للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة (زهراء احمد)
_________
ايريم
أحبك من تجي معلعل
شحلاتك من تگلي
ولايتي بحُضنك
وأسويلك وطن
من ديرة ضلوعي
وأگلك نام يمَدلل
___
مهيائيل: اكو سر ملاحقك من سنين مامخليك تعيش مرتاح واذا نعرف راح تصير مشكله وتدمر كلوب ويتأذه الشخص نفسه، اشوف بيها مرض، ابتعاد، فراق، حزن، وخداع، وخيانه، قصتك بيها بدايه مالها نهاية راح يعذبك حب وحده قريبه غريبه، تتلوع بيه حيل وماتكدر تخلص منه والرفض قائم من جميع الأطراف بالأساس هي.
أبيل: وليش اعيش هيج قصة؟!
مهيائيل: مستقبلك هيج يكول عاتبني اذا ماصار.
أبيل: العلم عند الله.
مهيائيل: علمنا الأنسان مالم يعلم متكدر تنكر.
أبيل: ايريم.
مهيائيل: بعيوني هاي.
أبيل: مراح تنظر بعدين؟
مهيائيل: حتى لو نظرت اني موجود وحميها لتخاف بدون سبب.
أبيل: هي اختي لتنسى.
مهيائيل: مرتي هي هم لتنسى.
أبيل: تزوجتك بالغصب لتنغر هوايه بهاي الصفه.
مهيائيل: القصه اخذت اتجاه ثاني.
أبيل: اذا جرحتها بيوم؟
مهيائيل: أبيل خلي بعقلك دائماً احنه البشر مامضمونين، نتعارك تصير بينه مشاكل وزعل ويمكن مرات اصير عصبي واصرخ بوجهه بسبب ظروفي أو العكس بس هاي الأمور ماتغير معزتها بكلبي تبقى هي سيدة البيت ومرتي ومحد يكدر يطخها بكلمه واني اشم الهوه وحتى لو متت حقوقها محفوظه فاطمأن اني ماضحي بشخص عزيز عليه،
شايف ذولي ال***** الكاعدين يم ابوك هسه؟
أبيل: شبيهم؟
مهيائيل: كلهم اكرهم طلع بس ثنين مع هذا معيشهم ابيتي واذا احد سمعهم كلمه أقيم عليه حرب، مابالك بزوجتي؟
أبيل: من باب معزتي بيه وخوفي عليها.
مهيائيل: ولهذا السبب شاركتك شي من داخل بيتي محد بيكم يعرف بيه.
أبيل: محتار ليش ختاريتها هي بدون باقي البنات؟!
مهيائيل: لأن سحرت كلبي وسحر الساحر مو سهل ابد.
أبيل: عزيمتك اليوم مو خاليه شنو وراها؟
مهيائيل: اخلصك من السحر.
أبيل: كالوا صعب اخلص من عنده لتحاول.
مهيائيل: منو كال؟
أبيل: من تزوجت ايريم تخربط وضعي حيل شكيت بنفسي مريض فرحت اني وبتال للمستشفى سويت كل الفحوصات طلعت سليم ميه ميه، الغريب كل فتره تصير عندي نفس الحاله بشكل مفاجئ وبكل مره الأعراض تزيد ماتنقص، تلعب نفسي او ادوخ وراسي احسه يريد ينفجر اكره اسمع القرآن وابتعد عن الدين اقترح عليه بتال اشوف روحاني بس اني مجنت اؤمن ومن سائت حالتي حيل قررت اسافر واعالج بره أو اكول بحجه دراسه راح اطلع حتى محد يلح عليه ويسألني لأن ماريد احد يعرف، وصلني بتال لمطار البصره ودعني وراح بالبوابة قبل مادخل لساحه الطيران دخت وفقدت وعيي صحيت بعد يومين بالمستشفى جانت يمي مره جبيرة بالعمر ساعدتني وطلعتني مثل الشخص الفاقد لا أيد ولا رجل اعتنت بيه بشكل مو طبيعي مشكلتها عدها بنات هوايه واسمع موسيقى عاليه وأصوات زلم بالبيت مشكيت كلت ممكن كرايبها لأن هي مخليتني بالغرفه وقافله عليه الباب وممنوع واحد يدخل يمي غيرها، بقيت هناك طول هاي الفتره وللامانه مگدرت احجي شي لأن وضعي مو زين وخفت امي يصير بيها شي اذا عرفت ابتعدت عن الكل وشفت هذا المناسب حتى ماضر أحد وقلقه عليه،
بيوم اجتني من الصبح وياها مره اخذت أيدي وكشفتلي بيها كالت مسوالك عمل من أيد حيه مسمومه كرايبك تريد بيه اذيتك وموتك وكسر كلب امك وهذا صعب ينفتح الا بشغل واحد يكدر للأمور النجسه،
بقيت يمها توكلني وتشربني ومعتبرتني ابنها بوقتها مجان عندي احد احجيله فتحت كلبي وسولفتلها حياتي بالكامل ماعدا بعض الأمور اللي ملازم تنحجي، وبقيت هيج حتى يوم الأعتقال دخلوا للبيت واخذوني وكدروا يوصلون لاهلي من موبايلي، خاب ظني من شفت امي شلون عصبيه وتحجي بحركه كلب وهي شاكه ببنها يروح لبيوت *** متعرف تربيتها وماعدها ثقه بيه.
