للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة (زهراء احمد)
____
هيَ الشِّفاءُ لِدائي لو ظفِرتُ بها
وليسَ مِنها شِفاءُ الداءِ مَبذولُ.
____
فتحت الباب بدون ما ادكه شفتها بوضع ماكدر اوصفه بقيت اباوع وبروحي الصدمه، اعرف بيها مسويه علاقه بس مجنت ادري واصله لدرجه بالبيت تفتح كام وتعرف اخوانها موجودين وعادي مهزها احد، لهاي الدرجه الذنب والملذات تنسي الواحد كل شي؟!
مكدرت انطق كلمه بسبب المنظر الشفته بقيت اباوعلها بنظره تعجب وصافنه بيها وبسوايتها فجأة وبدون سابق انذار سمعت صوته يصرخ بيها.
مهيائيل: دماغ سززز قليلة الأدب تت****** وبالبيت وكدامنا بدون حياااااااا!!!
عرفت مراح تعدي على خير دفعني بعصبيه وراح يمها سحلها من شعرها للكاع حسيت شعري من يمي تكطع، جسمها مستوعب شنو يجيه ساعه دفره وساعه راجدي لو بوكس خلاها امدده بدون صوت ويحجي بغضب.
مهيائيل: ساقطه ادبسززززز ولج بشنو مقصررر وياااااج حتى تجيبين السمعه الطايح حظهاااا اليه؟؟
تاليها اني وهيبتي وسمعتي بين الناس تجي وحده ***** مثلج تنززززل راسي!!! والله ادفنج مكانج اهنا وماخليلج أثر واشوف **** ابن **** اليطلعلج، **** قليلة تربيه شسوي بيج ولجججج شسوووووي؟
عليتي كلبي الله ياخذج ويخلصني منج وحده حقيره.
يحجي ويشتغل بالضرب أخير شي طلع من الغرفه يركض ثواني ورجع وبأيدة صونده ضربها ضربتين وحده على رجلها والثانيه على ظهرها روحها حسيتها راح تطلع من كم الضرب والعنف اللي استخدمه وياها معرفت شنو اسوي غير بقيت صافنه عليه مصدومه اللي سوا وي ميمون ميجي ذرة بسوايته هسه وياها أخير شي كلت مابيها مجال لازم ادخل رحت يمه اجيت اسحبه دفعني وكعت بالكاع، هي أمانة الله مال تستاهل تستاهل بس مو إجرام هيج لهاي الدرجه،
رحت مره ثانيه واني متأكده الصونده راح تصير على جسمي لأن هو اذا عصب ميشوف الكدامه مع هذا ماخليها تموت بدون ماحرك ساكن واني اخطي خطوة سريعه يمه خطرت على بالي فكره لزمت ايده وحجيت بصوت عالي حتى يركز وياي ويسمعني.
ايريم: بروح امك كافي راح تموت جوه ايدك.
يتنفس سريع شمر الصونده من ايده والتفتلي بخزره سحب أيدي وطلعني من الغرفه وقفل الباب وكال بتحذير.
مهيائيل: اذا شفت ظل وحده بيجن وصل لهنا متلوم الا نفسها، لو تموت وتريد قطرة مي محد ينطيها سامعتني؟
اشرتله براسي بمعنى اي بعيد عن الشجاعه والسباعيه منظره وهو هيج عيونه حمر وشعره مخربط وايدة ترجف خلاني انرعب اذا حصلت راجدي لو ضربه بالحايط منو يفيدني؟
هاي جانت افكاري وتأكدت كلها من الشيطان لأن اول مطلع واني ماعرفت ليش رجع من الأساس رحت يم الباب وبقيت اصيح اسمها بلكي تسمعني وتجاوب حتى اعرف بيها شلونها.
ايريم: ياسيم تسمعيني؟
ماكو صوت من عدها رجعت صحت مره ثانيه: ولج ياسيم تسمعيني؟
دكيت الباب بكُل قوتي هم ماكو صوت خفت ليكون صاير بيها شي رحت بسرعة كعدت ترانيم: كومي كافي نوم.
فتحت عيونها بصعوبه، ترانيم لو دك يمها طبل متحس.
ترانيم: شكو شبيج من صباح الله منو هاجم علينه؟!
ايريم: اول شي صحصحي حتى اسولفلج عدل ومتنجلطين مابيه حيل تصير مصيبه ثانيه ومحد بالبيت.
ترانيم: ياستار ياربي شكو ولج خوفتيني؟
ايريم: مهيائيل شاف ياسيم بوضع مخل بالأدب وضربها وقفل عليها الباب.
كامت من مكانها.
ترانيم: كولي موتها وقفل الباب وحق علي هذا مسودن هسه يكتل البت.
ايريم: كتلها شنو يكتلها.
ترانيم: وينه هو هسه؟
ايريم: طلع عنده شغل اصلاً هو جان طالع بس رجع على حظها ماعرف ليش.
