حسابي الأنستا zahraaahmedn99
لتنسون التعليق بين الفقرات والتصويت للبارت والمتابعه شمعاتي ❤️
مهيائيل
الكاتبة (زهراء احمد)
________
ولأنكِ إمرآه تفاصيلها كثيفه لا يليق بكِ إلا أن أسرد عليك رواية.
___
رولين: اخذت اللي تريده وهسه جاي تعاقبني هه، اخ يالدنيا شكد صغيرة وحقيره هم.
ميمون: بحقارتج.
رولين: اني وياك مبيتيها سوا على منو تضحك!!
ميمون: شنو بيتنه؟ اني ما اذكر اتفقت وياج بيوم على شي.
رولين: اكيد تنكر شترجه منك بس ربك يعرف كل شي بالحرف.
ميمون: تموتين ويروح كل شي وياج للكبر ابسط منها ماكو.
رولين: مثل موتت بلقيس؟
ميمون: ذيج تستاهل اخذت جزاها وانتِ اليوم دورج.
رولين: يدور شرفيات النايم بين ***** النسوان، تهي بهي.
ميمون: وانت عايشه بالجامع!! احنه الثنين نفس الطينه.
رولين: انت اللي جبتني من بيتي حتى تنتقم من اخوك هسه صاير براسي بس انت وبس، عجيببب شكد طلعت حقير اكثر من ما توقعتك.
ميمون: يابيت هذا؟ اني طلعتج من يم ناس زباله ومستقبل قذر نيتي جانت كل شي يصير بأسمي واشمر دَاسِم ومرته بره بس صار العكس وبمكان متوكفين وي الشخص الساعدج حبيتي اخوي وزحفتيله، هه مثلج وحده **** بعمري ماشفت.
رولين: اني من الأساس هاي طينتي ما اخجل منها بس كول عليك شلون كدرت تثق بوحده مثلي متعلمه على هيج طريق!! بعدين اخوك إذا جنت خايف عليه لهاي الدرجه ليش محجيت شي يمه وبقيت ساكت؟ اني اكلك لأن مكدرت تنطي بنفسك كدامه وتبين واحد طماع تهمك بس الفلوس.
سحبتها من شعرها ضارب راسها بالحايط.
ميمون: اخوي يبقى اخوي على رغم كل شي صار من قبل هدفي مجان مهيائيل من الأساس بالعكس اني حميته منج ومن سوالفج ومن الكل، على بالج ماعرفج كم مره خططتي انتِ وتالين تموتنه وخاصه من شفتي ايريم تخبلتي وصعد هرمون الغيره وبقيتي تحاولين تفرقيهم بكُل الطرق، بالأول سحر وبعدين حاولتي تسمميها وكم مره تحاولين توكعيها من الدرج وتموتيها وأخير شي اتفقتي وي حبيب الكلب يجي للبيت بوقت مهيائيل ماكو حتى تخليهم يطلكون،
على بالج بهاي الأمور كلها اني ماعندي علم؟
اذا جوابج اي فهذا يدل على انو انتِ شكد غبية اما اذا لا فيدل على غباء مضاعف،
الشاعر يكول: ان كنت لا تدري فتلك مصيبةٌ
وان كنت تدري فالمصيبة اعظمُ
رولين: وانت شلون عرفت!!
ميمون: اذا مهيائيل الأصغر مني عمراً ومهارة بالسحر مكدرتيله تكدرين عليه!!
رولين: اريد اعرف، اعتبرني غبيه ما افهم وحجيلي.
ميمون: هاي مال غبية منتهين منها بس بما انو هاي نهاية الطريق فراح احجي، كل شي سويتيه حتى تسيطرين بيه عليه جنت اعرفه وصراحه فدتيني بدون متدرين، بقيت اشتغل وخطط ومحد حس بية، وبالأخص مهيائيل مردته يشك حتى العب بكيفي ومزاجي واليوم صار موعد نختم هاي العبه وكل واحد يرجع لمكانه الأساس.
رولين: يعني مجنت تشرب العصير اللي اسويه الك؟
ميمون: يروح بالمغسلة.
رولين: والكحول؟
ميمون: عندي هواي بطاله.
رولين: اني حتى بالجكاير خليتلك شلون مأثر بيك المخدر؟!
ميمون: مادخن انا بس اشرب، الواضح معرفتي شنو احب وشنو اكره طول الفتره العشتي بيها ويايه للأسف.
رولين: مستحيل ماصدكك.
ميمون: هه وليش بله مصدكين؟
رولين: لأنك بيدك سويت السحر لمهيائيل بليلة عرسهم حتى مايكدر يقرب منها فشلون نقذتهم من خططي اذا انت من ايدك وكعتهم بيهاا؟
ميمون: هههههههههاي، مهيائيل مجان بيه سحر هو بس تورط وي جنية عاشقه بسبب عمل وبعدين مرته جانت معرضه لحادث سيارة وبقوا يومين بالمستشفى من ليلة العرس.
رولين: مستحيل ماصدكك شلون يعني!!!