مهيائيل: حقها.
أبيل: ولهذا السبب سكتت.
مهيائيل: منو ساعدك؟
أبيل: المره نفسها هي شهدتلي وجابت واحد وياها شهدلي هم هي صح **** بس شريفه رهمها شلون مجان.
مهيائيل: اسمعني عدل، سحرك أكدر اخلصك من عنده بس اكو مقابل.
أبيل: ولي هو؟
مهيائيل: ايريم متعرف بشي من عندك نهائياً.
أبيل: ليش؟!
مهيائيل: ماريدها تشوفني بطل مغوار.
أبيل: بالعكس اذا تريد تحبها هذا التصرف يساعدك وهوايه هم.
مهيائيل: اريد كلبها يدكلي من وحده ما أمشي وي مرتي بهيج طريق.
أبيل: نظرتي ماريدها تتغير عليك.
مهيائيل: اني سحار وكل شي اسويه بأجره لتفكر اقدملك مساعده حتى احصل ثواب لان بشغلنه نار جهنم فاتحه ابوابها.
أبيل: صدك ليش الغرفه ريحتها قذره؟
مهيائيل: لأن ابليس موجود بيها وهيج انواع تحب القذارة.
أبيل: وليش مجمعهم؟
مهيائيل: حتى أكدر احجي وياك بهاي الطريقه العقلانيه، ليكون مفكر كل الكلام الطلع جان برضاك؟!
أبيل: بدون مقابل؟!
مهيائيل: مقابلي ضحكتها، ترتاح من تشوفك مرتاح هذا يكفي بعدين أني هذا شغلي الأمر طبيعي يمي،
تمدد واخذ راحتك وغمض خليني اطلع السحر منك بسهوله وبدون متحس.
دخلت لاذني كل كلمه حجاها اله ومالفتني غير السر ياترى شنو هذا الشي الخطير اللي راح يدمر العائلة بالكامل اذا نعرف؟!
رجعت نظري اله شفته شلون يلوع ويتحرك للحظه فتحت الباب أجيت ادخل وروح الزمه وساعده بس صرخ بيه وماعرف شلون شافني.
مهيائيل: سدي الباب وروحيييي.
سويت مثل ميكول ماعرف ليش من يصير الأمر يخص سحورته اخاف بس عود تبت ومشيت لا رجعت بخطوات هادئه وباوعت من ثقب المفتاح، مخلي يمه طشت وجسم ابيل كام يرجف ويون كام يمه ولزمه وبعده يحرك شفايفه بكلام مامفهوم هدأ جسمه للحظه شربه مي من بطل ماعرف شنو نكلبت ملامحه لواحد ثاني واحد شيطان مو أخوي نزلت دموعي واني اشوفه كام يتقيئ شي اسود مكدرت اميزه حيل، بقى فتره طويله بهاي الحاله ومهيائيل مثبته بجسمه أخير شي وكع بحضنه مايحرك لا أيد ولا رجل عرفته تخلص من السحر اخذتني رجليه للمطبخ واني بعدني برجفتي غسلت وجهي شلون مجان وأخذت مي وصعدت لفوك كوه امشي بس مردت يشوفني ويكول تتجسس عليه وياريت ماشفته صدك لأن هذا المشهد مستحيل أكدر اطلعه من عقلي بعد،
شافتني امي بهاي الحاله اجت يمي وعليها علامات القلق واضحه.
تسنيم: ليش وجهج أصفر وايدج ترجف صاير شي يوم؟
حركتلها براسي بمعنى لا بلحظتها فقدت التوازن وصابتني دوخه قويه مكدرت احرك نفسي، وكعت واسمع صرخات امي ولطمها وحجي ترانيم ورعب استاج اريد افتح عيوني واكلهم مابيه شي لتخافون بس ماكدر، جان آخر صوت يسمعه عقلي صوته وهو يصرخ بماعرف منو.
مهيائيل: شبيهااااااا؟!
تسنيم: عزه بعيني راحت بنيتي ترانيم فدوة لكلبج صيحي اخوج واحد من الولد يجي ياخذها للمستشفى لايصير بيها شي وين انطي وجهي.
ترانيم: هدي نفسج ياعيني مابيها شي لتخافين عليها هسه انزل اصيح مهيائيل وارجع،
نزلت اركض اني اهدي بامها وكلبي يريد يطلع من مكانه تالي هاي المصايب تموتها اني ادري، دكيت الباب مالت الاستقبال فتحه بوجهي بسرعه حجيت بدون مقدمات: مهيائيل وين؟
رائف: بغرفة السحوره يمكن كال اجاه شغل.
