للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
مهيائيل
الكاتبة (زهراء احمد)
_______
في داخلي مِئة فرحة وألفُ حُزنٍ وما لا يُحصى من الآمال والحسرات وركنٌ صغيرٌ فارغٌ أختبئُ فيهِ منهُم جميعًا.
___
طفر من مكانه للباب واني كمت سريع لبست حجابي، صار بوجهه، ذلك عصبي ودفع مهيائيل بقوة نضرب ظهره بالحايط وصرخ بي بغضب.
ميمون: شلون تتجرأ تسوي هيج وي مرتي؟!
بعدني عايش ومسوين عليها وليه اذا متتت الله اعلم شسووون، هاي عود امنتها يمكم وكلت اخوي ابن امي وابوي شكول على الغريب؟!
بقى ساكت يستمعله بهدوء خلا يكمل وهو يتنفس سريع وجمسه ميكدر يسيطر عليه يرجف وعيونه حسيت براكين تريد تنفجر منهن، من شافني واكفه يم الباب قريب عليه راد يهجم عليه دفعه مهيائيل خلا يوكع بالكاع، دموعي نزلت من الخوف والرهبه.
مهيائيل: الايد اللي تنمد على مرتي اكصها واشمرها للكلاب، ياويلك تفكر مجرد تفكير ترفعها بوجهها، والله لو مو اخوي ابن امي وابوي، اتبره منك والعن الساعه اللي صرت بيها، الاهل اللي تحجي بيهم مربوك عدل وعلموك النساء يتقدسن محد تنضرب بيهن واكو رجال وراهن ينشد بي الظهر، اذا مرتك ساقطه وطالعه من بيت مال ***** تستاهل اللي يصير بيها وزود واني اشجع ايريم ومو بس هيج اوكف كدامها درع حامي وخلي شارب واحد بيكم يحجي والله اخلي القندره تلعب عليه، واحد سرسري مهتلف جايني وريحة الشرب والعربده اشمها على بعد متر هسه صاير براسي رجال ويريد ياخذ حقوق، خايب كمم، عدل نفسك بالأول وربيها يلا تجي علينا، رجليك بالكبر شوكت اتوبببببب راح تموتني ناقص عمر بسبب سوالفك ومصايبك المتخلص.
ميمون: معليك بيه لتنسى نفسك مهيائيل اني كبرتك وسويت براسك خير واللي بي هسه انت بفضلي لو زوجت وصرت تنكر المعروف؟!
نسيت اني اكبر من عندك وتجي بوقاحه تمد إيدك عليه ذيج المره سكتت مجنت بوعيي بس اليوم غير، اني اللي ادوسك بالقندرة واشوف منو يطلعك، صاير براسي متدين وانت افسق ماخلق ربك لو نسيت عمايلك السودة كمت تبيع شرفيات كدامها حتى ماتزعل الخانم وتنام بعيد عن حضنك تعودت على الحنان متكدر تعيفه.
كلامه خلاني فاتحه عيوني على وسعها شلون يحجي هيج بدون خجل!!!
جانت ردة فعله يستاهلها وبقوة على كلامه الجارح والما مدروس، هجم عليه وين اليوجعك مخله مكان بي صاحي ضرب راسه بالحايط خله الدم ينزل من كصته بوكسات على كفوف خلاص كلت مات جوه ايده الساني يردد ياعلي يا أمير المؤمنين احضرنه لأن الوضع الحالي صدك يحتاج تدخل ابو الحسن،
هذا المشهد اللي صار وهن واكفات كُل وحده اباب غرفتها وساكته بس بعيونهم نظره شماته شفت رولين شلون تضحك منصدمت بيها عرفتها وحده بايعه الشرف على رغم زوجها ينضرب كدامها وهي ولا كأن، ماعداها هي واكفه وتحجي عليهم.
ترانيم: كافي يمعودين لخاطر ربكم فضحتونااااا، مهيائيل استهدي بربك وكوممم عنه يحجي بدون وعي، بنات إبليس يعرفن شلون يشتغلن عدل الله لايوفقهن هل حقيرات.
كام عنه بعد ماتعب يتنفس سريع وأيده كلها دم واحد يضرب بالثاني بس جان مهيائيل اقوة من عنده يمكن لأن صدك شارب بس ممكثر بعده بي قوة،
شعره مخربط عيونه حمر ايده ترجف وكف بتعب وكال بتهديد.
مهيائيل: هذا تحذيري الأخير تمشون عدل كان بها لا والله تردون تلعبون بذيلكم اراويكم وجهي الثاني اللي محد يحب يشوفه، اخبلجن وحق الرب الخلق ايريم، اخليكم ماتعرفون الليل من النهار، بنص الفاتحه اطكون اصبع، اتقوا شري لأن اني واحد بايعها، اطلع يوم كامل ملعون دَاسِم، اجي حتى اخذ نفس ونام شويه مشاكلكم كلها تركص يمي، شايفين هذا الباب والله العظيم اطلعكم منه بس بالملابس وتدرون اسويها.
