رواية مبعثر فيك ماللحزن لايشفى الفصل السادس والعشرون 26 - بقلم ايمان يوسف🕊️

البارت السادس والعشرين

مهره في مكالمة مع زينه.. ختمتها وهي على اخر درجه وهي تقول'انا اكلمها واعزيها.. الله يصبرهم.. انتبهي لحالك واذا عيوش مانامت خليها تجي عندك'..

كانوا سيف ونواف وفارس جالسين بالصالة ..
سيف: من متوفي..؟!
مهره:اخو زوجة خالي فلاح.. وجديده رايحه عندها.. وظلت هناك.. عشان تكون حولها بايام العزاء..
نواف عقد حجاجه :زينه معها..؟!
مهره:لا.. هذه اشغلتني الله يهديها ماراحت.. ماتبي تصادف خوات عبدالاله وامه..

نواف بعصبية :تستهبل.. طيب ليش ماقالت لي اتصرف.. ماتوب اختك.. الحين ابن الكلاب ذاك تجرء و وصل لها هنا ببيتنا..
وقف بانفعال ولحظة ادراك:
من جدها.. وش قعدها لحاله..
سيف:يارجل.. وهو وش يدريه انها لحاله.. اقعد بس.. الدنيا ماهو فوضى..
مهره:والله الوضع وضع انُ ممكن يدري.. لان عزا بالعايله.. ولو وحده من خواته بتقول زينه ماجات.. هوبا بيدري انها بالمزرعة ..
نواف شال مفتاحه وجواله : الله يلعنه..
سيف بدهشه:وين..؟!
نواف:بروح لها.. بس مهره لاتقولين لها شي .. ممكن؟
ابتسمت:ممكن..!
فارس بضحك:يلعن ابو الحب شيسوي بالواحد..

خلاهم وطلع..
مهره:ياحليل نواف.. والله شكله صدق حب زوين..
سيف وفارس تطالعوا..
مهره بتسائل:شهالنظرات.. وراه..
فارس :نخاف نقولك وتفتنين..؟!
مهره بفضول :وشو.. علمني..
سيف باسترخاء:ان درى عمك بيعلقك ويصلخ جلدك..
ضحك :والله لساني ياكلني.. مهره بقولك بس امانه ماتقولين لزينه شي..
مهره :اييييييه..؟!
خر لها فارس كل شي يعرفه عن حب نواف لزينه.. بالزمان والمكان ومهره مصدومه.. من الحقيقة :
طيب ورى مايعلمها..
سيف:على قوله لغايه في نفسه..

******

توسعت عيونها وتبي تصرخ..
وذراعه القويه تحوطها..
همس في اذنها :انا يافالحه.. انكتمي ولاتصرخين..
شال كفه..
هي بذهول :نـ.. نواف..!

هدها والتفتت عليه بصياح:خبل انت.. بغى قلبي يوقف..
هو بانفعال:ودامك خوافه وماتعرفين تصرفين.. وش مقعدك لحالك..
زينه بانفعال:عاد وانا وين قاعده فيه.. ترى بيتنا.. ومالك اي حق تدخل بهالاسلوب وترعبني..

نواف بغضب:
ترى بنفس الاسلوب اللي انا دخلته.. ممكن اي احد غيري يدخل.. انتوا بمزرعه وعندكم عزاء..ومجتمعكم صغير.. لو الكلب طليقك سواها وش كنتي بتسوين..
زينه وهي تتحرك بعصبية :ماراح يسوي شي.. خلصنا منه وانتهينا.. ذا مب مبرر للي سويته.. اففف نواف.. اففف..
شافها كيف راحت جهة كرتون مويه على جنب.. وخذت علبه فرغتها بجوفها وهي ترتجف..
فتحت ثانيه رشحت وجهها ورقبتها.. وظلت سانده كفها في جدار تبي تسيطر على نفسها..
ظل يناظرها ورحمها كيف خافت ..راح لها حط يده على كتفها:
طيب زينه نعتذر ومنكم السماح..
بعدت كتفها وهي ترمي العلبه على الارض..تركته بالصاله ودخلت غرفتها.. واغلقت الباب..!
.
.
.
بعد شوي..
راح فتح عليها ..لقاها جالسه ترتب وتحط باقي الاكياس في الشنطة بعصبية وتقفلها..
ابتسم على مودها وشكلها وهي معصبه عليه.. اغلق الباب
وتلفت فغرفتها.. مرتبه ترتيب دقيق مع بساطة الاثاث.. الا ان كل شي فيها يلفت الانتباه.. تركها وراح يتأمل تفاصيل غرفتها وعالمها..
تأمل لوحات النسيج على الجدران.. وكلها تحمل توقيعها المطرز تحت اللوحات..
ارفف عليها شموع وكتب اغلبها انجليزية.. تخص الصوف والنسيج..
شال فريم من على الكومدينا.. فيه هم الثلاثه بعمر صغير..
ابتسم على جمال الصورة.. وكيف سندس في الوسط تحيطهم بذراعيها..
شال فريم ثاني.. صورة ابوهم..
سحبته منه: من سمح لك تلعب بأشيائي..
رفع حاجب: انتي وماتملكين لي..
حطت الفريم وبسخرية: ياشيخ..؟!
راح عند الرفوف: غرفتك.. تشهي للقافه..

سحب كتاب وتصفحه..
صاحت: نواف احر ماعندي ابرد ماعندك.. والله ولاكنك صفقت دمي.. جاي وتعثي بغرفتي بكل رواقه..
هو بنص عيون والكتاب بيده:
ليش ماقلتي لي انك لحالك..؟! وليش اصلاً تظلين لحالك..
هتفت :وليش اقولك.. وبعدين ادري لاقلت بتجي.. وانت قايل انك صاحي من خمس الفجر..ليش اشغلك واخليك تمسك درب انت فغنى عنه..
نواف بعصبية:عنبوك قاعده بمزرعه شكبرها مامعك احد..انتي ماتخافين؟!
زينه بانفعال:وش يخوفني.. حد يخاف من بيته..! نواف انت شايف شكلك..باين عليك التعب.. لو صاير لك شي بالطريق.. جيتك كلها مافيها سنع..

حط الكتاب وقرب منها:طيب ليه ترجفين ..
زينه بانفعال :ارعبتني..البيت على انُ فاضي وتمسكني كذا.. شعر راسي وقف ورب الكعبة.. الى الان احس الدم يغلي بعروقي..
كانت تتكلم بدون تناظره..
باغتها حضنها وخذ راسها على صدره وحبه :
آسف ياروحه.. آسف ياقليبي.. آسف ياعين جدي.. انا غلطت.. بس هي جات كذا يعني بفاجئك..
زينه بتنهيده:والله وفاجئتني..
وزفرت..
همس لها:بتسامحيني الحين.. ولاكيف؟!..

حوطته هي بيديها..استكانت على صدره وتنهدت.. مما اثار دهشة نواف..
'اغلقت عيني.. كنت جفلت من افكار مهره.. وامكانية مجيء عبد الاله.. والانتقام مني بتفكيره المريض ..
ازفر واتنهد الصعداء..
ونواف يتواجد معي كملاك حارس يرسله ربي لي..
طوقته اكثر.. عله اكثر صدر آمن لي في الحياه.. نعم..!
نواف يفرض نفسه فرضاً على قلبي..
حبه فرض وعشقه واجب.. وكله مباح..!'

بعدت راسها عنه..
وراحت خذت زجاجة ماء فاضيه:
بروح اجيب مويه.. تبي شي اجيب لك..
نواف :لا ياعينه ابيك انتي ..

طلعت بسرعه من الغرفة واغلقت الباب..
نواف بعد تعب اليوم كله ماتردد انه يرمي نفسه على فراشها..
اخفى عيونه بذراعه..
'ولذة تسري في عروقي.. رائحتها.. عطرها حولي.. انتشيت لشعوري اني على وسادتها.. وألامس شرشفها..
كيف لو نمت في حضن زينه.. اففففف...! '

دخلت وحطت الماء.. ناظرها وهي تحمر وقت شافته متمدد مكانها..
رفع حاجب: لاتناظريني كذا.. مثل ماخليتك تنامين في غرفتي.. لازم تستضيفيني بغرفتك..
زينه : يالله بدينا بحركات الورعان..
نواف:والله مانام فمجلسكم.. مانام الا على فراشك..
زينه : انا بروح غرفة مهره..
اعتدل:عاد كذا بعتبرها طرده..
جلست على طرف السرير:خلاص نواف نام وريح شياطينك..
حط كفه تحت راسه:تصدقين طار عني النوم..
انتبه لصندوق خشب على الكومدينه.. مد جذعه وسحبه:الله شهالانتيكه..
حطه قدامه.. يتفحص الزخارف..
ابتسمت:ابوي كان جايبه من تركيا..وتراه قديم.. نقوشه عثمانية..
نواف فرك يدينه ببعض :اكيد فيه مقتنيات..

فتحه وهي تناظره ورافعه حاجب.. لقى تجراف قديم.. ورسايل ورقيه.. وشعر ملفوف بطريقة انيقه ومربوط بشريط احمر لونه اسود..شاله ولقى تحته اشقر..
نواف: شعرك..؟!
ابتسمت:ايه.. وذاك شعر مهره..مصيبتنا واحنا بمتوسط..كنا نشوف قصات البوي في المجلات ودايخين عليها.. قصينا لبعض وجبنا العيد.. خبينا شعرنا بالعشه عن جديده.. وصرنا دوم لابسين قبعات.. ودرت جديده من تالي.. ياهي جلدتنا يانواف.. الله يرحم ابوي.. جاء وهي تهوشنا.. ومارضا وتهاوش معها.. تعرف وش سوى؟!..

