للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة (زهراء احمد)
_________
: حدّثنِي عَن عيناها ؟.
: دَعنِي ألتقط أنفاسي أوَلاً..
____
فزيت مرعوبه على صوت الموبايل، جسمي مشتغل نار وايدي خدرانه واحس بتعب فضيع وكأن جنت اركض، رجعت ذاكرتي للحلم ستعاذيت بربي وانتبهت الموبايل يفصل ويرجع يدك أخذته بأيدي وفتحت الخط اجاني صوته المرعوب.
مهيائيل: صار ساعتين اتصل بيج وينج؟؟
تنفست بعمق وحاولت مابين الخوف بصوتي.
ايريم: جنت نايمه ماسمعت.
مهيائيل: وين نايمه؟
ايريم: بغرفتي.
مهيائيل: وحدج؟
ايريم: اي.
التفتت برعب على صوت الشباك ينضرب بقوة، كل خليه بجسمي فزت خوف وايدي رجفت ومكدرت اسيطر على نفسي، مجان حلم هذا واقع دا اعيشه هسه، نزلت دموعي وكلت بصوت مهزوز.
ايريم: مهيائيل خايفه.
سمعت اكو حركه يمه امبين من الأصوات مال واحد بسيارة.
مهيائيل: تكدرين تنزلين يم امج؟
ايريم: لاا.
مهيائيل: اسمعي وياي وركزي، ماكو شي يخوف كلها أوهام مو حقيقه، اللي تشوفيه هسه مجرد خيال مو لشخص موجود على أرض الواقع.
حجيت بخوف اكبر من كال هيج.
ايريم: وهذا المخوفني.
مهيائيل: لتخافين رب العالمين وياج واني دقايق واجي يمج يروحي، اخذي نفس وغمضي عيونج وابقي اسمعي صوتي ميصير شي خدامي وكلتهم يبقون يمج ويحموج.
ايريم: منو فتح الشباك لعد؟!
مهيائيل: يجوز هم خلي اجي واشوف شنو صار بالضبط.
ايريم: لتتأخر عفيه.
مهيائيل: تعالي انزليلي ميصير ادخل للبيت بدون ميطلعلي أحد.
ايريم: واذا شفت خيال؟
مهيائيل: ركزي بس وياي لتخلين عقلج بغير أماكن، اسمعي بس صوتي، يلا انزلي كدام بيتكم اني.
ايريم: بسرعة وصلت!!
مهيائيل: هو بيتكم قريب واني صاعد سياره اكيد ماطول، يلا بدون مضيعين وقت تعالي.
ايريم: تمام نازله.
اول مكمت حسيت اكو واحد ورايه اجيت التفت منعني كلامه وهو يكول.
مهيائيل: ايريم، تدرين انتِ احله وحده شفتها بحياتي؟
ابتسمت وخجلت بنفس الوقت وجاوبته بهدوء: لتجاملني اعرف نفسي مو بهذا الجمال.
مهيائيل: على مقدار الفتره العشتي بيها وياي لازم عرفتي عدل اني شخص ميجامل ابد دائماً البكلبي على الساني، وانتِ فعلاً احله وحده اشوفها.
ايريم: وشنو سبب هذا الإعتراف المفاجئ؟
مهيائيل: اكو اعترافات ملازم تبقى بالكلب، الحياة ما مضمونه.
ايريم: عمرك طويل ان شاء الله.
مهيائيل: يجوز تموتين قبلي، الحياة ما مضمونه لثنينه.
ايريم: ههههههههه، صدك متعرف تجامل.
مهيائيل: الصراحه راحه، وداعتج ماكو وأحد يستحق تتصنعين علموده.
ايريم: بس انت مو اي احد.
مهيائيل: اعتراف مميز.
ايريم: الحق يقال بما انو انت زوجي لازم تكون قيمتك مميزه عندي ومختلفه عن البقيه.
مهيائيل: شنو رأيج تجيبين عباتج وتجين؟
ايريم: هههههههه، حتى اصير علج بحلك امي واستاج الصبح.
مهيائيل: وصلتي يم الباب لو بعدج؟
التفتت لكيت نفسي بالطرمه ابتسمت طلع كلامه كله علمود يشتت انتباهي وابقى مركزه بس وياه، رحت يم الباب وفتحته بدون ميحجي شي دخل وسد الباب وسحبني لحضنه.
وخرت عنه بعد فتره وكلت بتساؤل.
ايريم: شنو جابك بهيج وقت متأخر؟
مهيائيل: اني هذا بيتكم مامرتاحله لهذا السبب ماخليج تجين.
ايريم: ليش مترتاحله؟!
لزم أيدي ومشينا وره البيت اكو قنفه قديمه مطلعيها بره كعدنا عليها وحضني لصدره وأيده مخليها بشعري ويحجي ويايه.
مهيائيل: لأن بيه هوايه شياطين اغلبهم من السحر، بيتكم مو نضيف ابد.
