للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
مهيائيل
الكاتبة( زهراء احمد )
_______
أتيتُ نحوكَ لما الدّهر أتعبَني
فما لبثتُ و زادت بي جِراحاتي
إنّي أتيتُك بأشتاتي لتجمعها
ما لي أراكَ و قد شتّتَ اشتاتي؟
___
بقيت صافنه على امي اللي لمت الناس عليها بدون ما انطي اي ردة فعل، عقلي ميستوعب صاير شي لأهلي خاصة أبيل لان متعلقه بيه حيل هو مو بس أخ اعتبره أبويه على حنيته وحرصه وخوفه علينا،
حسيت على أيد نخلت على متني التفتت شفته هو حجه بصوت هادئ يطمني بيه.
مهيائيل: ماكو شي لتخافين.
مردت يشفق عليه اشرتله براسي بمعنى اي وقويت نفسي كد ما أكدر ورحت يم امي واني الخوف لعب بيه لعب بس اريد اطمأن مصار بأهلي شي لذلك بسرعة سألتها.
ايريم: شكوو صاير شي؟
أبيل بيه شي؟
حجت وهي تبجي خلتني حتى اني ابجي وياها.
تسنيم: ولج اخوج مسوي حادث خابرني ابوج هسه وكال دخلوا عمليه، اشاف من حياته وهيج يصير بيه؟
على رغم صعوبة الموقف على كلبي بس اذا وكعت وياها هسه وكمت الطم منو راح ينطيها قوة لهذا السبب ضغطت على نفسي وحاولت أبين قويه لزمتها من ايدها وكومتها ويايه.
ايريم: كافي لتبجين ان شاء الله مبيه شي، ساعديني وكومي نطلع منا شوفي الناس شلون التمت علينه.
قاطعني صوته وهو يحجي وياها.
مهيائيل: كومي أم أبيل خلي اخذج للمستشفى حتى تشوفيه ويرتاح كلبج.
ساعدني وكومها ويايه رحنه للسياره وهي على نفس الونه والبجي اهنا فقدت كل القوة خليت عبايتي على حلكي وبقيت ابجي بصمت واني اتذكر أيامي وياه فعلياً كل لحظه حلوه صارت من ضحكه وسالفه وشلون جان يقريني بالامتحان خو بأيام السادس جان اكثر من أم هو اللي مدللني بدونه البيت بدون طعم، خفت اخسره ويروح وهو مقهور عليه، شنو اذكر وشنو انسى أو وي كل ذكره حزن جبير يتولد بالكلب يجبرني ابجي اكثر، غمضت عيوني بألم وسمحت لخيالي يروح يمه بقيت احجي وياه بعقلي صحيت على صوته وهو يحجي ويايه بصوت عالي.
مهيائيل: ايريم، ايريمم.
مسحت دموعي ورفعت راسي اله وجاوبته.
ايريم: ليش تصرخ؟
منو كلك طرشه؟!
مهيائيل: مستوعبه اللي صار لو لاا؟!
ايريم: شكو شنو صار واني مادري؟
مهيائيل: صار نص ساعة انت فاقده مو يمي بالأول عبالي نايمه بس من حجيت وياج عرفت انتِ مو بوعيج بيج شي؟
ايريم: لاا مابيه شي بس اني نومي ثكيل.
مهيائيل: له له له مو نوم شي ثاني لازم نعرف هو شنو احسن منخسرج بعدين.
مهتميت لكلامه شويه وتذكرت اللي صار واحنه هسه واكفين كدام البيت لعد المستشفى واخويه شنو صار بيه، كبل حجيت بسرعة.
ايريم: أبيل، أبيل شنو صار بيه وينه؟
مهيائيل: اهدأي مصار شي مجرد حادث بسيط لا أكثر.
ايريم: وانت شلون عرفت؟
مهيائيل: شياطيني كلتلي لتنسين اني سحار هيج أمور متخفه عليه.
ايريم: واذا سحار تعرف علم الغيب مثلاً!!
مهيائيل: نوعاً ما، الخدام عدهم كم معلومه اذا حتاجيتي شي بالمستقبل اسأليني ممكن افيدج متدرين.
ايريم: كذب المنجمون ولو صدقوا.
مهيائيل: هاي جمله شتهرت بالعلن لامن نبي ولا أمام، ولعلمج هيج معلومات ماتعتبر من علم الغيب يعني مو من العلوم الغير قابله للمعرفه عقلج ميستوعب هيج شغلات فخليج بعيده أحسن.
ايريم: ليش انت عندك اطلاع على هيج أمور؟
مهيائيل: معرفتي محدوده على سبيل المثال موضوع الموت ماعرف بيه مع هذا هوايه اشياء اعرفها، جاوبتج على هواي أسئلة يلا تفضلي.
