للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
مهيائيل
الكاتبة(زهراء احمد)
_______
في ظلمات احضان عاشق
اغتصب برائتي بإسم الشرع والحقوق
أراد الانتقام فسخط الرب الرحمان
بقُبلة واحضان
يريدني بعقلي وتفكيري
ولا أعلم كيف سيكون مصيري
ذئب متعطش للدماء
وبيت لايوجد فيه للرب اسماء
شياطين ساهره ترتقب
وقلوب خائفة ترتعب
هلاك في نيران
انها من احقاد الإنسان
رجال على هيئة أشباح
يطأون كل حرام وغير مُباح
يعتبرون النساء شهوات
وليس لهم قنوت ولا صلوات
صيامهم ليل وافطارهم نهار
ومن العظام والرميم
عملوا كُل مايسر الشيطان الرجيم
ملعونين في القرآن
وعليهم غضب الجبار المنان
وما لي من خلاص
وانا بين الرصاص
من اسلحة النُحاس
ودقة الاجراس
انهُ يوم الإنتقام
تخضع الأبصار لرب الكرام
وهنا يؤخذ الحق من كل إنسان ظلام
مُعتدي على العُباد من دون ذنوب عظام
وأنا من المنتظرين حتى يأمر العلي بأخذ الثأر من المعتدي الأثام
والحُكم يومئذ لرب العرب والاعجام
الخاطره بقلمي
زهراء احمد
___
بقيت صافنه بوجهه وكلبي توقف للحظه عن العمل، ماعرف شنو اكول لو شنو اصرف بعد كل اللي صار ويايه والعذاب العشته هيج فجأة يطلع مزوج!!!
زين ليش؟!
اني بعمري مأذيت أحد ولا غلطت بحق أحد، عشت عمري بأكمله بعيدة عن الناس والصداقات وردت بس اعيش حالي حال البقيه شنو ذنبي؟
ليش هيج بس أريد أعرف، حاولت بكُل جُهدي ما تنزل دموعي بس الألم اللي بداخلي مكدرت اطلعه بغير طريقة، نزلت دمعه تبعتها الثانية وقررت ارجع لأهلي واللي يصير خلي يصير شنو يجبرني ابقى وي واحد مزوج لا فوكاها جابني لبيته عود شنو يريد يثبلتي مثلاً من هذا التصرف؟!
اني قوي وكدها وكسرت خشمج،
واذا كال هيج فهو عيب ينحسب من الزلم لأن يلعب على بنات الناس بهاي الطريقه،
ضغطت على أيدي السليمه بكُل قوتي وحاولت اكوم من مكاني بس متحملت أو وكعت وكل هذا وهو يحجي وياها بماعرف شنو لان عقلي فصل من يمهم، رجعت حاولت مرة ثانيه صارت عندي طاقه فضيعه كُل اللي هامني اطلع من هذا المكان برضاته لو غصب اني مستحيل ابقى زوجته حتى لو تهديد ماكو شي يجبرني ادمر حياتي بسببه، لهنا وبس وصار وقت افكر بنفسي بما انو الكل تخلوا عني من اليوم التزوجت بيه ولا أحد بيهم فكر يسأل عايشه لو ميته،
وي كُل كلمه يصنعها عقلي دموعي تنزل، حتى لو جنت اكرهه وما أطيق وجوده بحياتي مع هذا يبقى زوجي واكيد ما اقبل لنفسي المهانه والذله،
مره ثانيه اوكع أنتبهت عليه وصاحت.
ترانيم: الله الله، انتبهي ياعيني متشوفين نفسج متكدرين تخطين خطوة لتضغطين على جسمج بعدين تتأذين ويصير العلاج اصعب.
مجاوبتها واصلاً ولا كأن سمعت، كُمت مره ثالثه بس هاي المره مُختلفه بمكان ما أوكع ثبتني من خصري ورجع كعدني ضربت ايده أو وخرتها بدون ما انطق حرف، عرفت نفسي بهذا الوضع ما أكدر اسوي شي لازم اتصل بأبيل حتى يجي ياخذني رفعت راسي اله وحجيت بجديه.
ايريم: أريد موبايلي.
رفع حاجبه وصفن بوجهي وكأن ديقره عقلي سكت شويه وكال.
مهيائيل: مجان موجود ويانه بالمستشفى بقى بالسيارة وهي هسه بالتصليح اشتريلج واحد غيره لتهتمين.
رجعت حجيت بثقه بعد معرفتي انو عرف أريد اطلع من هذا المكان فحجه هيج حتى يخلي أملي ينقطع بالطلعة منا.
ايريم: مو مشكله انطيني موبايلك.
مهيائيل: شنو تسوين بيه؟
ايريم: من تنطيني اياه راح تعرف شنو اسوي بيه.
