حسابي الأنستا zahraaahmedn99
لتنسون التعليق بين الفقرات والتصويت والمتابعه حبايبي❤️
مهيائيل
الكاتبة(زهراء احمد)
_________
تهزمني كلمة احُبكِ عندما يشتد الخصام بيننا
___
ترانيم: الحك ماعرف شبيها فجأة كامت تصرخ وهي نايمة.
صعد مهيائيل يركض واني وهي تبعنا، صدك جانت تصرخ كعدها من النوم فزت مرعوبه وشويه ورجعت طبيعيه متحمل وضعها الواضح وسألها بقلق.
مهيائيل: سولفيلي شلون عشتي بذلك البيت وشنو جنتي تشوفين؟
ياسيم: مجان بيت جان جحيم وحتى من طلعت من عنده ماخلصت كل شي بيه يلاحقني اذا مو بالواقع بالمنام.
مهيائيل: انتِ وذلك الاغبر شلون جانت حياتكم؟
ياسيم: اهانه وتجريح لهذا السبب حاولت ما اكعد يمه والتقي بيه وهو اغلب وقته اصلاً بالشغل قليل يرجع للبيت بالنهار.
مهيائيل: وباقي العائله؟
ياسيم: حبابين خاصه امه.
مهيائيل: ياسيم من شنو خايفه؟ ليش متحجين الصدك؟
ياسيم: ماكو شي خايفه من عنده وحجيتلك الواقع.
مهيائيل: بس شياطيني تكول عكس كلامج.
ياسيم: مهيائيل الفات مات انسى.
مهيائيل: شلون بيج تردين تجلطيني اليوم احجي وفضيني بيا طريقه جان يعاملج ذلك ال****؟
ترانيم: ردتك عون صرتلي فرعون على شنو الصياح ياعيوني احجي وياها بهداوه.
مهيائيل: استغفر الله العلي العظيم، احجي بابا خليني اعرف راسي من رجليه ذلك الكلب الساقط شنو جان يسويلج؟
ياسيم: ميسوي شي.
مهيائيل: اللهم صبرك، اللهم صبرك، اني مبين اليوم مصبح بالطب العدلي احجي ياسيمممم لتخليني اسودن تره عقلي بيه واير واحد صاحي اذا نفجر هسه وحق محمد العب بيهم طوبه والعن ابهاتهم كلهممم.
ياسيم: جان شسمه.
مهيائيل: اي انطقيها للدره.
ياسيم: ايعامل اخته اكثر من كونها اخت، يحبها ومحتويها وموفرلها كل شي تحتاجه من اهتمام ورعايه وميسوي شي بدون مياخذ اذنها، يشتريلها ويطلعها اذا شافها ضايجه وعدها كامل الحريه على عكسي تماماً حتى بيوم محاكمة اهلي مقبل اروح وشوفهم، الموبايل ممنوع النوم متأخر ممنوع السوالف ممنوع عايشه بسجن بوجوده، تنظيف طبخ كنس اغلبه واكع براسي لأن لازم اكعد من الفجر، عقوبات وقوانين صارمه تمشي بس عليه وكل هذا بدون مقابل بككو ابو الربع ميذكرني، مو مهم ولا اني متعودة اطلب من احد عشت عمري كله بدلال وممحتاجه شي بس تبقى بخاطري من انهان ويسمعني كلام يسم البدن على الطالعه والنازله هاي غير يخابر حبيباته كدامي ويتغزل بيهن ويلبس ويطلع ويكول بالقلم الصريح راح اسهر وي فلانه اللي تسواج وتسوه عشيرتج.
مهيائيل: وامه من هذا كله وينها؟
ياسيم: ابداية زواجنا ومن شافتنا وأحد اعند من الثاني وهو اي شي يحتاجه يروح لاخته بيه كلتلي بعد مُزن مالها علاقه لا بأكله ولا شربه انتِ مرته مسؤوله عليه سويت مثل مكالت وبديت اتحمل المسؤوليه كوني زوجته وماكو مفر من الموضوع بده يصيح ويغلط ويهيني أكثر على اتفه شي واذا اطبخ ميعجبه وحتى الجاي إذا اسويه يشمره ويبقى يصيح عليه،
تعبت خلال أشهر قليله حسيت نفسي كبرت عشرين سنة، تمرضت وبجيت وندبت حظي وعضيت اصابيعي العشره ندم وتمنيت يرجع يوم واحد لأيام زمان جان بعمري كله مفكرت اسوي اللي سويته.
مهيائيل: هذا السرسري اذا ما أعلمه وربي من جديد فلا اطلع مهيائيل، وابن زاهده يعلمهم شنو يعني الشرف والغيره على العرض ****** الساقط تربيته على أيدي واعلمه الزلم شنو تسوي من واحد خنيثه يندك بيها.
طلع سريع واني رحت يمها حضنتها وهديتها.
