي سويته.. ووقفتك.. بس انا مارضى انك تنجبر علي.. كيف اوضح لك..؟!.. يعني بوفارس راح تصرف.. واحنا اضطرينا نسايره.. وهوبا صرنا زوجين.. غلط.. وانت بطيب اصلك.. جاي تبي تحسسني.. ان احنا بنقدر نتخطى هالشي.. ونبتدي مع بعض.. ونعيش فترة خطوبة وزواج تقليدي.. واحترام منك وود مني.. وتقض البصر ان انا مطلقه.. ونروح نكمل شي بدايته اصلا خطأ ..وبينتهي بخطأ ..

عقد حجاجه:وين الخطأ بزواجنا..؟!
زينه بانفعال:كله خطأ... انت تزهلت.. وانا تممت.. وكله بسبايب الكلب عبد الإله.. الله لايحله ..
نواف بخفوت حازم:
لاعاد يمر اسمه على لسانك ممكن..؟!
زينه بعصبيه وتهكم:
شفت صعب.. صعب.. انك بتتعايش معي وانا سبق وكنت زوجه لغيرك .. يعني ممكن تتقبلها.. لو كنت ارمل ولامطلق..ممكن..!

وراحت ضربت الحصان بشويش.. تدخله الاسطبل..
راقبها وهي تمشيه وتفتح له مكانه.. وتطلع اصوات من فمها..
والحصان مطاوعها..
وراحت شالت كمية علف وحطتها وقفلت عليه..
وهو مستمتع في تأملها وتحركاتها..
لو بيتكلم الحين.. ويقول عن مشاعره قبل.. بتكذبه..
وبعدين ماعنده مشاكل.. حبه حبه مع زينه..

ناظرته:
سكت.. ماعجبك الكلام..
نواف :لا بس اسمع لك.. انا مايهمني ان كان في شخص قبلي كان زوجك.. واثق بنفسي واني لااقارن بذاك السفيه.. بس عشانك انتي.. يعني عبدالإله واللي اعرفه تجاوز حدوده بشكل معك.. ماهو الشخص اللي ذكره على لسانك يحرك غيره بنفسي ..انا امنعك عشانه شخص ماضي وانتهى.. وذكره يضيق صدرك انتي ولا انا غلطان ..

زينه تركت لنفسها المجال في النظر لوجه نواف.. واسلوبه في الكلام.. وصوته الرجولي ..
مدري ليه تذكرت.. يوم اقنع مهره على عساف.. وكيف كنت اعلق على وسامته..
يوم اعجبني عساف شكلا ً..
ماكنت متوقعه اني برتبط بإنسان ذات شكله.. بس باخلاق اجمل..!
وانا اتأمل طول نواف وتقاسيمه.. طرى علي عبد الإله.. وصلعته.. دوم يحلق زيرو ولا نمره واحد ..
دقن نواف.. وشنباته..
طرى علي عبدالاله وشنبه وكيف مايربي دقن لانها تطلع كلها فراغات..وماظل زيت حشيش وثوم مافركه.. عشان تنبت كامله.. ومانفع..
فكان كل يوم يحك وجه بالموس ومخلي شنبه نفس الحشاشين..
زول نواف خفيف.. وجوده مريح.. عكس عبدالاله وملاغته.. كنت اكش منه وماحب حتى يناظرني..!!
يعني..
مالومه وهو يتبجح وواثق من نفسه..
الحين وش جاب هالرزه..
للمختل عبد الاله..

شارده في وجهه..
نواف ابتسم :ترى لاناظرتيني اكثر.. ببوسك ..

نفضت راسها وشالت جوالها والسماعه :
انا بروح اتروش ..
مشى معها:تمام .. بس انتبهي.. سيف جالس بره مع مهره والجده..
قربوا من البيت.. قالت:
خلاص.. روح عندهم انا بدخل من الباب ورى..
نواف مسك ذراعها:انتظرك ..
سكتت شوي وهزت راسها ايجاب:
ماشي..
وتركته وراحت..

‏خلي عيوني في عيونك تسلّى
‏ يا من يعد الحسن منها و اليها     

‏ما تل قلبي  من  عراويه  الا
‏عيونك اللي يا ماشاء الله عليها

*****

هادي بعصبية بالجوال:وعمي راسلك هالاحداث والتفاصيل.. علك تحنين وترجعين.. وانتي ماكلفتي نفسك وقلتي له انك والد وجبتي له حفيد جديد ..

جمان بانفعال:هادي..!
هادي بانفعال:وش جمان وش.. والله لو ادري.. انك بطولينها كذا كان ماطاوعتك.. خلاص ولدتي.. اقلها علمي عمي بمكانك ..

جمان : بيجي وبيجيب شاهين .. وبيسعى يصالحنا.. وانا والله مابعد الحب في راسي انطحن .. مابعد رضيت ياهادي..
هادي بعصبية:وعمرك ماراح ترضين.. تصدقين طيعي خيك وروحي تعالجي.. البلاء اللي فيك ماهو زعل وشيلة خاطر.. انتي شكلك نفستي وقريب تجنين ..

جمان :شكراً على هالكلام الجارح.. ماهقيتها منك تعايرني ياهادي.. وانا اللي عريت جروحي عندك ..
هادي بانفعال:سايرتك ودعمتك.. بس بناتك ياجمان.. بعيونهم غصه تذبح..
جمان تتهرب:فهد يبكي بقفل ..

واغلقت ..
هادي تعب من جمان وعنادها.. ومهددته لو نكبها وقال شي.. بتغير مكانها حتى هو مايدري وين تروح..
فاتح على جهات الاتصال وصبعه على اسم شاهين.. متردد..
ومشكلته الوعد والحلف..
جمان ما أمنته الا انها عارفه.. الامانه عنده.. وانه مستحيل ينكبها..
رمى الجوال ع الطاولة: اف جمان.. اف..!

