للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة(زهراء احمد )
_______
لا تكثر الايضاح فتفسد روعة الفن.
___
جسمي ختض بالكامل شكد شايفه بالافلام والمسلسلات هيج مشاهد بس من تصير بالواقع رعبتها اقوه، صحت بصوت عالي بدون ما اهتم لأحد،
يا أمير المؤمنين احضرنه.
لحظة صمت الكُل ممستوعب اللي يصير واكفين جامدين ومنتظرين معجزة تنزل من السماء وتعدي السالفه على خير،
باوعله بحده وكال بغضب صدك حسيت الشياطين كلها متجمعه كدامه هسه.
ميمون: شلون تمد إيدك عليهاااا وتحركهاااا؟؟
اصلاً منو انطاك الحق تلزم ايدهااااااا شنو شايفني ثور هنا ومحاسبلي حساب؟!
جاوبه مهيائيل ابرودة اعصاب ولا كأن مخلي مسدس براسه وبأي لحظة ممكن يتهور ويرمي طلقه وينتهي كُل شي بثواني، ماخذ الأمر بصدر رحب.
مهيائيل: والله زين عرفت نفسك ثور واكو على راسك كرون لهذا السبب مرتك مسويه الوضع فيطي تدخل وتطلع براحتها يكول زريبه مال حيوانات مو بيت محترم مع عوائل محافظه ولو انتوا وينكم وين الشرف والأخلاق مجموعه من ******* و ******* لو افتح بيكم شغل استرزق بدون كعدة الصبح ورجعتي بالليل، مجرد كم ديجي اجيب ولافته على الباب وأغاني ساجدة أو افتح بيكم ***** ، شنو رأيك؟
انت عليك الشرب لان ماشاء الله خبره ومرتك عليها السهره، اني اضمن ألك شغلها بالليل مضبوط لدرجه واحد من الزبائن جايها بنص الليل وعايف نومته وضارب حرمة البيت عرض الحايط، وتالين هاي عليها المزه شفتها كم مره تسوي لدَاسِم وشكلها خبره، واني اتفرج عليكم من فوك اجيك الوضع باب رزقي اكيد ماقبل بالأهمال.
اني من داخلي متت بدمي وعرفت على هذا الكلام اني لابسه الأسود لامحاله، ماكو بريك ولا فواصل نهد بيه فد مره مثل واحد مخنوك وخلوله اوكسجين ميعرف يبطل حجي،
سحب أقسام وخله ايده على الزناد لطمت على صدري واني وترانيم بصوت وأحد مفزوعين: يمةة عزةة.
ميمون: وصيتك؟
مهيائيل: عوف سوالف المسلسلات وراويني شجاعتك وشلون تكتل اخوك الصغير؟!
ميمون: تستاهل اخوي ماخله حرمه لا اللي ولا لمرتي.
مهيائيل: المامحترم هيج نتعامل وياه لتنسى هاي مبادئ شغلنه هم.
ميمون: وليش مطبق نفس القواعد وي مرتك لو يمها تموع مثل الثلجه؟!
مهيائيل: حقي اموع، شرف وعفه أو أخلاق ليش حتى انفذ بيها عقوبات وقواعد!!!
المثلها يتقدسن وين ماكانت، اللي اسويه ميوصل لحقها ربع.
ميمون: وين الشرف وهي نازله يم الغرفة النشتغل بيها بنص الليل وتضرب بالرايح والجاي؟!
فتحت عيوني على وسعهن هذا شديكول!!!
كلت مابيها مجال اليوم اذا ماميت مطلكه بالحالتين لازمه عده ماكو مفر، ماعرف ليش الأفكار السلبيه كلها تجمعت بعقلي يمكن لأن ماكو ملائكة هنا ابد بس الشياطين،
جاوبه بهدوء واني اللي جنت اظن راح يكلب الدنيا.
مهيائيل: الغرفة مابيها شي ممنوع ولازم متعرفه هي اصلاً داخله الها وتعرف شنو موجود واني ممنعتها من شي نهائياً وبأي مكان يعجبها تدخل بستقامه محد يكلها على عينج حاجب لأن هي ام البيت وهذا حقها، وبالنسبة للضربه بالرايح والجاي احب اكلك انت اللي ضربت بيها عمداً وجنت ناسي الموضوع بعد الصار اليوم ولكن بما انو ذكرتني راح اعاقبك بطريقة تليق بشرف مهيائيل وعرضه.
ميمون: عاقبني عود من اموت وصير بصفك لأن هسه راح تموت على أيدي، تريد اتوب على كل الذنوب اللي سويتها لو مو مهم عندك؟
مهيائيل: ذنوبي نتفاهم بيها اني وربي إذا بيك خير وشجاعة اقتل اخوك ودوس على وصية امك الأخيرة.
ميمون: سلملي عليها من تشوفها وكلها اخوي خان الأمانه.
