للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة(زهراء احمد)
_________
إن الأشياء الصغيرة !!
حينما تحدث في وقتها يكون لها معنى أكبر منها,
أقصد أن هنالك بداية صغيرة لكل حادث كبير.
_ غسان كنفاني
___
نفتح الباب واجاني والخوف واضح بعيونه خلاني كلي بحضنه يطبطب على ظهري ويحجي بكُل لطف وحنان كلامه ودفو حضنه هدأني بشكل جبير.
مهيائيل: يروحي، شبيج هيج ترجفين وصفره؟
ايريم: خايفه.
مهيائيل: يخسا الخوف يطخج واني موجود، اذكري الله ماكو شي.
رفعت راسي اله ودموعي تنزل.
ايريم: شلون يعني ماكو شي وهذا الخيال اللي اشوفه؟
وصوتك اللي اسمعه يصيحني وانت ماموجود اصلاً؟
وبعيد عن هذا الشباك ينفتح من وحده ويصير صوت ضربه قويه بالباب، هذا كله وتكول ماكو شي تريد تخبلنييي!!!
صفن بوجهي شويه ورفع حاجبه كايل.
مهيائيل: اكو وأحد داخل للغرفه غيرج؟
ايريم: لا اني اقفلها قبل ما اطلع.
مهيائيل: عادي يسوون نسخه ثانيه.
ايريم: شنو قصدك؟
مهيائيل: لازم اتأكد بالأول واعرف الموجود هنا منو، روحي يم ترانيم وانتبهي بتركيز اذا تشوفين نفس الأشياء هناك لو لا.
ايريم: خوفتني اكثر، شنو الموضوع؟
مهيائيل: ماكو شي يخوف زوجج يسوي السحوره بهاي ايده وماكو شي يصعب عليه شنو مجان تخلصين منه بحيل الله، اريدج قويه ومتنهزين من اي شي حتى لو خايفه، ماشي؟
اشرتله براسي بمعنى اي، باسني بجبيني واني كمت من يمه طالعه ماريد اروح يمها بنص الليل هسه يشمتن ويكولن طردها مع هذا طعته ومكلت لا اريد اعرف نهايتها وين هاي السالفة.
دكيت الباب شوية وفتحتلي، على وجهه هوايه اسأله واني مالي خلك اجاوب اي واحد بيهم عبرتها ورحت على جربايتها، ياسيم جانت بسابع حلم الساعه ب2 بالليل، اجتي يمي بدون متحجي كلمه حضنتني وكامت تلعب بشعري حتى غفيت ثاني يوم الصبح لكيتها كاعدة قبلي وهنا ماكدر اتهرب لازم اجاوب كل شي.
ترانيم: اسمعج.
ايريم: مهيائيل كلي اجي يمج.
ترانيم: اول تالي مهيائيل يسويها معقوله!!!
ايريم: والله بهذا البيت كل شي معقول لتستغربين.
ترانيم: كومي اخذي حمام وخلي ننزل نسوي ريوك سوا ولتفكرين هوايه ماطول الحياة والموت بيد رب العالمين محلوله.
ابتسمت بوجهه وكأن سمعتني الكلمه المحتاجتها، الحياة والموت بيده لعد على شنو خايفه اذا جان الأمر راجعله بالكامل!!
ايريم: ان شاءالله.
نزلنه بعد الحمام حضرت الريوك وبدينا تنظيف البيت وكأن ممنظف من قبل، الأيام تمشي بسرعه وباجر الخطبة مالت ياسيم، البنيه اللي نظلمت ونغصب حقها ونجبرت تتزوج مغتصبها، ماعرف بأي قانون عادل ينطي المغتصب الحرية الكامله وميحاسبة بمجرد مايمضي على عقد الزواج!!
اني لو بيدي احبسه واذا طلع من السجن اموته هو سلب حياة من انسانه بريئة لأغراض غير شرعيه ومن حقه اذا ابوه معتبره ابنه وتبره من عنده على شنو اولادة يدفعون الثمن،
وهذا السؤال اللي دائماً اسأله ليش النساء بشكل عام يتبعن كلبهن بأختيار الشريك مو العقل؟
فرضاً حبيته لكن هل هو مؤهل يصير زوج واكدر أأمن على حياتي ومستقبلي وياه؟
راح يكون اب جيد ويعتني ويربي أولادي ويضمن الهم مستقبل رائع؟
راح يكون مسؤول وشخص يعتمد عليه؟
تفكيره مناسب لتفكيري؟ يكدر يستوعبني ويتفهمني ويدعمني بأحلامي وطموحي ويصير إليه سند وعزوة وحايط قوي اذا ملت اوكع عليه وهو بالمقابل يحتضني؟
صفنت على نفسي اني شنو جاي احجي وخربط، النساء يزوجن بحالتين، اما معرفة اهلها لعائلة الشخص ويردون يحافظون على العلاقات، أو يكون اقارب وبنت العم لبن العم، صحيح مو الكل بس هي الأغلبيه هيج وفي حال جانت عائلة منفتحه وقبلو تتزوج الشخص المتقدم الها بأغلب الأحيان يكون الإختيار خاطئ وتكعد بعد الزواج تلطم،
لازم نوصل لفكرة انو الزواج وتكوين أسره مو شغلة يوم يومين ابدد انما هو عمليه تستمر لسنين طويله وتأثر بحياة اجيال قادمه مو رغبة لحظيه ومن كتشفت نفسي غلط واختياري مو صحيح بعد فوات الآوان ومن صرت ام اروح اطلك وقرر القرار الصح بالوقت الغلط ويروح ذنب عدم ادراكي المبكر بركبة الأطفال المساكين.