*****

دخل مشاري غرفة سما..
تكتف يراقب البوكسات والالعاب.. والغرفه اللي جهزت فيها جهه لسيف.. وواقفه على كرسي تعلق فريمات طفولية..
مع نزولها من الكرسي انتبهت له.. ببتسامة وحماس:
وش رايك مشاري.. حلو مكان الفريمات كذا..
ابتسم وهو يدخل:
حلوه بس لو فيها صور احلى..
قالت:لمن يجي سيف عندي.. وبسوي لنا صور سوى واحطها فيهم..
مشاري موجعه قلبه على حماسها..
وخايف من نكسه ممكن تصير لها.. لو مر الوقت اللي متفقين عليه.. ورجعوا سيف..
مسك كتوفها:
سما حبيبي.. بس لازم يكون عندك تقبل.. سيف ماراح يكون زي ماتبين.. يعني يمكن يعذبك.. لانُ متعلق باهله..
ارتبكت واسحبت نفسها من يدينه :
انا بعلقه فيني.. انا امه.. بيحبني على طول وبتشوف.. اصلاً احنا نحب بعض.. ولانسيت..

ليان جات وهي تنادي مشاري..
هتف:تعالي انا هنا..
دخلت وارتفعت حواجبها:
اففف يالحماس.. حسيت اني داخله بفرع لماماز باباز..
سما تشيل العلب:
ايه كلها تجهيزات عشان ولدي حبيبي..
ليان مدت شفتها.. وتوها بتعلق..
مشاري مسك ذراعها :
وش فيك تنادين..!
عطته اوراق :
هذي اوراق عطاني اياها ماجد من ابوه.. وصلها لبابا اذا بتشوفه..
خذها وطلع: تمام..
تلفتت ليان حولها وطاحت عينها على الملابس والماركات ..
سما متسوقه حق امير صغير..
كل فلوسها حطتها بهالتجهيزات..
لسيف اللي مابعد جاء عندها.. شالت بدلة رسمية وشافت السعر:
سما لاتبالغين ..
خذتها منها:حبيت اشوفها على سيف..
ليان كاسره خاطرها سما:
اوك.. بس يمكن يتضايق مع الجاكت.. هذا قصدي خاصه صيف ..
سما:البدلة صيفية.. بس خذتها حق مناسبة او شي.
ليان تنهدت وابتسمت:
والله حتى انا تحمست لولدك..
سما بحماس:جد ليان..؟!
بحنية:ايه جد.. مو انا خالته.. ولا نسيتي ..
ضمتها سما:يارب يجي وننبسط معه..

******

زينه بعد ماتروشت ولبست جلست في الصاله وهم بره..
تحججت داخل نفسها ان سيف بره..
ومهره مسوية فطور .. يفطرون..
فظلت تطقطق بالجوال ..
انفتح الباب وكان وراها مو بنطاق رؤيتها.. فكرتها عايشه..
مرتخية على الكنب ورافعه رجولها على الطاولة قدامها ...

انتظرها نواف تنتبه له.. مالتفتت.. قال :
قومي البسي عباتك بنطلع اشوي ..
اعتدلت بسرعة والتفتت :
هاا.. وش نطلع.. وين.. جدتي ماترضى ..
رفع حاجب:جدتك راضيه سألتها قبل اجيك..
زينه تضب شعرها بربطه: طيب ليش نطلع ..
نواف: بنشري خبز من البقاله..
زينه بغباء: اما خلص.. تونا شارين.. لحظه اشوف الفريز ..
وتوها بتروح ..ناداها: تعالي.. بنت .. امزح..
زينه ومربكها وجوده: الله يهديك ..
ورجعت بتجلس ..
قال لها: قومي البسي عبايتك.. والله بطلع معك شوي..
ناظرته بتردد ..
سحبها قومها :وش فيك مبلمه.. يلا ..
.
.

بعد شوي طلعت.. ولقت نواف ينتظرها جنب سيارته.. فتح لها الباب..
وزينه ناظرته.. بعدين ركبت واغلق ..
توترت اعصابها..
وعقلها يقارن ويقارن ..
ركب جنبها : نورتي سيارتنا يالزينه ..
ابلعت ريقها :نورك ..
ابتسم وحرك .. ماعلق على نقابها.. ماقال غطي عيونك.. ماقال لها موشح عن ستر المرأه .. وكأنها ليست مستورة..
فتح جواله وحطه على اليوتيوب وعطاها اياه :
اطربينا على ذوقك.. الجوال مشبوك على مسجل السيارة ..
زينه: لا.. ماعليش مافي شي جاي في بالي ..
زينه في بالها.. (لااوفر.. وبيعطيني جواله وهو مفتوح.. تعال ياعبد الاله يابو رموز وقفول) .. !
نواف :تسمعين لخالد عبد الرحمن..
زينه:ومن مايسمع لمخاوي الليل..
نواف شغل (رعش قلبي)..

وكل شوي يختلس النظر لعيونها.. اللي تناظر كل شي الا هو.. كيف واضح خجلها منه ..
قصر الصوت :
قولي لي.. وش ودك نسوي عرس كبير ولامختصر.. ولا ودك نسافر ..
زينه:عرس..؟! ..من جدك ..
نواف:ايه.. وكل شي خاطرك فيه يصير ..
زينه: خلنا مانسبق الاحداث.. يعني يمكن مانكمل وكذا ..
رفع حاجب: مانكمل..!.. كيف يعني.. زينه لايكون انتي مفكره بعد ماصرتي لي بطلقك ..

مربكها حماس نواف ومستغربه..!
ولاتبي تكون سلبيه معه ..
يعني حتى مربكها ان امه مادرت الا بعدين..واللي صار بينهم اتصال وباركت ورحبت.. بس يمكن ماهي راضيه..
اكيد ماترضى..
ولدها ماتزوج قبل.. وزين وعلم ومركز ..
وياخذني انا مطلقه..
قطع صمتها:زينه..!
التفتت عليه بسرعه :ارحب..
نواف التفت عليها.. ياخي وش ذا.. وش هالشعور ..
هو ارتبك هالمره وتنحنح :
لابس قلت نتخطى التفكير بالحفل .. ونخطط على شهر العسل.. وش تحبين.. اوروبا ولاشرق اسيا..
زينه لا لا ..اوروبا مره وحده..وعبدالإله.. خذني جده في عز الحر والرطوبة..وظل يعشمني بيوديني مصر .. وتطلقنا قبل نروحها ..

اطلقت ضحكة صافية..
ونواف مستمتع بمد متسائل.. :اييييييه..!
زينه:فاجئتني صراحه بالشطحه ..
نواف:ليه..؟!
زينه:طبعاً نواف.. اهنيك على مواكبة الحدث.. وانك معطي جو.. للوضع الغريب اللي احنا فيه.. وفوقه تتكلم عن شهر عسل مخملي.. اوروبا اجل..؟!