ترانيم: صدكيني هاي خفايف هسه يجي وشوفي الجزء الثاني مالته.
وكفت يم الباب وصاحت بصوت عالي: ياسيم ماما تسمعيني؟ اذا تسمعيني سوي اي حركه حتى اعرف بيج شي لو لا.
ماكو صوت لازم اخابر واحد من الولد يجي يساعدنا.
ايريم: اوكفي لتخابرين واحد مستحيل يكدرون يجون هسه.
ترانيم: ليش؟
مابيها مجال الوضع اللي احنه بيه لازم يحجيني.
ايريم: رائف مسوي حادث ويمه هم بالمستشفى.
لطمت صدرها وصرخت بوجهي.
ترانيم: عزة بعينج هسه يلا تحجين!!!
ايريم: هاي أوامر مهيائيل اني شعليه وبعدين هو بخير ومابيه شي مجرد حادث بسيط ميمون يمه بقى البارحه ومهيائيل راح الهم هسه اذا اتصلتي بيه راح يشك وهو حذرني محد يفتحلها الباب.
ترانيم: والحل تموت يعني هذا رجلج هم يمسلت، خلي اشوف بالأول شنو بيه رائف واطمأن عليه بعدين يلا اجيها ونلكي حل.
ايريم: تعالي وين رايحه البنيه راح تموت لمن تتصلين وتنعين ساعتين احضر الأسود، رائف بالمستشفى ويمه مهيائيل وميمون يعني ماكو داعي للقلق وبعيد عن هذا بس تحجين وي اي واحد بيهم راح يعرفونج دريتي بسالفة ياسيم واني اريد احل الموضوع بدون محد يدري.
ترانيم: هسه أصغر حجمي واعبرلج من فتحة الباب، متشوفين مقفول شلون ندخل؟
ايريم: راح ادور بلكي الكي مفتاح احتياطي.
ترانيم: لتعبين نفسج ماكو.
ايريم: مستحيل لغرفتي بيها.
ترانيم: حتى لو اكو تلكي ضامه بمكان مستحيل تندليه روحي جيبي درنفيس، جاكوك ،سكورسبانه وخلي نجرب احنه بلكي يفتح.
ايريم: تعرفين؟
ترانيم: ماكو مشكله بالتجربة.
رحت جبتهن واجيت: يلا راويني شطارتج.
حاولت بيهن كلهن ماصار أخير شي تعبت أو وخرت.
ترانيم: على الأقل جربنا.
ايريم: عندج ماشه؟
ترانيم: بطلي هندي وين ينفتح الباب بالماشه؟
ايريم: والحل؟
ترانيم: اوي شعليه اخوها عافها وراح اني شخصني.
ايريم: ولج والله صار جسمها ازرك بلكي ماتتت.
ترانيم: اكو احد من اهلج موجود؟
ايريم: اي اخويه وابوي بس ماعرف اذا يجون لو لا.
ترانيم: اتصلي بيهم وشوفي.
ايريم: واذا مهيائيل عرف؟
ترانيم: كولي اجه يشوفني اخوج هو محد يكدر يعترض.
ايريم: اخوج يعرف بكل شي وحقج يسويلنه مشكلة.
ترانيم: لعد خليها تموت اني بالنسبه اليه حذرتها هوايه ومسمعت من عندي خلي تفيدها تونه وسوالفها المكسره.
ايريم: متوقعتج بلا كلب لهاي الدرجه ولج اختج شلون تعوفيها هيج؟!
ترانيم: المثل يكول المايعرف تدابيره حنطته تاكل شعيره.
ايريم: راح اتصل بأبيل لأن ماكو حل وأخلي يجيب وياه استاج حتى محد يشك، ادعي الله يقبل يجي.
ترانيم: اي خلي يجي نشوفه شنو شكله حلو لا.
ايريم: والله عندج خلك تحششين.
ترانيم: شمالج هي نظره قابل ماكلين من عنده حته.
فتحت الموبايل واني ادعي ربي يقبل ويجي ويساعدنا، شويه ونفتح الخط صوته مال واحد تعبان ومخنوك.
أبيل: منو؟
بلعت غصتي ماحافظ رقمي لو صدك نساني اني منو؟
ايريم: اختك.
أبيل: وشنو تريد اختي بهيج وقت؟
ايريم: مساعده، تكدر تجيني؟
كال بعصبيه.
ابيل: هذا الكلب الساقط سوالج شي؟
ايريم: لاا بس تعال واني اكلك وجيب وياك استاج اريد اشوفها.
أبيل: دقايق واني يمج بس اغير ملابسي.
اخذت نفس ومسحت وجهي بكف أيدي صحيح غلط اللي سويته بس احسن ماتموت وخطيتها بركبتنه خاصه اني لأن مكدرت ادافع عنه، شويه وندك الباب نزلت سريع صار بوجهي بلعت ريكي وعيوني بقت تدمع مشتاقتله حيل اخويه وحزام ظهري وسندي وقوتي وحبيبي دخل بسرعه ولمني لم بحضنه.