مهيائيل: اوكي، بس بالأول خليني اعرفج على ترانيم الواضح انتِ مصدكه كلامها واني ممنتبه ومحجيت من كالت هي زوجتي، بالعادة هاي سالفتها كلما تشوف واحد ويايه حتى مره سوتها وي صديقي وزوجته يعني هذا طبعها بس بالحقيقه هي مو زوجتي ومستحيل تصير.
فر عقلي خلاني صُدك ماعرف افكر عدل، عقدت حاجبي وسألته.
ايريم: منو هي لعد؟
وليش تكول زوجتك، وشنو السبب اللي يخليك تجيبني لهيج مكان؟
مهيائيل: ترانيم هي اختي من والدي لهذا السبب مستحيل تصير مرتي بيوم من الأيام وثاني شي هي تحب الشقه هوايه وتعشق العِب بعقول الناس يعجبها تضوج العالم وهاي صفه موجوده بكُل اهل بيتي، اما بالنسبة للمكان فماكو بيت أأمن من هذا الج بهاي الفتره وترانيم هي الشخص الوحيد اللي اثق بيه.
التفتت بسبب صوت ضحكتها العاليه خليت ايدها على خصرها وحجت بثقه وغرور.
ترانيم: يعني توقعي لو اني مرته صُدك معقوله اخليج هيج كاعده بدون ما اسوي شي؟!
جان هسه انتِ بالمشرحه يشوفون سبب الوفاة شنو.
مهيائيل: كافي شقة روحي سوي اي شي ينوكل جوعانين.
ترانيم: ماعندي شي بالثلاجه روح تسوك.
مهيائيل: رائف البارحه دزيته الج وهو كلي مشتري كُل شي ردتيه فليش الجذب؟!
ترانيم: اي مشترالي عظام أريد أسوي شوربه ماشاء الله ثنينكم مكسرين تحتاجون كالسيوم.
مهيائيل: وين مكسر اصحه منج لو قل نظرج على الكبر.
ترانيم: العمر اله حوبه داده شعبالك لعد.
مهيائيل: يداده راح نموت جوع هذا اللي يجيج ضيف هيج تسوين بيه!!!
ترانيم: عيفك من الغده ليش معزمتني على عرسك؟
مهيائيل: هيج خباثه.
ترانيم: خاب كم خباثه يكول، انت تدري ما اطلع حاده عشتوا.
مهيائيل: تخلصين عمرج كُله حاده مات وراح انسي وعيشي اصلاً اني دورتلج عريس ينرفع بيه الراس وينشد بيه الظهر حضري نفسج حتى نعقدلكم.
ترانيم: الله عليك بالعرس اعزمني.
مهيائيل: أمشي وخري من وجهي مو مال واحد يضحك وياج.
ترانيم: صاير ظريف ماعرفتك.
مهيائيل: نبدل شخصيه شكو بيها كل يوم شكل حسب الجو.
ترانيم: وانت مبين جوك وردي متشوف وجهك شلون منتعش ومنور.
مهيائيل: اي والرب الخلق عزيزتي جوي ربيع ازهار مفتحه بنص الكلب.
ترانيم: عساها متذبل ان شاء الله كول آمين.
مهيائيل: آمين الله يسمع منج.
اني ساكته وهم يحجون ولحد الآن مامستوعبه منو هو ومنو هاي؟
وحتى كمت اشك بنفسي مرات اكول اني بحلم شوية واصحى منه واشوف نفسي بيتي ويم أهلي وكاعد نسولف ونضحك، متخيلت بين ليله ويوم هيج أعيش وتدمر حياتي،
نفضت عقلي من الأفكار بعد محسيت بنفسي تعبت حيل وبعد ماعندي طاقه اتحمل هيج وضع، ختنكت إلى درجه ماحس بصدري اكو نفس وكلبي مثل واحد لازمه بأيدة ويضغط عليه بقوة، لو مخلين عليه صخرة جبيرة ما أكدر أوخرها،
جان كاعد بصفي اللي يبعدنه مسافه شبر لا أكثر إذا ارفع أيدي اطخ بيه، رفعت أيدي وضربت على أيده، فقدت حتى واهس الكلام، دار وجهه اليه بسرعة وحجه وبقلق باين بنبرة صوته.
مهيائيل: بيج شي؟
محتاجه شي؟
اشرتله براسي بمعنى اي بعدين كلت.
ايريم: اريد انام، اذا ممكن أخذني للغرفه أو خليني انام اهنا على القنفه بس سويلي مجال.
لزم أيدي وكال بحنيه.
مهيائيل: مو مشكلة بس تغدي بالأول.
ايريم: ماريد مو جوعانه اريد انام تعبت.