نواف :ورويسك الغالي..لاقعد معك بارياف انترلاكن.. ونتقهوى في هبات نسيمها.. ولامشيك في النرويج وتشبرينها.. والله لا اوكلك من باستة الطليان.. واذوقك روتية فرنسا .. وش تامرين بعد فيه ..

'لكم ان تتخيلوا.. اني انا تنهال علي كل هذه الوعود.. بعد جفاف عبدالاله.. نواف حلم جميل.. لكني فقط حذره  من كل هذا الحماس.. وواجمه امام موجات جميلة.. لم تكن تستقطبني.. '
قربوا من نقطة تفتيش: قفلي حزامك ..

'كنت شاردة بافكاري.. مديت يدي بسحبه.. ومدري ماعرفت.. ماكنت مركزه.. نواف يميل بجذعه ويسحب الحزام بخفه ويقفله ويرجع يعتدل ..

'قلبي يرقع من تلامس جسدينا.. اخفيت اناملي حتى لايلمح رجفتي الغبية ..
لاحظته كيف يكلم العسكري بأدب.. وينهي الحوار .. بعساكم ع القوة..

عبدالاله يلعن ويشتم.. مع انه معلم.. حتى لو ماعطوه مخالفة..
كذا عاده.. يشتم في الاشارات.. الماره ... عمال النظافة لسانه زفر وبذيئ ..

وللغرابة ..
نواف كان ماخذني اطلع شريحة باسمي.. ودخلني الفرع والوضع كان عادي وانا امشي جنبه.. مع وجود موظفين وعملاء ..

كان يضحك مع الموظف ويسألني وانا ارد.. ويخيرني في الارقام.. والموظف يأشر على واحد ..(ذا مميز) ..

نواف يطلع عليه:تحبين الاصفار ؟!
زينه: عادي..!.
خذ مني بطاقتي الاحوال.. وعطاها للموظف ..
وبصراحه انفجعت ..
عبدالاله.. كان مغطي صورتي بالبطاقه بقصاصة نوته.. ومايسلمها لاحد.. الا وصبعه ع الصورة ..
انا لو بتخرفن..
من هالتناقض الرهيب..!

'تنويه:انا ككاتبة لست ضد الغيرة ..بس لما الشخص يكون يغار الى حد الشك .. ويحبس زوجته في قوقعة بشكل مرضي .. يكون اي تصرف منه لايحتمل'

رجعنا السيارة ..
ونواف مشتط يركب لي الشريحه.. بعدها سجل رقمه وبادل الارقام.. وسجل اسمه بجوالي.. (حبيبي وجنبه قلب احمر)وضحك وهو يحط  قلب فيه سهم..
زينه: ايش حركات المراهقين هذي..؟!
وتوها بتاخذه سحبه :ماتغيرينه..!
زينه:اصلاً مو حلو.. بطلع كذابه ..
نواف مروق :طيب بيجي اليوم و بيصير صدق..
زينه:طيب عطني الجوال..
نواف:وعد..؟!..
زينه:تمام..

اكملنا مشاوير صغيرة ..
اشترى نواف ايسكريم..وقفنا على جنب ناكله.. وخلاني افتح وجهي عشان ماعدم النقاب..!
خذني لماركت ..
وظل يشري شغلات ويسألني وش احب ..
يعني باختصار..
كان نواف بس يبي يقضي الوقت معي ..
جلست اطالع العربه.. ملاها.. شبسات.. مكسرات.. كافيات.. واقف ينتظر دوره في المحاسبه.. ويشيل شوكلت وام اند امز.. مالتيز.. ويحطه.. خذ حتى بطاريات للرموت.. ومدري ليش.. بس كذا خذهم..

ابتسمت لا إرادي وانا اتأمل نواف.. وكياتة نواف .. وحلاوة نواف..
الا اني حذره وخايفه من البدايات..!

*****
بعد كم يوم ..
اليوم سيف ونواف بيفتحون الموضوع للعايلة بعد ماحاولوا يستبعدون اليوم هذا..
بس بكره بيوصلون وليد ومشاري.. عشان ياخذون سيف لسما..

وليد  دخله سيف بالصورة وعلمه كل شي.. واصر عليه يجي.. عشان يكون مع سيف خطوة بخطوة..

هو ماراح يقدر يروح ولايبي مهره تروح هالفترة..
لأن لو كانت موجودة مستحيل سيف بيعطي سما وجه.. ولاحتى بيظل عندها..

نواف علم بلقيس كل شي و انصدمت وبغت تموت من البكاء ..
بس قال لها لانه يبيها تطلع مع مهره لاي عذر من البيت .. وماتكون موجوده وقت بيقولون السالفه
لسعود وموضي ..
لانهم خايفين من اي ردة فعل عكسية.. اول يوضحون لهم .. تالي تجي مهره ويقولون لها ..
لأن سيف مستحيل بيقدر يفشي اسرارها وهو يناظر عيونها..
هي بتنهار وتسكته..!
مايبيها تنجرح.. مايبي يأذيها .. بس كل شي يصير بدون ارادته..!!

كانت في السيارة مع السواق وبلقيس .. وسيف الصغير..
مهره باستغراب:
مدري وضعك غريب يابلقيس ..
بلقيس شارده:هاا.. ليش..!
مهره:يعني الطلعه مالها داعي كلها.. وانتي مفهية بالسوق.. وبس اتصل نواف قلتي بنرجع ..
بلقيس: طيب وش فيها.. تنفسنا شوي..
مهره بشك :لايكون امي الى الان ماهي راضية على ملكة نواف وزينه.. وهم يقنعونها ومايبوني اكون موجودة..
بلقيس ابتسمت بحنية :
والله يامهره انها راضيه.. وامس رايحه شارية الشبكه لزينه.. وانا صادقه معك.. هي في البداية ردة فعلها غريبه شوي.. بس متوقعه.. لكن الحين وربي الأرض مب شايلتها بعد ماستوعبت ان نواف اخيراً ملك.. وان زوجته بنت ناس وكفو ..
تنهدت : الحمدلله.. بس وش فيهم.. سيف بعد اليوم ماهو عاجبني.. مدري.. مدري بلقيس.. قلبي قارصني..
بلقيس شوي وتبكي وهي تناظر سيف لاصق في مهره ويلعب بجوالها.. ومهره كيف حاسه ان في شي ..
ربتت على يدها : مافيه الا الخير جعلني قبلك ..

