رواية مبعثر فيك ماللحزن لايشفى الفصل الثالث عشر 13 - بقلم ايمان يوسف🕊️

البارت الثالث عشر

ـآصويحبي لاصرت أحبه ومغليه
‏تموت حساد الهوى في مهلها ..
والله أحبه حب ماني بمخفيه !
‏حب سكن بأقصى الضماير دخلها .

طلع الصبح بعد ليل طويل ..
اعتدلت مهره من نومتها على الأريكة .. حركت رقبتها بوجع .. من نومتها الغلط ..
انتبهت لسيف جالس على الكرسي ويناظرها..
دلكت كتفها وذراعها: صحيت ..؟!
سيف : وانا عرفت انام ..اغفي واقوم ..
مهره تحرك رقبتها بوجع..
سيف: وراك نايمه فيذا ..؟!
مهره بنص عيون : عاجبتن الاريكه .. ع الاقل مايكون جنبي واحد يستغفلني يقول..مسافر لحاله .. وهو معه احد ..
ضحك بتهكم:ياشيخه ..!
ناظرها : ماشاء الله ركزتي صح في كلمة فارس هذي ..
مهره تقوم وتسفط البطانية:
انا ماكنت بعارض لو بتاخذها معك بس ماهو حلو .. تقول رايح شغل .. وانت رايح تجدد العسل مع نوف..
سيف : يعني انتي مصدقه اني خذتها معي .. واني كذبت عليك يوم قلت لك رايح لحالي..
مهره هزت كتفها : هل فارس جايب كلامه من كيسه .. اكيد درى وحب ينورني ..
سيف يشعل سيجار :
نوف جات لحالها ولاهو بشوري .. ولا كنت مرحب بجيتها.. ظلت ليله .. ورجعنا.. ماكانت معي من اول الرحلة ..

شردت والغيره تذبحها .. بس هي زوجته ..
زوجته اللي بتعطيه كل شي ..
زوجته الصح ..!
ماهو مثلي مع وقف التنفيذ ..
سيف حرك يده قدام عيونها : الووو ..
تحركت من شرودها :
يومك تكلمني وظلينا ساعه وشوي .. كانت جنبك ..
سيف : ايه.. وكانت نايمه ..

مهره والقهر ياكلها .. مالها حق تعترض ابد..بعصبية:
عادي يعني كان قلت لي .. على الأقل قفلت من باب الذوق ..
سيف طفى السيجار ..ووقف :
ماكان فيه صالح من اني اقولك واعكر مزاجك .. جات ورجعنا .. وانتهى ..
مهره بعصبيه تحط البطانيه في الخزانة :
وليش يتعكر جوي .. زوجين ومع بعض .. ايش فيها يعني ..اتعكر لما اتصل بالليل .. واصير عذول .. يعني جد آسفه .. حسيتني لاراحمه ولا مخليه رحمة ربي تنزل ..

راقبها سيف وهو وراها..ترتب شغلات طاحت من الخزانة بعصبية .. وتكمل :
الحرمه جايه .. وتبي تسوي مفاجأه لك .. وتعيش معك اجواء .. يالله لو يرجع الزمن ان كان ماتصلت .. ليت انكسرت يدي ولا دقيت .. احراج والله ..
فاجئها لما ضمها من وراها .. وخبى وجهه برقبتها وهمس :
ماعاد فيني يامهره .. ماغيرك يهزني والله .. كسرت خاطرها .. ماقدرت .. اذا مخك شطح رجعيه ..هذا انا وعلى حطة يدك...

ارتجفت بين يدينه .. همست: صدق ..؟!
سيف ويهمس في اذنها:واللي خلق عيونك اني صادق..
لفها ناحيته وناظر عيونها :
مابغيت احوسك واضيق صدرك  .. نوف وجودها كان محبط لها .. بس السؤال .. فارس من وين درى .. وواضح ان متضايق  وشايل بخاطرة.. يتكلم .. وكني طايح من عينه ..
مهره بحيره:مادري ..ممكن سمع صوتها وقت يكلمك .. او هي متواصله معه ..
سيف : ماصار بيني وبينه مكالمه وهي جنبي .. وحتى نوف ايش مصلحتها تقول له ..
مهره حطت كفها على خده :
درى وانتهى ..لاتعيد معه هالسواليف وتضايقه..انا ببدل .. وبروح اشوفه كيف وضعه ..
سحب يدها وحب باطن كفها ..
التقت عيونهم في نظره عميقة ..
ابترتها مهره ..
وهي تروح ..!
تنهد سيف ويضغط عيونه باصابعه .. !

*****
سعود وموضي على الفطور ..
موضي : ايه راحت وقلبها وراها .. مانامت وهي تهوجس على ولد اخوها ..
سعود :حسبي الله ونعم الوكيل .. هذا جيل .. تيم ولد علي ماوصل العشرين .. بس ولد ابليس ..الله يلعن من رباه ..
موضي : الله يهديه ولايوجع اهله فيه .. حفر لهالغافل .. وهو اللي سقط بحفرته ..
جاهم صوت فارس : وين جوالي ..
التفتوا اثنينهم .. ابتسم سعود : يالله حيه .. شلونك يبه ..
فارس بصد : زين ..
موضي قامت وباللهفة : تعال امي ..افطر دامك صحيت .. مابقى فيك دم يابعد روحي ..
فارس بجفاء : ماني جايع ..
وراح يمشي ناحية الكنب .. ولاحظت موضي انه يعرج: وش فيها رجلك ..

فارس واضح يدور جواله ع الطاولات .. والكنب : جوالي وينه ..؟! ..
موضي بعصبية: رد علي فروس .. احد يطنش امه كذا ..
فارس ويده بجيب الجاكت .. ورافع قبعته على راسه.. ومستمر يدور :
لما جيت البارح .. اكيد جوالي وقع من جيبي .. لقيتوه ولا ..
موضي بزفرة : مالقيناه ..
مرت جودي .. فارس : تعالي انتي ..
جودي : ايوه ..؟!
فارس : روحي مكتب ابوي .. يمكن تلقين جوالي على الأرض جيبيه ..
جودي : انا سوي تنظيف مكتب .. مافي شي ..
فارس جلس على الكنب .. واضح مو قادر يوقف اكثر على رجله ..
موضي : قل لي يمه .. وش فيها رجلك .. وش يوجعك ..
فارس .. ويده تضغط على ساقه .. بدون يناظرها:مايوجعني شي ..

موضي رجعت لطاولة الفطور .. ومو غريب عليها تصرف فارس ولا جفاه وحدته .. ربت ثلاثه كلهم نفس الطينة ..

سعود بخفوت وهو يشرب قهوته :
خليه .. يطخ من راسه .. ماهنا الا روؤس يابسه الله يدفع البلاء ..

نزل نواف .. وهو متجهز للعمل .. جاء ورى فارس ومسك راسه وحبه :الحمدلله على السلامة ..
فارس ببرود : يوم خذتني من المركز .. جوالي كان معي ولا ..؟!
نواف طلعه من جيبه: عطوني اياه المرور .. لقوه في السيارة..

ناظر الشاشة المكسورة .. خذه ..
نواف وهو يروح ناحية الطاولة:
انكسر بس يشتغل ..
فارس ماعلق .. فتحه.. ودق رقم .. لكن لارد..
نواف اختلس النظر له: قم افطر .. بلاك قاعد فيذاك..
فارس يكرر الإتصال على رقم ثاني : مابي .. كل انت .. عوافي ..
نواف يداعبه: ماتمر .. لازم عشيري يقابلني .. قم ابوي وجهك اصفر ..
فارس و باين قافل .. ماتكلم ..

نزلت مهره شايله سيف : خلاص صرت كبير .. ذبحتني ..
سيف ضامها وبمرح : مابي امسي ..ماما ساطر(شاطر) سيلني ..
ضحكت: نصاب ..
نزلته ع الارض .. وراح بسرعه لسعود .. تلقفه وشاله: هلا جدي .. هلا ..

