للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
مهيائيل
الكاتبة(زهراء احمد)
_______
- عليك أن تعلم ، بأنه لا حريق يستمر إلى الأبد ، لابد وأن يخمد ..
- ولكن ماذا إن انطفأت أنت معه ..؟
___
إقدام: لحظه ممكن من وقتج دقيقة؟
ايريم: شنو تريد استاذ؟
إقدام: اليوم اول يوم دوام الج وين جنتي طول هاي الفتره؟
ايريم: اعتقد هذا الشي ميخصك نهائياً.
عينه اجت لأصبعي رفع راسه وكال بهدوء.
أقدام: الواضح خلفتي وعدج إليه.
رفعت حاجبي وكلت بثقه.
ايريم: الوعود اللي متلكه رجال يحافظ عليها تنتهي، انت مو صاحب الزمان علمود انتظرك.
إقدام: يجي يوم تندمين وهذا وعد مني.
ايريم: لو جان بيك زود كدرت تنفذ وعدك قبل حتى تجي تهددني بوعد ثاني هسه، شوف حياتك وبتعد عن طريقي لأن ورايه رجال ينسيك حليب امك،
تركته ومشيت واني اشيط غضب جاي بعد كل هاي الفتره ويذكرني بوعد تافهه كاله بلحظه سعادة ونساه بوقتها، اللي يحب من صدك يحارب علمود حبه اني صار بطريقي ناس متعرف تاخذ قرار وتمشي على أصوله،
دخلت للقاعه وفكره وحده بعقلي الماضي مات وي أهله ارجع احيي من جديد جريمة لنفسي ولمهيائيل، بعد كُل هذا التعب حتى احافظ على سمعتي بين الناس وأمام الله بالمستوى الأول ما اسمح لواحد مثله يجي يخربها على الحاضر،
طردت كُل الأفكار وبدأ الامتحان، توزعت الأسئلة والهدوء عم المكان، جاوبت ومسمحت لعقلي يشتت، مستقبلي اهم من اي أحد، خلصت وطلعت، مشفت زميلاتي وبالأصح اني مو بوضع يسمحلي اختلط وسولف وضحك، احس جبال من الهم والحزن مخيم على كلبي ماعرف ليش، يمكن لأن شفته، أو لأن وهمت نفسي بالنسيان ومن صار كدامي كُل شي نعاد كدام عيوني مثل فيلم سينمائي، ماحبيت أي بس ممكن جان إعجاب مؤقت بيوم من الأيام وانتهى بوقته وماريده يأثر على حياتي الحاليه،
طلعت بره الجامعة بعد متصلت بيه وعرفته منتظرني، اول مصعدت بالسيارة نطاني بطل مي بارد بدون مينطق بولا حرف، شربته ورجعت راسي على الكشن مشغل تبريد واني منا تعبانه ونعسانه والجو يساعد غمضت عيوني ونمت محسيت الا وحنه واكفين بالباب نزلت وبوجهي للغرفه اخذت دوش سريع وخليت ملابسي بالغسالة ورحت نمت،
كعدت على صوته وهو يحجي ويايه.
ترانيم: ايريم، ايريم، كومي إذن.
فتحت عيوني باوعتلها بصفنه هاي دائماً تصير عندي الحاله اذا جنت تعبانه ومشبعانه نوم، تصيبني نوبة ثول، لازم ادقق شويه يلا اعرف اني وين وشنو اسوي اهنا واللي يحجي ويايه منو هو، دقيقتين وستوعبت، كمت بعجز صار فتره طويله من داومت وتعبت هيج لهذا السبب اليوم تعبانه بشكل مفرط،
كمت توضيت وصليت بس الواجب وهي طلعت ماعرف وين، لميت سجادتي وقريت دعاء اليوم ونزلت جوه لكيت الثلاثي المرح مجتمع يسولفن ويضحكن وترانيم كاعده تسوي زلاطه، كعدت يمها وخليت أيدي على خدي صافنه على الخيار شلون تقطع بي حتى طلعتني من صمتي وهي تكول.
ترانيم: شلونج بالامتحان؟
ايريم: الحمدلله.
ترانيم: اريدج تبيضين وجهي اذا مطلعتي الأولى اموتج.
ايريم: يمعوده يا أولى حتى لو مقبول المهم اعبر مرحله.
ترانيم: طيري على شنو مداومه لعد ومخليتني هنا وحدي، اريدج ترفعين راسي تره اكسر راسج.
ايريم: ماطول صار بيها تهديد دللي.
ترانيم: اي عفيه عليج هيج اريدج شاطره مو مثل ذني الثولات شهادة ابتدائية ماعدهن.
جانت تحجي بصوت ناصي بس آخر جمله علت صوتها بيها، خلتني اضوج لأن راح ندخل وياهن بنقاش يسد النفس واني ميته جوع، وعرفت توقعي بمحله من طفرت من مكانها مثل القرد وحجت.
