رواية مبعثر فيك ماللحزن لايشفى الفصل السادس 6 - بقلم ايمان يوسف🕊️

البارت السادس

العصر .. بيت سعود ..

اجواء الاستعدادت للحفل .. والبنات يستعدون
بوجود ميك اب ارتست ..
خوات سعود حليمه ومنال وبناتهم موجدات.. معهم بالبيت .

ولازم يوضحون قدامهم ان الزواج ماشي طبيعي ..
مهره خلصت وقت المغرب ..
جمان : ألبسي .. المصورة بالطريق .. احنا بنمشي المزرعة .. لاخلصتوا يجيبك سيف ..
توسعت عيونها وبخفوت : اي مصوره .. جمان وش فيكم .. صور جوال ونمشي ..
سحبتها : لايسمعونك عماتي .. خلي الأمور طبيعية .. ترى سيف محذر ..
مهره مسكت جبينها بوهقة : وين حطيتي فستاني طيب ..
جمان : بغرفة سيف ..
شهقت : لا عاد أوفر .. يوكارتك..
اشرت لها جمان يعني قصري حسك ..
مهره بخفوت : اوفر .. روحي هاتيه ..
جمان برواقة: سيف قال لي اخلي اغراضك هناك ..
مهره سحبت جمان بره الغرفه التي حولت صالون : امانه جمان قدري موقفي .. روحي جيبي الفستان .. ولابلبس اي زفت غيره ..
جمان تمد صبعها وتمسح شي تحت عين مهره .. وبلامبالاه :
لاطولينها وروحي قبل يجي سيف دامه ماهو هنا .. يمديك تبدلين .. ترى ان جاء بتبدلين وهو يناظر فيك .. اعرف اخوي وقواية عينه ..
توسعت عيون مهره : نعم ..!
ابتسمت جمان : روحي فديتك .. خلنا نشوف كشختك قبل نمشي ..
مهره بميك اب ناعم جميل .. آلاينر ابرز عيونها .. وشعرها مصلح بشكل مره حلو .. لابسه روب ابيض لنص الساق .. ربطت الروب بقوة وتوتر ..
وراحت بسرعة وهي تحلطم ..
تلبس بسرعه قبل يجي .. افضل لها
وبس وصلت لباب غرفته ..
اتصلت جمان عليه :الجميل صار بالغرفه ..!
.
.

دخلت مهره .. غرفة جلوس صغيرة دارت بعيونها مالقت شي .. عبرت باب الغرفة المفتوح ..
ارتجفت سيقانها .. لبرودة المكان والموقف .. ريحة عود .. وعطر سيف المميز مسيطر على الأجواء..

طاحت عينها على بشته الاسود مسفط بترتيب على الأريكة ..
ارتجفت اكثر ..
هي اشترت فستان تيفاني .. اذا بشته هنا .. والشماعة ماعليها شي .. وين فستاني ..
تراجعت على ورى للخروج ..
تفاجئت فيه واقف عند الباب وساند كفه ورافع حاجب : وين رايحه .. ؟!
شهقت وهي ترجع على ورى ..
خطى داخل الغرفة .. ومهره ابعدت خطوه لا إرادي .. وبالعثمه :
بروح اشوف جمان .. قالت انها حطت فستاني فيذا .. وماشوفه..
سيف : تقصدين هالاخضر مادري السماوي ..
مهره تصلح المعلومة: تيفاني ..!
سيف : اللي هو .. الحين قايل لك البسي ابيض..
مهره بوهقة : بس .. بس..المهم ان خلاص شريناه .. بروح اسئل جمان .. وين حطته..
دخل واغلق الباب ..
مهره فجأه حست قلبها وقع في الأرض ..
مشى سيف ناحيتها ..
تأمل زينتها الناعمة .. وشعرها الجميل ..شكلها بالروب يهوس ..
تعداها .. وراح غرفة الخزاين : فستانك اللي شريتيه كويس .. بس ممكن تخليه لمناسبه ثانية ..
طلع بيده فستان ابيض .. ناعم .. وراقي ..وباين من براند فرنسي ..
توسعت عيونها حطت كفها على فمها ..

سيف:مهره .. انا صدق تزوجت بعد نجود زواجات عابرة .. بس للمره الأولى بعدها اتزوج زواج مُعلن.. وبتحضر العايلة.. ابيك تظهرين بصورة زوجتي .. بتفاصيل سيف ..'داعبها'ارفعي استحقاقك...
مهره شتت نظرها :
ليه يعني ذوقي .. مايناسب مستوى حضرتك ..
قرب منها وحط الفستان ع السرير .. قرب منها وهمس :
تستهبلين ..
رفعت عينها له .. وبنظرة ماتقصدها .. كانت تعاتب بعفوية :
كلامك هذا معناه ..
ابتسم .. والواضح ان نظرات مهره .. بتكون صعبة عليه وعلى جوارحه.. همس :
انتي وش فيك مايعجب.. ورب الكعبة .. كل مافيك يذبح ..
خفق قلبها بتسارع .. لهذا الغزل الصريح .. والتزمت الصمت وعينها في الارض .. همس : نفسي تلبسين الفستان اللي جبته لك .. ترى موصي عليه من لندن .. زين وصل اليوم ..
بدهشه : الله .. لندن .. ! .. تبالغ سيف ..
سيف : مابالغ .. انا ابي هالشي .. وسويته..
مهره بحيرة : ليه .. سيف .. ليه ..
احتار اكثر من حيرتها:
مادري .. صدقيني لو دريت قلت لك .. خذيه والبسيه ..
وشاله حطه بين يديها ..
تناظر الفستان وتناظره والتفتت بتطلع .. وقفها :
روحي بدلي بغرفة الخزاين ..اذا لبستي.. عندي شي بعطيك اياه..
شهقت : الله اكبر .. ابدل وانت في الغرفة .. سيف .. ياسيف .. ركز شوي ..

خذها دفعها من ظهرها الى غرفة التبديل .. غرزت مهره .. وبتوسل :
والله بلبس هناك واجي .. استحي ورب الكعبة ..
سيف بانفعال:
يابنت .. ماراح اطب عليك وانتي تبدلين .. ثقي فيني .. واخلصي ..
مهره بتوتر:طيب خلاص .. ابعد .. هناك ..
سيف بنفاذ صبر :ابشري ياعمه ..
مهره : طيب لاتقول عمه ..
سيف بعصبيه: بعد وش نسوي الظاهر لازم نتوطى لك .. عشان توافقين ..
مهره ببراءه: لا .. مو هذا قصدي ..
سيف اومئ براسه بتسائل ..
مهره بفهاوة: يعني لاتقولي عمه .. وتكبرني .. يخف لسانك عليها .. عاد يفكروني عمتك يالشايب ..
ناظرها ..ضاع .. هي تمزح .. تنكت .. ولا شفيها ..
والله تتكلم بجدية ..
سيف: من اللي يفكرونها عمتي ..؟!
مهره بكل ثقه : أنا ..يعني مين.؟!
( مهره في المواقف الصعبه تفقد التركيز وتضرب فيوزاتها) ..

سيف مو عارف التعليق السليم قدام عباطتها ..
خاصه انها انزرعت في فتحة غرفة الخزاين وواضح .. انها قامطه ..
بهدوء : مهره ادخلي بدلي خليني اشوف اذا هالشي عدل عليك .. ولاطولينها..
مهره مثل الشجرة المزروعة : طيب ..
انتظرها تروح ..
وهي والله مو ناوية تتحرك ..
سيف بتهديد : والله وقلت والله .. لو قلت ثلاثه وانتي فيذا .. لشلح عنك هالروب وانا البسك ..
توسعت عيونها .. وشهقت .. مجرد ثانيه .. قبل يعد .. اختفت من عنده ..

ابتعد وراح لركن فيه خزانه فتحها وبوسطها خزنه .. دخل ارقامها .. وفتحها .. طلع علبة مخمل .. ووحده ثانيه شكلها مميز ..
سمعها تهتف بعصبية :
وين فستاني .. ذا شكله ضيق ..
سيف وهو يطلع شي من الخزنة :
بلا كذب .. ترى حطيته على فسانك الازرق نفس المقاس ..
مهره بصوت عالي : تيفاني .. ماهو ازرق..
سيف يغلق الخزنه : صجيتي امي بهالتيفاني ..
انهارت مهره واضح توهقت : من جدك سيف .. يعني بداية السحاب صايره في ..
وسكتت وكانت بتطلع منها كلمه غلط .. وكملت بصرخه : مايرقى ..
سيف داخ على اسلوبها .. مهره مع ربكتها من الموقف .. صايره تقط قطات .. عجيبة ..
مسك ضحكته:وش اللي مايرقى ..
مهره بتبكي وتصيح : السحاب سيف .. الفستان منقسم نصين .. ومايبي يجتمع ..كلم جمان تجيب لي الثاني ..
سيف قرب من غرفة التبديل : انا اقفله لك ..
مهره بفزع : لا والله .. ماتجي ..
سيف : لاتحلفين .. بجي .. ماراح نخلص.. مهره انتي راعية طويلة ..

دخل ومهره لصقت بظهرها في الجدار .. وبتحذير : سيف .. تكفى خلنا نتصرف بشكل حضاري ..
رفع حاجب : بقفله ..ماراح افتحه .. اكثر حضارية وبرستيج من كذا مافيه..
مهره بعصبية وتحذير : انا مايشوف ظهري الا اللي خلقه ..
سيف بدهشة وتهكم : الله أكبر .. ! ..
مهره وجهها شحب .. وبتوسل وبدت الدموع تتزاحم على عينها : خلاص سيف .. الفستان باين مو مقاسي .. وانا مالف ظهري لأحد .. لايتعكر جوي ..هات الثاني ..امانه سيف .. قدر موقفي ..
عقد حجاجه .. وهاله خوفها .. وارتياعها من الفكرة .. وبهمس يهديها :
طيب اهدي .. بقفل سحابك بس .. اذا ماتبين عادي .. اجيب لك جمان ولابلقيس ..
هزت راسها نفي بقوه : لا... والله مايجون .. ماحب اعطي ظهري لاحد .. انا كذا نفسية.. معقدة.. مادري .. مادري شفيني .. بس مارضى صدق ..

قرب منها وهي تلتصق اكثر بالجدار .. وبتوسل : سيف .. لاتكسر بخاطري .. انا جربت الفستان اللي قبل وعرفت اقفله لحالي .. (رفعت ذرعانها لوجهها وكنها تحمي نفسها منه ..غمضت عيونها بقوه وهلع) ..

سيف وخفقات قلبه تتسارع ..ماهذا الخوف ..
مهره كانت تذكرني بالحدود بيني وبينها .. لكني لم اتوقع .. ان السبب .. هذا الحُطام .. منظر مهره الآن..هي كومة حطام لحرب طاحنة.. لم تبقي شي ولاتذر ..
ويهرول لي السؤال ..
مالذي فعله عساف .. بهذه الروح المخضبة..
كادت مهره تحفر الجدار .. لتختبئ خلفه .. وهي تردد برجفه :
لاتقرب سيف .. عشاني .. خلاص سيف .. اتركني .. اتركني ..

مسك ذرعانها بلطف .. وابعدهم عن وجهها..همس:
يابنت .. والله مايجييك شي انتي مو راضيه عنه .. قلت والله .. ماراح اشوف ظهرك .. بس بقفل لك السحاب..
رفعت عيونها لعيونه ومتعلقة دمعه برمشها ..
رفع انامله .. ومسحها وابتسم:
انتبهي لايسيل الكحل ..
حركت رموشها ونزلت عيونها ..
سيف مرر يدينه من تحت ذرعانها .. ورى ظهرها ..
ولوهله .. التصقت بصدره .. بدون اعتراض .. وبدون لاحول ولاقوة ..
سيف جمع الفستان .. يغلق السحاب ببطئ ..
همس عند اذنها :قلت لك ماراح اشوف ..
رفعت عيونها الذباحه لسيف ..
سيف يغلق السحاب للنهايه :وكنت واثق ان المقاس صح عليك ..
مهره حطت كفوفها على صدره تبي تبعده شوي ..
بس هو ماتحرك ..
كان يستشعر رجفة كفوفها ..
وفي داخله ..(هي لي الآن .. هذه الروح المعذبة لي وحدي .. كيف ياربي .. امسح عمراً عاشته مع عساف .. وانسيها اياه.. )..!
همس وهو يبتعد عنها ويخرج:
انتظرك ..

