للتواصل انستا zahraaahmedn99
اريد اشوف تفاعل حلو يسر الخاطر ويعوض تعبي، تعليقاتكم بين الفقرات وتصويتكم شمعاتي يسويلي واهس للكتابه..
شاركوا القصه حتى تكبر عائلتنا ونستمتع وي مهيائيل مع بعض..
مهيائيل
الكاتبة(زهراء احمد)
_________
حقيقيهّ أنتِ ،
ڪ يقينٍ أن الغد يحملُ المشارق والمغارب
ڪ تأكيدٍ أن لا مفرّ منكِ ولا مهرب .
____
الساعه وحده واني عيني على الباب ومنتظره بقلق هاي البنيه وين راحت والله لو عرف بيها متأخره لهاي الساعه يموتنا، اكل بأظافيري ومنتظره بالحديقه ماكدر افوت بالبيت والشمس سوت من راسي مخلمه من كد محمست بيه، وتاليها اذا حتى موبايلها مغلق؟
نفتح الباب كمزت من مكاني ورحت يمها وبدون نقاش ضربتها كف من كد ما اني معصبه هسه منتظرت اسمع منها تبرير لازم ابرد كلبي بالأول، والصدمني برودها أو وجهه التعبان وحركتها بيها خلل هاي البنيه بيها شي وضعها مو طبيعي، اهنا عقلي نفر بس لا الخايفه من عنده صار،
سحبتها وراي وتأكدت محد موجود جوه حتى يشوفنا وأخذتها للغرفة هي متسوي اي ردة فعل غير صافنه باللامكان مثل الشخص الفاقد، نزعتها جبتها وهنا جانت الصدمه ملابسها مشككه وجسمها كله آثار لطمت على وجهي وضربتها بقوة اكبر بدون ما افتهم من عدها شي وحتى مكدرت اسأل، الموقف اللي نحطيت بيه ادعي من كلبي محد يعيشه.
بعد مرور يومين..
ايريم: مهيائيل، سحوري كوم الساعة سبعة مو تريد تطلع من وقت اليوم.
مهيائيل: عوفيني نايم خلي يولي الموعد.
ايريم: يمعود كوم حتى الصلاة خلصت وراح اسوي عشا حتى تنزل تاكل قبل متطلع.
مهيائيل: عوفج من العشا وتعالي نامي يمي نعسان وتعبان منايم من يومين.
ايريم: انت كلبك قلقان بدون شي جبتنا ركض بدون حتى منتريك مثل العالم وشوفت عينك اسبوع والجو هادئ حتى ما اسمع صوت بالبيت.
مهيائيل: هم حيوانات لأن ضربت دَاسِم جرو عدل اخذي كم يوم بعد ويرجعون ينجلبون.
ايريم: هسه كوم وياي يلا لتشلع كلبي.
مهيائيل: وحق ربج ايريم اذا مارحتي بدون ملحه اسحبج لحضني واخليج نايمه بدون حركه للصبح حتى عشا ماكو.
ايريم: كل شي ولا الاكل نام على راحتك عزيزي.
مهيائيل: هيج من الاول، شكيتيني.
ضحكت عليه وطلعت جهزنا اني وترانيم العشا ونزلت الخوانم بس ياسيم فتقدتها صار يومين ماكو ومن اسأل عليها ترانيم تكول تدرس اي شطلعت من دراسه صار سنه تحضر للسادس حتى أهل الطبيه ميدرسون هيج،
التفتت من سمعت صوته يسولف وي رائف اتفقوا الجمعه الجايه يرحون يخطبوها حاسه بيه الوحيد الفرحان الجو كئيب بالبيت بدون سبب بس رائف يركص للهوه علمود خطبته، دعيتله من كلبي الله يتممله على خير لأن من صدك يستاهل،
خلصنا عشا وكعدوا بالصاله يسولفون ومهيائيل اتصل بكُل الناس اللي يعرفها حتى يرحون وياهم مشيه مرادو نسوان بالأول راح يسووها سوه ماعرف السبب لأن اني من نخطبت جابوا نسوان قبل المشيه مالت الزلم يمكن العادات تغيرت بهاي الشهرين لو هم السحره يمشون بكيفهم؟
خلص الاجتماع العائلي واصلاً ترانيم مشفتها بسرعة صعدت وره العشا مسألت وماعرف ليش هاي المره مدققت وياها بخصوص هواية اشياء تغيرت بيها فجأة، جانت مرحه وتضحك وتسولف هسه منعزله ومنطويه وصافنه اغلب الوقت ودائماً فوك بالغرفه ومن تدخل تقفل الباب حتى الأعمى ينتبه عليها من كد متغيرت فجأة وبدون سابق انذار،
صحيت من أفكاري على لزمته لأيدي.
مهيائيل: تردين تسهرين؟
ايريم: لا ليش؟
مهيائيل: الساعه بالعشرة كومي انام.
كمت وياه وسألته واحنه نمشي: ليش مرحت؟
مهيائيل: خابرته من نزلتي واجلت الموعد ماحس اللي خلك لهاي الأمور.
ايريم: مهيائيل بيك شي؟
مهيائيل: شي مثل شنو؟
ايريم: مادري أحس اكو شي غريب بتصرفاتك.