تقدم رائف من عنده بسرعه وسحب ايده.
رائف: انت تخبلت علمود مره تموت اخوك؟!
ميمون: مو بس هو اموتك حتى انت اذا ماوخرت عني.
رائف: ماوخر وأريدك تموتنا ثنينه حتى بوجهك للعدام.
من شافه معند ولازمه بقوة ضربه بنهاية المسدس على رأسه صرخ بيه مهيائيل بصوت عالي من شافه وكع ولازم راسه بألم.
مهيائيل: طايح الحظ ماعندك رجوله مكدرتك على اخوتك وعايف ****** تسرح وتمرح بكيفها، بيك خير وحظ الزمها وضبها وكللها مكان النسوان المحترمه بالبيت وتتزين بس للثور مالتها ميصير مسويه نفسج مسرح للرايح والجاي.
صرخت صرخه بكُل قوتي من سمعت صوت الرصاصة: ياعلييييييي،
غمضت عيوني ماكدر اشوف شي بس مدام الوضع لحظات حتى سمعت صوته يحجي بثقه.
مهيائيل: عقلك شكد صغير بس مالومك من عاشر قوم اربعين يوماً صار منهم وانت خلصت سنين يم كاغد محترك اكيد تتأثر بالغباء.
ميمون: شلون صار هيج؟!
المسدس جان مليان واني اللي خليت الرصاص بي شلون فرغ!!!
مهيائيل: ميحتاجلها ذكاء اكيد اكو وأحد فرغه وهذا الواحد كدامك هسه.
دفعه بقوة ويحجي بعصبيه.
ميمون: شلون تتجرأ وتسوي هيج منو انطاك الحق تمد إيدك على شغله متخصكككك!!!
مهيائيل: اني انطيت الحق النفسي من شفتك انسان عديم المسؤوليه تنقاد من بغلتين بدون تفكير حتى، من شفتك واحد ارعن حتى عقلك متكدر تتحكم بيه، ومن شفتك تتبع شهواتك وغريزتك مثل الحيوانات وميهمك منو كدامك حتى لو جانت اختك، من صرت بدون أخلاق وسمعتك جوه الرجلين، من بقيت عاله عليه، اييي لتباوعلي هيج انت ومرتك عاله عليه، واني مو مثلك مافرط باخوي الجبير أو وصية الغاليه قبل متموت بالعكس اجي اعلمك او اوجهك للطريق الصح،
اني وياك سحاره اي ومعروفين بالمنطقة بهاي الهويه بس هذا ميمنع يبقى عندك شوية شرف لعائلتك على الأقل، الحياة تمر ميمون استغل الفرصه ورجع لعقلك قبل ميفوت الآوان أو وقتها ماكو ندم ينفعك.
كلامه يأثر حتى بالحجر بس هو مبين عليه ولا كأن حجه وياه تركه وطلع، من شاف الوضع هيج صفك بأيده وحجه بصوت عالي.
مهيائيل: خلصت المسرحيه كل واحد على غرفته.
مطلعن بالعكس اجن كعدن بمكانهن منصدمت بيهم شلون بلا كرامه اني لو يحجي ويايه كلمه وحده احسها اهانه لنفسي او ما اكل اي شي حتى لو اموت ذني عكس مفعلات وضع رحم الله من اهاننا، رولين كاعده وتالين مخليه ثلج على ايدها وثنينهن عيونهن طير شرار،
درت وجهي على صوته واكف اباب المطبخ اللي يصير على الصاله ويباوع بنظره بريئة كسر خاطري وملامح وجهه حسيتها حقيقيه خاصه من كال.
رائف: مهيائيل جوعان، يصير اكل لو اني من المطرودين؟
رفعله حاجبه وكال.
مهيائيل: واذا كتلك لا شنو تسوي؟
تبقى جوعان وتنام على لحم بطنك؟
لو شنو مثلاً؟
كف اردان قميصه واجه كعد مقابيله على الكرسي وكال بنبرة ثقه، قبل شويه جان وجهه يبجي هسه طلع يمثل اويلي شكد مكار.
رائف: قبل شويه اكلت ضربه على راسي لو ماربك ساتر جان هسه تاكل بفاتحتي لحم من كد مطيب تاكل أصابعك وراه احسن من هذا لحمك المحترك عود مسوي علينه منيه ومن الساعه خمسه إنذار محد يدخل للمطبخ وعبالي راح اكل وجبه يسيل لها العُاب، طلعن لحمتين ومحتركات أو فوك هذا مقابل ناكل مان علينه يكول مسوي خروف مجتف.
خلص كلامه وياه دار وجهه إليه بأبتسامه وكمل: اذا تسمحين بعد اخيج اريد ماعون من اللحم المحترك ريحته دخلت لكلبي، وياه عصرة ليمون حتى يخف الضغط امبين الجماعه راح ينفجرون.
ضربه على علباته وحجه برفعة حاجب.
