للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
مهيائيل
الكاتبة(زهراء احمد)
_______
في قلب الشيطان وردةً
سقاها بدمعهِ وقُبلهْ
أراد احتضانها بكل حيلةً
فوقعت في كفوفهْ أسيرة
وفي دار شياطينهْ شريرةٌ
أرواحٌ ملعونة
أبدانٌ مريضة
وأنفس متعبةً
لاخلاص سوا رب الراقصات
انها نهاية ام بداية
كلانا لانعرف شيئًا فقط إنهـا زوجة الشيطان
الخاطره بقلمي
زهراء احمد
___
مهيائيل: باجر نعقد محكمه يوم الخميس العرس.
صفنت شويه بكلامه بعدين ستوعبت شنو يكول معقوله اخلي هيج يستغلني بدون ما اسوي شي مستحيل جاوبته بسرعة واني ادعي بداخلي ربي ينطيني القوة حتى أكدر اواجهه صحيح صعب لكن وين المشكله أنهُ أحاول.
ايريم: بس انت تعرف اني مموافقه على هذا الزواج وكل شي صار غصب عني لهذا السبب خلينا نفسخ وكل واحد يروح بطريقه.
مهيائيل: بس أني مو هيج أريد وانت لازم تسوين اللي أريده، شفتج زوجه إليه ومراح يصير عكس هيج لتعبين نفسج.
ايريم: اعتبر كلامك تهديد؟
مهيائيل: له له له اني ماهدد زوجتي بس أتنبأ الها بلي راح يصير خلال ثلاث أيام.
ايريم: ليش اني؟
مهيائيل: شياطيني حبتج وهي قررت لازم تصيرين شريكه حياتي.
ايريم: اذا مجان بكلبك ذرة حُب إليه ليش تريد دمرني هذا الشي اللي ما أفهمه ابدد.
مهيائيل: مو كل العلاقات لازم يكون الحُب هو الطرف الرئيسي بيها ممكن جذبتيني كشكل أو شفتج زوجه صالحه وأم لأولادي برأيج هذا الشي ميكفي؟
ايريم: من تكون شيطان ملعون لا ميكفي.
مهيائيل: بدوني اليوم مكدرتي ترجعين صوتج الحلو وبدوني متكدرين تعيشين بسعادة، عقلي قفل عليج وراح تصيرين بين احضاني الشريرة وخليلة الساحر وزوجته حضري نفسج مبقى شي وتنورين الغرفه وتملكيها.
عرفت ماكو فايدة من النقاش وياه الكلام ضايع لذلك قررت اجي من غير باب.
ايريم: خلي فتره الخطبه اطول شويه حتى نتعرف على بعض وممكن أكدر اتأقلم عليك واتقبلك.
مهيائيل: عجبتني الفكره وماعندي مشكلة اوافق عليها بس داخلج يكول عكس السانج الحلو يحلوه ولهذا السبب تعالي يمي وتعرفي براحتج.
ايريم: ماكو نتيجه من الكلام وياك انت مُصر يتم هذا الزواج حتى لو غصب عني.
مهيائيل: بهاي الحق وياج هذا الزواج راح يتم برضاج لو غصب.
بقينه ساكتين شويه وقطعت هذا الصمت من تذكرت كلامه وي امي من رحناله للبيت.
ايريم: كلت لأمي اكو جني مسيطر عليه وجنية مرتبطه بيك ماكو حل توخره مني غير الزواج شكد جنت صادق بلي حجيته وشي ثاني ليش كل الساده مكدروا يوكفون على علتي وشنو السبب اليوم رجعت صحتي مثل قبل على رغم مصار الزواج بعده.
مهيائيل: سألتي اكثر من سؤال واني عندي حق الصمت.
ايريم: مراح تجاوب؟
مهيائيل: كل شي حلو بوقته لتستعجلين القفل والمفتاح.
ايريم: عندي سؤال حابه اعرف جوابه.
مهيائيل: اسمع.
ايريم: شلون نسحرت؟
اني ملتقيت بيك من قبل بنفس الوقت ماكلت شي غريب من احد بنفس اليوم اللي شفتك بيه صار ويايه هيج شنو تفسيرك للموضوع؟
مهيائيل: سؤالج بيه جواب لو تركزين شويه عرفتي.
ايريم: اريد انت تحجي وجاوبني.
مهيائيل: لهاي الدرجه حابه تسمعين صوتي وطولين المكالمه!!
لتخافين بس ثلاث ايام وانت يمي وتشبعين مني كُلي مو بس من صوتي.
ايريم: فهمان الموضوع غلط صوتك ميهمني ولا حتى انت بس اريد اعرف ليش هيج ويايه وشلون لا أكثر لا أقل.