ايريم: الحياة بيها هواي عقبات والصار انتهى خلص واحنه ولد اليوم وكل اللي عشتيه امتحان من رب العالمين ولو ماشافج كدها صدكي مخلاج تعيشين هيج موقف، كل شي نشتري لازم ندفع ثمنه ونفس الشي من نغلط لتفكرين هوايه هذا الوقت راح يمر وينتهي ويصير ذكريات.
ياسيم: والعمر اللي يمشي شنو يرجعه، وخساراتي والندوب البجسمي منو يكدر يمحيها؟
الكلام سهل وداعتج أسهل منه ماكو بس الفعل هو الصعب تجاهل الأمر ونسيانه وكأن شيء لم يكن امر مستحيل، ضاع عمري اني بهاي الايام البسيطه والغلط اللي سويته جانت عقوبته اكبر من قدرتي على التحمل.
ايريم: انتِ تشوفين الغلط صغير بس عند ربج جبير مو بالشي الهين، اللي صار انتهى بعد وخلص ليش تعذبين نفسج بأشياء مستحيل تكدرين تغيريها؟
ياسيم: من الوم نفسي اتعض حتى دائماً اذكر شنو صار وياي واخذ درس يخليني ماعيد الغلط.
ايريم: كُلي ثقه مراح تعيديه، شيلي الفكره من بالج ورتاحي تعبانه انتِ اليوم وباجر بحيل الله يكون أجمل وأفضل ومليئ بالسعاده والراحه تنسين بيه الأشهر المرت كلها.
ياسيم: شكراً الج، كلامج ما استحقه بعد السويته بيج.
ايريم: مفهمت ليش انتِ شنو مسويه؟
ياسيم: تذكرين مره من كتلج مهيائيل يريدج بالغرفة مالت السحر؟
ايريم: اي.
ياسيم: بوقتها امي كلتلي كليلها هيج جانت النيه تنزلين ويشوفج ميمون ويتحرش بيج ومن يشوفكم مهيائيل يعصب ويطردج هذا الشي عرفته بعد مصارت العركه بين الاخوه سمعت امي ورولين يسولفن واكتشفت وراها نيتهن مو انتِ وانما ميمون رادن ينطرد حتى رولين تاخذ راحتها وي حبيبها.
ايريم: يعني مجنتي تدرين بالموضوع بالكامل من كلتيلي؟
ياسيم: لا والله ابد، وكل ما اريد احجي وياج واعتذر ماكدر بس هسه رايده افتح صفحه جديده وانسى الماضي بالكامل ومثل ما تعاقبت امي وابوي وبلقيس واني ان شاء الله يجي يوم لرولين لأن هي الراس المدبر لكل مشكله تصير بهذا البيت.
ترانيم: من كلت حيه محد يصدكني.
ايريم: بعد منخلص من هاي المشكله نحجي كل شي لمهيائيل وخلي هو يتفاهم وي ميمون وان شاء الله يخلص منها.
ياسيم: ميكدر.
ترانيم: ليش؟
ياسيم: لأن رولين لازمه عليه ملفات تودي وره الشمس.
ايريم: وضحي أكثر شنو لازمه عليه؟
ياسيم: غسيل أموال وتجاره مخدرات.
لطمت على صدرها كايله بصدمه.
ترانيم: عزةةة بعينهااا شلون وحده ****.
ايريم: بس هاي شلون كدرت تسوي هيج؟
ياسيم: هي من بيت مشبوه، اللي عرفته من امي انو هي دازيها لمهيائيل بس صارت من نصيب ميمون لأن عرفت متكدر عليه وميمون أسهل طريق حتى توصل للي تريده، لهذا السبب شفتي مصار عدهم أطفال وعايشه براحتها بدون حساب لان علاقه بينهم ماكو وحتى اغلب وقته مخلصه لو بره البيت لو بغرفة السحوره.
ايريم: سود الله وجهه شلون وحده ملعبه وشيطانه.
ياسيم: شياطين الإنس أكثر من الجن بهذا البيت بعدج متعرفين شي هذا نقطه ابحر من مصايبهم.
ترانيم: مهيائيل شعجب ميعرف؟
ياسيم: يعرف هوامش بس ميدري بعمق الموضوع ميمون ميحجي شي لأحد هو سري كلش بخصوص حياته الخاصه.
ترانيم: هاي لازم نلعب عليها بنفس طريقتها، حتى تنتصر على الشيطان لابد تصير مشيطن أكثر من عنده.
خليتها تنام يلا طلعت رايحه لغرفتي، ملكيته موجوده بس مطول ودخل، التعب والحزن والخيبه مبينه عليه حسيته صدك اب وضيع بنته، وهنا صدكت بمقولة الابوه مو شرط بالإنجاب الإبوه بالتربية الها معنى عميق هم،
رحت حضنته بدون كلمه اخفف عنه التعب أو اوسيه عن طريق المشاعر، شد على حضني أكثر ماخذني للجربايه خله راسه على رجليه واخذ أيدي مخليها بشعره.
مهيائيل: تعبان اريد انام بحضنج وانتِ تلعبين بشعري.
