للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة(زهراء احمد)
_________
في القلب تستوطن
هي الحب بل الجنون
ويال قلبها الحنون
انها ساحره
تلك الفتاه الناظره
لقلبي هي القريبه
انها أعمق من حبيبه
هي بمثابة الأم الرحيمه
الخاطره بقلمي ( زهراء احمد )
___
باوعتلها مصدومه ماعرف متفاجأة ولو بالحقيقه ماكو شي يدعو للتفاجئ وسط هاي العائله التعيسه،
انتِ!!
ابتسمت بمكر تذكرت شلون خلت المسدس براسي واني نايمه من ذيج اللحظه عقلي كلي مو خوش بنيه أو جيتها وراها مصيبة.
بلقيس: اي انا، عندج اعتراض؟
ايريم: شنو تسوين بهاي الغرفة؟
بلقيس: اجيت اشوف مهيائيل محتاجه منه خدمة.
ايريم: ومهيائيل بره والكل يعرف فشنو الداعي تفوتين هنا!!
بلقيس: البيت بيت ابونا والكوم حاربونا، هيج صلافه بعمري ماشفت!!
عرفت شنو طينتها وبأي طريقة تحب واحد يتعامل وياها، صغرت عيوني وركزت بعيونها بنظره تمليها القوة والشجاعه وتقربت منها رافعه حاجبي واحجي بنفس الأسلوب مالتها، بهوايه غرور وعجرفه، والتكبر على المتكبر هو التواضع بعينه.
ايريم: غلطان يكميل، البيت بيت زوجي واني الآمر الناهي بعده ومنطيني كل الصلاحيات وبكلمه وحده مني انتِ أو ابوج تنامون بالشارع اليوم، فالأفضل تحجين وبدون كذب شنو تسوين بالغرفة الخاصه بيه بالسحر؟
بلقيس: كتلج محتاجه خدمه من مهيائيل.
ايريم: والخدمه متنكال الا بمكان مغلق محد بيه!!
بلقيس: انتِ شنو تردين؟
ايريم: اللي ترديه نفسه.
بلقيس: اللي اريده مايفيدج.
ايريم: الا اذا تردين حرام فهذا وبكل فخر مو طريقي.
بلقيس: من هاي الناحيه اطمأني، زوجج مو ذوقي.
ايريم: خلي هو يعبرج بالأول يلا تكولين هيج.
بلقيس: شنو قصدج؟!
ايريم: لتغشمين نفسج تره شفتج اكثر من مره تمشين قريب من عنده وتتموعين وهو يطيزج ويعبر، هسه صار مو ذوقج ام الزلم!!
بلقيس: زوجج هو ميكعد راحه شسويله؟
ايريم: شلون يعني ميكعد راحه متحرش بيج لو طالب تنطيه شرفج مثلاً؟
اريد افهم الميكعد راحه شنو يعني؟
بلقيس: انتِ مزوجه وتعرفين شنو اقصد.
ايريم: ومهيائيل يسوي هيج وياج؟
بلقيس: اني مره اجيب اكبر راس إليه مو بعينج!!
ابتسمت بوجهه فتحت الباب وصحت بصوت عالي.
ايريم: مهيائيلللل.
شويه واجاني بنظرته علامة سؤال.
مهيائيل: شكو؟
شنو تسوين بهاي الغرفة؟
ايريم: تعال فوت اريدك بشغله.
مهيائيل: ايرو سالفتج مو خاليه كولي شصاير؟
سكت من التفت وشافها عقد حاجبه متسائل: شدخلج لهاي الغرفة؟
ايريم: اني اكلك زوجي عزيزي، الأخت المحترمه تكول أنت متحرش بيها كذا مره، صدك هذا الحجي؟
ابتسم بوجهي بعدين تحولت ابتسامته لضحكه بصوت عالي، أشر على نفسه بتكبر وبعدين أشر عليها كايل بستصغار.
مهيائيل: اناا اتحرش بهاي!!
ويععع اول مره واحد يكلي ذوقك خايس.
ابتسمت بشماته بيها وهي عاطت.
بلقيس: شنو قصدك شبيه اني!!
مهيائيل: شنو المابيج؟
مثل الثور حتى مو الهايشه وشوفي جمالي أو اناقتي والكاريزما اللي اشيلها معقوله انااا مهيائيل على سن ورمح انعجب بوحده مثل هاي!!!
التفتلي يحجي بتأنيب: وانتِ مرتي العزيزة معقوله جايبتني على هيج موضوع تافهه؟
عتبي عليج شلون تشكين مجرد شك بأنو عندي علاقه وياها!!
شوفيها وشوفيني على كولة فوفه انا فوك بالعلالي انعجب بوحده من الحوش!!
ايريم: مو شك وانما اريد اثبتلها مدا ثقتي بيك حتى متكرر الغلط.
مهيائيل: هي مراح تكرره اصلاً اتصلت بزوجها البارحه بالليل وعزمته باجر غده، راح نمد جسر المحبه والوئام وترجع المياة لمجاريها وماكو بلقيس بعد.
بلقيس: مستحيل ما أقبل اني مقررة وي امي ارفع دعوة طلاك بالمحكمة ما ارجعله على كص ركبتي.
