للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
مهيائيل
الكاتبة (زهراء احمد)
_______
لم يبقَ عنديَ ما يبتزّهُ الألمُ
حسبي من الموحشاتِ الهمُّ والهرمُ
لم يبقَ عندي كفاءَ الحادثاتِ أسى
ولا كفاءَ جراحاتٍ تضجُّ دمُ
___
شفت المكان يخوف من صدك صحراء قاحله مابيها ظل شجرة مو بشر، نزل من السياره وضرب الباب بقوة اجه لجهتي وفتح الباب وسحبني من زندي حيل ودفعني بنص الصحراء وحجه بعصبيه.
مهيائيل: شايفه هذا المكان؟
تغيرت نبرته وصارت مرعبه كمل كلامه وهو يأشر على الصحراء باصبعه.
مهيائيل: تدرين احنه وين هسه؟
اشرت براسي بمعنى لا حرك راسه بعدين كال بكل خُبث وحقارة.
مهيائيل: هذا المكان بيه جن يجون المغرب ويجتمعون اهنا ويبقون للصبح وها هُمَ كفره يعني اذا مر واحد من منا بالوقت اللي يكونون بيه موجودين يكون كتب موته.
سألت بخوف.
ايريم: ليش؟!
الجن تكدر تقتل هم!!
مهيائيل: سؤال حلو جوابه اكيد يكدرون يدمرون حياتج لو يصنعون منج ملكه حسب انت واستخدامج الهم.
ايريم: وليش احنه اهنا؟
رفع طرف شفته بابتسامة وكال بضحكه خفيفه.
مهيائيل: حتى اراويج شنو أكدر اسوي بيج اذا ممشيتي عدل.
ايريم: شنو قصدك؟
مهيائيل: يعني باختصار يااا مرتي الغاليه أكدر وبكل بساطه اخلي اهلج مايعرفون ليلهم من النهار مثل وضعج واتعس وهاا سحري محد يكدر يفتحه لاسيد ولا مشعوذ حتى لو جان صبي.
ايريم: مستحيل هذا الشي بيد ربنا انت منو وتكدر تسوي هيج وتتحكم بحياة الناس بهاي الطريقه؟!
مهيائيل: يكول المثل اسأل مجرب ولا تسأل حكيم وانتِ خير مثال.
ايريم: وشنو ستفاديت من كل هذا مفكر انو ربي راح يعيفك هيج بدون عقاب؟!
مهيائيل: اني وربج نتفاهم انتِ اطلعي منها.
ايريم: تكفر بربك بكل وقاحه صدك انت واحد عديم أصل.
مهيائيل: له له له معقوله هيج تغلطين على زوجج امج معلمتج شلون لازم تحترمين شريك حياتج يحلوة؟!
بس يله مو مشكله تجين يمي واراويج عديم الأصل شنو يسوي.
ايريم: رجعني للبيت ماريد ابقى بهذا المكان.
مهيائيل: بس أني أريد أبقى.
ايريم: صحراء شنو شغلك اهنااا ما افهمم.
مهيائيل: بعدج متبتي من الصوت العالي على رغم تحذيري الج بس يله تتعلمين مو مشكله.
ايريم: مراح اتعلم وصدكني الاحترام من عندي مستحيل تأخذه لو تموت.
مهيائيل: خوش لتحترميني.
ايريم: شخص بدون إحساس.
مهيائيل: اي والله لدرجة صلافتج تعجبني.
الجو حار والشمس تضرب براسي دخت وتعبت حيل واني مماكله حسيت نفسي شويه وافقد الوعي، من شفت وضعي صار اسوء حجيت وياه بهدوء وعسى ولعل يسمع من عندي.
ايريم: خلي نرجع تعبت والله.
مهيائيل: قويه وتتحملين عادي.
ايريم: زين خلي نبقى بالسياره احسن ما واكفين بنص الحر.
مهيائيل: كلت تحملي بدون ملحه نص ساعه ونرجع.
سكتت مو لأن سمعت كلمته بس حسيت ماعندي قدرة حتى احجي واجادل، نزلت راسي لان كلش دخت ورجعت جسمي للسياره فجأة رفعته ملكيته موجود بقيت ادور عليه بعيوني حتى لو جنت حيل اكرهه يبقى هو الوحيد اللي يكدر يساعدني بهيج مكان من بعد ربي اكيد،
فجأة واني ادور صار هوه عالي وصوت مر على أذني ركزت شويه بيه هذا صوته الخوف سره بجسمي التفتت للمكان اللي سمعته منه ملكيت احد بلعت ريكي بخوف وبقيت اصيح بإسمه.
ايريم: مهيائيل، مهيائيل، وين انت؟
بقيت أصيح اكثر من مره بس ماكو جواب، بهاي اللحظه بالذات تمنيت الكاع تنشك وتبلعني صدك الموت ارحم بالف مره من الحياة وي هيج شخص،
كلبي دكاته صارت ألف المشكله الجو بده يظلم واني بنفس المكان وهو لحد هسه مبين أخير شي متحملت كعدت على الأرض اني وعباتي اللي متلت تراب بقيت ألوم حظي، نزلت دموعي من القهر والخوف رفعت راسي لرب العالمين وحجيت بغصه.
