للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة(زهراء احمد)
_________
اشمعزك وأنت لبّ اللب
شملذك فاهي ومرطب
يَنساوة بچر وبتوم
من تالي العُمر
والشايب محَدب
يواهس غجر من تحب
يلون الشمس والمَغرب
ورگ نعناع چنك
فايح مشرعب .
___
Flash back
ترانيم: عزه بعينج مصخمه شنو هذاااا؟!
جاوبتني ودموعها على خدها مطر ورجفتها متكدر تسيطر عليها مع هذا ماكسرت خاطري.
ياسيم: عمه والله العظيم انضحك عليه مجان قصدي اسوي هيج ابدد.
ترانيم: سود الله وجهج ان شاء الله، جايتني زركه من فوك ليجوه وتكولين بريئه لو جنتي ساقطه شتكولينننننن!!!
ياسيم: بس خليني افهمج الله يوفقج قبل لتحكمين عليه.
ترانيم: ماكو ماسمع منج شي هسه كبل اصيح مهيائيل يشوفلج حل ماكدر اورط نفسي وياه اذا عرف بيه اعرف وساكته يموتني بصفج.
ياسيم: الله عليج بداعة اعزاز كلبج لتصيرين سبب موتي، ساعديني ابوس ايدج.
ترانيم: اذا ماعجبني كلامج اروحله.
ياسيم: موافقه بس اسمعيني حبابه الله يرضا عليج.
ترانيم: لا والله مايرضا ماطول مكابلتجن من الصبح لليل.
بقيت مصدومه من حجتلي مكدرت انطق حرف واحد غير عيني عليها ودموعي وياها على نفس الونه نبجي حصلت مني ضربتين قويات وعفتها وطلعت، حاولت قدر الأمكان أسد السالفه وماحجي بيها الشرف هو والركبه عدنا اذا طار واحد يطير الثاني ومانطاني كلبي افرط بيها وهي بعدها جاهل حتى لو غلطت يبقى كلبي رجيج وماتحمل سفك الدماء عشتوا.
مرت يومين سم عليه لأبيه افتح حلكي واحجيلها ولا أكدر اضم السالفه اكثر واني اشوف بعيونها اسأله هواي قررت انعزل عن الكل حتى محد يقره عقلي واني اعرف مهيائيل من نظره وحده يعرف الاكو والماكو مو لأن سحار بس هو هيج فطن من يومه،
نايمه بأمان الله وكل عقلي خلصت المشكله بعد ما مر يومين ومحد حجه بالسيرة حادث وصار ونسدت أبوابه عود اذا نخطبت نكدر نعالجها وينسد الموضوع بينه احنه الثنين، مجنت حاسه انو هيج شي خطير ممكن ينكشف بلحظه وحده ويخرب كل مخططي وتنكلب حياة العائله جحيم،
ضرب، اهانه، تعنيف، ذل، عيشها هذا الأسبوع وكأن هي بنار جهنم مارحمها واني من داخلي اعرف عدل كل شي يسويه بسبب حركت كلبه لأن جان معتبرها بنته مو بنت عمه،
خفت لايزيد عليها اكثر وقررت لازم اخليه يسمعها اذا مو برضاته غصب عنه، مجان موجود بالبيت وكلها نامت الدنيا نص الليل وظلمه واني كاعده على الدرج منتظرته يجي، وراية الله بيضه شفته يطل عليه بهيبته شكد ماكول احبه واحترمه وقدره قليل بحقه على رغم هو أصغر من عندي بس معزته بكلبي معزة بنيه لأبوها،
عقد حاجبه واجه يمي والقلق باين على ملاحمه بوضوح.
مهيائيل: بيج شي؟
شمكعدج فوك الدرج بهيج ساعه؟!
حجيت واني عاقده النيه لو يجي وياي ويسمعها لو يجي مابيها مجال تتعاقب اكثر من هيج والعذبها يمشي بطوله بالشارع.
ترانيم: انت.
أشر على نفسه بتفاجئ.
مهيائيل: اناا!!
ترانيم: لعد امي، منو غيرك مطيح حظي هذا الأسبوع كله؟
مهيائيل: ترانيم تعبان وراسي يريد ينفجر ومريتي وحدها نايمه خليني اولي والصباح رباح، عود احجي بذيج الساعه افلامج، بشرفج وخري عني مابيه حيل اسمع كلمه وحده.
ترانيم: لازم تسمعني مو بكيفك هي، البنيه صارلها....
مخلاني اكمل قاطعني وهو يخلي أصبعه على حلكه.
مهيائيل: هششششش، كتلج طالعه روحي خليني انام بهدوء لا هسه اطلع جنازتها من البيت، حدي هنا وصبري كله خلص مابيه مجال بعد.
خطه خطواته رايح شجعت نفسي وحجيت السكوت عن الحق حرام مايصير.
ترانيم: كاعد تعاقبها بذنب غيرها، متوقعت الشيطان يمشيك لهاي الدرجه وسفة وانت تربات زاهده وتظلم انسان بريئ.
اسمها وحده يخليه يهدء لو يثور انت وحظك وهاي المره شمرت الزار وماعرف اذا اربح لو لا.
