للتواصل انستا zahraaahmedn99
لتنسون التعليق بين الفقرات والتصويت والمتابعه ❤️
مهيائيل
الكاتبة (زهراء احمد)
_________
الموت هو المحطه الأخيرة الغير متوقعه في نهاية القصة..
___
نزلنه اني ومهيائيل نركض شفتها بمنظر يكسر الكلب، كاعده على رجليها والموبايل مشمور يمها ومكابلتها ياسيم وتلطم وتصرخ صرخات تفزز الميت من كبره.
تالين: راحت بنيتي اول فرحتي وشمعت بيتي، راحت ونيستي وكت الضيج والمصبرتني والتسمعني، راحت رويحتي وياها، ياهو يردلي بتي والمكبره حضنتها ولكمم ياهووووو؟؟
ياسيم: يمه على كيفج ليصير بيج شي خلينا نتصل عليهم ونتأكد بلكي ماكو شي.
تالين: شلون يعني ماكو شي هسه اتصلت بيه جوراينهم كالت ضاربها خمس طلقات، كتلها وماتت من عسى بيده الشلل ماتريدها طلكهاا ليش تموت ضنايييي!!
مهيائيل: ميمون شكو؟
ميمون: بلقيس زوجها قتلها.
مهيائيل: ليش؟
ميمون: مادري هيج عرفت من تالين هسه.
مهيائيل: تعال ادفن وصخم وغير الفضيحه الصابتنا ناقصين مصايب احنه ونبتلي بال****.
ميمون: ماتت بعد هذا الحجي مايفيد شوف امها شلون محروك كلبها عليها.
مهيائيل: ايي ربك مايضرب بعصا، ان طال الزمن لو قصر لابد يجي يوم تتسدد بيه الديون ومايبقى حق لانسان الله ماياخذه.
ميمون: صاعد انام تصبحون على خير.
مهيائيل: جاي وراك، يلا مريتي امشينا لغرفتنا خليها تبجي براحتها يجوز مستحيه من عدنه.
ايريم: بس.
مهيائيل: ماكو بس تعالي وياي.
سحبني من أيدي وصعدنا بقيت صافنه بيه إلى أي درجه حاقد عليهن حتى ممهتم لهيج خبر محزن مثل هذا؟
تالين: كومي اتصلي ببوج خلي نروحلها، أريد اموت رجلها مثل ماموت بتي اذا ما ادفنه بصفها مايبردلي كلب.
ياسيم: انتِ بيا حال وتفكرين بالانتقام!!
مو كافي اللي صار بينه بسببججج؟ إلى متى تبقين انانيه ومتفكرين بس بنفسج كوليلي؟ مو خلص على منو تمثلين اللي تردين تستعطفين كلبه اخذ مرته وصعد بدون ميسألج على شنو تلطمين وتصرخين وصوتج واصل لسابع جار، كافي حقد وانتقام وشوفي وين وصلنه، انا اللي دمرت حياتي بسبب تربيتج وذيج بلقيس راح يغطيها التراب، كافيي اذا تعرفين نفسج مو خوش ام ومو حمل مسؤوليه على شنو خلفتي وشمرتي وخليتينه بحضن اليسوه والمايسوه ناس باعتنه برخيص على اللكمه تعيرنااااا ليشششش؟ ليشششش؟ فهميني انا اريدددد افهمممم ليش خلفتينيييييييييي؟ بركبة منوووو اني تاركه دراستي هسه؟؟
ليش ماجريتي أذني وضربتيني وكلتي عوفي بنات الحرام مايفيدنج؟ ليش ماوكفتي بالباب وشفتي وي منو اصعد أو وين اروح؟ ليش مافتشتي موبايلي وشفتي بنتج ليش تسهر للصبحححححح؟ ليش ماصرتي امممممم ليش ماوكفتي بوجهه مهيائيل وكتيله بنتي مازوجها؟ ليش ماسألتيني موافقه لو لا؟ ليش ماشفتج بعقد المحكه؟
وليش بلقيس ماتت؟ مو بسببج؟
أنتِ ام؟
دمرتينا ذيج الراحت لربها وهي زان** عاصيه ربها وباغضته لا من صلاة ولامن صوم لو اني العايشه بس ميته؟ ذنبنا بركبتمن؟
من كالتلج مسويه علاقه ليش ماضربتيها وكلتيلها عدج رجال دره مال الله بيا ذنب تخونه؟
بلحظة عصبيه كتل مرته والله اعلم بيا وضع شافها حتى تخبل هيج عليها، انتوا عائله قذرة ياريت الله موتني بالولادة لو بطنج وماطلعت للدنيا ابد.
طكت ايدها وكامت وداخلها محد يحس بيه غيري، هواي اشوف بيها شبه مني، انا ترانيم اللي نجبرت تتزوج بعمر الطفوله وتعيش أبيت بيه زوج وعيال وتعوف الدراسه وتدمر حياتها، لاعشت الحب ولاتهنيت بشبابي،
واكفه على الدرج من شافتني عبرتني وراحت للغرفه زين يمها مُزن تكدر تواسيها وتشكيلها،
وانا نزلت جوه، بعدها على كعدتها ودموعها تنزل شنو مجانت حتى لو وحده ساقطه طالعه من مجتمع قذر تبقى ام والابن عزيز حيل، كعدت كدامها شهكت وحجت بغصه.
تالين: نازله تشمتين؟
ترانيم: حشاا قضاء ربج مابي شماته، جايه اعزي، البقيه بحياتج.