رحت ركض وبدون مادك الباب فتت بقيت مصدومه من شفته نايم وميحرك شي من جسمه بلعت ريكي بصعوبه من هذا المنظر وكلت مأشرة ليفوك بأيدي.
ترانيم: مهيائيل، ايريم وكعت ماعرف ليش.
بدون جواب سوه حركة البيب بيب ماشوف وراه بس التراب وصعد فوك، اجيت اروح اني هم بس من شفته شلون مدد كسر خاطري رحت يمه ولكيت مخلي سطله بصف راسه تقربت منها شفتها كلها دم أو اكو اشياء تتحرك يمكن دود ماعرف شنو لعبت نفسي ودرت وجهي بسرعه عرفته مسويله فتحت عمل، سبحان الله شلون ناس نفسيتها تعبانه تسوي سحر وتخسر فلوس وتاخذ حرام بس علمود تدمر حياة انسان بريئ وحتى لو مو بريئ اخلي رب العالمين ياخذ حقي من عنده ليش امشي بطريق السحوره،
انسانيتي دفعتني اله ساكن أو وجهه رجعت بيه الحياة، تذكرت آخر مره شفته بيها شلون جان تعبان ومبين وجهه اصفر ومهموم خرب عرض الشيطان شلون يلعب لعب بالخلقه،
صفنت بيه وبملامحه شويه ومن حسيته راح يكعد طفرت وسديت الباب وراي.
دخل للغرفه وصاح بصوت عالي.
مهيائيل: شبيهاااااا؟
تسنيم: والله مادري راحت تجيبلي كلاص مي طولت يلا اجتي أو اول مدخلت وكعت من طولها مافهمت شنو بيها، شوفها كلبي راح يوكف من الخوف.
تقرب من عدها وخله راسها بحضنه بقى يضرب على خدودها بهدوء ويحجي وياها بصوت ناصي.
مهيائيل: ايرو حياتي تسمعيني؟
فتحي عيونج يلا خلي كلبي يطمأن، ايروو حبيبي فتحي عيونج يبعد عيوني،
مكاعد تسمع استاج نزلي دكي الباب مالت الإستقبال واي وأحد يطلعلج كليله مهيائيل يكول يحضر السيارة بالعجل،
كام طلع حجابها وعبايتها والجواريب لبسها وماقبل وحده من عدنا تساعدها من شفته هيج نزلت وكلبي يدك سريع ماحب احجي وي الشباب وعندي خوفه ورهبه منهم، دكيت الباب وايدي ترجف شويه ونفتح صار بوجهي واحد طويل جسمه مرتب اسمراني وملامحه هادئة، عنده لحية خفيفه وعيونه سود، بقيت صافنه وماعرف شنو أكول حتى فززني وهو يحجي.
ميمون: انتِ منو؟
جاوبته بهدوء واني ابعد عيوني من عنده، فصلني ميباوع عدل.
استاج: اخت ايريم.
ميمون: اي وشنو تردين؟
بهاي جملته تذكرت ايريم بسرعة حجيت: مهيائيل يكول خلي يحضر السيارة.
ميمون: ليش شكو؟
مجاوبته وبسرعة صعدت، صار بطريقي شايلها وامي نزلت وراه اني هم رحت وياهم كعدت امي بالوره وخلاها بحضنها وهي فاقده بدون حركه، حضنتها امي لصدرها وتبجي وتنعي هي بس تريد فرصه حتى تلطم هاي عادتها،
رفعت راسي اله مثبت المرايه الاماميه علينا وعيونه عليها ويسوق سريع حتى وصلنه للمستشفى نزل بسرعه وفتح الباب من يم امي واخذها بحضنه ونزل بيها يركض للداخل،
هي بالغرفه وهو يفتر وامي كاعده على الكرسي تتنحب واني عيني عليهم، حسيته يريد ينهار بس مثبت نفسه علمودنه، القلق مبين برجفة ايده وعيونه المسلطها على الغرفه، وبرجليه المثبتن بمكانهن ما أخذ نفس غير من طلعت الدكتوره كامت امي وهو راحوا يمها يعرفون شنو بيها.
:زوجتك حالتها النفسيه كلش مو زينه ياريت تبعدها عن الخوف والقلق حتى تحافظ على سلامتها.
مهيائيل: شنو طلع بيها؟
:ضغطها صاعد ودكات كلبها مامنتظمه راح نسويلها تخطيط قلب حتى نطمأن على سلامتها ونتأكد مابيها شي.
مهيائيل: اكو شي يخوف اكثر؟
:الصدمات المتتالية تضر عقلها بطريقه مانكدر نتوقعها ممكن تصير عدها اعاقه دائمة أو ممكن تسوي عدها جلطه لو سكته قلبيه الله لايقدر، المحافظه عليها وخاصتاً هاي الفتره شي مهم حيل حتى تتجاوز مرحلة الخطر عن حياتها، يارب ماعافاة.
بقينا مصدومين خاصه امي اللي انتفضت بوجهه بعنف ونست نفسها وحنه وين هسه.