ايريم: منو هذا اللي يريد يدمرنا؟!
مهيائيل: الحاسدين والحاقدين كومه، يشوفون الضاهر عبالهم هذا هو الواقع ميركزون بالأعماق لهذا السبب الناس تلتجئ للسحر.
ايريم: شغلتك هاي ليش تنتقدها!!
مهيائيل: اني اعتبرها مهنه استرزق بيها بس كولي اللي يجي ويسوي يمي هذا شبي.
ايريم: مقابل عليهم؟
مهيائيل: اكيد طبعاً، ماكو انسان عاقل يسوي سحر ويخسر فلوس ويدخل نار جهنم بس علمود يدمر حياة واحد شافه سعيد، لو وحده ظنت نفسها تحب وعافها لأن لكه صيده جديده تجي تبجي تريد ترجعه بجلب الحبيب، وباجر عكبه بعد الزواج تكعد تلطم ليش ميهتم بيه وعايفني ومدايرلي بال ويركض وره النسوان، ومن تاخذ خيره وتكليلها مسواله عمل لطمت صدرها وكالت منو هاي الماتخاف الله وهيج تسوي، الله وكيلج اكثر النسوان هسه غبيات لأن يركضن وره جلب الحبيب وطاعه وخضوع بخسارة الفلوس واحتمال جبير ينكلب عليها ويصير يشوفها خنزير مو بشر عادي تدرين ليش؟
اشرتله براسي بمعنى لا رجع كمل: لأن السحر صاير تجاره حاله حال اي شي ثاني بالسوك، يروح على اي موقع يطلع فيديو ويسوي الأعمال على اساس اني ساحر وهو استحضار الجن ميعرفه شنو، هذا ميسبب اضرار الهم مع الوقت؟
مره اجتني وحده قبل سنه اقل تلطم والله نزعت شيلتها بالطرمه وتبجي وتنحب ساعدني ابني راح يضيع من أيدي، حتى وقتها جان رائف موجود راح يمها وكللها: مشتبه بالمكان تره الكاظم عليه السلام مو هنا ابيتنا، من كد ما شكلها يكسر الخاطر، مع هذا ماحن كلبي عليها لأن عرفت مسويه خراب لحماتها والعمل غلط وكالب عليهم ومأثر بأبنها،
ياهو اجه كال اني ساحر، يحتاجلها خبره وسنين تدريب وعمل حتى يصير مضبوط صدك ومابيه أخطاء وبيه مفعول قوي.
ايريم: هم سويت اعمال تخريب؟
مهيائيل: اكيد هوايه.
رفعت عيني اله وحجيت بغضب: ليششش.
رجع راسي لمكانه وكال بهدوء.
مهيائيل: صوتج يحلوة اللبن لاتكعد امج، وبعدين اني ساحر واي عمل يجيني اسويه المهم السعر.
ايريم: وحياة الناس مو حرام، شنو ذنبهم خطيه يدمرون؟!
صدمني جوابه.
مهيائيل: لهذا السبب ارجع افتحه بعد يومين.
ايريم: يصير؟
مهيائيل: ليش ميصير اني أمرت خدامي ينفذون واكدر أأمرهم يسوون العكس.
ايريم: بأي طريقه ينكتب السحر؟
مهيائيل: هوايه طرق وحسب الشغله اللي ترديها.
ايريم: شنو تكتبون؟
مهيائيل: طلاسم.
ايريم: اي هاي الطلاسم شنو هي؟
مهيائيل: بيها فرق اذا جانت سفليه لو علويه اهنا اللي راح توكليه بالأمر يكلج شنو يريد تكتبين وانتِ تسوين، العلوي دائماً يكون رحماني آيات قرآنية ودعاء ومحبه وصلح بين اي شخصين اما السفلي عكس تماماً.
ايريم: يعني مو قرآن؟
مهيائيل: لا قرآن بس يكتبه الآيات بالعكس ويكتبهن بالنجاسه حتى يثبت العمل ويرضا الشيطان وينفذه.
ايريم: أعوذ بالله، آيات القرآن العظيمه هيج يصير بيها، ومخافة الله والعقاب يوم القيامه وين راح من عقلكم؟!
مهيائيل: والله انتِ على نياتج وين اكو مخافة الله بهيج شغل!!
ايريم: الحياة قصيره يوم يومين وتنتهي وهناك العقاب أبدي، اتفاجئ من اشوف انسان يغضب رب العالمين ولا كأن اكو حساب وعقاب منتظره بعدين.
مهيائيل: لو كل الناس تفكر بطريقتج جان كلها شفتيها أنبياء، الخير والشر موجودين بكُل مكان ميقتصر على الساحر وغيره.
ايريم: بس السحر يموت هم وبيه مضار مستحيل تتعالج.
مهيائيل: كل شي إله علاج ماعدا كم نوع ونكدر نوقفه وميخليه يأثر بالشخص بس فتحه والتخلص منه بشكل نهائي صعب يعني تبقى اضراره مستمره بس ميأثر بحياته الواقعيه بنفس الشكل اذا منفتح.