واني اسولف وي نفسي نزل من الدرج باوعلي وبتسم واني بادلته سويتله ريوك سريع وطلعت وراه للباب عيني تروح للأثر مالته، كاعد يعجبني اكثر يوم بعد يوم وهذا الشعور على رغم هو حلو حيل بس يخوف، عائلته وهذا البيت واهم شي شغله مو مكان لتكوين أسرة سعيدة ابد،
خلص اليوم بشكل هادئ صار الليل وبقيت كاعده بالمطبخ اخاف ادخل لغرفتي، منزله راسي على الميز مالت الطعام وصافنه بغير عالم فززني صوت سحب الكرسي رفعت راسي ومن شفته عقدت حاجبي وحجيت بتساؤل بيه نوع من الحِده.
ايريم: شنو تسوي هنا؟
ميمون: اشوفج ممكن؟
ايريم: بطل تفاهتك، الواضح آخر ضربه من مهيائيل فقدتك الذاكره بشنو ممكن يسوي بيك اذا تجرأت تعيد الغلط مره ثانيه.
ميمون: مو تتوقعين زاد عن حده هوايه؟
ايريم: وهو؟
ميمون: هوايه تبيعين شريفيات براسي، هاي بس كدامي لو وي كل الزلم هيج؟
ايريم: احترم نفسك واعرف شنو تحجي، لتشوف كل ناس مثل مرتك، واحد حقير بدون تربيه.
عفته وكمت البقاء وي الشيطان بنفس المكان يخنكني، قبل ما اطلع من المطبخ كال بصوت عالي نيته يسمعني.
ميمون: راويني شجاعتج بعدج معشتي شي لسه.
خفت من كلامه وحسيت اله أيد بموضوع الخيال والأصوات اللي أسمعها وقررت بس يجي مهيائيل اكله، فتحت باب الغرفه ودخلت مرت بخشمي ريحة تلعب النفس فتحت الشباك ورشيت معطر بس مكاعد تروح،
احس اكو شي يخنكني بشكل مو طبيعي ويمنع عني النفس وكعت على الأرض وماكدر احرك لا أيد ولا رجل، كل شي بيه نشل، اطرافي ماعندي قوة اسيطر عليها رجع بيه الزمن من وكعت نفس هاي الوكعه أبيت اهلي بس الفرق هسه أكدر أسولف،
صوت بزونه قريب عليه ماكدر ارفع راسي واشوفها وين بس احسها قريب على رجلي، رجف جسمي بالكامل من مررت السانها على اصابيعي صرخت بصوت عالي وصل للجوارين يمكن.
مهيائيلللللللللللل الحكليييييي.
نفتح الباب ودخلت مفزوعه اجت يمي وشالتني مخليتني بحضنها دموعي تنزل وحجي بخوف مو طبيعي اللي اعيشه بهاي اللحظه الله ليراوي لأحد.
ايريم: خابري خلي يرجع ماتحمل بعد اكثر من هيج.
ترانيم: شبيج يعيوني ليش هذا الرجيف كله؟
ايريم: بزونه اهنا اطرديها حبابه.
ترانيم: ماكو داده بزونه محد موجود بس اني وانتِ.
ايريم: شنو يعني ماكو!!!
هسه جانت يم رجليه واكفه.
ترانيم: وربج ماكو لا بزونه ولاغيرها اصلاً الشباك مسدود والباب هم منين تدخل يعني؟!
ايريم: لعد اللي يم رجلي شنو؟
ترانيم: ماكو شي وداعتج، بعدين انتِ ليش واكعه شبيج؟
ايريم: جسمي ماكدر احركه ماعرف ليش نشلت كل اطرافي فجأة.
ترانيم: اسم الله الرحمن، شو بالله كومي وياي اسندي نفسج عليه خليني اساعدج.
خليت أيدي على ايدها وهي سحبتني حسيت عظم ظهري طك بقوة صرخت متوجعه: اخخخخخ.
ترانيم: بسم الله الرحمن الرحيم، (سلام قولاً من رب رحيم) ماكو شي لتخافين ربج موجود ويانه ويحمينا بكُل وقت.
ايريم: والنعم بالله.
كومتني جسمي كله مكسر مثل الواحد طالع للشغل من الصبح، نومتني على الجربايه وبقت يمي تسولف وبعيونها كلام بس متردده تحجي بيه.
