للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة(زهراء احمد)
___
تظنه ضمادًا، هو الذي جاء كجرح إضافي
___
مهيائيل: شنو تردين اسوي بالضبط؟
ام رنا: اريده يزوجها ويستر عليها قبل مايموتها ابوها وانت تعرف عمامها حادين سنونهم علينه بس تصير سالفه ينهون عليها وتصير بالرجلين، أريد شغلك وانت اعرف بعد شلون تسويها.
مهيائيل: يحتاج اسوي عقد السان لأهلها حتى يوافقون ولصاحبها خضوع وطاعه وجلب حبيب وهذا يكلفج هوايه فلوس وبالأخص اذا ردتي فتره طويله المفعول مالته يستمر.
ام رنا: الفلوس اعتبرها يمك المهم مكضيه.
مهيائيل: مكضيه بس اكو اشياء راح انطيها الها وهي تسويها بالبيت وتنتبه اي حركه غلط ينكلب عليها وعلى بيتكم.
ام رنا: اشياء مثل شنو؟
مهيائيل: انتِ تعرفين هيج أمور تصير بالعمل السفلي مراح اكذب عليج بس لازم تسويها بالنجاسه.
ام رنا: وضحلي أكثر حتى افتهم عليك.
مهيائيل: ام رنا شنو المفهمتيه!!
كتلج نجاسه وانتِ مره افهمي قصدي، اما دم او...
لتنحرجين هوايه عمو مو دخلتي علاقه طول بعرض وي حبيبج معناها تعرفين شنو اقصد.
ام رنا: وهاي شلون تسويها؟
مهيائيل: هي ادره، بس لازم حتى يثبت العمل.
ام رنا: متكدر انت تسويها؟
مهيائيل: شوفي اني اخذ خيره واسوي سحوره بس مافاتح ****** دبري واحد، هي تسويها وي نفسها اذا تردين ساعديها انتِ لأن بدون هيج مراح ينجح شي.
ام رنا: اشرحلي شنو تسوي؟
مهيائيل: هاي **** شغلها راح يكون بيها بهاي لازم تشتغل واني احب اليفهمني من اول مره ميخليني اعيد واشرح، وهاي الورقه مكتوب عليها طلاسم وانطيج كم شغله ثانيه وياها تحركهم سوا المغرب، اي خطأ حتى لو بدون قصد ينكلب تره ويضركم كلكم مو بس هي.
ام رنا: ميصير غير وقت شرط المغرب؟
مهيائيل: اي شرط المغرب لأن الشياطين هيج وقت تتجمع، للعلم اذا سوتها بمكان اظلم يكون افضل.
ام رنا: وبلكي صاير بيها شي مو زين؟
مهيائيل: ميصير اذا التزمت بكلامي اما اذا خالفت هاي مشكلتها.
ام رنا: ماشي.
مهيائيل: تعرفين شغلي مو بلاش.
ام رنا: ادلل بس اشوف جاب نتيجه فلوسك واصله.
مهيائيل: له له له، اني هيج ميشمي وياي، الدفع مقدمه خاصه اني انطيت نص الأعمال الكم والباقي يمي اشتغله، وها قبل مترحين اذا كدرتي تجيبين شي من صاحبها ملابس أو شعره يكون احسن.
ام رنا: شنو تسوي بيه؟
مهيائيل: هذا شغلي.
ام رنا: اكلك ماكو مي انشمره ابابهم؟
مهيائيل: ميحتاج انتظري يومين ويتصل الاسبوع الجاي تنخطب ومطول شهر وتجين تعزمينا على العرس.
ام رنا: بهاي السرعه!!!
مهيائيل: اذا ماعندج ثقه بشغلي لتجيني.
ام رنا: ماعندك تقدير للجوره.
مهيائيل: ما اجيتي تشربين وياي استكان جاي هذا الشغل ومابيه جوره ومن هاي السوالف، اشكري ربج شفتيني إذا واكعه بأيد ميمون طلعت منا حامل.
ام رنا: استغفر الله شنو هل حجي مثل اخته هي.
مهيائيل: اي صح مثل اخته لدرجه قبل اشويه ردتي اساعدها بالسحر.
ام رنا: انت تختلف.
مهيائيل: هي بس وحده سويت وياها هيج وماكو وحده بالكون تلحك ضفرها.
ام رنا: شنو قصدك؟
مهيائيل: اني ساحر وقارئ فنجان وتاروت وكف والأهم أقره العيون، اعرف عدل نيتج بس مراح تحصلين مني غير السحر وبفلوسكم هم، اني لأمي ما اسوي ابلاش.
من سمعت بيهن وكفن وخرت سريع ودخلت للمطبخ واني بعدني مصدومه معقوله هيج يسون بس علمود تنخطب وتستر نفسها زين وين الحرام وين مخافة الله؟!
بعيد عن الدين احترام النفس وينه شلون تنطي نفسها لرجال غريب بس لأن كاللها احبج شنو من عقللل أعوذ بالله، وهذا مهيائيل شلون يحجي وياهن بهذا الأسلوب وليش حتى ينطيها اشياء محرمه تسويها!!!