ميمون: هذا الشلون، احنه الشياطين محد يفرض علينا شي تكدرين انتِ بطول اصبعي تمشيني بمزاجج!!
رولين: ليش تحرشت بيها اذا مجنت متأثر بالمخدرات؟
ميمون: بوقتها سكران تأثير الكحول مو المخدر حتى ما اذكر شنو سويت بالضبط ومن صحيت عتذرت من مهيائيل ونتهى الأمر.
رولين: تغيرت هوايه مو ميمون اللي اعرفه.
ميمون: لأن انتِ ما عرفتيني من الأساس، مكدرتي تاخذين كلبي وتبدين وياي صفحه جديده بعيد عن القذارة الجنتي عايشه بنصها، اختاريتي طريق المكر والخداع ولعبتي بذيلج من وراي، عبالج مستحيل يجي يوم وكشف الاعيبج ورجعج للشارع الأجيتي منه.
رولين: لتبري نفسك اكبر مساعد إلية هو انت.
ميمون: صح ما انكر بش قررت اصحح غلطي واخلص منج بأقرب مزبله.
رولين: راح تموتني؟
ميمون: لاا راح اوديج سفره لتالين سلمي عليها هوايه وكليلها ربج عاقب بنتج الثانيه وعماها خلي يفيدج الندم هسه بعد السويتيه بأم ميمون.
تركتها مربطه وطلعت لبست نظارتي نازل واسمع اصوات الشرطه وصلت للبيت، اني ميمون الابن الأكبر الزاهده عشت وي امي سنين طويله وشفت ألمها وعذابها من الكل ومن اشوف طيبتها وحنيتها وي ناس ماكلين حقها وظالميها قررت امشي وره مصلحتي واتبع طريق المكر والحيله حتى مايجي يوم وصير مثلها، هاي الدنيا يرادلها حيل محارب تعاركها معارك وتاخذ حقك من حلك الأسد والا تموت بدون محد يعرف شنو اسمك،
دَاسِم وتالين ورولين كلهم جانوا الأساس حتى اوصل للأريده اني سحار اي وشغلي وي الشياطين بس ردت انتقم من كل واحد ظلمنه وعذبنا واحنه أطفال فصرت العدو للجميع ومهيائيل بالصادرة وكل شي صار مخطط من عدنا احنه الثنين حتى وجود رولين بحياتي ماهي إلا طعم ومصيده للعم وزوجته ومن خلص دورها نغلق باب مهم من أبواب الماضي لبيت السحره،
صعدت يمه بالصدر هادئ ومشغل قصيدة باسم كالعاده كلما يحن الها ويمر ذكراها على باله تكون هي الرفيقه.
ليش اللي نحبهم نصير بعاد عنهم
يازمن والله كفر تحرمنا منهم
مهيائيل: اليوم نكدر نكول الله يرحمها وكدرنا ناخذ حقها بعد تعب سنين طويله.
ميمون: جنه نكدر نسوي كل شي بدون دخولي بهيج علاقه سامه.
مهيائيل: تالين صديقه مقربه من رولين ثنينهن نفس الطينه والسم تخلص منه بالسم.
ميمون: رجعت عزابي واخيراً يامرحباً بالحريه.
مهيائيل: فكر بالزواج مره ثانيه.
ميمون: مفكر لتخاف بس هسه مو الوقت المناسب خلينا نشوف ياسيم او وين تروح قضيتها.
مهيائيل: ذكرتني اليوم مسوين ثواب على روح الوالده خلينا نخابر الطباخ ونعزم الناس.
ميمون: منين طلع هذا!!
مهيائيل: ثواب صلح بين رائف وكوكب سبيستون، ولازم نستغل الأمر خابر الرجال نريد تجهيز كامل للعزومه.
ميمون: خبل انت شوكت نلحك!!
مهيائيل: شبيك هسه صار الصبح منا لليل حتى لو حصو يستوي بعدين السحره ويعزمون منو يكدر يكول لا؟
ميمون: محد اكيد والا ينسطر سطره بعمره كله ميكدر يخلص منها.