ايريم: سولفي شبيج؟
ترانيم: مابيه شي.
ايريم: عليه، حافظتج تره، السانج يحجي بموضوع وعيونج موضوع ثاني.
ترانيم: اي وتعرفيني ماكدر اضم شغله بكلبي لازم اغرد بيها.
ايريم: اي انا اللي اعرفج.
ترانيم: سمعت سالفه واني امر من يم غرفتهن قبل يومين تونه وصاحبتها التس.
ايريم: اييي.
ترانيم: ناويات نيه سودة أو اخاف احجي شي مهيائيل صاير مايتحمل كلمه بسرعة ينهد بيهن واني مالي خلك تصير مصيبه بسببي.
ايريم: ومن شوكت صرتي حبابه هيج!!
ترانيم: بيها تروح اركاب هاي السالفه مو شي هين وداعتج.
ايريم: خيانه؟
ترانيم: اضرب منها.
ايريم: فورتي كلبي ماتحجين!!
ترانيم: تالين متفقه وي واحد يكتل ميمون.
لطمت على صدري: عزةةةة.
ترانيم: وهو المسكين مايدري يمكن بيها.
ايريم: زين ليش وهو صار مطي بأيدها وين متريده يروح؟!
ترانيم: ذني حيايه صفره محد يعرفهن بكدي، بعقلها فكرة تسويها حتى تخلص منهم ثنينهم.
ايريم: ليش منو الثاني؟
ترانيم: راح احجيلج كل شي من البدايه، قبل سنتين صارت مشكله جبيره بين تالين و دَاسِم وصلت للطلاك وكلنه فرحانين وأخيراً راح نخلص منها هاي المسمومه بس اللي صار كلب الموازين وخلا يصير خاتم بأصبعها شلون وليش محد يعرف بعدها بفتره بسيطة ميمون صار نفس الشي بأديها على رغم جان يموتها جوه ايده وصوتها يوصل لسابع جار، مشوفها الويل بداية زواجهم ونكلبوا الزلم المشوربه وصاروا طليان بأديهن، وما اخفي عنج مهيائيل استغل هذا الأمر الصالحه واخذ كل حقه بالورث من عمه بطريقه قانونيه.
ايريم: يعني ميمون مسواله سحر ومن كتلج مصدكتيني.
ترانيم: اني اعرفه سحار مضبوط وأكثر خبره واقدميه من مهيائيل.
ايريم: و دَاسِم؟
ترانيم: هذا هو اللي علمهم.
ايريم: ممبين يحبهم شنو السبب علمهم على هيج طريق؟
ترانيم: مهيائيل جان وكح من طفولته وذكي واذا راد شي يسويه بدون نقاش بقى يراقب ابوه ومن مات كام يراقب عمه والتفاصيل بالدقه ماعرفها بس اكثر تعليمه جان من دَاسِم، اما ميمون فهذا جان دَاسِم يحبه لأن يطيعه ويسوي اللي يريده بدون نقاش.
ايريم: لهاي الدرجه ماعنده شخصيه!!
ترانيم: انتِ متعرفيه هو يلعب الكل بس بدون محد ينتبه، ينتقم ويخطط ويقرر ويسوي حتى يقدم الأكله جاهزه بالأخير ويصدم الكل.
ايريم: ليش شنو سوه بدَاسِم؟
ترانيم: سحب كل الاملاك من جوه رجليه بسهولة.
ايريم: شلون يعني مفهمت.
ترانيم: مهيائيل وميمون اخوه مو بس اسم علاقتهم عميقه وقويه حيل ومحد يكدر يفرقهم على رغم هوايه حاكو خطط حتى يخلونهم واحد يكره الثاني ويقدرون يسطرون على العقلين وهاي ماكو غير تفكير تالين ورولين اللي داخلات البيت على طمع بعيد عن انو هن من بيوت مو زينه.
ايريم: يعني مو بنات بيوت؟
ترانيم: لا داده اصلهن نجس.
ايريم: وليش تزوجوهن؟
ترانيم: قدر ربج.
ايريم: ماكو هيج حجي رب العالمين ميحدد منو الشخص اللي نرتبط بيه.
ترانيم: القسمه تسد حلوك معليج بحجي الناس.
ايريم: الزواج اختياري وكل واحد يتحمل مسؤولية أخطاءه.
ترانيم: يجي يوم يطلعن مثل مدخلن وتشوف عينج.
ايريم: عسى يكون قريب يارب.
ترانيم: تأخر الوقت نامي باجر ورانه كعده من الصبح.
ايريم: اليوم مشفت مُزن وينها؟
ترانيم: مكابله ياسيم وتلطم عوفج منهن زعاطيط.
ايريم: خطيه ياسيم راح تدمر حياتها بسبب خطأ بسيط.
ترانيم: كل شي بالحياة اله ثمن ومثل متنطي تاخذ، الف مره نبهت لتثقين بالناس اللي متعرفيها، ولتمشين وياها مو خوش بنيه وتكعدلج للصبح بس تراسل وتلغي حتى شلعت كلبي ومابطلت وشوفت عينج شنو صار بعدين.
