للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
مهيائيل
الكاتبة(زهراء احمد)
_______
أحدهم يضحك وأحدهم يبڪي ، أحدهم يُريد العيش والآخر يشتهي الموت ، وأحدهم لم يعد يبالي ..
وجميعهم أنا
___
بقت عيني على الباب منتظرته يرجع بس مر وقت طويل وهو ماكو، لميت المحاضرات ورجعتهن لمكانهن، لبست حجابي وطلعت دورت بالممر ملكيته نزلت جوه هم ملكيته، صارت بعيني الغرفه اللي دخلنه الها اني وامي تذكرت الريحه القذره والمنظر المرعب بسرعة تراجعت وظهري نضرب بشخص درت وجهي سريع شفته عاقد حاجبه ويحجي بتساؤل.
ميمون: شسوين هنا؟
ايريم: مهيائيل اجيت اشوف وين هو.
اجيت اعبره وامشي بس وقفني وهو يكول.
ميمون: مو لازم تعتذرين لأن ضربتي بيه؟
درت بس وجهي وحجيت برفعة حاجب.
ايريم: اني جنت راجعه وانت واكف ورايه معناها شفتني واني ارجع فليش مبتعدت؟!
الأخطاء اللي ترتكبها عمداً لتنتظر عليها إعتذار هاي قاعدة خليها بعقلك.
تركته ومشيت صاعدة، خطواتي سريعة ومبين على ملامح وجهي الغضب حجيت واني اريد انفجر بأي واحد يطلع كدامي: واحد حقير، سكير فاسق، جان يتظاهر بالأخلاق كدامي شكد ملعون صُدك لو كالوا ليغرك الشكل لأن المظاهر خداعه.
خليت راسي على المخده بعد مقفلت الباب خايفة ومشكلة مهيائيل من يجي محد كله يجبرني اعيش بنص ذئاب ماعرف بأي وقت يهجمون بيه عليه واني بنيه ضعيفه الخدش البسيط يدمرني، حتى لو كال اثق بيج بوقت الجد كلها تشيل ايدها لو جانوا اهلي اللي ربوني مو واحد عرفني من يومين،
بس معقول يسويها؟
يجي يوم يعوفني بي علمود أهله أو لأي سبب كان؟
اللي فتحلي حضنه وكال هذا بيتج هم يترك أيدي وميسأل عليه بعد؟
عقلي يسأل وكلبي يكول لا مستحيل يسويها مهيائيل، هاي الثقه العجيبه اللي تجيني وي كل نبضة من عنده خايفه لادمرني بيوم من الأيام، يمكن بديت انعجب بي وبهاي اكون دمرت نفسي كُلياً،
ختم النقاش الحاد صوت بعقلي اجه فجأة: هذا الزواج غلط، اي غلط ويجي يوم وينتهي هذا اللي لازم يصير،
ماعرف ليش أفكاري متناقضة ساعة اريد ابقى يمه وما افارق وجهه ابد وساعة اكول لا هو ساحر عاصي لرب العالمين غصبني على الزواج وخلاني اشوف ايام سودة تمنيت ميته ولا عايشتهن،
نزلت دموعي على ذكرياتي وشلون جانت امي تشيلني وتغسلي وتسبحني، اذكر دموعها شلون ينزلن على وجهه مثل المي واني اقابلها بنظره ميته، فقدت الأمل بنجاتي لدرجه من شافت كشه تمسكت بيها بقوة عبالها هي المنقذه من الغريق، متدري اني جنت اطفو على المي وبسبب هاي الكشه اني صرت هسه بالقاع،
بعيد عن انو مهيائيل خوش رجال وزوج جيد بس العائلة والبيت والناس اللي معاشرتهم اشبه بشخص يسحبني كُل يوم للهاويه وماكو حبل نجاة هذا شعوري اليومي من أصبح بوجهن حتى ادخل للغرفه واقفل الباب عليه،
اخذني النوم لأحضانه واني الافكار تلعب بعقلي، وين يلا كعدت الكلوب بعده مشتغل ومهيائيل لسه ماكو، رفعت نظري للساعة لكيتها وحده الا ربع، مسحت على وجهي وين رايح هيج وقت وشنو عنده وليش مكالي؟!
قررت اتصل بي مبيها مجال لازم اعرف هو وين، دكه دكتين ثلاثه وماكو رد كلبي بده يلعب، يارب سترك شنو صاير وياه!!