نواف :وش..؟!
شردت:حلق شعورنا ورتبها بالمكينه.. الوضع كان شي طويل شي قصير.. والله ياجديده كان بيوقف قلبها وهو يحف عند اذانا بالموس..
ضحك بصدمه:من جدك..
مدت يدها داخل الصندوق وطلعت مجموعة صور.. دورت بينهم..
طلعت وحده.. رفعتها له..
هي ومهره بقصات ولاديه خفيفه وثقيله من فوق .. وحلق في اذانهم..
توسعت عيونه :
اجراااااااام....
زينه:حلو صح..!
خذ الصورة من يدها:شف وقفة الثقه.. ايش هالصياعه يابنت..
ضحكت:والله طول بسرعه.. بس كنا حبينا الوضع وقلنا لابوي يسويه لنا من جديد ومارضا..
نواف يتأمل الصورة ويناظرها :
تاخذين العقل..
عضت شفتها ونزلت عينها..!!

في تلك الليلة..
تسامرنا.. لم امنعه من تقليب اشيائي ..اسراري وذكرياتي ..
تصفحنا دفتر ذكريات قديم.. وكتابات صديقات المدرسة.. ضحكنا حتى الهسترة..
على سذاجة العبارات وغزل الطفولة..
وعلى كلمة (اكتب لك بالمقلوب ليدوم الحب في القلوب)..
(واكتب لك بالرصاص ليدوم الحب والاخلاص)..
والكلمه اللتي تواجدت في اغلب الصفحات..
(الذكرى ناقوس يدق في عالم النسيان)..!

رسائلي مع خواتي..
اغلبها رسائل اعتذار.. او مخططات شيطانيه..
او طلبات.. نسردها انا ومهره لسندس.. لتكون المتحدث الرسمي مع جدتي..

اول رسالة حب تلقيتها..
كانت من احمد اخو صديقتي دانه.. قرئنا الرساله معاً.. كيف كان يعدني بالزواج.. وانه لن يتزوج احد غيري.. كيف يصفني بالاميرة والجميلة والسندريلا..
كان احمد حين ذاك في سادس.. وانا رابع..!
تزوج احمد من طالبه سعوديه ونسى وعده ..كانت تدرس معه في كندا..!
ضحكت:الكلب عشمني وراح لغيري..
ضحك :ياكلبه ..وتقولينها في وجهي..
زينه فرطت من الضحك:انت شايف القلوب اللي راسمها.. يحق لي اتعشم..
ناظر القلوب المسروده على السطور هز راسه:ماقول الا ليتهم رقدوا..
زينه:حرام عليك.. الولد عويشق وحبيب..
يناظرها بنص عيون وهي تضحك.. داخ ولعن الشيطان..
لملم الاشياء :طفي النور.. وصلت من النوم..
شالت الصندوق رجعته مكانه:نومة العافيه..
قصرت النور وهو انسدح وانقلب من الجهه الثانيه وقلبه يخفق.. وزينه وقربها خطر..
ظل مغمض ويحصي تحركاتها.. ويخمن بتظل ولا بتطلع من الغرفة..
كانت تطقطق بجوالها.. ظلت كذا مده بعدها حس فيها وهي تغطي الشمعات العطرية وتطفيها.. وهي تشيل الشاحن..
زينه من صمته وسكونه فكرته نام..
النور خافت..
وشيطان نواف صاحي.. فتح عيونه بخفوت.. شافها تشيل بلوزتها ..
*انفرط عقد نبضي.. ضجيج في كياني لايهدء.. ارقبها وهي تستبدل ثيابها.. وترتدي قميص ناعم ومريح..
توزع عطرها في معصميها.. وعنقها وعظمتي ترقوتها..
ويرتفع ضجيجي اكثر..!
هل سأعدي هذه الليله سلاماً.. ام سأضرم ناري واحرق غزالتي هذه..!!
شعرت بها تجلس على الطرف الاخر..
تسائلت.. هل ستثق وتنام بجانبي..
ام تخرج وتنزوي في مكان لا اصله..
لكنها فعلاً استلقت.. وهاهي تسحب جزء من البطانية لتدخل فيها.. وتلامس اقدامها اقدامي..
اثنين وثالثنا يجلدني.. انها زوجتي ولست ملام..
كنت سألتفت.. وآخذ منها كل شي اشتاقه..
كنت سأقتل البدايات التي تخافها..سأخطو خطوة عنيفه في علاقتنا.. وقد امزق ثقتها.. لن احتمل..
في النهايه انا رجل..
رجل عثى العشق فيه وارهقه..
لكن قبل ان افعل..
توقف فيّ الزمن وزينه تتسلل الى ظهري.. كوخزة ابرة.. أفقت من وسوسة ماأنا مُقدم عليه..
تظننني نائم..
تتسلل الى جسدي بحركات حذره..
تدس ذراعها تحت عنقي..
والاخرى تحت ذراعي.. وكفوفها على صدري...

انفاسها تلهب عنقي..
ومافعلت كل هذا الا ظنها اني نائم ..
ثقتها تنمو وتكبر..
الجمت نفسي هواها..
يكفيني..
اننا نتقدم..
في غرفتي.. نامت على الكرسي..
واليوم بجانبي..
والقادم مع زينه اجمل..!

تشبهين الطهر بايام الطفوله
‏والصباح بوسط الاحياء القديمة

****

في الطيارة وبدرجة رجال الاعمال.. شاهين يجلس ويرتب وضعه..
المضيفه تضحك:اووه كابتن.. هل يعجبك الذهاب كراكب..غير لائق بك ابداً..
ضحك وهو يشيك على الخدمات حوله:
لأقيم خدمتكم للركاب كاترين..
مر الكابتن خلدون:ياواد قوم ع الكبينه.. شكلك غلط هينا ياشيخ..
شاهين:اعتقني ياخلدون.. الرحله هذي محتاج اريح راسي.. مافيني اركز بشي..
خلدون:انت ادرى بوس..
وتركه وراح..
كاترين:اي خدمه كابتن..
ابتسم:لنقلع اولاً.. ثم امتحنكم عزيزتي..(وغمز بعينه)..
ضحكت وراحت..
شاهين متوتر واعصابه تتواكل.. والطاقم كل شوي حد جاء يداعبه ويمازحه..
وهو مو حول شي..
فتح كتاب جايبه معه.. وبداخله صورة جمان وراشيل..
يحاول يرتب افكاره..
يرسم خطة بحث في القريه.. وده الساعات تطوي ويوصل بلمح البصر..
غاضب منها.. ومشتاق..
عنده كلام كثير..
عنده عتب ومبررات.. عنده زعل وكم هائل من الشتائم والسب..
تنهد بحرقه:
اللهم هون علينا سفرنا هذا واطوي عنا بعده.. اللهم انت الصاحب في السفر.. والخليفة في الأهل ،اللهم اني أعوذبك من وعثاء السفر ،وكابة المنظر وسوء المنقلب في المال والاهل".

ظل يردد دعاء السفر ويستودع بيان وديم.. ويستودع جمان..
ولاعلم له بقطعه من صلبه.. تنتظره..
لايدري عن فهد.. ولا حتى لديه اي تخمين..!

عندي عشم مثل الكفوف الباردة ورا الهشيم
‏عندي أمل مثل الندى فوق الغصون اليابسة

******

الصباح بيت سعود..
بيان:لاخالي مالبس بدلة العمل..
سيف يتقهوى:غريبه على شاهين.. بالعاده لو بيسافر.. من غير عمل يقول..
فارس بسخرية:شكله لقى له وحدتن شق ورايح يعرس عليها بدل جمان الجحود..
سيف:عمتك يا **.. ماتستحي..
فارس :وانا صادق.. انا لو حرمتي تسوي لي كذا اخلعها..
ضحك سيف:انت تطلق.. هي تخلعك..
مهره كانت مبسوطه ببنات جمان.. ضحكت:
علمه على مصطلحاتك يابو ماضي معفن..
سيف يضحك:اشتقت لهالسوالف..
مهره بتهديد:هااا سيف هاااا...
ضحك وهو يقرص انفها:فديت خشيمك.. ختمتي على شياطيني.. مايجي بعدك احد..
ديم جات.. بعد بحث:وينه حبيبي سيف.. ابي العب معه..
انخطف لون مهره.. حاولت تبتسم:
رايح عند خالته.. كم يوم ويجي..
فارس شال ديم فحضنه ويبي يغير الموضوع:
وش هالالوان على جبيرتك.. ليش وسختيها من اول ليله..
ديم تتكلم بانفعال: لعبنا فألوان ماما.. وبابا.. هاوشنا انا وبينون.. والله فارس زعل مايكلمنا وقال قلعوا بره..
ضحك:قال لكم انقلعوا.. قلعتكم.. ليش تلعبون باغراض امكم..
بيان وهي شارده:مسكين سيف صار ماعنده ام زينا.. اكيد قلبه يبكي.. زيي انا وديمي..احنا كلنا مسكينين..!

لحظة صمت تعلقت عيونهم في فم الصغيرة.. وجملتها التي كانت ناعمه كالسكين.. قاتله كالسم..!

****

رن جوال نواف.. حاول يتجاهله.. وهو غارق فالنوم..
فتح عيونه بخفوت..بينقلب ياخذ جواله.. وتنبه لثقل على يده ماهو معتاده..
ابتسم.. وزينه نايمه فحضنه.. مندسه في صدره.. كنها طفله صغيرة:اففففف.. يالله الجنه..
اصر المُتصل..
فسحب ذراعه.. وانقلب للجهه الثانية..
استيقضت زينه مع حركته وصوته:
هلا مها..
مها:صباح الخير..
هو :صباح النور..
مها:يوو نايم.. آسفه نواف ع الازعاج.. بس الساعه تسع.. فكرتك صاحي..
نواف:ازعجتيني وخلصتي.. وش بغيتي..
مها:ملف الفواتير.. اللي سلمها المقاول امس.. انت خذته.. ابيه عشان اخذه للمحاسبه نخلصه..
نواف:ماهو عندي..خذه هادي.. وترى شوفي في غلط فأسعار الحديد.. كلموا علاء يتأكد.. عنبوهم كل ذا ضريبه..
مها:لاتنسى في ضريبه ١٥ بالمئه.. ممكن تكون هذا سبب الزيادة..
نواف:لا.. مستلمين الحديد قبل تطبيق القرار.. لايقعد جمال يسوقها علينا.. تأكدوا قبل التحويل..
مها:ابشر انا اشوف الوضع..
نواف:عساك ع القوة..
وقبل يغلق:ايه مها.. لاخلصتوا موضوع الملف اخذيه لابوي يوقعه.. انا ماوقعته.. لاني شككت فيه..
ضحكت:ياخي مافيه ثقه بالموظفين.. جمال سنين يشتغل مع العم بوسيف..مستحيل زايدها من راسه..
نواف:انا عاد كذا اشك حتى بثيابي.. تأكدي وارسلي لي على الواتس العلم..
مها:ماراح تداوم..؟!
نواف:لا... ابوي عنده خبر..
مها:تمام.. في امان الله..
هو:في امان الكريم..