ايريم: ابويه انت وين رحت وعفتني وي الوحوش وحدي؟
أبيل: اجيت واكسر راسه اليفكر يطخج، أمسحي دموعج لا امسح عائلتهم بالكامل واحسب مامخلوقين.
ايريم: اويلي شكد مشتاقتلك يروحي حبيبي.
أبيل: مو بكدي وعيونج بنيتي.
وخرت عنه وهو مسح دموعي وكال بقلق.
ابيل: اكو وأحد مضوجج كولي والله افلش راسه والعن يومه؟
ايريم: ماكو احد بس لأن مشتاقتلك حيل متحملت وبجيت.
ابيل: اريدج تجين يمي صار فتره طويله مشايفج بس يرجع مهيائيل كليله واذا ماقبل اتصلي بيه اجي اطيح حظه واخذج غصب عن خشمه.
ايريم: ههههه ان شاء الله تعال وياي محتاجتك بشغله، بس هي استاج وين؟
أبيل: مكعدتها اجيتج ركض فكرت صاير بيج شي.
ايريم: هو صاير بس مو وياي اريدك تجي تدخل جوه اكو باب مقفول تفتحه.
أبيل: بابيش؟
سمعت صوتها من وراي درت وجهي الها لابسه العبايه والحجاب وتحجي برفعة حاجب.
ترانيم: على هاي سوالفكم ماتت البنيه، فوت داده فوت ماعدنه جلب يعض جوه كلهم طالعين.
ضحكت جفصت بدون متدري أو يمكن هذا أسلوبها.
أبيل: منو هاي؟
ايريم: ترانيم حماتي الجبيره.
أبيل: السانها طويل ماعدها احترام ابد.
ايريم: هذا أسلوبها عوفك منها وتعال وياي قبل ميجي احد وتصير مصيبه.
صعد فوك اخذ الادوات من عندي درنفيس وبعد كم شغله ماعرف اسمها بقى شويه يحاول بالباب حتى نفتح كام من مكانه وعدل ملابسه وحجت بتعجب.
ترانيم: والله وطلعت بيك فايدة.
أبيل: اكيد بيه فايدة والا متصلت ايريم بيه، تعرف اخوها ميصعب عليه شي اذا راده وخلا بعقله.
هو فتح الباب واني دخلت يمها بسرعة اشوفها وبقوا ثنينهن يحجون بره.
ترانيم: أبطاي عفيه عليك.
أبيل: هسه محتاجه شي ثاني من عندي؟
ترانيم: سلامتك ماتقصر.
أبيل: سؤالي لأيريم.
ترانيم: عادي نفس الشي ثنينه خواتك.
أبيل: انتِ بكد امي.
ترانيم: ليش رضعتك واني مادري لو هازه كاروكك؟!
أبيل: لازم عندج مقام جبير حتى تهزين كاروكي خاله.
ترانيم: تخلخلت عظامك اخو مرت اخوي البطل.
أبيل: قصدج النذل الحقير.
ترانيم: ليش نذل حب واخذ غصب عن الكل.
أبيل: وهاي صفات النذلين ماكو رجال يسوي هيج.
ترانيم: بالحلال معصى الله.
أبيل: الزواج اللي يصير إجباري عن الزوجه يعتبر ز** ست خاله.
شفت وجهه كله دم والنفس تأخذه بصعوبه صرخت بيهم حتى يجون يساعدوني ننقذها قبل متموت.
ايريم: فارة وبزون شبيكمم؟!
ترانيم: شلونها؟
ايريم: لازم تروح للمستشفى بسرعه اذا بقت هيج تموت.
ترانيم: خبله انتِ والله يموتنا بدون فاتحه.
ايريم: ابيل ساعدني تكدر؟
أبيل: اي بس بالأول غطيها شوفي شلابسه.
كامت ترانيم جابت عبايه لبستها الها واني لبست عباتي هي من شافتني هيج صرخت بيه.
ترانيم: عوفج اني اروح الرجل القيور اذا شافج طالعه يلعن ابو خيري واني مالي خلكه.
طلع أبيل بسرعه واني وترانيم تساعدنا عليها ونزلناها جوه هي مافاقده حيل كدرت تمشي كم خطوه، ثواني وكفت سيارة بالباب اجيت اسأل هذا منو سبقني وهو يكول.
أبيل: هذا بتال، راح ناخذها للمستشفى وانتِ قفلي بابج وكعدي حتى نرجع.
أخذوها وطلعوا واني سويت مثل مكالوا بسرعة رحت لغرفتي وقفلت بابها هم وخليت راسي على المخده وماعرف شلون نمت.