تالين: وشبقى بحياتي؟
هه كاعد اشوف يوم بعد يوم صنع ربج بيه، عمايلي بالشباب طلعت ببنياتي ربج عاقبني بيهن، حلفت حوبتها ماتعدي وصدك ماعدت داستني دوس وماخلت عظم صاحي بيه.
ترانيم: وتبتي؟
تالين: ماتفيد التوبه ربج شيقبل مني متكليلي.
ترانيم: الله يغفر كل الذنوب لتحجين هيج.
تالين: اني السبب بموتتها، قتلت نفس بريئه تردين يجي يوم وربج يغفرلي؟
ترانيم: على الأقل امشي عدل علمود بنتج المسكينه.
تالين: انا ادري تليد معتدي عليها ولهذا السبب سكتت، العرك دساس ولابد يطلع بالخلفه بيوم وطلع عركي بيهن، ذيج شكد حجيت وياها وعلمتها بس ماتابت رجلها يطلع للشغل يجيب لكمه حلال الها وهي تخونه بنص بيته، على رغم تحملها سنين وهي ماتخلف وبنتي متكبره ومغروره وعمرها كله مارضت بقسمتها وتتبطر على النعمه،
انا السبب وراح ابقى ادفع الثمن طول عمري.
ترانيم: مو انتِ اللي دفعتي الثمن بناتج.
تالين: ترحين وياي؟
ترانيم: بنت العم شلون ماروح.
تالين: خابري دَاسِم ماكدر احجي وياه انا.
خابرته جان طالع وساعدتها تكعد على القنفه وصعدت جبت عبايتي وعبايتها وملابس سود نبدل ونطلع.
___
ايريم: مهيائيل.
مهيائيل: ريحة امه.
ايريم: لا هيج انسه شنو اريد.
مهيائيل: احسن انسي لأن عندي وياج موضوع مهم ناوي افتحه.
مد ايده لخصري ضربته على صدره.
ايريم: صاير فد مره انت!!
مهيائيل: اذا ماصير فد مره وي مرتي ويامن اصير!!
وبعدين كولي ليش تخون من هاي السوالف.
ايريم: صارت بيها خيانه أعوذ بالله بس تريد فرصة وتطفر من يمي، عاد بله انتم الزلم ماتتأمنون.
مهيائيل: اي والله وانتِ مجربه كل الزلم وعرفتي مانتأمن.
ايريم: اكلك.
مهيائيل: كولي.
ايريم: تذكرت شنو ردت منك قبل شويه.
مهيائيل: عبالي راح تتغزلين وتعوضيني الحمدلله على عطيتك ربي.
ايريم: هسه انت ليش تنسيني السالفه خليني احجيها قبل متروح من بالي.
مهيائيل: سولفي داده اسمع.
ايريم: مراح تروح علمود الدفنه؟
مهيائيل: لا.
ايريم: غير هي بنت عمك مايصير ماتروح.
مهيائيل: الأفضل نغطي على السيرة ماريد واحد يعرف بيها ماتت قتل نوب تصير سيرتنا على كل السان وحتى الساقط وابن الحرام هم يحجي بينه.
ايريم: وتعوفهم وحدهم!!
مهيائيل: ميمون راح يروح باجر الصبح وراهم وترانيم راحت وي تونه بعد شكو رايح انا فزعه هي.
ايريم: وياسيم؟
مهيائيل: لو رادت تروح ما منعها.
ايريم: وهيج انتهت حياتها ونغلق دفترها وراحت يم رب العباد.
مهيائيل: وهناك ينسلك ابو ابوها وتعرف الدين حق.
ايريم: لهيج يوم ماعندك نية اتوب؟
مهيائيل: كاعد اشوف توبتي قريبه.
ايريم: اي يا الله، ان شاء الله ربك يهديك.
مهيائيل: وانتِ ماعندج نيه تحنين على هذا المسكين الميته بنت عمه الليله؟
ايريم: احن يعني شسوي؟!
مهيائيل: عندي جفاف عاطفي، رجال مقهور انا واحتاج دعم معنوي شمالج جلف؟
ايريم: أعوذ برب الفلق، اللي يسمعك يكول اني ابد مامبادره من قبل!!
مهيائيل: وين ماذكر.
ايريم: ياااا.
مهيائيل: وجعا بكلب تونه وصاحبتها.
ايريم: وحق الله ناكر انت.
مهيائيل: عيدي الدرس يمكن آخر مره محفظته زين ونسيت عاد انتِ هم داريني رجلج تعبااااااان.
ايريم: اويلي على ابو الطلايب شلون يلوفها لصالحه.
مهيائيل: تعلمي مني الذكاء والنغلله.
ايريم: هاي شنو؟
مهيائيل: كلمه نغل بيها إضافات وتصير وصف يعني الصفه تتبع الموصوف ولغة عربية صعبه اهوو لدققين، رجال حزين انا مابيه حيل اشرح.