مهيائيل: احساسج غلط ماكو شي ارنوبه.
ايريم: لا والله اكص ايدي اذا ماكو شي بس أنت متريد تكول.
مهيائيل: لتشغلين عقلج بهاي المواضيع ربج يحلها.
دخلنه هو تمدد على الجربايه واني دخلت للحمام مطولت هوايه وطلعت عيني راحت اله جان لازم الموبايل بأيده بسرعة شمره وطفر للباب سحبت شالي ولبسته شلون مجان وركضت وراه واسمع صوت صريخه عالي.
مهيائيل: ****** ، ******* الساقطه اليوم موتج على ايديييييي، ترانيممممممم افتحي الباب لا اكسره والله، لتخبلينييي كلتتتت افتحي الباب.
ترانيم: خويه سمي بأسم الله وبس افهمني على كيفك وي روحك.
مهيائيل: طلعي ****** الضامتها جوه وماكو شي اتفاهم بيه وياهااا اريد اموتها وغسل عارها بنت الحرام المامؤدبه، بس عليمن تطلع امهااا منوووو.
ترانيم: مافتح الباب مادخل بخطيتها انا.
مهيائيل: خوش بسيطه لتفتحين.
عافهن وراح للغرفه سريع رائف وميمون طلعوا قبل ساعه وكالعادة ستات الحسن يباوعن رولين بعيونها نظرة رضا بس تالين تريد تموت مبينه خايفه على بتها.
ترانيم: هيج احسلج اكليها يالمصخمه نزلتي روس اهلج بالطين بعد محد يكدر يرفع راسه بوجه العالم.
تحجي بشهكه وهي لأمه رجليها لصدرها وتتحرك بهستريه.
ياسيم: والله ماجنت ادري هيج يصير والله.
ترانيم: انتِ يطبج مرض ولي ولتفكرين كاعد اساعدج ابددد بس انا اخاف على اخوي اذا صار بيه شي من وراج وراح بيها تفيديني انتِ الغبره.
ياسيم: حبابه عمه الله يوفقج لا تخليه يموتني والله هو خطفني مالي علاقه انييي اصلاً هوايه ضربته وتوسلت بيه يعوفني وماسمعني مالي ذنببب ليش متصدكينييي؟!
ترانيم: منوووو راحتتتت برجليهااا تشوف صاحبهاااااا؟
سنه كامله اجلتي بحجة السادس وأريد اعيد اجيب معدل وخلصها بس يدفع فلوس خط ودورات ماقصر وياج بشي تنزليننن راسه ولجججج، ليش تجازيةةةة هيج منو وكف وياج وسندج غيره، امج الدايحه لو ابوج السكيررررر؟
تفففف عليج وعلى تربيتج السكط حرام بيج شربة المي لو ما اكول خطيه اخوي جان نزلتج اله سحل وخليته يغسل عارج.
نفتح الباب ودخل مثل الإعصار هجم عليها شعرها وايدها وظهرها وبطنها ورجليها مخله بيها شي سليم يضرب ويحجي بعصبيه وغضب.
مهيائيل: ولجججج انااااا تسوينننن بيه هيج وتخلين واحد مامعروف أصله منينننننن يجي يعيرني بعرضيييي؟!
افر زلم مشوربه ومحد يكلي على عينك حاجب وامشي بين الناس واني ابو الراهي تاليييي تنزل راسي وحده فصمه بطوللل زرييييييي،
حسيت بيه فقد خاصه من صاح اسمه وهو يدري بيه طالع.
رااااااااائف ولك راااااااائف تعالللل ساعدني اريد اغسل عارها وطمهااااا جوه التراببببببب.
ترانيم: فدوة اروحلك اخذ نفس خويه لايصير بيك شي وين انطييي وجهي بعد عيني عينك.
مهيائيل: انتِ حسابج بعدين طول هاي الفتره تدرين وماتحجين شسوييي بيجججج كولي شسويييي؟
ترانيم: حقك والله حقك بس هدي بعد بيتي فدوه يرحلك كلهن بعد روحي روحك حبيبي.
مهيائيل: شهديييي شهديييي وهذا السكط ابن السكط يهددني بالصوررررررر شهديييي ويراوييني عرضي وبنت عمي المصون ****** نايمه بنص حضنةةةةة بدون هدوممممم شهدددددديييييي!!!!
ترانيم: جا شلون تموتها وتدخل سجن بعد عيني عينك لتضيعنا وتضيع روحك فدوة اروحلك انا،
انتِ يالثوله ماتجين تاخذين بتج من عيونه صافنه مسرحيةةةةةة تحركي.
مهيائيل: ويننننن ماتطلع مناا اذا مو للمكبره رجليها اكصهن وعلكهن بركبتها اذا خطت خطوه وحده بره هاي الغرفه سامعيننننن.
ترانيم: سامعين سامعين تدلل ماتطلع منا انا ابقى يمها بس هدي أعصابك حبيبي.
