للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة(زهراء احمد)
___
سامِرني يَسمَر يالسمارك سومَري
___
دخلو بسرعه لغرفة العمليات وكف مقابيل الباب ايده ترجف عيونه بيها لمعة دموع، روحه تريد تطلع من مكانها وهو يشوف ابنه اللي رباه وكبره ديصارع الموت جوه، اخذ حسره طالعه من روحه وحجه بتساؤل.
مهيائيل: شلون صار هيج؟
ميمون: اللي اتصل بيه كال متعاركين أو واحد بيهم جان سكران وضاربه ابطنه.
مهيائيل: لازميهم؟
ميمون: لا، يدورون عليهم بس هم شاردين.
مهيائيل: خلي يطلع منها سالم واني اعرف شلون اخذ حقه من عيونهم مربع.
ميمون: شنو تسوي؟
مهيائيل: اللي لازم يصير وي كل واحد يندك بعائلتي.
بقينا منتظرين ساعتين بلكي واحد يطلع ويطمنه عليه بعد عذاب وتفكير وقلق نفتح الباب وأخيراً طلعت من عنده ممرضه عيونها حمر اول مشفتها ركضت يمها وحجيت سريع.
ميمون: شلونه؟
زُمردة: نجحت العمليه بس هو خسر هوايه دم ورايحه اجيبله.
مهيائيل: ماكو داعي اني اتبرعله.
زُمردة: لمن نسوي الفحص ونكمل الإجراءات مالتك نتأخر هوايه، طلبنا دم نفس زمرته طالعه استلمه، دعوله.
هي راحت واجه يمي يحجي بغصه اعرفها عدل على رغم يكابر بس مبين مقهور حيل من نظرة عيونه.
مهيائيل: بيا وجهه ندعي الله واحنه ماكو عمل حرام مامسويه؟
ميمون: بس هو مو مثلنه متقرب من هاي الأمور كل حياته.
مهيائيل: طالع شويه واجي اذا صار شي انطيني خبر.
ميمون: خوش.
___
مكدرت ارجع انام من طلع والقلق بقه ياكل بيه اكل اتصلت بيه اكثر من مره يفصل وماكو رد من عنده بقيت ادعي بداخلي شنو مجان صاير رب العالمين يحفظه ويحميه ويبعد عنه المصايب والبلاء،
مخليه راسي على المخده والأفكار تلعب بعقلي طوبه أخير شي قررت اتصل برائف لو اي احد يطلع اسمه كدامي علمود اطمأن واعرف شنو صاير، اخذت الموبايل بأيدي بنيتي اتصل بيه شفته اتصل بيه بسرعة فتحت الخط وقبل ما انطق اي شي اجاني صوته التعبان.
مهيائيل: اريد اطلب من عندج طلب تكدرين تسويلي اياه؟
ايريم: اكيد طبعاً انت تأمر، شكو شنو صاير؟
مهيائيل: رائف متعرض لطعن سكين اريدج تدعيله حتى يعدي مرحلة الخطر ويطلع منها سالم.
ايريم: عزةةةة شلون صار هيج وليش أو وين؟!
مهيائيل: عوفي هي الاسئله هسه وكومي ادعيله ومن ارجع اسولفلج.
غلق الموبايل واني كمت صليت ركعتين هديتهم للأمام علي ودعيت رب العالمين بحق الأمير عليه السلام عنده،
جنت ارتاحله من البدايه واحس بيه خوش ولد بس بعد اللي صار وي استاج ضجت من عنده ومن عرفت بيه معجب بوحده ويريد يخطبها وشلون دافع عني وعلاقته وي مهيائيل وسوالفه كل شي وكف بعيني ودعيتله من اعماقي ترجع صحته وعافيته وينور بيته مره ثانيه.
___
مهيائيل: شكو ***** وينهم لحد الآن؟!
ميمون: لتصيح بنص المستشفى احنه.
مهيائيل: ولك صار سنه واحنه منتظرين مطلع سجين لو مضروب طلقه شيسوون!!!
ميمون: انت سمعتها شنو كالت خلي ننتظر شويه بلكي يطلع واحد بيهم.
مهيائيل: اريده يطلع بخير وسلامه واشوف موضوعك شنو.
ميمون: ياموضوع؟
مهيائيل: بعدين نسولف بيه.
مرت ساعه ثانيه واحنه نفس الوكفه حتى رجلينه وكعت ولحد الآن ماكو اي خبر منهم شويه ونفتح الباب وطلع الدكتور.
مهيائيل: شنو الوضع دكتور اخويه شبيه؟
:مضروب عنده شريان ابطنه أو وقفنه النزيف بصعوبه ماكدر انطيك جواب اكيد بس هو محتاج دعائكم، الاربعه وعشرين ساعه الجايه هي تحدد حياته، معافى ان شاء الله.
