للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
مهيائيل
الكاتبة (زهراء احمد)
_______
شرار متطاير في الهواء
سببهُ نيران الأعداء
يسعون للخراب وليس البناء
يقتلون بالليالي الظلماء
ويدفنون اعاملهم بدون رثاء
ويسرحون بالأرض بغير حق وهم فيها سعداء
انهم داء بلا دواء
غير رب الاتقياء
فماذا سيكون مصير أسيرتهم فائضةُ النقاء؟
الخاطره بقلمي
زهراء احمد
___
وكع الموبايل من أيدي واخذني الخوف هذا منو اللي يهدد معقوله مهيائيل؟!
اجتي لعقلي فكره ثانيه تنفي الأولى، مستحيل هو حتى لو يريد يهدد ميستخدم هيج اسلوب غامض، لعد منو؟!
مخليت الأفكار تسيطر على مخي بس بنفس الوقت معرفت شنو اسوي بعدين كلت هي خربانه خربانه خلي اتصل بيه وانطيه خبر واسوي نفسي شجاعه ومهتميت لهيج موضوع حتى إذا جان هو يريد يلعب عليه توصله الرساله انو ميهمني التهديد ابداً اما اذا مو هو فأي شي يصير بالمستقبل يكون عنده علم انو اني مُلاحقه من شخص معين أو ممكن يكدر يوصله هو ونعرف منو، نفضت كل شي من عقلي وأخذت الموبايل واتصلت بيه اول رنه فتح حسيت مخليه كدام وجهه ومنتظر اتصالي من هلكد مجاوب بسرعه،
اجاني صوته النعسان.
مهيائيل: يا مساء السُكر فديت اللي يخليني بدون خمر أسكر.
ايريم: أعوذ بالله خمر شنو سكر شنو اتصلت بيك لشي مهم عندك وقت تسمعني؟
مهيائيل: حتى لو عندي اجتماع القمة افرغلج نفسي افاا عليج كم اريومه عندي أني.
حجيت بصوت اشبه للهمس: حتى نسيت شنو اريد احجي مو رجال ضيم.
فزيت على صوته مو إذن مشاالله لاقطه.
مهيائيل: وأخيراً اعترفتي اني مو مثل البقيه.
جاوبت بسرعه بدون مقدمات واني داخلي محمل عليه.
ايريم: اي طبعاً منو يشبهك شيطان ملعون.
مهيائيل: والملائكة شنو تريد من الشياطين بهيج وقت؟
ايريم: تحركهم بنار جهنم.
مهيائيل: لا هاي منتهين منها هو مكان الشيطان المعروف هذا ميحتاج تهددين بهيج اشياء، المهم سولفي بسرعه شنو تردين اريد انام نعسان وتعبان حيل.
لا أرادي حجيت هاي الكلمات صدك اصير ثوله من اسولف وياه واحس اكو واحد كاعد بعقلي وهو اللي ينطقني.
ايريم: ليش شنو بيك؟
مهيائيل: ليش خفتي عليه؟
ايريم: لا ليش اخاف بس هيج من باب الاحترام لا أكثر.
مهيائيل: البارحه منايم وبقيت طول اليوم بالشغل ومن رجعت اتصلت بيج وقررت انام بس انتِ اتصلتي هسه وجاوبتج وبقيت بلا نوم.
ايريم: سألتك سؤال واحد ماكو داعي تحجي قصة حياتك.
مهيائيل: اي هم صح بس يلا مو مشكله حسيتج تردين تعرفين اني شنو اسوي ما اسوي بيومي اذا عندي سوالف منا منا لو لاا.
ايريم: ياسوالف شنو قصدك؟
مهيائيل: الخيانه والنسوان هيج قصدت.
ايريم: ليش هو اكو رجال بهذا الوقت ميخون؟!
مهيائيل: مو كل الناس مثل اخوج.
ايريم: الا عائلتي ما اسمحلك ابداً تجاوز عليهم.
مهيائيل: قصدي يخون صحته ويطلع خارج البيت، لتعصب يحلو.
ايريم: كلامك نساني اللي أريده من عندك.
مهيائيل: هذا بسبب الشيطان كولي أعوذ بالله من الشيطان الرجيم وهسه تذكرين لو أقرب طريق هو الصلاة من تصلين تجي كُل الأفكار براسج حتى الأمور اللي ماكو داعي تذكريها هم تخطر على بالج فنصيحه روحي صلي.
ايريم: تستهزء حضرتك؟!
مهيائيل: ابداً اني رجُل صادق جداً وياج، وشوفي راح اساعدج تذكرين قبل متتصلين بيه شنو جنتي تسوين؟
ايريم: اهاا تذكرت.
مهيائيل: اني لو مخلوق مني ثنين مبقت الناس بحيرة بس يلا مو مشكله يسوون استنساخ لعقلي الرائع.