طلع يتنفس بغضب كل هذا اني واكفه اباوع عليهم ودموعي تنزل صدك الله يساعده ولو هي مو اخته بس تبقى شرف العائله وعرضه ومستحيل يقبل واحد يدنسه بسهوله ويتعير بيه،
دخل للغرفه ودخلت وراه لازم الموبايل وأيده ترجف كوه مسيطر عليه تقربت من عنده والخوف موتني هسه تجيني ضربه ما محسوبه، رجل تمشي اله خطوة والرجل الثانيه ترجع ليوره خطوة ابلع بريكي وادعي بداخلي ميسويلي شي، متقربه من النار حرفياً هذا وضعي حالياً،
عيونه تريد تحرك المقابل ديطلع منها شرار وحمر دمم، بله جسمه صار سعفه بنص الهوه العالي، قريت سورة التوحيد ثلاث مرات على يميني وشمالي وبوجهه حتى يهدأ يمي وميسويلي شي مو زين،
رحت وكفت قريب عليه بس مو حيل يعني مكان أكدر ابتعد بيه اذا صار شي مامحسوب لحد يلومني بهيج موقف ميفكر الأنسان بغير سلامته ويخاف على نفسه ليصير بيه شي وهذا الشي طبيعي عند كل الناس.
حجيت بهدوء واني اتمنى يقابلني بنفس الأسلوب وميصرخ بيه.
ايريم: اساعدك؟
رفعلي نظره بلعت ريكي وقريت على نفسي الفاتحه محاولت ابتسم بس هي صارت بوجهه لا أراديه، كلبي يدك معزوفه من الخوف، نصدمت من جاوبني بنفس نبرتي.
مهيائيل: طلعي رقم جابر وتصليلي عليه.
سويت مثل ميريد اخذ الموبايل من أيدي وخلى على أذنه وراح لنهاية الغرفه يحجي وياه.
مهيائيل: راح ادزلك رقم، الموبايل مالته يرجع هستوه طالع من المصنع فاهمني؟
خوش اعتمد عليك حبيب.
هسه اذا سألت عادي الأمر لو اسكت واغلس؟
تذكرت من شفتها آخر مره شلون جانت منتعشه شكيت بيها من يومها سوت علاقه غير شرعيه بس على اللي صار اليوم واضح حيل مجانت علاقه مكتمله لأن وضعها ودموعها تنبأ الشي الصار وياها جديد بالباكيت مو قديم،
كعد على الجربايه وخله راسه بين رجليه هاي بنت عمه وهيج صار بيه لو جانت اخته صدك شنو سوه؟
رحت يمه وطز بكُل فكره تكول ابتعدي اذا اما اكون وياه بهيج مواقف شوكت ادعمه لعد؟
وكفت يمه وخليت أيدي على شعره وحركتها بهدوء بدون ميرفع راسه كال.
مهيائيل: ربيتها من الطفوله على أيدي هي صح بنت عمي بس اعتبرتها بنتي واختي الصغيره وهيج تجازيني بطيحت شاربي وراسي كدام العالم، لو أيدي تنطيني جان موتتها بس مو غسل عار لا اشفي غليلي واطلع حوبة السنين التعبت بيها وياها، امها دايحه وابوها اربع وعشرين ساعة سكران وصار مطي يم مرته، عرفت راح تمشي بطريق اسود اذا مالحكت عليها وشوفة عينج العرك دساس والوراثه تمشي بالدم.
ايريم: حقك تضوج وتنقهر وتزعل وتصيح وتضرب بموضوع مهم وحساس مثل الشرف اكيد الأنسان الشريف يسوي هيج وأكثر وخاصه لو جانت من اهل بيته وتعنيله، بس من يوصل الأمر يم صحتك وعافيتك اني ما أقبل تاذي نفسك وكلبك علمود احد،
نزلت كاعده مقابيله خليت أيدي على أديه مكمله: أنت قوتي مهيائيل، بوجودك أحس بالأمان والراحه غيابك يخلي كلبي مامرتاح ابدد، اذا صار بيك شي لا سامح الله اني وين اروح؟
مو علمود احد بس لخاطر أيامنا سوا اهدء واخذ الموضوع بعقل وفكر بيه من ناحيه ثانيه، اني الصراحه حاسه اكو ملعوب وره هاي السالفه الصارت اكعد يمها واسمع حجيها بالكامل يجوز تطلع مظلومه هاي المره والحق وياها.
مهيائيل: ماكو وحده تنظلم بهيج امر واني شفتها بعيوني والتسجيل والصور تثبت كل شي صار برضاها هي مامنعته بالعكس جانت مستمتعة حتى لو غصب عنها والحقيقه عكس الشفته مستحيل اقتنع وصدك بيها لأن امها نفس الطينه ثنينهن ****.
ايريم: وين المشكله اذا سمعتها هسه؟!
مهيائيل: اعرفها غلطانه لتحاولين تبررين الها الصار، اني راقبت موبايلها واعرف بكُل صادرة او واردة الها مستحيل اطلع غلطان اني ساحر وهاي الأمور ماتمشي من جواي، اعرف بلي يصير قبل مايصير وعقلي يتنبأ بيه.
ايريم: بس معرفت شلون راحت وشوكت.
مهيائيل: ماكو توقيت عندي بس اعرف قريب راح توكع مصيبه او وكعت.