ميمون: بيك خير نفذ اللي تكوله بدون متكعد تهدد، اني الكم لاعبالك نسيت سوالف مرتك على رولين وشلون تعير بيها كُل دقيقه بسالفة جوه الدرج، اطلعها من عيونها وحتى صلاتها متكدر تخلصها مني.
مهيائيل: انت عاجبك تنضرب بعد؟
اكو مكان بجسمك ماتشوه وتريد أكمله الك؟ كول لاتستحي تره بعدني بحيلي ورجع اضربك اقوة، خر* زايد لاتاكل ومشي ولي يم مجلوبتك أو وجهك ياريت ماشوفه.
ميمون: بسيطة هينه.
مهيائيل: فاض انائي بعد مابيه اصبر، يا**** يا سرسري، طايح الحظ انت تعرف هاي ****** شنو جانت تسوي جوه الدرج؟
لو لأن سمعت مرتي حاجيه عليها ***** وكمت دور حقوق، اني اكلك مبين انت نايم ورجليك بالشمس ماتعرف الدنيا طشت لو رشت، مرتك ياعديم الشرف والغيره جانت خاتله وي واحد غريب جوه الدرج وتوزع عليه حنان روح يمها وسألها هذا ياهو اللي مدخلته نص الليل وبيتي وخاتله وياه؟؟
واكيد راح تفر راسك لأنك بهيمه مطي مربوط من إذنك مثل مضحكت عليك وخلتك تزوجها وهي موزعه حنان للامه الإسلامية وغير الإسلامية راح تنجب وتنزل على رجلها تبوسها وتكلها بكُل حب فدوة يرحون لنعالج مهيائيل وامي وابوي الخبصتني بيهم والعشيره والدنيا كلها تعلمني بيك حافظك بصم.
ميمون: اذا كلامك صحح ليش محجيت شي ماخابرتني وكتلي لو انت لزمتها وربيتها وطاردها لبيتهم ليش مخليني انصدم بيكم واني هسه راجع من سفر وطريق طويل؟!
مهيائيل: اني لو ماعرف بيك اثول وأرعن والحجي مايفيد وياك جان خابرتك وكتلك يابه هيج السالفه بس اعرفك اخوي عشرة عمر لو احجي بعد الف سنه ماطول تدخل يمها وتنزل كدامك دمعتين تصير بغل كدامها وكلامي يروح ادراج الرياح، وبعدين يا أهل التحجي عليهم بعد هاي سنين العمر وتعبي حتى احافظ على سمعتنا تجي وحده ساقطه **** مثلها ادمرها، زايد عليها سجينه وبليله ظلمة واذبحها ودفنها بالحديقة غير هيج حجي ماعندي، باجر من تروح وتصير كعده يم العشيره شراح تكول؟
والله مرتي جابت واحد ودخلته للبيت وأهلي نايمين وزعلت وريد ارجعها، مو اني اعرف بيك درب الجلب على الكصاب مصيرك تجيبها لهنا ونصير فضيحه كدام أمة محمد، نلبس شيله ونكعد بعد منكدر نطلع لباب البيت لأن سمعتنا تصير مداس لكُل واحد مطي شرفه مبيوع وهو مايدري يصير بس هو وبس الشرف من كل جانب يوكع منه، مثل الدوش يصب أخلاق،
اذا تريد طلكها اني وياك أو اوكلك احسن محامي بجلستين خلصان بس مال توديها زعلانه لبيت ***** ويمر يومين وتحن ورحت رجعتها ولازم عشيرة وكعده ويحجون بالمشكلة وتتربع وتحجي بأسم مرتي بين الزلم لا اهنا ادفنكم ثنينكم وحتى فاتحه ماسوي اكول هاجروا وتنسد السيرة وأخلي الناس بمكان متترحم عليكم تسب وتشتم.
ميمون: اهم شي مرتك اني بيش كيلوي ما يكول اخوك والدم مايصير ماي على الأساس.
مهيائيل: على اساس هسه انت مهتم كلش للخوه اللي بينه، ولك اللي يسمعك يكول بس اني عندك وبس، لا اصعد ولا انزل ومحد يدري انت بايعني بلاش وتسب بي كدامها وكدام ***** حتى ترضيها، صاير مداس الهن، وإذا على مرتي طبعاً وبدون متكول احسن منك ومنها ومنكم كلكم تاج على روسكم جميعاً، انتوا عندي متسون التراب اللي تمشي عليه، على الأقل كُل شي تسويه اني عندي علم بي متخطي خطوه اذا متحجيلي، ايدها بالحرام مقبلت اطخها، اعيونها ميبقى بيها دمع اذا فاتها فرض، انتم الفسقه وين وهي وين؟!