حادث، لا يجوز تورط وي واحد بالطريق، يمكن أعداء ناصبيله كمين، لو... جانت الفكره اللي خربطت وضعي حرفياً معقوله يخوني؟
ضرب عندي العقل لبست حجابي وفتحت الباب ونزلت سويت الدرج بايتين وقفني صوت غريب أول مره اسمعه، أصوات تجي من الغرفه مالت الخيره أيدي رجفت، عقلي كلي اكو شي مو زين ديصير هنا، رجليه خدرت وبعد ماكدر اكمل طريقي وافتح الباب وأشوف، ضغطت على نفسي وسحبتها كلما اقترب خطوة الصوت يعله اكثر، فتحت عيوني بصدمه صوت بنيه اي والله، وهذا صوت رجال، كلبي دكاته مليار الفضول صار مليون عندي مديت ايدي حتى افتح الباب نسحبت بقوة درت وجهي لكيتها هي، نزلت دموعي واشرتلها على الباب مكدرت انطق كلمه، سحبتني من أيدي وصعدتني للغرفه قفلت الباب واني رحت للحمام غسلت وجهي دموعي تنزل اكثر من المي ماعرف ليش،
رهبه، أو يمكن صدمه، خوف لو توتر، أشياء مجهوله دتصير هنا، بيت مليان أسرار ومعاصي أعوذ بالله شنو هاي الأصوات اللي سمعتها هسه بعمري كله مسامعه شبيه الهاا؟!
مسحت وجهي بكفوف أديه وطلعت لكيتها ماخذه الغرفه طول بعرض من شافتني تقربت يمي وحجت بخوف.
ترانيم: شصاير ولج وكعتي كلبي؟
مكدرت اسكت لازم تعرف بالموضوع.
ايريم: مهيائيل طلع من وقت حيل الساعه يمكن ثمانيه واني بقيت انتظره نزلت من شفته تأخر دورت عليه ملكيته عبالي بالغرفه اللي جوه الدرج رحت يمها بس الخوف رجعني خطوة ليوره نضربت بميمون ورجعت صعدت وماعرف شلون غفيت ومن فزيت وشفتها بالوحده وهو ماكو القلق لعب بعقلي كلت اشوفه يجوز بالغرفه يشتغل ومن وصلت يمها سمعت أصوات غريبه ردت افتح الباب وأشوف شنو بيها منين الصوت وقفتيني انتِ.
اني احجي وهي وجهه انطعن احمر بس كملت بسرعة نهدت بالأسئلة.
ترانيم: ميمون شلون طخ بيج؟
ايريم: اني جنت واكفه يم الباب رجعت خطوة وهو جان واكف ورايه لو اجه بدون مينتبه.
ترانيم: بين الدرج والغرفه مكان يعني اللي يجي يشوفج مستحيل مينتبه الا اذا جان متعمد وهذا الواضح.
ايريم: شلون يعني متعمد؟!
ترانيم: اخذي حذرج منه تره هو سكير معربد ميلزم خاصه بهيج وقت اذا مهيائيل مموجود لتنزلين ابد.
ايريم: معقوله يسوي بيه شي مرت اخو اني!!!
ترانيم: والله بطرانه هي اخته بالليل ممنوع تنزل محذرها مهيائيل تردين انتِ تسلمين من عنده.
ايريم: وانتِ ليش طلعتي؟
ترانيم: اتصل بيه ابو الطلايب كلي الحكي لمرتي من حبها اليه راح تسودن وتطلع للشارع دور عليه.
ايريم: هههه مابيه حيل اضحك والله وضحكتيني، صدك ليش طلعتي وشلون عرفتي بيه يم الغرفة؟
ترانيم: مو كتلج اتصل بيه زوجج كال تصلت عليه وجان موبايلي بالسيارة ومشفته ومن اتصلت عليها هي ماكو مردت، فكال اجي اشوفج خايف عليج عيني، ومن اجيت للغرفة ملكيتج ونزلت شفتج جوه الدرج تختضين مثل السعفه عبالي نلبستي.
ايريم: والأصوات اللي سمعتها؟
ترانيم: هذا ميمون نايم جوه تلكيه لأن مرته مسويه عليه ممنوع الدخول اليعبر يموت.
ايريم: ليش مهيائيل ميقبل اخته تنزل معقوله يخاف عليها من ميمون شنو ممكن يسوي لأخته؟!
ترانيم: انتِ عقلج وين راح؟
ايريم: للشسمه.
ترانيم: طاح حظج منو معلمج هاي السوالف عوذه، ولج اقصد يخاف عليها تلبس ميمون شغله كُله هيج وقت، هو معربد وسكير وياج بس متدنه نفسه على اخته.
ايريم: محجيتي هيج قبل شويه تضحكين على منو؟!
ترانيم: هففف انتِ مينغلط يمج بسالفه تلزميها عليه بعد، اي صح يخاف عليها يسوي بيها شي، هو شارب لحد مكايل شيطانه بس وتنزل هاي يمه بالليل والشياطين متربعه براسه وهو منا عاد شلونه صايم ومصلي يصخم وجه أو وجهه.
لطمت على صدري.
