حسابي الأنستا zahraaahmedn99
لتنسون التعليق بين الفقرات والتصويت للبارت والمتابعه شمعاتي ❤️
مهيائيل
الكاتبة (زهراء احمد)
___
أين تكُن وفي أي بقعه من العالم ثق انا وقلبي نُحبك
___
مهيائيل: دَاسِم انطاكم عمره.
ترانيم: انا لله وانا اليه راجعون، شنو السبب؟
مهيائيل: صاير عنده تشمع بالكبد ومملحكين عليه ميت بالمستشفى، اني عندي علم صارله اسبوع من دخللها وجانت الفكره يسووله زراعة كبد بس على كولتهم خلصت خبزته بالدنيا.
ميمون: وليش ماعدنه علم؟
مهيائيل: عندي بس مردت اقلق أحد كلت من يموت انطيكم الخبر ليش تبقون تفكرون وتشيلون هم الفاتحه.
ترانيم: الله يرحمه برحمته منكول غير هيج.
رائف: وتونه؟
مهيائيل: هي ورولين متونسات بالسجن.
ترانيم: رولين بالسجن!!
مهيائيل: اي.
ترانيم: شلون صار هيج؟!
مهيائيل: ميمون الك المايك.
ميمون: السالفه والبيها، دَاسِم جان متورط بشغل الأقمار اللي ورطته بيه بالأساس تالين لأن اهلها معروفين ناس قفاصه ويضحكون على العالم فكلتله ادخل بهذا المجال راح تربح وتصير غني، النيه جانت يخسر واحنه نساعده وهيج تكدر تاخذ فلوسنا وتسيطر على البيت بالكامل، ماكو دليل يثبت ونكدر نلزمهم بالجرم المشهود واني ومهيائيل عرفنا بفتره قريبة لهذا السبب قررنا نحاربها بنفس السلاح ودخلنا للبيت الحية الثانيه وبالسم نكدر نقضي على السم ونخلص من جميع الأطراف بدون منوسخ ادينا، وهيج الجميع راح للسجن.
ترانيم: تالين مشكت بشي؟
ميمون: مراح تشك لأن بالأساس هي بنت عمها وصديقة مقربه من عدها واني قريب من زوجها بذيج الفتره فتعرفني وتعرف اخلاقي شنو وتدري بيه مستحيل انطي بيهم علمود مهيائيل أو أي واحد ثاني.
ترانيم: كمل السالفة خليني افهم بطريقة كامله.
ميمون: اني هوايه اروح الهم والتقي بيهم وكدرت من خلال دَاسِم اتعرف على هاي العائلة ويصير بينه زاد وملح فوصلت لكلبها بسهولة وعرفتها انسانه طماعه تحب الفلوس ستغليت هذا الشي وطمعتها بيه وبفلوس مهيائيل على بالها هاي الاملاك بس اله واحنه كلنه نضحك عليه وناخذهن وافقت وشجعتها تالين و دَاسِم جان الطبال الهن وبهيج مخططنا اني واخوي الغالي تنفذ وصارت رولين هي الجاسوسه الأساسية اللي تجيب المعلومات النه، مرت فتره زينه وعرفت اكو أشياء مضمومه عنه ويخططون الها بسكوت بدون محد يدري.
مهيائيل: خليت كاميرات مراقبة بكل مكان بالبيت ماعدا الحمام مدعومه بتسجيل صوتي اكيد وهيج كدرنا نلزمهم بالجرم المشهود وعرفنا كل شي عنهم ومخططاتهم صارت بيد الشرطه وكدرنا نخلص من الجميع.
ترانيم: بس دَاسِم وتالين عتقلوهم قبل رولين ليش مخلصتوا منهم سوا؟
ميمون: ردت اعاقبها على كل شي سوته وياي، خيانتها وحقارتها وبالأخص المخدرات اللي جانت تخليلي أياها بالاكل والشرب.
ترانيم: عزةةةةة بعينهن مخدراتتت!!!
مهيائيل: لتتفاجئين دَاسِم هم جان متورط وياهم، عائلة قذرة خلصنا منها كلها.
حميده: ملعبين عمي مينكدر عليكم.
مهيائيل: وخافي من عدنا.
رائف: بعد كل هذا الصار شلون نكدر نحجي لياسيم موت ابوها وهي مصار فتره طويله من طلعت من صدمه؟
مهيائيل: مراح يصير بيها شي تتقبل الأمر ويوم يومين تتأقلم وتتعايش وي الموضوع احسن متعيش بوهم ابوها عايش وهو جوه التراب.