وقفت مهره قدام مرايا .. طويلة .. انبهرت بشكلها .. بذاك الثوب الراقي ..
رتبته .. وطلعت له ..
التفت ..ابتسم بحنيه : يابنت ماحلاك .. طالعه اميرة..
ابتسمت بخجل .. واخفضت عيونها : صدق ..؟!
نادها : تعالي ..
راحت عنده .. جلسها ع الاريكه .. وجلس ع الطاوله المقابله .. تنهد:
مهره ابوي ..ماله داعي خوفك .. انا سندك ..انسي ماضيك .. وانسي اي شي ازعجك وغثك ..
سحب كفها ومسكها :
انا مو نبي ولارسول .. ولا انا الخالي من العيوب .. وادري .. انك لو بتحبين .. مو حابه شخص مثلي مزواج .. والحرمه عنده شكل وصورة .. ومزاج ..
انا خذتك وبعيد عن هالدافع.. انتي الوحيدة بعد نجود اللي ماخذتك عشان شهوة .. وحاجة .. ولا خذتك احبك .. ولا مفتون فيك مثل ماخذت نجود ..
انتي حاله مختلفة يامهره .. اقرب شعور مني لك .. شعوري بفارس .. ابي ادلعك .. ابي ابعد كل شر عنك .. ابي اشوفك مبسوطة وتضحكين .. ابي اكمل النقص بحياتك ..

مهره وكلماته تطبطب على روحها المريضة .. رفعت كفها الثانية وحطتها على كفه :
آسفه .. ردة فعلي غبيه وغريبه .. بس مو في يدي والله ..

سيف بحنيه : انا هنا يابوي .. الخوف ذا لايجيك وانا معك ..
ابتسمت:
احبك لاقلت يابوي .. تذكرني بابوي ..
سيف يرفع كفها ..مانتبهت وهو يلبسها الخاتم:
اجل شوفي يابوي .. عساه يعجبك ..
ناظرت الدبلة الماسية .. باستغراب .. وبدهشه: ماحسيت ..
سيف يحرك ابهامه .. على ظهر كفها وصبعها .. وابتسم :
انتي احسن اذا ماحسيتي ..
بعتب : ايش قصدك ..
سحب علبه من جنبه فتحها : هدية زواجك ..

طقم ناعم وفخم ..
مهره بإحراج: لاسيف كثير والله .. جد جد .. انت تبالغ..
مارد عليها .. قفل العلبه .. وحطها بحضنها ..
وخذ العلبة الثانية..و قبل يفتحها : الطقم والخاتم .. كيفك فيهم .. لك ..حتى لو ترمينهم .. هذا لك .. بس اذا خلصتي منه .. جيبيه حطيه بالتجوري ..
مهره استغربت : وشو ذا ..
فتح العلبه وبان تاج راقي .. تصميمه فريد .. همست بانبهار:
ياويلي..يجنن .. !
(سيف ماحب يقول لها اي تفاصيل عنه .. لان خاف ماتلبسه .. وتحس بالمسؤولية .. )
ارفعه : الصوره اللي ابيك اليوم عليها اميرة .. والاميرة بعرسها يلبسونها تاج ..
مهره ضمت كفوفها ..
وامتلت عيونها دموع ..
ياربي اني استودعتك قلبي .. من هذا الرجل .. ومنطوقه .. وتفاصيله ..
رفع التاج وحطه فوق راسها .. وبتهكم يمازحها: حركات الانجليز .. ماناقصنا الا البابا يجي .. يبارك لنا .. ويعلنا عريس وعروسه..
ضحكت تستشعر ثقل التاج :
حدك متأثر بالأجانب..

بالحديقة بره .. فارس واقف عند شاهين .. وماسك يد سيف الصغير .. رافع راسه يناظرهم ومو فاهم الحوار ..
فارس بندم : والله ياخالي طاح وجهي ..يعني هو لو ضاربني اهون ..
شاهين : ياخالي..مالك في القهاوي .. ماوراها الا جمعات زفت .. وتجرك للعفن والخراب ..
فارس : والله بس معسل .. هذا انت ونواف تعسلون طيب .. ..
شاهين : ابتلينا .. توك صغير لاتبلي روحك .. بس افحمك ابوك جايك باسلوب دوبلوماسي ..
وضحك ..
فارس : وانا وش غابني.. هو بالعاده يكفخني .. واحس بالظليمة مهما سويت .. الحين حاس ان قلبي عليه جبل ..
شاهين يعبث بشعر فارس :
سلامة قلبك ياعينه .. وسع صدرك وانا خالك...كل شي الا ضيقك ياولد الغاليه..
ابتسم فارس..
وسيف سحب كفه: فالس ابي ألوح ماما..
فارس :بتنزل الحين مع ابوي .. مايصلح نروح لهم ..
سيف بعصبية: ابي ألوح لها .. بوي يتكها .. ألوح لها فالس .. ألوح ..
شاهين باستنكار :
وش هادم اللذات ذا .. عز الله .. قضت ليلتك ياسيف ..
ضحك فارس : المفروض بينام معي الليله .. الله يستر لارميه مع الدريشه ..
شاهين : ياولد ضبط ابوك .. شغله .. الله يشغل عدونا ..
صاح سيف : الوح ماما..
فارس : لاتفكره مثل بناتك .. ذا سلالة عساف .. كل اطباعه معفنه .. مثله ..
شاهين : ياوجه الله ..
سيف يسحب فيه ..
فارس بستسلام : بروح معه .. يشوف امه .. وننزل نمشي معكم ..
شاهين : على خير يابوي ..

.
.

فــارس دخل جناح ابوه .. دق الباب ..
سيف : هلا..؟!
فارس : عيالكم ..
سيف بترحاب: حياكم يبه ..
دخلوا ..
وطاحت عيونهم على مهره واقفة .. بشكل ساحر خلاب ..
فارس بانبهار: واااو ..
سيف انصدم وتغير لونه .. واول مره يشوف امه بهالصورة ..
مهره تمد يدها : تعال سيف .. حلوه ماما ..؟!
سيف تنح .. مذهول ..
فارس : شفيه تشنج ..
مهره : مستغرب علي المكياج واللبس ..اول مره يشوفني بهالصورة ..
سيف ألتصق برجول فارس .. وبخوف وتوتر : حووفين ماااما .. (تخوفين ماما ههههههههههههههههههههههههههههههههههههههههههههه)
فارس وسيف انصدموا .. ومهره انفجرت ضحك : يامعفن كل هالكشخه واخوف ..
سيف : ماعندك ذوق انا اشهد .. يقولون اللي مايعرف الصقر يشويه ..
مهره راحت قربت منه : سيفي .. شوفني ..حلوه ..

جلست نص ركبه عنده .. وبكياته تفرجه : شوف علي تاج نفس الملكة .. وفستاني حلو..
سيف يفتح ويغمض .. .. ويناظر بوجهها .. ومد يده بتردد .. يلمس شعرها ..بعدين حلقها .. قال بانبهار : ماما .. انتي فوزون ..
سيف : منهي ..!
مهره تخاطب ولدها بابتسامه حلوه: مين احلى .. انا ولا فروزن .. ؟!
ضحك فارس : واللهِ تحطين فروزن بجيبك ..
رفعت مهره راسها له : بالله فارس .. لاتخلي الريشه تطلع ..
فارس : طلعيها .. في ذمتي .. انك مزيونة.. ماعندك اخت صغيره .. احجزها ..
سيف يعدل غترته : فارس خف لا خلي حرمتي تغشى منك ..
فارس بإعتراض: خير خير .. الشرع يقول حرمة الابو ماتغشى من عيال زوجها .. كان خليت نوف وهيا يتغشون .. مهره انا شايفها قبلك ..
ضحكت : اي والله .. ذا ورعي الحين .. ولدي .. غش حريمك انا ماتغشى عنه ..
ناظرها سيف بنص عيون :
والله كملت .. والكامل وجهه ..
فارس شاف البشت .. توسعت عيونه وبدهشة : لااا.. له له .. بتلبسه .. ؟!!
شاله سيف .. فله وفرده على كتوفه.. والتفت يرتبه ..

مهره وفارس .. اثنينهم عيونهم تلمع .. مأخوذين بسيف ورزته ..
فارس بانفعال: في ذمتي انك امير ..
سيف ناظر مهره ببتسامه فتاكه : اخليه ولا اشيله ..
حمرت ..
واللحظه فريده .. لم ترتدي الأبيض مع عساف .. ولاهو لبس بشت ..
همست بخجل : خله .. احنا قايلين بنصور وانت لابسه ..
فارس رفع حاجب وبتهديد وضحك: والله بتجيكم الساحرة وبوفارس الحين .. ويمحطونكم اثنينكم ..
ضحكت مهره :
لايحوشك .. الهجيج...

*****
صالة المزرعة زُينت بشكل راقي بالورد والطاولات والضيافات والشمعدان.. الجميع اعجب بمهره .. وباركوا الزواج..
بنات العائله .. في حوار :راح عليك يالُجين .. يوم عزم على زواج صدقي .. خذ حرمة عساف ..

لُجين منقهره ..تناظر مهره: عاد وش لقى فيها .. ارملة وعليها ولد ..ويقولون عايشة بمزرعه مع جدتها ..
اروى تقهرها : عيونها تكفي يابنت خالتي ... البنت جميلة .. وتخزبق..
لجين : انتوا لو تشوفون سنجاب يمشي قلتوا جميل ..
شيخه :الله يالقهر عامل عمايله فيك ..ماشاء الله .. شوفيها وشوفي اختها .. مُزز ..

مهره جنب زينه .. وماسكه البكاء : ماترد زينه .. حتى مشعل مايرد .. ماراح تجي ..
زينه:
طيب واذا ماجات تضيقين صدرك كذا .. ابتسمي .. والله اللي يشوفك بيقول غاصبينها ..
مهره بعصبيه : ياشيخه بلعنه.. ابي سندس .. جيبوا سندس ..
ومن رُكن هناك
طلت غنى ..!!!

تلك الصغيرة تشبه مهره اكثر من امها .. لونها كالعسل .. وعيونها واسعة مُلفته ..
في الرابعه من عمرها ..
بفستان جعلها كالدمى ..
وبين يديها باقة ورد هائلة .. تحملها بصعوبة ..

مهره .. وعيونها تدور وتبحث عن زول سندس ..
وقعت على غنى .. !
شهقت وخلاص لمعت عيونها .. انهمرت دموعها وهي تشوف سندس وراها .. بكامل اناقتها وزينتها ..
ومعهم جُمان .. والواضح انها هي اللي استقبلتها ..
مهره راحت بسرعه لاختها وباللهفه ضمتها : ياحيوانة .. وربي قلت ماراح تجين ..
سندس تضمها بدورها : وانا اقدر فيتس يالنزغه ..
مهره باحتضان قوي : احبك سندس .. الله لايحرمني منك انتي حزامي والسند اي والله...
سندس تحاول الإمساك بدموعها :
ياعين اختك يامهير..

*******
*فارس .. يصور ابوه .. وذاك مايدري ..مبسوط على ابتسامته .. جاء جلس جنبه .. ورفع الجوال :
سيلفي يابوفارس ..
عطى سيف نظرة معه وخذ صوره وراح باس خشمه :
يابعد روحي انت ..
سيف سرح بوجه فارس .. وهو يكتب تعليق على الصورة..
وتوه بيقوم الا مسك يده ورجعه جنبه ..
فارس باستغراب : وش .. يبه ..؟!
سيف : الحين انت مبسوط صدق .. ولا بس تسوي كذا عشاني ..
فارس رفع حاجب : وش ذا السؤال ..؟!
سيف رجع على ورى ويحرك سبحته :
يعني انا اتزوج واخلص اموري بعيد عنك .. هالمره مختلف .. والله يافارس شايل هم خاطرك ..
ابتسم : والله .. والله ورب الكعبه .. ان فرحتي بذا اليوم ماتشيلها جبال ..
سيف : اكيد ياعين ابوك ؟!
فارس :اكيدين يابعدهم ..
.
.
.
سيف الصغير ملبسينه ثوب ولاصق عند جده .. سعود جداً سعيد بهالمناسبة ..
يكلم نواف :ماناقصنا الا وجودك يابوك ..الفال لك ..
نواف : افرح يبه بسيف .. انا باقي .. في اشياء كثير ببالي .. لاحق على العرس ..
ضحك : انت تعال .. وامصع اذانك واعرسك ..
ضحك نواف: انت لو تامر بقول تم .. بس عارفك ماتغصبني..وتلزمني وانا عايف العرس هالحين...
ابوه بحنيه : الله يمد لي في العمر .. واشوف ربي عطاك حتى ارضاك .. مثل مانت راضيني يايبه ..
نواف :جعل عمرك طويل يابعد راسي..
.
.
.

