رواية مبعثر فيك ماللحزن لايشفى الفصل السابع والعشرون 27 - بقلم ايمان يوسف🕊️

البارت السابع والعشرون

'ويهز عرش قلبي قربها..
اغلقت الباب ولم احاول اقتحام بكاءها.. وهدرها لآلام احتقنت في ضلوعها..
كنت اسمع انتحابها.. وارى كم خلف صمتها من تصدعات وكدمات في جوفها..

جمان..اعرفها لاتريد اقترابي الآن..
ولو انها على خبري القديم.. منذ طفولتها وحتى يوم تركتني..
فالأفضل ان يهدء ضجيجها..
ويخفت حريقها..

تركتها وانا احاول تجاهل سبها.. الذي يعلو بين الحين والآخر علي..
ونقدها الطاغي على شخصيتي..
واتهامات جارحه.. سيدها الخيانه والكذب..

ابتسمت.. وكل قلبي يشرع ابوابه لفهد..
الذي يمص كفه الصغيرة ..
وتعلو عيناه فهاوه عجيبه..
حملته..
رحت ادردش معه.. يبكي تاره ويهدء اخرى..
وانا اقف وامشي به واعود احتضنه..

شاهين يرفع حاجبه وهو يلاحظ خد فهد وقرصة نامس:
المكان هذا ماهو لك يابوك.. ريف وبعوض.. شنسوي فأمك الهاجه.. اللي ماتستحي..!
وضحك بخفوت..

كأني نائم..
وان لي ولد.. 'اضغاث احلام'..
كأني متعاطي..
لااستوعب اني وجدتها اخيراً..
ومعها فهد..
ظللت اتأمله واتحسس شعراته الخفيفه نزولاً الى وجنته..
عدت اتكلم معه.. حتى اعلن علي الحرب.. ورفع رايات البكاء في الميدان.. '

مرت فوق ساعتين وحل الظلام وجمان ماطلعت
والولد جاع..

تلفت بوهقة حوله يبي يتصرف من غير مايلجئ لها..!

*****
حبايبنا وش الدنيا بلاكم
ملاه الشوق قلبن ماسلاكم
يضيق بهالفضا بعض الليالي
اللي دور نديم ومالقاكم
فلاتقولون يمكنه نسانا
حرام الظن في اللي مانساكم..

سمعت من قبل عزف مهره ودندنة عودها.. ترجمت آهاتها تقاسيم..
اوصلت رسائلها لي عبر تلك الآلة..
لكن للمره الاولى توصل لي حجم ألمها بأغنية.. اسمع صوتها المجروح وهي تغني.. نبرة مهره في ذاك المساء
كانت مالحة..
نبرة مهره مليئة بالندوب..ترددات مهرة الصوتية وبحتها حارقة..
هل مر بكم صوت مليئ بالتقرحات.. صوتها مريض وبه حمى..

مهما كابرت وضحكت..
تعلقها بسيف الصغير.. ليس شيء عابر ويسلى عنه..!
تعلقها تولد من مأساة.. والعلاقات التي ترتبط في ازمات.. تلتئم الجروح بها..
سيف قابع في مهره..
ليس قلبها فقط..
بل حتى مسماتها الجلديه..
سيف موجود في كُل مهره.. اراه هناك متعلق في قناتها الدمعيه..!

ردتت مهره الاغنية مع صوت موجات البحر الليليه..
سكون..
يخالجه شعورنا المبحوح..
وزينه اغرقت عيونها بدموع وببتسامه حانيه:
الحين قلنا لك غني.. شهالاختيار الزفت مهره.. عدمتي الجو..
ضحكت:الحين مجتهده.. وصوتي وصل لادراة المنتجع.. وهذا ردك..
سيف ضم كتوفها ويخفي المه بصعوبة:
صح كلك ويازين صوتك.. غني جعل مايغني غيرك..

فارس كان متلاهي بالجوال.. لكنه بصعوبه يبلع ريقه من الغصه مع صوت مهره...
نواف  يشوي ويقلب الاسياخ..
شرد..
وانغبن..
يطري عليه كل شي وقت نبش الحقايق..
لاتلام.. لاتلام في ألمها وتملكها.. وحقها..!
احترقت اصابيعه وهو يشيل الاسياخ ويرميها في الصحن وبحده:
فارس قوم يامال الوجعه.. ساعدني وشل هالاسياخ احترق الدجاج..
فارس قام وبانفعال:
هو انت قلت تعال وانا طنشت..
سيف حاس بالاجواء  مكهربه من غياب سيف..
قال وهو يقوم :
نواف وراه..
نواف يصب ماء على يده:مافيني شي.. بس اكلوا عشان احط باقي الشوي..
سيف:اتركها انا اكملها..
وبدء يكمل هو..
وزينه تطالعه وبنظرات يعني "وش فيك" ..؟!

