للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة(زهراء احمد)
_________
مهيائيل
من أين جاءت هذه الساحرة
واثقة هادئة مكابرة
عيونها كالمدن المحاصرة
اجفانها نوارس مهاجرة
فزجت الجيوش بالجيوش
وهزت التيجان والعروش
ولاعبتني لعبة خاسرة
___
اول مفتحت الباب شفته يطلع بالجنطه ويخلي بيها الملابس من شافني حجه وهو يشتغل.
مهيائيل: حضري نفسج راح نطلع هسه لأن اذا بقيت اهنا دقيقه اكثر ارتكب جريمه مستحيل اضمن نفسي.
سكتت محجيت شي ورحت ساعدته ماخذنا هوايه اشياء بس الضروريات لأن هو مقبل نشتري مناك اذا حتاجينا شي، لبست بنطلون اسود وقميص اسود للركبه بما انو طالعه بسياره ومكان بعيد وخوف من انو يصير شي الستر واجب كملت كل شي خليت العبايه يمي وكعدت على الجربايه منتظرته يطلع،
نفتح باب الحمام وطلع عيوني صاروا كلوب من شفته لابس قميص ابيض وبنطلون اسود بلعت ريكي شنو هل جمال من صدك حلو ومجذب بالبس الرسمي، هاي الحلاة وين جانت مضمومه؟
لبس ساعة جلد سودة والمحبس ابتسمت يريد يسحر العالم حتى وهو طالع سياحة، خله عطر ونزلنه شفت ترانيم كاعده بالصاله اجت سلمت علينا ونطلقنا بدون ميحجي وي واحد ثاني غيرها، بقيت ساكته كل الطريق وهو هم، عيني على الشوارع وعقلي بارد تماماً وحاسه براحه مو طبيعيه وفرحه داخليه ماكدر اعبر عنها بالكلمات هيج بدون سبب مجرد فكرة طلعت من البيت تريح اعصابي،
نعسانه وتعبانه والطريق طويل غفيت بدون ماحس على نفسي، فزيت بعد فتره كدام مطعم تعشينا ورجعنا طارت النومه ومليت الجو كئيب وحتى ممشغل شي بالسياره يسوق بصمت خلصت اكثر من ثلاث ساعات وهو هادئ حجيت كاسره هذا الصمت المميت.
ايريم: شلونك؟
جاوبني وهو يسوق بدون ميلتفتلي.
مهيائيل: مو زين.
ايريم: اذا حبيت تحجي اني موجوده بكُل وقت.
مهيائيل: السوالف مراح تحل المشكله مجرد تضيف كآبة وحزن وخنكه لا أكثر ولا أقل.
ايريم: خليني اني اسولف لعد، عندك خلك تسمعني؟
مهيائيل: اذا الج مالي خلك خلكي المن يروح لعد مريتي.
ايريم: هو تنبيه حتى متكلي دخت بعدين.
مهيائيل: سوالفج نغمات فيروز من الصبح يومي مايصير حلو بدونها.
ايريم: تره خوجلت اني ماتحمل واحد هيج يكلي بسرعا اذوب.
مهيائيل: ذوبي بس مو هنا خلي نوصل للفندق بالأول.
ايريم: هههههه، المهم كلي شنو حاب تعرف عني؟
مهيائيل: طفولتج مثلاً.
ايريم: اني هم اتمنى اعرف شلون جانت، تدري ماذكر طفولتي ابدد.
مهيائيل: ليش؟
ايريم: ماعرف بس ماذكرها نهائياً يعني من الرابع ابتدائي يلا اذكر أو اشياء قليله هم.
مهيائيل: مافكرتي بالسبب؟
ايريم: امي كالت الموضوع طبيعي ليش افكر بيه وبذلك الوقت ماجنت اهتم اذا اذكر أو لا.
مهيائيل: شعجب ماعندج اخوة أو اخوات اكثر بعد؟
ايريم: امي تكول التوم مالتي بس تمرض ومات وهو صغير، وبعدها ماصار الا بعد سنين خافت تخلف ويموت هم بس رب العالمين راد تصير استاج.
مهيائيل: الله يرحمه ويصبرها.
ايريم: آمين لأن على رغم مرت سنين طويله بعدها تذكره وتبجي عليه وكأن شهيد عدها مو طفل صغير.
مهيائيل: نفس المعزة شعور الأم مايتغير لأولادها شكد مجان عمرهم.
ايريم: ماعرف شعور الأمهات لأن ماعايشته بس اعرف شنو يعني الفقد والحزن والخوف من خسارة شخص عزيز عليك.
مهيائيل: ان شاءالله متعيشين هذا الشعور طول العمر.