مهيائيل: مو معاجبك شكو كاعد وتريد تاكل؟!
غمزله وكال
رائف: كُل شي من صنع إيدك يخبل خاصه الحرك يا أخي برد كلبي غير شكل.
طفرت ذيج من مكانها مثل القرد.
رولين: شنو قصدك!!!
رائف: قصدي على اللحم انتِ منو يمج؟!
رولين: ناس بدون خجل خلي عندك حترام شويه اكبر من عندك اني.
مهيائيل: واذا اكبر من عنده الاحترام ميجوز للناس الماعدها شرف هي مو بالعمر كاغد محترك.
رولين: عندي اسم ميحتاج كل دقيقه مطلعلي لقب.
مهيائيل: والله هذا حسب مزاجي مراح تحكمين مزاجي بعد، اني مو ميمون حتى تنطيني أوامر.
صبينا العشا وترانيم مقبلت تعزل حصتهن وهذا طبعاً بسبب اشاراته الها، كامت ياسيم تحضر الهن الأكل وهو صاح بيها.
مهيائيل: ياسيم تعالي يمي.
ياسيم: بس..
مهيائيل: ماكو بس انتِ حالج من حالنه اللي يريد يسوي لنفسه هذا الطباخ موجود محد كاتب على كصتج خدامه عند أحد.
اجت كعدت بهدوء وبدينا ناكل وهي كامت بغضب عبالي راح تطلع من المطبخ وسوت العكس وراحت طبخت، سويت نفسي وكأن مشايفتها نارها تاكل حطبها، كملنه وترانيم غسلت المواعين واني صبيت الجاي، كام رائف بعد مجان كاعد يم مهيائيل يسولف بهمس حتى منسمع وكال بصوت عالي.
رائف: يلا خوان كل واحد على غرفته عيفوا العنب بالسله وشوفوا شغلكم.
حجاها وهو يمشي وصل لباب المطبخ صرخ بيه مهيائيل بصوت عالي.
مهيائيل: اطلع بره وجهك ماريد اشوفه دماغ سززز.
ابتسمت عليهم وعلى سوالفهم، صبيت الجاي إليه وإله انطيته كوبه اخذه وسحب كوبي هم.
مهيائيل: ماكو جاي حتى طيبين.
ايريم: ليش بله؟!
مهيائيل: لأن عندج نقص حديد والجاي يمتص الحديد يعني مسوينه شي.
صفنت واني اذكر شنو صار ويايه الصبح وكلام رائف رجع لاذني مره ثانيه بصوره أوضح.
ايريم: صدك شنو صار اليوم بالمستشفى؟
منو عبد الرحمن اللي موكله بيه؟
مهيائيل: مجرد حادث طبيعي وبس وبالنسبة لعبد الرحمن حجيتلج عليه وكتلج هذا الجن الصالح اللي موكله بيج اي شي يصير وياج يجي يكُلي.
ايريم: يا حادث؟
مهيائيل: تركتي الموضوع بالكامل ركزتي بس وي الحادث!!
ايريم: سالفة الجن اعرف بيها بس الحادث لا، شنو صار اليوم مهيائيل؟
مهيائيل: وكعتي واخذتج للمستشفى سوولج تحاليل وطلع بيج فقر دم وهبوط بالضغط والسكري وبعدها رجعنا للبيت وهاي هي.
ايريم: اكو شي متريد اعرفه؟
مهيائيل: اذا اكو شي هيج من الأساس ماكول اني صريح جداً ماحب الجذب.
ايريم: تمام.
مهيائيل: كومي نصعد لايجي واحد هنا ويصير براسي سيد ونطلع احنه الفسقه.
تركته محجيت شي احساسي يكول اكو شي صاير بس هو ميقبل يكول ولسبب اجهله تماماً عفت كُل شي لوقته المناسب، يجي يوم وتنكشف الاوراق ميبقى شي على حاله،
كملت الروتين المعتاد قبل النوم ورحت يمه على الجربايه مخلي الجكاره بحلكه وصافن والدخان مالي الغرفة فتحت الشباك حتى تتهوه ورشيت معطر جو بس ياعطر يكدر يخلصني من ريحتها اللي تلعب النفس، ضجت أو أريد انام وهو بعده تخلص وحده يطلع الثانيه خلص باكيت ونص يمكن بهاي النص ساعة لو هاي الفلوس اليخسرها على الجكاير عندي بنيت جامع، صدك مع العشره تكتشف الناس على حقيقتها وتعرف طباعها، بالزمن كل شي يتوضح وميبقى أحد على شكله الأول.
ايريم: مهيائيل أريد انام.
رفعلي حاجبه أو وخر الجكاره نافخ دخانها بالهوه وكال بهدوء.
مهيائيل: لازمج اني هاي الجربايه وهذا فراشج.
ايريم: الريحه موتتني طفيها كافي عاد مختنكت؟!
مهيائيل: له له له.
ايريم: اي اي اي.