ايريم: تبقى بنت عمك انت مامسؤول عنها عدها اب وام يتجازون بيها ليش قاهر نفسك لهاي الدرجه ياعيني؟!
مهيائيل: الشرف أو وصمة العار تروح للعشيرة كلها حتى رائف الرجال من يسمعون بيها شنو مسويه ميقبلون يزوجونه حبيبته وعلى هاي وقيسي وشوفي شلون منكدر نطلع من الباب بعد، حتى انتِ المنغير عشيرة توصلج السمعه وتسمعين كلام يسد النفس.
ايريم: اذا هيج حلها.
مهيائيل: وشلون تنحل؟
ايريم: سدها بزفه وعرس.
مهيائيل: اني ماعرف منو هو حتى أكدر اسوي هيج.
ايريم: تعرف مو صعبه عليك، الشخص اللي اتصلت بيه قبل شويه هو يساعدك.
مهيائيل: ومنو يكول يقبل يزوجها ماكو رجال بالدنيا يزوج وحده مسوي وياها علاقه الا اذا جانت ساحرته لو طيحت شاربه بأيدها.
ايريم: اضغط عليه اسحره بكيفك المهم تزوجهم وماكو احد يعرف بالموضوع وتنسد السيره وميتك الله يرحمه.
مهيائيل: صدك من عاشر قوم اربعين يوم صار منهم، الشياطين أثرت بيج انتِ هم.
ايريم: مو قصة شياطين بس هذا الحل الأنسب لهيج موضوع.
مهيائيل: راح اشوف اذا اكدر اوصل لعنوانه واعرف هو منو ونحلها ان شاء الله.
حسيت الدم رجع بوجهه ابتسمت ودعيت بداخلي تخلص على خير بدون مينظر احد، اذا تزوجت ومعجبها تكدر تنفصل بس اذا ماتت جميع الأطراف تخسر بالنهايه.
واحنه كاعدين بهدوء نكسر الباب من الضرب والصوت العالي سمعه الجوارين طلع بعصبيه يشوف شكو.
دَاسِم: منو شايف نفسك وتضربهااا هيج؟
ابوها بعده يشم الهوه وانت تمد إيدك عليها اذا ماعندك ابو يربيك اني موجود أو اقوم بالواجب واحد هتلي سرسري نغل مامعروف اصلك منين تجيييي تضرب بنتي وتشوه وجهه والله الا دافنك بكاعك.
واكف ومكتف ايده وره ظهره يستمع اله برفعة حاجب ونظره استهزاء مبينه عليه، تقرب من عنده يهجم يريد يضربه دفعه على الحايط ورفع أصبعه بوجهه بتهديد.
مهيائيل: اذا خلصت سهرتك وي ****** ذيج غرفتك موجوده اكو **** اخيره تنتظرك، وبابي مايندك لو البيت يحترك وصوت الكم ما اسمع لا ومحمد أشعل بيكم البيت واخليكم تصيرون لحم مشوي وجبه فاخره للكلاب مال المنطقة واضح كلامي؟
التفتت على صوتها وهي تصعد على الدرج باوعتلها بتفاجئ هاي وين جانت صار سبوع مشايفتها؟!
بلقيس: انت هييييي شلون تسمح لنفسك تحجي وي ابوي هيججج؟!
مهيائيل: ايرو كاعده تسمعين جلب ينبح؟
يمكن هذا المطي ناسي الباب مفتوح ومسده، ليش مسديته لو الشرب ماخذ حيز من الفراغ منسيك كل شي؟
بلقيس: انااا هاي التحجي وياك شبيك نطرمتتت!!
دار وجهه الها وتقدم بخطوات بطيئة جانت واكفه على الباية السادسه نزل بهدوء أو وكف يمها رفع ايده ودفعها لزمت بالمحجر وكال بنبره تحذيريه.
مهيائيل: فيوز واحد باقي بعقلي وراها انتوا كلكم بحححح فاحتفظوا بيه لسلامتكم من الخطر وهسه كدامي ولي منااا ولتراويني وجهج النحس وحده ساقطه.
خلصت الليله بصعوبه لا هو كدر ينام ولا اني، هاي اول مره اشوفه ضايع ومحتار وتعبان لهاي الدرجه، جانت الحلول بعقله اسرع منها ماكو هسه صاير مثل الأسد الجريح لأبيه يكمل الحرب ولا يكدر ينسحب،
صبح الصبح بطلاع الروح صارت الساعه سبعه نزل جوه وصاح بصوت عالي فززها كلها.
رائف: خيرك من الصبح تصيح شكوو ديج خو ما ديج؟!
مهيائيل: حضر نفسك اليوم المشيه والخطبه.
رائف: صدك تحجي انت؟!
مهيائيل: اي صدك شايفني مجذب عليك من قبل؟
رائف: يمعود استر عليه وعلي هسه طلكني.
مهيائيل: بدون سوالفك التعبانة تريد تعرس لو لاا؟
رائف: اي بس مو اليوم حتى هي ممحضره نفسها.
مهيائيل: ماكو تحضير نفس هي مشيه نتفق على الحاضر والغايب ونقره الفاتحه.
رائف: خليها لباجر على الأقل.