*****

'وصلنا..
مدري احساسي غريب.. وعيوني ضايعه .. وضعي اليوم وشعوريذكرني بشعوري يوم وفاة ابوي ..
كنت اقول لجديده.. قلبي كأنه يتفتت ولا أدري ليش..!
اليوم قلبي يتفتت وذايب ولاأدري ليش..
دخلت مع بلقيس..
كانوا في الصالة ..
ضغطت على يد سيف ولدي بقوه..
وانا اشوف وجوه واجمه..
ودموع ..
في عيون امي موضي..
تحاول تخفيها..!

فارس ناظرني وحاول يبتسم .. بس عيونه غاصه بدمعه..
قربت منهم وبصوت اخرجته بصعوبة :وش فيكم..؟!.. اهلي فيهم شي.. جمان.. فيها شي.. امي وش فيك..؟!

امي نزلت عينها لسيف الصغير.. وارفعتها لي.. ودمعتها نفرت مع الكحل..!
مهره بعصبية وانفعال :
سيف وش فيكم.. يبه.. بلقيس.. انتي ماطلعتيني هالطلعه.. الا فيكم شي.. جديده فيها شي ..

سيف قام خذها :كلهم مافيهم الا العافية .. في سالفة صارت تخصنا هنا في البيت.. تطمني الكل سليم.. ومحد مات ولاشي.. وش فيك شطحتي الله يهديك ..

جلسها وجثى قدامها ومسك يدها وغمز لبلقيس عشان تبعد سيف وتشغله عن الأجواء ..
بس شافت بلقيس انسحبت بسيف..تمسكت بمعصمه بقوه وبانفعال:
قلت لهم عن سيف صح.. قلت لهم ؟!
سعود:اهدي يايبه..
مهره طلعت عروقها من جبينها والدموع تنحشر في عيونها وبانفعال: يالخاااااين.. انت وعدتني ..
سيف نزل عيونه وماعرف يتكلم ..
رفعت عيونها لنواف وببكاء وصياح :
نواف ليش ماسكته.. ليش خليته يقول .. مو انت وعدتني بعد وقلت هالشي بينا بس..

وقامت وقفت قدام سعود وبانهيار:
والله ولدي يبه.. لاتصدق هالاثنين.. يمه لاتصدقينهم .. يرضيك يقولون عنه ذا الكلام .. يرضيك يطلعون سيف ولد حرام ..
ضربت رجلها في الارض:
ولدي ولد حلال.. انا جبته.. ابوه عساف وانا امه ..
موضي قامت لها مسكت وجهها ومسحت دموعها :
ولدك يايمه ويخسي حد يقول غير هالحكي.. اهدي وخافي على اللي فبطنك ..
مهره بانهيار :
ليش يقول.. ليش يخليكم تشوفون سيف بهالصورة.. ماله ذنب اذا ابوه غلط .. عساف نظف فعلته فيني وانا قبلت.. سيف ولدي انا ..

بكت وهي تجلس على الارض وتمسك صدرها وبمرار  :
والله يايمه اني رضعته من صدري.. امه.. ان كنت ماولدته.. امه من الرضاع.. ماكذبت عليكم والله..
وحطت يديها على وجهها بانهيار ..

سيف جلس قدامها.. بعد كفوفها عن وجهها :
مهره ركزي.. محد معترض.. فهمي الموضوع وليش فتحناه.. سيف ولد حلال .. مو نتيجة غلط من عساف ..
ناظرته بصدمه وعيونها تهل دموع :
كيف يعني مافهمت وش قصدك ؟!
سيف بلع ريقه:
شفتي واحنا بلندن كيف جاك هاجس ان سما.. ام سيف.. لانها تحب عساف.. هو صدق.. سما امه ومو حرام .. عساف كان متزوجها وفي عقد في الموضوع ..
وراح يكمل لها السالفه بالتفصيل.. وش بيسونه الحين ..

'كانت الكلمات تخرج من فمه.. وتدخل الى اذني كالحديد المذاب..!
كيف تخرج سما وتطالب بابني ..
كيف اعطي ابني لمرأه لا اعرفها ..
انا حتى الخادمه لا اسمح لها ان تغسل يديه او فمه..
كيف يقنعني ببساطه انها شهران وسيعيده..!
كيف يطلبون مني ..
نزع قلبي وابعاده عني..!
كيف يكون الصبح صبحاً .. وكيف يكون الليل ليلا ً.. الا بسيفي الصغير..
ستختل الدنيا والموازين..'

دفته بقوه من صدره:
والله ماتاخذه.. والله ماعطيها اياه ..
سيف مسك يديها بقوه :
مهره.. قانونياً تقدر تاخذه.. ولو صار تحاليل واثبات نسب.. بتروحين في ستين داهية.. وعساف اللي سوا السالفه ماهو فيه عشان يشهد .. خوفي عليك .. ولا والله ماخليها تشمه..

صاحت فيه :
شهالجوووور.. شهالظلم.. هي ماتبيه..  ماكنت اعرفها بس عساف كان يقول امه ماتبيه.. كانت تبيه يموت.. ليش تجي الحين تطالب فيه ..
سعود بحنيه ووجع:
صلي على النبي يابوي.. تجزلي وصبري..  ويرجع لك.. كلنا معك..هي فترة امه ولها حق لانصير ظالمين.. فوق ظلم عساف ويتعذب بقبره..
نواف : والله لو علينا.. محد ياخذه يامهره.. محد له حق فيه غيرك .. بس مايرضينا يضيع عمرك بسجن ومحاكم وقضايا.. وراجح واصل.. لو بغى يعقدها عقدها ..

مهره قامت وطاحت عند حضن موضي:
يمه.. هم رجال مايفهمون.. انتي ام.. هالحين فارس ماولدتيه.. بس ولدك.. يرضيك احد يشلعه منك وياخذه..
موضي باست راسها وهي تبكي معها:
بس يايمه لايجيك شي ..
مهره ببكاء يقطع القلب :
اذا هي انوجعت فطلق.. انا اوجعني عساف اضعاف الطلق..
مدت كفوفها لموضي:
شوفي حروق زقايره في يديني عشان اسكت ..
جسمي يمه.. كله اثر ضربه عشان اسكت.. انا كنت اطلق تسع شهور كامله.. انا ولدته من كرب وضيق.. ووحده..
كانت ترتجف وهي تتوسل وتبكي:
عساف عطاني اياه وقال لك.. قال محد ياخذه منك .. مسح على قلبي ابه ..كافئني على صبري ابه..
صاحت مهره:
ابوووه عطاني اياه.. مالكم حق تاخذونه مني ..
مالكم حق ..
ضمتها موضي وانهارت:
خافوا الله ياسعود شوفوا حل.. آااااااه ياظلمكم ياعيالي وجوركم.. الله اكبر عليكم .. الله اكبر.. الله يحلك ويبيحك ياعساف.. ويبرد عليك.. الله يحلك ياعساف ويبرد عليك ..