تسنيم: اللي يصير وي بنتي اليوم كله بسببك وبسبب عائلتك الشياطين، كلبي جان عالمني راح يصير هيج وياها بس ماطاوعته وكلت ازفها لبيت رجال احسن مادفنها بالمكبره وتاليها هي والموت سوه بنتي معلعله يمك خلص هذا حدها مراح ترجع وياك مكانها يم امها أو ابوها.
هو سمع هيج لو تسودن تقرب منها وحجه بغضب.
مهيائيل: هي مو بيكفج ساعه ازوجها الك وساعه بطلت ماريد رجعها، الشغله مو لعبه وعلى مزاجج امشي، ايريم ماتطلع من بيتها وبيت زوجها او اريد واحد يكدر يكول عكس هيج.
تسنيم: هسه اخابر ابوها وهو يجي يحلها ويشوف حالة بنته شلون صارت من عفناها.
مهيائيل: على اساس من جانت وياكم عايشه بسعادة، ام ايريم اذا تردين الماضي يبقى مسكوت عليه وبكلبي لوقت أطول، سالفة تروح وياكم تنسيها لأن وقتها اخليها تعرف كل شي واخذها هم وخسرج المشيتين.
تسنيم: تهدد؟
مهيائيل: هذا اللي يصير اذا ماسويتي الأكول عليه.
تسنيم: يجي يوم وهي تكلك ماريدك بعظمة السانها أو وحق ربك وسماه أخذها وغصب عن خشمك.
مهيائيل: عود لوقتها الله كريم.
شويه وصحت ودخلنه يمها راحت امي وحضنتها وتبجي.
تسنيم: من عمري على عمرج حبيبتي، شلون صرتي يا أمي بشنو تحسين؟
صافنه بالمكان صايره هوايه ادخل مستشفى واني الماجنت اندل طريقها منين، مابيه حيل وجسمي تعبان احس مخلين ثكل على صدري مانع عني النفس بس من شفتها هيج منفعله وخايفه كلت علمود اطمأنها: مابيه شي لتبجين.
تسنيم: شلون يعني مابيج شي متحسين بألم؟
ايريم: ليش احس بألم؟!
مهيائيل: ماكو شي بس امج خايفه شويه لا اكثر، ام ايريم كومي غسلي وجهج وارتاحي حتى نرجع للبيت وانتِ استاج روحي ساعديها.
المصيبه اللي تموتني امي ليش مطيعه اله بهذا الشكل وكأن لازم عليها لزمه؟!
تقرب من عندي وخله ايده على خدي يمرره بهدوء حجيت بألم مستغله امي ماكو حتى متخاف عليه.
ايريم: مهيائيل صدري موتني ماكدر اتنفس.
كام من مكانه بسرعه وبدون ميحجي شي صاح الدكتوره دخلت سريع هي والممرضه واخذوني للأيكو، صفنت بحياتي تاليها اصير مريضة قلب معلعله شنو فتهمت من دنيتي حتى تكون النهايه هيج؟ الحمدلله على كل حال جاوب عقلي كلبي المنتفض،
الدكتوره تفحص وهو عينه ساعه على الجهاز ساعه عليه، اليوم لو انسأل متندمه على حياتج وياه؟ راح اكول لا ومن كلبي بس كارهه شغله وبيته لا أكثر لكن كمهيائيل فهو انسان مستحيل أكدر الكي مثله ابداً، حنون مراعي ومدافع عني ضد اهله، بيه صفات ايجابيه هوايه وصفه سلبيه وحده ادعي من ربي يخلصه منها،
القلق باين على ملاحمه، أديه شابكها وره ظهره وعيونه تريد تطلع من مكانها وتجي يمي تحضني يمكن لو تطبطب عليه وتكلي ماكو شي لتخافين، اشرتله براسي هو فهم عليه وتقرب من عندي ايده حضنت أيدي وبقى يمشي اصابيعه على اصابيعي ومبتسم بوجهي واني اعرف ابتسامته مو حقيقيه وداخله خوف جبير على صحتي، تصرفات الأنسان هي اللي تثبت صدق نواياه ومشاعره.
ابتسمت الدكتوره مبتعده وكالت بهدوء.
:مابيج شي مجدر ضغط نفسي لا أكثر اقترح عليكم تطلعون من البيت تغيرون جو وتبتعدين عن الهم والحزن هاي الفتره.
مهيائيل: ماكو شي خطير مو؟
:شوف بالعادة الأمراض النفسيه الها مؤثر اكبر من الأمراض الجسديه لدرجه تحس بألم بمكان معين بجسمها لكن بالواقع ماكو ألم فعلي أو مرض وانما الضغط النفسي وتدهور عقلية الشخص والبيئة اليعيش بيها كلها تكون عامل مؤثر على الصحه النفسيه والجسديه فحتى تخلص من هذا الشعور لازم تبعد لفتره معينه.