مهيائيل: شنو هي الأي؟
ايريم: اني ختنكت لخاطر ربك كافي وخلي نام.
مهيائيل: بشرط.
ايريم: يبوووو على شروطك المتخلص.
مهيائيل: معناها ماطفيها.
ايريم: كول شنو شرطك؟
مهيائيل: صيري جكارتي.
ايريم: شلون يعني؟
كام من مكانه وتقدم إليه وكف مقابيلي وبقى صافن بوجهي شويه قطع الصمت كايل بنبرة هادئة.
مهيائيل: اريدج.
ايريم: هياني موجوده.
مهيائيل: أريد تصيرين مرتي اليوم حتى مترجعين تسألين شنو تريد.
بلعت ريكي هسه هذا شنو اجاوبه واني لحد الآن ممستعده، اكذب على نفسي لو كلت عندي شجاعه كافيه واكدر اكول لا ومو من حقي هم، بس ردت هذا اليوم يكون مختلف مثل يوم زواجنا اللي مكتمل على خير وخططت لهيج موضوع بس بما انو هو يريد ليش امنعه واخذ حرام، اجيت انطي جوابي بس نقذني موبايله ماعرف منو اتصل بيه أخذه وطلع اني بسرعة رحت لترانيم اريدها تساعدني دكيت الباب حيل وهي طلعت مفزوعه.
ترانيم: خيرج ولج شبيج جايه هاده عليه؟!
ايريم: تعالي ويايه اخذيني يمج المهم اريد مساعدتج.
ترانيم: غير تفهميني شكو جايه تركعين بابي بنص الليل ماعندج رجل يلزمج ولو انتِ هم تايهتلج مثل ذيج.
ايريم: يمعوده منين تنطفين اريد احجي وانتِ اخذتيني بالسانج، اسكتي ثانتين مو حتى السالفه نسيتها.
ترانيم: هاي نلصمت اسمعج شكوو؟
ايريم: مو هنا تعالي ويايه للغرفه.
ترانيم: مره اني استحي على نفسج، روحي دوري على رجلج شسوين بيه!!!
ايريم: مو وكت شقه امشي كتلج.
سحبتها من ايدها والسانها يبدع مسكت ابد دخلتها الغرفه وقفلت الباب هي طفرت بوجهي: اسم الله شبيج فززتيني!!!
ترانيم: ايا طايحه الحظ صرتي مستخفه افتحي الباب اريد اولي انطمر شعندج جايبتني لهنا؟!
ايريم: تخليني احجي اليوم لو شلووون؟
ترانيم: ستعجلي وراي مخده هسه تشتاقلي عمت عيني اليوم كله مشافتني.
ايريم: مهيائيل.
ترانيم: مات، عرفته مكابل الوجوه الخر* من الصبح لليل اكيد ميبقى عايش.
ايريم: اسم الله شبيج اليوم افتهمي اول شي شنو التكملة بدون متكمزين.
ترانيم: انتِ يحتاجلج ساحبه حتى تفضيها وتكتين الدره الماراضيه تطلع من حلكج.
حجيت بسرعه وبدون مقدمات هي خربانه خربانه على شنو الخجل.
ايريم: يريدني.
ترانيم: خلي ياخذج اني شعليه وتكعديني وجايبتني لهنا عبالي اكو شي مهم.
ايريم: ترانيم انتِ فاصله فد مره، افتحي مخج ويايه وركزي اكلج مهيائيل يريدني.
ترانيم: عزةةة بس لا..
ايريم: اي.
ترانيم: ومخططج؟
ايريم: بححح.
ترانيم: وهسه المطلوب مني شنو ابدل مكانج اخته اني تره ميصير.
ايريم: والعباس راح جلطيني.
ترانيم: حتى لو جنازة الرجال ناوي يعني ماكو مهرب، فكري شنو تسوين هسه، صدك هو وينه؟
ايريم: راح ماعرف وين.
ترانيم: اي يرجع حضري نفسج بهذا الوقت واني راجعه انام.
رادت تطلع سحبتها.
ايريم: وين رايحه وعايفتني؟
ترانيم: اكلج هو مو عرض سينمائي اني هيج مشاهد ماحبها عود باجر الصبح الزمج وسولفيلي.
ايريم: والرب الخلق زوجي حرف واحد ما احجيلج اذا مساعدتيني.
ترانيم: لزمتيني من أيدي التوجعني امشي كدامي أمري لله.
ايريم: شنو راح نسوي؟
ترانيم: قصدج تسوين هي ليلتج مو ليلتي هاي للتذكير بس.
ايريم: ادري فضيني.
ترانيم: اول شي نخليلج احمر واخضر حتى يصير اليوم عرسج من صدك.
ايريم: وبعدين؟
ترانيم: البسي سيت نوم مشلتح وكعدي على الجربايه وهو المحروس يكمل الباقي.
ايريم: صايره ادبسزز وحق الله.
