للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة(زهراء احمد)
___
في المنتصف
حيث لاتستطيع العودة ولا التقدم
حيث الماضي الذي يجرك إليه بكُل قوته، والحاضر الذي يسحبك إليه بعنف..
لاتريد ان تمر بهذا وذلك، المستقبل هو فقط ماتريده ولايسعك الذهاب إليه بدون خوض الطريقين..
نحنُ الآن حيث اللاعودة فأنظر أي الطريقين تريد أن تسلك..
بقلمي زهراء احمد
___
حسيت كل شي توقف، احلامي اهدافي طريقي وحياتي بأي لحظه ممكن تنتهي، واكفه بكُل ثبات وعلى شفايفها ابتسامة خباثه، حقد، انتقام، غل، والسبب مجهول حرت اعرف نظراتها شنو وبالأحرى ردت بس اخلص من هذا الموقف الأكثر من مرعب، من تكعد من النوم فجأة وتشوف مسدس براسك مستحيل تسوي اي رد فعل تبقى بس تباوع بصمت منتظر القادم شنو،
كل شي بيه يرجف كلبي، جسمي حتى معدتي كامت توجعني، نسيت بهاي اللحظه الادعيه وعيوني عليها منتظرتها تضرب طلقه وينتهي كل شي، بهيج مواقف تعرف الحياة شكد قصيرة متستاهل الكره والبغض والحقد والعيش بالخدع وأهم شي الابتعاد عن رب العالمين بحجه يجي يوم واتوب لأن هذا اليوم يمكن مايجي ومتلحك اصلاً تودع اهلك مو تفتح صفحة جديدة وي ربك، الحياة قصيرة لأبعد درجه فلازم نستغلها ومنضيع دقيقه وحده من عمرنا بدون فايدة،
غمضت عيوني وتشاهدت مُرَحِبه بالموت، اللي فاجأني صوت ضحكتها فتحت عيوني بعقدة حاجب معقوله هاي البنيه خبله اصلاً من الأساس هي منو؟!
ستغليت الوضع وشمرت ايدها لبعيد وكع منها المسدس رجعلي عقلي الجنت فاقدته قبل دقيقه ونطيتها كف بعمرها كله مراح تنسى وي ضربتي الها دخل مهيائيل اللي اول ماشافها وشافني شلون واكفه وكلي يرجف راحت عينه للمسدس صاح بيها بصوت عالي.
مهيائيل: منووو سمحلج تفوتيننن لهاي الغرفه؟
بلقيس: اني سمحت لنفسي ابن العم.
مهيائيل: مبين بعدج على نفس قلة الأدب زوجج البغل ماعلمج تحترمين الأكبر من عندج ومدخلين لغرفة ثنين متزوجين؟
بلقيس: غرفة ابن عمي وزوجته عادي شكو بيها مهيائيل!!!
مهيائيل: وهذا المسدس ابنج وجايبته يشوف ابن العم هم؟
بلقيس: ابو الالف هذا بس شكله حقيقي، لو شايف ايريم شلون وجهه صار اصفر خطيه رادت تنجلط وتموت من الخوف.
مهيائيل: موت الخذاج وكبر الطماج وحتى فاتحه ماسوي عليج ولو ادري العار مايموت بس لابأس بالأمنيه.
بلقيس: ليش هيج ويايه وكأن كاتله واحد من اهلك؟!
مهيائيل: هي قاعده وحده مالها ثنين اذا تردين تبقين اهنا يوم يومين حتى يجي الثور وتنكلعين مرتي ايريم ام البيت تبتعدين عنها والا الباب اللي عبر منه ابوج وامج يعبرج هم.
ابتسمت جانت تستاهل هيج جواب من تلكي احد يدافع عنك يرتفع هرمون الادرينالين لا ارادي وتبقى واكف ومبتسم،
صارت عصبيه ومشت بدون كلمه وصلت يم الباب وقفها وهو يكول بدون ميدير وجه الها.
مهيائيل: رجليج متعبر عتبة هذا الباب او وجهج قريب لهاي الغرفه ما المحه.
بلقيس: واذا مسويت هيج تسطرني بسحر؟
مهيائيل: ميحتاج سحر كلمة وحده من عندي ادمر حياتج بالكامل.
بلقيس: لتخاف اني حياتي مدمره من البدايه يعني متكدر تسويلي شي.
عافته وطلعت واني رحت يمه متسائله.
ايريم: منو هاي؟
مهيائيل: بنت العم.
ايريم: ياعم؟
مهيائيل: دَاسِم.
ايريم: دَاسِم عمك؟!
مهيائيل: اي.
ايريم: مو ابوك؟!
مهيائيل: هو العم بمقام الوالد بس اني اعتبره مجرد حمل ثكيل وخلصت من عنده.
ايريم: تفاجأت عبالي ابوك.
مهيائيل: يخسا هذا النكس يصير ابوي.
ايريم: يعني انت ابوك وامك متوفين؟
مهيائيل: اي الله يرحم الوالده.
ايريم: الله يرحمهم.