مهيائيل: اليوم يعني اليوم بدون ملحه زايده اتصل بيها وكللها اذا ماقبلت تتأجل بعد شهرين وهذا اني كلت.
رائف: شبيك مهيائيل شو مو على بعضك صار شي؟
مهيائيل: ماكو شي لتخاف روح اتصل بيها ونطيني خبر حتى احجي وي العالم هسه وكللهم تقدم الموعد.
تالين: بنتي بين الحياة والموت وماكدر اشوف شكلها شنو وهو يخطب لاخوه صدك مات المستحه.
مهيائيل: لأن اخوي يريد يكمل نص دينه يعرس كدام العالم وبشهود قانوناً وشرعاً مايبيع نفسه لحضان الزلم.
تالين: شنو قصدك بنتي باعت نفسها؟!
مهيائيل: لا شريفه عفيفه هي بس كم صوره خليعه الها وي واحد وفيديو حصري بعدها شرفها يصب من كل مكان ماشاءالله.
رولين: هذا اليحجي بأعراض العالم لازم يصير شي بعرضه.
مهيائيل: اي وانا اشهد رجلج من كد ما *** اعراض العالم صار نفس الشي بعرضه هاي المره.
بلقيس: اوععع شهل اصوات المزعجه من صباح الله خير!!
مهيائيل: شرفت البومه الساهره للصبح بحضن مدري ياهو، اسمعي هي كلمه وحده مالها ثنين، بيتي يتعذرج شيلي زبايلج ورجعي من وين ماجيتي انا مو حاويه مالفي زبايل.
دَاسِم: تطرد بنتي من بيت ابوهااااا!!
مهيائيل: وطرد ابوها هم واذا تريد امها أو اختها وتسوي فضل اذا راحت كاغد وياكم.
دَاسِم: مابقى شي هين يجي يوم واني اطردك من هذا البيت وعينك تشوف.
مهيائيل: احلم براحتك هاي اعراض الكبسله لواحد رجليه بالكبر.
ترانيممممممم.
ترانيم: ها خويه؟
مهيائيل: حضري نفسج انتِ وايريم راح ترحن تشوفن البنيه ويانه اليوم، وتالين ورولين يرحن لبيت اهلهن ويجن بالليل.
تالين: وهذا القرار بكيفك احنه نمشي بيه؟!
مهيائيل: اي بكيفي لأن اذا ماطلعتي برضاج تطلعين غصباً عليج.
نزل بعد فتره ضايج وماله خلك يحجي وي احد فهم مهيائيل الأمر ومالح عليه وماعرفت السبب هو من الأساس ليش قدم الخطبه بشكل مفاجئ حتى انفجر بيهم يصح.
مهيائيل: تونةةةةةة.
تالين: خيرر شكو تصيححح؟
مهيائيل: بنتج ****** ويننن؟
تالين: غير انت حابسها شهل السؤال!!
مهيائيل: صيحيها تنزل اهناا خلي يشوف الأخ المحترم ليش اريد اقدم زواجه وهو ما راضي عليه ويريد يكوم يكتلني صايرين ****** برأسي الطايحين الحظ والله ارجعكم لبطن امكم ادبسزيه.
تالين: اذا تريد كوم صيحها معليه اني انت ابن عمها واجازه وياها.
مهيائيل: ترانيم جيبيها لهنا سحل.
ترانيم: خويه اصعد انت وسمعها.
مهيائيل: لا اريدها تجي اهنا وتحجي كدام الكل اريد اشوفها شلون طلعت بدون خجل ونزلت روسنا، اللي عدها جرأه هيج تسوي ماكو شي يمنعها تحجيلنا.
تالين: سهله حتى لو هيج سوت واحد منكم يستر عليها ويزوجها وتنسد السالفه ولا من شاف ولامن دره.
مهيائيل: اي مو احنه ميمون لو دَاسِم وناخذ وحده ****، على سيرة ثورج وينه قبل شويه اجاني يهدد ومن شاف نفسه مو كدها شرد مثل الجبان المطي الاغبر.
تالين: لاتغلط عليه عمك بمقام ابوك.
مهيائيل: ثنينهم ونعالي.
نزلت تركض وهي تصيح.
ترانيم: الحكليي ماتتت.
مهيائيل: عاشت ايدها والله خففت.
رائف: صدك تحجي البنيه تكلك كاعد تموت وانت بمكانك بعدك!!
مهيائيل: اي اذا الله يريد ياخذ أمانته امنعه يطبها مرض خلي تولي زباله وخلصنه منها.
صعد رائف وتالين ورولين كلهم يركضون بس هو بقى كاعد مبين من عيونه ممتحمل هذا الوضع بس يجبر نفسه عليه حتى اجاه اتصال وطلع،
صار العصر واحنه بنفس الوضع المتوتر بالبيت وكلها تريد تنفجر بوجه الثاني بس ساكتين خايفين من عنده، متجمعين بالصاله ومنتظريه يحجي وهو ولايهمك مشغل جكارته ومخلي التلفزيون على الشرقيه ويتابع الأخبار بهدوء مميت للجميع حتى طفر بيه صارخ.
