رواية مبعثر فيك ماللحزن لايشفى الفصل الثالث والعشرون 23 - بقلم ايمان يوسف🕊️

البارت الثالث والعشرين

في طلتك صبّح لك العيد بالخير       
‏وهلّت بك أزهار الصباح النديّه..

صوت تكبيرات  يملئ الأجواء بعد صلاة الفجر ..
بيت سعود.. نشاط وحماس واستعداد للصلاة..
العود يشتعل..
في كذا مبخره.. بالصاله وغرفة سعود وغرفة سيف بيد مهره..
وهي حاطته تحت غترته..
ابتسم:يازين هالعيد فيك ..اي والله ..
ضحكت :هذا وانا لسى ماتزينت..
قرص خذها :حلوه بكل حالاتك..
التفت لها وهي تشيل سيف وتسدحه على سريرهم في محاولات انه يصحى:
والشيخ ماهو رايح الصلاة ..
مهره :الا سيف امانه اخذه.. لبسته باقي بس شماغه ..
سيف بعدها عنه:خلاص لاتشيلين فيه الولد كبر وبيعورك ..
شاله ووقفه ع السرير :سيف بابا اصحى.. عيد ..
حاول يفتح عيونه وماقدر وقاط راسه على كتفه.. حاول يصحيه وماش ..
ضحكت :يمه  لابغى النوم ..
سيف:كيف الحين..؟!
مهره: هو متحمس ومعشمه نواف.. ومن البارح مجهز عدته ونعوله.. اذا ماراح بيتأزم 
شاله على كتفه :عطيني نعوله..
جابتهم.. ناظرهم وبتهكم :هذي ميداليات ولانعل ..
ضحكت :لزوم الثوب والشماغ..
جاتهم نداءات فارس من تحت ..
سيف:يلا الولد سابق ابوه.. والسبايب انت وولدك..
مهره تودعهم:ياجعلكم من عايده ياسنايدي ..

*****
شاهين..
'كانت اعيادي السابقة مختلفة.. بغضب جمان وصدها.. واستمتاعي بتعويض كل ذلك مع غاده.. والهروب من جفاءها لضحكة الاخرى ولقائي بها ..
وفنجاين قهوة نكرعها.. في مقهى يضمنا بآثامنا
نتبادل الهدايا والعيادي ..
وسلفيات تكررها غادة معي.. متحججه انها ماتضبط بالحجاب ..
العيد اليوم غريب..
كروحي الضاله..
كأنها روح متوفى مديون..
تائهة بين السماء والارض.. لاتجد ملفى ولاتجد من يسد دينها..
فتنام بسلام..!
معقول حتى ابليس.. لايزين لي غاده.. لأذهب اليها واعوض هذا الفراغ وهذا النقص..
كيف كانت غادة شيئ لااستطيع التخلي عنه..
وكيف اجهلها الان وكأنها شيء لم يكن في قلبي ابد.. '

انفتح الباب وهو يحط العقال على راسه..
دخلوا بيان وديم بفساتين ناعمه فخمه.. اختارتهم لهم مهره وبلقيس.. بعد تسوق لساعات بالبنات.. عشان يحسسونهم بالعيد واستعداداته..
ضمهم وملوا وجهه بوسات..
ابتسم وهو يبحث عن العوض في ملامحهم ..كيف خلدت جمان تفاصيلها في كل لمحه ولفته.. وسمره شهيه..
باس ديم وعض خدها..وهي تضحك ومبسوطه :
يلا بابا نروح بيت جدي.. خالتي مهره.. تسوي لنا مفاجآه..؟!
داعبها:وش طيب.. حتى انا ابي مفاجأه..
بيان :انت كبير مافي لك.. بس حنا..
وقف :وجدتكم جهزت ..
بيان:لا باقي.. بتجي مع جدي.. مانبي ننتظر بابا.. يلا..
ابتسم بحنيه على حماسهم..
ويُقدر لمهره وبلقيس استماتتهم لاسعاد الثنتين :يلا ابوي.. مشينا..

******

بعد صلاة العيد..
امتلئ قلبي بالبهجه.. في عيدي الاول مع سيف روحي..
تراقص قلبي مُطلق ضربات متلاحقه.. كطقطقات الاساور.. التي حشى بهم معصمي كعيديه..
لاادري متى اشتراهم.. ولاكيف خبئهم.. حركتهم بيدي:يجننون..!
مهره متأنقه بفخامة..بالوان يعشقها سيف عليها..
عايدها وقلبه هذه الايام يحترق.. كل مارأى سعادتها.. وشعر بقلبها يختلج على ضلوعه ..
كان ضامها همس:الله يسعدك يامهره.. عسى ضحكتك ماتنطفي ..
شعور داخلي غريب.. حست بخوف.. ونبضاتها ارتبكت..
خاصه مع رجفة صوته وتنهيدته الحاره ..
حاولت تبعد : سيف وش فيك.. وراه ؟!
باس جبينها :احبك.. بس..
ناظرته بنص عيون:تراه رمضان كله باليوم.. كذا عندك فصلات تربكني ..
ضحك ورتب شماغه:ياشيخه..!
طلع لها فلوس عدة فئات :
خليها معك عيادي.. يجون الجيران وبزارين عمامي .. وزعي ياعينه ..
ابتسمت وهي تاخذهم :لاخلا ولاعدم ياحيي..

العيد اليوم يتراقص.. كدخان المبخره في يد بلقيس.. وهي تختبئ في الممر والجوال بذنها وتهمس:
ولا في الحلم .. بقدر تشوفني اليوم ..
هادي:تراه خلاص ملكتنا بعد يومين.. نعتبرها نظره شرعية..
بلقيس تضحك:احلف عاد..؟!
هادي:انتي ملاحظه اني بتزوجك بدون نظره .. اخاف تغشوني..
بلقيس راحت دخلت غرفة جانبيه ..اغلقت وانفجرت ضحك:
فيك خير رح قل لابوي .. وشف وش يقول..
هادي:تكفين منعيني .. الا عمي سعود.. ياشيخه هو لي وجه اطلبه.. المهم انتي رتبي الامور وخليني اشوفك.. انا بيتكم.. مالك عذر ..
توسعت عيونها بدهشة من جنون هادي واندفاعه.. الغير  ملائم لشخصه:
طيب بتحجب ونكلم بعضنا سناب ..
هادي بعصبية بارده: مع السلامه..
قفل في وجهها وبلقيس تضحك :ياحليل هادي صاير عويشق وولهان..!!

هادي حيل يبي يشوفها وملهوف.. حبهم سنين.. بس ماكان يشوفها.. الا بالنقاب.. هي مره وحده شافها وانفتن فيها..
وكانت من سنين..

بلقيس في ثانوي وبمزرعتهم.. كان في المجلس.. توه جاي .. دخلت وهي ميته ضحك واغلقت الباب ومانتبهت لوجوده.. و نواف جايب كلب بوليسي ولاحقها..انحاشت وازبنت.. في المجلس ومن الخرعه كانت في حاله هستيريا من الضحك وهي تقول :نواف يا**.. بعده.. والله كان بيعضني..
نواف:فتحي.. انتي متى تتعلمين لا انحشتي من الكلب يلحقك.. امداك لمحتيه وحطيتي رجلك ..

مسكت قلبها تتنفس بسرعه وتضحك:
والله ماوقف له.. خلاص روح وده خلني اطلع.. ورب الكعبه.. ركبي تتصافق ..
ضحك نواف : والله خوفك كوميدي.. ركبك تتصافق وميته ضحك.. فتحي وخلك رجاله ..
هادي قاعد بهدوء ..
مخفي كل ما اعتمل في نفسه من اعجاب.. ببلقيس وقد عرفها.. خاصه من صوتها ..

بلقيس وهي تطق القفل وتلتفت داخل المجلس:اي والله زين ماعض مـ****..
وقطعت الحديث يوم شافته واشهقت : هادي..!

انصفرت من الوهقه.. الكلب بره.. وهادي داخل.. ونواف عند الباب.. والله يستر ..
هادي بدون تعليق.. طلع من النافذة.. وهي واقفه مثل الصنم..
اسمعته.. بره عند نواف.. يسلم عليه ويسأله عن ابوها.. وكنه توه جاي..
من ذاك اليوم.. في شي وقع في نفس الاثنين..
هادي انفتن فيها كشكل وضحكه وصوت..
وهي انفتنت فيه كيف تصرف.. رجولته برودة اعصابه.. وشخصيتة الواثقه.. مارتبك.. ولاتوهق.. ولا قض البصر.. تعامل كنها انسانه معتادها.. والوضع طبيعي..

تطورت العلاقه.. مع شوفه وحيده يتيمه لملامحها..
ظلت بلقيس متمسكه.. وهو ظل صاينها مايطالبها بشي..
بس اليوم هادي.. ومع شعوره انها صارت له.. ميت على الشوفه..!!

ظميان من مثلي من الناس يظما!
وانا على احلى الينابيع حارس

******

تحقق هدف من اهدافي لهذا العيد..
استطعت..
ان اخرج شهقات طفولية سعيدة من افواه بيان وديم..
وقد جهزت لهم طوقين ورد.. احضرهم فارس وخبئهم كمفاجئة..
الفكرة راودتني وقد تذكرت انبهاري انا وزينه.. عندما البسنا والدي اياه..
اتذكر انتشاءنا وشعورنا اننا من اميرات ديزني..
اراني وزينه..
في بريق عيني الصغيرتين.. ذاك البريق الذي ما ان يشع حتى يخفت..
وتلك الرغبه في السعادة والمكافحه في كبح الحزن..
سندس كانت تختلف.. حادة كصبحا.. قوية لاتكسر..
عكسي تماما وزينه..
قوتنا تهتز امام مشاعرنا.. وفقدنا..!