سلمت مهره .. والتفتت على فارس جالس في الصاله ومو على السفرة ..
راحت عنده : صباح الخير ..
فارس : صباح النور ..
مهره تحط كفها على جبينه .. وتجلس على الطاولة قدامه: لا الحمدلله .. راحت السخونة ..
فارس بعصبية : مهره كلمت اخو ذياب مايرد .. ولاهيثم يرد .. ابي اطمن كيف ..؟!
مهره وهي جالسه قدامة: الحين تسع يمكن الناس نايمة .. مداومين .. ماتدري وش ظروفهم .. اصبر شوي واتصل ..

مد رجله بشكل مستقيم وتغيرت ملامحه بوجع ..
مهره: وش فيك .. تونس شي؟!
فارس: مادري .. البارح ماكنت احس بوجع .. من صحيت ورجلي توجعن حيل ..
مهره زاحت وسوت مجال جنبها واشرت على الطاولة : حاول ترفعها هنا اشوف ..

رفع رجله جنبها..
موضي بخفوت عاتب: وانا مايرد علي ..الله يخلف عليك ياموضي ..ربيت ولغيري صفيت..
نواف ياكل وبخفوت وابتسامة:
يعني خلينا واقعين يمه .. وقت انتي انشليتي ومو عارفه توقفين هنا .. البنت وقفت واستقبلت كف ولدك اللي فر وجهها ..
سعود ضحك :والله انك صادق يانواف..
موضي : يعني انا اللي غلطانة..وانت ورى مادليت بدلوك ..
نواف مد شفته :
انا كنت مؤيد كل شي جاه وخاصه ماكنت ادري انه مظلوم وملعوب عليه ..
موضي : مادري من وين لكم قوة هالقلب .. حسبي الله على ابليسكم ..
مهره ترفع بنطلون فارس عن ساقه .. شافتها متورمه شوي ..وصايره مزورقه..

نزل سيف ..وعقد حجاجه .. ومهره ماسكه رجل فارس وتخليه يحركها ..
وقف يراقبهم .. مهره: هي مو مكسورة.. تحركها يعني .. بس واضح انرضت..
سيف : قم نروح المستشفى ..
فارس سحب ساقه ونزل البنطلون .. وبجفاء: مابي اروح مكان ..
سيف مسك رجله ومدها ثاني .. لدرجة عور فارس .. رفع البنطلون ..وضغط عليها .. وفارس يتوجع ..
مهره : باين ملتويه او منرضة .. فارس لازم يشوفك دكتور .. ويسون لك عليها تصوير ..
فارس بعناد : بتخف ..
يتكلم ولايلتفت على ابوه ابد ..
سيف يناظره .. وهو صاد بوجهه ..
تنهدت مهره : طيب تمام براحتك .. قم افطر..
رجع فتح جواله:موجوعان ..

سيف ظل يناظره ..وصله حجم الشرهه والزعل .. اللي شايلهم فارس عليه ..
بعدين ابتعد وراح على السفرة ..
مهره همست : وش مشتهي تاكل ..
فارس بخفوت : والله مابي شي .. مالي نفس ..
مهره تداعبه: خليني اجرب اسوي لك فطور .. والله تاكل صوابعك وراهم ..
فارس : لاتعبين نفسك مابي ..
مهره : انا بسوي شغله مشتهيتها .. اعجبتك اكل معي .. ماعجبتك لاتاكل ..تمام .. ؟!
فارس واصلاً ميت جوع :تمام..
تركته وراحت المطبخ ..

*****
فطر فارس مع مهره ..
ومشوا سعود ونواف للعمل ..
فارس ولأنه تعبان صعد غرفته ونام .. وصحى بعد الظهر ..

اتصل على اخو ذياب .. وخذ منه العلوم .. قفل منه ونزل وهو متضايق ويكلم السواق ..

ابوه عاقد حجاجه : وين ..؟!
مارد وواضح انه مايمشي عدل ويتمسك في الدرابزين والأثاث ..
سيف بعصبية وحده: اكلمك فارس ..
مهره مسكت ذراعه .. واشرت له ..
تنهد وكرر السؤال وفارس جالس يلبس جزمته ويربط خيوطها :
تبي تروح مكان خلني آخذك ..
فارس بدون يرفع راسه:
بروح لحالي .. بشوف ذياب .. كلمت ريان وقال لي وين متنوم ورقم الغرفة ..
سيف : طيب .. نروح سوى.. ومنها اشوف ذياب ..
فارس : شوفه بعدين .. مابي اروح معك مكان .. ممكن يبه ..؟!
قامت مهره : خلاص انا بروح معك ..
رفع راسه لها : اقعدي مكانك .. ماني بزر ..
مهره راحت : بجيب عباتي واجي .. لاتمشي عني ويطلع شكلي غبي ..
صعدت ..
وفارس راح يتمشى في الصالة .. ويحاول يجرب رجله .. لكنها توجعه مره ويعرج ..
سيف يراقبه: ادخل على الدكتور .. يشوفها ..

فارس عطاه نظره جانبيه.. وراح يمرن رجله ..
سيف يحاول مايضغط عليه .. قام وراح لركن في الصالة سحب عصا تخص سعود ..راح عنده وحطها على الأرض : تعكزها ..لاتنلوي رجلك ..
حاول يكابر..لكنه خذها .. نزلت مهره: مشينا ..
تقدم عليها : يلا ..
قبل تطلع مسكها سيف: مهره اقنعيه يدخل للدكتور يشوف رجله..
مهره : تمام ولايهمك ..
سيف: الله يحفظكم ابوي..

*****
بعد قليل-المستشفى ..
مهره ظلت جالسه على كرسي في احد الممرات ..
وفارس لبسوه شغلات معقمة .. بعد توسله لهم .. ولما توسطوا ابو ذياب واخوه  ريان .. لانهم عارفين كيف صداقة ذياب وفارس قويه ..!

ودخلوه يشوفه..
فارس يقرب ودموعه تنزل .. ذياب محاط بالاجهزة والاكسجين ..
صدره ملفوف بشاش بعد الجراحة..ونايم بعمق تحت تأثير البنج والمسكنات ..

تخيل صورة ذياب وهو يصرخ في تيم :
لو انه صاحي ماراح معك ..
-وانت وش دخلك ..؟! .
ذياب : والله ماخليه ..
ذياب وهو يقنعه يبقى ويسحب فيه .. وهو تحت تأثير الحبوب
اللي حطها له تيم .. كان مُصر يطلع ويكمل الفله بره :
فارس ان طلعت معه بتندم .. خلك ..تكفى فارس .. استوعب اللي اقوله لاتروح .. ترى ناوي لك شر ..
تيم يسحبه ويركبه قدام ..
ذياب .. جاء وركب .. ومُصر مايخليه ..

سحب فارس الهواء وماعرف يطلعه .. مسك كفه .. و بصوت مبحوح:
تكفى ذياب لاتخلين.. والله ماتصلح الدنيا دونك والله ..ماعرف يمر يوم وماشوفك .. كيف الأماني والطموح وش نسوي بها.. وحدي ماقوى عليها تكفى ياذياب قم وانا اخوك   (فارس وذياب .. اصدقاء من ايام الروضة..علاقتهم مره قوية)..
تمنى يكلمه .. اويفتح عينه .. ليتها ترف ..لكن ذياب لايستجيب..

بعد شوي..
افتحت الممرضه الباب .. تنبهه انُ لازم يطلع ..
فارس باس جبينه .. وهمس:
استودعتك الله ..بجيك ثاني وانت صاحي .. اتفقنا ..

طلع .. وشال الشغلات اللي لبسوه .. راح وهو يتعكز عصا جده .. لمن وصل لمهره ..
سألته عن وضع ذياب .. جلس جنبها .. وخبى وجهه بكفوفه :تعبان .. حيل تعبان يامهره .. ماكلمني ولا فتح عيونه ..
مهره : سمعت اخوه وهو يقول .. انو تحت تأثير البنج .. ان شاء الله يفوق .. والزيارة الجايه تسولف معه ..
فارس ارخى راسه ورى ..وبعد لحظة صمت .. تنهد وبحنين وذكرى :
اول اسبوع لي في الروضة .. كنت ابكي .. وخايف ورهبه .. وامي موضي تداوم معي يومين وامي سلمى يومين .. وسببت ازمه فالعايلة .. لمن تعلقت بذياب .. كان يجي يومياً.. ويجيب معه حلويات وشبسات .. والعاب .. وبالنصيفة .. مع اني اجيب معي .. بس اتحمس للشغلات اللي بيجيبها لي هو..عدينا الروضة..
وبحكم انُ ساكنين بحاره وحده ..كملنا كل الدراسة سوى.. مهره.،تدرين لو ابتدت السنه وفرقونا بالفصول ..
اخلي ابوي سعود يجي يكلم الإدارة .. ويجمعونا سوى .. كيف يعني .. لو يصير في ذياب شي .. كيف اكمل كل شي دونه..؟!