اشار بحاجبه على مهره.. وكنه يبي يطمن عليها..
هزت كتفها يعني "مدري" وان شكل نفسيتها ماش..
نواف طقطق جيوبه ومالقى الدخان..
سيف رمى البكت عليه.. وبهدوء مايسمعه الا نواف:
هد يابوي.. تراني مثل اللي واقف بين الغار والنار.. ان وطى احرق  صدره وان ارتفع ضرب الغار راسه.. لاتزيدها علي وتقلب سحنتك بعد انت..
نواف بخفوت وعصبية:
ترى الوقت اللي راح كفايه.. المفروض نرجع ولدنا.. انت شايفه لاكلمناه.. شلون يتكلم..
سيف:
في شغل انا بادي فيه يخص الكبار.. راجح طرف فيه.. ولاادري وش رد فعله.. لو درى اني ضده.. انا مابي اضره.. بس ان صار ضرر.. مابيه يلوي ذراعي بسيف.. خل يقضي الوقت اللي اتفقنا عليه.. واجيبه بدون شحنات..مابي راجح يدري اني طرف في اللي بيجيه هو وربعه..!

نواف بعصبيه :
وانت بتخلي زوجتك تنهري من الهم والحزن عليه عشان تكمل شغلك..تخلي سما تقعد فوق راسها وتدندل الرجلين بشماته.. انت ماسمعت عزيز وش يقول عن سما وكيف تحاول تبعد مهره باساليب قذره عن عقل سيف..

سيف يقلب الشوي :
والله يانواف اللي يدوس طرف ثوبها أشق له صدر ثوبه.. بس انا ماقدر انكب طلال وانا وصلت معه لهنا.. وسما خلها تشبع من ورعها.. ومهره انا كفيل بوجاعها..هي فتره وبجيبه.. بس تعرفني ان بديت بشغل اكمله..
نواف بتهكم وعصبية:وانت وش يدخلك بهالمجال.. تدري انك ممكن تروح بخرايطها.. ومن بيقول مات عشان الوطن.. انت حتى مالك مسمى وظيفي في هالمجال..
سيف بشرود في الجمر:
وان بعدت عن وطني له حق علي.. خلني اخدمه بطريقتي..
نواف:والله ياسيف لو صار لك شي من ورى سوالفك ذي.. لاذبح طلال بعدك كانه ماغسل مخك الا هو..
ضحك سيف:ترى مارضا على بوعقاب..
نواف وهو يرمي السيجار ويدوس عليها:
الله يلعنك انت وهو.. كان محد بيجيب العيد الا انتوا..
فارس كان يستمع بتركيز.. ومسوي نفسه متلاهي باشياء ثانيه..
انرعب من فكرة ان ابوه يخوض في مياه خطره..
تسائل (وش السالفه.. وش اللي قاعد تغامر فيه يايبه)..!

مهره وهي ترتب صحن لفارس نادته:
فارس.. تعال اكل..وراك مفهي..
ضحك وجاء لها :اففففف صرتي تجهزين صحني زي بو فارس..
مهره بأمومه وهو يجلس جنبها نزلت راسها على كتفه.. لان يدينها فيها اكل:
وان ماجهزت لولدي العود من اجهز له..اكل جعل عيني ماتبكيك..
زينه ببتسامة:
والله يابختك يامهير.. ولد هالكبر جاهز ومجهز..
فارس ابتسم وهو ياكل ويلقي نظره بشرود على ابوه والقلق اخذ منه ماتخذ..
جاء سيف ونواف وبيدينهم باقي المشاوي.. نزله سيف ع الطاولة..
رن جواله.. افتحه وبترحيب:
حيالله الهايت.. انت ماتقولي وين ذالف..
شاهين بسعاده ماقدر يخفيها:
البشاره يالعشير.. البشاره..
سيف: وش العلم..
شاهين:لقيت اختك.. وهذاني عندها..
توسعت عيون سيف: تقوله صادق..؟!
كل العيون انتقلت تبحلق فيه بفضول.. حرك شفايفه(انه لقى جمان)
وسيف حط الجوال سبيكر..
وهو يقول :
وازيدك ماهي بروحها.. لقيتها ومعها فهد..

بصدمه كلهم يناظرون..
نواف بانفعال:
وش فهد.. من فهد..عمي فهد وش وداه عندها.. وليه ماقال من الأول..
ضحك شاهين:
وش تبي انت.. من وين طلعت..
نواف :تكلم اخلص.. من فهد.. شارب شي.. يا** تراي شاك فيك.. ماتخلى.. بعد خاين وسكير كملت..
سيف سحب جواله من نواف:
اتركه وكلمني.. كيف تقول معها فهد.. تقصد عمي..
فارس :ابوي فهد بالسعودية.. مايطلع منها حتى جوازه منتهي من ثلاث سنين ماجدده..
شاهين :انتوا وش بلاكم.. ماكلين فلفل.. ماهو فهد ابوي.. فهد ولدي.. فهد بن شاهين.. جمان يوم سافرت كانت حامل.. ومزينة الفعول ماقالت لاحد..!
نواف وفارس بصوت واحد :وشهوووو..!!!!!
سيف بذهول:ياوجه الله..!
مهره وزينه يتبادلون نظرات الصدمه..

'حكى لهم شاهين تفاصيل.. ووصاهم مايعلمون الشيبان.. عشان يفاجئونهم بفهد'..!

سيف:وامورها هي.. عساك راضيتها..
تنهد شاهين :نقول ان شاء الله.. على الزعل ماجد جديد.. قلبها علي شايل.. وماظنتي بترضى بسهوله.. بس حنا لقيناها وكل رزق يجي بوقته وانا اخوك..
سيف :ماعليه ياكحيلان.. خلك مثل الجمل لابرك قام بحموله.. وينها هي ابا اكلمها..

