للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة(زهراء احمد)
_________
-مبتورةٌ أيّامي، أحاولُ السّير بعمرٍ أعرج.
___
مخلي ايده على حلكي مانعني اصرخ ضربته على ايده حيل وحركت جسمي حتى يوخر بس هو اقوه من عندي فتح باب الغرفه ودفعني جوه وقفل الباب دفعته بكل قوتي رجع ليوره صرخت بيه بغضب.
ايريم: انت مخبل هاي ادري بيها بس مالت تسوي هيج وتفكر تمس شرفي وحق الرب وملائكته اموتك ومايرفلي جفن وخر عني وخليني اروح احسن ميصير الحجي غير شي.
ضحك بصوت عالي راح اكذب لو كلت ماخفت اصلاً كل خليه بجسمي ترجف دعيت بداخلي ربي ينقذني ويخلصني من هذا السكير البدون عقل اذا هو اخوه ماسلم من عنده اسلم اني،
هو يتقرب واني ارجع ليوره حتى نضربت بالحايط نزلت دموعي وحاولت اصير هادئه واحجي وياه بعقل حتى يعوفني اطلع.
ايريم: اني مالي علاقه بلي بينك وبين مهيائيل شنو متريد تسوي بيه سوي المهم تعوفني بحالي، اعتبرني اختك وعيب هذا التصرف على شاربك وانت رجال جبير وعاقل.
باوعلي بنظره تفصيليه مهيائيل مباوعلي بيها عيونه خترقت داخلي عرفت هذا ما من عنده فايده والكلام مستحيل يجيب نتيجه وياه لازم اشوف حل قبل ميصير شي إليه ومحد يكدر يساعدني بعدها، درت وجهي لانحاء الغرفه بلكي اكو شي اضربه بيه واستغل الفرصه واطلع، بس حظي المصخم ملكيت شي، فزيت على ايده وهو يلزم أيدي دفعته وصرخت بيه.
ايريم: ماتستحي ماعندك غيره مو اني عرضك وسمعتي من سمعتكم انتوا باجر عكبه اذا مسني شي كلكم تتحاسبون وتصير عليكم وصمه عار، خليك رجال مره وحده بحياتك وعوفني اطلع لتسوي سوالف سرسريه وناس ساقطه وي مرت اخوك، افهمممم افهممم مرت اخوك ماجايه من الشارع،
الموتني ميحجي شي مخليها على الصامت بعدين نطق ابو الهول وشمئزت نفسي من ريحته هذا ماعنده وقت محدد بكُل الأوقات يشرب شنو من نفسيه معفنه.
ميمون: هو لأن انتِ مرت اخوي اريد اسوي هيج حتى ميكدر يباوع بوجهج وبهذا حققت انتقامي.
حجيت بتعجب من كلامه: وشنو تستفاد من تفرقنا؟!
ابتسم بخباثه وكال.
ميمون: لأن هو يحبج حيل واني اريد احرمه من اعز شي على كلبه، سويت هوايه اشياء حتى ادمر حياته وافرقكم بس مصار شي من المخططله وهذا غلط لازم اكو شي يشتت شملكم واخليه عايش بحسره طول العمر.
ايريم: ليش كل هذا الحقد شنو سوالك حتى تكرهه لهاي الدرجه؟
ميمون: اخذ امي ومر...
ضربه قويه على الباب خلته يسكت نفتح وشفته واكف بطوله حسيته صدك ملاكي المنقذ عيونه بيها اعصار اتقدم بدون مقدمات وضربه بوكس بنص وجهه اني من يمي وكعت، مكتفه بواحد ولا ثنين دمره حرفياً وهذا ميحرك لا أيد ولا رجل تمدد بالكاع ومهيائيل كاعد على صدره ويضرب بيه بعنف أخير شي تعب وكام صاح بصوت عالي هز البيت هز.
مهيائيل: رررررررررااااااااااائفففففف المسدس خليني اشوفه الزلم الحقيقيه شنو تسوي من يصير الموضوع يم العرض، عباله كل النسوان **** مثل مرته ال****، مو دم راح ازوعه روحه هل ماعنده غيره،
اتقدم يمه وبصق بنص وجهه وضربه برجله حيل وحجه بشمئزاز: تخسه الشوارب الشايلها زينها بالقندرة احسلك لأن صدكني اذا مسويتها يجي يوم واني اسويها واعلمك شلون تندك بمرتي،
رررررراااائففففف تجي لو اصعد؟؟؟
رائف: اجيت يمعود بس سمي بأسم الله شبيك مستعجل!!!