مهره مسكت كفه .. تجمعت غصه بحلقها : فاول بالخير ..الولد بيصحى .. وبيرجع لك ..ادعي له امي ..ادعي له ..
فارس بصوت مبحوح: ياااارب ..
ظلوا شوي ومهره محترمة صمته ..
لمن رفع راسه .. ولقى هيثم واقف عند زجاج غرفة يناظر ..
قام  : شوي مهره وبجيك ..
ناظرته وهو يروح .. تيم بالغرفة ولا يقدرون يدخلون له .. !
وقف معه فتره .. وكان بينهم نقاش ..!

****
في البيت- المغرب ..

موضي والبنات ..يضبطون المكان .. عشان الضيوف .. لأن انتشر خبر حادث فارس .. ومتوقع يجي اي احد بأي وقت..

رن الجرس .. رفعت جمان راسها : لا عاد بدري كذا .. من اللي بيجي الحين ..
بلقيس: اذا احد غريب .. دخلوه غرفة الضيوف .. سيف ونواف فوق ..

افتحت العاملة الباب ..
وموضي راحت تستقبل الجاي ..
واذ بها نوف..
جايه بباقة ورد وكيس لمحل شوكلت راقي .. ارتبكت موضي  وهي ترحب فيها وتدخلها..
بلقيس بخفوت لجمان: وش جابها ..؟!
جمان ماعجبها الوضع : مهره بتجي مع فارس ..والله والبنت مو ناقصه مغثه يكفي اللي جاها ..
نوف تجي تسلم ومسويه مُلمه بالوضع وانها من اهل الدار ..
بعد ماجلسوا ..
نوف بتملق :اخباره حبيبي فارس .. والله اني ارتعت عليه..

جمان بخفوت لبلقيس جنبها :واضح .. من الروج العنابي ..
لكزتها بلقيس :كلمي سيف .. لاتجي مهره .. الحين ..
جمان فاهمه نفسية نوف:
هي جايه تبي تشوف مهره اصلا ً .. حادث فارس حجه ..
نزل سيف وشافها .. عقد حجاجه .. وتقدم ناحيتهم : وش الرياح اللي هبت واحذفتك فيذا ..
نوف تضحك بتسليك :
ماشاء الله صاير تنكت ودمك خفيف ..
سيف بعصبية: نوف اقصري الهرج .. وش جايبك بدون حتى تقولين ..
نوف حطت رجل على رجل :
جايه اتحمد سلامة فارس .. لازم استأذن .. معروف بتفتحون البيت .. وبيجونكم الاحباب .. صح ولا ياخاله ..
موضي :صح يابنتي .. وحياك الله .. اقعد سيف .. والحرمه جايه تقوم بالواجب ..
تلفتت نوف : وينه حبيبي فارس .. ماشوفه ..
سيف وده يطحنها ..!
فارس خلقه مايطيقها ..
ومهره بتجي ..
الله يعديها على خير ..

*****
سكرت مهره الباب ..بعد ماركب فارس وركبت جنبه ..مسكت رجله المجبره تعدلها ..
فارس:ماكان له داعي يجبرونها ..
مهره: قل الحمدلله .. ان احنا دخلنا للدكتور .. حتى لو مو كسر تعورت وترضرضت .. لو تركتها بتزيد ..

حرك السواق .. وفارس تكلم بشرود:
الحمدلله على كل شي ..
التفت عليها : مهره .. صدق الحمدلله حتى على الحادث ..
مهره باستغراب : ايه الحمدلله يابوي .. والحمدلله ان الله حفظكم وطلعكم ..
فارس رجع شرد :تدرين شيقول هيثم ..

عقدت حجاجها تنتظره يكمل ..
فارس بغصه :تيم ماكانت نيته فيني بس كذا .. زعمه .. اني انا مستشرف .. واني مترفع عنهم وشايف نفسي .. كان نيته لا استويت من الحشيش .. وبعد مانفحط .. وادوخ .. كان بيرميني في استراحه للناس قاضية.. كان ناوي ..
وسكت وغص بالكلام .. مهره افهمت وانفجعت ..
فارس مصدوم من عقلية تيم وانتقامه الشيطاني ..

كمل بصدمة: تخيلي كان ناوي يسوي لي فضيحة .. ويشوه صورتي عاد لمن اموت ..
لاحظت مهره  كفه ترتجف ..
يتخيل هول الوضع لو انه صار ..
مسكت كفه واضغطت عليه:
انسى .. الله عالم بنيتك .. وهو اللي منعه ورده .. وسبحان الله هذا هو طايح بالمستشفى ..

مهره تبي تغير الموضوع ..
سولفت معه عن شغلات ثانية.. لمن وصلوا البيت ..!
.
.
.

في الصالة ..
نوف حطت فنجالها ع الطاولة .. وناظرت سيف الصغير : ياحليله .. من ولده ..؟!
جمان : ولد عساف الله يرحمه ..
نوف لسيف بخبث: ولد زوجتك يعني .. بس والله يشبهكم ..باين مايشبه امه..
سيف وعارف خبث نوف ودقها في الحكي ...
رفع حاجب والفنجال بفمه.. نزله :
مايشبها احد يانوف .. زينها واجد على ورعنا مايقوى يشيله ..
موضي تنحنحت .. على العيد اللي جابه ..
ونوف انقهرت .. وتغيرت ملامحها ..
بلقيس شالت صحن الحلا تضيف:
وحيالله نوووفه ..
نوف : يحييك حبيبتي ..
جمان لكزت سيف وبهمس: الله لايضرك .. لسانك مشرط مايرحم ..
سيف بخفوت : قومي شوفي اي عذر وادخلوا غرفة الضيوف .. قبل تجي مهره ..
جمان: تمام ..

قبل ماتسوي جمان شي.. انفتح الباب ..

(مهره)
'دخلت وفارس يتعكزني بيد .. واليد الثانية يتعكز العصا ..
حسيت ان في احد غريب من الهمهمات .. في الصالة الجانبية.. ونفس الشي قلبي انقرص .. لما سمعت صوت سيف معهم:
هلا ابوي حياكم ..
فارس ضغط على كفي بقوه وهمس:
نوف .. هنا ..
وحسيت بيد بارده تعتصر قلبي.. ماكنت ابي التقي باي انسانة ارتبطت فيه .. مابي اشوف انثى خذته اكثر مني ..
بس ابتسمت بدون ارفع راسي عليهم ..لابد من هذا اللقاء ..
تشبثت بذراع فارس .. وكأني بدل ان اسنده .. هو يسندني .. واقبلنا عليهم ..
ووقعت عيني على نوفه ..
موضي بارتياع: ياويلي جبروا رجله .. اجل مكسورة ..
مهره  توصل فارس لمن الكنبه وتجلسه:
لايمه .. مو مكسورة .. بس انرضت مره ..الدكتور قال لازم الجبيرة تظل اسبوع .. عشر ايام كذا ..
مهره ترفع رجله على طاولة صغيرة.. وفارس يقول :
يبالغ .. بس بشيلها ..
مهره : انكتم .. ماراح تشيلها الا لاسمح الدكتور ..
وقفت وغمزت لسيف :
دخلناه الدكتور وسوينا اشعه ..وجبرناها بعد .. شرايك .. ؟!
سيف ببتسامه: كفو ..ابوي ..
مهره التفتت ..على نوف وراحت تسلم عليها: اعذريني .. كيفك ..؟!
نوف وملامحها تغيرت .. ومهره تفك شيلتها وتجي تصافحها وتبوسها ..
في داخلها ( الآن عرفت لما سيف تغير .. لما صام عنا واعرض .. لما تبدلت مفاهيمه وعواطفه .. وكل شيء نحونا ..انا وهيا )..
بلقيس : نوف ..هذي مهره .. مهره نوف ..
لكن نوف .. رغم ارتباكها الا انها ماتخلي حركاتها :
ماشاء الله .. فكرتك خطيبة فارس أول ماقبلتوا .. صايرين كابلز ..لايقين على بعض ..
عقد سيف حجاجه .. وفارس .. دمه بدء يفور ..مقاصد نوف وسخه ..وطُرقها ملتوية ..
بس فجعتهم مهره لما ضحكت  والتفتت على فارس بنظرة :
بالله ..صدق الواحد مايحكم من اول نظره .. انا اول مالمحتك .. وشفت سيف جالس .. فكرتك عمته.. اللي ماشفتها .. طلعتي زوجته..!
فارس حشم الوضع والا كان بيصرخ : بوووووم ..
بس اكتفى ببتسامة ..
سيف .. احتفظ ببتسامته بداخله .. ومات على شقاوة مهره بالرد ..
الباقين .. وجوهم اشكال والوان ..
نوف بصدمة :
انااا .. عمته .. ؟! .. الله يسامحك ..
مهره تشيل عباتها :
يعني قلت لك .. من باب التخمين .. نفس ماخمنتي .. اني الحُب حق فارس وانا امه ..
نوف لمت قبضتها بغضب..
ومهره تنادي الخادمة: جودي ..
وذيك جات ..عطتها مهره العباية: اخذيها لغرفتي .. وجيبي لي سكارف كبير ..
صعدت الخادمه تنفذ ..
مهره وقفت ترتب شعرها بيدينها .. وتنزل بلوزتها على البنطلون ..
سيف : اخبار ذياب .. وش وضعه..؟! ..

