حسابي الأنستا/ zahraaahmedn99
لتنسون التعليق بين الفقرات والتصويت للبارت والمتابعه شمعاتي ❤️
مهيائيل
الكاتبة (زهراء احمد)
________
صراع ودمار وخراب
وقلوب اقتربت من الانفجار
وتفتح صفحات مغلقه
في بيت الفسقه الفجره
عاصي ومذنب
والله لايترك ذنب
وكيف سيكون العقاب
بقلمي (زهراء احمد)
___
مهيائيل: الأنسان اللي يسوي اغلاط هوايه وعباله رب العالمين مراح يحاسبه اكبر غلطان، الدنيا دين اليوم انت تمشي بيها برحابة صدر باجر تندفن جوه الكاع ومحد يذكرك واقرب مثال الكم كلكم بلقيس شلون ماتت مقتوله ورجلها حر طليق هسه لأن قضيته قضية شرف والقانون مايدخل بالحكم العشائري.
حميده: هاي المحاضرة الصباحية بشنو تريد تختمها؟
مهيائيل: مستعجله هوايه حتى تسمعين مرت الأب؟
حميده: على الأقل اعرف سبب كلامك الغريب عن العقوبات الربانيه وناسي نفسك شلون انت ساحر وتدمرت حياة هوايه ناس بسببك.
مهيائيل: على الأقل ماعتديت على وحده ودمرت برائتها وعميتها بالأخير.
حميده: بسببكم الصار، هو يكرهكم من الطفوله تريد بعد هاي السنين يرجع يحبك والله غريب.
مهيائيل: ليش انا الكتلج تعالي بوكي رجال من مرته واطفاله وسحري وعمي عينه بيج وحركي كلب مرته؟
حميده: الصار صار من من الماضي واحنه ولد اليوم ولاتنسى التحجي عنهم ماتوا خلاص على شنو الحقد بعد؟!
مهيائيل: وين الحقد وانتِ عايشه بنص بيتها؟
حميده: مو بيتها هذا وبعدين اذا تريد اذكرك انت اللي جبتنه وبهاي الساعة نكدر نرجع مو مشكله.
ابتسم بستفزاز مخلي ايديه وره ظهره كايل.
مهيائيل: روحيله اذا تكدرين.
حميده: شنو قصدك؟
مهيائيل: ابنج مطلوب دم وهذا الشي مكتوب على بيتكم لا ابو البيت يكدر يرجعكم ولا واحد يكدر يساعدكم ماعدكم غير ابن زاهده ذيج المره الجنتي تتأمرين عليها تسويلج ريوك انتِ والبغل مالتج، شفتي الدهر شلون يفر، يفر، يفر، ويصفعج صفعة تذكرج حليب امج شنو طعمه.
حميده: كلبك مليان كره وحقد صدكني مستحيل تكدر تعيش مرتاح وانت عقلك عايش بالماضي.
مهيائيل: لأن قسمت على تابوتها عايشه لو ميته اخذ حقها وبرد كلبها التوقف بسببكم كلكم واحد واحد، بديت بدَاسِم وتالين وام معتمد اللي طلكت بتها بدون حقوق وهذا بفضلي اكيد وبالختام انتِ وعبالج الحكايه تنتهي هنا لاا بعد موجود ابنج الحلو لازم ياخذ درس مرتب واربيه من جديد لأن ماعنده اب يلزم هاي المهمه قررت اني اتكفل بيه.
حميده: شسويت بيه؟
رافع حاجبه وعلى شفايفه ابتسامة شماته وانتصار، تقدم يم الكرسي وسحبه كال وهو يكعد عليه.
مهيائيل: مسويت شي بس البارحه رايح للبيت بالليل والجوارين بلغو عليه وهسه نايم بالمركز.
لطمت على صدرها اجت يمه ساحبته من ايده وصرخت بيه.
حميده: عزه بعينك سجنت ابنييي!!
وخر ايدها ونكت الدشداشه: اي اسجنه والعن والديه ومحد يكدر يكول لا وحتى انتِ أكدر اسجنج لأن تشوفين بعينج شلون يعذب بيها ومحد يحجي بيكم، من اجي اخذها تصيرون أنبياء براسي وكلبي حاس بيها بس اسكت وانتظر اشوف وين يوصل هذا الوضع حتى انصدم بيكم مسويين راسها نصين وعاميها اللي، لا اهنا اشغل شيطاني وأشعل ابهاتكم واحد واحد والعن ابو خيركم لابو اليطلع وراكم، ادبسزيه.
حميده: طايح الحظ بكد امك انا شويه خلي عندك أخلاق.
مهيائيل: هي مو بالعمر عزيزتي تنقاس بالعقل والفهم وانتِ ما شاء الله أصغر من حمودي ابن الجيران اذا نقيسها بالعقل يعني.
حميده: ماكو تربية حرامات بيك.
مهيائيل: مثل ابنج الخلفني خلفه.
حميده: غلطه للأسف.