مهيائيل: بس الوالده الاب ميستاهل الرحمه.
ايريم: الميت ميجوز عليه غير الرحمه.
مهيائيل: مو كل ميت يستاهل الرحمه اكو موته اللعنه وحدها متكفيهم.
ايريم: اذكروا محاسن موتاكم.
مهيائيل: جان **** محاسنيش اللي اذكرها!!!
ايريم: استغفر الله شنو مجان يبقى ابوك ميصير تحجي عليه هالشكل.
مهيائيل: ابوي واحد سرسري ساقط **** تدرين ماضيه اسود مصخم جان السبب بزواج ترانيم وهي طفله وهو السبب الأساسي بلي نعيشه اليوم، خلي الماضي ميت بكلبي لاتحييه مره ثانيه.
اخذ السويج وطلع الواضح من المحال نعيش يوم حلو بهذا البيت.
___
فاتح عيوني بالسكف صار ربع ساعه كاعد ولا واحد اجه وكال هذا الجلب شرايد حنينين بس على نسوانهم اخوان جيس حب،
نفتح الباب حسيت اجاني الفرج لو مو جرحي جديد جان كمت ركصت، والله وزادت الفرحه واني اشوف هل جمال كله والأنوثة والرقه والسعادة جاي يمي، شيطاني لعب وكلت اشتغل الفرصه واخذلي بوسه حتى لو سطحيه مدري ليش وزني ابليس هل كلب عليها اليوم،
من صارت قريب مني مديت ايدي الزم أيدها دفعتني ضحكت ورجعت مديت ايدي مره ثانيه هم دفعتني صحت متألم بسرعة حجت: اخخخخخ.
زُمردة: شبيك شنو اليوجعك؟
اشرتلها على كلبي: ولج هو من شافج وماثبت كام يركص جوبي اي ادري مره لو اغنيه شعبيه؟!
زُمردة: تدري سوالفك معوقه؟ اسكت عني اكمل شغلي واطلع.
رائف: شنو شغلج؟
زُمردة: انطيك ابره بالوريد حتى متحس بالألم.
رائف: ميحتاج باوعي بعيوني من وحدي اخدر ميحتاج مسكن.
زُمردة: ادبسززز ثمن كلامك قبل متحجي واحد سرسري.
رائف: هو اكو عاقل يبقى شريف كدام هل الحسن كله؟!
زُمردة: رجاءً خليني اكمل شغلي واطلع.
رائف: تكدرين تساعديني بالصونده؟
باوعتلي مصدومه.
زُمردة: بيمن؟
رائف: الصونده شبيج مو ممرضه انتِ؟
زُمردة: اي بس انت رجال هذا شغل الممرض من اطلع اصيحه.
رائف: زين ممكن تساعديني اغير قميصي كلش مضوجني؟
زُمردة: من يجي الممرض يساعدك.
رائف: واذا ردت بوسه شلون هم يجي الممرض يساعدني؟
زُمردة: سد حلكك لا اشتكي عليك والله اكلهم يتحرش بيه.
رائف: سديه انتِ والأفضل تستخدمين حلكج لأن ايدج ثكيله واني رجال مريض ماتحمل.
زُمردة: والله ماضربك الابره خلي الدكتور الخابصني بيك هو يبتلي معليه.
طلعت واني صافن على اثرها اويلي شلعبتي بيه ولج؟!
شويه واجاني يرعد وعيونه بكصته صرخ بيه.
مهيائيل: وتالي وياك مجوززززز!!!
رائف: لايطك بيك عرج وين اوديك واني رجال مدد؟
مهيائيل: ولك اثول غبي ليش مخلي البنيه تبجي وتشكي منككك؟
رائف: انااا؟!
مهيائيل: لا دَاسِم الك***.
رائف: استغفر الله غيبه شهل حجي.
مهيائيل: وحق ربك رائف اذا ماجريت عدل انقلك لغير مستشفى لو اطلعك للبيت واخليك حلم تشوفها.
رائف: وين سمعتها؟
مهيائيل: واكفه بالممر تبجي وتشكي على واحد متحرش بيها عرفتك انت لان ماتوقع هيج فعل من واحد غيرك.
رائف: رجال شريف عفيف لتتهمني باطل واحد مريض ماشيل لا أيد ولا رجل منين اجتني الشجاعه وتحرش ابنت العالم؟!
مهيائيل: يعني مو انت الكلتلها اريد بوسة؟
رائف: ايععع شهل الألفاظ اني ماكول هيج كلام سوقي.
مهيائيل: اي صح اتهمك باطل انا.
رائف: اكلك ختنكت اريد اطلع منا شوفلي حل.
مهيائيل: تبقى يومين لمن نتأكد من سلامتك يلا.
رائف: صحيلي واحد يشيلي الصونده *****.
مهيائيل: هسه اشوفلك ممرض ابقى عاقل حتى ارجع، **** يريد يطلع من المستشفى وهو يتمنى يبقى هنا العمر كله حتى ياكابل وجهه.
رائف: سمعتك.
مهيائيل: هذا الهدف.