قفل ورجع الجوال.. التفت على زينه.. لقاها تطالعه نظره غريبه..
ارتفعت حواجبه:من متى صاحيه..؟!
قامت من الفراش وهي تقول بتهكم :من الو مها..؟! (قالتها بتقليد)..
ضحك وباستغراب:وش فيك تقولينها كذا..؟!. تراها موظفه عندنا..
لملمت شعرها :والله حتى لو انها مديرتك فالدوام.. وش هالوقت الغلط اللي تتصل فيه.. وبعدين اتوقع.. ان محد له حق انه يسمع صوتك اللي توك قاعد فيه من النوم.. الا.. زوجتك..!!!
توسعت عيونه وبضحكه وهو واقف قدامها:
ليتك يامها داقه من زمان..؟!
سحبت منشفتها الصغيرة ونفضتها بقوه.. وهي تعطيه نظره معصبه..
وتتركه وتروح دورة المياة..
نواف بخرفنه:
ياااا عمري.. وش هالوجه الجديد..

*****

بعد شوي زينه معه بالسيارة:
طيب انا مشتهيه تميس بالسكر.. كيف..؟!!
نواف بنظارة شمسيه.. التفت عليها:
هالحين انا بفطرك بره.. عشان اراضيك.. تبين تميس..
زينه:عادي يعني.. مو لازم الفطور يكون كونينتال.. عشان نتراضى فيه.. ممكن يكون تقليدي.. وحسب مشتهى المعده.. وبعدين لازم نتشارك فطور بوريالين قبل نتشارك فطور بو مية ريال.. ولا..؟!
نواف :ماشي تميس.. تميس.. وتبين معه فول..عدس.. عريكه.. شي..
زينه:لا ماحبه.. بس خبز.. وبدليك مطعم ثاني ناخذ منه معجنات.. وحمص..
نواف مستمتع حده.. وزينه تقول :
روح يمين.. هناك ذيك البناية في خباز التميس اللذيذ..

'نزل نواف وانا ارقبه.. واغازل جاذبيته داخلي.. شكله الواضح.. وهو يزاحم الزبائن المتواضعين من عماله.. وبسطاء.. ويطلب لي ما اريد.. ابتسمت وقلبي يخفق سعاده في صباح اصحو فيه معه.. وعطره عالق في اوردتي.. وصوته يعثو بعقلي.. ظللت ارقبه واحصو تحركاته.. حتى خرج بكرتونه.. فوقها الخبز.. '

جاء جهة بابها.. فتحت له.. حط الخبز الحار في حضنها.. وبخفوت يداعبها وهو يقرب من وجهها:
ماقول الا ليتني تميس.. وتشتهيني..
شهقت :نواف..!!!
ضحك وهو يطلع ويغلق بابها ويركب..

هناك قريب.. كان شافه وهو يدخل المخبز واعرفه.. ظل ينتظره بالسيارة.. ونيته له قشره..
شافه وهو ينحني عليها ويضحك..
اشتعل.. احترق..
كان مريض بالغيره عليها وهي عنده..
كيف وهي مو في يده..
كيف وهو يملكها شخص ثاني..
كيف ونواف يهمس ويضحك.. ويقترب كذا.. منها..!!!!

*****

في حدث غير متوقع..
نازل يجيب مشروبات للفطور من بقالة ...
وهي بالسيارة.. تشغل اغاني وتختار.. مبسوطه وتدندن..!!

لما انفتح باب السيارة وسيل من الشتايم تنهال.. وهو يمسك معصمها ويحاول يسحبها..وكأنه زوجها.. وشايفها تخونه مع خويها..
زينه برعب.. تحاول تتشبث بأي شي:هدني يالمريض.. اتركني.. و تصرخ وتنادي (نواف)..

عبدالاله:نستك النعمه انا.. ساكبه بسيارة هالـ****.. وتجولين بالديره.. يالـ*****.
زينه:زوجي ياحيوان زوجي.. اتركني لاتفضحني.. الله ياخذك ..
قدرت توصل للهرن ودعست عليه..
بهاللحظة كان نواف طالع.. انصدم وهو يشوفه يسحبها بهالشكل..
زي ماكان يسحبها عند بيتهم..
كانت مو في ذمته وبغى يذبحه..
كيف الحين..
خلال ثواني نواف كان يضربه بجنون.. يضربه بنية القتل.. ضرب هستيري خارج عن السيطرة.. وهو راميه على الارض..يركله وينهال عليه بسيل من السب والقذف والشتائم..!!

وعبدالاله ببداية الهوشه طلع سكين وحاول يطعن نواف.. تحرك وانجرح ذراعه جرح طويل..
وزينه تتمسك فيه وهي تشوف الدم بتشرته.. وحالة عبدالاله معجون على الأرض:
لايموووت خلاص تركه.. لاتبتلي فيه.. نواف.. خلاص...

جاوا مجموعة رجال وحاولوا يفكونهم..
نواف بعد عنه.. بعد ماتقدم رجال كبير في السن :
ياولدي.. انا فوجهك لاترد هالشيبات.. خله.. هو غلط واحنا شهدنا..والعذر منك ومن الشيخه..

زينه عرفته:ياعم عبدالرحمن.. تكلم مع ابوه كانك تمون عليه.. يفكني من شره.. انا حاشمه الدم اللي بينا.. ومابي اقطع المواصيل بشكوى وسجون..
الشايب:على هالخشم وامسحيها بوجهي.. والله يرحم من رباك.. وانت ياولدي.. تعوذ من الشيطان.. وبعض العقول ترفع وكبر عقلك عنها..

نواف كان من الغضب.. مو عارف يرد رد عدل..
مسك ذراع زينه وفتح باب السيارة ركبها..
وركب جنبها.. وشخط بالسيارة مخلف صوت مزعج..
زينه تجمع مناديل وتحطها على ذراعه..والدم لايتوقف..
كل عروقه وعضلاته بارزه.. وهو يصرخ فيها:
زينه بعدي.. لايجيك شي بعد انتي..
هتفت:وانا وش سويت..
نواف بانفعال:يومك قاعده بمزرعتكم لحالك.. وش كنتي بتسوين لو ولد الـ*****.. ذا متهجم عليك..
زينه سكتت.. وهو يكمل :
والله لا انهي مستقبله..اما بسجن ولامصحه نفسيه.. ولد الحرام.. اللقطه.. من يظن نفسه..
وصاح :وين جوالي..؟!!
نفخت تبي تلملم اعصابها.. وعطته جواله من شاحن السيارة..
خذه وسحب مناديل..
مسح جبينه ورقبته..
وهو يتصل برقم: ارحب يابوسلطان..
فواز :هلا بطليق الحجاج..
نواف يحاول يكون طبيعي:
يارجل ماكنه عندك اقارب.. طلال نشوفه اكثر منكم..
فواز:توني جاي من امريكا.. ثمان شهور كامله وانا هناك..
نواف:بشر تخرجت المدام..
فواز:ايه ابشرك ولله الحمد..
نواف :مبروك يابعدي.. الفال لساره تلحق امها وتصير دكتوره..
فواز :بعمرك يابوسعود... وش فيك اتصالك وراه بلاء.. صوتك ماهو شلي..
نواف :ادري ان المجال ماهو مجالك.. بس صايره معي سالفه.. (وقال له عن الوضع اللي صار)..
فواز:دحدر المستشفى وخذ تقرير.. ارسله لي.. ولو فيه شهود عرفتهم ولازوجتك ارسل لي اسامي..بتواصل مع شرطة منطقتكم ومالك الا اللي يسرك..
نواف :كفو بخوالي ..
فواز :احتزم يابعدي ..
نواف:بيض الله وجهك.. بس اسمع فواز.. تراه مو المره الاولى.. يعني الرجال ماهو ناوي يرسيها على بر.. عطيته فلكه عدله الحين.. بس لو تكررت ببتلي فيه.. والله لاروح قصاص بسبابه..
فواز:اعقل.. مايسوى عمرك.. انا بتصرف.. بس ارسل لي معلوماته مضبوط..
نواف:عساك سالم يابوسلطان.. جعل عمرك طويل.. سلم لي على بوتركي والشباب..
فواز :يوصل ياسنايدي..

قفل منه..
راقبته كيف عاقد حجاجه.. كيف فكه مشدود وعروقه نافره..
وقف عند مستشفى ونزل..
طفت السيارة وقفلتها ولحقته..
كانت في حالة توتر وعصبيه من كل شي صار.. ووضع نواف.. والغضب والانفعال المخيف اللي هو فيه..

وعشان وضعه والنزف تعاملوا مع الحاله سريع..
الدكتور بدء ينظف الجرح.. وزينه واقفه على بعد بسيط وعينها عليه..
الدكتور:دي بلطجه..هوا شايف نفسو فين.. سلاح ابيض..ليييه.. ليه.. ايه الهمجيه دي..

وهو ساكت ومتجهم.. وبدء الدكتور يسوي له غرز.. وبان الألم على وجهه..

قربت منه.. حطت كفها فوق كفه..
ومع شكة الغرزه الثانيه.. تمسك بكفها.. وضغط على اناملها..
ظلت جنبه.. لمن خلصوا وحط له الدكتور الضماد..
جابت تشرته خذه منها.. لبسه وهو يوصي الدكتور على التقرير..
وكنه اهم شي عنده بجية المستشفى التقرير.. اكثر من علاج الجرح ..