ايريم: آمنت بيك وبلائك بس لشوكت والله بعد ما اتحمل ابقى اهنا على ساعه انجن ومحد يعرف بيه وين أني.
غمضت عيوني بتعب حسيت على خطوات صارت قريبه من عندي رتعبت لدرجه حتى عيوني مفتحتها، إلى أن سمعت صوته وهو يهس بأذني.
مهيائيل: يلا كومي نرجع للبيت.
دفعته وكمت وحجيت بغضب وتمنيت لو عندي مسدس لو سجين والله قتلته بدون ما افكر بالعواقب على الوقت السيء اللي عشته اليوم بسببه.
ايريم: مو بس عديم أصل انت شخص غيره ماعندك عايفني اهنااا وحدييي يجيني حيوان مفترس مثلاً تطلعي حيه لو عكرب!!!!
لهاي الدرجه انت بدون ضميررر بس اريد افهم عندك براسك عقل لوو لااا متفكرر بيه ولو شوي؟؟
عجيبب.
اقترب حتى يلزم أيدي دفعته.
ايريم: حركه وحده اُقسم برب الكون اموت نفسي وعود تزوجني واني بالكبر.
باوعلي بهدوء وكال وهو يأشر للسيارة.
مهيائيل: اذا خلصتي اصعدي.
ايريم: شنووووو هلل برووود بمكان متبررلي وين جنتت تأمرني ولا كأن صاررر شيي يا أخي أنت شبيك ويايه بس اريدد افهمم!!
مهيائيل: جان عندي شغل وي الجن لهذا السبب ختفيت بس خدامي جانوا موجودين يمج بالأضافة الباب مالت السيارة مفتوح وانت ماشغلتي مخج ورحتي صعدتي شنو بيدي اسويلج مثلااً هممم؟!
حجيت بتلعثم واني ابلع ريكي بصعوبه.
ايريم: يعني الأصوات اللي جنت اسمعها والظل هم نفسهم؟
مهيائيل: اي هم نفسهم ليش متفاجأة هيج على اساس متعرفيهم انت اصلا المفروض متخافين بس شنو نكول رقيقه الست متتحمل، يله تعيشين وتشوفين أسوأ.
ايريم: صدك والله؟!
مهيائيل: شكو شبيج؟
ايريم: كل هذا وتسألني شبيج؟!
مهيائيل: ايريم فتهمي شغله كل شي يصير وياج اعرفه بالحرف بعدين كل اللي صار اليوم جان بسبب سلوبج ويايه، مجان عندي نيه اجيبج لهيج مكان واعرف جماعتي عليج بس شنو نكول هيج كاتب القدر واحنه لازم نعيش.
باوعتله وماعرف شنو اكول صدك هذا الإنسان مو عاقل رفعلي نظره وكال وهو مبتسم.
مهيائيل: اعرف وللأسف راح اخبلج ويايه.
تحرك واني بقيت صافنه عليه صدك خبل وهو يمشي شفت بزونه سوده وراه فتحت عيوني من الصدمه والخوف والله مجان اكو شي موجود هنا هاي منين أجت صحت بيه بصوت وحجيت وياه واني أأشر عليها.
ايريم: اوكففف، هاي منين أجت؟!
عقد حاجبه وكال بتساؤل.
مهيائيل: منو هي؟
ايريم: هاااي اللي وراك.
التفت وره ظهره ورجع تسائل مره ثانيه.
مهيائيل: غير افتهمم هي منوو شبيججج؟
ايريم: البزونه اللي وراكك شبيك متشوفهاا؟!
مهيائيل: له له له معقوله نلبستي!!!
ايريم: شنو يعني نلبست؟
مهيائيل: يعني نمسيتي من الجن تعرفين هذا المكان مسكن الهم فيجوز نلبستي يله مو مشكله من تجين يمي اطلعه من يمج.
ايريم: هاي البزونه شنو لعد؟
مهيائيل: جن على شكل بزونه.
ضحكت مستهزءه بوضعي واللي اني بيه هسه كمل مشيته وحجه بصوت عالي حتى يخوفني.
مهيائيل: تحركي لا هسه تشوفين أسد مو بس بزونه.