واللي اسمها احافظ عليه بروحي شلون تريد اسمح ينذكر بنص الزلم!!!
روح بابا روح كمل بطلك ونام لو الاحسن روح انزل جوه لأن انت مطرود الليله ست النعل مراح تقبل عليك لازم تعتذر وتبوس رجليها بالأول وهسه مبين مابيك حيل.
مسمع جوابه دخل للغرفه وبوجه للحمام وهم كل واحد رجع لغرفته اجيت ادخل وراه سحبتني من أيدي.
ايريم: شكو شبيج؟
ترانيم: شفتي اللي صار اليوم؟
ايريم: اي شبيه؟
ترانيم: من راس الحيايه الثنين اول مدخل من الباب سحبته وراها ودخلت بي للغرفه وراها ركضت تالين وكملت اللمه وحقج طيرن عقل الولد من راسه الله لا ينطيهن.
ايريم: اذا كلتي مسحور اتخبل.
ترانيم: يا مسحور هو يكدر يسطر ابهاتهن بس لازمات عليه لزمه وكولي ترانيم كالت متشوفين شلون صاير مطي جوه رجليهن.
ايريم: واذا لازمات عليه هم يكدر يسوي شي ويسكتهن بس كولي هو يحبها معمي على عينه ميكدر يشوف اغلاطها.
ترانيم: شوف هاي الثولة، ولج بابا جان كُل راجدي يضربه الها يسمعه سابع جار مشوفها الويل بين ليل ويوم تغير وصار أنعم من الحرير برأيج السالفة بيها أن وحقج.
ايريم: والله صعب اقتنع هيج واحد يكدر يسوي العمايل بالناس يصعبن عليه ذني.
ترانيم: اي يصعبن سالفتها بيها حصبه وجدري وحقج مو هينات.
ايريم: الله يكفينا الشر ويستر علينا.
ترانيم: آمين الله يسمع منج، روحي يم رجلج خففي عصبيته لتخليه ينام مقهور مو زين عليه.
ايريم: هو رايحه تصبحين على خير.
ترانيم: ماطول أصبح بوجهن ماكو خير.
ضحكت على كلامها ودخلت للغرفة صار بوجهي طالع من الحمام ينشف بشعره، بوجهه للجربايه حتى مامشط، نام على ظهره وأيده على عيونه هاي حركته دائماً بجميع حالاته، بس عنده طبيعه ابد ميحجي شي اذا ضايج، اخذت نفس وتوضيت وصليت ركعتين قبل النوم ودعيت ربي يهدي للطريق الصح ويخلصنا من هاي الحياة المبيها غير الشياطين،
خلصت وكمت غيرت الدشداشه مالتي لثوب قصير نازل شويه من الركبه وربع اردان، لونه بيج، سحبت ايده اللي مخليها على بطنه وخليتها ورايه و راسي على صدره حضنته بدون مانطق شي، رفع ايده اللي نايمه عليها وخلاها على راسي وبقى على نفس نومته،
مكدرت انام بسرعة عقلي يفكر بلي صار اليوم، شلون جنه كاعدين ومستمتعين حتى محسيت بالوقت فجأة صارت مشكله خلت البيت يتكهرب وغيرت المود، صُدك دوام الحال من المحال، متعرف شنو يصير بعدين لازم نستغل كُل فرصه بين أدينا لأن ضياعها مراح نحسب حسابه،
عرفني منايمه ماعرف شلون كام يحرك ايده بشعري وهاي الحركه تخليني اغفى بسرعة، كعدت على سحبة أذني فتحت عيوني بنعاس ورفعت راسي لكيته رافع جسمه شويه واني واصله لنص بطنه صدك اذا انام ما احس اصير مثل الجثه،
بقيت صافنه على وجهه بثول والنوم بعيوني غمضت عيوني حتى ارجع اكمل نومتي فززني من سحب أذني مره ثانيه صحت بي بألم.
ايريم: شبيك اذنيي راحت.
مهيائيل: كومي كافي نوم راح يأذن.
ايريم: صُدك؟
بيش الساعة؟
مهيائيل: كومي توضي وشغلي الكلوب حتى تشوفيها.
ايريم: لعد اذا هيج معناها مصار وقت الأذان من يصير كعدني.
اجيت ارجع أنام كرصني بزندي كمت بوضجه ضربته على أيده، حركلي حاجبه وكال.
مهيائيل: ماكو نوم يلا كومي بدون عجز.
ايريم: بعدني نعسانه خليني انام شويه فدوة بعد وقت.