مهيائيل: اي خوش نكص ركبتج وننطيه الجثه حتى يمشي باجراءات الدفن.
باوعتله وحجيت حتى اراويها قيمتها بهذا البيت شنو.
ايريم: كثرانه الحيايه مهيائيل صاير البيت لايطاق بسببهن.
وبما انو الكلمه تمس شي اكيد تطفر مثل الكنغر وتجاوب قبله.
بلقيس: احسن حتى طلعين منه.
وماكو احله من ردوده بهيج مواقف تصعد عندي الهرمونات وتخليني اريد ابوسه بغض النظر عن الموجودين يمي.
مهيائيل: وانتِ منو حاجي وياج بسرعة لكفتي؟!
بلقيس: متشوف شلون كلامها يسم البدن؟!
مهيائيل: التعبير عن الرأي حق مشروع بعدين اذا انتِ تشوفين نفسج فقيرة ومظلومه شبيج كمزتي مثل بزون ماكول عشاها ساكته ومنجبه.
بلقيس: هوايه تقللون من احترامي وعود هاي اني جايه يم بيت اهلي اللي مفروض يسندوني بهيج وضع مو يحجون عليه ويعيرون بيه بالطالعه والنازله.
مهيائيل: اسمعيني عدل سوالف العهاره والعياره بطليها متاكل عندي هذا البيت وللمره الالف اكولها هو بيتي واذا تكولين جايه يم اهلي فذولاك اهلج شبر مالهم وياي، آخر كلام عندي باجر بغلج يجي حضري نفسج ترحين وياه.
بلقيس: والله ماروح لو تموتني بإيدك مارجعله.
مهيائيل: امبين متونسه هواي بفراكه مو مشكله استغلي الفرصه من يطلع وجيبي المتواعده وياه حتى بلكي يطلع ناسي المحفظه السويج ويرجع ويشوفكم سوا وبمممم تموتين ونخلص.
بلقيس: شدتحجي انت ياصاحب هذا!!
وصلت بيكم المواصيل تتهموني بشرفييي!!!
كامت تلطم وتصرخ بصوت عالي لا اني ولا مهيائيل تفاجئنه لأن نعرف أخلاقها شنو وشنو من طينه هي بس اللي يهمه الأمر ومن يشوف نفسه وصل لباب مسدود وتنتهي سبل الرجعه يكوم يسوي أشياء جنونيه علمود يبرئ نفسه مثلها بالضبط شافت شمعه مشتغله كبل شالتها وخلتها على أطراف ثوبها وصوتها يلعلع.
بلقيس: اموت نفسي او اريحكم اني تالي عمري تكول عليه مو شريفه بس ادري هذا كله منها هي الحقيره الترزع براسك لأن تكرهني بعد ماعرفت بعلاقتنا قبل مازوج.
جمعت بين كلامها وكلامه قبل من كال حب مراهقه يعني جان يحب بلقيس، والصراحه ماغرت منها ابد ابقى مرته الأولى واللي إليه مكاني وقيمتي حتى كدامها هي وهذا ان دل على شيء يدل على مقدار حبه وعزة لأيريم بس مو لوحده ثانية،
ابتسمت بوجهه كايله.
ايريم: المراهق ماعليه عتب مشاعره جياشه ويحب اي وحده بس وهو جبير وساحر ومعروف حبني إليه وتزوجني واختارني اني اصير ام أولاده ان شاء الله وهذا الشي وحده قادر على انو يثبتلج هو ممعبرج من الأساس وانتِ لاشيء عنده عزيزتي.
بلقيس: كله بسبب امييي مقبلت تزوجنا جان هسه عدنا درزن جهال.
مهيائيل: ويعععععع، والصراحه امج قدمتلي معروف بعمري كله ما انساه جان هسه أولادي يلعبون النفس قل أعوذ برب الفلق.
هذا كله وهي بعدها لازمه الشمعه وصوتها بعده عالي تبجي وتصيح، دخلت العائله الكريمه كلها امها من شافتها هيج ركضت الها وتتوسل بيها تشمر الشمعه.
تالين: ابوس ايدج لتسوين بنفسج هيج اني ماعندي غيرج انتِ وياسيم اذا صار بيكم شي اموت نفسي.
بلقيس: اريد اموت واخلص محد يفهمني عشت سنين من العذاب والحرمان والضرب والاهانه والبخل ومن قررت اطلك وشوف حياتي سووني مو شريفه شفتي بنتج شلون ماعدها حظ يمه؟
تالين: اكص السانه اللي يجيب طاريج بحرف انتِ اشرف من الشرف يعيون امج.
ذيج تبجي وهاي تصبر بيها ومهيائيل واكف يباوعلهن ويحجي وي رائف.
مهيائيل: جيب كاميرا نصورهن وننشرهن بيهن خوش مشاهدات.
رائف: خاصه اذا اكتب فضيحة البنت وامها والأب يكشف السر.
مهيائيل: ومن الخوف تقرر الانتحار شاهد قبل الحذف.
ميمون: وكولوا عن طريق الغلط مرت الأخ الأكبر جانت وياهم.