دخل وشافه مدد كبل ركض وكعد يمه وصرخ بمهيائيل.
رائف: ولك تخبلت نسيت هذا اخوك شلون تسوي بيه هيج؟!
المفروض طلقه بنص راسه وفضها على شنو دمرت الكاع هسه منو بي حيل ينظف!!!
مهيائيل: كوم وخر وانطيني المسدس خليني اربي هل ساقط الماعنده غيره ولاشرف شنو يعني عرض وحرمة بيت، بمكان مايحميهن من ولد الحرام صار هو ابن حرام عليهن، طاح حظ هيج زلم همهم بس ***** ال*****.
رائف: ادري بيك معصب بس ميصير تقتله بعدين تدخل سجن واحنه ماعدنه غيرك.
مهيائيل: ميخالف المهم اخلص العالم من هاي الحشره السامه.
كل هذا كاعده وباوع عليهم بعيون مدمعه وجسم يرجف، كلهن واكفات بالباب محد دخلت عبالك مسرحيه وديشاهدن العرض، عيوني راحت دور عليها مشفتها موجوده بهاي اللحظه محتاجه حضنها حيل، فززني من سحب أقسام وخله المسدس بوجهه اعرف مهيائيل ميلعب بهيج سوالف اذا صدك شياطينه وكفت كدامه يرتكب جريمه وميرفله جفن من تخيلته ينسجن ومايبقى عندي احد وماراح اشوفه مره ثانيه هذا المنظر وحده انطاني الشجاعة كمت بركضه يمه حضنته من صدره وحجيت ودموعي تنزل متقبل تسكت.
ايريم: لخاطر الله لتسوي شي تندم عليه بعدين عوفه هو مو بوعيه، انت العاقل والفاهم وهو واحد خبل ميصير تنزل عقلك إله.
حجه وعينه مثبته عليه وعيونه دم من العصبيه.
مهيائيل: وخري عني خليني ارجع اربيه من جده وجديد، هذا الدماغ سززز خوفج ولازم اعاقبه.
ايريم: جان سكران بس هسه انت بوعيك،
لزمت وجهه بثنين أديه وخليته يقابل وجهي مهتميت لأي أحد موجود وقربت راسي وبسته بطرف شفته وحجيت بغصه: اذا صار بيك شي منو أليه لتضيعني وتضيع نفسك مهيائيل لخاطر كل لحظه حلوه عشناها سوا.
رفع ايده ومسح دموعي بأبهامه وكال بنبرة قلق واضحه.
مهيائيل: خفتي؟
اشرتله براسي بمعنى اي وحجيت بدموع: هوايه.
حضني لصدره حيل وكال بتوعد.
مهيائيل: اذا ما اطيح حظه مايكون اسمي مهيائيل، وحق كل دمعه نزلت من عيونج ورجفة خوف صابت جسمج العنلج يومهم واحد واحد هل ساقطين الادبسزيه.
ايريم: خلي نصعد ماريد ابقى اهنا اكثر.
وخرني عن حضنه وكال وهو يمشي ناحيته.
مهيائيل: ابقي اهنا دقيقه خليني اضربه كم بوكس لأن نار كلبي بعدها مشتغله مابردت.
رجع ضربه من جديد وذلك فاقد مايدري بالدنيا أخير شي تعب وكام وصاح برائف: وحق الخلق ايريم اذا شفت الباب نفتح لو وحده منجن وصلت يم عتبته ورقه طلاكها توصلها يم اهلها وتعرفني اذا حجيت كلمه شلون تتنفذ بدون مافكر بالعواقب مو مثل ****** صاير بوكس ملاكمه إليه كلما اضوج اتمرن بيه.
رائف سد الباب والقفل يبقى يمك وأريد كلب ابن كلب يوصل يمه والله اعلقه فلقه اباب البيت وخلي فرجه لأمة محمد.
لزم أيدي وصعدنا فوك اول مدخلت للغرفه وصارت بوجهي الجربايه رجعت بذاكرتي ليلة البارحه وخرت أيده ورحت للحمام بعد ما اخذت ملابسي حسيت نفسي قذرة، فتحت الدوش ودموعي تنزل وي المي شنو يصير ويايه اكثر من هيج واني من شفته لحد الآن معشت براحه، صحيح ينقذني بكل موقف صعب بس هو أساس جحيمي وعذابي، الواضح حياتي كلما تتقدم تصير أسوء من قبل،
جلفت نفسي وكأن مسابحه اكثر من سبوع طلعت جلد جديد كلما اذكر لمساته استغفر ربي واحجي وي نفسي: يارب اغفرلي وحقك مو بيدي هم شياطين واني ماكدر عليهم وحدي.