مهيائيل: ايريم تكومين برضاتج لو غصباً عليج؟
نزلت من الجربايه وحجيت بصوت عالي حتى يسمعني.
ايريم: كمت كمت، هففف ماتخلون واحد ينام، بعد ولا ابقى يمك اروح يم ترانيم متكعدني قبل ساعتين.
مهيائيل: روحي نامي يمها منو لازمج؟
فتحت باب الحمام اجيت ادخل من سمعته هيج كال درت وجهي اله ومثلت الصدمه بحركات وجهي.
ايريم: هيج متريدني وسفه عليك.
رفع طرف شفته بأبتسامه مستفزة وكال برود.
مهيائيل: اللي مايريدني ماريده.
ايريم: عزةةة، ماشي بعد ولا اجي يمك واصلاً من باجر ابطل انام بهاي الغرفة.
مهيائيل: عود خوش انتِ مره سويها وثبتي كلامج.
ردت اضوجه ضوجني اني ثولة عبالي الناس كلها مثل رولين سهل استفزازهم نسيت هو يموتني بالبرود مالته خو ابتسامته تسوي عندي جلطتين وسكته،
توضيت وطلعت رافعه خشمي فرشت السجاده وقبل ما اصلي شفت الساعة لكيتها ب2ص، فتحت عيوني يعني مصار ساعتين من نمت واصلاً بعد ساعه ونص للأذان، وكفت يم راسه متخصره باوعتله بحقد وحجيت بغضب.
ايريم: بعد ساعة ونص ياظالم اذا جان ابو الجامع بسابع نومه هيج وقت ليش مكعدنيي؟!
جان مخلي ايده على عيونه من حجيت نزلها جوه راسه وكال بهدوء فاجأني بكلامه.
مهيائيل: انتِ مو صلين صلاة الليل؟
ايريم: ايي بس هم بعد وقت.
مهيائيل: صلي وقري قرآن والادعيه مالتج وعلي صوتج اريد اسمع.
حجيت بتفاجئ.
ايريم: وشنو المناسبه اليوم ليش تريد تسمعني اذا انت من اصلي متجي يمي اصلاً؟!
مهيائيل: أريد أعرف صوتج حلو لو لا مدحت هوايه بي ترانيم من جنه بذلك البيت وهسه اريد اكتشف صحة كلامها.
ايريم: وطلع صوتي حلو شنو راح تستفاد؟
مهيائيل: ارنوب روح صلي وعلي صوتك اريد اسمع.
ايريم: اول شي اني مو ارنوب ثاني شي ماعلي صوتي، اذا تريد تسمع هذا الموبايل وشغل القرآن وعلي الصوت بكُل البيت حتى تصير بركه.
مهيائيل: تدرين هاي الغرفه الوحيده اللي ميدخللها الجن؟
رفعت حاجبي وكلت بتساؤل.
ايريم: ليش؟
مهيائيل: لأن بيها قرآن وانتِ تبخريها بحرمل على طول وترشين خل وملح، لهذا السبب ميدخل لهنا الجن الشيطاني.
ايريم: ليش أكو رحماني؟
مهيائيل: اكيد طبعاً اكو الزين والموزين، هم قبائل حالهم حال البشر، بيهم الكفره وبيهم المسلمين.
ايريم: وشلون تفرق بينهم؟
مهيائيل: الكفره يحبون النجاسات والقذاره بأنواعها، المسلمين يحبون البخور والقرآن والعطر الطيب لهذا السبب ممكن يدخلون لهاي الغرفه وهسه واحد موجود بيها واكف نهايه الغرفه عينه عليج.
رجفه صارت بكُل جسمي جن هنا وبغرفتي يمةةة مكدرت ارفع راسي وشوف المكان اللي أشر عليه بقت جامده بمكاني فززني من كال.
مهيائيل: تردين تشوفيه؟
حجيت بسرعة بدون مقدمات.
ايريم: ابددد ابددد، خلي يطلع حباب والله اخاف.
مهيائيل: ميطلع يمشي وراج وين مترحين.
ايريم: ليش هيج؟!
مهيائيل: لأن اني موكله بيج فهو يبقى وياج على طول.
ايريم: ماريده حباب لتسوي بيه هالشكل اخاف والله.
مهيائيل: ميسوي شي وداعتج بس يحميج ويسولفلي شنو يصير وياج.
لطمت على صدري وحجيت بصدمه.
ايريم: عزةةة، يعني ماكو سر ينضم عليك ابدد.
مهيائيل: ليش عندج أسرار خايفه لا اعرفهن يمريتي؟
حجيت بضحكه.
ايريم: الله وكيلك أفرغ مني ماكو، قابل حياتي اكشن مثل باقي الناس.
مهيائيل: المهم خليها ابالج الجن يعرف كُل شي وبما انو اني موكله بيج شنو تسوين يجي يكلي.