ايريم: مسوينا شي بكل الأحوال يدمر حياته.
مهيائيل: طبعاً أكيد، اكو وحده عمرها بحدود الخمسين سنه ومامزوجه، بأيام المراهقة ابن عمها مسويلها سحر صبي لأن اهلها رافضيه ودافنه بالمكبره، كبرت وعداها الشيب ودخلت بسن اليأس، كل واحد تروحله ويكلها يمي وياخذ منها فلوس كومه، خسرت ملايين ومحد حل مشكلتها، وبقت حتى اجتها جلطه وماتت بفراشها من القهر بعد مطردها اخوها من البيت، جانت صديقة امي بأيام الشباب وبقيت اسأل عليها وعلاقتي بيها منكطعت لأن هي تعتبرني مثل ابنها واني هم اشوف بيها امي، ثنينهن نفس الطبع.
ايريم: ليش مفتحته انت؟
مهيائيل: بعض السحره يكذبون بشغله دائماً وهي أكدر افتح جميع انواع السحر وهذا غلط مو كل سحر ينفتح، الصبي، المدفون، المشمور بالبحر بالنهر ذني مو اي احد يكدر يفتحهن لأن صعب تحصلين عليه وتسويله بطله، بعد السباعية هاي منين يجيبوها مادري.
ايريم: وهاي بكيفك تحدد مكانه او وين تخليه؟
مهيائيل: اكيد لا، كتلج الساحر يتبع الجن الموكل بالسحر شنو يكله يسوي،
وهسه عوفج من سوالف الجن والسحوره وكوليلي عفتج نص يوم شوكت لحكتي تسمنين؟
ضربته على صدره: وين شفتني سمنانه؟!
كرصني بخدي كايل.
مهيائيل: مجان هيج من شفتج آخر مره.
ايريم: لتحجي هيج.
مهيائيل: وليش بله ماحجي مرتي واني حر!!
ايريم: كوم مهيائيل ارجع لبيتكم عيب كاعدين هنا وأهلي نايمين جوه.
مهيائيل: ليش محسستني مسوي جريمه للتذكير بس انتِ مرتي تره.
ايريم: اي واذا مرتك هذا الكلام عيب وخاصه بهيج مكان بلكي طلعت وحده وسمعتنا؟
مهيائيل: نطلع لغرفتج.
راد يكوم ويسحبني لزمت ايده: يمعود وين رايح ترديني انفضح؟
مهيائيل: ولج رجلج مو صاحبج شبيج خايفه؟!
ايريم: اذا هيج تريد نرجع للبيت.
مهيائيل: اي يلا اصلاً اجيت اكلج تلبسين عبايتج حتى نطلع بس ماعرف ليش نسيت يمكن من شفتج كدامي تيهت.
ايريم: هاي صدك تحجي انت؟!
مهيائيل: اي صدك ممبين بوجهي اشاقه ابد.
ايريم: مهيائيل مخربط بالجاي؟
مهيائيل: قصدج سكران؟
لا يحلوه بس تعودت انام بحضنج واليوم فاهيه الغرفه عليه ومن طلعتي لحد الآن مشايف شكلها شنو.
ايريم: ارجع لبيتكم وتعالي الصبح ارجع وياك عيب هسه كدام أهلي.
مهيائيل: روحي صيحي امج نترخص منها ونطلع.
ايريم: خطيه نايمه تعبانه ليش تريد اكعدها، كتلك خليها للصبح على شنو الاستعجال متكلي؟!
مهيائيل: حقج لو اهمج بمقدار ذره جان بدون إعتراض رحتي كبل لبستي عباتج وكلتي يلا زوجي سر سعادتي جاهزه، بس انت ماكو احساس ولا مشاعر.
ايريم: انت ابو الأحساس والمشاعر ليش متصلت بيه من وقت وكتلي جايج حضري نفسج نرجع؟
مهيائيل: وليش مو انت اللي طلبتي، على الأقل فكري منو يسويلي عشا ويكعد يسولف وياي.
ايريم: حسستني عايش بصحراء اصلاً اني ما اشوفك الا لنص الليل واذا كعدنا على سفره وحده رائف هو الوحيد اليحجي وياك هاي اذا ما صارت عركه من ستات الحسن.
مهيائيل: يروحلج فدوة يغارن غير.
ايريم: لتغير الموضوع مصره ترجع للبيت وعوفني يم امي اليوم.
مهيائيل: ما انكر الحضن التعودت عليه، تدخلين تصيحها لو اصيحها اني؟
ايريم: مهيائيل والله عيب كبر عقلك لتسوي بيه هيج.
مهيائيل: مو راح اغتصبج، مرتي واريدها وين المشكله يا أمة الأسلام!!!