سكتت وهدأت اعصابي من سمعت صوته يحجي بخوف.
مهيائيل: ولج ايريم صار ساعتين جوه شنووو تسوين؟
محجيت شي رجع كال مره ثانيه: وحق ربج اذا محجيتي وطمنتيني عليج هسه افتح الباب وادخل.
ادري بي يسيوها لعنت الشيطان وجاوبته: مبيه شي دقايق وطلع.
مسمعت صوته بعد اني هم مطولت اكثر بسرعة طلعت، لكيته واكف يم الشباك والغرفه صايره مدخنه من كد الجكاير هذا المنظر اخذت عليه عيني وحفظته كلما يفكر بشي لو معصب من شي يسوي هيج، جففت شعري وعلى صوت الجهاز التفتلي وبقى صافن عليه اني اشوفه بالمرايه بس مسويه نفسي ممهتمه إله اصلاً، كملت وبداخلي سؤالين الأول شلون عرف هو الضربني ذلك اليوم من جنت يم الغرفه والثاني شلون عرف بسالفة اليوم وهو مجان موجود بالبيت اصلاً؟!
ومستحيل اخلي التفكير ينخر عقلي والجواب واكف ومنتظر من عندي بس كلمه، نظرته مبينه يريدني اخلق حديث وياه ابو الطلايب منتظرني اتنازل وهو الغلطان بأحلامه، بلعت فضولي ورحت طلعت المحاضرات واليوم حالفه ماكو نزله بعد كافي اللي شفته من عدهم لحد الآن وماراح انتظرهم يسون شي جديد يلا اخذ اجراء من هسه اعتزل الكُل بس ترانيم لأن مشفت منها شي مو زين بالعكس هي بمقام اختي الجبيره ويمكن امي حتى،
من شاف اصراري وخشمي المرفوع بعجرفه وهذا بسبب تصرفاته اكيد طلع بعصبيه وضرب الباب وراه، رفعت أيدي افرها بالهوه: والله يا الله فوك ماهو عايل بيه يريدني اطخله راس، اذا ماطلعتلك كلب بصف كلبك فلا اسمي ايريم،
ماعرف منين اجتني الجرأة ودرت وجهي للمكان اللي كلي بيه موجود الجني ابتسمت وكتله: عود سولفله ماوصيك لتحتفظ بسر بينه.
تالي عمرج يا ايريم صرتي مخبله تحجين وي نفسج، طردت كُل الأفكار وبديت أقره وخلص باقي اليوم بشكل طبيعي لا اني نزلت ولا واحد صعدلي حتى ترانيم مشفتها،
شفت الساعه بالأربعه العصر واني ميته من الجوع فتحت الموبايل وتصلت بيها القلق بداخلي يلعب لأن مشفتها اليوم.
اول مفتحت الخط وبدون مقدمات بدت السيفونيه مالتها.
ترانيم: طايحة الحظ يوم كامل من الصبح واني ماكو كلت اريد اشوف معزتي عدها تتصل تسأل لاحس ولاخبر عبالي متي، يالكاطعه وينج ولج؟
ايريم: وعليكم السلام ورحمه الله وبركاته، اني بخير وردت اطمأن عليج وين مختفيه اليوم ليش مشفتج؟
ترانيم: زين والله وشتغل عقلج وفكرتي بيه.
ايريم: عوفي هاي السوالف وحجيلي وينج اليوم؟!
ترانيم: ابيتي مليت منكم واجيت اجازة كم يوم.
ايريم: صدك والله؟
ترانيم: اي والله ليش ابو الطلايب مكلج؟
ايريم: لا محد كال شي، البسي ملابسج وتصلي بيه اريدج ترجعين هسه يمي ميته من الجوع وماكدر انزل وحدي.
ترانيم: ليش؟
ايريم: تعالي واني احجيلج مو مال موبايل.
ترانيم: خوفتيني ولج شنو صاير؟
ايريم: ما احجي شي حتى تجين.
ترانيم: ماكدر اجي ثواب مسويه اليوم وعازمه عيالي على روح المكبور.
ايريم: منين طلع هذا الثواب؟!
ترانيم: سوالف رجلج هاي والا اني تمره على روحه ما انطي.
ايريم: مهيائيل شنو دخله بهاي السالفه؟!
ترانيم: مادري الله اعلم.
ايريم: وشوكت ترجعين؟
ترانيم: باجر يمكن العصر اذا الله راد.