وبس حست مهره ان البنتين بتختفي ابتساماتهم قالت بحماس:
يلا يلا المفاجئه الثانية..
فارس بتسائل.. يأشر :وش..؟!
مهره تشيل كيس كبير ..
مع دخلة سيف.. جاي من المجلس.. وهي تقول: نطلع ونشب طراطيع..
سيف بذهول: طراطيع..؟!
مهره تفتح الكيس وتطلع اكياس وكراتين:ايه طراطيع.. لزوم العيد..
فارس بحماس وانفعال:ويلوموني فيك.. ورب الكعبه جوي..
سيف قرب  ومهره ع الكنب.. وتنبش الكيس وفارس معها يستكشف.. انفجع:
من وين جايبتهم.. بتسوين مهرجان..
مهره: اللهم لاحسد.. لاتقول كذا بعدين يطلعون فاسدين..
سيف يطالع الكميه:من شراهم انتي ولافارس..
فارس وهو يطلع كرتون:مهب انا يبه.. انا رحت جبت البارح الورد.. مهره جابت هالاكشن..
مهره تضحك:ايه هذول ممنوعات .. مو اي احد يبيعهم..
ورفعت راسها لسيف :شفت يوم كنت عند جديده بشعبان.. شريتها من السوق الشعبي سوق الحريم.. والله ياخلصت ميزانيتنا انا وزوين على الطراطيع ..
سيف يناظر البزارين مجتمعين حولها هي وفارس وحضونهم مليانه:
والبزارين.. يامهره اعقلي.. تراني قابطك بعقل..
مهره تطلع قرطاس :البزارين جايبه لهم نجوم الليل وثوم.. يجلسون على العتب.. يطالعون وانا وفارس نشبها..
وراحت عطت بيان وديم وسيف على عود  واشعلتهم بالولاعه..
وثلاثتهم تعالت صرخاتهم وهم يفرونها : هييييييييييييييي....
سيف:استغفر الله العظيم.. شوي بيمتلي المجلس رجال.. اقعدي وبالليل نشبها..
مهره بوناسة:فيه كرتون ثاني لليل.. بنشبه لاوصلوا جديده وزوين..
سيف :والرجال..؟!.
فارس:يبه تو الناس.. مايجتمعون الا فوق التسع.. توها سبع ونص.. قد خلصنا لاجاوا ..
مهره:وبعدين احنا بنروح الساحه وراء البيت.. خلاص سيف لاتعقدها..
وراحت تغمز بشكل مبالغ وتأشر على بنات جمان:
عشان البزارين يفرحون.. عشان يستانسون..
سيف بنص عيون :
والله لو على البزارين.. مابيهم يلعبون بذا الطراطيع خطر عليهم.. بس عشان بزاريني الكبار.. نقول الشكوى لله (يقصدها اهي وفارس)..يقولون يرعى الحشيش بسنا الجت..
ارسلت له بوسه من بعيد:بعد قلبي والله..

جمعتهم وحطتهم بالكيس:يلا يلا فارس البزارين متحمسين..
وهو معها ع الخط :يلا يلا لايجيهم احباط..
وشال الكيس :احنا بره يبه.. تعال انت ونواف..
مهره تحط شالها على راسها:
لازم تجون كلكم..
وراحت عند الدرج وباعلى صوتها:
يلااااااا يابلقيس.. تراه العيد.. مب يوم عرستس..

سيف يناظر فيها وبحماسها باستمتاع.. ويرجع يناظر بسيف وضحكاته..
وشكله بالثوب والشماغ المبعثر وقلبه يوجعه.. والوقت يقرب.. لإعادة الحق لاصحابه..

جثى قدام سيف وراح يرتب شماغه.. ويركز العقال بوسط راسه..
ويناظر جيبه العلوي والفلوس طالعه منه.. داعبه بخفوت:
اوووه كم جمعت ..
طق جيبه :عندي فلوس واجد.. اوبه.. انت عطيتني واحد.. بابا عطاني ثلاثه.. جدي عطاني اثنين.. فارس عطاني.. كثييييير.. كلهم.. عطوني فلوس.. اشتري لمبرديني..
ضحك سيف :لمبرغيني مره وحده..
سيف يطلع فلوسه.. وسحب خمس مية بينهم كانت من سيف: اوبه انت تعطيني بس واحد.. ليش..؟!.
سيف وقلبه موجعه اليوم على سيف وصاير حساس جهته:
تراها وحده بس اكبر من باقي الفلوس كلها..
سيف طلع ثلاث خمسينات:
شف بابا عطاني ثلاثه..
سيف تفاعل: افاااا.. وانا ابن ابوي.. مايغلبني نواف. 
طلع خمسينات جديده من جيبه مدهم: خذ اللي تبي منها..
سيف بكياته:بس اثنين..
وسحبهم..
ووجهه ينتشي بسعادة..
وسيف غصته تكبر..
*تعلقت بسيف فعلاً..يناديني بابوه.. وانا هذا شعوري له.. من حملت مهره وانا احس بيصير عندي طفل ثالث.. كيف لو راح سيف.. بفقد نداءاته.. وابتسامته.. وعثرات كلماته.. لما يقول اوبه..تضحك لي الدنيا *

مهره وقع نظرها على سيف.. وجهه بتعبيره الغريب.. وهو يرتب فلوس سيف ويحطها بجيبه ويبتسم له ويبوس جبينه:
نشوف اخر اليوم كم يصير معك.. اذا تكفي حق المبرغيني..
عقدت حجاجها وهي اصبحت تحفظ سيف مهما اخفى:
سيف وراه..؟!.
قام وعطاها ظهره عشان ماتشوف لمعة عيونه :
اخلصي فارس طلع لايشبهم عنك وانتبهوا للعيال لايقربون ..
شردت في ظهره وبخفوت: تمام..

******
في قرية في الشمال الإيطالي.. ومن بيت راشيل الحجري..
كانت ترتفع صوت تكبيرات العيد من الشاشه.. التي تعرض البث المباشر للحرم المكي..
جمان من سمعت الشيخ يكبر وهي دموعها ماوقفت..
*بالامس خرجت من المستشفى بعد ولادة عسيرة.. كدت اذهب ضحيتها انا اوصغيري.. اليوم عيد أُمتي.. كأن ربي ارسل العيد ليكبر.. ويكبر.. ويمتلئ جوي ذكراً .. على عظمته وقد خرجت بمعجزه كما خرج يونس من بطن الحوت في ظلمات ووحده ..
قر عيني بعدها يعقوباً..رموا بوجه بقمصان..!
ولادتي.. وحياتي.. ولطف ربي بطفلي كانت معجزات..!!

ضممت فهد قلبي ودموعي تبلل قطنياته البيضاء.. استشعر عظمة الله في حفظه لي.. وقد نزل باكسجين قليل وقلب كاد يتوقف..

بن حميد يبدء خطبته وقلبي يرجف.. وخلاياي ترتعد.. من المقدمه.. وذكر الله كثيرا.. هل ماحل بي عقاب.. من ربي.. سخط امي.. الذي يذكره والدي في رسائله...
جفائي على شاهين.. وبناتي..
وزاد بكائي..
وضعفي وآلامي.. من الولادة تزداد..
ولادتي لفهد.. كانت مؤلمه.. وكأنها عشر ولدات.. في كل طلقه.. كنت اطلق على بناتي وفهد..!!

في كل صرخه..
كنت خائفه.. من الموت وحدي.. وشاهيني اللئيم ليس معي..
كنت مرعوبة من فكرة موتي.. وان يضيع ابني في الغربه..
من فكرة ان يموت ولا اجد من يجمعني من ارض الفاجعه..!
تخيلتني ثكلى.. مجنونه.. في طرقات لن تحضني.. ولن تبر فيِّ..
وجدتني اطرق الابواب وابكي ابنائي.. وليس بي عقل يرتب الامور ويصفصفها..
مرت بي لحظات رأيتني جازعه..
حتى لااذكر من الدين شيئ يطبطب على روحي المخضبه..

كنت ارى وجوه القابلات اللطيفات.. زبانية..
كنت على يقين ان احدنا سيموت.. ودعيت ربي في جوف الطلق وكربه..
ان متنا متنا معاً.. وان عشنا معاً..
واحد.. لن يسلم..
فياربي حمداً.. حمداً.. وشكراً .. وسجود شكراًحيث اذهب وابقى..

اشم صغيري.. واعوض جوفي الفارغ منهم.. من شوقهم.. وحنيني الجارح لهم..!. *
ياربي اليوم العيد..
من زين بيان وديم ..
كيف لبسهم.. قصوا شعورهم ورتبوا غراتهم ولا.. هادي قاهرني.. يتحجج بكل شي ولايصورهم ..

شعرت بغصه..
وانا افقد في هذ العيد اهم ركائزه..
وجه سعود.. وبوسة كفه.. وريحة دهن العود يلصق بوجهي..
موضي.. الزين كله.. وفخامة البس والرزه..
اخواني.. ياجعلني قبلهم..
بوفارس وعياديه وخيره..
نواف وبوسته لراسي ولو اني اصغر منه..!
بلقيس وزينها..وحضنها وهي تعيد علي كن سنه عن بعضنا..
فارس.. ياجعلني افداه.. وكيف  العيد مايبدى عنده الا لاجيت البيت..!