ايريم: يمةةة عزةةةة شلون هيج يطاوعه كلبه!!!
ترانيم: كلبه ميت من زمان اخوي هذا غاسله أيدي منه بألف صابونة وشرط مال ميت.
ايريم: خوفتيني شنو نشوف بعد اكثر من هيج بهذا البيت؟
ترانيم: هذا نقطه بحر، تخلص الدنيا ومعاصي اهل هذا البيت متخلص.
ايريم: يجي يوم الله ينتقم منهم، كُل ذنب اله عقاب هاي قاعدة.
ترانيم: آمين الله يسمع منج، انتِ قفلي بابج ونامي ابو السحوره يدبر نفسه من يجي عود، يلا تصبحين على خير.
رادت تمشي رحت وسحبتها من أيدها وحجيت بخوف.
ايريم: والله مطلعين متبقيني وحدي هنا خايفه.
ترانيم: واذا اجه رجلج عيب من عنده وبعدين صارلج شكد هنا اقفلي بابج ونامي، هو نايم بالعسل لو يحترك البيت ميحس.
ايريم: شنو قصدج نايم بالعسل؟
ترانيم: اقصد سكران فاقد ميدري.
ايريم: اكلج الشرب مو ممنوع؟
ترانيم: بالشوارع خو مو بالبيت، ليش تردين تشكتين عليه؟
ايريم: اعرف هو اخوج وغالي على كلبج بس اللي يصير غلط، يعني الله عليج شلون يعيش بنص نسوان وهو محد يكدر يأمن بيه!!!
ترانيم: راح احجي وي مهيائيل باجر اذا الله راد، نامي ولتنسين تقفلين بابج.
طلعت على رغم لحيت عليها تبقى يمي بس راسها يابس يسمع الحايط وهي لا، قفلت الباب ورحت يم الشباك كعدت ميجيني نوم، ماكو أمان وراحه بهذا البيت ابد، ماعرف شلون راح أكدر اقاوم وابقى صامدة،
بس لا ميصير اسكت لازم من يجي احجي وياه لو يبقى ويايه وميطلع بالليل لو يشوف حل لهاي السالفه الجديدة،
اخذت نفس وعيني على النجوم والقمر تمنيت اختفي منا واصعد فوك يمهن، لا أحد يزعجني ولا واحد يغصبني على شي ما اريده، اعيش مرتاحه وراسي بارد،
فزيت من أفكاري على صوت الموبايل رحت يمه تفاجأت من شفتها متصله عليه هيج وقت فتحت الخط وخليته على أذني اجاني صوتها التعبان.
تسنيم: شلونج حبيبتي؟
ايريم: الحمدلله ماما انت شلونج؟
تسنيم: مو مرتاحه صاير وياج شي؟
ايريم: لا شنو يصير مثلاً؟!
تسنيم: مادري كلبي يلعب عبالي بيكم شي ردت اطمأن.
ايريم: لتخافين ياعمري ماكو شي، طمنيني عنج صحتج شلونها بابا، استاج، أبيل هم تصل بيج؟
تسنيم: كلنه بخير الحمدلله بس هذا اخوج مربيلي عله كلما اتصل بيه ميفتح وين يلا شلع كلبي، ادري بي راح يموتني ناقصة عمر من هاي سوالفه، جان وردة مال الله شخربه!!!
ايريم: لتحجين هيج اسم الله عليج عمرج طويل ان شاء الله دفنينه وانتِ عايشه.
تسنيم: بعيد الشر عنكم امي، اشفتوا من حياتكم متكليلي حتى تردين تموتين؟
المهم اجيت اكلج باجر رايحين يم خالج حالته خطره ماريد يصير بي شي واكعد اندم بعدين ليش مرحت وشفته، وهاي استاج تجي يمج ديري بالج عليها عمامج طالعين سفره لأربيل ماكدر اوديها يمهم وماريد أخذها وياي لأن راح نروح للمستشفى ونبقى بيها وما أأمن عليها وحدها هناك منو الها وانتِ تعرفين اختج تتنحس من كُل شي.
ايريم: اي يوم بعيني من تردين طلعين تصلي بيه حتى افتحلها الباب.
تسنيم: الله يرضى عليج ماما، روحي نامي خوفتج بهذا الوقت اعذريني عيوني الثنين.
ايريم: لا شنو هل حجي ازعل عليج امي انتِ شنو عندي غيرج.
تسنيم: تصبحين على خير يروحي سلميلي على الساحر مالتج.
ايريم: وانتِ من اهل الخير انتبهي على نفسج، وسلميلي على بابا حيل مشتاقتله.
تسنيم: يوصل يروحي.