مهيائيل: شنو الشي الحجيته مو مفهوم؟
ايريم: مفهمت.
مهيائيل: لان عقلج مو وياي اني اعرف شلون ارجعه.
ايريم: شنو تقصد؟
مهيائيل: غمضي عيونج.
ايريم: اي وبعدين؟
مهيائيل: ركزي شنو تسمعين؟
بلعت ريكي بخوف واني اسمع صوت أبيل يحجي وي استاج وخاصه من تذكرت هو نايم هيج وقت واستاج هم يعني مستحيل هُمَ بس حاولت اضهر عكس هيج ونهضت من مكاني والموبايل على أذني اول مفتحت الباب لفحتني ريحه غريبه، الكهرباء جانت مشتغله فجأة طفت والصوت صار عالي رجف جسمي من الخوف ورجليه مكدرت احركهم واني بهاي الدوامة فززني صوته وهو يكول.
مهيائيل: اكو جن بيتكم هُمَ يحجون هسه بصوت اخوج لتفكرين هوايه ذولي خدامي ارجعي للغرفه وسدي الباب تره اذا نعجبوا بيج تصير مشكله يحلوه.
نزلت دموعي وحجيت بصوت يرجف.
ايريم: ليش؟
مهيائيل: حظج هذا.
ايريم: اني ما أريد هيج حياة ليش متفهم؟!
مهيائيل: تتعودين بعدين مو مشكله.
ايريم: انت بشر متأكد؟
مهيائيل: ماعرف انت شتكولين؟
ايريم: الله ليوفقك يارب تدمر حياتك مثل مكاعد أدمر حياتي تسمععع.
مهيائيل: له له له اهم شي اعصابج بعدنه بأولها شخليتي لبعدين يحلوه.
ايريم: الله يبليك بأقرب الناس ألك ويراويك شنو يعني الألم الحقيقي.
مهيائيل: كاعد تدعين على نفسج عندج علم؟!
ايريم: انسان مخبل انت يحتاجلك طبيب نفسي والله.
مهيائيل: انت موجوده وتعالجيني مو مشكله.
ايريم: هاي الأصوات اللي سمعتها والايام العشتها بسببك وبسبب سحرك صدكني مراح يجي يوم اسامحك عليهن لو تصير نبي فهمت؟
مهيائيل: منو طلب مسامحتج بلا؟!
اني اريدج انت اما حُبج وغفرانج ومشاعرج ميهمني ابداً فهمتي يمرتي؟
شكد ستفزني من كال آخر كلمه وهو يجر بيها خلاني اجاوبه بعصبيه واثور من الغضب.
ايريم: تحلم اعتبرك زوجي بيوم من الايام لان اكرهك تفهمم اكرهكك.
مهيائيل: ولتحبيني اني أريدج تكرهيني بكل قوتج ولتفكرين بيوم تحولين الكره للحب لان بوقتها تندمين حيل يحلوه، وهسه روحي نامي باجر وراج كعده من الصبح حتى تصيرين بأسمي قانونياً وأريد اشوف منو يخلصج من أدين مهيائيل عزرائيلج.
ايريم: تهددني انت؟!
مهيائيل: تجين يمي وتشوفين بعينج ليش نسبق الاحداث يمرتي.
غلقت الخط بسبب العصبيه صدك طلع اسوء صفاتي شكد ما أحاول اكتم الغضب يجبرني اقلل أدب اسلوبه مستفز إلى أبعد حد ومع هذا هو بارد حيل ماعرف شلون اتحمل هيج انسان اني واصلا شنو يجبرني اقبل اتزوجه واعيش وياه نفس البيت، خطرت على بالي فكره اسويها باجر بالعقد والغي هاي المهزله من أصلها، رجعت راسي على الجربايه وسرحت بمخيلتي عن الدوام وشكد فاتتني محاضرات وامتحانات شلون اكدر اعيدها أو اعوضها، من بين كل هاي الأفكار والتعب غفيت بدون ما أحس، كعدت بعد فتره حسيت نفسي شبعانه نوم هاي اول ليله بعد كل اللي صار أكدر اغفى بيها براحه، شفت امي واكفه على راسي والقلق باين على ملامحها عقدت حاجبي وحجيت بتساؤل.
ايريم: شكو صاير شي؟
تسنيم: وكعتي كلبي عبالي صار بيج شي صار نص ساعه اكعد بيج وانت ولاحركه كلت ماتت البنيه اسم الله.
ايريم: يمكن لان نايمه بعمق هيج صار اسفه إذا خوفتج.