شاهين :ماحولي الا الشبل.. هي خلتنا وقفلت على نفسها وخليتها.. لما تطخ وتجينا..
نواف:اجل الله يستر عليك.. بتقعد تنتظرها.. لمن معطر الشوارب يدخل المدرسه..
ضحك شاهين:
لاتقول..
سيف بضحكه:بس تهدء كلموني.. واحشتني طويلة اللسان..
شاهين :ابشر ولايهمك..
انهوا المكالمه..
وسيف بزفرة ارتياح :
حمل وانزاح.. مابغينا نعرف مكان هالعاصية..
نواف:السؤال الحين.. ابوي يدري انها كانت حامل.. وولدت لحالها..
سيف :لاوالله ماهقيت..
مهره :ياقو باسك ياجمان..
فارس:ذيبه ادبت خالي.. الحين ان شاف زول حرمه.. هج عشر امتار عنها..
ضحكوا..
وسيف:انا اشهد انها خذت حقها بدق خشوم..

*****

حست بهدوء خارج الغرفة..
يشابه هدوء ألتف بداخل روحها.. محتوي الفوضى والضجيج..!

ماعادت تسمع صوته وهو يلاعب فهد.. ولانبراته الموجعه لروحها..
اختفى صوت فهد وبكاءه..

مسحت دموعها.. ولاقدرت تمسح من ملامحها الحمره ..ولاتخفف من عيونها المنتفخه..
مشطت شعرها ولمته بربطه..
وافتحت الباب واطلعت..
ولأن الباب في الصاله ..
عيونها وقعت على طوله الفارع متمدد على الاريكه الواسعة..
وباين مستغرق في نوم عميق..
قربت ولقت فهد نايم فوق ذراعه باللجهه الثانيه والمصاصه طايحه من فمه..
ومحدثه انفراج بسيط في شفتيه..
بالضبط كشفتي شاهين..!

ابتسمت بحنيه..
بعدها انتبهت ان مغير ملابس فهد.. ومن العده الموجودة عرفت ان مسوي له رضعه..
ظلت كذا واقفه تتأمله..
اشتقت.. ورب الكعبة اشتقت..
وشاهين كالنائم بعد سفر طويل.. من هم وحزن وقهر..
نائم كمن صعد لقمه بعيده وانهكه الوصول..
نائم بعد ان اضناه السهر ايام وشهور..
على وجهه غبرة عناءه..
ونتائج فعلتي به..!

تأملته وانا استعيد كل كلمه وحرف قالها..
من اول واعلم انه يحبني لكن حب معتل بسم افعى.. تنفث فيه كل يوم..
وكنت ابخل بالترياق..
واتركه يتلوى بعيداً بتجاهل ورفض..
اليوم شاهين لي.. وحدي..
رأيت في عيناه حجمي..
وجدت في تغيره تدهوره دوني..!

غارق في نوم سقط فيه بعد أرق طويل..
شاهين نومه خفيف.. يشعر بأي حركه وخطوه.. وأي احد صامت يقف عند رأسه..
لكنه لايشعر..!
خالداً بعذوبة رمشاه التي لاترف..
تحرك فهد.. وهو يقطب ملامحه استعداداً لنوبة بكاء تعرفها..
انحنت بتاخذه قبل يزعج ابوه..
حس شاهين على طول ومسك ذراعها بتأهب..
وهو يفتح عيونه وعاقد حواجبه:
وين بتودينه.. خليه جنبي..
بخفوت:باخذه ارضعه.. بيبكي وباين جوعان..
ترك يدها وهو يغمض من جديد:
رضعيه وجيبيه انا انتظره..ماراح انام..
ارتفعت وبين يديها فهد.. ناظرته وهو يتحرك ماخذ وضعية الجنب ويكمل النوم.. 'اي بتنتظره.. واضح..!'..
استغربت تعبه و كيف معمق كذا..
خذت فهد وراحت.. وهي ترفع جسده الصغير لوجهها وتشم بشوق ريحة شاهين  عالقه فيه..
استغرقت تستنشق فهد..
متعلقه بذرات التصقت فيه ..تاركه الاصل يبعدها امتار..
ومكابره تروح تعانقه وتشفي غليل الاشواق والوله..
اسدحت فهد على سريرها وببشاشه وهي تشوفه مصحصح:
شفت بابا.. نمت عنده..بعد عطاك ننا..
ضحكت وهي تنتبه كيف مقفل طقطقات بدلة فهد.. فتحتهم :والله مدري استحول ابوك.. وش ذا..
راحت تقفلهم من جديد وهو يتحرك بنشاط ويصدر اصوت مرحه..
حسته فرحان ومستبشر..
جمعت رجلينه وبوستهم:
مبسوط ياقليل الحياء.. ماكنت ماليه عينك..