مهيائيل: بس هي مجانت تعتبرها غلطه وعمرها كله ماندمت لأن جابتنه على الدنيا بالرغم اللي أخذته واحد مطي مايفتهم دافعت وحمت وكبرت وربت لآخر نفس بيها، وخلت زلم وهي ميته ياخذون ثارها، وهذا الفرق بين الأم التربي وتعلم مو بس تخلف وتشمر وبعدين تكول غلطه،
كل شي سواه ابنج والمرحلة اللي وصل الها وكعدتج اليوم ابيت المره الحركتي كلبها من ايدج لتلومين الوقت ولا رب العالمين ولا أحد لومي نفسج حبيتي واحد مزوج واخذتي من بيته وعائلته وشمرج حالج حال اي وحده رخيصة وتبروا منج الأهل والأقارب لدرجه اليوم ماعندج واحد يطلع ابنج من السجن غيري وانتِ تعرفين شنو لازم تسوين حتى تخليني اتنازل عنه.
ميمون: مهيائيل.
مهيائيل: ها صحيح صوتك ذكرني ماريدك تصير سباعي وتروح تتنازل عنه تره اطلع عيونها من خشمك.
ميمون: ميصير تحجي وياها بهاي الطريقه المره مالها علاقه بخبال ابنها.
مهيائيل: بس الها علاقه بعذاب امي.
ميمون: السالفه ماتت وي اهلها اعقل شويه امك لو جانت عايشه ماتقبل بهذا تصرفك.
مهيائيل: تقبل هي تعرف ابنها صاحب طلايب.
ميمون: الله يكملك بعقلك ان شاء الله.
مهيائيل: مثل ماكملك يعني؟
ميمون: شنو قصدك؟
مهيائيل: شلون عرفت بسوالف كاغد؟
ميمون: هذا يحتاج وقت للشرح بس المهم عرفت.
مهيائيل: ادري بيك ملعب أو وراك السوالف المكسره كلها.
ميمون: اعجبك.
مهيائيل: اكيد غير اخوي ابن امي وبوي.
ميمون: كافي عاد مهيائيل خلي المره تاكل لكمه عيب عليك.
مهيائيل: بعد هذا كلامي كله وتشتهي تاكل!!
بس يلا هي ماعدها كرامه من زمان مو جديده عليها.
ترانيم: مهيائيل حتى مُزن خطيه راحت وي امها هذا حجي بوكت الاكل!!
مهيائيل: ليش هذا مو حجيها وي امي من قبل؟
ترانيم: وانت جايبها تهينها؟!
مهيائيل: اصلاً شوفتها تخنكني بس اني اعرف عدل مطيها مايربط اذا مو هيج والا هي لو تموت كدامي ما اهتم وشغل بالفاتحه ساجدة عبيد بمكان النعاوي واللطم.
ترانيم: لخاطر اختك على الأقل لتحجي هيج كدامها مره ثانيه.
مهيائيل: ماوعدج ماكدر الزم الساني من يشوفها يبقى يقسم بدون وعي وداعتج.
ترانيم: لخاطري خويه.
مهيائيل: اعذريني بس عيونها المدمعة وعلى رغم هاي السنين المرت ماكدرت تغادر مخي، وعليه ماكدر اسامح الظلمها.
ترانيم: رجعها لبيتها لعد بدون ماتدخل بخطيتها وهي مره مريضه.
مهيائيل: بيتها سلمته اليوم لصاحبه يعني ماعدهم بيت بعد.
ترانيم: تحجي صدك؟
مهيائيل: مامجذب عليج من قبل.
ميمون: وغراضهن؟
مهيائيل: صدقه جاريه عنهن بلكي تفيدها بيوم القيامة.
رائف: بعد هذا الحديث اكو اكل لو لا؟
مهيائيل: متاكل منو لازمك؟
رائف: وشلون أكدر اكل وانتوا تسولفون؟
مهيائيل: ولازمين حلكك!!
رائف: ياخويه ماكدر اركز بشغلتين سوه افهمني.
مهيائيل: شامر اذنك انت بله.
وكف واشرله ويحجي بعجله.
رائف: هاي هاي جوه رجلك انطيني أياها.
مهيائيل: منيه؟
رائف: أذني غير.
مهيائيل: طاح حظك عبالي بحلكك كلمه بيها خير.
رائف: اليوم اروح نحجز بدله اريد مريتك وياي.
مهيائيل: اسألها اذا تريد تروح.
رائف: ها مرت خويي؟
ايريم: اللي يكوله مهيائيل.
رائف: مهيائيل كلها.
مهيائيل: بكيفج حبيبي روحي وين ماتردين واذا هذا الاغبر ضوجج بس رمشيلي العنلج يومه.
بتسمت وحسيت كلبي يريد يطلع من مكانه من الفرحه الحب شي حلو خاصه وي الأنسان الصح.