نزلت دموعها وبسرعه حضنتني لصدرها وتحجي والغصه مبينه بصوتها.
تسنيم: ولج داده موتيني من الرعب الف الحمدلله صرتي احسن وصحتج رجعت فرحتي بشوفتج تحجين وتوكفين على طولج مانطيها لأحد يابعد عمري انتِ.
وخرت عني ومسحت دموعها وبتسمت وحجت بفرح.
تسنيم: يلا كومي مبقى شي ويجون ياخذوج حتى تعقدين محكمة.
صفنت شويه وعيني عليها شلون فتحت الكنتور حتى طلعلي ملابس فكرت أنو لازم احجي هسه قبل فوات الأوان واكلها اللي بكلبي.
ايريم: يوم.
التفتلي بسرعه وهي تكول.
تسنيم: عيوني ماما انتِ كولي شنو محتاجه.
حجيت بسرعه بدون ما افكر بردة فعلها.
ايريم: ماريد هذا الزواج خلي نفسخ احسن ميطور الموضوع ويصير صعب بعدين.
تسنيم: تحجين صدك؟
ايريم: اي ليش هذا الأمر بيه شقه؟!
تسنيم: وسمعتنا وسمعتج مفكرتي بيها البارحه عقدتي اليوم تنفصلين شتكول علينه الناس، هاي انت عاقله وجبيره وهيج تكولين ماكو عتب على الزعاطيط بعد، اكول ستهدي بربج وذكريه وكومي غيري ملابسج الناس على جيه عيب منهم.
ايريم: البارحه مجنتي مقتنعه شنو غيرج اليوم؟!
تسنيم: حتى لو مقتنعه سمعتنا وسمعتج أهم احسن ما باجر يطلعون عليج الف كلمه بعدها حتى أبيل وابوج ميكدرون يطلعون من الباب فكري بيهم شويه على الاقل.
ايريم: وليش محد يفكر بيه اني شنو ذنبي اعيش وي ساحر مجرم شغله كله وي الشياطين.
تسنيم: بتصرفاتج تكدرين تخليه يحبج وتغيريه إلزلم ينضحك عليهم بكم كلمه وانت بعد شاطره واعرف شنو قصدي.
ايريم: وليش لازم اخليه يحبني؟!
ليش حتى اني اقدم شبابي وعمري تضحيه لحضرة جنابه وعلمود سمعتكم؟
ليش احنه البنات لازم ندوس على كلبنه ومشاعرنه باسم السمعه؟؟
ليش مو انتوا اللي تتنازلون شويه وتفكرون بيه معقوله مهزت شعره منكم حالتي ورفضي لهذا الزواج؟!
تسنيم: عاشت ايدج والله هسه احنه طلعنه ضالميج وجابريج ونسيتي انت شنو صار بيج بذيج الفتره حمام وحدج مكدرتي تدخليه، اني اممم افهمي مستحيل اتنازل عن سلامة بنتي تحت اي ظرف طز بالناس قبولي بهذا الزواج هو لمصلحتج شوكت تفهمين خوفنا عليج وحرصنه على سلامتج؟
ايريم: اني أفضل اموت على أنو تخافون عليه بهاي الطريقه الموت ارحم على الاقل اعيش هناك بدوله يحكمها رب العدل ماعيش بقفص كله شياطين وشعوذه الله اعلم شنو نهايتي بيه.
تسنيم: واني مستحيل اقبل بهذا الشي ماراح افرط بسلامتج بس لهذا السبب، لو انت عندج واحد ثاني لهذا السبب رافضه هذا؟
ايريم: مشكورا والله بعد كل هذا الحجي طلع وياج بس هيج عندي واحد ثاني، هاي هي رحمه الله والديج كل شي مرايده اروح اعقد وياه سيد صخام حتى ارضيكم بس خليها بعقلج كل شي راح يصير ويايه وكل ألم وحرام وعذاب راح اعيشه انتوا السبب بيه وبالاخص انت عجبج مكانته وفلوسه على بالج هاي اللي راح تعيشني بسعادة وخليني افاجئج غلطانه انت حيل اهم شي هو الأخلاق وهذا اللي يفتقره.
ماعرف ليش نسيت الموقف اللي صار وياه وماحجيته حتى أبين حقيقه النسيب الفرحانه بيه،
باوعلتي بحزن وحجت بهم كسرتلي خاطري وخلتني اندم على اللي حجيته وياها قبل شويه.
تسنيم: بعد كل هذا التعب والربا وياج هيج تحجين على امج وهاي اني المفتخره بيج هيج تجازيني ياوسفه عليج والله الف وسفه.
ايريم: ليش متفهمين أنو ما أريده؟!