ايريم: ومهيائيل يمج؟
ترانيم: اي هسه طلع.
ايريم: وين رايح؟
ترانيم: ماكال شي، يجوز اشتاق واجه يشوفج.
ايريم: اي عاد الاشتياق مالته شلونه يخبل، عايفني وحدي من الصبح بدون ميفكر بيه ماكله لو لا.
ترانيم: ولج لو بس شايفه وجهه وشلون يرجف اجاني مشتعل النار تطلع من عيونه.
ايريم: ماطبختي عليهن.
ترانيم: باع هاي أكلها زوجج سر سعادتج واصله عنده للخشم وهي تستهزء صدك انتِ مال عين حمره يلا تمشين عدل.
ايريم: لاحمره ولاخضرة عايفني وحدي ورايح ينطفي يمج ويعرف عدل بعد اللي صار الصبح مستحيل انزل يمهم جوه.
ترانيم: فهميني شنو صار مابيه حيل اكعد اخمن.
ايريم: هاي لازم كعده مو مال اتصال.
ترانيم: مُصره متحجين شي اعرفج اذا يبستي راسج.
ايريم: اخذي راحتج داده واني رايحه اشوف شلون انزل.
ترانيم: لتنزلين هسه اتصل بأبو السحوره يجيج، كتله ذلك اليوم يشتري ثلاجه ويخليها بغرفتج على الأقل ترتاحين من شكولهن.
تنهدت: والله اذا بقت عليهن رحمه.
ترانيم: ليش منو مضوجج غيرهن؟
مكدرت اسكت اكثر من هيج: ميمون.
ترانيم: وهذا طايح الحظ شيريد؟!
ايريم: يكسر خشم مهيائيل بيه.
ترانيم: سود الله وجهه هل ادبسزز ***** شلون عنده قابليه يمد ايده على عرضه!!!
واني اكول ليش اجه معصب لهاي الدرجه، وانتِ شنو سويتي؟
ايريم: بجيت ولطمت وسكتت شنو اسوي أكثر من هيج.
ترانيم: لازم يوكفه عند حده تجاوز هوايه واحنه ساكتين عن عمايله واذا شتد الأمر نشتكي عليه يعيش بالحبوس ومايبقى مكابلنه وكاعد ومنكدر نأمن بيه.
ايريم: بالبدايه مجنت مقتنعه بس هسه من شفته تفاجأت شلون مأمنين على ياسيم يمه!!!
ترانيم: مو كتلج مهيائيل مسوي عليها حصار ممنوع تطلع من الباب من وره العشا.
ايريم: واذا منعها هذا ميمنعه يدخل للغرفه ويقفل الباب ومحد يدري بيه.
ترانيم: مستحيل مهيائيل يدري.
ايريم: ليش موكل بيها جني؟
ترانيم: ماعرف بس هو يدري.
واني اسولف وياها دخل مهيائيل سلمت عليها وسديته، عيني بقت عليه حفظت تصرفاته كلها اول ميدخل للغرفه ينزع الغتره ومحبسه والساعة والحلقة ويفتح دكم الدشداشه وياخذ تراك يلبسه بس بالغرفة والخاولي ويدخل للحمام،
انتبهلي صافنه عليه واني بقيت انطيه هذا الشعور عمداً احسسه بالاهتمام ومن يقترب اسوي بيه مثل مسوا بيه، حجه وهو يباوعلي بالمراية.
مهيائيل: ليش بقيتي طول اليوم بالغرفة؟
ايريم: بعد اللي صار اليوم مالي نزله جوه.
مهيائيل: انتِ ام البيت انزلي وكعدي براحتج معليج بيهم واللي يحجي وياج بكلمه تعالي كليلي اطيحلج حظه.
ايريم: ماريدك اطيح حظ احد خلصني من شوفتهم وبس.
مهيائيل: وهذا اللي راح يصير عن قريب بس اصبري.
ايريم: والله الواضح والمبين انو كلما يتقدم يوم كاعد تنكشف حقائقهم كدامي اكثر واعرف البيت العايشه بيه شياطينهم انسيه.
مهيائيل: وهذا الشي كتلج اياه من البدايه يعني اني ماخدعتج بشي.
ابتسمت متقربه من عنده، كايله بنبرة هادئة: ماريد أكثر من ان نعيش اني وياك بسلام وبعيد عن هيج ناس قذرة.
حضني كايل بنفس نبرتي.