*****

وبعد قليل انتصف الليل..
فهد نام وغطته.. هي انسدحت وعجزت تنام.. وفكرة وجوده قريب منها..
راحت فتحت الباب بخفوت..
واطلعت تشوفه.. وهو مستغرق في نومه الغريب..
ظلت واقفه بتردد وتكذب على نفسها.. انها بتشيك عليه لايكون مريض على هالنومه..
مدت كفها لجبينه.. ولمسته..
ظلت منحنيه..
تمشط ملامحه المتعملقه في قلبها بعينيها..
انفاسه الهادئه تلهب كفها و ذراعها..
بضراوة..
ارتبكت وتوها بتبعد.. الا يد شاهين تتشبث في معصمها..
ويناظرها بنص عيون..
حاولت تفلت يدها:كمل نومك.. انا قلت بشوفك عدل على هالنوم.. حشى ميت..
شاهين بخفوت متمسك فيها:
توني انام.. بعد ماسهرت شهور..
جمان برتباك:
طيب تمام نوم العوافي..اتركني.. 'وبتحذير'شاهين اترك يدي..
سحبها بحركة مفاجئة وطاحت على صدره :
وان ماتركتك وش بتسوين ..

وفجآه وجدتني علقت في خيوط العنكبوت..حاصرني باطرافه..
تخاذلت.. وعطره يهرول لجوارحي.. ويثير خدراً وخنوع..
اللعين.. كيف لعب في الأماكن بخفة..
لأكون مستلقيه على تلك الاريكه وهو فوقي..
ويبتسم بخبث :
والله و لعبتي فيني لعب يابنت سعود..
دفته بخفه من صدره:
شوي عليك.. ماجاك شي بعد..
مسك معصمها وثبتها:
وانا كبدي عليك فايحه.. وابي شي يبردها..
جمان ارتبكت.. لكنها قالت بتحدي :
بعيده عن شواربك.. ابعد ماني ناقصه هبالك..
مسك معصمها الثاني.. واحتكرها ورفع حاجب :
هبالي..؟!
وقرب بيبوسها.. لفت وجهها.. لتقع قبلته على خدها.. وهمس:مو مشكله.. حتى خدك مشتاق له..

حاولت تفلك يدينها :شاهين ابعد مو طايقتـ..
لف ذقنها غصب: ولاانا طايقك..
وراح بايسها بعنف..
حتى ادمى شفتها..!

'هكذا حبنا عنيف.. خلافاتنا مصائب.. ردود فعلنا كارثية.. ونتصالح رغماً عن انف الكبرياء..
هل رأيتم عشقاً.. مريض كهذا..!! '

ما هقيت السيف الأملح ينثلم من ياسمينه
‏لين عنت خيل فتنتها علي والله نصرها

*****

مستغرقه في نومي.. كأني بين بياض غيم وسرب حمام..
محلقه كريشة.. طارت فارتفعت فخف وزنها اكثر..
يتخلل برزخية حلمي الغريب عطره وانفاس حاره..
وجسدي يعلو ويهبط فوق ضلوعه..!

فعلياً لاادري ما أنا فيه فعلاً.. حلم.. علم.. او مت وارتفعت روحي..
لا اعرف طريقاً للإستيقاظ.. ولا اجد ميناء ارخي سفن حيرتي فيه..
ظللت هكذا..
حتى بدأت اسمع صراخ ونحيب من بعيد.. وبعيد.. كأنه ياتي من ارض حلمي.. بدئت اركز سمعي على الصوت..
وفجأه بدأت اهوي من وسط الغيم..
وقبل ان ارتطم فتحت عيني..
وبدأت استوعب..
الشمس تلوح بمنزل راشيل.. من النوافذ الكبيرة كأنها مستضافة داخله..
وانتبهت لجسدي وجسده..واشتباكنا الغريب كأسلاك سماعه.. لم اعرف بدايتي ونهايتي ولامواقع اطرافي.. يدي نائمة تحت جسده.. ونصف ضلوعي يكاد يسحقها بضغطه..
انتبهت لصوت فهد.. يبكي بشكل مخيف من الغرفه..
وانا معجونه فوق الاريكه مع الكلب شاهين ..

ماتدري كيف سحبت نفسها من جنبه ودفته بقوه..
وهي تصيح :فك عني.. نسيت ولدي.. الله يلعنك ياشاهين كان ماورى قربك خير..
نطت من الكنب ومع حركتها العنيفة طاح شاهين وصقع راسه الطاولة..
وهي تختفي.. وصوتها يوصله وهي تسمي على فهد..

دخلت لقته يبكي وينتحب ودموع.. ووجهه شاحب من كثر ماصاح.. باين يبس ونشف ريقه..
شالته :امي امي.. بسم الله عليك..
ضمته وتهدهد فيه.. وهو منهار ..
جاء شاهين يحك شعره:وش فيه..
هي تحاول ترضعه من صدرها:
شاهين وش فيك متبلد.. عنبوك ماسمعته وهو يصيح.. الولد يبس..

يرضع شوي ويرجع ينهار ..
شاهين قرب يحاول يهديه باصوات.. وتطهبل..
وفهد انهار من جديد..
جمان رمت علبة المناديل عليه:اسكت واللي يرحم شيبانك.. الورع حساس وماهو متعود على صوت احد غيري ..
خذه من يدها:خليه يهدى بعدين رضعيه.. لايشرق..
وقف فيه وقام يتحرك بوتيره هاديه.. يرفعه بكفوفه ويمرجح فيه..
وبخفوت :قومي جهزي مويه دافيه.. خلينا نروشه.. تهفت شياطينه..
جمان:بسم الله على ولدي من الشياطين..جبه انا اعرف له..
بعد فيه لجهة الحمام :
لو ولي العهد طالعن علي.. شوفي وش بيهجده..
وبحذر راح فتح بدلة فهد..
وبدون توتر من شاهين.. كان الصغير عريان على كفه.. وبدء يهدء وشاهين يقربه من المغسله.. ويصب عليه ماء دافي..