تسنيم: مو بيدي والله العظيم مو بيدي ليش متفهمين؟
ايريم: مهددج؟
كولي اي طمني كلبي ولانخليني ابقى ألوم بيكم طول العمر.
تسنيم: استعجلي مبقى وقت ويوصلون رايحه اجهز الريوك اني لتتأخرين ماماتي.
نزلت دموعي بقهر شويه تذكرت صلاة الصبح فاتتني رحت غسلت وجهي وتوضيت سريع وصليتها قضاء خلصت ولميت السجادة مالي نفس اي شي وبداخلي غصة جبيرة، دخلت للحمام وسبحت على السريع مشطت شعري ولبست فستان اسود صحيح اليوم لازم ألبس غير لون بس اني اعرف حياتي وياه سودة مصخمه على شنو احتفل بيها من هسه وهمات سبب ثاني حابه اغثه لبست كل شي اسود مثل شخص عنده فاتحه حتى الحذاء والجنطه رشيت عطر هادئ وخليت عباتي على أيدي ونزلت شفتها كاعده تتريك وبصفها استاج تفاجأت ملكيت ابويه موجوده بسرعه سألتها.
ايريم: ابويه وين؟
تسنيم: عنده شغل طلع وكال مناك الحكها للمحكمه اذا لحكت.
ايريم: أو أبيل؟
تسنيم: طلع وي صلاة الصبح ومرجع.
ايريم: وشلون هسه اروح وحدي؟
تسنيم: امه راح تجي وياه هي ومرت اخوه الجبير اختج وحدها لو اكو واحد اني همات رحت بس هم صاروا عائلتج ماكو فرق بينه ان شاء الله.
ايريم: متغيره هوايه مو امي اللي اعرفها قبل.
تسنيم: سوولي إعادة تصنيع تحديث جديد هذا.
ايريم: اكو شي اني ماعرفه؟
تسني: شي مثل شنو؟
ايريم: ماعرف انتِ كولي.
تسنيم: رجلج واكف بالباب مسمعتي الهورن؟
ايريم: غير لازم طلعين ويايه قابل اطلع وحدي هم عيب.
تسنيم: وهو رجلج ياكلج مثلاً.
ايريم: على الاقل وصيهم عليه مو اطلع وحدي هيج ميصير.
تسنيم: هذا كله بسببج راح طلعين بلا ريوك اذا سألج جوعانه لتبيعين ثكل بعدين تتخربطين ويكولون انطونا وحده مريضه ولو هو اللي دك رجل لو هي لو ماريد يتورط بيج يتحملج شنو نسويله.
ضحكت تسأل وتجاوب نفسها اعرف داخلها اكو غصه وهي مقابله على كل شي ديصير بس شي مانعها وفات الأوان حتى لو حجته،
طلعت ويايه هو أول مشافها نزل وسلم عليها وباس ايدها رفعت طرف شفتي بابتسامة خاصه من شفته يباوعلي وعاقد حاجبه هو مكال لا وهم ابتسم نفسي ورجع حجه وياها ماعرف شنو بس سمعت جوابها صارت مرتك بعد، يمكن عنده نيه يبيعني بسوق العبيد ضحكت على أفكاري مسلسل النبي يوسف عليه السلام مأثر بعقلي هواية.
اقترب من عندي ولزم أيدي حاولت ابعد عنه بس ضغط عليها بقوة صرنا نمشي بصف بعض حتى وصلنه السياره فتحلي الباب وصعدت بالصدر يمه وهو صعد مكان السايق اول محرك السياره سمعت صوت من وره شفتهن من المرايه الاماميه نسوان ثنين وحده جبيرة لابسه عبايه خليجيه والثاني بعدها صغيره، جانت لابسه فستان بيج عقدت حاجبي واني اتسائل منو هن بس سعفتني الذاكره لحجي امي من كالت امه ومرت اخوه بس هو عقد محكمه اني وهو هن شكو؟!
تالين: على الاقل سلمي لو بعدج خرسه متحجين.
اجيت احجي قاطعتها الثانيه وهي تكول.
ياسيم: لا ماما اعتقد من باب صوت المرأة عورة فمتحجي خاف نسمع صوتها وتاخذ حرام.
أخير كلمه كالتها ضحكت هي وامها بصوت عالي قاطعهن وهو يكول.
مهيائيل: واني اسأل ليش السيارة بيها ريحه تلعب النفس طلعتن انتن بيها معقوله يا تالين الغاليه ماكله ثوم من وجه الصبح؟!
تالين: شنو قصدك احنه ملعبين نفسك موو؟!