جمان قامت .. وتركت لمهره مجال تجلس جنبه ..
مهره : ذياب مسيكين تحت البنج .. والمسكنات .. بس طمنونا على وضعه .. وبعد ماخلصنا من جبيرة فارس .. رجعنا طلينا عليه .. طمنا اخوه انه بدء يفوق شوي .. بس مارضوا ندخل خلاص .. انتهت الزياره .. !

سيف : الحمدلله .. (والتفت لفارس.. رفع حاجبه) : كان نذرت على سلامة خويك .. اذا الله اخرجه من المستشفى..
مهره ابتسمت :انذر فارس .. على جلده ..
فارس بنص عيون : والله بنذر نذر يوهقك..
سيف ضحك: انذر ابوي .. ونذرك في رقبتي ..
فارس : تشهدون ..!
كلهم : نشهد ..
فارس : نذر لاقام ذياب بالسلامة... اسوي له عشاء بعشر روس غنم .. وفوقها شيك بعشر الاف .. هدية سلامته..

وناظره .. يعني انت اللي وهقت نفسك ..
سيف : تم ..يستاهل خوي ولدي ..
مهره بشطانه: هذا نذر سلامة ذياب .. سيف سلامة ورعنا ..وش له ..؟!
فارس :يوفي لي نذري في ذياب .. وانا مابي شي..
سيف: والله ياهي عاد اجتمعت .. رضاوة وسلامة .. انت الخسران ..
جمان : اطلب ..لاتفوت الفرصه..
فارس بكبرياء .. ويختلس النظر لنوف: الله يغنيني ..
شافها كيف تحدق بمهره .. وكنها تبي تقوم تخنقها ..
عرف من مهره من شوي ان ابوه ماكان يكذب .. وفعلاً  كان رايح لحاله ونوف جات هناك ..
تعجب من حركات نوف في سناباتها له ..!.
واصلا ً لاهو ماين معها ولاشي ..
الا انها فاهمه انه متقبل مهره ولاهو متقبلها .. وهي عارفه هالشي . . من ايام الزواج وسناباته ..
فاهي تفكر انه بيعرض الصور على مهره وبيسوي كهرب بينها وبين ابوه ..!

الجلسه كانت متوتره .. الا ان الجميع .. اعطى جو ان الأوضاع عاديه .. مهره  تحترق من داخل .. وخاصه لما تقول نوف موقف يشاركها سيف فيه ..

التفتت له كانت ذراعه ع الكنب وراها .. لاصقه فيه وكنها تبي تعلم نوف والعالم كله .. ان في النهايه هو لها .. لها لحالها ..
شعور انثوي لايمكن شرحه ..
كيف تمسح تاريخه مع النساء .. وتستأثر فيه لنفسها وحدها ..
ابتسمت وهو يناظرها ..وحركت شفايفها : بطعنك ..
سيف بيضحك .. بس لمس رمشها بظهر صبعه كنه يبعد شي عالق ..
بس مهره صارت تفهم سيف لما مايقاومها .. يلمسها بعذر .. انو يشيل رمش طايح .. ولا شي عالق ..
فاتوردت خدودها .. يعرف كيف يخرفنها ..
قامت .. وفي تفكير انثوي آخر ..خافت من الحسد ومن العين ..
صبت بيالة ..
خذتها لفارس ..
مدتها له : تقهوى امي .. شفيك مفهي وساكت..
خذ الاستكانه:سلمتي..(وابتسم ويداعبها): يمه ..
توه بيشرب الشاهي ..انتبه لعيون نوف .. ونظرتها الغريبة ..
فارس : فيه شي نوف .. ليه تناظرين كذا ..؟!
نوف باللهجة عتب وغبن ماقدرت تكتم داخلها:
وش كان يضرك يافارس .. لو عاملتني كذا .. كله كاش مني .. ولاتطيقني ..
سيف بتحذير : نوف ..؟!.
نوف : عادي سيف تسائل .. وفارس كبير وفاهم ..
فارس حدق فيها .. بعدين رفع الاستكانة وناظرها :
الفرق يامرت ابوي العزيزه ..انُ مهره نفس الزجاج هذا .. تشوف داخله .. وتعرف وش فيه .. عكس اللي معتم .. وحركاته غير واضحه .. ويلف ويدور .. ويقرب عشان مصالحه هو .. وبس ..
عقدت حواجبها وبعصبيه: الله .. انا تشوفني كذا .. ؟! ..
ابتسم بسخرية : عمر ابوي ماعطاني مشغول الا لاصار عندك .. والمصيبة .. ان ثاني يوم يكون مايدري عن اتصالي .. لانك انتي بصبعك الكريم تقفلين الاتصال .. وتحطين الجوال صامت ..
ارتبكت: من جدك .. شهالتفكير ..

سيف انصدم .. من كلام فارس ..
فارس : خلينا من الاتصال .. انا جيت لابوي عند الباب .. وكذبتي وقلتي مشى وسيارته بره .. انا من كيفي ماعلمته .. لأني عارف هو وش بيسوي في اللي يحول بيني وبينه .. عطيتك على جوك .. وماحطيت عقلي بعقلك ..
نوف : الله يافارس ذاخرها بقلبك .. ترى كان جد مشى ..
فارس التفت لابوه : انا مشيت واتصلت وقال انه في البيت .. اصلاً عشان ماظلمك .. كلمته فديو وطلع ببيتكم ..
نوف ماعرفت شتقول .. تحسفت انها تكلمت .. جمان قرصت بلقيس وقامو .. من المكان ..
مهره .. كانت بتروح .. مثل جمان وبلقيس ..
بس فارس مسك يدها : لاخليك مهره .. هي تسأل ليه انا معك كذا ومعها كذا ..
مهره بارتباك : خلاص قفل الموضوع فارس .. هي جاية تتحمد لك السلامة .. امي خل الماضي ماضي .. ويمكن انت فاهم خطأ..
سيف بعصبية وهدوء:
لامهره .. خليه ..خليني اعرف .. وش هالحمول بقلب ولدي ..
موضي :فارس امي ... اكيد نوفه ماتقصد .. يمكن يكون ابوك مشغول .. او عندهم شي ولاش ..لاتفهم خطأ..
فارس : انا ماني سفيه يمه ولامتطفل .. ترى معطي ابوي جوه .. وكل هالامور ساكت عليها واكثر .. وياما تحملت حركات من نوف واشكالها .. بس في ** كلهم ..
مهره بانفعال: فارس .. !!!
فارس ببرود : هم انبشوني .. وخليهم يسمعون .. نوف تنقهر .. من العز اللي معيشني ابوي فيه .. وتنقهر من كلامه لي .. وتغار .. حتى مره قالت لي .. والله بجيب له ولد .. ينسيه اسمك واسم امك ياولد نجود ..
سيف لم قبضته بقوه ..
وفارس هز كتفه: مارديت عليك وقتها .. لان حسيت عقلك صغير .. ادري لو يجيب ابوي قبيله .. يبقى فارس اولهم وفوقهم كلهم ..
نوف : كنت امزح معك .. لاتصير حقود يافارس .. والله ماشوفك الا ولد لي ..

