حسابي الأنستا zahraaahmedn99
لتنسون التعليق بين الفقرات والتصويت للبارت والمتابعه شمعاتي ❤️
مهيائيل
الكاتبة (زهراء احمد)
___
إن كل ما في الكون بريء و كامل ، إلا الإنسان.
___
مهيائيل: تزوجت امي وهي مراهقه عمرها ميتجاوز 15سنه مجان يحبها ويتقبلها بس لأن حلوه يشبع رغباته بيها لا أكثر ورب العالمين مراد تصير أم بهذا العمر بقت اربع سنين وكام الكل يسميها "العقيم الفصليه المابيج فايدة" نصحوا يزوج وهو ماكال لا راح حب وحده اصل وفصل وبنت شيخ معروف ايام زمان، بهاي الفتره كسر ربج عينه وطلعت حامل بميمون اخوي الجبير غلس عن حب حياته حبته سليمه كون، المهم خلفت امي من طلع الأربعين راح خطب، كلها حجت عليه يمعود عدل بعدل مرتك وحبلت الزم الدوده وستجن مفاد وياه الحجي راح خطبها اهلها مقبلوا بيت سحاره معروف من ذلك الوقت اب عن جد منو يضحي ابنته وهم ناس معروفين بالحظ والبخت شيسوي الاغبن يروح ويطفر على بيتهم نص الليل ويتواعد وياها ينطيها شراب تشربه لهلها حتى يوافقون ولأن حوبة امي قوية لزموه أو وين اليوجعك معافوا بيه عظم صاحي وزوجوها اله وتبروا منها حتى ينطم العار، هم اوادم وناس تخاف الله حيل مكتلوها وخلوها عايشه وصارت شريجة امي حميده لعنها الله ليوم الدين على كل شي سوته بأمي.
ايريم: وشنو صار بعدين؟
مهيائيل: دَاسِم بذلك الوقت جان ادمي وهوايه دافع عنها وماقبل يزوج عليها بس ماكدر يلزم الدوده بعدين مو بيده ******* عدهم وراثه، امي اجت لهذا البيت فصليه بثوب أسود وطلعت منه بثوب أسود وعاشت كل عمرها وسط سواد وظلم، اذكر مره دخلت للغرفه اصيحها جوعان ردتها تسويلي اكل وشفت حميده فاتحه كنتورها ومادري شنو تاخذ منه رحت يمها وعظيتها برجلها خليتها تصرخ وصاحت ابوي عليه كتلني كتله زوركني واني الساني يقسم عليهم ماحبهم ابد وماكدرت اتظاهر عكس هيج،
دموعها وغصتها بروحي تفتر فر ماكدر انطي بيها حتى لو جان ابوي، وبقيت كلما اشوفها بغرفتها اسويلها مشكله والله مره حركت أطراف ثوبها خليتها تشيل نفسها وتركعها واني واكف بالباب مبتسم عليها وخاصه من اشوف عيون امي تضحك احس الدنيا ماشايلتني،
كل سوالفي هاي واني طفل ومن كبرت ادخل يمها للغرفة واقفل الباب وماخليه يدخل يمها ومات وهي ما راضيه عليه ورحت لدفنته من وره خشمي قضيان واجب لا اكثر حتى سورة الفاتحه ماقريتها عليه لأن مايستاهلها.
ايريم: هذا جزء بسيط من العاشته والشافته مو؟
مهيائيل: كل همها وغمها شاركته وياها، اخلي راسي على رجلها وايدها تلعب بشعري اسحبها وبوسها واسولفلها كل شي يصير وياي حتى من اتعارك وي أبن الجوارين احجيلها على رغم هي ماتقبل بس تسمعني ومتسويلي شي غير دعائها الدائم "الله يهديك وليدي ويسحبك لطريق الصح وتموت وهو راضي عنك"
ارفع عيني الها وكلها يجي يوم تسحبيني انتِ وتعلميني وتوب على ايدج، تنزل تبوس راسي وتكولي جملتها المعتادة "الله يرزقك بنت الحلال التسحبك على ايدها، انت بريت بأمك لازم تنهدي لأن تستاهل التوبة والمغفرة".
بآخر أيامها جانت هوايه تنام اروح يمها وفتح اديها واغفى بحضنها، اشبع ريتي بريحتها الحلوه وماشبعت منها ولليوم بكل دقيقه وثانيه ولحظه تمر اشتاقلها، الأم نعمه فقدها محد يعوضه أبد.
ايريم: شنو ما احجي بعمري كله مراح أكدر امحي حزنك ونسيك همك، واعرف عدل مكان الأم شنو مجانت محد يكدر يعوضه، والمشاعر بعمرها متروح من داخل الأنسان للنهاية تبقى موجوده بكلبه وبروحه وخاصه لو جان انسان عزيز، يمكن اني ماحس بشعورك نفسه بس مقدرته جداً ولهذا السبب اكلك اني يمك، بكل وقت وكل يوم وكل ساعه ولنهاية عمري اذا مو بجسمي بروحي واعظم شي هو التواصل الروحي، من تحس بقرب حبيبك منك دائماً هذا الإحساس وحده يداعب الكلب ويخلينا نكدر نكمل،
امك راحت عن الدنيا بس هي موجوده بروحك مهيائيل، تشوفك، وتسمعك، وتحضنك، وطبطب عليك، الأموات مغيبين عن عيونا لا أكثر.