تالين: ليش يمه ثولات قابل انتِ متخرجه من اكسفورد، شو حالج من حالنه لا دراسه ولاشي.
ترانيم: والله اللي ياخذ على نفسه مشكلته شسويله اني حجيت وبعد بكيف اليفهمها.
رولين: لو مقصدتينا معليتي صوتج حتى نسمع عمداً، سوالف الحمايه الجبيره بطليها تره ندوسج بالنعال ومحد يطلعلج.
ترانيم: ليش عيني قابل اني جايبيني من الشارع مثل حضرتج، خليني اكوم هسه ودوس بمصارينج وأريد كلب ابن كلب اللي يعترض ويوكف بوجهي.
رولين: حتى اكسر اسنانج بحلكج والعن ابو خيرج، الطايحة الحظ بدون أدب وأخلاق.
من حجت هيج درت وجهي الها رفعت حاجبي وحجيت بأبتسامه حتى اضوجها.
ايريم: بيج الخير والبركه اريدج تعلميها بلكي تاخذ من ادبج، بس اذا انتِ جوه الدرج لزمناج اخاف اشوفها بالحديقة وتصير سيرتنا على كُل السان.
رولين: انتِ الحقيرة دواج عندي أني الج بسيطة.
ايريم: اي والله راسي حيل يأذيني انطيني بندول لو اكول احسن طلعين منا لأن شوفتج تسوي شقيقه.
رولين: ماطول شوفتي هي تضوجج الا اكعد على كلبج وخليج تموتين قهر.
ايريم: بعد احسن كومي صبيلي غده خلي نستفاد بوجودج بمكان مكاعده كدامي بدون شغل وعمل، حركي نفسج حتى تتنشط الدوره الدمويه ويصير عندج طاقه وبنفس الوقت تضعفين، تعرفين الحوادث كثرانه في حال صار شي يكدر واحد يشيلج ويركض بيج، أو إذا ربج تفضل على عبادة واخذج يمه من يشعيون جنازتج يكدرون يشيلون التابوت.
رولين: يومج قبل يومي الفاره، الغبيه، الله لايوفقج ليش مفاولتني!!!
ايريم: ليش افاولج هذا الوقع كلنه راح نموت، بعدين تموتين بعمر صغير احسن ماعندج هوايه ذنوب حسابج أقل، ولو انتِ من ختلاتج ريحة الحسنه متشميها.
رادت تحرك كلبي صار العكس، ابتسم بوجهه وزيد قهرها بدون ما اتعب نفسي وأيدي وياها، كلمتين كافيات تخليها تشتعل وتنطفي ومتكدر تسوي شي بس تحجي بصوت عالي لأن مهيائيل محذرهن اي وحده تأذينا يصير مكانها بره البيت، ولأن هي تخاف من عنده مخلصتها علينه بس تهديد مابيه فايدة.
تالين: مابقى شي ونخلص منجن هانت بسيطه.
ترانيم: لتخافين بهاي الحاله اشمر وراجن حجار مو مي واصيح بعالي صوتي روحه بلا رجعه يارب.
تالين: ياسيم كومي ماما صبي الأكل وخذي للغرفة ماريد اكابل ذني الحيايه، شوفتهن تلعب نفسي.
ترانيم: اي طبعاً وين شايفه ملائكة كُل عمرج مخلصتها بوجهه شيطانج عوذه منكم وجوهكم تطرد النعمه.
راحت ياسيم تصب بالأكل وصرخت بيها ترانيم.
ترانيم: اللي عاجبها تكعد هنا حالها من حالنه هلا بيها بس مال اكل ينضم لو ينتقل لغير مكان مامقبول، والميعجبها كلامي تطلب دلفري نازله موضته هاي الأيام.
تالين: تالي وكت الارمله تتحكم بينه وتقرر وين ناكل وشلون، وسفة على الشارب اليخليجن تتحكمن بينه بهاي الطريقه.
كتمت غضبها هوايه وكلامها جان القطره اللي فاض بيها الكأس، كامت من مكانها بعصبيه وعتتها من شعرها بقوة وراسها ضربته بالحايط، جسم ترانيم قوي وهيبه صحيح مو سمينه بس الها حضور ملفت، خنكتها من ركبتها وتحجي بغضب.
ترانيم: شفتي الأرملة شنو تسوي؟
وحق الله اخليج تنزفين دم من كُل مكان والشارب اللي يوكف كدامي ازينه، ماكو زلمه نخلق يكدر يسوي شي إليه، والرجال الكفو من يشوف اخلاقجن السكط يجي ويساعدني بضربجن، السان اللي يجاوز على اسيادة ينكص وينشمر للكلاب، ادبسز تربية شوارع، تالي عمري وشيبي تجي وحده ساقطه مثلج تعيرني، شايفه النعال اللي برجلي وحق ربج اخلي يلعب على ظهرج وسويج فرجه لأمة محمد.
دفعتها بره المطبخ وصاحت بيها.
ترانيم: بعد كلام ماعندي وياجن يجي مهيائيل ويعرف شلون يربيجن عدل، دماغ سزيات، ناقصات تربية وأخلاق.