درت وجهي والجميع كذلك من سمعنا صوت الكلاص وكع،
على آخر بايه من الدرج تباوع بوجه بذهول غير مستوعبه لكلامه، حاسه بهذا الشعور من تفقد النطق بدون أراده، الأهل شكد ميكونون قاسين تبقى لوعة فقدهم أليمه،
الكل حتضنها ولمها وداروا حزنها ودموعها ويبجون على بجيها وهي عيونها من بين الجميع ادور على ام ضيعت وضاعت والفقد متعبر عنه الكلمات،
ياسيم: يعني راح بعد خلص ماكو امل يرجع من جديد ويكفر عن ذنوبه ويتوب؟
مهيائيل: راح لدار حقه، وهذا الطريق باجر انا وانتِ سالكيه، الموت مابيه اعتراض.
ياسيم: بس هذا ابوي.
ميمون: واني ومهيائيل ورائف نعوض مكانه ونصيرلج سند وظهر وحمايه.
مهيائيل: ونلعن والديه اللي يتقرب منج.
ياسيم: جيبة لهنا اريد اشوفه الله يخليك.
مهيائيل: بما أنو مات هذا الشي مسموح، اليوم نكمل شهادة الوفاة وتدللين ميصير خاطرج الا طيب.
تليد: مو كأن ملت زايد؟
مهيائيل: اذا عندك فلوس تخسرهن علمود الأسنان ضمهن للأيجار يفيدنك.
تليد: صار ساعه مخليها بحضنك وأنت محرم عليها مستوعب نفسك شكاعد تسوي؟!
مهيائيل: مالك شغل طليقها انت.
تليد: بعدها على ذمتي عود من اطلك اذا طلكت احكمها بكيفك بس هسه شرع وقانون هي ملكي ومو من حقك تقرب منها لهاي الدرجه.
وخر عنها صارخ بوجه.
مهيائيل: ايبااااااخ، بديوان الزلم وتحجي الزعاطيط، شوف ولك لحد الآن النفس عليك طيبه ومخلي عقلي بمكانه ماحركته، اذا ماتجر عدل وتعرف شلون تسولف وياي يوم يومك العنه ادبسززز.
تليد: انت اللي تجر عدل ياسيم مرتي شرعاً وقانوناً متكدر تحجي شي والا ارفع بيها قضية واخذها لبيت الطاعه وتنحرم منها بأمر المحكمه.
مهيائيل: هههههاي، ابن ابوك سويها، اذا ماورطتك بسوالف اخليك باب السجن تحلم تشوفه وهناك اسلط بيك شياطيني ومايحتاج اشرح شنو يصير بيك وقتها.
تليد: تهددني.
مهيائيل: انا ماشتغل بالتهديد سوالفي كلها فعل، دخله وحده للغرفه ازوعك العافيه.
عافهم وطلع عصبي اللي فاجأني هي بوادر الحب الواضحه بيه وأساسها الغيره بوقت مستحيل يكدر يسوي شي غير انو يطلك.
مر على هذا الموقف اليوم ثلاث اشهر تغيرت بيه هوايه أمور اهمها نسدت سيرة تالين ورولين و دَاسِم اللي منكدر نكول عليه غير الله يرحمه،
نزلت جوه منتظريهم يجون من المحكمه لأن بعد عناء وإصرار وعركات طويله عريضه مخلت من تهديد مهيائيل وافق تليد يطلك ياسيم وعيونه وكل شي بيه رافض تماماً لكن الجميع أولهم هي ضد استمرار هذا الزواج ومحد يكدر يكول لا لقرارها.
___
:واكفه أمام القاضي وكلبي ضرباته اسمعها بأذني، اليوم الختام لقصة بدأت بالغلط عانيت بيها من الخذلان والحرمان وغدر الزمان وكان لابد من نهايتها بهاي الطريقه المستحقه والصحيحه لهيج علاقه سامه،
وكف يمي لازم أيدي، بنظرات تمليها القوة يعاين عليه منطيني طاقه وحافز جبير اكمل الطريق القررت اسلكه، غمضت عيوني وفتحتهم من بده القاضي يصدر الحكم بعد عناء وانتظار ومحاربة حكمت المحكمه بإنهاء هذا الرابط اللي انبنه بأساس مائل اعوج،
غادرنا المحكمه واحس طاقة الكون كلها عندي ورجعنا للبيت باستقبال حافل حسيت نفسي عروسه مو مرأه مطلقه قبل ساعة.
ترانيم: الف مبروك عيوني.
ياسيم: الله يبارك بيج عمه.
ايريم: يارب يكون العوض خير وبيه جبر خاطر جبير.
ياسيم: تسلميلي ربي يحفظج.
ميمون: ماكو كيكه صخام لطام!!
رائف: راح اشتريلكم عشا.
مهيائيل: الزم كصته ميمون يمكن صخن الولد.
رائف: ايا ناكر المعروف ماوكلتك العام لفات فلافل؟
مهيائيل: لا والنعم مو لفات ضيم طعم العمبى لحد الآن بحلكي.
رائف: وهسه راح أبدله بطعم كص.
ميمون: اريد خروف مجتف.
رائف: زين مني وطلعت من عندي لفات كص احمد ربك وشكره.
مهيائيل: وبله شنو المناسبة؟
رائف: ثنين الأول تحرير ياسيم من اخونا العار والثاني تعيينت.