مهيائيل: صاير تكرهه شعجب!!
ميمون: لأن عرفت نفسي وقررت اصحح الخطأ.
مهيائيل: وياريت ماتصحح بخطأ وترجع تندم بعد فتره.
رائف: ويبقى هيج بس يصحح الأخطاء.
مهيائيل: خابرتها؟
رائف: اي حددت الجمعه الجايه يعني وره عقد ياسيم.
مهيائيل: بيها الخير ان شاء الله.
ميمون: طالع انا يولد محتاجين شي؟
مهيائيل: ماتكمل الفلم؟
ميمون: عود اذا ماتن خابرني.
رائف: ليش؟
ميمون: اجيب واهليه.
مهيائيل: ههههههههه، وعشا وياك بثوابهن.
ميمون: يلا ثيمالا شباب.
مهيائيل: مع السلامه.
رائف: اكلك تعبت شنو مناويات يخلصن؟
مهيائيل: ترانيممم.
رائف: المن ترانيم؟
مهيائيل: تسكتهن.
غمزلها وهي هدت بيهن.
ترانيم: يلا يعيوني كل واحد لغرفته تعبانين نعسانين وانتن الفكوره تعالن ويانه نسوي عشا واللي عدها نيه تنتحر تأجلها مابينه حيل نغسل الغرفه ونعطرها.
الشمعه من كد ما لازمتها بأيدها طفت من الهوه طلع الكل وبقن بس هن واني ومهيائيل اللي شبك ايده وره ظهره كايل.
مهيائيل: اعرف ياتونه اللي صار جان مخطط منج حتى تجذبين تعاطف العائله وتغطين سواية بنتج بس انتِ ناسيه شي مهم اللعب وي الساحر يحتاج هوايه ذكاء وللأسف عقلج مجيم فمتكدرين تعبريني،
الزمي بنتج وخليها توخر عن سوالف الحرام والشقق وي الغربه والطبه والطلعه بحجة رايحه للجوارين وتروح تأجر تكسي لمنطقه فارغه تشبع شهوتها وترجعلي ثاني يوم اريد اطلك يابه ليش والله بخيل يعنفني واني أكثر واحد اعرف زوجها شلون من اهل الله وشريف وممقصر بشي وياها وجيتها اصلاً علمود شي ثاني مو طلاك صح لو لا؟
تالين: شي مثل شنو قصدك؟
مهيائيل: الفلوس، زوجها يمر بحالة ماديه صعبه وبنفس الوقت هي مسويه علاقه وي واحد غريب ودازلته صورها وباقي ذلك يهدد تعاليلي لو افضحج، مكدرت تروح زوجها يلزمها فأجت لهنا حتى بحجة اهلي اشبع غريزتي واخلص من التهديد ولتكولين غصب عنها لأن اكو الف طريقه حتى تخلص من المبتز أو اهمها تتصل بالشرطة وتشتكي يضيع وره الشمس، بس هي اختارت طريق الحرام والخيانه وهذا المطي لعبها صح وستغلها وكام يهددها يريد فلوس والخانم ماعدها فقترح عليها تبوكني، شفتها داخله للغرفه اكثر من مره ولزمتها ماخذه من محفظتي مبلغ معين وهذا اللي اثبت صحة كلامي وخلاني اراقبها بشكل مكثف.
تالين: هه وتريد اصدك كلامك وشنو اليثبت هي ماخذه يجوز مرتك؟
ابتسم بستفزاز وطلع موبايله مشغل تسجيل صوتي.
:اني مهند حبيب بلقيس دَاسِم، نعجبت بيها كشكل وردت اسوي وياها علاقه ومن شفتها سهله وبسرعة اجت للطريق استغليت الأمر وكمت اهددها لأن اعرف بيها وحده جبانه ومستحيل تقدم شكوى عليه والحقيقه اني ماشبعت منها وكلما احتاجها اتصل بيها وي هي تجيني بسرعة بدون متعارض، بآخر فتره ردت استغلها بس مو جسد أو أخذ منها فلوس بس هي رفضت رفض قاطع وكالت زوجها ماعنده بقيت اقنعها تعوفه وتطلك وسوت اللي اريده، وهسه هي تنطيني الفلوس وتجيني بين يوم ويوم أو واحد من الأيام بقت عندي الليل كله.
غلق الموبايل وهن وحده تباوع بوجه الثانيه بصدمه للأمانه اني هم تفاجأت بالبدايه عبالي من الخيره عرف بس الواضح ساحر القرن اذكه من هيج بهوايه.
مهيائيل: سمعتي عدل؟
تالين: منين جبته؟!
مهيائيل: من حبيبها لو نكول ******.
بلقيس: جذب مستحيل كلامه مو صحيح هاي خطه من عندك حتى تورطني.
مهيائيل: ما احتاج اخطط بكعدة وحده وي ابليس العن ابو خيرج، تتوقعين اني وبسحري وشغلي من سنين وحده بطول زري تسيطر عليه!!
تالين: وشنو تريد هسه؟
مهيائيل: تغادر البيت بدون رجعه وشكلها ما اشوفه بالمنطقه كلها.