خليت أيدي على حلكه من شفته حمه كلش وراد يصرخ، انتبهت على نفسي أجيت اوخرها ثبتها بمكانه وقبلها، خجلت من تصرفه وسحبتها من أيده بسرعة،
مهيائيل: تحركي كدامي لأن ما اضمن نفسي ابد.
شفت وضعه مابيه مجال سحبت نفسي ودخلت للبيت أجيت اغلس واصعد لغرفتي بس كلت عيب هذا التصرف اخذت نفس عميق ودخلت غرفتها من شفتها شلون نايمه ورايحه بسابع نومه كسرت خاطري وبدون ماكعدها صعدت فوك دخلت غرفة استاج كعدتها وكلتلها مهيائيل منتظرني جوه خاف يكعدن الصبح ويسألن عليه،
مجنت جايبه شي ويايه لأن عندي ملابس هنا باقيه، لبست حجابي وعباتي وأخذت جنطتي ونزلت، طلعت من باب الصاله لكيته واكف ومبتسم اني هم بادلته وطلعنا، شفت الساعة وحده ونص والمنطقه فارغه مابيها حتى جلب وهذا جايني مشتاق، شي بداخلي يركص من الفرح، الحُب الحقيقي أفعال اكثر من كلام ومهيائيل ثبتلي حبه بتصرفاته،
وصل للبيت ونزلنه قبل ما اصعد للغرفه سمعت صوت واحد يسولف بهمس بس مبين لأن هدوء، تقربت اكثر من المكان الجاي من عنده باب الغرفه مالت شغلهم مفتوح شويه وكفت على جهه ودققت سمعت شي بعمري كله مجنت متخيله اسمعه خاصه من وحده مثلها، واكفه وتسولف وياه وصوتها أوضح من قبل شويه.
ياسيم: ياحبيبي هاي شبيك، باجر الصبح اني يمك على الموعد بس ها ترجعني قبل وقت المحاضره متخلص للمعهد حتى محد يشك، تعرف مهيائيل هوايه يدقق بيه وماريده يحس على شي.
شهكت بفزع وخليت أيدي على حلكي حتى متسمعني بس صوتي جان واضح إلها يمكن التفتت واجت يم الباب سويت الدرج خطوتين وصلت للغرفه الهث ورايه مباشره دخل من شافني بهذا المنظر وتنفس سريع حجه بقلق.
مهيائيل: شكو شبيج ليش هيج وجهج أصفر؟
الساني مستحيل أكدر الزمه بهيج موقف: مجان قصدي اتجسس على احد بس الصوت السمعته جبرني.
مهيائيل: اي وشنو سمعتي؟
رجعت لعقلي من كال هاي الجمله، معقوله اكله اختك هيج تسوي، وإذا حجيت شنو تكون ردة فعله؟
ممكن يعصب لو ينقهر، شهل تمسلت اللي اكوله البنيه شرفها بقيمة حياتها اذا سمع عليها كلمه وحده ممكن يموتها بدون ميرفله جفن، بس شلون أكدر امنعها تمشي بهذا الطريق بدون ما احجي شي ومحد ينظر؟
نتبهت عليه شلون صافن عليه منتظرني احجي، غميت نفسي داخلياً لأن ماكو جذبه أكدر اكولها وطمطم على الموضوع، فجأة خطرت بعقلي فكره احتمال تساعدني واحتمال لا بس لازم انفذها،
رحت يمه وحضنته وخليت راسي بركبته وحجيت بهدوء عكس دكات كلبي السريعة والغير منتظمه.
ايريم: خايفه، ماحس بالأمان واني بهذا البيت لتعوفني وحدي بيه مهيائيل.
لف ايده على خصري والثانيه خلاها على شعري بقيت شويه او وخرت عنه أجيت اروح لزم أيدي ودارني عليه وكال بتساؤل.
مهيائيل: ايريم شنو سمعتي وخلاج ترجفين؟
ماكدر اتهم واحد بيهم لأن حرام عليه بنفس الوقت اذا حجيت ممكن يموتها، شرفها غالي مو مثل اخوانه يكدر يسامحهم، يامسامحه هو وصل ميمون للموت شنو ممكن يسوي بياسيم.
رجعت وجهي للجديه وحجيت: ماكو شي مهم انسى.
خله ايده وره ظهره وتقرب من عندي ويحجي بتوعد.
مهيائيل: شفت ياسيم صعدت لغرفتها على رغم اني محذرها هوايه متنزل بالليل بس خالفت الأوامر شنو رأيج شلون لازم اعاقبها حتى متكرر الخطأ مره ثانيه؟
تغيرت ملامحي وبلعت ريكي بصعوبه عرفت من كلامه شك بيه سامعه شي عنها بس ماريد اكول فحاولت قدر الأمكان اسيطر على اعصابي واحجي بأبتسامه: يجوز نزلت عطشانه لتاخذ قرار بدون متدري شنو الموضوع.
مهيائيل: منو كال ما ادري؟
ايريم: اي متعرف هي ليش نزلت.
متفاجأت من كال.