ايريم: جانت مصاحبه؟
ترانيم: نص الحقيقه محجتها واني شاهده عليها، سوت علاقه وي واحد وجانت تضرب الدوام وتطلع وياه بس هي لافتها وسوته نجبرت.
ايريم: مهيائيل عبرت عليه هيج سالفه؟!
ترانيم: لاا بس غلس.
ايريم: وليش غلس؟
ترانيم: راد حجه ميموتها وتليد حجه قويه.
ايريم: ومو حرام ينضحك عليه ويزوجها؟
ترانيم: ليش حرام هو صدك ماخذ شرفها.
ايريم: انتِ مو كلتي عدها علاقه من قبل؟
ترانيم: اي بس ذلك ما أخذ شرفها علاقه سطحيه طبه وطلعه.
ايريم: ويعع شلون يثقن!!!
ترانيم: ناقصهن حنان عشتوا، لفهن البين ساقطات.
بقت يمي تسولف حتى غفيت على صوتها بدون ماحس، هي من نكون وحدنه صوتها يصير همس وبنبرة ثابته تخليني انعس لا أرادي،
فزيت على حركه بالغرفه طفرت مفزوعه وأخذت نفس عميق حيل من شفته هو.
مهيائيل: أسم الله شبيج؟
ايريم: ماعبالي انت.
مهيائيل: زوجج بشحمه ولحمه رجعي نامي لتخافين حبيبي.
صفنت بيه، اسلوبه ويايه حلو حيل ولطيف عكس تصرفاته وي البقيه، تذكرت اني هاي الفتره كلها هاملته عاطفياً وكلما يدخل للغرفه يلكاني الطم، كمت من فراشي من دخل للحمام فتحت الكنتور وصارت بوجهي ملابس النوم بقيت محتاره شنو البس على رغم صارلنه هوايه مزوجين بس استحي من عنده لدرجه جبيره،
جذب عيني ثوب اسود من الستن وبما انو خاص للنوم اكيد حيكون مشلتح مثل متكول ترانيم، لبسته ورتبت شعري وخليت مكياج خفيف بس طوخت الروج، احب اللون الأحمر الدموي على شفايفي، رشيت عطر ورتبت الغرفه بشكل سريع اصلاً هي مرتبه على طول اليوم يعني مناقصها شي،
باوعت لنفسي بنظره اخيره وحجيت مخاطبة داخلي بصوت عالي مادحه: والله اطك بالكاع أعمى اللي مايشوف هيج جمال وماينعجب بيه.
ابتسمت بأعجاب وثقه ردت اخطي خطوة للجربايه نسحبت من أيدي ونضربت بالمرايه بقيت ارمش اكثر من مره استوعب الموقف وهو مبتسم على شكلي، بعدين قرب راسه من يمي وكال بتهديد.
مهيائيل: افكس عيونه اللي يرفعها بوجهج بنظرة إعجاب لو مدح مريتي.
ضحكت كايله بهدوء اريده استفزة لا أكثر: بهاي الحاله لازم تعمي هوايه ناس.
رفعني على الميز بأديه.
مهيائيل: صايره مستهتره!!
ايريم: تعلومك.
مهيائيل: اني ماعلم بس على الدين والأخلاق معليج بشخصيتي وي الناس العاديه، تربيتي تختلف.
ايريم: راويني بله شلون تربي عاجبني اطلع عن قرب.
مهيائيل: تعيشين وتشوفين لهمودي.
شالني وهو يضحك، أجواء سعيده يمليها الحب والأمان والراحه وداخلي دائماً يردد يديم علينا ربنا هاي النعمه وميحرمنا منها بيوم.
مهيائيل: اكول.
ايريم: كول.
مهيائيل: زعلان منج هوايه وماراضيتيني.
رفعت راسي اله مخليه أيدي جواه: ليش شنو سويتلك؟!
مهيائيل: شلون تعوفيني انام وحدي!!
مفكرتي زوجج سر سعادتج بلكي يحتاج شي شياتين، يريد حضن تالي الليل وين يولي هل المسكين؟
جحظت عيوني ضاربته على ايده.
ايريم: هاي وهي فكرتك اصلاً لو اني عايفتك صدك شسويت؟!
مهيائيل: اكسر رجيلج تكدرين تسويها.
ايريم: ايباه، والله اسويها اصلاً ابسط منها ماكو هسه اخابر ابيل يجي ياخذني وابقى هناك يمهم فد اسبوع اكثر اقل حسب عود افكر.
كرصني كرصه بأيدي حسيت شال اللحم منها: اخخخخ شبيكككك.
مهيائيل: السانج اكصه اذا نطقتيها مره ثانيه، ادبسززز منطيج مجال صايره ديحين بكيفج ماعندج رجال يلزمج!!!
ايريم: تره يمك موجوده دياحتيش!!!
مهيائيل: حجيتيها معناها جانت بعقلج يحلوه.