ردت انزل نتبهت على امي مموجودة عقدت حاجبي وسألته.
ايريم: امي وين؟!
مهيائيل: يم اخوج بالمستشفى.
ايريم: وليش مكعدتني انزل وياها؟
مهيائيل: اول موصلنه نزلت مجان عقلها يمج تعرفين الابن اغله من البنيه يم الأهل.
ايريم: امي مو هيج.
مهيائيل: يجوز.
ايريم: رجعني للمستشفى خليني اشوفه.
مهيائيل: شويه ويرجع للبيت ميحتاج ترحين.
ايريم: ليش تمنعني أروح؟!
لتنسى هذا أخويه.
مهيائيل: واني زوجج أو ولي امرج أكدر امنعج براحتي.
باوعتله بالمراية بغضب وحجيت بعصبيه.
ايريم: يصيررر من حقك تمنعنيي بالوقت اللي اعتبرك بيه صرت زوجي اما هسه فلا والف لااا اني اشوفك كأي رجال غريب مُحرم عليه.
أبتسم بطرف شفته وحجه بخباثه.
مهيائيل: عود باجر بالليل من تصيرين بنص حضني كولي اعتبرك رجال اجنبي.
صدك حركلي كلبي خاصه من غمزلي بآخر كلمه، فقدت آخر ذره عقل وصرخت بيه بحركه.
ايريم: مستحيللل صدكنيي اموت نفسي على أنو اصير زوجتك ادخل نار جهنم وما اكعد يمك لحظه.
حجه بهدوء عكس النار اللي تاكل بداخلي.
مهيائيل: باجر اذكرج ياقُفلي والمفتاح.
ايريم: بعمرييي مشفت انسان عديم احساس مثلك شخص ماعنده شخصيه يجبررر بنيه على الزواج بيه واحددد منحط بدون أخلاق والا اني شنو اترجه من فاسق!!!
مهيائيل: اشوفج اللي بدون إحساس والعديم الشخصيه نجيهن وحده وحده لتهتمين هذا وعد مني، وبالنسبه لصوتج العالي هاي المره اعدي الج مره جايه يكون العقاب اسوء من الصحراء والحر تكفيه الإشاره.
ايريم: أكبر بلاء وجودك بحياتي متشوف شنو صار بينه من اليوم اللي تعرفت بيه عليك لو ممنتبه؟!
مهيائيل: اني كتلج انو انت تمشين بطريق اسود يعني ستعدي لكل المصايب وشنو يصير هسه فالقادم أسوأ كوني على ثقه.
ايريم: ماكو شي أسوأ من اللي يصير هسه.
كلت هيج ونزلت بدون ما اسمع كلامه ضربت باب السيارة حيل وفتحت باب البيت ماعرف شلون نسحبت من أيدي ونضربت على الحايط حسيت ظهري نكسر سد الباب ورجعلي، رفع اصبع ايده بتهديد وحجه بغضب وعصبيه.
مهيائيل: آخر مره تسوين هاي السوايه ماكو والخلقج اراويج نجوم الظهر بعز النهار وكولي مهيائيل كال، امشي ويايه عدل لا اخليج حتى من ظلج ترجفين، سكتتلج كم مره وكلت مرتي لازم احترمها وانطيها وقت تتعرف عليه بس تجاوزتي كل الحدود وانا ماعندي صبر النبي ايوب تره.
ترك أيدي وطلع اخذت نفس عميق ودخلت للبيت صارت بوجهي استاج اجت بسرعه حضنتني خايفه بقيت اهدء بيها، هدأت ورحنه صلينه سوا، سويت عشا وتعشيت وياها غصب حتى ما خليها تحس على شي كملنه وغسلت المواعين وهي راحت تقرأ واني صعدت لغرفتي اخذت الموبايل وتصلت على امي مفتحت من بقيت الح عليها يلا جاوبتني.
ايريم: شلونه؟؟ شنو صار وياه؟؟ طمنيني عليه.
تسنيم: الحمدلله هسه طلع من العمليات صاير عنده رضوض وكسر برجله وراسه سبع خياطات.
ايريم: سوده بوجهي، بيه ولابيه.
تسنيم: اسم الله عليج يمه روحي ابقي يم اختج شويه لتخليها وحدها حتى ارجع للبيت.
ايريم: زين معرفتي شلون صار الحادث؟
تسنيم: سياره تمشي سريع وداعمته وصاحبها جايبه للمستشفى يكولون لو متأخرين شويه جان مات اسم الله بس ربج ستر الف الحمدلله والشكر.
ايريم: الف الحمدلله على سلامته، وين هو هسه؟
تسنيم: طلعوا من العمليات هسه بالعناية من يصحى ارجع.
ايريم: وشوكت يطلع من المستشفى؟
تسنيم: باجر الصبح اذا الله راد وتحسن وضعه.