مهيائيل: فراش بالمدرسة؟
رائف: لا ما اسمحلك صرت مسؤول الحسابات الماليه بشركة مال مقاولات.
مهيائيل: الف مبروك أن شاء الله يوم تاخذ الشركه كلها وتسوي بيها أفرع هم.
رائف: آمين، مشكور حبيب.
ميمون: خلصتوا نريد الأكل.
ترانيم: كامل كل شي بس نصبه.
ميمون: وعزومتك ولك؟
رائف: عزومتي عشا عزيزي ماريد اتعلم على البذخ الاقتصاد حلو.
مهيائيل: تزوجت وتوظفت وبعدك نفس المسلته شوكت تكبر!!
رائف: ذكرتني لازم اروح لكوكبي اجيبها مع السلامة.
___
:نفتح الباب بقوة ونضرب فزيت من مكاني وامي كاعده بصفي صاحت بصوت عالي بيه.
حميده: الباب كسرته كسر بيدك كون.
عبرها ودخل بدون مينطق حرف مستغربت وضعه من اجينا لهذا البيت وفاركها لحد الآن أسلوبه نفسه، ميحجي وميكعد يمنا وأربع وعشرين ساعة كاعد بالغرفة زمن اللي جان ميجي بيه للبيت بس بوقت النوم لو الأكل.
مُزن: كل شي صار من ايده وشوفي حالته هسه شلون تكسر الخاطر.
حميده: خليه يتعلم ماكو شي يجي حار مكسب رخيص.
مُزن: بعمرها مراح تسامحه ولا تفتح وياه صفحه جديده وهاي اكبر عقوبه على سوالفه، حبها بالوقت الغلط من صار حبه لايقدم ولا يأخر شي.
حميده: اذا صار ادمي وخلاها تحبه وتتعلق بيه وغير من اسلوبه وتصرفاته الهم مستقبل مره ثانيه.
مُزن: ما أعتقد ترجع تعيد الغلط من جديد.
حميده: هو شسوه بيها حتى هيج بقت مصره على الطلاك؟ حسب علمي مجان يلتقي بيها ابد وخلصت هاي الفتره كلها نايمه يمنه.
مُزن: اني وياج انام ساعة عشرة متدرين شنو يصير بنص الليل.
حميده: قصدج متقرب منها واحنه ماندري؟
مُزن: الله اعلم ماكدر اكول شي ما واثقه منه.
حميده: لا والله تعرفين بس كولي ماريد احجي.
مُزن: بما أنو نتهت علاقتهم ماكو داعي لفتح صفحات قديمه.
حميده: كومي سوينا غده اذا نبقى نسولف بيهم نموت من الجوع.
___
:واكفه بالباب منتظرته يجيني توقفت السيارة ونزل فاتحلي الباب وعلى وجهه إبتسامه كلما اشوفها تعيدلي الحياة صعدت وهو هم خلص الطريق كله اغاني حتى وصلنه للمطعم التفتت اله متفاجئه.
زُمردة: شنو المناسبه اليوم؟
رائف: عازمج على سمج الا بشده تاكلين اصابيعج وراه.
زُمردة: هيج فجأة اجه مشروع الغده لو جنت مخطط اله من زمان؟
رائف: واني بالطريق فكرت حياتنا هاي الفتره صارت روتينيه من الشغل للبيت والعكس واشوفج فتره قصيرة كلت نغير جو ونسرق من الزمن اوقات سعيدة خاصه بينه احنه الثنين.
زُمردة: اني هم جنت ناويه احجي بخصوص هيج موضوع حابه احتفل وياك بشغله مهمه متأكده حتفرح بيها هوايه.
رائف: راح اصير اب؟
ابتسمت مأشرتله براسي بمعنى أي تعابير وجهه ماعرف شلون اوصفها غير أنو حسيته يريد ينزل من السيارة ويركص كدام الناس، لاف السيارة ماخذني لمكان ثاني.
زُمردة: شنو بطلت من العزيمه!!
رائف: هيج موضوع يحتاج احتفال عظيم مو مال مطعم وكدام العالم انا لو مالازمتني السيارة جان هنا حضنتج.
زُمردة: عيب شنو هذا الكلام.
رائف: راح نصير شياب وبقي استحي مني هنيالي بيج كوكبي.
زُمردة: حلوه هاي مال كوكبي يوميه مطلعلي لقب جديد.
رائف: كل فتره نسوي تجديد وخاصه من يجي ابنه الحلو والصاك نغير الأسم هم لشي يليق بأم الفصاعين.
زُمردة: مكتلي قبل شنو تحب البنيه لو الولد؟
رائف: اي شي يجي من رب العالمين كل الهلا بيه اهم شي تمام الخلقه.
زُمردة: تدري اني احبك؟
رائف: لا ما ادري شو بله كوليها حتى اتأكد من سمعي واضح.
زُمردة: احبك.