*****

زينه تشوفه.. وهو يجمع اغراضها بعشوائية.. في شنطه فاضيه غير الشنطه اللي جامعه فيها اغراض زواجها.. بانفعال: نواف ايش هالتصرفات.. انت اشتكيته وخلاص.. وبكلم جديده ترجع اليوم..
نواف بغضب :لا اسمع صوتك زينه.. والله ماتقعدين بعيده عني يوم..اخلصي بدل ما انتي واقفه شيلي اغراضك.. ترى توني مسوي خياطه بذراعي..
قامت تاخذ الشغلات اللي تبيها بتردد..
لقته يتصل على جدتها وبعد السلام والسؤال.. وتعظيم الاجر.. قال لها انه بياخذها معه.. ويبدو ان الجده اعترضت على التوقيت..
بس نواف بصرامه:
مالك لوا ياجده.. بس الزينه معي.. ولو بننتظر الظروف تزين.. كل شوي بيصير شي.. وانا والله ماعاد بي حيل على بُعدها ..
زينه كانت تستمع.. وهي تشيل بعض الشغلات اللي تخصها..
قفلت سحاب الشنطة وهي تسمعه يقول:
فعيوني ياجده.. ابشري.. في امان الله..
قفل وسحب شنطتها الكبيرة وطلع..
زينه منقهره منه..
ومن تصرفاته..
بس خفف عليها انه ماقال للجده اللي صار عشان مايشغلها ويضيق صدرها..
البست نقابها.. وخذت الشنطه الثانيه واطلعت.. ووصت عايشه ع المكان.. ولحقته بره..

راحت له وهو فاتح شنطة السيارة.. ويبدل تشترته المتلطخ دم بواحد نظيف..
خذ اغراضها منها وحطهم بالسيارة..

شوي وكانوا فالطريق.. وبعد لحظة صمت وهدوء.. وقف عند كوشك قهوه.. وطلب لهم شاي..كان ينتظر..
لما رفع حاجب.. وابعد راسه ورى يناظرها بجنب عينه..
وهي صاده وباين زعلانه..
ابتسم دون كلام..
وهو مايبعد عيونه عنها..
نبهه العامل.. اعتدل وهو ياخذ اكواب الشاي والماء..
تالي مغط عمره.. وخذ من السيت اللي ورى كرتونة التميس.. عطاه اياه:
بوس ممكن تسخين مكرويف..
تردد الفلبيني..
غمز له :سوي حراره وشيل عشرين ريال..
زينه طلعت عن صمتها وهي تلتفت والعامل ياخذ الخبز منه :
هالحين انت شاريه بريالين وبتسخنه بعشرين.. وش يصير لك جُحا..
ضحك : مشتهى الحب ذا.. والله لو اسخنه بألفين..
زينه بنص عيون:سكنهم مساكنهم.. اركدت شياطينك..؟!
عض شفته وبنبره حلوه:
والله ان كانك بجنبي ومخاويتني لدربٍ ماينقطع.. وبتظل شياطيني هايجه.. ادخل النار..!
زينه غرقت فعيونه..
وردت داخلها "اللهم عمراً لايفنى.. مع عينيك نواف..!"

ـ الجفا ممنـوع ياسمح المحيّا
والعذر مرفوق والشرهه قديمه .

*****

بعد كم يوم..
كنت امتر واشبر تلك القريه في الريف وعقلي لايستوعب.. لوكانت باورتساي فعلا ً.. اي تفكير شيطاني جرها لذلك..
تواجدها في قريه في هذه المنطقة.. من ممكن يخطر في باله..!
اغلب البيوت مملوكه للاهالي..
السياح قليل..
ولمن يستهوي فعلاً الريف هذا والمنطقه..
تعبت.. منذ ايام.. وانا اخرج لساعات..
وماحيلتي الا تلك الصورة..
ومعلومة انها هاوية رسم..!
اضناني الحنين.. وشب في قلبي نار غضب لايرحم..
عزت عليا نفسي.. وانا ابحث عن زوجتي.. بين زحام بشر لايمتون لنا بصلة..!
كنت ازداد عصبية ..
حين اسقط فريسة بين فكي اللغه..
فأنا لا اعرف من الايطالية الا بضع كلمات.. تساعدني في طلب من مطعم.. او حجز في فندق.. فالعاصمه روما وميلان فيها الكثير من يعرف الانجليزيه ولايجهلها..
اما هنا فالغالب يتعبني.. مثل العجوز التي اريتها الصورة.. وتكلمت وتكلمت.. بشكل موسع..
لكني لم اصل لنتيجة..
الواضح انها عرفت وجه الشقراء راشيل..
وايضا وجه جمان..
لكن هناك خطب فالموضوع ولبس لم تستطع ايضاحه لي..
حاولت ان اجد احد يترجم.. لكن السوق كان اغلبه لايعرفون غير الايطاليه..
اللعنه عليك جمان..!
وعلى وضعي هذا..
كأني فأره في مصيده..اتخبط في مأزق ولا استطيع الخروج..
دخلت اورتساي وقد اغرتني الجبنه..
ابتلعت الطعم ولا استطيع النجاه..!!
انتي هنا..
الواضح ان وجهك مألوف.. لكن لا احد يدلني اين..!
تقدمت نحو محل قهوة.. اقبلت على زوجين شابين.. واضح انهم سياح..
سألت وانا اريهم الصوره..
دققوا فيها...
البنت باللغه ثانيه.. تتكلم مع زوجها وهي تشير لصورة جمان..
وهو يأيدها..
طلعت من شنطة الظهر تبعها رسمة متقنه بالرصاص لها..
استأذنها وهو ياخذها..
دقق في التوقيع j.s ..
قلبه قرب يطلع من مكانه و يسألها: عن المكان.. اللي التقت فيها..؟!..
ردت بانجليزيه ثقيلة:
ان من يومين شافوها وهي ترسم عند نافورة حديقة تتوسط القريه..
سألها عن اي معلومات ثانيه :
لاادري اين مكانها بالضبط.. لكن لفتت انتباهي وهي ترسم وجه رجل عجوز.. يعزف الناي.. سألتها لو ترسمني.. لم ترفض رسمتني بل ورفضت ان انقدها حق الرسمه.. لقد كانت امرأه جميلة بعينان حزينه.. ابتسامتها تعلق في الذاكره.. اليس كذلك مارك..؟!
ابتسم الشاب الهولندي:
نعم انها لطيفه جداً..
شكرهم وتركهم..
تمر الايام ولاهو عارف مكانها وين..!
بس الأكيد انها موجوده في هالمكان..
راح عند مطعم قريب يطل على النافورة.. طلب له اكل والشمس قربت تغيب وهو ماتغدا الى الان..
يتلفت بيأس في وجيه الماره.. ويدقق في صورة راشيل.. ويدور اشباهها من الشقروات..!

هناك.. عند مجموعة طيور.. كانت تنثر مجموعه من الحب.. والحمام ينزل ويحل ويلتقطها..
حدق في ظهرها..
شي جذبه لها..
بشيال جينز.. وشوز ناعم..
تعقد سكارف بألوان صيفيه على راسها بشكل تروبان.. ويطل شعرها الاسود من خلاله..
سوار ناعم في معصمها..
تلمع مع ارتفاع يدها ونثر الحب..
قام من الكرسي وقلبه يخفق بشده..
تفاصيل لايجهلها..
تحركات جسدية يعشقها..
مشى بضع خطوات وتوقف.. لما شافها تتوجه لعربية بيبي.. وتنحني تعدل مفارش الطفل وتروح..
احباط هائل.. زلزله..
ماهي جمان..
بيجن..
والله بيجن..!
تهاوى على الكرسي بالطاولة الخارجية.. واشعل سيجار نفثها بحرقه والم..

عن مجتمع حزن الشوارع و ناسه
‏أخذت لي ، في طارف الليل منفى

‏في خافقي طفلٍ كسى الشيب راسه
‏وفي عبرتي ، شيخٍ على الناي يغفى

******

المالديف..
وفي فيلا خاصه بشاطئها وخدماتها.. مهره بفستان ميد ابيض ونظاره شمسيه تبتسم.. وهي تشوف سيف وفارس.. بشورتات وواقفين بوسط الماء على قارب صغير قريب .. يصيدون سمك..
فارس بانفعال:ورب الكعبه صدت..
سيف : شكل سنارتك نشبت بالحصى..
فارس يسحبها ويلف البكره:
بوفارس..علي سقف الثقه.. عشاكم اليوم من صيدي..
مهره تضحك:ياخوفي.. نقضيها على تونه يا امك.. ماصدتوا الا سمك صغار كنها حراسين..

فارس:نذر.. اجدع لك سمكه كيلوين.. واقصها من النص واسويها دفتر..
سيف يسحب سنارته:لا والله ابوك اللي جاب العروسه..
مهره بترقب.. وفارس.. وهم يشوفون سنارة سيف تهتز.. وهو يسحبها..
وصرختهم بحماس..
لما خرج السناره وبنهايتها.. سمكه كبيرة..!!