طلعن ثنينهن واني عيوني جاحظتها عليها، متعودة على صوتها العالي ومتسكت عنهن ابد بس هاي أول مره تضرب بهيج عنف، ماعرف اضحك ابجي على المرحله اللي وصلناها بهذا البيت وشلون نسوانه يتعاركون من الروس، هاي تصرخ وذيج تجاوب خلن راسي يصدع أكثر.
تالين: اني اعلمج يجي دَاسِم وهو يربيكم ويعلمكم شلون تتجاوزن على مرته بسيطة.
ترانيم: اي عفيه كليله حتى تصير كتلتكم جماعية، اني الزمج من كفشتج ومهيائيل يستلم نعالج الخابصتنه بي، هو لو بي خير ماصار عربانه الج وين متردين دفعتيه، أخير شي وره عمايلج نام بالحبوس.
تالين: ميخالف عود خل يجي وفتحي حلكج وهددي مثل هسه اذا ميطردج بره البيت ويشمر ملابسج بالشارع فلا اطلع تالين هينه.
ترانيم: بلطي البحر اذا كدرتي، ولو احنه متعودين عليج بس السان وكُل خير مابيج.
اختفى صوتها ورولين وياها وين متروح مثل ظلها حتى مرات اشك عدهن شي سوا ممعقوله علاقتهن قويه هيج بدون مصلحه وخاصة هن ثنينهن شياطين رجيمه،
رادت تلحكهن صرخت بيها حتى اني فزيت.
ترانيم: طريق امج لتمشين بي لا اكسر رجلج، تجين تكعدين حالج حالنه وتاكلين مثل الأوادم لايجي مهيائيل واكله على سوالفج.
ياسيم: عمه هسه شسويت وهيج تصرخين بيه؟!
ترانيم: على اساس ماعرف بيها تترس براسج علينا وتشجعج تمشين بطريق الاعوج، وحق الله اذا شفتج تسوين شغله تنزل روس خواني اخلي راسج جوه التراب وما اسأل، لا عبالج تكدرين تشدين ظهرج بتونه المعفنه لأن هاي اول وحده تتركج اذا صار شي مو زين عليج، فأخذي حذرج ومشي عدل، وعينج بدراستج ومستقبلج احسن ميصير الحجي غير شي.
نزلت دموعها أمرها غريب الواضح اكو أسرار ماعرف بيها حتى وي ياسيم، صحيح هي وياهن بس ما اسمع الها صوت مثلهن، بس شنو ميكولن تسوي سكته متناقش ابد، طلعت وجتي كعدت يمي وترانيم واعرفها السؤال يحوص بداخلها متكدر تضمه.
ترانيم: رولين شنو تسوي جوه الدرج؟
ايريم: تشم هوه.
ترانيم: ولج امشي عدل لتخبليني عليج انتِ الثانيه.
ايريم: عاشت ايدج خلصتي من الثلاثي المرح اجيتي عليه سالمين داده.
ترانيم: ام داده سولفي، غردي شسوي هاي الغبره جوه الدرج بنصاص الليالي؟
ايريم: مو كتلج تشم هوه جدد نشاطها.
ترانيم: وحق علي شايفه هذا الجفجير يجي على راسج عدل وكبل احجي وخلصيني بيا وضع شفتيها.
ايريم: يبووو مراح تخليني ارتاح، شفتها واكفه يم واحد مجان مبين شكله من الظلمه يمكن زوجها.
ضربت على صدرها وعيونها حسيتها تريد تطلع من مكانها من كد مفتحتهن على وسعهن وحجت بصدمه.
ترانيم: عزه بعينها هل الحقيرة شلون تسوي هيج!!!
ونوب رجال غريب وبنص البيت وخاتله بي، فضحتنا المتخاف الله، سود الله وجهه وحركها بالدنيا قبل الآخره.
ايريم: هاي شبيج يجوز رجلها كتلج مشفته عدل.
ترانيم: شوكت شفتيها؟
ايريم: الاسبوع الفات يمكن.
ترانيم: ابشرج لعد زوجها مسافر من يوم عركته وي مهيائيل عنده شغل، وبعدين وين اكو وأحد يختل بمرته جوه الدرج وغرفته يركض بيها الخيل؟!
ايريم: معلينا بيها خلي ناكل ونام ورايه قرايه وراسي يدك بي طبل.
ترانيم: لاغيبه على الفاسقين، اللي يتجاهر بالمعصية يضربه ألم، محد كللها تختل والناس تشوفها جان مدخلته للغرفة وربج الذنب يستر عليه ولامن شاف ولا من دره و الله يحب التوابين، بس هو بعد حكمته راد يفضحها خلاج تشوفيها، وفوك كُل هذا عينها كويه ابد متنكسر شوكتها شكد صلفه.
ايريم: عيفج منها يمعودة ذني مو إبليس متلبس منهن هن متلبسات بيه، الحجي ميفيد وداعتج.