رائف: مسمعت عدل.
ضحكت كايله.
زُمردة: هم احبك وراح ابقى احبك لطول العمر يا اجمل عطايا الرب من بعد امي وابوي.
رائف: بشرفج هذا الجمال منين جايبته شو كلما اشوفج يرتفع السكر.
زُمردة: عيونك هي الحلوه حبيبي.
رائف: نروح للبيت؟
زُمردة: لأي مكان تحب.
رائف: خلي يولي البيت اريد اسرقج اليوم لمكان مميز ومختلف ونعيد أمجاد عرسنا.
شابك أيدي بأيده وكل شويه ملتفتلي مبتسم واني باقيه صافنه عليه طول الطريق حتى وصلنه يم الإمام الكاظم عليه السلام تفاجأت متوقعته يجيبني لهيج مكان مقدس.
رائف: اريد الجوادين عليهم السلام يباركون حياتنا الجاية ولو افر الكوكب ماكو أعظم من أماكن موجوده بيها اضرحة اهل البيت.
زُمردة: الله يتمم النا على خير وميفرقنا طول العمر.
رائف: آمين خياشيم روحي.
نزلنا اني وياه نزور وبقينا للمغرب بعدها اشتره عشا ورجعنا للبيت.
___
مهيائيل: الحلوه مطنكره اليوم.
ايريم: لتحجي ويايه وخر عني.
مهيائيل: ايبااااه غير افهم شنو صاير بسرعة كلبتي الخلقه!!
ايريم: وين جنت؟
مهيائيل: بالشغل.
ايريم: وراها؟
مهيائيل: يم جبار.
ايريم: وبعدين وين رحت؟
مهيائيل: يم صاحبتي.
خزرته أو وخرت سحبني من أيدي مرجعني إله.
مهيائيل: فهميني شنو المشكله يروح مهيائيل انتِ؟
ايريم: متعرف؟
مهيائيل: منين اعرف قابل ياعيوني!!
ايريم: عبد الرحمن موجود يحجيلك.
مهيائيل: منطيه اجازه سولفي شكو شنو مسوي وانا مادري؟
ايريم: افتح موبايلك تعرف الجواب.
طلعه من جيبه فاتحه واني عيني عليه تراقب حركاته وحاجبه اللي نعقد.
ايريم: ها عرفت؟
ابتسم بوجهي كايل بتبرير.
مهيائيل: جان صامت مسمعت المكالمه.
ايريم: عشرين، من العصر وهسه الساعة ثمانيه حتى مكدرت انزل يمهم جوه من القلق عبالي صار بيك شي، كول مهيائيل شنو عندك؟
مهيائيل: رحت يم مرتي الثانية، يمعودة صدك تحجين اني ويني وين الضيم كفيلج الله راسي مالحك احكه هذا جبار متواعد وياه صار شهر ويوميه مأجل واليوم ربج صارت ورحت عاد انتِ لدققين.
ايريم: وين رحت؟
مهيائيل: لمطعم.
ايريم: مهيائيل وين رحت؟
مهيائيل: لبيتهم، عمي والعباس لمطعم شسوي حتى تصدكين؟!
ايريم: وليش موبايلك صامت؟
مهيائيل: اني اخليه حتى مايزعجني.
ايريم: هنا رباط الفرس يعني اني ازعاج مو؟
مهيائيل: ياجلمه ردي لمجانج، انتِ راحتي ياروحي وحياتي وعمري وحبيبتي وكلبي وكبدي وكلياتي ومقلتاي وأبهري، كلما في الأمر من اطلع وي واحد من جماعتي ماحب اجاوب على الموبايل وكل دقيقه واحد متصل، وعيونج الماخذه روحي وسالبتني النفس لو ادري بيج هيج تقلقين دزيتلج رساله بس هي بعد صارت.
ايريم: خوش.
مهيائيل: رضيتي؟
ايريم: لا.
مهيائيل: ارضي بالغزل احسن ما افر المحبس شنو رأيج؟
ايريم: عفيه تريد تسحرني.
اتقرب مني ساحبني إله كايل بأبتسامه.
مهيائيل: تستاهلين بس انت قابل تسحرين قلب الساحر وتلعنين عشيرته كلها.
ايريم: مره بريئة اني مسويت شي لتضلمني.
مهيائيل: انتِ مسويتي شي بس عيونج سون.
ايريم: وشنو سون؟
مهيائيل: هجولن كلبي ولعبن بيه لعب وطلعنا عن الطريق.
ايريم: عيون وكحه.
مهيائيل: تحتاج تربيه من جد وجديد.
ايريم: وشلون تربيها بله؟
مهيائيل: ترهم نبوسها؟
ايريم: لا هيج تعلمها السرسره اكثر.
مهيائيل: وتتعلم، احله شي السرسره.
بتسمت متقرب مني وندك باب مخرب لحظاتنا الحلوه ابتعد عني رايح فاتحة قابله بوجهه مبتسم.