حجيت هيج ونزلت دموعي كارهه الوضع اللي اني بيه احس بضعف وماحابه يساعدني صح هو زوجي ومقصر ويايه ابد كل شي يسويلي من صحيت لحد الآن حتى للحمام ياخذني بأيدة بس مع هذا كارهه حياتي واني هيج ضعيفه ومحتاجه مساعدة منه وهو جديد عليه مصار شهرين من عرفته استحي من عنده حيل مو بيدي،
فاجأني بحركته من سحبني من أيدي وخلاني قريب من عنده وخلى أيده على شعري، بقى هادئ محجه ولا كلمه واني هنا أو واحد وكلي نفجري، بجيت وكأن حزن العالم كله على متوني حمل ثكيل أريد اخلص من عنده بعدني بعز شبابي ليش هيج يصير ويايه؟
اني بشنو غلطت حتى هيج اتعاقب؟
ومن بين دموعي سمعت همساته يم أذني.
مهيائيل: "وإذا ما ألعب بشعرچ كل هاي الأصَابع زايده بچفي".
سكتت وهو اخذ راحته وحزني تحول لخجل بقيت ساكته ماعرف شنو احجي، لزمني من حنكي ورفع وجهي باصابعه قرب ايده ومسح دموعي وكال بكُل لُطف ونبرة حنان.
مهيائيل: امسح اللي ينزلهم لتبجين دموعج تنزل بكلبي مو على خدودج.
بقيت عيني بعيونه أبتسم بوجهي واني صافنه بوجهه مثل الثوله حسيت بأيدة تقربت من خدودي وقرب وجهي يمه منطيت اي رد فعل بقيت اتابع حركاته وداخلي شي فرحان ماعرف ليش، خجل على سعادة والخوف متربع بالنص من شنو مادري، بس هيج مشاعر مخربطه وممفهومه خلت عقلي يسافر بمكان ثاني،
ميفصلنه غير سانتيمات بسيطه رفع راسه وقَبل عيوني وكال جُملة.
مهيائيل: ألعن ابو الفراك اللي يجي من بوسة اعيونج.
غمضت خجلانه من عنده، بس ما استمر وضعي هيج من كال.
مهيائيل: فتحي عيونج وباوعي بعيوني.
سويت مثل مكال صار تواصل بصري بينه بقينه صافنين بعيون بعض فتره بسيطه قاطع هذا الصمت صوته وهو يكول.
مهيائيل: عيونج مثل بغداد بكل أوقاتها تخبُل.
خجلت ونزلت عيوني رجع همس بصوت ناصي قريب وجهي.
مهيائيل: افتحيهم كافي صار اربع إيام مشتاقلهم لتحرميني من نظرتهم هسه.
رفعت راسي وباوعتله صفن شويه بوجهي وهو مبتسم، واحنه بهيج لحظات فززنا صوتها وخرت عنه بسرعه وهو عدل كعدته ولا كأن صاير شي ، رفعت راسي شفتها واكفه بالباب مالت الصاله ومكتفه ايدها ومصغره نظرها علينه، اني لو دورون عليه متلكوني، من الخجل والخوف والرهبه كلهن جتمعن بداخلي مرات المواقف وحدها تخليك تتمنى تنشك الكاع وتبلعك.
ترانيم: خويه كوم اخذ مرتك للغرفه حتى ترتاحون واذا جهز الغده اني اصيحكم.
مهيائيل: خية شنو رأيج متسوين هجوم مره ثانية.
ترانيم: والله خويه البيت بيتي وانتوا ضيوف لازم تحترمون اهل البيت ومتسوون شي يزعجنا.
مهيائيل: خية خلينا على هاي الحبشكلات غير هيج مراح نحصل شي وداعتج.
ترانيم: شو متستحي انت اختك الجبيرة اني تره؟!
مهيائيل: على اساس تخجلين انتِ من عندي!!!
ترانيم: ليش اشايفني؟!
مهيائيل: سلامتج، أريد من عندج اسعافات اذا موجودة.
ترانيم: اي البارحه رائف جابلي.
مهيائيل: راح أخذها للغرفه جيبيهن اذا متصير زحمه.
ترانيم: لاااا ما اجيكم هم انتوا بنص البيت ومحد لزمكم من دخلون الغرفه شسوون؟
مهيائيل: وتالي وياج شلون يعني متشوفين شغله؟!
ترانيم: فلم تركي كدامي غزل وعيون شلون تريد اغمض عيوني؟!
مهيائيل: وحق ربج فلا تستحين، فوكاها تحجين بوجهي بدون خجل مات الحياء وي زوجج الغير مرحوم.
ترانيم: والله اطلب الحياء منكم عايفين الغرفه وكاعدين بنص البيت اني شخصني؟!