ايريم: وابويه شلونه؟
تسنيم: كاعد يمي يسمع صوتج.
ايريم: خلي يرجع وياج علمود يرتاح وياكل لكُمه من العصر وانتوا اهناك مو زين عليكم.
تسنيم: ميقبل ولو بيدي حتى اني ابقى بس علمودجن راجعه، ديري بالج على نفسج وخيتج شويه واني يمجن وذا صار شي عود اتصل بيج.
ايريم: مع السلامه.
تسنيم: عينه الله عليكم يوم بحفظ الرحمن.
فتحت الباب ورحت يم استاج هي تقرأ واني صافنه بيها راح عقلي لقبل شهرين من هسه شلون جانت حياتنه هادئة وتجنن بين يوم ويوم تغيرت للأسوأ، نزلت دموعي صُدك منعرف شنو مكتوب باجر، مسحت دموعي من شفتها تباوعلي بسرعه اجتي يمي وحجت بخوف اختي حبابه حيل ورقيقه متتحمل اي شي بسرعه تخاف حاولت قدر الأمكان مابين الها شي بس لو شكد ما اضم تبقى عيوني تفضحني.
استاج: ايريم صاير شي وضعج مو طبيعي كل شويه باجيه ابويه بيه شي؟ لو أبيل؟
بتسمت بوجهه وحجيت بحُب.
ايريم: مبيهم شي كلهم بخير بس راحوا عدهم شغل شويه ويجون كملي دراستج وتعالي أنام سوا.
استاج: متأكده؟
ايريم: قابل اكذب عليج تعرفيني انتِ.
سوت مثل مكلت خلصت وأخذتها يمي بالغرفه بقيت اللعب بشعرها حتى غفت سمعت باب البيت ينفتح وخرت عنها وفتحت الباب على كيف حتى متحس بيه وتكعُد شفتها امي نزعت العبايه وشمرتها وكعدت على القفنه اول مشافتني اشرتلي على كلاص مي، رحت جبتلها وكعدت بصفها بسرعه بجت واني هنا منتظره بس واحد يكلي شلونج حتى الطم بسرعة، الحزن والكآبه اللي بداخلي وزادها حادث أبيل كل هاي الأمور نجمعت بنفس اللحظه صرت ابجي وياها بصوت عالي وكلما تحجي كلمه ازيد أكثر.
تسنيم: ولج يوم لو شايفته ابو طول الحلو ممبين منه شي ملامحه مختفيه ازرك على أحمر رايح وجهه الجنت اتونس من اشوفه ويرتاح كلبي، والله لو صاير عليه شي اموت بمكانه، بعد طولي مدد على السديه وممبين شكله من الأجهزة، ولج حتى ابوج من شافه بهاي الحاله ارتفع ضغطه، بار بأهله ومحافظ على عائلته بسبب وأحد ميخاف الله ودايس بنزين واكع و هسه بالمستشفى، لو مات وين انطي الوجه، يايمه يا أبيل يابعد عمري وليدي مو ألك هاي النومه.
سكتت شويه وبعدين كامت تنعي وهي تبجي واني يمها على الواهس.
تسنيم:
ضاع الربه وذلك الدلال
ومن وكت ياحضي مال
غدار دهري وحيل عيال
وي المشه يكليبي شال
كامت تبجي بصوت اعله خفت لايصير بيه شي واني هنا وحدي بقيت اسكت بيها.
ايريم: لله ما اعطا ولله ما أخذ، انتِ مرأه مؤمنه وتعرفين الموت حق الماضي راح وان شاء الله مينعاد وهسه أبيل تكولين بخير بعد ليش هل بجي مو زين عليج يعيوني انتِ.
تسنيم: ليش هو الصار ينسي مجودر بنص كلبي بس غير انا ساكته مرت سنين وعفنا كلشي هناك بس كلبي معلك ما اجه وياي شما اكول خلص ونسيت ما أكدر قطعه مني هذا مو حي الله وأحد، الانسان يبجي على حيوان ربا مو ابنه السهر وياه الليل، ربج وحده يعرف شنو اعيش اني كل يوم وبالعه الغصه وساكته شنو بيدي اسوي وهو مو ثار وأخذ حقي وينتهي قضاء وقدر ومكتوب بعد ولازم يصير.
ايريم: هاي كلتيها بالسانج قضاء وقدر يعني مابيدنه شي لتعبين نفسج اذا صار بيج شي اسم الله وين انطي وجهي؟
مسحت دموعها وحجت بغصه.
تسنيم: حظج مثل حظ امج الدنيا مراح تجي وياج عدل من اول يوم نخلقتي بيه للدنيا كلتها وشوفة عينج شنو يصير ويانه هسه.
ايريم: قدر الله وماشاء فعل غير الدعاء ماعدنه وسيلة.