___
:مكدرت اغفى لصلاة الصبح عقلي سارح ياترى شنو بيه ليش هيج تغير فجأة وصار يحجي من وره خشمه؟ ملكيت جواب على سؤالي ومن إيست النوم يجي لجفوني لأن تعودت انام بحضنه والليله كأن فاقدة واحد عزيز هيج احساسي، هم مزروع بداخلي ماكدر اخلص منه،
كمت توضيت وصليت وعقلي وكلبي بحرب، نزلت دموعي الدافيه على خدي وشكيت لربي بيني وبين نفسي سوء العيشه بهذا البيت وشنو مضمولي بعد اكثر من العشته، سنه ونص أخذن من عمري عمر ثاني، وشكد ماكول تأقلمت خلص هاي هي تطلع سالفة جديده تخرب كل شي وترجعني لنقطه الصفر،
فتحت القرآن صارت عيني على آية (لاتحزن ان الله معنا) شكد بيها اطمئنانية وحب لايوصف من رب العالمين لعبده، قريت كم صفحة وغلقته مرجعته لمكانه،
لميت السجادة ورحت لفراشي عيني صارت عليه الواضح كاعد نفسه مو منتظم ويحرك بأيده شكد مجنت مشتاقتله وأريد بس احجي وياه كلمه اريح كلبي بيها واعرف شنو السبب ليش نكلب عليه فجأة واني مسويت شي كرامتي تمنعني، اللي يزعل من وحده يرضا من وحده لو يصير الهوه ويم كبريائي أقبل اموت وماطخله راسي،
خليت راسي على المخده دايره وجهي للشباك ودموعي تنزل بهدوء وعض بشفايفي مانعه شهكاتي تطلع ويسمعها، ماريده يفكر تصرفه هذا هزني، العلاقه الزوجيه لازم تكون مبنيه على الأحترام والتفاهم حتى تكدر تستمر بشكل حلو مدى الحياة مو ازعل ودير وجهي بمزاجي وتعامل وي المقابل بأسلوب جاف وبعدين يكلي انتِ السبب واني ما فاهمه السالفه شنو،
حسيت بيه تحرك غمضت عيوني ودعيت بداخلي اغفى وطغى عليه النعاس ونمت ماحسيت للساعه عشره الصبح اول مكعدت عيني راحت لمكانه ملكيته موجود، مابيه حيل ومالي خلك بقيت بمكاني بدون ماتحرك، شويه وندك الباب وفاتت بعد مجاوبتها، على وجهه هوايه اسأله ختصرتهن بكلمه وحده.
ترانيم: شبيج؟
عدلت نفسي مجاوبتها.
ايريم: مابيه شي.
ترانيم: متأكده؟
ايريم: اي.
ترانيم: شايفه وجهج بالمرايه؟
ايريم: لا ليش؟
ترانيم: مورمه داده عيونج صايره نفاخه وحمر تدرين لو متدرين؟
ايريم: اي هاي لأن مانمت البارحه.
ترانيم: متعاركين؟
ايريم: لا.
ترانيم: لعد شكو؟
ايريم: هيج ماكو شي مهم.
ترانيم: سوفليلي مثل امج انا لتظمين عليه بلكي أكدر اساعدج بشي.
ايريم: لو اكو شي حجيت بس هو ماكو شي من الأساس بدون سبب ماعرف شنو الموضوع.
ترانيم: خاف ضربت عنده الهرمونات علمي درس حتى ميعيدها.
ايريم: وشسوي يعني؟
ترانيم: اليوم مشغولين بالعزيمة قبل شويه اجه ميمون وكلي ماشاء الله عليه عازم العشيرة كلها شويه ويجي الطباخ يحضر تعالي ننزل نجهز باقي الشغلات هم تلتهين وتغيرين جو وتنسين السالفه وهم نخطط اني وياج شنو نسوي بيه.
ايريم: ماريد اسوي شي بما انو زعلان من وحده يرضه من وحده، يكفي اللي كاعد اعيشه هنا احس نفسي تعبانه وأريد اطلع، من تخلص العزيمه اروح يم اهلي وبقى هناك كم يوم اعيش بيهن بعيد عن هذا الهم والحزن.
ترانيم: وتعوفيني؟
ايريم: اذا تردين تعالي وياي نغير جو سوه.
ترانيم: عم وليد خال بنيه شسوي رايحه داده، سوي اللي يريحج وتعالي ننزل ماريد اكابل وجه حمديه وحدي.
نزلت وياها بما انو بعدنا الصبح ماكو هوايه شغلات نحضرها بس الأشياء الخفيفه ميمون معايف شي مجايبه، اشتغل من وره خشمي لأن صدك مالي خلك وترانيم تسولف وتضحك واني بالي مو يمها ابتسم بوجهه مجامله وعقلي مسافر بعيد، صدك الحب مؤذي بشكل جبير غلطه وحده يسويها المقابل حتى لو بدون قصد تبقى تفتر بالعقل فترة طويلة،
صار العصر ولحد الآن مشفته الساعه اربعه ونخبصنا مبقى شي ويجون دخل باوع بوجهي وعقد حاجبه منطيته مجال يحجي شي عفته ورحت جان مستعجل يريد ياخذ ياسيم قبل ميجون الخطار وراحوا ماخذين ترانيم وياهم بقيت وحدي بالمطبخ راح الواهس وصابتني الكآبه كعدت على الكرسي وعيني على الحايط وصافنه وبالي سارح بعيد بأفكار متشعبه وماعرف وين راح تاخذني،
صحيت على واقعي من سمعت صوت سحب الكرسي كعدت مقابيلي كايله.
حميده: اليوم وضعج مو طبيعي بيج شي؟
ابتسمت بوجهه مجاملة: مابيه شي سلامتج.
حميده: عمج علمني على الخيره صح مو كلش افهم بيها بس أكدر اعرف كم شغله.
ايريم: ميحتاج خيرة الكاتبه رب العالمين يصير بالخيره وبدونها.