مهيائيل: بس انتِ تعرفين، اسمع منج احسن ماخلي شياطيني تحجي لأن وقتها ما اضمن ردة فعلي ابداً.
سويت نفسي ماعرف شي وكلت بعقدت حاجب.
ايريم: شنو تريد تسمع؟
مهيائيل: اللي سمعتي جوه.
عرفت مابيها مجال اتجادل وياه لأن بالأخير راح يعرف وصير اني الملامه لأن سكتت من البدايه مع هذا اجيت من طريق ما اخلي يضربها بالنهايه.
ايريم: مو شي ذات اهميه صدكني.
مهيائيل: مع هذا اريد اعرف شنو سمعتي.
ايريم: ماريد تصير مشكله بسببي.
مهيائيل: احسن مايصير شي بعدين وسكوتج السبب.
ايريم: مهيائيل.
مهيائيل: ايريم احجي وخلصيني لأن راسي راح ينفجر.
حجيت بقلق.
ايريم: شبيك؟
مهيائيل: عوفج من البيه احجي وخلصيني.
ايريم: ياسيم جانت تحجي وي صديقتها تريد تطلع وياها وره الدوره.
مهيائيل: قصدج صديقها.
ايريم: مسمعت احد يحجي وياها والله اللي سمعته كتله ألك.
مهيائيل: وليش وجهج جان مخطوف وكأن واحد يركض وراج؟
ايريم: لان حست عليه اسمعها ومردت تاخذ عليه غير نظره.
خلصت هاي الليله بصعوبه خاصه بعد مانزل واني بقيت بوحدي فكرت من رجعني بهيج وقت راح يبقى يمي بس صار العكس لعنت اللحظه الحجيت بيها هسه اني شنو ذنبي بسوالف بيتهم المتخلص.
ثاني يوم كعدت والنعاس بعيوني نمت وره صلاة الصبح واحس راسي يدكون بيه طبل، كملت روتيني ونزلت جوه حضرت ريوك وي ترانيم وكعدنا ناكل وأخذت راحتي من مشفت ولا واحد بيهم، شويه ودخلت وعيني عليها واذكر كلامها البارحه وافكر بمهيائيل لو عرف بيها متفقه وي ولد اليوم تطلع وياه شنو يسوي وبأي طريقه تصير موتتها،
واني افكر بالقادم لفت انتباهي إشعار وصل لموبايلها اجت بسرعه وقرت شنو مكتوب نرسمت على شفايفها ابتسامه خفتها فوراً، مبينه من حركاتها مستعجله تريد تطلع مهتميت الها وكملت ريوكي بس عيني مفارقتها ابد اباوعلها من جوه ليجوه وحده مستهتره ادور ولد من وره علم اهلها، مفكرت بسمعتها وشرفها وسمعة اخوانها؟
عجيب امر البنات اليوم يركضن وره اي واحد يكلها كلمة حلوه، عرفنه جفاف عاطفي بس هل الاستهتار على شنو!!!
صاير الحب صوريلي نفسج لو افتحي وياي كام مشتاقلج، على اساس تثبت حبها اله وثقتها بيه متدري بهاي السوالف اطيح حظها وحظ عشيرتها، اللي يحب من صدك باب البيت معروف ويجي يخطب هل سوالف التعبانة شنو، ومن يعيفها تكعد تلطم يكول ميتلها الشاب العشريني وهو يعوفها منا بنفس اليوم كبل وي وحده ثانيه تشبعه حنان، لفتكم حنان واخذتكم وياها وخلصتنا من بلاويكم،
هذا كلامي كله بداخلي بدون محد يسمعه حتى ميصير حرام عليه وينحسب ذنب وتروح حسناتي للميستاهلها،
غسلت مواعيني واجت تطلع ترانيم صايره على الطريق ابتسمت بخباثه وحجيت بصوت عالي.
ايريم: ولج ترانيم شنو هذا على رجلج؟
طفرت من مكانها ذيج جانت وراها مباشره وكعت على وجهه عدل وكامت تصرخ من رجلها دخل رائف يركض ومهيائيل اللي هسه يلا عرفت بيه موجود، راحوا يمها مهيائيل شالها وكعدها على الكرسي عرفتها عياره لان وكعتها مو قويه بس احسن حتى متطلع وتصير مصيبه وفضيحه بعدين،
عيني راحت للموبايل وشلون يشتغل ويطفي كل شويه مشيت على أطراف اصابيعي سحبته وخليته وره ظهري وصعدت بدون محد يدري لفوك واني اتذكر شنو صار البارحه قبل ميطلع مهيائيل من يمي.
Flash back
صفن شويه بوجهي وكال.
مهيائيل: مره كتلج عندي شرط وانتِ وعدتيني تتفذيه شنو ماكان تذكرين؟
ايريم: اي اذكر، شنو تريد من عندي؟
مهيائيل: اريد موبايلها يمي باجر وبأي طريقه ممكنه ماريدها تطلع.