تالين: تدلل بس هذا الحجي ينتهي هنا ومايطلع واستر عليها الله يستر عليك.
مهيائيل: مو انتِ اللي تشرطين عليه اسوي اليعجبني ومحد عنده يمي شي.
تالين: صحيح كلامك تآمر انت.
عافها وطلع واني رحت وراه دخل للغرفه واني قفلت الباب التفتلي وهو يفتح بدكم الدشداشه.
مهيائيل: بداخلج سؤال جوابه واضح بس اصفنيله شويه.
ايريم: جنت مفكره معلوماتك تجيبها بس من الشياطين.
مهيائيل: صح بعض الأمور من الشياطين اخذها بشكل كامل بس اكو اشياء لازم ادقق بيها وابحث الدليل مهم احياناً.
ايريم: كل يوم اكتشف بيك شي جديد يبهرني.
مهيائيل: وراح نبقى هيج طول العمر يوميه ابهرج.
ابتسمت رايحه يمه خليت أيدي على ايده منزعته الساعه واني اتسائل.
ايريم: بطلت اسمع اصوات هاي هم ألك أيد بيها؟
مهيائيل: ماكو شي يصير بهذا البيت ما اللي أيد بيه مريتي.
ايريم: اذا هيج شنو سبب اللي صار وياي؟
مهيائيل: سحر مشمور بالغرفه.
رفعت راسي اله: ومنو يدخل للغرفة بدون علمنه ويسويلي سحر؟
مهيائيل: ولد الحرام هواي.
ايريم: ميمون لو دَاسِم؟
مهيائيل: دَاسِم.
ايريم: ويجوز ميمون.
مهيائيل: لا هذا بي ضمان، ميسوي سحر بدون مقابل لأي أحد.
ايريم: وشعرفك يجوز هاي المره غير.
مهيائيل: اعرف سكان هذا البيت مثل الأم شلون تعرف أولادها.
ايريم: ومحجيت شي يم احد!!
مهيائيل: منتظر النهايه وشنو راح يسوون اكثر من هيج وبهاي الطريقه يخسرون كل الفرص المنطيها الهم.
ايريم: ما راح انضر؟
مهيائيل: اخليج بنص كلبي واكسر الأيد التنمد عليج.
ايريم: لهاي الدرجه اني مهمه عندك؟
مهيائيل: غير انتِ زوجتي واختياري الصح وام أولادي ان شاء الله.
يحجي ورافع طرف شفته بأبتسامه تذكرت شنو حجيت يم بلقيس الأخ هسه كاعد يردها عباله يحرجني وصدمته بالعكس، قبلته بخده كايله: سعيدة كوني زوجتك يامفتاحي.
ضحك حاضني لصدره بقوة.
مهيائيل: ياقُفل ومفتاح كلبي، على ايدج انفتح وبيج كتفيت وقفلته.
ايريم: وشمرت المفتاح لو لا؟
مهيائيل: ذبيته بالنهر من هاي الناحيه لتخافين.
ايريم: اكلك.
مهيائيل: كولي.
ايريم:
بقالب هالبشر الله حط عيون
وانت بقالبك بدرين منطيلك
مهيائيل: ايي.
ايريم:
اذا دمعك نزل بسرعة شك الليل
من ثوبه جزء سواه منديلك
مهيائيل:
واذا يطفى الضوة ويصعب عليك الشوف
الكمر ينزل الك ويصير قنديلك
ايريم: حافظها!!
مهيائيل: هذا الاثول دائماً يقراها يمي.
ايريم: احبها حلوه.
مهيائيل: بحلاتج.
ايريم: لتحجي هيج تره اخوجل هوايه.
مهيائيل: خرب بيومج ولج نعوج حلكج وانتِ تكوليها.
ايريم: اي غير ادلع عليك ياعيوني.
مهيائيل: اليوم مطوره، عيوني وشعر خيرج داده؟
ايريم: مكلت شي هو شعر لتاخذه اعتراف خاص.
مهيائيل: ايرو.
ايريم: همم.
مهيائيل: كتلج اني اليوم لو نسيت؟
ايريم: شنو؟
مهيائيل: انسحر الساحر بوحده متدينة، هدمت الحصون وحتلت القلب والعقل، وصارت الملكه بأرض محتله والغريب هي مو عدوا وكل شي بيه متقبلها بكُل حب ورضا.
ابتسمت اريد اجاوبه سبقني كايل.
مهيائيل: هاي المره اذا كلتي ماكلت احبج اعضج عضه يا ايريم اخليج اسبوع كامل مدمايه.
ايريم: هههههههههه، اوييي شكد عنيف.
مهيائيل: تعالي ولج مشتاقلج اويلييي.
ايريم: اي على كيفك مو هيج، هههههه.