___
مُزن: كافي تبجين ياعيني ميصير تسوين بنفسج هيج منو يستاهل؟
حميده: ما ابجي بسبب كلامه بالعكس هو كل الحق وياه ابن بار بأمه على رغم هي ميته من سنين بس ابد ماينطي بيها مو مثل العندي وهذا لأن امه خوش مره وتخاف ربها وصاينه بيتها عكسي.
مُزن: جنتي تعرفيها؟
حميده: شلون لعد عشت وياهم اهنا فتره طويله قبل ما يطردوني من البيت.
مُزن: منو طردج؟
حميده: راح تخليني افتح دفاتر قديمه ماريد احجي بيها بعد هاي السنين.
مُزن: بس اني اريد اعرف مهيائيل ليش حاقد عليج لهاي الدرجه؟
حميده: السبب هو اني.
مُزن: اي سولفي خليني افتهم السبب.
Flash back
مِسْوَط: كومي هي سويلي غده لابارك الله بيج ولا بشوفتج.
زاهده: شنو تريد تاكل؟
مِسْوَط:سويلي سمج وسألي حميده شنو تريد.
زاهده: تأمر.
راحت تسوي غده وهي ساكته كالعاده وميمون يزحف وراها ميخليها تشتغل عدل أخير شي تعبت من عنده وراحت خلته يم دَاسِم جان كلش يحبه ومن هو صغير وميقبل احد يتقرب من عنده مدللة دلال مصاير،
جنت اراقب كل تصرفاتها ومن تأكدت منها كاعده تشتغل رحت لغرفتي علمود اذلها لا اكثر وخليها تجيني برجليها تسألني وصدك اجتني للغرفه دكت الباب واني اصبغ بأظافيري بوقتها جنت عروس جديده واللبس والاناقه والترتيب حتى احرك كلبها واشوفها شلون هو يدللني ويحبني ومامعبرها حتى بثوب بسيط، دخلت ولو تشوفين النور شلون يشع منها رب العالمين مبارك بوجهه لدرجه ماتنوصف حلوه وتخبل بدون مكياج الله يشهد على كلامي بيها براءه وقبول مو طبيعي لهذا السبب اغار منها وأخاف تاخذه من عندي لأن تبقى هي مرته الأولى والها حق عليه وام ابنه الجبير وأول فرحته،
ردت اغثها فحجيت بدلع كدامها.
حميده: شايفه شلون حبيبي جابلي البارحه محبس ذهب يجنن شوفي هذا لابسته بأيدي وماقبل البسه وحدي هو لبسني اياه بأيده يحبني ويموت عليه وخلص الليل بس يغازلني ويحجي كلام رومانسي وياي.
ابتسمت بوجهي كايله.
زاهده: من حقه زوجته وبعدج عروس جديده اكيد يدلعج.
حميده: وانتِ مراح يكلبج بعد عوفي ورجعي للزباله الأجيتي منها.
زاهده: عيشي حياتج واعيش حياتي احسن للثنين.
حميده: تهدديني!!
اني اعلمج شسوي بيج هسه اذا ماخليته يموتج من الضرب فلا اطلع بنت ابوي،
خرمشت وجهي وكفشت شعري وبقيت الطم على نفسي وصرخ: الحكولي تريد تموتني هايييي الحقيره الكلبه،
وكما هو متوقع اجاني يركض اني وياه تزوجنا عن حب ودلعه ورومانسيه ولبس وهاي الأمور وراضيته بشكل مو طبيعي فشنو احجي يصدك بيه وبدون دليل، من شافها واكفه يمي سحبها من شعرها وكام يضربها بعنف لدرجه احس الضربه تصير بعظامي وهانت عليه ومدافعت عنها ابدد وبقيت اتشمت بيها وبتسم بداخلي وبعد هذا الضرب كله والإهانة راحت تطبخله غده ومن كملت عبالج يقبل تاكل وياه على نفس السفره ابددد مو من حقها تاكل وي العائلة، ياخذ ابنها منها يوكله وهي تروح للمطبخ تسوي جاي وتغسل مواعين لو تكعد تنظف.
مُزن: ومحد جان يوكف وياها من العائله؟
حميده: بس دَاسِم.
مُزن: شعجب؟
حميده: دَاسِم جان خوش ادمي بداية زواجنا بس هو تغير من تزوج تالين ذيج أخبث واحقر مني بهوايه.
مُزن: اكثر من السويتيه بيها!!
حميده: هذا جزء بسيط من العاشته والشافته بذلك البيت وحرامات ابنها الجبير مابيه خير ويساعدها يشوفها تنظلم ويسكت بس اي مهيائيل هذا جان يوكف كدامها وياخذ الضربه وهو بعمر صغير ميقبل عليها ابد حتى ابوه جان يكره وميحبه ابد ولا يريده.
مُزن: وانتِ اكيد مابطلتي منها.
حميده: اسكتي ولج كافي كلبي احسه فحم واني اذكر هاي الأمور روحي جيبيلي كلاص مي اشربه نشف ريكي.