حميده: كومي جيبي الزلاطه اسويها وانتِ حضري الخضره وخلينا نسولف مُزن نايمه واني كاعده وحدي والبيت فارغ محد بيه.
مناقشتها وسويت اللي كالت عليه اني انظف بالخضره وهي تفرم وتسولف.
حميده: مهيائيل عمره شهرين واني حبلت بتليد مصيبتي الحلوه، ومن جبته كثرت المشاكل وهذا يضرب وذلك يصرخ ومن يوم يومه رجلج ماحبني صارت مشاكل اكثر وتالين سوتلي مصيبه وبني عمره سنتين جانت عروس جديده ورادت تخلص مني بوكتني وتهمتني باطل، فدَاسِم اتعارك وي زوجي وهدده لو انت لو هي، بيتنا ماتعيش بيه حراميه توسل بيه جابها منا وداها مناك أصر الا يطلكني اهلي متبرين مني من قبلت اتزوجه بنت شيوخ تاخذ سحار عيب عدنا لهذا السبب مكدر يطلكني اجرلي بيت وطلعني وحدي وكام يجيني يوميه بعدين اخذ فتره هجرني وستمر بعيد سنتين ومن رجعلي اخوه مسجون استغل الفرصه ورجعني للبيت مهيائيل بذلك الوقت عمره خمس سنين يمكن اربعه ماذكر بالتحديد بس وكح ويعرف يلاسن ومحد يكدر يحجي وياه كلمه، امه مخليته على مايه ابد متضربه مو بس هو كلهم نفس الشي عدها ولدها اعز من الهوه حتى لو غلطان ادافع عنه وللامانه غزر وهوايه خاصه بمهيائيل، المهم من طلع دَاسِم من السجن رجعت لبيتي وبقيت اجيهم مرات ولأن ماعندي غرفه ابقى بغرفة زاهده شريجتي.
كل كلامها ماعبرته بس من ذكرت إسمها رفعت راسي الها وحجيت بستصغار.
ايريم: وقبلتي على نفسج تنامين على جربايتها؟!
حميده: مالها جربايه هي تنام بالكاع واذا مِسْوَط موجود يمها ويريد قربها تصعد تنام يمه بعدين تنزل وهذا الحجي جان هو يحجيلي اياه.
ايريم: لهاي الدرجه ذالها!!
حميده: اكثر بعد.
ايريم: شنو السبب؟
حميده: هاي التفاصيل يحجيها الج مهيائيل ملازم اذكرها اني، من حقي احجي بس الأمور العشتها والشفتها بهذا البيت،
هنا الشياطين ماكله وشاربه لحد ماملت وطلعت وبقوا اهل البيت هم الشياطين بنفسهم لتستغربين كل شي توقعي.
ايريم: ليش قبلتي على نفسج تاخذين زوج مره وتعذبيها هيج؟
حميده: حبيته.
ايريم: والحب ينطيج حق تظلمين انسان بريئ!!
حميده: بالنسبه إليه اي.
ايريم: وشنو ستفاديتي؟
حميده: كولي بيا طريقه ربج عاقبج واصلاً ميحتاج تسألين هذا السؤال كعدتي هنا جواب لكل شي سويته بالماضي.
ايريم: ام مهيائيل تعذبت منج ومن زوجها هوايه بيا وجهه تقابلون رب العالمين.
حميده: مو بس احنه، دَاسِم وتالين وكل واحد عاش بهذا البيت وحتى الأقارب عمام جوارين كلهم ظلموها، جان يدخل نسوان للبيت بحجة الخيره ومن يخلص يروح يشمر عليها الملابس تغسلهن، بين قوسين يعاملها وكأن هي عبده مو مرته.
ايريم: وأهلها وينهم من كل هذا؟
حميده: يهددها بالأطفال فجانت تسكت لخاطرهم.
ايريم: ماتت بسببكم مو؟
حميده: من ماتت اني جنت منفصله عن هذا البيت وعايشه وحدي وي أولادي لان مِسْوَط مات واني حامل بمُزن ومرجعت التقيت بيهم من جديد.
ايريم: يعني ابو مهيائيل توفى قبل امه؟
حميده: بسنين طويله.
ايريم: وبقت عايشه بهذا البيت؟
حميده: لعد وين تروح وحتى لو رادت دَاسِم مستحيل يخليها لأن البيت مالت ورثه.
ايريم: هو مو ملك دَاسِم من الأساس؟
حميده: منيله هذا الحافي هيج بيت!!
ايريم: ليش؟
حميده: شوفي عيوني اني من احجيلج على البيت ما اقصد هذا وانما البيت القديم الجان عايشين بيه كلهم وذلك البيت ملك لام مهيائيل حصراً أو أولادها، وإذا صدك ماخذه دَاسِم فأكيد بالحيله والتزوير هي مستحيل تنطي حق أولادها برضاها، كتلج من بعد وفاة المسموط الله لايغفرله اني نقطعت بشكل كامل عنهم حتى كبر ابني ومن سألني حجيتله ليش اجذب وحقد عليهم كلهم بالأخص مهيائيل والسبب واضح.