تسنيم: لا اكو بعد أللي شفته وصار وي اخوج مستحيل اخاطر بحياتج وزوجج لسحار من باجر ارفع عليه قضيه وخليه يطلك وابوج اني أقنعه وبالنسبه لاخوج يركص جوبي اصلا هو مارايد هاي الزيجه ماراح افرط بيكم حتى لو على كص ركبتي.
حسيت بشعور الفرح وأخيراً راح اخلص من ساحر القرن.
جنت مسويه كُبه للعشا سويتلها لفه وبعد اصرار من عندي قبلت تاكلها انطيتها علاجها وراحت نامت، شفت الساعه عشرة واني باقيه بالصالة افتر مثل الجني، بعد كل الأشياء اللي صارت ويانه اليوم عقلي اخذ استراحه من التفكير بيه ودائماً يصير شي يجبرني أرجع اذكره،
جانت الكهرباء مشتغله فجأة طفت وصار هوه قوي سمعت ضربة الشباك مالت المطبخ عقلي توقف عن العمل للحظه وشتغلت مشاعر الخوف حتى بطني كامت تأذيني، حركت رجليه شويه واني اتقدم لكدام ردت بس اطلع من هذا المكان واروح يم امي لأن غرفتها جوه وقريبه عليه، رجليه وكفن وحدهن من حسيت اكو واحد ورايه ،هوه حار لفح أذني وكلمات غريبه اسمع مكدرت اعرف شنو هن، مكدرت اخطي اي خطوة واكو شي يسحبني اله يشبه الظلام،
لحظه مرت صار ضوه قوي بعيوني شفت خيال أسود مجان لبشر وإنما خيال شكله غريب اني هنا من الخوف نسيت حتى أسمي، فقدت توازني او وكعت على الكاع، شي لامس رجليه طفرت من مكاني بسرعة تنفست سريع وركضت فتحت الباب ودخلت يم امي وشمرت نفسي بحضنها حست عليه ولمتني بأديها وراحت من بالي استاج أللي عفتها وحدها بالغرفه الفوك المليانه شياطين،
"حية جبيرة تمشي ورايه، وين ما أروح تتعقب مكاني، خفت منها حيل وزدت من سرعتي وصرت اركض اريد اصرخ بصوت اطلب المساعدة الساني مقيد، فقدت كل طاقتي أو وكعت على وجهي حسيت بيها صارت قريبه والتفت عليه مكدرت اسوي شي وأوخرها، شفت رجال لابس ابيض اجاني من بعيد ماعرف شلون طلع صوتي وطلبت مساعدته، طلع من جيبه سجين وكطع راسها أو وكع بحضني صرخت مفزوعه من المنظر والدم وهي صرخه وهي فزه من الحلم"،
سمعت صوت الأذان عالي نزلت دموعي وبقيت ابجي وامسح على صدري واردد بداخلي، ياعلي ، ياعلي، ياعلي، جنت اسمع من امي دائما وهي تنصحني قبل ما اطلع من البيت أو اروح للمدرسة، اذا وكعتي بشدة لو خفتي نادي ياعلي ثلاث مرات ابو الحسنين يساعدج ويجي ينقذج، ودائما جان جوابي ليش اكول ياعلي ليش مو يا الله مو هو خالقنه؟!
ترجع تجاوبني بابتسامة.
تسنيم: رب العالمين خلق الائمة والأنبياء حتى يكونون وسيله النه يمه وهذا الشي مذكور بالقرآن الكريم بسم الله الرحمن الرحيم(يا أيها الذين آمنوا اتقوا الله وابتغوا إليه الوسيلة) ربنا عزوجل خلقهم حتى يكونون وسيله نتقرب بيهم اله.
حسيت نفسي رتاحيت شويه مسحت دموعي وكعدتها حتى نصلي، فتحت الباب وطلعت صارت بوجهي الصاله كل شي مرتب والكهرباء مشتغله سميت بأسم الله وصليت على محمد وآل محمد وصعدت لغرفتي أول مفتحتها شميت ريحه قذرة تشبه ريحة المجاري (أجلكم الله) رحت يم استاج همات كعدتها فتحت عيونها بوجهي وصرخت بفزع.
استاج: اعيوننج شبيهنن؟!
ايريم: مبيهن شي حبيبتي هذا بسبب النوم كومي يلا توضي خلي نصلي سوا.
طلعت من الغرفه واني شغلت الكلوب ورحت يم المرايه شفت جفوني منفوخه وعيوني حمر دم، رحت غسلت وجهي وتوضيت وصليت اليوم متوفقت لصلاة الليل اصلاً أني من عرفته لحد الآن هوايه أعمال تركتها صُدك لو أتت الشياطين ذهبت الملائكة، هذا قدري ولازم اعيشه ما باليد حيله، لميت السجاده ورحت لفراشي بعد معطرت الغرفه وفتحت الشباك حتى اغير الهوه اللي بيها، فتحت الموبايل لكيت رسالة من بلائي.