طلعت من الغرفه صار بوجهي صاعد صار بعيني كلام امي رحت يمه حضنته ونزلت دموعي الواضح مو بس احنه عشنا طفوله صعبه حتى هو.
مُزن: اسفه.
شد على حضني منزل راسه مقبلني بشعري.
مهيائيل: على شنو؟
مُزن: لان ظلمتك هوايه بتفكيري.
مهيائيل: اللي صار راح ونتهى وامج هي السبب انتِ مالج علاقه.
مُزن: بس تبقى امي.
مهيائيل: ماكو انسان يتحمل ذنب اغلاط غيره، روحي سوي ريوك وخذيلها خليها تشرب علاج وانتِ هم اكلي لتبقين جوعانه والبيت بيتج اذا حتاجيتي شي.
وخرت نفسي مقبلته بجبينه.
مُزن: حاضر تأمر انت.
لزم خدي وبتسم صاعد واني اعرف بداخله جبال من الهم مستحيل يجي يوم ويخلص منها.
___
:اصفط بالملابس ودخل اجه يمي حاضني سحب نفس من شعري كايل بهدوء.
مهيائيل: تعبان ايرو.
التفتتله لزمه وجهه بين أديه.
ايريم: بيه ولابيك التعب يروح ايرو.
مهيائيل: تعبي ماريد تعيشيه وتشوفي، الخنكه بكلبي ماعرف شلون اخلص منها وشكد مايمر وقت تزيد ماتنقص.
ايريم: سولفلي يمكن ترتاح شويه.
مهيائيل: اريد اروح للمكبره تجين وياي؟
ايريم: هسه؟
مهيائيل: لا باجر اليوم رائف يريدج ترحين وياه ماريد اكسر بخاطره.
ايريم: مهيائيل.
سحبني لصدره كايل بصوت أقرب للهمس.
مهيائيل: جانت كلما اسويلها شي تكلي يوم عرسك وفرح بيك وجنت اسألها هم تهلهلين وتركصين تضحك وتكلي العب لعب بس تزوج وشوف وماتت وماحضرت عرس ولدها كلهم، الأم هي النعمه الوحيده اذا راحت مايكدر يعوض مكانها شي ابدد.
حسيت بيه بجه بجيت وياه على الواهس ماعرف ليش من يذكر سيرة امه شي بداخلي يحن لأمي وتخيل نفسي بمكانه وهذا الشي يخليني ابجي بدون أراده، فقد الأم شي عظيم الله ليعيشه لأحد.
مهيائيل: مشتاق حيللل.
ايريم: انروح سوه ونزورها وتعرفها عليه.
مهيائيل: تعالي اراويج شكلها شلون جان.
ابتعد عني رايح للمجر مطلع محفظته فتحها مخلي بيها صورتها شفته شلون صفن بملامحها على رغم قديمة بس وكأن يشوفها بالواقع حسيته يريد يطلعها من مكانها ويدخلها بنص كلبه بس للأسف هذا الأمر غير ممكن،
طلعها منطيني أياها كايل بأبتسامه.
مهيائيل: بوقتها رحت اسوي صور طلبوها مني بالسادس ولحيت عليها تروح وياي وبعد اصرار قبلت ومن دخلنه للمصور سحبتها وكعدتها على الكرسي ابتسمت صارت لأمي صوره وحتفظت بيها بداخل محفظتي من ذلك الوقت كلما اشتاق الها واني بعيد اطلعها وشوفها ومن راحت صارت سلوتي الوحيده، جان يوم مختلف عندي دخلتها مطعم وهي مستحيه وكل شويه ترزلني تريد ترجع واني ماقبل شتريت الها ملابس جديده وحسيت نفسي مسؤول عليها وشكد تمنيت نعيش هيج اخذها وطلعها ودللها ونعل والديه اللي يغثها بكلمه،
اول مره وآخر مره من بعدها الله حرمني منها وللابد.
ابتسمت بوجه كايله.
ايريم: واني اكول على منو طالع هيج كيك الوراثه هم تلعب دور.
ابتسم كايل بفخر.
مهيائيل: اي امي تخبل والحمدلله ورثتها ماطلعت على ابوي المعصعص.
ايريم: استغفر الله شلون تحجي عليه هيج.
مهيائيل: اي والله معصمص مو حلو ابد لو اني مانطيه هايشه يسرح بيها مو مره بس مو بيدها خطيه نجبرت على الثور.
ايريم: اعرف بيك ضايج من عنده وكلبك محروك بس يبقى ابوك وحتى لو كافر ميصير تحجي عليه يعتبر عقوق الوالدين حتى لو ميت وبعدين رب العالمين يحاسبك، هو مجان ادمي انت صير العكس خلي الله يباوعلك بعين الرحمه والمغفره، سويله ثواب وقراله الفاتحه مو علموده لا علمود متتحاسب بسببه بعدين.
باوع بعيوني والحب يشع منهن كايل.
مهيائيل: مجذبت من كلت "الله اخذ امي وعوضني بيج".