مهيائيل: وتنحل المشكله؟
:للمشاكل ماكو حل دائم لكن الابتعاد لفتره وجيزة يجدد النشاط ويبعد العقل عن التفكير لمدة معينه، يعني أعادة للحيويه وتجديد للطاقه.
مهيائيل: شكراً الج دكتوره.
عدلت ملابسي وطلعنا شفت امي من بعيد كاعده على الكرسي والخوف مبين عليها، شافتني استاج ونبهتها كامتلي وصرخت بيه بعصبيه.
تسنيم: وين رحتتتت صار ساعه أدور عليكم عبالي بيهااااا شي؟
مهيائيل: سوولها ايكو للقلب وبس ليش هيج معصبه عمتي مو زين لايرتفع الضغط وين اوديج.
تسنيم: شلونج يعيوني؟
ايريم: الحمدلله، خلونا نرجع للبيت.
تسنيم: ابوج راجع للبيت هو او ابيل هسه اتصل بيه عباله باقيه يمج وارجع العصر.
ايريم: احسن تعالي يمي نغير جو.
تسنيم: لا ارجع للبيت ماخلي أبوج وحده.
مهيائيل: جا شمالج وياي تردين تاخذين مريتي؟!
ايريم: وين تاخذني؟
مهيائيل: يومين يمهم زيارة وتسياره.
ايريم: وعادي تقبل؟
مهيائيل: اذا يهون عليج تعوفيني براحتج ماكول لا اذا أنتِ حابه.
ايريم: خوش طريقه حتى تخليني ابطل.
مهيائيل: لا روحي منو لازمج اذا حتاجيت شي عود موجوده بلقيس بنت العم ماتقصر.
باوعتله بغضب وكرصته من زنده حيل وحجيت بهمس قريب عليه حتى امي ماتسمعني: خوش خلي تفيدك بنت العم.
مهيائيل: تخسا ليش هي تلحكج ام براطم.
ايريم: ههههههههههههه استغفر الله.
مهيائيل: اي والله شبيج ام براطم.
ايريم: وانت وين منتبه على براطمها مبين مركز هوايه بالنظر.
مهيائيل: بهاي ماجذب عليج اكيد اشوف حتى لو قردة كدامي بس مالمس كلبي غير براطمج.
ايريم: ماعندي براطم لتعيب على شفايفي.
مهيائيل: صدكت لهمودي.
ايريم: كافي عاد تكول هيج والله مو سمينه.
مهيائيل: خوش خلي نرجع للبيت وراويج الموسمينه شنو.
وصلنه للسياره صعدت ليوره اني واستاج وامي يمه، شويه وشغل اغنيه، رفعت عيني اله جان يباوعلي بالمراية الامامية ابتسملي ودزلي بوسة بالهوه درت وجهي بسرعه اشوف استاج خاف نتبهت عليه لكيتها صافنه بالطريق هذا الشي شجعني ابقى اباوعله والابتسامة شاكه حلكي ومصدومه بنفسي شلون تغيرت وياه هيج،
وصل امي للبيت ومقبلت ترجع ويايه على رغم هوايه لحيت عليها، وكف السيارة باوعت على الباب صايرة بس شوفته تخنكني وماطيق اكعد بيه لحظه بس المجبور ماعليه عتب،
نزلت وهو ورايه اول مدخلت راحت عيني للغرفه تذكرت شنو صار ضاق صدري درت وجهي سريع وصعدت فوك نزعت العبايه وشمرت نفسي على الجربايه مغمضه، عقلي مشوش هوايه افكار وماكدر اجمعهن او اوصل لجواب يريحني،
شنو السر اللي ذكره مهيائيل اكثر من مره وليش معرفته راح تظر عائلتي بالكامل؟
ومنو اللي راح يأذي استاج ويلاحقها؟
عقلي راح لزواجي سالفة السحر وحدها مجانت الأساس بقبول امي هيج عرض ولحت على أبويه يوافق وتصنعت السعادة مع هذا جانت دمعتها بعينها ومو دمعة فرح ابداً،
وليش مهيائيل ختارني من اول لقاء شنو اليدفع ساحر مثله يستقتل على وحده شافها بس مره بوقت المغرب، الساحر مسحور أو وراه جنية ملاحقته وهذا السبب الخلاه مايتمم الزواج قبل فتره واعتذر مني هيج عقلي ستنتج من كال لعمه البارحه الجنية صارت من خدامه، معناها الأعراض الموجوده عليه بيوم الخطبه ومن جنه أبيت ترانيم كلها بسببها،
ليش مفتح السحر؟
وميمون شنو مشرب وصاير أعمى هيج؟
معقوله هم عمه مسويله شي؟!
اي ليش لا امبين مخبل العائلة كلها مو بس مهيائيل، عقلي بسرعة بدل وراح لياسيم ومنو هذا الشخص الجانت على علاقه بيه وتتواعد وياه خارج المعهد؟
مكدرت اوصل لجواب السلسله حلقاتها مفقوده ومخربطه ولازم أكملها وعرف مابقى مثل الأطرش بزفه،
طلع من الحمام واني دخلت وراه خذت دوش سريع وخليت الملابس بالغسالة وطلعت لكيته متمدد رحت يمه وهو يلعب بشعري.