ايريم: عيفك من الغرور واسمعني، قبل نص ساعه تقريباً وصلتني رساله من مجهول جان محتواها القادم أسوء كلت أسألك إذا عندك علم بهذا الأمر.
مهيائيل: اصححلج قصدج تسألين إذا جنت اني اللي دازها أو لا مو بله؟
ايريم: من حقي اشك.
مهيائيل: واني مكلت لا بس من الشجاعه تواجهين الشخص متمشين وياه بطريق ملتوي.
ايريم: أواجه من يكون عندي دليل هذا مجرد شك لا أكثر مو من حقي اتهم احد باطل.
مهيائيل: على كولتج اني شيطان والشياطين ميجون بطريق ملتوي بسرعه يجي بأذنج ويوسوسلج باللي يريده.
ايريم: قصدك؟
مهيائيل: قصدي اكو واحد يلعب عليج ويريد يخليج بشك دائم اني خطر سريع الاشتعال ،على رغم اني الوحيد اللي تكدرين تأمنين بيه من بين كل الناس اللي تعرفيهم.
ايريم: ليش؟
مهيائيل: اني شيطان صح لكن الج انت بالذات فاني الملاك الحارس اللي يحميج ويطلعج من المشاكل.
ايريم: ليش اني؟!
مهيائيل: اسألي شياطيني هي الوحيده التكدر تجاوب هذا السؤال.
خلاني صافنه بكلامه شويه بعدين فززني وهو يكول.
مهيائيل: دزيلي الرسالة والرقم خليني اتعرف على الحلو اللي يريد يخوفج وننطيه اكراميه على طريقة ابليس.
ايريم: كتلك مجهول ماكو رقم.
مهيائيل: مو فلم رعب هو ،دوري عدل راح تلكيه.
ايريم: والله ماكو رقم قابل اكذب عليك.
مهيائيل: الرساله على اي تطبيق وصلتج؟
ايريم: تلي.
مهيائيل: دزيلي الصفحة.
وخرت الموبايل عن أذني وفتحت التليكرام ملكيت شي عرفت حذفها فكتله.
ايريم: ماكو شي.
مهيائيل: محذوفه؟
ايريم: اي.
مهيائيل: مره ثانيه اي شي يصير وياج وأي احد يدزلج شي بسرعه سكرني حتى نعرف منو، ماشي؟
ايريم: ماشي بس وهسه شلون؟
مهيائيل: هذا جبان ميكدر يسوي شي لو بي خير احتفظ بالمراسله مو يحذفها يعرف عدل لو عرفت شنو اسوي بيه.
ايريم: شنو تسوي مثلاً؟
مهيائيل: أخلي يطك اصبعتين بنص المكبره.
صدك ضحكني بهاي الجمله سكتت من كال.
مهيائيل: وجناتج نخلقن بس للأبتسامة لتسمحين لأحد يخليهن ينعقجن.
خجلت ومن الخجل سديت الموبايل وخليت راسي على المخده اول مره أحد يحجي ويايه بهاي الطريقه برضاتي لو غصب لازم فكري ينشغل مو حُباً وإنما فضول وسؤال اريد اعرف جوابه ليش اني، وبالأخص بحياتي كلها مشايفته ولا اعرفه وحتى هو جديد انتقل لهاي المنطقة، كُل شي صار فجأة لدرجه مكدرت اتخذ قرار واعرف مشاعري شنو هي.
___
ياسيم: واكفه اطبخ وي أمي وصارت ضربه قويه فززتني من مكاني درت وجهي لكيته واكف ومكتف ايده لصدره ويم رجليه كلاص مطشر والكزاز واصل يم أمي اللي واكفه يم الطباخ بسرعه صرخت.
تالين: أعمى ماتشوف!!!
جاوبها بهدوء بس نظره عيونه مفترسيها.
مهيائيل: العمى العماج، وموت الخذاج، وكبر الطماج، أو اوزع بفاتحتج جُكليت واجيب معزوفه وديجي بمكان الملايه واللطم، وأخلي فرقه كامله مال رقص وفلوس الفاتحه اكيتها عليهم أو اراويج مهيائيل بوجهه الحقيقي.
صفن شويه بيها وعلى ثغره ابتسامه يسوي هاي الحركه دائماً من يريد يضوج شخص ويحرك اعصابه ونجح بهذا الشي من كالت.
تالين: الكبر يطمك قبل لايطمني واني اركص بفاتحتك هجع مو انت.
جاوبها بستفزاز أكثر.