ايريم: انت انسان كلبك أبيض على رغم تسوي سحوره وتعصي رب العالمين بس داخلك نظيف وطاهر هدايتك وابتعادك عن هذا الطريق بإيدك، لتموت على المعاصي مهيائيل سالفة عمرك طويل وباجر وتوب اتركها، خلينا نبدي من هاي اللحظة انا وانت سوه ونغيرك شويه شويه.
مهيائيل: اني حاب ابدي وياج صفحه جديده بس اليوم وقت مو مناسب لازم اعاقب كم واحد لأن ماريد اتوب نص ردن ما اضحك على ربي انا اسجد وركع ومن اخلص اشغل شمعاتي واشتغل بحياة الناس.
ايريم: (ومن يعمل مثقال ذرة خير يره) معليك بالمعاصي والذنوب اخطي لرب العالمين خطوه وحده وشوف شلون يسحبك اله مية خطوة.
مهيائيل: ان شاءالله هسه اريد اطلع عندي شغل اخذي اللي تحتاجيه من الكنتور كل شي لمهيائيل ملك حصري الج.
ابتسمت متقربه منه بدلع.
ايريم: كل شي، كل شي؟
نزل راسه إليه مجاوبني بغمزة حلو امه عرف قصدي شنو.
مهيائيل: اي كل شي، كل شي لهمودي.
ايريم: رجعت لنفس السيرة الف مره كتلك اني مو سمينه.
مهيائيل: السمن صحة معليج بالناس، وانا احبج بكل حالاتج لهمودة.
ايريم: بعد ماحجي وياك ماطولك هيج.
عكفت وجهي ورحت مبتعده سحبني من أيدي نضربت بصدره نزل ايده رافع وجهي صارت عيني بعينه حجيت بغضب مصطنع.
ايريم: وخر عني زعلت.
مهيائيل: ابوس الزعلان انا ويرضه علينا.
ايريم: متكدر تقشمرني.
مهيائيل: لعد شلون اراضيج يحلوة اللبن؟
ايريم: زعلي ثكيل عاد هم ايدك وراضي بطريقه مميزه.
مهيائيل: وشلون تصير هاي الطريقه المميزه بله؟
ايريم: انت سحار متفوتك هيج أمور.
مهيائيل: يعني لازم أقره شنو موجود بعقلج مو؟
ايريم: خصوصيه هاي لتدخل.
مهيائيل: لا والله الا أقره، خليني اصفن شويه اريد اعرف مريتي بشنو تفكر هسه عقلها بيمن مشغول.
ضربته على ايده مبتعده.
ايريم: والله متقره شنو مهيائيل وين الخصوصيه؟
مهيائيل: غير اعرف شنو يرضيج دلهمي.
ايريم: انوب سويت لقب جديد!!
مهيائيل: ليش متحبينه؟
ايريم: لا احس نفسي سمينه كلش واني مو هيج.
مهيائيل: يمعودة اكو احله من السمن؟
ايريم: اي طبعاً الرشاقه احله حتى في حال صار شي تكدر طلعني.
مهيائيل: وفي حال صار حصار تكدرين تاكلين بنفسج وهيج متموتين جوع، يا أخي خرب عرضي على هيج افكار عظيمه.
ايريم: صدك تحجي!!
مهيائيل: ليش متدرين؟!
ايريم: بشنو؟
مهيائيل: قبل سنتين اجوني عملاء من اليابان رادوا ياخذون عينه من عقلي بس اني رفضت رفض قاطع كتلهم خيري لابناء بلدي ميطلع للغريب وداعت دَاسِم التانكي مال المي نترس من دموعهم خو الفراش تشكك من كد ماركعوا حتى أوافق على طلبهم، بس اني ابن العراق وسأبقى للعراق ماحييت، سمعيني تصفيقج الحار صار ساعه أمدح بالبلد.
ضحكني من صدك وتعابير وجهه حقيقه مو مالت واحد يجذب، على أخير جمله كالها رفعت حاجبي.
ايريم: مادح بالعراق مادح بية قابل.
مهيائيل: لعد انتِ منين؟
ايريم: والله اني ما افوت هيج عرض مغري لو اجاني.
مهيائيل: وانتم بغيري شلون تعيشون؟
ايريم: قابل انت مي!!
مهيائيل: لا شربت.
مكدرت امثل وسايره اكثر من هيج نفجرت بالضحك.
ايريم: هههههههههه.
من شافني اضحك تقرب مني مقبلني بخدودي وكال.
مهيائيل: الضحك علامة الرضا، بوساتي لهاي الخدود الحلوه ودعيلي لهمودي.
طلع واني صحت بيه.
ايريم: مارضيت تره.
احب هاي العلاقه اللي بينه وشخصيته هو بالذات كل شي بيها حلو، ميبقى مستمر بنفس السيره أكدر اعيش وياه الضحك والحزن والخيبه والأمل بنفس الحديث وهنا كتشفت الثقافة ابد مالها علاقه بالدراسه كل إنسان وشلون يتربى، الله يرحم البطن الحملته.