ترانيم: والرب الخلقج من يوم يومي بس شويه استحي منج لأن بعدج صغيره متعرفين.
خلتلي مكياج هادئ رسمت ملامحي بجاذبيه بس الروج احمر دموي جذبني شكلي وابهرت بلمساتها حيل، اول مكملت هلهلت بصوت عالي كرصتها.
ايريم: شبيج تهلهلين فضحتينا.
ترانيم: عريسنا جكليته حامض حلو اباكيته،
ماريد العشا زفوني هو هوو.
ايريم: احلف عليج ماكو عقل.
ترانيم: ولج فرحانه راح اصير عمه عن قريب ياويليييي.
ايريم: صوتج يمعودة فززتي الموته البالمكبره.
ترانيم: غير فرحانه بيكم، ولو هو مو صوجج صوجي اني عايفه نومتي وجايه اسويلج دعم معنوي.
ايريم: شكراً لوجودج يمي صدك ماعرف شنو اتصرف لو انتِ ماكو.
مسحت دموعها الوهميه وحجت بهدوء.
ترانيم: لا هيج هوايه على كلبي اني مره صايبني جفاف وهذا الكلام يهيج المشاعر الجياشه والمسموط بالكبر منين اجيبه؟
ضحكت عليها شلون تحجي وتسوي نفسها متأثره.
ترانيم: يلا داده صار لازم تلبسين واني راح اتصل بأبو الطلايب استعجله لأن اذا طلع ينسى نفسه ادري بيه.
ايريم: اختاري انتِ والله ماعرف بهاي السوالف.
ترانيم: اني كايله اليوم ماكو نوم سهرانين للصبح، يلا بخدمة هاي الوجه ميضيع شي.
راحت يم الكنتور بقت ادور فتره مو طويله آخر شي طلعت سيت ابيض واجت شمرته بحضني وكالت بتهديد.
ترانيم: سوالف عياره ماريد البسي وبدون استحي وماكدر وشلون، انتِ خلصتيها بحضنه اربع وعشرين ساعه لتجين يمي تتمسكنين وصعبه وعيب اطيح حظج اذا مصرت عمه هذا الأسبوع.
ايريم: هوب هوب اكلتيني بكشوري واني محجيت شي اصلاً، منو كلج راح اعترض من الأساس؟!
حجيت هيج ماخذه دور السباعيه من رفعته لوجهي وشفته صدك مشلتح بلعت ريكي ورفعت وجهي الها قبل ما انطق خزرتني.
ترانيم: يلا داده بوجهج للحمام واني انتظرج بالباب خاف تحتاجين شي لتستحين الولد ولدنه وماعليه اذيه اعرفه خبره.
رفعتلها حاجبي.
ايريم: ومنين عرفتيه خبره؟
ترانيم: رجال عمره 30 سنه ابو الخبره اصلاً شعرفج انتِ اني افهم بالزلم ولتكولين يستحرم لأن يزوج متعه عادي اهم شي يشبع غريزته.
ايريم: تحسسيني هم حيوانات.
ترانيم: ليش حيوانات شاب ومن حقه وممسوي شي حرام والدليل كلامي الج، الرجال ميصبر وخاصه من يشوفج كدام عينه اربع وعشرين ساعة، هو بالمطبخ وراد العنكود والسله ترديه بالغرفه وبس هو وانتِ ويصير متدين والسواج وخلاج كدامي غصب عن الظروف لو تلبسين كونيه هم تغريه الا اذا جان مسحور، من كلت اهم شي الغريزة يعني اهم شي هي كلامي ميصير ثنين وداعتج.
ايريم: مو كلها لتعممين.
ترانيم: وحقج كلها ابو الخمسطعش وابو الستين هو ماطول رجال يحب النسوان خضره حمره صفره المهم مره، وبالمقدار اللي تنطي تاخذين ولحد يكلج زوجج ميستاهل وبعدين يخونج وميصون العشرة ذني حيايه لتصدكين بيهن، بكد متزرعين تحصدين، بيج ومامليتي عينه تشترين راحه بالج واذا ربج وخان متلومين نفسج وتبقين تكولين اني نطيت بس هو جلب وراح على أقرب عظم انشمرله.
فزيت على صوته وهو يحجي وراها غميت نفسي شلون ناسيه عنده مفتاح هسه شنو هل منظر اللي اني بيه وكدامه يبووووو.
مهيائيل: رحمه الله والديج سويتيني جلب.
ترانيم: يمعود مثل غير نرفع المعنويات هاي شبيك.
مهيائيل: عبالج تضحكين عليه بهاي السوالف على اساس ماعرفج انا.
ترانيم: ماضحك عليك اضحك عليها لتخاف ادري بيك *** ماتنغلب.
مهيائيل: اذا منمتي هوايه تبقين جفصين روحي عيوني للغرفه قبل مطلعيني **** ولو انتِ شبقيتي سويتيني ***.