بقيت يومين بالمستشفى ماكدرت المحها مره ثانيه من آخر موقف صار بيناتنا تندمت هسه اني شنو حجاني جان منجب وساكت، نفتح الباب ودخلت ممرضه بتسمت من شفتها اي والله اجه الفرج هي هاي التوصلني الها، تقربت من عندي واني تغزلت بيها.
رائف: شوف الجمال هو كل واحد يشتغل بالمستشفى يصير حلو هيج؟!
:نزول على السانك منين يجيب هل الكلام الحلو؟!
رائف: الغزل من الأساس نخلق الج وبس الساني مايكدر يشوف هيج جمال ومايمدح بيه.
:مكتلي شنو صار على موضوعي؟
رائف: ادللي من عيوني الثنين كم سموره عدنا احنه.
سمر: راح تحجي وياه؟
رائف: وليهمج انتِ بس اخدميني بشغله وحاجتج مقضيه اصلاً هو معروف بكُل المنطقه ساحر مضبوط وحقج يجونه من المحافظات حتى بس ياخذلهم خيرة.
سمر: كول من عيوني تأمر انت.
رائف: رقمها.
سمر: ماصار شهر من انطيته الك شوكت ضيعته؟!
رائف: مو ضاع موبايلي والارقام كلها بيه وبعدين انتِ كاعده تجمعين راسين بالحلال شكد عظيمة يم ربج هاي الشغله.
سمر: ادلل هسه اكتبه ألك.
رائف: ياروحي تسلميلي سماره.
اخذت الرقم وضحكت لو ترحين لأخر العالم يا زُمردة تاليتج نايمة بحضني.
____
ترانيم: ولج هم على جيه كملتي الغده؟
ايريم: كملت بقت بس النواعم اسويهن وهاي هي.
ترانيم: وذيج ست الحسن وين نهفي عليها هي تجي تسويهن.
ايريم: بشاربج لاتجي ولا اريد اشوفها لتصعدين عندي الضغط.
ترانيم: لعد عليها المواعين حالها من حالنه مو تاكل وتمسح ايدها بالحايط.
ايريم: معليج بيها يمعودة.
ترانيم: هي وين راحت ماشفتها من الصبح؟
ايريم: يم ياسيم.
ترانيم: نفس الطينه سبحان الله.
بقينا شوية نسولف حتى نفتح الباب ودخلوا راحتله ترانيم حضنته وسلمت عليه واني سلمت عليه من بعيد ودخله مهيائيل للصالة مقبل يروح للاستقبال، دقايق معدوده نزلت وحق الله عروس مو هيج لابسه ثوب اسود مفصل عليها وبيه فتحه على طول الرجل من جوه الركبه وطن مكياج والروج احمر دموي والشعر مفتوح عروس، عروس، راحت يمه ونزلت باوسته عيوني مثل توم طلعن من مكانهن ورجعن شنو من جرأه عدها!!! بعمري كله مشايفه هيج قلة أدب نهائياً،
ضربتني ترانيم بأيدها وكالت بصوت ناصي.
ترانيم: مو كتلج حظ الك*** كاعد.
عفناها ورحنه حضرنا الغده طبعاً ميمون ماكو بس مهيائيل ورائف، خلص اليوم بالخطار والهوسه كل دقيقه ماي وجاي راسي فتر ورجليه راحت مجنت متوقعه ساحر القرن عنده هلكد معارف صدمني صراحه،
يومين واحنه على نفس الوضع ناس طالعه ناس داخله وحتى مهيائيل قليل اشوفه يخلص النهار يم الخطار وبالليل يم رائف،
كاعدين بالصاله كلنه وره العشا مشغلين تلفزيون والأخ مخليه فلام كارتون صافنه عليه طالب جامعه سنه ويتخرج وعقله عقل طفل فوكاها يريد يزوج هذا اذا خلف جهاله شيطلعون؟
حسيت بأيدة صارت وره ظهري بلعت ريكي شويه و بقى يرسم دوائر وهميه اقشعر جسمي من عدها تقدمت ليكدام بدون محد يحس عليه ماريد واحد ينتبه بس طلعت غلطانه من طفر رائف من مكانه وكام يغرد.
رائف: هناك في الأعلى غرفة ترهم يصير بيها نادي مال خيل تعرفها خويه؟
مهيائيل: بسببك هاي الغرفه ماشايفها صار يومين ومشتاق للمهره حيل.
رائف: روحلها ماعندي شي اذا حتاجيت عود اتصل بيك.
مهيائيل: له له له مايصير اعوفك وحدك.
رائف: انا صاعد وانتوا أخذوا راحتكم.
مهيائيل: اثبت ولك وباوع للتلفزيون وسكت.
رائف: اي والله كوكب زُمردة غالي عليه حيل.
مهيائيل: اتعلم شلون تتعامل وي النسوان ابو الحلوك.
رائف: على اساس مامسويها انت.
مهيائيل: مو وي وحده غريبه.
رائف: مرتي راح تصير وانت الشاهد.
مهيائيل: عود نشوف.