مهيائيل: ذكرتيني نسيت شغله مهمه، انتِ ما الج كبر اصلاً اعضائج اتبرع بيها للحيوانات ولو خطيه يصير بيهم تسمم اكيد ميتحملون اكل منتهي صلاحيته بس يلا مو مشكله اهم شي يشبعون بعدين أخذهم للطبيب، خليني اكمل تونه لتقاطعيني، وين جنت؟
اها تذكرت اي، اعضائج نشمرها وبعدين نفصل جسمج بالمشرحه، المخ يفيد لأهل السحر يعني انطي لميمون لان اني تلعب نفسي منج خاف متدرين فكوني مطمأنه مستحيل المس شي يخصج، بس احرص على انو كُل قطعه من جسدج تروح لمكان أمين يعرفون شلون يعتنون بيها، وبهيج نستفاد بفلوس الكبر والجنازة والكفن وغيرها من الأمور الروتينيه المعتاده بالدفنه، وانت تعرفين المخاسير شلون تكون خاصه من ناخذج بكوستر وي المعزين وغده لازم الهم بعدين ثلاث ايام فاتحه وجيب الغده ورجع العشا كل هاي الأمور تكلف اكيد وهذا غير الخميسات بعدين الأربعينيه ومن ثم السنويه والثواب ولازم احنه بكل مناسبه موزعين فنختصر هاي السالفه كلها ونكول ماتت غسل عار،
سكت شويه بعدين كمل بكل برود وهو عاقد حاجبه كدام امي اللي شالت نفسها وركعتها من الغضب حسيت للحظه راح تنجلط من كد ما صار وجهه أحمر دم.
مهيائيل: مسألتيني شلون راح يصير قتلج!!!
ابتسمت مستهزءه وكالت.
تالين: إعدام لان قتلتك.
مهيائيل: له له له يومج قبل يومي، بعدين سوالفج كلها حافظها ومتعبر عليه اموتج وادفنج بالحديقة واكول شردت، لو اوديج للشماعيه واخلص منج، وإذا ستحيت كُلش اخذج لدار عجزة، ويمكن اشمرج بحديقه الحيوانات الله أعلم كل شي توقعي من واحد مثلي ماعنده مُعتقد وضارب الدنيا عرض الحايط، وأعتقد كلامي هاي المره وصل لأن مره ثانيه اسويج وصله وصله واشمرج للحيوانات وانفذ وعدي من صُدك،
وانتِ برسيم اصعدي وي رولين للغرفه ساعديها بشنو تريد لان العصر يجون يسون الغرفه العمال.
ياسيم: تمام خويه.
اجيت امشي سحبتني من أيدي وكالت بعصبيه.
تالين: معليها بيك روح نظف غرفتك انت ،ياسيم متتحرك من مكانها.
مهيائيل: شنو رأيج ترحين تنظفيها انتِ بما انو اخذتي دور الوالده كملي هذا الدور للأخير وسوي كل الواجبات تدرين مابقى شي للعرس.
تالين: لو تموت أيدي ماتنمد على شي يخصك.
مهيائيل: نمدت وراح اكسرها بطريقه تخليج تموتين من الألم ومحد يساعدج واني اعلمج شلون تندكين وياي.
عدل غترته وقبل ميطلع صاح بصوت عالي.
مهيائيل: الساعه اربعه يجون العمال اذا لكيت كشايه بالغرفه احسبي حسابج نايمه يم البزازين تونه.
رائف: وأخيراً شرف ابو طول الحلو، اي فهمني وين جنت انسمط دَاسِم من الحر.
ميمون: صار ساعه منتظريك وين ختفيت.
مهيائيل: بزونتي جوعانه شمرتلها أكل واجيت.
رائف: اكليش؟
مهيائيل: تونه بس منتهيه صلاحيتها يمكن راح يصير عدها سوء هظم خطيه.
ميمون: متبطل سوالفك وياها مو كبرتوا ثنينكم.
مهيائيل: من تدخل بأشياء متخصها هاي النتيجه، وسد موضوعها بشرفك ماريد تلعب نفسي، ويلا امشوا تأخرنا.
رائف: مكتلي وين تريد نروح؟
مهيائيل: لسوك مريدي يعني وين نروح كُل مره؟!
رائف: اي بس اليوم مو الموعد.
مهيائيل: اكو شقه جاين عليها مستأجرين وبعدين نطلع بطريقنه نجيب أغراض للشغل محتاجهم ونكمل كم شغله.
رائف: لعد اني نازل راس الشارع مالي شغل بسحورتكم.
مهيائيل: اكعد عاقل لا هسه اعميك بسحر.
ميمون: لازم تتعود على الشغل في حال صار شي علينه انت موجود.
مهيائيل: اني هذا بثور ما اطلعه تريد اسلمه شغلي!!
ميمون: لتخاف يجي يوم يصير بس هو وبس وذكرني.
مهيائيل: يجوز هو كُل اغبر صار براسه خير بعدين وهو ما شاء الله عليه القائد مالتهم.
رائف: منو هُمَ؟!
مهيائيل: الحمير من امثالك عزيزي.
رائف: رحمه الله والديك عود اني اخوك الصغير جا شخليت للغربه؟!
مهيائيل: تدلل من عيوني كم رائف عندي اناا؟
رائف: اهانه لحقوق الانسان راح ارفع عليك قضيه.
مهيائيل: هو وين اكو انسان مُحترم شو تمسلت انتَ.