ايريم: اذا تحب تسولف اسمعك.
مهيائيل: الحزن ماينتهي اذا حجيتي بيه.
ايريم: بس يتخفف الألم.
مهيائيل: انتِ نعمة ربانية إليه الله دزها تعويض عن أمي.
ايريم: اذا هيج اعتبرني هي وسولف اللي بكلبك.
مهيائيل: كاعد اتخيل نفسي بحضنها هسه وهي تلعب بشعري وتحجي وياي.
ايريم: اي وشنو تحب تحجيلها؟
مهيائيل: مشتاقلج حيلللل، ليش رحتي وعفتيني؟
ايريم: هي هم مشتاقتلك وتجي تحضنك روحها دائماً، ماراحت هي عايشه بكلبك مهيائيل.
مهيائيل: ماريد روحها اريدها هي بشحمها ولحمها، اشم ريحة شيلتها وبوس ايدها واغمض عيوني بحضنها وماحس بهم وحزن وهي تقرالي دللول الولد يمه دللول، عدوك غريب وساكن الجول،
جانت هاي أكثر جمله غلط تكولها لأن أعدائي بالبيت مني وبيه مو غربه، صدق من قال الحمه تجي من الرجلين.
ايريم: تعرف اني موجوده وياك بكُل وقت؟
مهيائيل: اعرف بس يجي يوم وتملين من هاي العيشه وتكولين خلص مهيائيل تعبت وترحين مثل البقيه.
ايريم: مستحيل ما اسويها واني بكامل عقلي.
مهيائيل: ممكن تتخبلين كل شي جائز حدوثه بهذا البيت وداعتج.
كلت اغير المود نزلت راسي مقبله جبينه وكايله بتساؤل.
ايريم: شنو تستخدم لشعرك ريحته طيبه؟
مهيائيل: صابون ركي.
ايريم: لا صدك!!
مهيائيل: وطين خاوه، جان علاج امي الشهير للشعر التعبان بيه فوائد عظيمه.
ايريم: لعد هذا الشامبو والسيروم والبلسم والمعطرات المن؟
مهيائيل: مشتريهن الج عيوني انتِ.
ايريم: كام الجذب.
التفتلي مخلي عيونه بعيوني ماعرف شبيه نزل عليه الخجل فجأة مد ايده لأذني وسحبها كايل بخزرة.
مهيائيل: ولج على منو صايره مستهتره هيج؟
ابتسمت بوجهه كايله: تعرف جوابي ليش تسأل؟
مهيائيل: كولي اريد اسمعه حتى اجاوبج بطريقه حلوه ومناسبه.
ايريم: عليك انت علمتني.
مهيائيل: هااا؟
ايريم: اي والله اهلي جانوا متدينين ماعدهم هاي السوالف.
مهيائيل: وشعلمتج بله؟
ايريم: هوايه اشياء صراحة.
مهيائيل: وحده منهن؟
ايريم: انك ساحر لطيف وحباب.
مهيائيل: حباب بس وياج ليغرج منظري.
ايريم: سولفلي بله على شغلك شويه.
مهيائيل: ساحر ملعون شحجيلج يعني غير هيج انتِ تعرفين بهاي السوالف.
ايريم: اريد اعرف شلون تسوي سحر؟
مهيائيل: بسيطه من تجي وحده تطلب نوع معين من السحر على سبيل المثال نكول محبه استحضر الجن المسؤول عن المحبه وهو يكول شنو يحتاج حتى يكمل العمل ويصير مضبوط وهاي الشغلات اما نطلبها من صاحب العمل لو اني اجيبها واخذ سعر مضاعف بالنهايه عملي مو خيري.
ايريم: وهذا الجن اللي يشتغل هيج شنو يستفاد؟
مهيائيل: الشيطان شنو يستفاد من يوسوس للإنسان؟
ايريم: يطلعه عن الطريق الحق ويخليه يطيعه.
مهيائيل: وهذا نفس الشي، ماطول العمل سفلي اكو شروط حتى يقبل الجن أو الشيطان بصورة أدق يطيع الساحر لازم يكفر ويسوي اشياء محرمه ومو بس حرام له له له، اكبر من هيج بهوايه، على سبيل المثال ذولي اللي يسون سحر بالمقابر يحتاجون جنيه معينه حتى تسويلهم العمل هاي شرطها يسوي وياها الساحر علاقه محرمه وجان دَاسِم خبير بهاي الأمور.
ايريم: أعوذ بالله وهاي شلون تصير علاقه بين الجن والإنس؟!
مهيائيل: الجن يتشكل بأشكال اشخاص تعرفيهم أو على شكل حيوانات محد يكدر يشوف حقيقتهم الكامله من البشر العاديين ومحد يعرفهم بهيئتهم الحقيقيه.
ايريم: قريت مره يكولون ماكو علاقه بين الجن والإنس لاختلاف المخلوقات عن بعضها والفرق بين الأشكال وصعوبة الأمر.