مهره كانت تبكي بصوت عالي مكتوم في صدر موضي ..
تمسكت فيها وخايفه يجيها شي..
الكل منجمر ..
فارس نزلت دموعه ..
هو من سيف كيف تعلق فيه وبيروح..
ولامن مهره وانهيارها اللي يقطع القلب ..

لحظة صمت وغصه..
ونحيب مهره..
ذبحهم مره وحده..!

*****

بعد شوي وفي الدور الثالث ..
صعدت مهره لمكتب سيف وقفلت الباب..
انزوت على نفسها.. ماراحت لسيف الصغير.. حست في لحظة غريبة ..
ان سيف عقوبة..!
كأن كل شي مؤلم هو.. حبته لحد العذاب.. دخل حياتها بوجع..
كان العثره قدام حبها وزوجها..
انضربت عشانه..تزوجت عمه عشانه.. انطعن شرفها عشانه ..
مهدده قانونياً وبالسجن عشانه..!.
مسكت بطنها..
من شدة الحزن الحين.. ممكن تفقد جنينها عشانه..!!

ضمت ركبها بقوه وهي على الاريكه الوحيده في المكتب..
خبت وجهها..
وبكت بكت.. حد الجزع..!

سيف يضرب الباب :مهره افتحي ..
مهره :سيف الله يخليك.. ابي اظل الحالي..
بخفوت:بس اشوفك.. مهره ابوي.. اوعدك هالشهرين بس.. اتفاقي معهم كذا..
مهره وفي داخلها.. ان تعلقت فيه امه ماراح ترجعه.. وان طلعت اوراق اثبات بتاخذه ..
سيفي لي..
لي انا..
الكلام ماطلع من شفايفها.. بس صاحت بانفعال:
خلاص سيف.. اذا تحبني خلني اشوي تكفى.. تعبانه سيف تعبانه..
سيف موجوع:
ياروح سيف وعيونه.. بسم الله عليك من التعب والوجع..
ضمت نفسها وبكت..
وسيف يسمعها..
اسند جبينه على الباب..

عزيّ للي جور الزمن عقد حجاجه
‏انبرى حالـہ'ه عقب ماهوب ضحُوك .

*****
(نواف)

حجم الضيق في صدري لايرحم ..
خرجت..
وصوت مهره يطرق اذني.. نحيبها والظلم الذي وقع عليها ..
وكأني عساف..
وكل ذنوبي تفترسني ..
لا ادري..
لكن كتوارد الارواح.. شعرت اني اختنق ومهره ترخي كفوفها.. تمدها بأثر جوري وسخطي..!

فتح ازرار ثوبه ودلك رقبته.. من زمان ماجاله هالشعور..
يشبه الانفصام ..
وكأن عساف يدخل جواته ويصير هو..
مسك علبة مويه شرب منها.. وسكبها على راسه ووجهه..
وهو يسوق ..
ونحيب مهره وهي تردد كلماتها.. بأحقيتها بسيف.. تعرية اللي جاها منه وصار ..!

ردد :اللهم اني اعيذ عساف من ظلمه.. اللهم اني اعيذ عساف من سخط مهره.. ووجع قلبها.. الله يرحمك.. الله يبرد عليك.. 

وجدت نفسي عند الصرافه.. اسحب مبلغ.. واخر ..
ذهبت الى حي فقير.. طرقت الابواب.. وزعت الصدقات عن روح عساف..
كنت بضعفي اطلب من هذه الارمله دعوه له.. ومن الايتام ان يقولوا الله يرحم اخوك .. ومن هذا المُسن
ان يترحم عليه.. بعدد حبات سبحة يده الألفية.. زدت المبلغ في حجره.. عله يصدق ويترحم بهذا العدد..!

خرجت وقد ضاقت فلا تفرج..
امي قلبها كرب.. ومهره تسخط عليه بظلمه لها.. وسما انظلمت.. وقد انتزع ولدها منها ..
وقفت بشيشة بنزين ..
عطيت العامل مبلغ يوازي راتبه..
فكرني غلطان..
رجعها..
قلت له برجاء :هذا لك.. سوي دعاء.. اخو انا موت..

كم نصبح ضعفاء.. ونلجئ لهم.. للفقراء والمساكين.. نجد سلوتنا في عطاءهم.. نطبطب على يأسنا بالإحسان اليهم..
ذهبت واشتريت عدد من كراتين المياه.. وضعتها امام باب مسجد مغلق.. فالوقت يقترب من منتصف الليل..
كنت اصارع دعوة المظلوم على عساف..
باغداق الصدقات عن روحه..!
مهما كان ظالم..
عساف نصف روحي..
لا اقوى ان يتعذب ..

سلكت درب طويل..
لا أدري..
كيف وجدت نفسي على طريق زينه.. دون ان اتصل.. او ارسل شيء..!

*****
سيف بعناد يمسك بدلته:
ماما لبسني بجامة.. ميمه روحي ..
بلقيس :ماما نامت.. يلا سيف حبيبي لاتعاند ..
دخل فارس الغرفه.. بعد ماكان فوق وحاول في مهره تفتح وتكلمه ولاقدر..!