رائف: غير انت اخوي طلعت عليك.
مهيائيل: والنعم مني بس انا لا اعرفك ولا انت تعرفني متبري منك إلى يوم الدين.
رائف: اصلا بيوم الدين لو يسحلوني ويكولون يمعود اخوك هذا اكلهم لا غلطانين تريد السمعه المو زينه تلحكني حتى اهناك.
ميمون: ليش ولك شبينه؟!
رائف: لا تخبلون خاصه بالليل، تدرون اني بهيج وقت اهج ما أبقى بسبب الأصوات اللي اسمعها ما ادري النسوان وين رياجيلهن ،اهلهن عن سوالفهن هاي.
ميمون: صرت زلمه بسبب هذا الشغل بعد ما كبرت طلعنا احنه غلط صدك ياوسفه بيك.
رائف: على اساس جنت ترضعني من فلوسك مهيائيل هو اللي خلص عمره يصرف عليه.
ميمون: اي ومهيائيل سيد ويصرف عليك من فلوس المجالس مو ساحر مثلي وانكس مني هم.
مهيائيل: انتم فد ثنين تافهين وماعدكم سالفه اني اكول احسن شي تسكتون وتخلوني اسوق بهدوء.
رائف: شغل اغنيه وخلوني اصفن بالجامه واسرح بمخيلتي وياها خرب عرضها شلون جمال.
مهيائيل: انجب واحترم اخوانك احنه.
رائف: اتقبلها منك اخوي وتاج راسي وهسه بلا أمر عليك شغل اي شي خليني اطرب مو والله مليت.
شغل أغنيه اللي هي الأولى والأخيرة عند مهيائيل اني هم اخذني الواهس وكمت اطك اصبع واغني وي المطرب.
رائف: يمةةةةة الحُب يمةةةةةة ،يموت، يكتل، يلعب لعب بكلوب أوادمك ربييي.
مهيائيل: ادبسززز صوتك فضحتنةةةةة.
رائف: وعلى أساس صوتك الهادئ والرقيق زرفت طبلة أذني مو حنجره سماعة جامع.
مهيائيل: اسكت لا اشمرك من الجامه وحق الرب الخلقك.
رائف: شعجب مكلت وحق الرب الخلق مرتي دائما تحلف بيها يم تونه؟!
مهيائيل: تسكت لو شلون؟
ضربت حلكي بأيدي وحجيت.
رائف: هاي هي سكتنا متسوون واهس ابد لو باقي اقرأ ولا اكابل هيج وجوه.
___
مرت الايام بأسرع مايكون بدون ما أحس بيها، طول الفتره المرت مرتاحه لامكالمه ولا رساله من عنده وحتى الرقم المجهول مرجع دز شي، أبيل صار شويه احسن بس بعده راسه ملفوف لازم يخلص عشر إيام يلا يفتحها هاي غير أيده اللي مجبره، وكل هذا يوميه يطلع هو وبتال وامي تخبص نفسه بالصياح والحجي وياه بس ميفيد اعرفه يريد يدور بماضي مهيائيل متأمل يلكي عليه شي حتى يلغي هذا الزواج بس اني اعرف حتى لو اكو فأكيد مسكت الناس بسحره ومخليهم ميحجون اي شي عنه،
لبست فستان نيلي وشال أوف وايت وخليت عباتي على ايدي ونزلت بما انو بأجر العرس المشؤوم فاليوم الحنه من العادات والتقاليد اللي لازم تصير وي كل عروس والمفروض اكون سعيدة ومرتاحه بس بالحقيقه لو واحد يكُلي شلونج انفجر بيه بهاي اللحظه حتى نفسي مطايقتها وكارهه العالم بأجمعه،
لكيت أمي محضره نفسها اول مصارت عيني بعينها مسحت دموعها عرفتها جانت تبجي اصلاً هاي الأيام كلما اعبر على باب غرفتها بالليل اسمع صوت بجيها متدري على شنو تحزن واني اعرف بداخلها رفض جبير لهذا الزواج ويمكن هي اكثر وحده بس اكو شي يمنعها تحجي اذا مجان سحره فأكيد مهددها بشي معين،
لبست عبايتها وطلعنه لكينا منتظرنه بالباب صعدت أمي بصفه واني ليوره جان لابس نظارات بلون الدشداشه ثنينهم جوزي وغتره بيج، مهتميت ودرت وجهي للمرايه خلص الطريق كلنه ساكتين حتى وصلنه للصالون نزلنه وهو منطق بحرف لدرجه تفاجأت من هذا الصمت الغريب مالته حتى شلونج مكال، بداخلي فرحت وتأملت بلكي يلغي العرس ويبطل منه بس الطريق اللي كاعد امشي بيه هسه ميدل على هذا الشي.