سحبني لحضنه تحت أجواء ضحك، وهنا تكتشف الأنسان اللي يموت يترك وراه اما ذكره طيبه ويخلي الناس تبجي عليه وتدعيله وتحزن على فقده أو محد يكول عليه حتى الله يرحمه،
الحياة بيها طريقين ورب الكون خله الأنسان مخير بيهن: اما، أو، وبعد انتهاء هاي الرحله وتصعد روحك للرفيق الأعلى تعرف وتتأكد شكد جانت حياتك قصيرة وحرامات حيللل نضيعها بالركض وره الملذات وناسين ربنا والحساب، ويوم بعد يوم وكلما نفقد شخص هذا درس وتنبيه النه انو دورك قادم جهز الحقيبه متعرف متى تقلع رحلتك من هاي الدنيا،
خليت راسي على صدره اسمع دكات كلبه المنتظمه الداله على دخوله بمرحله عميقه من النوم، صفنت بيه وبسوالفه وأخذت عهد على نفسي لازم اغيره، بالحسنى أو بالاجبار مهيائيل لازم يتوب وهذا قراري مابي رجعه.
فزيت على دكات قويه على الباب كام مفزوع فتحه قابلته بعيون دامعه والكثير من الحزن المرسوم على ملامحها.
ياسيم: اريد اروح لاختي اشوفها قبل ماتندفن.
مهيائيل: اي روحي وي ميمون.
ياسيم: ميمون طالع مو بالبيت وهسه خابرت عمه كالت راح يطلعوها للمغيسل اريد اشوفها الله عليك، احلفك بالسنين الخلصتها بتربيتي لاتحرمني من شوفتها الله لايحرمك من عزيزك.
مهيائيل: روحي البسي عبايه ونزلي راح انتظرج بالسياره.
تغيرت ملامحها للفرحه طارت ركض للغرفه وهو دخل اخذ نفس كمت وكفت يمه احجي بأبتسامه.
ايريم: الوداع قبل الفراق راحه للشخص احسن شي سويته ماحرمتها منه.
جاوبني وهو يمشي بإتجاه الكنتور.
مهيائيل: كسرت خاطري لا أكثر، ذكرتني من ماتت امي الله يرحمها.
ايريم: انت ولد بار بأهلك.
مهيائيل: بأمي بس اما الوالد الله لايرده ماخذ مني بس المسبه عايش وميت.
ايريم: حرام عليك، طاعة الوالدين واجبه حتى لو كفار بعدين تتحاسب عليها.
مهيائيل: داخل اسبح حضري نفسج اخليج يم بيت اهلج حتى نرجع.
ايريم: راح تسوي فاتحه؟
مهيائيل: اكيد نسوي ماطول رايح حتى أكدر الوفها على الناس ومحد يحجي بسيرتنا.
ايريم: الله يحرسك لعد وخلي موبايلك يمك من اتصل بيك جاوبني لتخليني قلقه.
مهيائيل: تدللين كم ايرو عندي انا.
ايريم: وحده حد كطع النفس واذا فكرت تلعب بذيلك اطلك واذبحك.
مهيائيل: عمت عينج تونه ثنينهن مره وحده هسه طلاك بيها باب وجواب بس تموتيني ليش!!!
تخوصرت كايله برفعة حاجب.
ايريم: يعني عندك عادي نطلك!!
ابتسم بستفزاز مجاوبني.
مهيائيل: اي غير انتِ تردين.
ايريم: اي روح الله وياك عود من ترجع تعال طلك.
مهيائيل: ليش مانضرب الفاتحه ونروح هسه؟ حتى وره ماتخلص ادورلي مره تعودت على حياة المشاركه.
ايريم: اي يلا ماعندي شي البس عباتي ونمشي سهله.
خله الخاولي على متنه متقرب مني، أسلوبه لا ارادي قهرني حتى لو جان يحشش المفروض ميحرك كلبي بهاي الطريقة،
وكف مقابيلي كايل بأبتسامه.
مهيائيل: ليش ولج انا أكدر افارك حلوة اللبن؟ بعد ماجبتج لبيتي بطلاع الروح افرط بيج بسهولة!!
ايريم: اي عادي اذا جنت مو مهمه عندك.
مهيائيل: اي بله وبعد؟
ايريم: وعجبتك وحده ثانيه وتريد تطبق الشرع.
مهيائيل: كملي كملي.
ايريم: شكمل خلص اذا تريد ننهي ننهي ماعندي مشكله.
خله ايده على صدره وصاح بألم.
مهيائيل: اخخخ الله.
حجيت مفزوعه واني الزم ايده.
ايريم: شكو شبيك؟
لزم أيدي مثبتها على كلبه.
مهيائيل: عضيتني بكلبي ملعونه.
ايريم: هههههههههه تستاهل.
مهيائيل: يخلص اليوم وانا اعلمج بسيطة.
كملنه كلشي وطلعنه اني رحت يم اهلي وهم راحو للدفنه ماكول غير الله يرحمها ويغفرلها،
فتحت الباب بأبتسامه عريضه وترحيب جبير.
تسنيم: هلا ومية هلا نور البيت بعد بيتي.
ايريم: منور بيج يعيوني، ماكو صوت وين البقيه؟
تسنيم: اختج نايمه تخزن للدوام وأخوج بالشغل وابوج تعرفيه مايرجع لليل.
ايريم: تعالي نسولف مشتاقتلج حيل.
تسنيم: اي نسوي ريوك ونسولف ماعدنه شي.
خلص نص النهار وي امي واستاج اللي اجت يمنه وجه الظهر، دخل من الباب مبتسم والحياة مشعه بوجهه كمت يمه حضنته وسلمت عليه وامي صبت غده بين مايغسل ويجي، كاعد مقابيلي وكل شويه ارفعله بحواجبي حتى كدرت اختلي بيه وره الغده ولزمته تحقيق.