مهيائيل: شلون يعني ظلمتها مافهمت؟
جانت محتاجه فلوس وراحت باعت نفسها علمود تعيش؟
ابنها الوحيد عنده مرض خطير وماكو علاج اله الا بهاي الطريقه؟
حياتها متوقفه على هاي العمله؟
فهميني اريد افتهم اعتبرني واحد مطي ارعن ظالم مثلاً وكولي شلون يعني ظلمتها؟!
هاي عود انتِ اختي وتعرفيني وعايشه وياي سنين وتدرين بيه وبطبعي وهيج تكولين مالوم ايريم باجر عكبه اذا نتفضت عليه وكالت ماريدك اذا اختي وسوتني ظالم ماعتب على اليعرفني من يومين.
ترانيم: لتحور كلامي كلت لتظلم البنيه محجيت شي عن الظلم، انت واصل مرحله تريد بس حجه حتى تنفجر بوجه العالم.
مهيائيل: عفيه ولتصيرين انتِ هاي الحجه، خليج بعيده عنهن تره كل اللي تقدميه هسه بالنهايه ايدج يعضنها وأخذي من عملتهن باخوج مثال.
ترانيم: البنيه ماسوت شي برضاها، ياسيم نغصبت مهيائيل تعرف شنو يعني نغصبت؟
ضحك بصوت عالي مخلي ايده على عيونه يمسحها متوقعته لهاي الدرجه ماعنده ثقه بيها بعد.
مهيائيل: كلتي غاصبها؟
ههههههههههههه، خرب يومج ولج وحق ربج مالي خلك وضحكتيني عاشت ايدج، وهسه عذريني اروح انام تصبحين على خير.
مشى عني صاعد صرخت بيه بصوت عالي.
ترانيم: تليد هو سوه بيها هيج.
التفتلي وعيونه حمر ويباوعلي بغضب ركض إليه ولزمني من متوني يهزني بقوته.
مهيائيل: عيدي مسمعت؟
ترانيم: تليد، ذلك الولد الأصغر منك بسنه هو اغتصبها.
مهيائيل: وليش؟
شوصلهااا يمه!!!
ترانيم: مايصير نحجي هنا لا احد يسمعنا تعال وياي للغرفه نسولف وهي تشرحلك الصار بالتفصيل.
منتظرني ركض لفوك واني رحت وراه سريع فتح الباب فزت من النوم حضنت نفسها وكامت تبجي وتشهك.
ياسيم: والله ماسويت شي لاتضربني حباب ابوس ايدك.
راح يمها وحضنها ماصدمني لأن اعرف بيه شكد يحبها صحيح هي محرمه عليه بس معزتها داخل كلبه جبيره.
كعد يمها على الجربايه وخله ايده على راسها يحجي بحنيه وهاي الطريقه يستخدمها حتى يسحب الكلام من المقابل، يحسسك بالأمان وياخذ اللي يريده بسهوله وبدون تعب.
مهيائيل: ملعون الوالدين شلون وصل يمج؟
ياسيم: راح احجيلك السالفه من البدايه، تعرفت على ابنيه ويانه بالمعهد سمعت منها ماعدها احد بالبيت وابن عمها هو اليصرف عليها، فجانت تطلع وتطب وياي واشاركها بكُل شي حتى صارت صديقتي المقربه شويه شويه كامت تحجيلي عن علاقتها وصداقاتها وتكلي الموضوع عادي مجرد سوالف بين الشباب والبنات، دخلتني لكروب بالواتساب جماعي كالت مال خريجين حتى يساعدونا على نمط الاسئله ومن هاي الأمور اني قنعت بكلامها لأن اثق بيها حيل وهي مقربه من عندي وبالأضافه كلش مؤدبه ومحتشمه من بره مجنت اتخيل داخلها قذر،
المهم مرت الأيام وصارت عندي صداقات هوايه بس متعدت خارج الكروب حتى مره جنه بالمحاضرة وكلش تخربطت وطلبت من عندي اروح وياها للبيت متكدر تأمن على نفسها وحدها وي ابو الخط وافقت لأن حسب كلامها ماكو بس عمتها وابنها ميرجع هيج وقت واني بس اطمأن عليها وارجع،
مشيت وياها، بالسياره زادت حالتها اكثر كلتلها نروح للمستشفى مقبلت ومكدرت اعيفها وحدها تمشي نزلت وياها ودخلتها للبيت مجان اكو احد شويه هدأت وطمأنيت للوضع، دخلتها للغرفه ونيمتها على الجربايه وبقيت يمها شويه من حسيت عليها نامت سحبت نفسي وطلعت بهدوء والمصيبه لاكتني بالباب واحد معضل لابس كله اسود تقرب من عندي ولزكني على الحايط مكدرت انقذ نفسي من عنده حاولت هوايه بس جان اقوه من عندي سوه كم حركه قذرة ورفعلي ملابسي لمساته وحركاته جانت كلش جريئة خفت ورتعبت وهذا كله هو محجه ولا حرف دفعني على الكاع وصار فوكي ضربته برجلي وبأيدي بجيت وندبت حظي شكددد وندمت على الساعة السودة الفكرت بيها اسوي شي زين،
حسيت انو خلص بعد مابيه حيل اقاوم ودموعي اخذت مجراها على خدي نفتح الباب وطلعت من عنده تضحك وكالت بمكر وياه:" خلص الفلم عاشت ايدك "
عافني وكام وهي نزلت لمستواي ضربتني على وجهي خفيف وكومتني، ماعرف منين اجتني الشجاعه وطلعت من البيت اركض صعدت بالخط ورجعت وجانت من هذا اليوم بداية معاناتي وياهم.