كعدت على الكرسي وبدت أم الصالون تخليلي مكياج واني مركزه وي كُل حركه تسويها جان قبل حلمي افتح صالون تجذبني الألوان واحب التركيز بهاي التفاصيل للروج والمسكاره وغيرهن، خلتلي مكياج ترابي هادئ جان مناسب لملامحي وزايدني جمال إضافي على جمالي، رفعت شعري لفوك وسوته على شكل ورده كُلش عجبني شكله، خلصت وصار وقت البس الفستان، لونه وردي فاتح من ألواني المفضله صدره مفتوح وبيه كرستالات بسيطه تحيطه، بدون اردان ويصير خلاعي لنص الظهر، وبيه شكالات بسيطه بلون الجلد حتى تثبته على الأكتاف، مخصر على الجسم حد الخصر ومن جوه يصير منفوش، لبستني أمي البرنص وطلعنه بعد متصل بيها وكلها انو هو بالباب منتظرنه.
حسيت بأيدة لزمت أيدي اقشعر جسمي وحاولت اقوي نفسي ونجحت حتى وصلنه السيارة ساعدني وصعدت، بقى طول الطريق مشغل أغاني حتى وصلنه للبيت، ساعدني انزل وامي كملت ويايه باقي الطريق حتى دخلنه الصاله جانت مزينه بشكل خرافي اليوم خوالي وبناتهم يمنه عندي خالين الجبير عنده اربع بنات والثاني بنتين غير خالاتي اربعه ثنين منهن عدهن ثلاث بنات او وحده بنتين اما الصغيرة ماعدها بنيه بس ولد، كعدت على الكوشه وامي جانت عازمه مله بنات خوالي يسمعن اغاني عادي وكُل عائلة تختلف بتربيتها،
صافنه عليهن وهن ساعه يركصن وساعه يسولفن ويضحكن عقلي راح لبعيد جنت اتمنى لو هذا اليوم يكون مميز أو ارتبط بالشخص أللي ختاره كلبي حالي حال اي بنيه اتمنى احب وانحب بس ثنينهن مصارن، يكولون الأمنيات متتحقق وغصتهن تبقى بالكلب طول العمر، الشخص اذا كلبك مجان يركص فرح بيه بهيج إيام وتصير اسعد مخلوق على وجه الأرض شنو فايدة الحُب والرضا اللي يجي بعدين هاي اذا اجه،
رجعت للواقع على صوت امي وهي تكول.
تسنيم: استرن نفسجن حبايب العريس راح يدخُل يحنيها.
دخل رفعت راسي صارت عيني بعينه صُدك هيبة وجمال ونزاكه ورقُي مو لأن زوجي وامدح بي او لأن حبيته بس الحق يقال صدك حلو، محدد اللحيه وهو لا ابيض ولا اسمر شكله مجذب، عيونه واسعه ولونهم أسود يجبرك تصفن بيهن وبجمالهن، جان لابس دشداشه بيضه وغتره حمره وعكال، وبأيده لازم سبحه، ولابس ساعه فضيه ومحبس بأيد اليمين وبصفه الحلقه، وعطره المميز وصل قبله، من شفت الإبتسامه على شفايفه اني لا أرادي ابتسمت عنده حضور غريب يخليني افقد عقلي وما أكدر اتحكم بتصرفاتي،
كعد بصفي اخذ أيدي اليمين وخله بيها الحنه بعدين أيدي اليسره ومن العادات لازم احني أصبعه الخنصر فكرت راح يعارض بس فاجأني من مدلي أيده وتقرب يم أذني وهمس.
مهيائيل: كُل شي من ايدج حلو حتى لو جان موتي.
رفعت عيني اله بسرعة وحجيت بخوف.
ايريم: اسم الله.
رجع همس بصوت ناصي بس اني اسمعه.
مهيائيل: ابوسهن.
عقدت حاجبي وحجيت.
ايريم: منو هن؟
مهيائيل: اللي كالن اسم الله.
حسيت نفسي راح افقد الوعي من الخجل وهو الأخ ولا كأن عجبه الوضع وبقى كاعد بصفي، اني هم ستغليت الفرصه وماعرف من وين اجتني الشجاعه ومديت أيدي وكرصته من زنده التفتلي وهو عاقد حاجبه من الألم حركت حواجبي بمعنى بكيفي وضحكت هو هم ضحك بوجهي، يجذبني أسلوبه غصب ويخليني صافنه بيه محسيت عليه إلا وهو ساحبني من أيدي خله أديه على صدره وهو حاوط خصري بأديه راحت مسامعي لصوت اغنيه التفتت لاخته لكيتها كاعده يم الديجي الواضح منطيها تعليمات لأن الاغنيه متعوب عليها.