من سمع هيج طلع بدون ميحجي كلمه بس منظره وعصبيته خلتني اعرف شنو راح يصير.
___
:طلعت من الغرفه ونزلت حضرت الغده وصحت امي علمود ناكل، امي مره جبير بالعمر ومريضه وماعدنه احد غير اني وأخويه،
حميده: اخوج وين؟
مُزن: طلع عنده شغل.
حميده: اذا ماطلع مسوي مصيبه عاتبيني.
مُزن: ديري بالج على نفسج ولتهتمين بيه ناره تاكل حطبه.
حميده: راح يجيب مصيبه إليه والج وكولي مكلت.
مُزن: يمه لخاطر بيت الله بطلي تفاولين علينه.
حميده: هذا الواقع، واحد سكير معربد ماخذ طبع ابوه الطايح حظه وشوفي اذا ممسوي عمله شكبرها، والا شفتيه يكمز على روسنا مثل القرد يريد زقنبوت.
مُزن: هذا دلالكم اله هو السوه بيه هيج.
حميده: لا والله طلع **** على ابوه ******.
مُزن: الرجال ميت من سنين عوفيه بكبره.
حميده: ولا اعيفه السرسري الله لايرحمه دمرني وبهذلني.
مُزن: مدمر شي انتِ رضيتي بكل شي صار مو صغيره تره واعرف الموضوع بالكامل لتبررين غلطج.
حميده: حقكم بالورث لازم يرجعلكم غصباً على روسهم.
مُزن: هو احنه نعرف بيهم وين ماوين حتى تردين ورث، العمر ضاع بدون اهل وكرايب لاعمام ولا خوال شنو فايدة كم فلس لخاطر ربج.
واحنه نسولف ندك الباب حيل طلعت واني اصيح بصوت عالي.
مُزن: على كيفككك شبيك هيج دك مشايف بيبان!!!
فتحته وصار كدام عيني واني معت، طول وجسم وهيبه ولابس زي عربي دشداشه سودة وغتره بيضه ونظارات سود، اسمراني أو وجهه يخبل ولحيته محدده، تهت بيه ومحسيت بنفسي الا على صريخه.
مهيائيل: اخوج الساقط وين؟
مُزن: احترم نفسك ولتصيح بوجهي واحجي بإحترام لا ألم عليك العالم وخليهم يطيحون حظك.
مهيائيل: أمشي كدامي صيحي المطي مالتكم ماعندي حجي وي الزعاطيط.
مُزن: مو بعينك وتكول عليه زعطوطه امشي والله فلا اصيحه.
مهيائيل: بقانون العشاير ميصير سحك عتبت بيت بيه مره بس اذا بقيتي تعاندين بهاي الطريقه والله ومن انزل القرآن ابهذل احوالكم كلكم واخليكم متعرفون الليل من النهار.
مُزن: منو انت وتهددني بهاي الطريقة؟!
لا عبالك اخاف اني زلمه بهيئة مره اموتك وامشي بجنازتك الطم.
مهيائيل: أمشي بابا وبدون السان طويل خليني اشوف شغلي يلااا تحركي.
مُزن: ما أمشي واللي تريد تسوي سويه.
مهيائيل: خوش اني افوت مبين الحجي ميجيب نتيجه وياج انتِ.
دفعني ودخل واني صرخت بيه.
مُزن: ولك ماتستحي ماعندك أخلاق شلون تسوي هيجججج وتفوت للبيت مابيه بس نسوان!!!
مهيائيل: عاد شلونها النسوان من امج واشيل أيدي.
دخل وكال بتهديد صدك خوفني.
مهيائيل: اني ماعندي كلام وياجن ومحترمج كونج مره جبيره ورجليج بالكبر بس الزمي ابنج وكليله الأحسن مايخليني اشوفه لأن موته يصير على أيدي ومثل ماخله اخوي ينام بالمستشفى اليوم انيمه بالكبر وانتِ تعرفين مهيائيل وعمايله بيج من زمن.
عافنه وطلع وهي وجهه صار اصفر ركضت ونطيتها ماي تشرب ومكدرت اسألها مهيائيل منو وشنو سوه بيها من قبل وهيج خافت من شافته!!
___
مر نص يوم واحنه بعدنا يمه بالمستشفى رجع ومخلاني اسأله كبل راح للدكتور استأذن من عنده يدخل يشوفه حتى لو خمس دقايق والدكتور اكيد قبل، ساحر ويطلب المقابل لازم يكون مطيع اله.
لزمت ايده وتذكرت من جان طفل شلون يجي يلعب وياي، فرقنا عشر سنوات بس احسه ابني، ربيته وكبر كدام عيني الهوه اذا مر بيه يأذيني هاي النومه مو الك يبن امي.