صعدنا وشمر بحضني بطل مي ونستله وحرك السيارة بدون ميكول شي جنت عطشانه حيل شربت المي بس مأكلتها تبقى نفسي ابيه يم الحرام، فتره طويله غفيت بدون ما أحس فتحت عيوني بعد وقت ماعرف شكد، الدنيا ظلمه وهدوء فضيع للحظه نسيت اني وين بعدين شويه شويه ستوعبت التفتت لكيته يمسح على رأسه ويهمهم بأشياء ماعرف شنو هي منظره كسر خاطري ماعرف ليش لا أرادي حركته من ايده بسرعه طفر وفززني، عيونه حمر دم نتبهت عليه شعره مخربط هاي اول مره اشوف شكله هيج لان كل مره التقي بيه لابس غترة حتى اليوم ماعرف شنو علاقته وي الابيض بكل مره اشوفه يلبسه وهو والغترة الحمره شكيت لوهله انو ماعنده غيرهن بس من انتبه على التصميم اعرف يختلفن، خفت من شكله خاصه من حرك راسه بمعنى لا ورجع ظهره على الكشن كام يتنفس بسرعه ورجع يهمهم يمكن فقد الوعي لو نام بس الصوت واضح وكأن اكو شي ديصير وياه اني مكلت لا اخذت موبايلي وشغلت سورة البقره ماعرف ليش خطر على بالي هيج أسوي او وأحد همسلي اكعده حسيته يصارع بين الحياة والموت ومن باب الإنسانيه ساعدته،
قربت راسي من أذنه وقريت آية الكرسي خمس مرات والتوحيد ثلاث مرات والحمد والمعوذات وقريت دعاء جانت امي تشغله يمي من جنت فاقده الحركه،
" الْخَالِقُ أَعْظَمُ مِنَ الْمَخْلُوقِينَ وَ الرَّازِقُ أَبْسَطُ يَداً مِنَ الْمَرْزُوقِينَ وَ نَارُ اللَّهِ الْمُؤْصَدَةُ فِي عَمَدٍ مُمَدَّدَةٍ تَكِيدُ أَفْئِدَةَ الْمَرَدَةِ وَ تَرُدُّ كَيْدَ الْحَسَدَةِ بِالْأَقْسَامِ بِالْأَحْكَامِ بِاللَّوْحِ الْمَحْفُوظِ وَ الْحِجَابِ الْمَضْرُوبِ بَعَرْشِ رَبِّنَا الْعَظِيمِ احْتَجَبْتُ وَ اسْتَتَرْتُ وَ اسْتَجَرْتُ وَ اعْتَصَمْتُ وَ تَحَصَّنْتُ بِ الم وَ بِ كهيعص وَ بِ طه وَ بِ طسم وَ بِ حم وَ بِ حم عسق وَ ن وَ بِ طس وَ بِ ق وَ الْقُرْآنِ الْمَجِيدِ- وَ إِنَّهُ لَقَسَمٌ لَوْ تَعْلَمُونَ عَظِيمٌ وَ اللَّهُ وَلِيِّي وَ نِعْمَ الْوَكِيلُ"
بقيت اصلي على محمد وآل محمد واستغفر بإذنه حتى هدء وسكت والقرآن بعد مشتغل ومعليه الصوت،
فتح عيونه بعيوني نتبهت على الحمار خف بحركه لا أرادية وكأني انسان مسير مينتبه على تصرفاته، مديت ايدي وعدلت شعره، فجأة ستوعبت شنو سويت وقبل ما أوخر لزم أيدي وقربني عليه أكثر صار ميفصلنا شي نطق بصوت تعبان وهادئ.
مهيائيل: أريد عمري يخلص بحضنج ياقُفلي والمفتاح.
دكات كلبي صارت ألف، مد أيده ومرر اصابيعه على شفايفي واني مستسلمه تماماً وكأن اكو شي مانعني امنعه احد مسيطر عليه ومخليني خاضعه، رفعت نظري اله بادلني النظره شفت اكو لمعه بعيونه، حسيت نفسي بحلم صحيت على كرصت أيده بزندي وهمس بأذني.
مهيائيل: ارجعي لمكانج قبل ما اسوي جريمه واحنه بعدنا بسم الله.
ستوعبت اني وين وشنو سويت على صوته بسرعه رجعت لمكاني وعدلت عباتي وساد الصمت بينه انتبهت صوت القرآن مختفي فتحت الموبايل لكيت الشحن مخلص اخذت نفس عميق وبقيت صافنه بالشارع وسترجع اللي صار، ليش هيج سويت وفقدت السيطره على نفسي واني اعرف عدل بداخلي كره جبيره اله مستحيل يتحول لحُب بهاي السرعه.
رجعت لواقعي على صوته.
مهيائيل: وصلنه يله نزلي.
التفتت اله دنيا ليل ستحيت احجي بس هو فهم عليه فتح الباب مالته وحجه بصوت عالي حتى اسمعه.
مهيائيل: مو لهاي الدرجه اني بدون إحساس انزلج وحدج بدون ما احجي لأهلج على التأخير اللي صار بسببي.
فتحت عيوني بصدمه هذا نفسه اللي عاقبني اليوم بسبب صوتي العالي وخلاني انجن الا شويه لو غيروه؟
نزلنا اجيت افتح الباب لزم أيدي ومنعني وهو يكول.
مهيائيل: ميصير غير وياج ضيف شلون هيج تفتحين الباب، خلي ندُكه بالأول وناخذ اذن اهلج يجوز ميردوج حتى يصير عذر شرعي واخذج ويايه للبيت وتنامين بنص حضني.
حجيت بسرعه بدون مقدمات.
ايريم: انت واحد ماعندك أخلاق.
مهيائيل: اي وعيونج صدك افقد كل الأخلاق من تصيرين يمي.
اجيت اجاوب نفتح الباب درت وجهي شفته عيونه حُمر صدك خفت حجه بعصبيه.
أبيل: وين جنتوا لحد الآن وليش اتصل بيج متجاوبينن؟
ردت احجي وقفني وهو يجاوبه.