___
ميمون: شبيك شكلك مو طبيعي؟
مهيائيل: ماكو شي شويه تعبان، محد طلع من يمه وكال شي؟
ميمون: قبل شويه الدكتور جان هنا طمني عن صحته وكال فتره قصيرة ويصحه.
مهيائيل: ارجع للبيت البنات وحدهن اهناك.
ميمون: وانت؟
مهيائيل: ابقى يمه لمن يصحى واشوف اذا اكدر اطلعه لو لا.
ميمون: ممنوع يطلع يبقى اهنا يومين حتى يصير احسن بالكامل ويتأكدون من عمليته.
مهيائيل: خوش، ارجع انت هسه، ارتاح أو إكل لكمه واني بالليل اروح يمهن.
___
فتحت عيوني واحس جسمي تعبان ومابيه حيل وريكي مر وعطشان وماكدر ارفع لا أيد ولا رجل، بقت عيني دور هاي اني وين وشنو صار ليش ماذكر؟!
مكدرت استوعب شي نفتح الباب ودخلت من عنده روحي ابتسمت معقوله كاعد احلم وهذا الملاك اشوفه هسه يقترب من عندي بهدوء وبخطوات رزنه؟ موخرت عيني عنها والابتسامة شاكه حلكي صدك حسيت نفسي طاير بالهوه واذا جان فعلاً حلم ماريد اصحه من عنده،
تفاجأت من وكفت يم السديه ورفعت ايدها للمغذي ضربت بيه ابره وحجت بصوتها الهادئ اللي سلب من عندي كلبي معناها هذا مو حلم احنه بأرض الواقع وهاي الأميره يمي هسه واكفه.
زُمردة: حاس بشي؟
استغليت الفرصه وكلت واني متناسي الكل عقلي بس يمها.
رائف: حاس بكلبي يدك سريع ويريد يطلع من مكانه تكدرين تفحصيه؟
رفعت حاجبها وحجت بتذمر.
زُمردة: حتى وانت مريض سرسري.
رائف: احب السرسره مو بيدي.
زُمردة: طالعه اصيح الدكتور يجي يجيك وضعك.
هسه يلا ستوعبت نفسي حجيت بتساؤل: اخوي وين؟
زُمردة: واكف بالباب بس يشوفك الدكتور ونطمأن على وضعك انقلك لغير غرفة وتكدر تشوفه.
باوعلي وحجه بمكر.
رائف: ليش تطمأنين لهاي الدرجه جنتي خايفه عليه يصير بيه شي؟!
معرفت شنو اجاوبه ساعتها تركته ومشيت.
عافتني وطلعت وروحي راحت وراها اذا جان هذا الحب فأني اريد ابقى عاشق طول العمر حتى لو بهذا الطريق اذيتي، قررت وهاي المره مامنها رجعه من شفت نفسي قريب من الموت خطوة لازم استغل حياتي كُل دقيقه قبل متخلص والحلم ماخليه مجرد حلم أسعى اله واحققه، بالرضا لو بالغصب هاي الحلوه لازم تحبني وتصير مرتي.
بعد فتره طلع الدكتور من يمه اول مشافه تقرب من ناحيته وسأله مستفسر.
مهيائيل: شلون صار هسه؟
:تجاوز مرحلة الخطر بس هم متكدر طلعه خارج المستشفى يبقى هنا كم يوم حتى يتحسن وضعه بالكامل ونطمأن عليه اكثر معافى يارب.
مهيائيل: أكدر اشوفه؟
:اي اكيد بس خلي ينقلوه لغرفه ثانيه.
هسه يلا بديت احس بالألم والصونده اللي مخليها اللي موتتني تحملت كوه حتى دخل وحجيت.
رائف: الحكلي احس اكو سجين داخله بطني راخ اموت من الألم.
مهيائيل: الدكتور ضربك ابره مهدئ شويه ويخف شدلي حيلك عمليه هاي اكيد تتأذة.
رائف: شلون عرفت بيه اني هنا؟
ومنو جابني من الأساس؟
مهيائيل: قبل ما اجاوب انت احجيلي شنو صار وخلاك تنام بالمستشفى؟
رائف: مابيه حيل احجي شي هسه خليها لبعدين.
مهيائيل: تليد مو؟
رائف: وليش شكيت بيه هذا بالذات؟!
مهيائيل: اني ما اشك احجي ومتأكد اتعافى وكوم بالسلامه وشوف شلون اعاقبه ألك.
رائف: حقه لتلوم الولد.
مهيائيل: احنه مابايكين حق أحد كل اللي عايشين بيه من تعبي وسهري ماكو **** مان علينه ومنطينه من جيبه حتى يجي يطالب بحقوق بعد كل هاي السنين.
رائف: امي الوحيدة النظلمت بهاي القصه.
مهيائيل: واخذ ثارها منهم كلهم وداعت شيلتها اخليهم يبجون دم وكول مهيائيل كال.
رائف: كلهم شياب هسه تاخذ الثأر من منو ولاتنسى الأساس ميت.