مهيائيل: شنو سوالج؟
ياسيم: بقى يبتزني بفلوس واني انطيه مر شهرين هيج حتى آخر مره اتصل بيه بالليل كال باجر اجي اخذج الصبح بوقت المحاضره اني اخاف من عنده حيل لأن مهددني بس احجي كلمه متعجبه ينشر الفيديو والصور ويفضحني.
مهيائيل: شلون وصلتي لتليد؟
ياسيم: جنت طالعه لابو الخط وكفت سيارة برأس الفرع وجانت مالته من شفت خفت حيل من عنده ليسويلي مشكله كدام العالم صعدت وشويه انطاني علبه ماعرفت شنو بيها وياها كلينكس وكلي اخليها على خشمي ماعرف شكد مر وقت ومن فتحت عيني شفته واكف ونظراته كلها شماته وحقد بدون ماعرف السبب.
مهيائيل: كملي شنو سوالج؟
ياسيم: اللي صار.
مهيائيل: والفيديو اللي شفته؟
ياسيم: مجنت بوعيي والله.
مهيائيل: شلون يعني مجنتي بوعيج، شربج كبسله مثلاً!!
ياسيم: يمكن.
مهيائيل: راح تسودنيني احجي وفضيهااا.
ترانيم: يمعود لتصيح شبيك متشوفها شلون ترجف.
مهيائيل: هسه ادكلها معزوفه وشدلها وصله حتى اغير مودها ست الحسن، احجي خلصيني.
ياسيم: شربني حبايه بس ماعرف هي شنو.
مهيائيل: اي.
ياسيم: ورجعني للبيت وراها.
مهيائيل: ايي.
ياسيم: وبس هيج.
اجاها راجدي خدر خدي من وحده، مطول هوايه واجاها الثاني والثالث سواهن اربعه على كل خد ثنين ويحجي بغضب جبير.
مهيائيل: الأول درس الج حتى متثقين بأحد، والثاني مدخلين بيت متعرفيه، والثالث حجي وي الولد ماكو لو جان ابن عمج فاهمةةةةةة؟
اما الرابع هذا حق تعبي وياج وجازيتني بنكرانه،
حضري نفسج أزوجج عن قريب ودراسه بعد ماكو واللي صار من ايدج لتلومين احد بيه.
عافها وطلع، ثاني يوم الصبح ماشفته واحنه نسوي غده دخل ودخلت وراه بنيه شابه عيونها خضر وتخبل ماتشبه العائله ابدد، كلبي نغزني معقوله يسويها مهيائيل ويزوج على ايريم؟!
والصدمه جانت البنيه جايبها فصليه، المسكينه من صدمتها وكع الماعون من ايدها وعيونها بسرعة دمعت وعفاتنا وصعدت فوك سريع، هو من شافها هيج صاحني ابقى يم هاي الكتكوته وصعد وراها يركض، اي ادري شموازيك تسوي هيج عمله اذا تحبها هلكد.
شكد ماريد احجي لو ابجي حتى اشرح اللي بداخلي ماكدر، بيا زمن عايشين ويجيب على راسي فصليه ليش اني شنو سويت حتى اجازه بهاي الطريقه؟!
تقبلته بكل عيوبه وحاولت اسحبه للطريق الصح بكل ماكدر، عائلته وشياطينه تحملتهم كلهم، اسمع يوميه كلام يسم البدن من الجميع وساكته ومتحمله وما احجي يمه حرف واحد لأن اعرف بيه يجي تعبان من الشغل ماريد ازيد همه همين على درايتي لو حجيت يطردهم كلهم بره، اعرف يستاهل واللي سويته كله من كلبي ما انكر ابدد ردت بس يحترمني ويقدرني ونعيش حياة سعيدة كأي ثنين مزوجين ميجيب على راسي مره ثانيه ولا فصليه هم احنه بيا زمن ويسوي هيج لهاي الدرجه ماكو خوف من الله بعد!!!!
قسمت مستحيل ابقى يمه لحظه وحده فتحت الكنتور وطلعت ملابسي بنفس اللحظه دخل ماباوعتله اصلاً وعيوني مسكتت دموعي تنزل وامسحها ومُصرة على قراري دقيقه بهذا البيت ما أبقى ونتقاسم اني وياها ايام واتحمل يتغزل بيها لو يكعد يمها كدامي لو يروح يمها واني اكل بنفسي على شنو اعيش هيج شعور ومنو جابرني اصلاً،
اجه يمي اني اطلع بالملابس وهو يرجع بيهن حركلي كلبي أضعاف رفعت عيني خزرته ابتسم بوجهي ودزلي بوسه بالهوه عصبتني حركته حيل وعطت بيه.