رائف: تحجي لو شلووون فهمني ياسيم ليش حاولت تنتحررر؟!
مهيائيل: عياره.
رائف: احر ماعندي ابرد ماعندك، يا أخي اكلك البنيه وصلت للموت لو ماربك سترر وتكول عياره صدك تحجي انت؟!
مهيائيل: صوتك ولككك مو طولت شبرين وكمت تصيح عليه لتخليني ادوس على راسك بالقندرة احترممم.
رائف: احجي بالأول شنو بيها؟
مهيائيل: ذيج فوك وروح اصعدلها اذا عرفت تعال كلي عود.
رائف: راح تموتونييي منين اتلكاهاااا اناااا!!!
مهيائيل: انطوا كلاص مي نشف ريكه، كوم حبيبي نام احسلك.
ترانيم: هاي وحده تصيحك بالباب مهيائيل.
مهيائيل: كليلها عزلنا ماكو سحوره بعد.
ترانيم: ام معتمد اجت.
رفع راسه الها وكأن هذا الأسم ذكره بشي بسرعة كام كلها صعدت لفوك وهو دخلها بغرفته مالت السحر، متحملت ورحت اسمعلهم من وره الباب.
ام معتمد: اعتمادي عليك من بعد الله لو تساعدني لو لا.
مهيائيل: احجي شنو الموضوع؟
ام معتمد: بنتي زوجها مو خوش رجال ابدد وعنده علاقات ويوميه يضربها ويدميها وهي عدها جهال وماريد اطلكها من عنده بداعة العشره والزاد والملح طالبتك لاتكول لا.
مهيائيل: يعني شنو تردين اسوي مثلاً؟
ام معتمد: طاعه وخضوع اريده ينعمي كدامها ويصير محبس بين ايدها.
مهيائيل: ماكدر.
ام معتمد: ليش؟
مهيائيل: هاي الفتره مشغول هوايه اذا تردين بعد شهر ودللي.
ام معتمد: كاعد تنتقم مني؟
مهيائيل: له له له، ليش انتقم وانتِ اجيتيني من محافظه بعيده بس هذا الموجود عندي.
ام معتمد: بذلك الوقت جنت مافتهم وصغيره ليش تاخذ بنتي بذنب اني سويته!!
مهيائيل: وليش دمرتيها ونزلتي دمعتها وحركتي كلبهاا؟
ام معتمد: اعتذر منك واكلك سامحني واذا تريد ابوس رجلك وتقبل، كل ما اروح لكشاف بس ياخذون مني فلوس وميسون شي مروتك بداعة امك لاتردني.
مهيائيل: لخاطر امي بس راح اسويلج عرض.
ام معتمد: موافقه عليه بدون متكوله.
مهيائيل: خليني احجي بالأول لتستعجلين.
ام معتمد: كول اسمعك.
مهيائيل: اريد دفع مسبق.
ام معتمد: سهله هاي تدلل اطلب شكد تريد واني جاهزه من الألف للمليون.
مهيائيل: ماريد فلوس اريد دفع بطريقة ثانيه.
خليت أيدي على كلبي وحسيت بخنكه قويه مكدرت اتنفس ثبتت نفسي بصعوبه واني اسمعها تجاوبه.
ام معتمد: شلون يصير ابني مثل امك انا!!
مهيائيل: هذا الموجود متقبلين تفضلي بره.
ام معتمد: موافقه.
نزلت دموعي معقوله ينطيه كلبه يخوني بسهوله؟
زين وكلامه أو وعده إليه والساحر اللي سحرته جان كل هذا جذب وتمثيل؟!
رجليه محملتني اكثر وانسحبت ماردت اسمع اي شي ثاني، صعدت بصعوبه حتى وصلت للغرفه جسمي كله تشنج ونفسي ضاق فتحت الباب او وكعت، أيدي ماكدر افتحها وسدها والساني ثكل ماكدر انطق اي حرف واكعه على ظهري ودموعي تنزل وصافنه بالسكف، حسيتها آخر لحظات من حياتي، غمضت عيوني مستسلمه نفتح الباب وجت يمي تركض.
ترانيم: عزةة بعيني ولج شصاير بيج منين اتلكاهااا منج من ذيج الثوله من اخوي الاغبر.
ركضت جابت مي وبقت تغسل بأيدي وتمسح على وجهي وتقره ادعيه وتبجي شويه يلا كدرت احرك نفسي ساعدتني وكعدتني ظهري على الجربايه ورجليه مادتها غمضت عيوني تعبانه اريد افز من كل هذا ويطلع حلم أو ارجع لذلك اليوم وحق الله مطلعت حتى لو نبقى بوقتها بدون عشا مستحيل اخاطر ودخل لهيج بيت.