ايريم: معناها هو اللي كلك على الملح الخشن والخل؟
مهيائيل: لا اني شميت ريحتهن صحيح موكله بيج بس ماخلي يدخل للغرفه خصوصيه ميصير بعدين يحبج وين اولي.
ايريم: لعد هسه شلون دخل؟
مهيائيل: لأن راح تصلين هو يحب وقت العباده و يحب اللي يصلي، يبقى يزعجني اذا شافني نايم لو مغلس على الصلاة.
ايريم: وانت شلون عرفته؟
مهيائيل: صديق من سنين، هو أول خدامي.
ايريم: عندك شياطين هم؟
مهيائيل: قصدج كفره؟
ايريم: اي.
مهيائيل: اي عندي بس بوقت الشغل استدعيهم كتلج سابقاً اني ساحر علوي وسُفلي.
ايريم: يعني شنو؟
مهيائيل: بعدين اشرحلج روحي صلي هسه، كعدتها تذكر ربها بقت تسولف وهاي قبل شويه عوزها بس تلطم لأن كعدت من النوم شوف القابليه!!!
مشيت للسجاده واني أحاول اطرد كلامه من عقلي التفتت اله وكلت بضوجه.
ايريم: مو صوجك صوج اللي يسولف وياك، ما احجي وياك بعد.
وكفت كدام القبله وهو عدل جسمه على تاج الجرباية مخلي ايده وره راسه ويباوعلي بتركيز حلو امه نظراته خجلتني، كال بصوت عميق وشويه عالي.
مهيائيل: مِدلي صوتَك فوگ هوسة ناسي خَل أعبرَ.
ابتسمت وبديت اصلي بركعة الوتر قنوت على كد ماقاريته واحبه حافظته ادعي بي اذا جانت عندي حاجه مستعصيه وعلى رغم صار سنين إني ملتزمه بالصلاه وصارت عندي شبه عاده بس كلما اقراه نفس الخشوع والدمعه،
"أناجيك يا موجودا في كل مكان لعلك تسمع ندائي فقد عظم جرمي وقل حيائي مولاي يا مولاي ، أي الأهوال أتذكر وأيها أنسى ولو لم يكن إلا الموت لكفى ، كيف وما بعد الموت أعظم وأدهى مولاي يا مولاي ، حتى متى و إلى متى أقول لك العتبى مرة بعد أخرى ثم لا تجد عندي صدقا ولا وفاء فيا غوثاه ثم و اغوثاه بك يا الله ، من هوى قد غلبني ومن عدو قد استكلب علي ومن دنيا قد تزينت لي ، ومن نفس أمارة بالسوء إلا ما رحم ربي ، مولاي يا مولاي ، إن كنت رحمت مثلي فارحمني وإن كنت قبلت مثلي فاقبلني ، يا قابِل السحرة اقبلني يا من لم أزل أتعرف منه الحسنى يا من يغذيني بالنعم صباحا ومساء ، ارحمني يوم اتيك فردا شاخصا إليك بصري مقلدا عملي قد تبرأ جميع الخلق مني نعم، وأبي وأمي ومن كان له كدي وسعيِي فإن لم ترحمني فمن يرحمني ، ومن يؤنِسُ في القبر وحشتي ، ومن ينطق لساني إذا خلوت بعملي وساءلتني عما أعلم به مني ، فإن قلت نعم ، فأين المهرب من عدلك ، وإن قلت لم أفعل قلت ألم أكن الشاهد عليك ، فعفوك عفوك يا مولاي قبل سرابيل القطران ، عفوك عفوك يا مولاي قبل جهنم والنيران عفوك عفوك يا مولاي قبل أن تغل الأيدي إلى الأعناق ، يا أرحم الراحمين وخير الغافرين"
قريته وعقلي نرسمت بي حياتي كلها من البدايه لحد هاي اللحظه، المعصيه والذنب كلهن مرن، صُدك بدون رحمة رب العالمين الأنسان وين يروح، كملت الصلاة وقريت قرآن وعليت صوتي وتعمدت أقره السور اللي مذكور بيها السحر حتى اوعيه لشغله واللي يسوي بنفسه أو وين راح يوصلها،
بقيت اقره واسبح حتى إذن الصبح كمت اصلي لكيته بعده يباوعلي ابتسمت بوجهه بادلني، حاولت احجي وياه بهدوء بلكي يسمع من عندي هاي المره.
ايريم: كوم صلي ويايه على الواهس؟
مهيائيل: مو هسه.
ايريم: ليش؟
مهيائيل: ربج مراح يتقبلني.
ايريم: سمعت الدعاء اللي قريته؟
مهيائيل: تهمسين وي نفسج وين اسمع!!!