غصتي تتضخم.. وفقدت شاهين كيف يعايدني بالقوه.. رغم رفضي له.. يضمني قسراً.. ويفترسني قبلاً.. ويملئ كفوفي عيادي.. وينتظرني لنذهب..!

ابتسمت واحس بفهد يصحى ويحرك يدينه الصغار.. ناظرته ودموعي تنزل :
امي.. امي.. ياحلوو العيد فيك.. يمه..

يتحرك بلطف وكفوفه الصغيره تلمس وجهها..

فهد امنية شاهين.. ومع ان بناتي يشبهوني.. فهد صار شبيهه هو.. وياحي الشبه حيه..
ضحكت.. ويغزل لي الشوق حريراً.. يلتحف به قلبي.. وانا اتخيل شاهين لاشافه..!
ادري اني عاقبته.. واوجعته.. وبكيته.. وجننته..
ادري انه صافي لي انا..
وعلمته ان الله حق..!
بس مدري دوم اتخيل شاهين لو رجعت يذبحني على هالفعله..
ابي ارتب ردة فعله لو درى ان جبنا فهد..
ومن قال بوريه فهد.. ينقلع..
وراحت ضمته: فهد لي لحالي..!
وبتملك.. ضمته اكثر..
فوق شينك ياشاهين.. احقق امانيك.. والله مارجع يالخاين.. يالجلف..
*واتخبط بين قسوة ولين.. وشوق وفقد.. بين غفران وسخط..
كل مالنت وهزني الشوق..
يداهمني صوته الهامس لغادة.. وهو يحاكيها سراً ولايريديني ان اسمع.. اسمها على شاشته.. تتصل وفي اي وقت..
خروجه لرد.. للقاء.. للشوق.. لحبها الملعون الذي لم يعرف طريقاً ليتخلص منه..!
تمرجح قلبه بيني وبينها..
واخيراً حضنٌ يصخب في عيني كل ما اتخيله.. اللعنه عليكِ غاده..
واللعنه عليك شاهين..

مِن علَمك،حكِي القسْى,من قال لك حُلو الغيَاب؟.

******

الشباب في المجلس..
وصوت الألعاب الناريه وصرخات البزارين.. مسويه لهم جو..
نواف مد فنجال لسيف وضحك:
اثاري حرمتك قاضيه مرتن وحده..
سيف:شاريه بسطه كامله.. ولا الليل يخلصون...
جاهم صوتها:فارس ماهو كذا.. ارميها.. بوسط الأنبوب..
وصراخها:يلا هج هج..
ضحك نواف:قم نطلع يمهم.. جوهم حريقه.. ماهو مثل جونا نايم..
سعود عيونه من فوق نظارة القراءه والجوال بيده:
اذا ودكم ومستحين قوموا.. دام مافيه احد.. هادي عندي موجود راح  يجيب امه ويجي..
نواف: والله مايندرى عنك يابوسيف.. هو تقوله صادق.. ولا تمسخر علينا..
ضحك : لا والله صادق.. بس ماهو تنسون نفسكم.. واقعد ازعق لكم زي البزارين.. عمامكم والجماعه على جيه..
نواف :اجل قم سيف. 
سيف متثيقل..
ونواف سحبه:قم..
.
.

اقبلوا عليهم وسيف راح جهة مهره وهي جالسه تضبط صاروخ على الارض ومانتبهت انه جاي.. شبته وقامت تركض وصدمت فيه..
مسكها ..
وانفجر الصاروخ فوق مطلق صوت قوي والوان..
ماشافته مهره..
رفعت عينها لسيف بالنظارة الشمسية..
ورجولته واناقته الطاقيه في نهار هذا العيد..

بوسط سلهمتها ..
سيف يأنبها: هذا علمك.. وشهولا تروكضين.. والله يامهير بتعورين ومحد ماكلها غيرك ..

انصدمت.. وانفجرت ضحك..
شال نظارته:وتضحك.. انتي وراك ناسيه انك حامل..
مهره مستمره تضحك: متتتت متتتت... اول مره تقولي مهير.. طالعه من فمك زي العسل ..
سيف بخفوت:مهره ابوي انتبهي.. لاتطيحين ولاتلتوي رجلك.. ياقلبي تحملي لاتجيبين العيد بورعنا ..
مهره تبعد وهي تعدل شالها :
يعني كيف.. اذا ماولعت طراطيع مايصير عيد..
سيف :ولعي عسى مايولع غيرك.. بس الهون احسن مايكون.. ولعي شي مافيه ركيض..

فارس يضحك:
امسكي نجوم الليل نفس بلقيس والوراعين ..
سيف يروح ياخذ المجموعة من يده :
وانت بدل ماتعقلها تستفزها.. هات دورنا انا ونواف ..

فارس توسعت عيونه.. وابوه يرفع ثوبه.. ويجلس نص ركبه.. وهو يرفع شماغه شرينبو ..
ويبتدي يشب معهم هو ونواف ..

مهره قلبها يرقع مع اصوات الالعاب النارية وسيف يضحك من قلب..وهو يستعيد اعياد كانت.. وشقاوة..
نواف وفارس.. بلقيس..
بنات جمان وسيفي كحلوى العيد يتلونون.. بضحكات وقفزات وصرخات تشجعنا..!

من قال انك عيد بأي حال عدت ياعيد..
فالعيد.. باشخاص تطوقنا.. كحلقات ورد تجملنا.. عيدي اليوم مختلف..
وكأني ملك.. والسعاده تجدد لي البيعه..!

سيف حانت منه التفاته لها وهي شارده ببتسامه فيهم..!

‏شوفتك  يوم العيـد حاجه عظيمه
‏تكفي عن كثار  الفرص والمواعيد

‏مافيه غيرك يعطي العيد قيمه
‏عيدي معك لاجيت عيدين في عيد

*****

بعد شوي والمجلس مليان.. شاهين جاله اتصال وقام بيرد..
سعود:لاتبعد ياشاهين.. الغداء بيحط وانا ابوك ..
شاهين: موجود يطول لنا بعمرك.. بس برد على العمل..
قال كذا وطلع ورد..
كانت الاداره.. ويكلمونه عن جدول رحلاته بعد اجازة العيد ..
ولو عنده نية في تغير الوجهات..
شاهين:لا ياقصي.. خلينا.. الفترة هذي على روما..
قصي :طيب واذا مازبطت..
شاهين : حاول لو ماضبط.. عادي .. بروح فيها كمسافر..
ضحك:ياشيخ يمين بالله.. اينتا موصيبه..
شاهين :هذا اللي عندي ياقصي.. ياتتساعدون معي.. ولا انا ادبر نفسي..
قصي :ابشر بوس.. انا بسوي اللي عليا.. والباقي على الله..
شاهين :ع القوة ياسنايدي..
قصي :يقويك.. ياقلبي..!

قفل الاتصال.. تنهد.. وشب سيجار نفخها بحرقة..
ولسان حاله يقول..

ياضعف قلبي معك على اتخاذ القرار
‏على كثر ماخذلتيني عجزت اتعض

‏انتي وانا مانشابه غير ( ليل و نهار )
‏نروح نفس المكان ومانلاقي بعض !

*****

مقتطفات من بقايا يوم العيد..

سيف ونواف واحساسهم المثقل.. باقتراب موعد رحيل سيف عنهم..
القطعه المتبقية من عساف والظل الباقي بعده.. نواف كان صعد يجيب شغله من فوق..
نزل ولقى سيف متخبي تحت الدرج.. فارد عيدياته ويعدهم ..
'الموقف عادي.. بس وشفيني ببكي..'
راح قرب منه..
ورفع عيونه له :بابا اتقول لاحد انا هنا.. ملحي اخذهم (الصلحي ولد الجيران)..
انحنى عنده :يخسى ياخذهم.. الله.. شهالفلوس.. صارن اكثر من فلوسي ..
سيف يحط الفئات فوق بعض باستمتاع :
بعد عيد.. اصير عندي.. كثييير فلوس اوبه يشتري لي لمبرديني..
ضحك نواف :
والله خوش..طيب عطني وحده..
خذ ريال معدني :هاك.. هذا..
نواف خذه:يابخلك.. عطني اللي عليها بابا عبدالعزيز..(واشر على الخمس مية)
سيف برفض:لا  هذا من اوبه.. ماما قالت خشها لي.. انا بكيت..والله تاخذها.. ابكي.. مررره..
نواف :خلاص الريال يكفي.. يقولون خذ من البخيل لو القليل..
جات بلقيس :من جدك تطالبه بفلوس.. عض قلبي ولاتعض رغيفي ..
سيف :ميمة والله اطيته..
نواف يرفعه لها:عطاني انتبهي تنقدين عليه.. والله يا انها عندي تسوى مال قارون ..
وحب راسه.. وماتحمل راح ضمه.. واستكن راسه جنب راس سيف..
بلقيس لما حست نواف طولها.. وحسته متأثر همست :نواف..!!
طلع صوته مرتجف :اشوف عساف فيه والله.. اشتقت لعساف يابلقيس .. والله اشتقت..!!!
مسكت قلبها وحسته بينفر من مكانه..همست :نواف ابوي.. صل على النبي..