ايريم: انت تكدر تمنعها ليش متسوي هيج؟!
مهيائيل: كلتي شكت اكو وأحد يم الغرفه وهي صعدت مباشره وراج فإذا منعتها اليوم معناها راح تاخذ احتياطها وتنتبه وبهاي الحاله منكدر نعرف الموضوع، وبعيد عن هذا راح تشك بيج وتكرهج وتصير حرب بينكم ولتنسين هي مرافقه تونه يعني الوراثه الها دور.
ايريم: صعب اسوي هيج.
مهيائيل: لو اعرفج مو كدها منطيتج هيج مهمه، اهم شي محد يعرف سوي الكتلج عليه والباقي يمي.
رجعت للحاضر على فتحت الباب مديت ايدي وانطيته الموبايل وحجيت بتأكيد، حتى لو السويته صح احس نفسي غلطانه لأن اعرف مهيائيل وعصبيته شنو.
ايريم: ماريد اندم ساعدتك.
مهيائيل: اهنا والسيره تنغلق بينج وبين نفسج متحجين بيها وتذكري بهذا البيت حتى الحياطين تسمع، افكارج أكدر اقراهن والسحارين غيري نفس الشي وميمون ما اضمنه لأن هو تحت قيادتهن.
تركني وطلع واني بقيت بحسرتي، مر اسبوع كامل خلصت الإمتحانات وبقيت كاعده بالبيت، سمعت من امي ابيل طلع براءة بس مقبل يرجع وي ابويه للبيت وراحله بتال وبعد اقناع اليوم يلا يجون، اما ياسيم بحجة رجلها المابيها شي منعها مهيائيل تطلع لأي مكان وكللها ادرسي بالبيت واي شي تحتاجيه اني موجود، وسالفة الموبايل نغلقت من ذلك اليوم بدون اي تطورات،
كاعده بالمطبخ يم ترانيم نسوي باميه دخل وصاح بصوت عالي.
مهيائيل: ياسيممم.
قريت على روحها الفاتحة وبقيت احسب اذا ماتت، اليوم صلاة الوحشه لو باجر؟
ولو هي ماتصلي وحشتيش تفيدها،
نزلت تركض وكفت مقابيله باوعلها بنظره طبيعيه صدمتني لعد على شنو جان يصيح؟!
فكرتها راح تنضرب وتدما طلع احساسي غلط.
مهيائيل: حضري نفسج اتصلت بالخط باجر يجي ياخذج علمود الدوره وموبايلج اليوم جبته من التصليح تكدرين تاخذيه بس اهم شي الدراسة وبعدين اسهري براحتج.
الإبتسامه شكت الحلك ضحكت على غبائها اذا مجان ناويلج على نيه سوده فلا اطلع ايريم اصبري وشوفي،
رجعت نظري لشغلي من ضربتني على أيدي كايله.
ترانيم: شهل نظرات ولج، شمفينه؟
ايريم: شنو هاي؟
ترانيم: يعني شمصخمه بس ذيج بالانباري.
ايريم: وانت شعرفج باللهجه الانباريه؟
ترانيم: شفتو وأخذوا لكلبي، ولج شنو من قيافه واسلوب وهندام جعل ربي يخليني ابيتو واغسلو ثيابوا هل الحلو، اويلي سرسحت.
ايريم: لا وحق الله ربحنا.
ترانيم: شبيج حرام انعجب امرأه ثلاثينه جاده واخبل واطك بالكاع، شنو ناقصني واعيش حالي حال العالم، احب وانحب وتمعشك، ويخابرني وره 12 ويكلي مشتاقلجج.
ايريم: وشلابسه وراها.
ترانيم: طاح حظج خليني اكمل.
ايريم: كملي داده كملي خليني اشوف تمعشكج وين يوصلنه.
ترانيم: ايي، اني اضحك بصوت هادئ مليان شاعريه وحب واكله اني اكثر يعمري.
نزلت راسي ورفعت عيوني وفتحت حلكي: هااا.
ترانيم: سدي حلكج ذبان ولتقاطعين لحظاتي الهادئه، ونبقى نسولف للصبح هو يتغزل واني العب بشعري حتى نغفى سوا والموبايل مفتوح.
ايريم: لا هذا جاد وجاد جداً وحق الخلق زوجي.
ترانيم: اي ام خلق زوجج شلون عرفتيه ليكون صرتي سحاره على الأخ؟!
ايريم: لأن يتحمل شخيرج للصبح.
ضربتني على أيدي واني ضحكت بصوت عالي ضحكه طلعت من اعماقي.
ترانيم: ادبسزز تضحك عليه اني اعلمج.
ايريم: مدري عنج حب وحب.
ترانيم: ليش ميصير احب يعني؟
ايريم: لا والله يصير افرحلج من اعماقي او اوكفلج وكفت اخت وصديقه بس مو حب واتصالات لا خطبه رسميه وكدام الأهل ينرفع راسج وراسهم بيها.