استغفرت ربي شنو اشوف بعد اكثر من هيج، المصايب بهذا البيت متخلص؟؟
نفضت الأفكار من سمعته يصيحني طلعت من المطبخ لكيته واكف جوه الدرج مصغر نظره عليه ويباوعلي بتدقيق بلعت ريكي من كال.
مهيائيل: تعالي وياي اريدج بشغله.
مشى قبلي واني وراه حتى دخل للغرفه بالأول ترددت بس من شفت مابيها مجال فتت لفحتني ريحه عفنه تذكرت بيها اليوم اللي دخلنه بيه لهنا اني وامي، رجعني لواقعي صوت الجداحه باوعتله يشغل بالشموع وصافن عليهن ثواني وكسر الصمت كايل.
مهيائيل: تعرفين ليش نحتاج الشموع بالسحر؟
جاوبته بهدوء: لا.
سكت شويه وبعدين كال.
مهيائيل: نحتاجها باستحضار الجن.
رجف جسمي من كال هيج ومسكت بقى مستمر يحجي.
مهيائيل: شويه طلاسم وشموع وجو اظلم وهدوء ولازم الطلاسم تكون حسب السحر الترديه اذا جان رحماني لو شيطاني لكل عمل اشيائه الخاصه اللي نتبعها، بدونها ماكو سحر يكتمل،
نفرض العمل شيطاني، برأيج الشياطين شنو تطلب من الساحر حتى تخضع إله وتنفذ طلباته؟
رفع حاجبه إليه من شافني صافنه وأيدي ترجف ابتسم وكمل كلامه بنفس النبرة الهادئة وعيونه على الشموع.
مهيائيل: تطلب النجاسه بأنواعها، والكفر، الساحر حتى يسوي سحر سفلي لازم يكفر ويسوي المعاصي، شنو يطلب الشيطان من عنده ينفذ وإلا ميخدمه.
حجيت بتوتر واني عيوني مخليتها عليه لأن اخاف اباوع على اي مكان ثاني: شنو يعني نجاسه؟
مهيائيل: متعرفين النجاسات؟!
ايريم: هن هوايه اي وحده تقصد بيهم؟
مهيائيل: اللي تغسلين بيهن الغسل الواجب هن ثنين.
ايريم: وهاي بشنو تفيدكم؟
مهيائيل: السحر يصير اقوة ويثبت والشياطين تحب هاي الأمور فتنفذ بدقه.
ايريم: وشلون تستخدموا؟
مهيائيل: كافي عليج هيج معلومات لليوم مره ثانيه نحجي اكثر.
ايريم: ليش حجيتلي بهيج اشياء؟
مهيائيل: لأن فضولج خلاج تسترقين السمع حبيت اخفف شويه من هذا الفضول وراويج زوجج الساحر شنو يسوي من تجي طلبيه.
من شفته يعرف بالموضوع ستغليت الفرصه وحجيت.
ايريم: بما أنو عرفت اكو سؤال حابه اعرف جوابه.
ابتسم وكال: اسمعج.
ايريم: شنو المساعده القصدتها حتى يكمل السحر؟
كام من مكانه واتقدم ناحيتي نزل راسه يم ركبتي وهمس بأذني.
مهيائيل: وحده من الغسل الواجب.
بلعت ريكي ورجعت ليوره وباوعت بعيونه كايله: وشلون هيج يصير وبعدين هي طلبت مساعدتك ليش رفضت؟!
مهيائيل: كتلج السحر الشيطاني يحتاج نجاسه واني رجال شريف فلازم هي تحلها من يمها، اني أيدي متلزم القذارة بس في حالات مستعصيه اي اسويها بس مثل حالة رنا له له له.
عقدت حاجبي متسائله.
ايريم: ليش؟
مهيائيل: لأن هي قذرة مثل امها.
ايريم: وشلون عرفت؟
مهيائيل: عدها علاقات وي العائله غير شرعيه.
حجيت بغصه واني داخلي اتمنى يكول لا وماعرف السبب شنو.
ايريم: وياك؟
مهيائيل: كتلج اني مو قذر، أيدي متنمد على ******، لكن باقي رجال العائله ممكن.
ايريم: حتى رائف؟!
مهيائيل: ما استثني احد الجميع ******.
شكد تشمئز نفسي من يحجي بالفشار والغلط كلت واني موتني هذا الموضوع.
ايريم: ممكن متفشر.
ابتسم برود وكال.
مهيائيل: هذا غلط طبيعي مو فشار.
عرفت ماكو نتيجه وياه كلت اغير الموضوع لأن ريحة الغرفه خنكتني.
ايريم: عوف السحر وتعال تعشا راح يبرد الأكل.
مهيائيل: اطلعي واني اجي وراج.
قبل ما اخطي اي خطوه وقفني وهو يكول.
مهيائيل: للسحر ثلاث انواع، وحده منهن كفيله ادمر حياتج، اخذي الحذر حتى الخنكه ممكن تكون سحر أو نتائج سحر.