ايريم: هذا الدعاء غير مستجاب الأنسان نخلق حتى يموت ويفقد ويخاف ويحزن هاي قاعدة بالحياة منكدر نغيرها.
مهيائيل: حتى لو جانت قاعدة العقل البشري مايقتنع بيها ومستحيل تتحملين فقد شخص مقرب منج وخاصه اذا جان عزيز.
ايريم: الأيام تنسي وداعتك.
مهيائيل: الأيام تعودج على الشعور بس مستحيل تكدر تنسيج الألم.
ايريم: بعدك تتأذة؟
مهيائيل: بعدني بذلك اليوم وطول السنين مكدر يخليني اتخطى الألم.
ايريم: حجي الناس جذب لعد؟
مهيائيل: المات عدهم مو عزيز.
ايريم: الله يصبرك وحدها تكفي؟
مهيائيل: له له له، الانتقام بنفس الطريقه يخليني ابرد.
ايريم: وشنو اللي يمنعك؟
مهيائيل: وصيتها.
ايريم: امك ماتت قتل؟
مهيائيل: تكدرين تكولين هيج.
ايريم: منو اللي سوا بيها هيج؟
مهيائيل: الجميع تكالب عليها حتى صار اللي صار.
ايريم: جبير بوقتها؟
مهيائيل: بيوم نتائج السادس بوقتها مجان اعلان إلكتروني مثل هسه رحت اجيبها من المدرسه واجيت فرحان راح أحقق حلم امي وحلمي وفرحها، دخلت يمها للغرفة واني كلبي يدك سريع يكول داخل سباق من الحماس اريد اشوف ردة فعلها وشنو تسوي من تعرف بيه جبت معدل طبيه وبزود، تقربت منها نايمه على السجادة مالت الصلاة جانت مثلج تكعد ساعة قبل الأذان تقره قرآن وادعيه وتشغل بخور، تقربت منها اكعدها صحت بيها اكثر من مره وانتهت قصة امي.
ايريم: الله يرحمها ويغفرلها ويدخلها فسيح جناته يارب.
مهيائيل: جانت خوش مره بمعنى الكلمه، عمرها كله مامدت ايدها علينه لو صرخت بوجهنه من النسوان اللي تجوع نفسها وتوكل أولادها، دارتنا مدارت متنوصف خلتنا اخوان ونوكف بظهر بعض حتى لو واحد يضوج من الثاني بس مايعوفه ابدد بوقت الحاجه، وكفتنا لبعض وسندنا اليوم كله بسبب تربيتها وتعليمها، امي ونعم النساء هي بعيني شي عظيم ومقدس وطاهر،
وماتت امي ومات بعيني كل شي حلو ومتت حتى انا،
عمري كله مافكرت اترك السحر بس من جانت تخطر على بالي اقرر اتوب حتى أكدر اشوفها بالجنه وحضنها لان عدالة ورحمة الله مستحيل يخليها بالنار.
ايريم: الموت شي ظاهري بس بالخفاء كل شخص عزيز على كلبنا موجود ويانه بكُل خطوة، يشوفنا ويسمعنا ويطبطب علينا ويدعيلنا هم، هي موجوده وياك حتى لو مجنت تشوفها مهيائيل.
مهيائيل: اعرف هذا الشي، بعض القرارات اللي اخذها احسها منها مثل زواجي بيج، بذلك الوقت الجميع لح عليه ازوج واني رافض رفض قطعي اذا عقلي مو هو اللي اختار وكال هي مستحيل ادخل وحده لحياتي وندم بعدين، صحيح سحار واخذ خيرة واعرف المستقبل بس عقلي اذا ماقرر مستحيل اخطي خطوة واحد يتبع الشياطين بشي مهم مثل هذا غلط واني ردت اتبع الملائكة اصلاً،
ومن شفتج قفل عقلي عليج وكلت خلص هاي صارت زوجتي.
ايريم: يعني مشايفني من قبل؟
مهيائيل: وين شايفج مثلاً؟!
لعلمج احنه جديد منتقلين لهذا المكان جنه بغير منطقه.
ايريم: بله شنو كلت عليه وقتها؟
مهيائيل: بيومها طلعت اجيب صمون للعشا وشفتج تمشين ومدنكه ولابسه عبايه ومبين الخوف عليج تردين بس توصلين اهنا بالواقع شياطيني شتغلت ولمت اهلج حيل مطلعيج هيج وقت وانتِ بنيه شابه وحلوه مخافوا يصير بيج شي فردت اخوفج حتى متسويها مره ثانيه ورجليج متتحرك بره البيت وخاصه بالمغرب، بعيد عن الناس الشياطين تتجمع هيج وقت واذا نلبستي متتخلصين منه بسهولة.
ايريم: والبزونه السودة؟
مهيائيل: هذا جني يفتر وياي يتحول على شكل بزون.