مهيائيل: اني أول ساحر ينسحر وميحاول يفتح العمل بالعكس مستمتع بقيوده لأبعد حد، وإذا تردين الصراحه اريد ابقى متمسك بصاحبة العمل طول العمر واقيدها بأحضاني وامنعها تلتقي حتى بضوه الشمس.
لفيت أديه حضنته اني هم وحجيت بنفس نبرته واحنه بعدنا بذات القرب: ومنو مانعك قيدها بكُل قوة ولتخليها تشوف واحد غيرك، امنعها تتنفس بغير هواك، وممنوع تشم غير عطرك، احكم عليها بالإعدام حُباً حتى الموت حتى ميجي يوم وتكدر تطلع بيه من هاي القيود.
مهيائيل: اريدها تبقى برضاها، واشوف القبول والسعادة بعيونها واحس بحبها بلمسة ايدها، بدون قيد أو شرط اريدها إليه بكُل اعضائها واحساسيها، بكلبها وروحها، اني صابر ومتأكد يجي يوم تبادلني شعوري.
ايريم: وليش متسألها يجوز هي هم نفسك عدها نفس الأحاسيس؟
مهيائيل: بكلبها موجوده بس بذرة وقبل ما اطلب الثمار لازم اعتني بيها بالأول، اريدها تطلع مفعمه ومنعشه، وبكامل حيويتها.
ايريم: واذا التربه غير صالحة للزراعة؟
مهيائيل: لتخافين من هاي الناحيه الأرض خصبه.
باوعت بعيونه بعمق وحجيت بهدوء.
ايريم: مهيائيل لو اجه يوم وكتلك البينه لازم ينتهي شنو تكون ردة فعلك؟
شد على حضني بقوه وكال بهمس.
مهيائيل: حتى لو عفتج جسدياً روحي تبقى متصله بيج لنهاية العمر.
ايريم: تحبني؟
مهيائيل: تعرفين شنو الحب؟
ايريم: عرفني عليه انت.
مهيائيل: انو تنطين روحج لشخص واحد بس، يسيطر عليها بالكامل وبساطه يكدر يسلبها، واني سلمت روحي بين اديج اذا بتعدتي خطوه معناها سلبتي انفاسي.
حضنت وجه بكفوف أيدي وكلامي طالع من اعماقي حيل.
ايريم: مستحيل يجي يوم اعوف بيه ايدك واني بكامل وعيي واذا صارت وسويتها امنعني لان مو بعقلي صدكني.
مهيائيل: اريد الوقت يوكف ونبقى هيج طول العمر، اني بهذا القرب وانتِ بحضني.
كمل كلامه بنبرة عميقه وصلت لكلبي مباشره وهو يشم بشعري.
مهيائيل: اشم بيج ريحة امي يادعائها المستجاب.
كلماته تأثر بيه غصب، شديت على حضنه اكثر وبقينه فتره هيج، لزم وجهي بين اديه ابتسمت بوجهه باسني بخدي وراح طلع ملابسه من الكنتور، نزلت من المرايه وكلت: كمل حمامك منتظرتك ناكل سوا.
رتبت الغرفه ورشيتها معطر وبقيت منتظرته من طلع نزلنه سوا بعد ملبس الدشداشه، يوم بعد يوم اكتشف بيه صفات جديده تجذبني اله اكثر ومستحيل اخليه يعرف بحساسي ناحيته.
___
مخليه أيدي على خدي وصافنه عليها شلون تلبس اللاب كوت وتجهز نفسها للعمليه وي الدكتور وعقلي رايح باليوم اللي القوا القبض بيه على الدكتور بالجرم المشهود وهو يحاول سرقة اعضاء المريضه، هوايه سامعه قصص بخصوص هيج حالات وهاي اول مره اشهد عليها، فزيت من أفكاري على صوت الموبايل رفعته بانزعاج الواضح هاي المصيبه راح تبقى على راسي ومستحيل اخلص منها، حجيت بعصبيه واني مطايقه هذا الوضع.
زُمردة: خيرررر شنووو تريد تره مللتني وكرهتني بحياتي كلها، يا أخي الف مره كلت اني مو مال هيج علاقات ليش متفهمممم؟!
رائف: هدي اعصابج ياعمري ليش هيج منفعله!!!
بعدين يصير بيج ضغط ومتگدرين تاكلين موالح.
زُمردة: يارب ويصعد مره وحده حتى جلطه وللكبر، تره اني مو من بقايه اهلك حتى متصل كل دقيقه وزاعجني، خلي عندك كرامه وبطل حرشه وفكر بعرضك ليصير وياه نفس الشي.