ايريم: وهذا البيت لعد بأسم منو؟
حميده: جان عدهم بيت ثاني اذكر يجوز هو هذا ويمكن مشتريه جديد الله أعلم، بس اللي اعرفه او واثقه منه دَاسِم ما اله اي حصه من الميراث.
ايريم: شنو السبب؟
حميده: لأن هو مو ورث خاص بأحد البيوت ثنينهن مشتريهن ابو مهيائيل يعني ذلك من الأساس ما اله حصه.
ايريم: اهله ماعدهم فلوس؟
حميده: عدهم بس هم مبذرين جانوا هوايه وخلصوا بين ورثه وبين تبذير وبين دين وضاعت الفلوس، الحرام مايدوم وهي فلوسهم كلها حرام.
ايريم: اكلنه كله من مال حرام؟
حميده: ابو مهيائيل جان عسكري وعنده راتب وهذا بقى المرته من توفى واني مالي حصه لأن ماكو عقد محكمه بذلك الوقت جان مو من حقه يزوج بدون ميسألون على مرته ويحققون بيها لهذا تزوجني بس عقد شيخ ومحد يدري عبالهم عرس رسمي متشوفين يخاف من التهديد بسرعه عافني.
ايريم: معافج اصلاً حبج من كلبه بس انتِ ناكره العشره.
حميده: بهذا العمر عرفت شكد ظلمني من مخلالي حقوق وانطه كل شي الها، اسمه ورثه وخلالها اسم كدام العالم او ولدها محد يكدر يفتح حلكه وياهم بالنهايه هي ربحت واني خسرت.
ايريم: وهذا من ايدج لتلومين احد، انتِ قبلتي تجين على رأس وحده.
حميده: ودفعت ثمنها عمري.
سكتت وصارت الساعه سته رجع مهيائيل وي ياسيم وكالوا باجر يسوولها رنين مغناطيسي مره ثانيه حتى يتأكدون من السبب والدكتور طمنهم تكدر ترجع تشوف مره ثانية،
ندك الباب وتفاجأت من شفت امي واستاج رحت بسرعة حاضنتها.
تسنيم: شلونج ماما شخبارج؟
ايريم: من شفتج صرت زينه.
تسنيم: حبيبتي عساج دوم زينه وبخير.
دخلن جوه وبقت يمهن حميده تسولف نسوان عجايز وتلاكن ماكو موضوع ميفتحنا حتى الحرب العالميه يذكرنها،
واجت السبب الرئيسي لهاي العزومه دخلت لابسه اسود سلمت عليها ورحت للمطبخ كل نيتي اتصل برائف وكله يجي يشوفها بس هو سبقني ودخل وبنفس اللحظه هي اجت صاروا واحد بصف الثاني هي خجلت وخدودها صاروا حمر وهو بقى بس صافن بوجهه قطع هاي اللحظات الرومانسيه صوته وهو يصيحه.
مهيائيل: رائف تعال عمك يريد يشوفك.
بتسمت من مسح على وجهه مستغفر وطالع، كمل العشا وبقينا نغسل بالمواعين وهي اجت تساعدني واسمع صوتهم صار عالي.
مهيائيل: الله بالخير عليكم، ابنا خاطب صار اكثر من سنه والدين يكول خير البر عاجله واحنه طولنا هوايه شنو رأيك ابو سعد؟
ابو سعد: ابنك مايقبل بالشروط المنطيها.
مهيائيل: تريده يعوف إخوته ويروح يعزل وحده ويصير كطعي، انت المفروض حتى لو يجي هو ويكول هذا الكلام ترفض، المابيه خير لأهله مابيه خير للناس والا انتم شنو رأيكم؟
الكل: كلامك زينة العقل.
ابو سعد: بنتي موظفه وتريد تاخذ راحتها تطلع وتلبس بكيفها محد يمنعها ويصير عليها رقيب.
مهيائيل: من هاي الناحيه اطمأن صدكني محد اله علاقه بيها كل واحد مهتم بنفسه وبحياته، بس تجي وتعيش اهنا تحب الحياة ومتريد تطلع منها بعد، ابنا مستعجل شنو رأيك نسوي الزفه يوم الثنين؟
ابو سعد: يومين بعد وين نلحك خليها يوم الخميس.
مهيائيل: يوم الخميس يوم الخميس، كوم سلم على عمك حبيبي.
جنت كاعد بصفه بتسمت حاجي بصوت ناصي.
أبيل: فريت محبسك؟
مهيائيل: لا سطرته بخرزه.
ميمون: شتهمسون؟
مهيائيل: ناخذ غيبتك.
ميمون: بذمتكم ولحد يكول بالعباس مابريكم.
مهيائيل: الخفه لهل وجهه كوم هلهل بنص النسوان رائف راح يعرس.
ميمون: كللوش نفتحت الجبسه.
مهيائيل: يوم لأبيل ونفرح بيه.
أبيل: آمين.
مهيائيل: مستعجل تزوج؟
أبيل: شيبنا.
ميمون: مرتك يمي.