درت وجهي اله: شلون يعني؟
مهيائيل: تعرفين التابعه منين تجي؟
ايريم: سحر غير.
مهيائيل: له له له، معلومه غلط، التابعه مو سحر وانما شي ثاني الها انواع مختلفه راح اسولفلج اليوم جزء من اضرارها،
توقف الزواج، توقف الرزق، تخلي الأنسان كئيب، ميكدر ينام من الكوابيس، يحلم دائماً اكو وأحد يركض وراه ويحبه ومتعلق بيه أو يحلم ناس هوايه تركض وراه وميكدر يصرخ، تعب وضوجه وحزن وخنكه خاصه وقت المغرب، ومستحيل حياته تصير افضل اذا مفتح التابعه.
فتحت عيوني بصدمه: هذا كله من التابعه!!!
مهيائيل: وأكثر هم.
ايريم: طيب شنو العلاج؟
مهيائيل: الوصفه يحتاجلها سعر تكدرين تدفعين؟
من نظرته عرفت نيته مو سليمه رفعتله حاجبي وحجيت بأبتسامه: اني ماعندي تابعه على شنو ادفعلك؟
وفي حال صارت بيه انت موجود وتفتحها ابلاش.
مهيائيل: الشغل مابيه بلاش مرتي.
ايريم: اذاً الدفع يصير بالطريقه المعتاد عليها ميحتاج سؤال.
مهيائيل: من تكونين مرت الساحر دفعج يصير مختلف.
ايريم: اطبخلك اكله تحبها وعتبرها عربون محبه.
مهيائيل: ماكو هيج حجي، المعده متوصلج الكلبي ابد كلام العجايز مو صحيح.
خليت أديه وره ظهري وكلت بمكر لأن اعرف قصده شنو بس مثولتها: وشنو الطريق لكلبك لعد؟
مهيائيل: المسافه البينج وبيني من تنامين.
ايريم: كلامك عواقبه وخيمه.
مهيائيل: عواقبه حضن،
غمزلي وكمل بنبره جديه: روحي كملي العشا هذا المكان مو مناسب لهيج أمور.
طلعت واني ابتسم ماعرف السبب بس يلا ضحكه ابلاش ليش منريدها،
نزلت ترانيم ورائف وياسيم العائله المكونة من خمس نفرات، بيت يمليه الهدوء والسكينة ومن صدك تحسه بيت لأن ماكو نفاق ودجل وخطط على احد، كل واحد يكمل شغله ويصعد لغرفته، راحه مابعدها راحه دعيت بداخلي يستمر هذا الوضع وماكو نواغص دمر هذا الأطمأنان،
هدوء تام ماكو صوت لأحد، الجميع يصنع بمخيلته قصه ما حتى قطع أفكارنا هو ماكو غيره الماكو دكمه طفيه نهائياً.
رائف: اريد ازوج.
مهيائيل: تخرج بالأول وشتغل أكيد ماناوي اصرف على مرتك هم.
رائف: على هاي السالفه راحت من أيدي.
مهيائيل: متروح خليها تحبك ولو انت متحبك بس الثوله.
رائف: ما اسمحلك تغلط عليها النبض هاي.
مهيائيل: طز بيك وبنبضك.
رائف: مشكور ماقصرت اخوي الغالي.
مهيائيل: وتاج راسك نسيت.
رائف: والماكو منه ثنين، العلم والعمود.
مهيائيل: والسكف والحايط.
رائف: ابو البيت او ولي امري والماكدر اتنفس بدونه.
مهيائيل: سحر ماسويلك.
رائف: بشاربك والحرمه بشارب الخير.
رفعله راسه وخزره.
مهيائيل: على هاي سوالفك صدكني نعالها لطريقك ميجي تريدها هي تجيك؟!
رائف: بسحرك خويه، بس اريد خضوع ومحبه والباقي عليه.
مهيائيل: متريد احبلها ألك بعد؟
رائف: لا هاي يمي انت بس خليها تجيني.
مهيائيل: كل شي تكدر تجيبه بالسحر الا الحب اذا مجان نابع من كلبها مستحيل تكدر تعيش وياها بسعادة، الأعمال الشيطانية الها وقت وبعدين ينتهي مفعولها مثل عقد الشغل، عكس المحبه التجي من الله هاي بقائها طول العمر.
رائف: والحل؟
مهيائيل: خليها تحبك.
رائف: هي ماتقبل تسمع صوتي اصلاً.
مهيائيل: تحبها لو نزوه؟
رائف: مادور وياها كرامه.
مهيائيل: لأن انت ماعندك من الأساس.
رائف: احجي صدك شبيك.
مهيائيل: اذا متأكد تحبها وتريد تتزوجها خليها تحبك بالأول وهذا الشي بسيط، السان والتعامل مفعوله اقوة من السحر وهاي بس الذكي يعرفها، احسن متخسر مليون علمود شهوه يوم يومين، اخسر يوم يومين اهتمام تحصل محبه طول العمر وحياة زوجيه سعيده، ورجع وكول اذا تحبها من صدك نيتك مو تضحك عليها.