شويه وحسيت بحركه وصوت ترانيم اختفه فتحت عيوني شفته هو، بداخلي غضب وحقد وقهر وحزن والأهم من كلهن خذلان، بأي نظره ممكن أكدر اعبر عن البكلبي بهاي اللحظه ويوصله بدون ماتعب نفسي واشرح؟
اجه تقرب من عندي ونزل لمستواي أيدي ماكدر احركها بصورة طبيعيه دفعته بس مو حيل من مد ايده لازم كتفي، غمضت عيوني من باسني بخدي مسح على راسي وسحبني لحضنه بكُل حنيه ردت ابتعد بس ماكدرت، خانتني دمعتي ونزلت،
العلاقه الزوجيه حتى لو مجانت مبنيه على حب تبقى الخيانات تأثر بيها بجميع انواعها سواء جسديه لو لفضيه لو حتى كلاميه، الموكد الوعود والعهود ليتزوج ويجرح كلب، لأن التصرف حتى لو جان لحظي يبقى تأثيره طول العمر عايش بالكلب مستحيل ينسي.
مخلي راسي على رجله وأيده على شعري، كال بصوت هادئ عكس نار كلبي المشتغله.
مهيائيل: ردت اذلها لا أكثر انتِ وياي من أشهر معقوله ماعرفتي زوجج عدل؟!
ايريم: وليش تذلها وهي مره عجوز؟!
مهيائيل: جانت صاحبه ابوي بأيام الشباب.
التفتت اله صار وجهي مقابيل وجهه وأيده على خدي يمرر اصابيعه عليه.
ايريم: وشنو رجعها هسه؟
مهيائيل: بتها وكعت بمشكله، ربج مايضرب بعصا.
ايريم: بس طلبك غير قانوني.
مهيائيل: ردت انتقم من كل شي عاشته امي بذيج الفتره بسببها.
ايريم: واني شنو ذنبي اعيش هيج شعور؟
مهيائيل: معيشتج شي اللي صار بسبب اذنج التحب سرقة السمع.
ايريم: حقي.
مهيائيل: ومنين بله حقج؟!
ايريم: زوجي مختلي بوحده غريبه وحدهم بالغرفه حقي لو مو حقي من افكر اعرف شنو يسوون سوه؟
مهيائيل: وانتِ يحلوه تغارين؟
ايريم: لاا وليش حتى اغار يعني عادي الموضوع شكو بيها دخل اللي تعجبك شعليه!!
مهيائيل: خوش لعد داده باجر تجيني بتها كتلها ماريد عجايز اريد وحده شابه.
ضربته على بطنه وكمت: سحار شترجه منك.
ضحك بصوت عالي وسحبني لحضنه، ويحجي ويايه بكُل هدوء وحب.
مهيائيل: من بعدج تحرم عليه النسوان كلها ولآخر العمر، هيج كافي؟
ايريم: لا.
مهيائيل: شنو تردين اكثر كولي ومن عيوني دبدب.
ايريم: نوب صرت دبدب.
مهيائيل: كولي هسه شنو تردين؟
ايريم: ماتحجي وي وحده حتى لو جان علمود الخيره.
مهيائيل: اهنا تكليلي بطل سحوره لأن محد مكلبني غيرهن.
ايريم: ليش ماكو زلم تسوي سحر؟
مهيائيل: اكو بس هن الأغلبيه العظمى.
ايريم: اي هذا اللي اريده ماحبك تحجي وي النسوان لسبب أو بدون سبب.
مهيائيل: لهاي الدرجه تغارين حُبحُب؟
ايريم: هاي شنو انوب!!
انت كل دقيقه مطلعلي لقب.
مهيائيل: اي يعيوني الثنين، مقلتاي كبدي وكليتاي، واحشائي، والرئتان والروح وقلبي المجروح، وضلعي، بعد شتردين؟
ايريم: ماكو احبج.
مهيائيل: انتِ حالفه يمين لازم تنكدين عليه اعرفج.
ايريم: كولها.
مهيائيل: ماا.
ايريم: ياااا.
مهيائيل: ههههههههه، سعادتي انتِ بس يمج احس نفسي زعطوط.
ايريم: وحق الله مو صوجك اكوم اولي احسلي.
ردت اكوم سحبني مره ثانيه وجانت قويه وجعني: اخخ على كيفك مو هيج متنتني.
مهيائيل: من اكول طفله ليش مصدكين؟
ايريم: وهسه هاي شدخلها بهاي!!
مهيائيل: بس الأطفال ينمتنون يعيوني.
ايريم: اي عادي يصير خلع نفس الشي.
قرب وجهه من وجهي ويحجي بصوت هادئ.
مهيائيل: اي مو مشكله ارجعه.
جاوبته بنفس النبرة مالته.
ايريم: منو هو؟
مهيائيل: متنج ام السحوره.
ايريم: ياااا هو منو يسوي سحر اني لو انت؟!
مهيائيل: اي صح اني اسوي للعالم بس انتِ سحرج مميز اخذ عقلي بسرعة.
ايريم: حتى تعرف قيمتي وماتركض وره النسوان.
مهيائيل: تعالي دلكي رجليه يوجعني حيل.
ايريم: ليش شبيك؟
مهيائيل: غير جنت اركض وره النسوان.
ايريم: متضحك تره.
مهيائيل: اي مبين خدودج تريد تنفجر وتكول مضحك.
سكت شويه وكال بهدوء: مريتي.
ايريم: نعم.
مهيائيل: نعم الله ضلوعج، اليوم شكد بالشهر؟
ايريم: ليش هذا السؤال؟
مهيائيل: ناذر نذر وأريد اوفيه كولي شكد بالشهر؟
ايريم: 12.