ايريم: منو سعيدة الحظ عرفني؟
أبيل: يمعودة ماكو شي شبيج.
ايريم: علينه والله مبين اكو شي وشي جبير من نظرة عيونك.
ابيل: ماكو شي وداعتج لتفكرين وكليلي شلونج انتِ اخبارج زوجج شلونه وياج؟
ايريم: عوفك مني كلنه بخير وسولفلي عنك.
أبيل: بس ياويلج تحجين.
ايريم: افااا اني من شوكت اطلع سرك؟
أبيل: تحذير واجب كل شي يصير مندري بعدين.
ايريم: اي احجيلي بعد ماتحمل الفضول لعب بيه طوبه.
أبيل: زميله وياي بالشغل.
ايريم: ايي.
أبيل: يمكن بديت انجذب الها.
ايريم: ايي شبيك اسحب منك الحجي سحب كمل موتتني.
أبيل: الصراحه مو هوايه اشوفها بهاي الفتره نقلوني لغير قسم بس ماخلي يومي يعبر بدون ماكحل عيني بيها.
ايريم: وليش متعترف الها شمنتظر؟
أبيل: مادري اخاف اصارحها وترفضني.
ايريم: لتحجي هيج جرب بالأول متدري يجوز تطلع نصيبك.
ابيل: ويجوز مو هي، ماريد كلبي ينجرح ويتأذه احسن شي اترك الأمر لرب العالمين ونشوف وين تصير تاليها.
ايريم: وبلكي راحت من ايدك.
أبيل: ربج ما قاسمها.
ايريم: معناها هذا مو حب، تحب تشوفها ويومك مايعبر بدون ماتلمحها ميدل على حب انت معجب بيها لا أكثر مع الايام تستوعب كلامي وتتأكد من عنده صح.
ابيل: صايره تفهمين بهاي الأمور السحار خوش علمج.
ايريم: كلما تتقدم بالعمر تفهم اكثر طبيعة الأنسان هيج.
أبيل: شخبار حماتج؟
ايريم: منو بيهن ياسيم؟
ابيل: ما اعرف هاي الجبيره يمكن ترانيم هيج اذكر كلتي.
ايريم: اي خوش بنيه وحبابه ونادره ودره مال الله.
أبيل: هاي شبيج تره ماخطبتها.
ايريم: غير امدح بيها كدامك يجوز ناوي.
أبيل: لتخافين ماناوي معجبتني اسلوبها كلش مو حلو، السانها طويل، وصريحه حيل.
ايريم: وهذا احله شي بيها تدري مهيائيل مخليها قائدة البيت محد يكدر يحجي كلمه بوجودها.
أبيل: حقهم يخافون متلزم هاي.
ايريم: تره أكلها.
أبيل: قابل مجذب شسوت بينه بالمستشفى الا شويه مفضوحين.
ايريم: هههههه فد متتت ضحك من حجتلي، مخططه هي.
أبيل: على اخوانها عليمن تطلع.
ايريم: يله اعوفك تنام اخذ راحتك حبيبي.
ايام تمر على الأنسان بهدوء تام لا مشكله ولا مصيبه ويمكن هذا مايسمى الهدوء قبل العاصفة، مر الجزء الأول من السنه براحة وسعادة، موت بلقيس غير هوايه أمور وتأجلت اشياء، مر ست أشهر كاملين ولأن تليد اجه تعارك وياهم قرروا يقطعون الحزن ويزوجوهم بس بهدوء بدون عزومه من الصالون لبيت الزوجيه كسرت خاطري الصراحه مفرحت ابد مثل الفصليه والفرق ثوبها ابيض.
___
تليد: حياج الله بجحيمج بت تالين.
رجفت اوصالي أول مخله مهيائيل أيدي بأيده حسيت نفسي نقطع عنها الهوه ودخلت لجهنم من أوسع ابوابها واني السبب بكل شي يصير وياي بهاي اللحظة، اني مثل الفصليه، لا زفه ولاحنه ولاصفكه من بيت اهلي للصالون لهنا حتى امي ما اجت وياي، على شنو اتعاقب واني من الأساس مظلومه؟!
شمر عليه المخده وكال بصوت حاد.
تليد: الخدم مكانهن جوه الرجلين وهذا مكانج منا وجاي وراوي اهلج ابن الساقطه شنو يسوي بيكم.
نزلت دموعي مسحتها وكمت بوجهه بعصبيه شنو فايدة الخوف اذا هي الروح وحده وربك يحدد شوكت تروح يمه.
ياسيم: الله خالق الناس جنسين بس الذكور والأناث والله بقرآنه كال الإناث ضعيفات ولازم الرجال يحترمهن، بس اذا جان الرجال غير محترم بهاي الحاله شلون تكدر المرأه تحترمه؟!
اجاني كف دار وجهي للجهة الثانيه، التفتتله مبتسمة وكملت بتعالي: ضرباتك لاشيء لإنسان ميهمه اي شي بعد،
انا جتال روحي منين اجيب الثار، وانا الوصلت نفسي لهذا المستنقع وصاروا الأسياد ينضربون من الخدم.
تليد: اليوم اخليج تمسحين قندرتي بثوب العرس وراويج الخدم الأصليه منوووو بنت ال**** يا*****.