اني استمع الهم والعب باظافيري مسويه نفسي بغير عالم واني كل كلمه كالوها سمعتها بصم، التمت الجمعة وصار ازدحام اجت ترانيم وميمون وبلقيس وياسيم اللي اعتذرت من مهيائيل بس هو ماعبرها وبقت تنزل يمنا ومحد سأل على الآثار لان تخلي خافي عيوب ميبين بيها شي وهذا بفضل بلقوسه اكيد،
مد ايده ولفها على كتفي ساحبني اله كلها منتبه على التلفزيون الا عيونها علينه، والمصيبه متسكت تحرج المقابل بدون متستحي.
بلقيس: إيدك ابن العم مو كدامنه.
مهيائيل: ايدي تروح للمكان اللي تحبه لتدخلين بنت العم.
بلقيس: عيب تخجلها.
مهيائيل: شريفه مو مثل البعض مايستحون.
بلقيس: افااا عليك منو ذولي العالم؟
مهيائيل: والله من الافااا عرفتيها منو، المطي مايمشي الا بالضرب.
بلقيس: امي وين؟
مهيائيل: يم الكا**** تكدرين ترحين تشوفيها.
بلقيس: احترم خوالي لتغلط عليهم ممأذيك.
مهيائيل: اني احترم الأوادم ولحد الآن من أصل هاي العائلة مشفت أدمي.
بلقيس: اريدك اطلع ابويه من الحبس.
مهيائيل: والله الشغله يم الحكومه مو بيدي.
بلقيس: انت اللي شتكيت عليه وبسببك ماكدر اشوفه ليش حبسته بدون ذنب؟!
نزلت دموعها وبقت عيني عليها وعلى حركاتها.
مهيائيل: امج ماتكعد عاقل واني الف مره كلت اللي يدوسلي على طرف ادوس راسه بالقندرة وما اسأل اني مو انسان لطيف ابددد.
ترانيم: عاشت ايدك خويه لطلع احد ولترجع احد خلي كل واحد بالمكان اللي يستحقه، وانتِ يابلقيس صار اربع ايام اهنا مناويه ترجعين لبيتج ورجلج؟
بلقيس: لا ماناويه اصلاً جيتي هنا بدون رجعه.
مهيائيل: طلاك ماكو احلمي بيه بهذا البيت مستحيل تعيشين.
بلقيس: بيت ابوي واعيش بيه غصباً على اليرضا والمايرضا.
مهيائيل: هههه ابوج بيته بالسجن اذا حابه روحي يمه اما هذا بيتي وباسمي وملكي وماكو كلب ابن كلب يكدر يكول عكس هيج، وهسه يلا تصبحون على خير نعسان وتعبان وانت رائف اي شي تحتاجه صيحني.
ترانيم: مايحتاج اخذ مرتك واصعد اني انام يمه.
مهيائيل: ياسيم كدامي لغرفتج.
دار وجهه إليه ومدلي ايده وكال بصوت عالي.
مهيائيل: ارخصونا حبابيب كعدتكم ماتنمل بس مشتاق لمرتي.
صعدنا فوك اول مادخلنا قفل الباب وسحبني لحضنه بكُل قوته.
مهيائيل: مشتاقلج فوك ماتتخيلين احس مبتعد عنج صار شهر.
اخذ نفس من شعري وهمس بأذني بهدوء.
مهيائيل: ارنوبه سمنانه بس احسن احب الملهمده.
ضربته على ايده: وين سمنانه والله نفسي.
مهيائيل: ولج ماشايفه جسمج بالمرايه؟
وحق ربج ملهمده صايره.
ايريم: مهيائيل لتلح بالسيرة، نفسي هاي متشوف باوعلي عدل.
ابتسم متقرب مني، بعض الأحيان الأشياء التجي فجأة احله بألف مره من المخطط الها من قبل عطايا الله عظيمه والصبر لابد يجي وراه فرج، راسي على صدره وأيده بشعري يتغزل بيه بأعذب الكلمات نساني كل شي صار ويانه من قبل وفتحت صفحه جديده مليئة بالحب والسعادة.
ايريم: مهيائيل.
مهيائيل: يكيفه.
ابتسمت وتخربط وضعي ونسيت شنو أريد اكول: نسيتني هسه لازم اصفن يلا اذكر شنو جنت رايده احجي.
مهيائيل: ههههه كومي صلي ركعتين وانتِ تذكرين.
ايريم: اي صدك والله بس ليش؟
مهيائيل: لأن الشياطين تجي للانسان بوقت العبادة وتشتت عقله بهاي الطريقه حتى ميركز وي الصلاة.
ايريم: ذكرت، انت من شوكت صرت ساحر؟
مهيائيل: مره شفت الوالد يستحضر جن بوقتها جنت ثالث متوسط يمكن يعني بعدني صغير، بقيت اراقبه لفتره طويله تقريباً سنه كامله وتعلمت شويه شويه.
ايريم: حتى ابوك سحار؟
مهيائيل: جان مضبوط اكثر من عدنه.
ايريم: وشوكت تبطل؟
مهيائيل: من يهديني ربج.