ترانيم: اذا ميفيد الحجي الله المن انطانه أدين، ادفنهن بكاعهن وحتى الفاتحه ما أقرأها.
ايريم: عصابجيه صايره ينخاف منج.
ترانيم: لا انتِ ماطول تمشين عدل لتخافين مني.
ضحكت على كلامها وتصرفاتها، صبينه غده واكلنه بس اني وياها، كملنه وغسلت المواعين هي بقت تشرب جاي واني صعدت، نمت ساعتين وكعدت أقره هذا الروتين المعتاد مالت الإمتحانات، واني عيني بالمحاضرة وشعري لافته ماعرف شلون ومتربعه بنص الغرفه والأوراق داير مدايري مطشرة ومندمجه، حسيت الباب ينفتح رفعت راسي لكيته مصغر عيونه ويباوعلي بنظره غريبة رفعت حاجبي بمعنى شكو؟
اني الجرباية صايره بوجهي كعد على أطرافها ونزع الغتره وعدل شعره وكال بتساؤل.
مهيائيل: شلونج اليوم بالامتحان؟
مسألتج من صعدتي لأن وجهج مجان بي غير التعب لهذا السبب محجيت شي حتى ما ازيد الضغط عليج وتاخذين راحتج بالتفكير وتعرفين تاخذين قرار صح.
كلامه غريب وكأن حاس على شي، معقوله شك بي وي إقدام؟!
لا مستحيل اصلاً اني ماعندي ويا شي مجرد هو استاذي لا أكثر، لعد هاي النبرة العميقه شنو سببها؟!
اسأل وجاوب نفسي فززني وهو يكول.
مهيائيل: اليوم مسويه اضراب مراح تحجين شي؟
بتسمت بوجهه حتى اخفف التوتر وحجيت بهدوء.
ايريم: بالنسبة لسؤالك الأول الحمدلله أكدر اكول مجاوبه وأن شاء الله انجح، اما لوضعي بالسيارة فتعرف الجو الحار والتعب واني ممتعوده للكعده من وقت صار فتره لا أكثر، وإذا تسائلت ليش مجاوبتك بسرعة وأخذت صفنه فالأمر بسيط لأن نبرتك وطريقة سؤالك حسسني اكو شي مسويته واني ماعندي علم فصفنت حتى اذكر شنو صاير اليوم ويايه.
مهيائيل: قنعتيني، بس اكو شغله وحده ما أقبل بيها تحت اي ظرف كان.
عقدت حاجبي.
ايريم: وهي؟
مهيائيل: كلمة ان شاء الله أنجح متعجبني، اما تفوق أو ما أقبل، خليتج على راحتج طول هاي الفتره حتى ارفع راسي بيج وبنجاحج لهذا السبب جيد ما أريد اشوف اقل شي جيد جداً وهاي لأن صارت ظروف وياج بالفتره السابقه كلت هيج لأن حتى الجيد جداً ماريدها.
فتحت حلكي بسعادة وحجيت بثقه.
ايريم: ان شاءالله متفوقه اصلاً اني ما أقبل ينزل مستواي.
عافني وراح للحمام واني رجعت أقره، بعد فتره طلع وراح نام بدون ميحجي شي، هو يوميه يطلع من الصبح للعصر يلا يرجع ويتغده هناك بس شنو يسوي أو وين يروح ماعرف، أو مرات يجي بوقت الغده ويطلع المغرب ميجي لنص الليل، بله سالفة الليل سالفة يبقى لل 2ص يلا يدخل للغرفة وهاي الأمور كلها منتبهه عليها بشكل سطحي ممدققه وراه بشكل جبير بسبب انشغالي بالامتحانات هسه والاحداث اللي صارت من زوجنه لحد الآن،
لميت كتبي ورحت للحمام غسلت الملابس وطلعت شريتهم فوك السطح، مخلي ستاره على البيت وهذا احله شي بي وين ما اطلع وشنو اسوي محد يشوفني، نزلت جوه ونظفت لأن إذا ابقى عليهن البيت يصير مزبله، اجت يمي ترانيم وبدينا نحضر العشا، وهيج خلص اليوم واجتمعنا كلنه على السفره، دخل رائف من الباب اول ملمحه كدامه صاح بي.
مهيائيل: وين جنت؟
رائف: يم بتال.
مهيائيل: مره ثانيه من تريد تطلع انطيني خبر ومن تخلص الامتحان ترجع للبيت تقره ماعندي مطعم وفندق وبكيفك تطلع وتدخل، اذا متجيب معدل بي خير السنه التجي ما ادفعلك القسط.
رائف: امده الوكت اللي يخليك تتحكم بيه.
مهيائيل: اخوك وغصباً عليك اتحكم، اذا ماعدكم اهل بيهم حظ ماخليكم ديحون بالشوارع، اني اصير أهلكم وربيكم بأيدي.
رائف: والنعم منك اخويه العزيز.
مهيائيل: غير ملابسك وتعال تعشا.