ايريم: يعني سويت كل هذا حتى تخوفني.
مهيائيل: ايي ومن درت وجهي منج ابتسمت وكلت هاي راح تصير مرتي واشك حلكه اللي يكول لا.
ايريم: أو احلامي بذيج الليلة؟
مهيائيل: خذاج الواهس انتِ.
ايريم: كول ماريد احجي وخلص.
مهيائيل: هههه فديت اليفهمني انا.
خلصناها سوالف بأمور عاديه حتى وصلنه لاربيل وأجر فندق من التعب اخذت حمام ونمت بسرعة فزيت ثاني يوم الساعة سته الصبح النعاس بعيوني وماريد اكوم استغليت الفرصه ورجعت نمت وهي نومه وحده لأذان الظهر،
بدت رحلتنا الفعليه من ثاني يوم رحنا لقلعة أربيل الجو كلش حلو مو بارده ولا حاره بداية شهر التاسع والجو لطيف حيل، على رغم اني علميه بس كلش احب التاريخ والحضارة والأماكن الاثريه،
حاضن أيدي بأيده ويمشي ويايه بكُل حب فعلي مو لفظي.
مهيائيل: صدك الترتيب والنظافة الها دور بتطور البلدان، شوفي الفرق هسه بين هاي القلعة والمنتجع ابابل فرق بين السماء والأرض.
ايريم: شنو فرقهم ثنينهم أماكن سياحية وتجيها سياح من العالم مو فقط العراقيين.
مهيائيل: لا طبعاً اكو فرق، النظافه والاهتمام بالمكان عامل اساسي بجذب سياح اكبر، انتِ عندج معرفه العراق اول بلد يصنع التاريخ وبيه ألاف الحضارات من بدت الخليقه لليوم لكن عنايه ماكو، مكان اثري شامخ ويرمز تاريخ البلد يجي كم واحد مخربط تافهه يكتب عليه احب فلانه وتاريخ ذكرى بينهم وياريت بعدين يزوجها ويجتمعون الله وكيلج كل واحد يسوي هاي السوايه سنتين مايبقون سوا لأن بس سوالف ماكو شي فعلي يسوي.
ايريم: اخذت غيبتهم تدري؟
مهيائيل: لاغيبة على الفاسقين، اتحب احترم نفسك ونجب وروح اخطب ليش تكتب على الحيطان!!!
ايريم: هههههههه وكعوا بالسانك بعد لازم تغلط عليهم.
مهيائيل: والله ال**** يستاهل.
ايريم: اخذ السانك على الفشار شنو فلمك متكلي؟!
مهيائيل: كلمات تعبيريه خفيفه حلوه لتاخذيها من ناحية غلط وقلة ذوق عزيزتي.
ايريم: اريد اروح لحديقة الحيوانات.
مهيائيل: ميحتاج كل الأنواع موجوده بالبيت من نرجع شوفيهم.
ايريم: هههههههه استغفر الله.
مهيائيل: اي والله شبيج الحيوانات اشرف منهم بهوايه، اني ميت جوع خلينه نسد سيرتهم ونروح ناكل شي خفيف.
ايريم: انت تاكل شي خفيف!!
مهيائيل: ليش التشريب ثكيل يعني؟!
ايريم: لا ابد اخف من عنده ماكو.
مهيائيل: شفهمج انتِ بابا اهم شي الصحة، دلعي كرشج عزيزتي.
ايريم: هو بدون شي وتكول مهلمده اذا صار عندي كرش اكبر شسوي بعد.
مهيائيل: حلوه الملهمده احسن من عود الماسحه.
ايريم: ايعع ماحب السمن.
مهيائيل: عود لتاكلين سوي رجيم بس مو هسه من نرجع.
ايريم: لازم اشتري قاطع شهيه لأن من وحدي مستحيل اقطع شي.
مهيائيل: يمي.
ايريم: تعرف علاج بيه فايدة؟
مهيائيل: شوفي تونه قبل الغدة وكاغد محترك قبل العشا اضمنلج تقطعين الشهيه يومين اني جربتها بفتره من الفترات سمنت وسويت هاي الطريقه شهر واحد بس ضعفت عشرين كيلو.
ايريم: اني بسببك راح ادخل نار جهنم من أوسع ابوابها بدون حساب وكتاب.
مهيائيل: احسن حتى اني وياج سوه.
غداني وطلعنا رجعنا للفندق وبالليل رحنا لمدينة الألعاب بقينا اربع ايام بأربيل وبعدين رحنا للسليمانية، بقينا همان اربع ايام زرنا كل المناطق المعروفه بيها وآخر محطة جانت شلال كلي علي بيك،
كاعدين على ضفاف الشلال خله ايده وره ظهري وسحبني اله جانت حضنه طبيعيه وخاصه محد موجود يمنه والوقت مغرب غنالي اغنيه بصوت هادئ اول مره اسمع بيها صوته وهو يغني ابو السحوره حتى بهاي طلع خبرة.