سديت الخط و تذكرت رائف، عزه بعيني شلون اخليها يمي وهذا ما اعرف شنو بعقله عليها، غميت نفسي بنفس الوقت مكدرت اسوي شي حتى لو متذكره من كالت لأن بكُل الأحوال ماكدر أرفض شتكول عني،
اللهي وربي لتخليها تصير مصيبه مالها حل بعدين ذولي وحوش والله حتى عظم ميخلولها،
ومن بين أفكاري وذكرياتي سمعت طكه قفل كلبي فز هذا منو اللي عنده المفتاح، من فتح الباب ودخل شلون شايفه ملاك كدامي ركضت بسرعة وحضنته بكُل ماعندي من قوة حتى جسمه رجع ليورة لأن شمرت نفسي عليه،
دموعي نزلت لا أرادي الخوف اللي بداخلي لايوصف منظري خلا يحجي بصوت مليان قلق.
مهيائيل: شكو شبيج ليش هيج ترجفين، صاير شي؟
داريت شهكاتي وكوه كدرت اكون كلمه مفهومه.
ايريم: خايفه.
مهيائيل: بله خل اشوف وجهج شبيج هيج مخروعه منو وياج والله اكسر راسه الج بس فهميني؟
ايريم: محد بس انت خوفتني عليك عبالي بيك شي، طلعت بدون متحجي كلمه وهسه الساعه ثنتين يله أجيت مفكرت بيه؟
مهيائيل: شلون مفكرت بيج غير انتِ بنص الكلب، بس مكدرت ارجع من وقت عندي شغل وكلت لترانيم تكلج لأن موبايلج مغلق مكدرت اتصل بيج.
ايريم: مبي شي هسه امي اتصلت عليه.
مهيائيل: ماعرف يجوز خلل بالشبكه يمي، شنو تريد امج بهيج وقت صاير شي؟
ايريم: راح تروح يم خالي هي وبابا وتريد استاج تبقى يمنه.
مهيائيل: اي هلا بيها بس ليش نبرتج وكأن انتِ مراضيه؟!
ايريم: بدون ما اكذب عليك اني خايفه من رائف، واني عندي متحانات منو يبقى يمها؟
مهيائيل: اطمأني رائف مراح يقرب منها وبعدين ترانيم موجوده لتخافين هذا البيت أمان الها.
ايريم: شلون يصير أمان اذا كُل الشخصيات اللي نهرب منها بالواقع موجوده بيه؟!
مهيائيل: شنو قصدج؟
ايريم: اخاف ابقى وحدي بالبيت خاصه بالليل اذا تكدر تقلص دائرة شغلك بهيج وقت اكون ممنونه.
مهيائيل: ليش تخافين؟
صفنت بوجهه هسه شنو احجي؟
اذا كلت الحقيقه بأي عين راح يشوف اخوه؟
واذا سكتت ممكن يصير اي شي باجر عكبه واني اللي اندم بعدين، قررت اقطع النزاع بين عقلي وكلبي واحجي كُل شي اذا تفهمني كان بها واذا متفهم هاي مشكلته على الأقل اكون صادقه امام ربي واللي يصير بعدها يصير.
ايريم: لأن ما اثق بلي موجودين هنا سواء النساء أو الرجال.
مهيائيل: اني هم ماثق لهذا السبب ترانيم موجوده يمج.
ايريم: بس ترانيم متنام يمي بهاي الحاله هم مسويت شي نفس الوضع متغير.
مهيائيل: صاير شي احجي بدون لف ودوران والف مره كلت لتفكرين اخذ عليج غير نظره لأن الموجودين بهذا البيت حافظهم واعرف كُل واحد ونيته شنو هي، اختصري على نفسج الطريق اسمع.
ايريم: ميمون سكران يمشي بالبيت خاصه بالليل واما رائف بعد اللي صار وي استاج ماكدر اثق بي، اعرف هم اخوانك وعلى رغم حجيك وعصبيتك بس تحبهم متكدر تنكر هذا الشي، يكولون الدم ميصير مي واني ملاحظه خوفك عليهم اذا تأخروا بالرجعة أو سمعت صاير شي وي أحد بيهم، الحُب الفطري متكدر تخفيه، ومع هذا اني ماطيقهم خليني اكون واضحه وياك خاف يصير شي بعدين يكون عندك علم أمام الله.
مهيائيل: بالليل لتنزلين جوه اي شي تحتاجيه صعدي وياج قبل وقت باجر راح اوصي على ثلاجة صغيره تخلين بيها احتياجاتج، حمام موجود ومستلزماتج العباديه هم بابج اقفلي ولو تسمعين انفجار صاير جوه لتفتحيه ونحلت فضت.
ايريم: بهاي البساطه؟
مهيائيل: يعني شنو أسوي مثلاً؟!
اخواني هُمَ وماطول ممسوين شي مالي حق احاسبهم.