مهيائيل: ماتفيده بعدها صغيره.
أبيل: اني اعرف وحده بلكي ربك يسهل وتصير.
مهيائيل: ماتصير.
ابيل: شوف التفائل.
مهيائيل: وشاربي ماتصير قدرك يختلف انت راح توكع بحب يلوعك وقريب اشوفه.
أبيل: اني احب وحده اصلاً.
مهيائيل: اكله ديج يكلي خلي يبيض، بابا افهم هاي مو نصيبك وقريب كلش تعرف صحة كلامي.
أبيل: واذا صارت؟
مهيائيل: اطلك رائف.
رائف: اني شكوو!!
مهيائيل: صوتك عمك لايسمع ويكول ماعرفنا نربي.
مكدرت ابقى ساكت خنكت ضحكتي عيب من العالم لدرجه مكدرت اتنفس بعد.
ميمون: اختنك اخو مرتك حلها بعد اذا تكدر.
مهيائيل: كايله اخنك ضحكتك!!
ميمون: عليك الله باوعله راح ينفجر.
مهيائيل: خلينا نسكت شوف شلون الكبار يباوعون علينا عبالهم تخبلنا.
رائف: حقنا الميت عزيز مو ياهو الجان.
مهيائيل: اسكت خاصه انت تريد تهز جتف بنص هي الفاتحه ولازمك العيب ولو انت مايلزمك شي.
رائف: استأذن منكم رايح ابارك لمرتي بهيج مناسبه جميله.
ميمون: من تدخل مرته لهذا البيت وتشوف حقيقته تندم أكثر من شعر راسها.
مهيائيل: اذا تحبه تتحمل.
ميمون: مثل مرتك.
مهيائيل: انا محد يشبهني اعرف شلون اسيطر على حياتي الخاصه وافرق بينها وبين شغلي عكس الجميع.
ميمون: كام التكبر.
مهيائيل: كوم صب جاي العمك.
ميمون: وعلي هسه اسطره بسحر خليني كاعد عاقل هاي الوجوه نصها ماطيقها.
صاح بيهم بصوت عالي وهو يبتسم.
ميمون: بذمته المايقره الفاتحة.
كتمت ضحكتي كوه صحح مهيائيل وهو يتنحنح.
مهيائيل: يقصد رحمه الله والديه من قره الفاتحه، طايح الحظ كم مره كتلك لاتسكر بهيج اوقات؟
ميمون: جا شنو جاين بس ياكلون غير يقرون الفاتحه على روحها.
مهيائيل: محد محتاج فاتحتهم من الأساس كافي ولدها يقروها الها.
ميمون: حافظها؟
مهيائيل: علمني ابو النسوان.
ميمون: روح طلعها على اليوتيوب وحفظها مايصير اعلمك عيب.
مهيائيل: اسكت اسكت راح ننضفح من وراكم.
ميمون: اكلك تخيلتهم يتكامزون شنو رأيك نلعب وياهم لعبه؟
مهيائيل: هاك استلم عود انت الجبير.
بقوا هيج يتناقشون ويحجون وي البقيه بدون محد يحس بيهم الاستقبال جبيره والصوت يضيع بيها.
:واكفين انظف ودخل يهوس ويغني ويطك اصبع بصوت خفيف.
عضت شفتها اله كايله بصوت ناصي.
زُمردة: هسه يسمعك احد كافي.
رائف: اليوم يومك يابطل اليوم تلعب جوله.
زُمردة: رائف شبيك شنو هل حجي!!
رائف: فديت الخدود الحمره انا، جبتلج خبر يطك بالكاع عرسنا تحدد يوم الخميس حضري نفسج بعد بيتي لأن بذلك اليوم اعلمج شلون متخليني الزم ايدج حتى وانتِ مرتي.
صارت خدودها حمر من صدك حسيت بيها صخنت خطيه عافتنا وطلعت وهو يباوع لأثرها والضحكه شاكه الحلك، خلصنا والكل راح واني واكفه ارتب شويه وسمعت صوته يحجي ويايه التفتتله حاسه نفسي صار فتره طويله مسامعه بيها صوته بقيت صافنه بوجهه حتى فززني كايل.
مهيائيل: ابيل يريد يسلم عليج منتظرج بالحديقه مقبل يدخل جوه.
تذكرت كل شي وحسيتها فرصه مناسبه اردله السواه بيه البارحه حجيت بكل ثقه واني اغسل أيدي.
ايريم: اريد اروح وياه.
مسمعت جوابه درت وجهي شفته مكتف أديه وره ظهره ويباوعلي برفعة حاجب اني هم سويت نفس الحركه خزرني كايل.
مهيائيل: اخوج منتظر بالحديقه تطلعين تسلمين عليه وتجين والأفضل سلام من بعيد راح انتظرج عندج خمس دقايق اذا ماصعدتي اني انزل.
ايريم: والا؟
مهيائيل: اليوم النبرة تغيرت صاير شي وانا مادري؟
ايريم: اني حره، اضحك، اتغزل، ارفع حاجبي، تبقى نفسيتي ومتكدر تعترض، وكتلك اريد اروح مشتاقه لبابه ومشفته اليوم.