مهيائيل: اني احجي اللي أريده السياره سيارتي والمكان مكاني وانتن ضيوف غير مرحب بيجن يعني أكدر هسه اشمرجن من الجامه ومحد يكول ليش.
تالين: نزلني اهنا مستحيل ابقى وياك طول الطريق.
مهيائيل: ماثق بيج عذريني خليني اوصلج للمكان المطلوب بعدين نزلي براحتج وهاي اللي بلون الكشن ماخليها وياج يجي واحد ثاني يوصلها وعندج وقت محدد اذا ملكيتج بالبيت على الساعه 10 الصبح اعتبري نفسج أبيت اهلج اليوم.
تالين: أنت منو مفكر نفسك وتهددني بكل وقاحه لتنسى اني منوو شلون تتجرأ تحجي ويايه هل شكل؟!
مهيائيل: الساني واني حر بيه اذا ميعجبج سدي اذنج.
نصدمت من اسلوبه كلت بكلبي هلا هلا هاي امه وهيج يتجاوز وياها لعد اني شلون قريت على نفسي الفاتحه وهديتها اكيد راح اعيش ايام سودة وياه مثل عباتي ويمكن اتعس،
جنت صافنه وافكر قاطعني وهو يحجي وي اخته.
مهيائيل: برسيم.
ياسيم خويه أسمي.
مهيائيل: عاجبني اسم برسيم عندج اعتراض؟!
ياسيم: لا خويه براحتك مثل ميعجبك.
مهيائيل: اي برسيم شنو كلتي عن مرتي؟
ياسيم: محجيت شي خويه.
مهيائيل: يعني اني اطرش؟
ياسيم: حشاك مكلت هيج.
مهيائيل: ماحب اسحب الحجي سحب كولي وخلصيني شكلتي عنها؟
ياسيم: كلت انو صوتها عورة.
مهيائيل: له له له جواب غلط هسه وانت تسوين نفسج تاخذين من جنطة امج المو حبابه كلينكس شنو حجيتي عنها؟
اجت تحجي قاطعتها امها وهي تكول.
تالين: تحجي بكيفها انت مالك علاقه امها اني اكيد احتاجت من عندي شي مهم ليش ادخل خشمك بكل صغيره وجبيرة؟!
مهيائيل: هو جبير شسويله؟!
تالين: منو هو؟
مهيائيل: خشمي.
تالين: متضحك تره وصلني وخليني انزل كلش اختنكت منك.
مهيائيل: ذكائج خلي يم الوالد تكدرين تضحكين عليه بس اني متعبر عليه هيج سوالف كولي برسيم شوكة حياتي شنو حجيتي عن حلوة اللبن؟
تالين: سويتها امك فد مرة عشتوا ياريتها لو تحبك مثل متحبها جانت كلت تستاهل كل هل غزل وهنت اختك كدامها.
مهيائيل: عندي نقطتين الأولى مرتي واتغزل بيها مثل ما أريد اسويها امي اسويها اختي صاحبتي عشيقتي انت ما ألج علاقه ثاني نقطه هي نفس الأول وهسه يشوكه احجي لان اذا حجيت اني يصير الحساب عسير.
ياسيم: كلت عنها خنفسانه.
ضرب ايدة على الستيرن بقوة فززني من مكاني وصرخ بيها بصوت عالي.
مهيائيل: عفيةةةة هيجج ربيت اني وعلمتتت تغلطين على الأكبر من عندج بس لأن لابسه عبايه ومحتشمه عن المحارم بس لا شلون لازم تلبس بنطلون وكيمونه حتى تطلع مثقفه وترضي ست الحسن، اللي كفاج الشر هسه احنه بالسياره ارجع للبيت واني اعلمج الخنفسانه منو اصبريلي.
كسرت خاطري من بجت وكلامه على رغم حلو بس ما أثر بيه لان أكرهه صعب تتقبل شخص اذا جان كلبك رافضه لو شنو يقدملك تبقى تبغضه،
قاطع بجيها وصوته العالي امها وهي تصرخ بيه.
تالين: وشدعوا عليك عيني ماخذ أميرة ديانه وهيج متقبل عليها، وبعدين شنو تهدد بيها ماعدها ام ابو حتى انت هيج تحجي وياها بكيفك تايهتلك هي مو!!!
مهيائيل: على هاي حجايتج وحق رب الخلق مرتي اذا مخليتج اليوم تنامين بيت اهلج ما اطلع مهيائيل واشوفج الشياطين من تفتر فوك راسي شنو تخليني اسوي من مصايب.
ساد الصمت حتى وصلنه للمحكمة اجه ولد شاب جبير شويه ملامحه تنطي شبه لمهيائيل تقريباً بس شويه أضخم من عنده ومبين شخصيه فتح باب السياره مالتهن ونزلن بقت تحجي بصوت عالي عليه اللي عرفته يردن يرحن للمول بس هو جابهن لهنا.