حضني لصدره وخلص اليوم بكل شي حلو وسيء مر بيه، ثاني يوم اجه زوج بلقيس اتغده يمنه وهي دمعتها بعينها ومقهوره خيل وامها كاعده يمها تصبر بيها عجيب امر هاي المره تشجع بناتها على الغلط بمكان متربيهن وتعلمهن، صدك لو كال الشاعر،
الأم مدرسةٌ ان إعددتها
اعددت شعباً طيب الاعراقِ
وقله للأسف هيج امهات، الأغلبيه صايره اما على الموبايل لو تروح يم صديقاتها وطلعات ونسات وتنسى امر التربيه، والمصيبه الأكبر بنوع ثاني من الأمهات وذني هن يحتاجن تربيه من جديد،
اني أم شلون ما اربط حساب بنتي بحسابي أو اشوف شنو اتابع وعلى أي موقع تدخل وشنو تسوي بغيابي!!
اتفاجئ من اشوف البنات هسه كل وحده موبايلها بأيدها والأم ياغافلين الكم الله حتى يوكع الفأس بالراس ويعضن اصابع الندم،
الولادة هي مسؤولية عظيمه باجر عكبه نتحاسب عليها، اذا اشوف نفسي وزوجي والبيت اللي اني ساكنه بيه ما مُهيأ للأطفال ماخلف، أأمن طرق تربية سليمه هي مو شغلت خلف وشمر وربك يرزق بعدين وهذا البعدين نفرض ما اجه وطلع للدنيا ولد معاق أو مصاب بمرض معين لاسامح الله اشلون أدبر فلوس علاجه وبيا بيئة اخليه عايش، العنايه لازم تصير بداخل البيت وخارجه واحنه بزمن متطور ولازم أحدث الأشياء تكون متوفره اله، صح القناعه كنز لايفنى بس الأطفال يغارون من اقرانهم ويتاثرون بالمجتمع اللي يعيشون بيه وهذا سبب رئيسي بخروجهم عن الطريق.
تحجي وتتعب وتسكت من تشوف ماكو اذن مفتوحه الك، ياسيم اللي كاعده بغرفتها وبلقيس المنتظره واحد يصيحها حتى تروح وي زوجها بعد عناء وخطط بائت بالفشل، لو أمهن الحايره تسحر بالعالم،
نغلقت صفحه من هذا الكتاب بطلعتها من البيت ونزلت الورقه السوده والمدبر الاعظم لكل المصايب اللي تصير ويانه، من اشوفها اشوف ابليس عن حق وحقيقه، بلبسها المامحتشم وطريقة كلامها وحركاتها الصدك مال بنات مو شريفه مثل ميكول مهيائيل عنهن، رحم الله امرئ كف الغيبه عن نفسه وهاي النماذج تكول رحمه الله والديه اليحجي عليه.
___
رولين: هاي شنو شوكت راحت؟
تالين: قبل شويه.
رولين: درب السلامه، ستعجلت هوايه لو باقيه بعد كم يوم نشبع منها.
تالين: احسن زوجها وحده بالبيت تروح يمه اداريه.
رولين: سودة عليه من شوكت صرتي تخافين عليه!!
تالين: عوفج من هاي السالفه أو كليلي زوجج وين؟
رولين: وشعندج بيه؟
تالين: راح من ايدج يالمسعده.
رولين: شنو قصدج مفهمت؟
تالين: ماطول كلتي شعليج بيه معناها متعرفين ارضه وين، خوفج لايطلع مزوج ويجيب على راسج ضره.
رولين: احركه وحركها غير يكدر يسويها هو.
مهيائيل: تحركين منو كغوده؟
تالين: ها عيوني شوكت اجيت؟
مهيائيل: اويلي يابه صارت بيها عيوني هيج الخوف يسوي بالعالم سبحان الله.
تالين: هاي شبيك وياي هسه اني شكلت!!
مهيائيل: اكرميني بسكوتج وكليلي روله تحركين منو؟
باوعتله بضحكه مال قليلات أدب وكالت.
رولين: ميمون اذا فكر يلعب بذيله وياي.
مهيائيل: ههههههههه، بالخصوص انتِ، احسبي كم يوم ومع السلامه متبقين اهنا بالبيت.
رولين: شنو قصدك؟
مهيائيل: اللي تردين تحركيه كاعد يحضر باوراقج اعتقد السفره هاي المره ون ويه، ذهاب بدون عودة.
رولين: مايكدر يسويها اعرفه.
مهيائيل: خوش عود،
زوجتي الجميله مشتهي اشرب من ايدج جاي.
ايريم: من عيوني يروحي.
رحت سويت جاي ورجعت وجتمعوا الكل حتى ميمون اجه.
رائف: اكلكم شمجهزين لخطوبتي؟
مهيائيل: جكليت اطشه فوك راسك.
ميمون: خلي اهلها يوافقون بالأول بعدين اطلب بصلتك محروكه.
رائف: اي والله خويه كلش مستعجل.
مهيائيل: اصدمك بشغله ماكو عرس حتى تتخرج.
ميمون: ماكو ربط بين الثنين يكدر يزوج ويدرس هي سنه وحده.
مهيائيل: ويوكلها حصو.
ميمون: احنه موجودين ونساعده لتكبرها مهيائيل.
مهيائيل: درهم احمر مانطي على شنو خابص نفسه ويريد يعرس اذا انا اصرف عليه!!
ميمون: هي هم موظفه والحياة الزوجيه مشاركه كبر عقلك شوي خويه.