مهيائيل: يعني بعد يومين.
ايريم: المن؟
مهيائيل: متدرين؟
ايريم: اي لا غير تكول.
مهيائيل: مافهمت اي لو لا؟
ايريم: هي هيج طلعت لدقق.
مهيائيل: خوش كومي.
ايريم: وين اكوم؟
مهيائيل: نطلع نفتر ونتعشا ونرجع.
ايريم: شنو المناسبه؟
مهيائيل: مخنوك من البيت وريد اغير جو.
ايريم: تمام خلي نصلي ونطلع.
مهيائيل: راح انزل جوه من تكملين تعالي ورايه.
ايريم: تمام.
صليت وكملت غيرت ملابسي ونزلت البيت هدوء ماكو احد، عائلة مال أشباح يتجمعون بأوقات محدده وطول اليوم ماكو، صعدنا بالسيارة ويسوق بهدوء واني صافنه بالطريق حتى قطع الصمت وهو يحجي.
مهيائيل: اختج شوكت تبدي دوام؟
ايريم: اعتقد بدايه العاشر.
مهيائيل: نجحت؟
ايريم: اي صارت متوسطه.
مهيائيل: هممم.
ايريم: ليش هيج سألت؟
مهيائيل: هيج ماكو شي خطرت على بالي فجأة.
ايريم: خوفي من اليخطر على بالك فجأة، كول شنو شفت؟
مهيائيل: ملاحظه نفسج صايره هوايه تثقين بكلامي؟
ايريم: مو ثقه يعني بس هيج.
مهيائيل: ايي صح صدكت.
ايريم: هسه كول شكو ليش سألت؟
مهيائيل: عمي والله ماكو شي مجرد اجت بعقلي لا أكثر لا اقل، صدك هي شكد عمرها؟
ايريم: دخلت بال15 سنه.
مهيائيل: هممم العمر كله.
ايريم: آمين بس ليش سألت؟
مهيائيل: لحيتي ما اخلص بعد.
ايريم: اي احجي.
مهيائيل: هي تاركه سنه؟
ايريم: اي.
مهيائيل: منعزله وهادئه وكتومه؟
ايريم: اي.
مهيائيل: حسيتي مرت فتره عليها وتغيرت هيج لو هي من الأساس هاي طبيعتها؟
ايريم: من صف الخامس هي هيج.
مهيائيل: هممم.
ايريم: مهيائيل خوفتني شنو الموضوع؟!
مهيائيل: هيج كلام اجه بعقلي، عوفج منه وسولفيلي اكو مره ضعتي بيها وانتِ جبيرة؟
ايريم: هوايه تسألني هذا السؤال ودائماً اكلك ماذكر.
مهيائيل: هممم.
ايريم: وحق الله اكو شي اليوم انت غريب.
مهيائيل: اي جني متلبس بيه.
سكتت عنه عرفت ماكو جواب اخذه من عنده ابد ماطول معند وميريد يحجي، شويه وسمعت صوته يصيحني التفتتله: شنو تريد؟
دار وجهه إليه عاقد حاجبه.
مهيائيل: ليش اني صايحج!!
ايريم: مو هسه صحت اسمي كتلي باوعي؟!
مهيائيل: متوهمه ماكو هيج شي.
فجأة وكفت السيارة بمكان اظلم يشغل بيها متشتغل، نزل من عدها وحاول يشوف وين المشكله لمحت بزونه سوده واكفه على جانب الطريق وتباوع عليه بلعت ريكي وزادت دكات كلبي وبسرعة صحته: مهيائيلللل.
صعد بالسياره وعينه عليه.
مهيائيل: شكو شنو صاير؟
ايريم: بزونه شفتها وشويه خفت.
مهيائيل: اي لتخافين عادي ماكو شي.
ساقها أو وصلنه للمطعم مجنت اشتهي اكل شي بقيت صافنه على الأكل هو عرفني خايفه طلب الأكل سفري وطلعنا للبيت طول الليله مكدرت أنام بقيت افكر بيه شلون سمعت صوته وهو محجه شي اصلاً وهاي البزونه منين اجت وليش تباوعلي بهاي الطريقه؟!
اسأله هوايه مالها جواب ومر اسبوع على هذا الحال كلما اسمع واحد يصيحني اشوف ماكو احد ويطلع وهم لو صوت من عقلي ومهيائيل يكول شي طبيعي ماكو داعي القلق،
كعدت من النوم ملكيته موجود كملت روتيني المعتاد ونزلت خلص نص النهار بشكل طبيعي وممل كالعادة والصدمه جانت وقت الظهر من نفتح باب المطبخ دخل وهو مبتسم بأتساع أو وراه بنيه، حسيت حلكي جف وماكدرت اسيطر على نفسي واكفه اكثر واسند طولي من كال.
مهيائيل: اعرفجن على الفصليه..
يتبع...
البارت اكثر من 4180 كلمه..
اريد تفاعلكم عيناي انتوا حمسوني حتى اكتب، تعليقاتكم بين الفقرات وتصويتكم للبارت شمعاتي..
تصبحون على ألف خير وعافيه..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!