مهره تجيب السطل سريع :واو واو.. ماشاء الله كبيرة.
سيف ينزلها بالسطل..
ومهره تضحك مع المويه اللي ترش بوجهها..
فارس :العن امها وش كبرها..
سيف وهو يمسك السمكه لاتقفز:ها فارس وش صار على صيدك..
سحب السناره وباحباط :
ماش طلع قبقب..
سيف علم مهره وش تسوي عشان ماتهج السمكه الحيه الى الان.. وقال وهو يشيل السطل الثاني وفيه سمكات:
لف السنارات.. واطلع من الموية.. جسمك تحرق ياتبن..
مهره تطالع جسم فارس:
اي والله وش فيك صرت خرايط..
رفع نظارته على شعره ويطالع ذرعانه:
تان هذا تان.. حالف.. مارجع السعودية.. الا وانا برونزي..
مهره تحط منشفه على كتوفه:
رح تروش وحط لك كريم اي برنزي.. يبي لك ميبو.. احترقت حسبي على شرك..
شال مع ابوه الاغراض:والله نواف والزينه بتفوتهم هالانعام..
سيف :وقت عشانا توها تقلع طيارتهم..
مهره:يوصلون بالسلامه.. الله يحفظهم ..
فارس تقدم عليهم دخل الفيلا وبيده شايل سطول الصيد..
سيف طوق مهره :ها حبيبي.. مبسوطه..؟!
مهره تبوس خده وببتسامه:
ياجعلني مابكيك.. وش لون مانبسط وانت معي..
لعب بشعرها:عمري..
مهره ضحكت مع وخزات حست فيها ببطنها..
حركات توها تركز معها من سافرت..
وكانت تحس فيها قبل ومع الحزن ماأدركت هذا وش..
سيف :وراه..!!
خذت كفه على بطنها :بنتك.. تغار مني.. قلت عمري وراحت طقتني..
سيف بضحكه:عمري بنتي ولاتزعلين ياعين ابوك..!
وراح بايس مهره على بطنها..

*****
في بيت راجح وبعد مكالمة فيديو بين سيف ومهره..
انهار يوم عرف انهم فالبحر..
يعني تخيلوا طفل ويشوف امه وابوه واخوه في بحر ومسافرين وناكبينه..
انهضم وصار يبكي..
ويمشي في البيت وهو يسب ويشتم.. مع ان مهره مابينت له ولا اللي معها..
بس سما كان عندها خبر بسفرتهم..
بعد ماقفل قالت:
ماقالت لك ماما.. انهم مسافرين للبحر شوف فارس كيف مبسوط.. ماما خذت النونو الجديد وفارس وتركتك.. ليه كذا يامهره..!!

كتم كتم وحاول يكذبها:
سما انتي كدابه.. والله كدبين..
سما تفتح سناب فارس :ماكذب حتى شوف..

سيف تجنن من شاف الفله والمقاطع.. وسيف وفارس يسبحون وصوت مهره جنبهم.. وهم يصيدون سمك وضحكهم..
تقوس فمه وتقوس.. وانهار..
حتى ليان استنكرت فعل سما:
انتي من جدك.. لاجد سما تستعبطين.. انتي تضرين نفسيته..
سما هزت كتفها :بالعكس.. لن اتوانى عن ابعاد مهره تلك عن عقله.. انه ابني انا.. لي انا..
فتح سيف المكتب على راجح وبملامح باكيه:
جدي..
راجح بحنيه:جدي..؟!. وش فيك من مزعلك..
سيف:سما تقول ماما راحت سافرت في البحر.. ورتني جوالها.. فارس واوبه يصيدون سمكه.. انا مايحبوني.. مايودوني..
وانهار وهو يعرك عيونه..
راجح ثارت شياطينه واستوعب على طول فعل سما..
قرب منه وشاله وطلع فيه من مكتبه.. وراح الصاله..
لقى مشاري نازل من فوق وواقف بالصاله وبحده:
ليش يبكي اجل.. انا فوق وسمعته.. وش مهببه هالمره..
ليان تقوله وش صار.. وقطعت كلامها..
مع صوت ابوها الحاد الغاضب باسم 'سما'..

بارتباك تطالع سيف بحضنه وضام رقبته:
وش فيه بابا.. لايكون ازعجك سيف..
نزله راجح على كرسي..
وبانفعال حاد:والله ياسما لو استمريتي تكيدين ضد مهره وما انتي عامله لمشاعر هالصغير حساب.. والله ماتشوفينه ولاتشمينه الا لاملى الشعر وجهه..!!
حي ميت ماطولينه..
سما باستنكار :بابا.. وانا شسويت..

راجح بصوت زلزل البيت:
عارفه وش سويتي.. والله واشتغل عقلك النايم سنين.. وحطيتي شره بولد عساف..
سما بعصبيه:ولدي بابا ولدي..

لوح بسبابته:اوووص ولاتقولينها عنده.. الورع ولد عساف وامه مهره.. وبيض الله وجيهم ان كانهم عطوك اياه.. من باب الخوف من الظلم والظليمه.. ولاانتي يوم ابوه نفاك من الامومه.. كان عارف بلاك.. عارف انك ماتصلحين حتى تربين جرو صغير يابنت الكلاب.. بس انا اللي ماعرفت اربيك..
مشاري :صل على النبي يبه وحصل خير..
راجح بغضب مو عارف يسيطر عليه:
انا الغلطان يوم سعيت لك في رجعته.. ولا عقليتك هذي ماتقدر حتى تحب نفسها.. لاتمتحنيني ياسما.. وارجعه قبل حتى تقضي المده اللي اتفقنا عليها..
سما بانفعال وعصبيه:
من ترجعه له.. لاهله وهم مابغوها الا من الله.. رايحين يتمشون بالمالديف.. والوضع عادي وطبيعي عندهم.. وكأن مهره كانت تبي الخلاص وتحررت..
مشاري بعصبيه ودهشه:وانتي تبين البنت تقعد تبكي وتلطم.. البنت دخلوها المستشفى من فرقا ولدها.. سيف قاعد يحاول يحفظها واللي ببطنها.. وان طلع وسفرها وش يدخلك تقهرين الورع.. خبله انتي..

ليان تكلمت:تفكر انها اذا سوت كذا.. بتاخذ سيف بصفها وتكرهه بمهره..
راجح باستياء واشمئزاز:
ياعزي عليك يابومشاري على هالخلفه ويافري جيبي.. هذا اللي خذتوه من الغرب.. النجاسه والغدر..
ومسك يد سيف اللي يطالع كل شي يصير بدموع عالقه :تعال جدي.. تعال..
سما بتحذير وعصبية :انتبه بابا تسوي شي.. والله تخسرني.. قلت والله.. وقلت لك اهله مو في السعودية اصلا ً..
راجح بتهكم يتوجه للباب :
والله مايصعب علي اخذه لهم حتى لو انهم بالقمر..
سما ماتت خوف وهي تروح لمشاري:تكفى مشاري تصرف.. رح معه لايسوي شي.. الله يخليك والله ماعيدها.. بس لاياخذ سيف مني..
مشاري طالع شحوب وجهها وشفايفها:
انتي لو تعقلين شوي.. كان حنا بخير..
وخلاها ومشى..

*****
كافي تعب ياضيقة الصدر تكفين
صكي زراير هاجسي .. واعتقيني

غصيت في العبره مثل حد .. سكين
قومي عن ضلوع الصدر وارحميني

مهره على كرسي عند البحر.. منبطحه على جنب وشارده مع صوت الموج ولحظات الغروب..
مكالمتها لسيف عورت قلبها..
خلاص ماعاد تطيق بعده..
كان يسأل بفضول عن صوت البحر.. وعن فارس ليش مو لابس بلوزه..
ويسأل انتوا وين.. وش تسون..
ابتسمت بدمعه..
فعلياً ماناقصهم الا هو..
سمعت صوت خطوات تقترب منها.. لقته فارس.. جاي بكوكناتا فيها مزاز..
وباليد الثانيه كاسه كبيرة شفافه مليانه فواكه استوائيه.. رفعت عينها له بدون تتحرك..
بخفوت:كيف جسمك الحين..
ابتسم :حطيت من الكريم اللي عطيتني وبرد.. قومي جايب لك تصبيرات قبل العشا..
اعتدلت وهي تمسح دموعها وتشتت نظرها وتلفتت :وين ابوك..؟!
فارس:راح لادارة المنتجع.. يبي يأكد حجز الفيلا جنبنا ويجهزونها عشان نواف..
فارس لاحظ ملامحها وضيقها.. حط الشغلات من يده على الطاوله وقعد جنبها:
وش فيه.. ليه البوز ذا الحين..
ضحكت وهي تمسح دمعه:
ولاشي.. هواجيس..
فارس مسك بطنها بلطافه:شكلها سدن لعوزتك.. هااا.. هااا يالشينه.. وش مسويه..
ضحكت : خلاص سميتها سدن..
فارس:عاجبن الاسم.. ان ماسميتوها سدن.. انا بناديها فيه..
مهره:تم يابوي..مايسميها الا اخوها..
فارس عطاها الكوكناتا :اشربي لذيذ.. يسرسح
خذتها مهره:يسلمو ياحيي..

******

على ظهر يخت فخم.. سيف يناظر بانبهار :
السفينه تتحرك جدي.. الله..
راجح وحوله رجاله ومن ضمنهم هاشم الاقرب والأوفى:
ايه ياجدي.. انبسط وتبي نصيد سمك نصيد..خلهم يجهزون السنارات ياهاشم..
هاشم ببتسامه:انتا تامور امور عمي..هسا نجهز كول شي..
وداعب شعر سيف:كون ابرك الساعات.. نچوف فيها عمي سيف ويطلب منا إشي..
سيف عيونه تتلئ ع البحر..
وهاشم التفت لواحد: قاسم يابه.. جهز عدة الصيد.. وجيب العدة مال الصغير الطالبها منا عمي ابو مشاري..

قاسم نزل في غرفة.. شوي ورجع ومعه جاكت سيفتي ضد الغرق..
عطاه هاشم..
جثى يلبس سيف:ليش هذا..؟!
هاشم يقفله ويرتبه:
هذا.. حتى وانت تصيد يسلم لي عُمرك.. ماتطيح ويعورك البحر..
التفت على راجح يطالب بترجمه..
ضحك :يابابا.. اللي بيصيد سمك لازم يلبس كذا..
سيف:فالس فاسخ ثيابه وهو يصيد.. ليش انا ألبس هذا زي البلونه..
راجح:فارس.. اكيد على الشاطي.. ولا احنا بنعمق ياجدي.. عشان اطمن عليك..
سيف مافهم كل شي..
الا ان راح يتحرك في اليخت بانبهار..
هاشم:شلون على موعدنا مع منصور عمي تريد نلغيه.. لو نأجله لوگت ثاني..
راجح:لا ياهاشم.. خلنا على موعدنا.. هو بيجي باليل..
هاشم :هسا انت تقول تريد تظل باليخت مع الصغير..لمن باجر..
راجح:ايه ماعليك.. سيف اموره طيبه.. الحين يتعب من اللعب وينام..