رفع راسه إليه حاضن وجهي بكفوف ايده مقرب وجه لوجهي مخلي أنفه على انفي وانفاسنه ندمجت سوه ويحجي كلمات فعلاً دغدغت كلبي.
مهيائيل: وروحها تجسدت بيج، "يريحتها، وحنيتها، ودعائها المستجاب"
"عمر مهيائيل خلص بالذنوب وانتِ الحسنه الوحيدة الموجوده بيه"
والمكافآة الربانيه لرضا أمي عليه، كلتها مره واعيدها للألف وابقى احجيها للموت، "الله اخذ امي وعوضني بيج"
"الأيد المؤمن بيها بيوم تسحبني من النار للجنه"
"احبج يامفتاح كلبي وقُفلة"
الإبتسامه شكت كلبي قبل حلكي وجاوبته بنفس نبرته.
ايريم: انت الساحر الوحيد الرتاحله كلبي وأمن بيه واطمأن بوجوده قريب منه، حتى الجن مالتك حبيتهم مو بس انت.
ابتسم كايل بهمس.
مهيائيل: اعتبره اعتراف صريح بالحب ارنوبي؟
بتسمت مجاوبته بستفزاز قابل بس هو يشلع كلبي بسوالفه.
ايريم: كتلك حبيت شياطينك مو انت داده.
ضحك وضحكت لضحكته، وانتهت ليلتنا على كل خير وسعادة، الصبح راحوا هو وترانيم ماخذين ياسيم علمود الرنين والأخبار جيدة اللي صار بيها عمى مؤقت بسبب الالتهاب الصايب عصب العين وكالوا ممكن بالعلاج تستعيد النظر خلال أشهر أو يمكن تبقى طول العمر متكدر تشوف، هذا الخبر اللي خله مهيائيل يطكن فيوزاته وياسيم تعتزل الغرفه ونكلب البيت كئيب بشكل مو طبيعي،
كاعده بالصالة وترانيم كدامي تهز برجلها وحميده تشرب جاي بأجواء صامته، ومُزن يم ياسيم فوك والشباب كلهم بره، عاطت بصوت عالي كاسره هذا الهدوء.
حميده: كافي لخاطر ربج سطرتينيي.
جاوبتها ترانيم وهي بس تريد حجه تطفر بوجهه.
ترانيم: اسكتي لا اكوم امطلج اهنا واضحك أمة محمد كلها عليج.
حميده: ديلا كومي نغير جو ونتونس ونحرك اعظامنا.
ترانيم: كله من وره ابنج الثور الحقير الاغبر.
حميده: ومن وراها هم شعدها صاعده بسيارة رجال غريب بنصاص الظهاري شنو يوديها منتزه!!
ترانيم: طبعاً شتوقع منج اكيد تبرريله، ياهو حماد العروس امها وخالتها.
حميده: مابرر لواحد ثنينهن ساقطين وغلطوا الصوج مو بس بأبني.
ترانيم: هي **** هو شبيةة!!
حميده: هو زلمه والزلمه مايلزم شما تشمريله يركض وراج مثل الجلب بالضبط، لا يفكر لا بحرام ولا بحلال، ومن احنه نعرف هيج المفروض نعقل ونبتعد عنهم ونستر رويحاتنا، هاي انا ارمله صارلي سنين وحق صاحب الخيمة الزركه ولا واحد تقرب مني وطخني بكلمه تدرين ليش؟
ترانيم: مو حلوه محد يكلبج.
حميده: الغبرة العجيز تلحكيني ام الوصخ، محد يدنالي لأن انعالي ينطبع بوجهه ويصير مضحكه للعالم كلها، ولتخافين شيكدر يسوي هم بس يهوبزون الله وكيلج يم الشريفه سرب مال زلم سرسريه ميوصلون.
ترانيم: يتحرشون بيها حتى التلبس نقاب ويجوز ماطالعه وسامعه الزمن تغير مو مثل قبل.
حميده: بس النعال نفسه ويضرب اليتقرب جبير صغير، اهم شي عند البنيه هو الشرف، هاي بالنسبة للشريفه وتخاف على نفسها من ولد الحرام كولي بلي تنطي شرفها بدون مقابل والله احبه أو وعدني يزوجني، هو لو شريف صدك ويحبها من كلبه ورايدها زواج جان متجرأ يطلب منها هذا الطلب وهي الرعنه تصدك وبعدين لو يبقى يهدد لو يستغلها وي جماعته وشوفي العالم وين وصل بيها الفساد من وره هاي السوالف مال الحبنجيات.
ترانيم: وانتِ ماختل بيج مسيويط بالحديقه وشبع بيج تغزل لو رايتكم بيضه والعالم رأيتهم حمره!!