بقيت بالسياره وهن راحن للسياره الثانيه بس الرجال بقى واكف مكانه نزل مهيائيل واني هم نزلت صار بوجهي بسرعه حجه.
ميمون: الف مبروك يارب يسعدكم وتكون زواجه الدهر، يمكن انت ماتعرفين مهيائيل حق المعرفه لكن مع الايام تتعرفين عليه وقتها راح تحبيه حيل صدكيني،
وهسه عذروني صار عندي شغل مهم لازم اروح واخذهن ويايه ولتهتمين اذا حجن شي معروف عليهن هذا طبعهن من زمان.
ايريم: الله يبارك بيك شكراً الك، كلامهم مو مهم يكفي انو مقتنعه بكل شي اسويه.
ميمون: عاشت ايدج اشوفكم على خير أن شاء الله وانت مهيائيل ما أوصيك بعد دير بالك عليها.
مهيائيل: بهاي العين وهاي العين روح ولتهتم.
التفتلي ولزم أيدي ورجع ابتسم واني من يباوعلي بهاي الطريقه احس شياطينه تصير كدامي واتمنى اسوي بيه اشياء متخطر على البال، قاطع صفنتي وهو يكول.
مهيائيل: فكري شلون تقتليني من تصيرين ويايه بنفس الغرفه مو هسه.
غمز نهايه كلامه وشكد خجلني الحقير، لزم أيدي ودخلنه سوا اتفاجأت من لكيت شاب منتظرنه اول مشاف مهيائيل اجه حضنه بسرعه وسوا نفسه يبجي صدك ضحكت وخفيتها بسرعه من حجه وياه.
رائف: معقوله ياخاين تعقد سيد بدون علمي ليش هيج واني اخوك الصغير هااا.
مهيائيل: انجب كم مره اتصلت بيك وانت رافض تجي تريد تسوي اكشن وكذا.
رائف: اي صح اريد اسوي مفاجأه لصديقي العزيز.
مهيائيل: لعد مو مشكلتي.
وهو يحجي وياه التفتلي وكال.
رائف: الحرمله السوداء ولك هاي مرتك!!!
مهيائيل: انجب رائف للتجاوز.
رائف: على بختج خيه لاحمره لاكحله لا احمر لا أخضر جايه تعقدين لو تحضرين جنازة؟!
مهيائيل: هسه انت شعليك ليش ادخل نفسك بشي ميخصك بس كُلي؟!
رائف: غير لخاطرك ياعيوني بعدين هذا فال مو منيح يجيب النحس عليك عاد انت وشلون عندك حظ يخبل يطيح الطير من السما.
مهيائيل: عيف كل هاي السوالف لبعدين خلينا ندخل نعقد.
رائف: شو محد اجه وياك ليش؟
مهيائيل: ليش يعني يجون طالع فزعه!!
رائف: عرسك هذا شلون مو فزعة؟!
مهيائيل: شو وخر من يمي شوكت احتاجيت احد حتى هسه احتاج؟!
بقوا يسولفون واني شبه فصلت عنهم وعقلي سرح بمكان ثاني مختلف تماماً فزيت على صوته وهو يحجي ويايه.
رائف: مرت الأخ وين رحتي؟
اجيت اجاوب سبقني وهو يكول.
مهيائيل: عيفك من مرت الأخ احجي وي اخوك نفسه.
رائف: ماكو شي شوكت تعقد؟
مهيائيل: انت خبل؟
حديثهم ممل من شفت هيج سوالفهم رجعت سرحت مره ثانيه حتى حسيت بأيد لزمت أيدي رفعت راسي شفته اشرلي علمود نعقد، دخلنه للغرفه جان المحامي موجود حتى يسهل الأمر وكفنه بالمكان المحدد بدأ المحامي يحجي بعدين القاضي اول مسألني مجبورة لو لا خطر على بالي اكول لا واللي يصير خلي يصير شنو اخسر مثلاً؟
حتى لو خسرت ابقى معززة مكرمه بيت اهلي ولا اعيش وياه، رجعت نتبهت عليه وهو يحجي جانت النيه اكول لا بس الساني نطق اي التفتت اله شفته مبتسم وزاد حقدي عليه اضعاف اكيد سوالي عقد السان كلبي يريد شي والساني ينطق شي ثاني تماماً، كمل العقد وطلعنه من الغرفه صار بوجهي اخوه طش علينا جكليت وهلهل بنص حزني ضحكت على سوالفه صدك شخص يصنع البهجه بنص المصيبة،
طلعنه وصعدنا بالسياره هو بالصدر يم مصيبتي واني بالوره اول محرك السياره بدأ يحجي.