جمان تراقب النتفه كيف استكن عند ابوه وهو يروشه ويتكلم معه..
اول مره ينهار عليها بهالطريقة ..
خذ المنشفة من يدها.. وضم جسد فهد بصدره العاري.. ولفه بالمنشفه وهو يضحك ويسولف معه..
'ابتسمت لا ارادياً على جمال الصورة.. كيف استطاع شاهين امتصاص هيجان فهد..كما يفعل من قبل مع بيان وديم '

بعد قليل..
كانت تضمه وهو ملفلف.. ويرضع منها ونام..
شاهين  طالع من دورة المياة يجفف شعره ولابس ..

اختلست له النظر..
وشافته يلبس شرباته والجزمة ..
وبثقل:وين ..ماتبي تفطر..
شاهين بهدوء:اغراضي بالفندق.. بروح ابدل واسوي شيك اوت واجي..
بدهشة وتهكم: يمكني مابيك تقعد عندي.. ليش تسوي شيك اوت..
وقف وخذ جواله من على الطاولة :
ماهو بكيفك..وحاولي تلملمين اغراضك.. بنبات الليلة وبكره بنمشي على روما..
سكتت..
قال :اوراق فهد سويتيها ولاباقي..
قالت:معي اوراق المستشفى.. وسويت تبليغ هنا.. بس كل الاوراق يبي لها تخليص فالسفارة.. عشان نقدر نسوي له جواز.. وانا ماعرفت اروح روما..كنت تعبانه طول شوال.. وهالفتره اجلت لاني ماقدر اسافر بفهد لحالي..راشيل كانت بتجي بعد اسبوع وبتروح معي..

قرب منها وباس راسها:
مو مشكله.. نخلصها ..

قال كذا وتركها ومشى..
'وقلبي يخفق وصفير خلو المكان منه بعد ان اغلق الباب ضايقني..'

*****

بعد شوي..
سيف ببتسامه حانية وهو يكلمها بالجوال:
حلال علينا كل اللي سويتيه.. اجل الحزن بعيونك ولا اشوفه..والله لو ادري وقتها.. كسرت ضلوع شاهين ضلع ضلع..
ضحكت بحشرجة دموعها:
ياجعلني مابكيك يابوفارس..والله يأن لكم وحشه تهز جبال..
سيف:عجلوا باوراق السبع.. ترى زواج بلقيس ماباقي عليه شي..
جمان تمسح دموعها من زاوية عينها:
اكيد ياعين اختك..واخبار مهره والله صوتها ضيق صدري..ماهي الاوليه..
سيف كان مبعد بالجوال.. بعد ماكلموها كلهم.. تنهد:
خليها على ربك.. كلها نتايج فصول اخوك الله يحله ويبيحه..
جمان:لاصراحه هوايل.. عجايب ياهالعساف.. على كثر فصوله بحياته.. ولاتجي بقطره بعد فصوله بعد مامات..
سيف:انتي قولي لي.. من دعمك ورتبك في امورك.. يعني حتى موضوع انك رايحه وانتي حامل.. ماغامرتي الا في ظهر ساندك ومعبد لك الطريق..
جمان ناظرت شاهين وهو في الحديقه الخارجيه شايل فهد :
ليش واثق.. يمكن انا رتبت الامور.. وراشيل رتبتني هنا..
سيف بجديه:ولو.. اعرفك جمان.. انتي اول لاجيتي تروحين.. ماتعرفين حتى تخلصين الفيزا والتذاكر احنا نسويها.. فما بالك رايحه وشاطحه بالارياف.. مين..؟!.. ابوي.. ولاتبون تعلمون..
سكتت شوي وبخفوت:بقلك بس لاتعلم احد.. عشان خاطر محد يزعل منه كيف صمل.. وحافظ على وعده وحلفه..!
سيف:ايييه..؟!!
جمان بهمس:هادي..
توسعت عيون سيف:ويدري بالتفصيل وين ساكنه.. وكذا..
جمان ببتسامة :وهو اللي رتب مواعيد الحمل ومستشفى الولاده.. والسفر الداخلي.. وكل شي.. سيف انا محلفته على المصحف.. والله واثبت انه رجال كلمه.. مع ان هاوشني كثير على تطويلتي.. بس وفى ولاعلم..
سيف بضحكه ودهشه:وتهقينه ماقال لبلقيس..
جمان:لا ماقاله.. لوقايل كان ماسكتت بخور المواقد..
ضحك :والله ان هادي رجل والنعم..!

****

مرت الايام على ابطالنا..
واليوم الشباب وبيان وديم رايحين يستقبلون شاهين وجمان فالمطار..
ديم تتحرك بحماس وتركض بعيد وتجي..
سيف شالها:
لاتضيعين ديم.. اعقلي..
هي وعيونها طايره:وينها ماما.. خالي انت تقول نزلت طيارتها وينهااااا..
قال:لازم يخلصون اوراقهم اصبري..
بيان  متشبثه بيد نواف وساكته.. وعينها على جموع الناس.. تبحث بصمت وعيون ملهوفه لزول امها..
ومن خلال تركيزها ويدها عرقت بيد نواف.. طالعها وبخفوت:
خالي روقي حبيبي..
بعصبية:مافيني شي خالي انا ساكته.. ديمي بس ازعاج..
فارس همس له:اسكت لاتنطق..