شاهين بالجوال : اكيد مت عليها .. عندك اعتراض ..
غاده بقهر : الحين تحبني .. وتغازل فيها ..
شاهين ببرود : انتي سألتي .. اذا حلوه جمان الليله ولا .. تبين اكذب عليك .. واقول لا .. جمان جمالها ماحد ينكره ياغاده .. واذا ماشفتيها شفتي بناتي .. تراه يشبهونها..
غاده : ودامك ميت عليها لذي الدرجة .. ليش متعلق فيني .. وماسكني من حلقي..
شاهين بهدوء : شسوي احبك .. حتى لو جمان احلى منك ..
غاده بغضب : ايش جوك شاهين .. قل ابتليت بحبك وانتي شينة ومابك حلى ..
ضحك : والله ماقلتها .. حلوه .. بس امزح معك .. ابي نتلاقى .. متى تقدرين ..
غاده تفكر : نشوف بكره ..او بعده .. في نفس الكوفي ..
شاهين : تمام .. ماشي .. انتبهي لنفسك ..

اغلق .. وشرد في نقطه .. واقف عند سيارته ويدخن ..
(مايكذب .. جمان اجمل من غاده بمراحل .. بس القلب ينبض لغاده .. غاده اللي عجز يقنعها بالزواج .. رافضه الفكره .. لمن يطلق جمان .. وهالشي مستحيل .. رغم جفا جمان .. وبُعدها عنه ومعرفتها بمكالماته وحبه لغاده .. الا انه مايقدر يفرط فيها .. يمكن لانها ام بناته .. يمكن .. !!
يجي له شي يقول .. بيعيشون .. وماراح ينقصهم شي .. بس عجز يخطي خطوة طلاق .. مايتخيل .. ينفصل عن جمان .. مايحبها .. لكن لايتخيل خروحها من ذمته ..! )

*****
سيف الصغير .. شاف مشعل يدخل .. ترك جده .. وركض عنده بانتماء عجيب .. ضحك مشعل وهو يشيله :
هلا بك يبه ..هلا ياعين جدي..
سيف يبوس خشمه .. ويقلد كلام مشعل الشمالي :
وحستني ملي ..
ضحك مشعل : يا بعد حيي وميتي..
راح مشعل يسلم على الرجال وهو شايله ..
سعود ببشاشه:
واضح ان ولدنا متعلقن فيك يامشعل ..
مشعل بابتسامه:ولدي سيف فديت روحه ..
سيف يسلم على مشعل .. ويشوف سيف كيف ضام رقبتة :
والله تعرف من تتعلق به .. اوريك يالنتفه ..
سيف ضام مشعل ولارد على سيف ..
فارس : واضح يبه ان سيف حاقدن عليك ..
مشعل : افا .. ليش ..؟!
سيف بنص عيون لسيف الصغير : انزل خنقت الرجال ..
سيف يتشبك في مشعل وعقد حجاجه : مابي ..

*****
هيا عند الشاطئ .. تحدق في البحر .. المُظلم .. والنجوم المنتشرة في السماء .. وضامه نفسها بذرعانها ..
*احببته حقاً.. لكن كنت اطرد وراء سراب .. اتخيل كيف لقائي الأول به ..
كنت في قسم العلاقات العامة .. في عملي ..وكان سيف عميل .. جاء بشكوى .. اذكر ورغم جرئتي وانطلاقي .. تلعثمت امام .. اسلوبه وهيبته .. وافحمني في شكوته ضد الشركة .. هادئ .. رغم حدته ..وفي ذاك اليوم وقعت في ذاك الرجل ..*

قاطعتها لولوه من افكارها : وين وصلتي ..
تنهدت : اليوم زواجه .. يالولوه ..مادري متضايقه شوي..
لولوه : المفروض مايضايقك هالشي .. خله يدقر نوف مثل مادقرك ..
هيا ضحكت بمرار: لولوه .. كل مره اقابل سيف افكر .. انه قرب مني .. والواقع يبتعد اكثر .. وش ذنبي اذا انا رضيت فيه مسيار ..
لولوه : الواقع هيا .. انتي بعد وفاة محمد قمتي تخبطين .. وحتى الفرص اللي جاتك الشايب .. واللي برقبته عيال .. سيف كان بعمرك .. وانتي اصلاً ميته عليه وقاضيه ..
هيا رفعت راسها تداري دموعها :
ليتني مارضيت .. ليتني اقنعته بزواج صحيح مو المسخره هذي ..
لولوه : هيا اقنعتيه ومارضى ..الحياه قدامك .. اطلقي .. ولاتظلين معلقه كذا ..

تنهدت :مادري لولوه .. سيف مو شخص تعيشين معه ..وتقدرين تتركينه بسهولة..
لولوه : يابنتي .. على ايش .. من الاحتواء .. ولا الحب اللي هاريك فيه .. انسان اناني توقف عنده الزمن على نقطه .. والله لو زوجته المتوفية .. من الحور العين ..
هيا: مادري ياخيتي .. الدنيا مع سيف بتاخذني على وين .. ؟!

*****
نوف .. فاتحة سناب فارس .. صورة لسيف وهو مقفي والبشت على كتوفه .. ويده تزينها سبحه .. مرفوعه عند عقاله ..
ومكتوب بيت
‏يسعد مساك وحقق الله امانيك
‏يانبض قلبي ياغلاه ورصيده
‏
‏قبضت الجوال .. بغضب وحنق .. وهي تشوف باقي الصور ..
سيف طالع يجنن .. امير .. لبس البشت على اكتافه .. وهو اللي كان يقول آخر عهده فيه بعرسه على نجود ..
من تكون هذي..
عشانها لبسه ..
يقول ارملة اخوه ..
وحد يحتفي كذا على زواجه من ارملة اخوه ..!!
بكت بقهر .. ولامت نفسها .. من شروط سيف .. الزواج بهالطريقه .. وانها مالها دخل بحياته .. لو تزوج بعدها هو حر .. لو طلق هو حر .. كانت تبي تتزوج وبس .. وكان سيف بحجمه المادي ..و وسامته .. كفيل بغض البصر .. !
لكنها تعلقت فيه وكبر في قلبها .. ولعنت حظها .. وياشينه حظ ..

*****
سيارة شاهين.. راجعين من الحفل .. جمان جنبه ..وبناته والعاملة ورى ..

من شوي وآخر مابقى في المجلس عمه سعود وسيف وفارس وهو ..
جات جمان لتبارك لابوها قبل تمشي ..

*تعلقتها عيني .. حتى كدت افترسها .. بثوب برغندي قاتم يميل للسواد جعل من لونها وبشرتها .. شيء يثير جنوني .. ويحولني الى فتات ..
جميلة جمان بحجم تخبطاتي ..
جميلة جمان بحجم المسافة التي لا استطيع تخطيها ..
تكبلني عن المضي او التراجع ..
قويةولعينة.. عاشقه لي امام الجميع .. نافرة مني وحدنا .. لاتتركني اعيش بسلام .. ولا تأخذني زوجها بالرحمه والموده ..
لما لاتُقدر سنيننا .. وايامنا الماضية..
وتُقدر ان لايد لي على القلب ..لما لاتستوعب اني لا اتركها رغم عشقي لغاده ..
التي لا اطالها والسبب وجودها في حياتي ..
مازالت رائحتها تلتصق بي .. وقد دخلت المجلس .. وسلمت على عمي وسيف .. واختارت المكان جانبي .. لتلتصق بي بدلال :
عاد يبه لاتبالغ .. مافيه حلوين مثلي انا وشاهين ..
ضمت ذراعي .. وبغنج احرقني هناك واحالني رماد :
ولا شاهين ..؟!
سقطت عيني .. في سحرها الشائك .. ولاتفصلني عنها الا سانتي مترات :
ماحد يجارينا ياعمي .. ولا يوصل مواصلينا .. في هالدنيا أحد ..
صفر فارس باصابعه : يالبيه ...خالي طلع خروف.. !
شاهين بتقريع :تعقب .. 'وبتعزوي' اخو نجيد ..!
ضحك فارس:مزوح ..مزوح..لاتشدها..

افاق من شروده .. على اغنية ابتدت من جواله الموصول بمسجلة السياره :
(مامل قلبك من زعلنا .. لين الحين .. بنموت واحنا ماعرفنا السعاده ..
حرام يعني بالرضا نعيش يومين ..ولا انت شاطر بالزعل والنكاده)

مد يده يطول .. وكانت اصابعها سباقه قصرتها .. بس ابعد يدها وطولها ..
وكانت الاغنية تعزف على الوتر الحساس ..
شاهين قلبه محروق .. مشتاق لها .. وهي صدودها شاهق .. وجبار ..
كانت تسمع الاغنيه .. وداخلها يذوب .. لكن ..!
خارجها كتلة جليد .. حتى رمشها لم يرف ..

وصلوا البيت ..
و في غرفة البنات مع لونا .. تبدل لبناتها وتلبسهم بجامات ..
بيان :ماما .. خاله مهره تجنن .. كذا عليها تاج .. نفس الملكة ..
جمان : يعني انا مو ملكة ..؟!
ديم تضم امها .. وهي ترفع سروالها وتلبسها اياه :
الا ماما انتي .. ملكه واميره وحلوه ..
باستها : ياعمري .. ياديم ..
بيان : ماما ليش فارس ماعنده ام .. وليش خالي سيف تزوج .. انتوا تقولون عمتي نجود .. اللي بالصوره هي زوجته ..
جمان: عمتك نجود .. مو موجوده الحين راحت عند الله .. خالك سيف .. مايصلح يظل لحاله .. عشان كذا تزوجها ..
بيان : ماما .. يعني اذا اختفيتي انتي .. بابا .. يتزوج .. عشان مايظل لحاله ..
شاهين واقف قريب من الغرفة ..
والحوار البريئ.. اشعره ببرودة القبور..
جمان: ليش لا .. الحياه كذا .. يابنتي ..
ديم تمسكت في امها بتملك وبأسلوب عصبي دفاعي :
لا بيان .. ماما .. حقنا .. بابا حقنا .. مابي .. مابي بيان .. ماما .. ماتروحين مكان .. ديم تبكي انتي تختفين .. والله ديم تبكي واجد ..

جمان وكفوف ديم تعتصرها ألم .. ابتسمت بحنية :
انا هنا .. امي .. مارحت مكان ..
بيان وهي شايله بجامتها .. ولونا تعلق الفستان:
طيب بعدي خلي ماما تلبسني ..
ديم متعلقة برقبة امها وبعدوانية: انتي تقولين بابا يتزوج .. انتي شريره بيان ماحبك ..
ضحكت جمان : خلاص ديم .. يا امي وش فيك فصلتي علينا ..

راح شاهين الغرفه ..
جلس على طرف السرير ..اخفى وجهه بكفوفه .. ضغط جبينه ..واطلق تنهيده حاره ..
بعد شوي .. دخلت .. توجهت للتسريحة وهي تشيل الحلق : مانمت .. ؟!
حدق فيها ..والله لو اني حجر .. لو انها معي وهي موحلال .. ان كان حتى الحرام سويته ..
ياناس جمان .. وزوجتي .. يتقفل علينا باب .. انفاسنا تجمعها غرفة .. انا على السرير وهي على الكنبة ..
لست براهب .. احيان يخرج الشيطان بداخلي .. وتتملكني تلك النافرة مني .. فأطحنها بين ضلوعي.. واخذها من عنادها عنوه ..
تتحاشى ثوراتي .. لكن .. !
انا لا استطيع كبح نفسي .. وشغفي بها ..
جمان تشعر ان عينا شاهين يحرقان عنقها وظهرها .. وهو ساكت ..
راحت تشيل الطقم بسرعة.. تبي تبدل وتستر نفسها عن عيونه ..
ولسوء الحظ .. شبك مفتاح العقد في شعرها .. حاولت تفكه ..
توترت وبتسحبه عنوة مستغنيه عن خصلتها العالقة .. مسك معصمها ومنعها : اتركيه ..
جمان : خلاص ابعد انا اشيله ..
شاهين يفك العقد من خصلتها.. وانامله تلامس عنقها .. الذي والله نقطة ضعفه وجنونه ..
جمان تكهربت .. وكل شعره بها وقفت .. آخر عهدهم في بعض من شهور .. ومن زمان وهي عاملة على نفسها درع من البُعد .. والبُعد .. تحاول تدخل الغرفه اذا نام .. وتصحى قبل يصحى ..
وجودهم في نفس الغرفة لأجل البنات .. وصورة العائله المثالية.. مايبونها تهتز قدام احد واولهم بيان وديم ..
فك العقد .. ومسك عنقها .. وبقرب موجع همس عند اذنها:
‏انا والله اني من وصالك لحقني جوع
‏تمناك قلبي منوه الماء على.. الضامي

حاولت تبعد .. بس اصابعه قبضت على مقدمة رقبتها وسحبها لصدره وبترجي :
ابيك جمان والله ابيك ..
جمان بعصبية: وانا مابيك .. فكني ..لاتخرب علي هالليله شاهين ..
ولم تشعر الا بفمه على عنقها ..احست ان اسنانه ستدميها ..
جمان ولم تغفل في السيارة.. عن اتصال غاده .. وكيف عطاها مشغول لتواجدهم ..
كيف يكلمها ويجيني ..!!
كيف يغازلها .. واعطيه اللي يبي .. !!