ايريم: وخر عنيي.
مهيائيل: له له له، اكو وأحد يوخر عن روحه؟!
ايريم: كلاواتك بطلها متمشي عليه.
مهيائيل: هسه صار كلامي كلاوات؟!
ايريم: اي ويلا وخر عني اريد اكمل شغلي.
مهيائيل: ياشغل هذا اللي تكملي؟
ايريم: اعتقد نظرك قوي من شغلك على الشموع والدنيا ظلمه، وإذا ماعرفت عبد الرحمن موجود اسأله.
مهيائيل: صاير خبيث ميحجي شي يضم الأسرار، انسحر الجني مثل صاحبه.
ايريم: خلي احسن على الأقل ميدور فصليات.
مهيائيل: لا هيج ضغطتي على الوتر الحساس واني رجال ماتحمل اشوف مرتي ضايجه ومقهوره وما اسوي شي حتى اراضيها.
ايريم: اي مبين تخاف على مشاعري حيل الله يسلمك.
مهيائيل: هسه مو كافي عوفي الهدوم شكيتيني وانتِ طلعين واني ارجع تعبتتتت.
ايريم: محد جابرك وخر عنيي.
مهيائيل: شلزكتي بيهااا وخر أو وخر عني اي ادري ماكو بالاعدادات كلمه غيرها!!!
شمرتهن من أيدي وباوعتله بحده: شنو رايد كول من الأخير وخلصني.
مهيائيل: اريدج.
ايريم: واني ماريدك.
مهيائيل: من شوكت هذا الحجي؟!
ايريم: من هاي اللحظه.
مهيائيل: ينطيج كلبج تعوفين ساحر القرن!!
ايريم: مثل ما انطاك كلبك تجيب فصليه على راسي.
مهيائيل: جوه رجلج.
ايريم: استغفر الله اني ما أقبل بذلة بني آدم حتى لو قاتل أبوي.
مهيائيل: تبقى شهرين وتروح لتهتمين الها اعتبريها ماموجوده.
ايريم: واني هم اعتبرني ماموجوده ولا كأن تعرفني وخليني ارجع يم اهلي معززه مكرمه على الأقل اهناك محد يخلي على راسي ضره.
تقرب من عندي وعيونه بعيوني ظهري على الكنتور وهو وگف گدامي، نزل راسه قريب من عندي يحجي بهمس.
مهيائيل: تغارين؟
ايريم: له له له، مو ايريم اللي تغار من واحد مامعبرها.
مهيائيل: ليش اني اي واحد؟
ايريم: انت شتكول؟
نزل ايده لكلبي وعينه رفعها لعيني وكال بمكر.
مهيائيل: هديه ميصير يدك بعنف كلما اصير قريب منه مو زين على صحتج بعدين.
ايريم: كلبي يدك براحته معليك انت بيه.
مهيائيل: منين جايبه هذا اللسان؟!
ايريم: من عشرتي وياك داده.
مهيائيل: شنو رأيج نصرفها خمستين؟
ضحكت غصب وراحت هيبة الزعله بس منطيته مجال ودفعته من صدره من شفته ضحك هو هم،
مبتعد بالعكس صار قريب اكثر، وكال بنبرة تمليها المشاعر.
مهيائيل: اني كتلج من قبل من بعدج تحرم عليه نساء الكون تتوقعين ساحرج يخلف بوعده؟
نزلت دموعي وحجيت بشهكه: أنت كلت هاي فصليه ومتحملت اشوفها واكفه وراك وخاصه هي شكلها مجذب حيل الأفكار كلها تجمعت بعقلي ساعتها.
مسح دموعي وعينه بعيني يحجي بأبتسامه.
مهيائيل: جبتها اكسر راس اخوها بيها وحجيت هيج تخويف الها لا أكثر لأن اعرفها تعرف مكانه وين والنساء عاطفيات متكدر تلزم نفسها وتخابره ومن يجي ويركع جوه رجلي واذله ساعتها ترجع لبيتهم.
ايريم: يعني مراح تعقد عليها؟
مهيائيل: شعقد عليها ولج اختي هاي.
فتحت عيوني بصدمه: اختكك!!!
مهيائيل: اي اختي من المكبور.
ايريم: وين جانوا لعد؟
مهيائيل: ابوي اتبره منهم لأن اهله هددوا اذا ميطلكها ينفوا من العشيرة.
ايريم: وليش؟
مهيائيل: عافت اهلها وشردت وياه والبنيه الشارده عار على العشاير ومحد يقبل بيها.
ايريم: وعافها؟
مهيائيل: له له له، حضرته جان كلب وفي مكدر يعرفها للأسف وبقت علاقته بيها وزادت اكثر من حبلت بتليد.
ايريم: وأمك؟
مهيائيل: الها الله تشوف وتسكت اصلاً جابها اكثر من مره النه وينيمها على جربايتها وهي دموعها تشرح حزنها بس متكدر تحجي لو تعترض.
ايريم: بما أنو سالفتهم قديمه شنو رجعهم هسه؟
مهيائيل: الورث، كبروا الزعاطيط وصاروا يدورون ورث عبالهم ياخذون مني فلوس وعيونج درهم احمر مانطيهم.