حسيت بالألم وهو يغنيها صدك طالعه من اعماقه سكت شويه ورجع كمل المقطع الثاني.
كملها والتفتلي عيونه بيها لمعة وكال بهدوء.
مهيائيل: تدرين شنو قصة هاي الأغنيه؟
اشرتله براسي بمعنى لا كمل بنفس النبرة الهادئة وعيونه على المي.
مهيائيل: جان اكو شاب عنده قارب بنهر المسيب يعبر منه يوميه ويغني عنده صوت عذب يكولون وعلى الضفاف اكو بنيه هي وصديقتها اسمها ميحانه يجن يوميه ياخذن مي ويسمعنا حتى قوت علاقتهم وحبته حب طاهر بدون محد يعترف للثاني بسبب العادات والتقاليد العشائرية، حتى بيوم صار وي حبيبها حادث أو وصل الها خبر وفاته حزنت ونقهرت عليه وبمغربيه راحت هي وصديقتها كالعادة يجيبن مي مر من يمها القارب مال حبيبها باوعت لصديقتها بحزن ونشدت هاي الأغنيه.
ايريم: قصتهم مأساويه.
مهيائيل: بهذا المجتمع الغير واعي اغلب القصص هيج.
ايريم: ماكو حب حقيقي مثل قبل.
مهيائيل: من زمنهم العرب ناس همج متخلفين يفكرون بالسمعه والشرف والعيب ومحد فكر بيهم بالحرام السيدة خديجه خطبت الرسول صلى الله عليه وآله وين المشكله اذا حبيبين تزوجوا وعاشوا حياة سعيدة!!
ايريم: الزواج يصير على اختيار الاهل البنيه مو من حقها تختار.
مهيائيل: ولهذا السبب عدنا ملايين البنات مثل ميحانه.
ايريم: على سيرة ميحانه مسامعتك تسمع هاي الأغنيه منين حفظتها لعد؟
مهيائيل: هاي مطبوعه بالروح ميحتاج اسمعها.
ايريم: لازم الها قصة عميقه حتى تاخذ منك هذا الحيل وانت تغنيها.
مهيائيل: جانت اغنية امي المفضلة الوحيده اللي تدندن بيها بكُل وقت وحفظتها منها.
ايريم: وليش تغني هيج أغنيه حزينه؟
مهيائيل: يجوز عدها قصة حب ماكتملت الله اعلم.
ايريم: زواجهم جان تقليدي؟
مهيائيل: إجباري امي تزوجت غصب عنها وماتت مظلومه بهذا البيت ماخذت غير العذاب والدمار أو ودعته وهي دمعتها بخدها، مرات من اصفن واذكرها شلون عانت وتعذبت اتمنى ميته من وقت وماعايشه هيج حياة لو اني جبير واكدر اخذها من يمهم وادفع دم كلبي حتى احميها،
ريحتها بروحي منو يكدر ينسى امه؟!
ايريم: الله يرحمها.
مهيائيل: ويرحمني، امي الوحيده اللي جنت اروح لحضنها اذا عندي مصيبه لو مشكله، بأيام الطفوله جنت كلش وكح وماحترم احد غيرها لأن من صغري عرفت محد يستاهل بيهم الاحترام وردت اكبر اسرع حتى احميها من الضرب والاهانه والذل العايشته، فجنت اضرب جوارينه ومن يجون يشتكون اختل وراها هي تحميني بروحها وماتقبل احد يمد عليه مره ونعم المره ماشفت ومستحيل اشوف مثلها دفعت كلبها وعمرها علمودنه وماقبلت تتنازل عن أولادها على رغم اجتها الفرصه للحلك وردتها،
عفيفه شهدت عليها تلبس بجامه جوه الدشداشه بهذا الصيف وتتوزر بالعباية وتخلي النقاب والجفوف حتى محد يلمح منها شي وتروح تحصد بهاي الشمس والحر ومن ترجع تحضر الأكل النا وتنظف البيت وتغسل مواعين وساكته ماترادد احد وصوت ماتسمعيلها ومن تريد تصلي تجمعنا يمها وتعلمنا اني وكيح كلش ما اسمع كلامها وعذبتها هواي وهسه متندم على كل لحظه عشتها وياها وماستغليتها،
لو يرجع بيه الزمن اخلي راسي بحضنها طول اليوم واصفن بوجهه ودكاته، يوم واحد اريد يرجع واعيش وياها واني طفل وتوكلني بأيدها وتبوسني بكصتي وتكولي "عفيه بوليدي السبع المايشلع كلب امه"،
من تشوفني اعاند وسوي مشاكل عبالج تضربني مستحيل ترفع ايدها للسماء وتدعيلي (الله يهديك وليدي ويصير ينضرب بيك المثل بالأخلاق ) ومن كبرت وشافتني تعلمت للسحر وبديت امشي وره الشياطين بكُل صلاة اسمعها تدعي (الله يعدل طريقك ويرزقك بنت الحلال التكدر تغيرك وترجع لربك قبل ماتموت)
التفتلي وعيونه مليانه دموع مكمل.