مهيائيل: الجن العاشق يسوي علاقه وي الشخص المسحور من قبله، لكن ميسبب تزاوج كامل بين الجن والإنسان لكن كعلاقه فأي يسوي بطريقه مختلفه متتأذه بيها البنت على سبيل المثال ماكو حمل من الجن ولافقد لعذريتها.
ايريم: والجن العاشق شنو يسوي؟
مهيائيل: مصايب، ابسطها البنيه أو الرجال ميزوجون حتى يتعالجون بشكل كامل وهذا يحتاج سحار مضبوط يفهم بهاي الأمور مياخذ بس فلوس ويضحك عليهم.
ايريم: وشلون تعرف الوحده عدها جن عاشق؟
مهيائيل: هوايه علامات، أفكارها متكون نظيفة، تعبانه ومالها خلك وتحب الظلمه وتبقى بالحمام لفتره طويله، تحس بواحد يحضنها وهي نايمه وحراره بأماكن معينه من الجسم، تشوف خيال مرات يلاحقها بشكل دائم، وهذا مو شرط الخيال يكون جن عاشق ممكن أوهام أو شي ثاني نعرفه بالفحص، ولا كل اللي كلته يثبت بالمعنى الدقيق بيها جني لازم تجي وناخذ خيره حتى نتأكد، اكو وحده اجت وي امها هيج إليه ومن شفتها عرفت بيها جن على رغم هي متدري، الجن العاشق يترك آثار بالجسم بمكان الركبه أو مكان ثاني والمريض عباله تحسس وهم هذا مو شرط وإثبات ممكن صدك تحسس أو واحد متحرش بيها وهي نايمة.
ايريم: وشلون تتخلص من عنده؟
مهيائيل: هاي حسب قوة الساحر والخِدام الموجودين عنده وقوتهم من يجي جني اقوه من هذا الموجود بداخل المريض نكدر نطلعه حسب كلمات نكولها اله، اكو جن عنيد وقوي يحتاج وقت وصبر وقوة واكو لا ضعيف من اول محاوله يطلع.
ايريم: هم سويت عمل مضر؟
مهيائيل: واحد ثنين، هذا شغلي بالأساس بس بيني وبين الله جنت افتح العمل السيء بعد فتره بسيطه يعني مضريت احد بكد ماضريت نفسي وأخذت حرام بسبب الأعمال.
ايريم: كفرت؟
مهيائيل: اكو نوع من الجن السفلي الشيطاني الملعون يطلب تلبسين القرآن برجلج وتدخلين للحمام وهذا السحره الشغلهم نجس يسوونه حتى يثبتون للجن الطاعه بين قوسين يصير مثل عبدة الشيطان، اني سويت سحر سفلي اي بس مجنت اكفر، بعمري كله متنازلت عن مبادئي بخصوص ديني ومعتقدي، ماصلي وماصوم اي والسبب ماريد اضحك على نفسي اني واحد عاصي مذنب بأي وجه اقابل رب العالمين واطلب منه العفو؟
ايريم: الصلاة تنهى عن الفحشاء والمنكر، رب العالمين يسحب الأنسان المصلي اله ويهدي للطريق الصح، صلي بلكي الله يهديك.
مهيائيل: اني اريد التوبة ورجع للطريق الصح بس الموضوع يحتاج وقت مو بالسهوله اترك كل شي.
ايريم: الإمام علي عليه السلام يكول( طويل الأمل قليل العمل) اليوم احنه عايشين وموجودين باجر ميتين وجوه التراب نبدي من اليوم شنو رأيك؟
مهيائيل: خليني اخلصج من الجن اللي بداخلج وبعدين نبدي.
ايريم: صلي حتى لو انت بعدك ساحر الصلاة مالها علاقه، رب العالمين يكول( من دنا مني شبراً دنوت منهُ ميل) أسعى وبقدرته ورحمته يسحبك اله.
مهيائيل: ان شاءالله.
ايريم: ان شاءالله مع العمل لو بدونه؟
مهيائيل: شنو رأيج تعلميني انتِ؟
ايريم: افرح من اعماقي تنهدي وتمشي للطريق الصح.
مهيائيل: لهاي الدرجه تحبيني؟
ايريم: منين اجه الحب بالنص!! اريد اخليك على الطريق لا أكثر علمود اكسب بيك أجر داده.
مهيائيل: تدرين انا سحار وحتى لو تركت السحوره تبقى الخيره تمشي بدمي واعرف الناس وبشنو تفكر، يعني الموجود بداخلج هسه داري بي انا عيوني الثنين ونظرهن.
ايريم: حتى لو داري بيه تبقى ماسامعه ياعيوني الثنين.
مهيائيل: نعيش ونسمعه مو مشكلة.
رفع ايده لوجهي منزل راسي اله يحجي بهمس.
مهيائيل: اريد من اديج الحلوه تسويلي،
صفن بعيوني شويه نظراته ربكتني حسيت نيته مو سليمه ابتسم من شافني هيج خجلت كمل كلامه وهو يضحك: اكل لأن جوعان حيللل هذا الساقط خلاني اصرف طاقه هوايه بسبب العصبية.