رائف: شغل اغنيه لازم نركص بهيج يوم سعيد، صدك مرت اخويه الف مبروك نسيت اباركلج، وانت يلا شغل اغاني قابل رايحين بعزااا؟!
مهيائيل: عاجبك تموت تالين حيل مو؟
رائف: ليش هي شدخلها؟!
مهيائيل: لان أكرهه هيج بدون سبب، بعدين انت بالع مسجل من صعدت لحد الان حجيت الف كلمه حتى مسمعت جوابها ليش لاكف؟!
رائف: احب اللكافه يلا يحلو شغل اغاني يلا.
مهيائيل: هذا المسجل يمك وشغل وسكت لان دوختني.
اني ما اسمع اغاني بس هاي الاغنيه جذبتني وبقت بعقلي حسيتها مقصودة والا ليش يخليها بالمسجل؟
بقى يطك اصبع ويغني ويركص اللي يشوفه يكول عرسه مو عرس اخوه بسرعه خطر على بالي أبيل غرغرت عيني بالدموع وصارت بعينه بسرعه طفى الأغنيه أو وكف السياره.
مهيائيل: يلا انزل.
رائف: أيا خاين تطردني!!!
مهيائيل: بدون سوالفك التعبانة ارجع للبيت اذا ملكيت تونه موجوده اتصل بيه ودير بالك على ياسيم.
رائف: واذا اجه واحد سأل عليك علمود سحر شكله؟
مهيائيل: خلي ميمون ياخذ موعد وياهم.
رائف: نشهرت صاير تاخذ مواعيد الله ربك مثل حضنا.
مهيائيل: رائف.
رائف: نازل نازل دير بالك على حلوة اللبن بطريقك.
مهيائيل: ولي من يمي واحد قليل تربيه.
نزل وهو يضحك وهو رفع راسه اليه يشوفني من المراية عينه صارت بعيني بسرعه درت وجهي بس هذا ممنعه يحجي اكيد.
مهيائيل: مبروك يا مرتي.
ايريم: قصدك البقيه بحياتج.
مهيائيل: ممكن وياج حق نفس الشي المهم عيفج من هاي الرسميات وين تحبين نتغدا؟
ايريم: رجعني للبيت اذا تكدر ماريد شي اكله شكراً ألك.
مهيائيل: خوش بما انو معاجبج مكان راح اخذج على ذوقي بالأخير لازم اددلج اليوم بما انو صرتي مرتي.
ايريم: وبما إنو رأي مو مهم ليش تسأل؟!
مهيائيل: عجبني اسأل اكيد مراح تسدين حلكي الا بطريقه وحده تكدرين تسويها شنو رأيج؟
كال آخر جمله وغمز خزرته ورجعت اباوع للشارع التزمنه الصمت حتى وصل يم مطعم وكف السياره ونزل وفتحلي الباب اخذت نفس عميق ونزلت وياه ابقى مسيرة مو مخيره لان ما أريد اسوي مشكله بنص الشارع واجيب السمعه المو زينه اليه دخلنه وحجز بمكان عائلي كعدنه وطلب اكل بعد فتره وصل وبدأ ياكل واني بقيت منتظرته يكمل حتى نطلع لان من صدك اختنكت، نتبهلي مأكلت شي رفع حاجبه وطرف شفته بابتسامة وكال وكأن قره أفكاري.
مهيائيل: فلوس حلال لتخافين من هاي الناحيه اني ما ادخل لمعدتج شي حرام بالأخير اريد ابقيج نفس ما انت ماريد تتغيرين وتصيرين عكس هسه.
ايريم: منو انت؟
: مهيائيل.
ايريم: اعرف اسمك بس اللي اقصده شي ثاني واعرف انت تعرف شنو اقصد بهذا السؤال.
مهيائيل: ماكو شي يخفي عني هاي احد ميزات الشياطين.
ايريم: لهاي الدرجه حاب غضب الله عليك؟!
مهيائيل: ربج لو يحبني يهديني لتفكرين بهذا الشي.
ايريم: ميهمني نهديت لو لا بس اني مو لهذا المكان افهم.
مهيائيل: ليش مكلتي جان غيرته اهم شي متضوجين يعمري.
ايريم: تغير شنو؟!
مهيائيل: المطعم مو كلتي معجبج!!
ايريم: اني شكول انت شتسمع تاليتي مجلوطه بسببك.
مهيائيل: اكلي عزيزتي وراج يوم طويل.