نتمايل اني وياه على نغمات الأغنيه حسيت نفسي مو بهذا العالم مثل الانسان المسحور اللي ميفكر بعقله، ما اشوف غير اعيونه ولا أحس بشي غير لمساته، مرت فترة واحنه على هل وضع خلصت الأغنيه وختم الرقصه بقُبله على خدي، قطعنه الكيكه وكلني أو وكلته وخلصت أجواء حقيقه جانت جميله جداً ومتنسى،
بعد مطلع بقيت شويه كاعده تعبت من البدله وحسيت نفسي كُلش ختنكت أشرت لأمي تساعدني اصعد هي مكالت لا كومتني وصعدنه، نزعت البدله وشمرتها على الجربايه اخذت حمام اريح بي جسمي وخليت راسي على المخده ونمت، من اليوم اللي لبسني بيه الحجاب لحد الآن مرتاحه من الأحلام والكوابيس بس دائماً عندي هذا الشعور وكأن شخص مشاركني الغرفه وماعرف شنو السبب،
مر وقت ماعرف شكد صحيت على صوت امي تكعدني للأذان صليت وقريت قرآن شويه وبقيت كاعده بالغرفه استحي انزل يمهم صعدن يمي بنات خوالي وغيرلي جو، بقينا نسولف ونضحك حتى صارت الساعه عشرة نعست حيل فرشتلهن ونامن واني على رغم النعاس مكدرت انام عقلي كُله اباجر وشنو راح يصير ويايه وشلون اتقبل الحياة بهيج بيت مليان شياطين صحيح اني افقد السيطره على نفسي من يكون موجود بس مجرد لحظات بس يطلع ارجع اتندم أو أللوم نفسي ليش هيج سويت جان المفروض ما اخلي يتقربلي لو شنو يصير وابدي اخطط بعقلي لو حاول مره ثانيه يعيد نفس الحركات امنعه، وتجي المره الثانيه وابقى مثل الدوله صافنه بوجهه وتقبل كُل تصرفاته برحابه صدر بدون ما أسوي اي شي.
صحيت من أفكاري على اشعارات الموبايل فتحته جانت فيديوهات من عنده، فتحتهم شفت اخوانه الثنين وهو بنصهم، كلهم لابسين زي عربي ويركصون جوبي ابتسمت على منظرهم الحلو بعيد عن شغلهم بس احسهم كلب على كلب، خلص الأول الفيديو الأول فتحت الثاني جان تكمله للركصه أيدي اخذتني للاعجاب هو بسرعه طلع متصل جارِ الكتابه كلبي راد يطلع من مكانه وحيل خُجلت، دقيقه أقل وصلني المسج.
مهيائيل: "من نخلقت لسه هذا اسعد يوم اعيشه بكُل حياتي"
معرفت شنو اجاوب بقيت ساكته رجع كتب مره ثانيه هم شويه وصلتني الرساله مالته.
مهيائيل: "انتِ دُعاء امي إليه"
اقشعر جسمي من هاي جُملته فكتبت.
ايريم: الله يحفظها ألك.
رجع جاوب.
مهيائيل: الله أخذها مني.
نكسر كلبي عليه ومعرفت شنو اكتب بقيت صافنه بكلماته وعقلي راح ليوم العقد وشلون جان يحجي وي ذيج المره اللي هي امه هسه عرفت ليش مجان يحترمها واني كعدت أخذ غيبته وحجيت عليه شكد، طلعت مو امه الله يعينه اكيد مسويتله شي والا ليش يحجي عليها هيج،
رجعت انتبهت على رسالته.
مهيائيل: لتفكرين هوايه بيه الماضي مات وي اهله المهم المستقبل اللي راح تكونين موجوده بيه ويايه.
ماعرف ليش صار عندي واهس افتح وياه موضوع فكتبت.
ايريم: واثق حيل!!
مهيائيل: فوك متتخيلين والدليل حجيج ويايه هسه.
ايريم: هذا مو دليل على انو اني قبلت بهذا الزواج.
مهيائيل: المهم انو تحجين وياي اما السبب مو مهم.
ايريم: لشوكت؟
مهيائيل: حتى تحبيني من اعماقج.
ايريم: وهذا الشي مستحيل يصير.
مهيائيل: واضح انو نسيتي شنو صار وياج اليوم وشلون ذبتي بعيوني ونسيتي نفسج بين احضان الشيطان.
ايريم: وضع جديد عليه أكيد تلكيني متوتره.
مهيائيل: التوتر يختلف عن الأستمتاع.
ايريم: الواضح تريد تدخل بمواضيع ما احبها تصبح على خير.
مهيائيل: وانتِ من اهلي.
غلقت الخط وحاولت قدر الأماكن انام واهرب من الواقع بس بأغلب الأحيان الأشياء اللي نريدها وبشده متجي بالوقت المناسب، وبين فكره وفكره صار وقت الصلاة واني بعدني كاعده كمت توضيت وصليت ورجعت احاول انام مره ثانيه وبعد مصارت الساعه سته يلا غمضلتي عين.
تسنيم: ايريم، ايريم، ايريمم.
ايريم: هممم.
تسنيم: كومي وكعتي كلبي لشوكت تبقين هيج تسوين بيه؟
على يوم اموت بسببج.
ايريم: شكو شنو مسويه؟!