رائف: ماكل بره الف عافية.
مهيائيل: وجهك بالكتاب أريده.
رائف: ربك ليش غاضب عليه؟
مهيائيل: لأنك مو خوش أدمي.
رائف: لا والله لأن أخوك، فأنت عاصيه واني باليني بسببك.
مهيائيل: روح وخر من وجهي لابارك الله بيك ولد مزعج.
اتقدم باسه براسه ومهيائيل يدفع بي.
رائف: هاي شبيك خليني ابوسك.
مهيائيل: متأكد كاعد تبوس شفطتني.
رائف: بوسة احباب ليش منزعج عابتلك.
مهيائيل: أمشي ولي مني.
صعد وهو يضحك، على رغم اني ضايجه من رائف بسبب الموقف السوا وي استاج بس مع هذا احب علاقتهم ماحسهم أخوة اكثر من أصدقاء، قريت عليهم القلاقل حتى مينحسدون،
خلصنه عشا رادن يطلعن صاحت بيهن ترانيم يغسلن المواعين، تركتهن يتعاركن حضرت الجاي وصعدت للغرفه وبيدي كوب لمهيائيل لكيته كاعد ومشغل التلفزيون على الأخبار خليته يمه واني دخلت للحمام، اخذت دوش سريع اطرد التعب والحر غيرت ملابسي وكملت الروتين وطلعت، جففت شعري وخليت مرطب حتى ميصير جاف وماسك لوجهي، التفتت بالصدفه لكيته صافن بيه ابتسمت بوجهه وكمت من مكاني ورحت كعدت يمه واني اعدل بالماسك حتى يثبت،
مديتله ايدي نزل نظره الها وبعدين رفع عينه بعيني ابتسم وكال.
مهيائيل: تردين اقرالج الكف؟
عضيت على شفتي وكلت بدلع.
ايريم: ليش انت مو ساحر وتعرف بالخيرة احجيلي شنو ضاملي مستقبلي.
مهيائيل: عيشي وشوفي ليش تردين تسبقين الأحداث؟
ايريم: اريد اعرف كم شغله قبل وقتها وين المشكلة؟!
مهيائيل: كذب المنجمون ولو صدقوا.
ايريم: هههههه، دتلعبها ويايه، كول ماريد احجيلج شي طاقتي السحريه خلصت ليش تلف ودور؟!
مهيائيل: حلو جوابج مال استفزاز بس اني مُصر ما احجي شي الا اذا سويتي شي مقابل الها.
ايريم: شنو تريد؟
مهيائيل: بالأول نطيني وعد تسويها.
ايريم: ماشي اوعدك اسويها بس كول شنو هو؟
مهيائيل: بما أنو وعدتيني على شي متعرفيه شنو هو معناها مستقتله على الخيره.
ايريم: اي اريد اعرف شنو مخبيتلي الأيام.
مهيائيل: تؤمنين بلي راح اكوله؟
ايريم: مخسرانه شي أسمعك.
مهيائيل: الإيمان بأهل الخيره كُفر فحتى لو كلامي صح وراح يصير لتكولين مهيائيل صادق ويعلم بالغيب هذا الشي عليه ذنب.
ايريم: مراح اكول هسه تاخذلي لو لاا؟
مهيائيل: ايدج.
ايريم: هيانها.
لزم اصابيعي وفتح أيدي وصفن بيها بقى شويه وطلع من صمته وهو يكول.
مهيائيل: اللي عشتي وشفتي قطره من بحر المستقبل، القادم أسوء واظلم ومنتظرج حزن عميق، فقد وموت، فراق يدك بابج، ندم وضياع، شخص من الماضي راح يرجع بس وجوده مؤقت ورحيله بي ندم، فرح انتِ الوحيده بيه حزينه، انكسار وراح تخذلين شخص عزيز عليج، لقاء بعد فراق، اشوف الج وظيفة بغير تخصصج الدراسي، عمل شيطاني وجن محاوطج من الطفولة، سر معرفته راح تعذبج حيل، راح تلبسين الفستان الأبيض مره ثانية.
كلامه خلاني فاتحه عيوني وجسمي كله رجف، معرفت شنو احجي بس التزمت الصمت ونزلت دمعة من عيني بدون ماحس، كلامه غريب بس لامس قلبي وكأن هو صحيح وراح يصير واسم الله اذا طلع حقيقه مستحيل اتحمل خسارة أحد،
محسيت الا وأيده سحبتني اله نضربت بصدرة حضني حيل وكأن هذا آخر حضن، كال بصوت هادئ.
مهيائيل: صدكتي؟
ايريم: كلماتك لامست كلبي لهذا السبب شويه شردت.
مهيائيل: اكو شي محجيته.
ايريم: شنو هو؟
مهيائيل: اني وياج حتى قطع النفس، لتشيلين هم بوجودي، مستعد اسرق سعادة الناس كلها وخليها بكلبج.
ايريم: ماريد سعادة أحد، بس اعيش بدون حزن وعقلي مرتاح.