ايريم: يجوز مايهديك.
مهيائيل: لا يهديني هيج اني احس.
ايريم: مهيائيل.
مهيائيل: قُفله والمفتاح.
ايريم: هيج تخجلني وانسى شنو اريد من عندك.
مهيائيل: انسي لأن أني اريد شي ثاني من عندج هسه.
ابتسمت خجلانه، بقينا اني وياه نسولف ونتسامر حتى غفيت بعد فتره واني كلي سعادة ودعيت داخلي ربي يديم هاي الأيام، فزيت الصبح على ضون الشمس اللي يضرب بعيوني، ابتسمت من شفته صافن بوجهي، قبل جبيني وكال .
مهيائيل: جان المفروض نعيش هذا اليوم من زمان بس مثل ميكولون كل تأخيره بيها خيره، وجودج بحياتي مثل البهارات مال البرياني مستحيل يصير البرياني حلو بدونها.
ضحكت بصوت عالي على التشبيه: الواضح انت جوعان؟
مهيائيل: اي والله والمشتهي مدد يمي، منين ابدي اذا كل شي بيج قابل للأكل حتى ضحكتج اريد افتح كلبي واخليها بيه، وين اضمج اذا اني خايف عليج مني؟
رفعت أيدي ومشيتها على لحيته وكلت بهدوء: لو يرجع بيك الوقت تختارني مره ثانيه وتسوي اللي سويته؟
مهيائيل: لو الف مره مو مره وحده ينعاد الزمن راح يبقى اختياري نفسه، انتِ سحر الساحر وهدوئة وضحكته وكل شي حلو بحياته.
ايريم: تحبني؟
مهيائيل: معقوله بعد كل هذا الصار بينه ومعرفتي هذا الجواب؟!
ايريم: اسمعها منك احسن ما اني اخمنها يمكن عقلي يرسم اشياء مو واقعيه.
مهيائيل: عوفيني من العقل كلبج شنو يكول؟
ايريم: هو ديسألك جاوبه.
ابتسم بوجهي ولمني بحضنه اكثر طبع بوسه بركبتي وكال بهمس داعب مشاعري تصرفه.
مهيائيل: اريد اضمج بنص كلبي بعيد عن عيون العالم كلها، اني الوحيد اللي يحقله يشوفج ويلمحج، الوحيد اللي يحقله يلزم ايدج والوحيد اللي يكدر يتمتع بالنظر لعيونج، أريد ابقى طول العمر بحضنج وتبقين بحضني، اشم بيج ريحة امي وعطرها والتمس حنانها بلمسة ايدج، برائتج براءة أطفال، كل شي بيج مجذب بشكل خرافي لروحي،
اعتبرج حسنه طلعني من النار للجنه،
كلمة احبج ماتعني شي يم احساسي بيج ايرو،
انتِ ساكنه بعقلي واعظم حب هو حب العقل الكلب شغلته يضخ دم لا أكثر.
ايريم: مع هذا ماكلت احبج.
مهيائيل: دخيل ربج شكد ثوله صار ساعه اكل تبن كل هذا مادغدغ مشاعرج!!!
ايريم: مو ثوله بس ردت اسمعها من عندك لا أكثر.
مهيائيل: عضيتيني بكلبي ولج حسيت مشاعري تحطمت.
ايريم: ههههههههههه، وخر عني اريد اكوم.
مهيائيل: صار ساعه اتغزل وخابص نفسي عبالي راح تكافئيني ابوسه، قُبله، حضنه عمي قابل حتى لو بكلمه عابره تجبر الخاطر.
ايريم: انت ساحر كيوت.
مهيائيل: أنعم الله هذا الطلع وياج!!
ايريم: لعد شكول؟!
مهيائيل: لاتكولين ولا اكول اروح اكابل شياطيني احسلي.
دخل للحمام وعيني بقت عليه ومبتسمه للهوه صدك السعادة اشياء بسيطه تجيبها،
خلص الروتين اليومي مالتي، ارتب بشعري وعيني عليه مخلي جتفه على الكنتور وضام ايده لصدره ويباوعلي ومبتسم، لبست حجابي ورحت وكفت يمه نزل راسه وباسني بجبيني لزم أيدي ونزلنا سوا صبحت بالوجه اللي احبه ابتسمت بوجهه عرفت الموضوع وهلهلت بصوت عالي خلتني اموع بهدومي.
ترانيم: الف الف الف مبروك يارب الحياة السعيدة والذريه الصالحه عيوني انتوا.
مهيائيل: الله يبارك بيج يوم الألج ونجي نزورج.
ترانيم: آمين يارب.
مهيائيل: كولي بالجذب ماريد مبين مستعجله نزفج.
ترانيم: ماريد العشا بالعجل زفوني.
هوست يمنا سوالفهم مخلتني الزم نفسي ضحكت بصوت عالي وهم ويايه على الواهس، الحياة الهادئة والبسيطه شكد حلوه، يارب يديمها علينه،
بس هذا الشي مستحيل بوجود حيايه عايشين ويانه ويتنفسون نفس الهوه.