صار العصر فتحت الباب طالعه اروح يم ياسيم شويه، صار بوجهي رائف يريد ينزل ومن شفت على ملامحه الحزن وقفته.
ايريم: رائف.
التفتلي كايل.
رائف: هاا؟
ابتسمت بوجهه عرفت بيه ضايج.
ايريم: شخبار كوكب سبيستون؟
ضحك بوجهي كايل بحسره.
رائف: شكتني شك الله وكيلج.
ايريم: تحبك.
رائف: اعرف على رغم هي متكولها.
ايريم: هيج وحده تمسك بيها بقوة خوش بنيه.
رائف: اكثر من هيج قوة بعد ماكدر يوميه صايره مشكله وتعال يرائف حلها، هي بصفحه وابوها بصفحه تعبت انا هم عندي كلب شتحمل بربج.
ايريم: شنو رأيك نروح الها؟
رائف: ماريد اروح البارحه جنت يمهم هسه شيكولون عليه.
ايريم: اعزمها لهنا.
رائف: متقبل.
ايريم: انطيني الموبايل اني اخابرها.
رائف: وتسمع منج؟
ايريم: معليك انت يجيك الصافي.
ابتسم ونطاني موبايله فتحه على رقمها أخذته ودخلت للغرفه متصله بيها شويه ونفتح الخط مسمعت صوتها عرفتها منتظرته يحجي عبالها هو المتصل نسوان نعرف دروب بعض.
ايريم: مساء الخير، اني ايريم زوجة مهيائيل.
زُمردة: مساء النور ياعمري، كل الهلا، اعذريني عبالي رائف المتصل لهذا السبب محجيت شي.
ايريم: لا بالعكس اني اعتذر لأن اتصلت بيج من رقمه رقمج مموجود عندي.
زُمردة: اكتبي يمج وتصلي بيه خليني احفظه.
ايريم: تمام بس بالأول اسمعي شنو رايده من عندج وليش اتصلت بيج، باجر مسوين ثواب بروح والدته واني عازمتج انتِ والوالده تجون يمنه ولتكولين لا ازعل منج، كولي لامج وحضروا نفسكم.
زُمردة: الله يرحمها اكيد نجي ان شاء الله.
ايريم: رائف ميحب يحجي بهذا الموضوع وجيتج سويها مفاجأة لتفتحين السيرة يمه.
زُمردة: اكيد طبعاً ماريد اضوجه.
اخذت الرقم من عدها وسلمت عليها غالقه الموبايل ندبت حظي لأن ستعجلت وسويت الشغله من راسي بدون ما اكول شي لأي أحد بس يلا متضيع بوجه الكريم وماطول النيه واضحه يمه يكفي، طلعت ارجعله الموبايل لكيته كاعد على الدرج ابتسمت شكد يحبها لعد،
دار وجهه من شافني صافنه ومبتسمه سألني بحماس.
رائف: شنو كالت؟
ايريم: وافقت بس ها سوي نفسك متدري وروح للسوك اشتري كم شغله نحتاجها راح ادزهم الك برسالة، ولتجيب سيرة يم احد حتى مهيائيل.
رائف: الله يوفقج وان شاء الله يجي يوم وردها الج بالأفضل ومتكون زعله.
ايريم: اريدك توعدني بشي مهم.
رائف: لتخافين اني ردتها بالحلال من اول مره وكعت عيني عليها مستحيل اضرها بشي بعد ماصارت مرتي.
ايريم: حتى تدخل لهذا البيت عروس عاملها مثل اختك متدري ربك شنو كاتب بعدين لتحطمها.
رائف: بعيوني هي وداعتج، يلا اترخص اروح اشتري المحتاجيه، وها صدك تذكرت جنت طالب منج تجين وياي نختار بدله بس تأجل الموعد لاشعار آخر مبين ماراح اعرس انا.
ايريم: تتزوج ونفرح بيك لتهتم.
رائف: الله يسمع منج ماريد غير اشوف أولادي قبل ماموت.
ايريم: اسم الله عليك ان تشوفهم وتشبع منهم همات وتزوجهم بإيدك وتفرح بيهم.
رائف: ان شاءالله انتوا قبلي.
ايريم: ان شاءالله، طلع واني رحت يم ياسيم دكيت الباب ودخلت على نفس كعدتها رحت يمها مخليه أيدي على ايدها.
ايريم: شلون صرتي اليوم؟
ياسيم: نفس الشي.
ايريم: ماكو هيج كلما أسألج كولي صرت بخير وعافيه ماطول رحمة رب العالمين محيطه بيه، دماغج يسمع شنو يحجي السانج خلي ياخذ الأمور الايجابيه بس.
ياسيم: ان شاءالله.
ايريم: خليني اقرالج دعاء وانتِ رددي ورايه.
ياسيم: تمام.