رائف: وداعتك احبها ماريدها تضيع من ايدي.
مهيائيل: اخذ موافقتها وخلي نروح نخطبها الك ومن تتخرج تزوجون.
رائف: نروح قبل مناخذ منها شي.
مهيائيل: أكدر اجيبها ألك بهاي اللحظه بس اعرف عدل اذا سويتها مراح دوم علاقتكم شهرين.
رائف: تريد تطيح حظي اعرفك.
مهيائيل: اطيحه لو جان موجود من الأساس، وهسه خلص عشا وتعالي اريدك بشي مهم.
فرحه داخليه متنوصف من عرفت بيه يريد يخطب ويزوج معناها ماعنده شي وي استاج الف الحمدلله، خلصنه العشا وصعدنا وترانيم راحت تنام واني بديت أقره هذا آخر اسبوع وبعدين اخلص ورتاح مو امتحانات ضيم موتني،
مركزه وعقلي كله يم الماده شفت موبايلي يم عيوني رفعت راسي لكيته لازمه ومادلي ايده أخذته من عنده مستغربه باوعت للشاشه امي تتصل مخليته صامت ومسعمت واني اذا ركزت بشي افصل عن باقي الأشياء، هو دخل للحمام واني فتحت الخط اجاني صوتها اليبجي.
تسنيم: الحكيلي والج راح انجلط بعد ماتحمل، عزةةة بعيني شسويت وهيج ربج يعاقبني عساها بحظه وبخته الجان السبب، ضاع من ايدي راح وليدي يبووو، ولج يمه تعاليلي راح اموت.
ايريم: سمي بأسم الله وهدي خليني افتهم شكو شصاير وياج فهميني ابيل بيه شي مو شلعتي كلبي والله؟
تسنيم: ياريت بي شي واكدر احلها وتفض ولج مصيبةةةة وكعت على راسي مالها حل مالهاااا.
ايريم: شنو مسوي؟
هو مو مسافر رجع لو شنوو بالضبط احجيلي؟
تسنيم: والله تمنيته مسافر صدك ولا هاي الفضيحه، ولج هذا طلع رايح للبصرة وساكن أبيت مال **** والشرطه اليوم لازميه وتحقيق وسالفه راح توصل للمحكمة.
ايريم: وشلون عرفتوا بالموضوع؟
تسنيم: بتال اتصل بأبوج، ضاحك حتى على صديقه على اساس مسافر وموصله للمطار وماعرف شلون سواها ورايح الهن، ضحكن على وليدي، وين العبادة والصلاة والدين هاي تاليها يروح وره بنات ابليس ليش كل هذا عساها بحظه وبخته السبب.
ايريم: راح اشوف بلكي مهيائيل يكدر يساعده بس انت كافي بجي مو زين عليج.
تسنيم: عيب كدام رجلج هسه شيكول علينه وعليج.
ايريم: على اساس عائلته شلونهم كلهم فسقه، معليج يمي الموضوع المهم تنتبهين على صحتج واني احلها ان شاء الله.
تسنيم: الله يوفقج يمه ويهدي وليدي ويرجعه للطريق الصح يارب.
ايريم: آمين، يله اجه اشوف شنو يكول واتصل بيج اطمنج.
تسنيم: منتظرتج يعمري تبشريني.
ايريم: ان شاءالله كل خير.
اخذت نفس عميق: شورطك ياخويه ومشيت بهيج طريق اعوج مابيه غير المعصيه وغضب الله، منو داعي على بيتنه ونكلب هيج ودمرت سعادتنا،
شفته يباوعلي وبعينه اسأله كلت احسن شي احجيله يساعدني ولا ابقى افكر وحدي وشايله هم.
ايريم: مهيائيل محتاجه مساعدتك تكدر؟
التفتلي وكال بتساؤل.
مهيائيل: شنو الموضوع؟
ايريم: ابيل.
مهيائيل: ايي.
ايريم: معتقليه.
مهيائيل: ليش؟
ايريم: لاكيه ابيت مو زين.
مهيائيل: وين؟
ايريم: بالبصره.
مهيائيل: مو على اساس مسافر.
ايريم: طلع ممسافر مجذب على الكل.
صفن شويه يفكر وطلع من الغرفه بدون ميحجي شي كلبي نغزني ورحت وراه، دك الباب مالت غرفته شويه وفتحه بدون اي مقدمات كال.
مهيائيل: أبيل عندك تواصل وياه؟
فتح عيونه ذلك بنظره تعجب وكال بتأكيد.
رائف: لا والله من يوم العرس وبعد ماعرف اني اخوك كطع كل التواصل بينه.
مهيائيل: تدري هو مامسافر؟
رائف: ليش هو جان مسافر؟
مهيائيل: رائف.
رائف: عمي والله مادري شبيك ليش مصدك مادري هو وينه لو شيسوي.