فارس ضحك بتهكم :
عشان كذا ترسلين لي صور ابوي في دبي .. وهو راقد وهو يدخن .. وغداكم .. ومشترياتك .. وتتغزلين فيه .. وتكتبين ع صور كلام رخيص .. عشان اوريها يعني مهره .. واخرب بينها وبين ابوي ..وتعطيني انطباع .. انُ الرحله لك .. وهو يكذب علينا انُ رايح للمزاد ..

سيف مصدوم من الخفايا .. والاشياء اللي كاتمها فارس ولايقولها ..هب واقف .. وبحده مكتومة :
نوفه تعالي ابيك ..
نوفه بتبكي : لحظه سيف .. والله فهمتني خطأ..

سيف راح ناحية الباب : انا بره .. اخلصي ..
نوف تلف شيلتها وتطلع بسرعه ..
مهره بصدمة:
وش فيك جبت العيد فارس ..خبل انت ..
فارس ببرود: خليها تنقلع انا ساكت عن هالناقصة بمزاجي... والله كانت هيا احسن منها .. بعيده ومحترمه .. ولا ذي ساحره و سوسه .. تمشي ورى مصالحها نفس النمل على السكر ..
موضي بتعجب :
شهالحكي اللي طلع منك ياقليل الحياء ..عنبوك بتخلي ابوك يرمي عليها اليمين ..
فارس : ياليت .. نفتك من عاهه ..
جمان وبلقيس جاوا ..
جمان : يمه منك .. بعير .. حاقد ..
بلقيس : بس صح كلامه .. خير منهي نوف تتعامل مع ورعنا كذا..
مهره :بس ولو .. غلط فارس .. ترى هي جايه عشانك .. تصرفك أوفر ..
فارس : انا نظامي في عشرين عشرين .. النسف .. ماعاد اجامل احد .. ولا استر على احد .. ولا اراعي احد ...كنت اعتم على اسلوبها عشان ابوي .. اقول مابي اغثه .. هالحين حتى ابوي بغثه ..والله لاصير حصاه ببلعومه ..
توسعت عيونهم كلهم ..
مهره : يووووووووه ...
جمان ضحكت: شفيك صاير شراني ..
فارس : تعبت وانا اعطيكم وجه .. يوم الله كتب لي عمر .. بصير عقوبه للجميع ..بسوي فيكم النون ومايعلمون..
بلقيس بحماس: كسسسسر يابخت البيوت اللي تكسرها..

******

نواف مع فارس في الغرفه ويأنبه: خبل انت ..فوق شينك قواة عينك .. احرجت المره ..
فارس بلامبالاة وهو ياخذ مسكناته:
ماراح اهتم لأحد .. طالما الكل يدوس على مشاعري ..
نواف : شفيك صاير سادي وحقير.. يا** ترى ابوك شوي بيرجع لندن .. واقعد تندم على افعالك معه ..
فارس: ماضريت ابوي .. بالعكس .. نورته .. خليه يعرف هالدوده الشريطية ايش تسوي من وراه ..
نواف : وانت الحين ضامن مهره ..ماتطلع افعالها كلها نفاق وكذب .. وكلها عشان غايه في نفسها..
فارس يتلحف :
لامو خايف .. شف انا قلبي يدلني .. واعرف اللي يحبن صدق .. واللي مصالح .. انت مادري ليه ماتثق فيها وصاير عدواني معها .. ترى لو يحس ابوي بيزعل ..

نواف شتت نظره: مابيني وبينها شي .. لا عداوة ولارضا ..
ودق رقم سيف : وابوك مقفل جواله .. ياخي افلامكم ماتنتهي .. كل ليله موسم جديد ..
فارس : خلاص اطلع بنام .. لايصحى سيف ويجي يلصق جنبي .. اخاف اقط هالجبيره عليه واموته ..
ابتسم نواف .. وهو يلتفت على سيف النايم .. راح جنبه .. ظل يناظره بحنيه ..
لمس شعره واذانه .. التفت لفارس: شغل التكيف .. الغرفه بارده ..اذان الورع مثلجة..
فارس : حط عليه بطانية زيادة..الا المكيف الحار ماتحمله ..
نواف: طيب دفايه .. شي ..ترى شريكك في الغرفة .. بيتشنج ..
فارس :عادي نواف .. في قبعه جنبك لبسه .. مهره تقول عادي .. سيف متعود حتى هي ماتشغل ..
نواف يدور ..
ولقى قبعه صوفية.. ولبسه .. وظل جاثي جنب السرير يتأمل ملامحه .. يلمس خشمه وحاجبه ..
فارس غمض شوي وفتح:
وراه .. ؟!
تنهد نواف ووقف : ولاشي.. تصبح على خير ..
فارس: تلاقي خير..

******
*همت في الشوارع .. مخنوق .. ماتوسعني الأرض ..
ضيعت فارس .. يتمته بوجودي .. يقترب مني واضمه .. ماقصر معه بشي ..
لكنه بعيد..
نوف من تكون يتصل علي وتعطيه مشغول .. لوكان محتاجني .. لو كان في مصيبه ..!
روحي اهو ..!
لعنت نفسي على كل لحظه دورني .. ولالقاني .. على كل ضيقة صدر كبتها وماقالها ..*

وصل البيت في منتصف الليل ..
صعد لغرفة فارس ..
دخل وقرب من راسه .. جلس جنبه .. باس جبينه  الملفوف بالضمادات ..
لاحظ المصحف الصغير .. يبين من تحت مخدته ..
سحبه وطلعت معاه سلسله ذهب فيها قلادة عليها آية الكرسي .. فردهم بكفه.. تأملهم بغصه ..
مسح دمعته قبل تطيح ..
كانت تحطهم نجود تحت راسه من ولدته.. وكان يأنبها انها تخاريف وحركات عجايز..
ناظرهم ورجع يناظر فارس ..
حدق فيه .. متى كبر فارس كذا .. تأمل شنبه الخفيف ..
لمس وجهه وانصدم .. !!
من متى فارس يحلق دقنه ..
متى اول مره مر الموس على وجهه ..
من علمه ..؟!
نواف ..
ولا أبوي .. ؟!
ولابداها بلقافه..؟!
اففففف .. والله اني قريب منه .. بس ذي التفاصيل كنت انتظرها ..
كنت ابي اكون فيها ..!
كيف ..
ويني ..ويني عن كل هذا ..!
آااااه يافارس آااااه ..

رجع المصحف والقلادة تحت المخدة .. باس خد فارس ويده:
*خلص هالسنه وماهو كيفك تظل بعيد عني .. والله ماخليك يوم ياولد نجود ..!*

طلع .. وماراح غرفته ..صعد الدور الثالث .. اكيد مهره نامت ومايبي يضايقها..
والنوم جافاه ومتأرق..
فضل يجلس لحاله ..
يتهاوش مع نفسه ويخطيها ..
اقبل على غرفة المكتبة .. لقى الباب شبه مفتوح.. ونور خافت مبين منها ..
غريب .. هو من قبل روحة دبي ماصعد ..
من فاتحها ..؟!
دخل وعقد حجاجه .. لقى مهره نايمة على الأريكة ..
متغطيه بفروة تخصه ..
استغرب .. متى مهره عرفت المكان .. ومتى جات .. وكيف لقت المفتاح ..؟!
تنهد .. وقفل الباب وراح جلس على كرسي المكتب ..
حاول مايطلع صوت .. عشان ماتصحى ..
استرخى وعينه عليها ..
مهره .. وفارس .. والضياع ..!
رغم عشقه للأثنين الا انه مو قادر يجمعهم لحضنه ..
ولايستقر و يعيش حياة طبيعيه ..معهم .. !
قدح الولاعة واشعل سيجار ..
كنشت مهره وافتحت عيونها ..
طاحت نظرتها عليه ..
جالس بثوب شتوي .. وسكارف اسود .. ووجهه مُرهق ..
ارتسمت على وجهه ابتسامة باهته: نومك عالق بذانك .. قمتي من صوت الولاعة ..