سحلني من شعري شامرني بره الغرفه قفل الباب بوجهي الجو بيه نسمة برودة بداية الثالث وهم بيتهم بنايه قديمه ومرطب متتت حضنت نفسي وعيوني تصب وحدها اريد اسكتها ماكدر، داريت شهكاتي وصبرت نفسي يجي يوم ورب العالمين يساعدني ماتبقى هيج،
مرت فتره طويله ونفتح الباب شافتني امه اجت يمي تحجي بقلق.
حميدة: شبيج عيني ليش كاعده اهنا؟
ماعرف بشنو اجاوبها وهي من شافت حالتي لزمت أيدي مكومتني يمها للغرفه وبقى هذا حالي تقريباً سبوعين اطلع اشتغل ونظف واطبخ ورجع للغرفه يم مُزن اصلاً هي والأم ينامن بنفس الغرفه واني صرت ثالثتهن.
___
ترانيم: تتقيأين من الصبح لحد الآن حتى للجامعه مرحتي خلي اخذج للمستشفى فدوة لكلبج.
جاوبتها بتعب واني أسند نفسي عليها.
ايريم: مابيه شي لتشغلين بالج.
ترانيم: وجهج جنه ليمونه صاير، شلون يعني ما اشغل بالي!!
ايريم: شويه وصير زينه مابيه شي والله.
ترانيم: ولج بس لاحبله؟
ايريم: لاا.
ترانيم: شمدريج حللتي؟
ايريم: ادري ادري، خليني انام شويه وحبابه لتكعديني راسي يريد ينفجر.
ترانيم: والعباس سالفتج مو خاليه اني من شفت ذني الجحشات نجمعن مره ثانيه غسلت ايدي.
ايريم: لتاخذين غيبه حرام يجوز اكلت شي وتسممت.
ترانيم: رجلج الشفيه ماكو خبر عنه؟
ايريم: باجر يرجع.
ترانيم: شوكت خابرج؟
ايريم: الصبح.
ترانيم: راح اخابره انا وشوف،
الووو.
مهيائيل: هلا.
ترانيم: شبيك تحجي من وره خشمك؟
مهيائيل: صايره مشكله يمي بالشغل مو مهمه كوليلي شنو الموضوع؟
ترانيم: شوكت تجي؟
مهيائيل: باجر العصر يمكن.
ترانيم: تكدر تجي هسه؟
مهيائيل: ليش شنو صاير؟
ترانيم: ما راح أضم عليك مرتك صارلها يومين لا تأكل ولاتشرب وبس تتقيأ ماعرف شنو بيها.
مهيائيل: رائف وين؟
ترانيم: ملتهي بزُمردة من عقد لحد الآن ساكن المستشفى.
مهيائيل: هسه اتصل بيه يجي ياخذكم للدكتور، انطيني أياها شويه اريد اسمع صوتها.
ترانيم: شوكت لحكت تشتاق عيوني الصبح تحجي وياها!!
مهيائيل: اني مشتاق وهي يمي شتحجين انتِ.
ترانيم: قبل متنزل على الترابي هاك مرتك انا مره جفافي صاعد وماتحمل غزل.
مهيائيل: ولاتوبين.
ترانيم: طالعه على ابوك دمي حامي.
مهيائيل: قصدج مستهتره.
ترانيم: ديلا هاك مرتك.
مهيائيل: الوو.
ايريم: الو.
مهيائيل: شبي صوتج تعبان؟
ايريم: مادري هيج من وحدي.
مهيائيل: روحي للدكتور جيكي وضعج راح احاول ارجع من وقت باجر اريد اشوفج بكامل صحتج سامعتني؟
ايريم: الله كريم.
مهيائيل: ايريم.
ايريم: همم.
مهيائيل: باباتي بيج شي؟
ايريم: حاسه بتعب وخمول وراسي حيل يأذيني ومعدتي ماعرف شبيها.
مهيائيل: مصخنه؟
ايريم: لاا.
مهيائيل: تصافن؟
ايريم: اول مارحت.
مهيائيل: بس ارجع العن ابهاتهن مايتوبن ذني ال****.
ايريم: معليهن هن بمرضي.
مهيائيل: اي مبين معليهن هل الساقطات ادري بيهن يموتن على تدمير حياة العالم.
ايريم: بداعتي مهيائيل.
مهيائيل: يروح مهيائيل انتِ ومفتاح كلبه.
ايريم: وقفله هم لتنسى.
مهيائيل: ابقي سولفي وياي صوتج دوه لروحي.
ايريم: واذا مليت؟
مهيائيل: ماكو وأحد يمل من صوت نبضات كلبه.
ايريم: هذا كله لان مريضه؟
اذا هيج ابقى طول العمر بالفراش.
مهيائيل: ماكو هيج حجي بس ارجع اسويلج شبيك لبيك ونحلت فضت.
ايريم: مشتاقتلك.
مهيائيل: اويلي يابه العن والديج تونه حركتي عشيرتي كلها من الشمال للجنوب.
ايريم: هههه، مبين مامشتاق انت.
مهيائيل: وبله شلون فهمتيها هاي؟!
ايريم: باقي اهناك اسبوع كامل بدون ما تسأل على مرتك.
مهيائيل: ملعونة الصفحه منو اربع وعشرين ساعه فاتح وياج كام؟
ايريم: وين الكام وين الحقيقيه؟ تعالي اريدك يمي.
مهيائيل: هسه شلون تريدني اعوف الشغل ونعل والديه وروح يمها بطياره.
ايريم: اذا تكدر تعال.
مهيائيل: ايرو بيج شي؟
ايريم: اريد اشوفك.