ايريم: بي مقطع يكول(يا قابل السحره اقبلني) ربي هو نفسه ربك ويتقبل الجميع بدون استثناء، أسعى لرضا الله وصدكني رب العالمين يسحبك إله، حاول مهيائيل ينقذك من المعاصي والذنوب ويرجعك طاهر مثل طفل وليد اللحظه.
مهيائيل: ان شاءالله ادعيلي بالهدايه.
ايريم: ياريت كلامي وياك ميكون ضايع ويجي يوم يأثر بيك وتتغير.
مهيائيل: هاي واثق منها.
صليت ولميت سجادتي ورجعت للجربايه تذكرته من كال اللي مايريدني ماريده نمت على الجهة الثانيه ونطيته ظهري جان هدفي اعرف شنو يسوي، ضجت من مر وقت وهو محجه شي، غمضت عيوني بأنزعاج وأخذت عهد ما اتقرب من عنده بعد على هاي سوايته، حسيت نفسي راح اغفى اول مستسلمت للنوم سحبني كايل بهدوء.
مهيائيل: لميني ايريم اني تايه ولكيت نفسي بين اديج.
نبرته عميقه حيلل حسيت الكلام طالع من كلبه متحملت التفتت اله وخليت عيني بعيني وكلت.
ايريم: أيدي مستحيل تترك إيدك بيوم من الأيام، حضنك بيتي المجاني واني بخيله ماحب أدفع إيجار.
جانت جملة غزليه بس بيها حس فكاهي خلى يضحك واني بأبتسامته اصير أسيره، كُل شي بيه يدك سريع احس اعضائي داخله بسباق ركض.
مهيائيل: هههههههه خربببب، كُل شي بيج سلب القدره على التحكم بكلبي وبالأخص من تحجين بطريقه عفويه.
ايريم: اني وسوالفي اصلاً ثنينه نخبل.
مهيائيل: ماعندي شك.
فتحت أيدي وكلت بأبتسامه شاكه حلكي على شنو ماعرف، وياه اتصرف بعفويه تامه بدون ما افكر شنو راح ياخذ عليه من نظره بعدين، الأمان اللي تحسه وي اي شخص موجود بحياتك يسوا ابو الحب.
ايريم: تعال لحضيني نام، أريد العب بشعرك.
مهيائيل: حسستيني طفل ولج تعال لحضيني شنو!!!
ايريم: مو تكول انتِ دعاء امي المستجاب؟
مهيائيل: اييي.
ايريم: لذلك اعتبر حضني مثلها.
صفن بوجهي شويه نظرته خلتني اعيد اللي حجيته مره ثانيه بعقلي اشوف اذا بي شي خطأ لو لاا، من شفت منطه اي رد فعل سديت أيدي وحجيت بأنزعاج.
ايريم: مو صوجك صوجي اني فاتحه أيدي ألك مو مال نعمه انت.
أجيت ارجع لنومتي الأولى سحبني من أيدي وخلاني بحضنه وكال بضحكه.
مهيائيل: دمج حار ولا عندج صبر شبيج؟!
كرصته بأيده خليته يصرخ.
مهيائيل: خرب يومج شكووو؟!
ايريم: هو خربان ماطول يخلص يمهن.
مهيائيل: هههههه حقج، خلي يولن يرحلج فدوة، فتحي حضينج اريد انام نعسان.
رفعت راسي من صدره وباوعتله على شفايفي ابتسامه ماكره.
ايريم: عزيزي المشترك الخدمه المجانية انتهت للحصول عليها مره ثانيه يرجى اعادة التعبئه.
خله ايده على عيونه وقهقهه بصوت عالي ضحكني وياه.
مهيائيل: هههههههههههههه، راح اجدد الاشتراك بس لازم تنطيني الرمز الخاص بالشبكة علمود اعبي الرصيد.
ايريم: خليني افكر شنو الرمز، ضربت على ايده وحجيت بأبتسامه، لكيتهااا.
مهيائيل: انتِ مبدليج اليوم شكو شبيج ساعة تكرصين ساعة تضربين خاف نلبستي؟!
ايريم: مابيه شي اصحى منك، اسمع اريد شعر سمعني.
مهيائيل: ايعع شهل السوالف مال المراهقين كولي غير شي.
ايريم: ماريد والله اريد شعر.
مهيائيل: ورطوني اهلج بزعطوطه واني مادري؟!
ايريم: وخر عني مو صوجك.
مهيائيل: والله ما احفظ شبيج، عقلي ميحب الشعر، اسمع اغاني ايي ومرات قصائد بس اني والشعر منلتقي.
ايريم: حتى لو بيت واحد شبيك بخيلل!!!
مهيائيل: عزيزتي ما حافظ شعر عندي نكته تردين سمعين؟
ايريم: سمعني أمري لله.