مهيائيل: "اذا قريتي الرساله اتصلي بيه"
طنشت ولا كأن قريت رسالته شمرت الموبايل وخليت راسي على المخده دقايق معدودة وسمعت صوت المكالمه أخذت نفس بضيق وفتحته وخليته على أذني اجاني صوته العالي.
مهيائيل: وتاااالي ويااااااج كمممم مره نبهتتتت انتِ متوبين يعنييييي بأي لغة لازم احجي وتفهمينننن؟؟
وخرت الموبايل عن أذني من كمل كلامه رجعته حجيت برود شي داخلي دفعني استفزة على رغم هاي مو شخصيتي ابد.
ايريم: وهسه شنو تريد؟
مهيائيل: هيج صار الحجي؟!
ايريم: من الأساس مجان اكو شي بينه كل اللي صار انت سعيتله اني موعدت بشي.
مهيائيل: تعرفين وي منو تلعبين لو لا؟
ايريم: حلو اللعب وي الشياطين للحقيقة مليت من لعب البشر والا انت شنو رأيك؟
مهيائيل: حبيت شويه شويه تنسحبين لعالمي وتتجردين من الإنسانيه بهاي الطريقه اكون سيطرت على كل عقلج.
ايريم: قصدك؟
مهيائيل: صايره طيعين الشيطان أيتُها المرأة العابدة وهاي بدايه حياتج ويايه الله اعلم شنو يصير وياج بعدين.
ايريم: اذا جان العمر مكتوب بيه يخلص يمك صدكني اتنازل عنه وما اعيشه وكول ايريم كالت.
مهيائيل: متكدرين تسويها.
ايريم: لتختبر صبري ولتستفزني بهذا الكلام لأن إذا اريد انتحر محد يوكف بطريقي غير شغلتين هُم اهلي والحرام وفي حال فقدت الأمل حتى ذني ما افكر بيهن.
مهيائيل: هاي مو انتِ اللي تحجين ايريم اكو شخص ثاني يحجي بمكانج.
ايريم: يمكن يجوز انت شنو تكول.
مهيائيل: اكول افتحي الباب جاي خلي نشوف مشكلتج يحلوه اني شكيت بيج اليوم بالسيارة وهسه تأكدت، انت من صُدك ممسوسه.
ايريم: لتجي محد موجود بالبيت بس اني وامي وبعدين الدنيا ليل بعدها الناس شنو تكول علينه.
مهيائيل: كومي افتحي الباب وانت تمشين اقري القلاقل الأربعه وآية الكرسي وكثري من الأدعية، ولتلفتين أبد لأي صوت تسمعيه ولتركزين بالخيال اذا شفتي غمضي عيونج وتذكري اي سورة قرآنية حافظتها وردديها واذا بصوت عالي يكون أفضل يلا تحركي لتبقين صافنه.
ايريم: ليش اسوي هيج؟!
مهيائيل: لان اني هيج أريد كومي يلااا لا اتصل بأمج واخوفها بهيج وقت فأختاري.
ايريم: استغفر الله كايمه.
مهيائيل: فديت الخوف، لتقفلين الموبايل خلي على أذنج.
سويت مثل ميكول لان صراحه اني صدك خايفه اريد اعرف ليش اشوف هيج اشياء، نزلت على كيفي وبقيت اقرأ بالسور اللي كالهم وأصلي على محمد وآل بيته حتى وصلت يم باب البيت وفتحته بسرعه دخل، اعتقد جان يحجي وهو يمشي لان بيته ورانه مباشرة فوصل بسرعه،
دخل وسد الباب وسحبني من أيدي للحديقة وكف مقابيلي وحجه بهدوء.
مهيائيل: سولفي شنو صار وياج اليوم؟
ايريم: مصار شي.
مهيائيل: الكذب حرام امج معلمتج هاي الشغله؟!
عرفت ماكو فايدة من التهرب لذلك اخذت نفس وحجيت كل شي.
ايريم: خيال أسود يلاحقني وين ما اروح، وريحه قذرة بغرفتي، ومن انام احلم احلام مو زينه.
مهيائيل: احلام مثل شنو؟
ايريم: بزونه تطفر عليه لو حيه جبيرة تلتف على جسمي لو خيال أسود يجي يخنكني وهوايه أمور.
مهيائيل: اكو شي غريب بالحلم غير هيج؟
ايريم: اي.
مهيائيل: اكره سحب الحجي.
ايريم: بكل حلم يجي واحد لابس ابيض يخلصني منو هو ماعرف.