مهيائيل: فتح عيونك أو ازفك الها بيدي، اللي تكول عليها متحبك واكعه بيك بدون متحس، كوم خويه ولتعلعل كلبي بنومتك هاي،
اذا ما أخذ ثارك من عنده فلا اسمي مهيائيل واني أعلمه شلون يندك بيك ويغدرك.
___
بقيت منتظره يوم كامل وهو ماكو وكلما اتصل بيه يطلع مغلق ماعرف شنو صار بيه وماكدر اسوي شي غير ابقى منتظره وساكته حتى لترانيم محجيت شي ماريد اخوفها واعيشها بقلق ورعب وخبر عنهم ماكو،
وبين كل اللي صار اليوم وقلقي بقت عيني عليها، طلعت الصبح من وقت وستغلت محد موجود راحت بدون ريوك وبقت للظهر يلا اجت على ملامحها اكو شي غريب حسيت احساس وكأن مسويه فد شي مبين بوجهه منظرها مختلف عن الصبح، يمكن عطرها لو حمرتها الطوخ وهي بالعادة متخلي مكياج وبسرعة صعدت للغرفه وحتى للغده منزلت،
فكرت اروح الها واكسر هذا الحاجز الموجود بينه من تزوجت لحد الآن واتعرف عليها عن قرب واصير صديقتها بلكي أكدر اسحبها للطريق الصح وما اخليها تاخذ حرام اكثر وشي داخلي يكلي سوي هيج لخاطر مهيائيل لأن يريد يحافظ عليها ويفرح من يشوف اخته تمشي بالطريق الصح،
دكيت الباب دقايق وسمعت صوتها فتحت ودخلت بأبتسامه: فارغه؟
ياسيم: اي تعالي فوتي.
كعدت بصفها على الجربايه مبين هسه كعدت من النوم عيني فحصت ملامحها عن قرب اكثر لابسه مستور ممبين بيها شي فكرت راح اشوف علامه لو الزم دليل يثبت مسويه غلط بس ماكو شي والغريب بالأمر اسلوبها لطيف وتحجي ويايه بأريحية شكيت اكو شي بطريقه اكبر والا من وحده تكرهني لوحده تحبني فجأة اكيد اكو مصيبه تفكر بيها.
ايريم: حبيت اشوفج محتاجه شي لو لا، منزلتي على الغدة ومن اجيتي لحد الآن باقيه بالغرفه اكو شي؟
ياسيم: ماكو شي بس تعبانه شويه.
ايريم: سلامتج من التعب، اتصل بمهيائيل ياخذج للدكتور؟
فزت بسرعة خلتني اتأكد اكو شي وضعها مو طبيعي هاي البنيه.
ياسيم: لاا ميحتاج بس لأن الجو حار والامتحانات على الأبواب مو أكثر.
ايريم: اي صح مبقى شي للامتحانات انزلي ويايه هسه نسوي شي ناكله بما انو بعد وقت للعشا واني جوعانه حيل.
ياسيم: ما اشتهي شي اذا جعت انزل تكدرين تاكلين وحدج.
ايريم: براحتج لعد اني جوه اذا حتاجيتي شي.
ياسيم: تسلميلي مشكوره.
تركتها ونزلت وداخلي احساس صحيح ميه ميه مسويه شي اليوم بس ان شاء الله ميكون اللي أبالي وتروح سمعتها على الأخير.
خلص هذا الوقت بهدوء تام واني اتصلت بأمي بوقت مسبق وكتلها مهيائيل اخوه مسوي حادث وبالمستشفى حتى مينحرجون ويجون ومحد بالبيت،
خلصت صلاتي وأخذت موبايلي اتصل بيه رن اكثر من مره وماكو جواب أجيت اغلقه وقفني صوته.
مهيائيل: جان موبايلي فاصل من الشحن، شلونكم؟
ايريم: انت اللي شلونك وشلون رائف صار زين؟
مهيائيل: بعده بالعناية ماكو اي خبر لباجر الصبح.
ايريم: راح تبقى هناك؟
مهيائيل: لا راح ارجع بعد شويه والصبح اروح مره ثانيه.
ايريم: هلا بيك.
مهيائيل: اهلج اجو؟
ايريم: لا كلت لأمي رائف مسوي حادث ومحد بيكم موجود بالبيت.
مهيائيل: خير ان شاء الله، اذا تأخرت لتنتظريني اقفلي بابج ونامي.
ايريم: راح ابقى منتظرتك، وبأي وقت تشوف نفسك ألك خلك وتريد تسولف اتصل بيه.
سكت شويه بعدين كال بهدوء.
مهيائيل: تعبان.
ايريم: بيه التعب ولا بيك.
مهيائيل: جان يضحك ويسولف وحلكه مينسد ابد فجأة سكت وماكدر اسمع من عنده كلمه، شوفته بهذا المنظر هدت حيلي وماخلت عندي قوة.