ايريم: اني مكلت حاسب احد، ولا قصدي اشكيلك اياهم، كُل مافي الأمر لتطلع بالليل وبس وين الصعب بالموضوع؟!
مهيائيل: شغلي بالليل يعني انجبر ما اتواجد هنا بكُل وقت بالإضافة اني عندي أشغال خارج البيت أمور بحاجتي ارتبها، وضع طارئ يصير مراح أكدر أمنع الحوادث بس لأن انتِ متردين أطلع.
ايريم: انو يصير حادث مفاجئ أو شغل مستعجل مراح امنعك واكلك ابقى يمي بالعكس اذا اكو شخص محتاج مساعدة اني ادفعك اله لكن ميعني تجي يوم واحد وباقي الأيام انت ماكو، تصير عندي حالة استغراب اذا جيت من وقت ومطلعت صدكني انصدم.
مهيائيل: فرضاً بقيت على شنو بقائي؟
ايريم: شنو قصدك؟
مهيائيل: انتِ ملاحظة نفسج عينج اربع وعشرين ساعه بالمحاضرات؟
ايريم: غير عندي امتحانات اكيد تشوفني أقره لعد شنو اسوي؟!
مهيائيل: وقت إليه ماكو، لتنسين ياعيني انتِ مرتي واكو واجبات وحقوق لازم تسويها لو عاجبج الوضع اللي احنه بيه؟
ايريم: بشنو مقصرة اني؟
مهيائيل: ليش انتِ شنو مسويه؟
ايريم: ههه، اني تزوجت لأول مره، بعمري كُله مدخلت بعلاقه مع احد، انت اول شخص عيني تنفتح عليه اذا اكو شي كوله بوجهي لتكعد تفزرني.
مهيائيل: هاي الأشياء تنفهم ايريم ميحتاج اكعد اشرحها انتِ طالبه جامعيه واعيه المفروض تفهمين شنو اقصد.
حجه هيج وطلع ضرب الباب وراه، هاي اول مره يعاملني بهذا الأسلوب، نزلت دموعي وضربت على كلبي بقوة وحجيت بغضب: وحق الرب الخلاني اعيش بنصكم اذا ما ادوس عليه فلا اطلع ايريم،
كلام ترانيم رن بأذني صُدك يمل حتى لو جان يعبدني، بس هو اللي مبتعد وميفتح الموضوع ماروح اني وكله لخاطر عينك تعال، هو بي شي لو اني فاهمه الموضوع غلط؟!
قررت ما ابادر ولا اعتذر، محجيت شي غلط ولا اسلوبي جان فض وياه بالعكس كلت الأشياء اللي كاعد تموتني بكُل دقيقه تمر بكامل الأحترام وحتى ما احسسه إخوانه بيهم عيب اذا هو راد يفتح أشياء مالها معنى بعد هاي مشكلته،
نمت وعاهدت نفسي ما اتنازل طاعة الزوج واجب ورضاه مثل رضا الوالدين عند الله بس اني مغلطت واذا اليوم نزلت راسي ورحتله راح ياخذها عاده يجي يوميه يسويله عركه واني اذل نفسي وروح اراضيه، اي اذل نفسي لان الحياة الزوجيه مشاركه وهتمام واحترام بين الطرفين، يعبر احد الأطراف عن المضوجه ميحجي بعصبيه وتعالي انتِ خمني ليش ضايج، هاي الأفلام الهنديه وين شايفها مادري،
سرقني النوم بعد تعب واني بداخلي هم جبير، شكد مكلت هذا الإنسان خوش أدمي بالعِشرة بس راح تعرف صدق احساسك وتوقعك بي.
فزيت على صوت المنبه فتحت عيوني بتعب حركت أيدي لكيت الجربايه فارغه اخذت نفس بضوجه معناها مرجع لسه، نفضت أفكاري وكمت توضيت وصليت صلواتي ودعيت ربي يخلصني من هل بيت هذا دعائي الدائم حتى مهيائيل لي جنت اكول عليه مختلف تصرفه اليوم ثبتلي العكس، هو النسخه الأصليه منهم، اللي عماني بسحر مدري وكلي جني يشلني وجبرني على الزواج وسوا الاهلي عقدة السان حتى يوافقون، واللي خدع وكذب علمود مصالحة الشخصية شلون أكدر أأمن بيه وانطي ثقتي!!
مكدرت ارجع اغفى بقيت مكابله الشباك وكاعده حتى الشمس بدت تشرق وعتمت الليل تختفي بالتدريج، تمنيت بداخلي تشرق الأنوار على حياتي مثل مسوت الشمس على الكوكب هسه،
غيرت ملابسي وتوضيت هاي عادة عندي خليت محاضرتين مكدرت اكملهم بأيدي اول مفتحت الباب صارت بوجهي مبتسمه بشماته ماعرف ليش تعدت من يمي وحجت بصوت شويه عالي بهدف تغيضني.