ايريم: وليش جبتها لهنا؟
مهيائيل: مو مال وكفه هيج وبنص الهوسه، تعالي نرتب الغرفه وننزل نتغده واحجيلج كل شي الظهر.
ايريم: على اساس اصبر.
مهيائيل: تصبرين ماكو حل ثاني حُبحُب.
رتبت الغرفه ونزلنه لازم أيدي ابتسمت على شنو هاي الحركه وهي اخته اصلاً شيغور!!
دورت عليها جوه ملكيتها تفاجأت وين راحت والصدمه بالصاله لازمتها رولين وحش سوالف هاي من شوكت حبابه وتضحك وي العالم!!!
مهيائيل: مُزن تعالي يمي بابا.
بابا مو قبل شويه جان يحجي عليهم!!!
مهيائيل: اسمعني زين وحفظن كلامي عدل مُزن هنا حالها حال ترانيم وايريم اي وحده تتجاوز وياها لو تسمعها كلمه متلوم الا نفسها راح تترتب الها الغرفه اللي بداية الصاله وتنام بيها حتى نشوف الأمور بأي مسار تتجه، واضح كلامي؟
رولين: من عيوني اصلاً اذا تريد انيمها بغرفتي وليهمك.
مهيائيل: حتى تصير **** ناقصني بنات شارع انا.
رولين: شنو قصدك عيوني!!
مهيائيل: عمت عيونج ان شاء الله كولي آمين.
تالين: مهيائيل صدك هاي فصليه؟
مهيائيل: وليش اجذب عليج مثلاً؟!
شنو يعني اريد اشوف معزتي بكلبج تغارين لو لا؟
تالين: مو ما اشوف مرتك ضايجه واجت على راسها ضرة تشاركك بيها.
مهيائيل: محد ياخذني من ايريم من هاي الناحيه اطمأني وخلي رجليج بمي بارده.
تالين: اي نشوف بعدين.
مهيائيل: انطيني نعال بعد ماتحمل مغثتها اكثر من هيج.
لزمت ايده عناد بيهن وحجيت بدلع.
ايريم: هدي يروحي ولتهتم بكلام المسمومات، التس كثران بهاي الفتره.
ضحك ورحنه اني وياه نتغده وجتمعت العائلة الكريمه الناقصها ميمون و دَاسِم الاربع وعشرين ساعه مختفين صدك احسهم مرات جنانوه فجأة كدامك يكمزون وفجأة ماكو، واللي محلي الكعده وهذا الوقت يصير مينمل بوجوده بده يسولف.
رائف: اي خويه ربك الله قابل مثلنه احنه ولد البطه السوده، اول وحده ماطول شهرين وتزوجها والثانيه راح الصبح رجع الظهر هي وياه بس اني من كتله اخطبلي اريد اعرس ماقبل.
مهيائيل: انجب ولك هي المارضت تريد ابوس رجليها!!!
رائف: صوجك بآخر لحظه قدمت الخطبه حقها ترفض هي لعب خو مالعب.
مهيائيل: من طلعت هيج معدل وتفهم بالاصول شبيك بعد تمسلت؟
رائف: مو خايب حتى خط ماتفتح عليه خطيبة اخوك شكتني شكتين.
مهيائيل: واني الثالثه اذا ماسكتت.
واحنه دناكل ندك الباب بقوة طلع رائف يفتحه شويه وصار صوته يرعد دخل بغضب وصاح بصوت عالي فززها كلها، انتبهت على شكله اسمراني ملموح، جسمه مرتب وشكله متعوب مبين راجع من الشغل،
تليد: العن والديك اليوم شلون تتجرأ تدخل لنص بيتي وتاخذهاااا وتخلي امي تلطممممم!!!
مهيائيل: صوتك ولك لتعليه على صوتي ادبسزز.
تليد: اعليه ونص واكسر راسك هم لتشوف نفسك كادر على ذولي البعران معناها تكدر عليه فاهمم.
مهيائيل: اكدرلك ودوس راسك بالقندرة ومحد يطلع وراك، عمامك متبرين من عملة ابوك وخوالك من امك، انت بنظر العرف ابن غير شرعي محد معترف بيه.
تليد: ههههههاي، ولك على منو تلعب مو جاهل انا وتكدر تستفزني بكلمتين، العقد مصدق بالمحكمه صحيح بس سيد بس موثق وبالقانون اخذ حقي منكم.
مهيائيل: ههههههههههههه، عاشت ايدك ضحكتني، اعد بله مره ثانيه خليني اعيد الضحكه،
سمعتوا شباب بنات؟
يكول حقه بالورث، حقيش بابا؟!
البيت والعماره والسيارات كلهن بأسمي حصراً واذا متت يرحن لمرتي حصراً يعني انت والجميع مالكم حق بيه وفي حال ربك كتب ومتنا اني ومرتي سوه الاملاك تروح لدار أيتام اعرفه يعني ايس من مهيائيل درهم رصاصي متاخذ، وإذا تريد ورث من ابوك فذلك موجود بالمكبره روح اخذ الجفن مالته اذا بقى موجود وما اكله الدود.