ايريم: يرجع لحيلة وصحته وسوالفه صدكني.
مهيائيل: خايف عليه لاتصير بيه اعاقه دائمة واني اعرفه مستحيل يتحمل.
ايريم: لتفكر بهاي الطريقه ماطول منتظرين خبر تفائل خير، رب العالمين مايعيف حمل مطروح يحلها ربك.
مهيائيل: والنعم منه.
ايريم: تخيل باجر الصبح بإذن الله الدكتور يجي ويطمنك على صحته ويكلك تكدرون اطلعوا للبيت.
مهيائيل: بعقلي هسه العكس حتى الجن ميكدر يطمني.
ايريم: بس اني اطمأنيت واخذها من عندي وكول ايريم كالت.
مهيائيل: عبد الرحمن مبين كاعد يحجي بعقلج.
ايريم: لا اني اليوم من دعيت رب العالمين بحق الامام علي عليه السلام اجاني هذا الاطمأنان معناها حاجتي مقضيه.
مهيائيل: الله يسمع من عندج، شنو اريد غير هيج.
ايريم: كاعد يمه؟
مهيائيل: عنايه ممنوع ادخل.
ايريم: تعال لعد اني محجيت شي الهن وباقين وحدنا، اسبح واكل لكمه وريح شوي وارجع باجر الصبح للمستشفى.
مهيائيل: اطمأن عليه وارجع.
ايريم: وحدك موجود يمه؟
مهيائيل: ميمون يمي وميقبل يرجع باقي اهنا راح أقنعه يجي وياي يرتاح شويه وبعدين نجي واشوف اذا يقبل.
ايريم: توصلون بالسلامة يارب.
مهيائيل: مع السلامه.
ايريم: بحفظ الرحمن.
سديته من عنده وطلعت من الغرفه شفتها تمشي جايتني نزلنه جوه وطلعنه للطرمه كعدنا على المرجوحه وبقت تسألني.
ترانيم: هم حبيتي بأيام الشباب؟
ايريم: لا والله عمري كله ماعرفت طريق الحب منين وانتِ؟
ترانيم: اي والله حبيت بس بوقتها جنت مزوجه وشعوري بداخلي محجيت بيه لأحد.
ايريم: معقوله؟!
ترانيم: اي معقوله، بذلك الوقت بديت هسه اكبر واعرف الحياة عدل وصرت بالغه وكبر جسمي وعقلي هم، جان عدنه حريه نطلع وندخل بكيفنا بس وي عمتي، فجنت يوميه اروح للسوك لو واجب لو يم الجوارين مو مثل هسه كاعدين بالبيت اربع وعشرين ساعه بذلك الوقت دايحه اني،
المهم شفته.
ايريم: كلبتها لأغنيه.
ضربتها على ايدها: تسمعين اغاني طلعتي ومسويه نفسج يمي متدينه.
ترانيم: بس هاي لان ماكدر احجي شي وشنو احجي حبيته واني على ذمة رجال بلعت غصتي وسكتت ومات حبي بكلبي.
ايريم: وهو؟
ترانيم: مادري بيه بس هو جان جوارين اهلي من زمان ومجنت منتبه عليه بعدين من كبرت يلا عجبني وحبيته.
ايريم: ليش اهلج يم عيالج؟
ترانيم: اي جنه نفس المنطقه بس مو نفس الشارع، ماعدنه وحده تزوج بمكان بعيد، اجي يمهم اروح يم صديقتي وهو كلما اطلع اشوفه كدامي بعدين شالوا اهلي وبقيت وحدي هناك بس بقى هو موجود وعيوني تحجيله والساني ميكدر ينطقها.
ايريم: متعتبر هاي خيانه هم؟
ترانيم: اكيد طبعاً خيانه وجنت استغفر هواي، مع هذا ماسويت شي غلط بقيت احبه بداخلي ومتعديت مشاعري وخنته بأرض الواقع الخان بس كلبي ومو بيدي لأن عمري كله معشت الحب وماعرفته هو شنو، زوجي الله لايرحمه شوفني الويل، ضرب اهانه خيانه على فراشي وبيتي، يوميه يزوج وحده متعه ويجيبها ويتغزل وياها واني يطردني بره الغرفه واكعد بالطرمه الطم واندب حظي واشبع مسبه بأبوي شلون زوجني لواحد حقير وسرسري.
ايريم: عجيب شلون يسوي هيج وكدام اهله هم!!!
ترانيم: احنه صح نفس البيت بس عندي وحدي مشتمل بحديقة بيتهم فمن يدخل ويطلع محد يشوفه بابنه مو عليهم وهو جان زايح الحيا وأهله يخافون من عنده محد يحجي وياه.
ايريم: ليش مطلبتي الطلاك؟
ترانيم: عيب عدنا وحده تطلك.