ترانيم: وحقج بس يجي اقبل ونص.
ايريم: فكرت انتِ مستحيل تقبلين تكملين حياتج بعد المرحوم.
ترانيم: قصدج المكبور، وليش يمه ما كمل حياتي هو اني شنو شفت منها اصلاً، زعطوطه اركض على حلاوه علوجه وابدلها بنعال بين ليله ويوم لبسوني اهلي البدله وهلاهل وركص اني فرحانه طفله ما افهم شنو يعني بيت ومسؤوليه ورجال وعيال اضحك وياهم على الواهس، بليلة عرسي وعيون مهيائيل وغلاته بليلتها كبرت عشرين سنه كدام، حرموني العب وي الجهال دعبل ودمرو طفولتي وبعد هذا العذاب والضيم الشفته تردين ما اقبل لا والله اقبل والعن ابو الراح لا ابو الاجه بس ها كون واحد على مزاجي بمواصفات اني اختارها واليعترض اشك حلكه.
ايريم: الله يساعدج والله، الزواج بهذا العمر صعب ما بالج بقاصر ما تفهم شي.
ترانيم: انسي كبرنا وعدت، سولفيلي انتِ وابو السحوره ماكو شي شياتين؟
ايريم: شايفه هذا الكلاص اليمج؟
ترانيم: فارغ شبيه؟
ايريم: احنه افرغ من هذا الكلاص، صار اسبوع كامل الأخ ما حاجيه ويا كلمه تردين اشياء تصير والله بطرانه.
ترانيم: بعدج معارضه؟
ايريم: يا معارضه غير لبست وحضرت نفسي ويكلي بعدين ماريدج، قابل تردين اعيدها والله على ركبتي حتى لو يجي وينطقها بالسانه هم اعترض وفشله مثل مافشلني.
حترك كلبي من تذكرت ذلك اليوم والعصبيه صعدت عندي فول، تخيلته قلم الباميه وفرمته فرم وما ارتاح كلبي، حزني بذلك اليوم تحول لعصبيه لأن بقيت كابته بداخلي ومحجيت شي كدامه، ولو هو شنو احجي حتى عيب، ياخذ عليه نظره انو كاتله نفسي عليه بلعتها وسكتت، بس والله اطلعها من عيونه بسيطه وين يروح مصيره يجيني وبرجليه هم.
كملنه الغدا وصعدت فوك واني داخلي يغلي نارر شفته نايم على الجربايه وساند ظهره على التاج وبأيدة الموبايل جان ودي اخذه من عنده واشمره بالحايط بس هدأت نفسي ورحت يم الكنتور انتبهت عليه نظراته موخرها مني من دخلت لسه بس شنو الفايده صار اسبوع يعاملني مثل المزهرية بالبيت ولا كأن مرته واللي حق عليه،
دخلت للحمام وركعت الباب بعصبيه كملت حمامي وطلعت وهو على نفس الكعده تجاهلته تماماً من اول مافتت لسه وهذا الشي زعجه امبينه عيونه صارت حمر، جففت شعري وخليت مرطب لوجهي وأيدي ورشيت عطر ولبست حجابي نيتي اروح يم ترانيم جوه اسولف وياها حتى يصير موعد الأذان،
واني اخطي خطواتي حتى اطلع وقفني صوته.
مهيائيل: وين؟
غلست محجيت شي ومدرت وجهي إله ضاج من تصرفي رجع كال بحده.
مهيائيل: كلت وين رايحه على شنو متحجين؟
التفتتله واشرت لنفسي وكلت بتساؤل.
ايريم: تحجي ويايه؟
مهيائيل: منو غيرج موجود هنا؟
ايريم: عبد الرحمن مو انت كلت.
مهيائيل: لتحاولين تلعبين وياي بهاي الطريقة ولتسخدمين هذا الأسلوب لأن ماحبه.
ابتسمت مستفزة اله وكلت بهدوء: بس اني احبه.
كام من مكانه واجه وكف مقابيلي عيوني بعيونه مد ايده وسحب الشال من على راسي وفتح شعري على طوله هاي الحركه اول مره يسويها، اباوع عليه بثبات ونظراتي بيها قوه حتى يعرف عدل ايريم مو لوقت الحاجه.
مهيائيل: صايره عنيفه شنو سبب هذا التغيير؟
ايريم: اني ماشوف هيج.
مهيائيل: زعلانه؟
ايريم: على شنو ازعل؟!
مهيائيل: لأن هذا الأسبوع جنت مشغول شويه عنج.
ايريم: مو مهم سويت اللي شفته مناسب وريحك، من يكون كلبك ماناوي القرب زعلي يكون اهانه لكرامتي لا أكثر.
مهيائيل: هذا الكلام جديد.
ايريم: بس حقيقي.
مهيائيل: وشلون تردين الرضا؟
ايريم: الاهتمام اذا نطلب تقل قيمة الطالب، الشي المينبع من الداخل ويكون فطري ما أريده، ممحتاجه من عندك كلمتين حلوين وقت الراحه واغلب الوقت تصرفاتك تكون عكس.