نفتح الباب ودخل الثنائي اللي يسد النفس ومتفاجأت من دخل وراهن ميمون بس الصدمه من دَاسِم جان موجود وياهن زين هذا شلون طلع هيج مو على اساس محبوس وراح تنحكم محكمته!!!
مهيائيل: لا الماي يروب ولا ميمون يتوب، لو انت بمكان رائف ولازعلت عليك.
دَاسِم: ها مهيائيل متسلم على عمك؟
مهيائيل: عمي هو والنعال.
دَاسِم: مو مشكله ارجع اربيك من جديد.
مهيائيل: اذا تقصد جنيتك أحب اكلك صارت من خدامي مو مهيائيل اللي يلعب عليه ويبقى ساكت دير بالك مني متدري شوكت تجي محكمتك وانفذ بيك الحكم.
دَاسِم: علمتهُ على الرمايه فلما اشتد ساعدهُ رماني.
مهيائيل: لتفرح هواي اني تعلمت بزودي لتخلي الفخر لنفسك.
دَاسِم: السفينه راح تمشي بغير مسار وتشوف شلون انتصر عليك بنهاية المطاف.
مهيائيل: تونه ثورج يمكن نحبس وي مدرس لغة عربية صاير مثقف المايعرف اليمنه من اليسره.
تالين: رجع وبزود اخوك ميمون البطل.
مهيائيل: عادي يكسب آجر بيكم ذنوبه هواي.
رولين: الحمدلله رجعنا لبيتنا ولمكانا تعال وياي حبيبي مشتاقتلك ومشتاقه لغرفتنا.
مشى وراها بدون صوت تكله يمين يروح تكله يسار يجي وحق الله مشرب هذا وضعه مو طبيعي ابد.
مهيائيل: اكص ايدي اذا صرت زلمه يُعتمد عليه.
تالين: اعذرونه حبابيب اريد اصعد اني وزوجي حبيبي نرتاح فوك.
مهيائيل: ماكو انعال حاب اريكه الها من الصبح.
ترانيم: وليهمك خويه لتضوج نفسك بيهم يولون.
مهيائيل: هم أغبياء بعدهم لحد الآن ماتعلموا الدرس يرادلهم إعادة للمحاضرة.
تركنا وراح للغرفه مالت السحوره سحبتني وياها للمطبخ بدينا نجهز بالريوك وهي تحجي ويايه.
ترانيم: اي سولفيلي شلون صار هيج فجأة؟
ايريم: والله مثل متكولين فجأة مجنت مخططه لأي شي.
ترانيم: جعله ربي عليكم خير وبركه بمحمد وآل محمد.
ايريم: آمين يوم الألج.
ترانيم: آمين.
ايريم: عبالي تشاقين وي مهيائيل قبل شويه طلعتي متمنيه تزوجين من صدك.
ترانيم: قابل اجذب عليج بس يجيني معرس أوافق وداعتج.
ايريم: يارب يرزقج اجملها واحسنها واصغرها أو اغناها وينطيج سعادة الدنيا والآخرة.
ترانيم: تعالي ابوسج على هاي الدعوه.
كملنه ورحت اصيحه دكيت الباب ماسمعت صوته فتحته على كيف دورت عليه ملكيته دخلت للغرفة اجيت اصيح باسمه صارت أيد على حلكي وهمس بأذني.
مهيائيل: هشششش، كاعدين هنا وعينهم عليج لتسوين شي يخليهم ينتبهون، اطلعي بدون متلتفتين اكمل شغلي أو اجي وراج.
دارني بدون ميوخر ايده فتح الباب وطلعني نزلت بجسمي على الكاع اريد اخذ نفس ماكدر شكد ماكول تعودت وتأقلمت على حياته وشغله وعادي عندي بس والله مو عادي، من تطلع فجأة من حياة هادئة وتدخل بحياة مليانه رعب وناس مو زينه بدون أخلاق متكدر تأمن على نفسك بينهم، كل مره اكول شوكت اخلص وترجع قيوده تثبتني بيه وبأهله اكثر وماعرف نهايتها وين حتكون.
ترانيم: ليش كاعده هنا شبيج؟
مدلتي ايدها وكومتني مكمله: اجيت اشوفج لأن تاخرتي كلت اكيد صار شي وياها، شكو ليش وجهج أصفر؟
ايريم: مادري يمكن هبوط بالضغط.
ترانيم: شفتي شي ضوجج؟
ايريم: قصدج خوفني.
ترانيم: يسوي سحر ومجمع الشياطين يمه؟
ايريم: اني غبيه اعرف هاي الغرفه خط احمر بس ماتوب حماره.
ترانيم: لتحجين هيج ردتي بس تصيحيه على الريوگ، اني وديت اكل لرائف تعالي ناكل احنه بالمطبخ.