مهيائيل: يكول لتفضفض يم شيخ لأن من يصعد المنبر يخلي عينه عليك ويكول حدثني احد الأخوة.
ايريم: هههه مضحك.
سحبني وخلاني بحضنه كايل.
مهيائيل: لا اشتراك ولا نت غصب عنج مكانج حضني.
نمت لأن نعست حيل وهو نام ويايه خلص اسبوع بشكل طبيعي، خلصتها كله بغرفتي ما التقي بأحد بس وقت الأكل، بالغده دائماً محد موجود بالبيت والعشا مهيائيل كاعد ركبه ونص الهم منو يكدر يفتح حلكه، وبالنسبة للامتحانات خلصن ثلاث وإقدام بعد مشفته مرتاحه حيل من عنده مناقصني مشاكل اكثر بعد،
طلعت من الغرفه اريد اروح يم ترانيم اكعد يمها شويه عبرت من غرفتها ستوقفني صوتها وهي تكول بهدوء وكأن كاعد تحجي وي واحد.
تالين: اني شكتلك ليش دومك اغبر ماتسمع الكلمه؟
اي اي ماشي سوي اللي اكوله ألك واني باجر اجيك الصبح،
خوش خوش يلا روح ولتتصل اني اذا اريد شي ارمش عليك عود.
رحت سريع وفتحت الباب ودخلت خفت لتطلع وتشوفني واكفه اتسمع عليها، اخذت نفس وايدي على كلبي، ترانيم من شافتني هيج كامت من مكانها مرعوبه وحجت بخوف.
ترانيم: شبيج ليش هيج وجهج مخطوف عبالك واحد يركض وراج صاير شي؟
اشرتلها براسي بمعنى اي اجيت احجي سدت حلكي بأيدها فتحت الباب وطلعتني لازمتني من أيدي فضولها شتغل بعد خلت طريقنا خطوتين ملحكت تسد الباب ونهدت بيه.
ترانيم: غردي اسمعج.
ايريم: تالين جانت تخابر واحد وتفقت تشوفه باجر ومبين عدها تواصل وياه لأن كلتله لتتصل بيه اني اتصل بيك.
ترانيم: صخام الصخمها هل ***** رجلها بالسجن وهي دور سوالف تعبانه سود الله وجهه طايحة الحظ فضحتنا.
ايريم: يجوز كرايبها؟
ترانيم: ويجوز رادت تسمعج حتى تخليج تتورطين زوجج يجي العصر وكليله هو الوحيد اليعرف دواها.
ايريم: شلون تسمعني هي اصلاً كاعده بغرفتها مطلعت؟!
ترانيم: مو هاي الغبره رادت تطلع واني كلتلها تصيحج تلكيها حجتلها.
ايريم: حاسه نفسي عايشه بعصابة شهل عائلة هاي!!!
ترانيم: بعد وبعد مشايفه شي انتِ إبليس بكبره ميلحكهن.
ايريم: عيفج منهن جوعانه.
ترانيم: اني هم كومي نسوي عصرونيه.
ايريم: قبل منكوم شنو ردتي مني؟
ترانيم: أجيت اسألج شوكت تخلص امتحاناتج؟
ايريم: سبوع ونص ليش؟
ترانيم: فاهي البيت مخلصتها بس قرايه وذني ماحب اكابلهن ابدد.
ايريم: مبقى شي ان شاء الله.
ترانيم: ان شاءالله ربي يسهلج.
ايريم: آمين يسمع منج.
نزلنه اني وياها سوينه كعك وجاي وبقينا نسولف حتى خلص هذا الوقت بدون منحس بيه.
___
بتال: يا أخي شتريد يوميه متصل تره ضوجتني؟
رائف: اعتذرت الف مره شبيك ميبس راسك؟
بتال: دطير وإذا عتذرت اجيت بالعرس تركص وتهوس وتشوف صديقك شويه وينفجر من القهر تالي تطلع اخو نسيبه ومتكول، وسفه عليك والله هاي عود أمن بيك ودخلك بيته.
رائف: ليش محسسني مسوي جريمة اخوي ومن حقي افرح بعرسه وين المشكله؟!
بتال: المشكله من جنت اتوسل بيك كوم نسأل عليه وتكلي ما اورط نفسي جايز منها اذا هفني بسحر وين انطي وجهي، المشكله جنت تاكل وتشرب وتضحك ويانه ولا كأن تشوف صديقك راح يطك ويموت من قهره على أخته المزوجيها غصب، أسألك بالله عليك لو اختك اسم الله تعرضت لنفس الموقف شنو تسوي؟
رائف: اختي تختلف لتقيس الكل مثلها، بعدين شبيها اختها مدللها مهيائيل ابن امه وابوه اللي يكول على عينها حاجب ملكه تمشي بالبيت.