مهيائيل: اذا شياطيني كالت عكس هيج صدكني متلوم الا نفسك.
عافه واكف ورجع للغرفه اني دخلت وراه وعيني عليه، فتح الكنتور وطلع علبه سودة صغيره كعد على الكاع وفتحها، طلع منها قماش اسود لاف بي ماعرف شنو فتحه شفت بيه عظام ولعابه صغيره ومفتاح وحلقه ودرهم ومكدرت أميز الباقي شنو، شالها كلهن بأيده وبقى يقره عليهن بصوت ناصي حيل مكدرت اسمع شي وطشهن صفن بيهن شويه بعدين كال بصوت عالي.
مهيائيل: امج ذكريني بأسمها.
ايريم: تسنيم.
مهيائيل: ابيل ابن تسنيم، همممم،
تعالي اكعدي كدامي خلي نشوف اخوج شنو مسوي ومصخم.
رحت كعدت مقابيله وعيني على المكان اللي يباوعله.
مهيائيل: اخوج مسواله سحر ومشربيه إله وكل تصرفاته بدون وعي، والمسويه العمل كرايبكم، سمينه طويله، حنطاويه عدها شامه بنهاية خدها الأيسر،
رفع وجهه إليه وكمل: اللي خطرت على بالج بهاي اللحظه هي نفسها.
ايريم: بس الخطرت على بالي عمتي لان نفس المواصفات.
مهيائيل: وهي عمتج المسويته.
ايريم: ليش؟!
مهيائيل: لسبب كشفه هسه يسوي مصيبه جبيرة.
عقدت حاجبي: تعرفه؟
مهيائيل: من اول مره شفتج بيها.
ايريم: وهذا العمل من شوكت مسويته؟
مهيائيل: صارله سنين قديم حيل بس تأثيره على البطيئ لازم اول مايجي نفتحه إله والا ما اضمن سلامته.
ايريم: بس هو مسجون شلون يرجع؟
مهيائيل: يطلع من السجن لو باجر لو عكبه، اكو وأحد يتكفل بيه ويطلعه.
ايريم: يجوز مايرجع للبيت.
مهيائيل: يرجع، اشوفه ساحك عتبة بابكم وتجراية دم تسوون على سلامته.
ايريم: اخوي مايؤمن بهاي الأمور ابدد.
مهيائيل: بعد هاي يمكم اللي عندي كلته.
ايريم: شنو شايف بعد؟
مهيائيل: ها مريتي صرتي تؤمنين؟!
ايريم: خيرة الطشه حلال سولفلي.
مهيائيل: اخوج راح يلكي وضيفه جديده بتعين ثابت، وينعجب بوحده بس متصيرله قدره غريب واشوفه قريب، حب صادم الجميع يعارضه بس يصير، صادم حتى لأخوج نفسه.
ايريم: شلون يعني غريب وقريب؟!
مهيائيل: يعني وحده من العائلة وغريب لأن متناسبه من جميع النواحي بس مصيرهم سوه أو اول خلفتهم ولد.
ايريم: هي هم تحبه؟
مهيائيل: هي اول المعارضين.
أشر باصبعه عليه وعليها مكانهم مو قريب وهي دايره وجهه عنه صدك ضحكت تالي عمرك ابيل توكع بحب عقيم وين مضمومتلك هاي.
مهيائيل: متريده بس تصير اله وتحبه بعدين وربج يسعدهم.
ايريم: اخذلي خيره لاستاج اريد اعرف شنو بيها.
مهيائيل: اخذج الواهس!!!
ايريم: خايفه عليها وأريد اطمأن.
مهيائيل: هاي لخاطرج على رغم الوقت مو مناسب.
لمهن وقره عليهن مره ثانيه ورجع طشهن وصفن بيهن شويه وبعدين كال.
مهيائيل: اختج عدها علاقه بواحد و تزوج بس بعد متصير فضيحه وتنلم بين الأهل، اكو وأحد معتدي عليها من قبل؟
جحظت عيوني على كلامه وكلت بسرعه: مستحيل ماكو هيج حجي.
مهيائيل: هذا كدامي قابل من جيبي انتِ طلبتي وكاعد احجيلج، اكو وأحد معتدي عليها من قبل؟
كلت بثقه لأن اعرف تربيت اختي شنو: لاا.
مهيائيل: بحياتها اكو هيج شي اما صار أو راح يصير.
ايريم: شلون يعني؟
مهيائيل: ماعرف.
ايريم: والحل؟
مهيائيل: قسمتها تجيها للباب لتخافين من هاي الناحيه تنسد بزفه وعرس.
ايريم: يعني نفسه يزوجها؟
مهيائيل: كتلج تصير فضيحه تنسد بفستان وحفله.
ايريم: نكدر نمنعه؟
مهيائيل: بالدعاء ممكن قدر الله وماشاء فعل.
ايريم: خوفتني حيل.
مهيائيل: لهذا السبب ماحب أخذلج خيره، مو كل شي تسمعيه راح تحبيه.