حميده: تخسين وتخسى شوارب اخوانج انا عمري كله ماسويت وياه شي بالحرام راد ينطيني مي اشربه لبوي حتى يوافق وربج وافق بدون تعب.
ترانيم: تاج راسج انا وخواني، احجي عن نفسج، غير ابوج لزمكم وطيح حظكم واجيتينا العين زركه من الضرب مو انا بعرسج جنت حاضرة وكل شي اعرف عليمن تبيعين شرفيات بعد، خليني ساكته لا أفضح خيستكم كلها، تره العرك دساس وابنج يطلع **** على ابوه وعليج قابل يطلع رجل دين وأهله اساس السقوط.
حميده: الحب وماذا يفعل.
ترانيم: الغسل لهيج حب مايجي من وراه بس الهم والنكد وضيجة الخاطر ومعصية الله وخسارة الدنيا والآخرة، اعيش بشرفي وكرامتي واطلع من بيت اهلي مرفوعة الراس وكل العالم تمدح بتربيتي واصلي وفصلي واليحجي وياي شحده ارجعه لبطن امه مو ذليله وعلى الكلمه والثانيه عيرني انتِ سويتي هيج وانتِ جنتي هيج العن ابو إلزام لا بو الخلفهم مايجي من وراهم بس شلاع الكلب.
حميده: اخوانج هم زلم عيوني.
ترانيم: تاج راسج خواني على الأقل ماباكوا شرف وحده وكلهم دكو الباب ماطفروا بيت واحد.
هاي ترفع وذيج تكبس واني كاعده وصافنه عليهن حتى صار الليل رحت صليت ونزلنه نسوي عشا ومن كملنه اجتمع الكل بالصالة شويه وندك الباب طلع رائف يفتحه دخل وعلى وجهه علامة تفاجئ كايل.
رائف: اخوج منتظرج بالباب.
عقد مهيائيل حاجبه متسائل.
مهيائيل: منيه؟
رائف: خالتك الشكره، ايريم مرتك عيوني يردوها.
مهيائيل: روح كله ماعدنه نسوان تطلع هيج وكت.
ميمون: عوفك من اخوك دخله للاستقبال وكوم انت الثاني نكعد يمه.
مهيائيل: مراح تروح لمكان.
ميمون: سلسلها بعد وخليها بجام خانه وباوع عليها.
مهيائيل: والزيارات ممنوعه.
ميمون: كوم عيب من الرجال وعوف سوالف المزعطه عود انت الفاهم وتسوي هيج شبقيت للجهال!!
كاموا واني عضيت شفايفي هسه شورطني وكتله هيج جان ساكته ومنتظره اشوف شنو يصير وبعدين ماخذه قرار بس يلا احسن اطلع من البيت اغير جو.
رائف: رحمه الله من صلى على محمد وآل محمد.
الكل: اللهم صل على محمد وآل محمد.
رائف: الثانيه على حب الزهراء يرحمكم الله.
الكل: اللهم صل على محمد وآل محمد.
ميمون: قبل متكول الثالثه اللهم صل على محمد وآل محمد.
كاعدين مثل يوم المحكمه كلها تخزر بيه وهو مكتف ايده ويرمقهم بنظرات حاده أخير شي تعبت منهم ومن سوالفهم التعبانة واني رجال اريد اعرس قريب ومالي خلك نكد قطعت الصمت.
رائف: شلونكم اخباركم صحتكم احوالكم وين ماوين؟
أبيل: بخير الحمدلله نسأل عنكم.
مهيائيل: اي النسيب شلونك؟
أبيل: اسأل عنك حبيب.
مهيائيل: الحمدلله بخير.
أبيل: ماريد أجرها وطولها اختي تلبس عبايتها وتجي ابوي مشتاقلها يريد يشوفها.
مهيائيل: المشتاق هو يروح لو يجونه؟
أبيل: ابوها هذا تمنعها من ابوها!!
مهيائيل: ابوها المن يزوجها اذا يشتاق الها؟
أبيل: شلون يعني تبطل النسوان ماطول زوجت ماتروح لهلها لو فلمك شنو!!
مهيائيل: لا فلمي ولا فلمك مرتي ماتبات بره البيت.
أبيل: من تزوجت لحد الآن متخليها تجينا الا بالمناسبات وهسه نريد نشوفها وتجي يمنا تغير جو صيحها
يا خويه اريد أروح.
مهيائيل: روح منو لازمك؟
ميمون: مهيائيل اخوها اجه عيب هو يوم واحد تروح وترجع لاتكبرها.
مهيائيل: اذا راحت انا ما راضي وبكيفها اذا تريد تروح.
رائف: هسه شلون اكلها لو لا؟
مهيائيل: كلها مهيائيل ماقابل.
أبيل: وليش بله؟!
مهيائيل: مرتي ماريد افاركها خاصه بالليل.
أبيل: متستحي تحجي يمي هيج اخوها انا!!!