مهيائيل: حبيبي صاير شي؟
ايريم: حلوه هاي حبيبي.
مهيائيل: بعدني ولج مامعترف ابقي انتظريني على الأقل اكولها بالأول.
ايريم: هههه، ماكو داعي تنطقها اني اقراها بعيونك من تباوعلي.
مهيائيل: فديت كلبج يابعد كلبي وغراضه.
ايريم: يسلملي كلبك عزيزي، راح انام نعسانه ومن اكعد اتصل بيك.
شمرت الموبايل لأن لعبت نفسي حيل كمت سريع للحمام تقيأت لدرجه حسيت جسمي تعب ونتفض وكمت ارجف ماكدر ابقى ثابته بمكاني، انتبهت اكو دم بالمغسلة رفعت راسي للمرايه شفت وجه ثاني غير وجهي، اصفر وتعبان ومشحوب حيل واللي جوه عيوني ازرك مو اسود حسيت هاي ايامي الأخيرة، اجتي يمي ساعدتني وصلت للجربايه وشمرت نفسي ونعاد نفس المقتل،
سواد حالك، مكان مجهول أو اصوات صريخ أو واحد يصيح بأسمي من بعيد ماكدر اركز مثل الشخص التايهه بدون عنوان بقيت امشي إلى المجهول فجأة بدوم سابق انذار شفته واكف من بعيد رحت يمه بخطوات سريعه وكلما اقترب يزداد السواد والخوف والأصوات من حواليه ويبتعد عني أكثر، صوتي اختفى وماكدر اصيحه،
واني اركض ناحيته سمعت صوت بزونه درت وجهي لكيتها واكفه قريب مني عيونها سود قاتمه وصايره خط واحد طفرت بوجهي واني فزيت.
ترانيم: اسم الله الرحمن، هاج اشربي مي وأخذي نفس على كيفج هدي.
حجيت واني اسحب نفس كوه.
ايريم: سحر.
ترانيم: شنو؟
ايريم: مسوالي سحر.
ترانيم: هي مبينه ادري بيهن مايكعدن راحه، بس شلون عرفتي؟
ايريم: مهيائيل مخليلي جني كايم يحجي بأذني مرات.
ترانيم: لا هاي هي ربحنه.
ايريم: صدكتي؟
ترانيم: وضعج مو مال واحد يضحك.
ايريم: صارت بيه نفس الحاله من خطبني هسه زين أكدر أسولف واتحرك المره الفاتت نشليت بالكامل.
ترانيم: بس مهيائيل ماسوالج سحر.
ايريم: شلون يعني؟!
ترانيم: مجان سحر وانما جني.
ايريم: فهميني تره اني من وحدي مسطوره.
ترانيم: شوفي اني التفاصيل ماعرف بيها بس اللي اعرفه جني مو سحر اللي خلاج تنشلين واحتمال جبير مهيائيل مجان السبب.
ايريم: لتخبليني شلون يعني مهيائيل ما اله أيد بالسالفة!!!
ترانيم: تذكري عدل شنو صار وياج بذيج الفتره؟
ايريم: ماكو شي مهم حياة عاديه، بس لحظه تذكرت عمتي هي اتصلت بأمي علمود اروح اجيب من يمها خبز وهوايه لحت عليه اكعد يمها وشرب عصير معقوله!!
ترانيم: والله كل شي توقعي صرت ما اثق بالعالم منا لهنا.
رجعت راسي على المخده مغمضه عيوني، جني وسحر شوكت اخلص من هذا الهم؟
ويكلولي حياتج سعيدة ومحظوظه بزوج يحبج ومحتويج ويدافع عنج أو لو يدرون شنو موجود داخل هذا البيت العايشه بيه يحمدون ربهم الف مره على حياتهم الطبيعية،
أصعب شي بالكون من تتمنى تعيش بدون تفكير ويخلص اليوم بدون مصيبه، اني هنا عايشه بداخل جحر وكل الافاعي بيه سامه ومتدري شوكت تهجم عليك وتلدغك،
التفتت للجهه الثانية واحارب حتى ما انام لان بس تغمض عيني ادخل بسلسله من الكوابيس الماتنتهي.
___
زُمردة: اريد افتهم شغله وحده انت ماعندك شغل ابدد؟!
رائف: انتِ شغلي ومشاغلي وروحي وراحتي وكياني وحياتي كلها من البدايه للنهاية.
زُمردة: مانطيك شي تره.
رائف: كافي اشوفج كدام عيني يانظر عيني.
زُمردة: تعال افحصك بما انو انت بالمستشفى اشوفك مصخن لو لا.
رائف: تعالي قيسيها بأيدي بدون فحص.
زُمردة: مو عرفتك سالفتك مو خاليه تعلمني بدروبك.
غمزلي وكال.
رائف: بس بشرفج مو حلوه؟
زُمردة: لا مو حلوه يوميه الدكتور مرزلني بسببك.
رائف: خلي نزوج لعد ونعيش بنص عشنا السعيد ونتسامر ونسولف للصبح.
زُمردة: بشنو نسولف هي بقت سالفه محاجيناها؟
رائف: اي.
زُمردة: شنو هي؟
رائف: المخدر شلون يأثر بالإنسان؟
زُمردة: ابرة بالوريد لو عن طريق الأنف، ليش تريد تجربه؟
رائف: وانا شبيه اخدر من اشوفج معقوله نظرة عيونج مخدر؟!
كال هاي الجمله وغمض عيونه متقرب مني دفعته وحجيت بأبتسامه.