ايريم: ماطول صار عادي تفكرين بيه ومو خيانه بعدج لحد الآن تحبيه؟
ترانيم: اي والله على رغم تزوج وصار عنده خمس جهال بس بعده كلبي يرف من اشوفه.
ايريم: بعده نفس المنطقه؟
ترانيم: اي مشال منها ابد، ناس متعودة على ناس وكلهم كرايب محد يطلع ويعوف ناسه وبيته.
ايريم: ماطول مزوج انسي ولتفكرين بلكي ربي يعوضج بحب حقيقي يدوم طول العمر.
ترانيم: ماكو وأحد يكلب وحده مثلي مره عجوز انا عداني الشيب.
ايريم: والله احله مني، طول بعرض وجسمج يخبل وين يحصل وحده مثلج اصلاً.
ترانيم: اخطبيني لخوج لعد.
ايريم: والله اركص ركص اذا حبج ورادج وين يلكي وحده مثلج كامله والكامل الله.
ترانيم: خايبه اسكتي لا واحد يسمعج والله نصير مضحكه.
ايريم: ليش تصيرين مضحكه شنو اول وحده تزوج بعد وفاة زوجها!!!
ترانيم: اخوج بكد ابني.
ايريم: لتفكرين بهاي الطريقه صارت قديمه اهم شي الحب والتفاهم العمر ماله علاقه.
ترانيم: اللي يسمعج يكول حبني ويريد يخطبني يمعودة.
ايريم: الله يعوضج بالاحسن.
ترانيم: من هاي الناحيه عوضني بيج وبمهيائيل.
بقت ادندن بالاغنيه بصوت ناصي، صحيح هي تحبه وهو يمكن حبها بس القدر مجمعهم سوا، بعض قصص الحب تنتهي قبل ماتبدي، السبب بمنو؟
بالأم لأن مدافع عن بتها لو بالاب وهو يقدم بنته وهي طفله لرجال مايفهم وغبي يدمر حياة طفله علمود ملذاته، كم وحده دمرت حياتها بهذا السبب؟
ليش احنه النساء ماعدنه الحق بأختيار الشخص اللي نكمل حياتنا وياه؟
وليش مو من حقنه نحب، وإذا نخطبت من حبيبها يرفضون ويصيرون عائق ويزوجوها لواحد ثاني، يعني هي بالحالتين مزوجه من الأساس انطيها لشخص يحبها ويحتويها حتى لو حياتها تصير جحيم يبقى اختيارها متلوم احد وتدعي عليه،
كلما اشوفها احس بداخلها حزن جبير كلمتين تلاثه مينهنه وماكو حل والزمن مستحيل يرجع ليوره ويحسن حياتها بس اني متفائله بالقادم يعوضها ربي كل خير،
دخلنه جوه وهي راحت لغرفتها واني هم دخلت للحمام وكملت روتيني اليومي ورحت نمت بقيت منتظره هوايه حتى نعست وغفيت وفزيت على صوت الأذان بالموبايل مديت ايدي لمكانه لكيته فارغ كمت صليت وكملت وتصلت بيه ميفتح كلبي بقى يلعب اكيد صاير شي والا متأخر هيج وهو كال راح اجي.
مهيائيل: خلي نروح للبيت نرتاح شويه ونرجع.
ميمون: ما ارجع ابقى اهنا حتى يطلع من العنايه كل شي يصير.
مهيائيل: خوش راجع اني فد ساعتين واجي وانت بدل مكاني.
ميمون: انتبه للطريق لتسوق سريع.
مهيائيل: اذا صار اي شي اتصل بيه.
بهذا الوقت طلعت الممرضه من الغرفه تركض ثواني واجه الدكتور وياه ممرضين ثنين بقينا مفزوعين شويه وطلعوا كلهم يسحبون السديه ودخلوه لغرفة العمليات مره ثانيه،
فقد توازنه أو وكع.
ميمون: الله الله شبيك؟
مهيائيل: مابيه شي روح شوف شنو بيه ليش اخذوا لغرفة العمليات؟
ميمون: كوم وياي ماعوفك وحدك اهنا.
مهيائيل: ميمون روح شوف وليدنا حيلي راح ماكدر امشي.
ميمون: مهيائيل.
مهيائيل: روح خويه ماكدر امشي ولا أكدر اشوفه.
تركته وكلبي يمه ورحت اشوف شنو بيه طلعت الممرضه نفسها مالت الصبح وكفت بالباب وكعدت على ركبها تبجي دنيت يمها وحجيت بخوف وقلق على اخوي الصغير: شبيه؟
رفعت راسها اليه وبكسره كالت.
زُمردة: نزيف داخلي صار عنده والدكتور كاعد يسويله العمليه.
ميمون: فوتي جوه وخليج يمه اخوي يحبج حيل وراح يكون مرتاح اذا انتِ موجوده قريب عليه.