عرفت تبعد واجهته وبصياح :
خلاص شاهين .. ماعندي لك شي .. ياخي اتركني مابيك.. عايفتك .. مسألة انك تحب وحده هناك .. وتجيني لحاجتك .. تخليني احتقر نفسي .. ياخي احسني بنت ليل .. اكرمني وخلني في حالي ..

شاهين صاح في وجهها :
لا تقولين عن نفسك كذا .. والله اذبحك .. اذبحك جمان .. هاللفظ لاتقولينه على نفسك .. تراه يوجع ..
ضحكت بقهر ودموع :
يوجع .!!!!
اجل وش اللي يسويه فيني ..تبي غاده اتزوجها وفكني .. انت ماتقدر عليها هي .. وتجي الظاهر تشوفها فيني ..

انصدم من كلامها .. ولا عمره .. ولا في ثانيه شاف غاده فيها .. لاجاها يجي متشفق عليها هي ومشتاق .. جمان حاده .. تجرح نفسها قبل تطعنه ..

قرب منها : والله واللي خلق عيونك الجارحة .. ولاعمري شفت فيك غيرك .. جمان انتي في قلبي وروحي ..
جمان تبعد لمن اصدمت في الجدار :
القلب مايشيل ثنتين .. انت تحبها هي ولاتنكر ..
صاح في وجهها :
شسوي .. شيليها من خاطري .. ابعديها عن مخي .. عالجيني منها .. غاده شي نمى بقلبي الصغير وكبر .. مابي اكذب عليك واخدعك .. انا مو قادر اتخلص منها .. واشيلها من خاطري ..

صاحت : لاتعالج منها ولاتشيلها .. ولا لي مكان عندك ولا في خاطرك .. اذا هي مو هاين عليها نفسها وماتبي تزوجك وانا على ذمتك .. تبيني انا اسمح لنفسي .. ياخي على قد ماحبيتك .. كرهتك .. الله يلعن ساعة اجمعتني فيك .. روح لغاده خل تحرك فيك مثل ماتبي .. تخلت .. وارجعت .. لقيتها .. وبمزاجها ارجعت لك .. على الرجولة السلام والله ..

عقد حجاجة : ولد ابوي..!..قلتي اللي سمعته..ولاسمعي به شي..

مشت ناحيته متجهة لغرفة التبديل ..وقفت امامه بتحدي : قلت على الرجولة السلام..المراجل كايدة ياولد عمي...
وتوها بتروح .. مسك ذراعها .. وسحبها بعنف : جمان اسحبي كلامك ..
رفعت حاجب : ماخطيت عشان اسحب كلامي ..
بغضب : جمان لاطلعين جنوني .. اسحبي كلامك لا اكفر فيك ..
حاولت تسحب يدها وبحدة: ابعد عني .. تأخرت على ديم تبيني احكي لها قصه ..
مسك كتوفها ..حفرهم باصابعه : يلعنك ويلعن ديم .. اسحبي كلامك ..
صاحت : خلاص اتركني اوجعتني ..
بتحذير وغضب نهرها: جمان ..؟!!!!
رفعت عيونها لعيونه .. وبتحدي ومن بين اسنانها :
ايه بالله ما انت رجال .. وبنت هالكلاب لاعبتن فيك .. وش تبي تسوي .. بطلقني .. ابركها ساعة ..

"وفتحت على نفسي بوابة الجحيم .. واتى ذاك الثائر بكل سخطه وجنونه ..
وفتك بي .. افترسني بغضبه وعشقه .. بشوقه وبُعده ..
بكيت بانهيار..وانا احاول الإفلات .. من قُبلاته ويديه...
انتهك حُرمة جسدي..الذي اترفع به عنه.."

'ياربي اني اعشق شاهين فانزعه من قلبي .. بقدرتك يا أرحم الراحمين ..'

*****
مهره تطل من شرخ الباب .. وتناظر بلقيس .. في الصالة العلوية مع شيخه واروى ..

سيف بعد مابدل جاء في غرفة الجلوس في جناحه .. وشافها كيف تطل ..
ابتسم :
تراه مطولين .. ماينامون الحين ..
رجعت واغلقت الباب : طيب هم كانوا بيظلون بالمزرعة .. وش جابهم ..
سيف جلس : بلقيس .. لزمت عليهم .. هي صداقه مع بنات حليمه ..
مهره متوترة ..كانت بدلت لابسه قميص قطني قصير كيوت : طيب سيف يمكن يغث فارس .. كلم بلقيس .. قل لها تفض الجلسة وكذا .. ترى دايخه ابي انام ..
جلس على اريكه واسعه: سيف نايم .. تو مقفل من فارس ..ماله داعي تقروشين عشانه..

قال كذا وفتح الايباد ..
مهره الجوال بيدها .. رن .. ناظرت الشاشة.. ضحكت بسخرية ..
عقد حجاجه .. يراقب انفعالاتها..وهي تكلم الشاشة ..بقهر قبل تفتح الاتصال : بدري يانوير .. والله بدري ..
سيف باستغراب : مين نوير ؟! ..
اشرت يعني لاتتكلم .. وتنحنحت .. وردت .. وبصوت ناعس: اهلين ماما ..
امها: يوه حبيبتي ازعجتك .. قفلت من زينه وقالت ان توك راجعة البيت ..
مهره متعمده تحرجها:عادي .. على فراغتك ..اترك سيف شوي واتفضى لك .. كم ماما عندي ..
سيف رفع حاجب .. ومهره تشطح .. وتحسس امها انها في جو معه وهي قاطعتهم ..
مهره : آمريني ..ليه متصله ..
نوير: بغيت ابارك لك .. واعتذر منك ودي جيت صدقيني ..بس مسافرة مع عمك منصور .. عندنا شغل ..
سيف راقب رجلها كيف تهزها بتوتر : يبارك فيك .. عادي يعني .. مو متوقعة حضورك .. عارفتك بزنس ..
نوير :بنت لا تكلمين كذا .. الله يعلم ودي جيت .. بس صعبة ..

مهره بعصبية.. تحاول تمسك نفسها : طيب ماما .. خلك مع منصور .. سيف معي ذا الحين ..
نوير : الله يسعدك ياماما .. انتبهي لحالك .. بكرة احاكيك ..
قفلت مهره قبل تقول شي ..
ومسكت الجوال بيد ترجف ...
سيف بخفوت وتسائل: مهره ..؟!
ردت بعصبية:
كيف تقطع اشغالها واعمالها .. ومنصور افندي .. وتجي تحضر مناسبه تخصنا .. ابي العن واسب .. بس اخاف يكتبني ربي عاقه ..

تروح وتجي في المكان : انا ماكنت بقول لها تجي .. بس طينة الجنه زينه اصرت تقول ..كأن بتقطع نفسها وتجي .. الله يرحمك يابوي .. ويعوضك الجنه ..

سيف يلاحظ ارتجافها .. وغضبها .. وشفايفها ترجف .. (والواضح مهره كانت تتمنى وجود امها .. حتى لو انكرت)
مد يده : مهره اجلسي ..
وقفت وضغطت راسها بكفوفها .. وعيونها تقاوم الدموع :
مابيها .. مابيها ليش دقت ..
همس: طيب تعالي عندي .. اهدي ..
تقدمت ناحيته ومسكت فه الممدودة.. وجلسها جنبه ظلت رجلها تهتز وتعض ابهامها ..
سيف يناظرها .. وهي شاردة ..متوتره .. همس : كنتي تبينها تجي .. صح ..؟!
هزت راسها نفي .. وهي تعض شفتها ..
ابتسم وبخفوت :
شحليلك وانتي تقولين ماما .. يابنت ايش هالدلع.. طفلة انتي..

مهره ماتحملت .. امتلت عيونها دموع ونزلت على خدودها .. مسحتهم : شسوي .. هي راحت .. وانا باقي نتفه اقول ماما .. ماتعودت اناديها .. ولاكبر اسمها .. ظل عالق على ماما .. ماتطور ..

خذ راسها على صدره ..مهره خبت وجهها بكفوفها .. ونزلت دموعها بصمت .. غريب ..
(لما صوت امها يُحرك وجع كامن في صدرها .. صوت امها يذكرها بقدمها التي رفعتها عن لغم الوداع ..وفجرت فيهم الوحده .. صوت امها يذكرها بخذلان غازي .. وخيبته .. آه يا ابي .. ليتك لم ترفع سقف التوقعات .. )

همس لها : تحبك .. مهما كان .. تبقون بناتها يامهره ..
مهره سانده نفسها على صدره .. ماردت لاإيجاب ولا نفي ..

سيف ظل يحوطها بذراعه ويداعب خصلاتها .. ومهره ساكته وشارده ..
بعدها تكلمت بخفوت ودمعة عالقة بزاوية عينها :اذكر مره بحصة التعبير ..
طلبت منا المعلمه كتابة تعبير عن الأم .. بمناسبة يوم الام .. اتذكر شكلي وانا ماهو عارفه وش اكتب .. ارفع راسي والبنات مندمجات ويكتبون .. وانا علق مخي .. مو طالع معي شي .. ذاك اليوم .. ابي استحضر وجهها على الأقل .. تصدق بالله نسيته .. مو عارفه اتخيل ملامحها .. ابي موقف يجمعني فيها .. كل شي تبخر .. تذكرتها واهي تسميني ياعسل امك .. قمت كتبت (انا عسل امي .. ) وتنحت مره ثانيه .. طيب هي وش لي انا .. كتبت (تركتني امي ) ..وشخطت عليها ومسحتها...ورحت اكتب مقتطفات .. وجُمل .. وامسح .. صفحتي .. صارت كلها جمل مطموسة..
يوم يأست .. قلت للأستاذه .. وانا خانقتني العبرة .. عادي ابله اكتب عن جديده .. ؟! ..

الابله ابتسمت بحنية.. والله اعلم فكرت ان امي ميته.. راحت قالت ماعليه حبيبتي .. اكتبي .. تصدق .. عبيت ثلاث صفحات ..
سيف وهو يحرك خصلاتها :
العوض من الله .. يوم امك تركت .. عوضكم بجدتكم ..
مهره وهي تستكين مع لمساته ..مرتاحةلقربه.. اسبلت جفونها: جعل عمرها طويل ..

*عدلت من وضع رأسي لأستمع لنبضه اكثر .. كنت مُتعبه .. من اليوم بطوله واحداثه ..رائحة عطره وتبغه.. تدقدق انفي ..تخدر اطرافي .. كنت بحاجة لحضن سيف .. ولم اقاوم .. مُجرد حضن ولملمة شتات.. الواقع هو زوجي .. ليكن لي نصيب .. من طبطبته .. ليست جريمة .. ! *

سيف تركها بحضنه .. كل مايحتاجه في علاقتهم .. الأريحية هذي .. مايبي اكثر ..هدت مهره .. لاحظت الايباد ..مفتوح على صفحة انجليزية .. فيها صور مخطوطات .. بأوراق عتيقة ..
تسائلت : وش تشوف ..؟!
سحب الأيباد ..ومسكه باليديتين ومهره صارت في محيط ذرعانه :
موقع كريستي ..
بفضول : وشو بالضبط .. ايش هالصور .. اثار ..؟!

سيف يحرك الشاشه بصبعه .. وفتح على صفحة لصور لوحات :
هذا مزاد .. مكانه الأساسي لندن.. بس يقام بعدة دول .. يبيع اثار واشياء نادرة ..
مهره تكبر لوحه باصبعها : شايفه اللوحه هذي من قبل ..او شي يشبها معروفة يعني ؟!
سيف : لوحة بابلو بيكاسو .. اسمها هيئه .. تعتبر اغلى لوحه في الفن السريالي...
مهره تحدق في اللوحه :
طيب شكلها بشع .. كيف تكون اغلى لوحة ..
سيف هز كتفه :
البشعه هذي .. تدرين آخر بيعه لها بكم ..؟
مهره رفعت راسها له..بتسائل..
سيف: فوق الحدعش مليون دولار .. قريبه للثنعش مليون .. عاد اضربي الرقم ب٣.٧٥ هلله وطلعيها بريال ..
توسعت عيونها وهي تناظره : هذي ..؟!
ابتسم : ايه هذي ..
مهره باستخفاف : والله حتى لو انها بريال ماخذتها ..
ضحك:اللي مايعرف الصقر .يشويه ..؟!
مهره تحرك الشاشة وتتفرج : يعني بعلق الوجه الودر هذا بغرفتي .. والله اتحلم بالليل .. انت لو تحصل لك .. علقتها ..ولا بس تخبيها كاثروة..؟!
سيف : والله الى الآن ماوصلت مواصيل اني اقدر اشتري لوحات بيكاسو .. لو سعرها انزل ممكن اشتريها .. ومو بس اعلقها بغرفتي .. اسدحها معي في السرير ..
مهره : لذي الدرجه تحب الرسم .. انا سمعت ان جمان رسامه ..
سيف : لا ما أرسم .. انا متذوق للفن .. وبعدين مو اي رسم .. تهمني الاشياء القديمه .. شغلي في هالمجال ..
مهره : كيف .. وش شغلك بالضبط .. من جد موفاهمه ..
سيف يوريها في الايباد : اشتري قطع من مزادات .. لوحات .. مجوهرات .. تحف من عصور قديمة.. وعندي معرض في لندن .. يضم الشغلات هذي .. بعضها ممكن ابيعها .. من خلال معرضي .. واتعامل مع المشتري مباشر .. وبعضها ادخلها مزادات ..واكسب فرق السعر في البيعة الثانيه ..