مهيائيل: واني كلت مترحين.
ايريم: اوكي، ابتسمت طالعه للحديقة سلمت عليه وحضنته وكلبت خلقتي من شافني هيج بسرعه سأل قلقان.
أبيل: شبيج؟
ايريم: مابيه شي بس مشتاقه الكم صار فتره ما اجيت.
أبيل: تعالي وياي هسه وباجر أرجعي.
ايريم: خاف مهيائيل ميقبل.
أبيل: ليش ميقبل اني احجي وياه معليج بيه روحي لبسي عبايتج وتعالي واذا عاند اخابر ابوي يجي يحجي وياه.
ايريم: ماريد تصير مشكله اعرفه ميقبل.
أبيل: مشكلة شنو اسم الله ماكو هيج حجي روحي وتعالي بسرعة منتظرج وصيحيه احجي وياه.
دخلت صاعده سريع صارت بوجهي ترانيم نازله نسيت أكلها ابيل واكف بره حتى متطلع ورحت للغرفه ملكيته موجود نزلت لغرفة السحوره هم مموجود غميت نفسي على هيج حظ رجعت لغرفتي سمعت صوت الدوش، غمضت عيوني بقهر بس مو مشكله اعاقبك واني كدام عينك محيتاج يم أهلي، نزلت اكله يروح وكفت من سمعت صوتهم يسولفون.
__
:نزلت اشرب مي وردت اطلع لبره اكعد على المرجوحه واخذ نفس اني بالعادة حجابي على راسي دائماً ما البسه بشكل كامل بس اخليه على رغم ماكو رجال غريب بس هي عادة، طلعت ونصدمت بيه واكف وعينه بالموبايل ردت ارجع بسرعة وقفني وهو يكول وعينه مرفعها يمكن منتظر ايريم وعباله اني هي.
ابيل: صحتيه؟
ترانيم: لا خويه منو هو؟
رفع وجه اليه كايل بعقدة حاجب.
أبيل: يامرحبا خاله شلونج شلون صحتج؟
ترانيم: خلخاله تخلخل عظامك.
أبيل: ماحجي وياج مبينه عصبيه ايريم وين؟
ترانيم: نايمه يم رجلها.
أبيل: اختي هي تره.
ترانيم: وهو رجلها.
ابيل: بدون زحمه صيحيها إليه اريد اروح.
ترانيم: محد لازم رجليك تكدر تروح.
أبيل: استغفر الله العلي العظيم، أريد احجي وي اختي إذا ممكن تصيحيها إليه بدوم أمر عليج.
ترانيم: اي هيج واحجي حجي معدل هسه اصيحها.
خطيت خطوه لجوه وسمعته صوت يكول بهمس.
أبيل: عجوز شمطاء.
التفتتله.
ترانيم: اتفضل خابرها انت العجوز رايحه لغرفتها تنام تأخر الوقت.
عفته ودخلت صارت بوجهي ايريم فاتحه الحلك خزرتها ورحت لغرفتي اليوم جان متعب بشكل مو طبيعي.
أبيل: وينج صار ساعه؟
ايريم: بالحمام روح انت وباجر تعالي بالليل انتظرك.
أبيل: تدللين كم ايريم عندي انا، تصبحين على خير حبيبتي.
ايريم: وانت من أهل الخير ياروحي.
هو راح قفلت الباب ودخلت صاعده لكيته طالع من الحمام اخذت دوش وطلعت شفته متمدد ونص جسمه مخليه على تاج الجربايه والغرفه صايره مدخنه عرفته ضايج وبداخله موضوع زاعجه حيل وبدون تفكير اكيد لان كتله اريد اروح لأهلي،
جففت شعري وتوضيت صليت ركعتين ورحت نمت، بدون ماباوع بوجهه اصلاً، دقايق وقطع هذا الصمت كايل.
مهيائيل: شبيج؟
جاوبته واني وجهي للشباك.
ايريم: سلامتك.
مهيائيل: ليش اليوم عاكفه الوجه؟
ايريم: عاجبني.
مهيائيل: احجي وياي عدل مو اصغر جهالج انا.
ايريم: تصبح على خير تعبانه وأريد انام.
سحبني من أيدي اله صار وجهه بوجهي يحجي بعصبيه وضاغط على زندي بكل قوته.
مهيائيل: شبيج اليوم متخبله انطيتج مجال زايد الواضح شنو فلمج فهميني؟
ايريم: وخر ايدك وحجي وياي عدل لاتصرخ بوجهي مو أصغر جهالك انا.
مهيائيل: هيج صارت!!
ايريم: اي نعم، اعاملك بالمثل ما زايد ضلع انت.
مهيائيل: تكفي شري ايريم متدرين بيه اذا يصعدن السوادين هسه شنو أسوي بيج.
ايريم: راويني حابه اشوف شنو تسوي.