ظلت على حالها تناظر فيه ..
سيف :وش جابك فيذا ..؟!
اعتدلت ..ورمت راسها على الكنب : ليش ماترد .. وين اختفيت كل هالوقت ..
سيف متضايق .. حرك راسه كأنه مولاقي النفس:
اختنقت مهره .. كلام فارس ذبحني .. عرفت اني بعيد عنه .. بعد طويل ومسافات ...
ضغط عيونه وتنهد :حاولت اقصر البعد واكون قريب ..لاصحيت اول ماشوف رسايله .. مانام الا اذا سمعت صوته وطمني عليه.. اتابع مواعيده .. حتى وانا بعيد .. يرسل لي معدله اول بأول .. مصروفه مو شهري .. اسبوعي ..باستثناء السياره ماقصرت معه بشي ..
سكت .. ومهره تنتظره يكمل ..
قام ومشى وقف قدام صورة لفارس :
وعاد قلبي .. ممتلي فيه.. ولدي .. نعمة الله علي ..يامهره الدنيا ملكتها يوم شلته ..كنت اضحك وابكي وانا أذن في أذنه.. شي مو صدق بالنسبه لي .. صغير وطايش وجاه ولد ..
مهره ابتسمت وبحنية:
ماحد ينكر ..انا اللي اموت على علاقتكم سوى وقربكم ..احب كيف تفهمون  بعض من العيون ..الكيميا بينكم عجيبة..

سيف جاء ناحيتها ومعاه صوره لفارس ..وعمره خمس سنوات ..
جلس قدامها .. ناظر الصورة :
مره في بداية سفراتي لندن بعد وفاة نجود .. فارس ظل مع امي واهلي هنا .. غبت حوالي سنه ونص ورجعت ..

ناخذكم لذاك اليوم ..
جاي من السفر .. جلس واخذ فنجال قهوة: جمان وين فارس .. ؟!
جمان : على جيه .. ماخذته امي معها بيت عمي فهد ..خالتي سلمى ذايب قلبها عليه ..وهذه تلح تقول خلوه عندي ..
سيف بنص عيون:ولدي مايربى الا عندي..
جمان : بالله عليك .. طاير عنه سنه وشوي .. وتشرط ..
سيف: اهم شي شعوري انه في حضن امي يريحني ..
انفتح الباب .. ودخلت موضي ومعها فارس بو خمس سنين ..
اعتدل سيف بسرعه وبشوق : فارس حبيبي ..
التفت بلهفه وشهق .. وعيونه تتوسع :
باااااباااااا ...
اسرع وركض وطب في حضنه .. ضمه سيف وكاد يدخله بضلوعه .. بوسه ..
وفارس يتعلق فيه .. مو مثل الطفل لما يبعد عنه ابوه ولا امه فترة .. يحس بشعور الحياء .. او الشرهه .. او حتى النسيان .. !
*بعد ان عانقته .. وبكى داخلي وانا اشم رائحة نجود فيه ..تشبثت فيه .. وظللت مغمض عيني .. وفارس يدخل وجهه في عنقي .. ظللنا هكذا ..في اعظم علاقة .. اني بابا .. لهذا الطفل الصغير.. ضممته بتملك .. حتى اني غرت من ان تكون امي امه وابي اباه .. هذا الشيء لي أنا .. اعطتني اياه فقيدتي وروحي وذهبت ..لا احد يشاركني صغيري ..فارس لي وحدي *

رفع فارس راسه .. وببتسامة حلوة وكفوفه على وجهي:
حبيبي .. بابا ..انا مبسوط.. متى جيت ..

في تلك اللحظة ايقنت اني اهملت فارس .. اتسعت عيناي .. وانا ادخل يدي في شعره الذي طال ونزل عن عنقه .. واتخذ الطريق لظهره.. وغرته التي اخفت حاجبية.
ملامح فارس جميلة وناعمة .. وعيناه كبيرتان .. ذو بشره بيضاء .. وغمازه ..
قلت بصدمة:
عنبوكم .. الولد صاير بنت ..يمين بالله ماعندكم سالفه ..يمه ليش ماحد خذه الحلاق ..
موضي بعتب:
شف لا تسوي فيها مهتم .. ولا ماهو عاجبك .. عجزنا.. تعرف شلون عجزنا .. مايبي يحلق الا معك .. ابوك وداه .. عمامه .. فرفروا فيه في حلاقين المجمعات كلها .. يبونه بس يحلق .. ولدك سوى النون ومايعلمون .. حالف مايدخل المقص راسه .. جده فهد وخاله .. خذوه .. اصلاً ام شاهين مسكينه كل ماشافته .. جابت المقص بتعدله .. يخشب من الصياح .. عاد انا اللي حلفت ..ياتجي تحلقه ولايظل كذا..

سيف يناظره.. ويجمع في شعره بغبن .. وفارس مفهي ..  يسمعهم ولايدري شسالفه ..
جمان : يعني عذراً سيف .. بس احيان والله اربطه له.. يكسر خاطري .. عيونه أكلها الشعر..

سيف رجع يحدق فيه .. ابتسم بغصه: ليه بابا .. ماحلقت .. مخلي شعرك زي البنات ..
فارس يلعب بقلم ابوه في يده:
انا ماروح حلاق .. لمن تجي بابا ..انا اقص شعري.. انت تقص شعرك .. مابيهم كلهم .. بعدين حلاق يقص اذني .. معك مايقصها ..

سيف يناظره ..
وفارس منزل راسه ويحاول يفتح القلم .. وكل شوي يشيل شعره بظهر كفه لما يخربش عيونه ..ويرجع للقلم .. وجعه قلبه .. ورجع ضمه بقوه وهو يهمس بذنه: آسف يبه ..آسف!!*

تنهد بعد ماكمل السالفه لمهره .. استمعت بإنصات .. ابتسمت : ياعمري شهالعند .. ممسكه غلط لازم معك ..
مد سيف لها الصوره : بذمتك ماكنه بنت ..
خذتها وانصدمت يجنن فارس في الصوره .. جد كنه بنت ضحكت:
يهبل ... يمه كيوووت ..
ابتسم : مارتحت من سفرتي .. شلته وطلعت للحلاق .. وجبته وانا حالقه بالمكينة.. امي زين مانجلطت .. كانت توصي فيني انُ بس بالمقص .. وخل غره .. ومادري ايش وطيرته ..بينت عيونه وجبينه .. ذاك يامهره اول لحظه حسيت فيها اني اهملته ..من بعدها قمت احرص على ادق تفاصيل حياته ..
بس بعد هالسنوات .. اكتشف ان في اشياء كثير فاتتني ..
مسكت كفوفه:
لاتلوم نفسك .. انت ماهملت فارس رغم الغياب .. سيف فارس متعلق بمبادئك .. مؤمن بأولوياتك .. كلامك حلق في اذنه .. ويهمه رضاك .. الطيش والعناد .. لاتعده اهمال ..فارس في مرحلة تغيرات ..بس والله متربي وكفو بالنسبه لعيال جيله ..

شرد :مغبون والله .. اتخيل نوف وهي تصرفه وهو يكون محتاجني .. تخيلته وصل للبيت وانا داخل وراح ولاشفته ..
رفع راسه: ولاعاد انها تهدده بضنا وانه بينسيني اياه ..
مسك جبينه بتوتر: افكر كيف ضربته وكفرت فيه امس وانا مو عارف السالفة..
مسكت يده : سيف ابوي..لا تقلب في هالامور خلاص.. يمديك تعوض كل شي ..
رفع راسه وبقرار: ايه عشان كذا قررت .. يخلص فارس هالسنه وباخذه هو وانتي وسيف .. ونروح لندن ونستقر هناك ..
توسعت عيونها :
بشويش على عقلي سيف .. وش هالقرار .. ؟!
هز كتفه :
انا اقدر استقر هناك بحكم شغلي ..وانتوا عايلتي  .. ماله داعي اصير بديرة وانتوا بديرة ..
قام ومهره توترت .. القرار كبير ..
وهي اللي صارت تخاف من البُعد والغربه ..
ماحاولت تناقشه في الموضوع ..
خاصه هو نفسياً تعبان حده ..!