مهيائيل: وهي مرتي وانت تدري مرتي يعني تعرف الرجال يريد مرته يمه بالليل على الأقل يشم ريحتها يمه.
أبيل: هوب هوب هوب ملت تره كلشش هوايه.
مهيائيل: اذا هيج عوفها اني اجيبها الكم غير يوم وتبقى يمكم نهار كامل.
أبيل: وانا اريدها اليوم.
مهيائيل: خويه عاجبك تنسطر؟
ميمون: خايب على شنو تخسر فلوس فر محبسك وتنكضي.
مهيائيل: اني طالع عندي شغل سلملي على عمي بطريقك نسيب.
أبيل: اني من البدايه مجان عاجبني تتزوجك بس الشغله مراجعتلي حرامات.
عافنا وطلع وره مهيائيل واحنه دخلنا للبيت.
ترانيم: ها خير شكو شو البيبان تتراكع؟
ميمون: الزوج يريد مرته والأخ يريد اخته ونلاصت.
ترانيم: وبعدين؟
ميمون: انتهت تعادل.
ترانيم: شلون يعني؟
ميمون: ثنينهم طلعوا، اخذيها انتِ لغرفتج وخلي مهيائيل يفلس منها.
هم يحجون وحسيت نفسي راح انفجر من الخجل صعدت بسرعه لغرفتي وتصلت بيه اعتذر من عنده لأن أني اللي ورطته واعرف مهيائيل مراح يقبل، فتح الخط وسمعت صوته.
أبيل: هلا بخيتي شلونج عيوني الثنين؟
ايريم: الحمدلله، ردت اعتذر اذا سمعت شي ضايقك من عنده، هو شويه ميقبل اطلع من البيت.
أبيل: بالعكس فرحت هوايه من شفت حبه وتمسكه بيج اهم شي عندي انتِ فرحانه ومرتاحه.
ايريم: الله يديمك إليه ويحفظك من كل سوء حبيبي الغالي.
أبيل: ويحفظج إليه يروحي انتِ، اتصل بيج بعدين هذا بتال اجه يمي.
ايريم: اخذ راحتك مع السلامة.
غلقت الموبايل وبقيت كاعده شغلت التلفزيون وخليته على القرآن ودخلت للحمام، رتبت وعطرت وغيرت الفراش ودزيت رساله لترانيم تجي يمي نسوي لوك جديد، وهي ام الوكفات مستحيل تقصر.
ترانيم: ها داده تردين تراضين الزلمه؟
ايريم: له له له، أريد اسحره.
ترانيم: لا من هاي الناحيه هو واكع جفي.
ايريم: اريد تسويني عروس.
ترانيم: هسه اطلعج ملكة جمال عروس شنو.
دارت وجهي عن المرايه وبقت تشتغل براحتها ولأن اثق بيها ما اعترض على اي شي تسويه أخير شي من كملت كالت.
ترانيم: جاهزة؟
ايريم: نعم.
ترانيم: نحسب ونفر المرايه.
ايريم: قصدج تفرين الكرسي.
ترانيم: هو حتى الكرسي مايفتر ندير وجهج.
ايريم: ديلا يمعودة سويتيها قصة عنتر.
ترانيم: ذكرتيني بيه راح ابجي خطيه.
ضحكت عليها ودرت وجهي صدك فنانه: اكلج ليش متفتحين صالون؟
ترانيم: اخواني يغارون على اختهم.
ايريم: والله شبيج انتِ مبدعه.
ترانيم: لا داده خدماتي بس للعزاز.
ايريم: اريدج بعرس زُمردة هيج تسوين همات.
ترانيم: لا هنا نكسر على العروس.
ايريم: تبقى صاحبة الحفل هي المبهره والمختلفة صدكي.
ترانيم: هم صح، يلا داده تصبحين على خير واني رايحه واتمنى لكِ سهره سعيدة.
ايريم: هسه يضربني بوري ومثل سوايته قبل ميجي.
ترانيم: راح يجي زعلان وشوفي اذا ما باع ثكل.
ايريم: ولهذا السبب اني هيج سويت.
ترانيم: بعد عاشرتي ابليس شتصيرين غير شيطانه مثله.
ايريم: الملاك يبقى ملاك يسحب ماينسحب.
ترانيم: وعلى هذا تفكيرج انتِ ملاك هسه!!
ايريم: تفكيري تفكير مره متزوجه تريد تحافظ على بيتها وزوجها معليها الشغله بالشيطنه.
ترانيم: الرجال سهل كسب كلبه، اعيد أكرر الرجال مو واحد ذكر اكو فرق بين الثنين.
ايريم: تدرين عاجبني اشوفج تحبين وتنحبين وهيج تتزوجين واحضر بعرسج واني اجهزج هم.
ترانيم: أسهل منها ماكو زوجيني لأخوج وجمعي راسين بالحلال.
ايريم: وحق ربج افرح بعمره كله مراح يلكه وحده مثلج عاد انتوا تتراهمون سوا.
ترانيم: هدني وهدك.
ايريم: ههه حلوه هيج العلاقه والله، يكولون المشاكل ملح الحياة.