رولين: وجهج معبس مبين البارحه مشابعه حنان، بس لتفكرين هوايه زوجج عنده كمية جبيرة تكفي لكُل نسوانه.
ضحكت بستفزاز عبالها تكدر تلعب عليه اني صعدت عندي الخباثه بعد، مديت رجلي الها هي جانت تمشي بغرور وعدل على وجهه ضحكت بصوت عالي ودنكت يمها وحجيت بأسلوبها وبطريقة خليتها تشيل نفسها وتركعها بالكاع.
ايريم: على الأقل مالي عيني ممخليني ادور ختلات بغيابه.
تعديتها ونزلت دورت عليه بعيوني بالصاله ملكيته موجود، اخذت نفس صدك شويه ونفجر، دخلت للمطبخ وجان بعقلي اي شي اشوفه اشمره بالكاع بس لا ابد لازم أبين للكُل اني قويه ميهمني احد خاصه هو، حتى يعرف عدل مو بالسهولة يكدر يتحكم بيه على مزاجه،
فتحت الثلاجه وطلعت بطل مي اول مفتحته اشرب صار بوجهي فاتح باب المطبخ أو واكف يمه، نظراته هادئه ممبين على وجهه شي، بقيت صافنه عليه اتمنى هسه عندي القدرة اللي تخليني افتح عقله أو اشوف شنو بي وبأي طريقه يفكر ابو السحوره بس هيهات،
سد الباب وتقدم ناحيتي اجه على بالي اضربه براسه بالبطل جان نصه جامد يعني يسوي عنده عنجوره بكصته ضحكت على الفكره هو من شافني اضحك بدون سبب عقد حاجبه عباله تخبلت خله ايده بجيب الدشداشه نتبهت على لونها رصاصي غامق وياها غتره بيج، منظره مُجذب بشكل مميز، مع هذا اللي بداخلي مخلاني اهتز ولو شعره كلما أريد اتخطه وكلبي يريد يعاكس عقلي وينبض بعنف كعادته من يشوفه ما اسمحله وخلي يذكر كُل كلمه كالها البارحه بقصد أو بدونه كلماته جرحتني،
الجكاره بحلكه اكثر شغله اتخبل منها هي التدخين ماعرف وين اللذه بدخان سام داخل للرئة، مع مرور السنين تسبب أمراض مالها علاج، طلعها من حلكه ونفخ الدخان بوجهي، مسويت اي رد فعل ردت أطول خلك وياه وأشوف شنو يسوي بله،
واكف مقابيلي ميفصلنه غير خطوتين يعني تقدم بسيط يخليني اصير بحضنه تقريباً، عيونه تتفحص وجهي وكأن ديقره شي احسن خليته يدقق بملامحي براحته واني اسوي المثل بهدوء تام وابتسامه خفيفه تظهر انو اني ماعندي شي وياك انت السبب بهذا الصمت اللي نعيشه هسه،
طال الوقت والدقايق تمر مكدرت ابقى اكثر ساكته راح يفوتني الإمتحان والأخ عاجبه الوضع صافن بوجهي يكول تمثال كدامه، وين يلا تذكرت امي واستاج غميت نفسي داخلياً على المستوى العالي من الغباء اللي واصلتله هاي الأيام، قطعت الصمت واني ابتعد عنه ورح بتجاه الجنطه المخليتها على ميز الطعام طلعت الموبايل لكيت مكالمتين فائتات من امي هاي المره الثانيه اللي اكتشف بيها غبائي عبر القارات، مخليته صامت ومنتظره مكالمه شلون ذكاء يخبل، رجعت تصلت بيها اسألها عن استاج فاجأتني من كالت بطلنه منروح ومطولت هوايه بسرعة سدت الخط،
التفتت اله اكو حساس داخلي يكول هو السبب بس مكدرت انطق شي والا تروح هيبة الزعله، والكبرياء اللي صانعته من الصبح، ومدام الصوت هوايه قطعه فتحت الباب والصوت المزعج اللي خرب يومي من صبحت بي.
رولين: صباح الخير ليش واكفين هنا؟
حجينه اني وهو فجأة نفس الكلمه.
مهيائيل + ايريم: ما اعتقد البيت بيتج.
رولين: هاي شبيكم هسه اني شنو حجيت!!!
مهيائيل: الأفضل متحجين صوتج مزعج.
رولين: صحيح البيت بيتك بس متكدر تتحكم بالساني هو ملكيه خاصه إليه اريد احجي بي اسكته بكيفي مالك حق تدخل.
عجبني اعكر مزاجها قبل ما اطلع درت وجهي لمهيائيل وحجيت بمكر.