كامت تبجي بشهكه بس سمعت الكلمه وفاتت ابتسمت عليهم ذولي راح يصيرون أزواج سعداء عن قريب اذا الله وفقهم.
دخلت للغرفه شفت شلون وجه اصفر والدكتور فاتح بطنه ويطلع الدم النزيف كارثي بقاءة عايش صدك معجزة من رب العالمين، رحت يمه وبقيت اساعد الدكتور والدمعه كلما تريد تنزل امسحها، اشتغل والساني يدعي مو حب ابد ولا عندي مشاعر إله بس هاي اول مره اشوف هيج حاله خاصه واني هنا تعين جديد، لو يمكن بسبب الذكره من اجه لهنا بيوم الحادث مالت الدكتور وبقى يصبر بيه ويحجي وياي، كلما افكر بشنو ممكن يصير ابجي اكثر حتى تعبت وستسلمت للأمر الواقع وبقيت انتبه لشغلي.
مهيائيل: شنو كال الدكتور؟
ميمون: نزيف داخلي.
مهيائيل: وليش هيج صار؟
ميمون: مادري.
مهيائيل: هذا الدكتور بس لايريد ياخذ اعضائه؟
ميمون: ما اعتقد بس الواضح صاير خطأ بالعمليه الأولى فهيج صار لو هو من الأساس اذيته جبيره.
مهيائيل: والحل؟
ميمون: ماكو حل غير ننتظر ونشوف.
مهيائيل: واذا مات؟
ميمون: لتحجي هيج ان شاء الله مابيه غير العافيه.
مهيائيل: هيج كلنه من تمرضت.
ميمون: ذيج السالفه وحد.
مهيائيل: نفس الشي ماكو فرق.
ميمون: تختلف مو نفس الشي.
مهيائيل: عرفت السبب.
ميمون: وهذا ماتاب؟!
مهيائيل: بالأول ترانيم ومرتي وهسه يريد ينتقم برائف لازم نخليله حل ميصير هيج يمشي براحته واحنه ساكتين.
ميمون: آخر مره من اخذت ترانيم لبيتها شنو صار؟
مهيائيل: نفس الحركه هم اجه للباب وبقى يراقب.
ميمون: مسوا شي ثاني؟
مهيائيل: ميكدر مخلي بالبيت حصانه محد يتقرب منه.
ميمون: ليش خاطرت بيها؟
مهيائيل: بالأول شكيت بعيالها لأن اعرف بيهم ساقطين أو واحد منهم عنده وياي عداوه وردت اتأكد من شكي يردون ترانيم لو ايريم حتى اعرف اللي يريد يضربني منو.
ميمون: وتأكدت؟
مهيائيل: اللي يكرهني مراقبني عن كثب يعرف وين اروح وشوكت اجي بس ذلك شجاع اعرفه اذا يريد شي يجيني وجه بوجه لكن هذا مختلف جبان لدرجه راح لأخوي ومكدر يخطي خطوه إليه.
ميمون: وشلون عرفته؟
مهيائيل: هاي سالفه طويله من يخلص هذا الأمر نحجي بيه.
ميمون: نطيح حظه عباله يكدر على ابناء الشيطان.
مهيائيل: شسويت على الموضوع مالتك؟
ميمون: لتخاف مثل منريد ديصير.
مهيائيل: وين هن هسه؟
ميمون: كل وحده يم أهلها خلي تنحل ونعرف شلون نتصرف بعدين.
مهيائيل: سويت فحص؟
ميمون: ميحتاج اني اعرف شنو مشرب.
مهيائيل: اتخلص من عنده بأسرع وقت اريدك ترجعلي ميمون الرباني.
اخذ نفس وكال بتأنيب: اعتذر اذيتك وتجاوزت وي مرتك هم مجان بوعيي ومن كلي رائف نصدمت انت تعرف عدل اني مو من هذا النوع بس كل شي صار بسببهن وراح ادفعهن الثمن كلهن وداعتك.
مهيائيل: من هاي الناحيه اني اعرف ومتأكد مجنت بوعيك بس لازم تنتبه اكثر اذا انعاد هذا التصرف اموتك.
ميمون: ادري بيك متسويها.
مهيائيل: لتثق هوايه بيه، احنه ساعه أعداء وساعه اخوه نتقمص الدور النحتاجه حسب الظرف.
ميمون: بس للأخير نبقى اخوه والدم بعمره ميصير مي.
كام من مكانه وهمس وي نفسه بصوت خافت حتى ميسمعه: وانت بعمرك متصير آدمي.
انتظرت اباب الغرفه ساعتين ضبط كمت اعد الدقايق حتى يطلع واشوفه بخير وماصاير بيه شي: جنت مختنك صار يومين وعرفت راح تصير مصيبه ومجنت ادري راح يصير بيك هيج شي وتنام هنا وماكدر المح طولك الحلو، ارجع بخير والله افرشلك الدنيا ورد بس خليني اشوف ضحكتك وهاي هي.