مهيائيل: لهذا السبب كلتلج "انتِ دعاء امي المستجاب" لأن بيج اشوف هداية مهيائيل واستقامته.
هو يحجي واني دموعي ماكدر اسيطر عليها شلون عاش من بعدها؟ وشلون كدر يتحمل فراكها وهي هيج ام عظيمه؟! اني بس سمعت من عنده كم كلمه ماكدرت اتحمل وصابتني كآبة حسيتها يمي هسه والله قهر هيج انسانه تنخسر،
ايريم: هسه عرفت الله يصبرك وحدها ماتكفي حتى اواسيك واشيل همك وياك بس أكدر اسمعك بكُل وقت والله ومستعده اشاركك الهم واذا تريد نكعد نبجي عليها سوا.
مهيائيل: وجودج وحده يكفي الماضي راح ونتهى احنه ولد اليوم.
كام ولزم أيدي يساعدني، جنت اتمنى يحجي ويايه عنها اكثر واعرف شلون عاشت بس متأكدة قصتها تحرك الكلب اكيد اذا هو بمجرد ماحجه كم شغله بسيطه عنها هيج تغيرت ملامحه في حال تعمق بأذيتها شنو يصير بيه،
رجعنا للفندق داخل صمت حتى متعشا بسرعة نام اني صليت ورحت يمه مخليه راسي على صدره وحاولت ابدي وياه موضوع صحيح هو ماله خلك بس ميصير ينام وهو ضايج.
ايريم: مهيائيل كاعد؟
مهيائيل: همم.
ايريم: اليوم آخر يوم اهنا شنو رأيك نتابع فلم؟
مهيائيل: همم.
ايريم: شنو هاي الهمم؟
مهيائيل: عوفي لغير يوم.
ايريم: ردت نغير جو بما انو باجر راجعين لتكول لا فدوة حباب، هي ليله وحده وراجعين للوجوه الحلوة باجر وللعبان نفس وتونه وعلى كولتك كاغد محترك، سحوري خلي نغير جو.
رفع ايده من عينه باوعلي بنظره تعجب.
مهيائيل: شهل لقب هذا ولج؟
ايريم: ليش انت مو ساحر؟
مهيائيل: اي بس هذا جديد اني منج اسمع بس ساحر القرن.
ايريم: هذا مميز سحوري يعني خاص بيه وحدي.
مهيائيل: صار الحجي حلو كملي بله.
ايريم: بس هيج شكمل؟
مهيائيل: كملي سوالفج حلوه.
ايريم: لا داده ماعندي شي هي كلمه خطرت على بالي وكلتها، كوم وياي نتابع فلم.
مهيائيل: ماريد فلم الرسالة.
ايريم: منو كلك اني اريد هذا الفلم؟!
مهيائيل: اريد فلم على ذوقي.
ايريم: ميخالف.
مهيائيل: مابيه حيل اكوم.
ايريم: خطر على بالي سؤال، جنت كاتل نفسك حتى علاقتنا تتحسن، ليش رفضت من وافقت اني؟
مهيائيل: جنت رجال مسحور.
ايريم: صدك والله؟
مهيائيل: اي والله.
ايريم: زين انت مو ساحر شلون مكدرت عليه!!
مهيائيل: قانون السحره يختلف عن قانون الناس العاديه، نجبرت اتعامل وي جنيه وهيج صار بعدين عيفج من هاي السيره الفات مات والعن ابو خيره بالحاضر.
مهيائيل: شنو رأيج انام هسه ونعوف الفلم؟
ضربته على صدره: والله ما اريد اشوف فلم.
مهيائيل: ***** على الفلم ادري بيج تنعلين يومي اذا ماشفتي.
ايريم: مره حبابه اني لتتهمني باطل.
مهيائيل: عمي اني رجال حباب وفقير ومسكين ومالي غير الله واحد مضطهد.
ايريم: بعد بعد وتطلع بالتقاطع يوميه الصبح بدون ريوك وخليتك بدون ملابس ومنيمتك بالشارع، هو ادري اكيد اصير اني مو ادميه ومعذبتك وانت أنسان بريئ، هو مو صوجك صوجي اني اكلك كوم نشوف فلم اصلاً اني بعمري كله مشايفه فلم وي واحد وماحب هاي السوالف بس لأن انت مختلف وردت نغير جو احسن من الصفنه بالحايط.