ايريم: دباع النغل شلون يفكر!!
ضربني ضربه على راسي خلاني استوعب شمسلتت قبل شوية، بتسمت بوجهه وبسته حتى ينسى الموضوع تحولت من بوسه رقيقه إلى عضه خلتني اكرصه بكُل قوتي انكلبت حلبة مصارعة مو ليله رومانسيه عود.
مهيائيل: مره ثانيه اشلعهن الج، السانج طولان ويرادله كص.
ايريم: رجال سويها ومد ايدك اكسرها.
مهيائيل: بله تعالي اريد اشوف شلون تكسريها.
ايريم: خربببب كافي لدغدغني حباب، ههههههههه، كافي فدوة.
مهيائيل: تعيديها؟
ايريم: لا والله ابد التوبه اصلاً طلعت من عندي بدون قصد وداعتك.
مهيائيل: اي هيج من الأول وامشي عدل ليش تشلعين كلبي.
ايريم: والله ماكو غيرك انت وأهلك شالعين كلبي.
ضحك وسحبني اله وخلص الليل بدون خوف، وجوده يمي مثل الحمايه الشخصيه ماكو شي يضرني، يمكن لأن ساحر وهاي شغلته ويعرف شلون يطرد الجن.
ثاني يوم الصبح كعدت من وقت ولأن اليوم خطبة ياسيم فالجميع موجود من ابوها لاصغر فرد بالعائلة، مترأس المكان دَاسِم الوجوده من عدمه لاشيء، اما بالنسبة لميمون فهذا الشخص احسه لغز صعب فتح الشيفره مالته وخاصه بعد الكلام اللي سمعته من ترانيم طردت فكرت مسواله عمل وبعقلي يقين تام اكو شي راح يسويه ويصدم الكل عن قريب امبين من نظرته مو راحه، وبخصوص رائف فهذا الطف انسان ممكن تتعرف عليه واحد واضح وصريح وميخاف من شي والأهم من هذا كله بعيد كل البعد عن السحر والشعوذة.
دَاسِم: اني مقابل على هذا الزواج.
مهيائيل: محد اخذ رأيك.
ميمون: عمك هذا ولاتنسى ابوها يعني من حقه ينطي رأيه بزواج بنته.
مهيائيل: وهسه يلا عرف عنده بنيه!!
ميمون: سواء عرف لو لا يبقى ابوها ومتكدر تنكر هذا الشي.
مهيائيل: هاي المره شنو بعقلك خويي؟
ميمون: ماكو شي صافي مثل عقلك.
مهيائيل: اذا طلع احساسي صحيح اندمك والله.
ميمون: لازم تعرف انت مو محور الكون وماكو شي مرتبط بيك.
مهيائيل: اني حذرتك وانت بكيفك بعد.
رائف: شنو فلمكم انتوا الثنين؟
ميمون: قريباَ تعرفه بعدنا نرتب بالمشاهد الأخيره حتى يصير رائع ومختلف.
مهيائيل: ويفشل بصالات العرض خليها بعقلك.
ميمون: يكفي بيه فائده إليه مو مهم رأي المشاهدين.
مهيائيل: تونه شفتي بنتج؟
تالين: اي شفتها مابيها شي متحمسه تتزوج مستعجلة.
مهيائيل: اي حيل انتِ امها اكيد تطلع عليج.
تالين: شفايتلها تطلع عليه غير اني اخبل.
مهيائيل: الواضح شايفه نفسج بالمكلوب، انتِ تشبهين الساحره بتوم وجيري تلعبين النفس.
رائف: لاخويه تشبه شرشبيل من يركض وره السنافر.
مهيائيل: اي شايفه شلون واحد تافه ماعنده شغل وعمل بس يركض وره الزعاطيط بعدين خططه تفشل وينتصر الأبطال الحقيقين.
رائف: هاي منتهين منها اكيد النصر حليفنا.
رولين: مو داخلين معركه انتوا والله يا الله.
مهيائيل: علم مرتك شلون تسد حلكها من يحجون الزلم.
ميمون: امسحها بوجهه بعدها ماتفتهم.
رولين: هاي شنو ميمون تحجي عليه؟!
ميمون: سدي حلكج ولج وكومي فوك لعبت نفسي واني ماكابل وجهج اليسد النعمه.
رولين: هاي اني!!!
ميمون: لا خيالج، كومي حتى بزازيني احله منج.
مهيائيل: ههههههههه، الواضح خلص المفعول يحتاج واحد ثاني اقوة كاغد محترك.
ميمون: من هاي الناحيه اطمأن ماكو شي تكدر تسويه بعد.
مهيائيل: شغيرك خويي؟
ميمون: لتستعجل، الأخبار الحلوه عن قريب توصل يمك بصورة كامله.
مهيائيل: انشوف شنو يصير.
دَاسِم: انت ماعندك احترام للاكبر من عندك ابد.
مهيائيل: واذا تعرف نفسك من تحجي وياي تترزل على شنو تحجي وياي؟!