نفتح الباب بعد ماخلص صبري وحسيت نفسي خلص راح افقد مابيها مجال، راسي راد ينفجر من الألم بس مع هذا بقيت واكف حتى اطمأن عليه وأخيراً وبعد عذاب شرف الدكتور.
مهيائيل: طمني شلونه؟
:هسه اكدر اكلك اتجاوز مرحلة الخطر راح نخلي بالعناية حتى يفك البنج وبعدين تكدر تشوفه، الحمدلله على سلامته.
مهيائيل: ليش صار بيه هيج؟
:اخوك متعرض لطعن سكين ومتأذي عنده شريان كدرنه نسيطر على الأمر وخيطنه الجرح بس هسه صار عنده نزيف مره ثانيه من نفس الشريان بعد مخيطنا عرفنه عبر مرحلة الخطر وان شاء الله مايمه الا العافيه.
مهيائيل: هذا الشي مراح يسبب عنده اضرار أو مشكله معينه بالمستقبل؟
:من يصحى نسويله كافه التحاليل ونتأكد اكثر لكن حسب خبرتي بهذا المجال ما اعتقد لأن السجين صاير بمكان غير حيوي ومأذيه بس الشريان.
مهيائيل: شكراً ألك.
:واجبي.
مهيائيل: راجع للبيت واذا صار اي شي اتصل بيه ماكدر ابقى اكثر هنا.
ميمون: ماشي اخذ راحتك.
____
ماكو نوم يجيني فتحت الشباك وبقيت صافنه على شكل النجوم والقمر الساعات تمشي بسرعه وبده الظلام ينزاح وتضوي الشمس المدينة، خيوط النور اكتست الظلمه تفائل جديد تولد داخلي وتأملت خير، كل صباح هو رساله النه ببدايه العمل والجهد لدنيانا أو اخرتنا،
نفتح الباب التفتت شفته هو بملامحه تعب واضح، عيونه تحتها سواد وأيده بيها رجفه وضعه مو طبيعي وكأن مريض رحت يمه واني اعرف الأنسان بهيج وضع مو مال سؤال، نزلت الغتره من شعره وفتحت الساعه من ايده ونزعته المحابس والحلقه وهو صافن احسه بغير عالم بديت افتح دكم الدشداشه انتبه عليه أو وخرني.
مهيائيل: اني افتحهم بس طلعيلي ملابس.
ايريم: تدلل.
طلعتله التراك وخليته اله بالحمام دخل هو واني بقيت منتظرته لمن طلع متأخر هوايه،
لاف المنشفه على راسه راد يسحبها سبقته اني وأخذتها من ايده ونشفت شعره واني مبتسمه بوجهه اريد ازيح عنه التعب بس ماعرف شلون وبأي طريقة، هاي الأمور البسيطه حسيت بيها معنى خاصه وهي طالعه من الكلب،
كملت وهو سحب أيدي قبلها واخذ من عندي المنشفه شمرها على الكرسي واخذني للجربايه نام وسحبني يمه وأيدي بشعره يحجي بهدوء بس كلماته دخلت لروحي.
مهيائيل: حضنيني حيل اريد احس امي موجوده يمي هسه.
غصب عني نزلت دمعتي وحضنته بكل قوتي وهو كمل كلامه بنفس النبرة.
مهيائيل: مشتهي ارجع لحضنها مره ثانيه وانسى التعب كله، الله لو ماخذني وعايفها على الأقل البيت متشتت هيج واخواني ماصاروا كل واحد بصفحه وماعدهم اخلاق ولا اني مشيت بهذا الطريق، جانت عظيمه حيل لدرجه انزل لرجلها ابوسها اشم بيهن ريحة الجنه، امي ماتت وأخذت كل شي حلو وياها.
ايريم: امك موجوده ما ماتت، تشوفك وتسمعك وطبطب على جتفك هم.
مهيائيل: يعني هسه هي بالجنه مو؟
ايريم: اكيد هي خوش مره.
مهيائيل: لا مو اكيد يجوز تتعاقب على ولدها شلون بلا تربيه ويمشون بطريق الشيطان.
ايريم: ماكو وأحد يتعاقب بذنوب الثاني كل شخص على عمله.
مهيائيل: اقريلي اي شي حافظته.
ايريم: ما اسمع اغاني اني.
مهيائيل: حتى لو لطمية عادي، اكو قصيده اسمها لاترد مات الورد احب اسمعها، سمعيني اياها بصوتج ذكريني بأمي من جانت تلعب بشعري وتقرالي اي شي حافظته.
على رغم اني ماحافظتها عدل بس قريت اللي اتذكره من عدها.