مهيائيل: بطول البغل ويريد مره تصرف عليه اذا هاي نيته يموت وماخطبله باجر عكبه تصير مشكله لو عركه وتعال انت خطبت بعد هذا العمر والتعب ارجع اركع اله مو هو زعطوط.
ميمون: والحل؟
مهيائيل: يتخرج ويشتغل ويزوج براحته.
رائف: خلصتوا؟
ميمون: احجي شنو بعقلك؟
رائف: اشتغل ودرس سوه.
مهيائيل: حتى تجيني ساقط.
ميمون: هو ساقط من زمان.
رائف: هذا قراري اريد اشتغل شفت مسائي ودبر افلوس علمود العرس.
مهيائيل: وين العزم؟
رائف: وي واحد حلاق.
مهيائيل: وانت وين تعرف تحلق؟
ميمون: كلهم يزينهم صفر ابسط منها ماكو.
رائف: عامل جوه ايده.
مهيائيل: اي خوش موافق.
رائف: وهو منو ماخذ رأيك من الأساس اجيت اكلكم وبس.
مهيائيل: شكد ماكبرت نبقى اني وميمون اخوانك وبمقام ابوك دير بالك تخطي خطوه بدون علمنه وتوقيت للرجعه للبيت بعد الساعه عشره ينقفل الباب وياويلك ادكه.
رائف: شو انت تجي بوجه الصبح محد مسوي عليك توقيت حتى هاي الفقيرة المسكينه.
مهيائيل: شاكيتلك؟
رائف: جا هي إلا تشكي مبينه.
مهيائيل: هذا العندي موافق توكل ماموافق انجب وكعد.
رائف: موافق عمي موافق.
مهيائيل: العنوان والرقم.
ميمون: اذا ماينطيه شمهروش اذن ايس يخليك تشتغل.
رائف: ماخلص انا من شياطينيكم ابتليت خو مابتليت عندي اخوان سحره!!
ميمون: مو زين عيش يم ابليس حتى تؤمن مكره.
رائف: وكبل بدون حساب شمر بنار جهنم.
مهيائيل: دَاسِم وين؟
تالين: طلع عنده شغل.
مهيائيل: خابريه يجي الليله بالليل عدنه فاتحه ولازم نروح.
تالين: تدلل.
مهيائيل: الخوف يعدل الشوف.
___
دائماً العصريه ممله الشباب يطلعون واني ابقى وحدي كاعده لو صافنه لو نايمه واذا انام يبووو لازم اكعد ميته من التعب والضوجه تقره ألف، نفتح الباب ودخلت ابتسمت صار فتره طويله محجينه سوا.
ايريم: حياج الله مشتاقه صار هواي ماكو عني.
ترانيم: اي والله حتى انا ضايجه مدري شمالني.
ايريم: شبيج؟
ترانيم: ضوجه يمعودة باقين بالبيت كاعدين وساكتين لاشغله ولا عمله شكالت تالين ورجعت رولين لعبت نفسي.
ايريم: شنو رأيج ناخذ اجازة بعد زواج ياسيم؟
ترانيم: ودوامج؟
ايريم: بس يومين هي زواجها الاسبوع الجاي وراها مباشره نروح.
ترانيم: خوش موافقه بس وين؟
ايريم: زيارة المراقد المقدسة صار فتره طويله مرايحه الهم.
ترانيم: اي والله خوش فكره نغير جو وناخذ ثواب.
ايريم: اكلج شخبار ياسيم؟
ترانيم: تون اربع وعشرين ساعه لعبت نفسي من الدنيا.
ايريم: غلطت والعقوبه تستحقها.
ترانيم: تليد مو شخص عادي وحقج حياتها جحيم تصير وياه.
ايريم: عمتها مبينه مره قويه.
ترانيم: بس مُزن حبابه وهاي يومين تلاثه وتتزوج وتبقى هل المسكينه بحضن هذا المطي.
ايريم: اي صدك ليش مصحتيها وياج خطيه كاعده وحدها.
ترانيم: ليش اصيحها تعالي ننزل نسوي عصرونيه ونكعد سوا.
نزلنه اني وياها سوينه عصرونيه هي صعدت تصيح ياسيم واني رحت يم مُزن، دكيت الباب وسمعت صوتها فتحته ابتسمت بوجهه وهي بادلتني.
ايريم: الحلو شنو يسوي؟
مُزن: جنت اتصل بتليد.
ايريم: وهسه؟
مُزن: كاعده.
ايريم: وهي كعده كعده تعالي اكعدي ويانه نسولف ونغير جو.
مُزن: ماشي جايه.
كعدنا بالمطبخ ونطلقت ترانيم وياها.
ترانيم: سولفي عنج يختي خلينا نتعرف.
مُزن: ماكو شي مهم عمري عشرين سنه وممكله دراسه وعايشه وي امي وأخوي.
ترانيم: ليش ممكمله؟
مُزن: مجان عدنا فلوس والطلاب يعيروني ماعندي اب وملابس وبطلت مكدرت اتحمل.
ترانيم: واحد ساقط الله لايرحمه.
ايريم: الرجال ميت يمعودة.
ترانيم: خلي يولي للقير ابو النسوان.