رائف: عوفوا سوالفكم لنص الليل هسه وكت عشا.
مهيائيل: تزوجت وكبرت وراح تشيب وبعدك على نفس سوالفك الطايح حظها شوكت اتوب؟
رائف: ماتوب حالف ماتوب وداعتك.
مهيائيل: غسل حظك الله امشي ولي من كدامي لابارك بخلقتك.
رائف: رجلي على رجلك.
مهيائيل: ارويف كتلك وخر من وجهي اليوم بدينا بالرجيم ومنريد ناكل.
رائف: والعباس تنزل وياي عندي الكم خبر يفلش يدمررر ولازم انت موجود تسمعه.
مهيائيل: أمري لله امشي يله خلصني.
علاقتهم هي احله شي بيهم متمسكين ابعضهم وميكدر احد يفرقهم ابد وهذا الشي اللي يخليهم أيد وحده على رغم المشاكل اللي تصير.
رائف: اليوم نضاف خبر ثالث جميل للقائمة.
ميمون: ماطلعن لحمات شكيتنا بيهن شك اي شبيك ماشايف!!
مهيائيل: خلي يكمل شمالك لكفت!!
ميمون: مو ادري بيه هسه يكول علمود العزيمه جمعت جميع المناسبات ادري بيه جلف ماراح يسوي غيرها، شوف من الأخير ولك خلصنا عمرنا نصرف عليك هسه غصباً عليك تصرف علينا اني ومهيائيل قررنا نترك كل شي ونتقاعد ونخلص ماتبقى من حياتنا بالتقوى والإيمان.
ترانيم: أو ايمان الجانت يمك الصبح هاي بداية التقوى؟
ميمون: اكيد غير هي بداية الإيمان، الوضع درجات لتخافين شويه شويه ننهدي.
مهيائيل: بليس يتوب وانت لا، ماعرفك قابل.
ميمون: تجي بت حلال اتوبني مثل مسوت ايريم بيك.
مهيائيل: بعدني رجال فاسق لحد الآن لتعتمد على بنات الحلال اذا تريد توب ابدي من هسه.
ميمون: عود افكر والتوفيق من ربك.
رائف: هسه تخلوني احجي لو لا؟
مهيائيل: سولف شعندك؟
رائف: راح تصيرون عمام.
ميمون: مرتك حامل؟
مهيائيل: لا راح ينزله من سوق بلي، عشرتك وي رولين سوتك مطي مع الأسف.
ميمون: لا هاي من كد ماربيت بيك.
مهيائيل: تذكر مره من رجعت من المدرسه ابجي؟
ميمون: اي ورحت وراك وشتكيت وهديت بالعالم تالي طلعت انت كاتل الولد ماتنلام بيك ترانيم من سمتك ابو الطلايب.
مهيائيل: شكيت راسه مو بس كتلته.
ميمون: وبقى من يومها يجيني يبجي وانا اروح وراه هداد بس بسكته محد يدري.
مهيائيل: اي تخاف يعرفونك تساعدني خاف تنكتل.
ميمون: جا اذا نكتلنا ثنينا منو يساعدك اغبر!!
مهيائيل: وعلي جذاب جان يتبره مني كدام ابوي حتى ماينكتل وياي.
ميمون: اتبره صحيح بس أصيح امي تجي تحميك وروح ادورلك ختله وتوسل بيه يعوفك بيه فوائد هوايه بس انت ناكر المعروف.
مهيائيل: امي جانت تاكل الضربه بمكاني ومتخلي احد يدنه يمي احسن منك التشرد تخاف من الضربه.
ميمون: كايلك انا تعيل بالعالم أكلها تستاهل، حلوه هاي يضرب الناس ويريد انكتل علموده.
رائف: وهسه نهاية هذا الحديث وين؟
مهيائيل: من كبرت انت وربيتك عقلت وبطلت هاي السوالف.
ميمون: شوف يعترف بنفسه انو جان خبل.
ترانيم: كلكم نفس الشي ماعرفك علمنو تسطرون جذب!!!
ميمون: كناين العيله ميدرن نبيعهن بروسهن.
ترانيم: هيهي وداعتك ايريم مسولفتلها كل شي خاصه من جان مهيائيل طفل ومصلخ اربع وعشرين ساعة ميحب يلبس هدوم.
غص بالأكل وكام ميمون يضرب على ظهره.
مهيائيل: بشرفج سولفي مغامراتي ابداعاتي ماذكرتي غير طفولتي الجايفه!!
ميمون: عادي تره خويه كل الاطفال هيج رائف هم ماشاء الله عليه نفس الشي فعادي.
رائف: هسه طفرت عليه اني شكوو!!
ترانيم: يريد يسمع مرتك عود.
رائف: الا زُمردة تره اسويها طلابه.
ميمون: انجب يسويها طلابه قبل يومين حفظتك بيدي هسه ترفع صوتك عليه اشك حلكك.