ترانيم: هاي جذبه، المشاكل دمر العلاقة الزوجيه وتكره الشريك بيج، ملح الحياة هو التفاهم والحب والاحتواء والاحترام غير هيج كلام نكعي وشربي ميه.
ايريم: سوالفج كلها حكم.
ترانيم: و****** مجان يقدرني.
ايريم: ههههه، الميت راح يم ربه كافي تسبين بيه.
ترانيم: احتركوا اهله ذكرتيني بيه اروح اسبه عشر مرات وانام اسمط والديه بهل ليل، تصبحين على خير عيوني عود اريد اكراميتي باجر الصبح تسولفيلي كل شي.
ايريم: تدللين اخبار مفصله.
طلعت واني اضحك على سوالفها كل مره تكول نفس الجمله وهي تشاقه ابد مدقق ويايه بهاي الأمور ولا اني احب احجي خصوصيتي يم احد حتى امي متعرف بأمور حياتي الخاصه بشكل عميق،
فتحت التلفزيون على مسلسل ولأن اني ما اشاهد هوايه مسلسلات بقيت صافنه عليه وهو صافن عليه حتى دخت وكمت طفيته ومن النعاس غفيت بدون ماحس، فزيت على حركه بالغرفة رفعت راسي شفته ياباوعلي برفعة حاجب ابتسمت بوجهه عافني وراح للحمام كلبت خلقتي وقسمت داخلي ما أراضيه قابل شنو جريمه سويت، اخويه اجه يريد ياخذني وياه وين المشكله!!
بقيت بمكاني بس درت وجهي للجهه اللي ينام بيها طلع واجه نام واني فاتحه عين ومغمضه الثانية حس بيه كاعده كال وهو يلتفت إليه.
مهيائيل: ليش مارحتي وياه؟
فتحت عين وحده وبتسمت مجاوبته: وعوف زوجي وحده ينام ميصير.
ابتسم ماد ايده لوجهي لامس خدي بكفه وكال بتساؤل.
مهيائيل: لهاي الدرجه غالي عليج؟
خليت أيدي على ايده كايله: لا داده بس ماثق بيك ولازم أأمن على زوجي يمي وميسوي شي بغيابي.
كرصني بخدي على كيف.
مهيائيل: اللي يريد يخون يخون لو مرته نايمه بحضنه والشريف شريف لو بعيده عنه مسافة قارات، الأخلاق والوفاء يجي من الداخل.
ايريم: واني واثقه بيك مستحيل تسوي شي غلط اعرفك.
مهيائيل: شلون عرفتيني بله؟
ايريم: عاشرتك أكثر من سنه واعرف تصرفاتك كلها، حفظتك على الغيب داده.
مهيائيل: يقال اللي يحب من كلبه مستحيل يخون.
ايريم: مو الحب هو السبب، لا ابدد السبب الرئيسي هي مخافة الله، الأنسان كد ميزيد خوف الله بكلبه يبتعد عن المعاصي ويكون وفي، والسبب الثاني التربية والأصل والمنبع اللي طلع من عنده، اما السبب الثالث نكدر نكول الحب لكن هذا برأيي مو سبب قوي هوايه اشخاص ميحبون مع هذا ميخون زوجته.
مهيائيل: شكد احب سوالفج ارنوبي.
ايريم: واني هم احبها.
مهيائيل: مو مال واحد يتغزل بيج بالله الكريم.
ايريم: هههههه، غير اغير جوك هاي شبيك.
مهيائيل: احبج.
كال هاي الكلمة وحضني، فرحانه بداخلي هواي على حبه إليه، نمت يمه بهدوء تام ونتهت هاي الليله وخلص وراها بقية الايام وصلنه ليوم العرس، جمعوا الحنه والزفه بنفس اليوم وسواها بالقاعة، جهزت نفسي اني وترانيم ومُزن، وياسيم مقبلت تروح لذلك بقت يمها حميده،
لبست فستان ارجواني مستور خوف اذا صار تصوير او شي مخليت مكياج من نروح للقاعه ترانيم تستخدم وياي لمستاها الخاصه، اما ترانيم متركت الأسود من وفاة زوجها لليوم وبالنسبه لمُزن ضافها جمال فستانها الذهبي كلنه لبسنه مستور لأن قاعة وماكو ضمان مراح نتصور لازم ناخذ حذرنا،
أخذنا مهيائيل للقاعه وبقينا منتظرين العروسة.