دَاسِم: آخر كلام عندي ولازم تسمعه ماعدنا بنيه للزواج، ذلك ****** مايصير نسيبي.
مهيائيل: محد معترف بيك ولا برأيك، كلت تتزوجه يعني تتزوجه وعلى ذكر طاريه دك، ترانيم روحي نزليها وانتِ مُزن اذا تردين ترجعين لبيتكم وتعيشين اهناك بسعادة امج من تكول تعالي وياي كليلها بيت اخوي الجبير وما اعوفه، واضح؟
مُزن: واضح.
مهيائيل: عفيه عليج.
غمزلي وطلع وراه مشوا كلهم، دخلوا للاستقبال واجت يمنه مره جبيره عمرها بالخمسين يمكن تمشي على عكازة، عافت الكل وراحت لمُزن حضنتها بكُل قوة.
حميده: عشرين سنه عمري كله مافاركت هذا الوجه الحلو الله لاينطي الفرقنا وشتت شملنا.
مُزن: لتدعين على السبب اللي صار كله من أيد ابنج.
حميده: لو مو هي **** جان مصار هيج، اكو **** طكها على ايدها وكللها تصعدين بالسياره وانتِ تدرين بي واحد هتلي سرسري ما يتأمن على حياة احد.
ترانيم: تفضلي ستريحي عيوني البيت بيتج.
حميده: زاد فضلج بنيتي، البيت عامر بأهله، عروستنا وين اريد اشوفها واشوف ابني شبي خابصني روحي اخطبي وروحي اخطبي.
ترانيم: امها راحت تجيبها وتجي شويه وهي يمج واشبعي بيها شوف.
حميده: حتى لو قردة مو مهم رأيي كافي عاجبه وليدي حبيبي.
هي تسولف واني احس نفسي محمله عليها حيللل اريد اكوم وانتحر بيها، يمكن لأن مهيائيل يكرهاا فشعوري نفس شعوره بالضبط،
اشرت عليه وحجت بأبتسامه.
حميده: الحليوه منو؟
ترانيم: مرت مهيائيل ابن زاهده.
حميده: ملعون من يوم يومه ميصيد بس النجر.
ترانيم: ذيب اخوي.
حميده: زاهده الله يرحمها محظوظه بيه.
ترانيم: اي ياخذ حقها من عين السبع حتى وهي ميته.
حميده: اي خطيه مكدر ياخذ حقها وهي عايشه.
مكدرت اسكت اكثر من هيج واني اشوف كلامها عباره عن مسامير.
ايريم: ميحتاج مهيائيل ياخذ حقها يكفي رب العالمين كفه أو وفه والزمن يثبت للناس.
حميده: مثل رجلج عليمن تطلعين.
ايريم: ونعم من زوجي شريف عفيف ماركض وره بنات العالم وهو بحضن مره صاينته ومحافظه على بيته.
حميده: اي بهاي وياج حق الزلم مثل الجلاب يركضون وره اي وحده لحمها ناعم.
ايريم: بس زلمتي مايشبه احد.
حميده: تحجين بزودج الله ربج.
ايريم: والنعم منه، اللي يمشي بدرب الحق لازم يلكي العوض.
حميده: اشوفج مانج بهينه بس لتفرحين منتظرج يوم اسود ينكسر راسج وغرورج بيه.
ايريم: دوام الحال من المحال، أو اكيد وره كل ليل مظلم نهار مشع ومشرق ومبهج للأنفس.
نزلت ياسيم اول مشافتها صلت على محمد وآل محمد، وسحبتها يمها وبقت تجر بشعرها تكرص بأيدها بس من باب الشقه قريت عليها السلام الواضح عمتها نسخه مصغره من ابليس.
مهيائيل: على بركة الله نقره الفاتحة.
دَاسِم: بعدنا بسم الله محجينا شي.
مهيائيل: ميحتاج اخوي وبضمانتي.
ميمون: يلا نتوكل الاسبوع الجاي العقد.
دَاسِم: وانت صفيت وياه!!!
ميمون: خير البر عاجله عميم.
دَاسِم: ياخيررر ياخيررر وازوج بنتي لبن الساقطه.
كمز بيه يصرخ.
تليد: هاااااا شو صار بالغلط، عداك العيب انت الشريف العفيف مو انت وبطلك اربع وعشرين ساعه ونايم بحضن الحرام للصبح، على بالك مادري بخياسك كله يدَاسِم، تره انا كلكم حافظكم واعرف مصايبكم وشنو تسوون لتخليني بشكوى وحده الغي وجودك من الكوكب، احترم نفسك وامي تاج على راس اليرضا والمايرضا، ويلا فضوني وراي شغل.
مهيائيل: عجبتني حبيتك.
تليد: تقره الفاتحه لو شلون؟
رائف: اذا تريد نقرالك سورة الكوثر بما انو قصيرة وانت عندك شغل مانريد نعطلك.
تليد: اريد اختي تجي وياي.
مهيائيل: ضيفه أبيت اخوها حتى يوم الزواج تعرف ياسيم ماعدها اخت ومحتاجها وياها بهيج فتره.