*****

بوقت الغداء..
وموضي تشرف على الصحون والذبايح مع الشباب..
مهره وبلقيس.. يجهزون السلطات.. والعاملات يشيلون وياخذونها بقسم النساء ..

نواف يعطي فارس صحن :طلعه ولايطيح..
فارس :ليش سيف العساف.. فارس فارس بن سيف ..
نواف وهو يرجع يجهز صحن :والله مدري من اللي قط الصحن العيد الماضي ..
فارس وهو يروح :عاد عثر لي السلك.. اليوم شيكت على الدرب كله ..
بلقيس :ياربي شهالحوسه.. يمه.. ليه ماتسون بمطبخ بره وتفكونا ..
موضي :ابوك مايحس بالعيد.. الا بطبخة البيت.. بملكتك سويه باللي تبين..

خلصوا تقريباً ..
وصلوا الاكل بمجالس النساء والرجال..
مهره وهي تشيل بقايا الاواني بالمغسلة ..
انتبهت لسيف  واقف ويسوي شي بصحن..
جات القت نظره..
لقته منسجم يقطع لحمه.. بالشوكه والسكين بترتيب.. ويحطها فوق صحن رز ..
توسعت عيونها :اماااا.. شتسوي.. ذابحك الاتيكيت.. الناس قدها خلصت ..
ضحك:ماهو لي.. ذا لفارس..عشان تقويمه.. لايتوهق بسلوت اللحم ..
مهره انهارت :ياااااااجععععععلني فارس ياشيخ ..
سيف مبتسم.. ومركز مع ترتيب صحن فارس: تبين اسوي لك..
جاء فارس : ها يبه خلص غداي.. تراي ميت جوع ..
سيف يحط شريحتين ليمون فوقه:ايه يبه اخذه هني.. ياجعله عافيه ..
فارس :عشت يابعدهم.. يلا تعال عاد..
سيف :جاي..
فارس ضحك على مهره:وراك ..؟!
مهره:واللهِ كيووت ...

فارس :وانتي لين الحين.. تنصدمين..
مهره:تفجعوني والله.. لازم بين فترة وفترة تطلعون بشي جديد ..
سيف: من عمره وهذا سلمي معه.. خاصه بالاعياد.. وهو صغير عشان مايغص.. وكبر وصرت اسويه عشان تقويمه..
فارس :وحتى لاشلته بتسوي لي.. والله مب حلو العيد الا بهالصحن..
مهره:اقول كنك اشغلته رجلي.. ورى ماتقصه لحالك..
فارس يحرك حاجبه:
الغيره..! ماهو حاصلك..
وراح وهو يضحك..
سيف :روحي تغدي.. ترى وجهك اصفر ..
مهره بتعب:اكيد لاني مواصله.. خلاص ابي انام ..
سيف :لاتنامين الا لاكلتي..
ابتسمت:تمام..

****

بعد الغداء والشاي.. صعد سيف معاه فارس وقبل مايتوجه لغرفته :
فارس حط راسك ونام.. لاتقعد تهجول والناس راقده..
فارس و طاقه البهدال:تراه عصر .. ولا صارت اجبارية الغيبوبه الجماعية ..
سيف :انت شايف وجهك.. ارقد ابوي.. وعين خير .. لاتشغلني..
فارس :تطمن ونام غرير العين.. اصلا ماشوف الدرب.. حدي بسبح وارقد..
سيف :صل..بالاول بيأذن..
فارس دخل غرفته :ماشي..

لقى على فراشه ترنغ جديد وعلبة مغلفه عليها كرت :كل عام وانت بخير ياقلب امك .. (ميمتك مهره)..
وقف يحدق في الكرت..
اليوم العيد بمهره مختلف.. حاولت ان تسعد الجميع وتعوض النقص..
حركت الاجواء.. بكل ما استطاعت ونجحت.. في اضفاء السعادة وكسر روتين العيد وخموله..
فتح العلبه وابتسم ..
ساعه رقمية.. شبابيه وعلى جوه..
خذ الترنغ.. ويستغرب من تفاصيل تحرص مهره عليها..
مايدري ان مهره.. اكثر وحده كانت تعاني من فقد التفاصيل..!
وده يروح يشكرها.. بس اكيد نامت..
تمتم:ياحبي لك والله..!

سيف لما دخل الغرفه ارتفع حجاجه ..
مهره منسدحه نص و متسنده على ظهر السرير و مابدلت..
وسيف نايم على صدرها بثوبه وهي تطوقه بذراعها..
كيف..
كيف بيفتح معها الموضوع.. كيف يفرق الاثنين من بعض..
'اقتربت والدنيا تحشر نفسها في بلعومي.. مهره حتى لاتكترث بحمل وطفل.. تنيم سيف فوق بطنها.. تحمله على الدرج.. تضعه على ظهرها وتركض لتضحكه.. كيف بالله سترضى.. كيف ستقتنع '

مسك سيف وتوه بيشيله. 
تمسكت فيه وافتحت عيونها متروعه..
سيف بحنية:بسم الله عليك.. بشيله بفراشه لايعورك ..
سدحته جنبها وضمته:
مايعورني كذا.. خله سيف.. ابيه..
وارجعت نامت..!
رفع راسه ومسح وجهه بكفه بحيرة والم.. كيف.. وش بسوي..؟!
ياربي..ألهمني..

****

بلقيس قبل تنام ..
جاتها رساله..
افتحتها وابتسمت :

يـ اللي ما توجد فـ الصبايا وصوفك
‏زينك هو اللي هازمً نخبة الغيد

‏ويلي على شوفك ولمست كفوفك
‏ومقابلة جيدك يا منتوقة الجيد

‏ماني معدي العيد من غير شوفك
‏لكن وعدنا  ثالـــث العيد

*****

اليوم ملكة بلقيس..
ومن امس زينه والجده موجودين للمشاركة في الحدث ..
والجده ام فهد جات.. والوضع كان مختصر.. خاصه اغلب الشخصيات من الديره ماحضروا.. زعلانين ..
كيف سعود رفض شبيب وعطاها لهادي..!!

الجده طبعاً في حياد.. ولان الجد مايقدر يجي بسبب وضعه الصحي ..
جات هي..
لقاء زينه وام فهد كان يهبل.. بالأحضان وكنهم سنين ماشافوا بعض..
وكانوا متفقين على اللقاء في الملكه.. من خلال مكالماتهم..

بالمغرب..
زينه فوق عند مهره يكشخون بتوتر :هو من رجع من مصر وهو مستلج على مخي .. حتى جوالي كرهته ..
يوم العيد جاء على الباب يطق وصرفه ايوب قال ان حنا بيت خالي فلاح..
مهره حطت الروج على التسريحة وبعصبية:
قايله لك.. خليني اقول لسيف يتفاهم معه وانتي ماتبين.. بس خلي يخلص هالعشاء.. وبقوله عن سوالف هالتسلب ذا ..
زينه بقلق:
تكفين مهره.. خلي الامر بيني وبينك .. مسكين سيف ماقصر .. ماهو مجبور يتمشكل في جاهي..
مهره: عنبوتس انتي من وين تفكرين.. اجل بتظلين يلحق وراك هالخبيلة ..
زينه بعصبية: مصيره يمل.. وييأس..!

اتصلت بلقيس وردت مهره:ارحبي..
بلقيس: مهره تعالي استشارة فالمكياج ..
مهره:يلا ثواني ..
قفلت وخذت شالها:دقايق وبجيك..
طلعت..

شوي الا وصلت لزينه رساله من عبد الاله:
شفتي تجاهلك وكلابتك والله لاطلعها من اللي خلفوك .. انا بره بيت اختك.. والله وفالتها وطلعات.. وتعيد .. وانا اتواكل على نار..
توسعت عيونها وقلبها وقع برجولها:
وين بيت اختي.. تستهبل..؟!
كتب :ما استهبل.. هذا انا عند بوابة بيت مهره.. بتطلعين تكلميني مثل الأوادم.. ولا والله بدخل بهالرشاش.. واهذك انتي واللي حولك..

زينه ركبها تصفق.. صفق ..
وسيقانها ماعادت تشيلها..
جاها عمى مفاجئ.. ماتشوف..
شتسوي..
شجابه..
ياربي ذا خبل .. يقتل احد...
يالله لاتقلب فرحة هالناس.. دم وصياح..
الله ياخذك ياعبدالإله.. اخذ عزيز مقتدر ..
لبست عباتها وشيلتها وطلعت.. وراحت تركض نازله تحت..!
مزنه كانت في الصاله.. نادتها.. وزينه ماسمعتها.. طلعت واغلقت الباب..
مزنه تنادي الكل.. ولا احد حولها.. الكل يتجهز .. قامت تتواكل :
الله يستر وش صاير على هالبنت.. لايكون سامعه شي ولاشي ..

زينه طلعت بره ومشت لمن سيارته وبانفعال:
انت ما انت صاحي..وش جايبك فيذا..
عبد الاله:
اكلمك ماتردين.. ارسلك وتكشتين.. اوصل لبابكم وتصرفوني.. جيت لشغلاتكم بهالرشاش.. وقالت انك هنا ..
زينه بانفعال وخايفه احد يشوفهم :
الله لايحلك ياعبد الاله على هالجنون اللي تهده فوق راسي.. عنبوك رايح مروع عايشه.. شاللي تبيه.. تطلقنا.. وطلاق باين..انتهينااااا..