نكلب وجه رائف مصدوم من جواب اخوه ضحك مهيائيل مغير الموضوع حتى نهاية هذا الشقى ميصير عركه.
مهيائيل: الحك اخوي صارت بيها شك حلوك اكوم انا.
ميمون: وين تو الناس اكعد اريدك بسالفه.
ياسيم: منو مات؟
ميمون: ابو الحمامات.
مهيائيل: ظريف الله عليك.
سوالفهم حلوه وماتنمل لمينا المواعين والشباب اخذوا الجاي وطلعوا للحديقة، خلصنا كل شي بين سوالف وضحك وصار اجتماع النواعم بالصالة.
ايريم: مكدرت احجي شي يمهم الف مبروك يارب ينولد بصحه وعافيه والف سلامة عليكم ثنينكم.
زُمردة: الله يبارك بيج يروحي ان شاء الله يوم الألج.
ياسيم: بنات اريد اكلكم فد شغله.
ترانيم: سولفي عيوني شبيج؟
ياسيم: قبل فتره راسلني رقم غريب دزلي صور مفبركه وهددني بيها ومكدرت احجي شي يمهم اخاف يشكون بيه وياخذون موقف.
زُمردة: اني اعرف واحد يحارب ابتزاز ممرض ويانه أكدر اخذ رقمه وانطيه اله ومحد يعرف من اهلج تنحل بينه احنه البنات.
ياسيم: المشكله الرقم شاكه بيه لتليد بس ماعرف شلون اتأكد.
ترانيم: بسيطه باجر اروح الهم واخذ موبايله واجيبه.
ايريم: ليش باجر روحي هسه.
ترانيم: لا الساعه عشرة عيب ميصير باجر الصبح ان شاء الله اروحلهم وبحجة الحمام اروح لغرفته سمعت من اخته تكول مايطلع من البيت ونكدر نشوف اذا هو لو لا.
ايريم: شنو سويتي بالرقم؟
ياسيم: حضرته بسرعة بس الشغله بقت بعقلي خاف يصير شي بعدين واندم لأن محجيت.
زُمردة: عين العقل واذا تردين للأطمأنان ناخذ الرقم ونشوف لمنو.
ياسيم: اكول الهم؟
ترانيم: لا، اذا عرف واحد منهم يسوون مشكله ومالنه خلك نحلها بينه داده لتخافين.
زُمردة: انتِ ليش شاكه بيه؟
نخطف لونها وجاوبت بلعثمه.
ياسيم: لأن قبل يومين اتصل بيه يهددني.
ايريم: ليش يهدد شنو يريد؟
ياسيم: مرادني أوافق على الطلاق.
ترانيم: وهذا الأخبن ليش هيج يسوي؟
زُمردة: يحبها.
ترانيم: يمعودة العن ابو هيج حب.
ايريم: مو كل تصرف بالحياة نحسبه حب بعض الأمور ممكن تكون شغله انتقام أو ربما فضول، مو كل شخص يوعد يوفي ولا كل واحد حب معناها راح يستمر، القلوب سُميت قلوب لأنها تتقالب وتتغير مشاعرها.
ترانيم: ولا كل واحد عنده شارب معناها رجال عيوني.
ايريم: اغلب الشباب اليوم يضحكون على البنات ويعوفوهن بالمنتصف بدون كلمه ولا كأن لعبوا بمشاعر وحده بريئة بس لأن دفعه الفضول عليها أو ربما أعجب بيها.
زُمردة: ويجوز اكو ظروف تمنع منكدر نحكم على الناس كلها بنفس الذنب والتقصير.
ايريم: اللي مو واثق من نفسه وعائلته ليدخل بهيج علاقة محد يجبر احد يدمر حياة الناس، القلوب رقيقه وكسرها مايمكن يتصلح.
ياسيم: واني اشهد على كلامج كله صح، الشباب يضحكون على البنات بأسم الحب ومن تخليه أمام الأمر الواقع اما يهرب من عندج ويتحجج بأي شي لو يهينج ويطلع بجرحين مو جرح واحد.
زُمردة: اني برأيي كل شي يصير بسبب البنيه من البدايه لتفتح كلبها لأي أحد ولتسمح لشخص يتقرب منها بدون عقد شرعي وزواج أمام الملأ، امي دائما تكلي مثل "الما يدني زنبيله محد يعبيله"
ترانيم: مابري واحد منهم، ثنينهم السبب واحد يزحف والثانيه تفتحله الباب.
ايريم: كل إنسان يخطأ يتعاقب بعدين، الدين دين ولامفر من تسديده.
ترانيم: كلامج صح وكعدتجن حلوه بس اني خلص شحني تصبحون على خير.
زُمردة: وانتِ من اهل الخير عيوني.
اني همات صعدت ليفوك، الايام تركض ركض بدون منحس، الدنيا نص الليل تقريباً نايمين بأمان الله وفزينا طافرين على صوت الباب الينضرب بكل قوة نزل مهيائيل وميمون ورائف واني والبنات هم،
دخل يطوطح مثل واحد سكران رجل بالجنوب والثانيه بالشمال ويصيح ويرعد علينا.