مهره بتسائل : طيب هو العميل ورى ماخذها من المزاد مباشر ..ليش يزيدها على نفسه ..
سيف : التعامل في الشغلات هذي حق كبار .. السوق مايدخله الا اصحاب الملايين والمليارات .. ماتهمهم الفروقات في كل بيعة .. مثلاً عندي زباين بره لندن .. يوجهوني للمزاد .. يوكلوني بالشراء .. والمعاملة تتم عن طريقي .. واطلعها من عندي بفاوتير المحل .. وبالسعر اللي انا اطلبه ..
عقدت حجاجها : وليه ماخذها هو طيب ..!
ابتسم بغموض :
بعضهم اسماءهم مايبون يطلعونها .. ولاوجوهم ..ممكن يبي القطعة تظل سرية عنده..خوف من النهب..او لغاية بنفسه..بعضهم ياخذونها لغرض غسيل اموال ..وعاد بعض القطع تدخل في السوق السوداء للأثار .. يعني يكون في اسباب ..
عقدت حواجبها :
وانت طيب .. مافي خطر عليك ..من انك تبيعها بالطُرق هذي ..
هز كتفه : لا .. انا المعرض تبعي مصرح من الحكومة البريطانية .. وعندي تصاريح من وزارة الاثار .. وشهادات من اقوى متاحف اوروبا .. السلعة تخرج من محلي سليمة .. غير مُدلسه ومافيها تزوير .. المشتري .. ينهي القطعه من عندي بستلامه ...
مهره ماستوعبت كل شي : احس شغله غريبة .. يعني لو تحول محلك متحف افضل .. واضمن ..
سيف : اشارك بعض القطع في متاحف .. واخذ عمولة.. بس انا لو بحول المكان لعرض فقط.. ماراح تجيني الأرباح اللي ابيها .. انا يهمني كم ..ومن ضمن شغلي في جهه ثانيه عندي من المعرض .. ورشه للقطع هذي ..
تسائلت: وش نوع الشغل فيها ..
ابتسم وهو يداعب خدها بابهامه : تنظيف وترميم القطع الاثرية ..وصيانتها... على ايدي متخصصين .. والجزء ذا يمكن اهم عندي من المعرض نفسه .. لأن المعرض تحول تقريباً.. لبيع مجوهرات حديثة وقديمة..!!

مهره باهتمام : يعني انا لو عندي لوحة وابي انظفها .. اجيبها لورشتك ..
سيف وعيونه على ملامحها .. وتعابير فضولها .. ابتسم:
حسب لوحتك وتاريخها .. الورشة مختصه للاثار .. يعني ماتعطينا لوحه انتي مخربطتها وتدخلينها الورشة ..تكون اللوحة اصلية .. عليها وثائق .. معتمدة .. لان ترميمها وتنظيفها .. يكلف كثير ..
مهره بقلق : سيف .. انت تتكلم عن شي كبير.. واصلاً الشغل حساس .. يعني لو دخلت قطعة بالورشة وانسرقت مثلاً .. ؟!
سيف ببساطة : في نظام امني جامد على المحل .. مهره .. احنا مدعومين من وزارة الثقافة والاثار البريطانية .. اصلاً تجينا قطع من المتحف البريطاني احنا ننظفها ونرممها .. التعاقد ذا ينفعنا .. في حماية المعرض .. احنا نضبط ادارة المتحف باسعار اقل .. ونكسب حماية اقوى لشغلنا ..
توسعت عيونها :صدمتني .. ماتوقعت ذا شغلك ..
سيف فتح صفحة فيه صورتين نفس الشي .. نفس البرواز ..
وقال: وش تشوفين ..
مهره : نفس اللوحة .. ايش الغريب فيها ..
سيف كبر الصورة: ترى اللوحتين جنب بعض .. مو مدخلين فوتشوب ..
دققت وشافت انهم فعلا ً معلقين على نفس الجدار ..
مهره : طيب ..؟! .. وش الغريب .. ممكن الرسام راسم ثنتين .. صح ..؟!
سيف : لا ..هذي لوحه من لوحات فان غوخ .. وحده اصلية .. والثانيه تزوير ..
توسعت عيونها وهي تدقق : مستحيل ..
سيف : هذا وانتي تشوفينهم صورة بايباد .. انا شفت الثنتين مع بعض .. استحالة تكون مزورة ..هذا من ضمن شغلنا .. تحليل عمر اللوحة .. اواي قطعه اثريه وموادها.. والتميز بين الأصل والمزور .. مثلاً هذي اليسار هي الاصل ..
مهره بإنبهار: بس كيف كيف .. تميزون ..
سيف:احيان نضطر ناخذ عينات بسيطه من اللوحه من الوانها .. وتحليلها في المختبر .. العمل صعب .. بس ماتتخيلين كيف ممتع ..

ابتسمت : حمستني والله .. يشوق ..
سيف :يجي يوم ان شاء الله اخذك .. المعرض تشوفين .. وحتى الورشة ..
مهره : بس سيف انت ماتقتني الشغلات لك .. مثل المهوسين في تجميع الاثار .. واستعراضها ببيوتهم ..
سيف : والله يامهره .. الشغل في المجال هذا .. غصب ياخذك للعالم وحُبه ..من قال ما اقتني .. انا عندي هوس بالقطع هذي ..

تلفتت حولها: مافي شي معلق .. يدل انه قديم .. ولا بس تحتفظ فيها بلندن ..
ابتسم بخفوت .. وهو يلقي نظرة على تاجها على الطاولة القريبة .. وباقي الطقم .. في العلبة المفتوحة ..

فتح الايباد : بوريك شي ..
ركزت انتباهها معه فتح صفحة .. طلعت صورة التاج .. في موقع وثائقي للمجوهرات ..
عقدت حجاجها .. وهي تاخذ الايباد من يده .. وتقرء الكلام الانجليزي.. مكتوب عن التاج في هامش الصورة..وعيونها تتوسع بصدمه..رفعت عيونها ..(حفيدة امبراطور روسيا ) .. سيف رفع حواجبه ونزلهم ..
وراحت كملت .. بعدين صاحت : اييييييش ...؟!
ضحك سيف: وراه؟!
مهره : ذا صدقي اللي عندي ولا مقلد عليه ..
سيف مستمتع بشكلها المذهول : هذا تاج سيسلي نفسها.. يوم اني اقولك حطيه بالتجوري .. وانتي راميته على الطاولة .. يابنت المهراجا ..
مهره بصدمة .. تحدق بالايباد .. والتاج ع الطاوله .. مسكت جبينها :
وانا شايلة هالامر على راسي .. واروح واجي .. لو صاير فيه شي ..
سيف : حلالك يابعدهم .. فدا ..
مهره مو عارفه تعلق .. حست الوضع اوفر : والله لو ادري مالبسته .. مسؤولية سيف .. من جدك .. والله ماله داعي .. وربي تبالغ ..
سيف بخفوت : عشان كذا ماقلت لك ..
عضت شفتها ومحتاره من السؤال .. تشجعت : نوف وهيا ..ونجود... لبستهم كذا ..؟!
سيف اشعل سيجار ونفث دخانها وبصدق : نجود توفت قبل دخولي المجال .. وقبل ادماني له .. لو لحقت كان لبستها.. نوف وهيا والله ماقصر معهم بشي بس الامور هذي بالنسبه لي معنوية .. اكثر منها مادية ..خاصه المُقتنيات اللي تخصني انا ..

قال كذا وشرد .. ومهره شردت في وجهه ..تكتشف اكثر ان سيف شخصية فريدة من نوعها .. شخصية تجذبها للفضول .. والغوص في عالمه اكثر ..

التفت عليها فجأه .. وغمز بعينه: وراه ..؟!
مهره بشرود : مادري ..
هزت راسها وتنهدت بعمق: والله مادري ..!
اطفئ سيجاره ودعاها لصدره ثانية : طيب تعالي ابوي ..اقربي..

ومهره .. بدون وعي واستسلام .. عادت لصدره .. طوقته بذراعيها هالمره .. واكتفت بالإنفراد مع نبضه .. ولمساته الحانية.. على شعرها ..

*****
'جمان'

اتاني صوت ضربات الباب .. وديم تنادي : يلا ماما .. تعالي .. قولي لي قصه .. ماما .. ماما ..
تحركت بروح لها لكن شاهين كبل حركتي .. بقدمه وذراعه .. وهو يكتم صوتي بصدره : ديم روحي نامي ..
ديم صاحت : ابي ماما .. تقولي قصه ..
شاهين بانفعال : خلاص ديم .. امك نايمه ..
همست بصوتي المتحشرج: شاهين .. اتركني اروح لها ..

ضمني حتى كدت اسمع صوت اضلاعي تتفرقع ..وبجنون : والله ماتركك .. مشتاق لك ..
همست بوجع : انت تحبها هي ماتحبني انا ..
رد علي بحشرجة واعرف انه غايب في اللحظه: ماحب غيرك .. انتي روحي جمان .. ماضيع الا معك .. ولا ألقاني الا فيك..
نزلت دموعي حارة.. وداخلي يردد : كذاب .. !

ضربت ديم الباب بقوه: افتحي ماما افتحي ..
وضمني شاهين بتملك اكثر .. لايريد ان يشاركه انا حتى 'ابنتي' .. !!

*****
'سيف'
نامت مهره على صدري كاطفلة صغيرة.. هذه الجميلة وحدها تستطيع ان تجذبني للحديث والثرثرة ..
كنت اجيب عن فضولها .. وكان ذاك من دواعي سروري ..
تريحني فكرة ان انام .. دون ان اخيب ظنها واتعمق فيما لاتريده .. !
تريحني فكرة ان تكون مهره جانب كهذا ..!
تشقيني بالسؤال ..وافضي لها .. نتصفح معاً.. ونضحك .. تقترب مني .. وانيمها على صدري ..
كانت ليلتنا خفيفة .. وعلى صدري بوزن ريشه ..
ماذا اخذت من ليالي غيرها .. غير اني اصحو .. وقلبي راضخ تحت جبل .. !
'ابتدي ليلي .. بشغف .. وانهيه بندم '..
.
.

'مهره'
في نومي ذاك .. رأيت ملايين الشمعات وكأني في البتراء .. ضحكت سعيدة بالمنظر ..كنت امسك بيد ابي .. واتفلت اريد الركض بين الشموع ..
لكنه تشبث بيدي ومنعني ..
كنت ملهوفة : هدني يبه ..
رد: دامني مسكتك .. ماتركك ..
لم يكن صوت ابي ..ابداً ليس صوته ..بل صوت بدئت اعتاده .. واستطيبه ..
التفت ..
وجدت 'سيف '..
يحدق في الشمعات : لو ماكفوك .. اشعل لك زيادة .. 'وبحنية' وانا اللي لاظميتي تبشرين بزمزم اعماقه..!

تحركت مهره في نومها ..سيف بسرعة حرك ذراعه والتقف راسها ..
سقطت نظرته على وجهها النائم بسلام .. بلع ريقه .. وخفقه نسيها منذ سنين داهمت قلبه .. راح يمشط ملامحها بالتأمل ..عاقد حاجبة ..
مهره برمشاها الطويلان وشفتاها المنفرجتان..
ابحرت بسيف للبعيد .. والبعيد ..!

*****

في صباح الجمعة..
و وقت مبكر .. جمان جالسة على طرف السرير .. تنظر لشاهين .. نايم على بطنه .. متعمق في نومه.. ابتسمت بخفوت وغصه .. وهي تلمس انفه الشامخ بظهر سبابتها.. حيث خُدش طويل لم يسلم منه البارحة..