___
:اباوع على نفسي بالمرايه بنظره رضا وقبول، أجمل شي بالحياة هو الزواج من الشخص الصح والمبني على الحب الطاهر الشريف بين الثنين، صحيح بالبدايه مجان يعجبني أسلوبه وملحته وهسه شوفته عندي بالدنيا كلها وسماع صوته وحده يضيف نكهه خاصه ليومي، احترامه لرغباتي وتقبله لشخصيتي الجافه وياه هذا بحد ذاته إثبات قوي على مقدار حبه وصدقه إليه،
بفستاني الأبيض ومكياجي الملكي وتسريحتي البسيطه نهضت من مكاني ملبستني امي البرنص لازمه أيدي منتظره فارس احلامي وزوجي يجي يمسك أيدي وياخذني وياه نحتفل بهيج يوم مميز،
وصل وصوت الاغاني العالي اللي دل على مقدار فرحته بيه خله كلبي ينبض بقوة وعنف وكأن يريد يطلع من مكانه، مسك أيدي برقه مصعدني بالسياره حتى وصلنه نزل وصارت الدخوليه منتبهت على الناس والموجودين بكد مجنت منتبها على سعادتي وفرحتي بهذا اليوم، جانت أجواء جميله كتملت برقصتنا سوا وختامها بتقطيع الكيك وبعدها نتهى وقت الحفل سلمني والدي اله ورحنا نصور صور عرسنا،
رائف انسان رومانسي ولطيف بنفس الوقت حنون وعاقل ويعرف شنو قيمة المرأه والزواج والعائله، يحترم رأيي وقراراتي بأدق التفاصيل، صورنا كم صوره بمختلف الحركات وبعدها طلعنه رايحين للفندق لنبدي صفحة جديده وفصل ثاني من حياتنا وعسى أن يكون مليئ سعادة وحب،
دخلنه للفندق قفل الباب ولتفتلي يحجي بغمزة.
رائف: ونجمعنا اني وياج تحت سقف واحد واليوم اراويج شلون متخليني الزم ايدج وانتِ مرتي.
ابتسمت خجلانه تقرب مني وهو مبتسم ونظراته مو راحه وانتهت هاي الليله بهمسه بأذني كلمات لطيفه خلت العصافير تزقزق بمعدتي.
رائف: احبج خياشيم روحي، يا أول سمجه من النهر طفرت لكلبي، احله صدفه كوكبي وعالمي الخاص.
وبما انو صار زوجي وتشاركنا الحياة سوا قررت اعترف بمشاعري بما انو مامضمون باجر شنو يصير.
زُمردة: اني هم احبك.
رفع راسه يباوعلي بصدمه فاتح حلكه رفعت أيدي لازمه لحيته مكمله بنفس نبرتي الهادئه: احبك حبيبي رئوفي.
حضني بقوة كايل.
رائف: حتركت عشيرة رئوفي وأهل رئوفي واحد واحد يروح رئوفي انتِ.
ضحكت وانتهت ليله من أجمل الليالي المستحيل تنسي.
___
مهيائيل: من رجعنا من المصور لحد الآن سارحه شكو شبيج؟
محتاره ماعرف شنو اجاوب بعد مطلعوا رائف و زُمردة من القاعه اني ومهيائيل رحنه للمصور يريد يعيد زواجنا ونسوي كم صورة بس من دخلت حسيت نفسي شايفه هذا المكان من قبل بس ما اذكر وين، رفعت راسي اله متسائلة بلكي يعرف الجواب اللي يدور بمخي صارله ساعات.
ايريم: مهيائيل اني وانت صورنه بعرسنا؟
مهيائيل: لا.
ايريم: ليش؟
مهيائيل: لأن بالطريق صار الحادث وملحكنا نروح لمكان غير المستشفى.
ايريم: مهيائيل مجان بيك شي عكسي كلي تكسرت شنو من حادث صار ويانه وليش ما اذكره؟!
مهيائيل: ليش مصار بيه شي هذا الشي غلط اني راسي صار نصين وعشر خياطات بعدين أني سايق واعرف اخذ احتياطي فالضرر الأكبر صار عليج عيوني انتِ وبالنسبه ليش متذكرين فالدكتور كال يصير هيج شي اذا المريض تعرض لصدمه راح يفقد الذاكره بالوقت اللي صار بيه الحادث، وهذا الشي صار وياج بالطفوله هم وانتِ صغيرة هم صاير وياج حادث وناسيه.
ايريم: عقلي مشوش ماكدر اجمع شي بس صور مو واضحة بعقلي وكأن اكو ناس اعرفهم بس اني بعمري كله مشايفتهم ماعرف شلون أوضح الفكره الك بس هيج يجي بعقلي هسه.
كعد على ركبه ساحب أديه ومخليها بين أديه كايل بأبتسامه.
مهيائيل: لتضغطين على نفسج هي مجرد افكار ومثل ما اجت تروح ريحي عقلج شويه وكومي اخذي حمام طردين بيه التعب حتى تنامين براحه.
ايريم: تمام،
قبلني بجبيني ونهض اكذب لو كلت عقلي رتاح بس ماكو باليد حيله لازم استمر بدون أسئلة بكل الأحوال مهيائيل مراح يغير أقواله،
تخلص الايام بسرعة ومر شهرين عايشين بهدوء وراحه تقريباً، نزلت الصبح احضر الريوك وطلعت من الغرفه بنفس الوقت زُموردة من صدك البنيه تشبه الزمرد حبابه حيل وانسانه بقمة الأخلاق واللطافه مناسبه لرائف بشكل كامل.
زُمردة: صباح الخير.
ايريم: صباح النور.