ترانيم: اعتذاري راح يصير شكل ايريم عود اصفن بوجهه وترحملي، عايفتلكم الجو تصبحون على خير.
كرصتها بخصرها والخوفه صارت برجليه اريد اوكف ما أكدر وهي ولاتحس رادت تطلع منعها وهو يكول.
مهيائيل: اوكفي لحظه لترحين ابقي يمها نازل اني شويه واصعد.
اخذت نفس بسعادة وهو طلع رحت قفلت الباب سريع وهي مخلتني اوكف هوايه بسرعه دفعتني للحمام، عضيت شفتي هسه هذا شلون البسه اني والله عيب، مكدرت أطول بالصفنه فززتني وهي تصيح من وره الباب.
ترانيم: وعلي تره اجيج اريد اولي انام وانتِ ماخذج الواهس بس صفنين.
لبسته ولبست الروب مالته وطلعت لكيتها واكفه ومخليه ايدها على خصرها وتباوعلي من فوك ليجوه سحبتني من أيدي للمرايه وفتحت شعري شسورته وبرمت كم خصله.
ترانيم: اليوم ابو السحوره يسودن.
ايريم: عفيه عليج عاشت ايدج خوفيني اكثر.
ضحكت وخلتلي عطر وكملت دارتني الها وفصلتني تفصال بعيونها اخيراً وبعد ملعنت يومي كالت وهي تصفك بأديها.
ترانيم: كملنه، على هذا الشغل يحتاج اقط زوجج باجر حتى الصالون ميطلعن ملكات جمال مثل مسويتج اني هسه.
حجيت وياها بضحكه واني امشي وياها للباب.
ايريم: هي حمره وكحله على شنو خابصتني، اطلعي وصيحي زوجي بطريقج.
دارت وجهه وغمزلتي بمكر.
ترانيم: مستعجله موو؟
ايريم: ايي بس اطلعي.
ترانيم: اوكفي طفي الكلوب حتى تصير أجواء واني ان شاء الله وي الأذان امرلج بحجة الصلاة.
ايريم: مراح اصلي اليوم مو للعبادة.
ترانيم: هاي بعدنه بأسم الله وعفتي الدين بعد
سبوع ادز طلب حتى اشوفج.
ايريم: ناس مشغولين احنه قابل فارغين.
ترانيم: عمت عينج مشغوله، المهم اني المخده اشتاقتلي صوتها اسمعه منا، ليله سعيده وتصبحين على خير داده.
ايريم: وانتِ من اهل الخير عيوني.
هي طلعت واني صابتني الرجفه اخذت نفس عميق وطفيت الكلوب خليت بس الشمعه مشتغله وكلوب احمر انارته خفيفه، ثواني ماعرف دقايق محسبت الوقت بسبب تفكيري دخل وقفل الباب بدون ميحجي شي دخل للحمام بقيت انتظره فتره طويله وهو ماكو تالي نعست حيل وهو طول نمت ومحسيت الا على أيده وهو يمررها على ملامح وجهي فتحت عيوني بنعاس شفته قريب من عندي حيل وشعره يقطر مي على وجهي، عشنا لحظات خاصة بس ما استمر وقت حتى ابتعد كايل بنبره مليانه ألم حسيته بوجهه.
مهيائيل: ماكدر.
كلمه وحده خلتني استوعب اللي صار، شنو مايكدر؟
ومن الأساس اذا ميريدني ليش اقترب اصلاً!!!
هو اللي كال ولخاطر علاقتنا مردت اكول لا ومنعه ومن احضر نفسي اله ابساطه يكلي ماكدر!!!
ومشاعري؟
ليش مفكر بيه؟!
لهاي الدرجه اني رخيصه بنظره وبكيفه يجي وبمزاجه يبتعد؟
صحه عقلي وكمت اشوف كل شي من ناحية الكرامه سحبت روبي ولبسته وكمت بدون حرف اخذت ملابسي من الكنتور ودخلت للحمام، مكدرت ابجي لأن بعدني بالصدمه اني هيج يصير ويايه!!!
بس والله مو صوجه ردت رضا الله وطاوعته وبما انو طلع ميستاهل يحلم يلزم ظفري بعد وما يطلع اسمي ايريم اذا مخليته ايعض اصابيعه ندم على هاي سوايته وجرحه لكلبي بهاي الطريقة.
اخذت نفس اشجع نفسي كملت حمامي لبست ثوب قصير يعبر الركبه وطلعت بدون ما باوعله، بداخلي غضب جبير ماكدر اوصفه ناحيته حسسني بالذله واني اقدمله نفسي وهو ابساطه رفضني، بلعت غصتي وخليت راسي على المخده ونمت ليش اعوف الجربايه اله واصلاً بالقانون والشرع هي ملكي المفروض هو ينزل مو اني،
ختنكت من ريحة الدخان كاعد بمكانه وبس يدخن، صفنت بحياتي والنوم طار من عيوني وكلبي يغلي من عنده مع هذا منزلت نفسي وحجيت حتى ميكول رادتني ورفضتها ولا يحس اني كاتله نفسي عليه، وبهاي الحركه راح ينقهر اكثر من يشوفني ممهتمه،
حسيت بيه نام عدل بعد مجان مخلي نص ظهره على تاج الجربايه، غمضت عيوني احاول اغفى وانسى كل شي صار وكأن حلم مو واقع وصحيت على صوته وهو يكول.