مهيائيل: على كيفك اهم شي الصحه تره خلي ندخل للبيت وعود اسأل براحتك.
أبيل: فوتي جوه خلي نشوف الغضب شنو يكول.
مهيائيل: مو كلنه أعصابك مو زين عليك.
سمعت الكلمه وفتت بس بقى الفضول يلعب بداخلي، وكفت وره الباب وبقيت اسمع حجيهم.
أبيل: وين اخذتها ليش متأخرين لهذا الوقت؟
مهيائيل: هي مرتي لتنسى من حقي أخذها لأي مكان أريد.
أبيل: بعدك متزوجتها حتى تحكمها ماطول بعدها بيت أهلها مو من حقك تاخذها بدون علمنا وتبقى لوقت متأخر منعرف عنها شي.
مهيائيل: اهلك عدهم علم اتصلت بالوالد وهو يعرف هي ويايه يمكن هو مكلك وهاي مشكله عائليه اني ما ادخل وهسه اترخص لازم ارجع للبيت تأخر الوقت خاف يعصبون مني وتعرف اني اخاف من الصوت العالي.
جان يحجي وياه بستهزاء ولا مهتم ابدد عجيب أمره شكد باردد، سمعت خطواته عرفته بتعد بس تفاجأت من سمعت صوته وهو يكول.
مهيائيل: كول لبتال يلتهي بحياته ويبطل يسأل عني لأن لو يموت نفسه مراح يلكي شي عليه، أودعناكم.
راح واني دخلت بسرعه ماريد احجي وي احد، صعدت لغرفتي شفتها الساعه سبعه ونص اخذت دوش سريع وغيرت ملابسي وصليت كل الصلوات الفاتتني اليوم، كملت ونزلت جوه ميته جوع اكلت وصعدت خليت راسي على المخده وبقى عقلي يسترجع الاحداث ومن التعب نمت بدون ماحس.
___
كاعدين نتعشا سمعت صوت الباب مال البيت نضرب بقوة شويه ودخل بغضب وصرخ بصوت عالي.
مهيائيل: تلووووون.
كام ابويه من مكانه وصرخ بيه.
دَاسِم: صوووتك لتعليه على أمك واني موجود لا اكسر راسك، مو كبرت وصار بيك خير وكمت اطلع عضلاتك علينااا اموتك بيدي ومايرفلي جفن وانت تعرف اني منوو.
مهيائيل: تخسى تصير امي، وقبل متهدد مره ثانيه لازم اذكرك اني مهيائيل لو نسيت والله ابهذل أحوالك واخليك تندم على الساعة السودة الشفتني بيها، هاي المره مراح تنام بهذا البيت تروح لهلها اكيد شتاقولها صار فتره طويله ماراحتلهم.
دَاسِم: متروح واذا معاجبك اطلع انت من البيت.
ضحك بصوت عالي وكال بنبره شيطانية.
مهيائيل: ليش يحلو نسيت نفسك شلون تنازلت مثل الشاطر عن البيت وصار بأسمي؟!
صاير عندك فقدان ذاكره يمكن زهايمر مبكر احسن حتى اشمرك بأقرب دار عجزة لان لو تموت ما اتقرب بيك من الله.
دَاسِم: طيح الله حظك هيج تحجي وي ابوووك شكد ادبسزز لعد وقليل تربيه.
مهيائيل: بهاي وياك حق والا اكو واحد متربي عدل يكابل هيج وجوه قذره بيته، وهسه يلا عجبني ثنينكم تابتون بره ماريد اشوفكم كدامي.
دَاسِم: مراح اطلع اريد اشوف شنو تسوي؟
مهيائيل: جبتها لنفسك أكلها معدله لعد.
صعد لغرفته واني بقيت صافنه حتى فززني صوتها.
تالين: مو كتلج لتخافين ابوج يحلها.
ياسيم: ماحس نحلت.
تالين: مايكدر يسوي شي صدكيني.
ياسيم: الله يسمع من عندج.
كام ميمون اللي بقى ساكت طول المشكله اللي صارت يفتح الباب رفعت راسي شفته نازل متعطر ولابس دشداشه نيلي وغتره بيضه لافها عماني هاي طريقته باللبس بشكل دائم من شفته وشافني،
كعد على الكرسي واخذ قطعه خيار أكلها ورفع راسه لأمي وكال.
مهيائيل: مره مثلج بس يلا مو مشكله نتحملها شوي مصيرها تروح للمكان المناسب للشي الغير مرغوب بيه.
تالين: شنو قصدك؟
مهيائيل: لو جنتي ذكيه شويه عرفتي قصدي بس انت والغباء عِشرة عمر.
تفاجأت ابويه ساكت منطق ولا كلمه وهو يحجي منطلق بدون ميهتم صدمني من كال بكل ثقه.
مهيائيل: اليوم معزومين انت وابليس عند بيت اهلج كالوا منكدر منام بدونهم يردون يحتفلون بيكم يمكن وميمون راح يوصلكم لهناك.
دَاسِم: اي ان شاء الله يلا كومي توله غيري ملابسج حتى نروح.