رائف: لتخافين على عرضي كل انسان حر نفسه بتصرفاته اذا تريد تحب قابل امنعها حريه شخصيه هاي.
زُمردة: احلف عليك ماكو عقل براسك المثلث اني انصحك تروح لدكتور نفسي يعالجك قبل ميتأزم وضعك وحالتك تصير أسوء وماكو علاج يفيدك.
رائف: خايفه عليه يروحي؟
بعدين وين شفتي راسي مثلث شو اخبل مثل المطر بالربيع.
زُمردة: ألعن اليوم الشفتك بيه واحد مزعج، اعتبر هاي آخر مره اجاوبك لأن راح أحضرك واكسر الخط واخلص من قلة الأدب مالتك.
رائف: اشوفج بخير يعمري واذا يمج ليمون اشربي لأن سمعت يكولون مهدئ جيد للأعصاب وانتِ بعد اعرف شغلتج هاي.
سديته بوجهه وطلعت الخط كسرته وشمرته ورحت اشوف المريض.
رائف: اويلي شلون كلبي يدك سريع من اسمع صوتها، جسمي كله ينعنش.
سمعت صوت صريخ طلعت من غرفتي ركض ونزلت جوه فتحت عيوني على هذا المنظر،
ايريم لازمه رولين من شعرها وتعت بيها عت.
خلصنا اكل وغسلت المواعين مهيائيل صعد فوك واني من كملت شغلي أجيت اصعد هم بس وقفني صوتها وهي تكول.
رولين: اكلج لازم نفضحها ذلك الاثول مكدر يسوي بيها شي وتالي اجاني مدمه دوري غير واحد يكدر يساعدنا بهاي الشغله اريد اخلص منها بأقرب وقت.
تالين: انتِ تخبلتي والله يسوينا عبره اذا سمع بالموضوع خلي نسكت بهاي الفتره ومنسوي شي خاف يحس علينا وتصير مصيبه.
رولين: ماكدر انتظر اكثر من هيج كلما اشوفه مقترب من عدها اموت الف موته.
تالين: لكيتها صدكيني فكره تموت بالليل اجي يمج بسكته ونسولف بيها بس بالأول نيميه حتى ميسمع شي.
رولين: تمام متفقين.
شياطين البيت والمنطقه والكوكب كلها صارت كدامي معناها اللي صار اليوم الصبح جان مخطط من هاي الحقيره وذيج الثانيه اذا منطيتج درس كلما تشوفيني تتذكريه ما اطلع بنت ابوي،
دخلت بهجوم ولزمتها من شعرها وسحبتها: قليلة الأدب وحده بدون حيا ولاغيره ولج شلون ينطيج كلبج تسوين بيه هيج!!!
هسه كولي تكرهيني زوجج شنوووو مفكرتي يصير شي وينكشف مكلتي يمكن ينسجن، لو كاتله مهيائيل من صدك شتسوالججج؟
رولين: وخري عني الغبيه بنت الشوارع بواكت الزلم.
سمعتها تكول هيج ونهديت عليها بغضب اكبر وين اليوجعك، ضربتها راجدي بكل قوتي وبعدين دفعتها برجلي ورجعت سحبت شعرها: اذا اني بواكت الزلم انتِ شكول عليج وشفتج بعيني خاتله وياه بنص البيت بدون مستحه!!!
بنت الشوارع هي التركض وره الرياجيل وعدها واحد مكتوبه بإسمه.
رولين: كافي عوفيني الله لايوفقج شسويتي بيه.
ايريم: يطبج مرض وحده ادبسزز ماعندج ذرة أخلاق والله هسه اصعدله اخلي يطردج بره البيت ولو اني لو انتِ.
رولين: باجر يجي ميمون يرجعني واعلى مابخيلج اركبيه.
ايريم: حتى هذا المطي المسحوب من أذنه ينطرد والبيت يخلص من الشياطين البيه، والله انتم سبب البلاء بس طلعون كل الخير يجينا.
التفتت على صوته وهو يصوفر ويصفك بأيده ويحجي بضحكه.
رائف: عفيه بالنسره اضربيها حيل على علباتها الزركه الخابصتنه بيها.
ايريم: رائف صيحلي مهيائيل خلي يشوف شنو من شياطين مخلي ابيته.
رائف: ادللي يالغاليه هسه اصيحه بس بشرفج لتسوين اي حركة من مالت جاكي شان لمن انزل ماريد يفوتني مشهد.
رولين: ولج ليش واكفه تعالي ساعديني من اديهاا مخلت شعرايه براسي.