ايريم: مره ثانيه اذا بعقلك تسوي شي لتخلي رولين تشوفك لأن ماشاء الله نقل مباشر ال CNN مثل متكول متلحكها.
عقد حاجبه وهي وجهه صار ينطي الوان ضحكت بداخلي على منظرها وزادت سعادتي من خزرها وكال.
مهيائيل: وين شفتيني كاغد محترك؟
هنا مكدرت اكتم بعد ضحكتي اكثر من هيج والله مو تنمر ابدد حاشا خلقت الله بس تشبيهه قاتل، هو من شافني هيج اضحك حجه بصوت عالي وياها خلاني اقلل صوت ضحكتي بس بعدني مستمره، شوفتها بهذا المنظر وهاي الوكفه سعادة صباحيه غير شكل.
مهيائيل: انا طالع لأن تأخرت من أرجع افتح تحقيق كامل أمام الكُل اريد اشوف وين شفتيني وشنو حجيتي لمرتي.
شدد على آخر كلمه حسيت من طريقته يريد يوصللها شي رفعت حاجبي والأفكار تضرب بمخي معقوله هم هي تطلع مثل زوجها بدون شرف ومنحطه لهاي الدرجه؟!
اذا احساسي صحيح مراح اتفاجئ صرت كُل شي اتوقع منهم،
طلع هو واني قبل ما اتبعه غمزتلها بستفزاز صعد هو بالسيارة واني يمه والعادة اللي مستحيل تتغير لازم يشغل ذبي العباية وحق الله من كد ما تربعت بنص عقلي قررت صدك اذبها حتى يبطل يشغلها، من آخر عركه صار ميشغلها اذا جنه وحدنه بس اليوم معند وياي الأخ، اني هم سويت المثل طلعت موبايلي وخليت الهيتفون بأذني وعليت صوت دعاء الصباح، غمضت عيوني حتى وصلنه للجامعة عرفته من وقف السيارة نزلت بدون ماكول كلمه، وبما انو اليوم صبحت بوجه ألبومه الغبره لازم يصير يومي غير شكل ومميز بالأحداث اللي تلعب النفس.
إقدام: صباح الخير مدام.
مجاوبته عبرته ومشيت يريد يخلق حديث تافه مثله واني مالي خلك، رجع تقدم وصار يمشي بصفي ويحجي بإستمرار زعجني إلى درجه ردت انزع القندره واضربه حرفياً اجاني هيج شعور من العبان نفس، يعني استاذ واله سمعته كاعد يتحرش بطالبه أمام الملأ بدون خجل وفوكاها مزوجه شنو من نفسيه قذرة عنده ماعرف.
إقدام: صايرين منعجب حتى تردين السلام الواضح زوجج مالي عينج.
اخذت نفس وتوقفت هي خربانه خربانه رفعتله حاجبي بغرور وحجيت بثقه.
ايريم: زوجي تاج راسك على الأقل يعرف حدوده وميتحرش بزوجة غيره، احترم نفسك لأن اللي ورايه رجال ينسيك حليب امك ويخليك طك اصبع بنص الفاتحه، ابتعد عن طريقي وشوف وحده ثانيه تضحك عليها احسن ما اطين عيشتك.
إقدام: والله صايره ذيبه مبين مربيج عدل.
اجيت اجاوب سمعت صوت ورايه التفتت وجانت صدمه من شفته.
رائف: واذا متوخر عن طريقها يربيك هم ،هو شغلته يربي الناس اللي ماعدهم اهل يربوهم وصدكني مراح يقصر وياك.
إقدام: وانت ليش دافع عنها ابوها اخوها؟!
رائف: حماها اخو اللي راح يربيك.
التفتلي وكال.
رائف: روحي اختي ولتشيلين هم.
سويت مثل مكال ورحت للقاعة كلبي أريده يهدأ ماكو ماعرف شنو راح يصير ومكدرت اتصل بي لأن موعد الإمتحان والموبايل أخذوا الأمانات من عندي، أيدي ترجف هسه رائف شنو راح يكول عني؟
خلي يطير على أساس اهتم اذا كال لو مكال يبقى واحد سرسري يركض وره بنيه مراهقه آخر همي المهم مهيائيل خاف يضيف بهارات لأن علاقتي بي متوتره، أو يمكن يبقى يهددني،
هففف شهل افلام الهنديه اللي يصنعها عقلي، خلصت الامتحان واني بصعوبة كدرت اركز وي الأسئلة لأن تفكيري التام بلي راح يصير، طردت كُل شي سلبي من داخلي وتكلت على رب العالمين هو يعرف اني ماعندي شي وانسانه نظيفه من يوم يومي حتى لو الكُل وجه إليه اصابع الاتهام يبقى ربي سندي وعلى معرفه تامه بيه ميحتاج ابررله،
طلعت وتصلت بي بقيت ربع ساعة انتظر ورمشلي مشيت باتجاه السيارة لكيته صاعد بالصدر يمه ودك سوالف التفتلي غمز وابتسم، حجيت بنفاذ صبر: راضعين طياح حظ وستهتار ممعقوله امكم شربتكم حليب طاهر على هيج تربيه قذره.