اول مره اكتشف اني الساني مينسد وعندي عنصر نكد وكلب المواضيع صراحة،
تركته ونمت على الجهه الثانيه وبداخلي ضوجه هسه شبيه نكدت عليه قبل شويه ضحكنا شهل اسلوب الجديد ماحبيته، بقيت منتظره منه حركه يراضيني ايسوي اي شي ماكو، درت وجهي اله بهدوء اشوفه شنو يسوي وجانت الصدمه غافي غميت نفسي وأني صار ساعه منتظره مبادرة وتالي طلع المسعد نايم هنيالي اي والله.
___
زُمردة: خيررررر.
رائف: اعصابج ياعمري.
زُمردة: مو على اساس راح تجيب الأهل وتجي تخطب بعد شكو مراسلل؟!
رائف: اي غير نتعرف شويه تعرفيني اعرفج نسولف وندردش وين المشكله؟!
زُمردة: المشكله انت ماعندي غيرك مشكله، كتلك اني وياك ما النه حجي سوه غير من تجي تخطب عود بذلك الوقت الله كريم وتعرف براحتك.
رائف: اريد اخذ موعد حتى نجيكم اني والأهل.
زُمردة: حدد الموعد انت ومره ثانية لتتصل بين لان صدگني حتى اللي كلت بيه الغي، واحد سرسري.
سدته بوجهي يا أخي احب النجره.
___
:شسوين بغرفتهم؟
:اسم الله الرحمن فززتني هي هيج الواحد يجي بهدوء تنحنح صخم لطم.
:كولي شنو جنتي تسوين بغرفتهم؟
:هه سحر.
:حتى اطيح حظج والعن يوم يومج ادبسزز راسج اكسره اذا فكرتي تلعبين من وراي فاهمةةةة.
:لتصيح عليه لا والله ادمرك وتعرفني اسويها.
:هه اللي مفتخر بيه بحححح ماموجود وهسه رجعت وراح أأدبج على كل شي صار من قبل بس اصبريلي شويه.
:من شوكت صرت هيج ميمون؟!
ميمون: من شفتج وحده **** ماتستاهلين الرحمه وتردين تدمرين مهيائيل وعائلته.
تالين: اني وياك مبيتيها سوه برأيك تكدر تدمرني؟
ميمون: عندج دليل؟
هه من هاي النظره ماكو معناها ابتعدي عن طريقي احسن متشوفين شي ميعجبج وحده ساقطه بدون تربيه.
اذا ماوكفتكم كلكم على تك رجل فلا اسمي ميمون.
__
تالين: الحكي ولج صارت مصيبه.
باوعتله وهي تطلك بعلجها وتحجي بمياصه.
رولين: مصيبتيش؟
تالين: ميمون راح من ايدينا.
رولين: هههههاي، ومنو كلج اعتمادي على ميمون هذا الارعن المايعرف الجق من البق؟!
تالين: شنو قصدج *****.
رولين: اللي يفيدنا موجود هسه وكاعد يخطط ويلعب بهدوء ومابقى شي ويصير محبس بأيدي.
تالين: خوفج لايصير العكس.
رولين: لتخافين بهاي الحاله أكدر اسيطر عليه بطريقتي.
تالين: ينخاف منج.
رولين: اي عفيه فديري بالج متدرين شوكت اطعن بيج.
___
تليد: اييييييييي وبعدينننننننننن شوكت تبطلين هاي الأكله لعبتتتت نفسي.
حميده: كافي لاتصيح احمد ربك وشكره لاكين اكل غيرك مامحصله اكل ونجب.
تليد: هذا الحجي مايفيد وياي اريد اخذ حقي منهم واحد واحد ونرجع نعيش هناك حالنه حالهم ميصير نبقى مشردين واحنه عدنا بيت أو ورث وعائلة.
حميده: استر علينا وعلى نفسك وليدي والله اذا شافك يموتك ومايرفله جفن.
تليد: لتخافين من هاي الناحيه راح اخلي يبوس رجلي وهو يتوسل بيه اجي اسكن ابيتهم.
حميده: شتريد اسوي ولك؟
تليد: مفاجأة انتِ اكعدي وشربي جكارتج وانتظري الأخبار توصل يم رجليج.
حميده: ولجججج يمةةة الحكيلي راح يجلطني هل ولددددد يربي عفوكككك استر علينا بحق نبيك.
مُزن: اسم الله ،اسم الله، شبيج؟
حميده: جيبيلي مي راح اموت ناقصه عمر من وره اخوج نشف ريكي.