زُمردة: اليوم طلبت اجازة من الشغل اريد اشيل التنظيف عنج وساعدج انتِ بس اكعدي ورتاحي يوميه مطلعه شغله من جوه الكاع ومتكعدين.
ايريم: كاعدين وساكتين لازم نشتغل حتى يمشي الوقت.
زُموردة: ليش متتوظفين؟
ايريم: مفكره بالموضوع من زمان بس لحد الآن مكدرت الكه شغله مناسبه إليه.
زُمردة: اخويه يشتغل بشركه اهليه راح اكله اذا اكو وظائف شاغره تكدرين تشتغلين وياهم؟
ايريم: شنو مجان رأيي لازم اسأل مهيائيل.
زُمردة: اكيد طبعاً يبقى رأيه الأهم.
ابتسمت نازله وياها شويه وسمعت صرخه جايه من فوك صعدنا بسرعه وطلعوا الشباب كلهم سوينه هجوم على الغرفه ومن الصدمه بقينا جامدين،
واكفه وتبجي وتضحك اني على منظرها بجيت ومشاعر جياشه صابتني مكدرت اعبر عنها غير بكلمة الحمدلله والشكر صدك رب العالمين ميعوف احد وكل اختبار لابد اله نهاية،
تباوع علينه وكأن تريد تحفظ شكلنا ممستوعبه فكرت رجع نظرها راح الها مهيائيل وشالها من مكانها حاضنها ويفر بيها وراح ميمون ورائف واحنه البنات هم حتى حميده تهلهل وتصلي على النبي،
حميده: عسى ربي ميخليج تنظرين بسمعج ولابصرج ويحفظلج عويفيتج ويديمها الج جنتي حبيبتي.
كمز مهيائيل مجاوبها.
مهيائيل: جانت جنتج اليوم من رجع نظرها نطلكها وترجع حره حتى تلحك السنه ترجع للسادس وتكمل دراسه ومُزن هم تحضر نفسها السنه تقدم خارجي وتمتحن.
حميده: معليك بمُزن انت.
مهيائيل: مو هي بكيفج اختي هاي واني حر بيها واعرف بمصلحتها اسكتي لا اسكنج دار العجزة تره دماغي فاصل كلش وكلما اشوفج اذكرها لتخليني اسودن عليج، العندي كلته مُزن تمتحن خارجي وياسيم هاي السنه ترجع تكمل دراستها،
ويلا بدون نكد خلونا ننزل جوه مشتاق اكابل عيون بنيتي اليوم.
ياسيم: الله لايحرمني منك اب، وأخ، وأكثر بعد.
مهيائيل: وسند وعزوة واكسر رجليه والعن والديه اليفكر بس تفكير يتقرب منج.
ايريم: الف الحمدلله على السلامه كلش فرحانه كدرتي ترجعين تشوفين مره ثانيه.
ياسيم: اللي طيبني الأدعية اكثر من العلاج ماعرف شلون اشكرج، ربي يوفقج ويسعدج دنيا وآخره ماكدر اقدملج شي حتى اعوض بيه وكفاتج ويايه غير الأمتنان والشكر والدعاء.
ايريم: الأمتنان والشكر لرب العالمين اللي أنعم عليج ورجع صحتج اما الدعاء فهذا افضل شي تقدميه إليه، كلنه محتاجين اله.
مهيائيل: يلا امشن كافي سوالف متنه جوع.
رائف: تعال اكلني.
مهيائيل: اعذرني عزيزي ماكل خر*.
ميمون: بمنتصف الجبهه.
رائف: ميصير هيج مو عدل لازم تقصفه مثل ماقصفتني.
مهيائيل: من يحجي شي يستحق الجواب اجاوبه هو لحد الآن عاقل.
ميمون: كافي ولكم اخوكم الجبير انا واحترامي واجب.
مهيائيل: منو معترف بيك من الأساس!!
ترانيم: اذا تبقون هيج تحجون نطبك الريوك ويه الغده.
مهيائيل: احسن علمود تضعفين سمنانه هاي الفتره.
ترانيم: ماكله من جيب الخلفك.
مهيائيل: ماكله من جيبي مباشرة، لو من الخلفني ماحجيت شي هو بيج يتجازة.
حميده: مهيائيل، طلعه من السجن وشنو تريد تسوي بيه سوي.
مهيائيل: اعميه عادي؟
حميده: كم مره كتلك هو ماله علاقه وسألها وحق ربك معماها.
مهيائيل: بس وصلها لهاي الحاله، جانت يمي وردة مفتحه وبنج ذبلها ولازم يتعاقب، خليه يشوف شلون جانت عايشه بنص الحبس لأشهر وهو دايح بالشوارع يم صاحباته.