مهيائيل: شلون صرتي؟
ايريم: الحمدلله.
مهيائيل: شنو رأيج نروح شهر عسل؟
ايريم: راح يصير نص سنه مزوجين ياعسل هذا داده؟
مهيائيل: ميخالف اني حاب اخطفج ونروح جوله سياحيه كم يوم.
ايريم: ماعندي جواز.
مهيائيل: نروح لاربيل.
ايريم: ننحسد يوميه ماخذني الاربيل.
مهيائيل: ههههه ذيج جانت جذبه حتى محد يسأل انتِ وين ويعرفون بيج مكسره.
ايريم: الفضل ألك متعرف تسوق.
مهيائيل: على سيرته بعدج متذكرين شي من الحادث؟
ايريم: لا والله شلون صار؟
مهيائيل: سولفتلج لو نسيتي هم؟
ايريم: اذا الحادث اجه من ناحيتي المفروض تنكسر أيدي اليمنى ليش نكسرت اليسره؟
مهيائيل: الحادث مو هين ايريم سياره واجتج ردة فعلج ضميتي نفسج كلج بأديج ومجنتي لابسه حزام امان نظر كل جمسج والبدله البيضه صارت حمره، اما ليش ايدج اليسره مو اليمنه فهاي نسأل بيها القدر ذكريني من اروح للبرزخ.
ايريم: بقائي معجزة.
مهيائيل: له له له، مجان يومج، ماكو شي اسمه الأنسان يتأخر حسب معجزة قانون ربج واضح وصريح، (لايستأخرون ساعة ولايستقدمون).
ايريم: ليش مدعيتلي؟
مهيائيل: لا انا مادعي لأحد.
ايريم: ليش؟
مهيائيل: بيا وجهه ارفع أيدي لرب السماء.
ايريم: الله يسمع جميع الناس حتى لو كفره مايضر ترفع إيدك إله.
مهيائيل: تفكيري يختلف عن تفكيرج، بعدين سولفيلي ليش هيج صار وياج بعد مفتحت السحر من أبيل مباشره؟
ايريم: لأن شفتكم.
مهيائيل: صريحه.
ايريم: ليش الجذب.
مهيائيل: سألتيني سؤال بالمستشفى تذكرته هسه وماطول وعدتج لازم اوفي.
ايريم: بخصوص شنو؟
مهيائيل: انتِ مو سمينه لهمودي.
ايريم: يااااا.
مهيائيل: والله سمينه.
ضحكت: مهيائيل لدغدغني.
مهيائيل: مثل مادغدغتي مشاعري بسوالفج الحلوه.
ايريم: وضحكت؟
مهيائيل: هههههههه، وياج بس اكتشف اني شكد تافهه.
ايريم: رحمه الله والديك.
مهيائيل: اي شبيج حلوه هيج شخصيه تحس وياها بالمتعة والفرفشه، الكبار يحتاجون للزعططه احياناً.
ايريم: هسه اني زعطوطه!!
مهيائيل: اني الزعطوط المهم متزعلين.
فزيت من النوم على دكات قويه على الباب كمت مفزوعه وكعدت مهيائيل.
مهيائيل: شبيج؟
ايريم: الباب ماتسمع؟
مهيائيل: لا.
ايريم: يمعود والله العظيم الباب يندك حيل ليش ماتسمع؟!
سحبني يمه كايل.
مهيائيل: حتى لو يندك قابل نهاية الدنيا.
ايريم: واذا صاير شي؟
مهيائيل: مصاير واذا صار يطبهم مرض شعليه بيهم.
ايريم: يمكن رائف لو ترانيم كوم خلي نشوف حباب.
مهيائيل: نومي خفيف وداعتج لو ندك سمعت حلمانه جنتي رجعي نامي.
خفت وحيل هم مستحيل يكون حلم واني سمعته بأذني معقوله هذا جني لحكني لهنا همات؟
من خطرت على بالي هيج فكره حضنته بكُل قوتي وغمضت عيوني هاربه من الواقع اللي صار اسوء من الكابوس عندي.
___
دخل يرعد ويصيح بصوت عالي خله امي تفرفح عليه.
تليد: هذا الحقير شلون يسوي هيججججج.
حميده: وسممم لتعلي صوتك علينا لتنسى عملتك السوده وياهم شلون تتجرأ وتكتل اخووةةة تخبلتتتت!!!
تليد: اييي مخبللل من رحتي وشمرتي نفسج بحضن واحد يدور بيج متعةةةة وحبلج وشمرناااا مثل الجلاب تخبلتتتت اني واحد مخبل وحلفت شاربي مو عليه اذا ما أخذ بثاري وثارجن وياي بالأخص مُزن لأن اني وهي بس المظلومين بالقصه.