تسنيم: صار ساعه اكعد بيج كومي الساعه عشره الصبح بعد منلحك شنو ناسيه اليوم عرسج ولازم نروح للصالون من وقت؟
ايريم: خابريه خلي يأجل.
تسنيم: وليش بلا؟!
ايريم: مابيه حيل ونعسانه مو وقت زواج وداعتج.
تسنيم: ولجج ايررررريمممم.
فزيت فزه من مكاني على صوتها وخليت أيدي على كلبي صُدك نرعبت.
ايريم: صار انفجار، احد مات؟
بشريني وكولي لغوا العرس.
تسنيم: فال الله ولا فالج كومي كدامي يلا تريكي سريع ورانه صالون وشغل اتأخرنه.
ايريم: عود شنو هاي التقاليد ليش ميصير اروحلهم هيج على شنو بدله وخبصه.
تسنيم: اسم الله قابل ماعندج اهل لو فصليه!!!
ايريم: ليش شبيها الفصليه مو بشر؟!
بس هذا حظنه احنه النسوان طول عمره ميكعد وياكم.
تسنيم: كومي جنج وحده عجوز اتحركي يلا.
كمت واني اتأفأف والله نعسانه هسه شنو هو الزواج واعيف نومي على مودة؟!
رحت غسلت وجهي ونزلت للمطبخ تريكت على كيفي صُدك اليوم مزاجي رايئ على آخر حبايه حابه انرفز الكُل وماعرف شنو السبب على رغم البارحه مجان بيه شي، اجت امي تصيح يمي حتى استعجل واني ابرد من قالب الثلج، بعد فتره طويله خلصت غسلت وفرجت اسناني وأخذت حمام على راحتي طلعت شفته الساعه 12م وامي شويه وتلطم والغريب عاجبني احرك دمها وابتسم باستفزاز، واحد وبعقلي يكُلي هيج سوي علمود تراويهم شلون يجبروج على زواج وحياة مترديها،
خلصت كُل شي وصارت الساعه وحده وصلني إتصال من عنده فتحته وخليته على أذني اجاني صوته الهادئ وهو يكول.
مهيائيل: وين انتِ؟
ايريم: بالبيت.
مهيائيل: تعرفين اليوم شنو مو؟
ايريم: خميس قابل أحد.
مهيائيل: بس هيج؟!
ايريم: اذا تريد تعرف التقويم فموجود بالموبايل ميحتاج تتصل بيه.
مهيائيل: نزعتي الحجاب؟
ايريم: اني بالبيت اكيد انزعه.
مهيائيل: ايريم اليوم عرسنا فأريد منج تنزلين علمود اخذج للصالون اني بالباب واكف ومنتظرج يلا ياقُفلي والمفتاح اضربي اللي يحجي بعقلج هسه بوكس وعاندي وتعاليلي.
ايريم: اريد الغي الزواج شو معجبني ازوجك اليوم.
مهيائيل: ماشي نلغي بس انزلي علمود نتفاهم راح انتظرج بالأستقبال لتتأخرين لأن عندي شُغل مهم بعد شويه.
ايريم: اذا هيج مو مشكله البس حجابي أو انزل.
مهيائيل: اذا ماراويتج نجوم الليل بعز الظهر ما اطلع ابن أمي وحده ادبسز تريد أدمر حياتي بيوم عرسي انتظري وشوفي شنو محضرلج من مفاجأة.
نزلت لكيت أمي واكفتلي يم الدرج وتخزر بيه حركت راسي بمعنى شكو اشرتلي على الإستقبال ابتسمت بوجهه ودكيت الباب ودخلت بعد مسمعت صوته، اول مسديت الباب نهض من مكانه باوع بعيوني والابتسامه على ثغره اقترب من عندي بخطوات بطيئه حتى صار ميفصلنه شي منتبهت على نفسي الا واني بين احضانه كال بهمس.
مهيائيل: منو يعيف ملاك ويختار شيطان ويردوني اعيفج مو اغبياء بله؟!
حجيت بتوتر بسببه.
ايريم: منو هُمَ؟
مهيائيل: مو مهمين لتفكرين هوايه بيهم خلينا عايشين اللحظه.
انتبهت شويه على وضعنا بسرعه حجيت.
ايريم: وخر وخر كلهم بالباب واكفين ليدخل أحد ويشوفنا والله تصير مصيبه على راسي.
ابتعد شويه وعدل ملابسه ورفع حاجبه وكال.
مهيائيل: افااا واني موجود هيج يصير وياج تعقليها؟!
ايريم: اي واذا لتنسى اني وياك بس عقد بينه يعني ماكو زواج كامل لحد الآن.
مهيائيل: ايصير كامل اليوم مو مشكله.
ايريم: شنو قصدك؟
مهيائيل: اذا متقبلين يكمل الزواج اليوم ما اضمن نفسي شنو اسوي هسه اني وانتِ والباب مسدود وشفتي قبل دقيقه وين وصلنه برأيج أكدر اجازف واترك كل شي ابساطه.