مهيائيل: بس الذيول عايشه حتى لو عمرهم طاعن بالسن الثار يتأجل بس مايموت.
رائف: اعرفك مصر احسن شي اسكت وكوم صيحلي اي واحد يضربني ابره هذا الألم نفسه ولا صار احسن.
___
ترانيم: صار سنه شوكت يطلع حلو امه ويطمنه اريد ارجع للبيت من وكت.
أبيل: انتِ بالمستشفى مو بالبيت لتصيحين.
ترانيم: ليش تسد حلكي؟
أبيل: بكد امي احترمج مو مشكله.
ترانيم: محسسني عمرك خمس سنوات اللي يشوفك يكول اني بنتك مو العكس.
أبيل: اذا بنتي هيج اعلك مشنقتها وماخلي صوتها يلعلع بنص الزلم.
ترانيم: خلي ينطيك الله بنت عود كول هيج.
هااا واخيراً كول دكتور شنو بيها؟
:نخفض ضغطها وكدرنه نداوي الجروح اللي بجسمها وبما انو الضرب مبين معناها متعرضه للتعنيف فتحنا بيها تحقيق وهسه الشرطه تجي تاخذ اقوالها.
ترانيم: اوكف لحضه شرطه شنو؟!
البنيه واكعه من الدرج وهاي الآثار تطلع طبيعي.
:اللي كدامج دكتور عنده خبره صار سنين يكدر يميز بين وكعه الدرج والضرب ولا مو اي ضرب آثار الصونده مبينه بجسمها.
ترانيم: انت ماتحجي ليش ساكت؟
أبيل: ليش اني شكو!!
تره لعلمج أجيت لخاطر ايريم والا اني بيتكم بلي بيه كله اكرهه ومن اشوف صايره عدكم مصيبه اطير من الفرح.
ترانيم: دكتور لخاطر اللي تعبده وتؤمن بيه اهلها ميدرون بيه اني جايبتها لهنا اذا عرفوا تصير مصيبه الها وإليه وهاي المره مو ضربة وتعدي هيج كبل للمكبره.
:تصير بذمتي اذا طلعتها بدون تحقيق اعذريني.
ترانيم: احسن مانصير بذمتك ثنينه لخاطر عزيزك سهلها بس هل مره.
:كلت لا يعني لا الشرطه شويه وتوصل وهسه اريد اروح عندي مرضه غيرها.
درت وجهي اله بقى أملي الوحيد من بعد الله.
ترانيم: ساعدني انت.
أبيل: وشنو اسوي مثلاً؟
ترانيم: انطلعها بدون ميدري احد.
أبيل: وهاي شلون تسويها بالله؟!
ترانيم: عندي فكره بس صيح صديقك بتار.
ابيل: بتال.
ترانيم: اي ادري انعال روح صيحه بالأول اني وين وانت وين.
أبيل: لخاطر ايريم خليها ابالج خاله.
ترانيم: موافقه بس روحح.
دقايق واجو ثنينهم صفن بوجهي وهو منتظرني احجي.
___
فزيت على صوت الموبايل كمت مفزوعه فتحته وأجاني صوتها العالي.
ترانيم: افتحي الباب بسرعة قبل ميجي احد.
نزلت ركض وفتحت الباب دخلتها تمشي على كيف ساعدتها وشكرت ابيل اللي اول موصلها راح، اخذناها للغرفه مالت امها نيمناها وطلعنه شمرت بوجهي العبايه واشرتلي على المي انطيتها الكلاص شربته وأخذت نفس وحجت بتعب.
ترانيم: ولج عشت مشهد من الأفلام وحق ربج.
ايريم: شلون يعني؟!
ترانيم: رادوا يحولونه تحقيق بسبب الضرب اللي بجسمها الا شويه متت بمكاني لو ما ربج نقذني وانطاني فكره.
ايريم: وشنو هي؟
Flash back
ترانيم: اني راح اوكع وانت صيح الممرضه وبتال يجيب عربانه ويطلعها بدون محد يحس.
أبيل: وين لكيتي هاي السالفه؟!
بيا فلم شايفتها؟
ترانيم: قبل لا اصير اني فلم سويهااا وخلينه نطلع لخاطر ايريم.
أبيل: استغفر الله مصبح بوجه منو ومفكور هيج؟
والله وسويتها وكعت وكام اخوج يصيح على الممرضين وبتال استغل الفرصه وطلع بيها يايمه خلولي مغذي وضربوني ابره واخوج كاعد يضحك عليه واني هم ستغليت الفرصه اول مطلع الدكتور طلعت المفروض ينطوني جائزة هي افكار ماتجي بس للعظماء.
ايريم: هذا كله طلع منج؟!
ترانيم: اي والله خفت لا تجي الشرطه صدك ومهيائيل يكتلنا كلنه اني اعرف اخواني اذا تخبلوا محد يشوف دربه وبعدني بعز شبابي منو يستاهل اخسر حياتي علموده.