مهيائيل: راح نبقى هيج راويني وراويك؟
ايريم: هذا الموجود، ربك مايختلف عن ربي، والمعامله بالمثل مع الجميع، تزعل من وحدك مراح اراضيك لو انتظر منك كلمه، مثل ما اكو واجبات عليه اكو حقوق هم، اعاملك بنفس اسلوبك حتى تحس بشعوري نفسه وهيج نتعادل.
مهيائيل: هذا المزعلج تصرفي البارحة وليش متحجين؟
ايريم: اني زوجتك مو خدامه عندك، ما اتقبل المزاجيات، براحتك تضوج وبراحتك تجي تسولف وتضحك، المشاركه الزوجيه فاهمها غلط، من يزعلك شي شنو ماكان تجي وتكلي ونتفاهم ونحل الأمر مو دير وجهك ويوم كامل متحجي ويايه حتى صباح الخير مكلتلي.
مهيائيل: مايحتاج اكول صباح الخير إذا انتِ الخير لصباحي، يا سر سعادتي وضحكتي وعمري وحياتي وحبيبتي وام بيتي ومريتي وارنوبي الحليو، مجنت زعلان منج البارحه بس ضجت لأن خرب المخطط علمود روحتنا للمقبره لا أكثر لا أقل وصارت بوجهج بدون قصد وعيونج.
ايريم: عود يعني شنو تريدني ارضه بعد هذا الكلام؟
مهيائيل: وليش مترضين غالط عليج سابج طاردج!!
تره هي هم زايده منج كتلج تصبحين على خير ونمت واصلاً مانمت لأن متعود على حضنج وفاركته بلحظة عصبيه، وبعدين هي اجت الحاله وصار اللي صار، تردين حياتنا كلها احبج وتحبيني لازم يصير شويه برود.
ايريم: اني مايقنعني هيج حجي، ماكو نار بدون حطب لازم اكو سبب، وشنو مجان الأمر متعاملني بهاي الطريقه.
مهيائيل: ايرو انا دايس على كلبي كوه وحق ربج البيه محد حاس بيه غيره هو وحده منين يجيني الخلك والواهس بهيج وضع نعيشه؟
ايريم: بس اني موجوده يمك اذا متخلي حملك يمي وين تخليه لعد؟
مهيائيل: ماريد اضوجج وياي عوفي كل شي وتعالي لحضني مشتاقلج.
ايريم: منو كلك اضوج بالعكس اني افرح من تحجيلي وتشاركني همك.
مهيائيل: همي مينحجي، الموجود بالكلب إذا طلع يدمر اهل البيت كلهم.
ايريم: والحل تبقى تتعذب هيج؟
جر حسرة طالعه من نص كلبه كايل.
مهيائيل: تعودت هذا العذاب صار ونيسي من يوم ماتت لليوم.
خليت أيدي على خده كايله بأبتسامه.
ايريم: خلينا نعوف الماضي شويه عندي موضوع اريد أسألك بيه واخذ رأيك.
مهيائيل: شنو هو؟
ايريم: لو ترانيم نخطبت توافق على زواجها؟
مهيائيل: اذا جان مناسب ليش لا.
ايريم: فكرت مراح تقبل.
حضني بقوة جاعصني وكال.
مهيائيل: مستحيل اظلم وحده بيهم مثل ماهو من حقي يبقى من حقها تعيش وتسعد نفسها، عندج عريس الها؟
ايريم: لو اكو جان كتلك اني هم اتمنى تعيش وتنسعد نظلمت هوايه بحياتها.
مهيائيل: امها السبب.
ايريم: ليش؟
مهيائيل: مجانت خوش ام زوجتها لابن صديقتها الشايب وهاي النتيجه.
ايريم: ليش هي مو نفسها امك؟
مهيائيل: لاا هي اختي من أبوي.
ايريم: يوميه اكتشف شي جديد صادم بهذا البيت.
مهيائيل: بسيطه امها جانت الزوجه الأولى للوالد بس محبته حسب سوالف ترانيم اول مزوجت بتها طلبت الطلاك وتزوجت وأحد ثاني وهاجرت خارج البلد ومن ذلك اليوم مسامعه عنها شي.
ايريم: عبالي امك هي الزوجه الأولى لأبوك صدمتني صراحه.
مهيائيل: هو معتبر ذيج مرته اصلاً ومن طلكها بفترة بسيطه صارت مشكله بين عشيرتين راح بيها زلم هواي من عشيرتنا وحتى يحلوها وماكو هدر دم انطوا مره فصليه وحسب القوانين لازم ياخذها الرجال الأكبر وصارت من نصيبه هاي المره هي امي زاهده.
جانت هاي الكلمه هي فتح باب الماضي المؤلم لمهيائيل وشلون جانت الحياة بهذا البيت التمليه الشياطين...
يتبع..
البارت اكثر من 4180 كلمه..
تعليقكم بين الفقرات وتصويتكم للبارت شمعاتي..
اللي سألوا على قفلة البارت القبله ليش متوضحت فالجواب هو سجن تليد وضحناها حبيباتي..
تصبحون على الف خير وعافيه..
لأي شي حابين تعرفوا بخصوص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!