بعدني من صدره مسح ادموعي بأيده وحجه بابتسامة.
مهيائيل: مجرد كلام عابر لتاخذين الموضوع بجدية، تعالي كليلي اليوم معاجبتني من طلعتي من الجامعه لحد الآن صاير وياج شي؟
سولفي حتى لو مسويه جريمه اني اساعدج بيها.
بتسمت على كلامه وحنيته، شكد ماكول لطيف ويايه ما أكدر اوصفه بالكلمات، يجبرني اثق بي واحجي كُل شي صار ويايه، فكرت احجي اللي صار اليوم وماخفي عنه شي خاف بعدين تصير مشكله يكون عنده علم.
ايريم: اريد احجيلك بشغله صارت بالماضي ويايه صارلها فتره طويله جنت ناسيتها بس اليوم رجعت سيرتها نفتحت.
مهيائيل: اسمع.
صفنت بنفسي هاي اني شكاعد اسوي إذا حجيت هسه شنو ياخذ عليه نظره وبعدين هو مو من حقه يعرف السالفه بالماضي واصلاً متستحق تنذكر وسولف بيها، خاف ميثق بيه بعدين ويكول جنتي دورين علاقات وهسه صايره شريفه براسي، ممكن يتهمني بشرفي،
لا لا شكاعد اخربط اني، اصلاً مسويت غلط ابدد وبعدين هي صارت وراحت ليش افتح دفاتر قديمة،
زين واذا عرف عن طريق الصدفه، بلكي سوالي شي إقدام، لو مثلاً شافني وياه أو سمعه يحجي ويايه مراح يفكر بيها غير شي ويكول مرتي بس غلاف داخلها مثل العديمات الشرف، احسن شي اقطع النزاع واكول اذا تفهمني كان بها واذا أخذ عليه نظره تبقى يمه بعد المهم ابري ذمتي امام الله،
صحيت من حواري الداخلي على صوته وهو يحجي ويايه.
مهيائيل: ليا عالم غادر عقلج؟
ايريم: لعالم أكدر اعرف بي ردة فعلك اذا حجيت.
مهيائيل: لهاي الدرجه الموضوع جبير حتى عقلج مفترض مراح اتقبله؟
ايريم: بالنسبة إليه لا لكن ماعرف وجهة نظرك.
مهيائيل: عشت بهوايه اماكن، وعاشرت عشرات الناس، السيء والجيد، المؤمن والفاسق، العابد والملحد، ولا واحد بيهم فهمته خطأ لأن كُل شخص عنده حياة خاصه بي، ماضي وحاضر، وعادات وتقاليد، وعائلة ومجتمع، وبالأضافة للمراحل العمريه اللي يمر بيها الانسان، من يكون طفل تصرفاته وقراراته غير مدروسه ومن يصير مراهق يكون عاطفي بزيادة واسلوبه غير مفهوم مرات، ومن يكبر ويوعي اكثر راح يعرف كُل شي عاشه ماهو إلا نقوش بسيطه من حياته،
اللي اريد اوصله الج القرارات والتجارب اللي عشتيها سابقاً مو من حقي ولا من حق أحد ياخذ عليها حكم مسبق، لأن بذلك الوقت عقلج وكلبج اتفقن على انو هاي الخطوه صح، كل الناس مذنبه، لحد يدعي يمج المثالية حتى الأنبياء كان يوسوس لهم الشيطان والنبي آدم عليه السلام أولهم، طلعي بس النبي محمد صلى الله عليه وآله وأهل بيته،
انطقي شنو تردين تحجين وثقي نظرتي الج هي هي كم كلمة منج هسه مراح تغيرها.
كلامه بحد ذاته مريح مرات احس بيه بلسم لجروح كلبي بنفس الوقت ازعل لأن لا عبادة ولا تقوى وهيج إنسان تفكيره واعي ومثقف ماعنده علاقه برب العالمين، سألته واني داخلي يريد يعرف الجواب بقوة.
ايريم: ليش تثق بيه لهذا الحد؟
مهيائيل: هذا السؤال ماعندي جوابه.
ايريم: واذا خنتك يوماً ما؟
مهيائيل: بوقتها تكونين قضيتي على آخر أمل للتوبه موجود بداخلي.
ايريم: شايفني طريق لتوبتك؟
مهيائيل: لأن أمي دعتلي ودعاء الأم مستجاب بدون نقاش.
ايريم: شكد تحبها لعد حتى واثق بصدق نيتها هيج؟
مهيائيل: بكد السما والكاع، والخضار اللي تارس العالم، بكد الفصول والساعات والإيام والسنين، بكد رحمة الله على المذنبين، بكد جروح كلبي وجوياته،
امي هي الحضن الوحيد اللي لمني بوكت البرد، ريحت شيلتها لحد هسه بروحي اشمها، وانتِ دعوتها اللي يحلوة اللبن.
ايريم: ليش تكلي يحلوة اللبن؟
سمعت هاي تنكال بس للأم.