حميده: وأحد عاق عساك ماخضرت بطني ولا كبرت وشفتك لو ماخذك الله ومرتاحه من هيج واحد سرسري ماعنده احترام لشيبات امه.
تليد: لو ميت احسن ما اعيش عيشه النغوله تدرين بالشارعع من امشيييي كلها شنووو تصيحليييييي النغلللللل تسمعينننن نغلللللل واحد مات ابوه وهو مامعترف بيه وكل هذا تردين اسكت لا والخلقني ابهذل احوالهم ودمر سعادتهم وافضحهم بين المنطقه وماكون نغل اذا ماسويتها.
حميده: اخوج المطي راح يجيب موتي اني ادري ماراح اعيش من وراه ومن سوالفه التعبانة.
مُزن: حقه تره ماعشنا يوم واحد مرتاحين مو زين ماموتهم.
حميده: منو حماد العروسه امها وخالتها، بس ورب الكون يندمكم شفتي شلون اجه وماحترم حرمة البيت هذا مايهمه ولا واحد يموتنا ومايرفله جفن.
مُزن: الأعمار بيد الله لتخافين من هاي الناحيه.
حميده: انتِ هم صفيتي وي اخوج الارعن، شمحصله منكم بس وجع الكلب عساكم لاصرتوا.
مُزن: والله بسببج ليش خلفتينا.
حميده: جنتوا فرحتي وكلت تشيلوني بكبرتي ماحسبت حساب هيج يوم اسود يمر بينا.
مُزن: غلطه وحده خلتنا ندفع ثمنها العمر كله من يصير الموضوع بيه شرف ومستقبل وسمعة لازم يفكر الأنسان الف مره قبل مايخطي اي خطوة.
حميده: وانا شمدريني راح يصير هيج ونتبهذل؟
مُزن: لازم تعرفين من سوا زواجج متعه وسكت عن الموضوع وماقبل يحجي بيه كدام اهله.
حميده: هههه اهله جانوا يدرون بالخصوص مرته اخذني لبيتهم ونمت على جربايتها بوقتها ابنها جان عمره اربع خمس سنين يمكن ومن شافني طردني وابوه ضربه حيل وطلعه بره، اللي صار اصلاً وياي حوبتها جانت خوش مره وابوج واحد ساقط.
مُزن: حركتي كلبها يوم واحد لو ساعه وربج حرك كلبج وكلوبنا سنين وشوفي شنو صار بينه من وراج ومن حبج الأعمى لواحد مايستاهل.
حميده: شتعلت صفحته ال****.
___
:الوو، الووو منو؟
خليك انسان راقي واحجي منو خلصني ماعندي وقت لهيج سوالف.
رائف: واذا ماعندج وقت ليش تردين على أرقام غريبه؟!
زُمردة: هذا انت؟
رائف: زوجج عن قريب بشحمه ولحمه.
زُمردة: حبوب الهلوسة بطلها متفيدك وروح العب بعيد منا واحد صايع طفل مراهق.
رائف: بس يحبج ونيته شريفه وياج هذا المراهق كبري كلبج أو وافقي بيه شبيج هيج وياي؟!
زُمردة: من الأخير المطلوب مني شنو؟
رائف: تتزوجيني.
زُمردة: بابا كتلك بطل تنام وتحجي وي العالم مو زين عليك هاي العادة بعدين تتخبل والشماعيه مقبطه.
رائف: ازعل منج هيج كاعد اخطبج على سنة الله ورسوله ليش متوافقين، شاب حليوه مرتب أو آخر سنه جامعة بعد شنو عذرج؟!
زُمردة: ماثق بيك.
رائف: حقج بس انطيني فرصه اثبتلج صحة كلامي وانتِ حكمي براحتج عليه.
زُمردة: وليش اثق؟
رائف: يمعودة هي بس ساعه شبيج!!
زُمردة: اذا عندك كلام كوله وي اهلي اني مستحيل انجمع وياك قبل ميصير شي رسمي بينه.
رائف: العب العب العب، هلا هلا هلا، عمييي كللووووووووشششششششششش، يهللللللللللل البيتتتتتتت حضروا الفرقةةةةةةةةةة آخر فرد بالعائلة راح يزوجججججججججججججججججججججج.
ضحكت عليه وداخلي مبتسم غلقت الخط ومشاعري مكدرت اعرف هي شنو بس متحمسه وفرحانه للقادم.
مهيائيل: وسمم شكوو تصيح؟
رائف: وافقت، كوكب زُمردة وافقققققق.
مهيائيل: خوش.
رائف: شنو خوش ماكو مبروك؟!
مهيائيل: بالأول اعرف بيتهم ونسأل عليهم ونراقبها فد فتره معينه أو أخذ خيره الها وللعائلة وبعدين انشوف اذا ممكن تصير زوجتك لو لا.
رائف: ماتريد تعرف من ياسلاله جايه بعد؟
مهيائيل: لازم نعرف الأمراض الوراثية الهم علمود اطفالكم بالمستقبل وخلي ابالك اذا صارت وطلع الدم ممتوافق زواج ماكو من يم المحكمه ترجعون.