ايريم: تعالي نسوي غده احسن الج واليه.
بقينا نسولف ونضحك حتى كمل الغده وره الصلاة حضرنا واني صعدت الأكل لياسيم خليتها تاكل وشربتها العلاج ونزلت كل هذا وماكو اي خبر منهم حتى اتصلت بيهم ترانيم وطمأنت عليهم وعرفنا رائف صارت صحته احسن بس راح يبقى بالمستشفى كم يوم تحت المعاينه.
صعدت لغرفتي وأخذت الموبايل اتصلت بيه اليوم كله ماسمعت صوته واحس نفسي مشتاقتله.
يحجي ويايه ابرود.
مهيائيل: الوو.
ايريم: شلونك؟
مهيائيل: زين وانتوا؟
ايريم: الحمدلله، حبيت اعرف شوكت تجي للبيت؟
مهيائيل: ماعرف يمكن ابقى لليل ميمون مو يمكم؟
ايريم: ليش هو اجه؟
مهيائيل: اي من الصبح ليش متدرين؟
ايريم: لا والله ماشفته.
مهيائيل: هسه اتصل بيه واشوفه، ياسيم شلونها؟
بلعت ريكي عرفت هذا السؤال علمود يتأكد اذا فاتحه الباب لو لا وللصراحه مردت اكذب حتى يثق بيه اكثر ومياخذ عليه نظره بعدين.
ايريم: فتحت الباب الها اني وترانيم لأن كسرت خاطرنا وهي هسه زينه، قبل متحجي شي سويت هيج لأن شفته مناسب ماكو وأحد بينه ميغلط وماكو فرق اذا رجال لو مره.
مهيائيل: نحجي بهذا الخصوص من ارجع للبيت هسه رايح يم رائف محتاجني.
ايريم: اخذ راحتك عيوني.
مهيائيل: تسلملي عيونج داده.
ايريم: انت مضايج مني مو؟
مهيائيل: بلائي الحلو له مضايج بس نقرر شنو العواقب لعملتج من اجي.
غلق الموبايل واني رحت اسوي عناية ابشرتي صاره فتره طويله هاملتها وداخلي احساس قوي عواقبه مراح تعدي على خير بس المهم عرف حتى لو نص الحقيقه افضل ميجي وينصدم واطلع اني الغلطانه، ابتسمت على نفسي سبحان مغير الاحوال جنت اخاف من ظلي وهسه كمت اسوي خطط واتكتك صدك لو كالوا من عاشر قوم اربعين يوماً صار منهم.
صار الليل كعدت بالصاله وره العشا اني وترانيم نسولف وحجيتلها شنو كلت لمهيائيل ليصير عدها علم في حال سألها، شويه ونفتح الباب ودخل سلمت عليه وسألته عن حالة رائف طمنها عنه وصعد ليفوك واني رحت وراه.
ايريم: متعشي؟
مهيائيل: لا ومامشتهي اي شي اكلت العصر.
ايريم: تريد جاي؟
مهيائيل: اريدج انتِ وره ماطلع من الحمام عندي حجي وياج مرتي.
ابتسمت وداخلي خوف بسيط وقلق شنو راح يسوي؟
فتحت الكنتور وطلعت من عنده حب وكرزات وجبس جان مشتري قبل فتره بسيطه واني مو من الأشخاص اللي يحبون هاي الأمور فتركته بس هسه حسيت الوضع مناسب لهيج اجواء، غيرت فراش الجربايه فرشت فرشه حمره وطفيت الضوه وشغلت اناره خافته رشيت معطر جو وعلكت بخور وغيرت ملابسي سريع لدشداشه ربع ردن وقصيره جوه الركبه لونها بُني، عطر وشويه روج وكحل طلعت اطك بالكاع، رتبت هاي الشغلات بصحون وشغلت الشاشه على فلم قله احبذ هيج أمور بس لازم نولعها، حتى ينسى شي لازم اكو شي ثاني يشغل عقله،
طلع من الحمام رحت يمه وسويت مثل المره السابقه اخذت المنشفه ونشفت شعره بس هاي المره حاولت اطخ بيه اريده يتأثر وينسى موضوع ياسيم بالكامل صحيح هذا الشي مستحيل بس على الاقل الليله باجر الصبح اذا بقينا عايشين ميصير لهاي السالفه قيمه تنتهي ابعض الأوامر والقرارات وخلص احسن ميسوي شي في حالة عصبيه يندم عليه بعدين،
ابتسمت أو دفعت ايده من راد يحضني.
ايريم: ممتفقين هيج احنه لتصير وكيح.
مهيائيل: على شنو مسويه هاي الأجواء اذا متردين هيج؟!
كلامه أذاني حسسني شامره نفسي عليه عضيت شفتي من الداخل وابتسمت غصب بس مكدرت ابقى هادئه وحجيت واني افجر الكبت الداخلي الصارله فتره يصول ويجول بكلبي.