تليد: زلم احنه تربات امي والنعم من تربيتها مانخلف الوعد خليك واثق.
مهيائيل: زلمه وسويها راسك اكسره اذا فكرت تخلف وعدك وياي، مو هيته تنطي كلمه للساحر.
تليد: اطمأن بنت العم بأيد امينه.
مهيائيل: كلمتك ماتاكل عندي خلي تجيني بيوم دمعتها على خدها ارجعك لبطن امك وانا عد كلمتي.
تليد: ماتشوف دمعتها عمرك كله ثق بكلامي.
مهيائيل: والاسبوع تجي يوم زياره لهنا واذا ماكدرت تجيبها اجي اخذها بأيدي.
تليد: أوامر ثانيه؟
مهيائيل: خليني انطيك سر محد يعرفه بس الكاعدين، انا شخص ما اتعامل بالكلام ولا بالتهديد بايع الدنيا بدينار وارخص منه اذا اكو، اسطرك سطره اخلي اسمك تنسى.
رائف: وطك اصبع بنص الفاتحه.
ميمون: وتهلهل وانت نايم.
دَاسِم: الإخوان حافظين اخوهم عدل.
مهيائيل: ويوم لتليد يحفظني هم سهل انا مايستغرق بيه هوايه وقت.
تليد: خلصني بعد شكو؟
مهيائيل: احنه مانتعامل بالفلوس اهم شي راحة البنيه بس علمود هيبتها وعزة نفسها راح اخلي 50/50.
تليد: خو ماكو شي ماخذ جكساره لو سنتافي!!
مهيائيل: اختي اغله مو زين مناسبيك لازم تكون شاكر النه.
تليد: وبعدين؟
مهيائيل: العقد الثلاثاء عقد المحكمه الأربعاء الثنين اللي وراها العرس ودبر نفسك.
تليد: احتاج شهرين بعدني كل شي ممكمل ماكدر ازوج حالياً اعذرني.
مهيائيل: اداينك ومن يصير عندك رجع، إخوان احنه تطلع من بيتها تدخل لبيتها ماكو فرق.
تليد: لهاي الدرجه مسترخصيها ولكمتها صعبت عليكم وتردون تخلصون منها؟!
مهيائيل: شايف اول ماتدخل من باب البيت؟
تليد: ايي.
مهيائيل: اكو حمام بالباب بيه نعال مميز عندي لأن صارله سنين وهو وياي عشرة عمر اكوم اخليه بحلكك طول بعرض اذا تجرأت تحجي عنها كلمه، وخليها بعقلك واحفظها زين اني أكدر احبسك بالسجن والعن ابو خيرك وماكو واحد يطلع وراك ويكول على عيني حاجب، بس زواجها منك هو درس وتعذيب ألك حتى متفكر الغلط ينعاد مرة ثانيه.
تليد: ههه عجيب امرك تحبها وتهتم بيها وتنطيها بسهوله لعدوك!!
مهيائيل: لأن اعرف نفسي العن والديك اذا مسيتها بحجايه.
تليد: خوش عود، خلينا نقره الفاتحه.
مهيائيل: بسم الله الرحمن الرحيم...
كاعدين وندك الباب صاح بصوت عالي قبل مايدخل.
مهيائيل: يا الله.
ترانيم: فوت داده فوت ماكو غريب.
مهيائيل: لا اكو الشيطان.
ترانيم: لا هذا من اهل البيت احنه الغربه.
مهيائيل: اي ياسيم بابا تعرفتي على ام خطيبج؟
طفرت هي من مكانها.
حميده: بنت عمك خجوله ماسمعنا صوتها لحد الآن ماعرف منين مستحيه واني بمقام امها ان شاء الله.
مهيائيل: صحيح تشبهيها نفس الطينه.
حميده: شنو قصدك؟
مهيائيل: تعرفين قصدي ام تليد.
حميده: احنه راح نصير أقرباء وبينه نسب شوكت ناوي تذوب الثلج وتصفي الكلوب؟
مهيائيل: ماتصفى حتى ربج ياخذ أمانته.
حميده: السوالف صارت قديمه وكبرنا عليهن حيل والناس راحت جوه التراب وربك يحب الستر والعافيه.
مهيائيل: الثأر مايموت وانما يتأجل والدليل جيتج لهنا وسببها، المهم حديثي هو وي ياسيم انطيت تحذير للمسعد وهسه دورج،
بنيتي مدللة تطلع اميره من بيت ابوها تصير ملكه أبيت زوجها، اللي يغثها ويزعلها ويحرك كلبها ياويله وسواد ليله أوله شرط آخره نور حتى محد يكول محجيت ومنبهت، وهاا انا ما أمشي بصوتها المتغير وعيونها الذبلانه لااا امشي بالسحر والشياطين مالتي يم بيتكم وبنصه تعيش شنو يصير تجي تكلي وياريت كلامي واضح.