ايريم: شنو تحب تاكل؟
مهيائيل: حلويات.
ايريم: اكو جوعان ياكل حلويات مو زين على معدتك، راح اسويلك شي خفيف.
مهيائيل: أمشي ننزل سوه.
نزلنه رحت بإتجاه المطبخ وهو سحب أيدي مخلي ايده على حلكي مانع صوتي يطلع وأشرلي بحاجبه على الكاعد على الكرسي ويسولف.
رائف: كلباي لو تدرين بيه شكد مشتااااق يابويه يايابه.
زُمردة: إذا تبدي تسولف بهاي الطريقه أسد الموبايل تعرفني اسويها فغير الموضوع.
رائف: شبيج كلبج قاسي وي زوجج حبيبج!!
زُمردة: خطيب انت بعدك مصرت زوجي.
رائف: مبقى شي هن ست إيام وان شاء الله تنورين بيتج وتنورينه يانور حياتي.
زُمردة: منور البيت بأهله تسلم.
رائف: هو هذا الطلع وياج!!
كولي النور نورك والجمال جمالك حبيبي ابو بيتي وزوجي وروحي وعمري وحياتي.
زُمردة: رائف.
رائف: خياشيم روحه.
زُمردة: هاي وين كاعد بسوك سمج شهل الغزل الغريب!!
رائف: اي والله اليوم اكلت سمج وصاحبي سألني منين تتنفس السمجه كتله من الخياشيم وانتِ اتصلتي بنفس الساعة وتعرفين اني ما اتنفس اذا ما اسمع صوتج ياخياشيمي.
زُمردة: اذا كان سحراً اللهم ابطله، وان كان ذنباً اغفره، انا مادري شنو مسويه بحياتي وطلعت بطريقي راح اسأل امي بلكي تعرف الجواب.
رائف: انا اعرف كل خير، مسويه اعمال وثوابات هوايه وربج رزقج بيه.
زُمردة: تدري سوالفك نستني شنو اريد اكول؟
رائف: كولي حبيبي اسمعج.
زُمردة: ليش حبيتني؟
رائف: من حسن حظي وسوء حظي هم.
زُمردة: من حسن حظك هاي اعرف بيها بس لسوء حظك ليش؟
رائف: اتيتي عقوبه لقلبي، بعد ماكسرت كلوب هواي بنات وكعت بحب وحده ساحل روحي الها سهل ومامعبرتني.
زُمردة: اهااا اهنا الحجي طلع المضموم، جنت واحد زاحوف موو؟
رائف: ومازلت.
زُموردة: روح كمل زحفك لعد شعندك جاي يمي، تصبح على خير باي.
رائف: سدته بوجهي ايااا.
لزم أيدي ودخلني للمطبخ ويحجي ويايه بصوت عالي.
مهيائيل: فد مشتهي سمجه وشرط الخياشيم مالتها كبار اويلييي.
رائف: هاا خويه جنت تتسمع عليه مو عيب؟
مهيائيل: هسه اني حجيت عليك لو حجيت بالخياشيم والله يا الله منو يمك داده!!
رائف: اعرف سوالفك ابو العناكيد.
مهيائيل: اي ابو الخياشيم.
رائف: شلونها؟
مهيائيل: نايمه.
رائف: شوف السالفه بيها أن صدكني.
مهيائيل: وكأن وأخواتها هم.
رائف: وشنو راح تسوي وهو مختفي؟
مهيائيل: نفس الخطه.
رائف: ويجوز هاي المره راح ياخذهن وياه.
عقد حاجبه وعقله مبين راح بعيد يمهن بسرعة كام من مكانه صاعد لفوك مطول دقيقتين ونزل طالع بره باوعتله بتأنيب.
ايريم: جان مخليه ياكل لكمه ليش هيج سويت؟
رائف: اذا مكدر يلزمهم مصيبه.
ايريم: ليش يعني؟
رائف: تليد مو انسان هين شخص تربة بنص الشارع راح يصير شيطان وأكثر بعد، صدكي هسه تلكينه أخذهن وشرد وكولي رائف كال اخذ عبره من الصار آخر مره حتى محد يضغط عليه ويرجع.
ايريم: راح يبقيها معلكه؟
رائف: نسوي تفريق مو مشكله.
ايريم: صدك تحجي!!
رائف: اي شكو بيها قابل اول وحده لو آخر وحده؟
ايريم: مادري رب العالمين يحلها ان شاء الله، صاعده اني تصبح على خير.
رائف: وانتِ من اهل الخير، لتفكرين هواي ماطول مهيائيل موجود محلوله.
صعدت فوك وكلبي مطمأن اكيد راح يحلها كالعاده، الشخص اللي معتمد عليه الكل محتاج احد يسند كتفه عليه وقت التعب وعاهدت نفسي اني اصير هذا الكتف وابقى محتضنته دائماً.