حسيت نفسي صخنت من كلامها وهذا ولايحس بيه ياخذ وياها وينطي بالحجي أخير شي متحملت بسرعة حجيت وياه.
ايريم: مهيائيل.
التفتلي وقطع حديثه وياها وكال.
مهيائيل: ياقُفله والمفتاح.
بلعت ريكي من كلمته وحجيت بتوتر.
ايريم: اخذني للغرفه تعبت.
نهض من مكانه بدون ميحجي شي وهي مشفتها وين راحت، مديت ايدي اله حتى يساعدني اكوم بس هو سوا العكس خله أيد جوه ظهري والأيد الثانيه جوا رجليه، خلاني على صدره وراسي يم ركبته، حتريت وبردت صار بداخلي مشاعر كُل الفصول، عواصف، وهدوء غريب، على خجل، واكو احساس جديد نزل بالساحه، شي داخلي يخليني افرح واطير بحركاته ماعرف ليش،
فتح باب الغرفة برجله مجان مقفول بس مرجعيه هيج، خلاني على الجربايه وطلع متأخر هوايه ورجعلي بأيدة الإسعافات اقترب من عندي وكعد بصفي مد ايده للجرجف وغطاني وكال.
مهيائيل: خليني اساعدج بتغير الضماد الدكتور كال لازم باليوم يتغير مرتين وهم اشكلج كانونه علمود الإبر.
حجيت بخجل.
ايريم: ماكو داعي الصبح غيرته الممرضة.
مهيائيل: غيرته الساعه سته وهسه 12م صار فتره طويله مو زين خليني اغيره يلا بدون عناد غيمتي.
رفعت راسي اله وحجيت بتوتر حتى ماعرف شلون طلعت الكلمات من عندي.
ايريم: ماريد والله افهمني حباب لتضغط عليه والله ما أكدر.
مهيائيل: ما راح اسوي شي وعيونج ليش خايفه من عندي لهاي الدرجه؟!
ايريم: مو خوف بس مستحيه ما أريدك تشوفني.
مهيائيل: بس هيج؟
اشرت براسي بمعنى أي.
كام من مكانه ورجع البرده وقفل الباب وطفه الكلوب صارت الغرفه ظلمة بيها ضوه خفيف من الشباك بسبب البردة مو ثخينه حيل، رجع كعد بصفي وكال.
مهيائيل: يلا رفعي الفستان بس على مكان الجرح خلي اعقمه وإطمأني مراح اشوف شي بس مكان الجرح وهاي هي.
سويت مثل ميكول وبدأ يعقم الجرح واني كلبي صارن دكاته الف صوته اسمعه بأذني من التوتر غمضت عيوني ومصرت اشوف شنو يسوي حتى كمل من بطني، عدلت ملابسي وساعدني اكعد فتح سحاب الفستان من فوك وطلع أيدي المتصوبه لزمته حتى ميوكع، كمل أيدي ورجع سدلي السحاب، اخذ الإسعافات وطلع بقى فتره قصيرة ورجعلي بأيدة ملابس، خلاهم على الجربايه وطلع هم شويه ورجع يفتر ماعرف شبيه حسيت بيه يريد يكول فد شي بس خجلان أو يمكن اني حسيت هيج بسبب تصرفاته، ضجت من هذا الوضع بسرعه حجيت مقاطعه اسلوبه الغريب.
ايريم: ممكن تثبت شوي وكولي شبيك ليش هيج تفتر؟
حجه بسرعة وكأن اني انطيته اشاره الانطلاق.
مهيائيل: أريد اساعدج تاخذين حمام.
بقيت صافنه بوجهه وحجيت بخوف من ستوعبت كلامه بعد فتره قصيره.
ايريم: مستحيل شتحجي انت!!!
مهيائيل: ليش مستحيل منو يساعدج غيري؟
ايريم: ما أريد احد خليني هيج مرتاحة، كافي اللي سويته علمودي كُلش اشكرك بس ميحتاج تسوي اكثر من هيج والله، تخجلني بهاي تصرفاتك واني ما أريد اخليك تسوي شي وتتعب ويايه بعدك متعرفني عدل يجوز ما استاهل كل هذا اللُطف من عندك.
احجي واني منزله راسي مستحيه من عنده حيل، محد راح تحس بكلامي غير اللي تعيش نفس الوضع، انسان جديده عليه اول ايام زواجنا هيج يتبهذل ويايه صعبه وخاصه اني ماعرفه حق المعرفه ولا جانت بينه علاقه قويه من قبل فالوضع اللي اني بيه لايحسد عليه،
رفعت راسي من حسيت عليه كعد بصفي ابتسم بوجهي وقرب ايده من خدي مسح عليه بحنان وكال بنبرة طُمأنينه.