'انتهينا من الاجراءات وكلي لهفه لبناتي.. عدت للوطن وقد كنت وطن ورحل..
'وطن شاهين وبناتي'..
مرت بهم ايام.. بلاهوية.. ولااستقرار.. ولا حتى اثباتات..
هل تصدقون اني تركتهم كالبدو الرحل.. كلاجئين.. لااصدق.. اني فعلتها..!!
وانها مرت ايام وليالي.. لاارى عيناي شقياتي..
خرجنا من صالات القادمون.. فهد يحمله شاهين.. وانا فقط ابحث بعيني عنهم.. هناك.. بين ايادي احبابي..
تضببت الرؤية وانا ارى انفلات بيان وصرختها :
والله ماماااا... جااااات ماماااا..
انطلاقها تلتها ديم نزلت من سيف والحقتها..يطلقون صرخات كرشقات في قلبي..
جلست على ركبها.. افتحت ذراعها..
لينغرس في صدرها قلبين..!!
احتضنتهم بشوق وجنون وهي تبكي بانهيار :وحشتوني.. وحشتوني ياامي..
ديم وهي تتشبك فيها لدرجة الالم :
وين رحتي ماما.. والله والله احنا نبيك... والله كنا نبكي انا وبينون.. واحنا ندور عليك.. والله ماخليك تروحين ثاني.. حتى لارحتي حمام اروح معك..

جمان وهي تبوسها وتشمها وحلف الصغيرة المتكرر حولها اشلاء:آسفه.. يا امي.. انا اسفه.. والله ماترككم يابعد روحي..
ديم تشوهق وتبكي بانهيار.. لدرجة الهستيريا..
وبيان فقط ضامه رقبة جمان بتملك ودموع تنزل بدون صوت.. وهي تشم شيلة جمان.. اللي جلست فيهم على الارض.. وشاهين واخوانها يحاوطونها عن عيون الماره..

شاهين:ديم بابا.. اهدي.. خلاص ماما جات..
ديم  تحط كفوفها الباردة على وجه جمان.. وبدموع:والله ياماما.. مشتاقه لعنونك ووجهك..
ابتسمت جمان وهي تبوسها بكل مكان ..
وراحت حركت بيان.. بذراعها:
بياني.. حبي.. وريني وجهك اشوف..
بيان برفض:
مابي..
وراحت تشم امها بقوه:
الحين اشوفك وابكي..
ضحكت وهي تبعد ديم شوي.. وتعدل بيان:
كلنا بكينا.. ليش ماتبكين..
وشافت وجهها..
توسعت عيونها..
بيان بجدايل.. مجدوعين على ورى.. لاأثر للغره التي طالت..
راحت خدودها..
ملامحها.. نعمت اكثر مع نحف وجهها..
لمست جديله منها :
ياحلوك بالطويل..!
بيان وعيونها تزخ دموع بكثافه وبتأنيب موجع:
شلون ياماما رحتي وتركتينا..!!!
عتبها.. طعنني من الوريد الى الوريد.. وانا احضنها بقوه:
سامحيني يمه.. تكفين..!!
وانتحبت بيان المكابرة على البكى.. تبكي بصوت عالي وهي تعانق جمان بعنف وقوه..

بعد لحظات.. سيف انحنى وفك بيان عنها.. ورجول جمان  ماعادت تطاوعها.. مو عارفه توقف..
مسكها من كتوفها وشدها ووقفها:
قومي ابوي.. مو عدله قعدتك كذا..
جمان بانهيار ترتمي على صدره وتبكي..
ضمها وباس راسها وابتسم:
قرت عينا فيك ياخلف ابوي.. مبروك ماجبتي يالغاليه..
جمان ببكاء وهي تخبي وجهها بصدره:
سيف انت ألعني وسبني مثل ماتسوي.. انت لومني لاتمشيها كذا..
عدل شيلتها المتراخية ونزلها على وجهها:
والله مايلومك احد ولايخطيك.. انتي جيتي بالسلامه بس يكفي ..
جمان وهي متشبكه فيه:
كلهم كلموني الا امي.. امي زعلانه  ياسيف.. زعلانه وزعلها كايد اعرفها..
داعبها:ماعليك.. نراضيها..
نواف سحبها وضمها:واحشتني يالعاصية..
ضمته:
ياقلبي يالمعرس.. مابغيت تدخل القفص..
ضحك نواف وهو ياخذ يدها يبوسها :
اثاريك انتي مقبسه علي.. ليتك هاجه من زمان.. عشان اخذ هالزينه..
شاهين كان جاثي وبيان وديم يطالعون فهود بدهشه وانبهار..
جمان اتركت نواف وبشوق راحت لفارس.. اللي فتح ذرعانه :وحشتيني وحشتيني.. ياعمه..
ضحكت وهي تضمه وماقال لها ياعمه الا من قو الشوق:
ياعين عمتك وروحها..
فارس وعينه تلمع بدمعه.. باس جبينها وراسها.. وخدودها:
يمه باكلك.. باكلك.. مشتاق لك مليون

******

كان وصول جمان صاخب عكس ذهابها المتسلل الهادئ..