تليد: رجعلي مرتييييي، مررررتي اريدها يلههههه خليها تجي وياي لا احرك البيت على روسكم.
مهيائيل: شلون يريد الصونده تلعب على ظهره هل دماغ سززز جايني بنص الليل وريحة الشرب واصله لسابع جار يريد مرته،
ملعون الوالدين مرتك مو يمي روح دور ويامن تورطت هاي المره امشي نكلع طيح الله حظك ولابارك بيك من ابن عاق وجهك يطرد النعمه.
تليد: والله احرككمممم ياسيمممممممم تعالي وياي نرجع لبيتنا والله ما أمد أيدي عليج مره ثانيه ولا اسحبج يمي بالليل حتى لو تبقين يم أمي قابل بس حبابه ارجعي وياي ماكدر اعيش بدونج كاعد اموووت.
على هذا كلامه بدون ميحس على نفسه مهيائيل صار نار وطفر يمه ساحبه من قميصه.
مهيائيل: عيد شنو كلت؟ شلون يعني تبقى يم امك وتسحبها بنص الليل؟!
شنو من نعال انتتتتتتت اذا مو كد المسؤوليه مارجعتهااااااا!!!
بنتي اناااا هيج تعيش وجايني هسه بنصاص الليالي تصيح بأسمها عبالك هي تايهه وحق ربها ادفنك اهنا وادفن اليطلع وراك واحد ساقط بدون شرف وأخلاق شلون تسمح لنفسك تسوييييي هيجججج شواربك المن الله خلقهننننننننننننن!!!
رائففففففف جيبيلي المكينه اليوم العن والديه واهينه من صدك واطلع سواياته بيها وحده وحده هل ساقط الماعنده شرف جان ماخذ بت *** مو مره من بيت محترم وهو السبب بلي عاشته، حرامات بيك السجن كم شهر المفروض العارر مثلك يبقى طول عمره خايس بالحبوس.
رائف بهيج مواقف بسرعة يسوي اللي يريده مهيائيل من عنده بدون سؤال، جابله المكينه منطيها اله اخذها من عنده وهو يسب ويشتم.
مهيائيل: تعال انت وميمون اربطوا إليه وانتِ ياسيم فتحي عيونج عدل وشوفي شراح يصير بيه هذا الحقير الماعنده غيره، الجلاب احسن من عندك ياكلب ابن سطعش كلب.
صدك ربطوا وهو دايخ ميحس بالدنيا طشت رشت ذلك اليوم من راحت ترانيم تجيب الموبايل همات تكول نفس الشي دخلت وطلعت وهو فاقد والحلو ماسأل عليه للعصر راحت رجعته، فكرت الرقم مو مالته ونصدمت من طلع اله الحساب لو جان يحبها صدك احتواها وحتضنها وتعامله الطيب والزين يجبرها تحبه،
جميع النساء يحبن الشخص اللي يعتني بيهن ويقدرهن ويحسسهن بقيمتهن بين الناس،
زينه صفر وزين شواربه ولحيته خلا غير خلقه وشمره برجله و دخل وذلك فقد فد مره شالوا ميمون ورائف ماخذيه لبيته واني عقلي يفكر بيه باجر اذا صبح عليه الصبح من يشوف وجه شنو يسوي؟
طردت الأفكار من عقلي صاعده فتحت الباب ودخلت يتنفس سريع وعيونه حمر وأيده ترجف يحجي بعصبيه.
مهيائيل: ذلك الحقير واني كلت اذا صار ادمي وتاب من سوالفه المكسره اساعده بس لا والله ماطول طلع هيج مسوي بيها فلا امدله أيدي واذا ما أشد عليه وطلعله كلب يم كلبه اسمي مو إليه.
تقربت من عنده لازمه أيده.
ايريم: الصار فات عليه وقت طويل وهسه ياسيم تحضر نفسها للدراسه ومرحلة جديده وبدايه مختلفه، لتفكر هوايه وتضوج نفسك ياعمري.
مهيائيل: كلما اكول هانت وصلت لبر الأمان وهسه راح ارتاح وأخذ نفس تطلعلي سالفه جديده تلعب بيه لعب وترجعني للصفر.
ايريم: اني وياك بكُل الأوقات وبتوفيق رب العالمين نتجاوز كل شي ان شاء الله.
رفع ايده لوجهي كايل بتساؤل.
مهيائيل: اريد اصلي تجين وياي؟
ضحك كلبي من كال هاي الجمله بوادر الهدايه بينت اشرتله براسي كايله بفرحه.
ايريم: اكيد ليش لا هسه اتوضا واجي نصلي سوه.
مهيائيل: امي صارلها سنين ماتت ناسي شلون يصير الوضوء والصلاة.