كيف دخل الطرف الثالث بينهم  ..كيف اتت صدفة غاده .. لتغتال كل جميل ..
كيف كانت لياليهم عشقية .. !
وكيف اصبحت بالإكراه ..والألم ..
رفعت يدينها .. معصمها .. اثر اصابعه .. من ضغطه وجنونه ..
وبيد مرتجفة.. لفت سكارف على عنقها.. وعليها إخفاء الكثير اليوم .. من نتائج حرب شاهين الطاحنة ..!
ارتجفت بقوه وقلبها يرتعش .. حقاً اصبحنا معادلة مستحيلة ..!
المحاولات في حلها عقيمة ..
اهتز جوال شاهين الصامت على الكومدينا .. القت نظرة .. مخذولة .. لحرف الـ(G)..!
ياربي اي رُقية .. ومعوذات .. تخفي كابوس غاده من حياتي ..!
غاده كالسرطان الذي ينتشر بخبث .. في جسدي قبل جسده .. ويعطب كل شيء فينا .. وشاهين مريض .. يائس .. خاضع للمرض ..لو .. لو يتمسك فعلاً في الحياة .. وينوي العلاج .. لكنت .. الدواء الذي يُضخ في خلاياه .. و يقاوم ..!
لكن ..هو لايريد ..يكذب .. متعلق بجماليات عاشها معها ويتصور انها الجنة ..!
هو .. لم يصل لمُبتغاه في غاده ..
فايظل مثل الظامي المُتعلق بسراب .. رن الجوال من الجديد ..
خذته واغلقته ورجعت الجوال .. وقامت طلعت من الغرفه ...!
طلت على غرفة بناتها .. ماصحوا .. نزلت وكانت لونا تلمع الطاولات .. شافتها وببشاشة : قود مورننغ مدام ..
ابتسمت : قود مورننغ لونا ..
لونا : هل احضر الفطور والقهوة ..
جمان : اكملي عملك لونا .. انا سأحضر القهوه ..

راحت المطبخ .. وبدت تسوي القهوه .. كانت واقفة تناظر الرتوه وسحبت كمومها لمنتصف كفوفها ..
تمنت تختفي عن العالم كله .. هناك افكار تراودها .. !
بس في اشياء تمنعها .. بيان وديم .. شردت في الرتوه الفائضة على الفرن ..

تغلي مثل القهوة .. كامنه كابركان .. سيأتي يوم وتفوض .. حارقه كل قريب .. مشوهه كل جميل .. !

بعد شوي كانت في مرسمها ..واقفه .. تعصر الالوان الزيتيه .. بشكل عشوائي على خشبة الألوان .. وتشرب القهوة ..مُره كامرارة حلقها ..
تدمج بالريشه ..
ترتجف .. وترتعش .. اتصلت رجفتها .. حتى ذراعها .. وكتفها واحست أن الألم في ضلوعها ..
نزلت الكوب ع الطاولة..
وخارت قواها .. جثت على الأرض .. انثنت بوضعية السجود .. وهي تعتصر معدتها .. الم رهيب داهمها في كل مكان ..

التظاهر بالقوه والشموخ .. مُكلف .. تتقطع من الداخل .. وتتحول لاشلاء.. بكت مانعه صرختها .. وهي تقفل اسنانها بقوه ..

كأَنني بحر أَرهقتهُ العواصِف وممراتُ
السُفن،
أتدري ما معنى أنّ يتعـب البحر؟.

*****
صحى سيف .. على صوت جواله .. رد بخمول:
هلا هيا..
هيا بجفاف:مبروك ..
حط ذراعه على عيونه : يبارك فيك .. ها متى الجيه ..
هيا : خلال هالاسبوع ..
سيف: توصلين بالسلامة .. وحشتيني ..
هيا بسخرية: لاتسمعك زوجتك .. واضح كنت نايم.. اكيد جنبك ..لاتزعل وتنصدم بشخصيتك .. توكم ..
سيف بتهكم :نايمة جعلني قبلها ..مغيبه ..ياعساها نومة الهناء ..
(سيف جاء باسلوب حلو لهيا في البداية وردت بسخرية .. وقصفها مره وحده ..)
سكتت وهي تقبض ع الجوال بيد مرتجفه ..
جلس سيف على طرف السرير .. ماهانت عليه .. بحنيه:
لاتضايقين هيون مزوح.. قولي لي متى بتجين..  ابي اشوفك .. وحشتيني..
هيا بخفوت: صدق ..؟!
قام :ماعودتك اكذب ..
هيا : وانا والله مشتاقه لك..
سيف: اجل لنا لقاء..
هيا: على خير ..انتبه لحالك ..
سيف : وانتي بعد ..

قفل .. ورمى الجوال .. تنهد.. وزفر ..وهو يمسح وجهه بكفه ..
طلع من الغرفة لغرفة الجلوس.. ابتسم بحنية .. ومهره نايمه .. على جنب.. ركبها طاويتهم عند بطنها ..وقميصها مرتفع .. ومبين سيقانها وجزء من فخذها .. وبطانيتها الحريصة عليها البارح طايحه على الأرض..
خذها وغطاها.. وبس حست بالبطانية .. سحبتها واحضنتها .. وباين انها مثلجه من التكيف ..
ابتسم وجثى قريب من وجهها .. نادها : مهره ..
ماردت ..
تأملها شوي واذ ارتسمت على شفتيها ابتسامة عابره واختفت ..
تماماً مثل الطفل النائم الذي يبتسم حين تداعبه الملائكة ..!
عقد حجاجه .. مع شعوره الغريب ..وهمس يحاول مايتأملها اكثر : مهره .. اصحي ..
رف رمشها وافتحت عينها .. تنهد سيف وبداخله يستعيذ .. مايبي يتأملها وهي مغمضه .. خاف يضيع ..
فتحت وبان العسل وضاع زيادة ..
مهره بتسائل وهي تعتدل: انفضت جلسة.. البنات..؟!
وقف وبتهكم: اي بنات .. تلاقينهم وصلوا الديرة...
مهره كانت تتمغط وتتثاوب ..توسعت عيونها وهي تعتدل : اي ديرة .. كم الساعة الحين ..؟!
سيف :احدعش ..
مهره قامت بسرعة وهي تنزل قميصها : تمزح ..؟!
سيف : شوفي ساعتك ..
شالت جوالها .. وبدهشه: كيف نمت كذا ..يالله رحمتك .. كنت بس انتظره يأذن .. ماصليت..
وراحت البست شبشب .. دورت الثاني .. وراحت نزلت في الارض تطل تحت الكنب .. وسحبته وهي تحلطم ..
وسيف يناظرها وهي ترمي الشبشب .. وتلبسه .. وتطلع من الغرفة ..

*****
بعد قليل..مهره .. عند سور الدرج تنادي : فارس .. سيف جنبك ..
فارس : ايه ياخي ولدك نشب في جوالي ..تعالي اخذيه لا اعضه..
ضحكت : انتبه لايكسره .. بجيب ايباده معي ..
فارس : مهره بنروح نصلي الجمعة ..بناخذه معنا ..
مهره : اهم شي بدل هو .. ؟!
فارس : ايه .. لبسته امي ثوب ..
مهره : وينه .. ماشوفه ..
فارس يكلم سيف متخبي بالجوال تحت الكنب : تعال كلم امك ..
سيف منسدح على بطنه ويلعب بالجوال : مابيها .. نام مع ابه خليني .. ( سيف يقول لسيف يبه .. مثل فارس ) ..
فارس انفجر ضحك ..
مهره : وش يقول ..؟!
فارس مستمر يضحك: مايقول شي .. خليه يولي ..

في غرفة سيف قبل لاينزل للصلاة .. يكلم نوف .. وصار بينهم حوار .. ونوعاً ما .. قدر يراضيها ..

دخلت مهره .. لغرفة الجلوس تبع سيف .. وراحت تدور عن جوالها في الكنب والطاولة ولا لقته .. متأكده كان هنا ..
راحت لباب الغرفة المفتوح .. دقت بخفوت تستأذن .. واسمعته يكلم .. طلت براسها .. كان بثوب وحاسر .. بيده الجوال واليد الثانيه زجاجة عطر يرش منها ..
مانتبهت من يكلم ..
همست: سيف ماشفت جوالي ..؟!
اشر على الكمودينا .. لقته شابكه في الشاحن ..
راحت شالته واسمعته : خلاص تعالي البيت اليوم ..واراضيك .. كم نوف عندي ..

كانت تبي تطلع بسرعة .. وماتبي تسمع شي.. الا ان طقطق باصابعه ينبهها .. التفتت .. وهزت راسها يعني 'وش ..'
اشر لها يعني 'انتظري ابيك ..'
وقفت .. وهو ينهي المكالمة: تمام ابشري .. سلام ..
وقفل ..
مهره واقفة تنتظره .. وش يبي يقول ..مشى لعند الخزانه : تعالي بوريك شي ..

لحقته وهو يفتحها .. ويبين التجوري : طقمك وتاجك هنا .. تعالي شوفي كيف افتحها وحفظي الرقم ..
مهره برفض : لا.. ماله داعي سيف .. لابغيتهم .. قلت لك تطلعهم ..
سحبها من ذراعها .. ووقفها قدام الخزانه .. وصار وراها وراح يضغط الارقام : حفظيه شكلا ً اسهل .. كأنك تكتبين حرف ' f' ..

انفتح التجوري .. كان فيه اوراق وعلب .. وفلوس وسلاح ..
اشر على اشياءها: هذول لك ..
مهره وتبي بس تهج ... ضاعت مع عطره وانفاسه تلهب خدها : تمام.. خلاص حفظته ..
قفلها من جديد وهو محتفظ فيها بين ذرعانه : فتحيها اشوف ..
مهره وكل ماحست بظهرها يلصق فيه .. ارتجفت : والله حفظته ..
سيف وعارف انها مرتبكه..برواقة: وريني ..
بدت تدخل الرقم .. واغلطت .. مع ارتباكها ..
مد يده يأشر على الارقام من فوق : الارقام اللي بنص .. ترجعين لها بعدين .. بعد ماتكملين للتسعه هنا ..
مهره بسرعه: خلاص فهمت .. فهمت..
دخلته .. وافتحت ..
سيف بتلاعب : كفو .. شاطرة .. والحين قفليها ..
مهره غمضت ..تتهرب : سيف ترى بدت الخطبة ..
سيف بصوته القريب من اذنها : ألحق ماليك.. إمامنا يطول ..

قفلتها .. وقلدت ايش سوى ..وبسرعة .. بتطلع من تحت ذراعه .. بس حكرها .. وهو مبتسم ورافع حاجب ..
غمضت وقلبها بيطلع من مكانه ..
سيف قرب انفه تحت اذنها :وش اسم عطرك .. اعجبني ..حمضي على زهور ..يشبهك..
بعدت عنقها وكل شعره كامنة ببشرتها انبثقت : شنيل ..
سيف بلعانه رجع يشمه وكأنه يبي يدركه : اي واحد فيهم ..
مهره ضاع منها الاسم : اصوره وارسله لك..
سيف وشاربه يداعب عنقها : اتوقع قبريال ..
مهره تبي تبعد : ايه ايه اتوقع..
قال: تمام .. لاتأكدتي علميني...
باسها بخفة .. وهو يشوف كفوفها كيف لامتهم بشده وتشنج..
ابتسم متلذذ بخجلها .. وهو يبعد .. ويطلع من الغرفة ..
مهره .. بس اغلق الباب .. اسندت يدينها على باب التجوري .. وهي تتنفس بسرعه .. بعدين مسكت قلبها .. وهي اللي حسته بيطلع من مكانه .. !

*****

بالليل وفي احد الكافيهات ..
شاهين سابح في ملكوت آخر .. ويسحب من دخان الشيشة .. وصمت جمان طوال اليوم يخنقه ..
كانوا على الغداء .. لما كانت شارده .. وتحرك الشوربة بالملعقة ..
لاحظ معصمها وهي تخفيه بكمها ..اوجعه قلبه..
كيف كانت تبتسم للبنات بشحوب .. وتتحاشى عيونه ..
غاده  تحدق فيه : شاهين وراه .. ترى ماشفتك من ثلاث اسابيع .. ايش هالصفنه .. ما انت معي كلش..
ناظرها وهي متحجبة.. وبطاقة العمل معلقه في رقبتها .. لقاءاتهم دائماً في الاماكن العامه .. حدق في عيونها حبه .. وخال خدها عشقه .. وبهدوء:
الى متى ياغاده هالعناد ..؟!
ارتشفت من قهوتها وشتت عينها : اي عناد ..مافهمت عليك؟!
شاهين : من رجعنا لبعض.. لنا ثلاث سنوات .. لا لامسين سما ولا ارض..
غاده بهدوء : انت عارف شرطي شاهين .. ماتزوج وعلى ذمتك مره .. اتوقع انك حفظت الديباجة..