داخل.. نزلت مهره وهي تنادي زينه.. شافت مزنه :جده زوين مانزلت..
الجده تقول :جيتي والله جابك.. الزينه نزلت واطلعت تركض ووجهها مايبشر بخير .. واصيح لكم ومحدن راد علي ..
مهره بخوف :
ليش طالعه .. بره يمكن جاوا الرجال ..
الجده:وجدتك ماهي بالملحق.. رقت  تصلي ومانزلت ..
مهره راحت بسرعه.. تغطت بالشال وافتحت الباب.. وتدق على سيف ومايرد .. وزينه ماترد..
شافت يمين يسار مافي احد..
الا نواف طالع من المجالس وهو يكلم جوال:
توجه المزرعه.. بنعقد فيذا والعشاء هناك.. وحرص على بولافي وعزوز لايخلون يجون..
اشرت له واشر بعينه :وش فيك..؟!
مهره باصرار بدون صوت تاشر بفمها:تعال بسرعه..
اغلف وجاء :وراك مهره.. وش مطلعك ..
مهره بعصبية : زوين اختي طلعت تركض...شافتها جدتي مزنه.. هي ماكانت بتطلع تدري انه بيجون رجال.. بس مدري شفيها .. تكفى نواف ....
وتوها بتكمل.. اسمعت صوت عبد الإله.. الحاد بره ..
برعب :صوت عبد الاله.. نواف تكفى.. اطلع.. اطلع لزوين.. لايسوي فيها شي..
نواف مانتظر باقي كلامها ..
راح بسرعة ..
بره عبدالاله ماسك معصمها بيد واليد الثانيه رشاش وبانفعال :
تعالي معي.. والله ماخليك .. احبك ياكلبببببه ماتفهمين..
ومع طلعة نواف.. كان ابو عبد الاله واخوه ينزلون من سياره ثانية.. وكانوا لاحقينه.. يوم دروا عن نيته ..
وابوه بصياح: انهبلت ياعبيد.. هدها لاتفضحنا ..
زينه برعب وتتفلت وهي تبكي:عمي انا فوجهك.. خله يتركني..
نواف وبدون اي مقدمات وقبل لا احد ينتبه لوجوده.. طير وجه عبدالاله بلكمة..
فك يد زينه بعدها..
نواف بحدة :ادخلي داخل ..
وكمل ضرب فيه.. زينه ماتحركت وهي تبكي :
معه سلاح .. انتبببببه..
نواف.. كأن شيطان تلبسه وقت شافها تبكي وتتفلت وهو يسحب فيها ..
صاح فيها:قلت لك روحي دااااخل..
عبد الاله بغضب وهو يدفع نواف ويضربه :
ومن انت عشان تقولها تدخل ولاتطلع.. زينه اركبي السيارة قبل اطشر مخك..
راضي اخوه مسكه ودفه:حمااار انت..
نواف بغضب لزينه :ادخلي ماتسمعين..
توها بتركض داخل..
الا صوت عبد الاله رافع سلاحه عليها :
والله افضيه بقفاك .. اووووقفي ...
زينه وقفت وكلها ترتعد.. وتوها بتتحرك ترجع مع اصوات الاقناع.. من ابوه واخوه يحاولون يهجدونه ..
وبس لفت نفسها.. ماشافت الرشاش.. شافت ظهر نواف.. اللي وقف فظهرها و بحزم وخفوت :
تحركي.. مايجيك شي.. وانا هنا ..
عبدالاله بصياح:
والله ابتلي فيك.. والله امسحك من الدنيا..
انتبهت لسلاح اللي رافعه نواف.. واللي كان في حزامه تحت ذراعه.:
لاتكثر محلوف في شي ما انت قده .. ضب نفسك وفارق .. الحشيمة لهالشيبه .. ولا والله افضي هالفرد براسك ..
زينه مو عارفه تتحرك برعب : لاتستفزه تراه خبيييل..
بخفوت من بين اسنانه : زينه.. ماتسمعين ..
وتوها تحركت.. وجه عبدالاله سلاحه عليها.. وتحرك نواف يصده عنها..
وتوه عشق ..
طلعت صوت طلقه ..
صرخت زينه وقفلت اذانها ..
والكل التفت على سيف وقد اطلق رصاصه بالهواء ووراه فارس..
وتالي وجه سلاحه لعبد الإله وبحزم وحده:
زينه ..ادخلي البيت..
انحاشت بسرعه ..
سيف بهدوء غاضب:ارم سلاحك ياعبد الاله..
عبدالإله بتحدي:وان مارميته..
سيف بواقعية: افضي هالفرد براسك .. ودمك هدر.. واطي ارضي وبسلاحك وتتهجم على بناتنا.. والكاميرات ماليات البوابة.. والله يابوعبد الاله.. حتى ديه فولدك .. مادفع ..انصحه اذا يسمع كلامك..

عبدالاله بلع العافية.. وخاصه سلاح سيف من جهه وسلاح نواف ..
ابوه : عبيد تراك سودت وجهي .. حط هالسلاح ..لاتجيب لنا بلاء حنا في غنى عنه..

راضي اسحبه منه..
وعبدالاله ماعارض..
بس قال:طيب.. ابي زينه..
سيف حرك شفته وبحزم:
ذا امر منتهين منه.. زينه طلعت من ذمتك.. وانتهى.. يومها بيدك ضيعتها.. تجي الحين تبيها.. ماعندنا لك شي ..
جاء سعود.. على صوت الرصاصه ويسأل شالسالفه..
فارس وضح له الوضع ..

عبد الاله بنفعال: ما انت وليها عشان تحكم وتتكلم في شي يخصها ..
سيف :الكلام مع السفيه ضايع ياعبد الاله.. وانت راعي طويله..
سعود :يالربع.. اليوم احنا عندنا مناسبة زواج وقران.. حياكم.. احضروا.. وادحروا ابليس.. ولو عندكم شي تناقشون فيه في المجالس..
وتكلم مع الابو :ياخوك انت الكبير وعلى عينا وراسنا .. تفضلوا حياكم..
عبدالاله يمسح خشمه من الدم :
مابي ادخل لكم بيت.. ولاعندي معكم كلام.. اذا زينه ماهو طالعه.. تجي جدتها وانا اتفاهم معها..
نواف تحرك بيلطمه..
بس سيف مسك ذراعه وبهدوء:
حياك المجلس.. وخلونا نحط النقاط على الحروف.. قبل تمشون.. لازم ننهي هالسالفه لأنها مسخت..!

*****
بعد شوي باحد المجالس..
المجموعة اللي كانت بره وزياده عليهم صبحا..
طلعت بعد ماجاتهم زينه..
داخل البيت..
و تنفسوا الصعداء.. بعد مادروا ان الاوضاع هدت..

بالمجلس..
صبحا:يابوراضي الحاله ذي ماتسر .. والبنت سمعه .. وطلعت من ذمة ولدك.. سواته سواد وجه.. فشلنا عند نسايبنا.. والله لولا القرابه بينا.. ان كان كلمت الشرطه شالوه..

بوعبد الاله:صلي على النبي ياام غازي وامسحيها بوجهي.. والولد يحبها ويبيها .. وماسواه الا من عشق.. ويقولون الحب عمي وانا اخوك..

نواف وده قام طحن الابو قبل الولد ..
سيف ساكت.. ويسمع الحوار.. وسعود بعد معطي الطرفين حق التفاهم..

بره في المجالس الثانية فارس واقف عند شاهين وهادي ويقول السالفه..
شاهين :من وين جاي ذا.. من داعش ..
فارس :والله يصلح.. ياان شكله.. مجرم.. مجرم..
هادي :يعني ومابغى يسوي تمثلية العاشق المتيم.. الا في ملكتي.. زين ماوصل الشيخ كان هج ..
شاهين ببتسامة :هذا كل همك ياهادي..؟!
هادي:لايطولونها معه ..بيأذن العشاء..

في المجلس :
سيف بعد صمت تكلم بهدوء:
طيب وان قلت لك.. ان البنت اليوم ملكتها.. وبتدخل في ذمة هالرجال ..
واشار براسه لنواف ..
نواف انلخم وانصدم.. بس حافظ على تماسكه وملامحه ..
ونفس الشي سعود..
وصبحا.. كانت بتشخط صوت (وشهوووو)  بس اسكتت ..

وكلهم خلوا الدفه يديرها سيف .. رفع حاجبه وبهدوء يكمل.. ووجه عبدالاله طلع فيه كل انفعال :
اليوم عندنا  ملكتين اختي على هادي.. وملكة نواف على الزينه.. واللي انا عارفه ان طلاقك لها طلاق حرمها عليك .. ماتقدر تعقد عليها ابد.. الا لمن احد يحللها ..

عبدالاله قام مثل الثور الهايج.. امسكوه ابوه واخوه:ماهوووو كيفكم.. اذبحها.. ومايخوذها غيري ..
صبحا قمطت خاصه مع الرشاش على الطاولة.. بهلع وتسرع :يحللهااا... الله يهداك اقعد.. اقعد.. يحللها..