مُزن: انتِ ماتعرفيه هاي سالفته من يوم يومه بس يريد ينتقم مايدري اللي ينتقم منه مات من سنين طويله وصار جوه التراب.
لطمت على صدرها وكامت تبجي بصوت عالي وتحجي.
حميده: نار بكلب وليدي اني السبب بيها، عسى ربي ماخذني ولا موافقه شورطني وجبتكم لهيج دنيا غبره مابيها خيرر.
مُزن: كافي لتحجين هيج ليصير بيج شي واني ماعندي احد وين اوديج.
حميده: الولد لعبت نفسه حتى من اكل البيت حقكم ماعدنا فلوس نشتري ريوك مثل العالم وهو يشوفهم مرتاحين اكيد يشيل بكلبه عليهم.
مُزن: لاظلمين بختج هم مالهم ذنب بلي صار ويانه.
حميده: هم مظلومين اصلاً ماتشوفيني ما راضيه عليه يسوي شي يندمه بعدين.
مُزن: ان شاءالله نهايتها متكون ندم النه كلنه.
حميده: ماضنتي جايتنا ايام سودة بس الله اليستر منها.
___
فزيت من النوم درت وجهي اله ملكيته موجود باوعت بانحاء الغرفه هم ماكو كمت من مكاني شفته واكف بالبلكون ويدخن تركته ودخلت للحمام غيرت ملابسي وغسلت وجهي وطلعت وكفت يمه.
ايريم: اليوم كاعد من وكت خيرك.
مهيائيل: اكو شي راح يصير كلبي مامرتاح.
ايريم: شلون يعني مافهمت؟
مهيائيل: لمي الملابس بسرعة خلي نرجع للبيت.
استعجلني لدرجه طلعنا بدون ريوك يسوق سريع داخل صمت منطق ولا كلمه حتى وصلنه نص الطريق نزل يم مطعم جاب اكل سفري إليه ورجع يسوق بقيت صافنه عليه ياترى شنو الصار وكلب وضعه لهاي الدرجه؟
معقوله احساس سيء لو اكو جني بالبيت حجاله شي؟
___
تسنيم: وين رايح؟
أبيل: طالع اني وبتال اكو شركه طلبت موظفين قبل سبوع وقدمت عليها واليوم الصبح خابروني علمود المقابله ادعيلي ان شاء الله اتعين.
تسنيم: يارب بمحمد وآل محمد وعلي الكرار ان شاء الله وليدي توكل ورب الكون وياك.
طلعت من البيت لكيته منتظرني بالسيارة صعدت وياه ورحنه للشركه كملت المقابله وطلعت انتظر اتصالهم اذا يقبلوني لو لا، واني امشي نضربت بيه وحده،
ابيل: الله الله، اسف منتبهت.
:ما صار شي اني هم مشفتك.
ابيل: اعتذر مره ثانيه اسمحيلي اساعدج.
:لا شكراً ماكو داعي لتعب نفسك اني المهن.
ابيل: لا شلون ميصير اني ضربت بيج ولازم اساعدج.
:مشكور كلك ذوق، بس بلا زحمه منو حضرتك مشفتك من قبل بالشركه؟
ابيل: اسمي ابيل أجيت علمود المقابله مالت العمل.
:اني تغاريد موظفه من شهرين اهنا يارب تنقبل وتصير زميل عمل.
ابيل: ان شاءالله ربي يسمع من عندج، وهسه اعذريني صديقي منتظرني لازم اطلع.
تغاريد: مع السلامه.
طلعت والابتسامه شاكه حلكي بدون سبب ودكات كلبي سريعه صعدت يمه أو اول مشافني وكال.
بتال: حمامه غراب؟
أبيل: حمامه وبيضه هم.
بتال: نقبلت بهاي السرعة؟
أبيل: لا كالوا نتصل عليك.
بتال: والحمامه المن لعد؟
أبيل: هيج ماكو شي من التفائل كلتها.
بتال: صدكتك.
سكت واني صفنت معقوله نعجبت بيها بهاي السرعه مستحيل شهور جديد عليه لأن معايشه من قبل، ركز على حياتك ابيل واطرد هاي الأفكار من عقلك بعد وقت الها.
___
:الووو وينك مختفي صار فتره طويله؟
:حبيبي مو كتلج مريت بظروف مو زينه ومحتاج مساعدتج امي مريضه حيل وماعندي احد يعتني بيها واني باقي يمها ان شاء الله تخلص هاي الأيام على خير واشوفج وطفي شوقي بيج يروحي.
:اويي لتحجي هيج تعرفني اخجل من عندك.
:بعد الصار ماكو اي خجل بينه انتِ مرتي.
:احبك حبيبي.