مهيائيل: المعرفه مو بالسنين ولا العمر اللي نخلصه سوا هي بالمواقف الصادقه اللي تصير بينه فالتفكرين ابداً اني أسوي هيج غصب عني أو انو مجبر واعتبرج وكعتي براسي ولازم اتحملج ابداً لأن لو هيج اني احس تجاهج ومحمل نفسي المنيه عليج جان وديتج لبيت أهلج ونطيت عذر على اساس ماعرف اهتم بيج،
ايريم علاقتي بيج مو بس زوج وزوجة اني اعتبرج مثل بنتي والأب بأسوأ الأحوال ميترك بنته، ولتفكرين اباوعلج بنظرة شهوة وانت بهذا الوضع راح اصير عار على الزلم وهذا الشي مستحيل اتقبله على نفسي، كُل اللي أريده ما اريدج تحسين بمنية احد عليج واني موجود، تكدرين تسندين نفسج عليه اذا تعبتي أو ملتي، تبجين بحضني اذا مر بكلبج حزن، وتشكيلي اذا أذاج واحد وتشوفين شنو اسوي بلي ينزل دمعة من عيونج والله الا اشوفه شلون الله حق، اصنع بيهم العمايل حتى لو جان النفس اللي ما عيش من دونه اقطعه واتبرء من عنده لخاطر دمعه من عيونج الحلوة،
لتخجلين من عندي وعتبريني كُل شي غير زوج بهاي الفتره حتى ترجعين لعافيتج وصحتج وقتها لِكُل حادثٍ حديث.
بقيت ساكته ماعرف شنو احجي بس لابد اتقبل الأمر الواقع انو محد يكدر يساعدني غيره يبقى زوجي سواء علاقتي بيه جديده لو قديمه هو مسوؤل عليه وكلامه قنعني،
مرت هاي الأيام كل يوم بسنه، وطول هاي الفتره هو ينام على القنفه يكُلي حتى خاف تصير حركه بالغلط من عندي أو أأذيج فالحذر واجب،
بالوقت اللي يطلع بيه مهيائيل من البيت تبقى ترانيم كاعده يمي وتسولف ويايه، دمها كُلش خفيف ومتخجل تحجي طك بطك ابد متخلي شي بكلبها بس حبابه إلى أبعد حد،
تواصلت وي اهلي بثاني يوم طلعتي وهو كلي انو منطيهم خبر رايحين لأربيل هاي الفتره حتى محد يدقق بالأسئلة وياه، اني هم رتاحيت من خلق هيج موضوع حتى ما أبقى افكر بيهم أو اقلقهم على حالتي،
جرح بطني وكتفي صار احسن وشلت الخياطات صرت أكدر اتحرك شويه واطلع من الغرفه وحاجاتي اقضيها بنفسي،شلت الجَبيره مالت أيدي ورجلي بعدها كالوا الكسر اقوة وتحتاج وقت بس أكدر اتحرك بالعكازة متحسنت بالكامل بس صرت احسن والحمدلله،
على اساس نبقى اهنا حتى اتعافى وترجع صحتي يلا نرجع للبيت وماكو أحد شاك بأي شي لحد الآن، متقرب مني طول هاي الفتره ولا سوا شي من يوم لزمتنه اخته بالصالة صار عاقل ماعرف شعجب،
نفضت أفكاري من سمعت صوت الباب ينطرق سمحتلها بالدخول فتحت الباب وقابلتني بأبتسامه، مهيائيل طلع عنده شغل مثل كُل يوم بنفس الوقت يطلع بيه ومسألته وين يروح ابداً،
اجت وكعدت بصفي وبدت حديثها ويايه.
ترانيم: الحلو كاعد عبالي نايمه شمكعدج هيج وقت؟
ايريم: كُل شي تغير ويايه من تزوجت حتى كعدتي من النوم.
ترانيم: تتعودين الحياة الزوجيه حلوه مو مثل ميحجن بعض النسوان تلكيها هي مدبرت حياتها ومعرفت تكسب رجلها فهو كرهه اكيد ومل من تصرفاتها، أنتِ لتسوين نفسهن حبي زوجج وديري بالج عليه مهيائيل خوش رجال مو لأن هو أخوي وامدح بيه لا الله يشهد بس مشفت بيه شي مو زين.
ايريم: وشغله؟
ترانيم: هذا ربج يحسابه عليه انتِ مالج دخل.
ايريم: انتِ متعرفين شي صدكيني عبالج اني كارهته وماحبه هيج بدون سبب، بس الله الوحيد اللي يعرف شنو عشت وكلبي شحامل من ألم.