حميده: حسيتك تهدد شنو السالفه هسه قرينا الفاتحه هاي من اولها يبن الاجاويد!!!
مهيائيل: اي من اولها لأن اعرف العرك دساس ولابد الدم القذر يرجع يتجدد وتصير سالفه منا منا وتتأذه، وبعدين اللي ضاحك عليج وكلج انا ابن اجاويد ووكع لخالك وعمك ومسحها بشارب افلان هذا يمضرط لأن احنه ثنينه نعرف ابوي واحد **** والأخلاق بعمرها مامرت منه ولا شم ريحتها.
صفكت أيد بايد وطلعت من صاحلها ابنها بدون متحجي شي بس وكفت بالباب تنتظر تجي بتها اللي اول مكلتلها تتحرك حجت وياها.
مُزن: ماروح وياكم اريد ابقى يم اخوي الجبير كم يوم واتعرف عليه اكثر.
ابتسامه رضا على شفايفه حسيته انتعش من كالت هيج، بالحقيقه اشوف بعيونه تقبل وحنيه على اخته بشكل عجيب، على رغم ادعائة كرههم ويريد ينتقم ومن هاي السوالف بس يذكرها بوقت الأكل ويسأل عليها كل شويه من ميلكاها موجوده يمنه، اني اعرف مشاعر ساحر القرن داخليه وبالصعوبه يعبر عنها بشكل واضح وتيقنت من احساسي من طلعوا كلهم وراحوا وبقت مُزن واكفه يمي اجه تقرب من عدها وشبك أديه وره ظهره كايل بهدوء.
مهيائيل: كل شي انزرع بعقلج من الطفوله لحد الآن هو جذب، اني مجنت اعرف بيج من زمان ولو مو بحثي المتواصل على الشخص اللي يريد ينتقم من عدنا ويأذينا مجان عرفت انتوا عايشين، معرفتي باخوج من كم سنه وعرفت عنده اخت بس مجنت ادري انتِ اختي فكرت امج تزوجت بعد ابوي وخلفتج، لو عندي علم بيج ثقي مستحيل اتخلى أو اربيج كدام عيني، لأن انتوا مالكم علاقه بلي سوا ابوكم.
نزلت دموعي على حنيته وعلى فكرة شكد ضيعنا سنين من عمرنا بالحقد والغل والانتقام ومفكرنا نعيش وي إخوتنا من ابوناا وهذا كله بسبب امي، حضنته وهاي جانت لحظه عاطفيه بحته حسيت بيه اب من صدك على رغم اخوي بعمره ماقصر بس هذا شعور مختلف ومميز واله طعم ثاني.
مسحلي دموعي وبتسم بوجهي مكمل.
مهيائيل: من اليوم اعتبريني مثل ابوج اي شي تحتاجين تعاليلي، واضح؟
اشرتله براسي بمعنى واني فرحتي ما انطيها لأحد اول مره احد يحن عليه من بعد اخوي الله يحفظه وهذا اكيد يخلي مشاعري تتغير لأخواني الجدد.
رائف: الله ربك الحضن صاير بس لناس وناس.
ميمون: عوفهم وتعال احضني اكفي ووفي وداعتك.
رائف: ماريد حضنك ولج زُمردة تعالي شوفي حبيبج وين شمره الوكت كام يتوسل بالعالم تحضن بيه.
مهيائيل: نجب وكوم بدون مسلته.
رائف: اخطبلي عليك العباس.
مهيائيل: استغفر الله هم رجعنا لنفس السيرة.
رائف: متدين عمت عينك، عوفك من هل حجي عمي مليتتتت زوجنيييي لا اكتل روحي.
مهيائيل: خابرهم واسألهم ياوقت فارغين نروح نشرب يمهم كهوه.
ركض وطفر لحضنه دفعه مهيائيل وهذا ماخذه الواهس خله أصبعه على حلكه وكام يهلهل بصوت عالي.
رائف: الليله حنته وباجر يزفونه، كلللللللوووووووووووووووششششششششش، باركولي راح اعرسسسسسسسس.
مهيائيل: بدت رحمة الله، شيخلصك بعد المسجل شتغل وماكو دكمه اطفيه.
وهم ديحجون لفت انتباهي ضوه يطلع من غرفة السحر، لزمت كلبي بأيدي هاي الغرفه دائماً ظلمه منو بيها وشنو يسوي؟
تقربت منها بهدوء وفتحت الباب ماعرف شنو خلاني اخطو هيج خطوه بدون ماكول شي لمهيائيل وبشجاعة مبالغ بيها من عندي خليت أيدي على يده الباب قبل ما افتح سمعت صوت حركه وهذا ثبت شكي اكو احد جوه فتحت الباب سريع بدون ما ادكه وكلت بتساؤل ممزوج بصدمه:
انت؟!
يتبع..
البارت اكثر من 4187 كلمه..
تفاعلكم صاير ميسوي واهس عيناي انتوا، تعليقاتكم بين الفقرات وتصويتكم شمعاتي للبارت.
تصبحون على الف خير وعافيه.
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!