كعدت يمها وبقت تسولف ويايه وتغيرلي جو اعرفها تريد تنسيني شنو صار بس جيب اللي يكدر يسويها،
تخلص الأيام بسرعه واليوم رائف فتح عمليته ورجعت صحته احسن مو هوايه يعني يكدر يكوم وحده ويصعد لغرفته، دنحضر بالغده لأن مهيائيل رجع جدد عزيمة اهلي،
كملنه كل شي وصعدت اخذت دوش سريع وطلعت جففت شعري دخل للغرفه وعيونه ادور على شي فتح الكنتور والميز مالت المرايه حتى الجربايه خربطها.
ايريم: اكو شي؟
مهيائيل: محبسي ماكو شايفته؟
ايريم: اللي يصير على شكل رصاصي؟
مهيائيل: تقريباً.
ايريم: اعتقد شفته بس اوكف لحظه أذكر،
صفنت وسترجعت ذكرياتي اي والله هو: تذكرت عمك دَاسِم جان لابسه.
مهيائيل: وهذا الحقير منو سمحله ياخذ شي مو مالته شهل قلة أدب لواحد رجليه بالكبر!!!
ايريم: ماعتقد هو داخل للغرفه لأن أني اقفلها قبل ماطلع والمفتاح بس عندي وعندك.
مهيائيل: خلي اشوف منو اذا ماكسر راسه وأخلي فرجه اليوم ماطلع ابن أبوي.
صفن شويه وعيونه مثبته بنهاية الغرفه ابتسم بشر ونزل أخذت حجابي ونزلت وراه صاح بصوت عالي.
مهيائيل: عائلتي الحلوه الجميله تعالوا اريدكم بشي مهم.
دَاسِم وتالين ورولين وبلقيس وياسيم بالمختصر كلها تجمعت بالصاله كاعدين على جهة اليسار وهو كاعد مقابيلهم واني وترانيم واكفين على صفحه الحماس عدنه فول لإن هيج مشهد للتاريخ ميتفوت.
مهيائيل: ضاع من عندي محبس ذكره من الوالده الله يرحمها واعرف عدل اللي ماخذه عدكم، دقيقه قبل ميجون اهل مرتي تحجون وتخففون عقابكم لو اخلي شياطيني تشتغل؟
دَاسِم: وانت جامعنا هنا علمود محبس؟!
مهيائيل: لأن اغله منك ومنكم كلكم عندي.
تالين: اني مادري بيه.
رولين: واني هم.
ياسيم: انت تعرفني مامد ايدي على شي يخصك.
ميمون: مو لهاي الدرجه ابوكك خويه.
مهيائيل: وانتِ ست الحسن؟
اشرت لنفسها بتساؤل اني صراحه شكيت بيها لأن هي الوحيده السوتها ودخلت للغرفه بدون إذن واحد من عدنا.
بلقيس: اني؟
مهيائيل: لا عمي المسطور واخوي المسحور والجن الوراج اللي يريد يسودنج منتظر بس اكله توكل.
بلقيس: مو انا.
مهيائيل: وجعانا، انتِ اللي دخلتي واخذتي المحبس ونطيتيه لابوج على اساس ماعندي علم ولج على منو تلعبين وانتِ اكثر وحده تعرف هاي الأمور ماتمشي من جواي.
بلقيس: شفته واكع ونطيته لأبوي يشوف مالت منو وين المشكله؟!
مهيائيل: شفتي واكع لو دخلتي للغرفه واخذتي؟
بلقيس: شنو هذا الحجي مستحيل اسويها.
مهيائيل: اني شفتج بعيوني البارحه طلعتي من الغرفه بنص الليل تمشين بهدوء وتتلفتين خاف واحد يشوفج كولي جذب؟
بلقيس: سمعت صوت عبالي صار وي ايريم شي رحت اطمأن عليه.
مهيائيل: محبسي وعقابج بعدين.
دَاسِم: ما انطي الك هذا ورث من المرحوم وحقي.
مهيائيل: امه أو ابوه ميتين قبله انت مالك حق من بعدهم الورثه بس ولده الشرعيين.
دَاسِم: ومنو يكول انت شرعيين الله اعلم امكم شسوت وصرتوا.
صارت عينه بكصته طفر من مكانه وخنكه من ركبته بكُل قوة ويحجي بفحيح.
مهيائيل: امي تاج راس النسوان كلها هي شي مقدس قبل متكول اسمه تتوضا اموتك بكاعك وادفنك بدون ما اترحم عليك اذا جبت سيرتها على السانك الوصخ بشين لو بالزين،
تونةةةةة.
جاوبت بخوف شخصيته وهيبته تعجبني وتصرفاته وياهن مثل المي البارد الينزل على كلبي هم سرطان ومهيائيل الكيمياوي اليقضي عليهم.
تالين: هااا.
مهيائيل: محبسي اريدج تغسليه بقاصر ومعقم وخمس دقايق وهو يمي لا رجلج يطلع منا للمكبره وأخلي دفنت الجلاب احسن من عنده.
تالين: ماشي تأمر انت.
مهيائيل: غصباً عليج ممسويه فضل عليه.
رفع ايده بتحذير للكل: هاي المره راح اسكت وماطول السالفه لخاطر الخطار بس والرب الخلق ايريم اسود عيشتكم اخليكم تهلهلون وانتوا نايمين، سرسريه ****** عبالكم اسكت واسامح واني ابوي اذا طلع من كبره هسه ارجع ادفنه من جديد لهاي الدرجه واصل عندي الخبال.