مهيائيل: امج محصنتج وانتِ طفله بحضرة الإمام علي لهذا السبب الشخص اللي يجي يساعدج هو الإمام، من شوكت تشوفين هاي الأحلام؟
ايريم: من زمان حيل بس مو دائما لكن من شفتك صارت هاي الاحلام بشكل يومي.
مهيائيل: وهسه شتشوفين؟
ايريم: شيطان على هيئة إنسان.
مهيائيل: روحي صيحي امج وتعالي اكو حجي لازم اكوله.
دخلت يمها لكيتها كاعده اول مكلتلها مهيائيل اهنا صار وجهه اصفر ولطمت على خدها.
تسنيم: شنو يسوي هنا بهيج وكت هذا يريد يسود وجوهنا وليش خليتي يدخل من الأساس تخبلتي؟!
ايريم: طلعي شوفيه هو بره يريد يحجي وياج بموضوع مهم.
سحبت عبايتها وبقت تحجي عليه لأن دخلته على اساس الموضوع بيدي، هم ورطوني ويحجون فوكاها،
طلعت شفته واكف أول مشافها عيني اجت على ايده جان لابس محبس فره بوجهه جانت عصبيه وتغلط بسرعه تغيرت نبرتها وصارت تحجي بحنيه وياه نصدمت من المنظر ورفعت عيني اله وهو غمزلي حتاريت معرفت شنو اسوي بس بهاي اللحظه تأكدت محد يكدرله غير رب العالمين وحده.
مهيائيل: شلونج ام أبيل طمنيني ابنج شلونه؟
تسنيم: الحمدلله وليدي كلنه بخير، تعال فوت جوه هسه ايريم تسوي ريوك وأُكُل ويانه ميصير تبقى واكف هنا.
مهيائيل: مشكوره متقصرين خيركم سابق، بس اني ما ادخل بيت مابيه رجال تعرفين العادات أكيد.
تسنيم: والنعم منك ومن اصلك ونعم التربيه والأخلاق، مكتلي شنو تريد يمه أكيد جيتك بهيج وقت الها سبب مهم.
مهيائيل: اي اكيد سبب مهم والا شلون ازعج راحتكم بهيج وقت، كُل مافي الأمر ردت اسألج ايريم هم ضاعت منج وهي صغيره؟
تسنيم: ليش هذا السؤال صاير شي واني ماعرف؟!
مهيائيل: لا بس هيج فضول اذا تذكرين كُليلي.
تسنيم: ما أذكر بعمرها مطلعت بدون علمنا.
مهيائيل: يلا مو مهم، بما انو أجيت هسه فحبيت اكلج بطريقي الزواج تأجل ليوم الخميس الجاي لان عندي شغل مهم بره المحافظه ديروا بالكم على نفسكم.
تسنيم: محروس ابني الله وياك.
عقدت حاجبي مو البارحه كالت ما ازوجج لهيج واحد لو شنو يصير ليش تغير كلامها هسه؟!
نفضت الأفكار ورجعت للواقع على كلامه.
مهيائيل: اذا تسمحين ام أبيل احجي وي ايريم شويه.
تسنيم: اي ابني اخذ راحتك مرتك هي بعد.
دخلت جوه وهو سحبني من أيدي طخيت بصدرة نزل راسه يم شعري واخذ نفس عميق همهم بكلمات مفهمتها وبعدين همس بأذني.
مهيائيل: ليش عطرج هيج طيب؟
اشم بيج راحتي شنو السبب؟
خجلت من كلامه حيل اجيت ابتعد ثبتني بأيد والأيد الثاني عدل بيها خصلات شعري وخلاهم وره اذني، على هاي حركته عرفت نفسي اني نازله بدون شال غميت نفسي داخلياً على هيج عمله، رفع راسي وباوع بعيوني لحظات من التوتر والصمت دارت بينه منتبهت على شي غير عيونه جانوا سود وبيهم لمعه مميزة تجبرك تنظر الهم بدون ملل، سحر من نوع خاص موجود بيهم ياخذوني لغير عالم، شي مُجذب بنفس الوقت غريب،
قطعت هاي اللحظات ايده وهو يلبسني كلادة أجيت انزل راسي قاطعني ايدة لامست حنكي رفع راسي بالسبابه والابهام باوع بعيوني بتركيز وحجه بثقه.
مهيائيل: بما أنو اني رايح كم يوم حبيت اترك بالرئة ريحتج حتى كلما اشتاقلج اغمض وارجع لهاي اللحظة، ديري بالج على نفسج ياقُفلي والمفتاح.
تركني بصدمتي من كلامه وطلع أمام انظاري بعدين حجيت بتفاجئ من تصرفاته.
ايريم: هذا مو جان قبل شويه يهدد لو غيره؟!