رائف: ماكلت هيج من تزوجت انت لو اني قوانيني تختلف!!
مهيائيل: اني تزوجت لأن هي ايريم مجنت امفكر بسيرة الأطفال.
رائف: تريد تسودني انت، اي والله أحلف عليك تريد تسودني.
مهيائيل: ميحتاج انت مسودن من عدهم.
رائف: ياهمه؟
مهيائيل: ابوك وعمامك والعشيرة كلها.
دَاسِم: احترم نفسك تاج راسك ابوه وعمه لتنسى نفسك وثمن كلامك احسن ماتشوف شي بعمرك ماشايفه.
مهيائيل: منو شامرلك عظم؟
محد ماكل لحوم اليوم عجيب، هذا الجلب ليش كام ينبح؟!
جوعان؟
مو مشكله لتضوج هسه تجي تونه تاكلها اصبر شويه هي على الريحه تركض، نفس الفصيله تحنون على بعض.
كام من مكانه عصبي لزم مهيائيل من ياخة الدشداشه نتر ايده بعصبيه وضربه بوكس بنص وجهه: اكسر راسك وراس اليطلع وراك والعن ابهاتكم واحد واحد ولد ال*****، تالي عمري تريد تمد إيدك عليه اكسرها واعلكها بركبتك وكول مهيائيل كال،
تونةةةةةةةةة تعالي اخذي مجلوبج فوك واني كاعد ماريد اشوفكم كدامي لأن ساعتها يطبكن وطردكم بالشارع مثل الحيوانات واعلمكم ابن زاهده منو.
دَاسِم: ابن حرام جنت دائماً اكله مرتك تخونك بس مايصدكني وشوف النتيجه مبين اصلك قذر، بس مو مشكله عن قريب ادمرك وارجع حصتي من البيت والورث لأن انتم مالكم شي يمنه.
مهيائيل: النه والنه اكثر من الموجود بالمحكمه، النه دم امي الراح هدر بينكم، النه كرامتها وشرفها الدستو عليه، النه ثاررررر قديم ياكل بكلبي اكللللللل وأريد اطلعه من خشمك اليوم اجيت الرجليه وكمت تنبح لازم انطيك جوابي أو اتوبككككك،
اميييييييي طاهره وشريفه وتاج على روسكمممم كلكمممم ***** انذال، ولد ****** تربية سززززز اليوم اريد اعلمك شلون تحجي بأمي بكلب بارد وتكول عليها وصخهةةةةةة.
يحجي ويضرب بيه برجله حار شنو يسوي أخير شي شغل جكارته وطفاها بحلكه خله يرجف جوه أيده كلنه واكفين ونباوعله شلون يضربه بكُل قوته مال واحد محمل بكلبه من سنين، محد تجرأ وراح يمهم كلها تخاف أو اني شكد ماخاف عليه تركته براحته لأن مبين امه مظلومه حيل وهذا اللي يدفعه يسوي هيج بكلب محترك،
دموعي تنزل عليه واني اتذكره شلون يذكر صفاتها بيه لعد شكد متعذب وشنو شايف حتى وصلت لهاي المرحله من الحقد والغل؟
تعب شمر الجداحه من ايده وخلى جثه بمكانها خشمه وحلكه ينزف وعيونه صارت زركه، ابتعد كم خطوه واجه وكف كدامنا وكال بتحذير.
مهيائيل: هاي المره خليته يوصل للموت المره الثانيه ادفنه جوه مداسي واللي يوكف وياه يصير بصفه، من القانون ماخاف، من الدين ماخاف، حرام وحلال انا عمري مامشيت بيهن، واحد ساقط من يوم يومي ماعترف بأي واحد لهذا ديرن بالجن، كلمه وحده ماسمع، نفس محد تاخذ سوالف الحيايه تبطلنها لا اسوي سوايتي هاي بيجن والخلق ايريم،
من شافهن ساكتات صرخ بصوت عالي.
:سمعتتتتتتننننننن؟
حجت تالين بصوت يرجف خلاني اضحك بداخلي عليها.
تالين: تأمر.
عافهن وصعد اجت يمي ترانيم تحجي بشماته.
ترانيم: ابوس ايده فوخ كلبي بيه، يوم الألجن ان شاء الله ونفس النومه بس بالمغيسل مو هنا.
بقت تحجي عليهن اني عفتها وصعدت يمه ماريد اخليه وحده بهيج وقت.
___
:اريدها.
:شوكت؟
باوع بمكر على التسجيل وضحك بخباثه شيطانية.
:كلما اسرع كلما افضل اريد اشوفها على فراشي بهذا الأسبوع....
يتبع...
البارت اكثر من 4096 كلمه..
اريد تفاعل يسرني ويسويلي واهس همتكم شمعاتي.
لتنسون التعليق بين الفقرات والتصويت حبايبي..
تصبحون على الف خير وعافيه.
لأي شي يخص القصه تعالوا يمي انستا👻.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!