مُزن: خلص انسي الفات مات.
ياسيم: ليش مدرسين خارجي؟
مُزن: مادري ممفكره بالموضوع.
ايريم: فكري واذا حتاجيتي اني اساعدج ليا صف واصله انتِ؟
مُزن: للخامس وبطلت.
ايريم: سهل السادس والتقديم بسيط فكري بالموضوع.
مُزن: ان شاءالله والله سويتلي واهس اكمل دراسه.
ترانيم: كملي داده وكلنه وياج، اهم شي الدراسه بيها مستقبلج وراحتج حتى لو تزوجين الملك تبقى الوظيفه اهم.
ايريم: وهذا الملك منين تجيبه!!
ترانيم: ربج ويدزه معليج انتِ.
الكعده يم الناس الحلوه تخلص بسرعة وأيام العمر تمشي بدون منحس واليوم راح مهيائيل و دَاسِم وميمون واني وترانيم حتى نخطب لرائف اللي خلص الطريق بس يركص ويهوس.
رائف: ها خوتي هاا.
ميمون: هاا.
رائف: بلمنا طك بلمكم يهل العماره.
مهيائيل: طاح حظك اي والله.
رائف: اسمع الثانيه هاي ألك مخصوص ميمون لان كاعد على مرامي اليوم.
مهيائيل: أو ماوجعك؟
رائف: ياهو؟
مهيائيل: مرامك.
رائف: وتكول عليه تافهه، المهم اسمعوني عدلللل تسمعون؟
مهيائيل: وسم كول وفضنا.
رائف: الصاحب شنهي الصاحب شيل انعال وكطعه عليه.
مهيائيل: راح ابطل والله اذا ماسكتت.
رائف: ياجلمه ردي لمجانج عمي سكتنا ها اها.
ضرب على حلكه وترانيم تضحك بصوت عالي بس اني مستحيه مخليه عباتي على حلكي ومبين بس جسمي يهتز،
وصلنه للبيت ونزلنه، الزلم راحو للاستقبال واحنه دخلنا يم النسوان استقبلتنا مره جبيره مبين عليها كلش حبابه كعدنه وبدت ترانيم تحجي وياها شويه ودخلت بنيه صدك حلوه أو وجهه بيه براءه قدمت العصير ومن وصلتلي كأن تذكرت شي مر عليها بسرعة كالت.
زُمردة: الحمدلله على السلامه.
عقدت حاجبي متسائله: الله يسلمج بس على شنو؟!
زُمردة: رادوا يستأصلون اعضائج من دخلتي للمستشفى بس ربج ستر ونقذج زوجج بآخر لحظه.
صدمه معقوله اني هيج صاير ويايه!!
ايريم: بس ذكريني شوكت؟
زُمردة: ماذكر بالضبط تقريباً قبل كم شهر بيومها جان رائف موجود وياكم.
ابتسمت بوجهه مجامله: اهاا ذكرت، عدت على خير الحمدلله.
زُمردة: اي الف الحمدلله كلش قلقت عليج وقتها.
ايريم: ياعمري ربج مجان كاتبه يومي.
زُمردة: اكيد والا جنتي على الموت شعرايه.
رجعت ذاكرتي لذلك اليوم من بقى يحجي وي رائف بخصوص دكتور وجاب سيرة عبد الرحمن ربطت بين الاحداث وايقنت كلامها صح، شوف الحياة شكد قصيرة وشلون الأنسان يتحضرله الكفن بدون ميدري.
خلصت الخطبه ورجعنا للبيت واني صافنه بالشارع بعيد عن الكل هم يسولفون بكلام اهلها واني عقلي سافر لذلك اليوم وبقيت اخمن اشياء ماموجوده ضافتلي خوف لخوفي الوهمي،
اول موكفت السيارة كدام البيت نزلت وصعدت فوك بدون كلمه، نزعت العبايه وشمرت الشال بعيد ودخلت للحمام اغسل وجهي وتنفس سريع فجأة سمعت صوت صريخ عالي طلعت بره مفزوعه دخل للغرفه واني اريد اطلع اشوف شكو من شافني هيج متيهه الدنيا سحبني من أيدي موقفني.
مهيائيل: شكو شبيج؟
من رجعنا من بيتهم وانتِ وضعج مو طبيعي صاير شي؟
حركت راسي نافيه واني اكول: سمعت صوت عالي منو يصرخ؟
عقد حاجبه: صريخ منو؟
ايريم: ماعرف بس صوت عالي مكدرت اميز هو منو.
مهيائيل: اتوضي وصلي واني نازل جوه عندي كعده وياج اليوم افهم شنو بيج وسبب هذا المود النزل عليج فجأة.
___
:صافنه بالسكف وعقلي رجع ليوم الخطبة، ساعدتني عمه ترانيم بالملابس كله ابيض بأبيض على اساس ادخل حياة بلون النقاء والصفاء واني على هذا الزواج ما راضيه ابد، يابنيه بالعالم تقبل تزوج المغتصبها!!