شاهين بانفعال: ياشيخة .. تنازلي عشاني .. جمان مانفصل عنها .. بنت عمي .. دمي ولحمي ..

غاده بعصبية اكبر : ودامه كذا ورى تبيني ومتمسك فيني .. انا وهذا ماصرت زوجتك انقهر قهر وانت معها .. وتنام معها .. ماختلفنا انا اخطيت .. يوم اختفيت .. بس شسوي ..زين الله طلعني من ذاك الحادث .. ما ختفيت بكيفي .. كنت بين الحياء والموت شاهين ..وترى صديتك اول مالتقينا .. خلاص بالنسبه لي كل شي انتهى وانا اشوفك جاي تستلم بنتك .. انت رجعت بإصرار... ورجعت كل المشاعر داخلي ..من حقي اتملكك لحالي ومايشاركني فيك أحد .. انا احبك قبل جمان .. انا الأوله ..
سحب الدخان ونفخه : والله ماتعرفين من الحب الا اسمه .. لو تحبين صدق ماتضيقينها علي .. الدنيا خانقتني ياغاده ..
غاده ملاحظة اللي بخشمه .. حدقت فيه  وبغل وغيره : واضح انك مختنق وماهو قادر تنفس ..
عقد حواجبه : وش قصدك ..؟!
اومأت بعينها : ماشفت وجهك اليوم ..؟!
عقد حجاجه وفعلاً مايدري : شتخربطين انتي ..؟!
غاده شالت شنطتها وجوالها وبتهكم: قلنا حلو وماتلزمك المرايا .. بس بعد الليالي الملاح .. طل بوجهك ..واضح معك قطوة شرسة تضرب ولاتبالي ..!

قالت كذا ومشت ..
شاهين بسرعه خذ الجوال وشغل الكاميرا الامامية.. وانتبه لشمخ الطويل بأنفه ..وبصدمه: ياوجه الله ..

*****
فارس بحماس :يعني مافي مدارس الا الثلاثاء .. عشان اليوم الوطني ..
بلقيس : والله نبي نفلها ..ايش رايك جمان .. تعزمين نمشي بكره دبي .. نرجع الاثنين بالليل ..
جمان ومالها خلق لشي : من جدك انتي .. يوم وطني ونطلع بره .. لاخلينا هنا .. وبعدين بكره انا عندي مشاركة رسم مع مجموعة من الرسامين .. صورة لليوم الوطني .. على جدار  قاعه بيسون فيها احتفال ..
مهره : ماشاء الله عليك .. ودي اشوف لوحاتك ..
ابتسمت : تعالي بيتي .. واوريك كل شي ياقلبي ..
مهره : بإذن الله ..لازم ..
جمان: وين المعرس اجل .. ؟!
مهره : فوق .. شوي ويجي ..
فارس : فاتك اليوم .. جمان .. ابوي بيطلع يتغدى مع مهره .. يعني مسوي فيها صباحيه الكنغ .. ونشبنا انا وسيف ورحنا معهم..
انفجرت جمان ضحك :
الله يخرب بيتكم .. الحين سيف ونقول ورع وماينشره عليه مايفهم .. انت ماتستحي على هالشنب اللي خط ناشب لهم ..

فارس : والله مثل ماياخذون الكلب الصغير ياخذوني ..
مهره : بالعكس .. فارس حلا لنا الطلعة.. ولدي العود ..
فارس يقلد الكويتين : انا اخوكم الكبير ..
مهره تذكره : كيف فارس .. قلد سيف وهو زعلان من ابوك ..

فارس وكنها ذكرته : انتوا تدرون ان ابوي مو على صلاح مع سيف .. كذا عطبه وجني .. من يوم ضربه هاك اليوم .. بالمطعم ابوي يسئله وش يبي ياكل وهو مطنش .. يروح يقول في اذن مهره .. وقالت انه يبي بطاطس .. ابوي عناد فيه ماجاب .. جابوا الطلب .. الا البطاطس .. وابوي الا تقول انت ولا مافيه .. والله ياجمان ..ان قعد كذا تكتف ومد البوز واحنا ناكل .. بس مايبي يطلب من ابوي ..

جمان : ياعميري كبرياء رجُل ..
فارس : بس جابه ذيبان على خشمه .. قبل نطلع .. راح وهو خانقته العبره .. ويقلده فارس (أوبه ابي بطاطس ) ..
جمان : ياقلبي قلباه .. مهره ..الورع ..خافوا الله..
ضحكت مهره :كل آفه والله يسلط عليها آفه ..
جمان : وجاب له ..
فارس : ايه راح طلب له سفري ..

فارس جاله اتصال .. ورد: خلاص شوي واجيكم ..
وقفل ..
نزل سيف ..شماغه على كتفه وشايل العقال .. سلم ..
وردوا ..
جمان عقدت حجاجها : وين على الله ..
سيف يصب لنفسه فنجال قهوه يشربها وهو واقف : بروح بيتي ..
توسعت عيون بلقيس ..
وجمان بدون شي اخلاقها زفت .. بعصبية صاحت : بيتك؟! .. الليلة...!!.. ما انت صاحي .. لو نسيت اذكرك .. ترى بنت الناس .. تو عرسها البارح ..

رفع راسه ونفخ .. يحاول يسيطر على اعصابه:
جمان .. ياليت ماتدخلين في هالأمور .. عشان مازعلك ..
جمان بغضب : لا زعلني .. لاتقصر .. اذا انت مو قد هالزواجه .. لاكان دقيت الصدر وتزوجت ..
توسعت عيون مهره .. وخافت لما شافت الغضب في عيونه وانقلاب كُلي بملامحه :
جمان تكفين .. خلاص ..انتي مو غريبة .. وعارفه ظروف هالزواج .. زوجاته أولى مني فيه ..
جمان بانفعال لاتسيطر عليه : حتى لو شكليات .. زواجكم .. غير زواجاته العابرة  قبل .. المفروض يعمل حساب وجوده .. ويحشم .. بس الظاهر ماعاد به سنع ..

مهره لاحظت سيف.. ممكن ينقض على جمان ويخنقها .. بس ماسك نفسه .. ظل يحدق بعيونها .. بعدين راح توجه لمهره .. ومسك ذراعها وقفها : تعالي ابيك ..
ناظر فارس : وش وضعك في البيت ولابتطلع ..؟!
فارس : بروح استراحة ذياب ..
سيف : حدك ثنعش ..
فارس : وحده يبه ..تكفى.. ويكند ..
سيف بشكل قاطع: ثنعش .. لا حرمك الطلعة ..
فارس : ابشر  يبه .. على هالخشم ..ولايهمك..
سحب مهره وطلع بها .. وقف ومسكها من كتوفها : مهره .. ماعلي من كلام جمان ..ولا اي احد .. انتي يضايقك ..لارحت اليوم لنوف..
هزت راسها نفي :لا والله .. عادي ..
سيف مهتم لأمرها : ادري ان ثاني يوم لك .. اذا بتقولين لاتروح بظل ..
مهره بكل جديه :
ليه نكذب على نفسنا .. هو زواجنا كذا .. انت لك حياتك يابوي .. رح والقلب داعي لك ..
ناظر عيونها لمدة .. بخذلان..
شيء داخله تمنى.. لو قالت ايه بتضايق .. لو رحت .. !..
ايه ظل معي ..!!

مهره ارتبكت:ليه تناظرني كذا ..
سيف .. بعد يدينه عن كتوفها: ولاشي ..

نزلت عيونها .. وحست بضيق .. لكن رفعت راسها وابتسمت :
اهم شي خذ هديه .. تراضيها فيها ..
سيف يمشي معها الى سيارته : وش اقتراحاتك .. ؟!
مهره : المُتعارف .. لرضاوة الحرمة ذهب .. مجوهرات .. ولا مبلغ حلو .. اذا هالاشياء ترضيها .. عليك بها ..
ركب وفتح النافذه .. وابتسم :
يعني لازعلتي ترضين بالذهب ..
مهره : انا لازعلت مايرضيني مال قارون .. انا لازعلت اكره .. اعاف ..بي كبد بعير..ماينسى..
سيف يشغل السياره : يعني لازم نتحاشى زعل سموك ..
مهره بدلعها العفوي : لاتزعلني عشان ماتضطر ترضيني ..
رفع حاجب وبخبث : عطيني فرصه ادلعك .. ثم ازعلك .. بعدها اراضيك .. بغير الذهب .. تتحدين ..؟
مهره مافهمت : بإيش يعني ..؟!
يستغرب براءة مهره واستيعابها البطيء لتلك الأمور : ولاشي .. قولي لي .. لو انتي مكان نوف .. وابي اراضيك .. وش يرضيك ..
مهره : تبي الصدق الصدق الصدق .. لو انا مكانها .. ؟!
سيف : ايه ؟!
مهره وهي تتكىء على النافذة: يعني انا نوف الحين ..
سيف : ايه حضرتك.. وش يرضيك في هالحاله ..؟!
مهره رفعت حاجب: انا نوف وزعلانه لانك تزوجت مهره .. عشان ارضى تطلق مهره .. وتطلق حتى هيا .. وافكر ارضى ..!

صدمته الإجابه : يعني انتي نوف الحين ..
مهره بثقه : اي نعم ..!
سيف : عمرك مارضيتي ..
انفجرت ضحك .. وهي توقف : ياقاسي ..
سيف : المهم بوصيك ..
مهره بتسائل : آمر ..؟!
سيف : فارس .. بيطلع .. لو جات فوق الثنعش وهو ماجاء .. تدقين علي ..
مهره :بيجي ان شاء الله .. ايش جوي اتصل عليك وانت عند حرمتك ..
سيف بنص عيون : والله بتتصلين حتى لو اني فـ...
قاطعته قبل يكمل : خلاص خلاص .. بتصل ..لاتقول شي ..
سيف : حلو .. توصين شي ..
مهره : سلامة عمرك .. !
سيف : يسلمك يا بوي ..

رجعت مهره .. وهي تمشي على ورى وتراقب سيارته تخرج من البوابه ..
شعرت بغبن .. وضيقة .. عكس ضحكها معه قبل ذهابه ..

*مابال قلبي قد اريق كما الماء .. لماذا اردته ان يبقى ..ياروحي ليس لنا نصيب بسيف .. يانفسي حاربي الشعور .. (لمست حلقها واذا بغصه تتضخم .. ).. نفخت .. تحاول تبديدها .. تنحنحت تجلي حنجرتها ..
فارس وراها:وراه ... واقفه فيذا ..
التفتت :توه ابوك ماشي .. هذا بدخل ..
عقد حجاجه : مهره وش فيك .. تونسين شي؟!
ابتسمت والعبرة فيها باينة :مافيني شي .. المهم لاتتأخر ترى ابوك موصيني لو مارجعت اتصل عليه ..
فارس بإصرار: بالله وش فيك .. زعلك ابوي ..؟!
مهره : لا والله ظلينا نضحك لمن مشى ..
فارس : ومشى وفصلتي الفيش ..
ضحكت : عليك مصطلحات عجيبة..
فارس لاحظ دمعتها سالت بدون تحس .. راح مسحها لها وبجدية :
مهره لاتكابرين .. انتي زعلتي لانه مشى ..
مهره ناظرت وجه فارس .. وعيونه حانية مثل ابوه .. تنهدت  .. والتزمت الصمت ..
فارس بحنيه :
مهره حتى لو تزوجتوا عشان سيف الصغير .. لاتظلين متمسكه ان هذا سبب زواجكم بس .. من سنين ماشفنا ابوي بهالمود .. والله مبسوط يامهره ..من صار موضوعكم .. واضح عليه..
مهره بتسائل : كيف يعني ..؟!
فارس : شفتي اسلوبه قبل شوي .. وهو يرد على جمان وكيف يسألني بدفاشة.. غالباً  هذا اسلوبه قبل .. مادري كذا البارح بالزواج .. واليوم وقت طلعنا نتغدى ..مره متغير ومبسوط ..
مهره بإنكار :ماهو بسببي صدقني .. انا ماسويت شي ..
ابتسم : ماسويتي .. بس تقدرين تسوين .. انتي غير اللي قبلك والله ..
مهره بحيره ..شردت في نقطه وهميه بالأرض ..
فاجئها فارس باس راسها وقال :
بالتوفيق مهره ..
ابتسمت وهو يداعب راسها بكفه .. ومشى .. نادته : فارس لاتأخر ..
ابتعد : تمام .. بس جهزي شاي قبل اجي .. عندي فلم نبي نسهر عليه مع بلقيس ..
هي : تمام .. انتبه لحالك ..الله يحفظك..