*****
باليوم الثاني..
شاهين في رحلة بحثه..
انتبه لمحل لبيع مستلزمات الرسم والأصباغ بواجهه زجاجيه..
دخل وسأل امرأه منهمكه في ترتيب بضاعه جديده..
جاته ومافهمت عليه.. طلع لها الصوره.. شافتها وبحماس تشير لصوره:راشيل.. راشيل كرو..
سئلها باللهفه.. وين تسكن..
فهمت من اشارات يده.. انه يسألها عن السكن..
وهي تقوله ان راشيل مسافره..
وتشير بيدها.. مثل الطيارة وتقول انها ببرلين..
اصر انه يبي يعرف مكان بيتها..
نادت ولدها.. جاء من سلم جداري وواضح ان يشتغل بالسقيفه تبع الكوخ..
قالت له..
وجاء الولد ذو السابع عشر.. وقال بانجليزيه سليمه:
راشيل سافرت.. لكن توجد صديقتها العربيه في المنزل..
نبضه.. عروقه.. مشاعره.. تفجرت.. تعرق جبينه من فرط الشعور والوصول..
بخفوت:هل انت متأكد..؟!
وعطاه الصوره:هذه..؟!
الشاب :نعم.. نهاية الاسبوع الماضي اتت المتجر واشترت مستلزمات للرسم.. انا اوصلتها لها بنفسي..
شاهين :اذاً ارجوك.. اوصلني للعنوان..
الشاب طالع امه وسألها..
الحرمه ناظرت شاهين وكنها تبي تستشف خيره وشره.
بعدين هزت راسها ايجاب..
وشوي كان شاهين يمشي مع الشاب..  متوجه لبيتها..
'تضخمت المسافه.. المتر اصبح كيلو..والثانيه ساعه..هل حقاً سأجد متمردتي.. التي اختفت شهور مخلفتنا ضحايا بعدها..
توقفنا بعد ان مرت ساعات افتراضيه بالنسبه لي.. لكن الحقيقة هي عشر دقائق تفصل المتجر عن المنزل الحجري.. المحاط بحديقه مليئه بالورد.. واغصان مزهره تتعلق في النوافذ.. وعشب ينبت في كل مكان حتى فوق القرميد..
اشار الولد ان هذا البيت..
وتركني وذهب..
تقدمت ببطئ لحاجز هش للحديقة.. باب صغير مفتوح.. وضعت كفي ليُفتح بمرونه..
ظللت اقف.. كأني لا اصدق..
اني سأطرق الباب وتفتح جمان..!
وانا افكر كيف سأطرقه..
كيف سأمشي الخطوتين الفاصله بيني وبينها..
كيف.. لو رأيتها..
هل اضمها.. ام اهشم عظامها على فعلتها بي..
غاضب.. وبي شوق عاصف..
وكلي تناقضات..! '

خرجت طفلتين شقراوات.. وهم يتكلمون الايطاليه وباين يودعون جمان اللي ردت عليهم بنفس اللغة...
مرو من خلالي.. كفراشات خرجتا من عنق الزجاجه..
الزجاجه التي تخبئ زهرتي السامه..!
زهرتي الشائكه..
صوتها مزق بقايا روحي..
نبرتها.. ولو انها تكلمت لغه اخرى..
تقدمت والباب تركته الطفلتان شبه مفتوح..
وبما ان راشيل مسافره والطفلتان اللتان كما يبدو تحشوان وقت فراغ جمان ووحدتها.. قد ذهبتا..

وضعت كفي على مقبض الباب..
لينقبض قلبي وجمان تخاطب احد.. ذكر.. بنداءات.. اخترقت عروق قلبي وادمتها:
يلا حبيبي.. اصحى.. حياتي.. قلبي.. يعني ماصحيت من هذرة البنات.. وش فيك.. وش صاير اليوم..
وباين انها تركت الصالة وراحت مكان ثاني.. وهي تكرر كلمات مرحه..

'استبعد فكرة الخيانه.. واستبعد ان جمان تفعلها.. ومستحيل اصلاً  تحب غيري..
يمكن الجزاء من جنس العمل..
لاا.. لاا.. الا طهرك ياجمان مايتجنس..!
فتح الباب بخفوت ودخل الصاله الهاديه..
غير مصدق بالكارثه.. انها مع رجل غيره..
ولو ثبت.. سيقتلها.. ويقتله.. سيمشي في جنازتها ويعترف بفعلته.. سيطبع فقدها شامه في قلب عمه.. الذي ايدها وآمن بها.. ودعم فعلتها..!

قبل ان يقتلها..
سيعذبها.. ويلعنها.. سيقتلها ويمثل في جثتها.. سـ.....
وقطع كل ذلك..
فهد وهو يناغي.. ويتحرك في فراش ارضي.. وسط الصاله..
اغلق الباب بدون صوت..
واصابته رجفه وهو يشوف كفوف الصغير واصابعه تتحرك لفوق.. ورجوله تتمغط بعد نومه باين طويله..
حس انفاسه بتنقطع..
وهو يتقدم اكثر نحو الطفل الصغير..
عجز يستوعب اللي صاير..
عجز يجمع قطع البازل وتطلع الصورة..
وقف بطوله الفارع بالضبط عند فراش فهد..
والصغير مثل الارنب عند رجوله..

'وملامح فهد تترجم لي قصة انتقام جمان..
اتسعت عيني وانا اجثو بركبتي بجانبه.. لم اميز هو ذكر او انثى..
لكن ملامح فهد.. لونه.. وعينه..
مازالت امي تحفظ لي مئات الصور وانا صغير..
فهد.. انا في طفولتي..
عليك اللعنه ياجمان..
عليك غضب من ربي لايرحمك..!
كيف فعلتيها بي..
اي سواد في قلبك..!

شاله بحذر.. حط كفه ورى راسه.. اغمض عيونه وشم رقبة الطفل.. لاتمتلئ عينه بحمم دمعية.. احرقت اجفانه..
جمان كانت في المطبخ.. جات..
شهقت بهلع وهي تشوف الشخص اللي معطيها ظهره.. وشايل فهد بهالطريقه..!

ماعرفته في بادئ الامر..
شاهين كان اكثر نحافه.. شعره كان طاول وعاقده بمطاط..
هي ثواني بسيطه.. حتى ابتلعتها جاذبيته وكيانه..التي وان نكرتها عينها.. لاينكرها قلبها..!

وهو يلتفت ببطئ مع شهقتها..
كانت لحيته طالت بشكل مرتب..
ناحف.. اهمل نفسه.. متغير عليها.. عظمة وجنته بينت.. سواد اجفانه تترجم معاناته حالك كظلمة ايامه الماضية..

ماستوعبت وجوده..
ولاوقوفه..
ولافهد بين يدينه..
يناظرها بكل عتب الدنيا.. وبكل عشق مرضي مر على قلوب البشر..!

******

سما تهاوش :لا أوفر.. والله ياذا هالولد.. اللي تعلق  فالكل الا فيني..
ضحكت ليان:عاد من كان بيتوقع انه بيسوي هالعلاقه مع بابا وبيكشت فيك..
مشاري مسترخي على الكنبه ويحرك جواله.. وتوه مقفل من ابوه وقاله انهم حتى الليله مو جاين :
والله ياسما.. سيف شكل جوه عالي مع ابوي.. من ضحكه يالله سمعت ابوي وش يقول..
سما بانفعال:
وانا يتبكبك عندي ويدور مهره..
مشاري:خلينا واقعين.. سيف يتأقلم معك وبدء يحبك.. بس انتي من تطلعين انانيتك وتبين تكوشين عليه.. تبدء اخلاقه تشين..
سما بعصبيه:اف.. اف.. هو اهم شي مارجعه.. وش يحس فيه بابا بهالتصرفات..
.
.
.

فاليخت..
راجح شرد في سيف وهو يتعلق بذراع هاشم.. ويحاول يوصل للكورة بيده الثانيه.. وطرى عليه الوضع البارح..
هو ومنصور.. في طاولة عشاء فاخر على ظهر اليخت..
راجح :فكني يامنصور.. تهريب تعرفني مهون.. ودخلتي معك  بتهريب لوحة ادوارد.. والله عشان العشره.. مابغيتك تتوهق..

منصور رفع حاجب:
العمليه فشلت.. لاتحطها برصيد خدماتك لي.. خسرت فيها مبلغ يبي له تعويض..
راجح بعصبيه:فشلت بس بأقل الخساير.. انت تدري لو طاحوا علينا وش كان بيصير.. والله مايفكنا من السجن الا عزراييل..
ضحك منصور:
ماش ياراجح.. رق عظمك وصرت تخاف..
ضرب راجح الطاوله:
خلني انظف ملفاتي وحياتي.. مابقى في العمر كثر مامضى.. وعملية فرنسا كنت حاسبها الاخيره معك.. لاتطولها يامنصور.. وكثير اللي يشتغلون معك..
منصور برواقه واسلوبه الفخم:
تعرف ان الشغل والسنياروهات النظيفه عندك.. وعند ذيبان الله يرحمه.. ولاتسوي فيها اخر عمليه معي وتروح ماراح خويك...
عقد راجح حواجبه :
وش قصدك..
منصور يشرب من الكاسه قدامه:
ماقصد شي.. لو انه عايش وماطلع من شغلنا.. كان الدنيا تتحرك على طقة اصابيعه..
راجح مارتاح وحس انه منصور هدده تهديد مبطن :
منصور للمره المليون اسألك.. انت لك يد بموتت غازي..!
ضحك: مات موتت ربه.. حادث ياراجح.. بقى هذي اتهمني فيها.. لاتنسى انك اتهمتني اني حرضت زوجته واني تسببت في الانفصال عشان حبيتها..
راجح يستند على الكرسي:
انت بذرة شيطان وهي ارض خصبة.. اسأل الله ان عيالكم مايطلعون عليكم..
منصور بعدم اهتمام:
اسامه متعلقن في عمه.. قاطعني ولد الكلب.. وباسل لاحقه.. بس خل اروق وادخلهم الكار صح..
راجح هز كتفه:عمري ماشفت اخطائي صح.. وعمري ماتمنيت مشاري يمشي على خطاي..
منصور يشرب بقية الكاسه:
قلبك ضعيف.. ليته زي عقلك كان عينا خير..
طلع في ذيك اللحظه سيف يدعك عيونه.. مشى لعند راجح:جدي..!
ناظره منصور وهو يشيله بحضنه:عين جدك..
سيف :انا قمت مايمي احد.. اخاف..
ضمه راجح وسيف يرجع ينام من جديد..