قبل متتحرك خزرتها: وحق الله اذا تقربتي خطوه وحده اكله على كل شي سمعته وشلون متفقات عليه بغيابه وأريد اشوف شنو يسوي بيجن.
بلعت السانها وسكتت، وثواني نزل وصوته رج البيت.
مهيائيل: خيرررررر شنووو هذا الصوت؟
عفتها ورحت يمه اباوع بعصبيه وحجيت بغضب: شوف بأي بيت مخليني عايشه وشنو من ناس معاشره، حقارتهم خلتهم يعتدون على مرتك وبيتك ولا مخططات بعد، الست رولين وياها تونه ثنينهن متفقات عليه يردن يجيبن واحد ويعتدي عليه حتى طلكني ويختليلها الجو وياك، الواضح اني السبب بتخريب أجوائكم الجميله، اذا جنت عائق طلكني وخليني اروح لبيت اهلي بشرفي على شنو طلعوني بمصيبة؟!
شفت عيونه صاروا حمر مثل اللهب كملت بصوت ناصي واني أأشر على الغرفه والدمعه بطرف عيني: اللي صار اليوم بغرفة الخيره وي اخوك جان مخطط الهن الله اعلم شنو شربنه وخلنه يتخبل هيج ويفكر يمد ايده على مرت اخوه، اذا اللي قيمه عندك ولو اشوي ذني الثنين ماريد اشوفهن اهنا بعد واذا كلت ما أكدر اني مالي كعده يمك.
مشيت من يمه ابتسمت برضا من لزم أيدي موقفني وكال بأمر.
مهيائيل: اعتقد سمعتن كلامها ولاوحده بيجن تبقى هنا كل وحده على بيت أهلها.
طفرت تحجي وياه بترجي.
تالين: مهيائيل شنو تكول!!!
استهدي بربك ولتخليها تأثر عليك بكم كلمه تره اللي سمعته نص الكلام مجان هيج ابد.
مهيائيل: حتى لو هي متوهمه وحتى لو سمعت غلط تبقى هاي رغبتها ومن واجبي أقدملها السعادة والراحة.
رولين: بس اني ما اطلع البيت بيت زوجي وبما انو مطردني بنفسه ابقى كاعده هنا على كلوبكم.
ابتسم بطرف شفته اعرف هاي الإبتسامه عدل وحافظتها ماوراها خير ابد، صاح بصوت عالي.
مهيائيل: ميموووون.
فتح الباب وطلع رجعت ليوره من شفته، الخوفه البداخلي بعدها مراحت وهسه من اشوفه واكف كدامي جسمي كله يرجف، نطق بصعوبه مبين عليه حيل هذا الرجال بيه شي مو بوعيه ابد وكأن مشرب مخدرات او شي ثاني.
ميمون: خير مهيائيل ليش صايحني؟
مهيائيل: مرتك اخوها مريض وتستحي تكلك اروح، انطيها اجازة مفتوحه خلي تشوف أهلها وتشبع بيهم حتى تمل.
ميمون: رائف وصلها لبيتهم واني راجع انام راسي حيل يأذيني وماريد ازعاج.
مهيائيل: تدلل اخوي الغالي.
صفنت معقوله ميذكر شو ممبين عليه مسوي مشكله البارحه واليوم، راح أسودن شنو هل بيت وشنو هاي الناس البيه!!!
مهيائيل: يلا تفضلن بره ماريد اشوف وجهجن اهنا وياسيم كالعادة ما الها غير بيت اخوها.
تذكرت اليوم الصبح من صاحتني اجيت اكله هي متفقه وياهن بس سكتت احتمال جبير مهدداتها ذني كل شي يطلع منهن.
سحب أيدي وراه صعدنا للغرفه شمرت حجابي وماكدر اسكت اكثر من هيج.
ايريم: شنو هذا اللي صار جوه؟
شلون عرفت بميمون هو الضربني من جنت جوه الدرج ذلك اليوم؟
وشلون عرفت بيه يريد يعتدي عليه؟
وليش ممبين عليه متذكر شي ولا كأن هذا الراد قتلك بدم بارد؟!
رفعلي حاجبه وتركني ودخل للحمام صرخت بغضب: اخخخخخ على برودة اعصابك الثلاجه مو هيجج.
اجاني صوته من وره الباب.
مهيائيل: الابره التوكع بهذا البيت اعرف بيها لتفكرين هوايه بخصوص هذا الموضوع لأن جوابه كدامج بس انتِ ممركزة.