صعدت بالوره وهاي المره غير الأغنيه رفعت عيني اله من المرايه الأمامية، ماكدر اخليهن بعينه لأن لابس نظارات، بقيت اطحن بنفسي ما أكدر اكله طفيها بنفس الوقت ماريد اسمع همات طلعت الهيتفون اول مخليته بأذني سمعته يحجي وياه مسوي نفسه يسولف بالألغاز على اساس مراح افتهم.
رائف: مسحت بيه الجامعه ذهاباً واياباً سويته فرجه لأمة محمد.
مهيائيل: خشمه اكيد نكسر وهسه هو بغرفه العمليات ادري بيك من تعصب ابوك متعرفه.
رائف: يا أخي بوكسات على جلاليق خليته يزوع حليب امه.
مهيائيل: طبيعي لو حليب قواطي؟
رائف: خليني اكمل شبيك توخر واهس السالوفه!!
مهيائيل: كمل، كمل لازم حلكك.
رائف: اي وبعدين من خلصت ضربه شلت راسه من شعراته مخليلهن دهن يمكن مال محرك لأن أيدي لحد الآن دسمه، وفريته بين الأقسام والطلاب كلها تجمعت تريد تفهم السالفه شنو واني ولايمي، الحرس مالت الجامعة والعمادة والأساتذه كلها ملتمه داير مدايري بس يردون يفهمون الموضوع واني عقلي كُله يمه بأي طريقه لازم اضربه.
مهيائيل: حددت كعده لو اروح لأهله اليوم؟
رائف: كعدت شنو؟
مهيائيل: قبل ميندك بيتنا نلحك على أنفسنا حتى ممنفضح بالمنطقه على هاي بوكساتك راح نروح بيها، كم مره كتلك من تعصب اخذ نفس واحسب للعشره لتورطني وي العالم مالي خلكهم بعد هذا العمر اروح اطمطم على سوالفك التعبانه.
رائف: شسوي بعد دمي حامي.
مهيائيل: اشرب مي بارد واستر علينه.
رائف: هسه شنو نسوي؟
مهيائيل: اعتقد هو يكدر يمشي وخشمه شفته مابيه شي مره ثانيه قلل افلام سلمان خان ولتميل زايد.
رائف: حرامات عمري كله تمنيت اصير ضابط واشبع المتهمين جلاليق بس للأسف طلع قسمي شي مختلف تماماً.
مهيائيل: طوع بالحشد هم يحبون هيج طاقات عنيفه.
رائف: جايز من روحي اروح للموت برجليه.
مهيائيل: شو صرت كورج الجبان فجأة.
رائف: اني كتلك امنيه والأمنيات لاتتحقق مو صح مرت اخوي؟
شلون طاقه، الدنيا حاره وهسه طالع من الإمتحان ويلغي بأستمرار حلكه ميسكت.
ايريم: حسب الأمنيه، اذا سعيت وشتغلت ماكو حلم يبقى جماد والعكس صحيح.
رائف: شنو امنيتج انتِ؟
بتسمت بوجهه وحجيت بهدوء.
ايريم: ماعندي اماني سابقه بس هسه عندي تكدر تحققها؟
رائف: اذا أكدر من عيوني.
ايريم: تسكت شويه لأن دخت وسولف عن بطولاتك بعدين اكون ممنونه.
رائف: الواضح نزعجتي من كلامي أو وجودي وياكم بالسياره.
ايريم: اذا فهمتها على هذا النحو تبقى مشكلة عقلك اني منطقت هيج شي، اما اذا تريد تبرير واعتذار فما عندي طاقه ابداً حتى اكون جمله مفيده هسه انتظرني اجدد طاقتي.
رائف: وكف السيارة نزلني راس الشارع ما أبقى بالمكان اللي محد يحترمني بي.
مهيائيل: هسه حولت لشاروخان، الحمدلله على نعمة العقل.
مهتميت للنظره اللي راح يشوفني بيها واني هيج احجي وي أخوه بكد مجنت محتاجه الراحه والسلام الداخلي بهاي الدقيقه،
صار صمت بالمكان واني صافنه على الشارع وعقلي مسافر بعيد حسيت نضرب شي براسي سببلي ألم فضيع عيوني وحدها نغلقت وماعرف بعدها شنو صار..
يتبع..
البارت اكثر من 4060 كلمه
مسائكم عافية شمعات روحي.
تفاعلكم صاير ميسوي واهس ليش مدا اشوف تعليقاتكم بين الفقرات؟
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!