مسكت الا اندك الباب طلعوا كلهم وهاي احله صفه بيهم، من بره تشوفهم عائله متماسكه دَاسِم شكد ياكل رزايل من مهيائيل بس من يكعد بين الزلم يحترمه حيل وهذا الشي شفته من عاشرتهم وعرفت طباعهم من بره شي ومن جوه شي ثاني مختلف لهذا السبب دائماً اكول لتنغرون بشكل اي احد لأن المضاهر خداعه.
دخلت امي واستاج سلمت عليهن وبقيت كاعده يمهن شويه وكمت وي ترانيم نجهز الأكل وبقت هي وتالين يسولفن شويه ودخلت تحجي بمياعه لعبت نفسي.
بلقيس: اكلج حبيبتي ايريم هذا الحلو الدخل هسه منو؟
ايريم: كل اهلي حلوين منو تقصدين؟
بلقيس: ابوج رجال شايب اكيد ماقصده.
ايريم: أبيل اخويه.
بلقيس: مزوج؟
اجيت اجاوب سبقتني كايله.
ترانيم: يحب وحده وعن قريب يخطبها شيلي عينج من الرجال ثكليها الدوده.
بلقيس: يجوز اطلك متدرين.
ترانيم: خلي ايدج على ثنين خيتي الطمع الزين والثالث احجي وياه خافن تفلسين، مطبقه المثل بحذافيره كلمه وحده معكستيها.
ضحكت ضحكه مالت نسوان تايهه وعلت صوتها وتحجي بمياصه يالله شكد اكره هيج بنااات.
بلقيس: انزول عليج شكد تضحكين انتِ.
ترانيم: يلوك لبنت شلوك لبس الكودري، انتِ مو بغداد بعد هل التصنع عليمن تره والخلقج مايزوجج لو تموتين ولا شكلج يسمح واحد يحبه.
دخل بعصبيه وحجه بصوت مليان غضب.
مهيائيل: فاتح ملهى بنت ال**** ضحكة الك*** المننننن.
بلقيس: كلنه دنحجي بقت عليه!!!
مهيائيل: ايريم بتهم وترانيم مثل بتهم انتِ منوووو؟
طالع منا صوتج اذا سمعته ياويلج ساقطه ادبسززززز.
من يكلها هيج تفتح حلكها مترين يكول متغزل بيها، عجيب أمرها وحده بلا كرامه ويامكثرهن اللي هيج من نفس الطينه،
كملنه الغده وسوينه جاي وصعدت اني وامي واستاج وترانيم لغرفتي لأن رادوا يجون بالصاله عرفت مهيائيل استغل هاي العزيمه حتى يفتح سحر أبيل وفرحت بداخلي لأن ديساعد عائلتي بدون مقابل وحتى منبهي لهذا الشي ابد.
تسنيم: تدرين ايريم كلما تحجي وياي لازم تذكرج وتمدح بيج حبيتج على حبها الله يشهد.
ترانيم: عيوني انتِ ام ابيل الورده.
تسنيم: اكلج داده شكد عمرج؟
ترانيم: العمر مو رقم ههههه.
تسنيم: اي والله صح اني اللي يشوفني يكول عليه سبعين سنه واني نهاية الأربعينات.
ترانيم: ماشاء بعدج صغيره.
تسنيم: هموم الدنيا لعبت بينه لعب، يلا كبرنا وراح وقتها السوالف.
ترانيم: بعدج بحيلج متجيبين بنوته اخت للحلوات.
تسنيم: يمه اسم الله بعد هذا العمر منين اجيب حيل لطفل او واق ويق، خليني بهم الكبار احسن.
ترانيم: كبروا لتشلين هم أحد يعرفون يدبرون نفسهم.
تسنيم: كلب والده يارب يرزقج بالزوج الصالح وتشوفين اولادج وتعيشين شعوري.
ترانيم: كبرنا يمعودة زواجيش.
تسنيم: متدرين ربج شكاتب.
ترانيم: والنعم من عنده.
تسنيم: ماما حبيبي جيبيلي كلاص مي نشف ريكي.
ايريم: تدللين.
تسنيم: فدوة لكلبج حبيبه.
نزلت وراحت عيني للغرفة نسيت اني ليش اجيت اصلاً ورحت وكفت قريب من الباب اللي مفتوح شويه فكدرت اشوفهم بوضوح، مهيائيل فاتح كف أبيل ويحجي وياه بالأول جانت سوالف عاديه بس وصل لموضوع صدمني خلاني ماعرف اتحرك وابتعد..
يتبع..
البارت اكثر من 4125 كلمه..
يداده مدا اشوف تفاعل يسر الخاطر..
تعليقاتكم بين الفقرات وتصويتكم شمعاتي للبارت راووني همتكم وحماسكم..
تصبحون على الف خير وعافيه حبايبي..
لأي شي يخص القصه تعالوا يمي انستا
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!