منصور يحدق فيه :
هالولد منهو عليه.. متى صار عندك حفيد ياراجح..!
راجح ماتمنى سيف يطلع.. ولامنصور يدري عن وجوده..
نادى هاشم :خذ الورع لفراشه..وخلك عنده لايخاف لحاله..
منصور بضحكه: ليش ماتثق فيني..
راجح بخفوت:وين وصلنا بالكلام ..

قطعه من حبل خياله سيف وهو يضم رجله:
قول هاسم نروح صان..
ضحك وهو يشيله:قضينا البارح فالبحر.. والليله نروح المزرعه.. ابوي سيف وش يامر فيه بعد..
سيف يعانقه ويبوس خده:
يابيبي ياجدي..

******

لحظه قاتله..
صمت مطبق..
شاهين يحتضن فهد.. وهي واقفه.. صاحت بحده:
وش جابك.. كيف وصلت لي.. لو ابيك كان رجعت..
شاهين بصدمه:
انتي وش.. جدار.. ماتحنين.. مالينتك الايام.. راسك اليابس ماكسرته الوحده والغربه..
جمان بعصبية :
مابقيت فيني شي يحن.. ولابقيت شي يروف ويشفع..!
قالت كذا وهي تصد وتتحاشى شوفه..
شاهين بانفعال:
هذا وش.. هذا وش ياجمان.. ..!
وكان يقصد فهد..

ناظرته ببرود وبنص عيون وبتشفي تبي تشوف حجم فعلتها فيه:
هذا فهد .. هذا فهد يابوفهد ..

ناظرها بصدمه وكفوفه ترتجف بالصغير..
عرف من اول ماشافه.. بس الحقيقه وهي تطلع من لسانها مُره..
تبعاتها كثير.. كيف حملت فيه بوحده.. كيف ولدته.. من كان معها فاوجاعها.. من مسح على راسها.. وقال لها "هانت".. كيف عانت ماحولها احد..!
فهد سمي ابوي.. حلمي وحلم جده..

فهد فرحه كبيرة للعايله..
كيف اختصرتها واحتكرتها.. وش هالحقد ياجمان..!!
رفعت حاجب وبنبره شامته لكنها خرجت مهتزه مُعذبه : ماكنت تستاهل تدري بحملي به.. لاني حملت به غصيبه.. بالضبط بالليله القشرا بعد ماجينا من زواج سيف.. خبيت هالشي داخلي..وبذكرى زواجنا جيتك بظرف.. وبه نتيجة التحليل.. قلت هذا هدية عودتك الحميده لي.. وهذا صافي النيه..

من بين اسنانها:
رحت لها.. خليتني بعيدنا .. خليتني ورحت.. شفتها غاده بحضنك تدور عزا امها فيه..

وبحده وغضب وانفعال:
منهي غاده تحلل لها شي لي.. منهي غاده اللي مانسيتك اياها.. منهي غاده عشان اصبر لانك متعلق فيها..حبك القديم..؟!!!
خرا عليك وعليها ..

كانت تتكلم وتوصف الوضع وشعورها.. بحده..

اعتاد شاهين منها التجاهل..
ماتواجهه...
دوم تبين انها ارخصت فيه لغاده..
ودايم تعطيه شعور انك 'اشبع فيها' ..
سدح فهد على الكنب وراح قرب لها..
بعدت وهي تمد كفوفها بتحذير :
لاتقرب مني.. خلك بعيد.. ماتحملك شاهين .. ماتحملك..
وقف ورمى كفوفه بيأس:
ليش ماقلتي لي وقتها.. ليه ضميتني وانتي تطعنيني من ظهر.. ليش ماتواجهين.. ليش تجمعين في قلبك لما اسود ضدي.. وماخليتي فيه ذرة رحمه علي ..

جمان بحده وزعل:
ماذكرك فيني.. ولا انبهك ماتخوني.. انا بنت سعود.. عندي كبر وعزة نفس.. والله يغطونك ياشاهين ويخبون عليك..

صاح فيها:بس انتي تدرين ان اللي صار عارض.. وانك انتي بقلبي..ويوم وعدتك من تالي كنت عند وعدي.. احبك جمان واللي رفع سبع مافي قلبي غيرك..
ضحكت بتهكم ومرار :
قال كيف عرفت انها كذبه.. قال من كبرها..!!!!

شاهين بغضب:
وش تسمين صبري عليك.. حد يرضى مايدري مرته وين.. اي ارض تتوسد واي سما تلحفها.. عزت علي نفسي لاسألوني بناتك ولا ادري وش اقول.. رحت لابوي حمدان بالعيد اعايده.. مالقاك معي على العاده.. تدرين وش قال يوم كذبت انك تدرسين بره.. قال والله من الدياثه.. مخلي حرمتك لحالها..وغيره وغيره.. والله لولا كبرك بقلبي ان كان طلقتك غيابي ومارديت الشور لحد..

جمان بضحكه مريره ودموع:
لاااا تقصر.. انت منتهي بافعالك فقلبي من زمان.. وش تبي من حرمه تسمعك تهمس لغيرها.. تطلع في المقاهي مع غيرها.. غاده ياشاهين كانت تطالبك تطلقني.. عشان ترتبط فيك.. متخيل ان وحده ماتسوى التالية من الغنم تناطحني فيك.. وتقول يا أنا ياهي.. وصبرت.. وقلت بناتي.. وقلت يحبني.. وقلت بكره يصفى ذهنه ويرد لعقله.. بس انت تغرق زياده..
لا انت سفيه وبنعقلك.. ولامسحور ونقرا عليك.. كنت عاصي على بصيره.. تدوس على قلبي وتمشي..!

شاهين بصياح: واللي خلق فهد اللي ماذنت فاذنه.. اني يوم وعدتك كنت قد الوعد.. وكان مافي عقلي ولاقلبي الا انتي..والبنت دقت علي بظرف اقشر.. امها توفت.. ان كانها طبت في حضني من حزنها.. ولا والله ماكنا نسويها.. علاقتنا فيها حدود.. ولا انا بايع عاد الدنيا والدين..

مشت بانفعال وامسكت راسها :
لاتبرر لي.. قلبي محترق.. ولايبرد حرتي فيك شي..
حطت كفوفها على جدار.. ونزلت راسها تحاول تسيطر على نفسها..
نزلت دموعها.. تكلمت بنبره مهتزه:
كنت صغيره.. وكانت نجود تجنني وتحضنك.. وتقول اخوي ولي بروحي.. كنت انقهر وادفها.. ماكنت افهم والله ماكنت استوعب.. بس كنت اغار احد يقرب منك غيري..
التفتت بحده:
كنت بزر واغار من اختك.. كيف تبيني اتقاضى وانا زوجتك وغاده تضمك..!
حضنك ماسخى فيه الا لبناتي..

اشرت على صدرها:
كسرت شي فقلبي ماينجبر.. والله وكسرت كل شي ومابقيت شي..

شاهين حاول يحط يده على راسها.. لكنها بعدت بنفور..

تكلم بحده:
تركت غاده وصفيت.. من وقت وعدتك.. انسي موقفها عند المستشفى.. سامحي عشان نعيش.. سامحي مابقى فيني حيل بدونك..

جمان بانفعال وصوت حاد:
باقي..باقي فقلبي غل عليك.. باقي فيني حب ماطحن.. باقي فيني زعل يكفي لسنين قدام ياشاهين..
شاهين بضحكه ساخره ومرار:
اكثر من انك تفجعيني أن جاني فهد.. اكثر من انك تجلديني اني ما اذنت فاذنه.. ولاتممت له.. اكثر من انك خذتي مني حق اني ابشر الدنيا بقدوم سمي ابوي..
جمان:شوهت علي ولادتي بديم.. وصمت بيان بعار اسم غاده يومك استغفلتني فيه.. حلفت ان ولادتي بفهد ماتجيسها.. ولاتعرف عنها ولاتفرح فيها.. اوجاعك اقترنت بعيالي.. حتى اعياد ميلاد ما اسوي لهم.. كل ذكرى ولاده ذكرى شينه منك..!

انوجع قلبه.. يبي يضمها.. يبي يلمسها.. يبي يعلمها انه غلط.. يبي يوصل لها وش قد ندم.. كيف عاش الوهم مع غاده..
وكيف كانت حقيقه مضببه في عمره..!
لكنها رافضه القرب.. كانت تبتعد مُخلفه قدامها حاجز وهمي مايقدر يتجاوزه..
حس بمدى صعوبة..
كسر المسافه..!
جمان مجروحه.. وتقيحت جروحها بالبُعد.. والوحده والوجع..!

كانت تقول كل شي بخاطرها ماكانت تقوله.. وكان يتكلم معها بكل شي بخاطره..
اصواتهم تحتد وترتفع.. احبالهم الصوتيه مُره ومالحه..!

انهت الحوار بشكل عاصف : حتى فهد اشبع فيه مابيه.. مابي شي يذكرني فيك.. مابي شي يربطني فيك.. يالخاين يالكذاب..!

وراحت غرفه.. واغلقت الباب وقفلت.. وانهارت في بكاء مرير..
بكت كما لم تبكي من قبل..
بكت بنحيب مرير..
انفجرت كبركان كامن.. من مكابره.. وضغوط.. وكبت وألم..!!!
وجوده قدامها كان فوق طاقتها..