تليد: مو بكيفك القانون يحكملي بالاحقيه هذا البيت مال ورثه شلون صار بأسمك شرعاً وقانوناً؟!
مهيائيل: لأن ابوك جان مطي مربوط من أذنه وضحك عليه دَاسِم اخوه ماموجود هنا دايح يجي غير وقت، وسجل البيت بإسمه واني ضحكت عليه وأخذته وصار ملكي شرعاً وقانوناً، وبهذا انتوا مو ورثه الجميع.
تليد: مستحيل ماكو هيج حجي ما اقتنع بكلامك.
مهيائيل: اي طبك مرض لتقتنع.
اثناء الحديث الصادم اله بس هو لأن الواضح الكل يعرف بالموضوع لكن هو الوحيد المعلق نفسه بأمل كاذب، دخلت ودموعها على خدها ركضت لحضنه لفها بالكامل وكأن اب حاضن بنته منظرهم كسر خاطري حيل.
تليد: كافي لاتبجين هسه اخذج ونرجع للبيت أمسحي دموعج يروح اخوج وعمره.
مُزن: وين رحتتت من البارحه اتصل عليك وانت ماكو حتى امي ارتفع ضغطهااا؟
تليد: جنت ادور على شغل بغير منطقه وهسه رجعت للبيت ومن شفتج ماهي اجيت لهنا.
مُزن: خلينا نروح ماريد ابقى اهنا حباب.
تليد: ماتبقين انتِ مكانج يم اخوج يروحي، بس كافي دموع شلعتي كلبي.
مهيائيل: اذا خلص هذا المشهد العاطفي خلي مُزن تروح وي ترانيم تجهزها العصر يجي السيد علمود يعقد.
طفر بوجهه عصبي راد يضربه بس لزمه رائف.
تليد: اختكككك خلي عندك شويه غيره عليهااا.
مهيائيل: ماعندي غيره انا أنسان بايعها للنعال.
تليد: اللي تسوي حرام شلون تعقد على اختك تخبلتتتت!!!
مهيائيل: اني والحرام عشرة عمر صدكني من الولاده.
تليد: انت تكبسل؟
مهيائيل: ماكو داعي اخسر فلوس من كد ماكابلت هاي الوجوه طار عقلي وصرت شخص فاقد.
تليد: بهاي مو مشكله كم بوكس على دفره ويرجع لمكانه وصلت.
مهيائيل: ابن امك تعال.
هجم عليه وصارت بوكسات واحد يضرب بالثاني ناقصهم بس حكم أخير شي اجه رائف ودفعه.
رائف: بشرفكم فهموني اللي صار تره راسي نسطر، اخو منو واخت منو وانت منو اصلاً؟!
مهيائيل: تليد ومُزن اخوانه من الأب، موضوعهم نسد من مات المطي مالتنا ماسمعنا عنهم خبر، بس رجع انفتح من جديد بعد هاي السنين مو لأن مشتاقين ويردون يسوون الهم سند وظهر يحتمون بيه من الزمن له له له، اجو علمود الورث عبالهم مهيائيل فاتح مؤسسه خيريه بأسم ملاعين الوالدين.
تليد: احترم نفسك من تحجي وياي لايصير غير حجي.
مهيائيل: شسوي مثلاً تغتصبني؟
رائف: شنو هذا الكلام مهيائيل!!
مهيائيل: هذا الواقع الأخ ماعنده شي يكدر يسويه وياي اترس حلكه تبن بس ينطق بكلمه ويعرفني اسويها والدليل جبته يم رجليني بدون ماتعب نفسي وياه، مثل الجلب اجاني ينبح وهو الممنون، حتى مره ثانيه يعرف المن يسدد السهم وشلون ردة فعل الثعلب تصير اذا وأحد ندك بيها.
تليد: اختي تروح وياي غصب عن الكل واي شي ما الك يمي.
مهيائيل: اني حكي اخذه مربع ومن حلك الأسد ابن ابوك تكدر تكول لا لشياطيني اذا رسمت خطط عليك،
ترانيم اخذي مُزن جهزيها الزلم على جيه.
راحت ترانيم يمها سحبها وخلاها وره ظهره علاقتهم الاخويه ذكرتني بأبيل الله يحفظه إليه.
تليد: وينننن كلت اختي خطوه منا متتحرك رجلي على رجلها.
مهيائيل: خوش اخذي وياج اخوج جهزي هم حتى نزفهم نفس الليله.
تليد: السانك احترممم مو أصغر جهالك اناا.
مهيائيل: الساني يحترم المحترم بعمري كله ماحترمت وأحد ****.
تليد: كول شنو تريد من الأخير؟
مهيائيل: ماريد شي اخذ بالمثل وهذا حقي ونتصافه ومالك شي يمي بعد.
تليد: الا اختي سوي اللي يعجبك بيه بس اختي لاتقرب منها.
مهيائيل: واني اريد اختك.
تليد: غيرتك ماتشتغل؟!
اختك هي هم!!!
مهيائيل: منو يكول هي اختي من الأساس؟
عندك دليل يثبت انت ابن ابوي؟
وطمأن عريسها خوش ولد بس ابن امه وهي تشبه امك إلى حد ما يعني **** بين قوسين.