تالين: ماروح لأي مكان اهلي اذا مشتاقيلي يجوني لبيتي.
مهيائيل: مو هو ملجأ ايتام مو كافي عليه متحملكم ابيتييي.
جر آخر كلمه بحكله وهو مبتسم بأنتصار لأمي صدك عرفت وقتها انو هو مو بس حجي ابدد.
راحت امي وره ابوي وهي تدعي على مهيائيل بصوت ناصي حتى ميسمعها بس وين هذا يخفي عليه شي، اجيت اكوم ألم المواعين واغسلها وقفني وهو يكول.
مهيائيل: عبالج نسيت؟
بلعت ريكي وحجيت بخوف.
ياسيم: لا.
مهيائيل: اللي صار اليوم اعتبري درس اني ماحب احد يتجاوز على الأكبر من عنده فانتبهي لكلامج مره ثانية.
ياسيم: ماشي.
مهيائيل: عفيه وهسه روحي بوجهج للغرفه شنو متسمعين لطلعين ابد خلي هيتفون باذنج وشغلي قرآن ونامي.
صعد لغرفته وعيني عليه قبل شويه راد يضرب ابويه هسه صار ميحب احد يتجاوز على الأكبر من عنده والله غريب هل رجال، اني هم ماكلت لا لميت المواعين وغسلتهم وصعدت لغرفتي ونمت بسرعة اعرف شنو يقصد بكلامه بس تعودت وصار شي روتيني بكل يوم لهذا السبب ما أهتم.
___
فزيت على صوت الموبايل وهو يرن بعدني نعسانه سحبته بدون ما اشوف منو المتصل وفتحته وخليته على أذني ويمكن رجعت غفيت رجعت صحيت واني اسمع صوت جداحه ركزت اني وين وشنو هذا الصوت رفعت راسي لكيت الموبايل يمي على المخده ومفتوح السبيكر نتبهت على اسم المتصل بسرعة سديته ورجعت راسي على المخده وطردت كل الأفكار وحاولت ارجع أنام، سمعت مره ثانيه صوت الموبايل يرن فتحته بقلة صبر وحجيت بصوت عالي.
ايريم: نعمم.
اجاني صوته الهادئ ومبين ديدخن لان صوت الجداحه يمه يشغلها ويطفيها.
مهيائيل: ينعم عليج بوجودي.
ايريم: ليش متصل؟
مهيائيل: مرتي ميحقلي اتصل يعني؟!
ايريم: نعسانه وأريد انام كول شنو تريد؟
مهيائيل: اريدج تكدرين تجين يمي هسه؟
ايريم: استغفر الله متصل بيه ومكعدني من النوم وتكلي هيج!!!
مهيائيل: شكو بيها ميصير تجين؟
ايريم: شربان شي انت؟
مهيائيل: مدري يمكن صوتج والخمر ينطيني نفس المفعول.
ايريم: صاحي؟
مهيائيل: له له له معقوله صاحي وما اجيبج هسه والفج بحضني والعن والديه اللي يكعدنا من النوم.
ايريم: اذا تبقى تحجي هيج اسد الموبايل.
مهيائيل: متكدرين، المهم سولفيلي شنو سويتي من وصلتج لحد الأن؟
ايريم: ليش هذا السؤال؟
مهيائيل: أريد اسمع صوتج لأطول فتره ممكنه.
ايريم: نعسانه وراح انام تصبح على خير.
مهيائيل: منين يجي الخير وانتِ مو هنا؟!
ايريم: متأكد مبيك شي؟
مهيائيل: شنو رأيج شبيه؟
ايريم: ماعرف انت كول.
مهيائيل: لهاي الدرجه اهمج حتى تسألين هذا السؤال؟
ايريم: اي لان اريد اعرف اذا الله استجاب دعائي عليك لو لاا.
مهيائيل: ميحتاج تدعين هو بتلاني بيج بعد وبتلاج بيه.
ايريم: وكل بلاء اله وقت وينتهي واخلص منك وقتها.
مهيائيل: وذا حبيتيني؟
ايريم: مستحيل.
مهيائيل: مو كاعد اكول وذا، شنو يصير وقتها؟
ايريم: اني ما احجي بشي مراح يصير.
مهيائيل: عيفج من هاي السوالف وكليلي أكلتي؟
ايريم: اي بعد عندك شي ثاني؟
مهيائيل: جامعتج.
ايريم: شبيها؟
مهيائيل: راح تداومين بس إيام الامتحانات وبالنسبه للشهري فحسبولج أعلى درجه.
ايريم: وانت شلون سويت هيج؟!
مهيائيل: سر المهنه.
فرحت من صدك بس مبينت اله جنت شايله هم للامتحانات والحمدلله نحلت.
قاطع تفكيري صوته وهو يكول.
مهيائيل: وين سرحت الحلوه؟
ايريم: موجوده.
مهيائيل: اي شلونج؟
ايريم: صُدك ماعندك سالفه الأفضل تروح تنام.
مهيائيل: السحره مينامون هيج وقت.
ايريم: ليش؟
مهيائيل: يسوون سحوره.
ايريم: تشتغل بالليل؟
مهيائيل: متسمعين صوت الجداحه كاعد اجمع حبيبين سوا.