زُمردة: لأنك مستخف واذا ماطلعت هسه منا ألم عليك العالم واكلهم متحرش.
رائف: وتقبليها خطيبج حبيبج يتعرض لهيج موقف مهين؟
زُمردة: اذا جان بدون أخلاق مثلك يستاهل.
رائف: جا غير احبج شمالج ساده الطريق بقواطع من حديد؟
زُمردة: نزوج والله كريم بعدنا اني وياك على البر.
رائف: زين خلي نطلع نتعشا بره.
زُمردة: قبل الزواج نوو.
رائف: تعالي لبيتنا اعزمج غده.
زُمردة: قبل الزواج... قاطعني مكمل.
رائف: نووو ادري حافظها منج انا، منك لله مهيائيل كله صوجك ماكو عرس حتى تتخرج طيحت حظي،
اهااا على ذكره اتصل، الووو معذب فؤادي قاطع افراحي وسعادتي شرايد؟
مهيائيل: بطل دياحه يم كوكب سبيستون ورجع للبيت ايريم مريضه جيبها للمستشفى.
رائف: مخابيل احنه نروح منا اني وهاي الحلوه ونفحصها ونسوي اللازم تدلل.
مهيائيل: شحجيت؟
رائف: رايح رايح ها اهاا، تأمر بشي بعد؟
سده حتى ماسمع مني تبقى طول عمرك ناكر للمعروف وجاحد.
زُمردة: شكوو؟
رائف: مرت الأخ مريضه.
زُمردة: ايريم؟
رائف: اي نعم، وراح اروح اجيبها علمود نفحصها ديري بالج على نفسج لتنجرحين وتتأذين واني ماموجود.
باسني بجبيني وراح بقيت اباوع على ظهره سحل كلبي سحل وجبرني احبه بس اعتراف قبل الزواج نووو.
___
ترانيم: ايريم كاعده؟
ايريم: ايي.
ترانيم: كومي نروح للمستشفى بلكي يشوفون شنو بيج وترتاحين من الألم.
ايريم: علاجي يمه من يجي اني أطيب.
ترانيم: ليش تعاندين ياعيني؟
ايريم: انا وانتِ نعرف عدل البيه مو مرض بعد على شنو الخساره والروحه للطبيب، أريد انام ترانيم نعسانه حيل.
ترانيم: خلصتيها بس نوم مايصير هيج كومي ننزل جوه تغيرين جو ونكعد نسولف مثل قبل.
ايريم: مابيه حيل.
ترانيم: والحل؟
ايريم: ماكو حل.
ترانيم: نازله اذا احتاجيتي شي صيحيني.
ايريم: همم.
عفتها وطلعت صار بوجهي يصعد على الدرج وقفته.
ترانيم: اريدك بشغله.
ميمون: اسمع.
ترانيم: مو هنا تعال وياي لغرفه السحر.
دخلنه وسديت الباب وكلت: اريدك تاخذ خيره لأيريم.
ميمون: ليش شبيها؟
ترانيم: صار يومين مو على بعضها لاتاكل ولاتشرب ومخلصتها بس نوم وتحلم بكوابيس.
ميمون: لازم نكشف عنها.
ترانيم: كشفيش؟
ميمون: اخذلها خيره عقلج وين راح؟
ترانيم: معليك بعقلي اريدك تحجيلي شنو بيها.
ميمون: شسم امها؟
ترانيم: تسنيم.
فتح القرآن وكال بعد مصفن بيه شويه.
ميمون: هاي البنيه مسوالها عمل اكثر من مره وكثرت الأعمال تأثر بشكل تام على الجسم حتى لو نفتحن تبقى كئيبة والاحلام تجيها مرات، والمسويلها اكثر من واحد، وبعيد عن هذا الأمر هي ممسوسه، ضايعه وهي صغيرة وجان وقت مغرب فمتلبس بيها جني وبعده لحد الآن موجود.
ترانيم: شلون يعني؟
ميمون: هذا الموجود وكاعد اشوفه، حجتلج مره عن طفولتها؟
ترانيم: لا.
ميمون: فاقده الذاكره هي ماتعرف شي عن الماضي وفقدان الذاكره مربوط بسر اذا نعرف مصيبة وكتمانه مصيبه وبكل الأحوال ممطول راح ينفضح.
ترانيم: شنو من سر؟
ميمون: ماعرف.
ترانيم: افتح السحر لعد.
ميمون: ماكدر افتحه مسوه بالمكبره.
ترانيم: تعرف منو مسويه؟
ميمون: كاعد اشوف نسوان ثنين.
ترانيم: مرتك وتالين.
ميمون: مو مرتي.
ترانيم: منو لعد؟
ميمون: ما ادخل بخطيت الميت بس هاي بلقيس.
ترانيم: الله لايرحمها، والحل؟
ميمون: تالين تعرف وهي مايكدر الها غيره خلي يجي ويحلها.
ترانيم: تنحل؟
ميمون: كاعد اشوفه ينفتح لتخافين ترجع لصحتها وتدخل بمصيبة ثانيه، هاي البنيه طريقها اسود اظلم.
ترانيم: اي طبعاً يصير اسود وجير هم ليش هي مكابله منو.
ميمون: طريقها اسود من الطفوله مو بسبب مهيائيل وهذا الزواج.
ترانيم: لتكلي مهيائيل يعرف كل شي قبل مايزوجها.