حجه هيج واقترب أكثر بسرعه فتحت الباب وركضت ومهتميت لصياح أمي ورايه اول مسديت الباب سمعت صوت الموبايل فتحته لكيتها رساله من عنده كاتب بيها.
مهيائيل: "ربع ساعه انتِ كاعده يمي بالسياره لان المره الثانيه ما اضمنلج ابقى عاقل"
شمرت الموبايل وأخذت نفس عميق عرفت ماكو فايده من العناد وعقلي رجع لمكانه غيرت ملابسي سريع ونزلت أمي وخالتي اول مشافني هلهلن مراحت ويايه غير امي وام مقتدر رفيقه أمي الأبديه تعيف خواتها علمودها علاقه حُب مو بس جارة،
طلعنه من البيت صار بوجهي جان واكف يسولف وي ابويه من شافني ابتسم واني من الخجل تمنيت اختفي من هذا العالم، صعدنا بالسياره وخلص الطريق يسولف وي امي وام مقتدر ومن الخوف والرهبه منتبهت عليهم أبد حتى وصلنه للصالون ونزلنه،
سوتلي مكياج كلش فخم وراقي بنفس الوقت الألوان اللي ستخدمتها كُلش فاتحه وتنطي حيويه للوجه ختمته بروج وردي، وسوت تسريحه مشابهه لتسريحه البارحه بس بيها شويه تعديلات لكن نفس رفعه الشعر وتركت كم خصله على وجهي، خلصت وصار وقت البدله، بيضه ناصعه وجمالها خرافي مفتوحه من الصدر بس اردانها تول والظهر نفس تصميم الردان، مخصره على الجسم بس شويه يم الركبه بيها نفشه بسيطه، لبستني أمي البرنص وخالتي بقت تهلهل وطش جُكليت، لزمني من أيدي وصعدني بالسيارة خلص الطريق اغاني واني مو يمه يسولفون ويضحكون واني بغير عالم رحنه للقاعه صارت دخوليه تجنن كعدت على الكوشه وبدت الفقرات، واني بالي كله بغير مكان شويه ودخل وكعد بصفي، لزم أيدي واخذني لمكان الرقص رقصنا سلو وانتبهت على ملابسه جان لابس نفس البارحه بس التصميم يختلف واللون ناصع البياض حيل، بالأضافة للعبايه اللي اول مره اشوفه يلبسها، محاوط خصري وايدي على صدره اعيوني بعيونه بس عقلي مو هنا، حتى خلصت الأغنيه قطعنا الكيكه وغيرنا مكان الخواتم وانتهى كُل شي وصار موعد الرحيل من بيتي وعائلتي وغرفتي،
أول ملزم أيدي ابويه وسلمني بأيده بدون ميحجي حرف قاطع طريقنه أبيل بسرعه نزلت دموعي وخاصه من كال.
أبيل: زواجك منها صار غصب عليه اما انفصالكم فهذا اللي اريده وعليه ياويلك تزعلها بيوم لان الدمعه اللي توكع من عينها انزل منك دم اضعاف اضعافها خليها ابالك.
حضني ورجع خله أيدي بأيده ودعت عائلتي وطلعنه خطرت على بالي كلمات جنت دائماً افكر بيهن من زمان،
كم وحده نغصبت على الزواج بأسم العادات والتقاليد؟
وكم وحده لبست الكفن بأسم النهوه؟
كم وحده تشيعت لبيت الزوجيه بأسم الفصليه؟
وكم وحده دمرت حياتها واحلامها علمود الفستان والزفه؟
وكم قاصر تحطمت ودمرت بأسم هاي حياة المرأه؟
احنه النساء نُدفن بسبب الحُب، ونقتل بسبب الحُب ونُحطم بسبب العادات والتقاليد ونُحرق فداء لأشخاص ميستحقون لحظه من عمرنا،
ردت الغي كُل شي واضرب الجميع عرض الحايط بس عرفت نفسي تأخرت هوايه من سمعت أصوات اخوانه شلون محتفلين ويركصون، ومن دخلت السيارة وبدأ يسوق، عرفت نفسي شكد تأخرت بوقت صار الندم ميفيد شي،
حياة جديده، مستقبل مجهول، وماعرف بذلك البيت شنو مضموملي،
طريق اسود ماكو احد أصوات بعيدة وهمس بأذني، شي حار ينزل من جسمي بين الوعي واللاوعي شفته تقدم مني بدشداشته البيضه وبوجهه النوراني لزم أيدي ورحت وياه لغير عالم.
يتبع..
البارت اكثر من 4200 كلمه.
اريد تفاعلكم بين الفقرات انشروا القصه شمعاتي وكبروا العائلة مالتنه،
تصبحون على الف خير وعافيه ورداياتي.
حسابي الانستا لأي شي يخص القصص مالتي..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!