شاف سيف كيف معاند ومجنن بلقيس ..
تنهد :سيف وراه.. لاتصير بزر..
تكتف بعناد:
ليش ماما.. راحت.. ليش ماتبي لبسني.. انا اقول ميمة.. ناديها.. ماتروح..
بلقيس وقفت بتعب وتكلمت مع فارس :
جنني.. يبي امه.. والمفروض ينام خلاص.. لاراضي يدخل الحمام ولايبدل ..
فارس بخفوت:
بالله عليك.. كيف سما النفسية بتتعامل معه..
بلقيس بعصبية وخفوت:عيب فارس..
فارس بعصبية:
نفسية ومجنونة.. وماتصلح انها تكون امه.. يلعنها من وين طلعت ذي ..
سيف يناظره بقلق ومو فاهم..
فارس سحب البجامه من يد بلقيس :
خلاص اطلعي انا اعرف له ..
بلقيس :مادخل الحمام ..
فارس :تمام باخذه انا..
طلعت.. فارس جلس على سريره وشرد ..مغبون.. مقهور ..
يتخيل مهره..!
قصتها..
معقول عساف سوا كل ذا..
ايش هالاجرام..
كيف  عساف توأم نواف..!
مسك راسه بقوه.. ضربها وحرقها.. مهره.. ياحيوان مهره..!
ابوه قال تفاصيل موجعه..
ابوه ونواف.. ظلموها بعد.. قبل مايكتشفون هالحقيقة ..
التفت ولقى سيف رافع عيونه الكبار ويناظره بصمت..
تنهد:ليش ماخليت بلقيس تبدل لك..؟!
هز كتوفه:
ابي ماما.. بعدين نونو جديد ياخذ ماما.. انا لوحي..
سيف بغصه:
من قال تخليك بروحك..بس هي تعبانه ونامت.. خلك رجال وخلني اساعدك.. عشان بكره ماما تنبسط..
قرب وحط يده على ركبته:فالس افيك _(شفيك)
قام :مافيني شي..
.
.
بعد شوي كان فارس خذه الحمام وضبطه.. وجالس يلبسه بجامته.. وهو جالس يمه على سريره..ومجرد مالبسه بلوزته..
سيف ضمه بقوه وارخى راسه على كتفه..
ضمه فارس..
سيف قلبه يرجف.. وكنه حاس باللي يصير..
ظل متعلبك برقبة فارس..
ربت على ظهره وداعب شعره.. وسيف يتحرك بوتيرة التهويدة..
لمن خدر ونام ..
فارس ظل ضامه..!
كيف يعني..
كيف ياخذونك..
سيف الصغيرون حقي..!

*****

وصل عند المزرعة.. ناظر الساعه قريب من الثنتين ..
نفخ واسند راسه على الدركسون ..
علاقته بزينه سطحية..
هي ماعندها لهفه ولاحماس..
مر كم يوم من جاها هاك اليوم..
مابينهم الامكالمات قصيرة..
بس في هالوقت والضيقه  يبيها هي.. يبي يشوفها..!
اتصل عليها.. ماردت.. كرر الاتصال.. وردت باين نايمه:
هلا..
ماتكلم..
ناظرت الشاشه.. ورجعت الجوال لاذنها:
نواف..الوو..!
بهمس:آسف.. ازعجتك..
زينه :ولا ازعاج ولاشي.. فقدت اتصالك اليوم.. ترى جد..
ابتسم وطلعت ابتسامته حزينه:
ويوم انك فقدتيني.. ورى مادقيتي ..
زينه ذراعها على عيونها وبصوتها الناعس:
امممم.. لسى ماعرف اتصل عليك.. بس يعني تعودت على مكالمتك وصوتك ..
بصوته الخافت:كويس.. تقدمنا شوي.. ع الاقل تعودتي على صوتي.. نقطه ..
بتسائل قلق:نواف فيك شي...؟!
سكت شوي..
وبخفوت قال:زينه.. انا عند الباب ..
اعتدلت بسرعه :
ايييييش..؟!
قال:متضايق شوي.. وماجاء في بالي الا انتي.. اما انك تفتحين .. ولا اعود..!
قامت بسرعه.. وطلعت من الغرفة :
وش تعود.. انتظر .. بفتح..
سمعها وهي تفتح قفول الباب الداخلي.. ونزل ينتظرها عند البوابه..
زينه تسرع في الظلام  ناحية الباب..
قفلت الجوال وهي تقول: نواف..
رد:يلا افتحي..
شغلت لمبه..
فتحت القفل بصعوبة بعد ضربتين برجلها للباب..
دف الباب ودخل..
ناظرت شكله المرهق.. وازراره المفتوحه.. بقلق:
خوفتني نواف وراك ..؟!!
فاجئها وضمها.. وارخى راسه على كتفها :
خايف زينه.. خايف ..
بتردد رفعت كفوفها وضمته:
وش منه خايف.. بسم الله حولك وحواليك..
همس عند اذنها :
الحين لو خفنا على ميت من عذاب الله وش نسوي..
زينه:ندعي له.. نتصدق عنه.. من اللي مخوفك حسابه يانواف..
حسته ضمها بقوه وتنهد بحرارة..
'نواف بحاجتي انا..
لجئ لحضني انا.. صورته الان تخلو من اي تظاهر وشكليات.. ومحاولات ..
لاادري.. لكني ارى نواف بدون اعتقادتي عن تقربه او تظاهره بالاقدام في علاقتنا..!
ضممته بدوري اكثر.. مسحت على راسه.. وهمست :خلنا نروح المجلس ونسولف.. تمام...؟!..
ابعد راسه :تمام..
وباس جبينها..

مشى معها الى المجلس.. دخلت  وشغلت النور :حياك..
جلس.. رفع عيونه لها وهي تشغل التكيف ..
انتبه انها لابسه قميص كات  ميد وشعرها مفتوح ..
وجهها يخلو من المكياج..
التفتت :دقايق اسوي لنا شاي واجي..
وابتسمت..
'فكانت ابتسامتها مطمئنة لقلبي المعتل اليوم'