ايريم: والجداحه شنو دخلها بالسحر؟!
مهيائيل: شموع لعد شلون يشتغلن؟
ايريم: فكرتك دخن.
مهيائيل: واذا دخنت مراح تقبلين بيه؟
ايريم: بيها أو بدونها اني مقابله بيك منو كال العكس.
مهيائيل: مقبلتي بس تقبلتي.
ايريم: مفهمت؟
مهيائيل: تفهمين بعدين كدامنا عمر طويل نسولف بيه.
ايريم: منو يثبت بأي لحظه ممكن نموت.
مهيائيل: وأن، تبقى ارواحنا سوا.
ايريم: تريد تحبسني حتى بعد موتي!!
مهيائيل: يجوز اني اموت قبلج منو يعرف.
ايريم: شكد مجنت عزيز تنسي مع مرور الوقت أعمالك هي الوحيده اللي تفيدك.
مهيائيل: غلطانه الانسان اللي يعز شخص مستحيل ينساه لآخر العمر مو يوم ويومين، كل اللي ينسون عمرهم ماحبوا من اعماقهم.
ايريم: ليش مشيت بهذا الطريق؟
مهيائيل: مدري.
ايريم: تعاملني بغموض واني ماحب هيج إلى متى تبقى متجاوبني على اسألتي؟
مهيائيل: مو كل سؤال إله جواب بعض الأمور تبقى سر احسن.
ايريم: اني شنو بالنسبه ألك؟
مهيائيل: الدُعاء الوحيد المستجاب.
ايريم: ليش اني؟
مهيائيل: هذا السؤال حتى شياطيني ماتعرف جوابه.
ايريم: تحبني؟
مهيائيل: له له له كلبي مادك لحد الآن لأي بنيه.
ايريم: اي خوش مع السلامه رايحه انام.
مهيائيل: زعلتي؟!
ايريم: ليش ازعل؟!
مهيائيل: هيج ماعرف حسيت.
ايريم: لتحس انت آخر شخص افكر احبه.
مهيائيل: ميخالف عود، باجر حضري نفسج اجيج العصر ونروح نجهز سوا.
ايريم: ماريد.
مهيائيل: مو مشكله تردين بعدين.
ايريم: منسيت اللي سويته ويايه اليوم.
مهيائيل: لتنسين اني اريدج تذكرين دائماً.
ايريم: ومراح اسامحك لذلك لتعتبر حديثي وياك هسه لتفكر بيه صفحه جديدة ابداً.
مهيائيل: اني ما اتعب عقلي بهيج أمور لتخافين.
غلقت الموبايل وخليت راسي على المخده شويه وصلني اشعار رساله فتحته لكيتها من أبيل.
أبيل: كاعده؟
جاوبته.
ايريم: اي محتاج شي؟
أبيل: نزلي للمطبخ اريد احجي وياج بموضوع مهم.
ايريم: تمام.
نزلت لكيته واكف يم الثلاجه اول مشافني كعد واشري اكعد سويت مثل ميريد مطول هوايه وكال.
أبيل: وين اخذج اليوم؟
لتحاولين تجذبين اعرفج تره.
ايريم: ميحتاج اكذب كل مافي الأمر عقدنا وبعدها رحنه للمطعم.
أبيل: اي هذا يخلص ب12 الظهر وين رحتوا باقي اليوم؟
ايريم: للشسمه.
أبيل: والشسمه مكان؟
ايريم: اخذني حتى نجهز للعرس.
أبيل: وليش هو؟!
ايريم: اني هم ماردت والله وكتله رجعني بس هو مقبل لتزعل من عندي.
أبيل: مصدكج لتحلفين بس هذا الرجال ماعندي ثقه بيه لهذا السبب خفت عليج خاصه من تصلت مجاوبتيني.
ايريم: ردت اجاوب بس خلص شحن الموبايل.
أبيل: لتجذبين وتاخذين حرام علمود ترضيني أو وين مرحتي وياه يبقى زوجج مو مشكله بس خفت عليج لا أكثر.
ايريم: اسفه إذا خوفتك.
أبيل: ميحتاج تعتذرين مغلطتي بشي انتِ.
كمت وردت اطلع وقفني وهو يكول.
أبيل: اذا بعدج رافضه كُليلي لو اعرف اخذج واهاجر من البلد وما اخليج تنغصبين على شي مترديه.
غرغرت عيوني وتذكرت كلامه اليوم من هددني بيهم مستحيل اخاطر بحياتهم علمود سعادتي اخذت نفس وحجيت بابتسامه مصطنعه.
ايريم: بعد باجر العرس ماريد انزل راسكم بعدين هو خوش رجال مشفت من عنده شي مو زين.
أبيل: اول شي كلتيه هو الصح الوحيد من كلامج بس يلا مو مشكله سواء قبل الزواج أو بعده ابقى نفسي اني اخوج وهذا البيت بيتج واللي مكدرنه نسوي اليوم نسويه باجر خلي هذا الشي بعقلج دائماً.