عافها ونزل، الأم شكد متكون قاسية وكلبها من حجر تبقى متقبل على ابنها وعدها سعادته من سعادتها والقليل كلش يحسون ويقدرون شعور أمهاتهم،
اليوم يخلص بالسوالف والشغلات الروتينية وتمر الايام بحلوها ومرها ونوصل لليوم اللي تغيرت بيه هواي أمور،
كاعد مقابيلنه وبصفه امه ومُزن ومهيائيل يمي وترانيم يم ميمون بصفها رائف وزُموردة، وياسيم فوك مقبلت تنزل، يتحدون بعض بالنظرات واحد يريد يهجم على الثاني وهاي المعركه المشتعله مالت العيون متعرف لشوكت راح تستمر وبأي طريقة تهدء، نطق مهيائيل كاسر الصمت.
مهيائيل: شعندك جاي؟
تليد: ارجع امي واختي لبيتهن.
مهيائيل: مُزن تعالي يمي.
مُزن تمرد بأصابيعها مرد والسبب واضح متردده وخايفه ومتكدر تاخذ قرار، اول محركت نفسها كايمه سحبها تليد بقوة مقيدها بأيده.
تليد: عمرها كله عرفت عدها اخو واحد وتبقى طول العمر هيج، اني الوحيد أخوها خليها بعقلك زين.
مهيائيل: هذا الحجي يفيدك، مُزن بابا كومي يمي، بما انو احنه اخوتج الكبار منقبل تبقين برعاية واحد مجرم.
طفر رائف كايل بصوت عالي.
رائف: تصويت.
رفعوا الأخوه الثلاثه أيديهم مأيدين كلام بعض.
ميمون: العاشته يمك جان بسببك انت وامك والا احنه لو جان عدنا علم بوجودها مخليناها عايشه يمكم.
تليد: من شوكت صرتوا حنينين علينا وانتوا بعمركم كله مسألتوا مجرد سؤال عن احوالنا وشلون عايشين.
مهيائيل: له له له، ازعل منك، سألت اني شخصياً وهوايه هم بس مو هدفي اساعدكم بالعكس اشمت بأمك.
ميمون: الراتب اللي امك تستلمه كل شهر هو بسعي كامل من عدنا، والشغل اللي حصلته من عمر صغير بفضلنا، لا عبالك عندك خرزة مال حظ بس اخوانك ماعدهم عداوه وياك احنه نكره امك لا أكثر لأن بسببها أمي تعذبت ومكدرت تعيش مرتاحه.
مهيائيل: والعذب امي ادوس عليه بالقندرة وما أسأل بس انت وكفت بعيني ماريد اعيشك الحرمان والعوز واخوانك سحاره وتجار معروفين.
تليد: تردون تلبسوني المنيه بعد هاي السنين كلها، هه مخابيل انتوا مو عاقلين.
مهيائيل: وراح تشوف المخابيل شنو يسون بيك،
رائف.
رائف: البند الأول.
ميمون: ياسيم ترجع حره طليقه وتحرر من هذا العقد.
رائف: البند الثاني.
مهيائيل: مُزن تبقى عايشه بهذا البيت وانت وامك احرار اذا تردون تبقون لو لا.
رائف: البند الثالث.
ميمون: تدفع مهرها بالكامل مقدم ومؤخر بالإضافة للديه مالت راسها وهاي مقدارها حددنا حسب قوانين الفصل العشائري.
رائف: البند الرابع والأخير.
مهيائيل: اذا تقربت من بتنا خطوه وحده احسب حساب نفسك انتهيت.
تليد: مموافق.
مهيائيل: احنه منسألك كاعد نحجي شنو راح يصير، ندكيت وي سحره لتلومنا..
ميمون + رائف: اذا خليناك تهلهل بنص الفاتحه.
تليد: امي واختي مكانهن بيتي وهذا الشي محد يكدر بيكم يرفضه.
مهيائيل: هذا البيت اشتريته من فلوس بيتي الثاني وذلك جان ملك لأبوك يعني الك حق بيه مثل ما النه تكدر تعيش بيه براحتك واذا حابين اني اشتريلكم البيت البصفنا وتنطيني الإيجار لأن ما اريد بنيتي تشوفك بشرط مُزن هاي السنه تكمل دراستها.
تليد: وليش تسوي هيج؟
مهيائيل: حتى أكدر الزمك بتسديد مهرها واخليك كدام عيني أو ارجع اربيك من جد وجديد.
تليد: وكل عقلك أقبل!!
مهيائيل: اني احجي الشي اللي راح يصير ما اخذ رأيك.
ميمون: راح تبقون عايشن اهنا انت تنام يمي بغرفتي واختك وامك بنفس غرفتهن حتى نشتري البيت ونكاتبه وتصيرون جوارين.
مهيائيل: ولتفرح بسدت الباب عليكم هذا الحايط اللي بينه يلغي واراقبك عن كثب واندمك من صدك لان لعبت بذيلك وياي وخالفت الوعد.
سكتوا الجميع من دك واحد على مهيائيل، رفع الموبايل مخليه على اذنه، تغيرت ملامحه نزله بعد فتره بسيطه كايل..
يتبع..
البارت اكثر من 4080 كلمه..
تعليقاتكم بين الفقرات وتصويتكم للبارت شمعاتي..
تصبحون على الف خير وعافيه..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!