*****
بعد ساعات طلعت مهره من المكتب..
البيت ساكن وهادي.. بعد ماقامت فيه القيامه قبل شوي ..
ساكن كمهره الان.. كأنها ارض قامت فيها حرب..
فلم تبقي الا انقاض واشلاء..!
جفت دموعها.. جفونها حمراء ومتنفخه..
توجهت لغرفة فارس وسيف..
فتحت الباب بخفوت ودخلت..
فارس  كان يلعب بجواله .. اعتدل بس شافها..
ناظرته وحست لو بتقول شي بتبكي.. فتوجهت لسيف.. النايم.. جلست جنبه ..
وظلت كذا تناظره بصمت وشرود ..
لمست شعره وخده ..
فارس بهمس:مهره.. بيرجع لك..
تنهدت وانزلت عن السرير وجلست على الارض.. ثنت ركبها لصدرها :
هو مو لي.. انا خذت شي ماهو لي.. وربي بياخذه مني..
نزل فارس وجلس عندها :
ماهو انتي اللي تقولين هالحكي.. سيف ولدك.. عساف رغم اللي سواه.. كان عارف ان ولده ماتصلح له ام غيرك..
مهره بشرود:
ماكنت عامله حساب هاليوم.. كنت خايفه من اهل عساف ياخذونه.. وتزوجت ابوك.. وتطمنت.. رقدت وامنت .. طلع عمك متزوج وعندها اثباتات.. ولو تسوي تحاليل.. بتوديني في ستين داهية.. ليه يصير فيني كذا..؟!
فارس :مهره كلنا معك.. ابوي ماراح يتخلى عن سيف.. الاجراء اللي بيصير.. عشان يسكتون سما.. سيف ماراح يتأقلم.. يابنتي نسيتي ايش سوا وقت سافرتي مع ابوي.. وهو معنا ومتعود علينا.. كيف سما..
مدت شفتها وابتسمت بغصه:
مابي افكر كثير في نفسية سيفي هناك.. ان بكى وعارض بيوجعن قلبي.. وان تأقلم وحب الوضع بيذبحني..
تنهدت :
يعني انت وسيف عيالي.. ولالي حق فيكم.. في اي لحظه تختفون من حياتي..الله يستر مايجي يوم بعد تبعد عني يافارس.. طبيعي.. هو انا امكم بس ماجبتكم..
حط كفه على يدها وبصدق متأثر :
مهره.. انتي امي..انا حطيتك بمكان نجود..انا علي برك  لمن تشيب عيوني.. انا ولدك ولك حق فيني مثل اللي في بطنك وزود..

ابتسمت بحزن..
وهي ترفع كفها تحطه على خده:
الله لايحرمني اياك يافارس ..
قالت كذا بصوت مبحوح ومجروح..
ودمعه.. تنزل وتنصف خدها نصفين..
فارس ضمها:
اف مهره اف..

*****

دخلت زينه المجلس معها صينية شاي وتسالي.. لقت نواف منسدح وحاط ذراعه على عيونه..
نزلت الصينيه بخفوت..
رفع ذراعه واعتدل :
نام نواف اذا تعبان..
قال :مافيني النوم.. تعالي اقعدي..
جلست..
وسكبت شاي مدته له:ايه..؟!.. اسمعك.. وراك..
رفع حاجب وهو ياخذ البيالة :
وش اللي وراي..
زينه:واضح انك روقت.. باين من اسلوبك الخبيث ونبرتك..
ضحك:وين الخباثه.. ماقلت شي..!
زينه: يعني مصحيني من النوم.. وواصل كن احد لاحقك.. وتقول كلام غريب.. وخايف على ميت من حسابه.. وش.. بتتكلم.. ولا انا اغراب..

شرد فيها وهي تشرب الشاي وهمس:
لو انتي اغراب.. ماخذني قلبي لك يوم ضاقت..
التفتت وعقدت حواجبها :
بسم الله عليك من الضيق..بعدوك..
ابتسم وحط بيالته:
تدرين.. نبرتك حنونه علي.. لاول مره..
زينه تشرب شاي :
انا كذا قلبي فضيخ..
فاجئها لما انسدح وحط راسه على فخذها :
افدا قلبك ياشيخة ..
ورجع سكت وشرد..
زينه مستغربه..وش فيه..!
هي ماتعرفه صح.. ولاتعرف مشاكله.. ولاهمومه..
بس ودها يتكلم.. مو هاين عليها.. نواف بالفترة اللي مرت بمكالماته لها.. مرح ويضحك.. ويحاول يسليها..
دخلت اناملها بشعره.. وداعبت راسه:
اسمعك.. ترى انا شاطره في الاستماع واحتواء الفضفضه..
نواف:وفاشله بالفضفضه.. ورمي همومك..
زينه:
كثر التشكي للمخاليق يشناك
يحط من قدرك.. ويفرح معاديك..

نواف رفع عيونه لها :
المخاليق.. ماهو نواف..
تعمقت في عيونه..وبهدوء :نواف اللي شهامته.. خلته يسوي شي غصب عليه..
نواف باللهجه كلها معاني :
من قالك غصب.. زينه انا ابيك.. واللي خلق عيونك الحلوات.. ابيك قبل يقولها سيف.. لاني مجبور.. ولا انا متمم شي غصيبه..
عقدت حجاجها :
هذا اللي مابيه.. لاتحسسني بشي اصلاً ماهو موجود.. خلنا.. الزمن كفيل فينا.. بس لانكذب على بعض..
شرد فالسقف : على هواك يابنت غازي.. انا معك.. ولو طالت دروبنا..
وخذ يدها وباسها..
تشبثت اناملها بيده اللي تمسكها.. وبإلحاح حنون:
سولف.. قل لي.. وش مضيق صدرك اليوم..
تنهد: بقول.. لاني محتاج وقفتك..
باستغراب :وقفتي..؟! كيف..
اعتدل وناظرها:مو معي.. مع مهره..
بخوف ورجفه:بسم الله.. شفيها خيتي.. نواف تكلم.. وش صاير..؟!

*****
سيف  جالس بره على كرسي يدخن..
ضايق ومهموم.. كم مره يصعد ويحاول في مهره تفتح ورافضه..
جاته رنه.. رد:هلا ابوي..
فارس بهمس:يبه بطمنك.. مهره نزلت.. جات عندنا الغرفه ونامت مع سيف..
تنهد :تمام حبيبي..
فارس: وانت نام يبه.. لاتظل كذا..
سيف:ان شاء الله ابوي.. تصبح على خير..
فارس :تلاقي خير..!

*****
اليوم غريب..
اليوم الأخير.. وبكرة سيف بيروح.. كما رُتبت الحجوزات..!

مهره بغرابة.. ووتيرة عجيبه.. كانت تجهز اغراض لسيف..
وتتكلم معه بحماس عن القادم..
تحببه..انه بيركب الطيارة ويقابل صديقته سما..
لكنه فعلياً نساها..
حتى اسعفت ذاكرته بصورة.. كانت التقطتها لها..
سيف باعتراض: مابي اروح.. انتي معي..؟!
مهره تتحاشى تناظر وجهه..
وتنشغل في ترتيب اشياءه..
وتقنعه.. انها بتجي.. بعدين..
لكن كان الاقناع صعب..!

وكان الوضع صعب للبيت كله..
واليوم كأنه يوم جنازة..!

وكأن تحضير مهره لتلك الحقائب.. ماهي الايوم جمع ثياب متوفى..
سيتخلص منها من المنزل..