تليد: تريدنيييي اموتككك على أيدي لو شنووو الفلمممم؟
مهيائيل: موتني بعد العقد أريد اطمأن على اختي قبل ماموت.
تليد: اختي ماتزوج واعلى مابخيلك اركبه.
مهيائيل: تزوج وكدام عيونك وانت الشاهد هم.
من شاف مابيه مجال حجه وياه بهدوء.
تليد: خلينا نتفاوض.
ابتسم منتصر وكال بطلب.
مهيائيل: ايريم سوي جاي.
ايريم: تدلل.
اخذه وراح لغرفة السحوره وترانيم وكفت حارس عليهم كملت الجاي هم طلعوا مبقى هوايه وراح وبقت اخته يمنا منصدمت لأن هاي سوالفه اكيد،
صعدنا فوك اول مسديت الباب سألته.
ايريم: سولفلي اللي صار قبل شويه شنو وشلون ومنين وليش؟
مهيائيل: تعالي لحضني الحديث يصير ممتع من العب بشعرج.
رحت يمه مخليه راسي على صدره وهو يلعب بشعري ويسولف.
مهيائيل: ياسيم اللي معتدي عليها هو تليد عرفت بهذا الموضوع البارحه بالليل والصبح رحت علمود اربيه واجيبه من شعفاته الخابصنه بيهن بس للأسف ملكيته وخطرت على بالي فوراً خطه محبوكه رائعه وبمكان ما اركض وراه اجيبه يم رجليه واني مخلي رجل على رجل ودخن جكاره.
ايريم: معقوله زين ليش سوا هيج بيها؟!
مهيائيل: لأن مكدر يلوح واحد من البيت غيرها عباله اروح ابوس رجليه وكله تزوجها حتى نطمطم السالفه وهو يشرط عليه فلوس وحصه بالورث علمود يوافق، واني راح ازوجها اله وراسه فوك رجليه ويدفع المهر من ملكيته الخاصه ويسوي زفه وعرس وكطع مهر تحجي بيه اهل المنطقه سنه.
ايريم: وخته؟
مهيائيل: جانت مجرد طعم لا أكثر.
ايريم: ليش متخليهم يعيشون اهنا؟
مهيائيل: اللي داس كلب امي ميدوس بيت ابنها ماطول خشمي يشم الهوه.
ايريم: بس هم اخوانك.
مهيائيل: بس مامعترف بيهم وماراح يجي يوم اعترف.
ايريم: راح يصير نسيبك مو بس اخوك لخاطر ياسيم على الأقل ساعدهم.
مهيائيل: اكلج تره اني سحار مو ابو الماليه ووزع وظائف اذا هو ابتدائية ممكل شغلتيش هاي اللي ادبرها اله؟
ايريم: تكدر لتكول لا.
مهيائيل: الله كريم، عوفيني منهم صار اسبوع راسي منسطر وأريد انام شويه شو بلا افتحي ايدج.
ايريم: ليش؟
مهيائيل: تعجبيني من تفهميني بدون شرح.
ابتسمت وفتحت أيدي خله راسه بحضني وبقيت العب بشعره حتى غفى،
الأشياء البسيطه بالحياة هي اللي تضيف نكهه مميزه الها، ماكو حب يكتمل بدون اهتمام واحترام وثقه، والأهم من عدهن متخلي سر مخبه عن الطرف الثاني، جبران خليل جبران يكول (بين منطوق لم يُقصَد، ومقصود لم يُنطَق، تضيع الكثير من المحبة)
لو اليوم مابرر تصرفه جان هسه اني وياه كل واحد بمكان، احب العلاقه المايستمر بيها سوء الفهم ولحسن الحظ زوجي مثل تفكيري.
___
طلعت من البيت كلي حماس واخيراً راح اداوم واشوفها، مر اسبوع كامل يلا اتصلوا بيه فكرت خلص راحت مني الوظيفه بس قدر رب العالمين عنده رأي ثاني، ماعرف ليش بسمتها اللطيفه أو وجهه البريئ نزرع بداخلي ومكدرت امحيه، وصلني بتال للشركه لأن طريقه على طريقي، وصلت سلمت عليه ونزلت وجان أصبح بوجهه نعنشت روحي وصباحي هسه بده تقربت مني تمشي برزانه وكفت يمي وكالت بصوت عذب طرب اله كلبي قبل أذني.
تغاريد: صباح الخير.
هنا وبمكان ما جاوبها تذكرت مقوله لمحمود درويش اني احبه حيل ودائماً اسمعله واحفظ كلامه مرات، يكول (الصباح الذي لا تسمع فيه صباح الخير ممن تحب يَبقى ليلًا حتى إشعارٍ آخر)
صحيت من صفنتي بعيونها على صوت واحد وراي وجاوبتها واني ابادلها الإبتسامه.
أبيل: صباح النور.
تغاريد: مبروك عليك الوظيفه.
أبيل: يبارك بيج تسلمين.
تغاريد: تعال وياي اعرفك على الزملاء وطبيعة العمل حتى تاخذ إيدك وتتعلم بسرعة.