ايريم: اذا معتبر أجواء الغرفه هي محاوله من عندي حتى تسوي وياي علاقه واستدرجك غلطان اني مو من هذا النوع ومستحيل اصير بيوم من الأيام مجرد ردت اخفف عنك التعب واريح اعصابك بلي أكدر عليه،
من اصير زوجه مطيعه وانفذ رغبات زوجي اطلع وحده بلا كرامه وتركض وره احتياجاتها ومن اغلس عنك او أدير وجهي هم اطلع غلطانه لازم ابادر ومن بادرت شنو صار؟
تركت امتحاني وكلت حقه زوجي وماطلب غير المذكور بالشرع والقانون نفذت وقدمت نفسي حالي حال اي وحده مزوجه بس انت شنو سويت؟
لاتنسى مهيائيل آخر مره شنو سويت بيه لأن اني لو اعيش الف سنه احاله انسى، عفتني ولا كأن شي صار ورجعت تعتذر على انو حاولت ومكدرت وبلعتها وسكتت ومحجيت كلمه ورجعت حياتنا طبيعيه وقدر الامكان ضميت الغصه بكلبي وسكتت ليش؟
لأن اذا حجيت اطلع وحده زايحتها ومستحيل ميجي يوم وتعيرني بحجة انتِ اجيتي برجليج اني مطلبت منج شي، ولتكول اني اخالف بعظمة السانك كلتلي براحتج ماريد منج اي شي تبقين وياي بنفس الغرفه واشم عطرج واشوفج مرتاحه ومن هاي السوالف وبس بلحظه مامحسوبه غيرت كلامك وردتني اصير زوجتك بالكامل وهسه لأن سويت أجواء اغير روتينه الممل صرت اني اريد القرب هه ماعرف انت بأي طريقة شايفني!!
تعاملني مثل ميكول المثل باكه لاتحلين خبزة لتثلمين واكلي وشبعي،
راح اريحك من عندي بالكامل اني من الأساس ردت مهرب من هذا البيت المليان شياطين واللي ماكدرت انام بيه ليله وحده مرتاحه وارجع للمكان اللي اجيت من عنده وانت دور وحده تعيش مثل متريد وحسب قراراتك.
وخرت عنه وفتحت الكنتور صدك تعبت يسمعني وهو ساكت ومنطق كلمه لأن يعرف كلامي صح من اول يوم داست بيه رجلي عتبه هذا البيت واني ماشايفه يوم حلو اي شنو جابرني، شو عندي عائلة شايلتني شيل ولا اكو طفل يخليني اتمسك وابقى،
طلعت ملابسي واني عازمه اروح خلص اتصل بأبيل يجي ياخذني منا، خليت كم قطعه بالجنطه وهو واكف بدون حركه بس يباوعلي بنظره ماعرفت افسرها ولا ردت، رحت اخذ موبايلي من على الجربايه علمود اتصل حسيت بيه حضني من وره قويت نفسي حتى ما أضعف خلصت طاقتي واني اتأمل باجر احسن من اليوم ويطلع اسوء بألف مره، جملته الأخيرة ملت الكأس بالكامل وخلتني انفجر وأخذ قرار حتى لو جان غلط لأن اجه من عصبيه مفرطه لكن يبقى افضل من البقاء مكتوفة الأيدي وانتظر الفرج يجي طاير إليه،
تقرب مني، شوية وبتعدت من تذكرت تصرفه ويايه ابتسمت بمكر وحجيت بثقه.
ايريم: اعذرني مالي نفس ماكدر خلي نجرب غير يوم.
شفت بعينه نظرة رغبه واني اباوعله بأبتسامه اريده يحس شعوري والألم اللي عشته ذيج الليله وخرت عنه مبتعدة وهو محاول يلزمني، دخلت للحمام ونزلت دموعي وجانت دموع فرح رديت اعتباري بدون ما احتاج اهل وشكرت ربي انطاني القوة حتى اسوي بيه هيج،
طلعت لكيت الغرفه صايره عباره عن دخان وبدون ما انطق اي حرف كعدت على الجربايه وبقيت اكرز حب واكل جبس واتابع الفلم بندماج، اجه نام يمي وبقى ينفخ الهوه بضيق واني ابتسم من جوه ليجوه رفعتله أيدي وبيها جبسايه بدون ماباوعله مأخذها من عندي رجعت اكلتها، بقيت على هذا الحال حتى حسيت بيه ضاج حيل وصرخ بيه.
مهيائيل: طفي الخراااا اريد انطمرررر.
عرفت وصلت حدها وياه كمت طفيته اصلاً اني نعست حيل والفلم مايستحق السهر، لملمت الأشياء وخليتهم بكيس زباله اجيت انزل عاط بيه.
مهيائيل: وينننن.