طلع ولف الغتره بعده لحد الآن ميغير ملابسه كدامي وهاي العادة حلوه بيه اعتبرها احترام إليه كون علاقتنا لليوم سطحيه، لبس ساعته والمحبس والخاتم رش عطر وتقرب من عندي باسني بخدي وكال.
مهيائيل: رايح يم ترانيم اقفلي بابج ونامي واليدنالج اكسر رجله.
ابتسمت بوجهه وكلت بهدوء.
ايريم: بحفظ الرحمن انتبه على نفسك.
طلع واني خلصت الروتين المعتاد للدراسه والصلاة بعدين نمت ثاني يوم جان عندي امتحان ومهيائيل مراجع من البارحه انجبرت اروح وي رائف اليبقى يسولف طول الطريق ميسكت خلا راسي مصدع، نزلت وبوجهي للقاعة، خلصن ثلاث أيام هادئات رولين وتالين من ذلك اليوم مشفتهن بعد وياسيم اربع وعشرين ساعه بغرفتها تقره وميمون هادئ وترانيم ماخذها الواهس واليوم تمدد ولحد الآن مرجعت للبيت،
نزلت جوه احضر عشا نفتح باب المطبخ درت وجهي ومن شفتها رحت طايره حضنتها.
ايريم: وين هاي الغيبه ولج عيني مشتاقه موت.
ترانيم: صار يومين الح عليه ولك وديني وديني ميقبل تالي اليوم العصر اجاني وركض ركض حتى ملحكت اجيب ليفتي.
ايريم: هههههههه والله عندج سوالف، شنو سويتي احجيلي من طلعتي فجأة حد هاي اللحظه.
ترانيم: كلها سوالف تعبانه عمه وحموات حمضن على كلبي اخير شي مليت وطردتهن، عوفيني منهن وكوليلي حليانه ولج هيج فراكهن مسوي بيج؟
ايريم: وانتِ شلون عرفتي اني محجيت شي؟!
ترانيم: ليش رئوفه الورد يعوف شي وداعتج الشرقيه نيوز متلحكه.
ايريم: الحمدلله خلصنا من ثنين صايرات عظم بالبلعوم.
ترانيم: هسه يجنج يتكامزن لتفرحين هوايه.
ايريم: عوفينا من سيرتهن التسد النفس وكوليلي مهيائيل وين؟
ترانيم: اجنه نسوان ثنين ياخذن خيره وبقى يسولف وياهن.
ايريم: بالباب؟
ترانيم: اي جوارينه يعرفهن.
ايريم: واذا يعرفهن يسولف وياهن بالباب شنو شتكول الناس علينه؟
ضربتني بجتفها وغمزت.
ترانيم: ايا ملعونه تغارين!!!
ايريم: اسم الله غيره شنو ماعندي هاي السوالف.
ترانيم: اي مبين، اذا هسه صبيت عليج مي بارد اسمع صوت وشششش.
ايريم: عوفي هاي السوالف وتعالي حضري وياي عشا صارلج فتره مرتاحه.
ترانيم: مسوياتني مطي ياراحه التحجين عليها طيحن حظي لمن كلت بس.
ايريم: تستاهلين عفتيني ورحتي يمهم اكليها.
ترانيم: اروح اغير ملابسي واجي اعلمج بسيطه.
هي صعدت ودخل رائف اخذ تفاحه ياكل بيها راد يطلع وقفته اسأله كلبي يلعب: رائف مهيائيل وين؟
التفتلي وأشر على نفسه.
رائف: تسأليني؟
ايريم: منو غيرك اهنا اسمه رائف؟
رائف: ليش تسألين عليه مضيعته؟!
ايريم: اريد اصيحه علمود يجي يتعشا وينه هو؟
رائف: بالغرفة يمكن شفته يدخللها قبل شويه.
ايريم: ياغرفه؟
رائف: مالت السحوره.
ايريم: بس وحده؟
رائف: لا اكو وحده وياه.
ايريم: ليش مشفته؟
رائف: لأن باب المطبخ مسدود ميحتاجلها ذكاء، واصلاً الغرفه بابها مو عليه.
طلع واني النار شتغلت بكلبي شنو يسوي يمهاا وليش دخلها اصلاً، رحت يم الباب اتسمع وكلبي بيه طبول دك مسكتت ابد توقف الوقت وفتحت عيوني على كبرهن واني اسمعه يحجي وياهن...
يتبع..
البارت اكثر من 4020 كلمه.
تفاعلكم شمعاتي ابد ميسوي واهس، أريد اشوف تعليقاتكم بين الفقرات والتصويت للبارت دللوني ودللكم.
تصبحون على الف خير وعافيه..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!