رجعت لعقلي بعد دقايق وشجعت نفسي كايله،
بعمرج لتثقين بيه هو يسوي هيج حتى يخليج تحبيه لا أكثر بعدين يتركج بعذاب وهم وحزن، الشياطين ميستحقون الحُب متفيد وياهم غير اللعنه.
رجعت لغرفتي وخليت راسي على المخده ونمت مصحيت الا على امي تكعدني، أبيل طالع من المستشفى وبيت عمي يمنه وخوالي بالطريق خلصت هاي الأيام بصعوبه علينه وكلما اشوفه صعب يتحرك تنزل دموعي عليه لأن من صُدك كلبه طيب وميستاهل اللي صارله،
صبيت كوب جاي ورحت يمه للاستقبال لان رجله مكسوره ميكدر يصعد دكيت الباب ودخلت بعد مسمعت صوته يسمحلي، خليته يمه على الميز وساعدته يعدل كعدته مر أربع ايام على الحادث والخطار رجعوا لبيوتهم، بس هو نفس حالته بعده ميكدر يتحرك راسه ملفوف وجوه عيونه ازرك كلما اشوفه انقهر حيل وما أكدر اسوي شي غير الدعاء إله، ردت اطلع وقفني وهو يحجي على كيف.
أبيل: هاي أول مره أفرح لأن صار بيه شي مو زين على الاقل متزوجتي من واحد متردي لو اعرف هيج راح يصير وداعتج شمرت نفسي كدام السيارة من زمان.
التفتت اله وحجيت بسرعه.
ايريم: اسم الله عليك بيه ولابيك يعمري انتَ، منو اللي غيرك يصبرني وينطيني طاقه حتى اكمل، تعرف عدل اني اعتبرك أكثر من أخ انت مثل ابوي ومعزتك متقل عنه ثق بالله، لتحجي هيج وتزعلني منك هذا الزواج تأخر شويه بس هو قائم لا محاله، اني وانت نعرف منكدر نغير من الواقع شي هذا المكتوب ولازم نعيشه.
شفت عيونه صاروا حمر وبيهم لمعة دموع نزلت دمعتي قبله فتحلي أيده شمرت نفسي بحضنه وصرنه نبجي سوا، بقينه هيج شويه وتذكرت حالته ومو زين عليه بتعدت وحاولت اضحكه واغيرله جو فكلت.
ايريم: الحادث مسويك حلو فدوه لله.
ضربني خفيف على أيدي وحجه بعتب.
أبيل: ليش ولج مو حلو اني قبل!!
ايريم: لا من وين حلو تشبه جبار ابو المولدة.
أبيل: ألعن يومج هيج اخرعع؟!
ايريم: متشوف راح توصل الثلاثين ومحد تقبل بيك لان مو حلو.
أبيل: اهم شي الأخلاق شنو نسوي بالجمال مو بله؟
ايريم: اي والله اهم شي الأخلاق ليش منو تحصل واحد مثلك هم جمال وهم أخلاق انسان ماكو منك ثنين، الله يديمك على روسنا ذخر.
أبيل: ويديمج حبيبتي.
بقيت ساكته شويه وقطع هذا الصمت بسؤاله.
أبيل: مشفتج رحتي للدوام ليش؟
ايريم: لأن كلي احضر بس بالامتحانات ميحتاج أداوم هسه.
أبيل: شلون سوا هيج؟
ايريم: ماعرف يمكن بسحره هو شنو يعرف غير هيج.
أبيل: مدوم صدكيني يجي يوم يندم على الساعه الصار بيها ساحر بوقت ماينفع الندم ولا التوبة، بعد مدمر حياة كومه ناس وسبب بخراب هوايه عوائل، ربج مستحيل يغفرله خاصه على اللي سوا بيج.
ايريم: رب العالمين ميترك حق أحد حتى لو تمر عليها سنين يرجع ياخذ الثأر بنفس الطريقه وينتقم للأذية اللي سببها بالناس البريئه.
أبيل: يلا ننتظر ونشوف انتقام ربنا من عنده نصبر مو مشكلة.
عفته وكمت بعد ما اجه ابويه، صعدت لغرفتي صار عندي واهس اطلع المحاضرات وأقرأ اني طالبه هندسه مدني مرحله ثالثه تأخرت هيج لان عدت السادس أكثر من مره علمود اطلع معدل بالأخير امي حلفت اذا مكملت تبطلني فخضعت للأمر الواقع ودرست هندسه على رغم مو قسمي المفضل وهاي ثاني شغله مجنت أرغب بيها وسويتها غصب،
درست بجد مثل الشخص المتعطش ولكه مي حتى نسيت نفسي بالقرايه فجأة رفعت راسي لكيتها الساعه سته، حيل شكد متأخره كمت من مكاني بسرعه ولميت كُل الهوسه ونزلت يم امي علمود نحضر عشا خلص هذا الوقت كالمعتاد وصار موعد النوم، اخذت دوش سريع وصليت ركعتين قبل النوم وخليت راسي على المخده هسه دا اغفى سمعت صوت الموبايل يرن رفعت راسي وأخذته قريت اسمه" ساحر القرن" تفاجأت من اليوم اللي راح بيه متصل بيه بعدها ولا جمعنا حديث شنو ذكره هسه فتحت الموبايل وخليته على أذني اجاني صوته الهادئ اللي يحسسني انو كاعد يمي مو يحجي ويايه من بعيد عن طريق الموبايل.