ايريم: اشمر العلاكه ما رايحه اشرد.
مهيائيل: اذا كلتي هاي الكلمه مره ثانيه اكسر راسج.
ايريم: مو تايهتلك.
مهيائيل: اتقوه عظمج باخوج عبالج يكدر يخلصج مني والخلقج ايريم اطلع اجنازتج من هذا البيت وماخليج تخطين خطوه لبيتهم.
ايريم: مو هي بكيفك والله اروح وكدام عينك ومتكدر تكول لا، لتفكر ابد ابقى متحمله هاي العيشه طول العمر اني مثل الطير المحبوس بس يجي يوم ينفتح بيه القفص مالتي تلكاني طايره لبعيد.
طفر من مكانه ودفعني على الباب وقابلني بعيونه الحمر وعروك جبينه البارزة يحجي بغضب شكد ما اكول بقيت متمسكه داخلي يريد يوكع من الخوف.
مهيائيل: اكسر رجليج واديج وأخلي عندج اعاقه دائمه حتى بعمرج كله متفكرين تخطين خطوه خارج سجني، انتِ تسجلتي بأسمي ومهيائيل ممتعود يتنازل عن املاكه.
ايريم: مو بكيفك.
مهيائيل: بكيفي وتشوفين، اني اسكت شيوخ كلمتي تمشي على الكل بدون محد يفكر يناقشني اللي اكول عليه يصير خلص يصير وماكو إعتراض،
تورطتي بساحر ومحد يخلصج من سحري مصيرج على فراشي وبنص حضني نايمه غير هناك مالج مكان،
وهسه يلا كدامي اشمري اللي بأيدج وتعالي اريد انام.
ايريم: واني ماريد انام وبكيفي.
مهيائيل: منو لاعب بعقلج اليوم؟
ايريم: ميحتاج احد يلعب بعقلي اني واعيه واعرف شنو اريد.
مهيائيل: اذا واعيه لازم تعرفين زوجج بنص عقل بس يتخبل تصرفاته تصير مو موزونه العني ابليس اللي يحجي بعلقج هسه وطردي الشر احسن ميصير الحجي شي ثاني.
ايريم: شي مثل شنو تقصد؟
مهيائيل: ناويه الليله متعدي على خير مووو كوليييي؟
ايريم: لتصيح بوجهي متخوفني تره.
مهيائيل: استغفر الله وكتها فيوزاتج يطكن!!!
ايريم: لتغلط عليه ما اسمحلك.
مهيائيل: يا**** خلاني اتزوج اني تايبببب تايبببب شورطنيييييي؟!
ايريم: عاشت ايدك بما انو اني ورطه اخلص من عندي ليش معصب لهاي الدرجه خليني انزل ولتشوفني ورتاح من وحده مزعجه نكديه.
كلمه من عنده وكلمه مني صارت عركه لا اني أكدر اغير موقفي ولا هو ومن البدايه لو واحد مكبر عقله مصار هيج بس الشيطان شاطر بهيج أمور،
سكتت من تقرب من عندي حيل وبلعت ريكي المشكله مهيائيل ماكدر أحزر تصرفه شنو ابدد دائماً تكون ردة فعله غير متوقعه وهاي المره هم صارت هيج سحبني من أيدي للجربايه نام وخلاني بحضنه خنكني خنك دفعته بأيدي كايله.
ايريم: اختنكت وخر شويه راح اموتتت.
جاوبني بهدوء وهو ينزل راسه يبوس جبيني.
مهيائيل: تموتين بحضني شتدرين اكثر من هيج فخر.
ايريم: اي مو ميته بحظرة الرسول صلى الله عليه وآله.
مهيائيل: اششش اسكتي خليني اعرف انام.
ايريم: وخر عني بعدني زعلانه منك.
مهيائيل: الصبح اراضيج خلينا انام هسه ورايه طلعه من وكت.
ايريم: وين تروح؟
مهيائيل: رائف لو حضني نساج؟
ايريم: مينسيني قابل حضن منو.
عصرني اكثر بحضنه نومه مال واحد يريد ينتقم والله مو مال اوادم مد ايده وكرصني بأيدي خلاني اصرخ.
ايريم: هاي شبيكككك!!!
مهيائيل: ياحضن هذا تردينه ينسيج حضني؟!
ايريم: عمي والله ماقصد شي هيج طلعت بدون ما انتبه، رخي شويه لخاطر الله تعبتني.
بقى معند مكدرت اعرف انام حتى غفى حركته شويه يلا كدرت اخذ نفس وانام، فزيت على صوت اعرفه فتحت عيوني بصدمه وقبل ما انطق اي حرف صار المسدس براسي...
يتبع..
البارت اكثر من 4080 كلمه.
تفاعلكم صاير يزعل يعني انتوا متجون الا بالتهديد👻
لتنسون التعليق بين الفقرات وتصويتكم للبارت شمعاتي..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!