بتال: بما أنو هيج الحجي واختك تختلف عن اخته ونسيت انو احنه أصدقاء المفروض عرضنا واحد ونحزن ونضحك سوا، لا اعرفك ولا تعرفني ولتعتذر مره ثانيه اذا مو أبيل يسامحك تحلم الساني يطخ السانك ويحجي وياه وإذا لاكيتك صدفه حتى سلام ما اسلم عليك خليها ابالك.
سد الخط رفعت راسي لكيته مخلي الجكاره بحلكه ويدخن ونظرته ماتتزحزح عني، من شافني ساكت محجيت شي اجه يمي وكعد على الكرسي اللي يم الجربايه، وكال بهدوء.
مهيائيل: هاي ضريبة الجذب عواقبها وخيمه حيل.
رائف: بالبدايه مجان اكو داعي احجي وياهم عن عائلتي ومن خطبت اخته نصدمت بنفس الوقت ماكدرت انطي بيك ولا اخسرهم، بس محد فهم وجهة نظري للموضوع ولاموني.
مهيائيل: كُل واحد يريد يفهم الناس بالطريقه اللي تعجبه خاصه الشخص اللي يمر بفترة حزن يحب يقنع نفسه الجميع خونه وغدارين وهذا مو سببك ولا سببهم هي مجرد مشاعر تبرد وتختفي مع مرور الوقت.
رائف: بس مراح ترجع الصداقه نفسها.
مهيائيل: شايف الجاي عباره عن بثل ومي من تجمعهم سوا يصير خليط متجانس طعمه طيب ولونه حلو، من تخلي يفور زيادة يحترك ومتكدر تشربه، اما اذا طفيت النار يصير بارد بدون طعم نهائياً، العلاقات نفس الشي، عاملها مثل الجاي، اهتمام بسيط واحترام وتقدير والكثير من الكرامه هنا الكُل راح تحبك وتدعيلك بالخير، الصداقه اللي بيها الصديق مايبرر لصديقه عن أخطائه هاي صداقه فاشله، اللي يريدك يعاتب ويصيح ويضربك لأن يريدك بس لو مجان يريدك راح يسوي اي شي حتى تبتعد عن طريقه.
رائف: ماريد احد يلومني ويخليني موضع اتهام.
مهيائيل: اللي يحبك يبررلك لتخاف.
رائف: صاير ناصوح حبيتك بهاي الشخصية.
مهيائيل: واني ماحبيتك.
رائف: هاي شبيك هسه جنت حباب شكلبك؟!
مهيائيل: تصرفاتك الغير مدروسه.
رائف: ياتصرفات؟!
مهيائيل: شعندك وي استاج؟
بتسمت.
رائف: كالتلك مو؟
مهيائيل: متكدر تجذب على ساحر انت تعرف بيه ما احتاج احد ينطيني المعلومات.
رائف: ماعندي شي وياها.
مهيائيل: هذا اللي أريده فعلاً مو بس كلام تقنعني بيه، ياويلك اسمع متقرب منها لأن اشيل أيدي منك وانت تعرف محد يدعمك غيري.
رائف: تعيرني؟
مهيائيل: هذا الواقع لتنكره.
رائف: ليش محجيت هيج لنفسك من زوجتها؟!
مهيائيل: لأن هي ايريم واني مهيائيل مكتوبين لبعض واحد يكمل الثاني اما اللي تركض وراها بنيه مراهقه قراراتها تجي من عاطفه وانت دفعتك الغريزة مو الحُب، فأخذ حذرك لأن مره ثانيه اعاقب بدون ما احجي كلمة.
طلع من الغرفه بدون ميسمع جوابي بقت عيني على الباب صافن بكلامه ليش الكُل شاك عندي علاقه بأستاج!!!
فزيت على رنة الموبايل بتسمت وفتحت الخط.
___
محاضراتي مطشره أقره بيهن باجر عندي امتحان وخلص الوقت واني ماقاريه شي اخذت نفس وحجيت بضوجه،
ايريم: شوكت تخلص هاي الأيام ورتاح والله تعبت.
خليت أيدي على كلبي ورفعت راسي بفزة.
مهيائيل: تخلص وتصير سوالف.
نزع ساعته والمحبس ودخل للحمام تعودت على روتينه من طلع نفس الأسئلة شلون يومج وشنو صار وياج؟ تذكرت تالين فكرت اكله حتى يصير عنده علم لأن بالحقيقة والواقع هن مينسكت عليهن يخوفن وقبل ما احجي دك موبايله صفن بالرقم شويه وصغر عيونه وقبل مايفتح الخط طلع بره الغرفة كلبي لعب منو هذا وشنو يريد..
يتبع..
مسائكم عافيه شمعات روحي.
البارت اكثر من 4090 كلمة
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!