ايريم: مره اني وياك صلينا من جنه ابيت ترانيم ماتذكر؟
مهيائيل: مره وحده وصارت هواي سوالف انسى اكيد عقل عندي لو حاسبه!!
ايريم: مو مشكله نرجع من جديد واني اعلمك.
ابتسم بوجهي كايل بحنيه وحب.
مهيائيل: علميني اريد انهدي على ايدج.
ابتسمت متمسكه بأيده رايحين نتوضأ خلصنا واجيت فرشت سجادتي وسجادته وكفت بصفه كونها صلاة تعليميه اله مو واجبه وبديت أقره بصوت عالي وهو يحجي ورايه وسعادتي لاتوصف، فرحانه بيه إلى درجه جبيره حيل وأخيراً اجه اليوم اللي اشوف بيه مهيائيل يطلب يصلي من كلبه، كملنه أخذت ايده بين ايدي وحجيت.
ايريم: من صلينا اني وياك قبل كتلي خليني اسبح بأيدج بلكي بيوم القيامة تشع اصابيعج نور وندلج منهن واليوم اكول نفس الشي اريد اصابيعي واصابيعك يشعن نور يوم القيامه.
مهيائيل: انتِ هديتي الربانيه، وحصادي الوفير بعد سنين زرع وشكه، احبج ورجع احبج وابقى احبج وبكل يوم ولحظه تمر عليه يتجدد هذا الحب ويكبر بداخلي،
انتِ القرار الوحيد الصح اللي عمري كله ماندمت عليه ومستحيل يجي يوم اندم، ومثل ما اني حبيتج بكلب صافي ادعي ربي واني كاعد على القبله يجي يوم وتحبيني بنفس الطريقه.
ابتسمت مجاوبته: ومنو كلك ما اجه هذا اليوم؟
فتح عيونه بوجهي متقرب مني كايل بتساؤل.
مهيائيل: تحبيني يريحة امي؟
ايريم: اي.
مهيائيل: شنو الاي كوليها بداعتي اريد اسمعها منج.
ايريم: أحبك.
سحب أيدي مخليها على كلبه وعيونه صارت بيها لمعة دموع كايل بحماس وفرحه تفاجأتها بيه.
مهيائيل: تسمعين؟ هذا كلبي كاعد يركص فرحان بيج يحلوة اللبن.
حضنته وبجيت وهاي المره جانت دموع فرح ولأول مره ادعي ربي يحفظ شملنا بهذا البيت ومانتفرق طول العمر، وحبيت المكان اللي جان منبع للشيطان لأن حسيت الملائكه راح تصير الها محط رجل هنا بتوفيق الله،
ايام الحب والسعادة والسلام هي أساسها وانتهى فصل مهم بسيئاته وحسناته وافراحه واحزانه أو وره كل هدوء وراحة بال لابد تجي عاصفه قويه مدمره تخرب كل شي مبني ومأسس بقوة ومن سنين طويله،
نفتح الباب بدفعه قويه مجان مقفول بعد مطلع مهيائيل منه مستعجل، ترعد وتصيح وتصرخ واني واكفه بوجهه مانطي اي رد فعل، داست على وتر حساس وتهمتني بالخيانه والحقاره، سبت وشتمت وتجاوزت بالأخير صفعتني صفعة قوية مكدرت اتحملها رجليه اخذتني بره البيت بدون عبايه ولاجبه طلعت بدشداشتي وشالي أريد اوصل لبيت اهلي واسألهم معقوله حجي عمتي صح وليش وشنو الدليل، عقلي ميستوعب،
اصوات هورنات قويه واني بالي بعيد اللي يفصل فرعنا عن فرعهم شارع عام تمر عليه سيارات سريعة، ناس تحجي وتصيح واني بس اريد اوصل واسألهم،
توقف العالم بعيني والمنظر عاد نفسه بنفس الوكفه وسيارة قريبة مني كلش وسريعه حيل وصلت يمي حسيت بيني وبين الموت شعره بسرعة رددت،
اشهد ان لا اله الا الله
واشهد ان محمداً عبده ورسوله
واشهد ان علياً ولي الله..
بعد آخر كلمه دخلت بظلام دامس..
انفتح الباب اما سر من الأسرار
يوضح كيد الفجار
ولعنات ليس لها غفار
قلوب تاهت بأرض التجار
سارقين ولصوص وعلى الحرام
بنيت علاقات مليئة بالآثام
انا وأنت وقلبي حُكم علينا بالإعدام
من حضناهم بالأمس
أصبح اليوم يحرم علينا المس
ومن المسؤول؟
يوم يسأل رب البتول
همسات لمسات
تسمع الصماء اصوات
أعادت الذكريات
ولربما هناك أخبار جديدات
غير مقبولات
ولكن هن بالتأكيد صحيحات
فماهي التوقعات؟
يتبع...
البارت اكثر من 4008 كلمه..
تفاعلكم مديسوي واهس شمعاتي نرجع للمحبه يعني👻..
تصبحون على الف خير وعافيه يارب..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!