*****
'لندن '

وفي مطعم فخم .. وبملابس رسمية .. على طاولة مستديرة .. وليد يراقب الولاعة بيد مشاري .. وهو يفتح ويسكر غطاها ..وبيده الثانيه يشرب من كاسة الواين ..
وليد :ايه وبعدين ..؟!
جات ماريا وباين مخلصه مكالمة : اكتشفوا بصعوبة انها مزيفة ..لقد استخدموا مواد .. قريبه من العصر الثامن عشر ..
ضحك مشاري بسخرية:
اهم شي انها جميلة وتفي بالغرض ..
ماريا : اوف مشاري اوف .. تفكيرك سطحي .. ليتك اخذت من شغف والدك بهذه الأمور ..
مشاري : اهتم بما يعنيني منها .. لست مهوس مثل والدي ..لما اضع تعب اشهر من جني الارباح من عملي في كتلة طين ..
ياسمين : لو راجح هنا لبصق في وجهك مشاري ..
وليد ببتسامة جانبية : هو يعرف متى يرمي الكلام .. في وجود راجح .. هو يعبد الآثار عبادة ..
مشاري بعبث : تبون تعرفون وش اللي اعبده عباده ..
حسين العراقي : يابه أُقعد ومانريد نشوف شي .. هسه يبتدي شغل الاستعراض مالك .. اللي بياخوضنا لستين داهيه ..

مشاري .. مسك زيتونه وقاعد يحدد هدف بالطاولة المقابله : راقبوا ابليس وش بيسوي ..
عزيز مر .. في وجهه : مشاري .. بلبق السيارة وصقعت سيارتك ..انحكت شوي.. يبي لها تلميع..
مشاري رفع عينه له : الله يلعنك .. سكران قبل تدخل المطعم ..
جلس عزيز :انت حاشر سيارتك زاويه .. كن البارك من حر مال ابوك ..
مشاري ماهو حوله .. والزيتونه .. فوق ظفر سبابته .. والباقين يراقبونه .. وراح نبطها .. وطاحت في كاس شمابانيا .. لسيدة اربعينه جميلة .. رفعت عينها له بتسائل ..
وغمز بعينه .. : سقطت من غير قصد ..هل يمكنني استعادتها ..
و مشاري الحيوان .. مُز وجذاب .. وعمره تسع وعشرين .. عيونه حاده زرقاء..ماخذها من امه البريطانية وملامحه عربية ..حاده ..يشبه راجح ابوه ..
ابتسمت واعجبها خبثه : الا يوجد غيرها ..
مشاري باسلوبه الأخاذ: هذه بالذات اشتهيها ..
رفعت كاسها  'نخبك' .. وفرغت الكاس بجوفها: اذاً خذها ..
قام مشاري .. وحسين يتحلطم:ولك هاذ الجلب مايتوب ..
وليد يحاول اخفاء ابتسامته ..
ومشاري ياخذ الزيتونه .. وبحركه خزبق الحرمه .. حطها على شفتها : بما اني لا استطيع ..لتحضى بالتوت قبل ان آكلها .. وراح كلها ..
الحرمه فهت .. ومانتبهت لخفة يده .. رمى جوالها من ع الطاوله ..
سوى نفسه بيرجع .. والتفت يكمل فلمه الرخيص .. وعطى نظرة انه بيرجع وهو يقول: اوه ..هاتفك ..
وقفت وانحنت: لاداعي انا التقطه ..
ومع انحنائتها .. الكلب مشاري .. ضربها بخفه .. رفعت راسها بشهقه .. فعض شفته:
لم اقاوم .. اعذريني يبدو ان العنب عثى بعقلي ..
وقفت .. وعطت ضحكة : لاعليك .. الخطأ على العنب ..'وغمزت' فالنغفر له ..
باس سبابته والوسطى .. ورماها عليها .. ورجع ع الطاولة ..
ياسمين : يلعنك .. يالمنتهي ..
ماريا تشرب من كاسها : لنقل انه اعطى المسكينة .. جرعة سعاده ..
وليد : الا تريدين جرعة سعاده عزيزتي ماريا ..
ماريا باستهتار : طبعاً اريد .. لكن ليس في الأماكن العامه ..
ضحك مشاري : اقطع طريقها وليد في الأخير هي زوجتك ..
جاء .. واحد حط على الطاولة مبلغ قدام مشاري : فزت بالرهان ..
مشاري يعد المبلغ : على الرحب والسعة .. مستعدين لاي رهان قادم ..
مشى ..
كلهم بتسائل: وش رهانه ..
مشاري يراقب الخمسيني اللي جاء على طاولة السيدة ..
و بخفوت: الحين انا جيت قبلكم .. جلست مع اثنين .. ومسوين رهان .. من يقدر يلمس مؤخرة زوجة مدير الشرطه .. (وغمز) ..
عاد انتوا افهموا الباقي ..
حسين بفجيعة : هسه هالماجدة مرت مدير الشرطه . .
مشاري : ايه وهذا مدير الشرطه وصل ..
حسين : ولك انت مو بس لمستها .. انتا مزقت ش****..
ياسمين مسكت راسها : ياخي حسنوا الفاظكم .. الله يقرفكم ..
عزيز : عاد مشاري وحسين وتقابلوا .. المفروض لا نتي ولاماريا تجون ..
ضحكت ماريا واللي صارت تفهم اغلب كلامهم :لماذا لايتزوج هذان الاثنان ..
مشاري يطلع جوف الابوستر .. ويضيف عليها ملح : ماجنينا لهالحين ليدي راثبون ..
ماريا بعربيه مكسرة لذيذة : والله انت .. مجنون رسمي ..
مشاري بتحذير: ماريا ...!!!!
وليد يشيل لحم الابوستر بالشوكه ويحطه بفم ماريا : انا افدا خشيمك.. يابعد حيي ..لاتكلمين هالاشكال ياعينه ..ترفعي ياملي ..
ماريا بانهيار : وليد.. لا تكلمني هكذا .. لااستطيع ترجمة شئ..
عزيز: طيرت سبيكتها الله يصلحك ..
مشاري :علمها وليد .. لاتصير فاغره مثل امي .. ماتت .. ماعرفت من العربيه شي ..
حسين : آني ود افهم شي واحد .. انتا اومك تقول عنها فاغره .. هسه بنات الحرام اش تقول عنهن ..
مشاري : محضوره .. ياملي ..
عزيز : ماخذت من الاجانب الا خشتك .. والا الذرابه انت في ديره وهي بديره ..
مشاري بصرخه : ابااا  سيف .. والله جوكم بيض بدونه ..
وليد : معرس .. وش يبي بمقابل وجهك ..
مشاري : شفت سناب فارس .. مصوره وهو لابس بشت ماعرفته .. وين الارماني .. والبانانا .. رجعوه مايصلح هناك.. صاير بدوي ابن الذين .. حلاته انجليزي ..

ماريا تستفسر من وليد شيقول مشاري عن سيف .. لانها ماترضى عليه ..
وضح لها ..
راحت قالت بصوت حالم : انا فداه ..
توسعت عيون مشاري وعزيز وانفجروا ضحك .. مشاري : عيدي ..عيدي .. يخرب بيتك عيدي ..
ماريا  مافهمت عليه: لم افهم .. ماذا قال هذا المتسكع وليد ..
وليد يترجم وهو ياكل : يطلب منكِ الإعاده ..
مشاري شغل جواله يبي يصورها .. رفعت حاجب وبعناد : الى الجحيم مشاري ..
وليد باس خدها: صح لسانك يابوي ..

*****
مهره في الصالة .. سيف راسه على حضنها ونايم ..
تتابع فلم مع بلقيس وفارس ..
شردت وهي تحرك شعرها باصابعها ..
سيف من طلع ماتصل عليها ابد .. ولا ارسل شي..
تقول لنفسها : هو الطبيعي مايتصل .. اوك اهتم ..في الكم يوم الماضية .. بس خلاص الواقع حقه.. نوف .. وقبلها هيا .. انا كذا بس .. هامش..

ليه تضايقت .. ليه طرى عليها نومها على صدره البارح ..
حنيته .. عيونه .. ريحة عطره وسجايره ..
انعصر قلبها ..
لما طرى عليها انه بحضن نوف .. وانه زوج نوف .. ماهو لها لحالها .. ياخبله .. المستحيل بعينه انك تكوني زوجه لسيف بشكل طبيعي .. لاتنسين انه اخو عساف .. حياتك لسيف الصغير وبس ..!
ابتسمت وهي تناظر وجه سيف ورموشه ونايم بسلام .. (يكفيني من الدنيا اهو ..اي والله) ..
جاتها رساله واتس ..
افتحتها والمتوقع زينه او سندس .. اعتدلت وهي تشوف الرساله منه ..
راسل : ها رجع فارس .. ؟!
ناظرت الساعة ثنتين .. حدقت بالجوال بنص عيون .. لذي الدرجه غارق في العسل .. توه يتذكر فارس ..
صورت فارس وهو منبطح ع الكنب ويتابع .. ورسلتها له .. بدون ماتعلق ..

سيف..مخلي نوف نايمة وطالع  الصاله .. ويدري ان فارس رجع..
لكن.. يبي يكلمها هي .. ماعرف ينام .. وصورتها ماراحت من باله ..
كتب لها : مانمتي الى الآن .. ؟!
كتبت : نشوف فلم مع فارس ..
رفع حاجب : كأنك تصرفين ..؟!
كتبت :منسجمه مع الفلم .. يلا اخليك ..
كتب :تمام .. استمتعي ..
توسعت عيونه لما جاه صح واحد والواضح انها اقطعت النت ..

هي قطعت النت وحطت وضع طيران وحطت الجوال ع الطاولة ..
وبعصبيه داخلها : مو انا اللي تجيني على فراغتك ياسيف ..
الفلم  انتهى ..
بلقيس: روعه ...
قام فارس يتمغط بصرخة ..
مهره : اش فارس .. لاتصحي .. اخوك ..
فارس انفجع : اخوي ..؟! .. متى وكيف .. انا مين انتوا مين ..ماعرفكم ...
ضحكت : يالظالم والله يحبك ..
فارس:تكفين لا .. سأعيش وحيداً واموت وحيداً ..ولااصير اخو قليص ..
بلقيس : خلاص بتنامون ..
مهره : ايه .. دام سيف نام ..
فارس قام ناحية مهره: خليني اشيله..
ابتسمت ..
وبلقيس بحنية : ياربي محلاك فروس ... صاير حنين مع سيف ..
شاله من حضن مهره : هو كلب .. بس يشفع له الأسم ..
مهره تشيل جوالها واغراضها: ياربي ذليت ولدي باسم ابوك .. بغيره واسميه غازي ..
بلقيس تطفي الانوار والشاشه:يذبحك سيف ..
مهره تمشي ورى فارس على الدرج : هذا وهو سميه .. الا ان متسلط عليه .. لو بغير اسمه ..  كيف يتعامل معه ..
فارس وصل غرفة مهره .. وسدحه على السرير ..
مهره بامتنان : يعطيك العافية فارس .. تشيل عيالك ان شاء الله ..
فارس باستبعاد : رددي يالليل ماطولك ..
مهره تحط اشياءها على الكومدينه ..
فارس لحف سيف وتنهد :
احس ابوي انعدمت ثقته فيني ..
رفعت راسها له : ليه .. ايش صاير ..
فارس بضيق : تخيلي كلمني ثنعش وربع .. وقلت له اني جيت .. ماصدق .. الا يوم كلمته سناب فديو ..
مهره انصدمت يعني يدري ان فارس هنا .. وكان يبي يكلمها ويبي عذر ..
نفضت راسها : وليه طيب .. ايش خلاه مايثق..
فارس: من كم يوم .. قلت له اني باستراحة ذياب ورحت القهوة .. وخلاص .. تقولين لك سبوره ومسحناها .. ماعاد يثق ..
ابتسمت: ماعليه .. مو عدم ثقه .. زيادة حرص .. انت شفت جديده شسوت فيني .. وقت جيتكم قبل الزواج .. لعبت في حسبتي .. لو بزعل زعلت .. على كثر ماتحرصني على الغطا والستر ..

فارس توجه للباب بيطلع : ياشيخه .. لقد ولدنا احراراً..
ضحكت : الخلا بس .. افسخ وقل ولدنا احرار..
ضحك : تصبحين على خير ..
مهره : تلاقي خير يا امك ..
ابتسم فارس على كلمتها ..وطلع ..
مهره .. ناظرت جوالها  مده.. وتنهدت وماتبي تفتحه .. سحبت منشفتها .. وراحت الحمام ..

في تزامن غريب سيف ظل يحدق في الجوال .. واطلق تنهيده ضايقه ..

ياوجودي لاسرى الليل والخاطر حزين
من صدوف الوقت مافيه شيٍ يسعده.

*****