الشوق يذبح والعنا ماله حلول
و الدمع يفضح والمكابر مصيبه

******

وبشاطئ المالديف..
مهره وزينه قاعدين والليله قمره.. وصوت الموج الهادئ يعثي في اجواء الليل وصمته..

والأختين يتبادلون السوالف..
زينه بضحكه:لا.. هو خذني من بيتنا بهالاسلوب الهمجي.. وانا مارضيت اعطيه على جوه.. فانمت بغرفة ثانيه وقلت له.. دام ماراح نسوي زواج.. اقل شي دام ناوين نسافر.. يكون زواجنا لاسافرنا..
مهره تضحك:حرام عليك.. والله نواف مايستاهل هالتغلي..
زينه بجديه اعتدلت في جلستها: مهره انتي فاهمه شعوري.. انا خايفه من التجربه الثانيه.. خايفه من انبهار نواف فيني يكون كله فقاعه وتختفي.. بعد ماياخذ اللي يبيه..مابي اكون حاجه سهله ووصل لها بكلمة فمجلس.. وانتهى فيهم الحال بليلة.. يكتشف بعدها انه بس كان مبهور بشكل وحده فجأه صارت زوجته..
مهره فهمت ان نواف لسى ماصرح بمشاعره الاوليه مابغت تحرق عليه هالكرت وتعلم زينه..
بس قالت:لايروح عقلك لذا الشي بس.. زينه انتي مو من اللي الواحد يعشق قشورها.. انتي روحك تنحب.. واصرار نواف وتعلقه فيك صدقيني اعمق من اللي ببالك..
تنهدت :وش تقولين عني انا اجل.. نواف دودهني.. ياختي وش هالمراجل.. وش هالحنان..انا مابي نواف شي يبتدي وينتهي.. انا ابيه عمر.. يامهره نواف العوض اللي نسمع فيه انه من رب العالمين..
شردت مهره: اجل لاتضيعين عمرك وايامك الحلوه على اي خوف ولاماضي.. ابعدت سيف.. ماخليته يقرب مني.. تمسكت بماضي ومخاوف.. كسرته.. وزعلته.. الرجل لاحب صدق.. لاتشحين بنفسك عليه.. لاتضيعين نفسك بوساوس وتسويفات.. عشان ماضي ولى وانتهى..!

وابتسمت بحنيه:
وانتي صبرتي يازينه.. عيشي الحلوه والمره مع نواف..لاتضيعين ايامكم بالبعد.. ومخاوف ماتودي ولاتجيب..

زينه شردت فالبحر وتفكر بحكي مهره..
لما جاتها رسالة واتس..
افتحتها لقتها.. من نواف ابتسمت وهي تحط السماعه.. وتسمع الرساله الصوتيه.. بصوته :
يقول بن قضعان
قد طلبت الله وأنا بين زمزم والحطيم
شوفتك ي اغلا ثنيه ليا صرتي ربـــــاع

العيون تجوع لك جوع والله العظيم
والعشاء ب عيونك السود وعيوني جياع

إن عطيتي مايرد الكريم إلا اللئيم
وإن بخلتي قلت تكفين والدنيا متــاع

أقبلي مثل التباشير في وجه الكريم
وارحلي مثل التعازي على موت الشجاع

احمرت.. وضحكت:اففففف.. نواف..!
مهره بشطانه:وش راسل هالمراهق..؟!
زينه تحاول تزيح الخجل عن ملامحها :ابيات.. فيها شغلات مبطنه..
مهره بضحك:ياعمري ع الحياء.. زوين.. والله يافجيعة نواف لادرا ان سبب تهربك.. انك قامطه اصلاً ..من ذا الليلة

زينه خبت وجهها:خلاص مهره.. تكفين..
جاتهم نحنحة سيف..
عدلت زينه حجابها..
مهره ببتسامه ونظره حلوه:
قلنا روحوا فلوها.. بس عاد مب ساعات..
ضحك وهو يبوس خدها :
كسرنا بعض فالبلياردو.. وقلنا نعطيكم مجال تحشون فينا..
مهره :اووووه قطعنا فيكم تقطيع..
سيف :محللين ياعينه.. ها زينه اعجبك المكان..!
ببشاشه:مره .. الاجواء خرافيه..
وبتسائل:وينه نواف..؟!
سيف:فالبار مع فارس..
توسعت عيونها:بار.. وش باره..؟!
ضحك:لاتخافين.. رايح يشري دخان.. قفلت البقالات.. نواف ماعليه خوف..
تنهدت:اشوى..
زينه قامت:استأذنكم انا..تصبحون على خير..
سيف:تلاقين خير..
مهره:نوم العافيه ياقليبي..

****
بعد شوي..
دخل نواف الفيلا الخاصه فيهم.. توجه للغرفه ولقى زينه متغطيه كلها وباين نايمه..
ظل كذا يناظرها.. نادها ولاردت..
راح تروش..
لبس ترنغ.. وراح سوا له كوب شاي وخذ بكت الدخان.. و فتح بوابة الشرفه..طلع واشعل سيجار..

كان متوقع يجي يلقاها تنتظره..
بس يمكن نامت بعد تعب السفر..
ظل شارد..
لو تعبانه.. لو مرضانه.. ماتخليني..
وش ذا يازينه..!!

زينه كانت اصلاً صاحيه.. وحاسه بكل حركه سواها..
وحست من خروجه للشرفه بحجم احباطه..
زاحت المفرش وراحت مشت لمن عنده..
حس بخطواتها ولا التفت..
تسللت تضمه من ظهره.. وتسند خدها عليه:
ماكنت نايمه.. كنت انتظرك.. بس قبل تدخل استحيت من لبسي.. واندسيت تحت فراشي..

ابتسم وبنص عيون:
ماتدرين انك دقرتيني..
باست كتفه:آسفه..
طالع القمره وبخفوت:
زينه.. قلبي.. زينه يامجننتني.. ومابقيتي فيني عقل.. انتي وش مفكره.. حبي لك وشفقاتي وليد لحظه.. تفكريني طاير بالعجه..

سكتت.. تسمع له وهي ضامته..
همس بنبرة الذكرى:
شفتك على الفرس يوم جيت بسيف لزراعتكم.. وسرقتي عقلي.. صورتك عجزت امحيها من مخي..
توسعت عيونها..
وكمل بتنهيده:سبيت نفسي ولعنتها.. كيف احط عيني على وحده في ذمة ثاني.. تالي انتي جيتي عشان سلامة امي.. انبهرت فيك.. وانتي تشيلين الذبيحه وتدقيني بالحكي انا وسيف.. صوتك.. بحتك.. كانت تطلع من فمك وتغزي قلبي.. وتفكك صواميل جنوني..
تذكرين يومك تطلعين فالمطر من ملحق الضيوف.. كنت واقف عند مكتب ابوي..ماهي عادتي استرق النظر.. ولا اشوف وحده ماتحل علي.. بس لخمتيني.. ضيعتي مبادئي.. فيك شي شدني حد الجنون.. كنتي تتسربين من عيني لقلبي.. انتي كذا الاعجاب فيك ينزل على الروح.. ماتكفيه العين ابد..
زينه تسمع وقلبها يخفق.. ويخفق من تصريحاته..
نفخ الدخان وبخفوت وضحكه قصيره:
تعرفين شعوري يوم دريت صدفه انك تطلقتي.. حسيت اني عقدت عليك.. حسيت انك صرتي لي.. دامها حره.. والله ماتدخل في ذمة حد غيري..
كنتي تمشطين الجده.. وجيت صدفه.. مادريت انك معها وشفتك.. يوم طلعتي وناديتي مهره.. وشكيتي انها هي اللي تطل من فتحة الباب.. كنت انا.. وكنتي تشعبتي بخاطري اكثر..

طفى سيجاره.. وبزفره:
كنت اسمع اسمك والمدح فيك.. طاريك يهز عروق قلبي.. ماكنتي حاجه عابره.. ولا اعجبت فيك اعجاب مراهق طايش.. سكنتيني ناضج.. وخذتي مكان ماسبقك فيه احد..!.

زينه تخبي وجهها بظهره اكثر.. صدمها بالكلام..
ابتسم وكمل ببحه:
يوم حطك سيف بوجهي.. وخلاصك برتباطك فيني.. كنت مثل اللي مابغاها الا من الله.. اللي ابيها.. بقدرة قادر بتصير لي..وش كنتي تظنين..لو انها غيرك كملت.. لاوالله محد يجيبني على وجهي.. كنتي انتي.. وعشانها انتي انا تممت.. وكملت..
زينه تضمه اكثر وبصوت خافت:
نواف شسوي فيك.. شسوي فيك..!
ابتسم بحنية:حبيني مثل ماحبك..
زينه بهمس:منتهين منها..
رفع حاجب :تعالي قابليني وقوليها ..وراه.. شوي وتدخلين بظهري كل ذا حياء..
زينه :طيب دامها ليلة تصاريح.. وبنكشف الاوراق.. انا معي شين اخفيه..
سحبها وناظرها.. وشكلها بلبسها طير الباقي من عقله.. باس كتفها.. وبخفوت:
وش.. كنتي مثلي.. حبيتيني قبل نتزوج..
زينه وقشعريره تسري بجلدها.. من بوساته..
كتفها.. رقبتها..
غمضت عيونها بقوه.. وبخفوت رمت القنبله عليه:
نواف.. انا بنت..
توسعت عيونه ناظرها وهو يكاد يحفر كتوفها:
وش.. وش.. ماسمعت..
فتحت عيونها بخفوت:
وهذا سبب فعول عبدالاله معي.. كان عليل.. ومايقدر على علوم الرجال مع زوجته.. انا بنت يانواف..
ضمها بقوه حتى حست ان ضلوعها بتدخل في بعض وهو يرفعها من الأرض.. ويهمس لها بكل عشقه وحبه..!

اخذني من غبر الأيام و محال الفصول
‏ولقني حضنك .. من الجايرات وضمّني

******