درت وجهي وطلعت وبسرعة نزلت دموعي شكد حنين وشكد تأذة بسببي هيج شخص مستحيل اخاطر بحياته حتى لو اعرف اموت يم ساحر القرن.
___
ميمون: ليش كاعد هنا؟
مهيائيل: هيج بدون سبب.
ميمون: شنو سوت تالين وخلتك تعصب لهاي الدرجه؟
مهيائيل: تراكمات.
ميمون: هههههه من شوكت تسمع لعلم النفس.
مهيائيل: تغير مواهب ملازم نبقى على الشعوذة بس.
ميمون: ودَاسِم؟
مهيائيل: هو مثل جدر الفافون المطعج بعمره ميصير اله جاره.
ميمون: بس الاكل اللي ينطبخ بيه طيب لتنسى.
مهيائيل: خلص الاكل من زمان بقى بس الجدر ذكرى.
ميمون: كوم نام موزين عليك السهر.
مهيائيل: زين زين لتهتم.
ميمون: شوكت تبطل متعبت؟
مهيائيل: له له له مو اني اللي اتعب اني اتعب وبس.
ميمون: باجر يرجعون للبيت والشغل بعده مخلص شلون؟
مهيائيل: دبر نفسك كافي ساعدتك اليوم.
ميمون: مرتي واختك السبب جان لازم طلعهن هم.
مهيائيل: كدام عيني أأمن لياسيم اما مرتك فهاي مشكلتك ميخصني بيها.
ميمون: طلبوا من عندي سحر أسود وهيج نوع صعب اسويه وحدي ساعدني بيه.
مهيائيل: خلي وره العرس هسه مشغول.
ميمون: عندي موعد وياهم ما أكدر أأجل.
مهيائيل: خلي دَاسِم يساعدك هو خبره بهيج سوالف.
ميمون: على سيرة العرس شعجب قررت تتزوج بهاي السرعه؟!
مهيائيل: هيج شياطيني كالت وتعرفني اني مطيع الهن.
ميمون: الحجي وياك ضايع اكوم انام احسلي.
ياسيم: دخل واني بقيت اراقبه من الشباك رجع راسه ليورة وشغل اغنية وعله الصوت، وماعرف ليش هاي الاغنيه مميزة عنده.
___
فزيت من النوم وضوه الشمس يضرب بعيوني بقيت بفراشي مابيه حيل اكوم ماعرف شكد مر وقت وجت امي فتحت الباب وصاحتني انزل حتى نتريك، نزلت وياها ومابين شغل البيت والتنظيف والطبخ صعدت للغرفه علمود اصلي الظهر سمعت صوت الموبايل يرن قتربت من عنده كاتبه عليه اسمه.
«ساحر القرن»
فتحته وخليته على أذني مسمعت صوت أحد اجيت أسده فززني من صرخ.
مهيائيل: ويننننن جنتييي؟
جاوبته بهدوء.
ايريم: بالبيت وين جنت مثلاً!!
مهيائيل: من السبعه الصبح اتصل وادز رسائل ليش مجاوبتي عليهننن.
ايريم: لان مفتحت الموبايل.
مهيائيل: الموبايل بأيدج اربع وعشرين ساعه اذا تكرر هذا الموقف لتلوميني على تصرفي.
سده بوجهي عقدت حاجبي: شبيه هذا، انطيته اكبر من حجمه من جاوبته البارحه هيج شكول هوايه عليها السلام.
وهنا الفضول اجه بصدر رحب وتربع بنص عقلي فتحت الرسائل وشفته صدك دازلي الساعه سبعه رسالة مكتوب عليها.
مهيائيل: "صباح الخير ياوجهٍ عرفت الخير من شفته"
حسيت نفسي معت بعدين ضربت جبيني أصحي ولج يريد يضحك عليج بهاي السوالف، رجعت قريت الرساله الثانيه.
مهيائيل: وينها القفل والمفتاح اليوم؟
هاي جانت الساعه عشرة طلعت من الواتساب ورحت لسجل المكالمات شفتهم عشره معقوله لهاي الدرجه تأخيري بالرد خوفه عليه؟!
بس مجان الموضوع مستاهل كل هاي العصبيه لو هو من النوع اللي يحب السيطره من البدايه ويريدني اسمع كلمته، عشتوا ليش اني شنو اعرف عليه حتى اطيعه وهو يعرف عدل اني هذا الزواج من الأساس مراضيه عنه فشنو الداعي يعاملني بهيج سلوب!!
صحيت على نفسي صدك سواني خبله صار ساعه اسأل واجاوب نفسي، طردت كل الافكار من عقلي ورحت لبست احرام الصلاة وحضرت نفسي للأذان.
اليوم هو آخر يوم اليه بيت اهلي راح أودع الدلال والايام الحلوه اللي عشتها تصير ذكرى، وتكون جياتي بعد هذا اليوم مثل الخطار، نجبرت على زواج اني مرايدته غصبوني عليه الكل اهلي ومهيائيل، فكرت اتقبل الأمر او أحاول اتأقلم ،هيج خط القلم وماكو شي بمقدوري اسويه غير الصبر والتوكل على رب العالمين.