اشعل حطب في مدفئه جدارية..
وهو ساكت ..
مهره تراقبه .. وهو يرمي الحطب ولهيب النار ينعكس على وجهه ..
ضمت ركبها وهي على الكنب القريب ..
التفت عليها : قولي لي .. وش جابك فيذا .. كيف عرفتي المكان ..؟!
ابتسمت : فارس .. قال انك بتجي وتصعد هنا.. لانه عارف انك متضايق .. ؟!
وانت بدبي .. فارس جابني .. لما شافني ابي كتب..واعجبني المكان وحبيته ..وقررت حتى انا لابغيت انفرد بنفسي اجيه ..

ابتسم بحزن وببحه: طيب لابغيتي تنفردين بنفسك .. ترضين تاخذني معك ..

اعتدلت وطقطقت فخذها وبحنية العالم : تعال ياعين مهره ..اخذك بقلبي وروحي يابعدهم..

راح لها .. وحط راسه على فخذها .. غمض عيونه ..
*اذا كانت مهره مشتته ألف ..
فاهو مشتت مليون ..! *
راحت تداعب شعره وذقنه .. تسولف معه .. تركته يفضفض .. ويقول اللي في خاطره ..
ظلوا كذا لمن نام..حطت مخده تحت راسه و فردت الفروه عليه .. !
توها تحركت بتمشي ..
ناداها وهو فاتح الفروه جنبه : تعالي نامي هنا ..
مهره: بضيق عليك خلاص نام وانا بنزل ..
عيونه شبه مقفلين : تعالي ولابنزل معك ..
جات جلست جنبه وانسدحت وظهرها على صدره .. وذراعه تحت رقبتها.. ضمها ..وهمس: انا فدا ريحتك ..
قشعرت لأنفاسه .. وهمسه ودفئه ..
اشتاقت لقربه ..
من قبل مايمشي دبي .. ماضمها كذا وناموا سوى ..

'اغمضت عيني .. في اكثر محيط آمنه الحياه ..
محاصره بذراعيه .. وقدمه ..
وكأنه يخاف ان افلت منه ..!
الى اي مدى ستصبر ياسيف..
واصبر أنا ..!
إلهي .. كُن معي .. !

*****
الصباح الباكر-شاهين في الكراج .. 
فاتح الجوال .. وغاده صورتها ع الشاشه وتكلمه سناب ..
تبكي .. وجالسه على الأرض : بموت شاهين .. ضايقه فيني ..امي حالتها تتدهور .. الدكتور احبطني ..

شاهين : طيب اهجدي يابنت لايجيك شي .. اطلعي من المستشفى شوي ..روحي بيت خالتك غيري مكان ..
غاده : ماقدر والله .. انام بغرفة امي .. واداوم من هنا ...ماقدر اخليها ولالحظة .. اخاف تموت وانا مو جنبها ..
شاهين : لاتقولين كذا .. الاعمار بيد الله ..
التفت ولقى جمان واقفه متكتفه .. وعليها شال كبير .. تكلم :اخليك غادة .. سلام ..
وقفل الاتصال ..
جمان واقفه .. قرصها قلبها .. شافته رجع من بره وظل بالسيارة يكلم ..
بس حاولت تتعوذ من الشيطان ..
وتبعد هالهاجس..
ابتسم لها .. وهي تحدق فيه .. طفى السياره ونزل .. وشايل كيس :
جهزتي الليمون ..؟!
ابتسمت:جهزته.. السبانخ بالجبنه.. تذكرني بايام الخطوبة .. لما تجيني الصباح ..
خطف منها بوسه:
يعني طلبتيه عشان قرب زواجنا ..
جمان هزت كتفها : يمكن.. نسترجع ذيك الأيام..
اسندت جبينها على صدره :
من ثلاث سنوات .. ماستشعرت هالأيام ولا راجعت الذكرى ..
شاهين خذها بذراعه ..
لعن نفسه .. وتواصله مع غاده ومواساته لها..
في الوقت اللي قلبه ممتلي بس بجمان .. ولايبي غيرها..
بس ضميره يجلده .. على غاده.. متأكد مو حُب .. بس شفقان عليها..
شفقة لحالها لا اكثر..!

*****

دخل سيف غرفة فارس ..
و كان في دورة المياه ..
جلس على سريره ينتظره ..
شوي وطلع .. وباين متروش.. انتبه لابوه .. وحاول يشتت نظره وهو يجلس على كرسي جانبي .. وانثنى عشان يفك الكيس المربوط على الجبيرة ..
قام سيف وجثى قدامه .. وراح يفكها : جدتك رابطتها ..؟!
فارس : ايه جاتني وانا بقص الجبيرة.. خلاص ابا اتروش .. يكفي شعري مو عارف اغسله .. والا ماتشيلها وحطت علي هالكيس ..
سيف شالها : لاتستعجل عليها يابوي..
بلع فارس ريقه وظل ساكت ..
لبسه سيف شراب على الرجل السليمه وشبشب..
فارس حس بغصه .. وابوه ياخذ بلوفر دافي ويلبسه اياه .. ويمشط شعره اللي مبين من الضمادات ..
ابتسم وهو ياخذ عطر ويعطره .. وبحنية:
يلا ننزل ..
هز راسه ايجاب والدمعة وصلت ..كأن الوقت مامر ولاكبر .. سيف من قبل واذا كان موجود هو يسبحه ويلبسه ويمشطه .. ويعطره ..
وقفه .. وشال العصا .. وتوه بيمشي تارك فارس يتعكز ذراعه ..
شده فارس وببحه:يبه.. !
سيف لف له: روح ابوك ..
فارس اندفع لصدره وبكى بصمت ..
ضمه سيف .. وهو اللي همس :
آسف يبه .. والله آسف..

تأسف منه اول ماهمله وطال شعره ..
وتأسف منه يوم حس انه اهمله الحين ..!

*****
بالضحى والشمس دافيه مهره وولدها وفارس قاعدين بره ..
سيف واقف يرسم على جبيرة فارس .. ماظل حرف m الا كتبه ..
فارس : خلاص ياورع .. بيفكروني احب وحده اسمها مرام .. ولامريم ..
ضحكت مهره وبيدها مجموعة ورد : انا وسيف قصة غرام لاتنتهي .. ترى يكتب حرفي على كل شي ..
فارس : ليته يكتبه صح .. شوفي كم مثلث يسوي ..
مهره : ماعليك .. مع الوقت بيضبط ..
طلع سيف وهو يكلم جوال  بانجليزي .. وباللكنه بريطانية : لاتستمري باتهامي في اهماله .. وكأنه يسمعني.. اخفضي صوتك ماريا .. تكادين تخرجين من الهاتف ..
توجه لفارس .. ومد الجوال له : كلم ماريا .. انجلطت يوم درت عنك ..
ابتسم فارس .. وصدم عيشة مهره .. كيف جايب اللكنة  نفس ابوه :
مرحباً ماريا الجميلة ..
ماريا : اوووه .. لقد انخفض لديا الضغط والسُكر .. خفت عليك حقاً ايها الوسيم الصغير..
ضحك : انا بخير .. حادث بسيط ..اشتقت اليكِ..كيف حالك..
ماريا : حبيبي انت .. اترقب قدومك .. لدينا الكثير لنفعله معاً..

مهره تناظر فارس .. بعدين سيف وهو يجلس جنبها : هذي ماريا .. اللي مارضيت تقول لي من تكون ..هاك اليوم؟!
سيف يسوي نفسه ماتذكر : بالله .. متى ..
مهره .. ترتب الورد بين يدينها وبغيره: وماشاء الله ماينه على فارس ..
سيف ضحك .. وهو ياخذها بذراعه:
وانتي لو تعرفتي عليها بتحبينها..
مهره بنقد : مابي اتعرف على احد ..اشبع فيها انت .. لا ومخليها تكلم فارس .. والله عيب ..
فارس : اكيد في الاجازة كالعادة ..حسناً عزيزتي .. نلتقي..