:شوكت اشوفج غزالتي؟
:مو كلت مشغول وي امك؟
:افضي نفسي الج نص ساعه المهم اشوفج واشبع منج ماكدر اصبر اكثر من هيج.
:تمام اشوف نفسي او اجيك من اطلع ادزلك رساله اشوفك بنفس المكان.
:انتظرك يحلو يعسل انت.
:فديتك اني والعشيرة.
:احركهم الج اليوم حرك بس تعالي.
___
ايريم: مهيائيل سوق على كيفك طريق سريع هذا لنسوي حادث.
مهيائيل: احس نفسي اسابق الزمن لو اوصل لو لا ادعي ميصير شي يدمرنا كلنه.
ايريم: تفائلوا بالخير تجدوه شنو هل التشائم العندك اليوم!!!
مهيائيل: وحقج راح تصير مصيبه شياطيني هيج تكول.
ايريم: الشياطين جن كذاب لتصدك بيها بكُل شي.
مهيائيل: له له له، هاي الشياطين مخليهم مراقبه بالبيت كل شي يصير يجون ينطوني خبر وهسه وصلني خبر سيء لازم استعجل قبل ميصير شي.
ايريم: ان شاءالله ماكو شي.
درت وجهي للشارع وعدوة القلق صابتني ماعرف ليش اني هم خفت طلعت موبايلي وراسلتها اطمأن.
ترانيم: وينج ملعونه صار سبوع ويومين انتِ ماكو لتسألين لتطمأنين ولتكولين هاي المره شلونها مالونها.
ايريم: غير شهر عسل حتى بهاي لاحكتني خليني اتونس كم يوم.
ترانيم: اتونسي ياهو لازمج بس مو تنسينا فد مره، ولو كالوا من شاف الماي عاف التراب.
ايريم: قصدج اذا حضر الماء بطل التيمم.
ترانيم: المعنى بكلب الشاعر كوليلي شذكرج بيه اليوم؟
ايريم: راجعين بالطريق.
ترانيم: جذبببب.
ايريم: والله شبيج.
ترانيم: ياهلا ومية هلا افرشلكم الدرب ورد بعد عيني.
ايريم: ياعمري تسلميلي، أريد اسألج سؤال صاير عدكم شي؟
ترانيم: صايره اشياء تعالي وسولفلج.
ايريم: اقصد مصيبه معينه يعني.
ترانيم: فرججج منين جبتي هل كلام؟!
ايريم: صايره لو لا؟
ترانيم: لا داده ماكو شي.
ايريم: متأكده؟
ترانيم: احجيها وخلصيني شنو سامعه؟
ايريم: حبيت اطمأن لا أكثر.
ترانيم: عليه سوالفج يحلوه سولفي والله ماهدج حتى اعرف.
ايريم: مهيائيل طلع بينه مستعجل من الصبح عبالي سامع شي صاير يمكم ردت اطمأن.
ترانيم: واذا صار يطبهن مرض على اساس يستاهلون القلق والله بطرانين لو اني منكم ابقى اهناك شهر شهرين ولا ارجع حتى امل ولو ذلك الجو الحلو منو يمل منه.
ايريم: ياسيم شلونها؟
ترانيم: والله البنيه تقره بأديها ورجليها حتى موبايل ماكو.
ايريم: والبقيه؟
ترانيم: دَاسِم يسوي سحوره بالغرفه وميمون دايح ورويف مشغل ردح ويركص مامصدك يعرس المسكين.
ايريم: خطيه ربي يتممله على خير.
ترانيم: آمين يارب، كايمه اسوي الغده بما انو راح تجون اريد ادللكم.
ايريم: عاشت ايدج من هسه يروحي.
ترانيم: وايدج حياتي، توصلون بالسلامة ان شاء الله.
___
:غرفة ظلمه واني بيها وحدي أيدي مربطه بالكرسي وعلى حلكي لاصق دموعي تنزل وين صرت وشنو سويت بنفسي، نقطع نَفسي من انفتح الباب ودخل واحد مخلي لثام على وجهه تقرب مني ابطئ نزع الثام ونفخ بوجهي غمضت عيوني خايفه نزل راسه يم أذني وحجه بصوت مليان حقد، غضب، غل.
:يامرحبا بيج بجهنم نفسها، اوعدج اجيتي تمشين برجليج مطلعين منا الا وانتِ تعرجين.
:وخر اللاصق عن حلكي بعنف ونزل راسه يريد يقبلني بتعدت وكلت بخوف: منو انت؟!
ابتسم بوجهي وكال بشيطانيه.
:عزرائيلج...
يتبع..
البارت اكثر من 4030 كلمه..
راوني تفاعل يسرني شمعاتي، تعليقاتكم بين الفقرات وتصويتكم للبارت حبابيب.
تصبحون على الف خير وعافيه يارب..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!