___
حميده: دخابري اخيج خلي نشوفها شلونها.
مُزن: خابرته اكثر من مره مايرد.
حميده: شوفي رويف وينه.
مُزن: هذا اربع وعشرين ساعه مشغول.
حميده: يارب مابيها غير العافية مسكينه هل البنيه تورطت بأبني الخبل.
مُزن: هو سوه سوايته وراح مادري وين.
حميده: الله لايرده وأحد عاق على يوم انجلط من وراه هذا الساقط ابن ******.
مُزن: يبقى اخوي يمه وابنج لتدعين عليه، احنه نعرف شكد يكرههم لتنسين شنو عاش بطفولته بسبب ابوي.
حميده: حتى انا اضوج منهم بس البنيه من يوم دخلت للبيت ماسمعت الها صوت وبعدين هو الظلمها ليش ندخل بخطية انسان بريئ؟ كافي ربج شسوه بيه بسببها ماعيد الغلط وي سيمه.
مُزن: ياسيم امي ياسيم.
حميده: اهوو اسمها صعب سيمه أسهل.
مُزن: اكلج هذا واحد يدك بالباب.
حميده: غلسي يدك ويروح عالم ماتستحي شعدهم جاينا بنص الليل.
مُزن: خاف مهيائيل اجه علمود تليد؟
حميده: كومي خابري وشوفي.
رحت جبت الموبايل لكيته صدك يدك عليه فتحته وخليته على أذني.
مهيائيل: اطلعي افتحي الباب هذا انا.
سديته وطلعت من فتحته اخذني بحضنه وباسني براسي: امج وين؟
مُزن: جوه تعال فوت.
دخلنا وهو يباوع الها بطرف عينه نظراته صدك مال واحد معاجبه وجاي مغصوب لغاية بداخله يريد يسويها.
مهيائيل: حضرن ملابسجن وكومن وياي ميصير تبقن وحدجن بالبيت.
حميده: ماروح من بيتي اذا تريد تاخذ مُزن اختك ومامنعك.
مهيائيل: مرت ابوي شنو رأيج تكومين بدون نقاش احسن ما اشتكي عليكم كلكم وبيتج بالسجن ابمكان بيت ابن زاهده وتدرين بيه من الطفوله لحد الآن مخلفت بشي كلته ولا سامحت اليندك بيه وبأهلي.
حميده: بيا تهمه تريد تسجنه ولك؟
مهيائيل: بتهمة عميتوا بنتي.
حميده: ومنو يمها بنت عمك هي مايعه جنه نتزورك من زلمنه وشوفت عينك مابينا شي مسمسمين.
مهيائيل: اللي ينضرب ويقبل على نفسه الاهانه بس الحمار وبنتي بنت عوائل حتى لو اهلها ****** بس انا موجود واخذ حقها من عين السبع، ابنج شتكيت عليه وعندي الادله التثبت عليه التهمه مع شهود الأطباء وبكيفج بعد تكدرين تعيشين اهنا وحدج بدون معيل محد يصرف عليكم لو تجين وياي وحالج حال العبريه؟
حميده: شصار بيها؟
مهيائيل: خمس خياطات وبشرج ابنج عمها عمي بعد بفضله ماتشوف.
لطمت على خدها وكالت بصدمه.
حميده: سود الله وجهك يالمسود وجهي لابارك الله بيك من ابن ساقط على ابوك.
مهيائيل: هو اسود بدون متدعين، يلا كومي مرتي وحدها بالبيت.
حميده: والبقيه وين؟
مهيائيل: اني شعليه بالبقيه اهم شي مريتي.
حميده: الله يثخن لبنكم ان شاء الله.
مهيائيل: آمين تحركي.
حميده: بشرط.
مهيائيل: استغفر الله العلي العظيم اللهم صبرج ياروح احجي اسمعج.
حميده: الماضي ماينفتح وتعتبره ورقه ونشكت وابني اول مايرجع ارجع لبيتي.
مهيائيل: ماوعدج، السانهن ماكدر الزمه بيتي بيه حرية التعبير عن الرأي مشروعه وكل واحد يحجي باليعجبه اما بالنسبه لابنج ما اعتقد راح يرجع لأن اذا سواها ربج كتبها عليه اطيح حظه عشائرياً وبعدين اطبق بيه القانون واهلسه هلس بالمؤخر والمقدم مالتها.
حميده: تسويها اعرفك.
مهيائيل: اي خوش ولهذا حضري نفسج راح انتظرجن بالسياره.
ماعرف امي شلون قنعت وهي بعمرها كله ماقبلت بالذله تخلينا انام بدون عشا على انو تطلب شي من احد، لميت ملابسي وملابسها وماخذت شي هواي لأن اعرف ممطولين يمهم، طلعنا اني وياها صاعدين يمه بالسياره واحساس داخلي اجه فجأة هاي المنطقه مراح ارجع الها بعد، طردت الأفكار من راسي وبقيت اباوع على الطريق بأفكار شاردة.