عبدالاله ينوفخ.. والتفت على صبحا يريد توضيح ..
وصبحا ماعندها ماعند جدتي غير انها قالت هالكلمه خوفاً من الاسلحه.. اللي متسلحين فيها عيال سعود عشان عرس بنتهم.. ورشاش شطوله على الطاوله..
نواف خرج عن صمته.. بستياء:
احللهاااا..؟!!.. ليش وانا تيس مستعار.. عيب ياجده.. مايخوفك وتقعدين تقطين خيط وخيط واحنا اشناب نذري عنك ..
ورفع راسه لعبدالاله :
البنت طلعت من ذمتك.. وبتدخل في ذمتي.. بتصير حليلتي.. وشعرة بوجهي.. وخط احمر.. ان تعديته.. بيني وبينك هالسلاح ..
وحط المسدس على الطاولة ..

سيف انصدم من نواف..
على قوة الرد..
وسعود متنومس :وانا اقول.. اقعدوا شاركونا.. والزواج قسمه ونصيب يابوراضي..!.

*****

داخل.. زينه ترعد ولاصقه بالجدة وذيك تسمي عليها..
موضي تشربها ماء : زينه امي.. خلاص ماهنا الا الخير..
زينه واسنانها تصطك :مافيني شي.. تكفون لاتحس بلقيس بحاجه ثم تتكدر.. ونعكر جوها ..
موضي:هي فوق ماهي حولنا.. لاتحاتينها.. انتي سمي بالرحمن والحمدلله.. ان الله سلم الجميع ..
مهره تهاوشها:
زيون انتي بقره.. وش مطلعك له.. لو ذابحك.. ولاهاج بك..
زينه تبكي :ورب الكعبة هددني.. يدخل فيذا ويسوي سالفه.. ياربي انا شجابني.. ليتني ماجيت..
مزنه ماسكه كفها:
يابنتي حصل خير ..ويمكنها خيره.. يتفاهمون معه كود يهون عنتس.. ويخلي هالعلوم الشينه..
موضي:قومي الحين.. ترتبي وعدلي مكياجك ومالك الا اللي يسرك ..
مهره كانت تطالع من النافذة.. تنتظر وش بيصير:
وصلت خالتي ام هادي والبنات ..
زينه بسرعه قامت :
انا بروح هناك.. ارتب نفسي واجي.. تكفون لا احد يحس بشي ..
واختفت في احد الغرف..
موضي بتأثر :ياعميري.. هالزينه.. حسبي الله على من رعبها تسذا..

****

بعد اشوي.. كانوا بالصاله..
لما نادى فارس :مهره..!!.
قامت راحت له وعند الباب :ها فارس.. وش صار ..؟!
فارس:يقولك ابوي.. ادخلي انتي وزينه غرفة النساء وافتحي له الباب ..
مهره بقلق:ليه .ماقالك شي ..
فارس هز كتوفه :مدري.. علمي علمك..

بره وفي جهه من الحديقة.. سيف ونواف ..
سيف:نواف ذا القرار مافيه رجعه.. ماجاء في بالي الا انت.. ماهو بعدين تقطها براسي..تبي نأجل الملكة  واشوف مخرج ..
نواف بحزم وحمية: الليله نملك.. لايمشي ابو راضي الا حاضر.. ونقطع هالعرق ونسيح دمه..
ابتسم سيف :كفووو.. كفو يالعشير..

جاء فارس :مهره وزينه بحجرة النساء ..
سيف:انا اروح واتكلم معها والله يكتب اللي فيه الخير..
اختفى سيف عنهم وفارس توسعت عيونه :
وجع نواف وجع.. والله وجاك يامهنا على ماتمنى.. يالساحر..
نواف قلبه يرقع و يتحرك بتوتر وعصبية :
عساها بس توافق.. والله يافارس كل مافيني يرعد من الحماس ..
فارس:ومسوي فيها التضحية.. وطاق الصدر وانت بتمووووت..

*****
بعد شوي..
وبعد ماقال سيف اللي حصل لزينه ومهره..
زينه بصدمة:
لا يابو فارس.. اعفيني.. بيض الله وجهك انت واخوك وابوك .. بس ماهو حل.. لا انا ناويه اتزوج بعد تجربتي.. ولا اخوك مجبور.. ياخذ مطلقه بأول فاله ..
مهره بعصبية:سيف وش فيك.. ترى ماهو حل.. وضعي انا وانت مختلف عن نواف وزينه.. الزواج ماهو حل لكل عقده ..
زفر  :مهره خليني اتفاهم مع زينه.. اطلعي منها ..
مهره بانفعال:
سيف.. ماحنا موضع تجربه ياتصيب ياتخيب.. نواف ماتزوج قبل.. ومتشرط وعال قلب امي على العرس.. تجي في قعده.. ترمي اختي عليه.. مايصلح..وماهو نلعب حذف احصي ابها تلقف ماتلقف ..
سيف بنفاذ صبر وحده :
انا اشوف شي انتي ماتشوفينه.. زينه انتي ماتبين الخلاص من عبد الاله هذا هو الحل.. هو قاعد يتبجح وباليك لأن شايف ان مالك ظهر..
زينه بعصبيه :
انا ماتزوج بدق الصدور ياسيف.. اخوك له حق يختار وينصى اللي يبيها.. انا اطلع لعبد الاله واتفاهم معه..
سيف بهدوء يحاول يقنعها:
زينه وانا اخوك لاطولينها وهي قصيره.. انا كفيلك.. ان ضرك هالعرس.. انا احله..
زينه :ماني برجاء زواج يابوفارس.. والله ضاقت فيني.. ولاهقيت رجال في الدنيا يبل الريق.. عبدالاله كرهني بالزواج وطاريه..
سيف :نواف غير.. وانا اضمنه..
زينه:والله اللي تلدغه الحيه.. يخاف من جرة الحبل يابوفارس..
انتهت من جملتها.. وانصدمت بعقال سيف في حضنها.. رماه وقال:
طلبتك يازينه.. طالبك قولي تم ولاتكثرين الهرج .. قولي تم وماجاك عندي..!

وارتجفت كفوفها وقلبها يخفق بقوه.. وعينها على عقاله.. سيف وقف وقفات معها محد وقفها.. واخرها وقفته قدام عبدالاله من شوي.. هو واخوه..
من فترة وهي شعورها بسيف انه اخوها الكبير.. الذي لم تحضى به ..
حست بضائلة لو ترد طلبته ..
بخفوت :
تم يابوفارس.. تم ولااردك ..

*****
تمت ملكة هادي وبلقيس..
وكما هو مخطط.. العايلتين بس في البيت.. بعدها حفلة الشبكه والعشاء بالمزرعه..
داخل ارتفعت اصوات الزغاريد ..
وهم يضمون بلقيس ويبوسونها..
وهي تحس نفسها بحلم..
وماهي مصدقه..
زينه كانت في حالة شرود وقلبها يرقع.. يرقع..
مع كل هالفعاليات والتبريكات ..
وامور صارت وقالها لهم سيف.. محد يدري فيها لسى..!
الا الرجال وهم ..
ضمت بلقيس :الله يوفقك ياروحها.. ياجعلها زواجة العمر والدهر..
بلقيس تمسكت في يدينها:
عقبالك ياقلبي.. فالك رجال يستاهلك ويقدرك .. ياربي نفرح فيك قريب..
ابتسمت زينه.. واختفت ابتسامتها ..
وهي تنسحب من كفوف بلقيس وتنسل مثل خيط الصوف من الشال ..
تاركه المجال للباقين..
انكمشت.. تحاول تتوازن..

هادي بعد ماتلقى تبريكات الرجال.. نواف خذه : حظوظ.. هالحين انا اصير ظل ليلتك.. وانت تقوم بكل الأدوار ..
ضحك هادي:
وش رادك عاد .. سو فعاليات.. يمديك
نواف:يابن الحلال.. ماينفع..البنت تبي كذا..
دخلوا من باب.. على موزع..
نواف:بلقيس..!!
جاهم صوتها:هلا ..
هادي وقلبه يخفق مع (الهلا ) ..
نواف:حولك احد..؟!
بلقيس:لا.. لحالي..
هادي بخفوت:نواف تكفى .. ابي ادخل لحالي .. ممكن..؟!
رفع حواجبه وبشطانه: لاااه.. وانا اناظر وانقهر..
هادي: تكفى..!
نواف بنص عيون: ماشي.. ولاطولونها.. بنحرك للمزرعة ..
هادي ببتسامة:على هالخشم ..

طلع نواف.. هادي عدل شماغه.. امام المرايا الكبيرة .. ثواني يحاول يسيطر على نفسه.. بعدها تنحنح برجولة اربكت بلقيس ..
وهو يخطو داخل الغرفة..

*الا تحطم سنين العشق والهيام هذا الخجل.. الذي كسر عيناها للأرض حين رأتني.. ثم رفعتهم من جديد لي ..
لطالما صبرت نفسي بتلك العينان.. وكبر عشقي من خلالهم ..
تأملت بلقيس..
وهي لي..
شرعا ً..
حلالاً..
بدون حاجز ولاستار.. ولاخمار..
تقدمت خطوة نحوها.. وعيناها ظلت في عيني.. كنا قد اذهبنا المقدمات.. ونضجنا.. ومابيننا اكبر الان من بضع كلمات..تقال لإذهاب الخجل.. وطرد الحياء الأولي..!
انا الآن لايطفئ نار قلبي.. الا ان اضم بلقيس بقوه لأضلاعي ..
وقد فعلت..!..