ترانيم: الوقت يشفي كُل الجروح هاي شوفت عينج تزوجت واني عمري 13 سنه، عشت الويل وي زوجي من ضرب من تعنيف وحسره عليه الربع، كلما اصير حامل يجي يضربني ويسقط الطفل حتى صاروا خمسه كلهم ماتوا وهُمَ بطني بسبب تعنيفه إليه، جنت دائماً ألوم اهلي بسبب العشته وادعي عليهم من كلبي ولتكولين حرام هم ظلموني ومحترموا رغبتي بالدراسه واحقق أحلامي وزوجوني لواحد معربد عربانه بأيد امه وخواته، حتى مرت السنين وخلص العمر وشوفة عينج مات صار ثلاث اشهر واني الفرحه ما واسعتني لو تدرين بيوم الفاتحه واجاني خبر وفاته من فرحتي الله يشهد دخلت للغرفه عود حاده وشغلت ساجده عبيد وخليت هيتفون بأذني ودك ركص حتى نمت من التعب، اول مخلصت الفاتحه اجه مهيائيل اخذني من بيتهم واخذ كُل حقوقي من ورث وبنالي هذا البيت من فلوسه ولاعبالج مالت السحر هو عنده شغل ثاني بالحلال يصرف بيه على أهله، وكعدني اهنا وكل اسبوع يجي يزورني ورائف ساكن عندي اصلاً، هم مو بس أخوه اني اعتبرهم ولدي على رغم مهيائيل ماعندي فرق وياه بالعمر جبير بس كم سنة بس هم مثل ابني، الله اخذ مني احساس الامومه بسبب المقبور الله لايرحمه وعوضني بيهم.
ايريم: الله يحفظهم الج ويحفظج الهم.
ترانيم: ويحفظج اله، والله لو شايفه من يكعد يمج بنص الليل وانت تونين بسبب الصخونه، تبجين على حاله يحير شنو يسوي، ساعة يغطيج وساعه يوخر الغطا وساعه يعض على أصبعه بقهر ويكول بغصه.
"شبيدي عليها غير اشوفها هيج واشيل نفسي او اركعها، تورطت بيه بواحد شيطان شنو الحل ياترانيم؟"
ميعرف شنو يسوي ساعديه لتخليه يحس بكرهج إله، يمكن غلط من جبرج على الزواج بس كُل واحد وعنده طريقه مختلفه بالحب.
عقدت حاجبي وحجيت بتساؤل بعد مجذبني كلامها.
ايريم: اني شوكت صخنت؟ ليش ماعندي علم؟!
ترانيم: يوميه جنتي تصخنين بأول أسبوع ومتحسين وهو يبقى سهران وياج لوقت الصبح انت تونين وهو يلزم ايدج ويكعد يون وياج.
Flash back
ايريم: اكرهك وخر عني.
مهيائيل: ارخصلج انا والعشيره كرهيني وشدي حيلج بالكره.
ايريم: انت منو؟
مهيائيل: زوجج يحلوة اللبن.
ايريم: ما أريد اكللل وخر عني.
مهيائيل: اي لتاكلين اصلاً مو زين على معدتج دنيا ليل.
ايريم: راح يجي وخر عنه يريد يكعد يمي كوم.
مهيائيل: منو هو؟
ايريم: واحد لابس ابيض احله منك.
مهيائيل: ايريم بابا تسمعيني؟
فتحي عيونج بشنو تحلمين؟ اريومه يعمري، قُفلي والمفتاح فتحي عيونج بس شويه خليني اشوفج مبيج شي، ولج لتخبليني بنص الليل وين اروح بيج؟؟
ترانيممم.
ترانيم: ها خويه خيرك شبيك؟
مهيائيل: مادري شو سكتت متحجي صار نص ساعه احجي وياها وهي فاقده تعالي شوفيها شبيها ايديه ميعينني.
جنت واكفه وره الباب اسمع سوالفه خاف يحتاج شي اركضله بسرعه لأن اعرف بيج مريضه أول مصاح فتحت الباب، شفتج رايحه روحج من الصخونه حتى الغطا مرفوع ساعه تبردين ساعة تحترين منعرف سالفتج شنو، كتله بسرعه يتصل بالدكتور ويسأله على حالتج ويخابر مضمد يجي يشوفج وينطيج علاج، اخذ نفس من كله عادي هاي بسبب العمليه وهو منطيج علاج مال صخونه شربج من عنده حبايه، وانتِ ماتدرين الدنيا طشت رشت باقيه بس تونين وهو يون وياج.
مهيائيل: عسى هاي النومه إليه ولا ألج، شنو شفتي من حياتج حتى يصير بيج هيج؟
ترانيم: اذكر الله ياخويه هي صخونه الصبح ان شاء الله مابيها شي.