لكن الكل..
احتذا بمهره وكتم مشاعره.. وحاولوا اظهار ان الوضع طبيعي..
وبتروح كم يوم وتجي..!

زينه جات مع نواف.. بعد ماقال لها كل شي.. والصباح علم جدتها..
اللي ارتفع عندها الضغط ومايبي ينزل..
ماقدرت تجي.. وخلت زينه تروح عشان توقف مع اختها في هالظرف..
عيونها كانت متورمة من البكي..
جات مع نواف عند غرفة مهره.. كان سيف طالع من عندها ووجهه تعبان..
زينه:اخبارها يابوفارس ..
زفر بقوه وبخفوت:
اي اخبار يازينه.. ادخلي واقنعيها تاكل شي.. لايجيها شي ولا للي ببطنها..
زينه امسكت ضلوعها:آااه عليك يامهره ..
نواف مسك ذراعها:
تكفين زينه اصملي.. الورع بيرجع لها لايجيها شي.. والولد حي ومعافى..
همست :طيب خلني اشوفها..

دخلت لمهرة.. لقتها فاتحه الابتوب وايباد سيف وتحط له بعض الاشياء..
همست لمهره:
مهره.. حبيبي.. كيفك..
مهره ماقامت تسلم.. بشتات وتوتر وعصبية:
كويس جيتي زيون.. وش اسم الاغنية الكويتية القديمة اللي يحبها سيف..  فيها ليلى  بخالتي قماشه ..

زينه بحشرجة وهي تشوف اختها ونفسيتها مو مضبوطة:
قناديل الأمل..اذا تقصدين اللي معها محمد المنصور..؟!
مهره مشتطه تبدا تطلعها:
صح هذا هي.. كلش راح اسمها من بالي ..

قربت منها : مهره..!
مهره تشتغل برجفه على الابتوب :
ذكريني زيون.. بشغلات يحبها بعد.. تعرفين ذائقة سيف.. بس هم ماراح يعرفونها.. بتحطط له امه في شغلات انجليزيه وهو مايحب!
زينه اجتمعت الدموع في عيونها وهي تاخذ يدها: مهره قلبي.. اتركي اللي فيدك شوي.. وجهك شاحب قومي اكلي شي..

مهره وكأنها شخص ماخذ حبوب لجه:
ابي اخلص كلشي اليوم.. احس يوم مايكفي.. انا بجهز ملابسه.. ولاايباده... ولا بقنعه.. ولابشبع منه.. مايكفي زينه مايكفي.. وتقولين اكلي..

سيف  واقف مع نواف جنب الغرفة ..
حط كفه على جبينه وضغطه:
بتجن.. مهره بتجن..
نواف :هي تاكل شي على الاقل.. لاطيح من طولها.. وش تحب.. خل اطلع اجيب لها يمكن زينه تقنعها..
سيف :لاتحاول.. مجربها انا.. ماراح تاكل الا اذا هي بغت..
وتوجه للدرج :بنزل.. احس تعبت.. قلبي يتواكل وانا اشوفها بهالحال..
نزل مع نواف..

والوضع مأساوي.. ابوه ساكت ووجهه محتقن ..
وامه رابطه راسها ومنجمره..
فارس.. وبلقيس..
في محاولات فاشله مع سيف.. اللي يبكي ويقول:
ماما ماتبيني.. تبي نونو جديد.. قولي رح مع شالي.. وليد.. طيارة.. انا مابيهم..

كيف..
هذا اليوم سيمضي..!

*****

نزلت مهره بعد محاولات زينه ..
واسمعت سيف يبكي ويردد نفس الموال..
حست صوته مزعج حيل..!

كان على طاولة الاكل.. وبلقيس تحاول تأكله..
اندفعت له واضربت الطاوله بكفوفها وبحدة وعصبية:
سيف.. خلاص انكتم.. اسكت.. صوتك أكل مخي..ابلعهااااا....
بلقيس تناظرها ..خافت من خزتها وعيونها :
مهره.. هدي ..مو كذا ..
موضي بتقوم.. تمنع مهره وصراخها على الولد..
بس سيف منعها..!

وفاجئهم سيف.. لما وقف ع الكرسي وضرب الطاولة زي امه وصرخ في وجهها:
انتي ووووااااانه.. خليني.. عشان نونو جديد..
صاحت فيه:
من اللي يخليك عشان النونو الجديد.. من.. انااا..؟!.. انا سيف اناااا..؟!!!!!..
صاح فيها :
ليش خليني اروح لوحي مع وليد.. شالي.. (ومشاري)..
مهره بانهيار وانفعال..توضح لسيف شي اكبر من مخه بس بأسلوب يستوعبه:
لان ياماما.. اذا انت مارحت.. بيحطوني لحالي بغرفة ظلمه.. بيربطون يديني ورجولي.. بيخلوني جايعه.. مع الفيران والذبان.. تبي ماما يصير لها كذا...؟! تبي ماما يضربونها.. ويحبسونها ..

توسعت عيون الجميع من الشفافية اللي اشطحت لها مهره ..
موضي مسكت راسها :ياويلي..
سيف بهلع ضمها :
لاااا ماما.. مابي...ماما اتقولين كذا.. حاااف.. (اخاف).. خلاص والله الوح معهم..
مهره ضمته بدون ماتبكي وبحزم :
كفو ولدي.. كم يوم ونرجع مع بعض.. صح ولا..؟!
سيف يبوس خدها بقوه: الاا..
وشوشت في اذنه وابتسم..
بعدها حطت جبينها على جبينه:وعد..؟!
قال:وعد..!
مهره تجلسه فوق الطاولة..
وتسحب الصحن وبخفوت:
خلاص خليه بلقيس.. انا أأكله..

حطت لقمه في فمه..
كلها..
والكل جلس بصمت وتوتر .. بعد الوضع اللي حصل..!

مهره وسيف.. المعاناة اللي اقترنت ببعض.. هي معه اكثر اثنين يفهمون لبعض..

'كان سيف رغم شهوره الاولى.. قادر ان يفهم تقلبات مزاجي.. يصفو اذا صفيت.. ويتعكر معي'

‏يا رب
غصنٍ بصدري
لو لمسته وقع ..
أرسل لي من الغمايم
ما يبلّه وأعيـش
وازرع بصوتـي ..
سوالف ما سقاها وجـع
من ضحكة الغيـم
ولا من حمام وريـش .

*****