___
:شنو سويت بلي كتلك بيه؟
:كتلج من قبل حياتي روله زوجج لازم يموت.
رولين: واني شلون اسوي هيج وحدي؟
:اخنكي وهو نايم.
رولين: بالتشريح مالت الجثه يبين.
:روحي يم اهلج وسوي هيج.
رولين: فريت عقلي اشرحلي حتى افتهم بطريقة افضل.
:شوفي كولي للكل رايحه لأهلي وختلي بمكان محد يشوفج بيه ومن يصير الليل ويدخل للغرفه ينام روحي كملي المهمه وطلعي من البيت بسرعة من يجي الخبر روحي الطمي بالفاتحه.
رولين: بس هيج صعب ميمون نومه خفيف شلون اكدر اسوي هيج؟
:خوش اجيبلج حبوب مال ضغط شربيها اله.
رولين: انت لتصير حمار كتلك ماريد شي يفضحني.
:ماعندي حلول غير ذني شسويلج بعد شكلج ما رايده تخلصين من عنده.
رولين: لا شلون اني ناويه وعندي فكره افضل واخلص من ثنين مو واحد.
:ديري بالج تورطيني بسوالفج.
رولين: اطمأن من هاي الناحيه مراح يصير شي غير اللي اني اريده.
الظلم والحقد والغيره يمشي بدمها بدون متفكر وتحسب حساب للآخره وعقوبات رب العالمين المنتظرتها، خطط ومؤامرات تحاك من الطرفين بدون منعرف منو المنتصر بالأخير،
نايمه وحسيت على أيده قريبة على شعري، حجيت بصوت بيه بحة نوم.
ايريم: رجعت وانت منتصر مو؟
مهيائيل: وبقوة تعرفين زوجج ميخسر بشي يريده.
ايريم: فرحانه علمودك.
مهيائيل: اجن وياي ضيفتين.
ايريم: كل الهلا بيهن البيت بيتهن واحنه الخطار.
مهيائيل: كريم وبالكرم معروف.
ايريم: اتعلم منك غير انت شيخ.
مهيائيل: لا مو شيخ رجلج سحار.
ايريم: هههههه، واحله سحار يرتاحله كلبي.
مهيائيل: ماطولج نعسانه خلي استغل الفرصه، شكد تحبيني؟
ايريم: منو كال احبك؟
مهيائيل: متحبيني يعني؟
ايريم: اني سألتك لأن انت تكول شكد تحبيني ردت اعرف منو كلك احبك؟
مهيائيل: نومتج هسه بنص حضني وعلى صدري هذا مو دليل؟
ايريم: مو دليل على الحب دليل على الأمان.
مهيائيل: وتحسين يمي بالأمان.
ايريم: ايي هوايه.
مهيائيل: كولي والله مرتين.
ايريم: والله مرتين.
مهيائيل: هههههههههه، اني احس يمج بالراحة، كلبي يهود ويرتاح بشوفتج لهذا السبب احب وجودج يمي من اضوج لا ارادي اهدء.
ايريم: المفروض تنطيني أجور على خدماتي الك.
مهيائيل: اجوريش؟
ايريم: تكلي احبج خمسين مره باليوم وشكد انت محظوظ بوجودي بحياتك ورب الكون انطاك نعمه لاتعوض ولاتقدر بثمن وملازم تفرط بيها وتبقى تصونها وتحافظ عليها وتحميها.
مهيائيل: وخليها بجام خانه وباوع عليها.
ايريم: سولفلي بالحب شكد هو حلو وشنو تحس من اكون قريبه منك؟
مهيائيل: ماحس بشي.
ايريم: لعد شلون عرفت نفسك تحبني؟
مهيائيل: شياطيني كالت.
ايريم: شفت هوايه علاقات حب اغلبها الشاب يعترف للبنيه ويكلها خلي نتعرف فتره يلا اخطبج انت شوفه وحده وخطبتني بالعادة أنت هيج مستعجل لو بس وياي؟
مهيائيل: لا بس وياج.
ايريم: شلون خططت لزواجك مني؟
مهيائيل: حلمت بيج بالليل مرتي كعدت الصبح حققت الحلم.
ايريم: بس هيج؟
مهيائيل: يقال الحب للشجعان اما الجبناء تزوجهم أمهاتهم.
ايريم: شكد سريع حبك لعد؟
مهيائيل: حب اسرع من صب الجاي، بس لأكون صريح مجان حب تكدرين تكولين إعجاب من اول نظرة وبعدين طور وي العشره وصار حب.
ايريم: العب بشعري اريد انام نعسانة.
مهيائيل: احلمي بيه شوفيني بالواقع والحلم.
ايريم: أقره المعوذتين ماشوف الشياطين انا.
كرصني بزندي بقوته ضحكت وصرخت بنفس الوقت: على كيفك عيوني متتحمل شقه.