مهيائيل: عيفج من هذا السؤال هسه وجاوبي شنو ردتي تحجين؟
ماعرف ليش نطرد الخوف من داخلي وبديت احجي كُل شي من البداية، يمكن لأن حسيت بالأمان هذا الشعور اللي يخليك متمسك بلي يمك بدون تفكير.
ايريم: من جنت طالبة سادس اجانه استاذ يدرسنا رياضيات كالوا متطوع جاي من الجامعة بقى ويانه طول المرحله الدراسية، شخص محترم ومجان ينطي مجال لأي بنيه، بوقتها اني مجنت مهتمه لشي غير دراستي وطموحي بالنجاح والتفوق، حتى وصلنه قبل العطله مالت المراجعه بأسبوع غادرنا وراح نسيته ومرت الأيام ولا كأن درسنا يم استاذ لأن مدرستنا مالت بنات وكلها مدرسات فمن يجي للقاعة البس عبايه الوحيده بالصف،
خلص السادس ونجحت بس المعدل مجان اللي أريده وعندت الا اعيد ولأن هاي السنه الثانيه إليه اهلي مقبلوا خافو عليه، جنت من أقره انسى نفسي بدون اكل ولا انام ابقى لازمه الملازم والكتب وعيني متنزل عنهن بس بوقت الصلاة، من كملت الإمتحانات صار عندي فقر دم وضعف عام، من حبهم وقلقهم منعوني اكمل، قدمت على الجامعة وطلع قبولي هندسه مدني، اول مداومت جان الوضع طبيعي إلى أن اجه نفس الأستاذ اللي درسنا رياضيات بالسادس سمعت انو هو كُل سنه يقدم دروس مجانيه للطلبة مساعدة من عنده الهم،
المهم مرت ايام وراحت وجت ثانيه، وخلصت السنه الأولى على خير ورحت استلم النتائج، شفته واكف يم غرفة رئيس القسم، أني بطبيعتي ما أسلم على اي احد لا طالب ولا استاذ بعيدة كُل البعد عن الشباب بأي مرحله عمريه كانوا، بس هو وقفني،
Flash back
إقدام: شلونج ايريم؟
ايريم: الحمدلله بخير استاذ، محتاج شي؟
إقدام: ليش جافه هيج بالتعامل ويايه مسوي شي معاجبج لو سامعه عني كلمة محبيتيها؟
ايريم: استغفر الله استاذ شنو دخلني اني بيك!!!
حدي وياك قاعه ومحاضرة من تخلص لا اعرفك ولا تعرفني، فليش حتى اتعامل وياك بأسلوب خاص؟!
إقدام: معقوله ممنتبهه عليه طول الفتره السابقة؟
ايريم: رحمه الله والديك ليش حتى انتبه منو انت قابل انشتاين؟
انت بالنسبة إليه استاذ ينطي المحاضرة ويروح هاي هي ليش مكبر الموضوع ما افهم، اذا ماعندك شي مهم تريد تكوله اعذرني اخويه منتظرني بالباب وتأخرت عليه هوايه.
إقدام: هي كلمة وحده اسمعيها قبل لترحين.
ايريم: اسمعك بس ياريت تستعجل.
إقدام: احبج.
ضحكت وحجيت واني عاقده حاجبي.
ايريم: ليكون مفكرني اني من مثل البنات اللي شمرن نفسهن ألك بالعدادية وهسه بالجامعة؟
اسمعني حضره الأستاذ لا اني من هذا النوع ولا يهمني الكلام اللي تريد تكوله مع السلامة وروح اضحك على وحده غيري مافيدك تره.
تحركت خطوتين صار كدامي بسرعه وقفني اخذت نفس بغضب وحجيت بقلة صبر.
ايريم: اخويه لخاطر الرب الخلق الكون وخر عن طريقي، استاذ معروف مثلك عيب عليه يسوي هاي الحركات وي طالبته اذا انت متخاف على سمعتك فأني اخاف وراي اهل وعشيرة ميخلون بيه قطعه سالمة.
إقدام: بس خلي احجي ليش متنطين مجال؟!
ايريم: احجي اسمع عندك خمس دقايق لا أكثر.
إقدام: اني معجب بيج من ايام الاعدادية بس مكدرت اعترفلج خفت لايأثر الموضوع على دراستج ومستحيل أقبل اكون السبب بتدمير مستقبلج، راقبتج وسألت عليج وعرفت مكان بيتكم، وبعدها رجعت ادرس بالجامعة مانسيتج بنفس الوقت مجان بداخلي هذا الشعور علمود احارب حتى احصل عليج، يمكن لأن جان إعجاب بأدبج وحشمتج مَوصل لمرحلة الحُب، بس من دخلت للقاعه وشفتج كدام عيوني شلون مدنكه راسج على الدفتر وعينج ابد مرافعتها التزامج وعبايتج البقت على راسج ومغيرج المجتمع، وهدوءج خلوا كلبي يرجع يرفرف مره ثانيه وبقوة، بقت عيني عليج طول السنه ومن عرفت انو خلص اني واقع بحُبج وبعد ما أكدر اصبر اضم مشاعري اجيت اعترفلج هسه،
تقبلين تتزوجيني؟
هو يحجي واني فاتحه عيوني على وسعها بسبب كلامه، ياعبايه ياستر ياحُب شبيه يخربط هذا، ضحكت عليه عايف جمال بنات القسم وجايني أني اللي بعمري مفكرت احب ونحب وعيش قصة من الأفلام، خطرت على بالي فكره يريد يستغلني لأن شافني بعيدة عن البقيه فطلع سالفة الزواج والا وين اكو وأحد يخطب وحده محاجي وياها كلمه من قبل؟!