أبيل: من بعدج.
تغاريد: كلك ذوق.
من أجمل أيام حياتي لأول مره كلبي يدك لوحده أو اول مره اعرف نفسي نعجبت ماعرف اللي بداخلي شنو وماكدر اوصفه غير صافن بيها ومبتسم بدون اراده، حتى نتبهت على نفسي ورجعت أبيل العاقل بعيد عن سوالف المراهقين.
___
:افهمني ماكدر اسوي اللي انت تريده.
:من عقلج هذا الكلام والله العظيم افضحج فضيحه بين العالم وكولي كال فلان.
:اني بنص بيتهم والمراقبه عليه مكثفه شلون تريد من عندي اسوي هيج؟
:معليه هذا الكلته وانتِ بكيفج بعد.
:زين انطيني مهله يومين تلاثه ارتب وضعي بيهن.
:لاااع كدامج نص يوم باجر اريد كل شي يمي.
:صعبه والله وخاصه هو نايم بالغرفه مايطلع منها ابد.
:انتِ ذكيه وتكدرين تلعبين عليه وتاخذيهن، يمج 12ساعه اذا مدبرتي اللي اريده سلميلي.
___
مهيائيل: ايريم، ايروو، يحلوة اللبن، فتحي اعيونج كافي ترجفين صار ساعه شبيج باباتي؟
بعالم اظلم ماكو احد أدير وجهي بالمكان اللي اني بيه احسه مألوف بس وين ماعرف صوت صياح وناس تحجي مميزت منو بس لفت انتباهي ونات خفيفه لطفل بلعت ريكي وتقربت من الصوت أو وي كل خطوه يعله اكثر، المنظر المرعب اللي شفته اربع بزازين داير مدايره وينهشون بلحمه مكدرت احرك ساكن وصوتي اختفه ورجليه ميعينني اركض بعيد، وحده منهن رفعت راسها اليه عيونها حمر حيل وتحولت من دائريه إلى خط وطفرت بوجهي بسرعة فزيت.
مهيائيل: أسم الله اسم الله اخذي نفس عيوني انتِ، يلا سوي شهيق على كيف بعدين زفير، حلم خلص ونتهى وهسه انتِ يمي وبأمان، محد يكدر يقرب منج اكسر رجليه وحق راسج.
اباوع اله واسمع كلامه بس صافنه بوجه ماكدر احجي شي هو يمسح على راسي بهدوء ويحجي ويايه بحنيه ويحاول يضحكني بس اني فاصله عقلي كله يم الطفل حتى طلعت من صدمتي ناطقه.
ايريم: مات.
عقد حاجبه متسائل.
مهيائيل: منو؟
ايريم: الطفل، جانن ينهشن بلحمه بدون رحمه.
كلتها ونزلت دموعي وحسيت جسمي كله يرجف اخذني بحضنه بقوة وبقى يهدأ بيه ويصبر.
مهيائيل: اشش يروحي، كلبي انتِ ماكو شي مجرد حلم محد مات وهذا الطفل وهم مو حقيقه.
ايريم: شفته بعيوني مهيائيل خطيه.
مهيائيل: يروح مهيائيل ولج كافي لترجفين هيج اضمج بنص ضلوعي والعن والديه اللي يدنه يمج بس اهدأي يعمري.
سكنت بس الصوره بعقلي وشيطلعها بعد، بهاي الليله متركني وحدي وبقى نايم بصفي وحاضني للصبح ومشغل سورة البقره ومعلي الصوت، حنيته ويايه بهيج اوقات تخليني اتعلق بيه بكُل قوتي.
ثاني يوم الصبح اتصل تليد بمهيائيل حددوا يجون الجمعه يخطبون ياسيم وعلى رغم إعتراض امها والأب بس مهيائيل اذا قرر شي محد يكدر يعترض، بالليل كملت المواعين بعد مخلصنا عشا وكلها راحت لغرفتها، الكلوب مالت الطرمه ممشتغل شويه صار ضوة قوي وضربه قويه بالباب تركت كل شي من أيدي ورحت ركض ليفوك مهيائيل طلع من العصر واني بقيت اكل بنفسي وحدي، دخلت للحمام غسلت ايدي أو وجهي وطلعت، لفت نظري خيال أسود يم الشباك بلعت ريكي وطردت هاي الأفكار شويه سمعت صوت مهيائيل يصيحني درت وجهي ادور عليه واني ادري بيه ماموجود بس عسى ولعل يطلع صوته حقيقي مو وهم،
حضنت رجليه لصدري وسديت أذني بأديه وكمت ابجي بحركه ماعرف هذا الوضع شنو سببه وليش كاعد يزيد ماينقص ومن احجي لمهيائيل يكلي الشياطين بالبيت هوايه هي السبب مبيج شي، صارت ضربه قويه بالشباك وهاي كانت لقلبي القاضيه..
#لاتفرحوا كثيراً_القادم اسوء 👻
يتبع..
البارت اكثر من 4276 كلمه.
لتنسون تعليقاتكم بين الفقرات وتصويتكم للبارت شمعاتي..
مسائكم خير وعافيه يارب..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!