باوعت لنفسي بالمرايه مخليتلي مكياج على آخر حبايه والترتيب والجمال على شنو بله منو اليستاهل اتأنقله بهاي الطريقة؟
نزلت لاكتني امي على الدرج الانسانه اللي حرام اكول عليها ام بعمرها كله ما احتضنتنا ولا ربتنا بطريقه عدله تيهتني بوقت جنت محتاجه بيه شخص واحد بس يلزم أيدي ويعلمني الصح من الغلط، صحيح مهيائيل ماقصر بس يبقى دور الأم اهم من اي احد ثاني بالدنيا،
تباركلي وتبوسني حالها حال الغربه، ومن دخلت للصالة وشفت امه قريت على نفسي السلام وكمت افكر بشنو منتظرني بذلك البيت الأسود اخذت نفس اشجع نفسي كعدت على الكوشه منتظره ورقة اعدامي شوكت تصدر، شويه وطلبت مني امي اكوم وياها راح يبدون العقد كعدت مقابيل الباب مالت الإستقبال وسوت ترانيم الطقوس الخاصه بهيج مناسبه من ياس وغيره،
"قبلت انت وكيلي" بهاي الكلمه طلعت من العزوبيه وصرت مره متزوجه ميحقلي اخطي خطوة بدون إذن مغتصبي وقاتلي، احقد عليه بكد الدنيا ومستحيل يجي يوم أكدر اتقبله بيه،
دخل ومبين على وجهه الانزعاج لبسني الحلقه وطلع بدون ميحجي كلمه بلعت غصتي وسكتت شنو احجي أو اصلاً مسموحلي احجي من الأساس، الكل ماخذ عليه نظره مو خوش بنيه بس محد كال هو أذاني ودمر حياتي ومحد عاقبه على سوايته بالعكس تماماً قدموني اله على صحن من ذهب،
عفت الكل وصعدت لغرفتي قافله الباب بجيت لطمت ندبت وشنو تغير؟
متغير شي بس حركت كلبي اللي تزيد ماتنقص، نمت والدمعه بعيني ثاني يوم رحت للعقد بس اني وهو خلصها عصبي وينتر على الناس، سكتت وبقت عيني على الطريق حتى وصلنه للمحكمة ومن شفت مهيائيل واكف منتظرنه تنفست الصعداء صحيح ميحجي ويايه بس وجوده اطمئنان لداخلي، كمل العقد وطلعنا ومقبل اروح وياه رجعت وي مهيائيل للبيت، ومن ساعتها مسمعت صوته واصلاً اني محابه اسمع عنه شي ولا اريد اسمه ينذكر كدامي والله اعلم شنو مضموملي بعدين.
كملت صلاتي وكمت نايمه مالي خلك انزل يمهم مطول هوايه ودخل للغرفه اجه كعد يمي على الجرباية اخذ أيدي بين أديه يحجي بحنيه.
مهيائيل: شبيج نظر عيني؟
ايريم: صدك رادوا يستأصلون اعضائي؟
مهيائيل: لا ماكو هيج حجي، كل مافي الأمر سويتها خطه حتى يلقون القبض على المتهم بالجرم المشهود.
ايريم: فرضاً لو مو انت ساحر شنو جان صار؟
مهيائيل: اذا تردين تبدين بالفرضيات اصلاً متزوجنا، لو مجنت ساحر مأجيت لهذا المكان ولا كدرت التقي بيج ومصرتي مرتي ولاعشنا تحت سقف واحد، عوفج من اللو زرعوها وماخضرت.
ايريم: بعد كل اللي عشنا سوا اريد اكلك شكراً لوجودك بحياتي لو مو انت مكدرت اعيش لهذا اليوم، رب العالمين يقول (وجعلنا لكل شيء سببا) وانت هذا السبب، يمكن بالبدايه مجنت راضيه على هذا الزواج لأن ماعرفك وماعرف شكد انت طيب كلب بس هسه بهذا اليوم لو يرجع بيه الزمن راح أختارك واكون سعيدة بهذا الزواج وتقبلك بكُل شي بيك.
مهيائيل: ليش اني شبيه ولج!!
ايريم: اتخبل كل شي بيك حلو.
مهيائيل: ايريم شنو سبب هاي الاعترافات فجأة؟
ايريم: مادري اكو وأحد بعقلي يكلي هيج احجي.
مهيائيل: يعني مو من كلبج؟
ايريم: لا مو هذا القصد، بس اريد احجي خاف يصير شي بعدين ما اترك ندم واعترفلك بلي احسه.
مهيائيل: ماطول هيج خليني اعترفلج بشي موجود بكلبي من فتره طويله.
عيني على شفايفه وكلبي يركص منتظره يحجي اللي اريد اسمعه من زمان بس كالعادة الراحه بهذا البيت ماموجوده، فززنه صوت صرخه قويه ومجانت عاديه الصرخه صرخت موت..
يتبع..
البارت اكثر من 4132 كلمه..
ملاحظه هوايه اشوف تساؤلات بخصوص القصه كتبت بالمقدمة هي حقيقية فهي حقيقيه ماراح اغير المعلومه بتقدم البارتات.
لتنسون التعليق وي كل فقره والتصويت للبارت شمعاتي.
تصبحون على الف خير وعافيه..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!