مهيائيل: لا صدك هذا شقه؟
ايريم: يعني هسه اني مجذبه متشتغل وي الشياطين انت؟
مهيائيل: اشتغل بس مو منهم يعني هسه اليشتغل يم رئيس الوزراء هم يصير رئيس؟
ايريم: بس وأحد من الحكومة، ماطول تشتغل وي الشياطين فأنت وأحد منهم لتحاول تبري نفسك.
مهيائيل: الشياطين احسن من الناس العاديه وداعتج.
ايريم: وهاي بله شلون قستها!!
مهيائيل: لأن الشياطين معروفه للكل انو هي ملعونه ومطروده من رحمة رب العالمين وتوسوس للناس وتبعدهم عن الطريق الحق شغلهم واضح وصريح مو مثل الناس اللي تغدر وتخون وتطعن بالظهر ولابسه قناع الدين والحشمه.
ايريم: بس يبقى الشيطان اسوء متكدر تنكر.
مهيائيل: ما انكر حقيقة الشيطان بنفس الوقت اكول اكو ناس مثله، مو اكو آية قرآنية تكول(إِنَّ الْمُبَذِّرِينَ كانُوا إِخْوانَ الشَّياطِينِ) وشوفي ابسط شي المي شكد نبذر بيه احنه لو الكهرباء نشغل كل الكلوبات وممستفادين بيها، هذا تبذير نهى عنه رب العالمين لو مو تبذير؟
ايريم: تبذير طبعاً.
مهيائيل: هذا رائف اذا راد يتوضأ يفتح المي ويبقى ربع ساعه يغسل بوجهه ويدقق بأديه حتى وضوءه يصير صحيح بس هو بالواقع محسوب من إخوان الشياطين بسبب تبذيره، الدين مو فقط صلاة وصوم وزكاة وخمس هو أعمق من هيج بهوايه، اكو اشياء احنه مملتفتين الها وهي الأم واحترام الأم شكد بنات يصرخن على امهن ومايحترمنهن واذا طلبت منها شغله يبوو تورطت على نفسها لازم تبقى تصرخ عليها ساعه عبالها من حقها تحجي وتلاسن بس هذا كله حرام ويعتبر عقوق بيوم القيامة تتحاسب عليها،
ياسيم شكد جانت امها ساقطه ولا احبها بس مع هذا ما أقبل تعلي صوتها عليها ولازم تحترمها مو لخاطر تونه لا ابد بس علمودها حرام تدخل نار جهنم بسببها، الاهل شكد يردون يعيشون صحيح الأعمار بيد الله بس الاغلبيه الاهل يموتون قبل الأولاد ويبقى يتندم طول عمره لو جار عدل وي اهلي لو محترمهم وهذا كله بصفحه والوراثه بصفحه لان مستحيل تقدمين شي وميرجعلج بيوم من الأيام سواء جيد أو سيء.
ايريم: الأهل نعمه.
مهيائيل: ونعمتي غطاها التراب من وكت، هسه هم تذكرني؟ أخطر على بالها؟ ملامحها بعد هاي السنين شلون صارت؟
ايريم: اكيد وتجي تزورك هم وتشوفك وتسلم عليك وتحضنك.
مهيائيل: ما استاهل صار هواي ناسيها ومذاكرها هسه اكيد زعلانه عليه اعرفها هي كلبها ميتحمل بسرعة تضوج.
ايريم: بما أنو ذكرتها هسه اقراها الفاتحة اكيد توصل الها وتعرفك مناسيها.
مهيائيل: اقريها وياي حتى يروح الها ثواب مضاعف.
ايريم: اني بكل صلاة اقراها الها أو أرواح الموتى جميعاً من المسلمين والمسلمات.
مهيائيل: خلينا انام تأخر الوقت حيل بسبب سوالفج الحلوه داده.
ايريم: كلي حلوه مو بس سوالفي.
مهيائيل: والعن والديه اللي يكول غير هيج.
خلصت الليله ومرن يومين على خير نزلت الصبح للمطبخ واكفه يم الطباخ احضر ريوك ودخل، صاح بصوت عالي حتى اني الواكفه قريب عليه فزيت من عنده نزلت العائله بالكامل ماعدا ياسيم وطلعت مُزن وامها من الغرفة من شال الصحن وكسره بالكاع مخله شي صاحي شكو شي يشوفه كدامه يكسره التفتت ادور عليه بهذا الجمع مشفته وهذا باقي يرعد يمنه ومحد يكدر يسكته.
ميمون: هاي ال**** وينننننننننن؟
رائف: شايفني ملهى وتسأل!!
ميمون: الحقيره عبالها خلص فلتتت مني بس وحق من رفع السماء وبسط الأرض اذا ما خليها تتمنى الموت وماتلوحه فلا يطلع اسمي ميمون.
شويه ونزل مهيائيل على وجهه نظرات ماتتفسر باوع للكل بطريقه غريبة بعدين كال..
يتبع..
البارت اكثر من 4059 كلمه..
مكاعد اشوف تعليقاتكم بين الفقرات 👻👻..
تصبحون على الف خير وعافيه شمعاتي..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!