مهره تغلي ..
لمن قفل فارس ..
هاوشته :والحين انت ماتستحي جالس تتكركر مع هالغريبة ..لا وتوعد فيها ومشتاق لها ..
والتفتت على سيف: وانت يالشيخ جايب الجوال بنفسك له ..
توسعت عيون فارس وضحك:
مهره ..هذي ماريا زوجة خالي وليد .. كبر ابوي ترى ..من جدك .. عمر معها ..
شهقت مهره وهي تلتفت لسيف وبقهر وهي تقوم :
ورب الكعبة ماعندك سالفه ..
ضحك وهو يمسكها: تدوخين وانتي غيرانه ..
مهره بقهر : اتركني يالمريض .. وبالله عليكم انا من متى في بيتكم ليه ماحد قال ان مرت خالكم اسمها ماريا ..
فارس : امي ماتقول الا الانجليزية .. هههههههههههههههههههه وبالعاده اصلا ً مايجي طاري خالي وليد منسي ..
التفتت لسيف وهو يضحك على شكلها ..
صاحت فيه : مبسوط على خيبتك .. والله قلة حياء ..انا احصلها من حريمك ولابعد من مرت خالك ..
سحبها وجلسها جنبه .. مسكها بقوه : مرت خالي يالمريضه انتي .. صديقتي ماهو حبيبتي ..
توسعت عيونها .. وهي تلتفت :
صديــقتك ..!!!!!!!!! ... ايش الفري اللي انتوا عايشين فيه ..
فارس يضحك عليهم :
مهره .. ماهو كذا خفي غيره .. ولا بتموتين بلندن ..علاقات ابوي واجد .. مير ماريا مرة خاله ..
مهره تتفلت : من قال بروح معه ..يروح لحاله ..والله قلنا انفتاح .. بس ماهو كذا عاد ..
سيف : والله طلعتي بزر .. اعقلي ..

رن جوال سيف .. رد فارس لان الجوال عنده:
خير وش تبي داق ..؟!
نواف يطل في الجوال : داق على ابوك .. انت اللي وش تبي .. ؟!
فارس: اقصر الهرج وش بغيت ..
نواف : انا وجدك بنروح المزرعة دام الجو دافي .. تعالوا هناك.. جدك مسوي ترتيبات للغداء ..
فارس : ورجلي طيب .. اجل بفك الجبيرة واجي ..لازم اطب بالمسبح ..
نواف : يا ** خلها مكانها... ولا بكنسل الروحه .. المهم علم جدتك .. ماردت علي ..
فارس : تمام ..(وقفل).. يبه .. نواف وابوي سعود بيروحون المزرعة .. ويبون نجي كلنا .. وابوي مرتب للغداء..
سيف الصغير بحماس : نلوووح للصان ..>>الحصان ..
سيف :ليش لا .. خلونا نروح ونغير جونا ..
والتفت : ها مهره ..؟!
مهره: والله الجو جميل مايتفوت .. نروح ليش مانروح ..

*****
في المزرعة ..
وقت اللي جاوا كان نواف نازل المسبح ..فارس توجه له وضحك وهو يتعكز العصا :حيوان .. تبي تقهرني ..
نواف رش عليه ماء ويبي يقهره: والله يالموية دافية وتشلع القلب..
سيف الصغير بحماس : ابي اسبح ..
مسكه سيف : لابابا .. برد عليك ..
نواف : جيبه .. المويه دافية..
سيف: ماترضى امه ..
نواف: جبه بس ..
سيف يتفلت : والله بسبح .. ادني أوبه ..
سيف : طيب وقف ..
جثى قدامه .. وفكك ملابسه ..
فارس بقهر : هالحين حتى هالجرو.. بينزل وانا لا..
سيف مد الملابس لفارس : امسكهم.. وانكتم لاحق .. حتى انا بنزل ..
فارس بقهر : اييييييش ..!!!!!!
مهره كانت داخل .. تشيل عبايتها .. بلقيس بحماس :
مهره شوفي .. سيف ..
*التفت .. للجدار الزجاجي في الصالة والتي تطل للمسبح ..سيف شايل سيفي من كفوفه .. ويمرجح فيه ... ناحية المسبح وهو يضحك ..
نواف ماد يدينه ينتظر..
وسيفي.. يضحك ..
اقتربت انظر بمشاعر غريبه..
لوهله انظر لنواف وكأنه عساف .. وان الله مده بالعمر .. ويلعب معه الآن .. !
خفق قلبي ..
وكدت اشهق وسيف يرميه في المسبح ..ونواف يلتقفه .. وينزله في الماء ويطلعه ..
ابتسمت بحنيه .. لضحكات سيفي .. الذي كان يتيم ..
لديه ثلاث اباء الان .. كل منهم يحتويه ويسعده ..
شردت في سيف .. وهو ينزع جاكيته .. وتشرته ..
تأملت تفاصيله .. احمرت وجنتي ..معقول وضعي مع سيف .. !
معقول ..اني اراه بهذا الشكل صدفه .. معقول ان سيف مطابق لفارس احلامي .. وانا بعيده عنه ..
اي بشريه داخلي يمكنها ان تبعد كل هذا البعد *

قفز سيف .. بلقيس بحماس :
بطلع اصورهم .. تعالي نطلع مهره ..
مهره: روحي انتي .. شوي وبجي ..
طلعت بلقيس ..
ورجعت مهره تتأمل سيف ونواف وهم يلعبون سيف ..
انفتنت باللحظة.. !
انفتنت بسيف .. !
في داخلها شي تحرك .. انُ لا.. ماراح تخلي العمر يمضي كذا .. !

سعود وموضي في المطبخ .. تسمع اصواتهم وضحكهم.. وهم يجهزون للبربيكو.. !
ويتغزلون في بعض بلطف ..
رجعت تناظر سيف بحب ..
ابي اشيب وانا معه .. كيف ..؟!

راحت .. عند شنط جايبينها معهم .. تطلع ملابس لسيف ..
فجأه انفتح الباب  ودخل نواف مستعجل وهو يكلم جوال وماسك منشفه ينشف راسه : اصبر بجوالي الثاني .. برسلهم لك وانت اطبعهم ..
مانتبه حتى لمهره الجالسة ..
راح يصعد الدرج ..
مهره التفتت لا إرادي عليه .. توسعت عيونها برعب وصدمه وهلع ..
وهي تحط يدها على فمها تمنع صرختها وشهقتها ..
نواف في كتفه اليمين وخلف رقبته اثار حرق قديم خفيف ..
المشكلة مو بالحرق ..
المشكلة ان مهره تعرف الحرق وتاريخه وكيف صار  ...
كيف لا .. وهي اللي بيدها حارقته ..!
امتلت عيونها دموع .. خافت تنهار  وأحد يحس ..

راح عقلها لذيك اللحظة ..
*مهره بعصبية وهي تبكي: الله يلعنك ياعساف .. على قد ما انت قاهرني ..
عقد حجاجه ..
وتركها تبكي وتقول كل اللي تبيه .. بعدين قام وبلامبالاه : لاتتقطع احبالك الصوتيه .. انا بروح انام ..تعبان حدي ..
دخل المطبخ ولحقته.. واقف فاتح الثلاجه ويشرب ماء ..
مهره بكل غلها وغضبها ..
خذت رتوه مركبه على النار .. وانثرت الماء اللي فيها على كتف عساف .. صرخ بألم وحدة : ايش سويتي يامجنوونة..
مهره ببرود : والله اشوي عليك ياولد سعود ..
مسك رقبتها  بيخنقها ..وبغضب :
قد اللي سويتيه .. قدها..
مهره بحقد وهيستيريا: والله ولو بيدي الموت كان هديته عليك ...*

توسعت عيونها بجنون ..
طلعت من الباب الثاني .. تعمقت في المزرعة .. اختنقت ومو عارفه تتنفس..!!!

*****