دخلت السيارتين.. وسعود واقف عند الباب.. معاه فهد بوشاهين..
وسلمى والبنات متغطين..
سعود يرفع الرشاش وهو يهلي ويرحب.. بقدوم بنته وشعرة جوفه..
سيف وهو يعبر بالسيارة يقول لشاهين :امسك فهود لاتنزل ابه.. واضح ان بوسيف بيفضي رشاشه لايتروع الولد..
شاهين:ابك خله يتعلم على سلوم الرجال وعلومها..
جمان:لاشاهين اصبر.. وش سلومها وفعولها.. توه الولد.. مافي اذانه غير تغريدات الطويرات نجيبه عند رشاش يرعد..
قطعت كلامها متأثره:
ياعمري ابوي وعمي طالعين بره.. ياجعلني افداهم..
شاهين :والله مادمرك علي الا هم.. ولا المفروض يستقبلونك بعقله على ظهرك..
وصلها صوت ترحيب ابوها وهو يرمي في الهواء..

افتحت الباب قبل توقف السيارة.. ركضت وارتمت فاحضان ابوها.. باست راسه وخشمه ولحيته.. ونزلت على كفه :
ارضى علي يبه.. ارضى علي.. ياجعلني قبلك..
كان ضامها بذراع.. وهي تبعثر دموعها وشوقها على صدره..
التقط نواف السلاح من ابوه.. اللي عانق جمان بكلتا ذراعيه: راضي عنك يابوك راضي.. ومزين الافعال يستاهل ماجاه.. وان رجع وعادها يبشر بطب مني يبري العله..
ضحكت وهي تمسح دموعها.. وعمها يأيد ابوها :
انتي جيتي.. والله يابنت سعود.. ان ضامك هالهيس.. مايبرد كبدك فيه الا انا.. لااقص اذنيه وارميها لتسلاب الضاله..
راحت حبت راسه وكفه:ياجعلك ذخر ياعمي..
شاهين  جاء وشايل فهد:
هذا وانت مادريت انها جابت سميك ذا حكيك.. وشلون بعد لو تدري..
صدمه في وجه الشيبان وسلمى وجمان تسلم عليها وتبوس راسها.. وهي تتشبث فيها:
يقوله صادق..!!!
شاهين وهو يمد فهد لابوه:
سميك يبه.. سم عليه.. وخله يحب خشمك..

فهد بدهشه وفرحه.. وبلعثمه متأثره وهو يلتقط الصغير:ماشاء الله.. ماشاء الله.. بسم الله عليه وحوله..

تهالك سعود على كرسي قريب من هول المفاجئه وهو يردد :
ياقو باسك يابنت سعود.. ياقووه..!..

بعد ماسلمت عليهم كلهم.. باللهفة تشبثت في مهره: وين امي مهره..لاتقولون طلعت من البيت..
ابتسمت وهي تدخل معها:
ماطلعت.. بس راحت قسم النساء..تعرفين شوي زعلانه..
جمان وهي ترمي الشيله على كتوفها :ام سيف ماتمزح.. زعلانه وزعلها كايد..
التفتوا جهة الباب على صوت بلقيس المنهارة على شكل فهد..
غمزت لها مهره:
في شي تتشفعين ابه.. روحي لها وفالك الرضا..
توجهت جمان لحيث امها..فتحت الباب بخفوت يطل لمجلس واسع..
'وجدتها هناك.. على كرسي منفرد.. تقبع شامخه.. متشاغله بهاتفها.. وكأن مايحدث من قدومي لايعنيها..
بل سمعت خطواتي.. ولاترفع عينها..
امي وحنانها البالغ.. وجفائها الأبلغ.. مع الزمن اخذت جفاء ابي واعطته حنانها..!

ابي وضع لي الاعذار..
اما هي.. وضعت بي ألف عله واهمال..
بخفوت دامع:
يمه.. انا جيت..
مارفعت عينها..وبجفاء :لاهلا ولامرحبا..
توسعت عيون جمان وهي تجثي عندها وتمسك كفوفها:
يمه تكفين... سامحيني.. والله اللي صار غصب عني.. شاهين ذل قلبي وهامتي..يعني يرضيك اظل كذا ولا ارد اعتباري..
امها بجفاء:وتعاقبينا كلنا.. مالك عندي عذر..
جمان بحرقه تملي كفوفها قُبل :
بلقى لي عندك عذر.. اما بيمين القلب ولايساره.. انا جمانك يمه..قلبك مايشيل علي..
موضي بنفس الجفاء: والله ماعرفت اربيك على هالفعله السوداء.. والله ماعرفت اربيك..
كثفت بوسات على كفوفها وبترجي:
خدي تحت رجلك يمه.. ربيني من جديد.. بس تكفين.. الا زعلك..
طالعتها موضي كيف تترجاها.. وجمان شخصيتها ماتشابهها الا هي.. تكابر وماتتذلل لاحد.. حتى لها ولا لابوها..!
تدري موضي انها ماطاحت تحت رجولها الا تبي الرضى ونادمه..
امسكت نفسها وبعتب :
يومك عزمتي على فعلك.. مامر بخاطرك بناتك.. ماوجعك قلبك عليهم.. ماحطيتي في بالك حالهم ويتمهم دونك..
بكت جمان بنحيب:
والله يايمه موجوعه وقلبي متقطع.. لاتزيدينها علي.. ترى قلبي ماعاد به قوه وحيل..
موضي بقسوه:شفتي وجيهم.. شلون ضعفت.. شفتي يد ديم كيف معلقه ومكسورة. دريتي عن شهادة بيان وكيف انجحت بالدف.. ياعمري عيونهم ضايعه ودموعهم قريبه.. انتي وش ياجمان.. وش.. ماتحسين.. كيف طاوعك قلبك على عيالك... كيف عشتي.. كيف مرت الايام وانتي ماتحنين على صوتهم حتى..