للمره الثالثه جدد الطشه بس جانت مختلفه عن سابقاتها.
مهيائيل: اول طفل يصير عدنا بنيه، عن قريب راح ينجمع شملنا ويتم هذا الزواج بس اكو عاقبه،
رفعلي عينه وكال وهو مصغر عيونه: هذا الأستاذ بعده يتعرضلج؟
اشرتله براسي بمعنى لا هز راسه وكمل: اخذي حذرج ولتأمنين بأحد، ايريم اي احد فاهمه.
ايريم: شلون يعني مفهمت؟
مهيائيل: لتأمنين وبس.
ايريم: راح يصير شي مو زين مو؟
مهيائيل: تره هي مجرد خيره احتمال وارد تطلع غلط لتنطيها هاي الأهميه وهسه كومي نامي باجر عندج امتحان والعصر اخذج يم الوالده تشوفيها.
ايريم: وانت؟
مهيائيل: راح اكمل العمل حتى باجر انطيه الها.
ايريم: مهيائيل عندي سؤال بداخلي ياكل بيه اكل.
مهيائيل: يخص ميمون.
ايريم: شلون عرفت؟!
مهيائيل: ميمون مو هيج بس من زوج تغير هوايه صحيح يضوجني خاصه وهو الأخ الجبير وبمثابة الوالد، تصرفاته مامدروسه وماعرف الحل وياه شنو خايف يسوي مصيبه ويورطنه لو يورط بنات الناس مع ذلك هو اخوي وماكدر انطي بي ذره.
ايريم: اكو وأحد مسويله سحر؟
مهيائيل: منو يكدر يسويله سحر وهو اصلاً بهذا وضعه يكدر يدمر عوائل، السحر الأسود هو وحده يكدر يسوي وتعرفين هيج نوع من أخطر السحوره، محصن نفسه من كل شي بس انا شاك بشغله واذا طلعت صحيح موتهن على أيدي.
مسألت اكثر من هيج لأن هو بسرعه كام واخذ الطشه وياه واني سويت نفس الشي نزل يكمل السحر واني نمت واكذب اذا كلت كدرت اغفى، عقلي بقى مشغول ويفكر بأبيل واستاج واني وحياتنا وشنو القادم، خلص ليلي هيج حتى طلع الصبح خلصت روتيني وغيرت ملابسي نازله اول مفتحت الباب صار بوجهي عيونه حمر ومبين عليه النعاس والتعب سويتله مجال دخل واني نزلت جوه سويت لفه جبن سريع اكلتها وردت اطلع وقفني هو يحجي ويمشي بإتجاه الباب.
مهيائيل: خليني اوصلج قبل ماروح للشغل.
جاوبته واني اتبعه: ياشغل؟
مهيائيل: اشوف البيت جايله مؤجر.
ايريم: يابيت؟
مهيائيل: اقصد شقه.
ايريم: ياشقه؟
مهيائيل: عندي عماره من خمس طوابق شراكه بيني وبين حلوين امهم ملتهين بحياتهم لذلك الشغل واكع براسي.
ايريم: قابل طايره روح العصر، شايف نفسك شلون عيونك حمر ومبين التعب بوجهك؟
مهيائيل: ماكدر انام اذا مارحت هسه يروح المؤجر واني بصعوبه لكيته.
ايريم: الله وياه يجي واحد غيره.
مهيائيل: اذا كل الناس تحجي مثلج خلص محد سترزق وكلها انتظرت الفرج يجي طاير، الحياة بالسعي ماكو شي يجي جاهز ارنوبه.
صعدنه بالسياره وعيني عليه خاف ينعس لو يغفى ويسوي بينه حادث الله لايقدر، انتبه عليه ابتسم وكال.
مهيائيل: ماكو داعي تصفنين هيج ما نندعم.
ايريم: ليش مخليت رائف يوصلني وانت نايم ساعتين؟
مهيائيل: اني طالع وبطريقي ليش اخليج ترحين وياه.
ايريم: وضعك معاجبني.
مهيائيل: متعود اصلاً خلصت عمري بالسهر مو جديده.
ايريم: موزين عليك هيج.
مهيائيل: تخافين عليه قُفلي والمفتاح؟
ايريم: شهل السؤال الغريب؟!
مهيائيل: حتى لو غريب بس اله جواب يا اي يا لا.
ايريم: اكيد اي شلون لعد ماخاف عليك غير زوجي سر سعادتي.
ضحك بصوت عالي خلاني أبتسم.
مهيائيل: يحفظج ياسر سعادتي.
وصلني يم الجامعة نزلت وبوجهي للقاعه، طول الإمتحان وعقلي يفكر بيه وداخلي قلق خاف صار بيه شي، خلصت بألف ياعلي اول مطلعت اخذت موبايلي من الأمانات وتصلت بيه مباشرة بآخر دكه فتح الخط.
مهيائيل: ها يعيوني.
ايريم: شلونك؟
مهيائيل: هسه طلعت من الأنعاش.
من سمعت هيج نهديت بيه مكدرت اسكت بعد، يمكن من الخوف اذا صار بي شي وين انطي وجهي.