مهيائيل: حاولت وضغطت على نفسي هوايه بس مكدرت لتزعلين قُفلي والمفتاح.
جاوبته بهدوء رغم الإعصار البداخلي.
ايريم: مصار شي لتهتم.
قرب ايده من وجهي وداره اله غمضت عيوني حتى ميشوف ضعفي بيهن بنفس الوقت ماريد اشوفه.
مهيائيل: ايريم، اني وانتِ حياتنا تختلف عن أي زوجين ثانين، الظروف الجمعتنا وشغلي بالأخص والصار ويايه بالماضي كل هذا يمنعني ابدي صفحه جديده بدون عوائق، الصار بالماضي اكبر عقبه كدام طريقنا.
سكت شويه وخله جبهته على جبهتي وكال بهدوء.
مهيائيل: اعرفج بديتي تتقبليني بدون ضغط لهذا السبب قررت احاول وضغط على نفسي وابني وياج حياة سعيده خاليه من المشاكل بعد مشفت راحتي بحضنج وجربت بس مكدرت.
فتحت عيوني من عرفت مابيها مجال ابقى ساكته الصمت مو الحل بهيج مواقف، رفعت طرف شفتي بأبتسامه حاولت قدر الأمكان اخليها تشبه ابتسامته يوم العقد اللي لو اعيش الف سنه مستحيل انساها.
ايريم: ورقه وحتركت اعتبره حلم وانتهى لتضغط على نفسك وتجبرها عليه اذا داخلك ممتقبلني ميصير تقنعه بعكس هيج، وهسه اذا تسمح وخر عني اريد انام عندي امتحان وأريد أقره.
وخرت ايده تركته بصدمته ودرت وجهي حسيت عليه طلع من الغرفه اخذت نفس عميق اجمع بيه الهوه بداخلي ونزلت دموعي وكأن هسه يلا ستوعبت الصار، مسويت شي غلط حتى استاهل هيج عقوبه،
كمت من مكاني من شفت مابيها مجال النوم مجاي يجيني ولا أكدر ابقى هيج بهمي توضيت وفرشت السجادة وبقيت اصلي ودعي انو رب العالمين يخلصني من هذا البيت،
بقيت للأذان بنفس مكاني دموعي كلما امسحها تنزل بقوة اكبر حتى حسيت راسي راح ينفجر، صليت صلاة الصبح وكمت انام بس والله ماكو النعاس مغادر عيوني، من عرفت ماكو فايدة من محاولاتي الفاشله كمت طلعت محاضراتي وبديت أقره كدرت أنسى شويه واني انطي جهد بالقرايه محسيت الا وخيال فوك راسي بدون مارفعه حجيت.
ايريم: اريد اقره رجاءً لتزعجني.
ترانيم: شبيج ولج ليش هيج صار؟
رفعت راسي الها ونزلت دموعي بسرعه اجت يمي وحضنتني لصدرها، حجيت واني اشهك لأن ما اتحمل اخلي شي بكلبي اكثر من هيج.
ايريم: يكولي ماكدر فشلني كدام نفسي ترانيم، والله مسويت شي اصلاً محجيت ولا حرف ليش هيج جازاني واني الجنت ادور راحته حتى الكلمه الاعرفها تضوجه ما احجيها، والله عايشه ايام سودة متحملتها على اعصابي بس لخاطره اسكت وشنو قدملي؟
يكلي ماريدج هيج بساطه جرح مشاعري وحطم كلبي،
وخرت عنها ومسحت دموعي وحجيت بثقه:
انطيته نفسي الغاليه بكُل رضا وهو شمرها مثل أي شغله مو مهمه، هانت عليه كرامتي وهيج انسان مستحيل أكدر اسامحه.
ترانيم: حقج والعن والديه اللي يكول لا، هسه اغسلج شراعه وليهمج، هذا الاثول وين لاكي كمر نازل من السما حتى يتبطر شو مكابل بس المطايه من طول النهار، بس هو كالها المثل مارضه بجزة رضه بجزة وخروف.
ايريم: ماكو داعي تحجين شي وياه هسه يفكرني كاتله نفسي عليه واللي سواه أثر بيه عباله اهتم وهاي نقطه مكسب لصالحه واني اريد ابين إله العكس.
ترانيم: عفيه عليج شاطره ربيه وخلي يحسب لزعلج الف حساب.