ايريم: «اللهمّ إنّي أسألك بحقّ محمّد وآل محمد عليك أن تصلّي على محمد وآل محمد وأن تجعل النور في بصري والبصيرة في ديني، واليقين في قلبي والإخلاص في عملي، والسلامة في نفسي، والسعة في رزقي، والشكر لك ما أبقيتني»
هذا الدعاء عن الامام الحسين عليه السلام لوجع العين ويفيد للدنيا والآخره مجنت حافظته بس من ستمريت اقراه الها بشكل يومي من تمرضت لسه حفظته بس هي بطيئة الحفظ ويمكن لأن عقلها سارح بمكان بعيد.
ايريم: سولفي اي شي يجي بالج لتبقين ساكته.
ياسيم: صيحي مُزن اكيد ملت وحدها جوه.
ايريم: انزلج يمهن؟
ياسيم: لا ماريد.
دخلت ترانيم وسمعت آخر جمله اجت يمها تحجي بإصرار.
ترانيم: لا والله الا تنزلين، راح تخيسين من كعدتج بالغرفة.
ياسيم: ماريد لتلحن عليه خلني وحدي اذا ممكن.
ايريم: ياسيم هاي الأيام بحلوها ومرها راح تنتهي والظلام شكد ماستمر لابد يجي النور بعده، رب العالمين مخلق شي يدوم للأبد هاي قاعدة لتسجنين نفسج من اول إمتحان بعد صغيره باجر تعيشين الأكبر والاعمق وعلى مقدار قوتج يصير الإختبار ربج لو ميدري انتِ كدها مخلاج تتعرضين لهيج ألم، ماكو راحه بالدنيا من تقتنعين بهذا الشي تكدرين تكملين بشجاعه،
الدينا متتوقف يم اول عثره استمري واحنه كلنه وياج حبيبتي.
ابتسمت رغم الحزن بداخلها ينرسم بملامح وجها، رفعت ايدها تريد تلزم أيدي اكذب لو ما اكول كاسره خاطري ومنظرها شكد مكسوره وتعبانه يموتني باليوم الف موته بس لازم واحد يصير يمها قوي حتى تكدر تكمل وتنتصر على وضعها،
مديت أيدي لازمه ايدها.
ياسيم: شكراً لوكفتج وياي لو امي موجوده ماسوت اللي سويتيه.
ايريم: لتحجين هيج اني بمقام اختج الجبيره وهذا واجبي.
ترانيم: خلصتن؟
يلا كومن ننزل جوه وماريد اسمع منج اعتراض ياسيم.
ياسيم: لا نازله وياجن.
ساعدناها ونزلنه للمطبخ نحضر عشا خلص هذا الوقت والكل اجتمع بالصالة يشربون جاي وره الأكل.
مهيائيل كاعد بصفي ومخلي أيده على كتفي وممهتم بأحد بس اني احس نفسي صرت نار من الخجل بقيت اوزع ابتسامات للهوه حتى قاطع هذا الصمت صوته وهو يكول.
مهيائيل: مو على الأساس اليوم تحجزون بدلات؟
رائف: ياخويه مادري شكلك السالفه مليوصه.
مهيائيل: اسمعك خويه احجي.
رائف: ابوها يريدنا نعزل.
مهيائيل: وعزل وين المشكله!!
رائف: يخسون والله ما اعزل لو تصير مو كوكب سبيستون حتى لو كائن فضائي.
مهيائيل: وليش بله؟
رائف: اعيفك!! والعباس على كص ركبتي.
ابتسم بفخر زام شفايفه.
مهيائيل: شوكت تريد العرس؟
رائف: اذا باجر اكون ممنون.
مهيائيل: اعتبره تم يوم الخميس عرسكم.
رائف: السحر مامذموم دائماً.
مهيائيل: يخسون انا ماحرك شياطيني عليهم كلمتي كافيه.
رائف: ويلوموني ليش احبك.
مهيائيل: العن والدين كل واحد يلومك وين تلكه واحد مثلي.
ميمون: حط رجليك بالكاع عيوني.
مهيائيل: حاطهن ماتشوف!!
ميمون: شصار بشغلة ياسيم؟
مهيائيل: سألت اليوم على أحسن الأطباء وحجزتلها، باجر ان شاء الله اخذها.
ميمون: انطيني خبر اروح وياكم.
مهيائيل: كاغد وين؟
ميمون: راحت سفره سياحية.
مهيائيل: شلون يعني؟
ميمون: سفره خويه شبيك!!
مهيائيل: ايي تعبانه خطيه تحتاج هيج سفره من زمان.
ميمون: تصل متأخراً افضل من إلا تصل.
رائف: حكيم ماشاء الله.
ميمون: من يوم يومي بس انتم مطايه.
مهيائيل: رحمه الله والديك.
ميمون: أو والديك بالرحمه عيوني.
ترانيم: اليوم الكلوب متصافيه عساها دوم ان شاء الله.