مهيائيل: هدت حيلي ترانيم هدته، صعبه اشوفها بهذا الوضع وما أكدر اسوي شي فوكاها الدكتور الاثول يكول بسبب العمليه ماطلعت عمليه هاي راح يصير سنه عليها.
ترانيم: بعده جرحها أخضر فأكيد تتعب غير هي مخلصتها بس بجي طول اليوم النفسيه هم الها حوبه.
مهيائيل: ما أريد اتعبها جان والله فريتها البلد بس هي من تشوفني اقترب من عدها تتكهرب ماتساعدني حتى اطلعها من هذا الوضع من تشوفني عبالك شايفه جني.
ترانيم: اتحملها بعدها جديده وين اكو عروس بمكان متصبح بهلاهل تشوف نفسها بنص الأجهزة وحالتها خطره، المره مو مثل الرجال يحتاج وقت حتى تتعلم انت البارحه خطبتها واليوم زوجت وبسرعه تكسري اشافت من عندك حتى ما تخجل ياعيني!!!
مهيائيل: هي لو بس تخجل مو مشكله، تخاف من عندي واني شكد اكره هاي النظره بعيونها.
ترانيم: أو وكعت ومحد سمى عليك ساحرنا.
مهيائيل: اني وين احجي هي وين تحجي.
ترانيم: شو اسمعك تقرأ قرآن وادعيه من غير العادة شنو كلب حالك وسواك متدين؟!
مهيائيل: اللي يسمعج يكول حاربت الرسول بمعركه بدر.
ترانيم: ليش انت عمرك خلصته لا صلاة ولاعباده صوت الآذان متقبل يشتغل بالبيت حتى ميطرد الشياطين منين أجت هاي الديانه يمه؟!
مهيائيل: دعوة امي هاي وربج استجابها متدرين يمكن تغيرني.
ترانيم: غيرتك مو يمكن.
مهيائيل: له له له بعدني نفسي هم اسوي سحوره ملتزمت بالدين مثلها، هي وعلى رغم هذا المرض والحاله اللي بيها داكة رجل الا تصلي بالوقت وتبقى تبجي اذا تأخرت شويه، ملاك واني شيطان الفرق اللي بينه مثل السما والكاع.
ترانيم: وهن بتواصل مستمر طول اليوم.
مهيائيل: شنو قصدج؟
ترانيم: انتم واحد يكمل الثاني، انت الذنب وهي التوبه، انت شيطان وهي ملاك، هي تحب ربها وقريبه منه وانت حيل بعيد.
مهيائيل: وخايف اجرها لطريقي وتصير مثلي بهاي الحاله مستحيل اسامح نفسي أبد.
ترانيم: اطمأن هي تسحبك الها لأن القريبين من رب العالمين بهاي الطريقه مستحيل يتخله عنهم، شوف وجهه على رغم التعب شلون مضوي تحسها كلوب مشتغل بكُل وقت، غير طيبة كلبها وحنيتها حتى عليه اني الما تعرفني، هيج ناس تسحب ماتنسحب صدكني.
مهيائيل: آمين الله يسمعج شنو اريد اكثر من هيج أنا.
اخذ نفس واني عفته وطلعت وبقى كُل ليله ينعاد نفس الموال حتى طبتي وشالوا الخياطات شفت الروح رجعت لوجهه ورتاح نفسياً.
بقيت صافنه بكلامها معقوله كُل هذا صار واني ماعندي علم؟!
اذا صدك شكد حنين لعد واكو بكلبه مكان ابيض بيه مجال ينهدي ويرجع للطريق.
قاطعت صفنتي وهي تكول.
ترانيم: اخذتنه السوالف ونسيت نفسي راح اكوم أسوي غده اذا تحبين تجين ويايه تغيرين جو الغرفه تخنكج طول اليوم.
مكلت لا لزمت أيدي وساعدتني اروح وياها كاعده على الكرسي وهي كدامي تقطع بالبتيته وتسولف ويايه على حياتها قبل محاولت اسألها أي شي عنه لأن بداخلي ردت هو يفتح كلبه ويحجيلي،
فززني صوت ضربة الباب التفتت اله شفت عيونه حمر ويريد ينفجر من العصبيه فتح الثلاجه وبدون مينطق حرف طلع بطل مي فتحه وشمره على راسه وشرب من عنده شويه، شعره مخربط والغتره لازمها بأيده دشداشته مفتوحه من الصدر آول دكمتين خفت عليه وبقى عقلي يمه، شنو صاير وهيج صار أعصاب؟
ترانيم محاولت تحجي شي عافنه وراح للحمام بدون مينطق كلمه.
سندت ايدي على ميز الطعام وحاولت اكوم أول مشافتني حجت بسرعة.