مهيائيل: يكولون الكلوب تحس بعضها معقوله شتاقيتيلي؟
ماعرف ليش من يحجي ويايه اكو شي داخلي يجبرني احجي شي مناويه احجيه من الأساس.
ايريم: ليش انت مشتاقلي؟
مهيائيل: من شفت مامنج فايدة كلت اني اتصل وإلا اكو وحده تعرف زوجها بغير مكان ومتسأل عليه؟!
ايريم: محسسني رحت تحرر فلسطين هو كلها راح تسوي سحوره.
مهيائيل: فديت الفاهمني والله، اي سولفي شلونج، شكو ماكو؟
ايريم: مرتاحه حيل بعدم وجودك.
مهيائيل: ومن الأحلام والأصوات هم مو؟
ايريم: مفهمت؟
مهيائيل: الحجاب اللي موجود على ركبتج هسه بيه عوذة تحميج بهاي الفتره تكدرين تكولين شي مؤقت بعدين نشوف شنو يصير.
ايريم: اريد انام.
مهيائيل: منو لازمج؟!
ايريم: يعني مع السلامه.
مهيائيل: قبل مترحين كولي لاخوج هاي المره لو يموت نفسه هم راح ازوجج بالموعد المحدد ماكو تأجيل.
ايريم: شنو قصدك؟!
مهيائيل: الحادث اللي صار جان مدبر من عنده يعني انتحار بس بصورة مثقفه.
ايريم: مستحيل اخويه ميسويها.
مهيائيل: علمود زواجج سواها حتى تعرفين انتِ شكد غاليه عنده، هيج أخ لو يطلب عمري انطي اله بدون ما أفكر حتى.
ايريم: شلون عرفت؟!
مهيائيل: يعني مصدكتني؟
ايريم: ابدد بس اريد اعرف هيج معلومه من وين حصلتها؟
مهيائيل: هاي المره مو الخدام من واحد ثقه.
ايريم: ما اصدك هو يخاف من الحرام شلون يسوي هيج عقلي راح يوكف.
مهيائيل: من كتلج مصدكتني ليش تنكرين؟!
ايريم: راح اتأكد بنفسي مراح اصدك حتى اسمع من عنده.
مهيائيل: من حقج.
غلقت الموبايل ونزلت اركض للاستقبال حتى اسأله اول ملزمت اليده مالت الباب ستوقفني صوته يمكن صديقه موجود ويتعارك وياه على اللي صار بقيت واكفه واستمع بتمعن لحديثهم.
بتال: انت عاقل شلون تسويييي هيج؟!
أبيل: ردت أأجل الزواج قدر الأمكان حتى نلكي لزمه عليه ونلغي العرس ليش ليكون مفكر ابقى ساكت واشوفها تروح للموت برجليها؟!
بتال: هذا انتحار تفهم لو لااا رب العالمين يكول (وَلا تُلْقُوا بِأَيْدِيكُمْ إِلَى التَّهْلُكَةِ) شلون تشمر نفسك على السياره بس فهمننييي.
لطمت على وجهي عزة بعيني اخويه راد يموت بسببي وين انطي وجهي لو صاير بي شي والله اموت وراه، رجع كمل كلامه واني مصدومه بسوايته المتوقعتها ابدد.
أبيل: فدوه الها حتى لو ميت المهم اكون سبب بتخريب هذا الزواج وسعادتها.
بتال: والله العظيم تخبلت انت مو أبيل اللي اعرفه.
أبيل: سد الموضوع مابيه حيل اناقشك لأن مستحيل تفهم شعوري وان شاء الله كل عمرك متفهمه.
رجعت للغرفه وأريد اوكف دموعي ما أكدر رجعت لنفس ليله الحادث تهسترت حيل واني بهاي الدوامة من التفكير والقهر والحزن وصلتني رسالة من مجهول زادت خوفي أضعاف.
" هذا لاشيء من اللي يصير هسه القادم اسوء"
يتبع..
البارت اكثر من 4100 كلمه.
شجعوني بتصويت وتعليق بين الفقرات شمعاتي وكتبولي توقعاتكم للقادم.
تصبحون على الف خير وعافيه يارب.
حسابي الأنستا لأي شي يخص القصه.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!