ايريم: انتِ شلون عرفتي؟
ترانيم: سمعت صوت جوه ونزلت حتى اتأكد شفته كاعد ويدخن.
ايريم: بالصالة؟
ترانيم: اي ليش؟
ايريم: هيج بس سؤال.
ترانيم: لتخافين مهيائيل ميدخل للغرفه الا عنده شغل بس ميمون اغلب الأوقات بيها.
ايريم: حتى لو دخل ميعنيني.
ترانيم: ادري بيج متحجين من كلبج، ربي يهدي سركم ان شاء الله.
ايريم: روحي نامي وارتاحي لتشغلين بالج بيه، اني عتبرته حلم وصحيت من عنده وانتهى بوقته.
ترانيم: مراح تنامين؟
ايريم: لا اريد اقره اليوم كله مفتحت محاضره وحده وبعد باجر امتحاني.
ترانيم: حتى لو نامي شويه ميصير تبقين سهرانه.
ايريم: اذا نعست انام لتفكرين بيه.
ترانيم: اذا حتاجيتي شي صيحيني أو بس رمشيلي اجيج.
ايريم: متقصرين كلج واجب.
ترانيم: غاليه على كلبي حيل انتِ اشوفج بمقام بنتي.
ايريم: ان شاءالله تتزوجين وتصيرين احله ام.
ترانيم: عدانا الشيب ويني وين الزواج.
ايريم: يكولون القسمه تسد حلوك متدرين شنو يصير باجر.
ترانيم: الله كريم كل شي لوقته حلو، رايحه انام وازعل منج اذا ردتي شي ومأجيتي عليه.
ايريم: من هاي الناحيه لتخافين قبل جنتي انتِ ومهيائيل هسه بس انتِ لامحاله اجي عليج لعد وين اروح.
طلعت بدون متحجي شي بس مبينه من نظرة عيونها مقهوره عليه، رجعت ادرس بقيت مندمجه وماعرف الوقت شكد صار حتى نعست حيل ومحسيت الا واني مرفوعه بالهوه مشكلتي من انام افقد وماحس على نفسي مثل الجثه، فزيت بعد وقت طويل شفت نفسي بحضنه راسي على صدره وأيده بشعري كمت بسرعة وحجيت واني دايره وجهي عنه.
ايريم: ماريد هيج قرب مره ثانيه وياريت متحجي ويايه بعد، وجودي اهنا حتى ميحس احد على شي ويخلوني سالفه بحلك الكل لتفكره حُباً بيك.
اجيت اكوم سحبني ورجعني لنفس المكان بس هاي المره رفع راسي بأيده خلاني بوجهه غصب وعينه بعيني سويتها عناد وغمضت حجه بهدوء.
مهيائيل: انتِ مره جبيره متفيدج سوالف الأطفال، فتحي عيونج.
فتحت عيوني ورفعتله حاجبي.
ايريم: هياني موجوده كول شنو تريد وخلصني اريد انزل.
مهيائيل: متردين شماته من احد اذا زعلتي بشكل علني ليش بقيتي يمي على نفس الفراش؟
ابتسمت بوجهه وكلت بتساؤل.
ايريم: وليش ما ابقى؟!
مو على اساس هاي غرفتي شرعاً وقانوناً؟
رفعلي طرف شفته مبتسم وكال.
مهيائيل: ايي.
ايريم: معناها انت المفروض تطلع مو اني.
مهيائيل: واذا مطلعت؟
ايريم: سوالف اعوف الجربايه ألك واني انام على الكاع وانتظرك تراضيني وارجع لفراشي هذا بسوالف الزمن الجميل احنه اولاد اليوم ماعندي سوالف الأطفال مثل مكلت كبرنا على هاي السوالف.
مهيائيل: واني تعجبني شخصيتج.
ايريم: وراح اعجبك اكثر لتخاف.
كمت من يمه وهو نزل جوه كملت روتيني من صلاة ودعاء لأن اليوم كاعدة متأخر فتحت باب الغرفه ردت انزل وصارت بوجهي ياسيم.
ياسيم: مهيائيل يريدج بالغرفه.
ايريم: ياغرفه؟
ياسيم: الجوه.
ايريم: اليم الدرج؟
ياسيم: لا اول وحده.
ايريم: تمام راح انزل.
عقدت حاجبي بتعجب مهيائيل ليش يدزها تصيحني خو يجي هو، نفضت كل الأفكار من عقلي ونزلت وصلت آخر بايه أيدي رادت تنخلع من اللي سحبني ضرب جسمي بالباب مالت الغرفه اللي جوه الدرج وأيده على حلكي حتى ما اصرخ من رفعت عيني وباوعتله بصدمه هذا معقوله؟!...
يتبع..
البارت اكثر من 4210 كلمه
تفاعلكم اللي يسويلي واهس وتعليقاتكم بين الفقرات وتصويتكم للبارت يحلوين
تصبحون على الف خير شمعاتي.
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!