كنت اتبارى مع عقلي.. ان هذا اليوم لن يأتي.. كنت في قناعة من صعوبة الوصول..
كان احتضان بلقيس.. امنية صعبة المنال.. انا اججت صعوبتها بأفكاري.. وقناعاتي..
اما وهي بين ضلوعي الآن..
كيف كنت سأفرط فيها..!!! *

بلقيس
غمضت عيونها.. وهي تتشبث بثوبه من ظهره..
*الطريق الذي امتلئ بالأشواك.. وقد مشيته حافية..
التشبث بهادي كان مثل
التشبث في حزام ناسف..!!
التمسك.. والايمان به..
رغم الابواب المقفلة ..
اليوم انتصاري العظيم..
اليوم كسبت رهان قلبي عليه ..
كان قلبي يتشبث به.. رغم قناعاته العقيمة !.
حتى لو ابوي كسر مخاوفه بإقدامه..

في النهاية..
كان هادي يلزمه قوة الاقدام..وابوي كان خير داعم..
عناقنا الصامت كان به كلام ابلغ من كل لفظ وحرف *

*****

انتهى اليوم بطوله واحداثه..
رجعوا من المزرعة.. وزينه كان حيل ودها ترجع مزرعتهم.. بس الوقت متأخر..
والكل تعبان..

في غرفة سيف..
مهره ساكته.. شالت العقد والحلق..
وواقفه تفك البنسات من شعرها..
وسيف يراقبها بشبح ابتسامة..
وهي زعلانه..!
.
.

قبل يمشون للمزرعة.. وبعد حواره مع زينه.. صعد غرفتهم فوق وهي لحقته.. وبعصبية:
سيف بلا جنون.. الزواج ماهو لعبه.. وزينه ماهو برجا طلاق ثاني يقفل حظها..
سيف راح فتح خزنة.. يطلع اوراق فيها توكيل زينه له اللي سوته وقت مسئلة طلاقها.. وكان مُطلق.. فيه انه يقدر يزوجها..
مهره تتحلطم ..
وسيف يحاول يركز.. يقرى التوكيل مضبوط.. لأن كلم الشيخ وقاله ممكن..
مهره بعصبية:انت ملاحظ انهم حتى ماخذوا تحاليل.. مايعقدون الا به..
سيف:الشيخ من ربع ابوي.. وقال بيسوي العقد .. ويضيف نتيجة التحاليل.. قبل توثيقه بالمحكمة ..

مهره بعصبية :وكل شي له حل عندك.. سيف كيف تقترح هالاقتراح.. نواف ماتزوج من قبل.. وبكره يشوف زينه بنقص ..
سيف يطلع مبلغ ويرتبه فوق بعض :
والله على كلامك.. زينه ماسبق لها الزواج الا بالورق.. ولا انا غلطان..؟
توسعت عيونها وصاحت:
نواف مايدري عن هالشي..
قال:بالعكس.. هذا يدل ان الولد شاريها باللي هي فيه..
صاحت:وش شاريها.. ماهو انت اللي تكلمت وجبرته فيها..

سيف يروح عند التسريحة وياخذ صندوق فخم مزخرف  بوسطه مسابيح.. كبهم وحط الفلوس فيه ورفعه :
مهر زينه ..
مده لها :استلمتوا..؟!
مهره مصدومه منه.. ومن اذنه كيف مقفلها عن اي شي تقوله ..
راح رفع يدينها وحط الصندوق بيدها :
استلمتوا .. ايه استلمتوا.. انا نازل.. لان طلعت صلاة العشاء وبيملكون

وخلاها ونزل..!

.
.
الآن ..

ظل يراقبها وهي تمشط شعرها وترفعه بمشبك بدون تناظره ..
تكلم : مهرتي.. وراه ماتعطين وجه ..
ماردت..
سيف:ورب الكعبة.. ان ذا الشي سويته.. ومقتنع ان نواف بيحب زينه وهي بتحبه..
مهره عطته نظرة صامته بحاجب مرفوع ..
ضحك : لاتناظريني كذا.. يعني جد مهره وش جاب نواف لعبدالإله ..فرق السما عن الارض.. وبعدين لعلمك نواف حده متحمس ومبسوط.. والله لدرجة انا استغربت..

ظلت ساكته..
سيف تكلم:يعني هي جات كذا.. والخيره فيما اختارها الله.. ماتدرين.. هالاثنين مكتوبين لبعض.. والله حطني سبب في طريقهم.. والله ألهمني اقول هالكلام..

عضت شفتها وكلام سيف منطقي.. قالت بخفوت ورجفه:
بس خايفه نكون ضغطنا على زينه.. وهي تاكلها..
مد يده لها وجات جنبه.. خذها بذراعه وباس جبينها:
اوعدك مايجي لزينه مضره.. انتي بس لاتضيقين صدرك وروحي شوفيها.. وشوفي خاطرها.. وعطيها من الكلام الزين ..
مهره :طيب وامي وجدتي مزنه.. الى الان مايدرون..
سيف:من اصبح أفلح.. بكره نفتح لهم الموضوع..
مهره:بيعترضون.. لان نواف ماعرس قبل وزينه مطلقه..
سيف:ليش انتي تسبقين الأحداث.. امي وجدتي يحبون زينه.. ويشرقون بطاريها واسمها.. واذا اطلقت.. ذا شي مايعيبها..
تنهدت:طيب .. انا بروح اشوفها ..
بدلت سريع وتوها بتنزل.. نادها :
شيلي مهرها عطيه اياه.. وقولي لها.. حقك مابعد جاك ..
مهره شعورها متلخبط.. ماتدري تتفائل ولاتخاف.. تتكدر ولاتفرح..
شالت الصندوق.. وطلعت من الغرفه..

****

نواف هذيك الليله مو مصدق..
كيف صارت..
كيف استوت..
معقول الواحد ينام ويصحى بيوم.. ومايدري ان بهاليوم بيتزوج..
وان البنت اللي ماخذه عقله وقلبه شهور..
فجأه تصير حرمته وحلاله..
طيب يبي يشوفها..
يبي يلتقيها..
يبي يتكلم معها..
بدون مايكون يطلطل بالخفا ..
او يتصيد الصدف..
كان ينشف شعره بعد ماسبح.. دق على سيف..
رد عليه:
وانت مانمت..؟!
نواف بتوتر:
سيف عاد مثل ماحطيتني بذا الموقف.. ضبطني..
سيف بهدوء:يعني..؟!
نواف بطفاقه :
ابي اشوفها.. هادي لصق ببلقيس.. بالبيت والمزرعة .. زين ماشالها بيتهم.. وانا قاعد حتى رقم جوالها ماعرفه ..
سيف:
ماشاء الله.. وانت ليش مستعجل على كل ذا.. مو المفروض العرس شي انت ماتبيه وماهو عامل حسابه.. والبنت مو مستعده نفسياً.. ولاتنسى امك ماقلنا لها شي لهالحين..
نواف بعصبيه :
طيب وصار واعرست.. لازم اقل شي اشوفها.. وامي بكره بنقول لها.. تكفى.. قل لمهره ترتب لي الوضع..
سيف:مهره تحت عندها.. واعقل وادحر ابليس.. ماهو وقته.. حبه حبه.. لأن زينه شايفه انه زواج وقتي.. ومارضت الا مثل ماقلت لك اني ضغطت عليها بطلبتي..
نواف:طيب ابي رقم جوالها..
سيف برواقه يستفزه :
رقمها ذا بنلغيه.. عشان مايدقدق عليها ذاك الخبيل.. شريحتها عندي..
نواف بانفعال:
هين ياسيف.. اواريك..
قفل في وجهه..

سيف رفع حواجبه وناظر الجوال وضحك :
وش فيه خفيف.. هالحين مايبي العرس.. وراه طار بالعجه ..

*****
في الصباح..
نواف صحى وبدل ويبخ عطر ويبالغ فيه .. لما فتح عليه سيف الباب..
ابتسم: ريحة العطور  ماليه الممر ..
نواف لابس ثوب وحاسر:
سيف لاتقعد تحجر علي.. ها قلت لمهره ترتبني مع الزينه..
سيف رفع حاجب :الزينه.. ها..؟!
نواف ياخذ مسباح ..
سيف :اهجد.. البنت وصلت بيتهم ..
توسعت عيون نواف وبقهر:
من جدك..؟!. تمزح سيف..
سيف بهدوء:
لاوالله مامزح.. حتى مهره معهم.. البنت ضج عليها المكان ومحتاسه بعمرها ومن اللي صار وشدت راحوا ..
نواف بانفعال:
وانا ماشفتها.. ولاعندي خبر.. سيف انا مشيت على اللي تبيه.. بس شوية احترام يا اخي..
سيف مستغرب وفي نفس الوقت مستمتع:
اقصر الهرج.. امي وامي مزنه تحت.. بدل ماتراهق تبي تشوف حرمتك.. تعال ننزل ونفاتحها بالموضوع..
وطلع واغلق الباب..
ونواف يتواكل..!