مهيائيل: انتِ زوجتي هسه تكدرين تحجين كل شي براحتج بدون الغاز ولتعتبريه ضعف شخصيه المشاكل بهاي الطريقه تنحل معليج بالمختصين.
ايريم: من شنو ابدي وبشنو انتهي وعلاقتنا من الأساس غلط، بدايه من زواجنا نهاية بتصرفاتك، عدم اهتمامك ملحوظ بالنسبه اليه ولتكول جنت مشغول بهذا الأسبوع لأن من تزوجتك لحد الآن الليالي التبقى بيها يمي معدوده، كلما احاول واكول خليني اتقبل الأمر الواقع ارجع اسأل نفسي الف مره: انتِ مقتنعه بنفسج متزوجه؟!
كلي بأي دين وقانون يحقلك تسوي ويايه هذا التصرف؟
اني مره او اخاف وعندي مشاعر وانت مخليني انام وحدي بالليل وتعرف عدل بالاشياء اللي اشوفها وشكد اخاف واموت رعبه، رعبه مضاعفه لأن اخاف من الجن والإنس، حتى النسوان بهذا البيت ماعندي امان بيهن.
جاوبني بهدوء عكس نار كلبي اللي تريد تحركه هسه.
مهيائيل: كل هذا بكلبج عليه؟!
ايريم: هذا جزء بسيط من احساسي بيك.
مهيائيل: كملي الباقي.
ايريم: له له له، ساحر القرن، الحر تكفيه الإشاره.
تركته ومشيت اذا هو ذكي يلكفها بدون شرح، خلص اليوم بشكل طبيعي ورحت اصلي وانام، حياتي رجعت للروتين الممل، صحيح الإمتحانات صعبه بس ماخذه وقتي ومخليتني اعيش بدون هم وحزن،
كملت صلاتي لميت السجادة ورحت انام دخل للغرفه درت وجهي للساعة شفتها عشره تفاجأت معقوله كلامي أثر بيه؟!
راح يم المرايه وهو ينزع بالساعه كال.
مهيائيل: باجر اهلج معزومين يمنه.
ايريم: شنو المناسبه؟!
مهيائيل: من زوجنا لحد الآن مصارت بينه جلسة تعارف هاي المناسبه.
ايريم: أو ابيل؟
مهيائيل: جاي اكيد عزمته بشكل منفصل عن الباقين.
ايريم: اتصلت بيهم كلهم؟!
مهيائيل: لا رحتلهم للبيت.
ايريم: ليش؟
مهيائيل: ميصير أروحلهم؟
ايريم: لا بالعكس بس تفاجأت لا أكثر.
مهيائيل: ميحتاج تتفاجئين وحضري نفسج غداهم باجر يمنه.
والله صعب اقتنع اجو برضاتهم خاصه أبيل يكره مايكرهك، حجيت هيج بصوت ناصي حتى مايسمع، دخل للحمام واني خليت راسي على المخده فتحت الموبايل كلبت بي شويه وسديته وبقيت صافنه بالسكف، الحياة المنزليه ممله اريد اطلع اشم هوه يوم عباره عن هم نكد وطبخ وغسل مواعين ونوم واكل، شنو من روتين يلعب النفس حجيت بصوت عالي مخاطبة نفسي: هسه شنو بيها لو يجي يكلي امشينا عازمج بره، لو ياخذني نشوف فلم صحيح ماحب هاي الأمور بس تغيير جو وين المشكله، بعيد عن الخساير والله اقبل يفرني بالمنطقه ونرجع طلعتت روحي،
وي آخر كلمه طلع من الحمام درت وجهي ونمت، مزوجني على شنو مادري يمكن ديكور زايد بالغرفة، حتى احبج ميكولها فوكاها حاسدتني ذيج الغبره على بوسه ومكملت، لو يسألوني حياتج الزوجيه شلونها اكلهم زواج بدون زوج، يوم يمي عشره ماكو حتى كمت اشتاقله وهو موجود يمي بالبيت وهو ميحس،
معقوله ميحبني؟
مستحيل لا ليش مستحيل هو لو يحبني جان يهتم بيه مو مخليني وحدي شمعة فكر،
كلبي يسأل وعقلي يجاوب أخير شي تعبت ونمت وبين صحوه ويقضه حسيت بأيده نمدت إلية وسحبتني الها،
فزيت على صوت الموبايل عيوني كوه افتحهم من النعاس، سمعته كام بفزعه وطفر للكنتور لبس دشداشته وطلع كلبي كلبي وياه ياترى شنو صاير..
يتبع..
البارت اكثر من 4044 كلمه.
سوولي واهس شمعاتي بتعليقاتكم بين الفقرات والتصويت لا ازعل عليكم وسويلكم محبه👻.
تصبحون على الف خير وعافية..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!