ايريم: ليش وين ناوي تاخذني؟
مهيائيل: راح تعرفين المهم تاكلين هسه يلا.
بقيت معنده وماكلت شي على رغم ميته جوع بس داخلي ميتقبل أمد أيدي على شي شاركني بيه الشيطان، خلص اكل وطلعنه اجيت اصعد بالورة بس جان مقفول صعدت يمه بالصدر متحملت وحجيت.
ايريم: رجعني للبيت تعبانة.
مهيائيل: رجعي راسج ونامي على الكشن من نوصل اكعدج.
ايريم: انت ليش متحس هااا كُلي؟!
مهيائيل: يمكن مشكله ولاديه اعذريني بس مابيدي شي.
ايريم: اكرهكككككك تسمع يا أخي افهم بقائي وياك بنفس المكان يخنكنييي ميهمني انت منو وشنو بس اللي أريدك تفهمه انو اني ما اريدككك هذا الزواج من البدايه نجبرت عليه ولو جان بيدي قسماً برب السماء ما أوافق عليه لو موتي الحتمي يصير بسببه شوكت تحسس موتتنييي.
مكدرت اتحكم باعصابي حجيت كل شي حسيته وبقيت انظرله بغضب ابتسم ومسح وجهه حركلي اعصابي اكثر رجعت صرخت بيه بصوت أعله.
ايريم: ماتسمعععع اكلككك ما أريدكك ليش متفتهمممم.
سكتت ومشهد من فلم رعب مر عليه من وكف السياره وسحبني من زندي اله لزمني بكل قوة حسيت اظافيره وصلت للعظم اعيونه حمر ويحجي بغضب وصوت عالي خله كل شي بيه يرجف.
مهيائيل: الشياطين متربعةةة براسي تدرينننن شنووو تكولللل؟
اني اكلج واحد يكلي موتها اهنااا ودفنهاا والثاني يكلي اخذها وياك للبيت وكسررر خشمها وخشم أهلها بدون زفه وعرس أو أخطر واحد يكلي اكسرها وطلكها بنفس اليوم،
استري على نفسج لأن اني شيطان على شكل انسان بأي لحظه افقد انسانيتي وياج وارتكب جريمة.
ستجمعت نفسي بصعوبه وباوعت بعيونه بتحدي ومن الغباء والعجله المحسبت احساب النتائجها بعدين انو حجيت هيج وياه.
ايريم: موتني، اعيش بنص كبر احسن بألف مره من أنو اعيش وياك بنفس البيت.
ابتسم ابتسامه شيطانيه ومال راسه حسيت من صدك اختفى مهيائيل الانسان وطلع الشيطان بمكانه ترك أيدي وحرك السياره وكال بنبره تمليها الخباثه.
مهيائيل: وجنت جهينه على نفسها، جنت مفكر نروح نجهز لعرسنا من غرفه وملابس لكن كل شي يتأجل، بس هسه راح اراويج روحج شلون تريد تطلع واني امنعها، اخليج توصلين للنهايه واسحبج اذا مخليتج تجرين عدل صدكيني لقبي مو إليه هينن بسيطةةة.
بلعت ريكي ودرت وجهي للشارع ودموعي تنزل بهدوء سمعت صوت موبايلي يرن اجيت افتحه سحبه من أيدي ورفع أصبعه بوجهي يهدد.
مهيائيل: كلمة وحده تحجيها متعجبني صدكيني اهلج يموتون واحد وره الثاني ومحد يكدر يخلصهم وتعرفين شنو أكدر اسوي تجربتج خير برهان.
فتح السبيكر وخله الموبايل يم وجهي جان أبيل يتصل اول مسعت صوته نزلت دموعي أجيت احجي وخزرني بتحذير خوفي على اخويه الوحيد خلاني اسكت وما احجي شي بس لشوكت ابقى ساكته اخير شي متحملت وقبل ما انطق سد الخط حتى مكدرت احجي كلمه رجع اتصل بيه مره قفل الخط وكتب رساله ودزها حتى مخلاني اعرف شنو مكتوب،
حاولت اعتذر بس هو مُصر يعاقبني على اللي حجيته وصلني لمكان مهجور مبيه احد صحراء ماكو أثر لأي بشر وكف السياره والتفتلي وعلى وجهه نظره شيطانيه وكال بأكثر نبرة مرعبه صدك حسيت برعب مو طبيعي من عنده.
مهيائيل: أو وكعتي بأيد الشيطان منو يكدر يخلصج من أيدي بعد؟؟
يتبع..
تفاعلكم ميسوي واهس شمعاتي والتنزيل حيتغير بالنسبه لتفاعلكم حبايبي.
اي شي يخص القصه تعالولي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!