مهيائيل: دومها كلوبنا متصافيه بس لو يطلعون كم شيطان نعيش بالعسل.
حميده: اكو شيطان اكبر منكم بعد!!
مهيائيل: احنه اصلاً يمه ولا شي.
حميده: اسطره وخليه يروح.
مهيائيل: لا هذا خاص يحتاج نعال مو سطره.
حميده: شسويت ببني؟
مهيائيل: ابنج يم المساجين هسه واذا حابه باجر اخذج بنفسي وتشوفيه.
حميده: ماصدكك.
مهيائيل: اجاوب لو لا؟
ميمون: لا خويه لا عيب ميصير.
مهيائيل: تبقى بكلبي ما نام الليله.
ميمون: تنام معليك اني اسويلك عوذه.
مهيائيل: كول والله.
ميمون: والله اسويلك تدلل كم مهيائيل عندي.
رائف: اليوم كلش منسجمين خيركم؟
مهيائيل: عين الحاسود بيها عود كول آمين.
ميمون: آمين وان شاء الله مال مكناسه.
مهيائيل: ومنظفين بيها البيت بعد عاصفه قويه.
ميمون: وطين ومطر.
رائف: هاي عليه؟
ميمون: لا مو عليك على واحد أبالي.
مهيائيل: يلا ياجماعة الخير انتهت سهرتنا وحان موعد النوم تصبحون على خير.
رائف: محروس خويه.
ميمون: مو طالع على سريع بغداد.
مُزن: مهيائيل.
مهيائيل: نعم.
مُزن: شخباره؟
مهيائيل: ياكل ويشرب وينام، مرتاح ويشوف ومابيه شي وباوعي على هاي الكاعده شوفي شنو صار بيها بسببه.
حميده: مجان السبب ياسيم هي تشكي من عيونها صارلها شهرين.
مهيائيل: ومن شكت ما اخذها للدكتور وإذا متعاجز منها ليش ما خابرني؟ اني اكلج لأن راد يعاقبني بيها وغلط من فكر يسوي هيج وراح تجيه عقوبه يستاهلها.
حميده: شنو ناوي تسوي؟
مهيائيل: حتى ترجع عيونها يبقى بالسجن وراها اسويها كعدة عشاير اخذ حقها مربع وفصل يكسر ظهره وطلكها منها وخليه يدفع مهرها كامل.
حميده: تريد تموت ابني انت؟
مهيائيل: محد كله يلعب بذيله لو ماشي عدل ومحترمها موصل لهاي المرحله، وهسه صاعد انام الحجي وياكم زعجني وخرب المود.
صعد واني وترانيم ساعدنا ياسيم تصعد ليفوك اول مخلت راسها على المخده كامت تبجي مهان عليه اعوفها وحدها بقيت يمها حتى غفت اقرالها ادعيه شويه وحجي وياها ومن شفتها دخلت سابع نومه طلعت.
دخلت للغرفه اظلم من حياتي رحت للحمام غسلت اسناني ودوشت وطلعت واكيد مينختم اليوم بدون ركعتين شكر لرب العالمين،
خليت راسي على المخده ومن حسيت بيه بعده كاعد حجيت.
ايريم: اليوم سويت شغله بدون ما اكلك.
مهيائيل: شنو هي؟
ايريم: من تزوجنا لحد الآن هوايه اسمعك تحجي بخالتي الله يرحمها بس ولا مره سوينالها ثواب ولهذا قررت باجر نسوي ثواب على روحها.
مهيائيل: منو كال ماسوي ثواب؟
ايريم: تسوي؟
مهيائيل: خليها يم ربج حتى يوصل بحسن نيه.
ايريم: ألمهم باجر عدنا ضيوف.
مهيائيل: منو؟
ايريم: زُمردة واهلها.
مهيائيل: اهنا رباط الفرس كولي هيج داده.
ايريم: نجمع راسين بالحلال وهم مسوين ثواب بنفس الوقت عصفورين بحجر واحد.
مهيائيل: تفكير عميق عاشت ايدج.
ايريم: مهيائيل.
مهيائيل: هممم.
ايريم: تحجي وانت مخلي ايدك على عيونك وحتى مدرت وجهك إليه.
مهيائيل: نعسان وأريد انام تصبحين على خير.
دار وجه للجهة الثانيه خلاني اصفن شنو صاير وياه ليش هيج يسوي اليوم؟ هاي اول مره يلتفت وميجي لحضني معقوله حسدت نفسي لو اكو شي ثاني ماعرف بيه؟
___
:نفتح الباب صارت بعيني شلون كاعده على الكاع والدم ينزل منها راسها على الحايط وتاخذ نفس بصعوبه، تقربت منها ونزلت لمستواها لزمت شعرها ورفعت راسها ضاربها كف خلاها تصحصح.
:هسه بده اللعب على أصوله خانم..
يتبع..
البارت اكثر من 4030 كلمه..
تعليقكم بين الفقرات وتصويتكم شمعاتي..
تصبحون على الف خير وعافية..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!