جان جوابي واضح وصريح وعقلاني لأبعد حد.
ايريم: علاقات اني بعيده كُل البعد عنها، تحب ومعجب مثل متكول وبما انو حتى البيت تندله تكدر تجي تخطب أمام الله واهلي والناس، غير هيج ماعندي حجي وياك مع السلامة.
مشيت مبتعده عنه سمعته وهو يحجي بصوت عالي.
إقدام: انتظريني عن قريب اخلي الحلقه بأيدج تلمع.
ماعرف ليش ضحكت، يمكن كلامه أثر بيه نوعاً ما لأن بعمري مدخلت بعلاقات من قبل، رجعت للبيت وعلى وجهي إبتسامة واضحه بقيت افكر بيه ليل مع نهار أو وي كُل دكة باب حسبالي هو اجه يتقدملي رسمي إلى أن خلصت العطله ورجع الدوام، دوامنا وخلص سبوع كامل وهو ماكو، بقت عيوني دور عنه مو حب ابدد بس جان سؤال بداخلي ردت اعرف جوابه ليش وعد وليش أخلف، حتى سمعت ثنين اساتذه يحجون بسيرته واني امشي للقاعة توقفت رجليه عن الحركه، واذني تركت راسي وركضت يمهم، نصدمت من عرفت بيه مسافر خارج العراق مكدرت اكمل السبب بسرعة دخلت للقاعه ومن يومها نسيته،
اليوم وعن طريق الصدفه شفته كدامي، ماكو مشاعر ناحيته لأن اني من الأساس محبيته، ولو سألتني ليش حجيتي إليه بلي صار وياج بالماضي راح يكون جوابي واضح وبسيط، لان خاف تسمع من أحد لو تشوف موقف معين أو أي شي يصير وتتسائل ليش مكتلك شنو السبب اللي يخليني اضم عليك هيج موضوع، وحتى الشكوك بكلبك متشتغل ناحيتي وعلاقتنا ميدخل بينها ثالث يخربها.
جانت ردة فعله عكس توقعاتي تماماً سحبني من كتفي فكرت راح يضربني لو يسوي شي إليه، نظرت عيونه مكدرت افسرها شنو هي بس كلبي شتغلت بيه حفله، أيدي على صدره وأيده حاضن بيها وجهي انفاسنه ثنينه مضطربه، خوف على قلق وبنصها مشاعر اطمئنان، امان ماعرف حب كلهن بداخلي هاي اللحظة، محسيت عليه إلا وهو يبوسني حتى قطع النفس بتعد عني وهمس قريب شفايفي بكلمات بعثرتني بالكامل.
مهيائيل: اليوم عرفت تعبي بيج مراح بلاش، انتِ الشي الوحيد اللي مستعد عليه ادفع دمي قطره قطره.
جاوبته بنفس نبرته.
ايريم: يعني نظرتك إليه متغيرت على رغم اللي حجيته؟
مهيائيل: له له له، اني لو اشوفج كدام عيني تسوين المعصيه كلبي راح يدك رجل ويكول بريئة عيونك كذابات.
ايريم: استاهل هاي الثقه؟
مهيائيل: اي.
حضنته بكُل قوة وحجيت بغصه ودموعي تنزل.
ايريم: اذا عافوني ناسي ابقى الوحيد المتمسك بيه، لتخذلني بيوم.
مهيائيل: انتِ لكلبي حبل النجاة وماكو عاقل يعوف المنقذ مالته.
ايريم: ضمني مهيائيل خايفة، بكلبي احساس مو حلو ممتفائلة ابد.
مهيائيل: اذا مكفاج حضني اخليج بعيوني وجفنها يغطيج.
سحب راسي لحضنه وبقى يلعب بشعري، وبهاي اللحظات اللي ما اريدها تخلص عاكسنا القدر وفزينا على صوت تكسير وصراخ جوه البيت، فجأة صار يم باب الغرفة واحد يضرب قوي عليه ويحجي بغضب..
يتبع..
البارت اكثر من 4150 كلمه
اريد تفاعلكم وتصويتكم وتعليقاتكم بين الفقرات سوولي واهس شمعاتي.
مسائكم مشمش يحلوين.
لأي شي يخص القصة تعالوا يمي انستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!