ميمون: صح مهيائيل كل شي يعرف، وتعرفيني اذا حجيتي شي كدام احد اركعج بسحر وأنا ماحسب احساب الخوه مو مثله.
عفته وطلعت وانا مصدومه صدك بيت شياطين، شنو مضموم اكثر بعد بيه وما عرفنا؟
___
بين صحوه وغفوه اسمع واحد يهمس بأذني، ساعه صوت ترانيم تحجي وي ياسيم وساعه صوت مهيائيل يصيح على ميمون، أريد افتح عيوني ماكدر، شويه وصار ضوة قوي بعيني وسمعت صوت الشباك نضرب وبزونه قريبه مني، كمت مفزوعه مجان حلم لان الشباك مفتوح من صدك،
ضوه القمر مسوي نور بالغرفه شفت خيال يمشي يم الحمام نرعبت حرفياً وكمت اصيح بصوت ناصي:
مهيائيل وينك خايفه،
نزلت دموعي هسه بيا ذنب اني هيج اعيش؟
مشتاقتله بنفس الوقت احس نفسي كارهته بدون سبب اريده وما اريده حرت وحتاريت وماعرف الحل شنو،
رعب مو طبيعي وماكدر ابقى بالغرفه واخاف اطلع بره كعدت بمكاني وحضنت رجليه لصدري وكمت ابجي ودعي بداخلي تعدي الليله على خير،
كاعده وعيني ما ارفعها لفوك ماريد اشوف شي وابقى خايفه للصبح وماكو احد يمي يواسيني، فزيت على فتحة الباب سكنت وضميت نفسي اكثر، حسيت بأيد انمدت عليه كمزت من مكاني، شفته والدم رجع يمشي بجسمي اجيت اركض لحضنه تغيرت ملامحه بعيني وصرت اشوفه بوجه خنزير وبمكان ما استقبله بالاحضان دفعته صارخه.
ايريم: اطلععععع برةةةةة ماريد اشوفك اطلعععععع.
تقرب من عندي ركضت عنه مبتعده: ولججج ترانيمممممم الحكيلي وخرييييي عنيييي ماريدةةةةةة.
كامت تضرب بنفسها وتسحب بشعرها وتلطم خدودها وتخرمشهن من شفتها هيج متحملت ورحت يمها حاضنها.
مهيائيل: اهدي، اهدي، كافي لتضربين نفسج، طالع بس اسكتي ماشي.
ايريم: وخرررررررر كتلك وخررر لاتلزمني، ولجججج ترانيمممممممممم.
مهيائيل: هاي هي وخرت شوفي مو يمج، بس كافي ايدج لتضربين نفسج هيج فدوة اروحلج لتصوبين كلبي وتعبينه.
ايريم: روح مني اكرهكككك ماريدككككك.
مهيائيل: ميت ولا كلمتج هاي، بس يله معذوره ادري مو من كلبج.
طلعت مايهون عليه اعوفها وحدها بس المسحور بالعادة يشوف اشياء غير الواقع، السحر أو الجن الموكل بالسحر مالته يخليه يشوف غير صور مثل حالتها هاي،
رحت دكيت الباب طلعتلي.
ترانيم: ها خويه رجعت الحمدلله على السلامة.
مهيائيل: روحي يمها لا تخليها وحدها.
عافني وراح اني هم ركضت الها مبين وجهه متعوب، دخلت وشفتها الوجه احمر وجسمها يرجف مثل السعفه شعرها مخربط وتكول نفس الكلمه:
وخروا عني ماريده،
منظرها وحده كسر كلبي رحت يمها مخليه راسها على رجليه بقيت العب بشعرها حتى غفت هو دخل اجه يمشي بهدوء نزل لمستواها وباسها براسها وبشفتها ودمعته نزلت بسرعة مسحها، رفع راسه إليه والغصه مبينه بصوته.
مهيائيل: راح اشيلها كومي رتاحي بغرفتج اخذتج من نص نومتج، بس الوضع جبرني.
ترانيم: ازعل عليك والله لاتكمل، الخوه المن موجوده اذا ما اوكف وياك بوقت حاجتك، بعدين ايريم بنتي واختي الصغيرة ما مقبول اعيفها بهيج وضع.
مهيائيل: ماتقصرين اعرفج كلج واجب.
اخذها من حضني لحضنه، ثنينهم متعوبين والدنيا لاعبه بيهم جقلمبه وشلون صاروا قسمت بعض، الله يجبر بخاطرهم ويحفظهم ويبعد عنهم العين والحسد والسحر.
عفتهم ياخذون راحتهم وطلعت تعبانه ونعسانه بس يانوم يجيني وهم بهذا الوضع.
صار الصبح فزيت على صوت ضربه بالكنتور ماعرف شنو اخذ وطلع كمت وراه بتعب جسمي مكسر عبالك مطلعيني عماله بالحلم، رحت يم المرايه صافنه على وجهي وشلون احمر ومزلغ، تذكرت البارحه وشنو صار فجأة رجعلي عقلي وستوعبت الأمر ردت اطلع اعتذر من عنده صار بوجهي داخل والشرار من عيونه لو يطلع يحركني...
يتبع..
البارت اكثر من 4340 كلمه..
تفاعلكم صاير ميسوي واهس تردون محبه لو طاعه👻..
لتنسون التعليق بين الفقرات والتصويت والمتابعه..
تصبحون على الف خير وعافية..
لأي شي يخص القصه تعالوا يمي انستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!