ترانيم: لترحين يمه هو من يصير أعصاب ميريد احد يحجي وياه حتى يهدء عيفيه شويه ويصير زين.
ايريم: مراح احجي شي بس اطلع ملابسه مأخذ شي وياه من دخل للحمام.
ابتسمت بوجهي وعيونها بيهن لمعة دموع، منتظرت تحجي شي وطلعت امشي على كيف، هو طبعا اشترالي كم ثوب بالبيت البسهن ومشتري لنفسه همات، فرحت للكنتور وطلعت تراك نيلي يلبسه مو دشداشه بهذا الجو الحار وأخذت خاولي ورحت يم الحمام وكفت على صفحة وطرقت على الباب اسمع صوت الدوش سده وصاح بصوت عالي.
مهيائيل: خيرررر.
بلعت ريكي كلت هسه يطلع واخذلي ضربه، بس قويت نفسي شنو يصير مثلاً اسوء من اللي صار وشجعت نفسي انو اني أسوي شي زين لزوجي حتى لو محترم هو هذا الشي رب العالمين ميضيع عنده تعب، حجيت بصوت شويه عاليه حتى يسمعني.
ايريم: جبتلك ملابس، بس افتح الباب واخذهم من أيدي.
مسمعت جوابه بقيت شويه واكفه حتى تعبت رجلي كلت راح ارجع بعد ما أكدر اتحمل الوكفه بس وقفني صوت القفل وهو ينفتح مد أيده اليه انطيته الملابس ورجعت للغرفة، فتحت الشباك حتى يتهوه المكان ورشيت معطر جو، عدلت الجربايه ولو هو ماكو شي مخربط بس هيج أريد إلهي نفسي وما أفكر،
مطولت هوايه وسمعت فتحه الباب درت وجهي اله، مخلي المنشفه على ركبته ويمسح بشعره الحمار اللي بعيونه خف اخذت نفس مرتاحه لأن مبين عليه هدء شويه ،راح يم الميز مالت المرايه ومشط شعره وخله عطر واني عيوني تراقب حركاته لا أرادي، طلع شويه ورجع خمنت خله الخاولي بالغساله لأن مشفته، ابتعد عني وراح نام على الجربايه من الجهه الثانية هنا القلق زاد عندي ومتحملت ابقى ساكته وخاصه اني متعوده عليه اول ميجي يبوس راسي ويسألني عن صحتي بس اليوم ساكت منطق ولاحرف،
مشيت على كيف حتى وصلت يمه رفعت أيدي لوجهه ومسحت على شواربه ونزلت إِلحيته مشفت من عنده اي ردة فعل بقيت اسوي هيج فتره من الوقت وهو مخلي ايده على عيونه واحس بيه مو يمي، مليت من تجاهله إليه فكرت أنو هو ميريد يحجي شي ليش اضغط عليه، اول مرفعت أيدي من وجهه لزمها وسحبني لحضنه، دكات كلبي اهنا صارت مليار لو مسموح تنسمع جان وصلت للجوارين، همس قريب مني.
مهيائيل: ليش تتحرشين بيه؟
حجيت بتوتر واني أحاول اطلع جمله مفيدة.
ايريم: لأن شسمه.
كال بنفس النبرة.
مهيائيل: شنو هو الشسمه؟
كلت بهدوء.
ايريم: متحرشت بس ردت اعرف شنو بيك ليش ضايج.
مهيائيل: وليش مسألتيني؟
ايريم: خفت متقبل أسألك على اشيائك الخاصة.
مهيائيل: ماكو اشياء خاصة غيرج.
خجلت وماعرفت شنو ارد، رفع وجهي اله صارت عيني بعينه أو وجهه قريب من وجهي إلى درجة جبيرة رفع ايده وخلاها من الجهه الثانيه مانعني من الحركه وحجه.
مهيائيل: تخافين عليه؟
جاوبته بدون وعي لتصرفاتي.
ايريم: اي.
مهيائيل: واني باقي يمج ماروح لمكان حتى آخر نفس بعمري.
سكتت وعيونه هي اللي تحجي مرات الكلام يضيع منك باللحظة ومتكدر تنطق بحرف، ندمجنا بالعالمنا الخاص بس ماكو فترة وفزينه على صوت الباب ينضرب بقوة طفر من مكانه واني من الخرعه مكدرت أتحرك، فتح الباب وهي أول مشافته حجت بسرعة...
يتبع..
البارت اكثر من 4000 كلمه.
تصبحون على الف خير وعافيه شمعاتي.
تفاعلوا وعلقوا بين الفقرات وصوتوا وكبروا عائلتنا حبايبي.
حسابي الأنستا لأي شي يخص القصه..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!