ايريم: مو كتلك ارجع للبيت خلي يولي الشغل على شنو مستقتل مادري، واذا راح مؤجر وأحد يجي عشره بمكانه بس الصحه اذا راحت شنو يرجعها بعد؟
بس انت راسك والف سيف لو احجي بعد الف سنه مستحيل تسمع من عندي.
مهيائيل: هذا كله خوف عليه؟!
ايريم: صدك والله؟
مهيائيل: شنو الصدك؟
ايريم: اني وين وانت وين، ليش تسوي بيه هيج ناوي تجلطني لو شنو فلمك؟!
مهيائيل: اسم الله عليج ياعيني ونظرها على شنو مفاوله نفسج ماكو وأحد يستاهل، على كولتج الصحه اذا راحت مترجع.
ايريم: وين انت هسه؟
مهيائيل: على بعد دقيقتين من الجامعة تعاليلي.
ايريم: ماشي طالعتلك.
وصلني للبيت داخل صمت من عدنا ثنينه، خلص باقي النهار بشكل طبيعي حتى صار العصر اخذني لبيت اهلي امي أول مشافتني بجت واجت حضنتني.
تسنيم: ابوج اليوم راحله من الصبح يكول ماكو حل اخوج متورط وأحد معترف عليه ساكن عدهن يعني مو زبون ويكدرون يطلعونه.
ايريم: ذكري الله أن شاء الله رب العالمين يحلها.
تسنيم: بعد هاي شيباتي وعمري تالي متالي ابني يروح لل**** وين انطي وجهي من ربي وشكله ماعرفت اربيه، ولج والله استحي ادعيله خجلانه من الله حيل وهو ماخله حيا لأحد، شاب وشحلاته مثل الورد ليش بهذل نفسه هيج!!!
ايريم: كله امتحان من ربنا لتجزعين من اول مصيبه يايمه.
تسنيم: هن وحده ثنين، راح يلفيني البين واني كلبي بلوعاته عليكم باقي.
ايريم: عمرج طويل لتحجين هيج، كافي عاد شو مسحي دموعج راح اسوي اكل النه واصيح استاج تنزل اهنا.
واني احجي دخلت للصاله اجت ناحيتي وهي تكول
بأبتسامه اطمأنيت لأن شكلها ميوحي صاير وياها مصيبه اسم الله.
استاج: ماكو داعي تجيني اني اجيتج، ياكاطعه مشتاقين لتسألين لتاخبرين تزوجتي ونسيتينا.
ايريم: والله من شغله لشغله ناسيه حتى نفسي وهاي اني هسه اجيت وملي من عندي حتى بعظمة السانج تكولين ارجعي بعد ماريدج.
استاج: ينكطع الساني وما اكولها تعرفين انتِ شكد غاليه عليه ميحتاج اشرح.
ايريم: لعد امشي نحضر عشا سوا وسولفيلي عن اخبارج.
استاج: ماكو شي جديد غير أبيل الشاغل بالنه.
ايريم: تنحل بحيل الله متبقى هيج.
استاج: خايفه لتصير سمعه علينه بالمنطقة ومنكدر نطلع من باب البيت بعدين.
ايريم: لتخافين من هاي الناحيه الولد مو مثل البنيه يوم يومين وتنسي.
استاج: ممبين عليج مهتمه!!
ايريم: الحجي بيناتنا اللي صار بسببه ماكو انسان عاقل يروح لبيت مو زين ويسكن بيه بعيد عن الحرام مفكر بسمعته وسمعة اهله شنو الداعي هيج يسوي؟
استاج: متدرين شنو عاش لتظلميه.
ايريم: للمعصيه ماكو عذر كولي راح برضاته اي بس لتشمريها براس الظروف.
استاج: مادري الله يحلها، احجيلي عنج مرتاحه بزواجج لو لا؟
ايريم: حياة طبيعيه.
استاج: اعرفج متحجين شي حتى لو ميته قهر.
ايريم: المشكله المالها غير ربها ليش احجي بيها.
استاج: هم صحيح.
حبيت استغل الفرصه واحجي وياها بلكي اسحب السانها واعرف اذا صاير وياها شي أو داخله بعلاقه مندري بيها.
ايريم: هم حبيتي من قبل؟
استاج: اي.
نصدمت بداخلي بس سويت نظرتي طبيعيه حتى تحجيلي اكثر: منو؟
ابتسمت وكملت بضحكه: العلوم والتاريخ.
ايريم: ملعونه ماقصدي الدراسة اقصد الحب بشكل عام يعني محد عجبج منا منا؟
استاج: وحقج بزونه مادخلت كلبي تردين احب بشر هو اني اللي خلك.
ايريم: اي هم صح الحب مكروه مو حلو.
استاج: ليش مجربته؟
ايريم: ماعرف بس يجوز دا اعيشه هسه.
استاج: اذا عشتي بعد الزواج انتِ محظوظه.