******

في مزرعة صبحا..
وبعد مكالمة من سندس..
هزئتهم ولعنتهم على هالفعله..
والحين الجوال عند الجده..
سندس:والله ياجديدة.. تستحقين جائزة نوبل.. لهالزواجات الخرائية.. لزيون ومهير ..
صبحا:يابنت انتي قل حياك مرتن وحده.. شيلي نعولتس وتعالي حذفيهم علي..
سندس:رايحه تباركين ملكة بنتهم.. وعطيتيهم بنتنا.. جده وش فيتس.. وشنوحك تمترين هاشمي..
صبحا:
عاد انا هالزواجه لالي ناقة فيها ولاجمل.. سيف اقنعها وهي قالت تم.. ويا امك زوين دامها تطلقت من وجه الحصني ذاك.. يبي لها رجال وظهر .. مهبووول .. جاين بسلاحوه.. يرعد ويبرق.. زين ماقلب هاك العرس عزا..
سندس بغضب :تجي الشرطه وتشيلوه.. ماهو تروح تعرس لاخطبوها ولا نصوها.. بس سيف قاله.. تقولون تم..
مهره :جديده.. خلاص قفلي.. سندس بترفع ضغطك ولاراح تقتنع ..
سندس سمعتها:
والله كله منك يالسوسه.. سويتيها قبلها.. بس يوم الله وفقتس مع بعلتس.. ماهو شرط تضبط.. مع طايحة الحظ زوين..
زينه انهارت نفسياً وهي تسمع.. ومو قادره تتكلم ..
عيونها تجمر وتجمر.. والغصه تخنقها..
لمن بعدين انهارت بكاء..
وراحت فرت بالمزرعة ..
صبحا:مهره يمه الحقيها.. لاتسوي في نفسها شي..
وقالت تكلم سندس:وانتي روحي لعيالتس.. وقولي خير ولاسكتي..
وقفلت الجوال ورمته على المساند..
وزفرت:
ياقرادة حظتس ياصبحا.. اجل هذا خطبه وملكة.. حتى الهنود اللي يعبدون البقر ماسوها..!!!.

****

في صالة بيت سعود..

سيف ونواف..
كانوا يشروحون اللي حصل..
وناوين على التدريج فالطامه..
وصلوا لموضوع ان نواف بيتزوجها وان سيف حطهم بالموقف ذا قدام الرجال..
وكانت ردة فعل موضي الغضب والاعتراض..

نواف بمحاولة اقناع:
يمه ابي رضاك.. هماك كنتي تلحين تبين اعرس..ويوم عزمت تزعلين..
موضي بانفعال:
عاد كذا ياولد سعود.. تاخذ مطلقه وتكون اول بختك..
الجده مزنه: ولدك ماهو احسن من النبي ياموضي.. ماخذ الا عايشه بكر..
موضي بصد وعصبية: عليه الصلاة والسلام..لا احنا نوصل مواصيل النبي يمه ولا مطلقاتنا صحابيات..!
بلقيس :يمه.. ترى انتي اكثر وحده عاجبتك زينه من شفتيها بخطبتنا لمهره ولاتنكرين..
موضي بانفعال:
مانقد على البنت بشي.. الله يشهد انها زينة خلق واخلاق.. وان شاء الله تاخذ اللي يستاهلها.. بس عاد ماهو نواف..
سيف بتهكم:والله يايمه.. انك تترفعين على النعمه.. ترى بنات غازي الله سافطهم بطيب اصل..متربيات صح وصابرات .. ان رضت فيه زينه هذا والله من دعواتك له  ببنت حلال ..
موضي بنص عيون:
انت خذت مهره لانها ارملة اخوك وماكانت اول بختك.. واطلع منها ياسيف.. تراك انت  زرعت هالفكره براس اخوك وشوشته..
نواف بحده : ماني امعه يمه وسيف يشوشني.. انا اللي ابيها..
سيف : وبعدين انتي وشهولا معقدة الامور.. ترى احنا وهقنا زينه بموضوع هالخطبه وقلنا كلمة رجال في الوضع اللي صار.. زينه ماتبي العرس فايحه كبدها من ذاك العوج.. فترة ماجاز لهم الوضع.. مثل مالله شرع الزواج حل الطلاق..

موضي توسعت عيونها:وانتوا تلعبون ياعيال سعود.. هو الزواج والطلاق عندكم لعبه.. من انت عشان تاخذ البنت وتعرضها لطلاق ثاني..

الجده مزنه : والله ياولدي يانواف لو ذقت هالزينه.. بتحرم عليك بنات حوا بعدها.. الصدر عامر والبطن ضامر.. والجيد يالله من فضلك..
شقة عينها مثل الغزال.. والخد اسيل يا امك.. والشعر ليل.. البنت خذت اسمها يانواف زينه وخذت الزين كله ..
نواف بنص عيون : اشكرك ياجده على الشفافية.. ماكنك بالغتي في الوصف.. ترى سيف قاعد..
موضي بانهيار : وانت هنا.. وهي حلت عليك وصارت لك.. شفيكم انتوا استخفيتوا ..
الجده ضحكت وماعليها من موضي :
ياخلف جدي يانواف غيران على حرمتك.. وانا وش علي من سيف وهو عنده اختها وماتقل عن الزينه بشي.. بس مهره خذت الشقار.. وخلت لزينه سواد العين والشعر.. الشهاده لله بنات هالغازي ماخلن للبنات من الزين شي ..

موضي بعصبية :
يمه تكفين لاتقعدين تدخلينها براسه.. عنبوكم انتوا على قول سلمى آلدكم وتلقفكم الشياطين.. كل واحد شاطح شطحة ابليس.. حتى انت يالعاقل.. بعد الحنه على هالعرس والصبر.. تروح تعرس بدق صدور وحكي مجالس ..
سعود  كان جالس ويقرء اخبار في الجوال وملتزم الصمت.. لأن سيف قايل لازم نمهد..
رفع عينه ونظارة القراءه على خشمه:
وانتي وش معارضه هالعاقل فيه يامويضي ..
موضي بانفعال:
وانت عاجبك.. ياخذ مطلقه باول فاله.. ماظل بنت ماتحاليت عليها وابي اخطبها له.. في النهاية تسذا..
سعود شال النظارة:
عيب ياموضي.. عندك ثنتين.. والدواير تدور.. والله لو تلفين البيوت.. من اعالي الحمايل.. مالقيتي لعيالك مثل بنات غازي..وقبلها مهره.. ولاتنكرين انها سوت لسيف اللي ماحد سواه ..

موضي تحاول تتمسك فموقفها :
انا ماهو راضيه على هالعرس.. لو تحط رجل بالسما يانواف ورجل بالارض.. ماني راضيه..

نواف بانفعال وعصبية:
والله عاد يايمه ذا شي احنا قضينا منه وخلصنا.. واذا يهمك امري تتقبلينه وترضين فيه..
موضي:شلون يعني يانواف.. بتعصي امك عشان كلمة قالها اخوك..
نواف وهو يوقف :
لا يمه.. لأن الوضع اللي صار امس.. كله رتب له القدر.. البنت لعلمك في بالي.. ومن شهور.. لاسيف يدري.. ولاهي.. وانا والله ابي الفرصه وازمتها تفك واخطبها ..
سيف ناظره بدهشه ويفكر انه بس اقناع لأمه ..
نواف بنفس الانفعال:
لاطالعني كذا سيف..ورب الكعبه البنت بخاطري وودي بها.. لمحتها بمزرعتهم يوم خذت سيف هاك اليوم وانتوا مسافرين.. ومن يومها وهي ماخذتن عقلي .. وكلكم تطرونها وتمدحونها.. كبرت بقلبي وماغير اسمع ان هاك الكلب عقدها من العرس.. ويوم والله تيسرت.. وهالذيب سنع لي الامور.. لاتقفلينها بوجهي يمه تكفين ..

موضي وكلهم يناظرونه بصدمة..
موضي بانفعال :وانت بنيت حب وخرابيط من لمحه.. وين الثقل والعقل..؟!!
نواف بعصبية: طارن.. مع هالعنقا عاد.. ولا نطولها يمه.. ترى امس عقدت على زينه وصارت زوجتي.. وحليلتي على سنة الله ورسوله ..

موضي رفعت كفوفها على راسها:عليكم الله اكبر.. عليكم الله اكبر.. وجاي الحين تبي الرضا ..
نواف:ماخذت انا وحده من الشارع ولاخذت قليلة اصل ودين عشان ماترضين.. خذت وحده لو حطت في مويه عكره صفتها..

مزنه بتبهور وانتقاد:
الله عليكم .. تعقدون عليها..  لاباركنا لها ولا قمنا لها بواجب .. تجي تحضر حفلة بلقيس حاله من حال المعازيم..
سيف :هي مارضت.. قبلت بالملكة بعد طلبتي والله ياجده رميت عقالي عشان ترضى.. وبعدها قالت لا احد يدري اليوم.. ان كان الناس بتعترض.. مابي اخرب ليلة بلقيس .. وان كان الناس بترضى.. ماتقاسم ليلتها معها.. هي ماتبي شي يشوش خطوبة بلقيس ..

سعود:انا اشهد انها تربية شيوخ..
موضي وقدام كل هالكلام والاعترافات مالقت شي تقوله..
تركتهم وصعدت فوق..

فارس نازل وشكله توه صاحي :
وول وش فيها امي *** معها..؟!. قلتوا لها..
بلقيس:وماشاء الله حتى انت تدري.. معلمينك الدرس ماقلت شي..
فارس جاء سلم على ابوه وجلس جنبه :
انا اللي ادري عن كل شارده ووارده.. حتى ادري ان نواف يبيها قبل الفلم الهندي حق البارح ..

سيف صقعه على راسه من ورى:
وساكت ياكلب..!

نواف :وتكلم .. لو انا ماقلت لهم.. والله لا اطحنك واجيبك لابوك بسحلة..

*****