جمان بنحيب وهي تتشبث وتخبي وجهها بحجر امها:
انذبحت يمه بدونهم والله.. الايام كانت ماتمر الا علقم وحنضل.. مر يمه مر.. بس انا كنت مجروحه وقلبي محروق..
صاحت فيها :
الأم تدوس الشوك .. تتجرع الضيم والظلم ولاتكسر ضناها.. ما انتي أم ياجمين.. ولاعرفتي الامومه..
جمان تأشر على صدرها:
ام يمه ام.. ماذبحني الا عيالي وماصبرت على شاهين الا في جلايلهم..
صاحت امها فيها بقهر :
روحي لمرت اخوك تعلمك شالامومه.. روحي شوفي اخوك وش فعل فيها.. واصبرت عشان ورع ماطلع ولانبت من روحها.. ذيك ام ولا انتي تهبين... دستي على روسهم وصلبتي طولك..!!

وبتسائل متهكم:اثبتي وجودك.. رفعتي هامتك.. خذتي حقك.. سامحتي رجلتس.. سامحك هو.. روحي له عساكم بألف عافيه.. والله يهنيكم.. بس والله ان روحي وخاطري قافلن عليتس..

انهارت وهي تستسمح منها.. مهره  كانت تسمع.. مسكت ضلوعها بقوه مع كلام موضي..
جاها صوت سيف:
وراك ..؟!
بخفوت موجوع:
ياكبر زعل امي ياكبره..ياعمري جمان ماتت بكى..
ابتسم بخفوت :ماعليك.. نراضيها.. روحي فهد عند خالتي سلمى جيبيه..
مهره:تمام..
دخل :خفي عليها يمه.. تراها جاتك فرد وجيتها جماعه..
التفتت جمان له:انا فوجهك يابوفارس توسط لي.. امي مسوده الخاطر علي..
صدت موضي..
وجمان توقف وتضم ذراع سيف :
يمه جبت لك جاهتي وشيوخي  اعرف ان سيف كلمته عندك ماتنزل..انا اخطيت ومنك العفو..

موضي بجفا:ماحنا بساحة قصاص.. روحي اذلفي مع جاهتك.. واطلعوا بره..
ضحك سيف :افااا..
جمان بسرعه:الا  يمه.. اذا مارضيتي.. انا  بأعتبرها قضية دم.. وش بغيتي.. ديه..والله نسوقها لك سوق..
انتبهت لهمس مهره عند الباب..
التفتت وراحت بسرعه خذت منها فهد ومهره تقول :
هذا اللي بيجيب الضايعه..
ابتسمت جمان بتفائل..
وراحت لامها وهي صاده بالجهه الثانيه.. وحطت فهد بحضنها وبخفوت:
هذا ديتي.. عاد اذا مارضيتي..
وقبل ماتكمل.. موضي عينها فحضنها.. توسعت عيونها..وكأنها جليد وذابت..وهي تمتلي بالدمع وجمان تتركه وموضي تلتقطه بسرعه عن يطيح  :
وش ذااا.. وش ذااا.. يالله رحمتك..

جمان بفرح وتضحك:ولدي يمه.. فهد ..مايقولون من طول الغيبات جاب الغنايم.. وهذي غنايمي..
موضي رفعت عيونها وبدموع:
لا اسمع حسك وتضحكين بعد. .. تستهبلين.. وش هالخبال يابنت سعود.. سيف.. ذا ولد..انت شفته..ذا منهو عليه.. هو لها ولا جايبينه تدودهوني فيه..
ابتسم :ايه يمه.. ولد هالخبله..يومها راحت كانت حامل..
جمان :ايش رايك بالانتاج بس..!
انهرتها موضي:قلت لتس انطمي ياجمين.. دام  النفس عليك طيبه..
مهره سحبتها وبخفوت:
عطي سداح فرصه.. واضح واسطة هالنقطه.. اقوى من واسطة طوال الشوارب..
موضي ضمته وشمته.. تسمي عليه وتصلي على النبي..
وكل مافي خاطرها..
كيف.. كيف كانت لحالها.. بهالمسؤولية.. والوجع..!

سيف رفع حاجب:
نقول طاح الحطب..
موضي بتنهيده وكبرياء:
بس قل لها..ان عادت هالفصل.. انا اللي ازوج شاهين. شيخة قوم.. اذا هي بنتي.. شاهين ولدي..
ضحك سيف:يعني رضيتي..
رفعت عيونها لجمان وهي تناظرها ملهوفه:
جابت لنا رضاوة ماتنرد.. نستنا قشر الافعال..
جمان راحت ضمتها وباست راسها وخدودها:
ياااااابعدهم..
مهره وسيف يناظرونهم ويضحكون.. وجمان كنها طفله وهي تجنن موضي بالبوسات في كل مكان..

*****