ايريم:
إنـتـهـيـنـه و إتركتلك ذكرياتي
و بـصـوركـم تـلـكه دمعة أمنياتي
تـلـكه حسره من دعائي في صلاتي
إبـحـيـاتـي إنـت غـايب و بمماتي
سـلـوتـي مهد الطفل أتصوره و ألولي
سـلـوتي ها يالإخو يالما ترد حجولي
تـنـجـوي إبنهارك...دمعة إنتظارك
يـا الـعـفتني أملي دربك بس خواطر
يـا مـا يا ما كلتلك إرجع لا تسافر
يكضي يومي و كلت أشوفك بلكي باجر
لا يـبـاجـر سـيـفه يذبح بالمشاعر
أيـسـت مات الأمل و بيا جرح تجيني
أيـسـت لا مـا ترد و آني عفت أنيني
تـنـطـوي إبـمدارك...دمعة إنتظارك
حسيت بيه دمعت عينه سكتت وبقيت العب بشعره واحجي بهدوء: الحياة منخلقنه بيها حتى نعيش بسعادة الحزن مكتوب علينا مثل أي شي ثاني، امك او ابوك أو اختك انت مجبر بيوم من الأيام تعيش حزنهم، الحوادث والمصايب والبلاء هذا شي روتيني لأن بالمختصر احنه منخلقنه للراحه، بالأمس امك الله يرحمها باجر احنه ماكو احد يدوم " الدنيا دار فناء والآخره دار بقاء" الامام علي عليه السلام هيج يكول،
ادري صعبه خسارة الأم ومستحيل يكدر احد يعوضها بس الحياة تمشي ومتبقى متوقفه على احد.
مهيائيل: هي امي مو اي أحد، هذا الألم محد يكدر يحسه غير اللي عاشه وان شاء الله عمرج كله متعيشيه.
ايريم: الله يصبرك ويقويك ويخليك تتجاوز هاي المحنه.
مهيائيل: آمين.
خليت راسي على رأسه حتى حسيت ايده رخت عرفته نام بقيت مكسره ومتحركت لمن كعد مكدرت اكوم جسمي كله منمل شويه يلا كدرت احركه، هو دخل للحمام ولبس ملابسه واني نزلت جوه حضرت ريوك وجبرته ياكل كم لكمه.
ايريم: متطلع لازم تاكل شي.
مهيائيل: ما اشتهي لو طابخه بعير مجتف.
ايريم: ماعدنه بعران هو جبن وكلاص جاي اكلهن شلون مجان وطلع.
مهيائيل: من ارجع اطبخي الغده وأخذي كلمه مني بس ادخل للمطبخ اكل قبل ما اغير ملابسي حتى.
ايريم: والله ماخذ منك لاكلمه ولاكلمتين تكعد تاكل هسه قبل متطلع ادري بيك البارحه ولا لكمه داخله معدتك واني الصراحه بعدني شابه ماريد البس اسود والزم عده.
ضحك واني ضحكت من شفته نسى حزنه شويه كعد اكل: اخذ هاي من ايدي ميصير ترجعها عيب.
مهيائيل: كافي شبعت.
ايريم: والله أيدي مترجع لازم تاكلها يلا.
مهيائيل: خلصيني هاي آخر وحده والرب الخلقج ما أكل غيرها.
ايريم: ميخالف.
غسل وطلع واني رحت وراه قبل ميفتح الباب صحته: مهيائيل.
التفتلي تقربت من عنده ورفعت نفسي بسته بخده وحجيت بأبتسامه: ارجعلي سالم راح انتظرك.
باسني هو هم بخدي وكال بأبتسامه: هاي لأن ماحب ابقي دين وراي.
رجع باسني بخدي الثاني وكمل: وهاي لأن اني كريم أو اعوض بالأكثر.
رفع وجهي باصابيعه وطبع بوسه على شفايفي وكال بغمزة: وهاي لأن مشتاقلج حيل ياقُفلي والمفتاح.
ابتسمت وهو باسني بجبيني وكال قبل ميطلع: ادعيلي دعوتج مستجابه حتى لو طولت.
ايريم: بحفظ الله والنبي وأهل بيته.
دزلي بوسه بالهوه وراح واني دخلت جوه والنعاس بعيوني رحت للغرفه نايمه وقفني صوت جاي من غرفة تالين تفاجأت محد موجود هنا لعد هذا اللي اسمعه شنو؟!
تقربت بهدوء وبخطوات بطيئة حتى محد يسمع شي والله والصدمه...
يتبع..
البارت اكثر من 4048 كلمه
اذا مشفت تفاعل يسرني ازعل شمعاتي اذا انتوا تردون زعلي بكيفكم، تصويتكم للبارت والتعليق بين الفقرات لتنسوا..
تصبحون على الف خير وعافية..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!