جهزت نفسي ونزلت راح نطلع اني وماما نجهز للعرس ولو اني ممقتنعه وين اكو وحده تكمل كل احتياجاتها بيوم واحد،
طلعنه من البيت وشفته منتظرنه بسيارته بسرعه تذكرت البارحه كلي نجي نجهز، نزل وهاي المره ماعرف شعجب مغير الدشداشه ولابسها أسود وغتره بيضه للصراحه بعيد عن شعوري اتجاهه بس شكله مرتب وحلو وانيق وشخصية مدحت مضهره هوايه بعيوني ومن سوء حظي انتبه حاولت أدارك الموضوع والتفتت بعيد عنه مشت امي كدامنه وهو صار بصفي نزل راسه يم أذني وحجه بهدوء ونبرة مكر.
مهيائيل: من حقج تباوعين حلالج انا يحلوه.
تمنيت الكاع تنشك وتبلعني على هل الموقف الخايس صعدنا بالسياره ورتاحيت من مشفت احد ماريد اسمع مغثه واني نفسي مطايقتها.
درت وجهي للشارع وبقيت احسب اعمدة حتى لفتت انتابهي المرايه الأمامية صارت عيني عليه لابس نظارات سود وعنده لحيه محدده وشوارب زايدته حلاه، شكله مو أسمر ولا ابيض وعنده كاريزما تموت، ومع هذا اني ماحبه اصلا مابيه شي ينحب واحد مغثه شيطان ملعون بس لازم نمدح الجمال وين المشكلة؟
صحيت من أفكاري على صوت ضحكته العاليه حتى امي نتبهت عليه اني عرفت يضحك عليه بس ليش؟!
قاطع هاي الأجواء سؤال امي إله.
تسنيم: شلون عرفت نريد نطلع؟
مهيائيل: اني جنت ناوي اجي أخذها نختار غرفه وكم شغله للعرس وشفتكم طالعين عن طريق الصدفه.
باوعتله من المرايه وتسائلت بداخلي ليش مكال الها عندي علم بس اني غلست ومحجيت؟
بقت الأفكار تلعب بعقلي وامي نطلقت بالحديث وياه.
تسنيم: باجر عرسكم وممختار غرفه لسه!!
مهيائيل: اي وين المشكله؟!
تسنيم: ماكو مشكله بس وين تلحك؟
مهيائيل: كلامج صح بس اني ناوي أخذها سفره سياحيه اول سبوع من زواجنا.
تسنيم: ماعدها جواز.
مهيائيل: نسويلها جواز مو مشكله كل شي لعيونها يهون أم أبيل.
تسنيم: الله يسعدكم يارب.
مهيائيل: ويحنن كلوب ذولاك الناس.
تسنيم: امشي عدل وتحن، حتى الحديد يلين بالكلمه الطيبه.
مهيائيل: لا اهنا عذريني اكلج غلطانه الحديد يلين من يتعرض لحراره عاليه وينصهر يعني ماكو ليونه بالموضوع.
تسنيم: صدك امك وين مشفتها؟
مهيائيل: اكيد متشوفيها.
تسنيم: ليش صاير شي؟
مهيائيل: اذا تردين اخليج تزوريها بيوم من الأيام بس هسه منكدر.
تسنيم: خوفتني بيها شي؟
مهيائيل: راحت لبيت أهلها اجازة طويله.
تسنيم: هاا على خير أن شاء الله خوفتني داده.
مهيائيل: تعيشين وتاكلين غيرها.
تسنيم: صريح حيل.
مهيائيل: اعجبج.
تسنيم: المهم تعجبها هي اني مو مهم رأي.
مهيائيل: تعيش وتنعجب لتخافين.
حجيهم كله الغاز مفهمت شي او بالأحرى مو مهم كلامهم حتى اهتم إله، توقفت السيارة بعد فترة مو طويلة يم محل اثاث نزلنه وبدأ صاحب المحل يعرض القطع الزينه والاستيراد جديد جذبتني وحده لونها ابيض أو أسود حسيتها لون ملكي، نتبهلي عيني عليها بسرعه اجه يمي وكال.
مهيائيل: عجبتج؟
اني بدون قصد بسرعه جاوبته.
ايريم: مو مهم الغرفه المهم انت بيها.
عرفت نفسي شنو جفصت من نرسمت إبتسامة شيطانية على ثغره وكال بنبرة تلاعب.
مهيائيل: مو صارت بسرعه كُلش؟!
عضيت الساني الوكعني بمشكله بس سويت نفسي مفتهمت قصدة وكلت بتساؤل.
ايريم: على شنو؟
مهيائيل: على حُبي ياقُفلي والمفتاح.
حجيت بثقه واني اباوعله بتحدي.
ايريم: اذا جان للدنيا سبع عجائب حُبي ألك هو العجيبه الثامنه.
تبادلنه النظرات مابين توعد وثقه فززني صوت امي وهي تصرخ اني بسرعه اجه على بالي أبيل معقوله صار بيه شي؟
يتبع..
البارت اكثر من 4100 كلمه.
اريد تفاعلكم وتعليقاتكم الحلوه بين الفقرات شمعاتي.
تصبحون على الف خير وعافيه.
حسابي الانستا لكل شي يخص القصه..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!