ايريم: ليش؟
استاج: لأن قله يحبن أزواجهن اذا نغصبن عليهم.
ايريم: مو شرط، الرجال يحب المره التعتني بيه وتهتم بتفاصيله والمره كذلك، اكو وحده كلتلي شكد متنطين تاخذين واني مطبقه هاي القاعدة.
استاج: ربي يسعدج واصير خاله عن قريب.
ايريم: آمين يارب.
استاج: لهاي الدرجه متحمسه تصيرين ام؟
ايريم: فكرة الأطفال تخوفني مرات بس ماكو مشكله بالتجربة.
استاج: ليش تخافين من الأطفال؟
ايريم: الخوف من تربيتهم، شايفه مجتمعنا شلونه وخاف ما اطلع ام زينه وتعرفين اهله شغلهم كله سحر وشعوذه وماريده ياخذ وراثتهم.
استاج: من هاي الناحيه لتخافين صدكيني مهيائيل اذا بقى وياج بعد فتره اكبر يتوب ويصير خوش أدمي ومو بعيدة يصير معمم.
ايريم: مو لهاي الدرجه.
استاج: كولي استاج كالت.
كملنه العشا ورحت خليته بالصاله وجبرنه امي تاكل، لكمتين وبطلت وعيونها مسكتن تنزل دموعها وتمسحهن، صدك نقهرت وضجت من ابيل على هاي سوايته، وليا مرحله وصل اهله الشياب بسبب طيشه وغبائة،
ندك الباب ورادت استاج تطلع وقفتها ولأن امي ماتكدر طلعت اني، كلت منوو اجاني صوته.
خويه اني بتال اجيت اطمأن عليكم اذا محتاجين شي، الوالده شلونها؟
جاوبته من وره الباب.
ايريم: الحمدلله خويه الله يسلمك ممحتاجين شي.
بتال: اذا احتاجيتوا اي شي الله عليج انطوني خبر اني هنا بهذا البيت المقابيلكم.
ايريم: متقصر كلك واجب الله يحفظك.
راح واني رجعت قبل ما افوت من الباب سمعت صوت همس رجفت رجليه وبلعت ريكي، الصوت يروح ويجي وماعرف مصدره من وين سويتها ركضه ودخلت جوه وقفلت الباب وطردت خوفي قانعه نفسي هذا الهوه ماكو شي،
بقينا كاعدين نسولف وحاولنا اني واستاج نضحك امي قدر الأمكان وهي شويه رتاحت من اتصل بيها ابويه وطمنها عليه وكاللها اكو وأحد يكدر يشهد لصالحه عرفوا عنوانه وباجر الصبح بإذن الله يرحوله،
صارت الساعه ب11 كلها نعست امي دخلت نامت واستاج هم واني صعدت لغرفتي قبل ما ادخل راحت عيني لمقابيل غرفته اجه بعيني منظر ابيل شلون جان شايلني ويفرني فرحان بيه رجعت امشي أو اوكف على رجليه ابتسمت بنفس الوقت بجيت مجنت متوقعه هذا الشخص المؤمن العنده مخافة الله اهم شي يسوي هيج عمله،
دخلت لغرفتي اخذت نفس ورجعت الذكريات كلها بعقلي، هنا ضحكت وهنا كمزت من الفرح وهنا نزلت دموعي لأن أمي صيحت عليه جايبه تسعه بالاملاء، أصعب شعور من تتمنى الزمن يرجع بيك ليوره وتعيش الطفوله مره ثانيه لأن هاي الأمنيه جايه من وجع وقهر محد يحس بيه غير الله،
نفضت الأفكار والنعاس ساعدني همات رحت لفراشي واني أحاول النوم وبعد كم فكره وذكره غفيت ماحسيت الا وصوت طكطكه عبالي الهوه عالي ويضرب بالشباك رجعت نمت مغلسه على الموضوع بس شويه وصار صوت همس فزيت من مكاني جان ضوه الكمر يضرب بالغرفة شفت خيال اسود بلعت ريكي واني اكول مستحيل ماكو شي، بس مدام توقعي فتره طويله ونفتح الشباك رجف كل جسمي واني اذكر مافاتحته ولامتقربه يمه اصلاً، كمت بصعوبه وكل نيتي اسده ورجع انام ماعرف شنو جان بعقلي وليش منزلت جوه يم امي بدون ما التفت،
رجليه اخذتني يمه واني امشي سمعت صوت باب غرفتي نفتح تجمدت مكاني ومكدرت اسوي اي حركه وحسيت أيدي نملت وجسمي محملني اكثر من صارت أيد على خصري سحبتني الها والثانيه سد بيها حلكي...
يتبع..
البارت أكثر من 4090 كلمه.
التنزيل حيصير بين يوم ويوم مع الاحتفاظ بيوم الجمعة عطله إليه..
تفاعلكم ميسوي واهس تدرون لو متدرون شمعاتي، أريد اشوف تعليقاتكم بين الفقرات وتصويتكم للبارت يعيوني تره ازعل.
تصبحون على الف خير وعافيه يارب..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!